Published_ 18 November 2023

တရုတ်နိုင်ငံအနေဖြင့် မြန်မာနိုင်ငံကိုတရုတ်ခရီးသွားများပိုမိုလာရောက်နိုင်ရန်အတွက် TikTok တွင်“Myanmar Pavilion” ခရီးသွားမြှင့်တင်ရေးပလက်ဖောင်းဖွင့်ပြီးတရုတ်ခရီးသွားများကိုဆွဲဆောင်သွားမည်ဖြစ်ကြောင်း သိရသည်။

ယင်းကဲ့သို့ဆောင်ရွက်မည့်အကြောင်းကို မြန်မာ- တရုတ်ခရီးသွားမြှင့်တင်ရေး၏အမှုဆောင်ဥက္ကဌ Mr. David Liu @ Liu Wei ဦးဆောင်သော ကိုယ်စားလှယ်အဖွဲ့မှမြန်မာနိုင်ငံ၊ ဟိုတယ်နှင့်ခရီးသွားလာရေးဝန်ကြီးဌာန ဒုတိယဝန်ကြီး ဦးဖြိုးဇော်စိုးကိုလာရောက်တွေ့ဆုံစဉ်ထည့်သွင်းပြောကြားခဲ့ခြင်းဖြစ်သည်။

Mr. Liu Wei ဦးဆောင်သော ကိုယ်စားလှယ်အဖွဲ့က တရုတ်နိုင်ငံရှိ TikTok တွင် ဖွင့်လှစ်ထားသော “Myanmar Pavilion” ခရီးသွားမြှင့်တင်ရေး ပလက်ဖောင်းကို တရုတ်နိုင်ငံ၌ မိတ်ဆက်တင်ပြပြီး ယင်းပလက်ဖောင်းကို အသုံးပြု၍ မြန်မာနိုင်ငံ၏ခရီးသွားဆွဲဆောင်မှုများနှင့်ယဉ်ကျေးမှုများကို တရုတ်နိုင်ငံသားတိုင်းသိရှိစေရန် မိတ်ဆက်ပေးနိုင်ရေးအတွက် ခရီးသွားမြှင့်တင်ရေးဆိုင်ရာလုပ်ငန်းဆောင်ရွက်နေမှုအခြေအနေများကို တွေ့ဆုံတင်ပြခဲ့သည်။

မြန်မာနိုင်ငံ၊ ဟိုတယ်နှင့်ခရီးသွားလာရေးဝန်ကြီးဌာန ဒုတိယဝန်ကြီး ဦးဖြိုးဇော်စိုးကလည်း တရုတ်နိုင်ငံ၌ မြန်မာနိုင်ငံ၏ ခရီးစဉ်ဒေသများ၊ အစားအစာများ၊ ခရီးသွားဆွဲဆောင်ရာနေရာများ ကို မြှင့်တင်ကြော်ငြာ ရေးဆိုင်ရာကိစ္စရပ်များ၊ တရုတ်နိုင်ငံမှ social influencer များ၊ သတင်း မီဒီယာများ၊ ခရီးသွားဘလော့ဂါများနှင့် ခရီးသွားအေဂျင်စီများပါဝင်သော ရင်းနှီးကျွမ်းဝင်မှု ဆိုင်ရာခရီးစဉ် (Familiarization Trip- FAM Trip (ဖန်ထရစ်)) အား ပူးပေါင်းဆောင်ရွက်နိုင်ရေးဆိုင်ရာကိစ္စရပ်များကိုထည့်သွင်းဆွေးနွေးခဲ့သည်။

ယင်းအပြင်ဝန်ကြီးဌာနမှ တရုတ်ခရီးသွားများ ပိုမိုဝင်ရောက်လာရေးအတွက် အကောင်အထည်ဖော် ဆောင်ရွက်နေမှုအခြေအနေများ၊ ဒစ်ဂျစ်တယ်နည်းပညာအသုံးပြု၍ ခရီးသွားမြှင့်တင်ရေးဆိုင်ရာကိစ္စရပ်များအား ပူးပေါင်းဆောင်ရွက်သွားမည့် အခြေအနေများ၊ မြန်မာနိုင်ငံ၏ ဟိုတယ်နှင့်ခရီးသွားကဏ္ဍ၌ တရုတ်နိုင်ငံမှ ရင်းနှီးမြှုပ်နှံမည့်လုပ်ငန်းရှင်များအား ဖိတ်ခေါ်နိုင်ရေးအတွက် ဆောင်ရွက်သွားရမည့်ကိစ္စရပ်များ၊ တရုတ်နိုင်ငံ၌ မြန်မာနိုင်ငံနှင့် ပတ်သက်သော သတင်းတုသတင်းမှားများအား အမှန်သတင်းဖော်ပြနိုင်ရေးဆိုင်ရာကိစ္စရပ်များ၊ တရုတ်- မြန်မာ ခရီးသွားလုပ်ငန်းဆောင်ရွက်နေသူများအကြား communication channel တည်ဆောက်နိုင် ရေးနှင့် နှစ်နိုင်ငံခရီးသွားလုပ်ငန်း ဖွံဖြိုးတိုးတက်ရေးဆိုင်ရာကိစ္စရပ်များအား အပြန်အလှန် ဆွေးနွေးခဲ့ကြကြောင်း သိရသည်။
#Yangon_Times/tthl
#Local_News
#Published_ 18 November 2023
#YMG #Yangon_Times #Yangon_Media_Group #YMG_News