#Local_News
Published _ 3 August 2022

တရုတ်-မြန်မာနယ်စပ်ကုန်သွယ်မှုတွေ ဆက်တိုက်လျော့ကျနေပေမယ့် ကန်ပိုက်တီ၊ လွယ်ဂျယ်နယ်စပ်ကုန်သွယ်မှုကတော့ တိုးမြှင့်လာနေပါတယ်။

#Yangon_Media_Group

TV Yangon Times Matters အစီအစဉ်
Published - 4 Sep 2022

အစီအစဉ်တင်ဆင်သူ ဆရာဟိန်းလတ်က ဒီနေ့ပုဏ္ဏက(တေးရေးဆရာ)နှင့်အတူ

-"အရေးအသားအသုံးအနှုန်းတွေက ရှေးစာဆိုတွေနဲ့ တစ်ခြားစီဖြစ်နေပေမယ့် ဒီအရေးအသားတွေကြောင့် လူသိများခဲ့ပြီး အဖေက အိမ်ပေါ်ပြန်ခေါ်တဲ့အထိ အကျိုးပေးခဲ့ကြောင်း

-ဝေဖန်မှုတွေကို စိတ်မဆိုးခဲ့ဘဲ လက်ခံပြုပြင်ခဲ့လို့ ပုဏ္ဏကဆိုပြီး ဖြစ်တည်လာ‌တာဖြစ်ကြောင်း" စတဲ့ စိတ်ဝင်စားဖွယ်အကြောင်းအရာများကို ဆွေးနွေးခဲ့ကြပါတယ်။
⏭ Watch full Video on Youtube >>>
⏭ Website >>>
⏭ Telegram >>> https://t.me/yangonmediagroup
#Yangon_Media_Group

#Local_News
Published - 3 September 2022

ထိုင်းနိုင်ငံတွင် အလုပ်လုပ်သည့် ရွှေ့ပြောင်းလုပ်သားများအတွက် မည်သူမည်ဝါဖြစ်ကြောင်း သက်သေခံလက်မှတ် (CI- Certificate of Identity) လျှောက်ထားနိုင်သည့် CI စင်တာများကို ပြည်နယ် လေးခုတွင် ထပ်ဖွင့်ရန် ထိုင်းအစိုးရက စီစဉ်နေကြောင်း အလုပ်သမားအရေးဆောင်ရွက်သူများထံမှ သိရသည်။

CI စင်တာများ ထပ်ဖွင့်ရန် ထိုင်းအစိုးရဝန်ကြီးအဖွဲ့ကို ထိုင်းအလုပ်သမားဝန်ကြီးဌာနက တင်ပြထားခြင်းဖြစ်ကြောင်း၊ အဆိုပါ CI အထောက်အထား ပြုလုပ်ရန် ရွှေ့ပြောင်းလုပ်သား သုံးသိန်းနီးပါး ကျန်နေ ခြင်းကြောင့် ၂၀၂၃ ဖေဖော်ဝါရီ ၁၃ ရက်အထိ စမုပရကန် ၊ စမုဆာခွန်၊ ရနောင်းနှင့် ချွန်ဘူရီပြည်နယ်တွင် CI စခန်းများ ထပ်ဖွင့်ရန် စီစဉ်နေကြောင်း သိရသည်။

ထိုင်းနိုင်ငံတွင် အလုပ်လုပ်သည့် ရွှေ့ပြောင်းလုပ်သားများအနေဖြင့် နေထိုင်ခွင့်ဗီဇာနှင့် မည်သူမည်ဝါဖြစ်ကြောင်းသက်သေခံ(CI- Certificate of Identity)စာအုပ်ရှိမှသာ ဥပဒေအရ တရားဝင်အလုပ်သမားအဖြစ် သတ်မှတ်ခံရခြင်းဖြစ်သည်။

ရွှေ့ပြောင်းလုပ်သားများအနေဖြင့် တရားဝင်နေထိုင်အလုပ်လုပ်ခွင့်အတွက် နေထိုင်ခွင့်ဗီဇာ တံဆိပ်တုံးထုခြင်း၊ CI စာအုပ်ပြုလုပ်ခြင်းတွေကို ထိုင်းနိုင်ငံအတွင်းက သက်ဆိုင်ရာ CI စင်တာများတွင် ပြုလုပ်ရခြင်းဖြစ်သည်။

CI စင်တာများကို ပြီးခဲ့သည့် ဇန်နဝါရီ ၁ ရက်မှ ဇူလိုင် ၂၇ ရက်အထိ ပြည်နယ် ငါးခုတွင် ဖွင့်လှစ်ခဲ့ရာ ရွှေ့ပြောင်းလုပ်သား လေးသိန်းခန့် CI အထောက်အထား ပြုလုပ်နိုင်ခဲ့ကြောင်း သိရသည်။

CI သက်တမ်း လျှောက်ထားသူများသည် ၂၀၂၅ ခုနှစ် ဖေဖော်ဝါရီ ၁၃ ရက်အထိ အလုပ်လုပ်ခွင့်ရမည်ဖြစ်ကြောင်းလည်း သိရသည်။

#ymg/sth
#Yangon_Media_Group

#Local_News
Published - 3 September 2022

လယ်ယာသုံး စက်ပစ္စည်းကိရိယာများနှင့် ပတ်သက်သည့် သွင်းကုန်များကို ပြည်ပမှတင်သွင်းရာတွင် သွင်းကုန်လိုင်စင်လျှောက်ထားရန်မလိုအပ်ကြောင်း အကောက်ခွန်ဦးစီးဌာနမှ ကြေညာထားသည်။

ယခုလမှစတင် ပြီး လယ်ယာသုံး စက်ပစ္စည်းကိရိယာနှင့် အကျုံးဝင်သည့် ကုန်စည်အမျိုးအစား ၇၀ ကို ပြည်ပမှ တင်သွင်းရာတွင် သွင်းကုန်လိုင်စင်လျှောက်ထားရန် မလိုအပ်ဘဲ တင်သွင်းခွင့်ပြုသွားမည်ဖြစ်ကြောင်း သိရသည်။

လယ်ယာသုံးစက်ကိရိယာ တင်သွင်းမှု လွယ်ကူချောမွေ့စေရေးအတွက် ယခုလို ခွင့်ပြုပေးခဲ့ခြင်းဖြစ်ကြောင်း အကောက်အခွန်ဦးစီးဌာနက ကြေညာထားသည်။

လယ်ယာသုံးစက်ပစ္စည်းကိရိယာတွေနှင့် အကျုံးဝင်သည့် အကောက်အခွန်နှုန်းလိုင်း ၇၀ ကို လိုင်စင်မလိုအပ်သော အကောက်အခွန်လိုင်းတွေအဖြစ် အကောက်အခွန်စနစ်မှာ ထားရှိပြီးဖြစ်ကြောင်း အကောက်ခွန်ဦးစီးဌာနက ထုတ်ပြန်ခဲ့သည်။

#ymg/sth
#Yangon_Media_Group

#Local_News
Published _ 3 August 2022

အိမ်အကူ အလုပ်လုပ်ကိုင်ရမည်ဟုဆိုကာ ယူအေအီးနိုင်ငံ၊ ဒူဘိုင်းမြို့သို့ အလုပ်သမားလိမ်လည် ပို့ဆောင်မှုတွေ ဆက်တိုက်ဖြစ်ပေါ်နေသောကြောင့် အိမ်အကူအလုပ်ဖြင့် မသွားကြရန် ရွှေ့ပြောင်းအလုပ်သမားအရေး ကျွမ်းကျင်သူများက အကြံပြုထားရှိသည်။

အရှေ့အလယ်ပိုင်းဒေသနိုင်ငံတွေဟာ ကျွမ်းကျင်လုပ်သားများကိုသာ အဓိကထားခေါ်ယူပြီး အိမ်အကူလုပ်သားအဖြစ်ခေါ်ခြင်းဟာ ယခုနှစ်၌ ရေပန်းစားလာခြင်းပင် ဖြစ်သည်။

"အိမ်အကူအနေနဲ့ တရားဝင်လွှတ်ခွင့် ပေးထားတာလည်း မရှိဘူး။ ခိုးပို့နေတာ။ များသောအားဖြင့် အလိမ်အညာတွေ"ဟု ပြည်ပအလုပ်သမားအေဂျင်စီလုပ်ငန်းရှင်တစ်ဦးက ပြောသည်။

အိမ်အကူအနေနှင့် လုပ်ကိုင်ရန် ဒူဘိုင်းသို့ရောက်လာသူများဟာ အလုပ်ချက်ချင်းမရဘဲ နိုင်ငံကူးလက်မှတ်အသိမ်းခံရတာမျိုးလည်းဆက်တိုက်ကြုံနေရကြောင်း ဒူဘိုင်းရှိ မြန်မာရွှေ့ပြောင်းလုပ်သားအရေး ကူညီပေးနေသူများက ဆိုသည်။

"ရောက်လာပြီးမှ ရောင်းစားခံရတာတွေလည်း ရှိတယ်။ ဒုက္ခရောက်နေသူတွေလည်း အများကြီး။ မြန်မာအသိုင်းအဝိုင်းကပဲ တတ်နိုင်သလောက် ကူညီပေးနေရတယ်။ ဒါကြောင့် အိမ်အကူအလုပ်နဲ့မလာဖို့ တိုက်တွန်းတယ်"ဟု မြန်မာလုပ်သားအရေးကူညီပေးနေသူတစ်ဦးမှ ဆိုထားသည်။

ဒူဘိုင်းမှာ အလုပ်လာလုပ်မည်ဆိုလျင် အင်္ဂလိပ် ဘာသာစကားကျွမ်းကျင်ရန်နှင့် ကဏ္ဍအလိုက်ကျွမ်းကျင်မှုလက်မှတ်များ အပါအဝင် အရေးတကြီး အောက်ခြေလုပ်သားအနေဖြင့် လာရောက်မည်ဆိုလျင် အာမခံချက် မရှိကြောင်း ၎င်းတို့ထံမှ သိရသည်။

#ymg/NN
#Yangon_Media_Group

#World_News
Published 3 September 2022

အမေရိကန်အနောက်ပိုင်းဒေသမှာ အပူလှိုင်းဖြတ်သန်းလျက်ရှိကာ ပုံမှန်ထက် အပူချိန် ၃ ဆလောက်မြင့်တက်နေပါတယ်။

"ကျွန်မတို့အိမ်မှာ လေအေးပေးစက်မရှိပါဘူး၊ ပန်ကာတစ်လုံးပဲရှိပါတယ်၊ အိမ်မှာမနေနိုင်တော့လို့ လေအေးပေးစက်ဖွင့်တဲ့နေရာတွေကို လာရတာပါ" လို့ အငြိမ်းစားတစ်ဦးဖြစ်သူ'နယ်လီအာမာယာ'က AFP ကို ပြောကြားခဲ့ပါတယ်။

အပူချိန်က ကြောက်စရာကောင်းလောက်အောင် မြင့်တက်နေတာကြောင့် ဒေသအရေးပေါ်ဌာနမှ လေအေးပေးစင်တာနေရာ ၄၀ ကို ဖွင့်လှစ်ပေးခဲ့ကာ လော့စ်အိန်ဂျလိစ်က လူပေါင်းများစွာဟာ ထိုလေအေးပေးစင်တာများသို့ လာရောက်ကြပါတယ်။

လေအေးပေးစင်တာတွေကို စာကြည့်တိုက်တွေ၊ အပန်းဖြေစင်တာ၊ ပန်းခြံ၊ သက်ကြီးဂေဟာတွေမှာ ပြုလုပ်ထားပြီး အပူချိန်မြင့်တက်နေတဲ့ နေ့ပိုင်းတွေမှာ လေအေးပေးစက်ဖွင့်ထားပေးကာ အချိုရည်အေးများဖြင့် ထောက်ပံ့ပေးထားပါတယ်။

မိုးလေဝသဌာနတွေက ကယ်လီဖိုးနီးယားမှ နေရာအများစုအပြင် နီဗါဒါ၊ အရီဇိုနာ အချို့နေရာများမှာလည်း အပူလွန်ကဲနိုင်ပြီး အပူချိန် ၁၁၀ ဒီဂရီဖာရင်ဟိုက် ( ၄၃ ဆဲလ်စီးယပ်စ် ) အထိရှိနိုင်ကြောင်း ထုတ်ပြန်ထားပါတယ်။

ယခုရက်သတ္တပတ်ရုံးပိတ်ရက်ကိုကျော်ပြီး နောက်အပတ်အထိ ကြာမြင့်နိုင်ကာ ညဘက်မှာတော့ အပူချိန်ကျဆင်းတာကြောင့် ခံသာတယ်လို့ ပြောလို့ရပါတယ်။

အပူချိန်များလာခြင်းက ရက်ကြာလာပြီး ညဘက်တွေမှာပါ ပူလာမယ်ဆိုရင်တော့ လူ့ခန္ဓာကိုယ်ကို ထိခိုက်မှုရှိလာနိုင်ပြီး နာမကျန်းဖြစ်လာနိုင်ကာ အသက်သေဆုံးသည်အထိဖြစ်လာနိုင်တယ်လို့ ဆရာဝန်များက ဆိုပါတယ်။

အပူချိန် ၁၀၀ ဒီဂရီဖာရင်ဟိုက်ကျော်လာတဲ့အချိန်မှာ အကူအညီလိုအပ်မယ့်သူတွေကို အတတ်နိုင်ဆုံး ရှာဖွေကူညီဖို့စီစဉ်ထားကြောင်း လော့စ်အိန်ဂျလိစ်အရေးပေါ်စီမံဌာနမှ 'ဟိုဆက်ပ်ရစ်ဆာ'က ပြောပြခဲ့ပါတယ်။

အပူလှိုင်းက လူနေမှုအဖွဲ့အစည်းတွေကို မျှမျှတတသက်ရောက်တာတော့မဟုတ်ပါဘူး။

ဒေသအစွန် အဖျားကလူတွေနဲ့ ဆင်းရဲနွမ်းပါးတဲ့ အသိုင်းအဝိုင်းတွေက ပိုပြီးတော့ ခံစားရနိုင်ပါတယ်။

အိမ်ခြေရာမဲ့လူတွေ၊ အပြင်ဘက် နေပူကြီးထဲ အလုပ်လုပ်ရသူတွေ၊ သစ်ပင်ရိပ်မရှိတဲ့ အိမ်ကလူတွေ၊ ကားလမ်းမနဲ့နီးတဲ့အိမ်ကသူတွေက ပိုပြီးတော့ အန္တရာယ်များပါတယ်။

"လေအေးပေးစက်မရှိတဲ့အိမ်က လူတွေ၊ အိမ်မရှိတဲ့လူတွေ၊ အပူဒဏ်သက်သာအောင် ရှာကြံနေထိုင်တဲ့လူငယ်တွေ၊ လေအေးပေးစက် မကောင်းတဲ့အိမ်ကလူတွေ ဖြစ်ပါတယ်"လို့ 'ရစ်ဆာ'က ဆိုပါတယ်။

ကယ်လီဖိုးနီးယား လျှပ်စစ်ဓာတ်အားပေးစက်ရုံက အိမ်တွေကို လျှပ်စစ်ဓာတ်အား ခြိုးခြံချွေတာသုံးစွဲဖို့ တောင်းဆိုထားပါတယ်။

သိပ္ပံပညာရှင်တွေကတော့ ကျောက်ဖြစ်ရုပ်ကြွင်းလောင်စာများ အသုံးပြုခြင်းကြောင့် ကမ္ဘာကြီးပူနွေးလာရကာ ရာသီဥတုပြောင်းလဲမှုများ ပြင်းထန်လာရကြောင်း သတိပေးလိုက်ပါတယ်။

အပူလှိုင်းတွေက ပိုပိုပြီး ပူပြင်းလာကာ မုန်တိုင်းတိုက်တဲ့အခါ ရေကြီးရေလျှံတာတွေ အဖြစ်များလာပြီး အန္တရာယ်ပိုများလာတဲ့ သဘောတရားပါပဲ။

#Source: rfi
#Yangon_Media_Group

#World_Health
Published 3 September 2022

စတီးရွိုက်ဆေးတွေ သောက်သုံးနေရခြင်းက စိတ်ဓာတ်ကျခြင်း၊ ပင်ပန်းနွမ်းနယ်ခြင်းအပြင် အခြားကျန်းမာရေးပြဿနာများနဲ့ ဆက်စပ်နေကြောင်း အဓိကလေ့လာချက်ကြီးမှာ တွေ့ရှိထားပါတယ်။

ဗြိတိန်လူမျိုးသန်းပေါင်းများစွာက အဆစ်အမြစ်ရောင်၊ အသက်ရှူကြပ်အဆုတ်ရောင်ရောဂါ၊ နှင်းခူ၊ ရင်ကြပ်ရောဂါ၊ ခုခံအားကျဆင်းဝေဒနာတွေကို ကုသဖို့ စတီးရွိက်တွေ အသုံးပြုနေကြပါတယ်။

စတီးရွိုက်တစ်မျိုးဖြစ်တဲ့ ဂလူကိုကော်တီကွိုက်ဟာ ဦးနှောက်ရဲ့ပုံပန်းသဏ္ဍာန်ကို ပြောင်းလဲစေနိုင်ပြီး စိတ်ကျန်းမာရေးပြဿနာများ ဖြစ်နိုင်ချေများစေပါတယ်။

ဂလူကိုကော်တီကွိုက်ကြာရှည်စွာ သုံးစွဲခြင်းက ရေရှည်မှာ ဘေးထွက်ဆိုးကျိုးဖြစ်လာနိုင်ချေရှိတာနဲ့ ပတ်သက်နေပေမယ့် သုတေသနအရတော့ အထောက်အထားအနည်းငယ်သာရှိပါ သေးတယ်။

ဆေးတွေရဲ့ ဓာတုပစ္စည်းတွေ ကိုယ်တွင်းအင်္ဂါတွေကို ပစ်မှတ်ထားနိုင်ရန်အတွက် ဆေးတွေက လူရဲ့ကိုယ်ခံအားစနစ်ကိုချပေးပါတယ်။

ဒီလိုဓာတုပစ္စည်းတွေထဲမှာ ဒက်ဆာမီသာဆုန်း၊ ကော်တီဆုန်း၊ ဘူဒီဆိုနိုက်တို့ ပါဝင်ပါတယ်။

လူနာတွေရဲ့ဦးနှောက်ကို ကျန်းမာတဲ့ဦးနှောက် ၂၄,၀၀၀ ကျော်နဲ့နှိုင်းယှဉ်ကာ ဦးနှောက်ရဲ့ ခဲရောင်အသားနဲ့ အဖြူရောင်အသားတို့မှာ ပြောင်းလဲမှုဖြစ်ပေါ်ပုံကို ကြည့်ရှုခဲ့ကြပါတယ်။

စတီးရွိုက်သုံးစွဲနေရသူတွေက စိတ်ဓာတ်ကျဝေဒနာဖြစ်နိုင်ချေ ၇၆ ရာခိုင်နှုန်းပိုဖြစ်နိုင်ပြီး ထုံထိုင်းခြင်းဝေဒနာ ၉၀ ရာခိုင်နှုန်း ပိုဖြစ်နိုင်ပါတယ်။

ဒါ့အပြင် စိတ်မပါလက်မပါဖြစ်ခြင်း ၈၄ ရာခိုင်နှုန်းနဲ့ ဂဏာမငြိမ်ခြင်း ၇၈ ရာခိုင်နှုန်းပိုဖြစ်နိုင်ပါတယ်။

လေ့လာချက်အရ ဂလူကိုကော်တီကွိက်သောက်သုံးခြင်းနဲ့ ရှူသွင်းခြင်းကြောင့် ဦးနှောက်ပုံရိပ်ပြောင်းလဲခြင်းများ ဖြစ်ပေါ်ကြောင်း တွေ့ရှိခဲ့ရပါတယ်။

ဂလူကိုကော်တီကွိုက်ရေရှည်သုံးစွဲသူတွေထဲမှာ ဆေးပမာဏအတိုင်း ဒါမှမဟုတ် သုံးစွဲချိန်အတိုင်း ဦးနှောက်အဖြူအသားတည်ဆောက်ပုံအရ ဂလူကိုကော်တီကွိုက်ရှူသွင်းတဲ့သူတွေမှာ သက်ရောက်မှုအနည်းဆုံး၊ သောက်သုံးတဲ့သူတွေမှာ သက်ရောက်မှုများကာ ရေရှည်သုံးစွဲသူတွေထဲမှာ သက်ရောက်မှုအများဆုံးဖြစ်နေပါတယ်။

ဒီတွေ့ရှိချက်တွေက ထင်ရှားပြီးတော့ ရောဂါကုသမှုနဲ့ အာရုံကြောဘေးထွက်ဆိုးကျိုးများကြား ဆက်စပ်မှုကို သတိထားမိစေမှာဖြစ်ပါတယ်။

ဂလူကိုကော်တီကွိုက်သုံးစွဲသူတွေမှာ စိတ်ကျန်းမာရေးပြဿနာများဖြစ်ပေါ်ကြောင်း သတင်းတင်ပြခဲ့ကြပြီး မှတ်ဉာဏ်ပိုင်းဆိုင်ရာကတော့ သိပ်ပြီး မပြောင်းလဲပါဘူး။

ဂလူကိုကော်တီကွိုက်သုံးစွဲခြင်းနဲ့ ဦးနှောက်တည်ဆောက်ပုံကြားဆက်စပ်မှုကို လေ့လာတဲ့ အကြီးဆုံးသုတေသနဖြစ်ပြီး ပထမဆုံးလည်းဖြစ်ပါတယ်။

Source: Telegraph
#Yangon_Media_Group

#Local_News
Published - 3 September 2022

ရန်ကုန်ဆန်ဈေးကွက်တွင် ဆန်ချောဈေးနှုန်းမှာ အတက်ဈေးဖြင့်ငြိမ်နေပြီး ဆန်ကြမ်းဈေးနှုန်းသည် အနည်းငယ်ဈေးတက်လာကြောင်း ဆန်ရောင်းချသူများထံမှ သိရသည်။

နယ်ဈေးကွက်တွင်လည်း ဆန်စပါးဈေးနှုန်းသည်အတက်ဈေးဖြင့် ငြိမ်နေကြောင်း သိရသည်။ ယင်းအပြင် ငွေလဲလှယ်နှုန်းဈေးမတည်ငြိမ်ခြင်းကြောင့် ဝယ်ယူသိုလှောင်မှုများပြားသည့်အတွက် နေ့စဉ်မြင့်တက်နေခြင်းဖြစ်ကြောင်း သိရသည်။

စပါးအသစ်မှာ အချို့ဒေသတွေများတွင် ထွက်ရှိသော်လည်း ဈေးနှုန်းမှာ အများကြီးကျဆင်းနိုင်ခြေမရှိကြောင်း ကုန်သည်များ၏ ပြောပြချက်အရ သိရသည်။

ဆန်စပါးအသင်းအနေဖြင့် လက်ရှိမြင့်တက်နေသည့် ဆန်စပါးဈေးကို ထိန်းချုပ်ရန်အတွက်အရန်ဆန်စီမံကိန်းတစ်ခုကို ဆောင်ရွက်မည်ဖြစ်ကြောင်းလည်း သိရသည်။

ရန်ကုန်ဈေးကွက်တွင် ဆန်ချောဈေးနှုန်းမှာ တစ်လအတွင်း တစ်အိတ်ကို ၄,၀၀၀ မှ ၆,၀၀၀ ကြားဈေးတက်လာပြီး ဆန်ကြမ်း ဈေးနှုန်းသည်လည်းတစ်အိတ်ကို ၃,၀၀၀ မှ ၇,၀၀၀ ကြား ဈေးတက်လာ ကြောင်း သိရသည်။

ဧရာဝတီတိုင်းဈေးကွက်တွင်လည်း ပထမတန်းစားစပါးသည် တစ်လအတွင်း တင်း ၁၀၀ကို အနိမ့်ဆုံး တစ်သိန်းမှ တစ်သိန်းခွဲကြား ဈေးတက်လာပြီး ဒုတိယတန်းစပါးဈေးနှုန်းမှာ တစ်လအတွင်း တင်း ၁၀၀ ကို ၃၀,၀၀၀ မှ ၆၀,၀၀၀ ကြား ဈေးတက်လာခြင်းဖြစ်သည်။

ဆန်ဈေးအပြင် အခြေခံစားသောက်ကုန်များပါ ဈေနှုန်းမြင့်တက်နေမှုကြောင့် အခြေခံလူတန်းစားများ စားဝတ်နေရေး ကျပ်တည်းနေ ကြောင်းလည်း သိရသည်။

#ymg/sth
#Yangon_Media_Group

#Local_News
Published - 3 September 2022

တောင်ကိုရီးယားနိုင်ငံတွင် ရောက်ရှိနေသည့် မြန်မာနိုင်ငံသားများအနေဖြင့် ၂၀၂၃ ခုနှစ် တက္ကသိုလ်၀င်စာမေးပွဲကို ဖြေဆိုလိုပါက စက်တင်ဘာ ၁၃ရက် နောက်ဆုံးထားပြီး ဆိုးလ်မြို့ မြန်မာသံရုံးမှာ လျှောက်ထားနိုင်ကြောင်း အဆိုပါသံရုံးက သတင်းထုတ်ပြန်ထားသည်။

စနစ်ဟောင်း(သင်ရိုးဟောင်း) တက္ကသိုလ်၀င်စာမေးပွဲကို ၂၀၂၃ ခုနှစ်မှာ နောက်ဆုံးကျင်းပမည်ဖြစ်သောကြောင့် တက္ကသိုလ်၀င်စာမေးပွဲ မအောင်သေးသည့် ပြည်ပနိုင်ငံရောက် မြန်မာနိုင်ငံသားများအနေဖြင့် သင်ရိုးဟောင်း ဘာသာတွဲ ၈ ခုအနက် တစ်ခုကို ရွေးချယ်ပြီး စာမေးပွဲဖြေဆိုခွင့်လျှောက်ထားနိုင်ကြောင်း သံရုံးထုတ်ပြန်ချက်တွင် ဖော်ပြထားသည်။

၂၀၂၃ ခုနှစ်နောက်ပိုင်းကျင်းပမည့် တက္ကသိုလ်၀င်စာမေးပွဲတွင် စနစ်သစ် ဒွါဒသမတန်း(Grade- 12) သင်ရိုးညွှန်းတမ်းကို ဖြေရမည်ဖြစ်သောကြောင့် ၂၀၂၃ ခုနှစ်အထိ တက္ကသိုလ်၀င်စာမေးပွဲ မအောင်မြင်သေးသူများ နောက်ပိုင်းတွင် သင်ရိုးသစ် Grade- 12 ကို ထပ်မံသင်ကြားပြီးမှသာ စာမေးပွဲဖြေရတော့မည်ဖြစ်ကြောင်း သိရသည်။

၂၀၂၃ ခုနှစ် တက္ကသိုလ်၀င်စာမေးပွဲဖြေဆိုခွင့်လျှောက်ထားမည့်သူများအနေဖြင့် မိဘနှင့်အတူ တောင်ကိုရီးယားနိုင်ငံတွင် ရောက်ရှိနေထိုင် နေသူဆိုပါက မိဘနှစ်ဦးနှင့် ကျောင်းသား၊ ကျောင်းသူ၏ သက်တမ်းရှိနိုင်ငံကူးလက်မှတ် မိတ္ထူ၊ ဗီဇာအမျိုးအစားနှင့် ဗီဇာတံဆိပ်တုံးပါရှိသည့် စာမျက်နှာမိတ္ထူတင်ပြရမည် ဖြစ်သည်။

တောင်ကိုရီးယားနိုင်ငံတွင် နေထိုင်ခွင့်ရှိထားသူဆိုပါက Work Permit ၊ ID Card မိတ္ထူလိုမျိုး နေထိုင်ခွင့်ပြုသည့်မှတ်ပုံတင်အထောက်အထား တင်ပြရမည်ဖြစ်ကြောင်း သိရသည်။

ဖြေဆိုခွင့်လျှောက်သူသည် တောင်ကိုရီးယားနိုင်ငံတွင် အလုပ်လုပ်နေတာ၊ ကျောင်းတက်နေတာဆိုရင် ဘာကြောင့် ရောက်ရှိနေရသလဲဆိုတဲ့ အထောက်အထားကို တင်ပြရမှာဖြစ်ပါတယ်။

ဖြေဆိုခွင့်လျှောက်ထားသူအားလုံးသည် ဒသမတန်းဖြေဆိုခဲ့သည့်ခုနှစ်၊ ခုံအမှတ်နှင့် စာစစ်ဌာနကို တင်ပြရမည်ဖြစ်ပြီး လျှောက်လွှာနှင့် တံဆိပ်ခေါင်းဖိုး ၀မ်တစ်ထောင် ပေးသွင်းရမည် ဖြစ်ကြောင်းလည်း သံရုံးက ကြေညာထားသည်။

#ymg/sth
#Yangon_Media_Group

#Local_News
Published_ 3 September 2022

အရည်အသွေးကောင်းသည့် မြန်မာ့ဆန်များတိုးမြှင့် ထုတ်လုပ်တင်ပို့နိုင်ရေး၊ ဈေးကွက်သစ်များ ရှာဖွေရေး ဆွေးနွေးခဲ့ကြောင်း သိရပါတယ်။

ထို့ပြင် ပြည်တွင်း၌ ပိုမိုစိုက်ပျိုးထုတ်လုပ်နိုင်ရေးနှင့် စိုက်ပျိုးတောင်သူများ၏ အကျိုးစီးပွား ဖွံ့ဖြိုးတိုးတက်စေရေးစသည့် ကိစ္စရပ်များနှင့်စပ်လျဉ်း၍ စီးပွားရေးနှင့်ကူးသန်းရောင်းဝယ်ရေးဝန်ကြီး ဦးအောင်နိုင်ဦးသည် စက်တင်ဘာ ၂ ရက်နံနက်ပိုင်းတွင် ရန်ကုန်မြို့ရှိ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန ရန်ကုန်တိုင်းဒေသကြီးရုံး၌ မြန်မာနိုင်ငံ ဆန်စပါးအသင်းချုပ်ဥက္ကဋ္ဌနှင့် တာဝန်ရှိသူများနှင့် တွေ့ဆုံဆွေးနွေးခဲ့ပါတယ်။

မွန်းလွဲပိုင်းတွင် ဝန်ကြီးသည် ရန်ကုန်မြို့ရှိ ပြည်ထောင်စုသမ္မတ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ်ရုံး၌ ပြည်ထောင်စုသမ္မတ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်နှင့် ညီနောင်အသင်းများမှ တာဝန်ရှိသူများနှင့်တွေ့ဆုံခဲ့ပါတယ်။

ပို့ကုန်မြှင့်တင်ရေး၊ ကုန်သွယ်မှုလုပ်ငန်းများတွင် ကြုံတွေ့နေရသော အခက်အခဲများအား လျင်မြန်လွယ်ကူစွာ ဖြေရှင်းဆောင်ရွက်နိုင်ရေး၊ ပြည်တွင်းရှိ အရင်းအမြစ်များကို တိုးမြင့် ဆောင်ရွက်၍ ပို့ကုန်တိုးမြှင့်တင်ပို့နိုင်အောင် ဆောင်ရွက်ရေးနှင့် နိုင်ငံတော်၏ စီးပွားရေးဖွံ့ဖြိုးတိုးတက်ရေးအတွက် ကုန်သွယ်မှုကဏ္ဍမြှင့်တင်နိုင်မည့် နည်းလမ်းရှာဖွေရေးနှင့် နိုင်ငံခြားငွေလဲလှယ်နှုန်း တည်ငြိမ်ရေးအတွက် ဆက်လက်ပူးပေါင်းဆောင်ရွက်ရေးတို့နှင့် ပတ်သက်၍ ညှိနှိုင်းဆွေးနွေးခဲ့ပါတယ်။

ပြည်ထောင်စုဝန်ကြီးဟာ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၏ တာဝန်ရှိသူများမှ တင်ပြချက်များအပေါ် လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိပါတယ်။

#ymg_mnn
#Yangon_Media_Group

#Local_News
Published_3 September 2022

ငြိမ်းချမ်းရေးဖြစ်စဉ်ဦးဆောင်မှုအဖွဲ့ (Peace Process Steering Team- PPST) ၏ ဦးဆောင်နာယကအဖြစ်မှ ဗိုလ်ချုပ်ကြီးစောမူတူးစေးဖိုးနှုတ်ထွက်လိုက်ကြောင်း သိရသည်။

ဗိုလ်ချုပ်ကြီးစောမူတူးစေးဖိုး အနေဖြင့် KNU ဗဟိုအလုပ်အမှုဆောင်အဖွဲ့က တာဝန်မယူသင့်ကြောင်း ဆုံးဖြတ်ခဲ့သောကြောင့် ဦးဆောင်နာယကအဖြစ်တာဝန်ယူမည့်ကိစ္စကို ရုတ်သိမ်းကြောင်း PPST အဖွဲထံ စာရေးသားပေးပို့ခဲ့ခြင်း ဖြစ်သည်။

ယင်းစာတွင် ''PPST ၏ ဦးဆောင်နာယက အဖြစ်တာဝန်ယူရန်သဘောတူကြောင်း ကျွန်တော်မှ ၄/၈/၂၀၂၂ ရက်စွဲဖြင့် PPST သို့ စာပေးပို့ခဲ့သလို PPST ၏ ငြိမ်းချမ်းရေးလုပ်ငန်းစဉ် ဦးဆောင်အဖွဲ့၊ အဖွဲ့ခေါင်းဆောင် နိုင်အောင်မင်း၏ ရည်ညွှန်းစာပါ အကြောင်းကြားစာကိုလည်း လက်ခံရရှိခဲ့ပါသည်။ ကျွန်တော်၏ ကိုယ်ပိုင်သဘောထားဆုံးဖြတ်ချက်ဖြင့် အဖွဲ့အစည်းကိုယ်စားမပြုဘဲ ပုဂ္ဂိုလ်အရ လွတ်လပ်စွာ ပါဝင်ရန် ပြန်ကြားစာပေးပို့ခဲ့သော်လည်း ၃၁.၈.၂၀၂၂ ရက်တွင်ကျင်းပသော KNU ဗဟိုအလုပ်အမှုဆောင်ကော်မတီအစည်းအဝေးတွင် ကျွန်တော်သည် PPST ၏ ဦးဆောင်နာယက အဖြစ် တာဝန်မယူသင့်ကြောင်း ဆုံးဖြတ်ခဲ့ပါသည်။ KNU ၏ ဥက္ကဌတစ်ဦးဖြစ်သော ကျွန်တော်သည် ဒီမိုကရေစီစနစ်ကို လက်ခံယုံကြည်သူဖြစ်ပြီး KNU က ချမှတ်ထားသော ဖွဲ့စည်းပုံအခြေခံဥပဒေ၊ နည်းဥပဒေများကို တာဝန်ခံထိန်းသိမ်းရန်တာဝန်ရှိသည့် အလျောက် ပုဂ္ဂိုလ်ရေးအမြင်ထက် အဖွဲ့အစည်း၏ "မူ"၊ လမ်းစဉ်အပေါ် ဦးစားပေး ရှေ့ဆောင်မှုပြုရန် ရည်ရွယ်၍ PPST ၏ ဦးဆောင်နာယက အဖြစ်တာဝန်ယူရန်သဘောတူသည့်ပေးစာကို ပြန်လည် ရုတ်သိမ်းပါကြောင်း လေးစားစွာအကြောင်းပြန်အပ်ပါသည်" ဟု ပါရှိသည်။

"PPST ရဲ့ ပထမဆုံးနာယကကြီးဟာ ဗိုလ်ချုပ်ကြီးစောမူတူးစေးဖိုး ဖြစ်လာခဲ့တာပဲ။ သူ့ကို လက်ရှိ PPST ရဲ့ တာဝန်ရှိသူတွေက ကမ်းလှမ်းတောင်းဆိုခဲ့တာပါ၊ ဗိုလ်ချုပ်ကြီး စောမူတူးစေးဖိုးဟာ PPST မှာ နိုင်ငံရေးလမ်းညွှန်မှုနဲ့ ဦးဆောင်မှုတွေပေးနိုင်မယ်လို့ တိုင်းရင်းသားအဖွဲ့အစည်းတွေက ယုံကြည်ထားကြပါတယ်။ PPST ရဲ့ လုပ်ငန်းလမ်းညွှန်ချက်မှာ အဖွဲ့အစည်းရဲ့ လွှမ်းမိုးမှုမပါဘဲ ကိုယ်ပိုင်လွတ်လပ်တဲ့ ဆန္ဒအရ ပါဝင်နိုင်တယ်လို့ ပြဋ္ဌာန်းထားပါတယ်။ ဒါကြောင့် ဗိုလ်ချုပ်ကြီးစောမူတူးစေးဖိုး အနေနဲ့ KNU ဥက္ကဌ ဖြစ်ပေမဲ့လည်း အဖွဲ့ကို ကိုယ်စားမပြုဘဲ ပုဂ္ဂိုလ်အနေနဲ့ ပါဝင်လာခဲ့တာပါ"ဟု PPST ၏ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့် က YMG ကို ပြောထားဖူးသည်။

PPST တွင် ကရင်အမျိုးသားအစည်းအရုံး (KNU)၊ ရှမ်းပြည်ပြန်လည် ထူထောင်ရေးကောင်စီ (RCSS)၊ မွန်ပြည်သစ်ပါတီ (NMSP)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF)၊ ကရင်ငြိမ်းချမ်းရေး ကောင်စီ (KNU/KNLA-PC) ၊ ဒီမိုကရေစီအကျိုးပြုကရင်တပ်မတော် (DKBA)၊ ချင်းအမျိုးသားတပ်ဦး (CNF)၊ လားဟူဒီမိုကရက်တစ်အစည်းအရုံး (LDU)၊ ရခိုင်ပြည်လွတ် မြောက်ရေးပါတီ (ALP)၊ ပအိုဝ့်အမျိုးသားလွတ်မြောက်ရေးအဖွဲ့ချုပ် (PNLO) တို့ ပါဝင်ကြကြောင်း သိရသည်။

#ymg/mt
#Yangon_Media_Group

#World_Health
Published 3 September 2022

သွေးအမျိုးအစား-အေ ပိုင်ရှင်တွေဟာ အသက်စောစောအချိန်မှာပဲ လေဖြတ်ခြင်းအန္တရာယ်ဖြစ်နိုင်ချေ များနေပြီး အို-သွေးပိုင်ရှင်တွေကတော့ ဖြစ်နိုင်ချေနည်းတဲ့သူတွေဖြစ်ပါတယ်။

Neurology ဂျာနယ်မှာ ဗုဒ္ဓဟူးနေ့ကဖော်ပြရာမှာ လေဖြတ်ထားတဲ့လူ ၁၇,၀၀၀ နီးပါးနဲ့ လေဖြတ်ခြင်းမဖြစ်ဖူးသူ ၅၇၀,၀၀၀ ကျော်တို့ကို လေ့လာခဲ့ကြပါတယ်။

"လေ့လာသုံးသပ်ချက်များအရ လူတွေရဲ့မျိုးဗီဇနဲ့ပတ်သက်ပြီး သွေးအမျိုးအစားနဲ့ စောစီးစွာလေဖြတ်ခြင်းဖြစ်နိုင်ချေတို့ ဆက်စပ်မှုရှိနေတာကို တွေ့ရှိခဲ့ပါတယ်၊ အသက်အရွယ်နောက်ပိုင်းမှ လေဖြတ်ခြင်းအန္တရာယ်ဖြစ်နိုင်ချေဆက်စပ်မှုက အသက်အစောပိုင်းဖြစ်နိုင်ချေလောက် အထောက်အထားမပြနိုင်ပါဘူး"လို့ စုံစမ်းရေးမှူး'ဘရက်စ်တန်မစ်ချဲလ်'က ဆိုပါတယ်။

မေရီလန်းဆေးပညာတက္ကသိုလ်မှ 'မစ်ချဲလ်'နဲ့သုတေသီအဖွဲ့က သွေးအမျိုးအစားနဲ့ လေဖြတ်ခြင်းအန္တရာယ်ကြား ဆက်စပ်ပုံကို လေ့လာခဲ့ကြပါတယ်။

သွေးအမျိုးအစား အေ၊ အေဘီ၊ ဘီ၊ အို တို့ကို လေ့လာခဲ့ကြရာ အေ-သွေးပိုင်ရှင်တွေက အသက် ၆၀ မတိုင်ခင်မှာ လေဖြတ်ခြင်းအန္တရာယ်ဖြစ်နိုင်ချေအများဆုံးဖြစ်နေတာကို တွေ့ရှိခဲ့ကြပါတယ်။

တွေ့ရှိချက်ကို ကောက်ချက်ချနိုင်ရန် သုတေသီတွေက စမ်းသပ်ခံသူတွေကို သွေးအမျိုးအစားအလိုက် ခွဲခြားပြီး စောစီးစွာလေဖြတ်ခြင်း၊ အသက်အရွယ်နောက်ပိုင်းလေဖြတ်ခြင်း၊ လေဖြတ်ခြင်းအန္တရာယ်မဖြစ်ခြင်းဆိုတဲ့ အခြေအနေတွေနဲ့ နှိုင်းယှဉ်ကြည့်ခဲ့ပါတယ်။

အေ-သွေးပိုင်ရှင်တွေက စောစီးစွာလေဖြတ်နိုင်ချေရှိနေပြီး အို-သွေးပိုင်ရှင်တွေကတော့ သိပ်ပြီးဖြစ်နိုင်ချေမရှိပါဘူး။

ဘီ-သွေးပိုင်ရှင်တွေကတော့ စောစီးစွာဖြစ်နိုင်ချေအပြင် အသက်အရွယ်နောက်ပိုင်းမှလည်း ဖြစ်နိုင်ချေရှိနေပါတယ်။

၂၀၂၀ ခုနှစ်အတွင်း လေဖြတ်ခြင်းကြောင့် သေဆုံးသူ ကမ္ဘာတဝှမ်းမှာ ၃.၅ သန်းနီးပါးရှိခဲ့ကြောင်း အမေရိကန်နှလုံးအဖွဲ့အစည်းက ပြောကြားခဲ့ပါတယ်။

ဒီလိုတွေ့ရှိချက်ကြောင့် သွေးအမျိုးအစားက လေဖြတ်နိုင်ချေနဲ့ဆက်စပ်နေတာကို ပိုပြီးစူးစမ်းစရာဖြစ်လာပါတယ်လို့ 'ဒင်းမာ့ခ်ဂလက်ဝင်း'က မှတ်ချက်ပြုခဲ့ပါတယ်။

Source: The Jerusalem Post
#Yangon_Media_Group