#LocalNews
Published-24 March 2023

အပြည်ပြည်ဆိုင်ရာ မြန်မာလေကြောင်းလိုင်း (MAI) အနေဖြင့် ယခု မတ်လကုန်ပိုင်းမှ စ၍ စင်ကာပူနိုင်ငံသို့ လေကြောင်းခရီးစဉ်များ တိုးချဲ့ပျံသန်းမည်ဖြစ်ကြောင်း သိရသည်။

လက်ရှိတွင် ရန်ကုန်အပြည်ပြည်ဆိုင်ရာ လေဆိပ်မှ စင်ကာပူနိုင်ငံသို့ လေကြောင်းခရီးစဉ်များကို တစ်ပတ်လျှင် ခုနစ်ကြိမ် ပျံသန်းပေးလျက်ရှိပြီး မတ်လ ၂၈ ရက်မှစ၍ အပတ်စဉ် အင်္ဂါ၊ ကြာသပတေးနှင့် စနေနေ့တို့တွင် နောက်ထပ် လေကြောင်းခရီးစဉ် သုံးကြိမ် တိုးချဲ့ပျံသန်းမည်ဖြစ်ကြောင်း သိရသည်။

ယင်းကြောင့် မတ်လ ၂၈ ရက် နောက်ပိုင်းတွင် MAI အနေဖြင့် စင်ကာပူနိုင်ငံသို့ ပြေးဆွဲမည့် ခရီးစဉ်မှာ တစ်ပတ်လျှင် ၁၀ ကြိမ်ရှိလာမည်ဖြစ်ကြောင်း ၊စင်ကာပူသို့ သွားရောက်သည့် ခရီးသည်အများစုမှာ စီးပွားရေးကိစ္စနှင့် အလည်အပတ် သွားရောက်ကြသူများကြောင်းလည်း သိရသည်။

ယခုအခါ MAI အနေဖြင့် Airbus A320 လေယာဉ်များဖြင့် အာရှတိုက် လေကြောင်းခရီးစဉ်များ၊ ဒူဘိုင်းလေကြောင်း ခရီးစဉ်များကို အဓိကထား ပျံသန်းပေးလျက်ရှိပြီး အိန္ဒိယနိုင်ငံ ဒေလီမြို့သို့လည်း တနင်္လာ၊ ဗုဒ္ဓဟူးနှင့် သောကြာနေ့တို့တွင် တစ်ပတ်လျှင် သုံးကြိမ် ပျံသန်းပေးလျက်ရှိကြောင်း၊ယင်းအပြင် ကမ္ဘောဒီးယားနိုင်ငံရှိ ဖနွမ်းပင်လေဆိပ်၊ ဗီယက်နမ်နိုင်ငံရှိ ဟနွိုင်းလေဆိပ်နှင့် ဟိုချီမင်းလေဆိပ်၊ ထိုင်းနိုင်ငံရှိ ဖူးခက်လေဆိပ်၊ ချင်းမိုင်လေဆိပ်နှင့် ဗန်ကောက်လေဆိပ်တို့သို့လည်း ပျံသန်းပေးလျက်ရှိကြောင်း သိရသည်။

ymg/mt
#Yangon_Media_Group

#LocalNews
Published-24 March 2023

မြန်မာနိုင်ငံ၏ သတင်းမှန်ကို အမှန်တကယ်လိုအပ်ကြောင်း မလေးရှားနိုင်ငံ၊ နိုင်ငံခြားရေးဝန်ကြီးဌာန၊ Human Rights and Humanitarian Division မှ Principal Assistant Secretary ဖြစ်သူ Mr. Neermal Shunmugam က ပြောသည်။

မလေးရှားနိုင်ငံ၊ နိုင်ငံခြားရေးဝန်ကြီးဌာန၊ Human Rights and Humanitarian Division မှ Principal Assistant Secretary နှင့် ကွာလာလမ်ပူမြို့မှ မလေးရှားနိုင်ငံဆိုင်ရာ မြန်မာသံရုံး၊ သံရုံးယာယီတာဝန်ခံ၊သံအမတ် တို့ မတ်လ ၂၂ ရက်က တွေ့ဆုံစဉ် အထက်ပါအတိုင်း ပြောကြားခဲ့ခြင်းဖြစ်သည်။

မလေးရှားနိုင်ငံအနေဖြင့် အနောက်နိုင်ငံများ၏ မီဒီယာများပေါ်တွင်သာ သတင်းမှီခိုနေရသည့်အတွက် မြန်မာနိုင်ငံ၏ သတင်းမှန်ကို အမှန်တစ်ကယ် လိုအပ်ကြောင်း၊ သို့မှသာ မြန်မာနိုင်ငံကိစ္စအပေါ် မျှတစွာ စဉ်းစားပေးနိုင်မည်ဖြစ်ကြောင်း၊ မြန်မာနိုင်ငံကိစ္စသည် အတူတကွ ဖြေရှင်းရမည့် ကိစ္စဖြစ်ကြောင်းဖြင့် ဆွေးနွေးပြောကြားခဲ့ကြောင်း နိုင်ငံခြားရေးဝန်ကြီးဌာနက ထုတ်ပြန်ထားသည်။

ymg/mt
#Yangon_Media_Group

#LocalNews
Published_ 24 March 2023

တရားမဝင်လျှပ်စစ်ဓာတ်အားသုံးစွဲသူများနှင့် ဓာတ်အားခိုးယူသုံးစွဲများအား ကွင်းဆင်းစစ်ဆေးပြီး လျှပ်စစ်ဥပဒေအရအရေးယူမည်ဖြစ်ကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှမတ်လ(၂၄)ရက်ထုတ်ပြန်ကြေငြာလိုက်သည်၊၊

ယင်းကဲ့သို့ ကျူးလွန်သူများကို ဓာတ်အားဖြတ်တောက်ခြင်း ၊ လျော်ကြေးငွေကို တပ်ဆင်ဝန်အားအရ တွက်ချက်တောင်းခံခြင်းများအပြင် ၂၀၁၄ ခုနှစ် လျှပ်စစ်ဥပဒေအရတရားစွဲဆိုမည်ဖြစ်ပြီး ပြစ်မှုထင်ရှားစီရင်ခြင်းခံရပါက ငွေဒဏ်အပြင် အနည်းဆုံးငါးနှစ်မှ အများဆုံးဆယ်နှစ်အထိထောင်ဒဏ်ချမှတ်ခံရမည်ဟုထုတ်ပြန်ချက်တွင်ဖော်ပြပါရှိသည်၊၊

ထုတ်ပြန်ချက်တွင် နိုင်ငံတော်အစိုးရသည် အများပြည်သူများ၏ လူမှုရေး ၊စီးပွားရေးနှင့် လုံခြုံရေးများအတွက် လျှပ်စစ်ဓာတ်အားကို ထုတ်လုပ်သယ်ပို့ဖြန့်ဖြူးရောင်းချခြင်းများ ဆောင်ရွက်လျက်ရှိရာ တရားဝင် ဓာတ်အားသုံးစွဲခွင့်ပြုထားသော ပြည်သူအချို့နှင့် တရားဝင်ဓာတ်အားသုံးစွဲခွင့်မရရှိသေးသော ပြည်သူအချို့သည် မသမာသောနည်းဖြင့် လျှပ်စစ်ဓာတ်အားကို တရားမဝင်သုံးစွဲမှုများ ပြုလုပ်လျက်ရှိသည်ဟုဆိုသည်၊၊

တရားမဝင်ဓာတ်အားသုံးစွဲမှုများအနေဖြင့် အောက်ပါနည်းလမ်းတစ်ခုခုဖြင့် ပြုလုပ်သုံးစွဲခြင်းဖြစ်သည်၊၊
(က) လျှပ်စစ်ဓာတ်အားကိုခိုးယူသုံးစွဲခြင်း
(၁) မီတာမရှိဘဲတိုက်ရိုက်ခိုးယူခြင်း ။
(၂) မီတာရှိသော်လည်း မီတာမတက်အောင် ပြုလုပ်သုံးစွဲခြင်း ၊ မီတာမရောက်မီ အဝင်မှသုံးစွဲခြင်း( By Pass )၊ မီတာအဝင်ကြိုး ၊ အထွက်ကြိုး ခွထောက်သုံးစွဲ ခြင်း ၊ မီတာအဝင်ကြိုးနှင့်အထွက်ကြိုးပြောင်းပြန်တပ်ဆင်ခြင်း။
(ခ) ဆင့်ပွားဓာတ်အားဆက်သွယ်အသုံးပြုခြင်း ။
(ဂ) အထွေထွေအိမ်သုံးမီတာ ၊ အိမ်တွင်းသုံးပါဝါမီတာမှစီးပွားရေးလုပ်ငန်းလုပ်ကိုင်ခြင်း။
(ဃ) အသေးစားစက်မှုလက်မှု၊ စက်မှုလက်မှုနှင့်တစ်လုံးတစ်ခဲတည်း မီတာမှခွင့်ပြုဝန်အားထက် ပိုမိုသုံးစွဲခြင်း။
(င) မီတာအမျိုးမျိုးအား ပြုပြင်၍ဓာတ်အားခိုးယူသုံးစွဲခြင်း ( မီတာရှန့်လင့်များဖြုတ်ခြင်း ၊ မီတာ၏အတွင်းအစိတ်အပိုင်းအား ပြုပြင်ထားခြင်း၊ မီတာရှိဝက်အူ( Serew )များ လျော့ခြင်း။
(စ) စက်မှုလက်မှုလုပ်ငန်းများ လျှပ်စစ်ဓာတ်အားအသုံးမပြုရန် ကန့်သတ်တားမြစ်ထား သည့်အချိန်( ၁၇:၀၀ )နာရီမှ( ၂၃:၀၀ )နာရီအတွင်း လျှပ်စစ်ဓာတ်အားရယူ၍ စက်မှုလက်မှုလုပ်ငန်းများ အသုံးပြုခြင်း ၊ လျှပ်စစ်ဓာတ်အား မလုံလောက်မှုကြောင့် အလှည့်ကျ ဓာတ်အားပိတ်ထားသောအချိန်တွင် မိမိသဘောဖြင့် လျှပ်စစ်ဓာတ်အား ကို ရယူ၍ စက်မှုလက်မှုလုပ်ငန်းများ အသုံးပြုခြင်း။
(ဆ) လျှပ်စစ်ဓာတ်အားမလုံလောက်မှုကြောင့် အလှည့်ကျဓာတ်အားပိတ်ထားသောအချိန် တွင် မိမိသဘောဖြင့် လျှပ်စစ်ဓာတ်အားကိုရယူ အသုံးပြုခြင်း။
(ဇ) ဓာတ်အားလိုင်း( ၂ )လိုင်းနှင့် ဓာတ်အားလိုင်း( ၂ )လိုင်း အထက်ဆွဲထားခြင်း ။
(ဈ) အထွေထွေအိမ်သုံး ၊ အိမ်တွင်းပါဝါအသေးစားစက်မှုလက်မှု ၊ စက်မှုလက်မှု တစ်လုံး တစ်ခဲတည်း မီတာများတွင် ချို့ယွင်းမှုများ( Tampered )တရားမဝင်ပြုလုပ်ခြင်း ။
(ည) မီတာနှင့်တွဲဖက်သုံးစွဲထားသော Current Transformer ၊ Voltage Transformer များကိုလည်းကောင်း၊ မီတာနှင့် Current Transformer ၊ Voltage Transformer များကိုဆက်သွယ်ထားသော လျှပ်စစ်ပတ်လမ်း ( Electric Circuit ) ကိုလည်းကောင်း မူလအနေအထားမှ ပျက်ယွင်းအောင်ပြုပြင်မှု( Tampered )ပြုလုပ်ခြင်း ။
(ဋ) မီတာနှင့်တွဲဖက်သုံးစွဲထားသော Current Transformer ၊ Voltage Transformer များကိုလည်းကောင်း ၊ မီတာနှင့် Current Transformer ၊ Voltage Transformer များကို ဆက်သွယ်ထားသော လျှပ်စစ်ပတ်လမ်း( Electric Circuit )ကိုလည်းကောင်း၊ Tampered ပြုလုပ်ခြင်း မဟုတ်သည့် မီးသုံးသူ၏ ပယောဂမပါရှိဘဲ အကြောင်းတစ်စုံ တစ်ခုခုကြောင့် အားနည်းမှု ၊ ချို့ယွင်းမှု ၊ ပျက်စီးမှုဖြစ်ခြင်း ။

အထက်ပါ မသမာသောနည်းဖြင့် ဓာတ်အားသုံးစွဲသူများကြောင့် ဓာတ်အားပျောက်ဆုံးမှုများ ၊ ဗို့အားကျဆင်းမှုများ ၊ ထရန်စဖော်မာများမှာ ဝန်အားမနိုင်နင်းမှုကြောင့် လောင်ကျွမ်းပျက်စီးမှုများ ၊ ဓာတ်လိုက်မှုအန္တရာယ်များ ၊ မီးဘေးအန္တရာယ်များနှင့် နိုင်ငံတော်၏ လျှပ်စစ်ကဏ္ဍတွင် ဝင်ငွေ လျော့နည်းကျဆင်းမှုများ ဖြစ်ပေါ်နေသည့်အပြင် တရားမဝင် ဓာတ်အားသုံးစွဲသူ ပြည်သူများအတွက်လည်း အနှောင့်အယှက်ဖြစ်ပေါ်စေမည်ဖြစ်သည်ဟုဖော်ပြထားသည်၊၊

သို့ဖြစ်၍ " သက်ဆိုင်ရာမြို့နယ်များမှလည်း အဖွဲ့ဖြင့် ကွင်းဆင်းစစ်ဆေးမည်ဖြစ်ပြီး " အထက်အပိုဒ်( ၂ )ပါ တရားမဝင်ဓာတ်အား သုံးစွဲမှုနည်းလမ်းတစ်ခုခုကို ဖောက်ဖျက်ကျူးလွန် ကြောင်း စစ်ဆေးဖော်ထုတ်တွေ့ရှိပါက မီးသုံးစွဲသူကာယကံရှင်နှင့်အတူ ပူးပေါင်းကြံစည်ပါဝင် လုပ်ဆောင်သူများအား ဓာတ်အားဖြတ်တောက်ခြင်း ၊ လျော်ကြေးငွေကို တပ်ဆင်ဝန်အားအရ တွက်ချက်တောင်းခံခြင်းများ အရေးယူခံရမည်ဖြစ်သည့်အပြင် ( ၂၀၁၄ ) ခုနှစ် လျှပ်စစ်ဥပဒေပုဒ်မ ( ၅၂ )၊( ၅၃ )အရ အမှုဖွင့်တရားစွဲဆိုခြင်းခံရမည်ဖြစ်ပြီး ပြစ်မှုထင်ရှား စီရင်ခြင်းခံရလျှင် ငွေဒဏ်အပြင် အနည်းဆုံးငါးနှစ် မှ အများဆုံးဆယ်နှစ်အထိ ထောင်ဒဏ်ချမှတ်ခံရမည်ဖြစ်ကြောင်း ကြိုတင်အသိပေးအပ်ကြောင်း ထုတ်ပြန်ချက်တွင်ဖော်ပြထားသည်၊၊
ymg/tthl
#Yangon_Media_Group

#LocalNews
Published_ 24 March 2023

မတ်လ၂၃ရက်နေ့ က ရန်ကုန်တိုင်းဒေသကြီး ဗဟန်းမြို့နယ် ဗိုလ်ချို( ၂) ရပ်ကွက် နတ်မောက်လမ်းသွယ်(၁)တွင် အမျိုးသား ၁ ဦး ဒဏ်ရာများဖြင့်သေဆုံးနေကြောင်း မြန်မာမွတ်စလင်မ် ပရဟိတအဖွဲ့မှ သိရသည်။

သေဆုံးသူအနီးရှိဖုန်းဖြင့် မိသားစုအားအဆက်အသွယ်ပြုလုပ်၍ရသဖြင့် ပရဟိတအဖွဲ့က ဆက်သွယ်အကြောင်းကြားနိုင်ခဲ့ကြောင်းသိရသည်။

သေဆုံးသူ အမျိုးသားမှာ ကြည်မြင်တိုင်မြို့နယ် သီတာရပ်ကွက် သိင်္ဂီလမ်းနေသူဖြစ်ပြီး၊ ၎င်းပိုင်ဆိုင်သော Cherry QQ အမျိုးအစား MDY CC-5489 မော်တော်ယာဉ်မှာ ပျောက်ဆုံးနေကြောင်း သိရသည်။

သေဆုံးသူ၏ရုပ်အလောင်းအား ရန်ကုန်ဆေးရုံကြီးရေခဲတိုက်သို့မွတ်စလင်ပရဟိတအဖွဲ့က ပို့ဆောင်ပေးခဲ့ကြောင်းသိရသည်။

ymg/ppk
#Yangon-Media-Group

#LocalNews
Published-24 March 2023

မလေးရှားသို့ တရားမဝင်သွားရောက်မည့် ဘင်္ဂါလီ ၃၀ ကျော်ကို ရခိုင်ပြည်နယ် စစ်တွေမြို့၊ ဆေးသမားကြီးကျေးရွာအုပ်စု၊ အုန်းတောချေဒုက္ခသည်စခန်းအနီး၊ပင်လယ်ကမ်းစပ်တွင် မတ်လ ၂၂ ရက်က ဖမ်းမိခဲ့ကြောင်း ရခိုင်ပြည်နယ် အစိုးရအဖွဲ့က သိရသည်။

မလေးရှားသို့ တရားမဝင်သွားရောက်မည့် ဘင်္ဂါလီ ကျား ၃၄ ဦးနှင့် စက်လှေမောင်းနှင်သူ ၁ ဦးတို့အား ဖမ်းဆီးရမိခဲ့ရာ ယင်း ဖမ်းဆီးရမိဘင်္ဂါလီများမှာ မောင်တော၊ ဘူးသီးတောင်၊ ရသေ့တောင်မြို့နယ်နှင့် ဘင်္ဂလားဒေ့ရှ်နိုင်ငံရှိ ဒုက္ခသည်စခန်း နေထိုင်သူများဖြစ်ပြီး မလေးရှားနိုင်ငံသို့ သွားရောက်လိုပါက ငွေကျပ်သိန်း ၈ဝ ဖြင့် ပို့ဆောင်ပေးမည်ဖြစ်ကာ စရံငွေ ၃ သိန်းကျပ် အရင်ဆုံးပေးထားရန်နှင့် ကျန်ငွေများကို မလေးရှားရောက်မှသာ ပေးဆောင်ရမည်ဟု ပွဲစားများက လာရောက်စည်းရုံးခဲ့ကြောင်း၊ယင်းကြောင့် သွားရောက်ရန် သဘောတူခဲ့ကြခြင်း ဖြစ်ကြောင်း သိရသည်။

အဆိုပါဘင်္ဂါလီများကို ပွဲစားများက ရသေ့တောင်မြို့နယ်ရှိ အာကာတောင်ကျေးရွာနှင့် သမီးလှကျေးရွာတို့တွင် စုစည်းခဲ့ပြီး ၎င်းမှတစ်ဆင့် စက်လှေများဖြင့် ပင်လယ်ပြင်သို့ ထွက်ခွာ၍ စက်လှေအကြီးပေါ်သို့ တင်ဆောင်ပေးခဲ့ကြောင်း၊ စက်လှေမှာ ငါးဖမ်းပိုက်နှင့်ငြိပြီး ဆက်လက်ထွက်ခွာ၍ မရဘဲရှိနေစဉ် ကမ်းစပ်သို့ ရေကူးလာကြခြင်းဖြစ်ပြီး ယင်းမှတစ်ဆင့် အဖမ်းခံရခြင်းဖြစ်ကြောင်းသိရသည်။

ယခုအခါ ဖမ်းဆီးရမိဘင်္ဂါလီများကို လဝကအက်ဥပဒေဖြင့် အမှုဖွင့်အရေးယူထားပြီး ပို့ဆောင်ရာ၌ ပါဝင်သူအား ရာဇသတ်ကြီးပုဒ်မ-၃၆၇ ဖြင့် အမှုဖွင့်အရေးယူထားကြောင်း သိရသည်။

ymg/mt
#Yangon_Media_Group

#LocalNews
Published-24 March 2023

မြန်မာ-ကိုရီးယား နှစ်နိုင်ငံ ချစ်ကြည်ရေး(ဒလ)မြစ်ကူးတံတား နှစ်ဖက်မှ ချဉ်းကပ်လမ်းပိုင်းနှင့် ဆင်ခြေလျှောလုပ်ငန်းများကို ယခု ၂၀၂၃ ခုနှစ် နှစ်ကုန်ပိုင်းတွင်ပြီးစီးရန် နေ့ရော ညပါ တည်ဆောက်နေကြောင်း ဆောက်လုပ်ရေးဝန်ကြီးဌာနက သိရသည်။

တံတားကြီးကို ၂၀၁၉ ခုနှစ် မေလတွင် တည်ဆောက်ရေးလုပ်ငန်းများစတင်ဆောင်ရွက်ခဲ့ရာ ယခုအခါ တံတားကြီး၏ပုံသဏ္ဌာန်မှာ ရုပ်လုံးပေါ်လာပြီဖြစ်ပြီး ရန်ကုန်ဘက်ခြမ်းတွင် ဘုန်းကြီးလမ်းသို့ နှစ်လမ်းမောင်းတံတား တစ်စင်း၊ ဆူးလေဘုရားဘက်သို့ တစ်လမ်း မောင်းတံတားတစ်စင်း၊ အလုံမြို့နယ်ဘက်သို့ တစ်လမ်းမောင်း တံတားတစ်စင်းဖြင့် စုစုပေါင်း တံတားသုံးစင်း သွယ်ဆင်းသည့် ပမာ တည်ဆောက်လျက်ရှိကြောင်း ဆောက်လုပ်ရေးဝန်ကြီးဌာနက သိရသည်။

ယင်းတံတားအရှည်မှာ ၁၈၆၈ မီတာ၊ အကျယ် ၂၆ ဒသမ ၅ မီတာရှိကာ သံကူကွန်ကရစ် ကိုယ်ထည်အပေါ်တွင် သံမဏိကြိုးဆိုင်းဖြင့် ဘိုးပိုင်အုတ်မြစ် တံတားတစ်ခုဖြစ်ပြီး တံတား၏ တစ်ဖက်တစ်ချက်တွင် ၄ မီတာကျယ်ဝန်းသော လူသွားလမ်းပါရှိ၍ တံတားခံနိုင်ဝန် မှာ ၇၅ တန်ဖြစ်ကြောင်း ၊ပင်မတံတားကြီး၏ အောက်ဘက်တွင် တန်ချိန်တစ်သောင်းခွဲ (DWT) ရှိ နိုင်ငံတကာ ကုန်တင်သင်္ဘောများ ဖြတ်သန်းသွားလာနိုင်ရန် ရေလမ်းကင်းလွတ် အမြင့် ၄၉ မီတာ(၁၆၀ ပေ) ၌ ရေလမ်းကင်းလွတ် အကျယ် ၃၀၁ မီတာ (၉၉၈ ပေ)ဖြင့် တည်ဆောက်နေကြောင်း သိရသည်။

တံတားစီမံကိန်းကို ကိုရီးယားနိုင်ငံ GS Engineering Group မှ တာဝန်ယူတည်ဆောက်ခြင်းဖြစ်ပြီး စုစုပေါင်း အမေရိကန် ဒေါ်လာ ၁၅၇ ဒသမ ၈၃၃ သန်း ကုန်ကျမည်ဖြစ်ကြောင်း သိရသည်။

ymg/mt
#Yangon_Media_Group

#World_Military
Published 24 March 2023

ရန်သူရဲ့ ရေတပ်သင်္ဘောတွေနဲ့ ဆိပ်ကမ်းတွေကို ဖျက်ဆီးပစ်နိုင်တဲ့ ရေဒီယိုသတ္တိကြွဆူနာမီကို ဖန်တီးပေးနိုင်တဲ့ ရေအောက်နျူကလီးယားဒရုန်းတစ်ခုကို မြောက်ကိုရီးယားက ကြာသပတေးနေ့မှာ စမ်းသပ်ခဲ့ကြောင်း ဒေသတွင်းမီဒီယာတွေမှာ ဖော်ပြခဲ့ပါတယ်။

အင်္ဂါနေ့ကနေ ကြာသပတေးနေ့အထိ မြောက်ကိုရီးယားတို့က စစ်ရေးလေ့ကျင့်မှုများပြုလုပ်ရာမှာ အဆိုပါလက်နက်စနစ်အသစ်ကို ထည့်သွင်းစမ်းသပ်ခဲ့တာဖြစ်ပါတယ်။

တောင်ကိုရီးယားနဲ့ အမေရိကန်တို့ ပူးတွဲစစ်ရေးလေ့ကျင့်မှုတွေက ကိုရီးယားကျွန်းဆွယ်မှာ မရှောင်လွှဲနိုင်လောက်အောင် တင်းမာမှုမြင့်တက်လာတယ်လို့ မြောက်ကိုရီးယားက အပြစ်တင်နေပါတယ်။

ဒါတွေကြောင့် မြောက်ကိုရီးယားတပ်တွေဟာ စစ်ပွဲဖြစ်လာနိုင်တဲ့အခြေအနေအတွက် အသင့်ပြင်နေကြပြီး နျူကလီးယားတပ်တွေမှာ အရေအတွက်အရရော အရည်အသွေးအရပါ အခြေခံဦးစားပေးအနေနဲ့ အင်အားဖြည့်တင်းနေကြပါတယ်။

KCNA သတင်းဌာနတင်ပြချက်အရ မြောက်ကိုရီးယားစစ်တပ်ဟာ ဖျက်ဆီးစွမ်းအားအလွန်ကျယ်ပြန့်တဲ့ ဆူနာမီလက်နက်စနစ်ကို နေရာချလိုက်ပြီဖြစ်ပါတယ်။

အဆိုပါရေအောက်ဒရုန်းဟာ ရေအနက် ၈၀ မှ ၁၅၀ မီတာမှာ ၅၉ နာရီ ၁၂ မိနစ်ကြာအောင် မောင်းနှင်နိုင်ခဲ့ပါတယ်။

ဒီရေအောက်နျူကလီးယားဒရုန်းဟာ မည်သည့်ဆိပ်ကမ်း၊ ကမ်းရိုးတန်းမှာမဆို နေရာချနိုင်သလို ရေပေါ်သင်္ဘောနဲ့လည်း ဆွဲထားနိုင်ပါတယ်လို့ ဖော်ပြထားပါတယ်။

မြောက်ကိုရီးယားခေါင်းဆောင် 'ကင်မ်ဂျုံအန်'က အဆိုပါစစ်ရေးလေ့ကျင့်မှုတွေကို ညွှန်ကြားခဲ့ကာ ဒီလေ့ကျင့်မှုတွေက အမေရိကန်နဲ့ တောင်ကိုရီးယားတို့ကို သတိပေးတဲ့အနေဖြစ်ကြောင်း ဆိုလိုက်ပါတယ်။

အမေရိကန်အရင်းရှင်တွေနဲ့ တောင်ကိုရီးယားရုပ်သေးရုပ်တို့ ရွေးချယ်ရာလမ်းကြောင်းအတိုင်း ကျရှုံးသွားအောင် ပြုလုပ်ချင်ကြောင်း ပြောကြားခဲ့ပါတယ်။

ဒါ့အပြင် နျူကလီးယားထိပ်ဖူးတပ် ပုံစံတူတပ်ဆင်ထားတဲ့ ပဲ့ထိန်းဒုံးကျည်တွေကိုလည်း ဗုဒ္ဓဟူးနေ့က စမ်းသပ်ခဲ့ကြောင်း KCNA က အတည်ပြုလိုက်ပါတယ်။

အဆိုပါစစ်ရေးလေ့ကျင့်မှုက မြောက်ကိုရီးယားရဲ့ နောက်ထပ်စစ်ရေးတိုက်ခိုက်စွမ်းရည်ကို ဖော်ပြလိုက်တာဖြစ်ပြီး လေထဲဖောက်ခွဲခြင်း၊ ထိန်းချုပ်ရေးကိရိယာတွေအပေါ် အားထားနိုင်စွမ်းကို ဖော်ပြနေတာဖြစ်ပါတယ်။

Source: WION
#Yangon_Media_Group

#LocalNews
Published_ 24 March 2023
မတ်လ(၂၇)ရက်တွင်(၇၈)နှစ်မြောက်တပ်မတော်နေ့စစ်ရေးပြအခမ်းအနား နေပြည်တော်၌ကျင်းပမည်ဖြစ်၍ ရန်ကုန်-မန္တလေးလမ်းဟောင်းနေရာအချို့ ခေတ္တပိတ်ထားမည်ဖြစ်ကြောင်း နေပြည်တော်ယာဉ်စည်းကမ်းထိန်းသိမ်းရေးကြီးကြပ်မှုကော်မတီ၏ ထုတ်ပြန်ချက်အရသိရသည်၊၊

ရန်ကုန်-မန္တလေးလမ်းဟောင်း ပျဉ်းမနားမြို့နယ် ဘောဂသီရိမီးပွိုင့်မှ ဇေယျာသီရိမြို့နယ် သိုက်ချောင်း လမ်းဆုံမီးပွိုင့်အထိ မနက်(၅)နာရီမှ(၁၀)နာရီအထိ ခေတ္တလမ်းပိတ်/လမ်းလွှဲထားမည်ဖြစ်သည်ဟုဆိုသည်၊၊

မော်တော်ယာဉ်မောင်းနှင်သူများအနေဖြင့် မတ်လ (၂၇)ရက်တွင် နေပြည်တော်ဇေယျာသီရိမြို့နယ် သိုက်ချောင်းလမ်းဆုံမီးပွိုင့်မှ နိဗ္ဗာန်လမ်း (မြို့ပတ်လမ်း)အတိုင်း ခွာညိုပန်းအဝိုင်းအထိ၊၎င်းမှ ရာဇသင်္ဂဟလမ်းအတိုင်းကုမုဒြာကြာပန်းအဝိုင်းအထိ ၊ရာဇဌာနီလမ်းအတိုင်း ပျဉ်းမနားမြို့နယ် ပန်းခင်းလမ်း မီးပွိုင့်-ဘောဂသီရိမီးပွိုင့်မှတစ်ဆင့် ရန်ကုန်-မန္တလေးလမ်းဟောင်းသို့မောင်းနှင်ပေးကြရန်
နေပြည်တော်ယာဉ်စည်းကမ်းထိန်းသိမ်းရေးကြီးကြပ်မှုကော်မတီမှသတိပေးနှိုးဆော်ထားကြောင်း သိရသည်၊၊

ymg/tthl
#Yangon_Media_Group

#LocalNews
Published_ 24 March 2023

မတ်လ၂၄ရက်နေ့ ရွှေအဖွင့်စျေးမှာ ၂၃သိန်း၄သောင်းကျော်ရည်ညွှန်းသတ်မှတ်ထားကြောင်းရန်ကုန်တိုင်းရွှေလုပ်ငန်းရှင်များအသင်းမှသိရသည်။ကမ္ဘာ့ရွှေပေါက်စျေးမှာ တစ်အောင်စကို ၁၉၉၀ ဒေါ်လောက်ပေါက်စျေးရှိ​နေကြောင်း ကမ္ဘာ့ရွှေစျေးကွက်အတွင်းစုံစမ်းသိရှိရသည်။

ကမ္ဘာ့ရွှေစျေးမြင့်တက်နေသည့်အတွက် စျေးကွက်ထဲမှာစျေးနူန်းအပြောင်းအလဲများနေပြီး စျေးကစားသူတွေလည်းရှိနေကြောင်း ရန်ကုန်ရွှေအသင်းက သတိထုတ်ပြန်ထားပါသည်။ကမ္ဘာ့ရွှေစျေးနှင့် ပြည်တွင်းရွှေစျေး ချိတ်ဆက်မူမရှိသည့်အတွက် ရွှေစျေး အပြောင်းအလဲဖြစ်မည်ကို စိုးရိမ်စရာမလိုကြောင်း ရန်ကုန်ရွှေအသင်းကထုတ်ပြန်ထားသည်။

ပြည်တွင်းရွှေစျေးဟာ မတ်လ ဒုတိယအပတ်မှာ တည်ငြိမ်နေပေမယ့် တတိယအပတ်ထဲမှာ စျေးနူန်းအမြင့်ဘက်ရောက်ရှိလာပြီးသိန်း၃၀နီးပါးအထိပေါက်စျေးရှိနေသည်။
ymg/ynzw
#Yangon_Media_Group

#LocalNews
Published_ 23 March 2023

၂၀၂၂ ခုနှစ် ဧပြီလ ၁ ရက်မှ ၂၀၂၃ ခုနှစ် မတ်လ ၁၀ ရက်အထိ ပြည်ပသို့ ပင်လယ်ရေကြောင်းမှ ပြောင်းတန်ချိန် ၁၁ သိန်းတင်ပို့ထားကြောင်း မြန်မာနိုင်ငံပဲမျိုးစုံ၊ ပြောင်းနှင့်နှမ်းကုန်သည်များအသင်း ကသိရသည်။

ကုန်သည်တွေအနေနဲ့ ပြောင်းကို လွတ်လွတ်လပ်လပ်တင်ပို့နိုင်ပြီးMOU ထိုးစရာမလိုကြောင်းနှင့်လက်ရှိတွင် နိုင်ငံပေါင်း ၇၀ ကို ပဲ၊ ပြောင်း၊ နှမ်းတင်ပို့လျက်ရှိကြောင်းကသိရသည်။

နှစ်စဉ် ပြည်တွင်း၌ တစ်နှစ်အတွင်းစိုက်ပျိုးထုတ်လုပ်သည့် ပြောင်းတန်ချိန်သည် ၂ ဒသမ ၃ သန်းနှင့် ၂ ဒသမ ၆ သန်းကြားထွက်ရှိပြီး နယ်စပ်ကုန်သွယ်ရေးလမ်းကြောင်းကနေတစ်ဆင့် ထိုင်းနိုင်ငံသို့ မတ်လ ၁ ရက်မှစတင်ပြီး အခွန်ကင်းလွတ်ခွင့်ဖြင့် သြဂုတ်လ ၃၁ ရက်အထိ တင်ပို့နေခြင်းဖြစ်ကြောင်း သိရသည်။

လက်ရှိ မြန်မာ့ပြောင်းကို ဒေသတွင်းနိုင်ငံများ၏ လိုအပ်ချက်ရှိမှုကြောင့် ဝယ်လိုအားရှိနေဆဲဖြစ်ပြီး ဗိယက်နမ်၊ဖိလစ်ပိုင်အန္ဒိယအပါအဝင်နိုင်ငံအများအပြားကဝယ်ယူလျက်ရှိသည်။

ပြောင်းတင်ပို့ရာတွင် နယ်စပ်မှတင်ပို့နေသည့် ကုန်သည်အချို့သည် ၆၅-၃၅ စနစ်ကြောင့် အဆင်မပြေမှုများရှိနေကြောင်း ကုန်သည်များ၏ ပြောပြချက်အရ သိရသည်။

ymg/ppk
#Yangon-Media-Group

#LocalNews
Published_ 24 March 2023

စစ်ကိုင်းတိုင်း၊ ပုလဲမြို့နယ်၊ နှောကန်ရွာ အရှေ့ဘက်ရှိ ဆောက်လုပ်ရေးရုံးခွဲ ယနေ့ ညနေပိုင်းက မီးလောင်မှုဖြစ်ပွားခဲ့ကြောင်း သိရသည်။

မတ်လ ၂၃ ရက်၊ ယနေ့ ညနေ ၃ နာရီခန့်တွင် ပုလဲမြို့နယ်၊ နှောကန်ရွာအရှေ့ဘက်ပုလဲ၊ ဂန့်ဂေါ်လမ်းဘေးရှိ ဆောက်လုပ်ရေးရုံးခွဲ မီးလောင်ပျက်စီးသွားခဲ့ကြောင်း ဒေသခံများထံမှ သိရသည်။

တောမီးရှို့ထားရာကနေ ရုံးအဆောက်အဦပါ မီးလောင်သွားခြင်းဖြစ်ပြီးမီးငြိမ်းသက်ဖို့ ကြိုးစားရာတွင်ရာသီဥတုပူပြင်းခြင်းနှင့် ရေအလွယ်တကူမရတာကြောင့်ဟု ဒေသတွင်းကူညီစောင့်ရှောက်ရေးအဖွဲ့ဝင် တစ်ဦးက ပြောသည်။

ပျက်ဆီးဆုံးရှုံးမှုတန်ဖိုးကိုတွက်ချက်နေဆဲဖြစ်ပြီထိခိုက်ဒါဏ်ရာရရှိသူမရှိကြောင်းသိရသည်။

ymg/ppk
#Yangon-Media-Group

#World_Health
Published 24 March 2023

ခန္ဓာကိုယ်အတွက် အကောင်းဆုံးအစားအစာထဲမှာ ဟင်းသီးဟင်းရွက်များပါဝင်ပြီး စားရန်အသင့်တော်ဆုံးစာရင်းတွေကို လူတွေသိချင်ကြပါတယ်။

ဘယ်လိုဟင်းရွက်သီးနှံပဲဖြစ်ဖြစ် အစာချေခြင်း၊ ဦးနှောက်လုပ်ဆောင်ချက်တို့ကို ကူညီပေးကာ အသားအရည်ပုံသဏ္ဍာန်ကောင်းမွန်စေခြင်း၊ ဆံကေသာကောင်းမွန်စေခြင်း၊ အသက်ရှည်ခြင်းတို့ကို ပံ့ပိုးပေးနိုင်ပါတယ်။

ဒါကြောင့် ပုံမှန်စားသုံးပေးသင့်တဲ့ ဟင်းသီးဟင်းရွက် ၅ မျိုးကို ဖော်ပြပေးလိုက်ပါတယ်။

(၁) ပန်းဂေါ်ဖီစိမ်း
ပန်းဂေါ်ဖီစိမ်းတစ်ပန်းကန်မှာ လိုအပ်တဲ့အာဟာရများအဖြစ် ဗိုက်တာမင်-ကေ ၁၁၆ ရာခိုင်နှုန်း၊ ဗိုက်တာမင်-စီ ၁၃၅ ရာခိုင်နှုန်းအပြင် ဖောလစ်အက်ဆစ်၊ မန်းဂနိစ်၊ ပိုတက်ဆီယမ်တို့ လုံလောက်စွာပါဝင်ပါတယ်။

သူ့မှာပါဝင်တဲ့ ဒြပ်ပေါင်းအမျိုးမျိုးနဲ့ အင်ဇိုင်းတွေက ကင်ဆာအမျိုးမျိုးပြန်ဖြစ်ခြင်းမှ ကာကွယ်ပေးနိုင်ဖွယ်ရှိပါတယ်။

(၂) ခရမ်းရောင်ဂေါ်ဖီ
သူ့မှာ အမျှင်ဓာတ် ၂ ဂရမ်၊ နေ့စဉ်လိုအပ်တဲ့ ဗိုက်တာမင်-စီ ၈၅ ရာခိုင်နှုန်းပါဝင်သလို ကျန်းမာရေးအကျိုးကျေးဇူးရစေတဲ့ အန်သိုဆိုင်ယာနင်လည်း ပါဝင်ပါတယ်။

အဲဒီဓာတ်တိုးဆန့်ကျင်ပစ္စည်းက သွေးကြောကျဉ်းခြင်းကို ကာကွယ်တဲ့အပြင် မကောင်းတဲ့ကိုလက်စ်ထရောလ်တွေ ဓာတ်တိုးခြင်းမှ ကာကွယ်ပေးပါတယ်။

(၃) မုန်လာဥနီ
မုန်လာဥနီက အမြင်အာရုံကို ထိန်းသိမ်းပေးပြီး ဗိုက်တာမင်-အေ၊ ဗိုက်တာမင်-စီ၊ ဗိုက်တာမင်-ကေ၊ ပိုတက်ဆီယမ်တို့ပါဝင်ပါတယ်။

လိမ္မော်ရောင်ဖြစ်စေတဲ့ ဘီတာကယ်ရိုတင်းက ကင်ဆာဖြစ်ခြင်းမှ ကာကွယ်ပေးပြီး ဆီးကျိတ်ကင်ဆာဖြစ်နိုင်ချေ ၅ ရာခိုင်နှုန်းလျှော့ချပေးနိုင်ကြောင်း တွေ့ရှိထားပါတယ်။

(၄) သကြားမုန်လာ
သကြားမုန်လာအပြင် ဟင်းနုနွယ်၊ ကိုက်လံ၊ အခြားဟင်းရွက်များပါဝင်ပြီး မဂ္ဂနီဆီယမ်အပြည့်ပါဝင်တာကြောင့် ကြွက်သား အာရုံကြောလုပ်ဆောင်ချက်၊ သွေးတွင်းဂလူးကို့စ်၊ သွေးပေါင်ချိန်တို့ကို ထိန်းညှိပေးပါတယ်။

(၅) ကြက်သွန်ဖြူ
ရိုးရာဆေးဘက်ဆိုင်ရာများအရ ရောဂါအမျိုးမျိုးကာကွယ်ကုသရာမှာ ကြက်သွန်ဖြူကိုအသုံးပြုကြပါတယ်။

လေ့လာချက်များအရ ကြက်သွန်ဖြူက ဘက်တီးရီးယားအချို့ကို သေစေနိုင်ပြီး ရောဂါကူးစက်မှုနဲ့ အစာအဆိပ်သင့်ခြင်းတို့ကို ကာကွယ်ပေးနိုင်ပါတယ်။

Source: The Jerusalem Post.
#Yangon_Media_Group