#Local_News
Published_1 November 2022

တရုတ်နိုင်ငံကဆိပ်ကမ်းတွေနဲ့ မြန်မာနိုင်ငံက ရန်ကုန်ဆိပ်ကမ်းကို တိုက်ရိုက်သွားလာနိုင်မယ့် ရေလမ်းကြောင်းသစ်တစ်ခု တရားဝင်ဖွင့်လှစ်လိုက်ပြီဖြစ်တယ်လို့ မြန်မာနိုင်ငံဆိုင်ရာတရုတ်သံရုံးမှ သိရပါတယ်၊၊

 
#Yangon_Media_Group

#DailyNews
Published _ 1 November 2022

၁။ တရုတ်-မြန်မာ တိုက်ရိုက်ရေလမ်းကြောင်းသစ် တရားဝင်ဖွင့်လှစ်၊ ချင်းကျိုးမှ ရန်ကုန်မြို့သို့(၁၂)ရက်အတွင်း ရောက်မည်

၂။ စားအုံးဆီဈေးနှုန်း ပြင်ပဈေးကွက်တွင် ၇၀၀၀ ကျပ်ဝန်းကျင်အထိ ပြန်လည်ကျဆင်းလာ

၃။ ပြည်ပသို့ရေထွက်ကုန်ပစ္စည်းတင်ပို့မှု ကန်ဒေါ်လာ ၃၉၀ ဒသမ ၆၈ သန်းရရှိထား

၄။ ကမ္ဘာ့ဖလားပြိုင်ပွဲကျင်းပရန် လိုအပ်သည့်ပြင်ဆင်မှု အားလုံးနီးပါး ကာတာတွင် ဆောက်လုပ်ပြီးစီး... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published _1 November 2022

သွင်းကုန်လုပ်ငန်းရှင်တွေအနေနဲ့ ဒီကနေ့ နိုဝင်ဘာလတစ်ရက်နေ့ကစပြီးတော့ ဘဏ်ထဲမှာ ငွေပြနိုင်မှ တင်သွင်းလို့ရတော့မယ်လို့ သိရပါတယ်။

 
#Yangon_Media_Group

#Local_News
Published _1 November 2022

အောက်တိုဘာ ၁ ရက်မှ ၃၁ ရက်အတွင်း တောင်ကိုရီးယားနိုင်ငံသို့အစိုးရပြည်ပအလုပ်အကိုင် အေဂျင်စီမှ တစ်ဆင့် EPS စနစ်ဖြင့် အလုပ်သမား စုစုပေါင်း ၁၂၇၉ ဦး တရားဝင် ပို့ဆောင်ထားကြောင်း ဆိုးလ်မြို့ မြန်မာသံရုံးမှထုတ်ပြန်ထားသည်။

အောက်တိုဘာ ၄ ရက်တွင် လုပ်သားသစ် ၁၂၈ ဦး ၊ ၆ ရက်တွင် လုပ်သားသစ် ၁၂၄ ဦး ၊ ၁၁ ရက်တွင် လုပ်သားသစ် ၁၂၀ ဦး ၊ ၁၃ ရက်တွင် လုပ်သားသစ် ၁၄၈ ဦး ၊ ၁၈ ရက်တွင် လုပ်သားသစ် ၁၅၀ ဦး ၊ ၂၀ ရက်တွင် လုပ်သားသစ် ၁၇၈ ဦး နှင့် ၂၅ ရက်တွင် လုပ်သားသစ် ၁၄၈ ဦး ၊ အောက်တိုဘာ ၂၇ ရက်တွင် လုပ်သားသစ် ၁၇၃ ဦးနှင့် အောက်တိုဘာ ၃၁ ရက်တွင် လုပ်သားသစ် ၁၀၉ ဦးကို ပို့ဆောင်ပေးထားခြင်းဖြစ်ကြောင်း သိရသည်။

ယင်းအပြင် မြန်မာလုပ်သားဟောင်းများအပါအဝင် လုပ်သားဟောင်း ၅၀ ကျော် နှင့် ကုန်ထုတ်လုပ်သားသစ် ၈၀ ကျော် စုစုပေါင်း လုပ်သား ၁၄၀ နီးပါးကို နိုဝင်ဘာလဆန်းတွင် စေလွှတ်သွားမည်ဟု အလုပ်သမားညွှန်ကြားရေးဦးစီးဌာနအောက်ရှိ အစိုးရပြည်ပအလုပ်အကိုင်အေဂျင်စီ (POEA) က ထုတ်ပြန်ကြေညာထားသည်။

တောင်ကိုရီးယားနိုင်ငံသို သွားရောက်အလုပ်လုပ်ကိုင်သည့် အလုပ်သမားအများစုသည် ကုန်ထုတ်လုပ်သား ၊ ကုန်ထုတ် Re-entry လုပ်သား၊ စိုက်ပျိုးရေးနှင့် မွေးမြူရေး Re-entry လုပ်သားများအဖြစ် ဝင်ရောက်လုပ်ကိုင်နေကြခြင်းဖြစ်သည်။

#ymg/sth
#Yangon_Media_Group

#Local_News
Published _ 1 November 2022

ဂျပန်နိုင်ငံရှိ ကုမ္ပဏီများ၌အလုပ်လုပ်ကိုင်ရန် မြန်မာလုပ်သား အမျိုးသား ၃၀၇ ဦးနဲ့ အမျိုးသမီး ၃၈၉ ဦး စုစုပေါင်း ၆၉၆ ဦးခေါ်သွားရန် အလုပ်ကမ်းလှမ်းစာ ၁၈၀ စောင်ရရှိထားကြောင်း ဂျပန်နိုင်ငံဆိုင်ရာ မြန်မာသံရုံး၊ တိုကျိုမြို့က အောက်တိုဘာလ ၃၁ ရက် ရက်စွဲဖြင့် ထုတ်ပြန်ခဲ့သည်။

အဆိုပါ အလုပ်ကမ်းလှမ်းစာ ၁၈၀ စောင်အား မြန်မာသံရုံး၊ တိုကျိုမြို့က အောက်တိုဘာလ ၁၇ ရက်မှ ၃၁ ရက်အတွင်းစိစစ်ပြီးနောက် ယင်းကမ်းလှမ်းစာများနှင့်ပတ်သက်သည့် အချက်အလက်များအား နိုင်ငံခြား ရေးဝန်ကြီးဌာနသို့ ပေးပို့ပြန်ကြားခဲ့ခြင်းဖြစ် သည်။

ထိုအလုပ်ကမ်းလှမ်းစာများသည် အလုပ်သမားဝန်ကြီးဌာနက နိုင်ငံခြားရေးဝန်ကြီး ဌာနမှတဆင့် ပေးပို့လာခြင်းဖြစ်၍ အလုပ်ကမ်းလှမ်းစာ (Demand Letter)များကို အချိန်နှင့်တစ်ပြေးညီ စိစစ်ဆောင်ရွက်ပေးခဲ့သည်။

ဂျပန်နိုင်ငံရှိ အလုပ်သမားကြီးကြပ်ရေးကုမ္ပဏီနှင့် အလုပ်ခေါ်ယူသည့် စက်ရုံ၊ ကုမ္ပဏီများသည် ဂျပန်နိုင်ငံ၌ တရားဝင်တည်ထောင်ထားခြင်း ရှိ၊ မရှိနှင့်စာရွက်စာတမ်းအထောက်အထားများအားစိစစ်၍ တွေ့ရှိချက်များ၊ သဘောထားမှတ်ချက်များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့ခဲ့ခြင်းဖြစ်သည်။

အဆိုပါ အလုပ်ကမ်းလှမ်းစာ ၁၈၀ စောင်အတွက် မြန်မာနိုင်ငံရှိ ပြည်ပအလုပ်အကိုင်ရှာဖွေရေး တရားဝင်လိုင်စင်ရ ကုမ္ပဏီများက မြန်မာအလုပ်သမားများအား စေလွှတ်သွားမည်ဖြစ်ကြောင်းလည်း သိရှိရသည်။

#ymg/NN
#Yangon_Media_Group

#Local_News
Published_1 Nov 2022

စင်ကာပူနိုင်ငံ၊ Resorts World Sentosa Convention Centre ၌ အောက်တိုဘာ (၂၈) ရက်တွင် ကျင်းပသည့် အာရှနှင့် သမုဒ္ဒရာဒေသရှိ သတင်းအချက်အလက် နည်းပညာဆိုင်ရာအသင်းချုပ်ရဲ့ Digital Summit 2022 သို့ လူမှုဝန်ထမ်း ဦးစီးဌာန ညွှန်ကြားရေးမှူးချုပ် ဒေါက်တာ စန်းစန်းအေးနှင့် ဘာသာရပ်ဆိုင်ရာ ကိုယ်စားလှယ်တစ်ဦး တက်ရောက်ခဲ့ပါတယ်။

အစည်းအဝေးတွင် Digital Trust Forum ကို ကျင်းပရာ ဒေသတွင်းနှင့် နိုင်ငံတကာမှ IT ပညာရှင်များ၊ တက္ကသိုလ်များမှ ပညာရှင်များ၊ နည်းပညာအသုံးပြုသည့် ကုမ္ပဏီတို့မှ CEO, CFO နှင့် တာဝန်ရှိသူများက နည်းပညာဆိုင်ရာ ယုံကြည်မှုအပေါ် ခေါင်းစဉ် (၁၄) ခုဖြင့် ဆွေးနွေးခဲ့ကြပါတယ်။

အဆိုပါ Summit ၏ ညပိုင်း Gala Dinner တွင် ASOCIO Digital Government Award 2022 ကို ပေးအပ်ချီးမြှင့်ရာ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာနက ဆောင်ရွက်လျက်ရှိတဲ့ လူမှုရေး သတင်းအချက်အလက် စီမံခန့်ခွဲမှုစနစ်၏ ကဏ္ဍတစ်ခုဖြစ်သော လူမှုဖြစ်ရပ်စီမံခန့်ခွဲမှု သတင်းစနစ်ကို ကာကွယ်ရေး ဝန်ကြီးဌာန၊ မြန်မာနိုင်ငံကွန်ပျူတာ အသင်းချုပ်တို့၏ ပံ့ပိုးကူညီမှုဖြင့် ဝင်ရောက်ယှဉ်ပြိုင် ခဲ့တာ ဖြစ်ပါတယ်။

ဝန်ကြီးဌာနအနေဖြင့် ASOCIO Digital Government Award 2022 ကိုရရှိခဲ့ရာ လူမှုဝန်ထမ်းဦးစီးဌာန ညွှန်ကြားရေးမှူးချုပ် ဒေါက်တာစန်းစန်းအေးက ဆုလက်ခံရယူ ခဲ့ကာ ဆုလက်ခံအပြီးတွင် ASOCIO အသင်းချုပ်၏ ဥက္ကဋ္ဌနှင့် တာဝန်ရှိသူများကို အမှတ်တရ လက်ဆောင်များပေးအပ်ခဲ့ပါတယ်။

၂၀၂၂ ခုနှစ်တွင် ကျင်းပသည့် ASOCIO Digital Summit တွင် နိုင်ငံပေါင်း (၁၄) နိုင်ငံက Digital Government Award အပါအဝင် ဆုပေါင်း(၅၄)ခု ပေးအပ်ခဲ့ကြောင်း သတင်းရရှိပါတယ်။

ygm_mnn
#Yangon_Media_Group

Published 1 Nov 2022

☑️အမေရိကန်နိုင်ငံ ချီကာဂိုမှာ တနင်္လာနေ့ည ကိုးနာရီခွဲခန့်က  ဟော်လိုဝင်ပွဲ ဆင်နွှဲနေကြသူတွေကြားထဲ  သေနတ်  ပစ်ခတ်မှုဖြစ်ခဲ့ရာ  သုံးနှစ်အရွယ်ကလေးငယ်တစ်ဦးနှင့် အခြားကလေးငယ်နှစ်ဦးအပါအဝင် အနည်းဆုံး လူ(၁၄)ဦး ဒဏ်ရာများရရှိ

☑️မောင်းနှင်နေတဲ့ ကားတစ်စီးပေါ်ကနေ လူအုပ်ထဲ သေနတ်နှင့်ပစ်ခတ်သွားခြင်းဖြစ်

☑️ဖြစ်ရပ်တစ်ခုလုံးက သုံးစက္ကန့်ခန့်သာကြာမြင့်ခဲ့

☑️အသက်(၃)နှစ်အရွယ်ကလေးငယ်နှင့် အခြားကလေးနှစ်ဦးမှာ ၁၁နှစ်နှင့် ၁၂နှစ်အရွယ်များဖြစ်

ဒဏ်ရာရသူတွေထဲမှာ ကားတိုက်မိသူတစ်ဦးလည်းပါဝင်

☑️အရေးပေါ်ဌာနတွေက အခင်းဖြစ်ပွားရာ West Side မှာရှိတဲ့ West Flournoy ဘလောက် ၂၇၀၀ သို့ အလျင်အမြန် သွားရောက်နေ

☑️အဆိုပါသေနတ်ဖြစ်မှုမျာ ကာလီဖိုနီးယားနှင့် ပေါ့လ်လမ်းဆုံးမှာဖြစ်ပြီး ဒဏ်ရာရသူတွေထဲမှာ ဒဏ်ရာပြင်းထန်သူများ နှင့် မစိုးရိမ်ရသူများ အမျိုးမျိုးပါဝင်

☑️ကားပေါ်ကနေ လူအုပ်ထဲ ရမ်းသန်းပစ်သွာတာဖြစ်ပြီး အကြောင်းရင်းလည်းမသိသေးလို ပစ်သူဘယ်သူဘယ်ဝါဆိုတာလည်း မသိသေးဘူးလို့ ရဲတပ်ဖွဲ့ပြောရေးဆိုခွင့်ရသူကပြောပါတယ်။

Source: Mirror/Reuters/others

#Chicago_Haloween_shooting

#Drive_by_shooting

#Haloween_tragedy

#World_Military
Published 1 November 2022

ယူကရိန်းအခြေခံအဆောက်အအုံများကို တိုက်ခိုက်ပြီး ပင်လယ်နက်ပိုင်းဂျုံတင်ပို့ရေးအစီအစဉ်ကနေ ရပ်ဆိုင်းဖို့ ဆုံးဖြတ်လိုက်တာဟာ ခရိုင်းမီးယားရှိ ရုရှားသင်္ဘောကို တိုက်ခိုက်ခဲ့တာကြောင့် တုံ့ပြန်တဲ့သဘောဖြစ်တယ်လို့ ရုရှားသမ္မတ'ဗလာဒီမာပူတင်'က ပြောကြားလိုက်ပါတယ်။

ယူကရိန်းဒရုန်းတွေဟာ ကုလသမဂ္ဂသဘောတူညီချက်အရ ဂျုံသင်္ဘောများဖြတ်သန်းသွားလာတဲ့ ရေကြောင်းလမ်းများအတိုင်း အသုံးပြုသွားတာဖြစ်တယ်လို့ 'ပူတင်'ကဆိုပါတယ်။

ယူကရိန်းဘက်ကတော့ အဆိုပါတိုက်ခိုက်မှုအတွက် သူတို့မှာ တာဝန်မရှိကြောင်း၊ ဂျုံတင်ပို့မှုလုံခြုံရေးအစီအစဉ်ကို စစ်ရေးအရအသုံးပြုတယ်ဆိုတာကိုလည်း ငြင်းဆိုကြောင်း ထုတ်ပြန်ခဲ့ပါတယ်။

ရုရှားတို့က ခရိုင်းမီးယားရှိ သင်္ဘောများတိုက်ခိုက်ခံရတယ်လို့ ဆိုခဲ့ချိန်မှာ ပင်လယ်နက်ဒေသအတွင်း စနေနေ့က မည်သည့်ဂျုံတင်ပို့ရေးသင်္ဘောမှ မသွားလာခဲ့ကြောင်း ကုလသမဂ္ဂက ပြောကြားခဲ့ပါတယ်။

ဖေဖော်ဝါရီ ၂၄ ရက်နေ့ ယူကရိန်းကိုကျူးကျော်တာ ရက်ပေါင်း ၂၅၀ ပြည့်တဲ့နေ့မှာ ရုရှားတို့က ယူကရိန်းနိုင်ငံအနှံ့ ဒုံးကျည်မိုးရွာချခဲ့ပါတယ်။

မြို့တော်ကိဗ်တဝိုက် ပေါက်ကွဲမှုများဖြစ်ပွားပြီး မီးခိုးလုံးများထွက်လာခဲ့ပါတယ်။

တနင်္လာနေ့က ယူကရိန်းပြည်နယ်အနည်းဆုံး ၆ နေရာရှိ အခြေခံအဆောက်အအုံများကို ရုရှားတပ်များ ပစ်ခတ်ခဲ့ကြကြောင်း ယူကရိန်းလက်နက်ကိုင်အဖွဲ့များရဲ့ ဗိုလ်မှူးချုပ်တစ်ဦးက ဖေ့စ်ဘွတ်ခ်မှာ ဖော်ပြခဲ့ပါတယ်။

"ဒါမပြီးသေးပါဘူး" လို့ 'ပူတင်'က ရုပ်သံသတင်းမှာပြောကြားခဲ့ရာ နောက်ထပ်ပစ်ခတ်မှုတွေ ပြုလုပ်ဦးမယ့် အခြေအနေရှိနေပါတယ်။

ရေအားလျှပ်စစ်ဆည်များလည်း ထိခိုက်ခဲ့တာကြောင့် ဓာတ်အား၊ ရေနဲ့ အပူပေးခြင်းများ ပြတ်တောက်သွားခဲ့ပါတယ်။

တိုက်ခိုက်ခံရပြီးနောက် ပြည်သူ ၁၄၀,၀၀၀ ခန့်အတွက် ဓာတ်အားပြတ်တောက်သွားပြီး ယူကရိန်းရဲ့ဒုတိယအကြီးဆုံးမြို့ခါကိဗ်က နေထိုင်သူ ၅ သောင်းလည်း ပါဝင်ကြောင်း ခါကိဗ်အရှေ့မြောက်ပိုင်းမှ အုပ်ချုပ်ရေးမှူးက တယ်လီဂရမ်မှာ ရေးသားလိုက်ပါတယ်။

ရုရှားဘက်ကပစ်လွှတ်တဲ့ ဒုံးကျည် ၅၀ မှာ ၄၄ ခုကို ပစ်ချနိုင်ခဲ့ကြောင်း ယူကရိန်းစစ်ဘက်က ဆိုပါတယ်။

ဒါပေမဲ့ ကျန်တဲ့ဒုံးကျည်တွေကြောင့် မြို့တော်ကိဗ်ရဲ့ ၈၀ ရာခိုင်နှုန်းလောက်ဟာ ရေမရရှိတော့ဘဲ ၁၃ ဦးဒဏ်ရာရခဲ့ပါတယ်။

ပြီးခဲ့တဲ့ ၃ ပတ်အတွင်းကလည်း ရုရှားဟာ တာဝေးပစ်ဒုံးကျည်များနဲ့ အီရန်နိုင်ငံထုတ် ဖောက်ခွဲရေးဒရုန်းများဖြင့် ယူကရိန်းအရပ်ဘက်အဆောက်အအုံတွေကို တိုက်ခိုက်ခဲ့ပါသေးတယ်။

တနင်္လာနေ့က စွမ်းအင်အဆောက်အအုံအများစု ထိမှန်ခဲ့ပြီး ယူကရိန်းဒေသ ၁၀ ခုမှာ ဒရုန်းတိုက်ခိုက်မှုများရှိခဲ့ကြောင်း ယူကရိန်းဝန်ကြီးချုပ်'ဒန်နစ်ရှမီဟယ်'က ပြောကြားခဲ့ပါတယ်။

Source: Reuters
#Yangon_Media_Group

#Local_News
Published_1 November 2022

ရန်ကုန်တိုင်းဒေသကြီး၊ သီလဝါဆိပ်ကမ်းရှိ Terminal များတွင် စက်သုံးဆီဂါလန် ၆ သန်းကျော်ဆိပ်ကမ်းချထားပြီး ၉ သန်းကျော်ကို ဆီချခြင်းလုပ်ငန်း ဆက်လက်ဆောင်ရွက်သွားမည်ဖြစ်ကြောင်း စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ သိရသည်။

သီလဝါဆိပ်ကမ်းရှိ Terminal များတွင် ရိုးရိုးဒီဇယ်ဆီ ၃ ဒသမ ၀၇ ဂါလန်သန်းနှင့် ပရီမီယံဒီဇယ်ဆီ ၃ ဒသမ ၀၇ ဂါလန်သန်း တင်ဆောင်လာသည့် MT Harmony One သင်္ဘောသည် ဆီချလုပ်ငန်းများ ဆောင်ရွက်နေကြောင်း သိရသည်။

အလားတူ ဓာတ်ဆီ 92 Ron ၂ ဒသမ ၇၆ ဂါလန်သန်း၊ ဓာတ်ဆီ 95 Ron ၀ ဒသမ ၉၂ ဂါလန်သန်းနှင့် ရိုးရိုးဒီဇယ်ဆီ ၁ ဒသမ ၆၅ ဂါလန်သန်း တင်ဆောင်လာသည့် MT Yu Dong သင်္ဘောနှင့် ပရီမီယံဒီဇယ်ဆီ ၄ ဒသမ ၃၁ ဂါလန်သန်း တင်ဆောင်လာသည့် MT Beluga Pacific သင်္ဘောတို့သည် သက်ဆိုင်ရာ Terminal များသို့ ဆိုက်ကပ်၍ ဆီချလုပ်ငန်းများ ဆက်လက်ဆောင်ရွက်သွားမည်ဖြစ်ကြောင်း သိရသည်။

ယင်းကြောင့် ရန်ကုန်သီလဝါ ဆီလှောင်ကန်လက်ကျန်များ၊ စက်သုံးဆီအရောင်းဆိုင်များနှင့် ဖြန့်ဖြူးမှု လက်ကျန်အခြေအနေများအရ စက်သုံးဆီဖူလုံမှုရှိကြောင်း အသိပေးထုတ်ပြန်ထားသည်။

စက်သုံးဆီဈေးနှုန်းများအနေဖြင့် ယခုရက်သတ္တပတ်တွင် အစိုးရရုံးပိတ်ရက်များ၌ ပြည်တွင်းခရီးသွားလာမှု များပြားခဲ့ခြင်းကြောင့် စက်သုံးဆီသုံးစွဲမှုမြင့်တက်ခဲ့ပြီး ဈေးနှုန်းအနည်းငယ် မြင့်တက်ခဲ့ကြောင်း သိရသည်။

#ymg/sth
#Yangon_Media_Group

#Local_News
Published _ 1 November 2022

ပညာရေးဝန်ကြီးဌာန၊ အဆင့်မြင့်ပညာဦးစီးဌာနရှိ တက္ကသိုလ်၊ ဒီဂရီကောလိပ်နှင့်ကောလိပ်များတွင် ၂၀၂၂ ခုနှစ် တက္ကသိုလ်ဝင်စာမေးပွဲအောင်မြင်သူများ၏ တက္ကသိုလ်နေ့သင်တန်း ပထမနှစ်(ပထမနှစ်ဝက်)ဝင်ခွင့်ရသူများစာရင်းအား လာမည့် နိုဝင်ဘာလ ၃ ရက်တွင် ကြေညာသွားမည်ဟု ပညာရေးဝန်ကြီးဌာန၊ အဆင့်မြင့်ပညာဦးစီးဌာနမှ ထုတ်ပြန်ခဲ့သည်။

သက်ဆိုင်ရာတက္ကသိုလ်၊ ဒီဂရီကောလိပ်နှင့်ကောလိပ်များ၊ ပညာရေးဝန်ကြီးဌာန website http://www.moe.gov.mm နှင့် အဆင့်မြင့် ပညာဦးစီးဌာန website http://www.dhe.gov.mm များတွင် ကြေညာထားမည်ဟုလည်း အသိပေးထုတ်ပြန်ထားသည်။

အဆင့်မြင့်ပညာဦးစီးဌာနမှ ၂၀၂၂ ခုနှစ် တက္ကသိုလ်ဝင်စာမေးပွဲ အောင်မြင်သူများကို ပထမနှစ်(ပထမနှစ်ဝက်)နေ့သင်တန်းများအား နိုဝင်ဘာလ ၂၁ ရက်၌ စတင်ဖွင့်လှစ်ပေးသွားမည်ဖြစ်သည်။

ယင်းအပြင် ပထမနှစ်(ဒုတိယနှစ်ဝက်)နှင့် ဒုတိယနှစ်မှ မဟာဘွဲ့သင်တန်းများအထိ နေ့သင်တန်းများအားလုံးကိုလည်း နိုဝင်ဘာလ ၁၀ ရက်၌ စတင်ဖွင့်လှစ်၍ ကျောင်းအပ်လက်ခံခြင်းကို အောက်တိုဘာလ ၂၇ ရက်မှနိုဝင်ဘာလ ၁၈ ရက်အထိ လက်ခံဆောင်ရွက်ပေးသွားမည်ဟုလည်း အသိပေးထုတ်ပြန်ထားရှိသည်။

#ymg/NN
#Yangon_Media_Group

#Local_News
Published_1 November 2022

သွင်းကုန်ပစ္စည်းတင်သွင်းမှုအတွက် တစ်ဖက်နိုင်ငံသို့ ပို့ကုန်တင်ပို့ခြင်းမှ ရရှိသည့်ဝင်ငွေနှင့် တစ်ဖက်နိုင်ငံရှိ မြန်မာနိုင်ငံသားများ၏ လစာနှင့်လုပ်ခလွှဲငွေ အပါအဝင် အခြားဝင်ငွေများကို အသုံးပြုတင်သွင်းခွင့်ပြုမည်ဖြစ်ကြောင်း ကုန်သွယ်ရေးဦးစီးဌာနမှ အသိပေးကြေညာထားသည်။

သွင်းကုန်တင်သွင်းသူများ အနေဖြင့် အဆိုပါရငွေများကို အသုံးပြုကာသက်ဆိုင်ရာဘဏ်များမှတစ်ဆင့် သွင်းကုန်အတွက် ငွေပေးချေမှုများကိုဆောင်ရွက်ရမည်ဖြစ်ကြောင်း၊ နယ်စပ်ကုန်သွယ်မှုကိစ္စရပ်များကို ဘဏ်စနစ်ဖြင့်ဆောင်ရွက်ရာတွင် ကနဦးအဆင့်အနေဖြင့် မြန်မာ-ထိုင်းနယ်စပ်ကုန်သွယ်ရေးတွင် စတင်ကျင့်သုံးဆောင်ရွက်သွာမည်ဖြစ်ကြောင်း သိရသည်။

သွင်းကုန်လိုင်စင်လျှောက်ထားရာတွင် ကုမ္ပဏီများအနေဖြင့် မိမိ၏ဘဏ်ငွေစာရင်းသို့ ပို့ကုန်တင်ပို့ခြင်းမှ ရရှိသည့်ဝင်ငွေ သို့မဟုတ် အခြားဝင်ငွေရောက်ကြောင်း သက်ဆိုင်ရာဘဏ်မှ ထုတ်ပေးသည့် အထောက်အထားနှင့် ဘဏ်ငွေစာရင်းရှင်းတမ်းမူရင်းတို့ကို ပူးတွဲကာ ကုန်သွယ်ရေးဦးစီးဌာနသို့ တင်ပြလျှောက်ထားရမည်ဖြစ်ကြောင်း၊ ယင်းအပြင် ကုန်သွယ်ရေးဦးစီးဌာနအနေဖြင့် သွင်းကုန်တင်သွင်းလိုသည့် ကုမ္ပဏီကတင်ပြလာသော ပို့ကုန်မှ ရရှိသည့်ဝင်ငွေ သို့မဟုတ် အခြားဝင်ငွေပမာဏသက်ရောက်မှုကို စိစစ်၍ ဘဏ်ငွေစာရင်းလက်ကျန်ပမာဏထက် မကျော်လွန်ဘဲ သွင်းကုန်လိုင်စင်ကို ခွင့်ပြုထုတ်ပေးသွားမည်ဖြစ်ကြောင်း သိရသည်။

ယင်းအပြင် သွင်းကုန်လိုင်စင်လျှောက်ထားရန်မလိုအပ်သည့် ကုန်စည်တင်သွင်းမှုများအတွက် သွင်းကုန်ကြေညာလွှာဖွင့်လှစ်ရာ၌ ပို့ကုန်မှရရှိသည့်ဝင်ငွေ သို့မဟုတ် အခြားဝင်ငွေဝင်ရောက်မှုကို သက်ဆိုင်ရာဘဏ်မှထုတ်ပေးသည့်အထောက်အထားနှင့် ဘဏ်ငွေစာရင်းရှင်းတမ်းမူရင်းတို့ကို ပူးတွဲကာ အကောက်ခွန်ဦးစီးဌာနသို့ တင်ပြလျှောက်ထားရမည်ဖြစ်ကြောင်း သိရသည်။

အဆိုပါ လျှောက်ထားမှုကို နိုဝင်ဘာ ၁ ရက်မှစတင်ဆောင်ရွက်မည်ဖြစ်ပြီး ယင်းကြောင့် အောက်တိုဘာလ ၁ ရက်အထိလျှောက်ထားပြီးဖြစ်သည့် သွင်းကုန်လိုင်စင်လျှောက်ထားမှုများ အကျုံးဝင်မည်မဟုတ်ဘဲ အဆိုပါရက်မတိုင်မီ ထုတ်ပေးပြီးဖြစ်သည့် သွင်းကုန်လိုင်စင်များဖြင့် ကုန်ပစ္စည်းတင်သွင်းမှုကို နိုဝင်ဘာလ ၃၀ ရက်မတိုင်ခင် ပြီးပြတ်အောင်တင်သွင်းကြရန်နှင့် သတ်မှတ်ကာလအတွင်း တင်သွင်းနိုင်ခြင်းမရှိပါက သွင်းကုန်လိုင်စင်ပျက်မည်ဖြစ်ကြောင်း အသိပေးထုတ်ပြန်ထားသည်။

ယင်းသို့တင်သွင်းခွင့်ပြုရာတွင်လည်း ပို့ကုန်မှရရှိသည့်ဝင်ငွေနှင့် အခြားဝင်ငွေဝင်ရောက်မှုများနှင့် ပတ်သက်၍ ဧပြီလ တစ်ရက်နောက်ပိုင်းမှဝင်ရောက်သည့် ဝင်ငွေကိုသာ အသုံးပြုဆောင်ရွက်ခွင့်ပြုမည်ဖြစ်ကြောင်း သိရသည်။

ယင်းသို့တင်သွင်းခွင့်ပြုရာတွင်လည်း ပို့ကုန်မှရရှိသည့်ဝင်ငွေနှင့် အခြားဝင်ငွေဝင်ရောက်မှုများနှင့် ပတ်သက်၍ ဧပြီလ တစ်ရက်နောက်ပိုင်းမှဝင်ရောက်သည့် ဝင်ငွေကိုသာ အသုံးပြုဆောင်ရွက်ခွင့်ပြုမည်ဖြစ်ကြောင်း သိရသည်။

#ymg/sth
#Yangon_Media_Group

#World_Health
Published 1 Nov 2022

ဂေါက်ရောဂါဟာ အဆစ်အမြစ်ရောင်ရမ်းနာကျင်တဲ့ ဝေဒနာတစ်မျိုးဖြစ်ပါတယ်။

များသောအားဖြင့် အဆစ်တစ်ခုမှာ ဖြစ်လေ့ဖြစ်ထရှိပြီး အဝလွန်ခြင်း၊ သွေးဖိအားများခြင်း၊ အသားကြီးငါးကြီးစားသုံးခြင်းတို့ကြောင့် ခန္ဓာကိုယ်ထဲမှာ ယူရစ်အက်ဆစ်(Uric Acid)များလာကာ အဆစ်အမြစ်တွေမှာ စုပြုံလာပြီး ရောင်ရမ်းနာကျင်ခြင်းကို ဖြစ်စေပါတယ်။

ဂေါက်ရောဂါကို လွန်ခဲ့တဲ့ ၈ နှစ်ကတည်းက ခံစားနေရတဲ့ ခရိုအေးရှားအင်ဂျင်နီယာ'ဂိုရန်မိုရိုဗစ်'ဟာ သူ့လိုပဲ ဂေါက်ရောဂါခံစားနေရတဲ့ ဆရာဝန်တစ်ဦးနဲ့တွေ့ဆုံခဲ့ကာ ထူးဆန်းတဲ့ကုသမှုကို တွေ့ရှိခဲ့ပါတယ်။

"ဆရာဝန်က ကျွန်တော့်ကို သံလွင်ရွက်ရေနွေးကြမ်း တစ်နေ့ကိုနှစ်ကြိမ်သောက်ခိုင်းခဲ့ရာမှာ အဲဒီနောက်ပိုင်း ဘာစားစား ဂေါက်ရောဂါပြန်မဖြစ်တော့ဘူး" လို့ 'မိုရိုဗစ်'က ပြောပြခဲ့ပါတယ်။

သံလွင်ရွက်အခြောက် ဒါမှမဟုတ် အစိုကို ရေနွေးထဲ ၅ မိနစ်ခန့်ထည့်ပြုတ်ကာ ရေနွေးကြမ်းလို သောက်သုံးရတာဖြစ်ပြီး အနည်းငယ်ပိုခါးတဲ့အရသာရှိပါတယ်။

ဒါဟာလည်း ဓာတ်တိုးဆန့်ကျင်ပစ္စည်းများဖြစ်တဲ့ အိုလျူရိုပိန်းနဲ့ ဟိုက်ဒရိုဆီတိုင်ရိုဆောလ်တို့ကြောင့် ခါးတဲ့အရသာထွက်တာဖြစ်ကြောင်း ခရိုအေးရှားအဟာရပညာရှင်'အော်လ်ဂျာမာတင်နစ်'က ဆိုပါတယ်။

ဒါ့အပြင် ပိုလီဖီနောလ်ဟာလည်း သွေးပေါင်ချိန်ကိုကျစေကာ ဂေါက်ဝေဒနာကို လျော့ကျစေပြီး နှလုံးသွေးကြောရောဂါဖြစ်နိုင်ချေကို လျှော့ချပေးပါတယ်။

၁၂ ပတ်ကြာလေ့လာမှုမှာလည်း သက်လတ်ပိုင်းအဝလွန်အမျိုးသားတွေမှာ သံလွင်ရွက်ရဲ့ ပိုလီဖီနောလ်က ဆီးချိုဝေဒနာကိုလည်း သက်သာစေပါတယ်။

သံလွင်ဆီဟာဆိုရင် အူလမ်းကြောင်းမှ ကောင်းကျိုးပြုပိုးမွှားများကို တိုးများစေပြီး ရောဂါခုခံအားကို မြှင့်တင်ပေးပါတယ်။

သံလွင်ရွက်တွေမှာပါဝင်တဲ့ ပိုလီဖီနော်လ်ဟာ ကင်ဆာ၊ အယ်လ်ဇိုင်းမားနဲ့ နှလုံးသွေးကြောရောဂါများကို ကာကွယ်ရာမှာ ပါဝင်ပေးပါတယ်။

'မိုရိုဗစ်'ဟာကံကောင်းစွာနဲ့ သံလွင်ခင်းတစ်ခုကို ပိုင်ဆိုင်ထားတာကြောင့် သံလွင်ရွက်အလွယ်တကူရရှိနေပါတယ်။

'မိုရိုဗစ်'က ၂၀၀၉ ခုနှစ်မှာ သံလွင်ခင်းကြီးကို ရယူပိုင်ဆိုင်ခဲ့ပြီး အသေးစားထုတ်လုပ်နေခဲ့ပါတယ်။

သံလွင်ဆီတွေကို ၂၆ ဒီဂရီဆဲလ်စီးယပ်စ်အောက် အေးတဲ့အပူအချိန်မှာ ထားခြင်းဖြင့် အာနိသင်ကို အထိရောက်ဆုံး ထိန်းသိမ်းထားနိုင်ပါတယ်။
'မိုရိုဗစ်'ဖွင့်လှစ်ထားတဲ့ဟိုတယ်မှာဆိုရင် သံလွင်ရွက်ရေနွေးကြမ်းဖြင့် နေ့စဉ်ဧည့်ခံသလို သံလွင်ဆီဖြင့် ခန္ဓာကိုယ်နဲ့မျက်နှာတွေကို နှိပ်နယ်ပေးတဲ့ ဝန်ဆောင်မှုလည်းရှိပါတယ်။

Source: SCMP
#Yangon_Media_Group