#Local_News
Published_ 19 January 2023

ပြည်တွင်းခရီးသွားအများဆုံး သွားရောက်လည်ပတ်လေ့ရှိတဲ့ အင်းလေးဒေသခရီးစဉ်ကို ခရီးသွားအချို့ ဖျက်သိမ်းမှုတွေရှိနေတယ်လို့ ပြည်တွင်းခရီးသွားလုပ်ငန်းလုပ်ကိုင်သူတွေထံကနေ သိရပါတယ်။

#Yangon_Media_Group

#Local_News
Published_ 19 January 2023

တရုတ်မှ ပြန်လည် ဝင်ရောက်လာသူပြည်တော်ပြန် ၁၀၀ ကျော်အနက် ၃ ဦးတွင် ဇန်နဝါရီ ၁၈ရက်က ကိုဗစ်-၁၉ရောဂါပိုးတွေ့ရှိခဲ့ကြောင်း လူသားချင်းစာနာထောက်ထားမှုအကူအညီပေးအပ်ရေးကွန်ရက်က သိရသည်။

"၁၈ရက်နေ့က နန်းတော်ဂိတ်ပေါက်က မူဆယ်မြို့ကို ပြည်တော်ပြန် ၁၀၀ ကျော် ပြန်လည်ဝင်ရောက်လာတယ်။ စစ်လိုက်တော့ ၃ယောက် မှာ ကိုဗစ်ပိုးတွေ့တယ်။ သူတို့ကို ကိုဗစ်စင်တာမှာ စနစ်တကျ ကုသပေးနေတယ်"ဟုဆိုသည်။

အဆိုပါ ကိုဗစ်-၁၉ရောဂါပိုးတွေ့ရှိသူ အမျိုးသမီး ၃ဦးကို မူဆယ် ၁၀၅မိုင် ကုတင် ၁၀၀၀ဆေးရုံတွင် အသွားအလာကန့်သတ်၍ စနစ်တကျထားရှိကုသပေးနေကြောင်းလည်း လူသားချင်းစာနာထောက်ထားမှု အကူအညီပေးအပ်ရေးကွန်ရက်က သိရသည်။

ဇန်နဝါရီ ၈ရက်တွင် တရုတ်နိုင်ငံဘက်မှ နယ်စပ်ဂိတ်များ ပြန်လည် ဖွင့်လှစ်ပေးပြီးနောက်ပိုင်း နှစ်နိုင်ငံအစိုးရ၏သဘောတူညီမှုဖြင့် နေရပ်ပြန်များ ပြန်လည်လက်ခံပေးနေပြီးဇန်နဝါရီလ (၁၄) ရက်ကလည်း နေရပ်ပြန် မြန်မာနိုင်ငံသားပြည်တော်ပြန် (၁၄၀) ကျော်ရှိခဲ့ကြောင်းလည်း သိရသည်။

ပထမအကြိမ်ဝင်ရောက်လာသူများအား လိုအပ်သည့် ကျန်းမာရေး စစ်ဆေးမှုများ၊ လဝကကိစ္စရပ်များအား စစ်ဆေးမှုများပြုလုပ်ပြီး မိမိတို့၏ နေရပ်များသို့ ပြန်လည်ထွက်သွားပြီးဖြစ်ကြောင်းနှင့် ယခုအကြိမ်မှာ ဒုတိယအကြိမ်ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_ 19 January 2023

ပြည်တွင်း၌ ဖွင့်လှစ်ထားသည့် အထည်ချုပ်စက်ရုံတွေ၏ ထက်ဝက်ခန့်သည် ဘဏ်စာရင်းမဖွင့်ဘဲ လည်ပတ်နေကြောင်း အလုပ်သမားဝန်ကြီးဌာနမှ အမြဲတမ်းအတွင်းဝန် ဦးညွန့်ဝင်း၏ ပြောပြချက်အရ သိရသည်။

ပြည်တွင်း၌ ဖွင့်လှစ်ထားသည့် အထည်ချုပ်စက်ရုံများတွင် ဘဏ်စာရင်းမဖွင့်မထားသည့် အထည်ချုပ်စက်ရုံတွေနှင့် ဘဏ်စာရင်းဖွင့်ပြီးနိုင်ငံခြားငွေမရောက်သည့် စက်ရုံတွေကို အရေးယူခံရမည်ဖြစ်ကြောင်း အလုပ်သမားဝန်ကြီးဌာနက သတိပေးထုတ်ပြန်ထားသည်။

ပြည်တွင်း၌ အထည်ချုပ် လုပ်ငန်းပေါင်း ၇၀၀ ကျော် လည်ပတ်နေတဲ့အနက် ဘဏ်စာရင်းဖွင့်လှစ်ကာ နိုင်ငံခြားငွေ ဝင်ရောက်တဲ့ စက်ရုံ ၃၆၂ ရုံသာရှိကြောင်း သိရသည်။

လက်ရှိတွင် အထည်ချုပ်စက်ရုံတွေ၏ နိုင်ငံခြားငွေဝင်ရောက်မှု ကုန်စီးဆင်းမှုတွေကို စစ်ဆေးရာတွင် ယခုနှစ်နိုဝင်ဘာလ ၁၄ ရက်ထိ ဘဏ်ငွေစာရင်းဖွင့်လှစ်ထားပြီး နိုင်ငံခြားငွေဝင်ရောက်သည့် အထည်ချုပ်စက်ရုံ ၃၆၂ရုံ၊ နိုင်ငံခြားငွေဝင်ရောက်မှုမရှိသည့် စက်ရုံ ၂၈၄ ရုံနှင့် ငွေစာရင်းဖွင့်လှစ်ထားခြင်းမရှိသည့် စက်ရုံ ၉၂ ရုံ ကို စိစစ်တွေ့ရှိထားကြောင်း သိရသည်။

#ymg/sth
#Yangon_Media_Group

#Local_News
Published_ 19 January 2023

ပြည်ပအာဖရိကရှိ Madagascar နိုင်ငံမှာ အကျဉ်းကျနေခံရတဲ့ မြန်မာသင်္ဘောသားနှစ်ဦးထောင်ဒဏ်နှစ်(၂၀) မကျအောင် ကူညီဆောင်ရွက်ပေးနေတယ်လို့ မြန်မာနိုင်ငံ ပင်လယ်ကူးသင်္ဘောသားအလုပ်သမားများအဖွဲ့ချုပ် (MSF) ဥက္ကဌထံမှ သိရပါတယ်၊၊

#Yangon_Media_Group

#World_Politics
Published 19 January 2023

ယူကရိန်းသမ္မတ'ဗိုလိုဒီမီယာဇယ်လန်စကီ'က တရုတ်နိုင်ငံခေါင်းဆောင်'ရှီကျင့်ဖင်'နဲ့ ဆွေးနွေးပြောဆိုရန် ဖိတ်ကြားစာစောင်ကို ဒါဗို့စ်မြို့မှာ တရုတ်ကိုယ်စားလှယ်လက်ထဲသို့ ပေးအပ်ခဲ့ကြောင်း ယူကရိန်းသမ္မတကတော်'အိုလီနာဇယ်လန်စကာ'က ဇန်နဝါရီ ၁၈ ရက်နေ့မှာ ပြောကြားခဲ့ပါတယ်။

ယမန်နှစ်ဖေဖော်ဝါရီလ ရုရှားတို့ ကျူးကျော်ကတည်းက 'ဇယ်လန်စကီ'ဟာ ရှီကျင့်ဖင်နဲ့ ဆက်သွယ်ဖို့ အကြိမ်ကြိမ်ကြိုးစားနေခဲ့ပြီး တရုတ်က ရုရှားခေါင်းဆောင်'ပူတင်'ကို လွှမ်းမိုးနိုင်မယ်လို့ မျှော်လင့်နေခဲ့တာဖြစ်ပါတယ်။

ဆွစ်ဇာလန်နိုင်ငံ ဒါဗို့စ်မြို့ရှိ ဆွစ်အယ်လ်ပိုင်းအပန်းဖြေစခန်းမှာ အင်္ဂါနေ့က ကျင်းပတဲ့ ကမ္ဘာ့စီးပွားရေးဖိုရမ်မှာ ဇယ်လန်စကာက မိန့်ခွန်းပြောကြားရာ ရှီကျင့်ဖင်အတွက် ဖိတ်ကြားစာပေးဖို့ရှိတယ်လို့ ဆိုခဲ့ကာ ဗုဒ္ဓဟူးနေ့သတင်းစာရှင်းလင်းပွဲမှာတော့ အသေးစိတ်ပြောပြခဲ့ပါတယ်။

"ဒါဟာ တွေ့ဆုံဆွေးနွေးရန် ဖိတ်ကြားချက်တစ်ရပ်ဖြစ်ပြီး တုန့်ပြန်မှုတစ်စုံတစ်ရာ ပြုလိမ့်မယ်လို့ မျှော်လင့်ပါတယ်" လို့ သတင်းထောက်တွေကို ပြောကြားခဲ့ပါတယ်။

ယူကရိန်းကို ပူတင်မကျူးကျော်ခင်ကာလမှာပဲ တရုတ်နဲ့ရုရှားတို့ဟာ အကန့်အသတ်မရှိ မိတ်ဖက်ပူးပေါင်းကြောင်း ကြေညာခဲ့ပါသေးတယ်။
ယခုစစ်ပွဲမှာ တရုတ်က အတတ်နိုင်ဆုံး ကြားနေနိုင်ငံအဖြစ် တည်ရှိရန်ကြိုးပမ်းနေပေမယ့် တချိန်တည်းမှာပဲ ရုရှားနဲ့ဆက်ဆံရေး ပိုမိုခိုင်မြဲအောင် ပြုလုပ်နေပါတယ်။

ကျွမ်းကျင်သူအချို့ရဲ့ သုံးသပ်ချက်မှာတော့ ယူကရိန်းစစ်ပွဲအဆုံးသတ်စေဖို့ရာ တရုတ်က နောက်ဆုံးမှာ ကြားဝင်ဖြေရှင်းညှိနှိုင်း‌ရဖွယ်ရှိနေကြောင်း သုံးသပ်နေကြပါတယ်။

တရုတ်နိုင်ငံခြားရေးဝန်ကြီး'ဝမ်ယိ'က စက်တင်ဘာလက ပါတီစုံဖိတ်ကြားကာ တစ်ကမ္ဘာလုံးရဲ့ စီးပွားရေးကိုသက်ရောက်နေတဲ့ စစ်ပွဲပဋိပက္ခကို အကြောင်းပြုပြီး ထိုအကြပ်အတည်းပျံ့နှံ့လာမှာကို ထိန်းသိမ်းနိုင်ဖို့ စိုးရိမ်နေရကြောင်း ပြောကြားခဲ့ပါတယ်။

အထောက်အကူဖြစ်စေမယ့် ဆွေးနွေးပွဲပြုလုပ်နိုင်ဖို့ ရှီကျင့်ဖင်ကို တရားဝင်တောင်းဆိုထားတယ်လို့ ဇယ်လန်စကီက ဩဂုတ်လမှာ South China Morning Post သတင်းစာကို ပြောကြားခဲ့ပါတယ်။

နှစ်နိုင်ငံစလုံးမှ နိုင်ငံခြားရေးဝန်ကြီးတွေဟာ စက်တင်ဘာလက နယူးယော့ခ်မှာကျင်းပတဲ့ ကုလသမဂ္ဂအထွေထွေညီလာခံမှာ တွေ့ဆုံခဲ့ကြပြီးဖြစ်ပါတယ်။

Source: CNA
#Yangon_Media_Group

#Local_News
Published_ 19 January 2023

ထိုင်း-မြန်မာနယ်စပ်ဝင်ထွက်ပေါက်များမှ တစ်ဆင့်မြန်မာနိုင်ငံသို့ ပြန်ဝင်မည့်သူများကို ကိုဗစ်လက္ခဏာရှိမရှိနှင့် ကိုဗစ်ပိုးရှိမရှိစစ်ဆေးပြီးမှဝင်ခွင့်ပြုမည်ဖြစ် ကြောင်း ဇန်နဝါရီလ(၁၉)ရက်ကထုတ်ပြန်လိုက်သည့် ကျန်းမာရေးဝန်ကြီးဌာန၏ ထုတ်ပြန်ချက်အရ သိရသည်၊၊

ကိုဗစ်ကာကွယ်ဆေးအကြိမ်ပြည့် ထိုးထားသူများကို ကိုဗစ်နှင့်ပတ် သက်၍ ကိုယ်အပူချိန်ရှိမရှိ ဖျားနာခြင်းရှိမရှိ စစ်ဆေးမည်ဖြစ်ပြီး ကိုဗစ်ကာကွယ်ဆေးအကြိမ်ပြည့်မထိုးထားသူများကို မြန်မာနိုင်ငံသို့ မဝင်ရောက်မီ(၄၈)နာရီအတွင်း ကိုဗစ်ပိုးရှိမရှိ RDTနည်းဖြင့် စစ်ဆေးကာ စစ်ဆေးထားသည့်အဖြေလွှာကို မြန်မာ-ထိုင်းအရာရှိများထံပြကြရမည်ဖြစ်ကြောင်း သိရသည်၊၊

နယ်စပ်ဝင်ထွက်ပေါက်သတ်မှတ်နေရာများတွင် ကိုဗစ်စစ်ဆေးမှုခံယူရမည့်သူများအနေဖြင့် RDTနည်းဖြင့် စစ်ဆေးရန်ကုန်ကျစရိတ်ကျပ်(၁၅၀၀၀)ကို ခရီးသွားများမှမိမိစရိတ်ဖြင့်အကုန်အကျခံစစ်ဆေးမှုခံယူရမည်ဟု ထုတ်ပြန်ထားသည်၊၊

နှစ်နိုင်ငံနယ်စပ်တွင် နေ့ချင်းပြန်သွားလာမည့်သူများကို RDT စစ်ဆေးမှု မှကင်းလွတ်ခွင့်ပြုမည်ဖြစ်သည်ဟု ဆိုသည်၊၊

ပုံမှန်အားဖြင့် ကိုဗစ်စစ်ဆေးမှုအဖြေကို နှာခေါင်းတို့ဖတ်ယူပြီး တစ်နာရီအတွင်းကျန်းမာရေးမှထုတ်ပေးမည်ဖြစ်ပြီး ခရီးသွားလာသူများဆက်သွားနိုင်မည်ဖြစ်ကြောင်း သိရသည်၊၊

နိုင်ငံခြားသားခရီးသည်များ အသွားအလာကန့်သတ်ခြင်း၊ ဓာတ်ခွဲစစ်ဆေးခြင်းနှင့် ဆေးကုသမှုစရိတ်များကို ကုန်ကျခံရမည်ဖြစ်ကြောင်း၊သံတမန်များ၊ ကုလသမဂ္ဂ ဝန်ထမ်းများနှင့် မိသားစုဝင်များကိုတော့ Home Quarantine ခွင့်ပြုဆောင်ရွက်သွားမည်ဖြစ်ကြောင်း၊ နိုင်ငံတော်အဆင့်ဧည့်သည်တော်များ၊ နိုင်ငံခြားကိုယ်စားလှယ်များအနေဖြင့် ဆိုက်ရောက်ရက်မတိုင်မီ အနည်းဆုံး(၅)ရက်ကြိုတင်၍ ကိုဗစ်ဗဟိုကော်မတီ၊ နိုင်ငံခြားရေးဝန်ကြီးဌာနနှင့် ကျန်းမာရေးဝန်ကြီးဌာနသို့တင်ပြ၍ သတ်မှတ်ချက်များမှ ကင်းလွတ်ခွင့်တောင်းခံနိုင်ကြောင်းသိရသည်၊၊

#ymg/tthl
#Yangon_Media_Group

#Local_News
Published_ 19 January 2023

အရက်ချက်စက်ရုံမီးလောင်ပြင်၌ဒဏ်ရာရရှိခဲ့သည့် တပ်ဖွဲ့ဝင်တစ်ဦးပျောက်ဆုံးနေမှုမှာ ၅ ရက်ရှိပြီဖြစ်ကြောင်း ရွှေပြည်သာမြို့နယ် (၄)ရပ်ကွက် အရန်မီးသတ်တပ်ဖွဲ့က သိရသည်။

အဆိုပါ တပ်သားမှာ မော်လမြိုင်မြို့နယ် မြိုင်သာယာမှ ရွှေပြည်သာမြို့နယ် (၄)ရပ်ကွက် အရန်မီးသတ်တပ်ဖွဲ့သို့ လာရောက်၍ စေတနာ့ဝန်ထမ်းအဖြစ် လာရောက်တာဝန်ထမ်းဆောင်နေသူ အသက် ၁၈ နှစ်အရွယ် မောင်ပြည့်ဘုဏ်းမောင်ဖြစ်ကြောင်း၊ တပ်ဖွဲ့ရုံး၌ အဝတ်အစားများနှင့် မှတ်ပုံတင်လည်းကျန်နေခဲ့ကြောင်း သိရသည်။

"သူက စကားမပီဘူး၊ မွေးရာပါစကားမပီတာပါ၊ စကားက လုံးနေတာပေါ့။ အရက်ချက်စက်ရုံ မီးလောင်တဲ့နေ့ကမီးသတ်ကားပေါ်မှာ ရေထိုင်တာဝန်ယူရင်း ပြုတ်ကျလို့ သူ့ဦးခေါင်းဖုရောင်သွားတာကြောင့် ရွှေပြည်သာဆေးရုံမှာတစ်ရက်တက်ရတယ်။ ဇန်နဝါရီ ၁၄ ရက်နေ့ ဆင်းတယ်။ ဆေးရုံက ဆင်းလာပြီး နောက်နေ့ ဇန်နဝါရီ လ ၁၅ ရက်နေ့ နေ့လယ်လောက်ကပဲ ဘုရားသွားဖူးမယ်ပြောပြီး ထွက်သွားတာ ခုထိ ပြန်မလာ ၅ ရက် ရှိပြီ၊ ထွက်သွားတော့ အဝတ်တထည်ကိုယ်တစ်ခုပဲ ၊သူက မော်လမြိုင်ကပါ။ ဒါပေမဲ့ သူ့အမေအိမ်ကိုလည်း မရောက်ဘူး၊ သူ့အိမ်ကလည်းရှာနေကြတယ်။ အခု ရဲစခန်းမှာ လူပျောက်တိုင်ရမလားဆိုတာကိုလည်း ကျွန်တော်တို့ တိုင်ပင်နေကြတယ်"ဟု ယင်း မီးသတ်တပ်ဖွဲ့၏တာဝန်ရှိသူက ပြောသည်။

ယင်းမောင်ပြည့်ဘုဏ်းမောင်အားတွေ့ရှိပါက ရွှေပြည်သာမြို့နယ်၊ ရွှေပြည်လေးအဖွဲ့၊ အရန်မီးသတ်တပ်ဖွဲ့(၄)ရပ်ကွက်၏ တယ်လီဖုန်း ၀၉၄၀၀၅၄၄၄၀၆ ကို ဆက်သွယ်ပေးကြရန်လည်း ထုတ်ပြန်ထားသည်။

#ymg/mt
#Yangon_Media_Group

#Local_News
Published_ 19 January 2023

ယနေ့ ပြည်တွင်းစက်သုံးဆီဈေးနှုန်းမှာ ၉၂ တစ်လီတာလျှင် ၂၂၀၀ ကျော်လာပြီး ကျန်စက်သုံးဆီဈေးနှုန်းများသည်လည်း ဆက်တိုက်မြင့်တက်လာကြောင်း စက်သုံးဆီအရောင်းဆိုင်များ၏ ဈေးနှုန်းများအရ သိရသည်။

နှစ်ဆန်းပိုင်းတွင် ပြည်တွင်းစက်သုံးဆီဈေးနှုန်းမှာကျဆင်းလာသော်လည်း ဇန်နဝါရီ ၁၂ ရက်နောက်ပိုင်းတွင် ပြန်လည်မြင့်တက်လာခြင်း ဖြစ်သည်။

ယနေ့(ဇန်နဝါရီလ ၁၉ ရက်)တွင် ပြည်တွင်းစက်သုံးဆီဈေးနှုန်းမှာ ၉၂ တစ်လီတာ ၂၂၃၀ ကျပ်၊ ၉၅ တစ်လီတာ ၂၃၁၀ ကျပ်၊ ဒီဇယ်တစ်လီတာ ၂၄၂၀ ကျပ်၊ ပရီမီယံဒီဇယ်တစ်လီတာ ၂၅၀၀ ကျပ်ထိမြင့်တက်လာပြီး ယမန်နေ့တွင် ၉၂ တစ်လီတာ ၂၁၅၅ ကျပ်၊ ၉၅ တစ်လီတာ ၂၂၁၅ ကျပ်၊ ဒီဇယ်တစ်လီတာ ၂၄၃၅ ကျပ်၊ ပရီမီယံဒီဇယ်တစ်လီတာ ၂၅၁၅ ကျပ်ဖြစ်ကြောင်း သိရသည်။

ယခုရက်ပိုင်းအတွင်း စက်သုံးဆီဈေးနှုန်း ဆက်တိုက်မြင့်တက်လာသည့်အတွက် သယ်ယူပို့ဆောင်စရိတ်များကြီးမြင့်လာပြီး ကုန်ဈေးနှုန်းအချို့ အနည်းငယ်ဈေးမြင့်တက်လာကြောင်း သိရသည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီအနေဖြင့် ရန်ကုန်၊ မန္တလေးနှင့် အခြားတိုင်းနှင့်ပြည်နယ် အသီးသီးတွင် ရောင်းချရမည့် စက်သုံးဆီအခြေခံရည်ညွှန်းဈေးနှုန်းများကို နေ့စဉ်ထုတ်ပြန်ပေးနေခြင်း ဖြစ်သည်။

ပြည်တွင်းရှိ စက်သုံးဆီ ရောင်းချသူများအနေဖြင့် စက်သုံးဆီ ဈေးနှုန်းများကို ဈေးကစားခြင်း၊ သိုလှောင်ထားရှိခြင်းများ၊ ဈေးတင်ရောင်းချခြင်းများ မပြုလုပ်ရန်နှင့် ယင်းသို့ပြုလုပ်ပါက အရေးကြီးကုန်စည် ဥပဒေဖြင့် အရေးယူဆောင်ရွက်မည်ဖြစ်ကြောင်းလည်း စက်သုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေး ကော်မတီက အသိပေး ကြေညာထားသည်။

#ymg/sth
#Yangon_Media_Group

#Local_News
Published_19 January 2023

မြန်မာ့ပင်လယ်ပြင်ရေပိုင်နက်အတွင်း ခွင့်ပြုချက်မဲ့ အပျော်တမ်းငါးမျှားလှေဖြင့် ဝင်လာသူ နိုင်ငံခြားသား ၇ ဦးအား ဇန်နဝါရီလ ၁၇ ရက်က ပြည်နှင်ဒဏ်ပေးခဲ့ကြောင်း သိရသည်။

အဆိုပါ နိုင်ငံခြားသား ၇ ဦးမှာ ထိုင်းနိုင်ငံသား ၃ ဦး၊ ဗြိတိန်နိုင်ငံသား ၃ ဦးနှင့်ဆွစ်ဇာလန်နိုင်ငံသား ၁ ဦးတို့ဖြစ်ကြောင်း၊ ယင်းတို့က အပျော်တမ်းငါးမျှားလှေဖြင့် မြန်မာ့ပင်လယ်ပိုင်နက်အတွင်းသို့ ပြီးခဲ့သည့် ၂၀၂၂ ခုနှစ်၊ ဒီဇင်ဘာလ ၂၂ ရက်က ခွင့်ပြုချက်မဲ့ ဝင်ရောက်လာခဲ့သည့်အတွက် မြန်မာအာဏာပိုင်များက ဖမ်းဆီးထိန်းသိမ်းခဲ့ခြင်း ဖြစ်ကြောင်း သိရသည်။

ယင်းကြောင့် မြန်မာနိုင်ငံလူဝင်မှုကြီးကြပ်ရေး အက်ဥပဒေပုဒ်မ ၁၃(၁) ဖြင့်တရားစွဲဆို ၍ ၁၉၄၇ ခုနှစ်၊ မြန်မာနိုင်ငံလူဝင်မှုကြီးကြပ် ရေး(လတ်တလောဥပဒေများ)အက်ဥပဒေပုဒ်မ ၇(၁)ဖြင့် ပြည်နှင်ဒဏ်အမိန့်ချမှတ်ခဲ့ကာ ကော့သောင်းခရိုင်တာဝန်ရှိသူများမှ ထိုင်းနိုင်ငံ၊ရနောင်းမြို့တာဝန်ရှိသူများထံ လွှဲပြောင်းအပ်နှံ၍ ကော့သောင်းနယ်စပ်ဂိတ်မှတစ်ဆင့် ပြန်လည်စေလွှတ်ခဲ့ကြောင်း သိရသည်။

#ymg/mt
#Yangon_Media_Group

#World_Health
Published 19 January 2023

နှာယိုနှာစေးခြင်းက စိတ်ရှုပ်စရာဖြစ်ပြီး ထွက်လာတဲ့နှာရည်ရဲ့ အရောင်နဲ့ပုံစံတွေက အဓိပ္ပာယ်အမျိုးမျိုးဖော်ဆောင်နေပါတယ်။

(၁) နှာရည်အကြည်ရောင်

ချွဲသလိပ်ကြည်လင်နေပါက နှာခေါင်းကနေ ပုံမှန်ထွက်တဲ့နှာရည်ဖြစ်ပါတယ်။

ရာသီအကူးအပြောင်းမှာ ဓာတ်မည့်ခြင်းကြောင့် နှာရည်ယိုခြင်း၊ နှာချေခြင်း၊ မျက်ရည်၊ ကျိန်းစပ်ခြင်းတို့ ဖြစ်တတ်ပါတယ်။

(၂) အဖြူရောင်

တုပ်ကွေး၊ အသက်ရှူလမ်းကြောင်းအထက်ပိုင်း ရောဂါကူးစက်ခြင်း၊ ဆောင်းတွင်းတို့မှာ အဖြူရောင်သလိပ်များ ဖြစ်တတ်ပါတယ်။
သဘာဝဖြစ်စဉ်ဖြစ်တာကြောင့် စိတ်ပူစရာတော့ မဟုတ်ပါဘူး။

(၃) စိမ်းဝါရောင်

နှာရည်က စိမ်းဝါရောင်ပြောင်းသွားတဲ့အခါ ရောင်ရမ်းကူးစက်ခြင်းဖြစ်တဲ့ သဘောဖြစ်ပါတယ်။

နှာရည်ယိုပြီး အဖျားကြီးခြင်း၊ ခေါင်းကိုက်ခြင်း၊ ချောင်းဆိုးခြင်းတို့ ဖြစ်တတ်ပါတယ်။

(၄) ပန်းရောင်မှ အနီရောင်

နှာရည်က ပန်းရောင် ဒါမှမဟုတ် အနီရောင်ပြောင်းတဲ့အခါ သွေးပါတဲ့သဘောဖြစ်ပေမယ့် သွေးအနည်းငယ်ထွက်တဲ့သဘောဖြစ်ကာ သိပ်ပြီးစိတ်ပူစရာမရှိပါဘူး။

ဆောင်းတွင်းမှာ ချမ်းအေးတာကြောင့် နှာခေါင်းအမြှေးပါးများခြောက်သွေ့ကာ သွေးထွက်တာမျိုးဖြစ်တတ်ပါတယ်။

(၅) အညိုရောင်

အညိုရောင်ချွဲတွေက သွေးဟောင်းတွေ ခြောက်သွေ့သွားတဲ့ အနေအထားဖြစ်ပါတယ်။
သွေးတော်တော်များများ ပါလာရင်တော့ ဆရာဝန်နဲ့တိုင်ပင်သင့်ပါတယ်။

နှာရည်ယိုတာနဲ့ပတ်သက်ပြီး သိထားသင့်တဲ့ အမျိုးအစားတွေကတော့...

နှာတစ်ဖက်ယိုခြင်း - နှာခေါင်းပေါက်တစ်ဖက်ထဲကနေ နှာရည်ယိုတာဖြစ်ပါတယ်။

နှာရည်ယိုရာတွင်အနံ့ပါခြင်း - ချွဲသလိပ်က ပုံမှန်ဆိုရင် အနံ့မရှိတာကြောင့် အနံ့ပါလာပြီဆိုရင် ရောဂါကူးစက်တဲ့သဘောဖြစ်ပါတယ်။

နှာခေါင်းနောက်တွင်နှာရည်ယိုခြင်း - နှာရည်တွေက နှာခေါင်းပေါက်မှထွက်မလာဘဲ အနောက်ဘက်ထဲမှာ ချွဲထတာဖြစ်ပါတယ်။

ခြောက်သွေ့ခြင်း - နှာရည်ယိုတဲ့အချိန်မှာ ဆားရည်ဖြင့်ဆေးခြင်းက သက်သာစေသလို ချွဲသလိပ်ကို ခြောက်သွားစေပါတယ်။

Source: The Jerusalem Post
#Yangon_Media_Group

#Local_News
Published_ 19 January 2023

ဝန်ထမ်းများ တရားမဝင်ကုန်သွယ်မှုများတွင် ငွေကြေးတောင်းခံခြင်း၊ တံစိုးလက်ဆောင်ရယူခြင်းများမရှိစေရေး အကြိမ်ကြိမ် သတိပေးထိန်း ကျောင်းနေတဲ့ကြားမှ တရားမဝင်ကုန်သွယ်မှုများတွင် ပါဝင်ပတ်သက်နေတဲ့ ဝန်ထမ်းများကို စိစစ်တွေ့ရှိပါက စံနမူနာပြအနေဖြင့် ထိထိရောက်ရောက် အရေးယူသွားရမည်ဖြစ်ကြောင်း နစက ဒုတိယ ဥက္ကဌက ပြောကြားခဲ့ပါတယ်။

နေပြည်တော်ရှိ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၌ ကျင်းပတဲ့ တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီ လုပ်ငန်းညှိနှိုင်းအစည်းအဝေး (၁/၂၀၂၃) မှာ ဦးဆောင်ကော်မတီဥက္ကဋ္ဌ နစက ဒုတိယဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်း က ပြောကြားခဲ့တာ ဖြစ်ပါတယ်။

ထို့အပြင် နေပြည်တော်၊ တိုင်းဒေသကြီးနှင့်ပြည်နယ် တရားမဝင်ကုန်သွယ်မှု တိုက်ဖျက်ရေးအထူးအဖွဲ့များအနေဖြင့် ဖမ်းဆီးတားဆီးရေး လုပ်ငန်းစဉ်များ ဆောင်ရွက် ရာတွင် ဥပဒေနှင့်အညီဆောင်ရွက်ရန်၊ အများပြည်သူကိုလည်း ဥပဒေကိုလေးစားလိုက်နာရန် တတ်စွမ်းသမျှ ဆောင်ရွက်ရမယ်လို့ ဆိုပါတယ်။

တရားမဝင်ကုန်သွယ်မှု တိုက်ဖျက်ရေးအတွက် လုပ်ငန်းဆောင်ရွက်မှုများသည် အများပြည်သူအမြင်တွင် အထင်အမြင်မမှားစေရေးအတွက် ဆောင်ရွက်ကြဖို့ မှာကြားခဲ့ပါတယ်။

ယခုကဲ့သို့ ပြောကြားရခြင်းသည်လည်း နေ့စဉ်ဖမ်းဆီးရမိသတင်း တင်ပြနိုင်ရေး ဟန်ပြဆောင်ရွက်ခြင်းထက် အမှန်တကယ် ထိထိရောက်ရောက် တားဆီးစစ်ဆေးပြီး ဥပဒေနှင့်အညီ အရေးယူဆောင်ရွက်ခြင်းမျိုးကိုသာ ဖြစ်စေလိုတဲ့အတွက် ပြောကြားရခြင်းဖြစ်တယ်လို့ ဆိုပါတယ်။

ယခင်ကကုန်သွယ်မှုလမ်းကြောင်းများ၊ စစ်ဆေးရေးစခန်းများ၌ပင် စစ်ဆေး ဖမ်းဆီးမှုများပြုလုပ်ခဲ့ပြီး နောက်ပိုင်းတွင် တရားမဝင်ကုန်ပစ္စည်းများ သိုလှောင်နိုင်တဲ့ သိုလှောင်ရုံနှင့် အဆောက်အဦများကိုပါ သတင်းရယူ ဝင်ရောက်စစ်ဆေးဖော်ထုတ်ဖမ်းဆီးပြီး ဥပဒေနှင့်အညီ အရေးယူခဲ့တဲ့အတွက် ကုန်သွယ်မှုလမ်းကြောင်း မဟုတ်တဲ့နေရာများတွင် ဖမ်းဆီးရမိမှုများ တိုးတက်လာတယ်လို့ ဆိုပါတယ်။

အထူးသတိပြုရမည်မှာ တရားမဝင်ကုန်သွယ်မှုများတွင် တာဝန်ကျဝန်ထမ်းများ ပါဝင်ပတ်သက်မှုမရှိစေရေးပင်ဖြစ်ကာ လာဘ်ပေး လာဘ်ယူ ကင်းရှင်းရေးကို အစည်းအဝေးတိုင်းတွင် ထပ်ကာထပ်ကာ မှာကြားနေတယ်လို ပြေကြားပါတယ်။

အလားတူ တရားမဝင်ကုန်သွယ်မှု၏ ဆိုးကျိုးများကို အများပြည်သူသိရှိစေရေးတို့အတွက် အသိပညာပေးခြင်းလုပ်ငန်းများကိုလည်း စဉ်ဆက်မပြတ်လုပ်ဆောင်ဖို့ မှာကြားခဲ့ကြောင်း သတင်းရရှိပါတယ်။

#ygm_mnn
#Yangon_Media_Group

#World_Science
Published 19 January 2023

ရိုမေးနီးယားမှာရှိတဲ့ သက်ရှိကျောက်တုံးတွေကို ထရိုဗန့်လိုခေါ်ကြပြီး ဘူမိဗေဒဖြစ်စဉ်တွေအရ သဘာဝအတိုင်း ပေါ်ပေါက်နေတာဖြစ်ပါတယ်။

ထရိုဗန့်ကျောက်တွေဟာ ကျောက်စရစ်ခဲများအဖြစ် စတင်ဖြစ်ပေါ်လာကာ ထောင်စုနှစ်တစ်ခုအတွင်း ၂ လက်မခန့်ကြီးထွားနေပါတယ်။

အပင်နဲ့ နို့တိုက်သတ္တဝါတွေအတိုင်း ဖွဲ့စည်းထားတာကို တွေ့ရှိရပါတယ်။

အပင်တစ်ရှူးတွေလို ကြီးထွားလာပြီး သက်ရှိသတ္တဝါတွေလို ကျောက်တုံးအသစ်များ ဖြစ်ပေါ်စေပါတယ်။

အဆိုပါ ထရိုဗန့်ကျောက်တုံးတွေကို ရိုမေးနီးယားမြို့တော် ဘူခါရက်စ်အနောက်ဘက် မိုင် ၅၀ ခန့်အကွာရှိ ကို့စ်တက်စ်တီရွာလေးမှာ တွေ့ရှိရပါတယ်။

ကျောက်တုံးနဲ့ဖွဲ့စည်းထားတဲ့ ပူစီဖောင်းတွေလိုပုံသဏ္ဍာန်ရှိကာ အချင်းအတိုင်းအတာအမျိုးမျိုးဖြင့် အရွယ်အစားအမျိုးမျိုးရှိသလို လက်သီးဆုပ်လောက်ရှိတဲ့ ကျောက်တုံးတွေလည်းရှိပါတယ်။

ဒီအတိုင်း မြေပြင်မှာပေါ်လာတာမဟုတ်ဘဲ ခေတ်အဆက်ဆက် ဘူမိဗေဒသဲတွေကနေ စုပြုံလာတာဖြစ်ပါတယ်။

မိုးရေရရှိပြီးတော့ တဖြည်းဖြည်းကြီးထွားလာတဲ့ ထရိုဗန့်ကျောက်တုံးတွေနားမှာ ခရီးသွားဧည့်သည်တွေ လာရောက်ကြည့်ရှုနိုင်ပါတယ်။

မိုးရေမှာပါတဲ့ သတ္တုဓာတ်တွေက ဓာတ်ပြုခြင်းဖြစ်ပေါ်ကာ အထဲမှာ ဖိအားများလာပြီး ကျောက်တုံးတွေ ကြီးထွားပွားများလာတာဖြစ်ပါတယ်။

သိပ္ပံနည်းအရ အသက်ရှင်နေတာမဟုတ်ပေမယ့် ဒေသခံတွေ ခရီးသွားတွေကတော့ သက်ရှိအဖြစ် တင်စားနေကြပါတယ်။

ထရိုဗန့်ကျောက်တုံးတွေဟာ ကို့စ်တက်စ်တီတစ်ရွာတည်းမှာ ရှိနေတာမဟုတ်ဘဲ ရိုမေးနီးယား ကာပါသီယန်ဒေသတဝိုက်အနှံ့ တည်ရှိနေကြပါတယ်။

ဒါပေမဲ့ ကို့စ်တက်စ်စီမှာရှိတဲ့ ကျောက်တုံးတွေက ပိုမိုကြီးမားပြီး လူသိများကြပါတယ်။

ထရိုဗန့်ကျောက်တုံးကြီးတွေမှာမှ ကျောက်တုံးအသေးလေးတွေ ပေါ်ပေါက်နေတတ်ပါတယ်။

Source: Daily Mail
#Yangon_Media_Group