#Local_News
Published _ 27 July 2022

ပြည်တွင်းဒေါ်လာဈေးကွက်၌ ဒေါ်လာဈေးမြင့်တက်နေမှုကို ထိန်းညှိနိုင်ရေးအတွက် လက်ရှိကမ္ဘာ့ပေါက်ဈေးများနှင့် ချိန်ညှိကာ လုပ်ဆောင်နေကြောင်း နစက ပြောရေး ဆိုခွင့်ရှိသူ ဗိုလ်ချုပ်ဇော်မင်းထွန်းက ပြောခဲ့သည်။

ဇူလိုင်လ ၂၆ ရက်တွင် နေပြည်တော်၌ ကျင်းပသည့် ၁၈ ကြိမ်မြောက် နစက၏ သတင်းစာရှင်းလင်းပွဲတွင် ၎င်းက ယခုလို ပြောကြားခဲ့ခြင်းဖြစ်သည်။

"ဒေါ်လာဈေးနဲ့ ပတ်သက်ပြီးတော့ နိုင်ငံခြားငွေ သုံးစွဲရေး ကြီးကြပ်မှု ကော်မတီကနေ ဦးစီးပြီး ဆောင်ရွက်လျက်ရှိပါတယ်။ ကမ္ဘာ့ပေါက်ဈေးနဲ့ ချိန်နေတာ ရှိပါတယ်" ဟု ဗိုလ်ချုပ်ဇော်မင်းထွန်းက ပြောသည်။

ဇူလိုင်လ အစောပိုင်းအတွင်းမှာ ပြည်တွင်း ရင်းနှီးမြှုပ်နှံမှုကဏ္ဍတွေ ဆောင်ရွက်နေသည့် ကုမ္ပဏီများအပေါ် နိုင်ငံခြားငွေနှင့် ပတ်သက်၍ ဗဟိုဘဏ်ကကန့်သတ်မှုများ လုပ်ဆောင်ခဲ့သည့်အတွက် ပြည်တွင်း ဒေါ် လာဈေးကွက်တွင် ဈေးနှုန်းမြင့်တက်မှုများ ဖြစ်ပေါ်ခဲ့ခြင်းဖြစ်သည်။

ယင်းကဲ့သို့ ဒေါ်လာဈေး မငြိမ်သက်မှုများ ဖြစ်ပေါ်မှုကြောင့် ပြည်တွင်းစီးပွားရေးလုပ်ငန်းရှင်များအကြား စိုးရိမ်မှုများမြင့်တက်ခဲ့သလို ရွှေ၊ ဆန်၊ ဆီနှင့် ဆေးဝါးအပါအဝင် အခြေခံစားသောက်ကုန်ဈေးနှုန်းများလည်း သိသိသာသာမြင့်တက်မှုများ ဖြစ်ပေါ်ခဲ့သည်။

ဇူလိုင်လ ဒုတိယပတ်အတွင်း၌ ဗဟိုဘဏ်မှ နိုင်ငံခြားငွေ ကန့်သတ်ချက်များတွင် နိုင်ငံ ခြားသား ပိုင်ဆိုင်မှု ၃၅ ရာခိုင်နှုန်း ပါဝင်သည့် ရင်းနှီးမြှုပ်နှံမှုလုပ်ငန်းများနှင့် ယခင်က ကင်းလွတ်ခွင့်ပြုထားသည့် ရင်နှီးမြှုပ်နှံမှုကုမ္ပဏီများကို ၎င်းတို့ပိုင် ဒေါ်လာများအား ဗဟိုဘဏ်သတ်မှတ်ဈေးနှုန်း တစ်ဒေါ်လာလျင် ၁၈၅၀ ကျပ်ဖြင့် ကျပ်ငွေသို့ လဲလည်ရန် ညွှန်ကြားခဲ့ခြင်း ဖြစ်သည်။

ယင်းသို့ ညွှန်ကြားပြီးနောက်ပိုင်း ဈေးကွက်အတွင်း ဒေါ်လာဈေးနှုန်းမှာ မြင့်တက်လာခဲ့ရာ လက်ရှိတွင် ဈေးကွက်အတွင်း၌ အမေရိကန်(၁)ဒေါ်လာလျင် မြန်မာငွေ (၂၄၀၀) ဝန်းကျင် ပေါက်ဈေးရှိနေခြင်း ဖြစ်သည်။

ymg/NN
#Yangon_Media_Group

#World_Politics
Published 27 July 2022

အင်္ဂါနေ့က ကွန်ဂိုဒီမိုကရက်တစ်သမ္မတနိုင်ငံအရှေ့ပိုင်းတွင် ကုလသမဂ္ဂဆန့်ကျင်ရေး ဆန္ဒပြပွဲများ ဆက်လက်ဖြစ်ပွားခဲ့ပြီး ဆန္ဒပြပွဲဒုတိယနေ့အတွင်း ကုလသမဂ္ဂငြိမ်းချမ်းရေးတပ်ဖွဲ့ဝင် ၃ ဦးနဲ့ အရပ်သားအနည်းဆုံး ၁၂ ဦးသေဆုံးခဲ့ကြောင်း အာဏာပိုင်များက ထုတ်ပြန်လိုက်ပါတယ်။

ကုလမှချမှတ်ထားတဲ့ ကွန်ဂိုသမ္မတနိုင်ငံအားကာကွယ်ပေးခြင်းနှင့် ငြိမ်းချမ်းရေးတည်မြဲရေးရည်မှန်းချက်(MONUSCO)ဟာ အရပ်သားတွေကို နှစ်ပေါင်းများစွာအကြမ်းဖက်လာတဲ့ပြည်သူ့စစ်ဘက်ဒဏ်တွေကနေ ကာကွယ်နိုင်ခြင်းမရှိတာကြောင့် မကျေနပ်ကြဘဲ ဆန္ဒပြပွဲဖြစ်ပေါ်လာတာဖြစ်ပါတယ်။

ကုလပြောရေးဆိုခွင့်ရှိသူ'ဖာဟန်ဟက်'က ထုတ်ပြန်ကြေညာခဲ့ရာမှာ ကုလအထွေထွေအတွင်းရေးမှူးချုပ်'အန်တိုနီယိုဂူတာရက်စ်'က အကြမ်းဖက်မှုကို ရှုတ်ချကြောင်း၊ ကုလသမဂ္ဂငြိမ်းချမ်းရေးဆိုင်ရာအမှုထမ်းများကို တိုက်ခိုက်ခြင်းက စစ်ရာဇဝတ်မှုမြောက်နိုင်ကြောင်း၊ ကွန်ဂိုအာဏာပိုင်များအနေနဲ့ ဒီဖြစ်ရပ်များကိုစုံစမ်းစစ်ဆေးပြီး အပြစ်ရှိသူများကို မျှမျှတတစီရင်ဖို့တောင်းဆိုကြောင်း ပြောကြားခဲ့ပါတယ်။

တနင်္လာနေ့က ဂိုမာမြို့မှာ ဆန္ဒပြပွဲစတင်ခဲ့ပြီး အင်္ဂါနေ့မှာတော့ ဘူတမ်ဘိုအထိရောက်ရှိလာကာ တာဝန်ထမ်းနေတဲ့ ကုလစစ်သည်တစ်ဦးနဲ့ ကုလရဲအရာရှိ ၂ ဦး ပစ်သတ်ခံရပါတယ်။

အဆိုပါ ၂ မြို့စလုံးမှာ ကုလသမဂ္ဂငြိမ်းချမ်းရေးဆိုင်ရာ တပ်ဖွဲ့ဝင်တွေက အင်အားသုံးနှိမ်နင်းခဲ့တယ်လို့ စွပ်စွဲမှုများရှိနေပြီး ရာဂဏန်းလောက်ရှိတဲ့ ဆန္ဒပြသူတွေက ကျောက်ခဲများဖြင့် ပစ်ပေါက်ကာ ကုလအဆောက်အဦများကို ဓာတ်ဆီများဖြင့် မီးရှို့ဖျက်ဆီးခဲ့ကြပါတယ်။

ကုလငြိမ်းချမ်းရေးတပ်ဖွဲ့ဝင်တွေက ဂိုမာမြို့က ဆန္ဒပြသူ ၂ ဦးကို အသေပစ်ခတ်ခဲ့တာကို ရိုက်တာသတင်းထောက်က မြင်တွေ့ခဲ့ရပြီး အစိုးရအဖွဲ့မှ ပြောရေးဆိုခွင့်ရှိသူ'ပက်ထရစ်မူယာယာ'ကတော့ အနည်းဆုံးလူ ၅ ဦးသေဆုံးကာ အယောက် ၅၀ ထက်မနည်းဒဏ်ရာရရှိခဲ့ပါတယ်။

ဘူတမ်ဘိုမှာလည်း အရပ်သားအနည်းဆုံး ၇ ဦးသေဆုံးပြီး ဒဏ်ရာရသူအရေအတွက် မသိရသေးကြောင်း ရဲမှူးချုပ်'ပေါလ်နဂိုမာ'က ပြောပြပါတယ်။

ကုလသမဂ္ဂငြိမ်းချမ်းရေး လုပ်ငန်းစဉ်တွေဟာ နှစ်ပေါင်းများစွာတိုင်အောင် အလွဲသုံးစားလုပ်ခဲ့ကြတယ်ဆိုပြီး စွပ်စွဲမှုတွေနဲ့ရင်ဆိုင်နေရပါတယ်။

ကုလတပ်ဖွဲ့များကြောင့် သေဆုံးမှုများ၊ ထိခိုက်ဒဏ်ရာရရှိမှုများဖြစ်ပေါ်ခဲ့ရင် အရေးယူမှုများဆောင်ရွက်သွားမယ်လို့ 'ဟက်'က ဆိုပါတယ်။

ကုလတပ်ဖွဲ့များအနေနဲ့ ဆန္ဒပြသူများအကြား မျက်ရည်ယိုဗုံးဖြင့်လူစုခွဲရန်နဲ့ လိုအပ်လာမှသာ သတိပေးသေနတ်ပစ်ဖောက်ရန် မှာကြားထားပါတယ်။

ထိုဆန္ဒပြပွဲများကို အာဏာရပါတီရဲ့ လွတ်လပ်တဲ့အဖွဲ့ခွဲမှ ဦးဆောင်ပြုလုပ်တာဖြစ်ပြီး သူတို့အဖွဲ့က ထိရောက်ခြင်းမရှိတဲ့ ကုလလုပ်ငန်းစဉ်များ ရုတ်သိမ်းပေးဖို့ အလိုရှိနေတာဖြစ်ပါတယ်။

ယခုလများအတွင်း ကွန်ဂိုအရှေ့ပိုင်းမှာ M23 သူပုန်အဖွဲ့နဲ့ ဒေသခံတပ်ဖွဲ့တွေကြား တိုက်ပွဲများပြန်လည်ဖြစ်ပွားလျက်ရှိရာ လူထောင်နဲ့ချီပြီး ထွက်ပြေးနေရပါတယ်။

ကွန်ဂိုစစ်တပ်နဲ့ ယူဂန်ဒါစစ်တပ်တို့ပူးပေါင်းကာ နှစ်ပေါင်းများစွာဆန့်ကျင်တိုက်ခိုက်နေပေမယ့် ပြည်သူ့စစ်ဘက်က ဆက်လက်ဆန့်ကျင်လျက်ရှိပါတယ်။

ကွန်ဂိုမှာ ၂၀၁၀ လောက်ကစပြီး MONUSCO လုပ်ငန်းစဉ်လုပ်ဆောင်နေခဲ့ရာ ၂၀၂၁ နိုဝင်ဘာမှာ တပ်ဖွဲ့ဝင် ၁၂,၀၀၀ နဲ့ ရဲအင်အား ၁,၆၀၀ ရှိခဲ့ရာမှ တဖြည်းဖြည်းချင်း ဆုတ်ခွာခဲ့ကြပါတယ်။

ဆန္ဒပြသူတွေက ဂိုမာမြို့က ကုလဝန်ထမ်းနေအိမ်တွေကို ဝင်ရောက်သောင်းကျန်းခဲ့ပြီး ဝန်ထမ်းတွေကို စစ်တပ်ကစောင့်ကြပ်ခေါ်ထုတ်သွားခဲ့တာကို ရိုက်တာသတင်းထောက်က မြင်တွေ့ခဲ့ပါတယ်။

သေဆုံးသွားတဲ့ ကုလတပ်ဖွဲ့ဝင် ၂ ဦးက အိန္ဒိယလူမျိုးဖြစ်ပြီး ကျန် ၁ ဦးကတော့ မော်ရိုကိုလူမျိုးဖြစ်ပါတယ်။

ကုလသမဂ္ဂလုံခြုံရေးကောင်စီက ထိုအခြေအနေနဲ့ပတ်သက်ပြီး အင်္ဂါနေ့မှာ တံခါးပိတ်ဆွေးနွေးသွားမှာဖြစ်ကြောင်း သံတမန်တွေကပြောကြားခဲ့ပါတယ်။

Source: Reuters
#Yangon_Media_Group

#Local_News
Published - 27 July 2022

၂၀၂၂ ခုနှစ်ဘဏ္ဍာနှစ် ၃ လ ကျော်အတွင်း ပြည်ပသို့ ပဲမျိုးစုံတင်ပို့မှုမှ ကန်ဒေါ်လာ သန်း ၄၀၀ ကျော် ရရှိထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ စာရင်းများအရ သိရသည်။

၂၀၂၂-၂၀၂၃ ဘဏ္ဍာနှစ် ပင်လယ်ရေကြောင်းမှ ပဲမျိုးစုံတန်ချိန် ၃ သိန်း ၉ သောင်းကျော်တင်ပို့ခဲ့ပြီးနယ်စပ်မှ တန်ချိန် ၁ သိန်း ၄ သောင်းနီးပါး တင်ပိုခဲ့ကာစုစုပေါင်း တန်ချိန် ၅ သိန်း ၃ သောင်း ၁ ထောင်ကျော်အထိ တင်ပို့ပြီးဖြစ်ကြောင်း သိရသည်။

ယင်းအပြင် ဘဏ္ဍာနှစ်အတွင်း ပဲတီစိမ်းကို အများဆုံး တင်ပို့ထားပြီး တန်ချိန် ၂ သိန်း ၇ သောင်းနီးပါးအထိရှိကြောင်း၊ မတ်ပဲ တင်ပို့မှုသည် တန်ချိန် ၁ သိန်း ၁ သောင်းကျော်နှင့် ပဲစဉ်းငုံ တင်ပို့မှုသည် တန်ချိန် ၇၇၀၀ ကျော်ရှိကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ စာရင်းများအရ သိရသည်။

ယင်းအပြင် ပြည်ပမှ ဝင်ရောက်သည့် နိုင်ငံခြားငွေများကို ၁ ဒေါ်လာ ၁,၈၅၀ ကျပ်နှုန်းဖြင့် တစ်ရက်အတွင်း မြန်မာငွေလဲလှယ်ရမည်ဟု ဗဟိုဘဏ်၏ ညွှန်ကြားချက်ကြောင့် Export လုပ်နေသည့် ကုန်သည်များ တင်ပိုသည့်လုပ်ငန်းများ အဟန့်အတားများ ဖြစ်ပေါ်နေသည့်အတွက် စျေးကွက်မှာ ငြိမ်နေခြင်းဖြစ်ကြောင်းလည်း ကုန်သည်များ၏ ပြောပြချက်အရ သိရသည်။

မြန်မာနိုင်ငံမှ ပဲများကို အိန္ဒိယနိုင်ငံသို့ ၇၅ ရာခိုင်နှုန်းအထိ တင်ပို့နေပြီး သီရိလင်္ကာ၊ နီပေါ၊ မလေးရှား၊ ထိုင်းနှင့် UAE နိုင်ငံများကိုလည်း ပဲမျိုးစုံတင်ပို့နေကြောင်း သိရသည်။

ymg/sth
#Yangon_Media_Group

#World_Technology
Published 27 July 2022

ညအိပ်ပျော်ဖို့အရေး အိပ်ရာထဲလူးလိမ့်နေရတာလောက် စိတ်ညစ်စရာ ကောင်းတာမရှိပါဘူး။

တစ်ခုခုကိုရေတွက်တဲ့နည်းလမ်းနဲ့လည်း အလုပ်မဖြစ်ဘူးဆိုရင် ယခုလေ့လာချက်အသစ်က ကူညီပေးနိုင်မှာပါ။

ဩစတင် တက္ကဆပ်တက္ကသိုလ်မှ သုတေသီများက အပူပေးအအေးပေးစနစ်ဖြင့် လျင်မြန်စွာအိပ်မောကျစေမယ့် ခေါင်းအုံးနဲ့မွေ့ရာတစ်မျိုးကို တီထွင်ခဲ့ကြပါတယ်။

စမ်းသပ်မှုပြုလုပ်ရာမှာ ထိုစနစ်ဖြင့်စမ်းသပ်ခံသူတွေက ပုံမှန်ထက် ၅၈ ရာခိုင်နှုန်းလောက် စောပြီးအိပ်ပျော်သွားခဲ့ကြောင်း သုတေသီများဖော်ပြခဲ့ပါတယ်။

ဒီပစ္စည်းက ဘယ်အချိန်မှာထွက်ရှိမလဲ ဘယ်လောက်ကုန်ကျမလဲဆိုတာကို သေချာမသိရသေးပေမယ့် ထိုနည်းပညာအတွက် သုတေသီများက မူပိုင်ခွင့်ရယူထားပါပြီ။

လူတွေရဲ့အိပ်ချင်လာတဲ့ခံစားချက်ကို ခန္ဓာကိုယ်အပူချိန်နဲ့ထိန်းသိမ်းထားတာဖြစ်ပါတယ်။

နေ့ညလည်ပတ်မှုစနစ်အရ ခန္ဓာကိုယ်အပူချိန်ဟာ ညဘက်မှာ အလိုလိုကျဆင်းလာပြီး အိပ်ချိန်ရောက်ပြီဆိုတဲ့ သဘောဖြစ်ပါတယ်။

လူတွေအိပ်ပျော်နိုင်အောင် အပူချိန်ထိန်းညှိနိုင်မလားဆိုတာကို သိရဖို့အတွက် သုတေသီများကလေ့လာခဲ့ကြပါတယ်။

၂၀၁၉ ခုနှစ်ကလေ့လာချက်တစ်ခုမှာ အိပ်ရာမဝင်ခင် တစ်နာရီ နှစ်နာရီလောက်အလိုမှာ ရေနွေးနွေးဖြင့် ရေချိုးခြင်းဖြင့် ပိုမိုလျင်မြန်စွာနဲ့နှစ်ခြိုက်စွာအိပ်ပျော်စေကြောင်း တွေ့ရှိခဲ့ကြပါတယ်။

အဲဒီနောက် ထိုကဲ့သို့အခြေအနေမျိုးရရှိစေတဲ့ အပူချိန်ထိန်းညှိနိုင်တဲ့ မွေ့ရာနဲ့ခေါင်းအုံးတို့ကိုတီထွင်ဖို သုတေသီများဆုံးဖြတ်ခဲ့ပါတယ်။

တီထွင်ထားတဲ့မွေ့ရာ ၂ မျိုးက ရေကိုအသုံးပြုတဲ့စနစ်နဲ့ လေကိုအသုံးပြုတဲ့ စနစ်တို့ ဖြစ်ပါတယ်။

ထိုစနစ် ၂ မျိုးစလုံးက အပူပေးခြင်းနဲ့ အအေးပေးခြင်းတို့ကို သပ်သပ်စီလုပ်ဆောင်ပေးပါတယ်။

ခန္ဓာကိုယ်တွင်းပိုင်းကို အပူချိန် ၂၅ ဒီဂရီဆဲလ်စီးယပ်စ်ဖြစ်စေပြီး လည်ပင်း၊ ခြေဖျားလက်ဖျားတို့ကိုတော့ ၃၃ ဒီဂရီဆဲလ်စီးယပ်စ်ပေးပါတယ်။

ထိုနည်းလမ်းဖြင့် ခန္ဓာကိုယ်တွင်းအပူကိုလျှော့ချပေးကာ လျင်မြန်စွာအိပ်ပျော်စေပါတယ်။

စမ်းသပ်ခံလူတွေထဲက ၆ ယောက်ကို လေပေးစနစ်မွေ့ရာနဲ့အိပ်ခိုင်းပြီး ၅ ယောက်ကတော့ ရေအသုံးအပြုစနစ်နဲ့ စမ်းသပ်ကာ ကျန်တဲ့လူတွေကိုတော့ သာမန်မွေ့ရာနဲ့ အိပ်စေခဲ့ပါတယ်။

ရေအသုံးပြုစနစ်နဲ့ လေအသုံးပြုစနစ်မွေ့ရာတွေနဲ့ အိပ်သူတွေက သိသာတဲ့ကွာခြားချက်မရှိဘဲ သာမန်မွေ့ရာနဲ့ အိပ်သူတွေထက် ၅၈ ရာခိုင်နှုန်း ပိုမိုစောစီးစွာ အိပ်ပျော်ခဲ့ကြပါတယ်။

ခန္ဓာကိုယ်တွင်းက သွေးစီးဆင်းမှုတွေက ခြေလက်တွေကိုရောက်ရှိစေပြီး ကိုယ်တွင်းအပူချိန်ကိုတော့ ကျဆင်းစေပါတယ်။

ဒါ့အပြင် နှလုံးသွေးကြောစနစ်ကိုလည်း ဖိစီးမှုလျော့ကျစေကာ ညအချိန်မှာ သွေးပေါင်ချိန်အနည်းငယ်ကျဆင်းစေပါတယ်။

သုတေသီအဖွဲ့က ဒီနည်းပညာအတွက် မူပိုင်ခွင့်ရယူထားပြီး ပူးပေါင်းထုတ်လုပ်ဖြန့်ချိဖို့ မွေ့ရာကုမ္ပဏီများ ရှာဖွေနေပါတယ်။

Source: DailyMail
#Yangon_Media_Group

#Local_News
Published - 27 July 2022

ပြည်တွင်း၌ ကိုဗစ်ကူးစက်နှုန်းသိသိသာသာလျော့နည်းလာသော်လည်း နှာခေါင်းစည်းမဖြစ်မနေတပ်ဆင်ရန် ကျန်းမာရေးဝန်ကြီးဌာနမှ ထုတ်ပြန်ကြေညာထားသည်။

အဆိုပါကြေညာချက်တွင် အခန်းတွင်း၌ လူတစ်ဦးနှင့်တစ်ဦး နီးကပ်စွာရှိနေခြင်း၊ အများပြည်သူအသုံးပြုသော မော်တော်ယာဉ်၊ မီးရထား၊ သင်္ဘော၊ လေယာဉ်စသည့် ယာဉ်များဖြင့် ခရီးသွားလာခြင်း၊ အများပြည်သူ ဝင်/ထွက်သွားလာအသုံးပြုသော ဆေးရုံ/ကျန်းမာရေးဌာနများ၊ ရုံးများ၊ ကျောင်းများ၊ ဈေးများ၊ ဈေးဝယ်စင်တာများ၊ ဘိုးဘွားရိပ်သာ အစရှိသော လူထူထပ်သောနေရာများ၌လူအများနှင့် အတူရှိနေခြင်း၊ ဖျားနာခြင်း၊ ချောင်းဆိုးခြင်း၊ နှာချေခြင်း၊ နှာစေးခြင်း၊ လည်ချောင်းနာခြင်း၊ ကိုယ်လက်မအီမသာဖြစ်ခြင်း၊ ကိုယ်လက်ကိုက်ခဲခြင်း၊ ရုတ်တရက်အနံ့အရသာပျောက်ဆုံးခြင်း စသည့် ကိုဗစ်-၁၉ ရောဂါ သံသယလက္ခဏာ တစ်ခုခုရှိခြင်းစသည့်အနေအထားတိုတွင် တပ်ဆင်ရန်လိုအပ်ကြောင်း ထုတ်ပြန်ထားသည်။

ယင်းအပြင် ကျန်းမာရေးဝန်ကြီးဌာနမှ ကိုဗစ်ကာကွယ်ဆေးအကြိမ်ပြည့်ထိုးနှံခြင်းနှင့် ထပ်ဆောင်းကာကွယ်ဆေး မဖြစ်မနေထိုးရန် တိုက်တွန်းထားပြီး ကိုဗစ်လူနာများကိုလည်း သက်ဆိုင်ရာဆေးရုံများတွင်သာ လက်ခံကုသပေးမည်ဖြစ်ကြောင်း သိရသည်။

ကိုဗစ်-၁၉ ရောဂါကူးစက်ခံရသူဦးရေမှာ ၆၁၃,၉၈၀ ယောက် ရှိပြီး ရောဂါပြန်လည်ပျောက်ကင်းသက်သာလာသူပေါင်း ၅၉၂,၈၃၆ ယောက် ရှိခဲ့ကြောင်း၊ ယင်းအပြင်ကိုဗစ်-၁၉ ရောဂါကူးစက်ခံရပြီး ထပ်မံသေဆုံးသူမရှိပဲ စုစုပေါင်း သေဆုံးသူ အရေအတွက်မှာ၁၉,၄၃၄ ယောက် ရှိကြောင်း သိရသည်။

ymg/sth
#Yangon_Media_Group

#Local_News
Published_27 July 2022

မလေးရှားနိုင်ငံ KLIA ထိန်းသိမ်းရေးစခန်းရှိ မြန်မာနိုင်ငံသား ၃၇ ဦး ပြည်တော်ပြန်ခွင့်ရရေးအတွက် ကွာလာလမ်ပူမြို့ရှိ မလေးရှားနိုင်ငံဆိုင်ရာ မြန်မာသံရုံး၏ သံအရာရှိနှင့် တာဝန်ရှိသူများက စီစဉ်နေကြောင်း သိရသည်။

ဇူလိုင်လ ၂၆ ရက်တွင် ယင်းတို့ ပြည်တော်ပြန်ခွင့်ရရှိရေးအတွက် လုပ်ဆောင်နေခြင်းဖြစ်ပြီး မြန်မာနိုင်ငံသားဖြစ်သည့် အထောက်အထားပြည့်စုံသူများအား ဦးစားပေးကာ အမြန်ဆုံး စီစဉ်မည်ဟု မလေးရှားနိုင်ငံဆိုင်ရာ မြန်မာသံရုံးက ထုတ်ပြန်ထားသည်။

မလေးရှားနိုင်ငံတွင် ဖမ်းဆီးခံရသော မြန်မာနိုင်ငံသားများအနေဖြင့် ပြစ်ဒဏ်ကျခံပြီးသော်လည်း ထိန်းသိမ်းရေး စခန်းများတွင် ဆက်လက်ထိန်းသိမ်းခံနေသည့်အတွက် မြန်မာနိုင်ငံကို ပြန်လည်ပို့ဆောင်ရန် မြန်မာသံရုံးက အမြန် စီစဉ်နေရခြင်း ဖြစ်ကြောင်း သိရသည်။

ymg/mt
#Yangon_Media_Group

#Local_News
Published_27 July 2022

တောင်ကိုရီးယားနိုင်ငံသို့ အလုပ်သမားအသစ် ၁၄၂ ဦး ထပ်မံသွားရောက်ကြကြောင်း ဆိုးလ်မြို့ရှိ မြန်မာသံရုံး၏ ထုတ်ပြန်ချက်တွင် ဖော်ပြထားသည်။

အဆိုပါ အလုပ်သမားများမှာ စိုက်ပျိုးရေးနှင့် မွေးမြူရေးလုပ်သားအဖြစ်အသစ်ဝင်ရောက် လုပ်ကိုင်မည့် လုပ်သားသစ်(၂၃)ဦးနှင့် ကုန်ထုတ်လုပ်သားအဖြစ် အသစ်ဝင်ရောက်လုပ်ကိုင်မည့် လုပ်သားသစ်(၁၁၉)ဦး တို့ဖြစ်ကြောင်း၊ ရန်ကုန်မှ အင်ချွန်းအပြည်ပြည်ဆိုင်ရာလေဆိပ်သို ဇူလိုင်လ ၂၆ ရက်တွင် ရောက်ရှိခဲ့ကြကြောင်း ထုတ်ပြန်ချက်တွင် ဖော်ပြထားသည်။

ယင်းတို့အား တောင်ကိုရီးယားနိုင်ငံဆိုင်ရာဆိုးလ်မြို့ရှိ မြန်မာသံရုံးမှ အလုပ်သမားသံအရာရှိကကြိုဆို၍ အလုပ်သမားများ သိရှိလိုက်နာသင့်သည့် အချက်များကို မှာကြားခြင်း၊ လိုအပ်သည်များ ကူညီပံ့ပိုးပေးခြင်းများပြုလုပ်ခဲ့ကြောင်း သိရသည်။

လက်ရှိအချိန်အထိ တောင်ကိုရီးယားနိုင်ငံ၌ မြန်မာလုပ်သား ၄၀၀၀၀ ကျော်ရောက်ရှိလုပ်ကိုင်နေကြကြောင်း အလုပ်သမားရေးဝန်ကြီးဌာန စာရင်းများအရ သိရသည်။

ymg/mt
#Yangon_Media_Group

#Local_News
Published _27 July 2022

ပန်းဆိုးတမ်း-ဒလပြေးဆွဲနေသည့် ချယ်ရီသင်္ဘော လက်မှတ်ခများအား သြဂုတ်လ ၁ ရက်မှစတင်ကာ ရေယာဉ်စီးနင်းခနှုန်းထား ပြောင်းလဲကောက်ခံမည် ဟုသိရသည်။

ရေယာဉ်စီးနင်းခနှုန်းထားအနေဖြင့် လက်ရှိတွင် ခရီးသည်တစ်ဦးလျှင် ၁၀၀ ကျပ်ကောက်ခံလျက်ရှိတာဖြစ်ပြီး သြဂုတ်လ ၁ရက်နေ့မှ စတင်ကာ ခရီးသည်တစ်ဦးလျှင် ၂၀၀ ကျပ်ဖြင့် တိုးမြင့်ကောက်ခံသွားမည်ဟု သိရသည်။

ယင်းကဲ့သို့ ပြောင်းလဲကောက်ခံရာတွင် ကုန်ပစ္စည်းတင်ဆောင်ခ ၊ စက်ဘီး၊ ဆိုက်ကား၊ ဆိုင်ကယ်တင်ဆောင်ခများမှာ ပြောင်းလဲခြင်းမရှိဘဲ ယခင်နှုန်းထားများဖြစ်သော စက်ဘီးတင်ဆောင်လျှင် ၁၀၀ ကျပ် ၊ ဆိုက်ကားတင်ဆောင်လျှင် ၂၀၀ ကျပ် ၊ ဆိုင်ကယ်တင်ဆောင်လျှင် ၈၀၀ ကျပ် အတိုင်းသာ ကောက်ခံသွားမည်ဖြစ်ကြောင်း သိရသည်။

ymg/NN
#Yangon_Media_Group

#World_Health
Published 27 July 2022

မျက်ကပ်မှန်တပ်ဆင်ခြင်းဖြင့် ရောဂါပိုးဝင်ရောက်ခြင်း၊ ပစ္စည်းချို့ယွင်းခြင်း၊ ဓာတ်မတည့်ခြင်း၊ အောက်ဆီဂျင်မလုံလောက်ခြင်းနဲ့ မျက်လုံးတွင်း သွေးဖိအားတက်ခြင်းတို့ ဖြစ်ပေါ်နိုင်တဲ့အပြင် အမြင်အာရုံပြန်ကောင်းမလာနိုင်တော့တဲ့အထိ ပျက်စီးနိုင်ကြောင်း အစ္စရေးလ်ဆေးဘက်ဆိုင်ရာအဖွဲ့အစည်းဂျာနယ်မှာ ဖော်ပြခဲ့ပါတယ်။

ဒီလိုအခြေအနေတွေက အသက် ၁၅ နှစ်မှ ၁၉ နှစ်ကြားဆယ်ကျော်သက်တွေမှာ အများဆုံးဖြစ်နိုင်ပေမယ့် သူတို့ထက်ငယ်ရွယ်သေးတဲ့သူတွေကတော့ မျက်လုံးကျန်းမာရေးကို ပုံမှန်စစ်ဆေးပေးဖို့ စောင့်ကြပ်ပေးမယ့် အုပ်ထိန်းသူတွေရှိနေပါတယ်။

မျက်ကပ်မှန်သန့်ရှင်းစေရန် အခြေခံနည်းလမ်းတွေဖြစ်တဲ့ မျက်ကပ်မှန်မကိုင်ခင်လက်ဆေးခြင်း၊ ပိုးသတ်ဆေးဖြင့် သန့်စင်ခြင်းတို့ကို ဆယ်ကျော်သက်လူငယ်တွေက ပြုလုပ်လေ့မရှိပါဘူး။

အချိန်ကာလအလိုက် မျက်ကပ်မှန်လဲလှယ်ခြင်းမျိုး မလုပ်ကြဘဲ အိပ်တဲ့အခါ တပ်ဆင်ထားတာမျိုး ရှိကြပါတယ်။

အိပ်နေစဉ်မျက်ကပ်မှန်တပ်ဆင်ထားမိပါက မျက်ကြည်လွှာထံသွေးလည်ပတ်ရောက်ရှိမှု နည်းပါးသွားပြီး မျက်လုံးကိုထိခိုက်စေလောက်တဲ့အထိဖြစ်စေနိုင်ပါတယ်။

မျက်ကပ်မှန်အမာသား တပ်ဆင်သူတွေမှာ မျက်ကြည်လွှာက မျက်ကပ်မှန်နဲ့ အံဝင်အောင် သူ့အလိုလိုပုံသဏ္ဍာန်ပြောင်းလဲ ပေးရပါတယ်။

တစ်နေ့လောက် မတပ်ဖြစ်တဲ့အခါ မျက်ကြည်လွှာက ပုံမှန်အခြေအနေသို့ပြန်ပြောင်းသွားတတ်တာကြောင့် ခဏခဏမျက်ကြည်လွှာသဏ္ဍာန်မပြောင်းလဲရအောင် နေ့စဉ်တပ်ဆင်ဖို့ လိုအပ်ပါတယ်။

မျက်ကပ်မှန်ကြောင့် အမြှေးပါးရောင်တဲ့ အခြေအနေကလည်း အဖြစ်များတဲ့ ဓာတ်မတည့်ခြင်းမျိုးဖြစ်ပြီး နီရဲခြင်း၊ ယားယံခြင်း၊ နာကျင်ခြင်းတို့ ခံစားရနိုင်ပါတယ်။

မျက်ကပ်မှန်သန့်စင်ပေးတဲ့ ဓာတုအရည်တွေကို ပြင်းအားများများနဲ့သန့်စင်မိပါကလည်း ဓာတုတုံ့ပြန်မှုပြင်းပြင်းထန်ထန်ဖြစ်တတ်ပါတယ်။

အစ္စရေးလ်မှာ မျက်ကပ်မှန်တပ်တင်သူ ခန့်မှန်းချေ အယောက် ၃ သိန်းခန့်ရှိပြီး ပျမ်းမျှအသက်တွေက ၃၀.၃ နှစ်ရှိကာ ၁၀ ယောက်မှာ ၆ ယောက်ကျော်က အမျိုးသမီးတွေဖြစ်ပါတယ်။

အနောက်တိုင်းနိုင်ငံတွေမှာ အသက် ၄၅ နှစ်အရွယ်အထိ မျက်ကပ်မှန်တပ်ဆင်ခြင်းက မျက်ကြည်လွှာရောဂါပိုးဝင်ရောက်ခြင်း အဖြစ်အများဆုံးဖြစ်တဲ့အပြင် အမြင်အာရုံပျောက်နိုင်တဲ့အထိ အန္တရာယ်ဖြစ်နိုင်ပါတယ်။

Pseudomonas aeruginosa ဆိုတဲ့ဘက်တီးရီးယားဟာ မျက်ကြည်လွှာကို ရက်ပိုင်းအတွင်း ဖျက်ဆီးပစ်နိုင်ပါတယ်။

အခုဆိုရင် မျက်ကပ်မှန်တွေကို အွန်လိုင်းကနေဝယ်ယူလာကြတဲ့အခါ ဆရာဝန်တွေနဲ့ မတိုင်ပင်ဖြစ်တာကြောင့် နောက်ဆက်တွဲဆိုးကျိုးတွေဖြစ်လာနိုင်ပါတယ်။

အန္တရာယ်မဖြစ်စေတဲ့ အခြေအနေမျိုးကြုံ‌တွေ့ရင်တောင် မျက်ကပ်မှန်ကိုဆက်ပြီး မတပ်ဆင်ကြပါဘူး။

မျက်ကပ်မှန်တပ်ဆင်တဲ့အခါ မျက်လုံးနဲ့မျက်ကပ်မှန်အသားမကျခြင်း၊ နီရဲခြင်း၊ ယားယံခြင်း၊ နာကျင်ခြင်း၊ အမြင်ဝေဝါးခြင်းတိုဖြစ်ပေါ်တယ်ဆိုရင် မျက်ကပ်မှန်ကို ချက်ချင်းချွတ်ပစ်ပြီး ကျွမ်းကျင်ပညာရှင်နဲ့ဆွေးနွေးတိုင်ပင်သင့်ကြောင်း သုတေသီများကအကြံပြုထားပါတယ်။

Source: The Jerusalem Post
#Yangon_Media_Group

#Local_News
Published_ 27 July 2022

မျောက်ကျောက် ရောဂါအတွက် ကာကွယ်ဆေးရရှိရန် ကမ္ဘာ့ကျန်းမာရေးအဖွဲ့၊ အာဆီယံအဖွဲ့တို့နှင့် ချိတ်ဆက်ဆောင်ရွက်လျက်ရှိကြောင်း ကိုဗစ်-၁၉ ရောဂါ၊ မျောက်ကျောက်ရောဂါနှင့်ပတ်သက်၍ ညှိနှိုင်းအစည်းအဝေးတွင် ကျန်းမာရေးဝန်ကြီး ဒေါက်တာသက်ခိုင်ဝင်းက ပြောကြားခဲ့ပါတယ်။

မျောက်ကျောက်ရောဂါသည် ယခင်က ဖြစ်ပွားလေ့မရှိသောနိုင်ငံများ၌ပါ ရောဂါပျံ့နှံလာသဖြင့် အပြည်ပြည်ဆိုင်ရာ ပြည်သူ့ကျန်းမာရေးအရေးပေါ်အခြေအနေ အဖြစ် ဇူလိုင် ၂၃ ရက်တွင် ကမ္ဘာ့ကျန်းမာရေးအဖွဲ့မှ ထုတ်ပြန်ခဲ့ပြီး ရောဂါကူးစက် ဖြစ်ပွားနိုင်ခြေဆန်းစစ်ချက်အရ မြန်မာနိုင်ငံတွင် လတ်တလော ရောဂါကူးစက်ဖြစ်ပွားသူ မတွေ့ရှိရသေးပါသဖြင့် အုပ်စု(၁)တွင် ပါဝင်လျက်ရှိပြီး ပြည်ပနိုင်ငံများမှတစ်ဆင့် ရောဂါ ကူးစက်ဝင်ရောက်မှု မရှိစေရေးအတွက် ကြိုတင်ပြင်ဆင်မှုများကို ပြင်ဆင်ဆောင်ရွက်လျက်ရှိကြောင်း သိရပါတယ်။

အိန္ဒိယ၊ ထိုင်း၊ စင်ကာပူနိုင်ငံများတွင် မျောက်ကျောက်ရောဂါဖြစ်ပွားသူများ တွေ့ရှိရသဖြင့် မျောက်ကျောက် ရောဂါကာကွယ်ထိန်းချုပ်ရေးကို နှီးနွယ်ဌာနများ အနေဖြင့် ကျန်းမာရေးဝန်ကြီးဌာနနှင့် ပူးပေါင်းဆောင်ရွက်ကြရန် ကျန်းမာရေးဝန်ကြီးက မှာကြားခဲ့ပါတယ်။

ထို့ပြင် မြန်မာနိုင်ငံအနေဖြင့် ကိုဗစ်-၁၉ ရောဂါလှိင်းကို လက်ရှိတွင် ထိန်းချုပ် ထားနိုင်တဲ့ အနေအထားတွင်ရှိသော်လည်း ကိုဗစ်-၁၉ မျိုးရိုးဗီဇပြောင်းရောဂါပိုး BA.4 နှင့် BA.5 ကူးစက်မှုများသည် ကမ္ဘာ့နိုင်ငံများ၊ ဒေသတွင်းနိုင်ငံများနှင့် အိမ်နီးချင်းနိုင်ငံများတွင် မြင့်တက်လျက်ရှိပါတယ်။

BA.4 နှင့် BA.5 သည် ရောဂါပြင်းထန်မှုနည်းပြီး သေဆုံးမှုနည်းသော်လည်း ကူးစက်မှုနှုန်းမြင့်မားကြောင်း တွေ့ရှိရသဖြင့် ကာကွယ်ထိန်းချုပ် ရေးလုပ်ငန်းများ၊ မျိုးရိုးဗီဇသစ်ရှာဖွေခြင်း လုပ်ငန်းများကို အရှိန် အဟုန်မပြတ် ဆက်လက်ဆောင်ရွက်ဖို လိုတယ်လို ဆိုပါတယ်။

ရာသီတုပ်ကွေးရောဂါနှင့် မျောက်ကျောက်ရောဂါ ကာကွယ်ရေးနည်းလမ်းများသည် ကိုဗစ်-၁၉ ရောဂါကာကွယ်ရေးနည်းလမ်းများနှင့် သဘော သဘာဝအားဖြင့် တူညီသည့်အတွက် တစ်ဦးချင်းလိုက်နာရမည့် ရောဂါကာကွယ်ရေးဆိုင်ရာ စည်းမျဉ်း စည်းကမ်းများကို လိုက်နာဖို အရေးကြီးတယ်လို့ ဆိုပါတယ်။

ymg-mnn
#Yangon_Media_Group

#World_Industry
Published 26 July 2022

ဗီယက်နမ်တော်လှန်ရေးတပ်ဖွဲ့များ ဝတ်ဆင်ခဲ့တဲ့ ဗီယက်နမ်လက်လုပ်ရော်ဘာဖိနပ်တွေကို စစ်ကားဘီးတာယာများ၊ စစ်လေယာဉ်ဘီးတာယာများမှ အသုံးမပြုတော့တဲ့ ပစ္စည်းများဖြင့် ပြုလုပ်ကြပါတယ်။

#Yangon_Media_Group

Published 26 July 2022

အာတိတ်ပင်လယ်ဖျံမလေးတစ်ကောင်ဟာ  အနားယူဖို့နေရာ ရှာဖွေဖို့ကြိုးစားရင်း နော်ဝေနိုင်ငံ မြို့တော်အောစလိုအနီးက လှေတွေအနီး ကူးခတ်ရောက်ရှိလာခဲ့ပါတယ်။

ပင်လယ်ပျော် နို့တိုက်သတ္တဝါကြီးတစ်ကောင်းဖြစ်တဲ့ အဲဒီပင်လယ်ဖျံကြီးဟာ လှေရဲ့နောက်ဘက်ကနေ အပေါ်ကိုတက်လာတာကို မြင်ရသူတွေဟာ ဇဝေဇဝါဖြစ်ကုန်ကြပါတယ်။

တကယ်တမ်းတော့ ဖရီယာလို့အမည်ပေးထားတဲ့ အဲဒီဖျံမကလေးဟာ နေပူစာလှုံရင်း အနားယူဖို့ လှေပေါ်တက်လာတာပါ။

ဖရီယာဆိုတာ စကင်ဒီနေဗီးယားရဲ့ လှပခြင်းနှင့်ချစ်ခြင်းမေတ္တာဆိုင်ရာ နတ်သမီးတစ်ပါးအမည်ပါ။

အလေးချိန်ပေါင်၁၃၀၀ရှိတဲ့ဖရီယာကြောင့် ဥရောပတစ်ခွင်က ဆိပ်ကမ်းတွေက လှေတွေ၊ လေသွင်းလှေတွေတော်တော်များများ နစ်မြုပ်ခဲ့ရပါတယ်။

အဲဒါကြောင့် အော်စလိုက သူနေပူစာလှုံပြီး အေးအေးချမ်းချမ်း နားနေနိုင်အောင် သူနှင့်ကိုက်ညီတဲ့ ရေပေါ်ဆိပ်ခံလေးတစ်ခုကို ဖန်တီးပေးထားပါတယ်။

ဖရီယာလို့အမည်ပေးထာတဲ့ အဲဒီဖျံမကလေးဟာ နေထိုင်ကောင်းနေပုံရတယ်လို့ ဒေသဆိုင်ရာ ငါးလုပ်ငန်းမန်နေဂျာ ရော့ဖ် အာရက် ဂျင်ဆင်က ပြောပါတယ်။

#Source_AFP

#Sleepy_walrus

#Freya

#Oslo_walrus