#Local_News
Published_4 November 2022

ကမ္ဘာ့ရွှေဈေးကျဆင်းနေပေမဲ့ ဒေါ်လာဈေးမာနေတာကြောင့် ပြည်တွင်းရွှေဈေးနှုန်းဟာ လက်ရှိမှာတော့ အတတ်ဈေးနဲ့ ဈေးငြိမ်နေတာပါ။

 
#Yangon_Media_Group

#Local_News
Published_4 November 2022

ရုတ်တရက်နှလုံးရပ်သွားသောကြောင့် ရန်ကုန်တိုင်းဒေသကြီး၊ ဒဂုံမြို့သစ်မြောက်ပိုင်းမြို့နယ် ပင်လုံဆေးရုံကြီး၌ ဆေးကုသမှုခံယူနေရသော စာရေးဆရာအကြည်တော်၏ ကျန်းမာရေး တိုးတက်မှုရှိကြောင်း အစ်ကိုဖြစ်သူ ကိုမိုးက သူ၏လူမှုကွန်ရက်တွင် ဖော်ပြထားသည်။

နိုဝင်ဘာလ ၃ ရက် ညနေပိုင်းက ဆေးရုံမှာ ညီဖြစ်သူ အကြည်တော်အား သွားရောက်၍ သတင်းမေးခဲ့စဉ် သူတွေ့ခဲ့သည့်အခြေအနေကို လူမှုကွန်ရက်တွင် ပြန်လည်ဝေမျှပြောပြထားခြင်းလည်း ဖြစ်သည်။

"မနေ့က ညနေမှာ ကျွန်တော့် ညီ အကြည်တော်ဆီ လူနာကြည့်သွားရောက်ခဲ့ပါတယ်၊ ကျွန်တော့်အသံကြားတာနဲ့ သူလှုပ်လှုပ်ရှားရှားဖြစ်သွားပုံလေး နည်းနည်းပြောပြချင်လို့ပါ။ ဟျောင့် ကိုကြည် ငါပြန်ရောက်လာပြီကွဆိုတော့ ကျွန်တော့်အသံကြားတာနဲ့ ဒီကောင် မျက်လုံးဖွင့် ဟိုဒီလျောက်ကြည့်ပြီး ( မြင်ဟန်မရှိပေမယ့် သိကြောင်းပြတဲ့ သင်္ကေတ ) ပါးစပ်လှုပ်ပြီး ဘာမှန်းမသိတဲ့ ဘာသာမဲ့ အသံမဲ့ စကားတွေ ထပြောပြီး မျက်ရည်တွေ ကျတော့တာပဲ။ ဒါနဲ့မင်းအတော် သက်သာလာပြီ သိလား ၊ မင်းခန္တာကိုယ်မှာ ပိုက်တွေအားလုံး တစ်ခုမှ မရှိတော့ဘူး၊ ခုအတိုင်းဆို မကြာခင်မှာ ခုထားတဲ့ အရေးပေါ်အခန်းကနေ ရိုးရိုး အခန်းထဲပြောင်းလို့ ရတော့မယ်ဆိုတော့လည်းဝမ်းသာ အားရ ပုံစံနဲ့အားရပါးရကြီး ပါးစပ်အပြည့်နဲ့( ခုနကအတိုင်း)အသံမဲ့ ဘာသာမဲ့ စကားတွေထပ်ပြောပြီးမျက်ရည်တွေ တောက်တောက် ဒီးဒီးကျနေတော့တာမို့ ကျွန်တော်က အေ့ အေ့ ဟျေင့် ရပြီး မင်းပြောနေတာငါနားလည်တယ် ခုဘာမှမပြောသေးနဲ့အုံး ၊ နောက်တော့မှ မင်း နေကောင်းသက်သာလာမှ အစကနေ ပြန်ပြောကြမယ်၊ နားလိုက်အုံး ၊ ခုတော့ အားလုံးအဆင်ပြေနေတယ် အေးချမ်းနေတယ်၊ မင်းဘာမှ စိတ်မပူနဲ့၊ နေကောင်းအောင်သာနေ၊ မင်းနားမှာ ငါအပါအဝင် အားလုံးရှိနေကြတယ်၊ ဘာမှ အားမငယ်နဲ့ စိတ်မပူနဲ့လို့ပြောပြီး နှုတ်ဆက်ပြန်ခဲ့ပါတယ်၊ ခြုံပြီးပြောရယင်တော့ အခြေအနေတိုးတက်မှုရှိပါတယ် ကောင်းမွန်နေပါတယ်"ဟု ကိုမိုးက ရေးသားထားသည်။

စာရေးဆရာအကြည်တော်သည် ကိုဗစ်လည်းနှစ်ကြိမ်ဖြစ်ဖူးသူ ဖြစ်ကြောင်း၊ အသံတဖြည်းဖြည်းပျောက်သွားသည့်အတွက် စစ်ဆေးကြည့်ရာ လည်ချောင်းနှင့် လည်ပြွန်ကြားတွင် ကင်ဆာဖြစ်နေသည်ဟု အဖြေထွက်ထား၍ ထိုင်းနိုင်ငံတွင် ဆေးကုသမှု ခံယူနေခဲ့ရပြီးနောက် မြန်မာနိုင်ငံသို့ ပြီးခဲ့သည့်နေ့ အောက်တိုဘာလ ဒုတိယပတ် ညတစ်ညတွင် ရုတ်တရက် အသက်ရှူမဝဖြစ်ကာ နှလုံးခုန် ရပ်သွားခဲ့ခြင်းကြောင့် ဆေးရုံတင်၍ ကုသနေရခြင်းဖြစ်ကြောင်း သိရသည်။

အကြည်တော်၏ နာမည်ရင်းမှာ စောကြည်ဖြူဖြစ်ပြီး အဖ ဦးထွန်းနိုင် ဒေါ်ယုနွယ်တို့၏ မွေးချင်း (၇) ယောက်အနက် ခြောက်ယောက်မြောက်သား ဖြစ်သည်။ ၁၉၈၈ ခုနှစ်မှစ၍ ကိုကိုကြီး ကလောင်အမည်ဖြင့် စာပေလောကသို့ စတင်ဝင်ရောက်ခဲ့ကာ ၂၀၀၃ ခုနှစ်တွင် အကြည်တော် အမည်ဖြင့်လုံချင်းဝတ္ထုများ စတင်ရေးသားခဲ့သည်။

ကျောက်သင်ပုန်းတွေ မိုးထားတဲ့အိမ်၊ ကဝေပျို၏ နိဒါန်း၊ ခြူဆီ၊ ဆွေတစ်ရာ မောင်တစ်ကျိပ်၊ ဇော်က ကနေသည်၊ နေတစ်ခြမ်း လတစ်ခြမ်း၊ ပြုံးရွှင်ရေ ပျော်ရဲ့လား (ပြုံးရွှင်သည် ငိုတတ်သည်)၊ ဘီလူး၊ စောကြည်ဖြူနှင့် မြင့်စန်းရီ (မောင်စောကြည်ဖြူနှင့် မမြင့်စန်းရီ)၊ယောက္ခမနှင့် တစ်ထောင့်တစ်ည၊ ရွှေမိုးသည်း၊ အိပ်မက် အပိုဒ်ခွဲ (၉)စသော ဝတ္ထုများကို ရုပ်ရှင်ကားကြီးများ ရိုက်ထားရပြီး ယင်းအပါအဝင် ဝတ္ထုပေါင်း ၈၀ ကျော်ကို ရေးသားထားသူလည်း ဖြစ်သည်။

#ymg/mt
#Yangon_Media_Group

#Local_News
Published_ 4 November 2022

ဆေးတက္ကသိုလ်(၁)ရန်ကုန်တွင် မိမိစရိတ်ဖြင့် ဆေးတက္ကသိုလ်တက်ခွင့်ရသူ(၂၇)ဦးရှိကြောင်းဆေးတက္ကသိုလ်(၁) ရန်ကုန်၏ ထုတ်ပြန်ချက်အရသိရသည်၊၊

ဆေးတက္ကသိုလ်များကို မိမိအစီအစဉ်ဖြင့် ငွေကျပ်သိန်း ၆၀၀ မှ ကျပ်သိန်း ၇၀၀ ကြား အကုန်ကျခံပြီး တတ်နိုင်မည့်သင်တန်း ယခုပညာသင်နှစ်တွင် ပါဝင်ခဲ့ပြီး ဆေးတက္ကသိုလ်(၁)ရန်ကုန်တွင်မိမိစရိတ်ဖြင့် ဆေးတက္ကသိုလ်တက်ခွင့်ရသူ(၂၇)ဦးရှိကြောင်း ထုတ်ပြန်ခဲ့ခြင်းဖြစ်သည်၊၊

၂၀၂၂ ခုနှစ် တက္ကသိုလ်ဝင်စာမေးပွဲအောင်မြင်သူများအနေဖြင့် ဆေးတက္ကသိုလ်နှင့် သွားဘက်ဆိုင်ရာ ဆေးတက္ကသိုလ်များကို နိုင်ငံတော်အစီအစဥ်ဖြင့် မဟုတ်ဘဲ မိမိ အစီစဉ် မိမိကုန်ကျစရိတ်ဖြင့် တက်ရောက်ပြီး သင်တန်းပြီးမြောက်ပြီးပါက မိမိသဘောဆန္ဒအတိုင်း နိုင်ငံ့ဝန်ထမ်းတာဝန် မထမ်းဆောင်ဘဲနေလိုလျင် ရနိုင်ကြောင်း ကျန်းမာရေးဝန်ကြီးဌာနက ထုတ်ပြန်ခဲ့ကြောင်းသိရသည်၊၊

၂၀၂၂ တက္ကသိုလ်ဝင်တန်းအောင်မြင်ကာဆေးတက္က သိုလ်(၁)ရန်ကုန်သို့ဝင်ခွင့်ရပြီး နိုင်ငံတော်အစီအစဥ်ဖြင့်ပညာသင်ကြားမည့် ကျောင်းသားကျောင်းသူ စုစုပေါင်း(၃၄၅)ဦးရှိကြောင်း သိရသည်၊၊

#ymg/tthl
#Yangon_Media_Group

#Local_News
Published_4 November 2022

၂၀၂၂-၂၀၂၃ ဘဏ္ဍာနှစ် (၇)လ နီးပါးကာလအတွင်း ပြင်ပနိုင်ငံများသို့ ဆန်တန်ချိန် (၆) သိန်းကျော်နှင့် ဆန်ကွဲတန်ချိန် (၃) သိန်းခန့်တင်ပို့ရာမှ အမေရိကန်ဒေါ်လာသန်း (၄၀၀) ခန့်ရရှိခဲ့ကြောင်း မြန်မာနိုင်ငံဆန်စပါးအသင်းချုပ် (MRF) က တရားဝင် ကြေညာထားသည်။

မြန်မာနိုင်ငံဆန်စပါးအသင်းချုပ်အနေဖြင့် ပြည်ပကို ဆန်တင်ပို့ရောင်းချသည့် ပုံစံကို ပြောင်းလဲလုပ်ဆောင်လျက်ရှိရာတွင် အရည်အသွေးမြင့်မားသည့် စပါးမျိုးများကို အာရုံစိုက်၍ (၃) နှစ်အတွင်း ဆန်တင်ပိုမှု နှစ်ဆတိုးမြှင့်ရန် ရည်မှန်းထားကြောင်းလည်း သိရသည်။

ယင်းကြောင့် လာမည့် (၂၀၂၅) ခုနှစ်က စတင်၍ နှစ်စဉ်တန်ချိန် (၄) သန်းအထိ တင်ပို့နိုင်ရေးအတွက် ဆောင်ရွက်နေပြီး ပိုကုန်ဝင်ငွေ ကန်ဒေါ်လာ (၁ ဒသမ ၅) ဘီလီယံအထိ ရရှိရန် မျှော်လင့်ထားကြောင်း သိရသည်။

မြန်မာ့ဆန်ကို တရုတ်နိုင်ငံ၊ ဘင်္ဂလားဒေ့ရှ်နှင့် ဖိလစ်ပိုင်အပါအဝင် ဥရောပသမဂ္ဂအဖွဲ့ဝင်ဖြစ်သည့် အီတလီ၊ စပိန်၊ ပိုလန်၊ ဘယ်လ်ဂျီယံ၊ နယ်သာလန်၊ ပြင်သစ် စသည့်နိုင်ငံများကလည်း ဝယ်ယူကြောင်းသိရသည်။

#ymg/sth
#Yangon_Media_Group

#Local_News
Published_4 November 2022

ရန်ကုန်တိုင်းဒေသကြီးအတွင်းဖောက်ခွဲဖျက်ဆီးခြင်း၊ လုပ်ကြံသတ်ဖြတ်ခြင်း၊ ဓားပြတိုက်လုယက်ခြင်းများ ဆောင်ရွက်ခဲ့သည့် အမျိုးသား ၁၇ ဦး၊ အမျိုးသမီး ၄ ဦး၊ စုစုပေါင်း ၂၁ ဦးကို ပစ္စတိုမျိုးစုံ ၇ လက်၊ ကျည်အိမ် ၁၀ ခု၊ ကျည်မျိုးစုံ ၉၈ တောင့်၊ လက်ပစ်ဗုံး ၈ လုံး၊ ဖောက်ခွဲရေးသုံးဒီတိုနေတာ ၃၀ ခု၊ ယမ်းမှုန့် ၁ ထုပ်၊ ဆားကစ်ပြား ၁ ခု၊ ဆက်စပ်ပစ္စည်းများနှင့်အတူ ဖမ်းဆီးရမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

အောက်တိုဘာလ ၁၈ ရက် နံနက်ပိုင်းက ဒလ PDF အမည်ခံအဖွဲ့က မအေးသီတာဝင်းအား ဒလမြို့နယ်၊ ကမာကဆစ်ရပ်ကွက်၊ မဉ္ဇူလမ်း၌ ဖမ်းဆီးရမိခဲ့ပြီးနောက် ယင်း၏ ထွက်ဆိုချက်အရ အောက်တိုဘာလ ၂၀ ရက် ၊ ၂၁ ရက် ၊ ၂၂ ရက် ၊၂၄ ရက်တို့တွင် ဆက်တိုက် ဖမ်းဆီးမိခဲ့ခြင်းဖြစ်ကြောင်း အဆိုပါ ထုတ်ပြန်ချက်အရ သိရသည်။

အဆိုပါ ဖမ်းဆီးရမိသူများ၏ ထွက်ဆိုချက်အရ ယင်းတို့အနေဖြင့် ၂၀၂၁ ခုနှစ်၊ ဇွန်လခန့် ကKNLA တပ်မဟာ(၇) လှုပ်ရှားနယ်မြေ ၊KIA ဗဟိုဌာနချုပ်ရှိရာ လိုင်ဇာမြို့အနီးတို့တွင် သင်တန်းများတက်ရောက်ခဲ့ကြကြောင်း၊ယင်းနောက် ၂၀၂၂ ခုနှစ်၊ ဇန်နဝါရီလတွင် ဒလ PDF အဖွဲ့ကို လူ ၁၉ ဦးဖြင့် ဖွဲ့စည်းခဲ့ခြင်းဖြစ်ကြောင်း သိရသည်ဟု ထုတ်ပြန်ချက်တွင် ရေးသားထားသည်။

ယင်းတို့အနေဖြင့် ဖောက်ခွဲမှု ၄ ကြိမ်၊လုပ်ကြံသတ်ဖြတ်မှု ၆ ကြိမ် ကျူးလွန်ခဲ့သည့်အပြင် သင်္ဃန်းကျွန်းမြို့နယ်၊ ဘဝမြင့် မှတ်တိုင်အနီးရှိ A ဘဏ်နှင့် ရတနာရွှေဆိုင်တို့ကို ဓားပြတိုက်လုယက်မှုများ ကျူးလွန်ခဲ့ကြောင်းလည်း ထွက်ဆိုချက်ကို သတင်းထုတ်ပြန်ချက်တွင် ထပ်မံဖော်ပြထားသည်။

ယင်းကြောင့် လက်ရှိတွင်ဖမ်းဆီးရမိသူများအား ဥပဒေအရ ကျူးလွန်ခဲ့သော ပြစ်မှုများအတိုင်း ထိရောက်စွာ အရေးယူဆောင်ရွက်သွားမည်ဖြစ်ကြောင်းလည်း အဆိုပါ နစက သတင်းထုတ်ပြန်ချက်အရ သိရသည်။

#ymg/mt
#Yangon_Media_Group

#Local_News
Published_4 November 2022

ရန်ကုန်တိုင်းဒေသကြီး၊ တောင်ပိုင်းခရိုင်၊ သံလျင်မြို့နယ်သီလဝါဆိပ်ကမ်းရှိ Terminal များသို့ စက်သုံးတင်သင်္ဘောများ ဆက်တိုက်ရောက်ရှိမည် ဖြစ်ကြောင်း စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီတာဝန်ရှိသူကပြောသည်။

"စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေနဲ့ စက်သုံးဆီအမျိုးအစားအလိုက် ပြည်တွင်းသုံးလိုအပ်ချက်နဲ့အညီ စိစစ်ပြီး လုပ်ဆောင်လျက်ရှိပါတယ်။ သီလဝါ Terminal မှာ တန်ချိန် ၁၈၂၀၀ ပါတဲ့ MT Yu Dong သင်္ဘောဟာ ဆီချပြီးတော့ နိုဝင်ဘာလ ၃ ရက်က ပြန်လည်ထွက်ခွာသွားပါပြီ။ လက်ရှိမှာ ဆီချနေတဲ့သင်္ဘောက တန်ချိန်တစ်သောင်းပါတဲ့ MT Intan Premier သင်္ဘောနဲ့ တန်ချိန် နှစ်သောင်းနှစ်ထောင်ပါတဲ့ MT Lucia Solis နှစ်စီးက ဆီချနေပါတယ်။ လက်ရှိ ဆီချနေတဲ့သင်္ဘောတွေက မနေ့က ရောက်တာပါ။ နောက်ထပ်လည်း ဆက်တိုက်ရောက်ဖို့ ရှိနေပါတယ်"ဟု အဆိုပါကော်မတီ တာဝန်ရှိသူက ပြောသည်။

ရောက်ရှိသော စက်သုံးဆီအမျိုးအစားများမှာ ဓာတ်ဆီ 92 Ron၊ ဓာတ်ဆီ 95 Ron ၊ ရိုးရိုးဒီဇယ် ၊ပရီမီယံဒီဇယ်ဆီတို့ဖြစ်ကြကြောင်း ကော်မတီ၏ မှတ်တမ်းများတွင် ဖော်ပြထားသည်။

သီလဝါဆီလှောင်ကန် လက်ကျန်များ၊ စက်သုံးဆီအရောင်းဆိုင်များနှင့် ဖြန့်ဖြူးမှု လက်ကျန် အခြေအနေများအရ စက်သုံးဆီဖူလုံမှုရှိကြောင်း၊ စက်သုံးဆီဈေးနှုန်းများအနေဖြင့် ယခုရက်သတ္တပတ်တွင် ဓါတ်ဆီဈေးနှုန်း အနည်းငယ်မြင့်တက်ပြီး ဒီဇယ်ဆီဈေးနှုန်း အနည်းငယ်ကျဆင်းလာကြောင်းသိရသည်။

#Ymg/STH
#Yangon_Media_Group

#Local_News
Published_ 4 November 2022

အသစ်ဖွင့်လှစ်လိုက်သည့် ဝေဘာဂီအထူးကုဆေးရုံကြီး အဆင့်မီဆေးကုသဆောင်သစ်ကြီးတွင် ဆိုလာစနစ်နှင့်ရောဂါပိုးကူးစက်မှုကိုကာကွယ်နိုင်သည့် လေဖိအားစနစ်တပ်ဆင်ထားသည့်အခန်းများပါဝင်ကြောင်း သိရသည်၊၊

နိုဝင်ဘာလ(၃)ရက်တွင် ရန်ကုန်တိုင်းဒေသကြီး၊ မြောက်ဥက္ကလာပမြို့နယ်၊ ဓမ္မသုခလမ်းမှာရှိတဲ့ ဝေဘာဂီဆေးရုံကြီးအတွင်းမှာ ဝေဘာဂီအထူးကုဆေးရုံကြီး အဆင့်မီဆေးကုသဆောင်သစ်(ကုတင် ၁၁၀ ဆံ့)ကို ဖွင့်လှစ်ခဲ့သည်၊၊

အဆင့်မီဆေးကုသဆောင်သစ်ဖွင့်ပွဲ အခမ်းအနားတွင် နိုင်ငံတော်စီမံအုပ်ချုပ်ရေးကောင်စီအတွင်းရေးမှူး ဒုတိယဗိုလ်ချုပ်ကြီးအောင်လင်းဒွေးက" ယနေ့ဖွင့်လှစ်သည့်ကုသဆောင်သစ်တွင် ရောဂါပိုးကူးစက်မှုကိုကာကွယ်နိုင်သည့် လေဖိအားစနစ်တပ်ဆင်ထားသည့်အခန်းများ၊လူနာများကို(၂၄)နာရီစောင့်ကြပ်ကြည့်ရူနိုင်မည့်စနစ်များပါဝင်သော နိုင်ငံတကာ အဆင့်မီကုသခန်းများ၊ ဓာတ်ခွဲခန်းများပါဝင်ပြီး ဝေဘာဂီအထူးကု ဆေးရုံကြီးကိုလည်း Infectious Disease Institute အဖြစ်ကုသရေးအပြင်သုတေသနနှင့် သင်ကြားရေးလုပ်ငန်းများပါဆောင်ရွက်နိုင်မည့် Center တိုးမြှင့်ဆောင်ရွက်နိုင်မည်ဖြစ်သည့် အတွက် ကူးစက်ရောဂါကာကွယ် ထိန်းချုပ် ကုသရေး လုပ်ငန်းများကို တိုးတက်ဆောင်ရွက်နိုင်မည့်အပြင် ရောဂါကူးစက်မှုအခြေအနေများကို လေ့လာ၍သုတေသနပြုဆောင်ရွက်ရန် များစွာအထောက်အကူပြုမည်ဖြစ်ကြောင်း" ထည့်သွင်းပြောကြားခဲ့သည်၊၊

ထို့အပြင်နိုင်ငံတော်အကြီးအကဲ၏ လမ်းညွှန်ချက်ဖြင့် အညီ ဆိုလာစနစ်တပ်ဆင်ထားသည့်အတွက် စွမ်းအင်ခြွေတာရေးနှင့် ကာဗွန်ဒိုင်အောက်ဆိုက် ထုတ်လွှင့်မှု အနည်းဆုံး ရှေ့ပြေးဆောင်ရွက်မှုဖြစ် ကြောင်းနှင့် ကျန်းမာရေးဝန်ကြီးဌာနအောက်ရှိ ဆေးရုံများတွင်လည်း အသုံးပြုနိုင်ရေး စီမံချက်ရေးဆွဲပြီးစတင်ဆောင်ရွက်လျက်ရှိကြောင်းလည်း ပြောကြားခဲ့ကြောင်းသိရသည်၊၊

ဝေဘာဂီအထူးကုဆေးရုံကြီးအဆင့်မီဆေးကုသဆောင်သစ်ကြီးဖွင့်ပွဲအခမ်းအနားကို နိုင်ငံတော်စီမံအုပ်ချုပ်ရေးကောင်စီအတွင်းရေးမှူး ဒုတိယဗိုလ်ချုပ်ကြီးအောင်လင်းဒွေး၊ ပြည်ထောင်စုဝန်ကြီး ဒေါက်တာသက်ခိုင်ဝင်း၊ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း နှင့် အစိုးရအဖွဲ့တာဝန်ရှိသူများ၊ကုသရေးဦးစီးဌာနညွှန်ကြားရေးမှူးချုပ်နှင့် တာဝန်ရှိသူများနှင့် AW ဖောင်းဒေးရှင်းဥက္ကဋ္ဌတို့တက်ရောက်ဖွင့်လှစ်ပေးခဲ့ကြောင်းသိရသည်၊၊

#ymg/tthl
#Yangon_Media_Group

#World_Politics
Published 4 November 2022

အမေရိကန်သမ္မတဟောင်း'ဒေါ်နယ်ထရမ့်'က အိမ်ဖြူတော်သမ္မတရာထူးအတွက် တတိယအကြိမ်ယှဉ်ပြိုင်ရန် ယခုလအတွင်း စတင်စီစဉ်နေပြီဖြစ်ပါတယ်။

အင်္ဂါနေ့ကြားဖြတ်ရွေးကောက်ပွဲမှာ ရီပတ်ဘလစ်ကန်တွေ အနိုင်ရဖို့မျှော်မှန်းထားပြီး ထိုကနေမှ အခွင့်အလမ်းကောင်းများရရှိရန် ကြိုးပမ်းနေကာ ဖြစ်နိုင်ချေအခြေအနေများကို သုံးသပ်ဆွေးနွေးဖို့ လူယုံတော်တွေကို ဆက်သွယ်ထားကြောင်း ထရမ့်ရဲ့အကြံပေးပုဂ္ဂိုလ် ၃ ဦးက ပြောကြားလိုက်ပါတယ်။

"ပိုးဖလံမျိုး မီးပုံတိုးဆိုတဲ့အတိုင်းပဲ ထရမ့်က ၂၀၂၄ မှာ ယှဉ်ပြိုင်ပါလိမ့်မယ်၊ ကျေးဇူးတော်နေ့မတိုင်ခင် ကြေညာဖို့ဆန္ဒရှိနေပြီး ဒါဟာ ပြိုင်ဘက်တွေအပေါ် အခွင့်အရေးကြီးကြီးမားမား အသာရလိမ့်မယ်ဆိုတာကို သူသဘောပေါက်ထားပါတယ်" လို့ အကြီးတန်းအရာရှိတစ်ဦးက ရိုက်တာကို ပြောကြားခဲ့ပါတယ်။

လာမယ့်သီတင်းပတ်များအတွင်း ပြိုင်ဘက်ဖြစ်လာနိုင်သူတွေကို ပိတ်ပင်ထားနိုင်လိမ့်မယ်လို့ ကြေညာလိုက်ကာ သမ္မတဟောင်းအနေနဲ့လည်း စိတ်ပြောင်းလဲတာမျိုးဖြစ်နိုင်သေးတယ်လို့ ပြောကြားခဲ့ပါတယ်။
အင်္ဂါနေ့ရွေးကောက်ပွဲမတိုင်ခင်လေးမှာပဲ 'ထရမ့်'က ပြန်လည်ရွေးကောက်ခံမယ့်အကြောင်း ကြေညာဖို့ရည်ရွယ်ထားပြီး ကြိုးပမ်းမှုမှာ ပါဝင်မယ့်သူတွေကို အသိပေးထားပါတယ်။

ဘက်မလိုက်သော ရွေးကောက်ပွဲရလာဒ်ကြိုတင်ခန့်မှန်းသူများရဲ့ ခန့်မှန်းချက်နဲ့ မဲဆန္ဒများအရ ရီပတ်ဘလစ်ကန်တွေက အမေရိကန်အောက်လွှတ်တော်မှာ နေရာအများစုရရှိနိုင်ချေရှိနေပြီး အထက်လွှတ်တော်မှာလည်း ချုပ်ကိုင်သွားနိုင်ဖွယ်ရှိနေကာ သမ္မတ'ဘိုင်ဒန်'ရဲ့ ဥပဒေပြုရေးအစီအစဉ်ကို နောက် ၂ နှစ်အထိ တားဆီးနိုင်စွမ်းရှိသွားမှာဖြစ်ပါတယ်။

ငွေကြေးဖောင်းပွမှုများကြောင့် ဒီမိုကရက်တစ်တွေရဲ့ မဲရရှိမှုမျှော်လင့်ချက် မှေးမှိန်လာကာ မဲဆန္ဒကောက်ခံမှုများအရ တစ်နှစ်ကျော်ကြာတဲ့တိုင်အောင် 'ဘိုင်ဒန်'ကိုထောက်ခံမှုနှုန်းက ၄၀ ရာခိုင်နှုန်းသာ ရှိနေပါတယ်။

မနှစ်က အမေရိကန်ကပ်ပီတိုလ်လွှတ်တော်အဆောက်အအုံကို 'ထရမ့်'ထောက်ခံသူများတိုက်ခိုက်ခဲ့ကြကာ မဲလိမ်လည်မှုကြောင့် ရှုံးနိမ့်ရတာဖြစ်တယ်လို့ 'ထရမ့်'က အဆက်မပြတ်စွပ်စွဲနေခဲ့ပါတယ်။

'ထရမ့်'ကလည်း မဲကောက်ခံမှုမှာ သိပ်ပြီးအလေးမသာခဲ့ဘဲ အမေရိကန်တွေရဲ့ ၄၁ ရာခိုင်နှုန်းလောက်ကသာ သူ့ကို ထောက်ခံနေကြပါတယ်။

'ထရမ့်'ဟာ သမ္မတရာထူးနှုတ်ထွက်ပြီးကတည်းက နိုင်ငံရေးလှုပ်ရှားမှုများကို အရှိန်အဟုန်ဖြင့် ဆက်လက်လုပ်ဆောင်ခဲ့ပြီး နောက်ထပ်ယှဉ်ပြိုင်ဖို့ လူသိရှင်ကြားထုတ်ဖော်ပြောကြားခဲ့ပါတယ်။

သမ္မတရုံးကနေထွက်ခွာပြီးနောက် အရေးကြီးထိပ်တန်းစာရွက်စာတမ်းများကို ယူဆောင်သွားတယ်လို့ စွပ်စွဲခံရပြီး လတ်တလောမှာ စုံစမ်းစစ်ဆေးခံနေရပါတယ်။

အခုလိုသာ 'ထရမ့်'ပါဝင်ယှဉ်ပြိုင်လာမယ်ဆိုရင် ၂၀၂၀ က ဘိုင်ဒင်-ထရမ့်ရွေးကောက်ပွဲယှဉ်ပြိုင်မှုမျိုး ပြန်လည်မြင်တွေ့ရဖွယ်ရှိနေပါတယ်။

Source: Reuters
#Yangon_Media_Group

#World_Health
Published 4 November 2022

ကိုယ်ဝန်ဆောင်စဉ်ကာလအတွင်း နေ့စဉ်ကော်ဖီခွက်တဝက်ခန့် သောက်သုံးခြင်းဖြင့်ပင် မွေးလာတဲ့ကလေးမှာ အရပ်တစ်လက်မခန့်နီးပါးနိမ့်သွားနိုင်ကြောင်း အမေရိကန်ဆေးဘက်ဆိုင်ရာအဖွဲ့အစည်းဂျာနယ်(JAMA)မှ ဖော်ပြထားပါတယ်။

ဆရာဝန် ၁၀ ဦးခန့်နဲ့ သုတေသီများက အမေရိကန်တဝှမ်းမှ အသက် ၄ နှစ်နဲ့ ၈ နှစ်ကြား ကလေး ၂,၅၀၀ နီးပါးကို စစ်တမ်းကောက်ယူခဲ့ပါတယ်။

အရင်လေ့လာမှုတွေနဲ့မတူဘဲ သွေးထဲက ကဖင်းဓာတ်ပမာဏကို လေ့လာခဲ့တာဖြစ်ပါတယ်။

အဆိုပါလေ့လာချက်အရ ကိုယ်ဝန်ဆောင်စဉ်ကော်ဖီသောက်သုံးလေ့ရှိတဲ့ အမျိုးသမီးတွေက မွေးဖွားလာတဲ့ကလေးတွေဟာ ဆေးလိပ်သောက်တဲ့ကိုယ်ဝန်ဆောင်တွေက မွေးလာတဲ့ကလေးတွေလို အရပ်အမြင့်တူညီနေကြောင်း တွေ့ရှိရပါတယ်။

အရပ်နိမ့်ခြင်းဟာ ကိုယ်ဝန်ဆောင်တွေရော ကျန်တဲ့သူတွေမှာပါ နှလုံးဇီဝဖြစ်စဉ်ရောဂါဖြစ်နိုင်ချေမြင့်မားခြင်းနဲ့ ဆက်စပ်နေပါတယ်။

အဲဒီကနေမှ ဆီးချိုနဲ့ အဝလွန်ခြင်းတို့လည်း ဆက်လက်ဖြစ်ပွားလာနိုင်ပြီး ကော်ဖီသောက်ခြင်းနဲ့ ကိုယ်ဝန်ဆောင်ချိန်အတွင်း ဝန်လျှော့ချနိုင်ဖို့ကြိုးပမ်းကြတာနဲ့ ဆက်စပ်နေပါတယ်။

ကိုယ်ဝန်ဆောင်ကော်ဖီသောက်တာက ကလေးတွေအရပ်နိမ့်စေရတဲ့အကြောင်းအရင်းကို သေချာမသိကြသေးဘဲ ကဖင်းဓာတ်က သန္ဓေသားမှာ လှုံ့ဆော်ပေးတာမဟုတ်ဘဲ တစ်ရှူးတွေထဲမှာ စုပြုံလာတာဖြစ်ပါတယ်။

သားအိမ်မှာကဖင်းဓာတ်ထိတွေ့ခြင်းက မွေးလာတဲ့ကလေးရဲ့ ဖွံ့ဖြိုးကြီးထွားမှုအပေါ် ရေရှည်သက်ရောက်မှုရှိလား/မရှိလား ဆိုတာကို လေ့လာဆုံးဖြတ်ဖို့ အရေးကြီးနေပါတယ်။

Source: New York Post
#Yangon_Media_Group

#Local_News
Published_4 November 2022

တယ်လီဖုန်း ဆင်းကတ်မှတ်ပုံတင်မည့်ကာလကို ၂၀၂၃ ခုနှစ် ဇန်နဝါရီလ ၃၁ ရက်ထိသက်တမ်း တိုးမြှင့်လိုက်ကြောင်း ဆက်သွယ်ရေးညွန်ကြားမှုဦးစီးဌာနက ထုတ်ပြန်ထားသည်။

ဆင်းကတ်မှတ်ပုံတင်ရာတွင် အမည်၊ နိုင်ငံသားစိစစ်ရေးကတ်အမှတ်တို့ကို မှန် မမှန်စစ်ဆေးပြီး၂၀၂၃ ခုနှစ် ဇန်နဝါရီလ ၃၁ ရက် နောက်ဆုံးထား၍ ပြန်လည်ပြင်ဆင်ပေးရမည်ဖြစ်ပြီး ဖြည့်စွက်ရသည့် အမည် ၊ နိုင်ငံသားစိစစ်ရေးကတ်အမှတ် အချက်အလက်များကို လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ National Database အချက်အလက်များနှင့် တိုက်ဆိုင်စစ်ဆေးသွားမည် ဖြစ်ကြောင်း၊ယင်းတွင် အချက်အလက်မှန်ကန်စွာ ဖြည့်စွက်ထားခြင်းမရှိသော ဆင်းကတ်များကို ပိတ်သိမ်းမည်ဖြစ်ကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။

ယင်းအပြင် မှတ်ပုံတင်ထားသည့် ဆင်းကတ်များကို လဝကတွင်ရှိသည့် အချက်အလက်များနှင့် တိုက်ဆိုင်စစ်ဆေးသွားမည်ဖြစ်ကြောင်း သိရသည်။

မိုဘိုင်းဖုန်းသုံးစွဲသူများအနေဖြင့် မိမိ၏ အမည် ၊ နိုင်ငံသားစိစစ်ရေးကတ်အမှတ်တို မှန် မမှန် မြန်မာ့ဆက်သွယ်ရေးလုပ်ငန်း (MPT) *601# ၊ Atom *979*3*3# ၊ Ooredoo *666# နှင့် Mytel *966# ခေါ်ဆိုပြီး စစ်ဆေးနိုင်ကြောင်း ၊ ပြန်လည်ပြင်ဆင်မှတ်ပုံတင်ခြင်းကို သက်ဆိုင်ရာ အော်ပရေတာများ၏ အရောင်းဆိုင်များ ၊ အက်ပလီကေးရှင်းများနှင့် ဝက်ဘ်ဆိုက်တိုတွင် ဆောင်ရွက်နိုင်ကြောင်း သိရသည်။

#ymg/sth
#Yangon_Media_Group

#Local_News
Published _ 4 October 2022

လက်ရှိ ၂၀၂၂ခုနှစ်မှာ စတင်ဖွင့်လှစ်မည့် ငါးလုပ်ငန်းသိပ္ပံကျောင်း (တွံတေး)အတွက် လျှောက်လွှာများကို ယခုမှစတင်၍ နိုဝင်ဘာလ ၂၁ရက်ထိ နောက်ဆုံးထားလျှောက်ထားရန်နှင့် သင်တန်းသားများလည်း ခေါ်ယူနေကြောင်း စိုက်ပျိုးမွေးမြူရေးနှင့်ဆည်မြောင်းဝန်ကြီးဌာနမှ သိရသည်။

ငါးလုပ်ငန်းသိပ္ပံကျောင်းကို တက်ရောက်လိုသူများအနေနှင့် တက္ကသိုလ်ဝင်စာမေးပွဲကို သိပ္ပံဘာသာတွဲနှင့် အောင်မြင်ပြီး အသက်၂၂နှစ်ထက်မကြီးသူ ဖြစ်ရန် စသည့် သတ်မှတ်ချက်များရှိပြီး လျှောက်လွှာများကို ငါးလုပ်ငန်းဦးစီးဌာန ရုံးများ၊ ငါးလုပ်ငန်းစခန်းများ ငါးလုပ်ငန်းသိပ္ပံတွံတေးတို့ထံ ပေးပို့လျှောက်ထားနိုင်ကြောင်း ထုတ်ပြန်ကြေညာထားသည်။

ငါးလုပ်ငန်းသိပ္ပံ ဒီပလိုမာ သင်တန်းဟာ ၃နှစ်ကြာတက်ရောက်ရမှာဖြစ်ပြီး အဆိုပါ ငါးလုပ်ငန်းနှင့် ရေသတ္တဝါမွေးမြူရေးသင်တန်း အောင်မြင်ပါက အောင်လက်မှတ်ဖြစ်သည့် ( Diploma in Fisheries and Aquaculture)အား ပေးအပ်မည်ဟု သိရသည်။

မြန်မာနိုင်ငံတွင် ငါးပုစွန် ထုတ်လုပ်ခြင်း တိုးတက်မြင့်မားလာစေရန် အလယ်အလတ်အဆင့် ငါးပုစွန်ထုတ်လုပ်သူများကိုပျိုးထောင်ပေးပြီး ရေသတဝါမွေးမြူရေးကို စာတွေ့လက်တွေ့သင်ကြားကာ လုပ်ငန်းများတွင် လက်တွေ့အသုံးချစေနိုင်ရန် ရည်ရွယ်၍ ငါးလုပ်ငန်းသိပ္ပံအား ဖွင့်လှစ်ကြောင်း သိရှိရသည်။

ကျောင်းစတင်ဖွင့်လှစ်ချိန်တွင် ပထမနှစ်အတွက် သင်တန်းသား ၄၀ကို လက်ခံသင်ကြားပို့ချပေးမည်ဖြစ်ပြီး နောက်ပိုင်းတွင် ကျောင်းသားဦးရေတိုးမြှင့်လက်ခံခြင်းနှင့် ဒုတိယနှစ်နှင့် တတိယနှစ်သင်တန်းသားခေါ်ယူခြင်းများဆောင်ရွက်မည်ဖြစ်ကာ သင်တန်းဆင်းပါက အဆင့်မြင့်ပညာရပ်များကို ဆက်လက်လေ့လာဆည်းပူးနိုင်ရန် ပေါင်းကူးစာမေးပွဲများ ဖြေဆိုခွင့်ရရှိမည်ဖြစ်ကြောင်းသိရသည်။

#ymg/NN
#Yangon_Media_Group

#Local_News
Published _ 4 november 2022

လာမည့် တန်ဆောင်မုန်းလပြည့်နေ့မတိုင်မီ နိုဝင်ဘာလ ၅ရက်နေ့မှစ၍ ရန်ကုန်-ပြည် အထူးရထားအား ရိုးရိုးတွဲဆိုင်းများဖြင့် ပြေးဆွဲသွားမည်ဟု ရန်ကုန်ဘူတာကြီးရဲ့ရုံပိုင်ချုပ်ကြီးထံမှ သိရသည်။

အများပြည်သူများ ခရီးသွားလာရေးအဆင်ပြေစေရန် ပုံမှန်ခရီးစဉ်များအပြင် အထူးရထားများကို အခါကြီး ရက်ကြီးများ၌ အစဉ်အမြဲပြေးဆွဲပေးနေလျှက်ရှိကြောင်း ရုံပိုင်ချုပ်ကြီးဦးသောင်းထိုက်က YMG ကိုပြောခဲ့သည်။

" အခုလာမယ့် နိုဝင်ဘာလ ၅ရက်နေ့မှာ ရန်ကုန်-ပြည်အထူးရထားကို ပြေးဆွဲပေးသွားမှာပါ။ အမြဲတမ်း အခါကြီးရက်ကြီးတွေမှာ အခုလိုအထူးရထားတွေကို ပြေးဆွဲပေးနေပါတယ်" လို့ ရုံပိုင်ချုပ်ကြီးဦးသောင်းထိုက်က ဆိုသည်။

ပြီးခဲ့သည့် အောက်တိုဘာလ ၂၄ရက် ဒီပါဝလီနေ့တွင်လည်း ရန်ကုန်-မန္တလေး အထူးရထားများကို ပြေးဆွဲပေးခဲ့ကြောင်း ယင်းမှသိရသည်။

ရန်ကုန်-ပြည် ရထားလက်မှတ်နှုန်းထားများမှာ အထက်တန်း (၆၄၅၀)ကျပ်နှင့် ရိုးရိုးတန်း (၃၂၅၀) ကျပ်တို့ဖြစ်ပြီး ရန်ကုန်-မန္တလေး ရထားလက်မှတ်နှုန်းထားများမှာ (၁၅၄၅၀) ကျပ်များ ဖြစ်ကြသည်။

မြန်မာ့မီးရထားမှ ရန်ကုန်-ပြည် လေအိတ်အမြန်ရထား(နေ့စဉ်)၊ ကြည့်မြင်တိုင်-ပြည် စာပို့ရထား (နေ့စဉ်)၊ ရန်ကုန်-မော်လမြိုင် လေအိတ် အမြန်ရထား(နေ့စဉ်)၊ ရန်ကုန်-ပဲခူး(နေ့စဉ်)၊ ပျဉ်းမနား- တောင်တွင်းကြီး စာပို့ရထား(နေ့စဉ်)၊ ပုသိမ်-ကြံခင်း စာပို့ရထား(နေ့စဉ်)၊ မန္တလေး-ပြင်ဦးလွင် (စနေ)၊ ပြင်ဦးလွင်-ဂုတ်ထိပ်(တနင်္ဂနွေ)၊ သာစည်- ရွှေညောင်(တနင်္လာ)၊ ပြည်တော်သာ-ရေချမ်းပြင် (နေ့စဉ်)၊ တောင်ကြီး-ဘန်းယဉ်(နေ့စဉ်)ရထားလမ်းပိုင်းများကိုလည်း ပြေးဆွဲပေးလျက်ရှိသည်။

#ymg/NN
#Yangon_Media_Group