#Local_News
Published _ 5 September 2022

ကြက်သွန်နီလက်လီရောင်းဈေးနှုန်းတွေဟာ ဒိုင်လက်ကားဈေးတွေနှင့် ကွာဟမှုတွေရှိနေတယ်လို့ သိရပါတယ်။

#Yangon_Media_Group

#DailyNews
Published _ 5 September 2022

၁။ ကြက်သွန်နီ လက်လီဈေးများ ဒိုင်လက်ကားဈေးများနှင့် ကွာဟမှုတွေရှိနေ

၂။ မီးစက်များ မဖြစ်မနေဝယ်နေရ၍ လုပ်ငန်းသုံးမီးစက်ဝယ်ယူနှုန်း မြင့်တက်နေ

၃။ စားအုန်းဆီ အခြေခံလက်ကားရည်ညွှန်းဈေး ၅၂၂၀ ကျပ်ဟု တိုးမြှင့်သတ်မှတ်ထား

၄။ နယူးယော့ခ်မှ မြင်းလှည်းရထားလုံးများကို ဆန့်ကျင်သူများပြားလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 5 September 2022

အရင်ကာလတွေအတိုင်း ဆေးဝါးတင်သွင်းတယ့်အခါ ကုန်သွယ်ရေးဦးစီးဌာနကို တိုက်ရိုက်လျှောက်ထားနိုင်ပြီဖြစ်ပါတယ်။ ဒါက ပြည်တွင်းမှာ နိုင်ငံခြားဆေးတွေဈေးမြင့်တက်တဲ့ အခြေအနေကို ထိန်းချုပ်ဖို့ကန့်သတ်ချက်တွေကို ဖြေလျှော့ပေးတာဖြစ်တယ်လို့ သုံးသပ်မှုတွေရှိနေပါတယ်။

#Yangon_Media_Group

#Local_News
Published _ 5 September 2022

ရွှေဒင်္ဂါးပြားကို တစ်ကျပ်သားလျှင်၂၉ သိန်းခွဲ ဈေးဖြင့် နေပြည်တော်၌ စက်တင်ဘာလ ၅ ရက် ယနေ့တွင် ကျောက်မျက်ရတနာပြတိုက် ခန်းမဆောင်တွင် စတင်ရောင်းချပေးနေပြီဖြစ်ကြောင်း သိရသည်။

"ညနေ ၄ နာရီခွဲထိ ရောင်းပေးမှာပါ။ ရန်ကုန်မှာတော့ မနက်ဖြန်လောက်မှ ရောင်းပေးဖြစ်မယ်လို့ ယူဆရပါတယ်။ ဒီနေ့က နေပြည်တော်မှာ ရောင်းပေးတာပါ"ဟု သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန တာဝန်ရှိသူကပြောသည်။

တစ်ကျပ်သား၊ ငါးမူးသားနှင့် တစ်မတ်သား အလေးချိန်ရှိသော ရွှေဒင်္ဂါးပြားများကို ရန်ကုန်၊ နေပြည်တော်၊ မန္တလေးမြို့ကြီးများရှိ မြန်မာ့ကျောက်မျက်ရတနာ အရောင်းပြခန်းတွင် လွတ်လွတ်လပ်လပ် ရောင်းချပေးမည်ဟု နစက က စက်တင်ဘာလ ၁ ရက္ညပိုင်းတွင် ကြေညာထားသည်။

အဆိုပါ ရွှေဒင်္ဂါးပြားပုံစံမှာ ၂၀၁၈ ခုနှစ်က ထုတ်ဝေခဲ့သည့် အမျိုးသားခေါင်းဆောင်ကြီး ဗိုလ်ချုပ်အောင်ဆန်းပုံပါ ဒင်္ဂါးပြားဖြစ်ကြောင်းလည်း သိရသည်။

#ymg/mt
#Yangon_Media_Group

#Local_News
Published - 5 September 2022

ပြည်တွင်းစက်သုံးဆီဈေးနှုန်းမှာ အတက်အကျ သိပ်မရှိဘဲတည် ငြိမ်နေကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

ယနေ့စက်တင်ဘာလ ၅ ရက်တွင်ပြည်တွင်း စက်သုံးဆီဈေးနှုန်းမှာ 92 တစ်လီတာ ၂၃၉၅ ကျပ်၊ 95 တစ်လီတာ ၂၄၉၅ ကျပ်၊ 97 တစ်လီတာ ၃၀၄၀ ကျပ်၊ ဒီဇယ်နှင့် ပရီမီယံဒီဇယ်တစ်လီတာ ၃၁၂၅ ကျပ်ဖြစ်ကြောင်း သိရသည်။

နစက အနေဖြင့် ရုရှားနိုင်ငံမှ ဝယ်ယူထားသည့် စက်သုံးဆီမှာ ယခုအပါတ်အတွင်း မြန်မာနိုင်ငံကို ရောက်ရှိမည်ဖြစ်ပြီး ပြည်တွင်း၌ စက်သုံးဆီပြတ်လပ်မှုမရှိအောင် ဆောင်ရွက်ပေးထားကြောင်း၊ ယင်းအပြင် စက်သုံးဆီပြတ်လပ်သည့် ဆီဆိုင်တွေကိုလည်း အရေးယူဆောင်ရွက်မည်ဟု ထုတ်ပြန်ကြေညာထားသည်။

ရန်ကုန်၊ မန္တလေး အပါအဝင် နေပြည်တော်၊ တိုင်းဒေသကြီးနှင့် ပြည်နယ်များတွင် ရည်ညွှန်းလက်လီဈေးနှုန်း ဖြင့်ရောင်းချပေးနေကြောင်း စက်သုံးဆီတင်သွင်း သိုလှောင်ဖြန့်ဖြူးခြင်း လုပ်ငန်းကြီးကြပ်မှုကော်မတီမှ သိရသည်။

#ymg/sth
#Yangon_Media_Group

#Local_News
Published - 5 September 2022

အိန္ဒိယနိုင်ငံ၏ (၇၅)နှစ်မြောက် လွတ်လပ်ရေးနေ့အထိမ်းအမှတ်အဖြစ်ကျင်းပပြုလုပ်သည့် EXIM Bazaar- 2022 ပြပွဲတွင် မြန်မာနိုင်ငံအပါအဝင်နိုင်ငံ(၄)နိုင်ငံမှ ပါဝင်ပြသလျက်ရှိကြောင်း သိရသည်၊၊

အဆိုပါပြပွဲကို Export-Import Bank of India ၏ စီစဉ်မှုဖြင့် စက်တင်ဘာလ(၃) ရက်မှ (၆)ရက်အတွင်း နယူးဒေလီမြို့ National Craft Museum ၌ကျင်းပ လျက်ရှိသည်၊၊

အိန္ဒိယနိုင်ငံလွတ်လပ်ရေးနေ့အထိမ်းအမှတ်အဖြစ် ဘင်္ဂလားဒေ့ရှ်၊ ဘူတန်၊ မြန်မာ၊ နီပေါနှင့် သီရိလင်္ကာနိုင်ငံ အပါအဝင် အိန္ဒိယနိုင်ငံ ပြည်နယ်များနှင့် ဒေသအသီးသီးမှ လက်မှုအနုပညာပစ္စည်းများ၊ အထည် အလိပ်များ ပြသရောင်းချပွဲ EXIM Bazaar- 2022 ကို ကျင်းပလျက်ရှိရာ၊ နယူးဒေလီမြို့၊ မြန်မာသံရုံးမှ မြန်မာနိုင်ငံကိုယ်စားပြု ပြခန်းတစ်ခန်း ပါဝင်ပြသလျက်ရှိကြောင်း သိရသည်။

အဆိုပါပြပွဲ၊ စျေးရောင်းပွဲကို အိန္ဒိယအထက်လွှတ်တော်အမတ် (Member of Rajya Sabha) Padma Vibhushan Dr. Sonal Mansinghမှ ဖွင့်လှစ်ပေးခဲ့ပြီး ဖွင့်ပွဲအခမ်းအနားသို အိန္ဒိယအစိုးရတာဝန်ရှိသူများ၊ မြန်မာသံအမတ်ကြီး ဦးမိုးကျော်အောင်နှင့် ဘင်္ဂလားဒေ့ရှ်၊ ဘူတန်၊ မြန်မာ၊ နီပေါ နှင့် သီရိလင်္ကာနိုင်ငံများမှ သံအမတ်ကြီးများ တက်ရောက်ခဲ့ကြကြောင်း မြန်မာနိုင်ငံခြားရေး ဝန်ကြီးဌာန၏ ထုတ်ပြန်ချက်များအရသိရသည်၊၊

#ymg/tthl
#Yangon_Media_Group

#World_News
Published 5 September 2022

စက်တင်ဘာ ၄ ရက်နေ့(တနင်္ဂနွေနေ့) က စတင်ဖြစ်ပွားခဲ့တဲ့ ဓားထိုးလူသတ်မှုကွင်းဆက်မှာ ပါဝင်တယ်လို့ သံသယရှိထားတဲ့ တရားခံ ၂ ဦးကို ကနေဒါရဲတပ်ဖွဲ့များ ရှာဖွေနေကြပါတယ်။

ဆက်စ်ကက်ချာဝမ်အလယ်ပိုင်းပြည်နယ်တလျှောက် ဒေသခံရပ်ဝန်းမှ လူ ၁၀ ဦးသေဆုံးကာ ၁၅ ဦးဒဏ်ရာရရှိခဲ့ပြီး သံသယရှိသူ ၂ ဦးကို အခင်းဖြစ်ပွားရာနေရာမှ ကီလိုမီတာရာချီဝေးကွာတဲ့ နေရာတွေမှာ တွေ့လိုက်ရပါတယ်။

ဒါဟာ ကနေဒါနိုင်ငံတလျှောက် လူဦးရေကျဲပါးတဲ့နေရာမှာ ဓားထိုးမှုဖြစ်ပွားခဲ့တာ သေချာနေပါတယ်။

"ဆက်စ်ကက်ချာဝမ်မှာ တိုက်ခိုက်ခဲ့မှုက ကြေကွဲကြောက်လန့်စရာကောင်းပါတယ်။ ဒဏ်ရာရတဲ့သူတွေနဲ့ ဆုံးရှုးသွားရတဲ့ မိသားစုဝင်တွေကို ကိုယ်ချင်းစာပါတယ်" လို့ ကနေဒါဝန်ကြီးချုပ်'ဂျက်စတင်ထရူဒေါက်'က တွစ်တာမှာ ရေးသားခဲ့ပါတယ်။

"ဒီလိုအကြမ်းဖက်မှုကြောင့် ထိခိုက်ဆုံးရှုံးခဲ့သူတွေအတွက် ဖော်ပြစရာစကားတောင် မရှိတော့ပါဘူး၊ ဆက်စ်ကက်ချာဝမ်ကလူတွေအားလုံး သူတို့နဲ့အတူ ဝမ်းနည်းပူဆွေးနေရမှာပါ" လို့ ဆက်စ်ကက်ချာဝမ်အုပ်ချုပ်ရေးမှူး'စကော့မိုး'က တွစ်တာမှာ ဖော်ပြခဲ့ပါတယ်။

ရဲတွေက အသက် ၃၁ နှစ် 'ဒါမီယန်ဆန်ဒါဆန်'နဲ့ အသက် ၃၀ 'မိုင်းလ်စ်ဆန်ဒါဆန်'တို့ရဲ့ ဓာတ်ပုံတွေနဲ့ အကြောင်းအရာတွေကို ဖော်ပြအသိပေးထားပေမယ့် သူတို့ကျူးလွန်ရတဲ့ ရည်ရွယ်ချက်နဲ့ ပစ်မှတ်တွေတော့ အသေးစိတ်မပါဝင်ပါဘူး။

ဓားထိုးမှုဖြစ်ပွားတဲ့ ဂျိမ်းစမစ်ခရီဒေသနဲ့ ဝယ်လ်ဒန်ရွာရဲ့ တောင်ဘက် ၃၂၀ ကီလိုမီတာရှိ ရက်ဂျီနာမြို့မှာ တရားခံ ၂ ဦးကို Nissan Rogue အနက်ရောင်ကားနဲ့ တွေ့လိုက်ရကြောင်း ရဲတပ်ဖွဲ့က ဆိုပါတယ်။

"ဓားထိုးခံရသူအချိုဟာ ပစ်မှတ်တွေဖြစ်ခဲ့ဟန်ရှိပြီး အချို့ကတော့ ကြုံရာဓားထိုးခံရသူတွေဖြစ်နိုင်ပါတယ်၊ ဓားထိုးရတဲ့အကြောင်းအရင်းကိုတော့ အခုအချိန်မှာ ပြောဖို့ခက်နေပါတယ်" လို့ ဆက်စ်ကက်ချာဝမ်တော်ဝင်ကနေဒါရဲတပ်ဖွဲ့မှ 'ရွန်ဒါဘလက်ခ်မော'က သတင်းစာရှင်းလင်းပွဲမှာ ပြောကြားခဲ့ပါတယ်။

ဓားထိုးခံရပြီး သူတို့ဘာသာ ဆေးရုံတွေကိုသွားခဲ့တဲ့ နောက်ထပ်လူတွေလည်း ရှိနိုင်သေးကြောင်းဆိုပါတယ်။

ဒီဓားထိုးမှုကွင်းဆက်က ဂျိမ်းစမစ်ခရီပြည်နယ်နဲ့ ဝယ်လ်ဒန်မြို့အပါအဝင် နေရာ ၁၃ နေရာမှာ ဖြစ်ပွားခဲ့တာဖြစ်ကြောင်း ရဲတွေက ရှင်းပြခဲ့ပါတယ်။

ပထမဆုံးဖြစ်ပွားခဲ့တဲ့ ဓားထိုးမှုတွေက ဒေသစံတော်ချိန် နံနက် ၅ နာရီ ၄၀ မိနစ်မှာ ဖြစ်ခဲ့ပြီး ၂ နာရီခွဲကြာမြင့်ပြီးနောက် အန္တရာယ်ရှိတရားခံအဖြစ် ရဲတွေက သတိပေးတပ်လှန့်ခဲ့ကာ မွန်းလွဲအချိန်မှာတော့ အနီးနားပြည်နယ်တွေဖြစ်တဲ့ အယ်လ်ဘာတာနဲ့ မာနီတိုဘာတိုမှာလည်း အလားတူ သတိပေးခဲ့ရပါတယ်။

ပြည်သူတွေကို ကိုယ့်နေရာမှာကိုယ် လုံခြုံစွာနေထိုင်ကြဖို့နဲ့ သံသယရှိသူကိုတွေ့ရှိပါက ချက်ချင်းအကြောင်းကြားဖို့ ရဲတပ်ဖွဲ့က သတင်းမှာ တိုက်တွန်း ဖော်ပြထားပါတယ်။

တရားခံတွေက ဘယ်ကိုဦးတည်သွားလဲဆိုတာနဲ့ မော်တော်ကားကို ပြောင်းလဲစီးသွားကြလားဆိုတာကို မသိရသေးပါဘူး။

"ဆေးရုံအများအပြားမှာ ထိခိုက်သူတွေကို စောင့်ရှောက်ကုသပေးခဲ့ပြီး နောက်ထပ်ဝန်ထမ်းအင်အား အကူအညီတောင်းခံခဲ့ပါတယ်" လို့ ကျန်းမာရေးအာဏာပိုင်များက ထုတ်ပြန်ခဲ့ပါတယ်။

Source: CNA
#Yangon_Media_Group

#World_Health
Published 5 September 2022

ဆီးချိုဝေဒနာသည်တွေ လိုအပ်တဲ့အင်ဆူလင်ကို ဆေးထိုးစရာမလိုဘဲ ပါးစပ်ကနေသောက်သုံးနိုင်မယ့် သောက်ဆေးကို သုတေသနအဖွဲ့တစ်ဖွဲ့က ထုတ်လုပ်လိုက်ပါတယ်။

ကနေဒါရှိ ဗြိတိသျှကိုလံဘီယာတက္ကသိုလ်(UBC)မှ သိပ္ပံပညာရှင်တွေ ထုတ်လုပ်လိုက်တဲ့ သောက်ဆေးဟာ လူတစ်ယောက်ရဲ့အသည်းဆီကို အင်ဆူလင်တွေအကုန်လုံး ရောက်ရှိစေမှာဖြစ်ပါတယ်။

အရင်တုန်းက အင်ဆူလင်သောက်ဆေးတွေ ထုတ်လုပ်ဖို့ကြိုးစားခဲ့ကြပေမယ့် အစာအိမ်မှာသာ ဆေးတွေပုံနေတာကြောင့် မအောင်မြင်ခဲ့ပါဘူး။

ဆီးချိုဝေဒနာရှင်တွေက ဆီးချိုအခြေအနေကို နေ့စဉ်ထိန်းသိမ်းရန် အင်ဆူလင်ရရှိဖို့ လိုအပ်ပါတယ်။

လက်ရှိနည်းလမ်းတွေက တစ်နေ့တည်းကို ဆေးထိုးအပ်နဲ့အကြိမ်ကြိမ် ထိုးသွင်းနေရတာဖြစ်ပါတယ်။

အမေရိကန်လူမျိုး ၁၀ ယောက်မှာ ၁ ယောက်ကျော်လောက်က ဆီးချိုရောဂါရှိနေပြီး တစ်နှစ်ကို ဆီးချိုကြောင့် အသက်ဆုံးပါးသူ ၁ သိန်းကျော်ရှိကာ အမေရိကမှာ သေဆုံးရတဲ့ အကြောင်းအရင်းတွေထဲက အဌမမြောက်အများဆုံး အခြေအနေဖြစ်ပါတယ်။

"ရရှိလာတဲ့ရလာဒ်တွေက အင်ဆူလင်လိုအပ်ချက်ပိုင်းမှာ တိုးတက်မှုတွေရှိလာမှာ သေချာပါတယ်၊ နေ့စဉ် အပ်ထိုးနေစရာမလိုတော့ဘဲ စိတ်ကျန်းမာရေးအခြေအနေကိုလည်း တိုးတက်စေမှာဖြစ်ပါတယ်" လို့ UBC မှ အစားအစာနဲ့အဟာရ တွဲဖက်ပရော်ဖက်ဆာ ဒေါက်တာ'အေနက်ဘ်ဟက်ပရာတပ်ဆင်း'က ဆိုပါတယ်။

အင်ဆူလင်သောက်ဆေးက ပါးစပ်ကနေ အသည်းအထိ ဆေးအာနိသင်ဆုံးရှုံးမှုမရှိစေဘဲ ရောက်ရှိစေမှာ ဖြစ်ပါတယ်။

သဘာဝအားဖြင့် အင်ဆူလင်ကို ပန်ကရိယကနေ ထုတ်လုပ်ကာ အသည်းဆီကိုရောက်ရှိပြီး သွေးတွင်းသကြားဓာတ်ကို ထိန်းသိမ်းပေးပါတယ်။

ဆီးချိုရောဂါ ပထမအမျိုးအစားခံစားရတဲ့လူနာတွေက အင်ဆူလင်အလုံအလောက် မထုတ်လုပ်နိုင်ကာ သကြားဓာတ်ကို မထိန်းသိမ်းနိုင်တော့ပါဘူး။

အင်ဆူလင်ဆေးထိုးတဲ့အခါ သွေးထဲကိုအလျင်အမြန်ရောက်ရှိပြီး လိုအပ်တဲ့အင်ဆူလင်ကို ထောက်ပံ့ပေးပါတယ်။

သောက်ဆေးတွေက သွေးထဲရောက်ရှိဖို့ ၂ နာရီမှ ၄ နာရီကြာတတ်ပေမယ့် UBC က ထုတ်လုပ်တဲ့အင်ဆူလင်သောက်ဆေးကတော့ မိနစ် ၃၀ ကနေ ၂ နာရီအတွင်း အပြည့်အဝရောက်ရှိစေမှာ ဖြစ်ပါတယ်။

သုတေသီတွေက ဆေးအသစ်ကို ကြွက်တွေနဲ့စမ်းသပ်ရာမှာ ရလာဒ်တွေက စိတ်ချရလောက်တဲ့ အနေအထားဖြစ်ပါတယ်။

သောက်ဆေးသောက်ပြီး ၂ ကျော်ကြာတဲ့အချိန်မှာတောင် အစာအိမ်ထဲမှာ အင်ဆူလင်မရှိတော့ဘူးလို့ UBC မှ 'ယိဂေါင်ဂို'က ဆိုပါတယ်။

ဆေးအားလုံးက အသည်းဆီရောက်သွားပြီး လိုအပ်တဲ့အင်ဆူလင်ကို ရရှိစေပါတယ်။

UBC အနေနဲ့ သူတို့ရဲ့တီထွင်ချက်က အင်ဆူလင်မလုံလောက်တဲ့သူတွေကို အထောက်အကူဖြစ်စေပြီး အလွယ်တကူအသုံးပြုနိုင်ဖို့ မျှော်လင့်နေပါတယ်။

Source: Daily Mail
#Yangon_Media_Group

#Local_News
Published - 5 September 2022

ပို့ကုန်တင်ပို့သူများမှ ကုန်ပစ္စည်းသင်္ဘောတင်ခ၊ ကုန်ပစ္စည်းစစ်ဆေးခနှင့် ကော်မရှင်ခများကို ပို့ကုန်ရငွေ ၃၅ ရာခိုင်နှုန်းကနေ ကိုယ်ပိုင်အစီအစဉ်ဖြင့် သုံးစွဲရန် ကုန်သွယ်ရေးဦးစီးဌာနက ညွှန်ကြားထားသည်။

အဆိုပါ ကုန်ကျစရိတ်များကို နိုင်ငံခြားသုံးငွေကြီးကြပ်မှု ကော်မတီဆီ တင်ပြတောင်းခံခြင်း မပြုရန် မြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ်သို့ စာပေးပို့ ညွှန်ကြားထားခြင်းဖြစ်သည်။

ပို့ကုန်ရငွေ ၃၅ ရာခိုင်နှုန်းကို ကိုယ်တိုင်သုံးစွဲခွင့်ပေးပြီးနောက်တွင်လည်း ကုန်ပစ္စည်းသင်္ဘောတင်ခများ ဆက်လက်တင်ပြတောင်းခံနေသည့်အတွက် ယခုလို ညွှန်ကြားခြင်းဖြစ်နိုင်ကြောင်း ပို့ကုန်လုပ်ငန်းရှင်တစ်ဦး၏ ပြောပြချက်အရ သိရသည်။

မြန်မာနိုင်ငံတော်ဗဟိုဘဏ်က ဩဂုတ်လဆန်းပိုင်းမှစတင်ပြီး ပို့ကုန်ရငွေ ၃၅ ရာခိုင်နှုန်းကို ကိုယ်တိုင်သုံးစွဲခွင့် ပြုခဲ့ခြင်းဖြစ်သည်။

#Ymg/STH
#Yangon_Media_Group

#Local_News
Published _ 5 September 2022

သက်တမ်းကုန်ခါနီး မော်တော်ယာဉ်နှင့်ဆိုင်ကယ်များကို ၂၀၂၃ ခုနှစ် ဇွန်လကုန်အထိ ယာဉ်စစ်ဆေးခြင်းမပြုဘဲ သက်တမ်းတိုးပေးမည်ဟု ကုန်လမ်းပို့ဆောင်ရေးညွှန်ကြားမှု ဦးစီးဌာနမှ ထုတ်ပြန်ထားသည်။

သက်တမ်းကုန်ဆုံးမည့် မော်တော်ယာဉ်များနှင့် မော်တော်ဆိုင်ကယ်များ သက်တမ်းတိုးဆောင်ရွက်ရာ၌ ခရီးသည်တင်ယာဉ်မှလွဲ၍ ကျန်မော်တော်ယာဉ်နှင့် မော်တော်ဆိုင်ကယ်များကို ၂၀၂၃ ခုနှစ် ဇွန်လကုန်အထိ ယာဉ်စစ်ဆေးခြင်းများ မပြုလုပ်ဘဲ သက်တမ်းတိုးဆောင်ရွက်ပေးမည်ဟု ထုတ်ပြန်ထားသည်။

ကားဝယ်ရောင်းသမားများအနေဖြင့် "ဒီအချိန်မှာ ကားဝယ်မယ်ဆို သတိထားပီးဝယ်ကြပါ။ ဖောက်စွပ် ဖြတ်ဆက်ကားတွေများနေပါတယ်။ အရမ်းဈေးတန်နေရင် ပိုသတိထားပါ။ ကားရောလူပါ ယုံကြည်ပီဆိုမှကားဝယ်ကြပါ"ဟု သုံးသပ်ထားသည်။

#ymg/NN
#Yangon_Media_Group

#World_Health
Published 5 September 2022

ဆိုရှယ်မီဒီယာတွေ၊ TikTok လို နေရာတွေမှာ ရေအေးနဲ့ရေချိုးခြင်းကရတဲ့ အကျိုးကျေးဇူးတွေကို ဝေဝေဆာဆာဖော်ပြလာကြပါတယ်။

အဲဒါနဲ့ပတ်သက်ပြီး ဒေါက်တာ'ဇက်လ်တာနာ'က ရေအေးနဲ့ချိုးခြင်းက အကျိုးကျေးဇူးရှိလား မရှိလားဆိုတာကို နှစ်မျိုးစလုံးအကြံပြုခဲ့ပါတယ်။

ရေအေးချိုးခြင်းက ကျန်းမာရေးအတွက် အကျိုးရှိတာမှန်ပေမယ့် ရေနွေးအစား အမြဲတမ်းရေအေးချိုးဖို့တော့ မသင့်ပါဘူး။

ရေနွေးနဲ့ပဲချိုးရတာ ငြီးငွေ့နေလိုဆိုရင်တော့ အပြောင်းအလဲအနေနဲ့ ရက်အနည်းငယ်လောက် ရေအေးချိုးလို့ရပါတယ်။
သူ့ရဲ့အကျိုးကျေးဇူးအချို့က..

- ခန္ဓာကိုယ်ကို ရောဂါမဖြစ်အောင် ခုခံကာကွယ်ရာမှာပါဝင်တဲ့ သွေးဖြူဥတွေကို များပြားစေပြီးတော့ ကိုယ်ခံအားကို မြှင့်တင်ပေးပါတယ်။ ဒီလိုမျိုးအကျိုးရရှိရန်အတွက် တစ်ပတ်ကို ရေအေး ၂ ကြိမ် ၃ ကြိမ်ခန့် ချိုးပေးသင့်ကြောင်း အကြံပြုထားပါတယ်။

- ရေအေးက ခန္ဓာကိုယ်ကို တပ်လှန့်လိုက်သလိုဖြစ်ပြီး ဦးနှောက်ဆီ လျှပ်စီးကြောင်းလိုလှုံ့ဆော်မှု ပေးပါတယ်။ ဒေါက်တာ'တာနာ'က ဒါကို ကားတစ်စီး အင်ဂျင်စနှိုးလိုက်တာနဲ့ ဆင်တူတယ်လို့ဆိုပါတယ်။

ဦးနှောက်လည်ပတ်အောင် စတင်လုပ်ဆောင်စေပြီး နိုးနိုးကြားကြားဖြစ်အောင် စွမ်းအင်တွေပေးပါတယ်။ စိတ်ပျော်ရွှင်စေပြီး စိတ်ဓာတ်ကျအခြေအနေကို သက်သာစေနိုင်ပါတယ်။

ရေအေးနဲ့ထိတွေ့တဲ့အခါ အညိုရောင်အဆီဓာတ်တွေထွက်လာပြီး ကယ်လိုရီတွေလောင်ကျွမ်းစေကာ စွမ်းအင်ထုတ်ပေးပါတယ်။

ကိုယ်အလေးချိန်စစ်ဖို့အတွက် လေ့ကျင့်ခန်းလုပ်ပြီး ရေအေးချိုးဖို့ အကြံပြုထားပါတယ်။

ရေအေးက ကြွက်သားနာကျင်ကိုက်ခဲ၊ ရောင်ရမ်းခြင်းများကို သက်သာစေတဲ့အတွက် အားကစားသမားတွေ ကိုက်ခဲနာကျင်မှုသက်သာအောင် အသုံးပြုလေ့ရှိပါတယ်။

အစပိုင်းတော့ အတင်းကြီး ရေအေးတွေနဲ့ မချိုးပါနဲ့။

တစ်ပတ်ကို ၁ ကြိမ် ၂ ကြိမ်ကနေစပြီး တဖြည်းဖြည်းနဲ့တိုးသွားပါလို့ 'တာနာ'က အကြံပြုပါတယ်။

ဒါပေမဲ့လည်း ရေအေးနဲ့ရေနွေးကို စက္ကန့် ၃၀ နဲ့ ၆၀ ကြား အလှည့်ကျချိုးပေးခြင်းကလည်း ထိရောက်စေတယ်လို့ ဆိုပါတယ်။

ချိုးတဲ့အခါ အသက်ပြင်းပြင်းရှိက်ရှူပြီး ပိုပိုအေးလာတဲ့ အပူချိန်နဲ့ ချိုးပေးပါ။

ရေအေးမချိုးနိုင်တဲ့သူတွေအတွက်ကျတော့ ရေအေးမချိုးရလို့ ဘာမှဖြစ်စေမှာတော့ မဟုတ်ပါဘူး။

ရေများများသောက်ခြင်း၊ အသီးအနှံ၊ ဟင်းသီးဟင်းရွက်များ စားသုံးခြင်းဖြင့်လည်း ကျန်းမာရေးကိုထိန်းသိမ်းနိုင်တာကြောင့် သူများတွေပြောတိုင်းလိုက်လုပ်စရာမလိုကြောင်း အကြံပြုသွားပါတယ်။

Source: The Jerusalem Post
#Yangon_Media_Group

Published: 4 Sept 2022

အစ္စရေး ရှေးဟောင်းသုတေသနပညာရှင်တွေဟာ နှစ်သန်းဝက်သက်တမ်းတဲ့ ရှားပါး ဆင်စွယ် တစ်ခုကို ပြသခဲ့ပါတယ်။ အဲဒီ ဆင်စွယ်ကြီးဟာ ယခုမျိုးတုန်းပျောက်ကွယ်သွားပြီဖြစ်တဲ့ အလွန်ကြီးမားတဲ့ ဆင်ကြီးတစ်ကောင်ထံမှဖြစ်ပြီး သမိုင်းမတင်မိ လူသားတွေရဲ့ လူမှုအလေ့အထတစ်ခုရဲ့ အထောက်အထားတစ်ခုလို့လည်း ပညာရှင်တွေက မြင်နေကြပါတယ်။

အဲဒီ ၈.၅ပေခန့်ရှည်ပြီး ပေါင် ၃၃၀ခန့် အလေးချိန်ရှိတဲ့ ဆင်စွယ်ကြီးကို တောင်ပိုင်း အစ္စရေးက ရာဗာဒင်းရွာကလေးအနီးမှာ တူးဖော်ရင်း ဇီဝဗေဒပညာရှင် အီတန်မောက တွေ့ရှိခဲ့တာပါ။

အစ္စရေးရှေးဟောင်းပစ္စည်းအာဏာပိုင်အဖွဲ့ရဲ့ အစီအစဉ်နှင့် အဲဒီတူးဖော်မှုမှာ တွေ့ရှိရတဲ့ အဲဒီဆင်စွယ်ရုပ်ကြွင်းဟာ အရှေ့ပိုင်းအနီးမှာ ရှာတွေ့သမျှထဲ အကြီးဆုံးဖြစ်ပါတယ်။

မူလအခြေအနေကို အများကြီးထိန်းထားနိုင်တဲ့ ဒီဆင်စွယ်ကြီးရှာတွေ့တာဟာ အင်မတန် ဆန်းပြားလှတယ်လို့ တူးဖော်မှုဆိုင်ရာ ညွှန်ကြားရေးမှူး အေဗီလီဗိုင်းက ပြောပါတယ်။

“ ဆင်က အဖြောင့်အစွယ်ဆင်မျိုးဖြစ်ပြီး လွန်ခဲ့တဲ့ နှစ်ပေါင်း လေးသိန်းဝန်းကျင်ကတည်းက မျိုးတုန်းပျောက်ကွယ်သွားခဲ့ပြီ ဖြစ်ပါတယ်” လို့လည်း သူကဆက်ပြောပါတယ်။

ဆင်စွယ်အနားတွေ့ရတာက သမိုင်းမတင်မီလူသားသုံးခဲ့တဲ့ မီးခတ်ကျောက်လက်နက်တွေဖြစ်တယ်။ အဲဒီလက်နက်နှင့် ဒေသထဲက တိရိစ္ဆာန်တွေကို လှီးဖြတ်အရေခွံခွာခဲ့ကြတယ်။ အဲဒီအထဲမှာ ဆင်တွေလည်းပါတယ်” လို့ သူကပြောပါတယ်။

အာဖရိကနှင့် အာရှဥရောပကို ကုန်းကြောင်းချိတ်ဆက်ပေးတဲ့ အဲဒီဒေသရဲ့ သမိုင်းမတင်မီလူသားတွေရဲ့ သရုပ်သကန်ဟာလျှို့ဝှက်ဆန်းကြယ်လှတယ်လို့ လီဗိုင်းကပြောပါတယ်။

“ လူတွေရဲ့ရုပ်ကြွင်းတွေကို ဒီမှာရှာမတွေ့ဘူး။ သူတို့ရဲ့အသုံးအဆောင်ယဉ်ကျေးမှုပဲရှာတွေ့တယ်။  တိရိစ္ဆာန်အရိုးတွေ ဒါမှမဟုတ် ကျောက်လက်နက်တွေဖြစ်ဖြစ် သူတို့သုံးပြီးရင် လွှင့်ပစ်ကြတယ်” လို့ လည်းသူကဖြည့်စွက်ပြောပါတယ်။

ဆင်စွယ်ရဲ့ အရွယ်အစားကိုကြည့်ပြီး ဆင်ဟာ မတ်ရပ်အနေအထားမှာ အရပ် ၁၆ပေခွဲလောက်မြင့်လိမ့်မယ်လို့ ခန့်မှန်း ထားပါတယ်။ ဒီနေ့တွေ့ရတဲ့ အာဖရိကဆင်တွေထက် အများကြီး မြင့်ပါတယ်။

မုဆိုးအုပ်စုတွေဟာ တစ်ချိန်ချိန်မှာ ဒီကိုရောက်လာကြလိမ့်မယ်။ အဲဒီမှာ သူတို့ဟာ မိန်းမတွေနှင့် သတင်းအချက်အလက် တွေ ရောင်းဝယ်ကြလိမ့်မယ်။ နှစ်များစွာအားနည်းခဲ့တဲ့လူမှုဆက်ဆံရေးပြန်လုပ်ကြလိမ့်မယ်။ ဆင်တွေကိုအမဲလိုက်လိမ့်မယ်။ ဒါဟာ အမှတ်သညာတစ်ခုဖြစ်တယ်” လို့ တဲလ်အဗစ်တက္ကသိုလ်က ဇီဝမနုဿဗေဒပညာရှင် အစ္စရေးဟတ်ရှ်ကိုဗစ်က ပြောပါတယ်။

ဆင်စွယ်ဟာ အဓိကသင်္ကေတစ်ခုပဲ။ သူတို့ရဲ့ အရွယ်အစားနှင့်အလေးချိန်ကြောင့် သူတို့ဟာ လှည့်လည်သွားလာနေတဲ့ သူတွေနှင့်အတူ လိုက်ပါ သွားလာဖို့မရှိခဲ့ဘူး လို့လည်း သူကပြောပါတယ်။

ဒီဆင်စွယ်တွေ အနားတစ်ဝိုက်မှာ သူတို့ဟာ ရိုးရာပွဲတစ်မျိုးမျိုးလုပ်ခဲ့ကြလိမ့်မယ်။ တစ်ချိန်ကျတော့ သူတို့ ရွှေံပြောင်းဖို့ဖြစ်လာတယ်။ မိသားစုတွေဟာ နောက်ထပ်နေစရာအသစ်တွေရှာဖို့ ခြေဦးတည့်ရာသွားကြရတယ်” လို့ သူကဆက်ပြောပါတယ်။

ယခုရှေးဟောင်းတူးဖောက်မှုကို တဲလ်အဗစ်နှင့် ဘင် ဂူရီယွန် နီဂက်တက္ကသိုလ်က ပညာရှင်တွေဆောင်ရွက်ခဲ့ကြတာ ဖြစ်ပြီး အဲဒီဆင်စွယ်ကို အစ္စရေးရှေးဟောင်းပစ္စည်းအာဏာပိုင်ဌာနကို လွှဲပြောင်းပေးအပ်မှာဖြစ်ပါတယ်။

Source AFP

#Rare_elephant-tusk