#Local_News
Published - 26 July 2022

မြန်မာ့လူဦးရေ(၅)သန်းကျော်မှာB ပိုး၊ C ပိုး အပါအဝင် အသည်းရောင်ရောဂါတွေရှိနေပြီး ရောဂါရှိမရှိ အခမဲ့စစ်ဆေးပေးသွားဖို့ရှိတယ်လို့ မြန်မာအသည်းဖောင်ဒေးရှင်း ဥက္ကဌဒေါက်တာ ဒေါ်ခင်ပြုံးကြည်က ပြောပါတယ်၊၊

#Yangon_Media_Group

#Local_News
Published - 26 July 2022

ပြည်တွင်းရွှေဈေးကွက်တွင် ဖြစ်ပေါ်နေသည့် ၂၃သိန်းကျော်ပေါက်ဈေးသည် ဈေးကစားကြသူများ၏ လုပ်ရပ်ကြောင့်သာဖြစ်ပြီး ထွက်ပေါ်နေသည့်သတင်းများမှာလည်း အမှန်မဟုတ်ပဲ ကောလဟာလများသာဖြစ်ကြောင်း ရန်ကုန်တိုင်း ရွှေလုပ်ငန်းရှင်များအသင်း ထံမှသိရသည်။

ကမ္ဘာ့ရွှေဈေးကျနေသော်လည်း ပြည်တွင်းရွှေဈေးကွက်မှာ ဈေးမကျဘဲ ဈေးအမြင့်ပိုင်းဖြင့် အရောင်းအေးနေကြောင်း ယင်းမှ သိရသည်။

ကမ္ဘာ့ရွှေဈေးဟာ တစ်အောင်စကို ၁၇၂၇ (အမေရိကန်ဒေါ်လာ)ရှိနေချိန် ပြည်တွင်းရွှေဈေးနှုန်းဟာ သိန်း ၂၀၊ ၆ သောင်းရှိနေသည်။

ဒေါ်လာဈေးနှုန်းမြင့်တက်လာတာကြောင့် ပြည်တွင်းရွှေဈေးနှုန်းကလည်း ယခုလို ဈေးတတ်လာရခြင်းဖြစ်သည်။

ကိုဗစ်ကာလနောက်ပိုင်း ရန်ကုန်ရွှေ ဈေးကွက်ဟာ လေးပုံတစ်ပုံသာ အရောင်း အဝယ်ရှိနေပြီး လုပ်ငန်းအချိုသာ ပြန်လည်ပတ်မှုရှိနေကြောင်း ယင်းမှသိရသည်။

ရန်ကုန်ရွှေအသင်းအနေနှင့် မီးလင်းရွှေအတုံး အခဲအရောင်းအဝယ်ပြုလုပ်သူများကို လိုင်စင်ပြုလုပ်ထားကြရန် ပြီးခဲ့သည့် မေလ ၁၈ ရက်က အသိပေးပြောကြားထားပြီး လိုင်စင်မရှိသည့် ရွှေဆိုင်များကိုလည်း ရွှေအရောင်း အဝယ်လိုင်စင်ပြုလုပ်ကြရန်ထုတ်ပြန်ကြေညာထားသည်။

ymg/NN
#Yangon_Media_Group

#Local_News
Published_26 July 2022

အမေရိကန်နိုင်ငံက မြန်မာနိုင်ငံကို ခရီးမသွားသင့်တဲ့ နိုင်ငံ Level 4: Do Not Travel အနီရောင်အဆင့် သတ်မှတ်လိုက်တာကြောင့် ခရီးသွားလုပ်ငန်းမှာ ထိခိုက်သွားမယ်လို့ လုပ်ငန်းရှင်တွေက ဆိုပါတယ်။

#Yangon_Media_Group

#LocalNews
Published _ 26 July 2022

အာဆီယံအထူးသံနှင့် ဒေါ်အောင်ဆန်းစုကြည် တွေ့ခွင့်ရမည်ဟူသော သတင်းများအပေါ် နိုင်ငံရေးတွင်မဖြစ်နိုင်တာမရှိဟု ဗိုလ်ချုပ်ဇော်မင်းထွန်းက သတင်းမီဒီယာများအား ယနေ့ ဇူလိုင်လ ၂၆ ရက်က နေပြည်တော်၌ပြုလုပ်သည့် ၁၈ ကြိမ်မြောက်သတင်းစာရှင်းလင်းပွဲတွင် ပြောကြားလိုက်သည်။

ကမ္ဘောဒီးယားအခြေစိုက် ဖနွမ်ပင်ပို့စ် သတင်းတွင် ဒေါ်အောင်ဆန်းစုကြည်နှင့် အာဆီယံအထူးသံတမန် လည်းဖြစ်ဖြစ်၊ ကမ္ဘောဒီးယားနိုင်ငံခြားရေးဝန်ကြီးလည်း ဖြစ်သော ပရက်ဆော့ခွန်တို့ တွေ့ဆုံခွင့်ရရန် အလားအလာကောင်းများ ရှိနေကြောင်း နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ကတိပြုလိုက်ပြောကြားလိုက်သည့် သတင်းနှင့် ပတ်သက်၍ သတင်းမီဒီယာ၏ မေးမြန်းချက်အပေါ် ယင်းက အထက်ပါ အတိုင်းပြောကြားလိုက်ခြင်း ဖြစ်သည်။

"ဒီကိစ္စနဲ့ပတ်သက်ပြီး ပထမဆုံးပြောလိုတာက နိုင်ငံရေးမှာ မဖြစ်နိုင်ဘူးဆိုတဲ့ ကိစ္စမရှိပါဘူး၊ အာဆီယံအထူးကိုယ်စားလှယ်ရဲ့ပြောကြားချက်အပေါ်မှာ သီးခြားမှတ်ချက်ပေးစရာတော့ မရှိပါဘူး"ဟု ၎င်းက ဆိုသည်။

အာဆီယံအထူးကိုယ်စားလှယ်အနေဖြင့် လာမည့် စက်တင်ဘာလ ၁၃ ရက်တွင် အမေရိကန်နိုင်ငံ နယူးယောက်၌ ပြုလုပ်မည့် ကုလသမဂ္ဂအထွေထွေညီလာခံ မတိုင်မီ မြန်မာနိုင်ငံကို သွားရောက်နိုင်ရန်မျှော်လင့်ထား‌ပြီး ဒေါ်အောင်ဆန်းစုကြည်ကိုတွေ့ခွင့်ရှိပါကနိုင်ငံအတွင်းဖြစ်ပွားနေသည့် အကြမ်းဖက်တိုက်ခိုက်မှုများ အဆုံးသတ်နိုင်ရေးအတွက် ကြိုးစားဆောင်ရွက်မည် ဖြစ်ကြောင်းလည်း အဆိုပါသတင်းဌာနကို ပြောကြားထားကြောင်း သိရသည်။

အာဆီယံအထူးကိုယ်စားလှယ် ပရက်ဆော့ခွန်အနေဖြင့် မြန်မာနိုင်ငံသို့ နှစ်ကြိမ်ရောက်ရှိပြီး ဖြစ်သော်လည်း ဒေါ်အောင်ဆန်းစုကြည်နှင့် တွေ့ဆုံခွင့် မရခဲ့ပေ။

ymg/NN
#Yangon_Media_Group

#Local_News
Published _ 26 July 2022

Kaung For You စာသင်ကြားမှု အစီအစဉ်မှာ ပါဝင်သည့် ဆရာ၊ ဆရာမများနှင့်ငွေကြေးထောက်ပံ့မှုများမှာ ပူးပေါင်းပါဝင်ဆောင်ရွက်ရန် ကျန်ရှိသည့် အဖွဲ့အစည်းများ၏ စာရင်းအား အသေးစိတ်ရရှိပြီးဖြစ်ကြောင်း နစကမှ ထုတ်ပြန်ထားရှိသည်။

Kaung For You မှာ စာသင်ခဲ့သည့် ဆရာ၊ ဆရာမများ ဥပဒေဘောင်ထဲ ဝင်ရောက်ကြရန် ထုတ်ပြန်ချက်တစ်စောင်ကို နိုင်ငံပိုင်သတင်းစာမှတစ်ဆင့် ထုတ်ပြန်ကြေညာခဲ့ပြီး Kaung For You ကျောင်းရဲ့ စာသင်ကြားမှု အစီအစဉ်မှာပါဝင်သည့် ဆရာ၊ ဆရာမများ၊ ငွေကြေးထောက်ပံ့မှုများ ပူးပေါင်းပါဝင်ဆောင်ရွက်နေသည့် အဖွဲ့အစည်းများ၏ စာရင်းအားရရှိထားပြီးဖြစ်ပြီး ပါဝင်နေသည့် ဆရာ၊ ဆရာမများကို ဆက်သွယ်သတင်းပို့ရန် ထုတ်ပြန်ခဲ့တာဖြစ်ကြောင်း သိရသည်။

ယင်းအပြင် ယခုလို သတင်းပို့ ဆက်သွယ်လာသူများကို သတ်မှတ်စည်းကမ်းများနှင့်အညီ အေးချမ်းစွာနေထိုင်ရေးအား အာမခံချက်ပေးသွားမည်ဟု ထုတ်ပြန်ခဲ့ကြောင်းသိရသည်။

ထို Kaun For You အွန်လိုင်းအခြေပြုစာသင်ကျောင်းမှာ CDM ပြုလုပ်ထားသည့် ဆရာ၊ ဆရာမများ ပါဝင်ခဲ့တာဖြစ်ပြီး ကျောင်းတည်ထောင်သူနှင့် ကျောင်းအုပ် ဖမ်းဆီးခံရပြီးနောက် ဆရာ၊ ဆရာမအချို့လည်း ဖမ်းဆီးခံရမှုများရှိခဲ့သည်။

အဆိုပါကျောင်းတွင် CDM ဆရာ၊ ဆရာမ ၄၀၀ ခန့် ချိတ်ဆက်ပြီး သင်ကြားနေကြောင်း နစက၏ သတင်းထုတ်ပြန်ချက်အရ သိရသည်၊၊

ymg/NN
#Yangon_Media_Group

#Local_News
Published_ 26 July 2022

မန္တလေးတိုင်းဒေသကြီး၊ ရမည်းသင်းမြို့နယ်တွင် ငွေကျပ် ၁ ဒသမ ၉၃ ဘီလီယံ ကျော်တန်ဖိုးရှိ ဘိန်းဖြူ ၇၇ ဒသမ ၅၂ ကီလို ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

ဖြစ်စဉ်မှာ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့သည် ဇူလိုင် ၂၀ ရက် နံနက် ၁ နာရီခွဲတွင် မန္တလေးတိုင်းဒေသကြီး၊ ရမည်းသင်းမြို့နယ်၊ ရမည်းသင်း-ရွှေမြင်တင်သွားကားလမ်း၊ သင်ပန်းကုန်းလမ်းဆုံတွင် ရွှေမြင်တင်မှ ရမည်းသင်းဘက်သို့ အောင်မျိုးထက် မောင်းနှင်ပြီး ရာဇာစိုး လိုက်ပါလာတဲ့ DYNA မော်တော်ယာဉ်ကို သတင်းအရရှာဖွေရာ ယာဉ်ပေါ်မှ ဘိန်းဖြူ ၇၇ ဒသမ ၅ ကီလို သိမ်းဆည်းရမိခဲ့ပါတယ်။

စစ်ဆေးချက်အရ နံနက် ၄ နာရီခွဲတွင် ရမည်းသင်းမြို့၊ အောင်မင်္ဂလာရပ်ကွက်ကြီး၊ ရွှေပြည်သာရပ်ရှိ တည်းခိုခန်း၌ ဘိန်းဖြူများ တာဝန်ခံ သယ်ဆောင်သူများဖြစ်ကြသည့် ဇော်ဦး၊ ခွန်ထွန်းလင်းနှင့်အတူ ဖမ်းဆီးရမိ ဘိန်းဖြူများ သယ်ဆောင်ရောင်းဝယ်ရာတွင် ပူးပေါင်းပါဝင်သူများဖြစ်ကြသည့် မောင်ငြိမ်း၊ ကိုလေး(ခ)သန့်ဇော်ထွန်း၊ အိုက်အွမ်၊ သိန်းလင်းမောင် (ခ)ဒိုဇာ၊ ထွန်းထွန်းဦး(ခ)ကြီးဘ၊ ကျော်သူတို ၈ ဦးကို ဘိန်းဖြူ သုည ဒသမ ၀၂ ကီလို၊ HIJET မော်တော်ယာဉ် ၁ စီး၊ SURF မော်တော်ယာဉ် ၁ စီး၊ 4 WHEEL DOUBLE CAB မော်တော်ယာဉ် ၁ စီး တို့နှင့်အတူ ဆက်လက်ဖမ်းဆီးရမိခဲ့ပါတယ်။

ထို့ကြောင့် စုစုပေါင်း ဒေသကာလတန်ဖိုး ငွေကျပ် ၁ ဒသမ ၉၃ ဘီလီယံကျော် တန်ဖိုးရှိ ဘိန်းဖြူ ၇၇ ဒသမ ၅၂ ကီလို သိမ်းဆည်းရမိခဲ့ကြောင်း၊ စစ်ဆေးဖော်ထုတ်ချက်အရ သိမ်းဆည်းရမိဘိန်းဖြူများကို ရှမ်းပြည်နယ်(တောင်ပိုင်း)မှ မန္တလေးတိုင်း ဒေသကြီးသို့ သယ်ဆောင်ခြင်းဖြစ်ကြောင်းသိရသဖြင့် ၎င်းတို့အား ဥပဒေအရ အရေးယူထားရှိပြီး ကွင်းဆက်ပြစ်မှု ကျူးလွန်သူများကို ဆက်လက်စစ်ဆေး ဖော်ထုတ်လျက်ရှိကြောင်း သတင်းရရှိပါတယ်။

ymg-mnn
#Yangon_Media_Group

#Local_News
Published - 26 July 2022

စီးပွားရေးနလန်မထူတော့သည့် သိရီလင်္ကာကဲ့သို့ ဖြစ်လာနိုင်စရာမရှိကြောင်း နစကပြောရေးဆိုခွင့်ရှိသူ၊ ပြန်ကြားရေးဒုတိယဝန်ကြီး ဗိုလ်ချုပ်ဇော်မင်းထွန်းက မီဒီယာများ၏မေးမြန်းချက်ကို ပြန်လည်ဖြေကြားခဲ့ခြင်းဖြစ်သည်။

‘‘ဖြစ်လာနိုင်စရာအကြောင်း မရှိပါဘူး။ မြန်မာနိုင်ငံမှာ အရန်ငွေကြေးအဖြစ် ဒေါ်လာထိုက်သင့်သလောက် စုဆောင်းပြီး ဖြစ်ပါတယ်’’ဟု ၄င်းကထည့်သွင်းပြောကြားခဲ့သည်။

နိုင်ငံတော်၏ လက်ဝယ်အတွင်း နိုင်ငံခြားအရန်ငွေမှာ အမေရိကန်ဒေါ်လာအပြင် တရုတ်ယွမ်လို ငွေကြေးမျိုးကိုလည်း ထည့်သွင်းစုဆောင်းထားကြောင်း ၄င်း၏ပြောပြချက်အရ သိရသည်။

‘‘ငွေကြေးပမာဏကို မပြောနိုင်ပေမယ့် ထိုက်သင့်တဲ့ ငွေကြေးပမာဏ စုဆောင်းပြီး ဖြစ်ပါတယ်။ အခြေခံရှိပြီး ဖြစ်တယ်လို့ပဲ ပြောချင်ပါတယ်’’ဟုဆိုသည်။

နိုင်ငံတော်တွင် သင့်တင့်သည့် နိုင်ငံခြားအရန်ငွေကြေးနှင့်ဘဏ္ဍာငွေများ ရှိပြီးဖြစ်ကြောင်းလည်း ထပ်လောင်းပြောကြားခဲ့သည်။

ymg/sth
#Yangon_Media_Group

#Local_News
Published - 26 July 2022

နောင်ကျင်းပပြုလုပ်မည့် ရွေးကောက်ပွဲတွင် ကျောင်း ဆရာ၊ ဆရာမများသာမက ဥပဒေနှင့်ကိုက်ညီသည့် အခြားဝန်ထမ်းများကိုလည်း မဲရုံမှူးနှင့် မဲရုံအဖွဲ့ဝင်အဖြစ် တာဝန်ပေးအပ်သွားမည်ဖြစ်ကြောင်း နစက၏ ပြည်ထောင်စုရွေးကောက်ပွဲကော်မရှင်အဖွဲ့ဝင်ဦးခင်မောင်ဦးက ပြောသည်၊၊

ဇူလိုင်လ(၂၆)ရက်တွင်ကျင်းပသည့် နစက၏သတင်းထုတ်ပြန်ရေး အဖွဲ့၏(၁၈)ကြိမ်မြောက် သတင်းစာရှင်းလင်းပွဲ၌ ထည့်သွင်းပြောခဲ့ ခြင်းဖြစ်သည်၊၊

ဘူးလက်နယူးဂျာနယ်မှ ဘူးလက်ဦးလှဆွေ၏ ပညာရေးဝန်ထမ်းများအပြင် လ.ဝ.ကအပါအဝင် အခြားဝန်ထမ်းများကို မဲရုံမှူးများအဖြစ်တာဝန်ပေးရန်ရှိ မရှိမေးခွန်းကို ပြန်လည်ဖြေကြားရာမှာ ယခုလိုပြန်လည် ဖြေကြားခဲ့ခြင်းဖြစ်သည်၊၊

"ပြီးခဲ့တဲ့ ရွေးကောက်ပွဲမှာ ဖြစ်ပေါ်လာတဲ့ဖြစ်စဉ်တွေကို သုံးသပ်ပြီးတော့ အများစုကတော့လုပ်ဆောင်မှုမှာ မှန်ကန်မှုရှိသလို အချို့မဲရုံမှူးပိုင်းမှာလည်း အချို့ကိစ္စတွေမှာ အားနည်းချက်တွေရှိတာ၊ ဥပဒေချိုးဖောက်တာတွေရှိခဲ့လို့ ဥပဒေနဲ့အညီအရေးယူဆောင်ရွက်မှုတွေရှိခဲ့ပါတယ်၊၊ ဒါ့ကြောင့် ကျွန်တော်တို့က ဒီအခြေအနေကို သုံးသပ်ပြီးတဲ့အခါကျတော့ နောင်ကျင်းပပြုလုပ်မယ့် ရွေးကောက်ပွဲမှာတော့ ကျောင်းဆရာ၊ ဆရာမတွေတင် မဟုတ်ပါဘူး ကျွန်တော်တို့ ဥပဒေနဲ့အညီသတ်မှတ်ချက်နဲ့ ကိုက်ညီတဲ့အခြား အကြံပြုတဲ့ ဝန်ထမ်းတွေအပါအဝင် အားလုံးပဲခြုံငုံသုံးသပ်ပြီးတော့ မဲရုံမှူးနဲ့ မဲရုံအဖွဲ့ဝင်တာဝန်တွေကို ကျွန်တော်တို့ပေးအပ်သွားမှာဖြစ်တဲ့အကြောင်းပြန်လည်ဖြေကြားအပ်ပါတယ်"လို့ နစက၏ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးခင်မောင်ဦးက သတင်းစာရှင်းလင်းပွဲတွင်ပြောခဲ့သည်၊၊

ymg/tthl
#Yangon_Media_Group

#Local_News
Published - 26 July 2022

နိုင်ငံတော်တွင် သင့်တင့်သည့် နိုင်ငံခြားအရန်ငွေကြေးနှင့်ဘဏ္ဍာငွေများ ရှိပြီးဖြစ်ကြောင်း နစကပြောရေးဆိုခွင့်ရှိသူ၊ ပြန်ကြားရေးဒုတိယဝန်ကြီး ဗိုလ်ချုပ်ဇော်မင်းထွန်းက ပြောသည်။

ဇူလိုင်လ ၂၆ ရက်တွင် ကျင်းပပြုလုပ်သည့် သတင်းစာရှင်းလင်းပွဲတွင် ထည့်သွင်းပြောကြားခဲ့ ခြင်းဖြစ်သည်။

‘‘နိုင်ငံတော်မှာ လုံလောက်တဲ့ ငွေကြေးရှိလိုလည်း နိုင်ငံတော်ဝန်ကြီးချုပ် ဦးဆောင်ပြီး ယခုလ ၂၂ ရက်နေ့မှာ ကျင်းပပြုလုပ်ခဲ့တဲ့ နိုင်ငံတော်အစိုးရရဲ့ စီးပွားရေးကော်မတီ အစည်းအဝေးဆုံးဖြတ်ချက်အရ နိုင်ငံ့ဝန်ထမ်း အမြဲတမ်းဝန်ထမ်းတွေကို အိမ်ငှားစရိတ်အဖြစ် အိမ်ထောင်သည်ဖြစ်ပါက မူရင်းလစာရဲ့ ၈ ရာခိုင်နှုန်းနဲ့ လူပျိုဖြစ်ပါက ၄ ရာခိုင်နှုန်း ထောက်ပံ့မှာဖြစ်ပါတယ်’’ဟု ပြောကြားခဲ့သည်။

ယင်းအပြင် ရဲတပ်ဖွဲ့ဝင်များကို လစာအပြင် ဩဂုတ်လမှ စတင်ကာ ပင်ပန်းကြမ်းတမ်းမှုနှင့် သက်စွန့်တာဝန်စရိတ်အဖြစ် တစ်ဦးလျှင် တစ်လ ကျပ် ၁၀၀၀၀ ခံစားခွင့်ပြုမည်ဖြစ်ကြောင်း ၎င်းက ဆက်လက်ပြောကြားခဲ့သည်။

ကိုဗစ်-၁၉ အသုံးစရိတ်များကို အမျိုးသားအဆင့် ဗဟိုကော်မတီ၏ ခွင့်ပြုချက်ဖြင့် စိစစ်သုံးစွဲနေသည့် အမျိုးသား သဘာဝ ဘေးအန္တရာယ်ဆိုင်ရာ စီမံခန့်ခွဲမှု ရန်ပုံငွေလက်ကျန်ထဲမှ ကျပ်ဘီလီယံ ၄၀၀ ကိုလည်း ပြည်တွင်းစီးပွားရေးလုပ်ငန်းတွေထံ ထုတ်ချေးပေးရန် စီစဉ်နေကြောင်း သိရသည်။

ymg/sth
#Yangon_Media_Group

#Local_News
Published_26 July 2022

ဒေါ်အောင်ဆန်းစုကြည်ရင်ဆိုင်နေရသော ရဟတ်ယာဉ်အမှု၏ တရားလိုပြသက်သေများအား ယနေ့ ဇူလိုင်လ ၂၆ ရက်တွင် နေပြည်တော်အကျဉ်းထောင်တွင်း တရားရုံး၌ ဆက်လက် စစ်ဆေးခဲ့ကြောင်း သိရသည်။

"ရဟတ်ယာဉ်အမှု ဖြစ်တဲ့ ၄၀(၇) အတွက် တရားလိုပြသက်သေ ဦးစိုးအောင်ကို ဆက်လက်စစ်ဆေးခဲ့ပါတယ်၊ ပြီးတော့ဒေါ်ခင်ကြည်ဖောင်ဒေးရှင်းကို ဦးမောင်ဝိတ်ကအလှူငွေပေးအပ်ခဲ့တဲ့ အဂတိအမှု ၂မှုအတွက်ကတော့ တရားလိုပြသက်သေ ဦးရဲထက်ကို ပြန်ခေါ်သက်သေ ဆက်လက်စစ်ဆေးခဲ့ပါတယ်။ နောက်ထပ်လည်း လိုပြသက်သေတွေကိုဆက်လက်စစ်ဆေးဖို့ အများကြီး ကျန်ပါသေးတယ်"ဟုတရားရုံးနှင့် နီးစပ်သူက YMG ကို ပြောသည်။

ယမန်နေ့ ဇူလိုင်လ ၂၅ ရက်က ဒေါ်ခင်ကြည်ဖောင်ဒေးရှင်းအတွက် ဦးမောင်ဝိတ်ကအလှူငွေပေးအပ်ခဲ့သည့်အမှုကို စွဲချက်တင်ကြောင်းလည်း တရားရုံးက ဆုံးဖြတ်ထားသေးသည်။ ယင်းအပြင် အဆိုပါအမှုကို ပြီးခဲ့သည့် ဇူလိုင်လ ၁၃ ရက်က တရားလွှတ်တော်ချုပ်သို ချေဖျက်ခွင့်လည်း တင်ထားသေးကြောင်း အဆိုပါ တရားရုံးနှင့် နီးစပ်သည့် အသိုင်းအဝိုင်းက သိရသည်။

၎င်းအမှု နှစ်မှုမှာ ဒေါ်ခင်ကြည်ဖောင်ဒေးရှင်းအတွက် ဒေါ်လာငွေလှူဒါန်းသည်ဆိုသည့် အမှုများဖြစ်ကာ အမှတ်အမှတ် ၃ မှာ ဒေါ်လာ နှစ်သိန်းခွဲ လှူသည်ဆိုသော အမှုဖြစ်ပြီး အမှုအမှတ် ၄ မှာ ဒေါ်လာ ၃ သိန်း လှူသည့် ဆိုသည့် အမှူများ ဖြစ်ကြောင်း သိရသည်။

ဒေါ်အောင်ဆန်းစုကြည်အနေဖြင့် ၂၀၂၂ ဇွန်လအထိ အမှုပေါင်း ၂၀ ထက်မနည်းဖြင့် စွဲဆိုထားခြင်းဖြစ်ပြီး ယင်းအထဲမှ ၆မှုအတွက် ထောင်ဒဏ် ၁၁ နှစ်ချမှတ်ထားကြောင်း သိရသည်။

ymg/mt
#Yangon_Media_Group

#World_Politics
Published 26 July 2022

ရုရှားက ဥရောပထံဓာတ်ငွေ့တင်ပို့ခြင်းများကို ထပ်မံဖြတ်တောက်သွားမှာဖြစ်ပြီး ယူကရိန်းကိုထောက်ပံ့နေတဲ့ နိုင်ငံများအတွက်တော့ အထိနာဦးမယ့် အခြေအနေဖြစ်နေပါတယ်။

ပင်လယ်နက်ဒေသတဝိုက် ဂျုံစေ့ပြန်လည်တင်ပို့ရေးကို ယခုသီတင်းပတ်အတွင်း သဘောတူညီခဲ့ကြတာကြောင့် စီးပွားရေးဖိအားလျော့ကျလာဖို့ မျှော်လင့်နေကြတဲ့အချိန်မှာ အခုလိုသတင်းထွက်ပေါ်လာတာဖြစ်ပါတယ်။

ယူကရိန်းဘက်က အင်္ဂါနေ့ကထုတ်ပြန်ရာမှာ ရုရှားက ပဲ့ထိန်းဒုံးကျည်များဖြင့် တောင်ပိုင်းကိုတိုက်ခိုက်ခဲ့ကြောင်း၊ ယူကရိန်းတပ်ဖွဲ့တွေကလည်း ရန်သူပစ်မှတ်တွေကို တိုက်ခိုက်နိုင်ခဲ့ကြောင်းသိရှိရပြီး ရုရှားကာကွယ်ရေးဝန်ကြီးဌာနဘက်ကတော့ မှတ်ချက်ပြုခြင်းမရှိသေးပါဘူး။

သောကြာနေ့မှာရရှိခဲ့တဲ့ သဘောတူညီချက်အရ ယူကရိန်းမှပထမဆုံးကုန်တင်သင်္ဘောတွေ ရက်ပိုင်းအတွင်းထွက်ခွာနိုင်တော့မယ်လို့ ကုလသမဂ္ဂက ထုတ်ပြန်ခဲ့ပေမယ့် ရုရှားတို့က ယူကရိန်းရဲ့အိုဒက်ဆာဆိပ်ကမ်းကို တိုက်ခိုက်ခဲ့တာပါတယ်။

ယူကရိန်း-ရုရှားစစ်ပွဲဖြစ်ပွားလာတာ ၆ လခန့်ကြာမြင့်လာပြီဖြစ်ပြီး ဒုတိယကမ္ဘာစစ်နောက်ပိုင်း ဥရောပမှာအကြီးဆုံးစစ်ပွဲဖြစ်လာပါတယ်။

စစ်ပွဲရဲ့သက်ရောက်မှုက ယူကရိန်းသာမက နိုင်ငံအများအပြားကိုပါထိခိုက်နေပြီး လောင်စာစွမ်းအင်ဈေးနှုန်းများ ထိုးတက်ကာ ဆင်းရဲတဲ့နိုင်ငံတွေက လူသန်းပေါင်းများစွာဟာ အငတ်ဘေးကြုံရဖွယ်ရှိနေပါတယ်။

အနောက်နိုင်ငံအနေနဲ့ စီးပွားရေးဒဏ်ခတ်ပိတ်ဆို့မှုတွေ ပြုလုပ်တာဟာ ကမ္ဘာ့လောင်စာဆီဈေးနှုန်းတွေကို မြင့်တက်စေနိုင်တယ်လို့ ရုရှားသမ္မတ'ဗလာဒီမာပူတင်'က ယခုလအတွင်း သတိပေးခဲ့ပါတယ်။

စက်မှုလုပ်ငန်းစောင့်ကြည့်ရေးအဖွဲ့ရဲ့အဆိုအရ နော့ဒ်စထရင်းမ်(၁)ဂတ်စ်ပိုက်လိုင်းကနေ ဂျာမနီကိုပေးပို့နေတဲ့ ဓာတ်ငွေ့ပမာဏကို ဗုဒ္ဓဟူးနေ့ကစတင်ပြီး တစ်နေ့ကို ၃၃ သန်းကုဗမီတာအထိ လျှော့ချသွားဖွယ်ရှိကြောင်း ရုရှားဓာတ်ငွေ့ကုမ္ပဏီကြီး Gazprom က အသိပေးခဲ့ပါတယ်။

စစ်ပွဲကာလမတိုင်ခင်က ဥရောပသို့ပေးပို့နေတဲ့ ဓာတ်ငွေ့ ၄၀ ရာခိုင်နှုန်းနဲ့ ရေနံ ၃၀ ရာခိုင်နှုန်းဟာ ရုရှားဆီကနေ တင်သွင်းဝယ်ယူခဲ့ကြတာဖြစ်ပါတယ်။

အခုအချိန်မှာတော့ ထိုပမာဏရဲ့တဝက်ခန့်ကိုသာ ဆက်လက်ပေးပို့သွားဖွယ်ရှိပါတယ်။

ဓာတ်ငွေ့တင်ပို့ခြင်းကို လျှော့ချရခြင်းက ပြုပြင်ထိန်းသိမ်းခြင်းကိစ္စတွေနဲ့ အနောက်နိုင်ငံရဲ့ဒဏ်ခတ်ပိတ်ဆို့ခြင်းတွေကြောင့်လို့ ရုရှားဘက်ကဆိုခဲ့ပြီး ဥရောပသမဂ္ဂကတော့ ရုရှားတို့ဟာ လောင်စာဆီတင်ပို့ခြင်းနဲ့ပတ်သက်ပြီး ခြိမ်းခြောက်နေတယ်လို့ စွပ်စွဲလိုက်ပါတယ်။

လာမယ့်ဆောင်းတွင်းမှာ ရုရှားကဓာတ်ငွေ့ဖြတ်တောက်သွားဖွယ်ရှိပြီး ထိုသို့ဖြတ်တောက်လိုက်ပါက ဂျာမနီအနေနဲ့ စီးပွားရေးဆုတ်ယုတ်မှုကိုကြုံတွေ့လာနိုင်ပြီး ငွေကြေးဖောင်းပွခြင်းကြောင့် အထိနာနေရတဲ့သူတွေလည်း ပိုမိုနစ်နာလာမှာဖြစ်ကြောင်း ဥရောပနိုင်ငံရေးသမာများက အကြိမ်ကြိမ် သတိပေးထားပါတယ်။

ရုရှားက ဥရောပထံဓာတ်ငွေ့တင်ပို့ခြင်းကို အလုံးစုံဖြတ်တောက်ဖို့တော့ အစီအစဉ်မရှိဘူးလို့ ဆိုထားပါတယ်။

ကျူးကျော်မှုတွေ၊ ဒဏ်ခတ်ပိတ်ဆို့မှုတွေ မရှိခင်တုန်းက ကမ္ဘာ့ဂျုံတင်ပို့မှုရဲ့ ၃ ပုံ ၁ ပုံနီးပါးဟာ ရုရှားနဲ့ယူကရိန်းထံမှ ဖြစ်ပါတယ်။

ပင်လယ်နက်မှတဆင့် တူရကီရဲ့ဘော့စ်ဖောရပ်စ် ရေလက်ကြားကနေ ဈေးကွက်များထံဖြန့်ချိမယ့် ကုန်သည်သင်္ဘောများကို မတိုက်ခိုက်ရန် ရုရှား၊ တူရကီ၊ ယူကရိန်း၊ ကုလသမဂ္ဂတိုက သောကြာနေ့မှာ ‌သဘောတူညီခဲ့ကြပါတယ်။

ထိုကဲ့သို့သဘောတူညီပြီး ခဏအကြာမှာပဲ ရုရှားတို့က အိုဒက်ဆာဆိပ်ကမ်းကို တိုက်ခိုက်ခဲ့တာဖြစ်ပါတယ်။

ဒါကြောင့် ရုရှားတို့က သူတို့ရဲ့ကတိကဝတ်ကို စောင့်ထိန်းမှာလားဆိုတာ စောင့်ကြည့်သွားရမှာဖြစ်တယ်လို့ အိမ်ဖြူတော်ကပြောကြားခဲ့ပါတယ်။

Source: Reuters
#Yangon_Media_Group

#DailyNews
Published - 26 July 2022

၁။ မြန်မာနိုင်ငံကို ခရီးမသွားသင့်သည့် နိုင်ငံအဆင့် အမေရိကန်သတ်မှတ်ခြင်းအတွက် ခရီးသွားလုပ်ငန်းနစ်နာမှုရှိ

၂။ မြန်မာ့လူဦးရေ(၅)သန်းကျော်တွင် အသည်းရောင်ရောဂါများရှိနေ၊ B ပိုး C ပိုး ရှိမရှိအခမဲ့ စစ်ဆေးပေးမည်ဟုဆို

၃။ နေ့စဉ်မိုးလေဝသသတင်း။

၄။ ဗီယက်နမ်စစ်ပွဲကာလမှ စတင်အသုံးပြုခဲ့သည့် ရော်ဘာဖိနပ်များ ယနေ့အချိန်အထိ လူကြိုက်များလျက်ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group