#Local_News
Published_2 August 2022

တရုတ်-မြန်မာနိုင်ငံတကာလမ်းကြောင်းရှိ အဓိကအစိတ်အပိုင်းဖြစ်သော ယူနန်ပြည်နယ် တာလီ-ရွှေလီရထားလမ်း၏ တာ့လီ-ပေါင်စန်းလမ်းပိုင်းဖွင့်လှစ်လိုက်ပြီ ဖြစ်ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်လိုက်သည်။

အဆိုပါ ရထားလမ်း ဖွင့်လှစ်ပြေးဆွဲပြီးနောက် တရုတ်နိုင်ငံနှင့် မြန်မာနိုင်ငံအပါအဝင် အရှေ့တောင်အာရှနိုင်ငံများအကြား ကုန်စည်စီးဆင်းမှုလမ်းကြောင်းသစ်များကို ကုန်းလမ်းနှင့် ရထားလမ်း၊ ရေကြောင်းနှင့် ရထားလမ်းပေါင်းစပ် ပို့ဆောင်သည့်နည်းလမ်းဖြင့် လုပ်ဆောင်နိုင်မည် ဖြစ်ကြောင်း သိရသည်။

ယူနန်ပြည်နယ် ပေါင်စန်းဘူတာမှ C296 Fuxing EMU ရထားထွက်ခွာဖွင့်လှစ်ခဲ့ပြီးအရှေ့ဘက် တာ့လီသို့ ဦးတည်ခုတ်မောင်းခဲ့ကြောင်း၊ ယင်းရထားလမ်းမှာ ၁၄ နှစ်ကြာမြင့်ခဲ့ပြီး ယခုအခါ တာ့လီ-ရွှေလီရထားလမ်း၏ တာ့လီ-ပေါင်စန်းလမ်းပိုင်းကို တရားဝင် ဖွင့်လှစ်ပြေးဆွဲနိုင်ခဲ့ခြင်း ဖြစ်ကြောင်းလည်း သိရသည်။

ယင်းရထားလမ်းပိုင်းတွင်ပါသည့် ပေါင်စန်းလိုဏ်ခေါင်းကို (၆)နှစ်ကြာ ဖောက်လုပ်ခဲ့ရကာ ပြီးခဲ့သည့် ဧပြီလ ၁၉ ရက်တွင် ဖောက်လုပ်ပြီးစီးခဲ့ကြောင်း ၊တရုတ်-မြန်မာ နိုင်ငံတကာလမ်းကြောင်းကြီးဖြစ်သော ယူနန်ပြည်နယ် တာလီ-ရွှေလီရထားလမ်း၏ ဖူဖျောင်းမြို့နယ်မှ နုကျန်းမြစ် အရှေ့ဘက်ကမ်းထိ အလွန်ရှည်လျားသော ဥမင်လိုဏ်ခေါင်းအုပ်စု အဖြစ် တည် ဆောက်နိုင်ခဲ့ခြင်းဖြစ်ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားခဲ့သည်။

တာလီ-ရွှေလီရထားလမ်းမှာ စုစုပေါင်း (၃၃၀) ကီလိုမီတာ ရှည်လျားပြီး တံတားနှင့် ဥမင်လိုဏ်ခေါင်း (၇၆)ရာခိုင်နှုန်း ထိ ပါဝင်ကြောင်း၊တာလီ-ရွှေလီရထားလမ်းတစ်လျှောက် လိုဏ်ခေါင်း ၄၄ ခုတွင် လိုဏ်ခေါင်း ၂ ခုသာကျန်ရှိတော့ကြောင်း၊ တာလီမှ ပေါင်စန်း၊ ပေါင်စန်းမှ ရွှေလီ အပိုင်းခွဲဆောက်လုပ်ခဲ့ခြင်း ဖြစ်ကြောင်းလည်း သိရသည်။

မြန်မာနိုင်ငံနှင့် တောတောင်ရေမြေထိစပ်လျက်ရှိသော ပေါင်စန်းမြို့မှာ ယူနန်ပြည်နယ် အနောက်တောင်ပိုင်းတွင် တည်ရှိသော မြို့ ဖြစ်ကြောင်း သိရသည်။

လက်ရှိတွင် တာ့လီ-ရွှေလီရထားလမ်း၏ ပေါင်စန်း-ရွှေလီလမ်းပိုင်းဖောက်လုပ်မှုကို စနစ်တကျ မြှင့်တင်လျက်ရှိပြီးလမ်းကြောင်း တစ်ခုလုံးဖွင့်လှစ်နိုင်ပါကတရုတ်-မြန်မာနိုင်ငံတကာ ရထားလမ်းကြောင်း၏ တရုတ်နိုင်ငံတွင်းလမ်းပိုင်းကို ဘက်စုံတည်ဆောက်ပြီးစီးမည်ဖြစ်ကာ “Belt and Road” နှင့် တရုတ်-မြန်မာစီးပွားရေးစင်္ကြံ တည်ဆောက်ရေးအတွက် တာ့လီ-ရွှေလီရထားလမ်းမှ ဝန်ဆောင်မှုပေးသည့် အခန်းကဏ္ဍကို ပိုမိုသိသာထင်ရှားစေမည် ဖြစ်ကြောင်း သိရသည်။

ဓါတ်ပုံ - မြန်မာနိုင်ငံဆိုင်ရာ တရုတ်သံရုံး
ymg/mt
#Yangon_Media_Group

#Health_Tips
Published 2 August 2022

အမေရိကန်နဲ့ ယူကေတို့ရှိ အရွယ်ရောက်ပြီးသူ ၃ ပုံ ၂ ပုံခန့်ဟာ တစ်နေ့တာအိပ်စက်ချိန် ၈ နာရီလုံလောက်အောင် မရရှိကြဘဲ ပျမ်းမျှအားဖြင့် ၆ နာရီလောက်သာ အိပ်ချိန်ရှိနေကြပါတယ်။

လုပ်ငန်းခွင်တာတွေကြောင့် အိပ်ချိန်မလုံလောက်တာမျိုး ဖြစ်ကြပေမယ့် ခေတ်မီနည်းပညာများစွဲလမ်းစွာ အသုံးပြုခြင်း၊ လေ့ကျင့်ခန်းမလိုက်စားခြင်း၊ စားသောက်ခြင်းပုံစံမမှန်ခြင်းတို့ကြောင့်လည်း အိပ်ချိန်နည်းပါးနေရတာဖြစ်ပါတယ်။

အကောင်းဆုံးအိပ်စက်ခြင်းရရှိစေရန် ကျွမ်းကျင်သူဆရာဝန်များက ၁၀-၃-၂-၁ ဖော်မြူလာအတိုင်း တစ်ဆင့်ချင်းလုပ်ဆောင်သွားဖို့ အကြံပြုထားပါတယ်။

*ညမအိပ်ခင် ၁၀ နာရီအလိုကစပြီး ကဖင်းဓာတ်သောက်သုံးခြင်းကိုရှောင်ရှားပါ*
ကဖင်းဓာတ် ပါဝင်တဲ့သောက်စရာများကို ညအိပ်ရာမဝင်ခင် ၁၀ နာရီအလိုကတည်းက မသောက်သင့်တော့ပါဘူး။

ဥပမာ ည ၁၁ နာရီအိပ်လေ့ရှိသူဟာ နေ့လယ် ၁ နာရီနောက်ပိုင်းကတည်းက ကော်ဖီ၊ လက်ဖက်ရည်၊ အားမြှင့်အချိုရည်များ မသောက်သင့်ပါဘူး။

ဘာကြောင့်လဲဆိုတော့ ခန္ဓာကိုယ်ထဲမှာ ကဖင်းဓာတ်ကို ချေဖျက်ဖို့ ပျမ်းမျှအားဖြင့် ၁၀ နာရီခန့်ကြာမြင့်တတ်ပါတယ်။

ကဖင်းဓာတ်က အသိဉာဏ်ကိုအားကောင်းစေပြီး အိပ်ငိုက်ခြင်းခံစားမှုမျိုးကို ခဏတာဖယ်ရှားပေးပါတယ်။

ဒါပေမဲ့ အာရုံခံစားသိရှိမှုတွေကို လှုံ့ဆော်ပေးနေတာကြောင့် အိပ်ပျော်ဖို့ ခက်ခဲစေပါတယ်။

*ညစာနဲ့ယမကာများကို အိပ်ရာမဝင်ခင် ၃ နာရီအလိုမှာ အပြီးစားသုံးပါ*

၁၀-၃-၂-၁ နည်းလမ်းအရ ညစာနဲ့ ယမကာဖျော်ရည်များကို ညမအိပ်ခင် ၃ နာရီနောက်ဆုံးထားပြီး စားသောက်ဖို့အကြံပြုပါတယ်။

ဒါဟာ ခန္ဓာကိုယ်ကို အစာချေဖျက်ဖို့ အချိန်ပေးလိုက်တဲ့သဘောပါပဲ။
နောက်ကျမှစားသောက်ခြင်းမျိုးက အစာချေဖျက်ဖို့အချိန်နည်းပါးသွားပြီး အစာအိမ်အက်ဆစ်လျှံထွက်စေနိုင်တဲ့အပြင် ညအိပ်ခါနီးအစာချေစနစ်အလုပ်လုပ်တဲ့အခါ အိပ်ရတာသက်တောင့်သက်သာ မဖြစ်စေပါဘူး။

ညအိပ်ခါနီး ၂ နာရီအလိုမှ စားသောက်တဲ့အခါ သွေးပေါင်ချိန်မြင့်တက်လာကာ စိတ်ဖိစီးမှုဟော်မုန်းတွေထွက်လာစေပြီး နှလုံးနဲ့ပတ်သက်တဲ့ဝေဒနာတွေ ဖြစ်လာနိုင်ပါတယ်။

*ညမအိပ်ခင် ၂ နာရီအလို နောက်ဆုံးထားပြီး အလုပ်နားပါ*
ညအိပ်ရာမဝင်ခင် ၂ နာရီလောက်ကတည်းက ဦးနှောက်ကိုအနားပေးသင့်ကြောင်း ကျွမ်းကျင်သူများက ဆိုပါတယ်။

ထိုအချိန်အတွင်းမှာ အလုပ်နဲ့ပတ်သက်တဲ့ အီးမေးလ်၊ ဖုန်း၊ နောက်နေ့အစီအစဉ်များနဲ့ပတ်သက်တဲ့ အကြောင်းအရာတွေကို စဉ်းစာတွေးခေါ်ခြင်းကနေ ရပ်တန့်သင့်ပါတယ်။

ကောင်းစွာအိပ်မပျော်သူတွေက စိတ်ဖိစီးမှုနဲ့ ပူပန်မှုကြောင့်လို့ ယူဆကြပါတယ်။

အလွန်အကျူးဖြစ်လာတဲ့အခါ ပိုမိုနိုးကြားစေတဲ့ ဟော်မုန်းတွေထွက်လာပြီး နှလုံးခုန်နှုန်းနဲ့ သွေးပေါင်ချိန်မြင့်တက်လာနိုင်ပါတယ်။

*မအိပ်ခင် ၁ နာရီအလိုတွင် တီဗီ၊ ဖုန်းများ အသုံးမပြုသင့်ပါ*
ညအိပ်ခါနီးအချိန်တွေမှာ ဖုန်း၊ လက်ပ်တော့၊ တီဗီစတဲ့ စက်ပစ္စည်းများကြည့်ရှုခြင်းဖြင့် နေ့ညပုံမှန်ဟော်မုန်းများထွက်ရှိမှုကို အနှောင့်အယှက်ဖြစ်စေပါတယ်။

ညအချိန်မှာ ထိုကဲ့သို့ကြည့်ရှုခြင်းက အလင်းရောင်ဓာတ်ရရှိစေတာကြောင့် အိပ်ပျော်ခြင်းကိုဖြစ်စေတဲ့ဟော်မုန်းထွက်ရှိမှုကို ရပ်တန့်စေပါတယ်။

ဒီလိုပြောင်းလဲမှုတွေကြောင့် ညအိပ်စက်ခြင်းကို အနှောင့်အယှက်ဖြစ်စေတာဖြစ်ပါတယ်။

Source: DailyMail
#Yangon_Media_Group

#Local_News
Published_2 August 2022

ထိုင်းနိုင်ငံသို့ MoU လုပ်သား ၈၀၀ ကျော်ထပ်မံသွားရောက်ခွင့်ရရှိကြောင်း ပြည်ပအလုပ်အကိုင် အေဂျင်စီများက သိရသည်။

သြဂုတ်လ ၁ ရက်က မြဝတီ- မဲဆောက် ချစ်ကြည်ရေး အမှတ် (၂) တံတားမှတစ်ဆင့် ထိုင်းနိုင်ငံသို့ သွားရောက်ခွင့် ရခဲ့ကြခြင်းဖြစ်ပြီး Myanamar Experience Iink Co.Itd အေဂျင်စီ၊ New Covenant အေဂျင်စီ၊ ထူးသစ်ဇေ အေဂျင်စီ၊ ယွန်းနဒီဦး အေဂျင်စီ၊ Arbourfield Manpower အေဂျင်စီ၊ ထရိန်းဝင်း အေဂျင်စီ ကုမ္ပဏီများက တာဝန်ယူ ပိုဆောင်ပေးကြောင်းလည်း သိရသည်။

ထူးသစ်ဇေ အေဂျင်စီမှ တာဝန်ယူ စေလွှတ်သည့် လုပ်သား (၁၀၀)၊Myanamar Experience Iink အေဂျင်စီမှ လုပ်သား (၆၅) ဦး၊ ယွန်းနဒီ အေဂျင်စီမှ လုပ်သား (၂၀၀) ဦး၊ New Covenant အေဂျင်စီမှ လုပ်သား (၅၈) ဦး၊ Arbourfield Manpower အေဂျင်စီ မှ လုပ်သား (၃၁၅) ဦး၊ထရိန်းဝင်း အေဂျင်စီမှ လုပ်သား (၆၉) ဦး၊ စုစုပေါင်းလုပ်သား (၈၀၇) ဦးဖြစ်ကြောင်း သိရသည်။

ယင်းတွင် ထူးသစ်ဇေ အေဂျင်စီမှ တာဝန်ယူ စေလွှတ်သည့် လုပ်သား (၁၀၀) ဦးမှာ နခွန်းပထုံမြို့ရှိ ကြာဇံစက်ရုံသို့လည်းကောင်း၊Myanamar Experience Iink အေဂျင်စီမှ စေလွှတ်ခဲ့သည့် လုပ်သား (၆၅) ဦးမှာ ကုမ္ပဏီသို့ ဝန်ဆောင်ခပေးစရာမလိုသည့် ဇီးရိုးကော့ဖြင့် ချိုင်ယာဖွန်မြို့ရှိ အထည်ချုပ်စက်ရုံသို့ လည်းကောင်း သိရသည်။

လက်ရှိတွင် ထိုင်းနိုင်ငံသို့ မြဝတီ-မဲဆောက် ချစ်ကြည်ရေး အမှတ် (၂) တံတားနှင့် ကော့သောင်း-ရနောင်း ရေလမ်းကြောင်းတို့မှ သွားရောက်နေကြခြင်းဖြစ်ကြောင်းလည်း အလုပ်သမားဝန်ကြီးဌာနက သိရသည်။

ymg/mt
#Yangon_Media_group

#Local_News
Published_2 August 2022

အော်ပရာစီ စီမံချက်လုပ်ဆောင်နေသော မလေးရှားတွင် မြန်မာအပါအဝင်နိုင်ငံခြားသားအချို့ ဖမ်းဆီးခံရကြောင်း မလေးရှားရောက် မြန်မာရွှေ့ပြောင်းအလုပ်သမားများအရေး လုပ်ဆောင်နေသူများက သိရသည်။

အဆိုပါ စီမံချက်ကို မလေးရှားနိုင်ငံရှိ JIMWPKL ထိန်းသိမ်းရေးဌာနခွဲက ဇူလိုင်လ ၃၀ ရက်တွင် စတင်ခြင်းဖြစ်ပြီး တရားမဝင်နိုင်ငံခြားသားများအားစစ်ဆင်ရေးတစ်ရပ်အနေဖြင့် ရှာဖွေဖမ်းဆီးခဲ့ရာ လူ ၁၇၁ ဦးကို စစ်ဆေးမှုပြုလုပ်စဉ် ပြည်ပနိုင်ငံသား စုစုပေါင်း ၃၆ ဦးကို ပြစ်မှုကျူးလွန်မှုဖြင့် ဖမ်းဆီးအရေးယူခဲ့ကြောင်း သိရသည်။

ဖမ်းဆီးရမိသော မြန်မာနိုင်ငံသားများ အပါအဝင်နိုင်ငံခြားသားများအား မလေးရှားနိုင်ငံ ဥပဒေပုဒ်မ - ၁၅(၁)(ဂ) လူဝင်မှုကြီးကြပ်ရေး အက်ဥပဒေ ၁၉၅၉/၆၃ ပုဒ်မ - ၆(၁)(ဂ) လူဝင်မှုကြီးကြပ်ရေးအက်ဥပဒေ ၁၉၅၉/၆၃ ပုဒ်မများဖြင့် အရေးယူဆောင်ရွက်နေကြောင်း မလေးရှားအာဏာပိုင်များ၏ ထုတ်ပြန်ချက်ကို ကိုးကား၍ မြန်မာရွှေ့ပြောင်းအလုပ်သမားများအရေး လုပ်ဆောင်နေသူများက ပြောသည်။

အဆိုပါ အဖမ်းခံထားရသူ ၃၆ ဦးထဲတွင် အိန္ဒိယနိုင်ငံသား (၂၆)ဦး၊ အင်ဒိုနီးရှား(၃)ဦး၊ မြန်မာ(၃)ဦး၊ပါကစ္စတန် နိုင်ငံသား (၄) ဦးတို့ဖြစ်ကြောင်းသတင်းရရှိသည်။

"သူတို့က ဘာပြစ်မှုနဲ့ ဖမ်းခံရတယ်ဆိုတာတော့ မသိဘူး။ ပြစ်မှုတွေ ကျူးလွန်တာရှိတယ်ဆိုပြီးတော့ ပတ်ဝန်းကျင်က တိုင်တာတွေကြောင့် စစ်ဆေးတာကနေ အဖမ်းခံရတာ။ ကျွန်တော်တို့ နိုင်ငံသားတွေပါတာက ဘယ်သူဘယ်ဝါ မသိရသေးဘူး။ စုံစမ်းပြီးတော့ လိုအပ်တာတွေကို ကူညီသွားရမှာပေါ့"ဟု မြန်မာရွှေ့ပြောင်းအလုပ်သမားများအရေးလုပ်ဆောင်နေသူတစ်ဦးကပြောသည်။

ymg/mt
#Yangon_Media_Group

#Local_News
Published _2 August 2022

စားသုံးသူပြည်သူများ ဈေးနှုန်းသက်သာစွာ စားသုံးနိုင်ရန် မြန်မာနိုင်ငံဆန်စပါးအသင်းချုပ်က ဦးဆောင်၍ ဆန် ၁အိတ်လျင် ၃၅၀၀၀ ကျပ်မှ စ၍ရောင်းချပေးသွားမည် ဖြစ်ကြောင်း အဆိုပါအသင်းချုပ်မှ သိရသည်။

ယင်း ဆန်ရောင်းချခြင်း အစီအစဉ်အား ဩ ဂုတ်လ ၃ရက်မှ စတင်ကာ နေ့စဉ် နံနက် ၉နာရီမှ ညနေ ၃နာရီအတွင်း ရောင်းချပေးသွားမည် ဖြစ်ကြောင်း သိရသည်။

အစီအစဉ်ကို မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံ ဆန်စပါးကုန်သည်များအသင်း၊ မြန်မာနိုင်ငံ ဆန်စက်လုပ်ငန်းရှင်များအသင်း၊ ဆန်စပါး ကုန်စည်ဒိုင်(ဝါးတန်း) နှင့် ဆန်စပါးကုန်စည်ဒိုင် (ဘုရင့်နောင်) တို့ ပူးပေါင်းကာ ဆောင်ရွက်ခြင်းဖြစ် ကြောင်းလည်း သိရသည်။

ယခုရောင်းချပေးမည့် အစီအစဉ်တွင် ရွှေဘိုပေါ်ဆန်း၊ ဧရာဝတီပေါ်ဆန်း၊ ကြားပျံ၊ ရက် ၉၀ စသည့် ဆန်အမျိုးအစားများ ပါဝင်မည်ဖြစ်ပြီး ဈေးနှုန်းအနေဖြင့် ၁ အိတ်လျှင် ၃၅၀၀၀ ကျပ်မှ ၇၇၀၀၀ ကျပ်အထိ အ စားစားရှိမည်ဖြစ်ကြောင်း မြန်မာနိုင်ငံ ဆန်စပါးအသင်းချုပ်မှ သိရသည်။

ရောင်းချပေးသွားမည့် ဈေးနှုန်းများမှာ ရက် ၉၀ ဆန် ၁ အိတ်လျှင် ၃၅၀၀၀ ကျပ်မှ ၃၇၀၀၀ ကျပ်၊ ကြားပျံဆန် ၁ အိတ်လျှင် ၅၅၀၀၀ ကျပ်မှ ၆၀၀၀၀ ကျပ်၊ ဧရာဝတီ ပေါ်ဆန်း ၁ အိတ်လျှင် ၅၂၀၀၀ ကျပ်မှ ၅၅ ၀၀၀ ကျပ်၊ ရွှေဘိုပေါ်ဆန်း ၁ အိတ်လျှင် ၇၅၀၀၀ ကျပ်မှ ၇၇၀၀၀ ကျပ်ဖြင့် ရောင်း ချပေးသွားမည် ဖြစ်ကြောင်း သိရသည်။

လက်ရှိဈေးကွက်အတွင်း တန်းမြင့်ဆန်အဖြစ် သတ်မှတ်ထားသည့် ရွှေဘိုပေါ်ဆန်း တစ်အိပ်လျင် ၉၀၀၀၀ ဝန်းကျင်အထိ ပေါက်ဈေးရှိနေပြီး အခြားဆန်အမျိုးအစားများမှာလည်း ယခင်လဆန်းပိုင်းကနှင့်နှိင်းယှဉ်ပါက ၁အိတ်လျှင် ၅၀၀၀ ကျပ်မှ ၁၀၀၀၀ ဝန်းကျင်အထိ ဈေးနှုန်းမြင့်တက်မှုများရှိခဲ့ကြောင်း ဆန်ဈေးကွက်အတွင်းမှ သိရသည်။

ရွှေဘိုပေါ်ဆန်း ဈေးနှုန်းမြင့်တက်ရခြင်းမှာ စစ်ကိုင်းတိုင်းအတွင်း နယ်မြေမတည်ငြိမ်မှုကြောင့် အပါအဝင်၊ ကုန်ထုတ်လုပ်မှု စရိတ်များ မြင့်တက်လာခြင်း၊ သွင်းအားစု ဈေးနှုန်းများ မြင့်တက်လာခြင်း၊ သယ်ယူခ စရိတ်များ မြင့်တက်လာခြင်းတို့ကြောင့်ဖြစ်ပြီး ဈေးနှုန်း ဆက်လက် မြင့်တက်နေဦးမည် ဖြစ်ကြောင်း ဆန်စပါးအသင်းချုပ်မှ တာဝန်ရှိသူ တစ်ဦးထံမှ သိရသည်။

ဆန်ရောင်းချမည့် အစီအစဉ်မှာ အခြေခံ ပြည်သူလူထုသို့ ရောင်းချပေးမည့် အစီအစဉ်ဖြစ်ပြီး တစ်အိမ်ထောင်လျင် ဆန် (၁) အိတ်နှုန်းသာ ရောင်းချပေးသွားမည်ဖြစ်ကာ ဆန်စပါး ကုန်စည်ဒိုင် (ဝါးတန်း)တည်ရှိရာ၊ ဝါးတန်းဆိပ်ကမ်းနယ်မြေတွင် ရောင်းချပေးသွားမည်ဖြစ်ကြောင်း သိရသည်။

ymg/NN
#Yangon_Media_Group

#Local_News
Published -2 August 2022

ဩဂုတ်လ ၂ ရက်နေ့ နံနက် ၃နာရီခွဲကျော်အချိန်ခန့်ရှိ လူထုမိတ်ဆွေယာဉ်လိုင်းမှ YBS 94 ယာဉ်တစ်စီး ခိုးယူခံရမှုဖြစ်စဉ်ဖြစ်ပွားခဲ့ကြောင်း သိရသည်။

အဆိုပါ အခိုးခံရသည့် YBS 94 ယာဉ်လိုင်းမှ ယာဉ်အမှတ် 2P-7221သည် ရွှေပြည်သာကွေ့ CNG ဆိုင်တွင် gas ဖြည့်ရန် ရောက်ရှိနေခဲ့ပြီး ယာဉ်မောင်းဖြစ်သူသည် ယာယီကားရပ်ခဲ့ကာ မိမိရှေ့ကားသို့ သွားရောက်မေးမြန်းနေစဉ် အမည်မသိသူတစ်ဦးမှ ယာဉ်အားမောင်းနှင်ကာ ထွက်ပြေးသွားခြင်း ဖြစ်ကြောင်း အဆိုပါယာဉ်လိုင်းမှ သိရသည်။

ယင်းအပြင် အခိုးခံလိုက်ရသည့် ယာဉ်ကို ဂျပန်လမ်းမှတ်တိုင်အနီး လမ်းပြောင်းပြန်အနေအထားဖြင့် ဓာတ်တိုင်များဝင်တိုက်ကာ ရပ်တန့်နေသည်ကိုတွေ့ရှိရပြီး ရပ်ကွက်နေပြည်သူများက ဝိုင်းဝန်းကူညီပေးမှုဖြင့် မော်တော်ယာဉ်အား မောင်းနှင်သွားသူကို ဖမ်းဆီးရမိကာ ရွာမယာဉ်မှုစစ်ရုံးတွင် ထိန်းသိမ်းထားကြောင်း သိရသည်။

ယင်း ဖြစ်စဥ်ကြောင့် ကျားတစ်ဦး၊ မတစ်ဦး သေဆုံးခဲ့ပြီး သုံးဦးထိခိုက်ဒဏ်ရာရှိခဲ့ကြောင်း သိရသည်။

Photo - လူထုမိတ်ဆွေယာဉ်လိုင်း
ymg/sth
#Yangon_Media_Group

#Local_News
Published_2 August 2022

ပြင်ဦးလွင်တွင် ရေကြီးရေလျှံမှုများကြောင့် ရေဘေးသင့်ပြည်သူ(၃၀၀၀)နီးပါးခန့်ရှိခဲ့ပြီး နေအိမ်အတွင်းရေများ ဝင်ရောက်ကာနေအိမ်ထိခိုက်ပျက်စီးခဲ့သူများ၊ စိုက်ခင်းများဆုံးရှုံးသူများ အနေဖြင့်ပြန်လည် ထူထောင်ရေးများ ပြန်လည်ဆောင်ရွက်နေသည်ဟု သန္တိသုခလူမှုကူညီရေးအသင်းဒုဥက္ကဌ ဦးလေးမြင့်အောင်က YMG ကိုပြောသည်၊၊

လတ်တလောတွင် ရေများပြန်ကျသွားပြီဖြစ်ပြီး ရေတွင်းရေကန်များပျက်စီးသွားသည့်အတွက် ရေဘေးသင့်ပြည်သူများအတွက် ရေသန့်နှင့် စားနပ်ရိက္ခာများလိုအပ်နေသည်ဟုဆိုသည်၊၊

"ရေဘေးသင့်ပြည်သူကတော့ (၂၀၀၀)ကျော်၊ (၃၀၀၀)နီးပါးရှိတယ်၊၊ ရေကတော့ပြန်ကျသွားပြီ၊၊ ပုံမှန်အနေအထားလောက်ပဲရှိတော့တယ်၊၊ ရေဝင်သွားတဲ့ အိမ်တွေကတော့ သူတို့အုတ်တံတိုင်းတွေပြိုတာ၊ ကားတွေရေမြုပ်သွားတာတို့၊ သူတို့ရဲ့အိုးအိမ်ပစ္စည်း၊ စိုက်ခင်းတွေဆုံးရှုံးသွားတာတို့ ဒါတွေကိုတော့ ပြန်လည်ထူထောင်ရေးဆောင်ရွက်နေတာပေါ့၊၊

စိုက်ခင်းတွေ ပါသွားကြတယ်၊၊ ရေတက်နေချိန်ကတော့သူတို့ရွေ့ရပြောင်းရနဲ့ မနေ့ကတည်းက ကျွန်တော်တို့အသင်းအနေနဲ့ ထမင်းဗူးတစ်ထောင်ကျော်ဝေခဲ့တယ်၊၊ ရေတွင်းရေကန်တွေပျက်စီးသွားလို့ ရေသန့်နဲ့ ထမင်းဗူးတွေဝေခဲ့ပါတယ်၊၊ ဒီနေ့လည်း တစ်ထောင်ကျော်ဝေဖို့ရှိပါတယ်၊၊ ရေကြီးမှုကြောင့် သူတို့ရဲ့ ရေတွင်း၊ ရေကန်တွေပျက်သွားလို့ သောက်စရာရေတွေနဲ့ စားနပ်ရိက္ခာတွေလိုအပ်ပါတယ်"လို့ သန္တိသုခလူမှုကူညီရေးအသင်းဒုဥက္ကဌဦးလေးမြင့်အောင်က သြဂုတ်လ(၁)ရက်ညနေပိုင်းတွင်ပြောသည်၊၊

မန္တလေးတိုင်းဒေသကြီး၊ ပြင်ဦးလွင်မြို့နယ်တွင် မိုးသည်းထန်စွာရွာသွန်းမှုကြောင့် ဇူလိုင်(၃၁)ရက်တွင်ရေကြီးရေလျှံမှုများဖြစ်ပွားခဲ့ပြီး မြိုကိုအဓိက ဖြတ်စီးနေသည့်ဂဲလောင်ချောင်းဘေးရှိ ရပ်ကွက်စုစုပေါင်း(၄)၊(၅)ရပ်ကွက်လောက် ရေမြုပ်ခဲ့ကာလူနေအိမ်ပျက်စီးဆုံးရှုံးမှု ကျပ်သိန်း(၂၀၀)ကျော်နှင့် စိုက်ခင်းများပျက်စီးခဲ့ကြောင်းသိရသည်၊၊

ymg/tthl
#Yangon_Media_Group

#World_Health
Published 2 August 2022

အမျိုးမျိုးသော လေ့ကျင့်ခန်းပြုလုပ်ခြင်းဖြင့် ကြွက်သားတွေထဲမှာရှိတဲ့ မော်လီကျူးတွေကို ပြုပြင်ပြောင်းလဲစေကြောင်း သုတေသနလေ့လာချက်အသစ်ကို Cell Metabolism မှာ တနင်္လာနေ့က ဖော်ပြခဲ့ပါတယ်။

ဘယ်လိုလေ့ကျင့်ခန်းပဲလုပ်လုပ် C18ORF25 မျိုးဗီဇဆဲလ်များ လှုပ်ရှားလာစေပြီး ကြွက်သားသန်မာမှုကို မြှင့်တင်ပေးနိုင်တယ်လို သုတေသီများဖော်ပြခဲ့ပါတယ်။

C18ORF25 မျိုးဗီဇဆဲလ်နည်းပါးတဲ့ သူတွေဟာ လှုပ်ရှားလေ့ကျင့်မှုသိပ်မလုပ်နိုင်ဘဲ ကြွက်သားအားနည်းလေ့ရှိကြောင်း မဲလ်ဘုန်းတက္ကသိုလ်နဲ့ ကိုပင်ဟေဂင်တက္ကသိုလ်တို ပူးပေါင်းလေ့လာချက်မှာ ဖော်ပြထားပါတယ်။

ပရိုတိန်းတွေ ဆဲလ်တွေထဲမှာ ဘယ်လိုပြောင်းလဲသွားလဲဆိုတာကို ဆန်းစစ်ခဲ့ကြကာ လူသားကြွက်သားတွေမှာ လေ့ကျင့်ခန်းအမျိုးမျိုးကြောင့် မော်လီကျူးကွဲပြားခြားနားခြင်းတွေနဲ့ တူညီချက်တွေကို သုတေသနအဖွဲက တွေ့ရှိခဲ့ကြပါတယ်။

မဲလ်ဘုန်းတက္ကသိုလ်မှ ဒေါက်တာ'ဘန်ဂျမင်ပါကား'က C18ORF25 မျိုးဗီဇဆဲလ်ဟာ ကြွက်သားတွေကြီးထွားစရာမလိုဘဲ သိသိသာသာသန်မာလာစေတာကို မြင်တွေ့ခဲ့ရကြောင်း ရှင်းပြခဲ့ပါတယ်။

ထိုတွေ့ရှိမှုတွေက လေ့ကျင့်ခန်းပြုလုပ်ခြင်းနဲ့ ရရှိလာနိုင်တဲ့အကျိုးကျေးဇူးတွေကို ပိုမိုကောင်းမွန်အောင်ပြုလုပ်နိုင်ပြီး လေ့ကျင့်ခန်း အကျိုးကျေးဇူးအချို့ကို တုပပြီးဆေးကုသမှုနည်းလမ်းများ ရရှိလာနိုင်ကြောင်း မျှော်လင့်နေပါတယ်။

"အဆိုပါ မျိုးဗီဇဆဲလ်တွေတွေ့ရှိခြင်းဖြင့် အိုမင်းရင့်ရော်လာခြင်းတွေ၊ ကြွက်သားကျုံသေးလာခြင်းတွေ၊ အားကစားသိပ္ပံ၊ မွေးမြူရေးနဲ့ အသားထုတ်လုပ်ရေးတွေမှာပါ ထိန်းချုပ်နိုင်ရေးအတွက် သက်ရောက်လာနိုင်ပါတယ်၊ ဘာကြောင့်လဲဆိုတော့ ကျန်းမာရေးကောင်းမွန်ဖို့အတွက် အကောင်းဆုံးနည်းလမ်းတစ်ခုက ကြွက်သားလုပ်ဆောင်ချက်အကောင်းဆုံးဖြစ်နေဖို့ လိုအပ်လို့ပါပဲ" လို့ ပြောကြားခဲ့ပါတယ်။

"ဆီးချို၊ နှလုံးသွေးကြောရောဂါ၊ ကင်ဆာရောဂါများအပါအဝင် နာတာရှည်ရောဂါများကို လေ့ကျင့်ခန်းပြုလုပ်ခြင်းဖြင့် ကာကွယ်နိုင်ပါတယ်၊ အခုဆိုရင် အမျိုးမျိုးသောလေ့ကျင့်ခန်းတွေက မော်လီကျူးအဆင့်အနေနဲ့ ကျန်းမာရေးကောင်းကျိုးများရရှိစေပြီး ကုသရေးနည်းလမ်းအသစ်များ တိုးတက်တီထွင်လာနိုင်ပါတယ်" လို 'ပါကား'ကပြောကြားသွားပါတယ်။

Source: The Jerusalem Post
#Yangon_Media_Group

Published 2 August 2022

အမေရိကန် အောက်လွှတ်တော်ဥက္ကဋ္ဌ နန်စီပီလိုစီဟာ အင်္ဂါနေ့မှာ ထိုင်ဝမ်ကို သွားရောက်မယ်လို့ သတင်းအရင်းအမြစ်တွေက ဆိုပါတယ်။ အမေရိကန်ပြည်ထောင်စုအနေနှင့် တရုတ်ရဲ့ခြိမ်းခြောက်မှုကို ကြောက်ရွံ့မှာမဟုတ်ဘူးလို့ပြောပါတယ်။

အာရှခရီးစဉ်ကို တနင်္လာနေ့စောစောပိုင်း စင်္ကာပူကနေ စတင်ခဲ့တဲ့ ပီလိုစီဟာ ထိုင်ဝမ်မှာ အင်္ဂါနေ့ည နေထိုင်မှာဖြစ်တယ်လို့ ခရီးစဉ်နှင့်နီးစပ်တဲ့ သတင်းအရင်းအမြစ်(၃)ခုက ပြောပါတယ်။

ထိုင်ဝမ်နိုင်ငံခြားရေးဌာနက မှတ်ချက်မပေးလိုဘူးလို့ပြောဆိုပြီး အိမ်ဖြူတော်ကတော့ သူတို့အနေနှင့် အဲဒီခရီးကို အတည်ပြု မပေးနိုင်ဘူး။ဒါပေမယ့် ပီလိုစီဟာ ထိုင်ဝမ်ကိုသွားဖို့ သူမမှာ အခွင့်အရေးရှိတယ်လို့ပြောပါတယ်။

ရိုက်တာသတင်းဌာနကို သတင်းအရင်းအမြစ်တစ်ခုကပြောတာကတော့ ပီလိုစီရဲ့ ထိုင်ဝမ်သွားရောက်မယ့်ကိစ္စ အမေရိကန် ပြည်ထောင်စုဟာ ယင်းရဲ့ မဟာမိတ်အချို့ကို အကြောင်းကြားပြီးဖြစ်တယ်လို့ ဆိုပါတယ်။ နောက်သတင်းအရင်းအမြစ်နှစ်ခု ကတော့ ပီလိုစီဟာ သူမ ထိုင်ဝမ်မှာနေစဉ်အတွင်း တရုတ်ရဲ့ လူ့အခွင့်အရေးမှတ်တမ်းကို ဝေဖန်ပြောဆိုနေနဲ့ လှုပ်ရှား တက်ကြွသူ အုပ်စုလေးတစ်စုနှင့် ဗုဒ္ဓဟူးနေ့လောက်ဖြစ်ဖြစ် တွေ့ဖို့ရှိတယ်လို့ပြောနေပါတယ်။

Source Reuters

#Local_News
Published _ 1 August 2022

ဆန်စပါးအထွက်နှုန်း တိုးတက်လာစေဖို့ လျာထားဆောင်ရွက်ချက်နဲ့အတူ ရန်ကုန်တိုင်းဒေသကြီးအတွင်း အခုနှစ် မိုးစပါး စိုက်ပျိုးရာသီမှာ ဧကပေါင်း ၁၁ သိန်းကျော်အထိ စိုက်ပျိုးနိုင်ဖို့ လျာထားပေမယ့် ဧက ၈၉၀၀၀၀ အထိသာ စိုက်ပျိုးနိုင်ခဲ့တယ်လို့ စိုက်ပျိုးရေးဦးစီးဌာနက သိရပါတယ်။

#Yangon_Media_Group

#World_Discovery
Published 1 August 2022

ပနားမားအတ္တလန်တိတ် ဆိပ်ကမ်းတစ်ခုက အလုပ်သမားတွေက စပိန်ကနေ သင်္ဘောနဲ့ပြန်ပါလာတဲ့ ကွန်တိန်နာအလွတ်တစ်ခုကို ဖွင့်ကြည့်လိုက်ရာမှာ အသက်ရှင်နေသေးတဲ့ ခွေးလေးတစ်ကောင်ကို အံ့အားသင့်စရာတွေ့ရှိခဲ့ကြပါတယ်။

#Yangon_Media_Group

Published: 1 August 2022

အိန္ဒိယနိုင်ငံဟာ ယင်းရဲ့ ပထမဆုံးသော မျောက်ကျောက်ရောဂါဖြင့်သေဆုံးမှုကို အတည်ပြုပါတယ်။ သေဆုံးသူဟာ တောင်ပိုင်း ကာရာလာပြည်နယ်ကဖြစ်ပါတယ်။

ပြီးခဲ့တဲ့အပတ်က စပိန်နိုင်ငံဟာ မျောက်ကျောက်ရောဂါကြောင့် သေဆုံးသူ နှစ်ဦးရှိကြောင်းကြေညာပြီး ဘရာဇီးကလည်း ပထမဆုံးသေဆုံးသူ တစ်ဦးကို ကြေညာခဲ့ပါတယ်။ အဲဒါကြောင့် အိန္ဒိယမှာ သေဆုံးမှုဟာ အတည်ပြုသေဆုံးမှု (၄)ဦးမြောက် ဖြစ်ပါတယ်။ အဲဒီအပြင် အာရှမှာ ပထမဆုံးသေဆုံးမှုဖြစ်ခဲ့ပါတယ်။

ကမ္ဘာ့ကျန်းမာရေးအဖွဲ့က မျောက်ကျောက်ရောဂါကူးစက်မှုကို ကမ္ဘာ့အရေးပေါ်အခြေအနေအဖြစ် ဇူလိုင် ၂၃ရက်က ကြေညာခဲ့ပါတယ်။

“ ဇူလိုင် ၂၁ရက်မှာ သူဟာ ကာရာလာကိုရောက်လာပြီး  မောပန်းပြီးဖျားနာလာလို့  ဇူလိုင် ၂၆ ရက်က မှ ဆေးရုံ ရောက်လာခဲ့တာဖြစ်ပါတယ်” လို့ ဝန်ကြီး ကေရာဂျန်ကပြောပါတယ်။ ပထမအဆင့်ထိတွေ့ဆက်ဆံခဲ့သူတွေဆီမှာ ဘာရောဂါလက္ခဏာမှပြသခြင်းမရှိလို့  ပြည်သူတွေအနေနှင့် အထိတ်တလန့်ဖြစ်စရာ အကြောင်းမရှိဘူးလို့လည်း သူက ဖြည့်စွက်ပြောပါတယ်။

အဲဒီသူဟာ အိန္ဒိယကို ပြန်မရောက်ခင် ယူအေအီးမှာ  ဆေးစစ်တဲ့အခါ မျောက်ကျောက်ရောဂါပေါ့စတစ်ဖြစ်ခဲ့တာလို့ အာဏာပိုင်တွေကို မိသားစုကပြောတဲ့အကြောင်း ပြည်နယ်ကျန်းမာရေးဝန်ကြီး ဗီနာ ဂျော့က ပြောပါတယ်။

ပြီးခဲ့တဲ့လကုန်ပိုင်းအထိ နိုင်ငံပေါင်း ၇၈ နိုင်ငံမှာ မျောက်ကျောက် ကူးစက်မှုပေါင်း ၁၈၀၀၀ ရှိခဲ့ပြီး အများစုဟာ ဥရောပ မှာဖြစ်တယ်လို့ ကမ္ဘာ့ကျန်းမာရေးအဖွဲ့ကပြောပါတယ်။

မျောက်ကျောက်ရောဂါဟာ ကျောက်ရောဂါထက် ရောဂါလက္ခဏာ ပျော့ပြီး အလယ်နှင့် အနောက်အာဖရိကမှာ အဓိကဖြစ်ပွားတဲ့ရောဂါဖြစ်တယ်လို့ ကမ္ဘာ့ကျန်းမာရေးအဖွဲ့က ပြောပါတယ်။ ရောဂါဟာ တိရိစ္ဆာန်ကနေလူသားကို ကူးစက်တာဖြစ်ပါတယ်။

Source: Reuters

#India_Monkeypox_dead

#Monkeypox

#World_Health