Published - 4 September 2022

နစကဥက္ကဋ္ဌရဲ့ ယခုရုရှားခရီးစဉ်အတွင်း ရုရှားသမ္မတပူတင်နှင့် နစက ဥက္ကဌ ဗိုလ်ချုပ်မှူးကြီး မင်းအောင်လှိုင်တို့ တွေ့ဆုံကြဖို့ရှိတယ်လို့ နစက အဆင့်မြင့် အရာရှိကြီးတစ်ဦးက YMG ရဲ့မေးမြန်းချက်အပေါ် အတည်ပြုပြောဆိုပါတယ်။

"ဒီခရီးစဉ်မှာ ရုရှားနိုင်ငံအစိုးရအဖွဲ့ဝန်ကြီးတော်တော်များများနဲ့တွေ့ဖြစ်ပါမယ်၊ရုရှားသမ္မတနဲ့ တွေ့မယ်။ဘာတွေဆွေးနွေးဖြစ်မယ်ဆိုတာတော့ မသိရသေးပါဘူး"ဟု ယင်းကပြောပါတယ်။

ရုရှားဖက်ဒရေးရှင်းနိုင်ငံ၊ ဗလာဒီဘော့စတော့မြို တွင် စက်တင်ဘာ ၅ ရက်မှ ၈ ရက်အထိ ကျင်းပပြုလုပ်မည့် (၇ ) ကြိမ်မြောက် အရှေ့ဖျားစီးပွားရေးဖိုရမ်- ၂၀၂၂ ( The 7th Eastern Economic Forum 2022) သို တက်ရောက်ရန် နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ဟာ ယနေ့ စက်တင်ဘာ ၄ရက်နေ့မှာ ရုရှားနိုင်ငံ  ဗလာဒီဘော့စတော့မြိုသို ရောက်ရှိကြောင်း ရုရှားမီဒီယာအချို့ရဲ့ သတင်းထုတ်ပြန်ချက်အရသိရပါတယ်။

ဗိုလ်ချုပ်မှုးကြီးမင်းအောင်လှိုင် ရုရှားဖက်ဒရေးရှင်းနိုင်ငံအစိုးရ၊အရှေ့ဖျားစီးပွားရေးဖိုရမ်(EEF)၏ ဖိတ်ကြားချက်အရ ရက်ပိုင်းအတွင်း သွားရောက်မည် ဖြစ်ကြောင်း စက်တင်ဘာလ ၂ ရက် ည ပိုင်းတွင် နစက အနေဖြင့် သတင်းထုတ်ပြန်ထားခဲ့တာဖြစ်ပါတယ်။

အဆိုပါ ခရီးစဉ်အတွင်း ရုရှားဖက်ဒရေးရှင်းနိုင်ငံ ဗလာဒီဘော့စတော့မြို့တွင် စက်တင်ဘာလ ၅ ရက် မှ ၈ ရက်ထိ ပြုလုပ်မည့် ၇ ကြိမ်မြောက် အရှေ့ဖျား စီးပွားရေးဖိုရမ် ကို ပါဝင်တက်ရောက်မည်ဖြစ်ပြီး ရုရှားဖက်ဒရေးရှင်းနိုင်ငံအစိုးရအဖွဲ့တာဝန်ရှိသူများနှင့် တွေ့ဆုံကာ နှစ်နိုင်ငံကြား ချစ်ကြည်ရေးနှင့် စီးပွားရေးပေါင်းစုံတွင် ပူးပေါင်းဆောင်ရွက်သွားမည် ဖြစ်ကြောင်းလည်း အဆိုပါထုတ်ပြန်ချက်တွင် ဖော်ပြထားပါတယ်။

ymg/mt

Yamgon_Media_Group

#SAC_Myanmar

#Russia_Myanmar

#Myanmar_Politics

Published 4 Sept 2022

လမ်းလျှောက်တတ်ခါစ ကလေးငယ်ကလေးတစ်ဦးကို ဆရာဝန်တွေက သေဆုံးသွားပြီလို့ကြေညာခဲ့ပါတယ်။ ဒါပေမယ့် ကလေးငယ်ရဲ့ အသုဘကိုလာကြတဲ့ ကလေးရဲ့ဆွေမျိုးသားချင်းတွေက သူမဟာ အသက်ရှင်နေတယ်လို့ သိလိုက်ကြ ရပါတယ်လို့ သတင်းတွေမှာ ရေးသားကြပါတယ်။

အသက်(၃)နှစ်အရွယ် ကာမီလာရိုဇန်နာမင်တင်နက်ဇ်မင်ဒိုဇာဟာ ရေဓာတ်ခန်းခြောက်သွားတဲ့အတွက် မက္ကဆီကိုနိုင်ငံ ဆန်လူးဝစ်ပိုတိုဆီပြည်နယ်မှာရှိတဲ့ ဆာလီနာ့စ် ဒီဟီဒယ်ဂို အခြေခံကွန်မျူနတီဆေးရုံကို ဩဂုတ် ၁၇ ရက်က ပို့ဆောင်ခဲ့ကြပါတယ်လို့ ဖောက်စ်သတင်းဌာနက သတင်းရေးသားခဲ့ပါတယ်။

ကလေးငယ်ဟာ ဆေးရုံကဆင်းပြီး မကြာမီမှာပဲ နေမကောင်းပြန်ဖြစ်လာခဲ့တဲ့အတွက် မိဘတွေက ဆေးရုံကို ပြန်တင်ခဲ့ကြရ ကြောင်းနှင့် ဆရာဝန်တွေဟာ ဥပေက္ခာပြုကြတယ်လို့ မိသားစုက ပြောပါတယ်။

ဒေသတင်းစာတစ်စောင်ဖြစ်တဲ့ အယ်လ်ယူနီဗာဆယ်ဆန်လူးဝစ်ပိုတိုဆီက တွေ့မြင်ရတဲ့ အမှုအခင်းအကြောင်းအရာအရ ဝန်ထမ်းတွေဟာ ကလေးငယ်ကို အိုင်ဗွီ drip သွင်းဖို့နှင့် အောက်ဆီဂျင်ပေးဖို့ နှေးကွေးခဲ့တယ်လို့ မိသားစုကပြောကြောင်း သိရပါတယ်။

အဲဒီနောက်တော့ ဆရာဝန်တွေက ကလေးငယ် ဆုံးသွားပြီလို့ကြေညာခဲ့ပါတယ်လို့ အယ်ယူနီဗာဆယ်ဆန်လူးဝစ်ပိုဆိုဆီကို ကိုးကားပြီး ဖောက်စ်သတင်းဌာနက သတင်းပေးပို့ပါတယ်။

“ သမီးလေးက ကျွန်မကို ဖက်ထားတုန်းပဲ။ သူတို့က ကျွန်မဆီက ကလေးကိုဆွဲယူပြီး “ သူမကိုငြိမ်းငြိမ်းချမ်းချမ်းနားခွင့်ပေးလိုက်ပါတော့” လို့ ကျွန်မကိုပြောတယ်လို့ မိခင်ဖြစ်သူ ဂျိန်းပါရယ်တာက သတင်းစာကို ပြောပါတယ်။

အဲသလိုနှင့် မင်ဒိုဇာရဲ့ အသုဘအခမ်းအနားကို ဩဂုတ် (၁၈)ရက်မှာ ကျင်းပခဲ့ပါတယ်။ မိခင်ပါရယ်တာဟာ သမီးရဲ့မှန်ခေါင်းမှာ ရေငွေ့တွေရိုက်နေတာကို သတိထားမိလိုက်ပါတယ်။  အဲဒါကြောင့် သူက သူ့သမီးအသက်ရှုနေတုန်းပဲလို့ ပြောလိုက်တဲ့အခါ အသုဘလာပို့ကြတဲ့သူတွေက “ ဝမ်းနည်းပူဆွေးလွန်းလို့ ထင်ယောင်ထင်မှားဖြစ်နေတာဖြစ်မယ်” လို့ သူမကို ပြန်ပြောခဲ့ကြပါတယ်။

မင်ဒိုဇာရဲ့အဖွားဖြစ်သူကလည်း အသက်(၃)နှစ်အရွယ်မြေးကလေးရဲ့ မျက်လုံးတွေ လှုပ်နေတာကို သတိပြုမိပြန်ပါတယ်။  အဲဒီအချိန်မှာ သူမရဲ့ နှလုံးခုန်နှုန်းက တစ်မိနစ်ကို ၉၇ကြိမ်ရှိနေပါတယ်။

အဲဒါကြောင့်ကလေးငယ်ကို ချက်ခြင်းပဲ အရေးပေါ်လူနာတင်ယာဉ်နှင့် ဆေးရုံကိုပို့ဆောင်ကြပါတယ်။အဲဒီအချိန်မှာ ကလေးငယ်ရဲ့ နှလုံးခုန်နှုန်းက ချက်ခြင်းကြီး ကျဆင်းလာပြီး နောက်ဆုံးမှာ သူမကို “သေဆုံးသွားပြီ” လို့ ဒုတိယအကြိမ် ကြေညာပါတယ်။

ပထမဆုံးအကြိမ်သေဆုံးကြောင်းကြေညာတုန်းက ရေဓာတ်ခန်းခြောက်လို့ဆိုပြီးအကြောင်းပြခဲ့ပါတယ်။ ဒုတိယအကြိမ်မှာတော့ ဦးနှောက်ရောင်တာကြောင့်သေဆုံးတာလို့ အကြောင်းပြပါတယ်လို့ ဖောက်စ်သတင်းဌာနက သတင်းပေးပို့ပါတယ်။

သူမအနေနှင့်လည်း ဆရာဝန်တွေနှင့် သူနာပြုတွေအပေါ် အာဃာတမရှိပေမယ့် နောင်ဒီလိုမျိုးအဖြစ်မျိုးမကြုံတွေ့ကြရအောင် တရားစွဲရတာဖြစ်တယ်လို့ ဖောက်စ်သတင်းဌာနကသိရပါတယ်။

 Source: Insider

#Mendoza

#Peralta

#Mexico

Published 4 Sept 2022

1MDB နှင့်ဆက်စပ်တဲ့ အဂတိလိုက်စားမှုကြောင့် ထောင်ကျခံနေရတဲ့ မလေးရှားဝန်ကြီးချုပ်ဟောင်း နာဂျစ်ရာဇက်ဟာ  ဒီကနေ့  ဆေးရုံတင်လိုက်ရတယ်လို့ သူ့ရဲ့ အထူးအရာရှိက စက်တင်ဘာ ၄ ရက်က ပြောပါတယ်။

“ သူဟာလက်ရှိ ကွာလာလမ်ပူဆေးရုံမှာ တက်ရောက်ကုသခံနေပါတယ်။ ပူးပေါင်းကူညီပြီး လိုအပ်တာဆောင်ရွက်ပေးကြတဲ့ အကျဉ်းထောင် အာဏာပိုင်တွေနှင့် ကွာလာလမ်ပူဆေးရုံဝန်ထမ်းတွေကိုကျေးဇူးတင်ပါတယ်” လို့  မူဟာမက် မူခလစ် မက်ရီဘီက ပြောပါတယ်။

ဒါပေမယ့် ဆေးရုံတက်ကုသရတဲ့အထိဖြစ်လာရတဲ့ နာဂျစ်ရဲ့ နာမကျန်းမှုအသေးစိတ်ကိုတော့ သူက ပြောမသွားပါဘူး။

နာဂျစ်အခြေအနေဟာတည်ငြိမ်နေပြီး ဆေးကုသဖို့လိုအပ်နေတယ် လို့ အကျဉ်းထောင်အရာရှိတစ်ဦးကပြောတယ်လို့ အက်စထရို အန်ဝါနီ သတင်းဌာနက ပြောပါတယ်။

 အကျဉ်းထောင်အတွင်း မသိရသေးတဲ့ အဖြစ်တစ်ခုအပြီးမှာ ဝန်ကြီးချုပ်ဟာ ကျန်းမာရေးစစ်ဆေးခံရတာဖြစ်တယ်လို့ ယုံကြည်ရတယ်လို့ အရင်းအမြစ်တစ်ခုကပြောပါတယ်။

“ ကျန်းမာရေးစစ်ဆေးမှုတွေပြီးရင်တော့ သိရမှာပါ ။ အချိန်တော့ နည်းနည်းကြာမယ်” လို့ အဆိုပါ အရင်းအမြစ်ကပြောပါတယ်။

အခြားသတင်းပေါ်တယ်တစ်ခုကတော့ ဝန်ကြီးချုပ်ဟောင်းဟာ ကိုယ်တွင်းသွေးယိုစိမ့်မှုတစ်ခုကြောင့် ကွာလာလမ်ပူ ဆေးရုံတင်လိုက်ရတာလို့ ရေးသားပါတယ်။

Source: Straits Times

#Najib Razak

#Najib_Razak_hospitalized

#Hospital_Kuala_Lumpur

Published 4 Sept 2022

လေကြောင်းလိုင်းတွေနှင့် လေယာဉ်အမှုထမ်းတွေ ခရီးသည်တွေကို လေယာဉ်ပေါ်တက်ဖို့ ထပ်ထပ်ခေါ်နေရတာတွေဟာ ဒီနှစ်နွေရာသီမှာတော့ သိပ်များများစားစားမရှိပေမယ့် ဒီတစ်ပတ်ထဲမှာတော့  မိသားစုတစ်စုအတွက် လေယာဉ်မှူးတစ်ဦးက တကယ့်ကို မှန်ကန်တဲ့ အလုပ်ကို လုပ်ဆောင်ပေးခဲ့ပါတယ်။

ခရီးသည်တင်ဂျက်လေယာဉ်ကြီးဟာ ပြေးလမ်းမပေါ်မှာ ပျံတက်မယ့်ဆဲဆဲမှာ   လေယာဉ်မှူးဟာ လေယာဉ်ကို ပြန်လှည့်ပြီး ဂိတ်ဆီသို့ ပြန်မောင်းလာခဲ့ပါတယ်။ အကြောင်းကတော့ သမီးငယ်ဖြစ်သူ လေယာဉ်ပေါ်တက်ခါနီးမှ ပတ်စ်ပို့ ပျောက်သွားလို့ အဖေရောသမီးပါ ဒီလေယာဉ်နှင့် လိုက်လို့မရဖြစ်ခဲ့တဲ့ အဲဒီအဖေနှင့်သမီးကို ခေါ်တင်ဖို့ဖြစ်ပါတယ်တဲ့။

အင်္ဂလန်နိုင်ငံ နော်တင်းဟမ်အနီးက လီကက်စတွန်က အသက် ၃၈နှစ်အရွယ်ရှိ အင်ဒရူးယန်အင်စလေနှင့် သူ့ရဲ့ ခုနှစ်အရွယ်သမီး ကလေးဟာ ကာနာရီကျွန်း တင်နာရိုင်းဖ်ကနေ အရှေ့မစ်ဒ်လန်းလေဆိပ်ကို ပျံသန်းမယ့် Tui လေယာဉ်ခရီးစဉ်နှင့် လိုက်ပါဖို့ တားမြစ်ခံခဲ့ရပါတယ်။ ဘာဖြစ်လို့လဲဆိုတော့ သမီးငယ်ရဲ့ပတ်စ်ပို့ကို ရှာမတွေ့လို့ဖြစ်ပါတယ်လို့ မိသားစုက အိုင်တီဗွီသတင်းဌာနကိုပြောပါတယ်။

အဲဒါကြောင့် အင်စလေရဲ့ ဇနီးနှင့် အခြားကလေးသုံးယောက်နှင့် မိဘတွေက လေယာဉ်နှင့်ပါသွားပြီး အဖေနှင့်သမီးက လေဆိပ်မှာကျန်ရစ်ခဲ့တာဖြစ်ပါတယ်။

အဲဒီနောက် ပတ်စ်ပို့ကို  အကောက်ခွန်မဲ့ဈေးဝယ်အိတ်ထဲမှာ ပြန်ရှာတွေ့တဲ့အချိန် လေယာဉ်က ဂိတ်ကနေ ထွက်ခွာသွားခဲ့ပါပြီလို့ အိုင်တီဗွီက ပြောပါတယ်။

လေယာဉ်ပေါ်က လေယာဉ်မောင်မယ်တွေပြောတာကတော့ သူတို့နှစ်ဦးဟာ မန်ချက်စတာကိုထွက်ခွာမယ့် နောက်လေယာဉ် တစ်စီးနှင့် လိုက်လို့ရအောင်ကြိုးစားခဲ့ကြပါတယ်။  ဒါပေမယ့် လေယာဉ်မှူးကို အကူအညီတောင်းတဲ့အခါ လေယာဉ်မှူးက သူတို့နှစ်ယောက်ကို ဂိတ်မှာ ပြန်ခေါ်ပေးဖို့ သဘောတူခဲ့တာဖြစ်တယ်လို့ အင်ဒရီယန်ရဲ့ မိခင်ဖြစ်တဲ့ အသက်၆၀ အရွယ်ရှာရွန်က အိုင်တီဗွီသတင်းဌာနကိုပြောပါတယ်။

“ အဲဒီအချိန်မှာ လေယာဉ်က ပြေးလမ်းမပေါ်ရောက်နေပြီး ပျံတက်ဖို့အဆင်သင့်ဖြစ်နေပြီ” လို့ ရှာရွန်ကပြောပါတယ်။ ကျွန်မ ကြက်သေသေမိသွားတယ်။ ဘာဖြစ်လို့လဲဆိုတော့ ကျွန်မလေယာဉ်တွေစီးလာတာ ကြာလှပြီ။ ဒီလို ကျန်ခဲ့တဲ့ ခရီးသည်ကို ပြန်လှည့်ခေါ်တာမျိုး မကြုံဖူးလို့လေ” လို့လည်း သူမကပြောပါတယ်။

အစပိုင်းက မဖြစ်နိုင်ဘူးလို့ပြောထားတဲ့ သားဖြစ်သူရဲ့ ခရီးဆောင်အိတ်ကိုတောင် လေကြောင်းလိုင်းက လေယာဉ်ပေါ် တင်ပေးလိုက်သေးတယ်လို့ သူမကဆက်ပြောပါတယ်။

ကမ္ဘာအနှံ့မှာ နွေရာသီ ခရီးသွားတော်တော်များများ စိတ်ဒုက္ခတွေရောက်နေကြရချိန်မှာ ဒီအဖြစ်အပျက်ကလေးက အပြုသဘော ဆောင်တဲ့ဇာတ်လမ်းကလေးတစ်ပုဒ်ဖြစ်ပါတယ်။ ဝန်ထမ်းမလုံလောက်မှုနှင့် ကပ်ဘေးကြောင့် ပိုမိုဆိုးရွားမှုတွေ ဖြစ်နေရတာကြောင့် လေကြောင်းလိုင်းတွေနှင့် လေဆိပ်တွေဟာ ခရီးသွားလုပ်ငန်းတွေပြန်ဖြစ်လာတဲ့အပေါ် အတော် ရုန်းကန် နေကြရတာဖြစ်ပါတယ်။ အဲဒီပြဿနာတွေကြောင့် လေယာဉ်ခရီးစဉ်တွေဖျက်သိမ်းရတာတို့၊နာရီနှင့်ချီနောက်ကျရတာတို့၊ ခရီးဆောင်အိတ်တွေပျောက်ဆုံးရတာတို့တွေဖြစ်နေကြရတာပါ။

အဲဒီနေ့က ဩဂုတ် ၂၆ရက်ဖြစ်ပြီး ယူကေရဲ့ ရက်သတ္တပတ်ရုံးပိတ်ရက်ဖြစ်ပါတယ်။ သူတို့စီးတဲ့လေယာဉ်က ထွက်ခွာချိန်ကိုက နောက်ကျနေခဲ့တာပါ။ လေဆိပ်ဟာ ဗြိတိန်ကိုပျံသန်းမယ့် လေယာဉ်သုံးစီးအတွက် အလုပ်များနေတယ်လို့လည်း သူမက ပြောပါတယ်။

Tuiလေကြောင်းက Business Insider ရဲ့ မေးမြန်းမှုကို ပြန်လည်ဖြေကြားခြင်းမရှိသေးပါဘူး။

ရှာရွန်က သူမဟာ လေကြောင်းလိုင်းကို ကျေးဇူးတင်ကြောင်းပြောဖို့ကြိုးစားပေမယ့် အဆင်မပြေတာတိုင်တန်းလို့ရတဲ့ ဝက်ဘ်ဆိုက်ပဲတွေ့တယ်လို့ ဆက်ပြောပါတယ်။

Source: Insider

#Tui_Airlines

#Tenerife

#Air_Travel

Published 4 Sept 2022

သမ္မတဟောင်း ဒေါ်နယ်ထရမ့်က သူ့နေရာဆက်ခံထားတဲ့ ဂျိုးဘိုင်ဒင်ကို “ နိုင်ငံတော်ရဲ့ရန်သူ” လို့ တံဆိပ်တပ်လိုက်ပါတယ်။ စက်တင်ဘာ ၃ရက်က ပဲင်စီလ်ဗေးနီးယား မှာ ကျင်းပတဲ့ စုရုံးပွဲတစ်ခုမှာ သူက အဲသလိုပြောကြားခဲ့တာဖြစ်ပါတယ်။  သူက ပြီးခဲ့တဲ့လက သူ့ရဲ့ဖလော်ရီဒါအိမ်ကို အက်ဖ်ဘီအိုင်က စီးနင်းတဲ့ကိစ္စကိုလည်း ပြစ်တင်ဝေဖန်လိုက်ပါတယ်။

“ ခင်ဗျားတို့ အမှန်တရားကို သိချင်ကြသလား။ နိုင်ငံတော်ရဲ့ ရန်သူက သူနှင့်  သူ့ကိုထိန်းချုပ်နေတဲ့ အုပ်စုပဲ” လို့ သူက ပြောလိုက်တဲ့အခါ သူ့ထောက်ခံသူတွေက ဩဘာပေးကြပါတယ်။

Source AFP

#Donald_Trump

#Joe_Biden

#Enemy _of_the_state

#LocalNews
Published - 4 September 2022

နေပြည်တော် ရေပန်းဥယျာဉ်ကို ခေတ်မီဥယျာဉ်ကြီးအဖြစ် အဆင့်မြှင့်တင်နေပြီဖြစ်ကြောင်း နေပြည်တော်စည်ပင်သာယာရေးကော်မတီက သိရသည်။

ယင်းအဆင့်မြှင့်တင်ခြင်းလုပ်ငန်းများကို ယခုလမှစတင်၍ ၃ နှစ်အတွင်း အပြီးဆောင်ရွက်မည် ဖြစ်ကြောင်း ၊ ရိုလာကိုစတာ(Roller Coaster)၊ Zip Line ၊ ရေလွှာလျှောစီး(အကြီး)၊ ရေလှိုင်းတု၊ မဟာရဟတ်၊ Mono Train စသည့် ကစားနည်းများ အပါအဝင် ကစားနည်းပေါင်း ၄၈ မျိုးပါဝင်မည်ဖြစ်ကြောင်းသိရသည်။

အဆိုပါလုပ်ငန်းများ အကောင်အထည်ဖော်ရန် နေပြည်တော်စည်ပင်သာယာရေးကော်မတီနှင့် တင်ဒါအောင်မြင်သည့် ဆန်းမြတ်ထွန်းကုမ္ပဏီတို့ နေပြည်တော် စည်ပင်သာယာရေးကော်မတီ အစည်းအဝေးခန်းမတွင်နေပြည်တော်ရေပန်းဥယျာဉ် နှစ်ရှည်ငှားရမ်းခြင်းဆိုင်ရာ သဘောတူစာချုပ်ချုပ်ဆိုခဲ့ကြခြင်း ဖြစ်ကြောင်း၊ ရေပန်းဥယျာဉ်တွင် နဂိုရှိသည့် ကန် (၃) ဆင့် ရေကန်၊ ရေတံခွန်၊ ရေပန်းရုပ်ရှင်(Water Movie)နှင့် ရေပန်းအက(Water Dancing)တို့ကိုလည်း အဆင့်မြှင့်တင် ဆောင်ရွက်သွားရန် ပါဝင်ကြောင်း သိရသည်။

ရေပန်းဥယျာဉ်ဝင်ကြေးကို သင့်တော်သောနှုန်းထားသာ ကောက်ခံရန်၊ဒေသတိုင်းရင်းသားရိုးရာ စားသောက်ဆိုင်များ၊ အထည်ဆိုင်များ၊ သန့်ရှင်းသပ်ရပ်သည့် ခေတ်မီစားသောက်ဆိုင်များ၊ နည်းပညာ ဆန်းသစ်သော ကစားကွင်းများနှင့် ပြပွဲများထည့်သွင်းဆောင်ရွက်ရန်နှင့် တစ်နှစ်ထက်တစ်နှစ် မတူညီသည့် ဆန်းသစ်မှုများ၊ အဆင့်မြှင့်တင်မှုလုပ်ငန်းများကို စဉ်ဆက်မပြတ် အလေးထားဆောင်ရွက်ရန် လည်း ဆန်းမြတ်ထွန်းကုမ္ပဏီကို ညွှန်ကြားထားကြောင်း သိရသည်။

ymg/mt
#Yangon_Media_Group

#LocalNews
Published - 4 September 2022

ခလေးငယ်များပါသည့် တရားမဝင်မြန်မာလုပ်သား ၁၃ ဦး ကို ထိုင်းနိုင်ငံရနောင်းခရိုင်စု(က်)စမ်ရမ်မြို့၊ နာခါကျေးရွာတွင် စက်တင်ဘာလ ၃ ရက် ညပိုင်းက ဖမ်းဆီးမိကြောင်း ရနောင်းခရိုင်အခြေစိုက် အမှတ်-၂၅ ခြေမြန်တပ်ရင်းအထူးတပ်ဖွဲ့၏ သတင်းထုတ်ပြန်ချက်ကို ကိုးကား၍ ရွှေ့ပြောင်းမြန်မာလုပ်သားများအရေးဆောင်ရွက်နေသူများက ပြောသည်။

ယင်းတို့မှာ မြန်မာနိုင်ငံ ကော့သောင်းမြို့ကတစ်ဆင့် ပဲ့ချိတ်လှေစီးကာ ထိုင်းနိုင်ငံ၊ ဆူရတ်ထာနီခရိုင်အတွင်း အလုပ်လုပ်ရန် ဝင်ရောက်လာသူများ ဖြစ်ကြောင်း ၊ ပွဲစားခအဖြစ် တစ်ဦးလျှင် ဘတ်တစ်သောင်းခွဲမှ ဘတ်နှစ်သောင်းအထိ ပေးခဲ့ရကြောင်း ဖမ်းဆီးခံရသူ ၁၃ ဦးနှင့်အတူ ကလေးငယ် ၄ ဦးလည်း ပါဝင်ကြောင်း သိရသည်။

ယခုအခါ အဖမ်းခံရသူများအား စု(က်)စမ်ရမ်ရဲစခန်းတွင် ထိန်းသိမ်းထားပြီး ထိုင်းနိုင်ငံ ဥပဒေအရ အရေးယူရန်လုပ်ဆောင်နေကြောင်းလည်း သိရသည်။

ymg/mt
#Yangon_Media_Group

#World_Health
Published 4 September 2022

ကမ္ဘာ့ပေါ်မှာ ကာကွယ်ရေးထုတ်လုပ်ရေးအကြီးဆုံး ကုမ္ပဏီဖြစ်တဲ့ အိန္ဒိယဆီရမ်အင်စတီကျုက အိန္ဒိယနိုင်ငံရဲ့ ပထမဆုံးသားအိမ်ခေါင်းကင်ဆာကာကွယ်ဆေးကို ထုတ်လုပ်လိုက်ပြီး မကြာခင် ဈေးကွက်ထဲမှာရောင်းချတော့မှာဖြစ်ကြောင်း ကုမ္ပဏီဘက်ကရော အစိုးရဘက်ကပါ ကြာသပတေးနေ့က ထုတ်ပြန်ကြေညာလိုက်ပါတယ်။

ကမ္ဘာပေါ်က အမျိုးသမီးတွေကြား သားအိမ်ခေါင်းကင်ဆာက စတုတ္ထအဖြစ်အများဆုံးကင်ဆာဖြစ်ပြီး ၂၀၂၀ ခုနှစ်အတွင်း ဖြစ်ပွားသူ ၆၀၄,၀၀၀ ဦးရှိခဲ့ကာ သေဆုံးသူ ၃၄၂,၀၀၀ ဦးရှိခဲ့ပါတယ်။

ထိုသို့ဖြစ်ပွားမှုတွေရဲ့ ၉၀ ရာခိုင်နှုန်းလောက်က အလယ်အလတ်နိုင်ငံတွေနဲ့ ဆင်းရဲနွမ်းပါးတဲ့နိုင်ငံတွေမှာ ဖြစ်ပွားခဲ့တာပါ။

သားအိမ်ခေါင်းကင်ဆာဖြစ်ပွားခြင်းရဲ့ အနည်းဆုံး ၇၀ ရာခိုင်နှုန်းလောက်က HPV ဗိုင်းရပ်စ် ၁၆ နဲ့ ၁၈ ဖြစ်ပြီး အိန္ဒိယကုမ္ပဏီအနေနဲ့ HPV ဗိုင်းရပ်စ် ၁၆, ၁၈, ၆, ၁၁ တိုဖြင့် လုပ်ဆောင်နေကြောင်း အိန္ဒိယဇီဝနည်းပညာဌာနက ဆိုပါတယ်။

Merck နဲ့ GSK ကုမ္ပဏီတို့က HPV ကာကွယ်ဆေး အဓိကထုတ်လုပ်နေတဲ့ ကုမ္ပဏီတွေဖြစ်ပါတယ်။

"အခုထုတ်လုပ်လိုက်တဲ့ကာကွယ်ဆေးဖြင့် အိန္ဒိယရှိ သားအိမ်ခေါင်းကင်ဆာကြောင့် အမျိုးသမီးတွေသေဆုံးနေရခြင်းကို လျှော့ချပေးနိုင်မှာဖြစ်ပါတယ်" လို့ ဆီရမ်အင်စတီကျုမှ အမှုဆောင်ချုပ်'အက်ဒါပူနာဝယ်လာ'က ထုတ်ပြန်လိုက်ပါတယ်။

နောက်လအနည်းငယ်အတွင်း အရင်ဆုံး အိန္ဒိယဈေးကွက်မှာ ကာကွယ်ဆေးဖြန့်ဖြူးမှာဖြစ်ပြီး တစ်ကမ္ဘာလုံးကို ဆက်လက်ဖြန့်ချသွားမယ်လို့ သတင်းထောက်များကို ပြောပြခဲ့ပါတယ်။

ကာကွယ်ဆေးက ၂.၅၁ ဒေါ်လာမှ ၅.၀၃ ဒေါ်လာကြား ကျသင့်မှာဖြစ်ပြီး ၂ နှစ်အတွင်း ကုမ္ပဏီကနေ ဆေးပေါင်း ၂ သန်းထုတ်လုပ်ဖို့ ရည်မှန်းထားပါတယ်။

အသက် ၉ နှစ်မှ ၁၄ နှစ်ကြားအမျိုးသမီးငယ်များအတွက် ဆေး ၂ ကြိမ်၊ အသက် ၁၅ နှစ်မှ ၂၆ နှစ်ကြားအတွက် ဆေး ၃ ကြိမ်ကို သွေးကြောထဲထိုးသွင်းရမှာဖြစ်ပါတယ်။

Source: Reuters
#Yangon_Media_Group

#LocalNews
Published - 4 Sep 2022

ဖျာပုံမြို့နယ်တွင် ပစ်သတ်ခံရသောအမျိုးသမီး ၂ ဦးဖြစ်စဉ်မှ ဆက်စပ်သူ ၁၉ ဦးကို ဖမ်းဆီးမိကြောင်း နစက အနေဖြင့် စက်တင်ဘာလ ၃ ရက်တွင် ထုတ်ပြန်လိုက်သည်။

ဩဂုတ်လ ၂၃ ရက်က ဖျာပုံမြို့နယ်၊ ချောင်းတွင်းကျေးရွာအနီးရှိ KM စားသောက်ဆိုင်အတွင်း အမျိုးသမီး ၂ ဦးအား ပစ္စတိုဖြင့်ပစ်သတ်၍ ရွှေထည်ပစ္စည်းအချို့ကို လုယက်ယူဆောင်သွားသည့် ဖြစ်စဉ်၏ ဆက်စပ်သူများ ဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

ယင်းတွင် အမျိုးသား ၁၈ ဦး ၊ အမျိုးသမီး ၁ ဦး ၊ စုစုပေါင်း ၁၉ ဦးကို ပစ္စတို ၄ လက်၊ ကျည်မျိုးစုံ ၁၉၈ တောင့်၊ ကျည်အိမ် ၂ ခု၊ လက်ပစ်ဗုံး ၁ လုံး၊ လက်လုပ်မိုင်း ၂ လုံးနှင့် ဖောက်ခွဲရေး ဆက်စပ်ပစ္စည်းများ၊ သတ်ဖြတ်ခံခဲ့ရသည့် အမျိုးသမီး ၂ ဦး၏ အမည်ပါ ကျောင်းသားကတ် ၁ ခု၊ နိုင်ငံသားစိစစ်ရေးကတ် ၁ ခု၊ ဆွဲကြိုး ၁ ကုံး၊ ဟန်းချိန်း ၁ ခု၊ လက်ပတ်နာရီ ၁ လုံးတို့နှင့်အတူ ဖမ်းဆီးရမိခဲ့ခြင်းဖြစ်ကြောင်း သိရသည်။

ဩဂုတ်လ ၂၉ ရက် နံနက်ပိုင်းကအထက်ပါဖြစ်စဉ်၌ ပါဝင်ကျူးလွန်ခဲ့သူများဖြစ်သည့် ကောင်းစည်သူ အား ဖျာပုံမြို့၊ အမှတ်(၁)ရပ်ကွက်၊ သီတာလမ်းရှိ ၎င်း၏နေအိမ်တွင်လည်းကောင်း၊ အောင်မိုးမြင့်(ခ) အေးမင်းသူ (ခ) အေးမင်း အား ဖျာပုံမြို့၊ အမှတ်(၁၆)ရပ်ကွက်၊ ပဒုမ္မာ(၅)လမ်းရှိ ၎င်း၏နေအိမ်တွင်လည်းကောင်း၊ သိမ့်တြာလှိုင် အား ဖျာပုံမြို့၊ အမှတ်(၉) ရပ်ကွက်၊ မဟာဗန္ဓုလလမ်းရှိ ၎င်း၏နေအိမ်တွင်လည်းကောင်း အသီးသီးဖမ်းဆီးရမိခဲ့ကြောင်း၊ ဩဂုတ်လ ၃၁ ရက် နံနက်ပိုင်းတွင် တီးတီး(ခ)ကိုကိုအောင်အား တွံတေးမြို့နယ်၊ ဘုရားငုတ်တို စစ်ဆေးရေးဂိတ်၌ ဖမ်းဆီးရမိခဲ့ပြီး ၎င်း၏ထွက်ဆိုချက်အရ စံလင်းစံ အား ရန်ကုန်တိုင်းဒေသကြီး၊ အလုံမြို့နယ်၊ ဆင်မင်းဈေးမှတ်တိုင်အနီး၌ ဖမ်းဆီးရမိခဲ့ကြောင်း သိရသည်။

တီးတီး(ခ)ကိုကိုအောင်၏ ထွက်ဆိုချက်အရ စက်တင်ဘာလ ၁ ရက် နံနက်ပိုင်းတွင် ဟိန်းသူလွင်(ခ) သာကဒိုး အား ဖျာပုံမြို့၊ အမှတ်(၁)ရပ်ကွက်၊ ဓနိတော(၈)လမ်းရှိ ၎င်း၏နေအိမ်တွင်လည်းကောင်း၊ ဇော်မင်းသူ(ခ) မက်စီ(ခ)မျောက်ကြီး အား ဖျာပုံမြို့၊ အမှတ်(၁၅)ရပ်ကွက်၊ အောင်သုခ(၂)လမ်းရှိ ၎င်း၏နေအိမ်တွင်လည်းကောင်း၊ ကျော်သူရအား ဖျာပုံမြို့၊ အမှတ်(၁)ရပ်ကွက်၊ ဓနိတောလမ်းရှိ ၎င်း၏နေအိမ်တွင်လည်းကောင်း၊ ကျော်ဇောဦးအား ဖျာပုံမြို့နယ်၊ ကျုံကူကျေးရွာ၌ SIGSAUER ပစ္စတို ၁ လက်၊ Glock ပစ္စတို ၂ လက်၊ ၉ မမကျည် ၁၅၀ တောင့်၊ ပစ္စတိုကျည်အိမ် ၂ ခု၊ ဖောက်ခွဲရေး ဆက်စပ်ပစ္စည်းများ၊ အကြမ်းဖက်သတ်ဖြတ်ခံခဲ့ရသည့် အမျိုးသမီး ၂ ဦး၏ အမည်ပါ ကျောင်းသားကတ် ၁ ခု၊ နိုင်ငံသားစိစစ်ရေးကတ် ၁ ခု၊ ဆွဲကြိုး ၁ ကုံး၊ ဟန်းချိန်း ၁ ခု၊ လက်ပတ်နာရီ ၁ လုံးတိုနှင့်အတူ ဖမ်းဆီးရမိခဲ့ခြင်း ဖြစ်ကြောင်း သိရသည်။

ဖမ်းဆီးရမိတရားခံ စံလင်းစံ၏ ထွက်ဆိုချက်အရ စက်တင်ဘာလ ၁ ရက် နေ့လယ်ပိုင်းတွင် ရန်ကုန်တိုင်းဒေသကြီး၊ မှော်ဘီမြို့နယ်၊ အမှတ်(၁)ရပ်ကွက်၊ ရန်ကုန်-ပြည်လမ်း၊ အေးချမ်းကား မှတ်တိုင်အနီး၌ အကြမ်းဖက်မှုများအား ကျူးလွန်ပြီး လာရောက်တိမ်းရှောင်နေသော BDFP အမည်ခံ အကြမ်းဖက်အဖွဲ့ဝင် ဝင်းမြတ်သိန်းဇော် အားလည်းကောင်း၊ အလုံမြို့နယ်၊ ဆင်မင်းရပ်ကွက်၊ ဆင်မင်းလမ်းနှင့် ငုဝါလမ်းထောင့်ရှိ တိုက်အမှတ်(၁၀၇)၊ (၇)လွှာ၌ အကြမ်းဖက်မှုများအားကျူးလွန်ပြီး လာရောက်တိမ်းရှောင်နေသော မအူပင် PDF အမည်ခံ အကြမ်းဖက်အဖွဲ့ဝင်များဖြစ်သော စိုင်းနောင် (ခ)လက်ယာ၊ မျိုးမင်းဦး၊ ဝေဖြိုးအောင်၊ သူရဦး၊ ငြိမ်းချမ်း တို့အား SIGSAUER ပစ္စတို ၁ လက်၊ ၉ မမ ကျည် ၄၈ တောင့်၊ လက်ပစ်ဗုံး ၁ လုံး၊ လက်လုပ်မိုင်း ၂ လုံးတို့နှင့်အတူ ဖမ်းဆီးရမိခဲ့သည်။

စံလင်းစံ ၏ထွက်ဆိုချက်အရ ယင်းနေ့ ညနေပိုင်းတွင် မှော်ဘီမြို့နယ်၊ ချော်ကုန်းကျေးရွာ၊ ပန်းတစ်ပွင့်တောင်လမ်း၊ မြစည်းခုံကျောင်းတိုက်ရှေ့၌ ကျော်ဆန်းဦးနှင့် သူရဖြိုး(ခ)ဝတုတ်တို့အား ဖမ်းဆီးရမိခဲ့ပြီး ထိုသို့ဖမ်းဆီးစဉ် သူရဖြိုး(ခ)ဝတုတ်သည် အဖမ်းမခံဘဲ လုံခြုံရေးတပ်ဖွဲ့ဝင်များ၏ လက်နက်အားလုယူ၍ ထွက်ပြေးရန်ကြိုးစားခဲ့သဖြင့် ခြောက်လှန့်ပစ်ခတ်ဖမ်းဆီးခဲ့ရာ ယာပေါင်ဖောက်ဝင် ဒဏ်ရာဖြင့် ထပ်မံဖမ်းဆီးရမိခဲ့ကြောင်း၊ဇော်မင်းသူ(ခ)မက်စီ(ခ)မျောက်ကြီး၏ ထွက်ဆိုချက်အရ စက်တင်ဘာလ ၁ ရက် နေ့လယ်ပိုင်းတွင် ရဲဇော်ထက်(ခ) မောင်မောင် အား ဖျာပုံမြို့၊ အမှတ်(၁၆)ရပ်ကွက်၊ ပဒုမ္မာ(၄)လမ်းရှိ ၎င်း၏နေအိမ်တွင် ဖမ်းဆီးရမိခဲ့ကြောင်း ၊ ဝင်းမြတ်သိန်းဇော်၏ ထွက်ဆိုချက်အရ စက်တင်ဘာလ ၁ ရက် နေ့လယ် ပိုင်းတွင် မှော်ဘီမြို့နယ်၊ နှင်းဆီမြိုင်ရပ်ကွက်၌ ထွန်းထွန်းဦး (ခ)စနေ အား ထပ်မံဖမ်းဆီးရမိခဲ့ကြောင်း သိရသည်။

ဖမ်းခံရသူတို့၏ထွက်ဆိုချက်အရ ၂၀၂၁ ခုနှစ်၊ ဇွန်လ ၁၉ ရက်တွင် ဖျာပုံမြို့ရှိ အခွန်ဦးစီးရုံးနှင့် အမှတ်(၄) ရပ်ကွက်ရှိ ရစဖမှူး ၁ ဦး၏ နေအိမ်တို့ကိုလက်လုပ်မိုင်းဖြင့် လည်းကောင်း၊ အောက်တိုဘာလ ၁၇ ရက်တွင် ဖျာပုံမြို့၊ အမှတ်(၁၆)ရပ်ကွက်ရှိ Mytel တာဝါတိုင်စက်ခန်းကို လက်လုပ်မိုင်း ၂ လုံးဖြင့် လည်းကောင်း၊နိုဝင်ဘာလ ၂၂ ရက်တွင် ဖျာပုံမြို့တွင်းရှိ ယာဉ်ထိန်းရဲကင်းရုံနှင့် အမှတ်(၄)ရပ်ကွက်ရှိ မြို့နယ်စီမံအုပ်ချုပ်ရေးရုံးရှေ့တို့ကို လက်လုပ်မိုင်းဖြင့် လည်းကောာင်း၊၂၀၂၂ ခုနှစ်၊ ဇန်နဝါရီလ ၁၁ ရက်တွင် ဖျာပုံမြို့၊ အမှတ်(၁၆)ရပ်ကွက်ရှိ ရပ်ကွက်စီမံအုပ်ချုပ်ရေးရုံးကို လက်လုပ်မိုင်းဖြင့် လည်းကောင်း ဖောက်ခွဲခဲ့ကြောင်း သိရသည်။

ယင်းအပြင် ၂၀၂၁ ခုနှစ်၊ နိုဝင်ဘာလ ၄ ရက်က ဖျာပုံမြို့၊ အမှတ်(၁၅)ရပ်ကွက်၊ (၈)လမ်းမှ အရပ်သားမျိုးသား ၁ ဦး ၊ အောက်တိုဘာလ ၂၆ ရက်က မအူပင်မြို့၊ အမှတ်(၁၀)ရပ်ကွက်၊ အောင်မြေ သာစည်လမ်းနေ အရပ်သားတစ်ဦး ၂၀၂၂ ခုနှစ်၊ ဖေဖော်ဝါရီလ ၁ ရက်တွင် မအူပင်မြို့နယ်၊ မလက်တိုရဲစခန်းမှ ရဲတပ်ဖွဲ့ဝင် ၁ ဦး၊ဧပြီလ ၂၄ ရက်တွင် ဖျာပုံခရိုင်၊ ဘိုကလေးမြို့နယ်၊ ကျုံကျိုက်ကျေးရွာရှိ ရစဖမှူးတို့ ဇနီးမောင်နှံ၊မေလ ၂၉ ရက်တွင် မအူပင်မြို့နယ်၊ ခွာလေးကျွန်းကျေးရွာနေ အမျိုးသား ၁ ဦး ၊ ဩဂုတ်လ ၂၃ ရက်တွင် ဖျာပုံမြို့နယ်၊ ချောင်းတွင်းကျေးရွာအနီး၊ KM စားသောက်ဆိုင်တွင် အမျိုးသမီး ၂ ဦး တို့ကို သေနတ်ဖြင့် ပစ်ခတ်ခဲ့ခြင်းဖြစ်ကြောင်း သိရသည်။

ymg/mt
#Yangon_Media_Group

#World_Health
Published 4 September 2022

အူမကြီးကင်ဆာက ကင်ဆာတွေထဲမှာ ဒုတိယအသေအပျောက်အများဆုံးဖြစ်ပေမယ့် ရောဂါဖြစ်နိုင်ချေကို လျှော့ချနိုင်ပါတယ်။

အိမ်တွေမှာ ဝယ်ယူသိမ်းဆည်းထားကြလေ့ရှိတဲ့ ကုန်ခြောက်မုန့်ခြောက်တွေက အဓိကဖြစ်ကြောင်း လေ့လာတွေ့ရှိထားပါတယ်။

ဘီစကစ်တွေ၊ မုန့်တွေ၊ အသင့်စားခေါက်ဆွဲခြောက်ထုပ်တွေ စတဲ့ အဆင့်ဆင့်ထုတ်လုပ်ထုပ်ပိုးထားတဲ့ စားစရာတွေကို စားသုံးလေ့ရှိသူတွေက အူမကြီးကင်ဆာဖြစ်နိုင်ချေပိုများတာကို တွေ့ရှိရပါတယ်။

အသင့်စားအသားတွေ၊ သကြားဓာတ်ပါတဲ့ အချိုရည်တွေ၊ ဝက်အူချောင်းတွေနဲ့ အခြားသောအသားတွေကို ထိုစာရင်းထဲ သတ်မှတ်နိုင်ပါတယ်။

အမေရိကန်မှ အမျိုးသား ၄၆,၀၀၀ နဲ့ အမျိုးသမီး ၁၆၀,၀၀၀ နီးပါးကို ရေရှည်လေ့လာမှုများ ပြုလုပ်ခဲ့ကြပါတယ်။

ထိုလူများကို ဆယ်စုနှစ် ၂ ခု ၃ ခုခန့် စောင့်ကြည့်ပြီးနောက် အူမကြီးကင်ဆာဖြစ်ပွားသူ ၃,၂၀၀ တွေ့ရှိခဲ့ပါတယ်။

အဆင့်ဆင့်ထုတ်လုပ်ထုပ်ပိုးထားတဲ့ စားစရာတွေကို အများဆုံးစားသုံးသူတွေက အနည်းဆုံးစားသုံးသူတွေထက် အူမကြီးကင်ဆာဖြစ်နိုင်ချေ ၂၉ ရာခိုင်နှုန်း ပိုများပါတယ်။

ထပ်မံခွဲခြားလေ့လာခဲ့ရာမှာ အသင့်စားအသားတွေစားတဲ့ အမျိုးသမီးတွေက ပိုဖြစ်နိုင်ချေများ ပါတယ်။

သကြားဓာတ်ပါတဲ့ အချိုရည်တွေက အမျိုးသားတွေမှာ အူမကြီးကင်ဆာဖြစ်နိုင်ချေ ၂၁ ရာခိုင်နှုန်းပိုများပါတယ်။

အစားအသောက်နေထိုင်မှုစရိုက်က မျိုးဗီဇ၊ အသက်အရွယ်များအရ အူမကြီးကင်ဆာဖြစ်နိုင်ချေနဲ့ ပတ်သက်နေကြောင်း အထောက်အထားတွေ့ရှိထားပါတယ်။

အမေရိကန်လူမျိုးများ နေ့စဉ်စားသောက်တဲ့ ကယ်လိုရီစုစုပေါင်းရဲ့ ၅၇ ရာခိုင်နှုန်းခန့်က ထုပ်ပိုးထားတဲ့ အစားအစာများဖြစ်ပါတယ်။

ဂျာနယ်တစ်ခုမှာ ဖော်ပြထားချက်အရ ထုပ်ပိုးထားတဲ့ စားစရာကို အများဆုံးစားသုံး အီတလီလူမျိုးတွေ စောစီးစွာအသက်ဆုံးပါးနိုင်ချေ များနေပါတယ်။

အဆင့်ဆင့်ထုတ်လုပ်ထုပ်ပိုးထားတဲ့ စားစရာတွေမှာ အဆီ၊ သကြား၊ ဆားများ ပေါများစွာပါဝင်ပြီး အမျှင်ဓာတ်နဲ့ အဟာရဓာတ်များနည်းပါးပါတယ်။

အချိုစားစရာတွေက အဆင့်ဆင့်ထုပ်ပိုးထုတ်လုပ်ထားတယ်ဆိုတာ သိပ်မသိပါဘူး။

ဥပမာအားဖြင့် ကွေကာ၊ ပီဇာ၊ ပေါင်မုန့်တို့ကို ကျန်းမာရေးဆိုးစေတဲ့စားစရာလို မသတ်မှတ်ကြပါဘူး။

အူမကြီးကင်ဆာက အူမကြီးနေရာမှစတင်ကာ အူနှောင်းပိုင်းနေရာ၊ စအိုအထိ ပါဝင်ပါတယ်။

ယူကေမှာ အူမကြီးကင်ဆာရှိသူ နှစ်စဉ် ၄၃,၀၀၀ နီးပါးရှိပြီး ၁၆,၅၀၀ သေဆုံးနေကြပါတယ်။

Source: The Sun
#Yangon_Media_Group

#Local_News
Published_ 4 Sept 2022

မြန်မာ သံရုံး/အဖွဲ့ရုံးအနေဖြင့် အာဆီယံ-ဗီယင်နာကော်မတီ၏ အလှည့်ကျဥက္ကဋ္ဌ တာဝန် ကို ၂၀၂၂ ခုနှစ်၊ ဇူလိုင်လမှ ဒီဇင်ဘာလအထိ (၆) လ တာဝန်ယူထားကြောင်း သိရပါတယ်။

အာဆီယံ-ဗီယင်နာကော်မတီ၏ အလှည့်ကျဥက္ကဋ္ဌဖြစ်သော ကုလသမဂ္ဂနှင့် နိုင်ငံတကာအဖွဲ့အစည်းများဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးမင်းသိမ်းသည် ဩဂုတ် ၂ ရက်တွင် ဗီယင်နာမြို့ရှိ Vienna International Centre ၌ ကျင်းပခဲ့သည့် (၅၅) နှစ် မြောက် အာဆီယံနေ့အထိမ်းအမှတ်အခမ်းအနားသို့ တက်ရောက်၍ အဖွင့်အမှာစကားပြောကြားခဲ့ပါတယ်။

အခမ်းအနားတွင် United Nations Office in Vienna (UNOV) ၏ ညွှန်ကြားရေးမှူးချုပ် ကိုယ်စား Mr. Jean-Luc Lemahieu ၊ Director of the Division for Policy Analysis and Public Affairs က တက်ရောက်မိန့်ခွန်းပြောကြားခဲ့ပါတယ်။

အာဆီယံနေ့အထိမ်းအမှတ်အခမ်းအနားသို့ UNOV/ UNODC၊ IAEA၊ UNIDO နှင့် CTBTO တို့မှ ကိုယ်စားလှယ်များနှင့်ဝန်ထမ်းများ၊ ဩစတြီးယားနိုင်ငံ၊ ဥရောပနှင့် နိုင်ငံ တကာရေးရာ ဝန်ကြီးဌာနမှကိုယ်စားလှယ်၊ ဗီယင်နာမြို့အခြေစိုက် အမြဲတမ်း ကိုယ်စားလှယ်အဖွဲ့ရုံးများမှ အမြဲတမ်းကိုယ်စားလှယ်များနှင့် ဇနီးများ၊ ကိုယ်စားလှယ်များ အပါအဝင် ဧည့်သည်တော် စုစုပေါင်း (၂၀၀) ဦးခန့် တက်ရောက်ခဲ့ကြပါတယ်။

အာဆီယံ-ဗီယင်နာကော်မတီကို အာဆီယံအဖွဲ့ဝင်နိုင်ငံများဖြစ်သော အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ ထိုင်း၊ ဗီယက်နမ်နိုင်ငံများမှ သံရုံးနှင့် အမြဲတမ်းကိုယ်စားလှယ် အဖွဲ့ရုံးများနှင့် စင်ကာပူနိုင်ငံအမြဲတမ်းကိုယ်စားလှယ်အဖွဲ့ရုံးတို့ဖြင့် ဖွဲ့စည်းထားကြောင်း သတင်းရရှိပါတယ်။

ygm_mnn
#Yangon_Media_Group

Published. 4 Sept 2022

အိန္ဒိယနို်ငံဟာ ကမ္ဘာ့ နံပါတ်(၅) စီးပွားရေးနိုင်ငံအဖြစ်ရောက်ရှိလာပြီး ဗြိတိန်ဟာ နံပါတ်(၆)နိုင်ငံအဖြစ် အိန္ဒိယရဲ့ နောက်ကိုရောက်ရှိသွားကာ နေရာဖယ်ပေးလိုက်ရတယ်လို့ ဘလွန်းဘတ်သတင်းဌာနက သတင်းဖော်ပြလိုက်ပါတယ်။

ဒါဟာလူနေမှုစရိတ်တွေကြောက်စဖွယ်ကြီးမြင့်လာနေတဲ့ ဗြိတိန်မှာ အစိုးရအတွက် ထိုးနှက်မှု တစ်ခုဖြစ်လာပါတယ်။

ယခင်ကဗြိတိန်ရဲ့ ကိုလိုနီဖြစ်ခဲ့ရတဲ့ အိန္ဒိယနိုင်ငံဟာ ၂၀၂၁ ခုနှစ် နောက်ဆုံးသုံးလမှာ ဗြိတိန်ကိုကျော်တက်သွားပြီး ကမ္ဘာ့နံပါတ်(၅)မြောက်အင်အားကြီးနိုင်ငံဖြစ်လာခဲ့တာပါ။ တွက်ချက်မှုကို အမေရိကန်ဒေါ်လာအခြေခံခဲ့တာဖြစ်ပြီး  နိင်ငံတကာငွေကြေးရန်ပုံငွေအဖွဲ့က ရရှိတဲ့ ဂျီဒီပီ ကိန်းဂဏန်းတွေအရ ယခုနှစ် ပထမလေးလပတ်မှာလည်း အိန္ဒိယဟာ ဆက်လက် ဦးဆောင်နေပါတယ်။

နိုင်ငံတကာအဆင့်သတ်မှတ်ချက်တစ်ခုမှာ ဗြိတိန်လျောကျရတာဟာ ဗြိတိန်ဝန်ကြီးချုပ်အသစ်ဖြစ်လာမယ့်သူအတွက် ကြိုဆိုလက်ခံစရာ   မရှိတဲ့ နောက်ခံတစ်ခုဖြစ်လာပါတယ်။လာမယ့်တနင်္လာနေ့မှာ ကွန်ဆာဗေးတစ်ပါတီဝင်တွေဟာ ဘောရစ်ဂျွန်ဆန် ကိုဆက်ခံမယ့်သူကို ရွေးချယ်မှာဖြစ်ပြီး နိုင်ငံခြားရေးဝန်ကြီး လစ်ထရပ်စ်ဟာ အကြီးတန်း ဝန်ကြီးဟောင်း ရီရှီဆူနက်ကို အနိုင်ယူအရွေးချယ်ခံရလိမ့်မယ်လို့ မျှော်လင့်ထားကြပါတယ်။

ဝန်ကြီးချုပ်အသစ်ဖြစ်လာမယ့်သူဟာ ဆယ်စုနှစ်လေးစုအတွင်း အလျင်အမြန်ဆုံး ငွေကြေးဖောင်းပွမှုတွေကြုံနေရပြီး    စီးပွားရေးကျဆင်းမှုကြုံရဖွယ်ရှိတယ်လို့ အင်္ဂလန်ဘဏ်က သတိပေးထားရတဲ့ ဗြိတိန်နိုင်ငံကို တာဝန်လွှဲ ယူရမှာဖြစ်ပါတယ်။

ဗြိတိန်နှင့်ခြားနားစွာပဲ အိန္ဒိယစီးပွားရေးဟာ ဒီနှစ်မှာ ၇ ရာခိုင်နှုန်းတိုးတက်ဖို့ရှိနေပါတယ်။ တူညီတဲ့ လေးလပတ်နောက်ဆုံးရက်မှာရှိတဲ့ ဒေါ်လာလဲလှယ်နှုန်းကို အသုံးပြုပြီး တွက်ချက်ကြည့်တဲ့အခါ အိန္ဒိယ စီးပွားရေး အရွယ်အစား ဟာ မတ်လ အထိ အမေရိကန်ဒေါ်လာ ၈၅၄.၇ ဘီလျံဖြစ်လာပါတယ်။ အခြေခံနည်း စနစ်အတူတူနှင့်တွက်ချက်ကြည့်တဲ့ အခါ ဗြိတိန်စီးပွားရေး အရွယ်အစားက ဒေါ်လာ ၈၁၆ ဘီလျံပဲရှိတယ်လို့ စီးပွားရေး သတင်းမီဒီယာကြီးဖြစ်တဲ့ ဘလွန်းဘတ်က ရေးသားပါတယ်။

ဒီတွက်ချက်မှုတွေကို နိုင်ငံတကာငွေကြေးရန်ပုံငွေအဖွဲ့ကိန်းဂဏန်းတွေနှင့် ဘလွန်းဘတ်တာမင်နယ်ရဲ့ သမိုင်းဝင် ငွေကြေးလဲလှယ်နှုန်းတွေကို အသုံးပြုထားတာဖြစ်တယ်လို့ဆိုပါတယ်။

ဗြိတိန်ဟာ ဆက်လက်ပြီးကျဆင်းဖို့ရှိနေပါတယ်။  

အိန္ဒိယဟာ ဗြိတိန်ကို ကျော်ဖြတ်ပြီး ကမ္ဘာ့နံပါတ်(၅)အဆင့်စီးပွားရေးတက်လှမ်းသွားတာကြောင့် အိန္ဒိယရဲ့ရှေ့မှာ အမေရိကန်၊တရုတ်၊ဂျပန်နှင့် ဂျာမနီတို့ပဲရှိတော့မှာဖြစ်ပါတယ်။ လွန်ခဲ့တဲ့ဆယ်စုနှစ်ကတော့ အိန္ဒိယဟာ ကမ္ဘာ့စီးပွားရေးမှာ အဆင့် ၁၁သာရှိခဲ့ပြီး အဲဒီတုန်းက ဗြိတိန်က အဆင့် (၅)မှာရှိခဲ့ပါတယ်။

Source Bloomberg

#India_Economy

#The_fifth_largest_world-economy

#India_overtake_Britain