Published_ 20 November 2023

ရန်ကုန်မြို့ရှိ အသက်(၇၀)အထက်သက်ကြီးဆရာဝန်ကြီး (၁၇၂)ဦးကို ရန်ကုန်ပြည်သူ့ဆေးရုံကြီးတွင် ကျန်းမာရေးစစ်ဆေးပေးခြင်းနှင့်ကျန်းမာရေးစောင့်ရှောက်မှုများပေးခဲ့ပြီးဆီးချိုသွေးချိုရှိသည့်သက်ကြီးဆရာဝန် (၁၅၀)ဦးကိုဆီးချိုသွေးချိုတိုင်းစက်များပေးအပ်ခဲ့ကြောင်း ကျန်းမာရေးဝန်ကြီးဌာနမှသိရသည်။

သက်ကြီးဆရာဝန်ကြီးများကို ဓာတ်ခွဲစမ်းသပ်စစ်ဆေးခြင်း၊ Ultrasound ရိုက်ကူးခြင်း၊ ဓာတ်မှန်ရိုက်ခြင်း၊ နှလုံး စက်ဖြင့် စစ်ဆေးခြင်း (ECG)၊ သက်ကြီးရွယ်အိုဆိုင်ရာ ကျန်းမာရေးစစ်ဆေးမှု (Geriatric assessment) ပြုလုပ်ခြင်းတို့ကို ဆောင်ရွက်ပေးခဲ့သည်ဟုဆိုသည်။

အဆိုပါကျန်းမာရေးစစ်ဆေးမှုတွင် သက်ကြီးဆရာဝန်ကြီး (၁၇၂)ဦးအား ကျန်းမာရေးစစ်ဆေး ကုသမှုပေးခဲ့ကာ ဆီးချိုသွေးချိုရောဂါရှိသူ သက်ကြီးဆရာဝန်ကြီးများ အသုံးပြုရန် သွေးချိုတိုင်းစက် (Glucometer) (၁၅၀)ခု ထောက်ပံ့ပေးခဲ့သည်။

ယင်းကဲ့သို့ကျန်းမာရေးစောင့်ရှောက်မှုများကို ကျန်းမာရေးဝန်ကြီးဌာန၏ လမ်းညွှန်မှုဖြင့် ရန်ကုန်ပြည်သူ့ ဆေးရုံကြီးမှ ပါမောက္ခချုပ်(ဆေးရုံအုပ်ကြီး/ ကုသရေး) နှင့်ဆေးရုံအုပ်ချုပ်မှုအဖွဲ့၏စီစဉ်မှု၊ ရန်ကုန်တိုင်းဒေသကြီး ပြည်သူ့ကျန်းမာရေးနှင့် ကုသရေးဦးစီးဌာန၏ ပူးပေါင်းပါဝင်မှု၊ သက်ကြီးဆရာဝန်များ အထောက်အကူပြုအဖွဲ့၏ ပူးပေါင်းပါဝင်စီစဉ်မှုတို့ဖြင့်ဆောင်ရွက်ပေးခဲ့ခြင်းဖြစ်ပြီး၊ရန်ကုန်မြို့ပေါ်ရှိ ပြည်သူ့ဆေးရုံကြီးများမှ သက်ကြီးရွယ်အိုဆေးပညာနှင့် ဓာတ်မှန်ပညာဌာန ပါမောက္ခ/ ဌာနမှူးများ၊ ဘာသာရပ်ဆိုင်ရာ အထူးကုဆရာဝန်ကြီးများ၊ သူနာပြုအုပ်ကြီးနှင့်သူနာပြုများ၊ ဆေးဘက် ကျွမ်းကျင်ဝန်ထမ်းများနှင့် အမျိုးသားကျန်းမာရေးဓာတ်ခွဲမှုဆိုင်ရာဌာနနှင့် ရန်ကုန်ပြည်သူ့ဆေးရုံကြီး ရောဂါဗေဒဌာနမှ ပါမောက္ခ ဦးဆောင်သော အဖွဲ့တို့ကဆောင်ရွက်ပေးခဲ့ခြင်းဖြစ်ကြောင်းသိရသည်။
Yangon Time/tthl
#Local_News
#Published_ 20 November 2023
#YMG #Yangon_Times #Yangon_Media_Group #YMG_News