#Local_News
Published_ 18 January 2023

မွန်ပြည်နယ်၊ သထုံခရိုင်၊ ကျိုက်ထိုမြို့နယ်၊ သစ်စိမ့်ပင်ကျေးရွာ၊ ရန်ကုန်- မော်လမြိုင်ကားလမ်းမကြီးပေါ်တွင် စားအုန်းဆီပုံးများ တင်လာသည့် ကုန်တင်ကားက ကုန်တင်ဖောကားကို ဝင်တိုက်မိသောကြောင့် ဆီကားမောင်းသူ သေဆုံးခဲ့ကြောင်း မြန်မာနိုင်ငံမီးသတ်တပ်ဖွဲ့က သိရသည်။

ယနေ့ ဇန်နဝါရီလ ၁၈ ရက် နံနက် ၆ နာရီ ခွဲခန့်က မွန်ပြည်နယ်၊ ကျိုက်ထိုမြို၊ ရန်ကုန်-မော်လမြိုင်ကားလမ်းတွင် ဆီပုံးများတင်လာသည့်ကုန်တင်ကားက ကုန်တင်ဖောကား၏ နောက်ပိုင်းကိုဝင်တိုက်မိခြင်းဖြစ်ကြောင်း သိရသည်။

ယာဉ်တိုက်မှုဖြစ်ပွားကြောင်း သတင်းရရှိသဖြင့် ကျိုက်ထိုမြို့နယ်မီးသတ်စခန်းမှ တပ်ဖွဲ့ဝင်များနှင့်ကျိုက်ထိုမြို့နယ် လူမှုကူညီရေးအသင်းမှ ကယ်ဆယ်ရေးလုပ်ငန်းများ ပြုလုပ်ခဲ့ပြီး သေဆုံးသွားသူ အမျိုးသား၏ ရုပ်အလောင်းကို ကျိုက်ထိုမြို့နယ် လူမှုကူညီရေးအသင်းယာဉ်ဖြင့် သိမ်ဇရပ်ဆေးရုံသို့ ပို့ဆောင်ပေးခဲ့ကြောင်း သိရသည်။

#ymg/mt
#Yangon_Media_Group

#World_Politics
Published 18 January 2023

အမေရိကန်အခြေစိုက် ကမ္ဘာလုံးဆိုင်ရာ စီးပွားထောက်လှမ်းရေးကုမ္ပဏီ Morning Consult က မကြာသေးမီက ကောက်ယူခဲ့တဲ့စစ်တမ်းတစ်ရပ်မှာ အိန္ဒိယတွေဟာ အမေရိကန်ကို လုံခြုံရေးခြိမ်းခြောက်မှု ဒုတိယအပေးနိုင်ဆုံးနိုင်ငံအဖြစ် ရှုမြင်နေကြကာ အိန္ဒိယရဲ့အိမ်နီးချင်းပါကစ္စတန်ထက်ပင် ပိုပြီးစိုးရိမ်တဲ့သဘော ဖြစ်နေပါတယ်။

လူပေါင်း ၁ ထောင်ကို စစ်တမ်းကောက်ယူခဲ့ရာမှာ အိန္ဒိယအတွက် စစ်ရေးအရအခြိမ်းခြောက်ဆုံးနိုင်ငံအဖြစ် တရုတ်ကို သတ်မှတ်ခဲ့ကြပါတယ်။

ဒါ့အပြင် ယူကရိန်းပဋိပက္ခဖြစ်ပွားရခြင်းကိစ္စမှာလည်း ရုရှားသမ္မတ'ဗလာဒီမာပူတင်'ထက် အမေရိကန်နဲ့ နေတိုး(NATO)တို့ကိုသာ အိန္ဒိယတွေက ပိုပြီးအပြစ်မြင်နေကြပါတယ်။

အင်္ဂါနေ့ကထုတ်ပြန်ခဲ့တဲ့ စစ်တမ်းအရ ဖြေဆိုသူ ၁ ထောင်ရဲ့ ၄၃ ရာခိုင်နှုန်းဟာ တရုတ်ကို စစ်ရေးအခြိမ်းခြောက်နိုင်ဆုံးအဖြစ် သတ်မှတ်ခဲ့ကြကာ ၂၂ ရာခိုင်နှုန်းက အမေရိကန်၊ ၁၃ ရာခိုင်နှုန်းတို့က ရုရှားနဲ့ ပါကစ္စတန်တို့အဖြစ် အသီးသီးသတ်မှတ်ခဲ့ကြပါတယ်။

ကမ္ဘာ့အင်အားအကြီးဆုံး ဒီမိုကရေစီ ၂ နိုင်ငံက တရုတ်ကိုအယုံအကြည်မရှိတဲ့နေရာမှာ လက်တွဲဖော်နိုင်ငံများသဖွယ်ထင်မှတ်ရပေမယ့် အိန္ဒိယတို့ဟာ အနောက်တိုင်းအင်အားကို သတိပြုနေရတဲ့ အကြောင်းအရာတွေရှိနေတယ်လို့ စစ်တမ်းကိုကြီးကြပ်ကောက်ယူခဲ့တဲ့ 'ဆောနက်ဖရစ္စဘီ'နဲ့ 'စကော့မော့စ်ကော်ဝစ်ဇ်'တို့က Bloomberg ကို ပြောကြားခဲ့ပါတယ်။

အမေရိကန်နဲ့ တရုတ်တို့ တင်းမာမှုမြင့်တက်လာခြင်းကြောင့် ပဋိပက္ခကြားညပ်ပြီး အိန္ဒိယရဲ့ဒေသတွင်းလုံခြုံရေး အန္တရာယ်ကျရောက်လာမှာကို အိန္ဒိယလူမျိုးတွေက စိုးရိမ်နေတာဖြစ်နိုင်ကြောင်း သူတို့နှစ်ဦးက မှတ်ချက်ပြုလိုက်ပါတယ်။

အောက်တိုဘာလက ကောက်ယူခဲ့တဲ့စစ်တမ်းမှာလည်း ဖြေဆိုသူ ၆၀ ရာခိုင်နှုန်းဟာ အိန္ဒိယအစိုးရအနေနဲ့ ရုရှားရေနံတွေကို ဆက်လက်ဝယ်ယူစေချင်ကြပါတယ်။

၄၈ ရာခိုင်နှုန်းက အိန္ဒိယစစ်ရေးကိရိယာပစ္စည်းများအတွက် အမေရိကန်ထက်စာရင် ရုရှားကိုပိုပြီးအားထားဖို့ ရွေးချယ်ကြပါတယ်။

စစ်တမ်းထဲမှာ ယူကရိန်းစစ်ပွဲအတွက် အမေရိကန်နဲ့ နေတိုးကို အပြစ်တင်နေကြပေမယ့် ဒါဟာ အိန္ဒိယက ရုရှားကိုထောက်ခံတယ်ဆိုတဲ့ သဘောတော့ မယူဆသင့်ကြောင်းလည်း ဖော်ပြထားပါတယ်။

အိန္ဒိယလူမျိုးတွေကြား ရုရှားလိုလားမှုက ကျဆင်းလာပေမယ့် နေတိုးနဲ့အမေရိကန်လိုလားသူတွေကတော့ အဲဒီလောက် မကျဆင်းသေးပါဘူး။

အနောက်နိုင်ငံတွေရဲ့ဖိအားက အိန္ဒိယနဲ့ ရုရှားတို့ရဲ့ ကာလကြာဆက်ဆံရေးမှာ သက်ရောက်လာစေနိုင်ပေမယ့် အိန္ဒိယကတော့ ရုရှားနဲ့ယူကရိန်းပဋိပက္ခမှာ ဆက်ပြီးကြားနေလျက်ရှိပါတယ်။

Source: WION

#Yangon_Media_Group

#World_Health
Published 18 January 2023

စိတ်အားငယ်တဲ့အခါမျိုး၊ စိတ်ဖိစီးတဲ့အခါမျိုး၊ အသည်းကွဲတဲ့အခါမျိုးမှာ မိမိကိုယ်ကို ပျော်ရွှင်အောင် အစားစားကြတာဟာ ကျန်းမာရေးအတွက် မသင့်လျော်ပါဘူး။

ပြင်သစ်ရှိ နန်စီတက္ကသိုလ်ဆေးရုံမှ သုတေသီများက လူ ၁,၁၀၉ ဦးကို စိတ်ခံစားချက်အရ စားသောက်ကြသလားဆိုတာကို လေ့လာခဲ့ကြပါတယ်။

ထိုလူတွေရဲ့ နှလုံးသွေးကြောထိခိုက်မှုတွေကို မှတ်သားထားခဲ့ရာ စိတ်ခံစားချက်ကြောင့် စားသုံးခြင်းဟာ သွေးကြောကျဉ်းစေပြီး နှလုံးရောဂါ၊ လေဖြတ်ခြင်းတို့နဲ့ ဆက်စပ်နေပါတယ်။

ဆာလောင်စိတ်ကြောင့်ဆိုတာထက် စိတ်ဖိစီးမှုကြောင့် စားသုံးဖြစ်ကြပြီး ဆာလောင်စိတ်၊ ပြည့်တင်းစိတ်တို့ကို သတိမထားမိကြတော့ကြောင်း ဒေါက်တာ'ဆန်ဒရာဝက်ဂ်နာ'က ဆိုပါတယ်။

ထိုကဲ့သို့စားသုံးခြင်းဖြင့် နှလုံးသွေးကြောပြဿနာတွေ ဖြစ်စေနိုင်ပေမယ့် ကယ်လိုရီများပြားစွာ စားမိတာက အဓိကပြဿနာဖြစ်နေပါတယ်။

စိတ်ခံစားချက်ရှိတဲ့အချိန်မှာ စားမိတာကြောင့် စားသင့်တဲ့အချိန်မှာ မစားမိကြတော့ပါဘူး။

ဒီအလေ့အကျင့်ကို ပြုပြင်ဖို့ကတော့ စားတဲ့အခါ စိတ်ကထဲမှတ်ပြီး စားသင့်တာပါပဲ။

ဒီအလေ့အကျင့်က စားတဲ့အချိန်သတ်မှတ်ပြီး တစ်ဦးတည်းဖြစ်ဖြစ်၊ လူအများနဲ့ဖြစ်ဖြစ် တီဗီ၊ ဖုန်းမကြည့်ဘဲ စားသုံးတာမျိုးဖြစ်ပါတယ်။
လမ်းလျှောက်ခြင်းနဲ့ လှုပ်ရှားလေ့ကျင့်ခန်းပြုလုပ်ခြင်းက စိတ်ဖိစီးမှုတွေကို ပြေ‌လျော့စေနိုင်ပါတယ်။

တစ်နေ့ကို ၁၀ မိနစ်မျှ တရားထိုင်ခြင်း၊ အသက်ရှူထုတ်ပြုလုပ်ခြင်းဖြင့် စိတ်ဖိစီးမှုလျော့ကျစေကာ အာရုံစူးစိုက်နိုင်စေမှာဖြစ်ပါတယ်။

Source: New York Post
#Yangon_Media_Group

#World_Health
Published 18 January 2023

ကျောက်ကပ်က လက်သီးဆုပ်အရွယ်အစားခန့်ရှိတဲ့ အင်္ဂါ ၂ ခုဖြစ်ပြီး နံရိုးအိမ်အောက် ကျောရိုးမကြီးရဲ့ တစ်ဖက်တစ်ချက်မှာ တည်ရှိပါတယ်။

ကျောက်ကပ်က ဆီးစွန့်တဲ့အလုပ်အပြင် အခြားအလုပ်တွေများစွာ ရှိနေပါတယ်။

သွေးပေါင်ချိန်ထိန်းညှိပေးတယ်၊ ဗိုက်တာမင်-ဒီနဲ့ ဟော်မုန်းအများအပြား ထုတ်လုပ်တယ်၊ သွေးနီဥထုတ်လုပ်မှုကို လှုံ့ဆော်ပေးတယ်၊ ခန္ဓာကိုယ်ထဲက ရေဓာတ်နဲ့ အက်ဆစ်-ဘေ့စ်ကို ထိန်းညှိပေးတယ်၊ ချုံပြောရရင် ခန္ဓာကိုယ်ရဲ့ ဓာတုဓာတ်ပစ္စည်းစက်ရုံတွေလိုပါပဲ။

ဒါပေမဲ့ ကျောက်ကပ်မကောင်းရင် ဘယ်လိုသိနိုင်မလဲ၊ ကျောက်ကပ်ကောင်းမွန်အောင် ဘယ်လိုထိန်းသိမ်းသင့်သလဲ?

ကျောက်ကပ်မကောင်းတဲ့အခါ နာကျင်တာမျိုးနဲ့ ခံစားရတဲ့လက္ခဏာတွေ မပေါ်တာကြောင့် မသိရှိကြတာများပါတယ်။

ကျောက်ကပ် အလုပ်ကောင်းကောင်းလုပ်လားဆိုတာသိရဖို့ ဆရာဝန်နဲ့ ပြသသင့်တဲ့အပြင် ဆီးစစ်ဆေးခြင်းများ ပြုလုပ်သင့်ပါတယ်။

အယ်ဗျူမင်ဟာ သွေးထဲက ပရိုတိန်းဓာတ်ဖြစ်ပြီး အရည်တွေကို သွေးထဲကမထွက်သွားအောင် ထိန်းသိမ်းပေးပါတယ်။

ကျောက်ကပ်က သွေးကိုစစ်ယူပြီး အညစ်အကြေးတွေကို ဆီးကနေတဆင့် စွန့်ပစ်ပေးပါတယ်။

ကျန်းမာတဲ့ကျောက်ကပ်တွေက ပရိုတိန်းတွေနဲ့ အခြားအဟာရဓာတ်များကို မဖယ်ရှားတာကြောင့် ဆီးထဲမှာ အယ်ဗျူမင်ပါလာပါက ကျောက်ကပ်ထိခိုက်တဲ့လက္ခဏာဖြစ်ပါတယ်။

စွန့်ပစ်ပစ္စည်းဖြစ်တဲ့ ခရီအိတ်တနင်တွေ သွေးထဲမှာများပြားလာတာကလည်း ကျောက်ကပ်လုပ်ဆောင်ချက် ပျက်စီးလာတဲ့လက္ခဏာ ဖြစ်ပါတယ်။

ကျောက်ကပ်ပြဿနာတွေ ဖြစ်မလာစေရန် ကျန်းမာရေးနဲ့ညီညွတ်တဲ့ အစားအစာ စားသုံးပေးဖို့က အရေးအကြီးဆုံးဖြစ်ပါတယ်။

ကျောက်ကပ်ရောဂါအတွက် အဆိုးဆုံးအန္တရာယ်က ဆီးချိုဖြစ်ပါတယ်။
ကျောက်ကပ်ကောင်းဖို့အတွက် ကိုယ်အလေးချိန်ထိန်းသိမ်းရန်လိုပြီး အငံဓာတ်နည်းစွာ စားသုံးရမှာပါ။

ပိုတက်ဆီယမ်နည်းပါးစွာ စားသုံးခြင်းကလည်း ကျောက်ကပ်ရောဂါအတွက် အထောက်အကူဖြစ်စေပါတယ်။

သွေးပေါင်ချိန်တက်ခြင်းကလည်း ကျောက်ကပ်ထိခိုက်စေတဲ့ အန္တရာယ်ဖြစ်ပြီး ဆားပမာဏမြင့်မားစွာ စားသုံးခြင်းဖြင့် သွေးပေါင်ချိန်တက်စေပါတယ်။

အရက်သေစာအလွန်အကျူးသောက်သုံးခြင်းကလည်း ကျောက်ကပ်ကိုထိခိုက်စေပါတယ်။

ရေများများသောက်ခြင်းက ကျောက်ကပ်အတွက်ကောင်းတယ်ဆိုတဲ့ သိပ္ပံနည်းကျအထောက်အထားတော့ မတွေ့ရှိထားပါဘူး။

Source: South China Morning Post
#Yangon_Media_Group

#Local_News
Published_ 17 January 2023

ပုဂ္ဂလိကဆေးရုံအချို့မှာ ဆရာဝန်လိုအပ်ချက်ရှိနေတဲ့အတွက် မူလရှိနေတဲ့ ဆေးရုံကဆရာဝန်တွေအနေနဲ့ အချိန်ပိုတွေဆင်းပေးပြီး တာဝန်ထမ်းဆောင်ပေးနေရတယ်လို့ မြန်မာနိုင်ငံပုဂ္ဂလိကဆေးရုံများအသင်းဥက္ကဌထံမှ သိရပါတယ်၊၊

#Yangon_Media_Group

#World_Environment
Published 16 January 2023

ပလတ်စတစ်ပစ္စည်းတွေဟာ ပတ်ဝန်းကျင်ကို ထိခိုက်ညစ်ညမ်းစေတဲ့အတွက် အင်္ဂလန်မှာ ပလတ်စတစ်ပန်းကန်ပြား၊ ဇွန်းခရင်းစတဲ့ တစ်ခါသုံးပလတ်စတစ်ပစ္စည်းများကို အောက်တိုဘာလမှစတင်ကာ ပိတ်ပင်တားမြစ်သွားမှာဖြစ်ကြောင်း အစိုးရက စနေနေ့မှာ ပြောကြားလိုက်ပါတယ်။

#Yangon_Media_Group

#Local_News
Published_17 January 2023

ပြည်ပကိုရေထွက်ကုန် တင်ပို့ရောင်းချခြင်းကနေရရှိလာတဲ့ ငွေကြေးတွေကို တရုတ်ယွမ်ငွေ (သို့မဟုတ်) ထိုင်းဘတ်ငွေတို့နဲ့ နိုင်ငံတော်ကို အခွန်အခပေးသွင်းနိုင်တယ်လို့ သိရပါတယ်။

#Yangon_Media_Group

#Local_News
Published_ 17 January 2023

လတ်တလောမှာ ဒလမြို့နယ်ဘက်က အသက်ရှူမွန်းကြပ်လူနာတွေကို လူနာတင်ယာဉ်တွေနဲ့နေ့စဉ်ဆေးရုံသို့ ပို့ဆောင်ပေးနေရတယ်လို့ ရှင်သန်ရေးကူညီမှုအသင်းထံမှ သိရပါတယ်၊၊

#Yangon_Media_Group

#Local_News
Published_17 January 2023

စီးပွားကူးသန်းဝန်ကြီးဌာန လက်အောက်ရှိ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်မှုကော်မတီရဲ့ အပတ်စဉ် ရည်ညွှန်းဈေးနှုန်း ဖော်ပြချက်အတွင်း အမေရိကန်ဒေါ်လာ ပျမ်းမျှငွေလဲနှုန်းကို (၂,၄၈၈) ကျပ် သတ်မှတ်ပေးထားပါတယ်။

#Yangon_Media_Group

#DailyNews
Published_ 17 January 2023

၁။ စီးပွား၊ ကူးသန်းက စားအုန်းဆီတင်သွင်းသူတွေကို တစ်ဒေါ်လာ (၂,၄၈၈) ကျပ်သတ်မှတ်ပေး

၂။ ဒလဘက်ကအသက်ရှူမွန်းကြပ်လူနာများကိုနေ့စဉ် ဆေးရုံပို့ဆောင်ပေးနေရ

၃။ ရေထွက်ပို့ကုန်ရငွေကို ယွမ်၊ ဘတ်တို့ဖြင့် နိုင်ငံတော်အခွန်ပေးသွင်းခွင့်ပြုထားဟုဆို

၄။ အင်္ဂလန်တွင် တစ်ခါသုံးပလတ်စတစ်ပစ္စည်းအသုံးပြုခြင်းကို တားမြစ်သွားမည်ဟု အစိုးရအဖွဲ့ထုတ်ပြန်ကြေညာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_17 January 2023

ယခုရက်ပိုင်းအတွင်းမှာ ကြက်သွန်နီဈေးနှုန်းဟာ အနည်းငယ်ပြန်လည်မြင့်တက်လာတယ်လို့ ဘုရင့်နောင်ကုန်စည်ဒိုင်ကနေ သိရပါတယ်။

#Yangon_Media_Group

#Local_News
Published_ 17 January 2023

ရှမ်းပြည်နယ် မူဆယ်မြို့ အမှတ် (၁) မြို့မဈေး အပေါ်ထပ်တွင် ဖွင့်လှစ်ထားသည့် “လောဝ်ခမ်း” ရွှေဆိုင်မှ ရွှေဆွဲကြိုး ၈ ကုံးခန့်ကို အမျိုးသမီးနှစ်ဦးက ယနေ့ ဇန်နဝါရီလ ၁၇ ရက် နံနက် ၁၀ နာရီခန့်အချိန်တွင် လုယက်ယူဆောင်သွားကြောင်း သိရသည်။

ရွှေများလုယက်ယူဆောင်သွားသည့် အမျိုးသမီး ၂ ဦးမှာ အသက် ၅၀ ခန့်အရွယ်များဖြစ်ပြီး အနွေးဦးထုပ်၊ အနွေးအင်္ကျီ နှင့် မာဖလာပတ်ထားကာ ရွှေလာဝယ်သည့် ပုံစံဖြင့် အဆိုပါ ရွှေဆိုင်ကို ဝင်ရောက်လာခဲ့ကြခြင်းဖြစ်ကြောင်း ခန့်မှန်းတန်ဖိုးမှာ ငွေကျပ် သိန်း ၃၀၀ ခန့် ရှိကြောင်း ဒေသခံများထံမှ သိရသည်။

မူဆယ်မြို့တွင် ပြီးခဲ့သည့် ၂၀၂၂ ခုနှစ် မေလ ၁၀ ရက်က ကျင်တွင်လည်း ခရစ်ယာန်ရပ်ကွက်အတွင်းရှိ ဖုန်းအဟောင်းရောင်းဝယ်ရေး ပြုလုပ်သည့် ဆိုင်တစ်ဆိုင်သို့ အမည်မသိ မျက်နှာဖုံးစွပ် အမျိုးသား ၆ ဦး မော်တော်ယာဉ်ဖြင့် ဝင်ရောက်လာကာ ဓားပြလာတိုက်သွားသည့်အတွက် ငွေကျပ်သိန်း ၁၀၀၀ ထက်မနည်း ဆုံးရှုံးသွားသည့် ဖြစ်စဉ်ရှိခဲ့ကြောင်း သိရသည်။

#ymg/mt
#Yangon_Media_Group