#LocalNews
Published_ 12 December 2022

လတ်တလောတွင် ထိခိုက်ဒဏ်ရာရလူနာများ၊ သားဖွားလူနာများအပြင် တက်သည့်ကလေးလူနာများကိုလည်း ဆေးရုံများကိုအချိန်မီပို့ဆောင်ပေးနေရကြောင်း ပုလဲအရန်မီးသတ်တပ်ဖွဲ့မှ သိရသည်၊၊

တက်သည့်ကလေးလူနာများထဲတွင် အသက်ဆုံးရှုံးရတာမျိုးများလည်းရှိနေသည့်တဲ့အတွက် သတိပြုဖို့လိုသည်ဟုဆိုသည်၊၊

လူနာများပို့ဆောင်ပေးနေရသည့် အခြေအနေများနှင့်ပတ်သက်၍ ပုလဲအရန်မီးသတ်တပ်ဖွဲ့မှ ဦးထင်လင်းအောင်က အခုလိုပြောပြသည်၊၊

"လူနာပို့ဆောင်ပေးရတာက ကားအက်ဆီးဒင့်ဖြစ်တာ၊ဆိုက်ကယ်မှောက်တာတို့၊ကိုယ်ဝန်ဆောင် မိခင်တွေ ကလေးတွေ၊အခုလောလောဆယ်တော့ တက်တဲ့ကလေးတွေကို ဆေးရုံကို ပို့ဆောင်ပေးနေရပါတယ်၊၊ကလေးတစ်လအရွယ်လေးတွေ တက်တာပေါ့၊၊ရွှေပေါက်ကံက ကလေးကတော့ ညပိုင်းကြီးဖြစ်သွားတယ်၊၊ကျွန်တော်တို့ရောက်တဲ့အချိန်မှာ မမီလိုက်ဘူး၊၊အသက်ဆုံးရှုံးသွားတယ်၊၊လသားလေးတောင်မဟုတ်ဘူး ရက်သားလေးပဲရှိတာပေါ့၊၊ ဟိုတစ်နေ့က တစ်ယောက်ကတော့ မှီသွားတယ်၊၊ရန်ကင်းကလေးဆေးရုံကိုပို့လိုက်တဲ့အချိန် မီသွားတော့ကလေးက အသက်ရှင်ခွင့်ရသွားတယ်၊၊အချို့တွေက မွေးကတည်းက တက်တာတွေဘာတွေပါတာပေါ့၊၊ရာသီဥတုပူတာ ၊အပူကြောင့်လည်း ပါချင်ပါမှာပေါ့"ဟု ဦးထင်လင်းအောင်ကပြောသည်၊၊

လူကြီးပိုင်းများတွင် အပူကြောင့် သတိလစ်တာ၊ရှော့ခ်ဖြစ်ခြင်းများ မရှိသေးကြောင်းနှင့် ကလေးလူနာများ ကျန်းမာရေးသတိပြုရန်လိုအပ်ကြောင်း သိရသည်၊၊

တက်သည့်ကလေးငယ်တွေရှိပါက အရေးပေါ်လူနာတင်ယာဥ်များကို အချိန်မီခေါ်ယူကြရန်လိုအပ်ပြီး အချိန်မီဆေးရုံကို မပို့ဆောင်နိုင်ပါက အသက်ဆုံးရှုံးနိုင်သဖြင့် ပရဟိတအသင်းများကို အချိန်မီ ဆက်သွယ်အကူအညီတောင်းခံကြောင်း သိရသည်၊၊

ymg/tthl
#Yangon_Media_Group

#DailyNews
Published _ 12 December 2022

၁။ ပြည်ပသို့ ရေထွက်ကုန်ပစ္စည်းတင်ပို့မှု လျော့ကျလာ

၂။ ပြည်တွင်းခရီးသွားလုပ်ငန်းတွေ ယခုနှစ်တွင် အစကောင်းခဲ့ပြီး လာမည့်နှစ်တွင် ပိုတိုးတက်လာမည်

၃။ လာမည့်နှစ်တွင် ဘေးကင်းစွာမီးဖွားနိုင်ရေးနှင့် ဆေးလိပ်နှင့်အရက်သုံးစွဲမှု လျော့ကျစေရေးလုပ်ငန်းများ တိုးချဲ့ဆောင်ရွက်သွားမည်ဟုဆို

၄။ တောင်ကိုရီးယားတပ်ဖွဲ့များနှင့် ခံတပ်များဖြင့် ကာရံထားသည့်နယ်ခြားကျွန်း ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published _ 12 December 2022

HiJet တစ်စီးကို ကုန်တင်ကားကြီးကဝင်တိုက်၍ လူသေဆုံးမှု သံဖြူဇရပ်-ရေးလမ်းမကြီး တွင် ယနေ့ နံနက်ပိုင်းက ဖြစ်ပွားခဲ့ကြောင်း ရွှေဟင်္သာလူမှုကူညီရေးအသင်း(မော့ကနင်) က သိရသည်။

အဆိုပါ ယာဉ်ကို ဝင်တိုက်ခဲ့‌သော ကုန်တင်ကားကြီးမှာထွက်ပြေးမောင်းနှင်သွားကြောင်း၊Hijet ယာဉ်ပေါ်ပါ ခရီးသည် ၁၁ ဦးအနက် အမျိုးသမီးတစ်ဦးသေဆုံးကာ ၅ ဦးခန့် ဒဏ်ရာရရှိခဲ့ကြကြောင်း အဆိုပါ အသင်း၏ တာဝန်ရှိသူကပြောသည်။

"ဒဏ်ရာရသူတွေထဲမှာက ပြင်းထန်တဲ့ ဒဏ်ရာရသူတွေကို မော်လမြိုင်ဆေးရုံကို ပို့ပါတယ်။ကျန်တဲ့သူတွေကတော့ လမိုင်းဆေးရုံမှာ ကုသမှုခံယူနေကြပါတယ်" ဟု ၎င်းကပြောသည်။

ymg/mt
#Yangon_Media_Group

#Local _News
Published _ 12 December 2022

မန္တလေးတိုင်း၊ ပြင်ဦးလွင်မြို့ရှိ ပြင်ဦးလွင်အမျိုးသားကန်တော်ကြီးဥယျာဉ်တွင် လာမယ့် ဒီဇင်ဘာလ ၁၅ ရက်နေ့တွင် ကျင်းပမယ့် ၁၅ ကြိမ်မြောက် ပြင်ဦးလွင်ပန်းပွဲတော်မှာ နိုင်ငံကျော်တေးသံရှင်တွေ လာရောက်သီဆိုဖျော်ဖြေသွားမယ်လို့ ပန်းပွဲတော်ကျင်းပရေးကော်မတီကနေ အခုလိုပဲ သိရပါတယ်။

#Yangon_Media_Group

#LocalNews
Published _ 12 December 2022

ထိုင်းနိုင်ငံ Sichon စီရင်စုရှိ ကျေးလက်လမ်းဘေးတွင် မြန်မာရွှေ့ပြောင်းအမျိုးသားတစ်ဦး၏ ရုပ်အလောင်းတစ်လောင်းကို ယနေ့ ဒီဇင်ဘာလ ၁၂ ရက် နံနက်ပိုင်းက တွေ့ရှိခဲ့ရကြောင်း သိရသည်။

ယင်းမှာ ကျန်းမာရေးမကောင်းဖြစ်ပြီး သေဆုံးခဲ့သည်ဟု ယူဆ၍ရကြောင်း၊သေဆုံးသူမှာ အသက်(၅၆)နှစ်အရွယ် မြန်မာနိုင်ငံသား ဦးစိုးပိုင်ဆိုသူ ဖြစ်ကြောင်း ရဲမှူးကြီး Veeraya Kochaborirak ၏ ပြောစကားကို ကိုးကား၍ ဘန်ကောက်ပို့စ် သတင်းတွင် ဖော်ပြထားသည်။

ယင်းမှာ Sichon မြို့ရှိ ရာဘာခြံ အလုပ်သမားတစ်ဦးဖြစ်ကြောင်း၊ဦးစိုးပိုင်၏ မိတ်ဆွေများ ပြောပြချက်အရ ၎င်းမှာ တနင်္ဂနွေညကတည်းက ပျောက်သွားပြီးနောက် ယနေ့ တနင်္လာနေ့ နံနက်တွင် Sichon ရှိ Moo 8 ရွာ လမ်းဘေးတစ်နေရာ၌ သေဆုံးလျက်သား တွေ့ခဲ့ရခြင်းဖြစ်ကြောင်းလည်း သိရသည်။

ထိုင်းအာဏာပိုင်များက အလောင်းကို စစ်ဆေးကြည့်ရာတွင် ထိခိုက်ဒဏ်ရာမရှိသည့်အပြင် ခန္ဓာပေါ်၌လည်း အကြမ်းဖက်ခံထားရခြင်းမျိုး မတွေ့ရကြောင်း၊ မှုခင်းဆရာဝန်၏ ပြောဆိုချက်အရ နာတာရှည်ရောဂါကြောင့် သေဆုံးခြင်း ဖြစ်နိုင်သည်ဟု ကောက်ချက်ချထားကြောင်း သိရသည်။

ယခုအခါ ဦးစိုးပိုင်၏ ရုပ်အလောင်းကို သက်ဆိုင်သော မိသားစု ဆွေမျိုးအပေါင်းအသင်းများဖြင့် နာရေးပြုလုပ်နိုင်ရန် Tai Teck Tung Foundation တွင် ထားရှိကြောင်းလည်း ဘန်ကောက်ပို့စ် တွင် ရေးသားထားသည်။

ymg/mt
#Yangon_Media_Group

#Local_News
Published_12 December 2022

ခြောက်လတာကာလအတွင်း ဗဟိုဘဏ်မှ ရည်ညွှန်းနှုန်းအတိုင်း စားအုန်းဆီလုပ်ငန်းရှင်တွေထံ အမေရိကန်ဒေါ်လာ (၈၂) သန်း ရောင်းချပေးခဲ့ကြောင်း ဆီကုန်သည်နှင့် ဆီလုပ်ငန်းရှင်များအသင်း (MEODA) ဥက္ကဋ္ဌ ဦးဆန်းလင်း၏ ပြောကြားချက်မှ သိရသည်။

အဆိုပါ ဒေါ်လာ (၈၂) သန်းအနက် (၅၉) သန်းနှင့် ညီမျှသည့် ပမာဏကိုအသင်း၏ ကြီးကြပ်မှုနှင့်အတူ စားသုံးဆီစုစုပေါင်း (၄၅၂၀၈ ဒသမ ၇၂) တန် ဖြန့်ဖြူးရောင်းချပေးနိုင်ခဲ့ပြီး ကုမ္ပဏီတွေကနေတစ်ဆင့် စားသုံးဆီ (၁၇၀၅၁ ဒသမ ၁၃) တန်ကို ဖြန့်ဖြူးရောင်းချပေးခဲ့ကြောင်း သိရသည်။

လက်ရှိတွင် နိုင်ငံတော်မှချမှတ်ထားသည့် မူဝါဒအတိုင်း ပြည်ပမှ တစ်လလျှင်စားအုန်းဆီတန်ချိန် (၅၀,၀၀၀) ထက် ပိုမသွင်းရန် ဆောင်ရွက်နေပြီး Edible Oil Industry Value Chain နှင့် စားသုံးဆီကဏ္ဍတစ်ခုလုံး ဖွံ့ဖြိုးတိုးတက်ရေးတွင် ပါဝင်သွားရန် အစီအမံများ ချမှတ်သွားမည်ဖြစ်ကြောင်းသိရသည်။

ပြည်တွင်း၌ စားအုန်းဆီသုံးစွဲမှုသည် တစ်နှစ်လျှင် တန်ချိန် ၁၀ သိန်းကျော်အထိရှိသည့်အတွက် နှစ်စဉ်တန်ချိန် ၆ သိန်းမှ ၇ သိန်းကြားကို မလေးရှားနိုင်ငံနှင့် အင်ဒိုနီးရှားနိုင်ငံကနေ အဓိထားတင်သွင်းနေရကြောင်း သိရသည်။

#ymg/sth
#Yangon_Media_Group

#Local _News
Published _ 12 December 2022

ပြည်တွင်းအသေးစားလုပ်ငန်းလုပ်ကိုင်သူတွေ ဦးစီးကျင်းပမည့် Local Brand များအပါအဝင် ပြည်တွင်းဖြစ် လက်မှု အနုပညာပစ္စည်း ဈေးရောင်းပွဲတော်ကို လာမည့် ဒီဇင်ဘာ၂၅ ရက် ခရစ်မတ်နေ့မှာ ကျင်းပသွားမည်ဖြစ်ကြောင်း သိရသည်။

ဈေးရောင်းပွဲတော်ကို ရန်ကုန်မြို့၊ ဗိုလ်တထောင်ဆိပ်ကမ်းရှိ Vintage Luxury Yacht တတိယထပ်တွင် ပြုလုပ်သွားမှာဖြစ်ပြီး ဒီဇင်ဘာလ ၂၅ ရက် နေ့လညျ ၂ နာရီမှ ည ၈ နာရီ အတွင်း ရောင်းချပြသသွားမှာဖြစ်သည်။

ကိုယ်တိုင်ဖန်တီးပုံဖော်ထားသည့် ပန်းချီကားများ၊ အနုပညာလက်ရာများ၊ လက်ဝတ် ရတနာအဖြစ် ပုံဖော်ထားသည့် ပယင်းများ၊ တိုင်းရင်းသားရိုးရာအထည်များနှင့် မြန်မာ့ရိုးရာမုန့်များပါ ပါဝင်ရောင်းချပေးသွားမှာဖြစ်ကြောင်း သိရသည်။

ယခုလိုရောင်းချပေးသည့်အတွက် အသေးစားလုပ်ငန်းလုပ်ကိုင်နေသူများရဲ့ အလုပ် အကိုင်အခွင့်အလမ်းနှင့် ဈေးကွက်မှာ နှစ်ဦးနှစ်ဘက် အကျိုးအမြတ်ရရှိစေမှာဖြစ်ကြောင်း သိရသည်။

ဆိုင်ခန်းများကို တစ်ခန်းလျှင် ငွေကျပ် ၅၀၀၀၀ဖြင့် ဌားရမ်းနိုင်ပြီး ဝင်ကြေးအခမဲ့ ဖြစ်ကြောင်းလည်း သိရှိရသည်။

#ymg/NN
#Yangon_Media _Group

#Local _News
Published _ 12 December 2022

စစ်ကိုင်းတိုင်းဒေသကြီးမှ ထွက်ရှိသည့် ရွှေဘိုပေါ်ဆန်းကို မြန်မာနိုင်ငံရဲ့ပထမဆုံးပထဝီဒေသဆိုင်ရာ ညွှန်းကိန်း(GI) ထုတ်ကုန်အဖြစ် သတ်မှတ်နိုင်ရန် လုပ်ဆောင်လျက်ရှိကြောင်း ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းထံမှ သိရသည်။

ပြည်တွင်းရှိ ထုတ်ကုန်များကို GI လျှောက်ထားနိုင်ရန် ပြင်သစ်နိုင်ငံရှိ AFD မှ ၂၀၁၈ ခုနှစ်က စစ်တမ်းကောက်ယူခဲ့ပြီး ရွှေဘိုပေါ်ဆန်း၊ ရွာငံကော်ဖီ၊ ဟန်မြင့်မိုရ်စိန်တစ်လုံး၊ ပုဂံယွန်းထည်၊ သနပ်ခါးနှင့် လက်ဖက်စသည့် ထုတ်ကုန်များထဲတွင် ယခု ရွှေဘိုပေါ်ဆန်းအား ကနဦးရွေးချယ်ခဲ့ကြောင်း သိရှိရသည်။

ရွှေဘိုပေါ်ဆန်း ကို GI ထုတ်ကုန်အဖြစ် သတ်မှတ်နိုင်ရန် ပြင်သစ်နိုင်ငံ AFD အကူအညီဖြင့် ၂၀၂၂မှာ စတင်အကောင်အထည်ဖော်ခဲ့ပြီး ၂၀၂၂ ဒီဇင်ဘာလ မှာ အပြီးသတ်ဖို့ လျာထားခဲ့ပေမယ့် ကိုဗစ် ၁၉နှင့် အခြားသောအခြေအနေများကြောင့် လာမည့် ၂၀၂၃ ခုနှစ် ဇွန်လမှာ အပြီးသတ်သွားမည်ဖြစ်ကြောင်းလည်း အသင်းမှ သိရသည်။

ရွှေဘိုပေါ်ဆန်း ကို GI ထုတ်ကုန်အဖြစ် သတ်မှတ်နိုင်လျှင် မြန်မာ့မျိုးရင်းအဖြစ် နိုင်ငံတကာမှာ သတ်မှတ်နိုင်မှာဖြစ်သလို ပြည်တွင်းစိုက်ပျိုးထုတ်လုပ်သူတွေအတွက် ပိုမိုအကျိုးဖြစ်ထွန်းပြီး ပြည်ပစျေးကွက်ကို ချဲ့ထွက်နိုင်မှာဖြစ်ကြောင်း သိရသည်။

ယခုလက်ရှိမှာတော့ စိုက်ပျိုးတဲ့ ပမာဏနည်းပါးခဲ့သည့်အတွက် ရွှေဘိုပေါ်ဆန်း တစ်အိတ်ကိုဆန်အမျိုးအစားပေါ်မူတည်ပြီး ငွေကျပ် ၁သိန်းအထိပေါက်စျေးရှိနေကာ စပါးတင်း ၁၀၀ကို ၂၆သိန်းအထိ စျေးရှိနေသည်။

#ymg/NN
#Yangon_Media_Group

#Local_News
Published_12 December 2022

ဒီဇင်ဘာလ ၁၂ ရက်မှ ၁၈ ရက်အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာ ၄၅၁၅ ကျပ် သတ်မှတ်ထားပြီး ပြီးခဲ့သည့် တစ်ပတ်ထက် ၁၀၀ ကျော်ကျဆင်းလာကြောင်း သိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် စားအုန်းဆီအဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ပြီး သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်အတွင်း ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးနေခြင်းဖြစ်ကြောင်း သိရသည်။

ယင်းအပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။

လက်ရှိဈေးကွက်ထဲတွင် စားအုန်းဆီးဈေးနှုန်းမှာ တစ်ပိဿာ ၆၀၀၀ ဝန်းကျင်အထိ ကျဆင်းလာကြောင်း၊ ပြည်တွင်း၌ စားအုန်းဆီသုံးစွဲမှုမှာ တစ်နှစ်လျှင် တန်ချိန်၁၀ သိန်းကျော်အထိရှိသည့်အတွက် နှစ်စဉ်တန်ချိန် ၆ သိန်းမှ ၇ သိန်းကြားကို မလေးရှားနိုင်ငံနှင့် အင်ဒိုနီးရှားနိုင်ငံမှ အဓိထားတင်သွင်းနေရကြောင်း သိရသည်။

#ymg/sth
#Yangon_Media_Group

#World_Business
Published 12 December 2022

အဲအိန္ဒိယ(Air India)လေကြောင်းလိုင်းဟာ အဲဘတ်စ်(Airbus)နဲ့ ဘိုးအင်း(Boeing)တို့ကနေ ဒေါ်လာဘီလီယံဆယ်ဂဏန်းခန့် တန်ဖိုးရှိတဲ့ ဂျက်လေယာဉ်အစင်း ၅၀၀ ကို မှာယူရန် နီးစပ်နေပြီဖြစ်ကြောင်း သိရှိရပါတယ်။

Tata Group လုပ်ငန်းစုကြီးရဲ့ လက်အောက်မှာ လေကြောင်းလိုင်းကို ရည်မှန်းချက်ကြီးကြီးနဲ့ ပြန်လည်အကောင်အထည် ဖော်နေတာပဲဖြစ်ပါတယ်။

မှာယူမှုထဲမှာ ကိုယ်ထည်ကျဉ်းဂျက်လေယာဉ် အစင်း ၄၀၀ နဲ့ ကိုယ်ထည်ပိုမိုကျယ်တဲ့ ဂျက်လေယာဉ် အစင်း ၁၀၀ ကျော်ပါဝင်တဲ့အပြင် Airbus A350 ၊ Boeing 787, 777 ယာဉ် ဒါဇင်ခန့်ပါဝင်ကြောင်း သတင်းနီးစပ်သူတစ်ဦးက ဆိုလိုက်ကာ လာမယ့်ရက်ပိုင်းအတွင်း အတည်ပြုသွားမှာဖြစ်ပါတယ်။

ဝယ်ယူမယ့်စာရင်းအရ စုစုပေါင်းတန်ဖိုးအမေရိကန်ဒေါ်လာ ၁၀၀ ဘီလီယံရှိလာနိုင်ကာ လေကြောင်းလိုင်းတစ်ခုတည်းကနေ ပမာဏအများဆုံး ဝယ်ယူမှုတွေထဲက တစ်ခုဖြစ်လာနိုင်ပြီး လွန်ခဲ့တဲ့ဆယ်စုနှစ်ကျော်တုန်းက Airbus နဲ့ Boeing တို့ကနေ အမေရိကန်လေကြောင်းလိုင်းများ စုပေါင်းမှာယူခဲ့တာထက် ပိုများနေပါတယ်။

ကိုဗစ်ကပ်ရောဂါကာလပြီးနောက် လေယာဉ်မှာယူမှုများ ပြန်လည်များပြားလာကာ ထုတ်လုပ်ရေးလုပ်ငန်းတွေအနေနဲ့ ဖိအားတွေနဲ့ ရင်ဆိုင်နေရပါတယ်။

Air India နဲ့ Vistara တို့ပူးပေါင်းကာ စင်္ကာပူလေကြောင်းလိုင်းတွေနဲ့ လက်တွဲပြီး ပြည်တွင်းရော နိုင်ငံတကာမှာပါ ပိုမိုကြီးမားတဲ့ လေကြောင်းပို့ဆောင်ရေး ဖြစ်လာစေရန် Tata က ကြေညာပြီး ရက်ပိုင်းအတွင်းမှာပဲ အခုလိုမှာယူလိုက်တဲ့သတင်းတွေ ထွက်ပေါ်လာတာပါ။

ဒီဝယ်ယူမှုကြောင့် Tata မှာ လေယာဉ်ပေါင်း ၂၁၈ စင်းရှိလာမှာဖြစ်ပြီး အိန္ဒိယနိုင်ငံအတွင်း အကြီးမားဆုံး နိုင်ငံတကာလေကြောင်းလိုင်း ဖြစ်လာမှာဖြစ်ပြီး ပြည်တွင်းမှာတော့ IndiGo ပြီးရင် ဒုတိယအကြီးဆုံး ဖြစ်လာမှာပါ။

Air India ဟာ တစ်ချိန်တုန်းက ပြင်ဆင်မှု၊ ဝန်ဆောင်မှုတွေနဲ့ နာမည်ကြီးခဲ့ပေမယ့် ၂၀၀၀ ခုနှစ်တွေမှာ ဘဏ္ဍာရေးပြဿနာများကြောင့် နာမည်ပျက်ခဲ့ရပါတယ်။

၁၉၃၂ ခုနှစ်မှာ JRD Tata က Air India ကိုတည်ထောင်ခဲ့ကာ ၁၉၅၃ မှာ ပြည်သူပိုင်သိမ်းလိုက်ပါတယ်။

Tata က ဇန်နဝါရီလမှာ ပြန်လည်ထိန်းချုပ်လိုက်ပြီး ကမ္ဘာ့အဆင့်လေကြောင်းလိုင်းအဖြစ် ပြန်လည်ဦးမော့လာစေရန် ကြိုးပမ်းနေပါတယ်။

မှာယူတဲ့ လေယာဉ်အစင်း ၅၀၀ ကို လေကြောင်းလိုင်းထဲမှာ အစားထိုးခြင်း၊ ထပ်ထည့်ခြင်းများ ပြုလုပ်သွားမှာဖြစ်ပါတယ်။

ကမ္ဘာ့တစ်နေရာမှာ နေရာရဖို့အတွက် အခြေခံအဆောက်အအုံ လိုအပ်ချက်တွေ၊ လေယာဉ်မှူးနည်းပါးမှုတွေ၊ ပြိုင်ဆိုင်မှုပြင်းထန်ခြင်းတို့ကြောင့် Air India အနေနဲ့ အခက်အခဲများစွာ ကြုံရဦးမယ်လို့ ကျွမ်းကျင်သူများက သတိပေးလိုက်ပါတယ်။

Source: SCMP
#Yangon_Media_Group

#World_Science
Published 12 December 2022

လူတွေက ခွေးလေးတွေ ဘာလုပ်ချင်လဲဆိုတာကို အမူအရာကြည့်ပြီး ခန့်မှန်းနိုင်ပေမယ့် ရန်လိုတဲ့သဘောကိုတော့ သိပ်ပြီးမသိရှိကြပါဘူး။

ခွေး ၂ ကောင်ကြား အပြန်အလှန်ရန်လုပ်နေတဲ့သဘောကို လူတွေက ၂၀ ရာခိုင်နှုန်းလောက်ပဲ မှန်အောင် ခန့်မှန်းနိုင်ကြတယ်လို့ ဂျာမနီမှသုတေသီများက တွေ့ရှိခဲ့ပါတယ်။

ကလေးတွေ ရန်စောင်တဲ့အချိန်မှာလည်း ခန့်မှန်းရခက်ပြီးတော့ ကစားချင်တဲ့အချိန် သာမန်အချိန်တွေလောက်မှာပဲ ခန့်မှန်းနိုင်ကြတာများပါတယ်။

ဒါဟာ အခြားလူတွေနဲ့ ခွေးတွေဆီကနေ အကောင်းတွေကိုပဲ ဘက်လိုက်ပြီးခန့်မှန်းတတ်တာကြောင့် ဖြစ်နိုင်တယ်လို့ စာတမ်းပြုစုခဲ့သူ'ထရီဇာအက်ပါလိန်'က ဆိုပါတယ်။

ဒီလိုဘက်လိုက်မှုကြောင့်ပဲ ခွေးတွေမှာ ရန်စောင်တဲ့အမူအရာကို သတိမထားမိကြတာ နေပါလိမ့်မယ်။

လူသားတွေဟာ တစ်ယောက်နဲ့တစ်ယောက် ပြောတဲ့စကား၊ ကိုယ်အမူအရာတွေကနေ အကဲကြည့်ပြီး လေ့လာတတ်ကြပါတယ်။

ဒီလိုနဲ့ လိုအပ်တဲ့အချိန်မှာ သင့်လျော်စွာတုန့်ပြန်ဆောင်ရွက်နိုင်တဲ့ စွမ်းရည်ရလာကြပါတယ်။

လူသားတွေက အခြားသတ္တဝါတွေကိုကော ဘယ်လောက်အထိ ခန့်မှန်းနိုင်သလဲဆိုတာကို သုတေသီများက လေ့လာချင်ခဲ့ကြပါတယ်။

စမ်းသပ်မှုပြုလုပ်ရာမှာ ကလေး ၂ ယောက်၊ ခွေး ၂ ကောင်တို့ရဲ့ပြုမူပုံတွေကို ခန့်မှန်းဖို့အတွက် ဗီဒီယိုထဲကနေ သူတို့ရဲ့ မျက်နှာအမူအရာ၊ ခန္ဓာကိုယ်အနေအထားတို့ကို သတိထားခဲ့ကြပါတယ်။

ကြည့်ရှုသူတွေထဲ လူတဝက်က ဗီဒီယိုကိုကြည့်ပြီး ကလေးတွေ၊ ခွေးတွေက ရန်လိုနေသလား၊ သာမန်အတိုင်းလား၊ ကစားချင်နေသလားဆိုတာကို ခန့်မှန်းရပါတယ်။

အဲဒီအခါ အမျိုးအစားတစ်ခုချင်းစီရဲ့ အပြန်အလှန်တုန့်ပြန်ပုံတွေကို ခန့်မှန်းရာမှာ မျှော်လင့်ထားတာထက်ပိုပြီး ကောင်းမွန်အောင် ခန့်မှန်းနိုင်တာကို တွေ့ခဲ့ရပါတယ်။

ဒါပေမဲ့ ခွေးတွေနဲ့ကလေးတွေရဲ့ ရန်လိုတဲ့အမူအရာကိုတော့ ကောင်းစွာမခန့်မှန်းနိုင်ခဲ့ဘူးလို့ သုတေသီများ ဖော်ပြခဲ့ပါတယ်။

ခွေးပိုင်ရှင်တွေအနေနဲ့လည်း ခွေးတွေရဲ့ရန်လိုတဲ့အမူအရာကို သတိရှိနိုင်စေရန် သေချာလေ့လာမှတ်သားသင့်တယ်လို့ ဖော်ပြနေပါတယ်။

သူတို့ရဲ့ရန်လိုတဲ့အမူအရာတွေကို လူသားတွေနားလည်ဖို့ လိုအပ်တဲ့အရာတွေကို နောက်ထပ်လေ့လာမှုတွေ ပြုလုပ်ရဦးမယ်လို့ ဖော်ပြထားပါတယ်။

Source: Daily Mail
#Yangon_Media_Group

#World_Health
Published 12 December 2022

အဆုတ်ရောဂါ ဖြစ်နိုင်ချေအများဆုံးရှိတဲ့ အမေရိကန်တဝိုက်မှ အလုပ်ခွင်နေရာများကို စာရင်းပြုစုထားပါတယ်။

ရောဂါထိန်းချုပ်ကာကွယ်ရေးစင်တာ(CDC)မှ သုတေသီများက ၂၀၂၀ ခုနှစ်အတွင်း အဆုတ်လမ်းကြောင်းကျဉ်းရောဂါ (COPD)ကြောင့် သေဆုံးသူ ၃ သိန်းကျော်ကို လေ့လာခဲ့ပါတယ်။

သတ္တုမိုင်းတူးဖော်ရေး အလုပ်သမားတွေက အန္တရာယ်အများဆုံးဖြစ်ပြီး သူ့နောက်မှာတော့ စားပွဲထိုး၊ စားဖိုမှူး၊ ဟိုတယ်ဝန်ထမ်းတွေက ဒုတိယအန္တရာယ်အများဆုံးဖြစ်ကာ ဆောက်လုပ်ရေးသမားတွေက တတိယနေရာမှာ ရှိနေပါတယ်။

စာသင်ဆရာများ၊ ရှေ့နေ‌များ၊ ဘဏ္ဍာရေးဝန်ထမ်းများကတော့ ဖြစ်နိုင်ချေအနည်းဆုံးသူတွေ ဖြစ်နေပါတယ်။

COPD ရောဂါက အသက်ရှူလမ်းကြောင်း ကျဉ်းမြောင်းခြင်း ဒါမှမဟုတ် ရောင်ရမ်းခြင်းဖြစ်ပေါ်ကာ အသက်ရှူရခက်ခဲလာပါတယ်။
သေဆုံးမှုတွေကို ခွဲခြမ်းစိတ်ဖြာပြီး အလုပ်ခွင်မှာ အလုပ်လုပ်နေတဲ့သူအရေအတွက်နဲ့ နှိင်းယှဉ်ကြည့်ကြပါတယ်။

အများစုက သေဆုံးချိန်မှာ အသက် ၇၅ နှစ်ကျော်ဖြစ်ကြပြီး လူဖြူလူမျိုးအများစုပါဝင်ပါတယ်။

အဆုတ်ရောဂါ အဖြစ်အများဆုံး အလုပ်အကိုင် ၅ မျိုးထဲမှာ စစ်တပ်၊ သယ်ယူပို့ဆောင်ရေး၊ ဂိုဒေါင်နေရာများမှ အလုပ်သမားဝန်ထမ်းများ ပါဝင်နေပါတယ်။

အန္တရာယ်အနည်းဆုံး လုပ်ငန်းနေရာကလူတွေက အယောက် ၁ သိန်းမှာ အဆုတ်ရောဂါကြောင့် သေဆုံးသူ ၀.၆၈ ဦးသာရှိပြီး သတ္တုတူးဖော်ရေးအလုပ်သမားတွေကတော့ အယောက် ၁ သိန်းမှာ ၁.၃၃ ဦးရှိပါတယ်။

ဖုန်မှုန့်များ၊ အငွေ့များ၊ ဓာတ်ငွေ့များ၊ ဆေးလိပ်သောက်သူရဲ့ ဘေးမှာနေတဲ့သူများက အဆုတ်ရောဂါဖြစ်နိုင်ချေအများဆုံးရှိကြောင်း ကျန်းမာရေးသိပ္ပံပညာရှင် ဒေါက်တာ'ဂီရီဂျာဆီယမ်လဲလ်'က သတိပေးလိုက်ပါတယ်။

သတ္တုတူးဖော်ရေး၊ ဆောက်လုပ်ရေး၊ ဟိုတယ်လုပ်ငန်း၊ အစားအစာလုပ်ငန်းတွေမှာ အလုပ်လုပ်သူတွေက တဆင့်ဆေးလိပ်ငွေ့၊ ဒီဇယ်ထုတ်အငွေ့၊ စက်ပစ္စည်းလောင်ကျွမ်းခြင်းတို့မှ အငွေ့များကို ထိတွေ့နေရပါတယ်လို့ ဆိုပါတယ်။

လူအများသွားလာကြတဲ့ နေရာတွေမှာ ပိုးသတ်ဆေး၊ သန့်ရှင်းရေးပစ္စည်းများ အသုံးပြုခြင်းကြောင့်လည်း အဆုတ်ရောဂါဖြစ်နိုင်ချေရှိပါတယ်။

ဒီလိုမဖြစ်ရအောင် လေဝင်လေထွက်စနစ်များတပ်ဆင်ခြင်း၊ လေထုထဲက အန္တရာယ်ပြုအမှုန်များကို စစ်ထုတ်ပေးနိုင်တဲ့ နှာခေါင်းစည်းတပ်ဆင်ခြင်းများ ပြုလုပ်သင့်ပါတယ်။

Source: Daily Mail
#Yangon_Media_Group