#Local_News
Published_15 December 2022

နစက အနေဖြင့် ရခိုင်ပြည်နယ် ဖွံ့ဖြိုးတိုးတက်ရေးအတွက် စိုက်ပျိုးရေး၊ မွေးမြူရေးလုပ်ငန်းများ၊ ကုန်ထုတ်လုပ်ငန်းနှင့် ရေလုပ်ငန်းများ ဆောင်ရွက်နိုင်ရန် မတည်ရန်ပုံငွေမှ ခွင့်ပြုထားသော ထောက်ပံ့ငွေကျပ် (၁၀)ဘီလီယံကို ပြည်ထောင်စုသို့ ပြန်လည်ပေးဆပ်ရန် မလိုဘဲ ရခိုင်ပြည်နယ်အတွင်း စဉ်ဆက်မပြတ်လည်ပတ် အသုံးပြုနိုင်မည် ဖြစ်ကြောင်း နစက ဥက္ကဌက ပြောသည်။

ယနေ့ ဒီဇင်ဘာလ ၁၅ ရက်တွင် ကျရောက်သော( ၄၈ )နှစ်မြောက် ရခိုင်ပြည်နယ်နေ့အတွက် ပေးပို့သည့်သဝဏ်လွှာတွင် အထက်ပါအတိုင်း ပြောကြားခဲ့ခြင်း ဖြစ်သည်။

၁၉၇၄ ခုနှစ်တွင် ရေးဆွဲအတည်ပြုခဲ့သော ဖွဲ့စည်းပုံအခြေခံ ဥပဒေအရ ဒီဇင်ဘာလ (၁၅) ရက်ကို ရခိုင်ပြည်နယ်နေ့အဖြစ် သတ်မှတ်ပေးခဲ့ခြင်းဖြစ်ကြောင်း၊ ကမ္ဘာ့အလှဆုံး စာရင်းဝင်ပင်လယ်ကမ်းခြေဒေသကိုလည်း ပိုင်ဆိုင်ထားသည့်အပြင် မြောက်ဦးဒေသကို ကမ္ဘာ့ရှေးဟောင်း ယဉ်ကျေးမှု အမွေအနှစ်စာရင်းဝင် မြို့တော်အဖြစ် ဆောင်ရွက်လျက် ရှိသည့် ရခိုင်ပြည်နယ် သည် ဧရိယာစတုရန်းမိုင်ပေါင်း ၁၄၂၀၀ ဒသမ ၁ မိုင် ကျယ်ဝန်းပြီး ခရိုင်(၅)ခရိုင်၊ မြို့နယ်(၁၇)မြို့နယ်ဖြင့် ဖွဲစည်းထားရာမှ ၂၀၂၂ ခုနှစ်၊ ဧပြီလ ၃၀ ရက်တွင် တောင်ကုတ်ခရိုင်နှင့် အမ်းခရိုင်တို့ကို ခရိုင်အဆင့်အဖြစ် တိုးမြှင့်ပေးခဲ့သည့်အတွက် ရခိုင်ပြည်နယ်သည် ခရိုင်(၇)ခရိုင်ဖြင့် ဖွဲ့စည်းထားသော ပြည်နယ်တစ်ခု ဖြစ်လာကြောင်းလည်း ယင်းကပြောသည်။

နစက၏ ငြိမ်းချမ်းရေးဆွေးနွေးရေးအဖွဲ့အနေဖြင့်လည်း ရခိုင်ပြည်လွတ်မြောက်ရေး ပါတီ(ALP) ပါတီနှင့် ငြိမ်းချမ်းရေး တွေ့ဆုံဆွေးနွေးပွဲများကို ၂၀၂၂ ခုနှစ်၊ ဇွန်လ ၁၄ ရက်မှ ၁၅ ရက်ထိ ပထမအကြိမ်၊ သြဂုတ်လ ၂၄ ရက်မှ ၂၆ ရက်ထိ ဒုတိယအကြိမ်ဆောင်ရွက်ခဲ့ပြီး ဆွေးနွေးညှိနှိုင်းချက်များအရ ပြည်နယ်အဆင့်နှစ်ဖက် သဘောထားများကို အတည်ပြုလက်မှတ် ရေးထိုးနိုင်ခဲ့ကြောင်း၊ပြည်တွင်းငြိမ်းချမ်းရေးနှင့် အမျိုးသား ပြန်လည်သင့်မြတ်ရေးအတွက် NCA လက်မှတ်ရေးထိုးထားသည့် တိုင်းရင်းသားလက်နက်ကိုင် အဖွဲ့အစည်းများနှင့် NCA လက်မှတ်ရေးထိုးခြင်း မပြုသော တိုင်းရင်းသား လက်နက်ကိုင် အဖွဲ့အစည်းများကို နိုင်ငံတော်အနေဖြင့် ငြိမ်းချမ်းရေး ဆွေးနွေးနိုင်ရန် ဖိတ်ခေါ်ထားပြီးဖြစ်ကြောင်းလည်း အဆိုပါ သဝဏ်လွှာက တစ်ဆင့် ထည့်သွင်း ပြောကြားထားသည်။

#ymg/mt
#Yangon_Media_Group

Published 15 Dec 2022

အာဆီယံဟာ ပေးစာကမ်းစာတွေထက် ဥရောပနှင့်လွတ်လပ်သောကုန်သွယ်မှုတစ်ခုလိုချင်တာသာဖြစ်ပြီး အင်အားကြီးတွေပြိုင်ဆိုင်မှုကြားထဲ အသုံးချခံနယ်ရုပ်တစ်ရုပ် အဖြစ်မခံလိုကြောင်း အာဆီယံခေါင်းဆောင်တွေက ဘရပ်ဆဲလ်မြို့မှာ ဗုဒ္ဓဟူးနေ့ကပြောကြားလိုက်ပါတယ်။

အာဆီယံနှင့် ဥရောပသမဂ္ဂတို့အကြား ပထမဆုံးသော ထိပ်သီးအစည်းအဝေးပြီးဆုံးပြီးနောက် အဖွဲ့ကြီးနှစ်ခုအကြား ကုန်သွယ်ရေးသဘောတူညီချက်ကို ပြန်လည်စတင်ဖို့ မနီးကပ်သေးတဲ့အပေါ် အာဆီယံဟာ မကျေမနပ်မှုနှင့် ကျန်ခဲ့ရတာဖြစ်ပါတယ်။

 မြန်မာနိုင်ငံပါဝင်နေတဲ့ အာဆီယံမှာ ဒီလိုမျိုးသဘောတူညီချက်မျိုးကို ဥရောပသမဂ္ဂ(အီးယူ)အနေနှင့် ဆွေးနွေးဖို့တုန့်ဆိုင်းနေတာဖြစ်တယ်လို့ အေအက်ဖ်ပီကရေးပါတယ်။ အဲဒီအစား အဖွဲ့အချင်းချင်း သဘောတူညီမှုကို အဖွဲ့ဝင်နိုင်ငံတစ်နိုင်ငံချင်းစီနှင့်သာ ဆောင်ရွက်သွားလိုတယ်လို့ အီးယူခေါင်းဆောင်တွေက ပြောပါတယ်။

အီးယူက ယူရို ၁၀ဘီလျံ( အမေရိကန်ဒေါ်လာ ၁၀.၇ဘီလျံ)တန်ဖိုးရှိတဲ့ အခြေခံအဆောက်အအုံအကူအညီနှင့် ချေးငွေတွေကို အာဆီယံနိုင်ငံတွေကို ပေးမယ်လို့ကြေညာခဲ့တာဖြစ်ပါတယ်။ 

“ အာဆီယံဟာ ဥရောပကနေအကူအညီအမြဲတမ်းရရှိနေဖို့ စိတ်မဝင်စားဘူး၊ ကုန်သွယ်ရေးသဘောတူညီချက်ပဲ ပိုသဘောကျတယ်”လို့ အာဆီယံရဲ့ တာဝန်ပြီးဆုံးတော့မယ့် ဥက္ကဋ္ဌ၊ ကမ္ဘောဒီးယားဝန်ကြီးချုပ်ဟွန်ဆန်က  အီးယူကို သတိပေးပြောကြားလိုက်ပါတယ်။

“ အာဆီယံဟာ အီးယူက အကူအညီကို အမြဲတမ်းစောင့်ဆိုင်းနေတာမဟုတ်ဘူး။ ဒါပေမယ့် ကျွန်တော်တို့ဟာ ဒေသနှစ်ခုရဲ့ စီးပွားရေးအစပ်တည့်မှုကို မြင်လိုတယ်” လို့ ဟွန်ဆန်ကပြောလိုက်ပြီး မြန်မာကိစ္စမှာ “ နိုင်ငံရေးဟာ အီးယူနှင့်အာဆီယံရဲ့ တိုးတက်မှုကို အဟန့်အတားမဖြစ်စေသင့်ဘူး” လို့လည်းပြောပါတယ်။

“ ဥရောပနိုင်ငံတွေကပိုတိုးတက်တာ မှန်ပါတယ်။ ဒါပေမယ့် အာဆီယံဟာ  အကူအညီလက်ခံရယူနေတဲ့ နေရာတစ်ခုမျှ မဟုတ်ဘူး။ အာဆီယံနှင့် ဥရောပဟာ ကုန်သွယ်မှုသဘောတူညီချက်တစ်ခုရှိသင့်တယ်” လို့ သူကပြောပါတယ်။

အမေရိကန်-တရုတ်ပြိုင်ဆိုင်မှုမှာ ဒေသကိုမကြာခဏဆိုသလို ဟိုယိမ်းသည်ယိမ်းလို့ ဖော်ပြကြတာရှိတာကို သတိပေး လိုက်ပြီး ပထဝီနိုင်ငံရေး အပြန်အလှန်တိုက်ပွဲမှာ ပိတ်မိနေတာမျိုးကို သဘောမကျဘူးလို့ ဖိလစ်ပိုင်သမ္မတ ဖာဒီနန် မားကို့စ်ဂျုနီယာက ပြောလိုက်ပါတယ်။” ဘယ်အင်အားကြီးနိုင်ငံဟာ ကျွန်တော်တိုနှင့် မဟာမိတ်ဖြစ်တယ်လို့ ရွေးချယ်ရမယ့် စစ်အေးတိုက်ပွဲအခြေအနေတွေပြန်သွားဖို့ ကျွန်တော်တို့ လုံးဝငြင်းဆိုတယ်” လို့လည်း သူက ဆက်လက်ပြောဆိုပါတယ်။

“ အာရှပစိတ်ဖိတ်ဒေသရဲ့ အနာဂတ်ကို အာရှပစိဖိတ်နိုင်ငံတွေကသာ ဆုံးဖြတ်သင့်ပြီး အဲဒီဒေသအပြင်က ဘယ်အင်အားကြိးနိုင်ငံကမှာ မဆုံးဖြတ်သင့်ဘူးဆိုတဲ့ အတွေးအခေါ်ကို  အာဆီယံအဖွဲ့ဝင်တွေဟာ ကတိပြုထားကြတယ်” လို့လည်း ဖိလစ်ပိုင်သမ္မတက ထပ်မံပြောဆိုပါတယ်။

အီးယူက အာဆီယံကို ပထဝီနိုင်ငံရေးကိစ္စတွေထဲ ပါဝင်လာဖို့ ကြိုးပမ်းမှုတွေဟာ လုံးဝဥဿုံ မအောင်မမြင်ဖြစ်ခဲ့ရတာပါ။

ထိုင်ဝမ်နှင့် ရုရှားရဲ့ယူကရိန်းကျူးကျော်မှုခေါင်းစဉ်တွေဟာ နှစ်ဘက်အကြား ပေါင်းကူးလို့ မရနိုင်လို့ အဲဒီကိစ္စတွေဆွေးနွေးတာရပ်ပစ်ခဲ့ကြရပါတယ်။  စေ့စပ်ညှိနှိုင်းသူတွေက ပူးတွဲကြေညာချက်တစ်စောင်အတွက် ရက်သတ္တပတ်ပေါင်းများစွာ ကြိုးစားခဲ့ကြပေမယ့် တကယ်ရလိုက်တာကတော့ စာကြောင်းတွေက စိတ်ပျက်စရာ ကောင်းလှတယ်လို့ အီးယူခေါင်းဆောင်တွေကပြောပါတယ်။

Source: SCMP

#ASEAN_EU_Summit

#Free_Trade_Rather_than_handouts

#EU_ASEAN_Relations

#World_Health
Published 15 December 2022

မနက်ပိုင်းမှာ နှိုးစက်ပေးပြီး အိပ်ရာထရတဲ့လူတွေဟာ ပုံမှန်အတိုင်းထတဲ့သူတွေထက် အိပ်ရေးမဝလေ့ရှိကြောင်း Sleep ဂျာနယ်မှာ ဖော်ပြထားပါတယ်။

နှိုးစက်မြည်တဲ့အခါ အချိန်ရွှေ့ဆိုင်းတဲ့အပြုအမူနဲ့ ပတ်သက်ပြီး အိပ်စက်ခြင်း၊ စိတ်ဖိစီးမှု၊ အမူအရာတို့ကို ‌ဒေါက်တာ'စတီဖင်မက်တင်လီ'က ပြောကြားခဲ့ပါတယ်။

အချိန်ပြည့်ဝန်ထမ်း အလုပ်လုပ်တဲ့လူ ၄၅၀ ကို စစ်တမ်းကောက်ယူကာ အိပ်စက်ခြင်းအချိန်နဲ့ နှလုံးခုန်နှုန်းတို့ကို တိုင်းတာတဲ့ အချက်အလက်များကောက်ယူခဲ့ပါတယ်။

နှိုးစက်မြည်တဲ့အခါ အချိန်ရွှေ့တဲ့လူတွေက အိပ်စက်ရာမှာ အနှောင့်အယှက်ကြုံတွေ့ရပြီး ပုံမှန်အတိုင်းထတဲ့သူတွေကတော့ ပိုပြီးအိပ်စက်ရကာ နေ့ခင်းပိုင်းကော်ဖီသိပ်မသောက်တတ်ကြပါဘူး။

အမျိုးသမီးတွေက အမျိုးသားတွေထက် ၅၀ ရာခိုင်နှုန်းလောက် ပိုပြီးနှိုးစက်ရွှေ့ဆိုင်းတတ်ကြကာ ညဘက်နောက်ကျမှ အိပ်သူတွေကလည်း အပင်ပန်းဆုံးသူတွေ ဖြစ်ပါတယ်။

လေ့လာခဲ့တဲ့သူတွေက နှစ်‌ပေါင်းကြာအောင် အဆင့်မြင့်ဘွဲ့တွေနဲ့ အလုပ်လုပ်ကိုင်သူတွေဖြစ်ပြီး လူအနည်းစုကိုသာ လေ့လာရသေးတာဖြစ်ပါတယ်။

နှိုးစက်မလိုတဲ့သူတွေက နေ့ခင်းဘက် တရေးတမောအိပ်စရာမလိုသလို ‌တစ်နေ့လုံးမပင်ပန်းကြပါဘူး။

နှိုးစက်ပေးခြင်းက လူတစ်ယောက်ရဲ့ သဘာဝအိပ်စက်ခြင်းစက်ဝန်းကို အနှောင့်အယှက်ဖြစ်စေကာ ပိုမိုပင်ပန်းစေနိုင်ပါတယ်။

နှစ်ခြိုက်စွာအိပ်ပျော်တဲ့အချိန်နဲ့ အိပ်ရာမထခင်အချိန်တို့မှာ ထွက်တဲ့ဟော်မုန်းတွေ မတူညီကြပါဘူး။

ပုံမှန်အတိုင်း အိပ်ရာထပါက ခန္ဓာကိုယ်က ဖိစီးမှုကိုတုန့်ပြန်ခြင်းဖြစ်ပေါ်ကာ ပိုမိုနိုးကြားနေပါတယ်။

လူတွေက အိပ်ရေးမဝတာကြောင့် နှိုးစက်ကိုအချိန်ရွှေ့တတ်ကြပြီး လူ ၂ ယောက်မှာ ၁ ယောက်ကသာ အိပ်ရေးဝလေ့ရှိပါတယ်။

နှိုးစက်ပထမဆုံးအကြိမ် နိုးတာပဲဖြစ်ဖြစ်၊ ၃ ခါလောက်မှ နိုးတာဖြစ်ဖြစ်၊ နှိုးစက်အသုံးပြုတယ်ဆိုကတည်းက အိပ်ရေးမဝစေမယ့် လက္ခဏာပဲဖြစ်ပါတယ်။

အကောင်းဆုံးကတော့ ခန္ဓာကိုယ်က လိုအပ်သလောက် အိပ်ပေးဖို့ပဲဖြစ်တယ်လို့ သုတေသီများက အကြံပေးလိုက်ပါတယ်။

Source: NY Post
#Yangon_Media_Group

#Local_News
Published_15 December 2022

တိုင်းဒေသကြီးနှင့်ပြည်နယ်များ အလိုက် လျှပ်စစ်သုံးစွဲမှုကိုအခြေခံ၍ ဝန်အားမျှတစွာ ဖြန့်ဝေပေးထားရသောကြောင့် ထပ်မံ တိုးမြှင့်ထုတ်လုပ်နိုင်ရန် စီမံဆောင်ရွက်နေစဉ်၌ပင် ရရှိပြီးပို့လွှတ်လျက်ရှိသော ဓာတ်အားလိုင်းများကို သောင်းကျန်းသူများက ဖောက်ခွဲဖျက်ဆီးလျက်ရှိကြောင်း လျှပ်စစ်စွမ်းအား ဝန်ကြီးဌာန ပြည်ထောင်စုဝန်ကြီး ဦးသောင်းဟန်က ပြောသည်။

ဒီဇင်ဘာလ ၁၄ ရက်က နေပြည်တော်ရှိ လျှပ်စစ်စွမ်းအား ဝန်ကြီးဌာန ရဲရွာခန်းမ၌ တိုင်းဒေသကြီး၊ပြည်နယ် လျှပ်စစ်အင်ဂျင်နီယာများနှင့် တွေ့ဆုံစဉ် ပြည်ထောင်စုဝန်ကြီးက အထက်ပါအတိုင်း ပြောကြားခဲ့ခြင်း ဖြစ်သည်။

လက်ရှိတွင် မြန်မာနိုင်ငံ၏ လျှပ်စစ်ဓာတ်အားထုတ်လုပ်ရေးတွင် အရင်းအမြစ်မျိုးစုံမှ စက်တပ်ဆင်အင်အား (၇၂၈၇) မဂ္ဂါဝပ်ရှိသော်လည်း ရေအားလျှပ်စစ်စက်ရုံများတွင် လာမည့်နွေရာသီအတွက် ရေစုဆောင်းထားရခြင်း၊ သဘာဝဓာတ်ငွေ့ထုတ်လုပ်မှုလျော့နည်းနေခြင်း၊ မဟာဓာတ်အားလိုင်းတိုင်များ ဖောက်ခွဲဖျက်ဆီးခံရခြင်းတို့ကြောင့် (၃၀၆၄) မဂ္ဂါဝပ်ခန့်သာ ထုတ်လုပ်နိုင်ကြောင်း လည်း ယင်းကဆိုသည်။

ဖျက်ဆီးခံရသော ဓာတ်အားလိုင်းတိုင်များကို ပြန်လည်ပြင်ဆင်ခြင်းများ ဆောင်ရွက် လျက်ရှိသည့်အပြင် စီမံကိန်းအသစ်များကိုလည်း သတ်မှတ်နှစ်များတွင် လျှပ်စစ်ဓာတ်အားထုတ်လုပ်နိုင်ရန် လုပ်ဆောင်လျက် ရှိကြောင်းလည်း သိရသည်။

ဓာတ်အားဖြန့်ဖြူးပေးပို့ရာတွင် ဗို့အားပြည့်ဝစွာဖြင့် ဖြန့်ဖြူးပေးပို့နိုင်ရေး၊ ဓာတ်အား ပြတ်တောက်မှု၊ ဓာတ်အားပျောက်ဆုံးမှု လျော့နည်းစေရေးနှင့် ဓာတ်အားစနစ် တည်ငြိမ်တိုးတက် ကောင်းမွန်စေရေးတို့အတွက် ဓာတ်အားခွဲရုံများ၊ ဓာတ်အားလိုင်းများကို သန့်ရှင်းရေး ပြုလုပ်ခြင်းအပါအဝင် ထိန်းသိမ်းပြုပြင်ခြင်း၊ အဆင့်မြှင့်တင်ခြင်းလုပ်ငန်းများကို လည်း လုပ်ဆောင်လျက် ရှိကြောင်း လျှပ်စစ်စွမ်းအား ဝန်ကြီးဌာန၏ မှတ်တမ်းများတွင် ဖော်ပြထားသည်။

#ymg/mt
#Yangon_Media_Group

#Local_News
Published_15 December 2022

ကိုရီးယားသမ္မတနိုင်ငံသ့ို အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် မြန်မာအလုပ်သမား ၃၆ ဦးကိုထပ်မံစေလွှတ်ခဲ့ကြောင်း ဆိုးလ်မြို့ မြန်မာသံရုံးမှ ထုတ်ပြန်ထားသည်။

အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် စေလွှတ်သော Re-entry ကုန်ထုတ်လုပ်သား (၃၆) ဦးကို ယနေ့တွင် စေလွှတ်ခဲ့ခြင်းဖြစ်ကြောင်းသိရသည်။

ယင်းအပြင် တောင်ကိုရီးယားနိုင်ငံသို့ EPS စနစ်ဖြင့် ဒီဇင်ဘာ ၁၉ ရက်တွင် Regular(ကုန်ထုတ်လုပ်သား) ၊ Re-entry ကုန်ထုတ်၊ စိုက်ပျိုး၊ မွေးမြူရေးလုပ်သား ) စုစုပေါင်း ၁၁၀ ဦး၊ ဒီဇင်ဘာ ၂၁ ရက်တွင် Re-entry လုပ်သား ၆၉ ဦးကို ထပ်မံစေလွှတ်သွားမည်ဖြစ်ကြောင်း သိရသည်။

အစိုးရ ပြည်ပအလုပ်အကိုင် အေဂျင်စီမှတစ်ဆင့် EPS စနစ်ဖြင့် လုပ်သားစေလွှတ်မှု ဒီဇင်ဘာလ ဒုတိယအပတ်ထိ စုစုပေါင်းလုပ်သားဦးရေ ၂၃၅ ဦးကိုစေလွှတ်ခဲ့ပြီးဖြစ်ကြောင်းသိရသည်။ တောင်ကိုရီးယားအစိုးရမှ မြန်မာလုပ်သားများကို ပြန်လည်လက်ခံပြီးနောက် သြဂုတ်လတွင် ပြန်လည်စေလွှတ်ခဲ့ခြင်းဖြစ်သည်။

#ymg/sth
#Yangon_Media_Group

#Local_News
Published_15 December 2022

ပူတာအို ဒေသ၏ထူးခြားမှုအဖြစ် ခရီးသွားများကို ဆွဲဆောင် နိုင်သည့် ကျောက်လုံးများကို စီ၍ကာရံထားသည့် ကျောက်စီခြံစည်းရိုးများ ရှိသောကြောင့် အဆိုပါ ကျောက်လုံးစီခြံစည်းရိုးများကို လမ်းအလိုက်၊ ရပ်ကွက်အလိုက် စည်းကမ်းသတ်မှတ် ချက်များချမှတ်ကာ စနစ်တကျလှပသပ်ရပ်စွာဖြင့် ထူးခြားသည့်မြင်ကွင်းတစ်ခုအဖြစ် ဆောင်ရွက်၍ ဒေသ၏ Land Mark တစ်ခုအဖြစ် ပြည်တွင်း၊ ပြည်ပခရီးသွားများကို ဆွဲဆောင်နိုင်မည် ဖြစ်ကြောင်း နစက ဥက္ကဌက ပြောသည်။

ဒီဇင်ဘာလ ၁၄ ရက်က ကချင်ပြည်နယ်၊ ပူတာအိုမြို့နယ်ရှိ ဌာနဆိုင်ရာတာဝန်ရှိသူများ မြို့မိမြို့ဖများနှင့် ပူတာအိုလေဆိပ်ဧည့်ခန်းမဆောင်၌ တွေ့ဆုံစဉ် ဒေသဖွံ့ဖြိုးတိုးတက်ရေးဆိုင်ရာများကို ဆွေးနွေးရာ၌ အထက်ပါအတိုင်း ထည့်သွင်း ပြောကြားခဲ့ခြင်း ဖြစ်သည်။

ယင်းအပြင် ပူတာအိုဒေသသည် သွားရေးလာရေး ကန့်သတ်ချက်ရှိသည့်နေရာတစ်ခုဖြစ်သောကြောင့် ရာသီမရွေးသွားလာနိုင်ရေးအတွက် လမ်းပန်း ဆက်သွယ်မှု ပိုမိုအဆင်ပြေချောမွေ့စေရန် ဆောင်ရွက်လျက်ရှိကြောင်းလည်း ယင်းနေ့က ပူတာအိုတပ်နယ်မှ အရာရှိ၊ စစ်သည်၊ မိသားစုများအား တပ်နယ်ခန်းမ၌ တွေ့ဆုံအမှာစကား ပြောကြားရာတွင် နစက ဥက္ကဌက ထည့်သွင်း ပြောကြားခဲ့သေးသည်။

အဆိုပါ တွေ့ဆုံပွဲ၌ စစ်သည်တစ်ဦးချင်းအနေဖြင့် မိမိတို့ကိုင်ဆောင်နေရသည့် လက်နက်များ၊ အသုံးအဆောင် ပစ္စည်းများကို စစ်မြေပြင်တွင် လက်နက်များကို ကျွမ်းကျင်ပိုင်နိုင်စွာဖြင့် ထိရောက်စွာ အသုံးပြုနိုင်ရန် အမြဲလေ့ကျင့်နေရန်လိုကြောင်းနှင့်စစ်မြေပြင်၌ အချိန်၊ ရာသီဥတု၊ မြေအနေအထားတို့အပေါ်တွင် မူတည်၍ အလစ်အငိုက်တိုက်ခိုက်ကြခြင်းဖြစ်သဖြင့် သွားသတိ၊ လာသတိ၊ စားသတိ၊ နေသတိဖြင့် နေထိုင်လုပ်ကိုင်ဆောင်ရွက်ကြရန်လိုကြောင်းလည်း ဥက္ကဌက ပြောကြားခဲ့သည်။

#ymg/mt
#Yangon_Media_Group

#Local_News
Published_15 December 2022

၁၃၂ ကေဗွီ ဘီလူးချောင်း(၂)-တီကျစ် ဓာတ်အားလိုင်း၊ အောင်လံ-သရက် နှင့် မင်းတပ်-မတူပီ ၆၆ ကေဗွီ ဓာတ်အားလိုင်းကြိုးများ ထပ်မံ ဖျက်ဆီးခံရပြန်ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ဒီဇင်ဘာလ ၁၃ ရက်က ဘီလူးချောင်း ရေအားလျှပ်စစ် ဓာတ်အားပေးစက်ရုံများမှထွက်ရှိသည့် လျှပ်စစ်ဓာတ်အားကို နိုင်ငံတော်ဓာတ်အားစနစ်သို့ ပို့လွှတ် ပေးလျက်ရှိသည့် ၁၃၂ ကေဗွီ ဘီလူးချောင်း(၂)-တီကျစ် ဓာတ်အားလိုင်း၏ တာဝါတိုင်(၂)တိုင် နှင့် သရက်မြို့နှင့်အနီးဝန်းကျင်ဒေသများသို့ ဓာတ်အားဖြန့်ဖြူးပေးလျက်ရှိသည့် ၆၆ ကေဗွီ အောင်လံ- သရက် ဓာတ်အားလိုင်း၏ တာဝါတိုင် (၁) တိုင်တို့ကို ဖျက်ဆီးခဲ့ပြီး ဒီဇင်ဘာလ ၁၄ ရက်က ၆၆ ကေဗွီ မင်းတပ်-မတူပီ ဓာတ်အားလိုင်းကြိုး ကို ထပ်မံဖောက်ခွဲပစ်ခတ်ဖျက်ဆီးခဲ့ခြင်း ဖြစ်ကြောင်းသိရသည်။

ယင်းကြောင့် လျှပ်စစ်စွမ်းအား ဝန်ကြီးဌာနမှ ဝန်ထမ်းများအနေဖြင့် လျှပ်စစ်မီးသုံးစွဲသူပြည်သူများသို့ လျှပ်စစ်ဓာတ်အား စဉ်ဆက်မပြတ် ဆက်လက်ဖြန့်ဖြူးနိုင်ရေးအတွက် အမြန်ဆုံးပြင်ဆင် ဆောင်ရွက်လျက်ရှိ ကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။

ယခုအခါ ဖျက်ဆီးခံရသည့် အကြိမ်အရေအတွက် (၄၄)ကြိမ် ရှိပြီ ဖြစ်ကြောင်းလည်း လျှပ်စစ်ဝန်ကြီးဌာန၏ စာရင်းများအရ သိရသည်။

#ymg/mt
#Yangon_Media_Group

#Local_News
Published _ 15 December 2022

တာချီလိတ်မြို့နယ်အတွင်းရှိ လမ်းဘေးမြောင်းအတွင်းမှာ ပုပ်ပွနေသည့် အမျိုးသားတစ်ဦး၏ အလောင်းတစ်လောင်းတွေ့ရှိခဲ့ကြောင်း ဦးလှမိုး(တာချီလိတ်)လူမှုကူညီရေးအသင်းထံမှ သိရသည်။

ယမန်နေ့ ဒီဇင်ဘာလ ၁၄ရက် နေ့လည် ၂နာရီဝန်းကျင်ခန့်တွင် တာချီလိတ်မြို့၊ လွယ်စတုံသွားရာလမ်း တာဝေမီးစက်အကျော် လမ်းဘေးမြောင်းအတွင်းမှာ ပုပ်ပွသေဆုံးနေသည့် အမျိုးသားအလောင်းတစ်လောင်းကို တွေ့ရှိခဲ့ကြောင်း အသင်းမှ တာဝန်ရှိသူက YMG ကိုပြောခဲ့သည်။

"လမ်းဘေးမြောင်းထဲမှာ ပုပ်ပွသေဆုံးနေတဲ့ အမျိုးသားက ပျံကျနေထိုင်သူတစ်ဦးဖြစ်တယ်လို ခန့်မှန်းရပါတယ်။ ပြီးတော့ သူ့ကိုတွေ့တော့ မျက်နှာကမဲနေပြီး ပျက်ဆီးနေပါပြီ။ အသက် ၃၀ ဝန်းကျင်လောက်ရှိမယ်လိုတော့ ခန့်မှန်းရပါတယ်။ တာဝန်ရှိသူတွေခေါ်ပြီး သမားရိုးကျသေဆုံးတာလို အတည်ပြုပြီးတော့ အသင်းကနေ အခေါင်းတစ်လုံးနဲ့ မီးရှိပေးလိုက်ပါတယ်"ဟု ဦးလှမိုး(တာချီလိတ်)လူမှုကူညီရေးအသင်းမှ ဆိုသည်။

#ymg/NN
#Yangon_Media _Group

#World_Health
Published 15 December 2022

ရာသီဥတုအကူးအပြောင်းမှာဖြစ်တတ်တဲ့ တုပ်ကွေး၊ အအေးမိ၊ ကိုရိုနာဗိုင်းရစ်တိုဖြစ်တဲ့အခါ နှာခေါင်းပိတ်ခြင်းကဲ့သို့ လက္ခဏာများဖြစ်တတ်ပြီး အသက်ရှူရခက်ခဲတတ်ပါတယ်။

နှာခေါင်းပိတ်တာကို‌ ဖြေရှင်းဖို့ နည်းလမ်းများစွာရှိပြီး နှာခေါင်းဖျန်းဆေး၊ သောက်ဆေးတို့အသုံးပြုနိုင်ပါတယ်။
ဒါပေမဲ့ ဆေးအသုံးမပြုရဘဲနှင့် နှာခေါင်းပိတ်တာကို ဖြေရှင်းလို့ရတဲ့ နည်းလမ်းတွေရှိပါသေးတယ်။

(၁) လျှာအသုံးပြုခြင်း

လျှာဖျားထိပ်ကို အာခေါင်ကိုထိပြီး မျက်စိကြားထဲကနဖူးနေရာကို ဖိထားပါ။

အဲ့ဒီပုံစံအတိုင်းစက္ကန့် ၂၀ ကြာပြုလုပ်လျှင် နှာခေါင်းပြန်ပွင့်လာသလို ခံစားရမှာပါ။

(၂)ခေါင်းကိုအနောက်ဘက်စောင်းခြင်း

နှာခေါင်းပေါက်မှာ လက်နစ်ချောင်းဖြင့် ပိတ်ပါ။ ပါးစပ်ကနေ လေရှုသွင်းပြီး ခေါင်းကိုမော့၍‌အနောက်သို့လှန်ပါ။ အသက်အောင့်ထားပြီး ခေါင်းကိုအနောက်ကိုပဲ ဆက်မော့ထားပါ။
ထိုကဲ့သို့ပြုလုပ်ခြင်းက ဦးနှောက်ထံသို့ သတင်းရောက်ရှိပြီး နှာခေါင်းပွင့်လာစေရန် တုန့်ပြန်ပေးပါတယ်။

(၃) လက်မကိုအသုံးပြုခြင်း

ညာဘက်လက်မကို ဘယ်ဘက်ပါးရိုးအောက်ထားပါ။ နောက်ထပ်လက်တစ်ဖက်က နားရွက်ကို ၁၀ စက္ကန့်ဆွဲထားပါ။

ထိုကဲ့သို့ပြုလုပ်ခြင်းက ဘယ်ဘက်နှာခေါင်းပေါက် ပွင့်လာစေမှာဖြစ်ပြီး ဆန့်ကျင်ဘက်အတိုင်း ထပ်မံပြုလုပ်ရပါမယ်။

(၄)အသက်ရှုသွင်းနည်း

အရင်ဆုံးနှခေါင်းဖျန်းဆေးဖြင့် ပိတ်နေတဲ့နှာ‌ရည်တွေကို ပျော်အောင်လုပ်ရပါမယ်။ ထိုင်ပီးတော့ ပါးစပ်ပိတ်ကာ နှာခေါင်းကနေရှုသွင်းရှုထုတ်ပြုလုပ်ပြီး ၁၀ စက္ကန့်နှာခေါင်းပိတ်ရမယ်။

ခေါင်းကိုဟိုဘက်ဒီဘက်စောင်းပြီး အကြိမ်ရေများစွာ ပြုလုပ်သင့်ပါတယ်။

Source: The Jerusalem Post
#Yangon_Media_Group

Published 14 Dec 2022

အမေရိကန်စစ်တပ်ဟာ တောင်ကိုးရီးယားမှာ အာကာသတပ်ဖွဲ့တစ်ဖွဲ့ကို  ဗုဒ္ဓဟူးနေ့က တည်ထောင်လိုက်ပါတယ်။ အဲဒီအာကာသတပ်ဖွဲ့ဟာ  မြောက်ကိုးရီးယားမှ ပဲ့ထိန်းဒုံးကျည် ပစ်လွှတ်တာတွေကို ထောက်လှမ်းသိရှိဖို့ ပိုမိုထိရောက်စွာကူညီပေးနိုင်တော့မှာဖြစ်ပါတယ်။

မြောက်ကိုးရီးယားဟာ လေကြောင်းစစ်လက်နက်စမ်းသပ်မှုတွေကို ဒီနှစ်မှာ စံချိန်တင်ပြုလုပ်ခဲ့ကြပါတယ်။ အဲဒီစမ်းသပ် မှုတွေထဲမှာ ပြီးခဲ့တဲ့လကစမ်းသပ်ခဲ့တဲ့ တိုက်ချင်းပစ်ပဲ့ထိန်းဒုံးကျည်အသစ်လွင်ဆုံးတွေလည်းပါဝင်ပါတယ်။

“ အကာသတပ်ဖွဲ့ဟာ ပဲ့ထိန်းဒုံးကျည်ပစ်လွှတ်မှုတွေကို အချိန်နှင့်တပြေးညီနီးပါးမျှ ထောက်လှမ်းသိရှိ သတိပေးနိုင်  ပါလိမ့်မယ်” လို့ အမေရိကန်တပ်-ကိုးရီးယားက သတင်းထုတ်ပြန်ပါတယ်။

ကျွန်တော်တိုနှင့် ၄၈မိုင်လောက်ပဲကွာတဲ့နေရာမှာ လက်ငင်းခြိမ်းခြောက်မှုတစ်ခု တည်ရှိနေတယ်။ အဲဒီခြိမ်းခြောက်မှုကို ကျွန်တော်တို့ဟန့်တားရမယ်၊ကာကွယ်တိုက်ဖျက်ရမယ်။ လိုအပ်လာရင် တိုက်ခိုက်ရလိမ့်မယ်” လို့ အဲဒီအကာသတပ်ဖွဲ့ ကို ဦးဆောင်မယ့် ဒုတိယဗိုလ်မှူးကြီး ဂျိုဆွား မက်ကူလီယွန်းက ပြောပါတယ်။

ဒီတပ်ဖွဲ့သစ်ဟာ အမေရိကန်-ကိုရီးယားမဟာမိတ်ဖြစ်မှုအပေါ် ခိုင်မာတောင့်တင်းတဲ့ကတိကဝတ်ကို တိုးမြှင့်လိုက်ပြီလို့ သူက ဆက်လက်ပြောဆိုပါတယ်။

နျူကလီးယားလက်နက်ပိုင်မြောက်ကိုးရီးယားရဲ့ အန္တရာယ်ကနေ ကာကွယ်ရာမှာကူညီဖို့ တောင်ကိုရီးယားမှာ အမေရိကန် စစ်သား ၂၈၅၀၀ ဦးခန့်ရှိနေကြပါတယ်။ ၁၉၅၀-၅၃ ကိုရီးယားစစ်ပွဲကို စစ်ဆိုင်းသဘာတူညီမှုနှင့် အဆုံးသတ် ခဲ့ပေမယ့် ငြိမ်းချမ်းရေးစာချုပ်မဟုတ်တဲ့အတွက် နှစ်နိုင်ငံဟာ သဘောတရားအရ စစ်ပွဲဆက်ဖြစ်နေတုန်းပဲဖြစ်ပါတယ်။

၂၀၁၈ခုနှစ်မှာ သမ္မတဟောင်းဒေါ်နယ်ထရမ့်က အာကာသတပ်ဖွဲ့စည်းဖို့ အမိန့်ပေးခဲ့ပါတယ်။ ပင်တဂွန်ဟာ အာကာသမှာ ပျော့ကွက်တွေရှိနေတာကို ကိုင်တွယ်ဖြေရှင်းပြီး ဂြိုဟ်ပတ်လမ်းမှာ အမေရိကန်အသေအချာကြီးစိုးအောင်လုပ်ရမယ် လို့ပြောခဲ့ပါတယ်။

တောင်ကိုးရီးယားမှာ ယခုဖွဲ့ပေးလိုက်တဲ့ အာကသာတပ်ဖွဲ့ဟာ အမေရိကန်နိုင်ငံပြင်ပမှာ လုပ်ငန်းလုပ်ဆောင်နေတဲ့ အာကသာတပ်ဖွဲ့တွေထဲက တစ်ခုဖြစ်ပါတယ်။

ပြီးခဲ့တဲ့လကလည်း အမေရိကန်စစ်တပ်ဟာ ဟာဝိုင်ယီမှာ အင်ဒိုပစိတ်ဖိတ်စစ်တိုင်းက အာကာသတပ်တိုက်ပွဲဝင် စစ်ဌာန  ချုပ်တစ်ခုကို စတင်လည်ပတ်ခဲ့ပါတယ်။

တောင်ကိုးရီးယားလေတပ်ဟာ သူ့ရဲ့ကိယ်ပိုင်အာကာသ တပ်ဖွဲ့တစ်ခု ဒီလစောစောပိုင်းက ဖွဲ့စည်းခဲ့ပါတယ်။ အဲဒီတပ်ဖွဲ့က အမေရိကန်စစ်တပ်နှင့် အကာသစစ်ရေးဆိုင်ရာကိစ္စတွေပူးပေါင်းဆောင်ရွက်မှာဖြစ်ပါတယ်။

ကုလလုံခြုံရေးကောင်စီက မြောက်ကိုးရီးယားရဲ့ ပဲ့ထိန်းဒုံကျည်စမ်းသပ်မှုတွေကို  ကြိမ်ဖန်များစွာတားမြစ်ထား ပေမယ့်  ဆိုးလ်နှင့်တိုကျိုမဟာမိတ်တွေကို အကာအကွယ်ပေးနေတဲ့ ဝါရှင်တန်ရဲ့ လှုပ်ရှားမှုတွေကို တုန့်ပြန်ဖို့အတွက် စမ်းသပ်မှုတွေဟာ တရားဝင်တယ်လို့ မြောက်ကိုးရီးယားက ပြန်ချေပခဲ့ပါတယ်။

Source AFP

#US_South_Korea_Military_Alliance

#US_space-force_in_South_Korea

#Korea_Peninisula_tensions

#Local_News
Published _ 14 December 2022

ကိုဗစ်ကြောင့် ပိတ်ထားတဲ့ မဲဆောက်-မြဝတီ ချစ်ကြည်ရေးအမှတ် (၁) တံတားကို ဒီဇင်ဘာလအတွင်းမှာ ပြန်ဖွင့်ဖို့ လုပ်နေတယ်လို့ သိရပါတယ်။

#Yangon_Media_Group

#World_Species
Published 14 December 2022

ပန်းတွေဝတ်မှုန်ကူးရန် နေရာရှာဖွေနေတဲ့ ပျားမျိုးစိတ်တွေဟာ ကော်စတာရီကာရှိ ဟိုတယ်တစ်ခုကို ရောက်လာကြပါတယ်။

#Yangon_Media_Group