#Health_Tips
Published 30 September 2022

တစ်နေ့ သွားနှစ်ကြိမ်တိုက်ပေးခြင်းဖြင့် သွားပျက်စီးခြင်းမှ ကာကွယ်ပေးနိုင်ကြောင်း သိရှိထားပြီဖြစ်သလို သွားတွေကို အကောင်းဆုံးဖြစ်အောင်ထိန်းသိမ်းခြင်းဖြင့် သွားသက်တမ်းပိုမိုကြာရှည်စေကြောင်း သုတေသီများ တွေ့ရှိထားတာ ကြာပါပြီ။

လူတွေမှာ အဖြစ်အများဆုံးနာတာရှည်ရောဂါတွေထဲမှာ သွားဖုံးရောဂါလည်း အပါအဝင်ဖြစ်ပြီး ကမ္ဘာတဝှမ်းရှိ လူပေါင်း ၂၀ မှ ၅၀ ရာခိုင်နှုန်းလောက် ခံစားနေကြရပါတယ်။

ဒီရောဂါဟာ အစပိုင်းမှာ သွားဖုံးရောင်ခြင်းလက္ခဏာ ဖြစ်ပေါ်တတ်ပြီး ပုံမှန်သွားကြိုသွားကြား သန့်ရှင်းရေးလုပ်ပေးရင် အပြည့်အဝကောင်းမွန်လာပါတယ်။

သွားဖုံးရောဂါဟာ မကုသဘဲထားလိုက်ရင် သွားဆုံးရှုံးရသည်အထိ ဖြစ်တတ်ပါတယ်။

တွေ့ရှိချက်များအရ သွားဖုံးရောဂါကနေတဆင့် အခြားကျန်းမာရေးအခြေအနေများ ဆိုးရွားသည်အထိ ဖြစ်လာတတ်ပါတယ်။

(၁) အယ်လ်ဇိုင်းမားရောဂါ
မှတ်ဉာဏ်တဖြည်းဖြည်းချို့ယွင်းလာတဲ့ အယ်လ်ဇိုင်းမားရောဂါဟာ သွားဖုံးရောဂါနဲ့ ဆက်စပ်နေပါတယ်။

သွားဖုံးရောဂါဖြစ်ရတဲ့ ဘက်တီးရီးယားတစ်မျိုးကို အယ်လ်ဇိုင်းမားရောဂါကြောင့် သေဆုံးသွားသူရဲ့ဦးနှောက်ထဲမှာ တွေ့ရှိဖူးပါတယ်။

ခံတွင်းကျန်းမာရေးဂရုစိုက်ရင် အယ်လ်ဇိုင်းမားရောဂါဖြစ်လာနိုင်ချေကို လျှော့ချနိုင်မယ့် အလားအလာရှိပါတယ်။

(၂) နှလုံးသွေးကြောရောဂါ
နှလုံးသွေးကြောရောဂါကလည်း သွားဖုံးရောဂါနဲ့ဆက်စပ်နေပါတယ်။
သွားဖုံးရောင်ရမ်းတဲ့အခါ ခန္ဓာကိုယ်ကတုံ့ပြန်တဲ့အနေနဲ့ နျူထရိုဖီးလ်ဆဲတွေ ထွက်လာကာ ထိုဆဲလ်တွေက သွေးကြောနံရံကဆဲလ်တွေကို ပျက်စီးစေပါတယ်။

(၃) ဆီးချိုရောဂါဒုတိယအမျိုးအစား
သွားဖုံးရောဂါ ကြာရှည်လာတဲ့အခါ ဆီးချိုရောဂါဒုတိယအမျိုးအစားလည်း ဖြစ်လာနိုင်ချေများပါတယ်။

သွားဖုံးရောဂါဖြစ်တဲ့အခါ အင်ဆူလင်ဟော်မုန်းအလုပ်မလုပ်နိုင်ဘဲ ဆီးချိုရောဂါဖြစ်လာရတာ ဖြစ်ပါတယ်။

(၄) ကင်ဆာများ
သွားဖုံးရောဂါကနေ ကင်ဆာရောဂါအမျိုးမျိုး ဖြစ်ပေါ်လာနိုင်ပါတယ်။
သွားဖုံးရောင်ရမ်းခြင်းကြောင့် ဆဲလ်များ ပုံမှန်အတိုင်းကျန်းမာစွာ မလုပ်ဆောင်နိုင်တော့ကာ သွားဖုံးရောဂါနဲ့ အကျိတ်ကြီးလာတာမျိုး ကြုံတွေ့ရတတ်ပါတယ်။

သွားဖုံးရောဂါကို ကြိုတင်ကာကွယ်နိုင်သလို ဖြစ်ခါစအစောပိုင်းမှာ ကုသလိုရပါတယ်။

အချိုဓာတ်လျှော့စားခြင်း၊ အရက်နဲ့ဆေးလိပ် ရှောင်ရှားခြင်းတို့၊ စိတ်ဖိစီးမှုကင်းဝေးအောင် နေထိုင်ခြင်းတို့ဖြင့် ကာကွယ်နိုင်ပါတယ်။

သွားထဲမှာ ဖလိုရိုက်ဓာတ်ကြာမြင့်စွာ ရှိနေစေရန် သွားတိုက်ပြီးတဲ့အခါ ချက်ချင်းပလုတ်မကျင်းဖို့ လိုအပ်ပါတယ်။

စိတ်ကျရောဂါကုဆေးများနဲ့ သွေးတိုးကျဆေးတို့လို အချိုသောဆေးများက တံတွေးထွက်ခြင်းကို လျော့နည်းစေကာ သွားဖုံးရောဂါဖြစ်နိုင်ချေ များစေပါတယ်။

Source: The Sun
#Yangon_Media_Group

#World_Health
Published 30 September 2022

ရှေးခေတ်ကာလတုန်းက ဗိုင်းရပ်စ်ကူးစက်ခံရခြင်းကနေ ကျန်ခဲ့တဲ့ ကြွက်ခရိုမိုဆုန်းထဲက မျိုးရိုးဗီဇဆဲလ် ၂ မျိုးဟာ ဦးနှောက်ထဲက ရောဂါကူးစက်မှုအသစ်တွေကို တိုက်ခိုက်နိုင်တယ်လို့ တွေ့ရှိခဲ့ကြပါတယ်။

ဒီအချက်အလက်က ယနေ့ခေတ် ဆေးပညာလောကအတွက် ကြီးမားတဲ့သက်ရောက်မှုတွေ ရှိလာနိုင်ကြောင်း ဂျပန်နိုင်ငံမှ သုတေသနလေ့လာချက်ကို Development ဇီဝဗေဒဂျာနယ်မှာ အင်္ဂါနေ့က ဖော်ပြခဲ့ကြပါတယ်။

retrotransposon Gag-like' 5 နဲ့ 6 (Rtl5 နဲ့ Rtl6) မျိုးရိုးဗီဇတွေကို နို့တိုက်သတ္တဝါတိုင်းနီးပါးမှာ တွေ့ရှိရပါတယ်။

သူတို့ဟာ HIV လို retro ဗိုင်းရပ်စ်တွေမှာ တွေ့ရတဲ့မျိုးရိုးဗီဇတွေနဲ့ ဆင်တူတာတွေရှိနေပါတယ်။

ဒီဗိုင်းရပ်စ်တွေက ဗိုင်းရပ်စ်မျိုးရိုးဗီဇဆဲလ်တွေဖြစ်ပေမယ့် နှစ်ပေါင်းသန်း ၁၀၀ ကျော်သည့်တိုင်အောင် နို့တိုက်သတ္တဝါမျိုးရိုးဗီဇထဲမှာ ရှင်သန်နေတာကြောင့် အရေးကြီးတဲ့လုပ်ဆောင်ချက်တွေ ရှိနေနိုင်တယ်လို့ သုတေသီများက ယူဆနေကြပါတယ်။

သိပ္ပံပညာရှင်များ လေ့လာကြည့်ရာမှာတော့ ထိုမျိုးရိုးဗီဇတွေဟာ မိုက်ခရိုဂလီယာဆဲလ်တွေ ဖြစ်ပါတယ်။

မိုက်ခရိုဂလီယာဆဲလ်တွေက ပင်မအာရုံကြောစနစ်ရဲ့ အဓိကရောဂါခုခံကာကွယ်ရေးအဖြစ် ဆောင်ရွက်ပေးပါတယ်။

"လွန်ခဲ့တဲ့ ၁၅ နှစ် စတင်လေ့လာခဲ့တုန်းက Rtl6 နဲ့ Rtl5 တို့က မိုက်ခရိုဂလီယာတွေလို လုပ်ဆောင်လိမ့်မယ်လို့ မထင်ခဲ့မိပါဘူး၊ Rtl6 က မိုက်ခရိုဂလီယာမျိုးရိုးဗီဇဖြစ်ပေမယ့် သူ့ရဲ့အရေးပါပုံကို နားမလည်ခဲ့ကြပါဘူး" လို့ တိုကျိုဆေးဘက်ဆိုင်ရာ တက္ကသိုလ်မှ ဦးဆောင်သုတေသီဒေါက်တာ'ကာနဲကိုအီရှီနို'က ပြောပြခဲ့ပါတယ်။

ဒေါက်တာ'အီရှီနို'က ကြွက်ဦးနှောက်ကို သေချာဖယ်ရှားခွဲစိတ်နေစဉ်မှာ အခုလိုတွေ့ရှိခဲ့တာဖြစ်ပြီး ဦးနှောက်ပျက်စီးသွားတယ်ဆိုရင် Rtl6 ကို လှုံ့ဆော်ပေးလိုက်လို့ ရပါတယ်။

မျိုးရိုးဗီဇဆဲလ်တွေက ဘက်တီးရီးယားနဲ့ ဗိုင်းရပ်စ်တွေကို ဘယ်လိုတုံ့ပြန်သလဲဆိုတာသိရဖို့ ကြွက်ဦးနှောက်တွေမှာ ရောဂါကူးစက်စေခဲ့ပါတယ်။

Rtl5 က ဘက်တီးရီးယားလို ရောဂါကူးစက်မှုတွေကို တုံ့ပြန်နိုင်ပြီး Rtl6 ကတော့ ဘက်တီးရီးယားရော ဗိုင်းရပ်စ်တွေပါ တုံ့ပြန်နိုင်တယ်ဆိုတာကို သတိထားမိခဲ့ကြပါတယ်။

နောက်ထပ်စမ်းသပ်မှုမှာတော့ Rtl5 နဲ့ Rtl6 တွေကို ဖယ်ရှားလိုက်ရာမှာ ကြွက်တွေက ရောဂါကူးစက်ခံရခြင်းကနေ မသက်သာတော့ပါဘူး။

ဒါကြောင့် ဒီမျိုးရိုးဗီဇဆဲလ်တွေဟာ ဦးနှောက်ရဲ့ အဖြစ်အများဆုံးရောဂါကူးစက်မှုတွေကို အဓိကကာကွယ်ပေးတဲ့နေရာမှာ ပါဝင်ကြောင်း တွေ့ရှိခဲ့ကြပါတယ်။

"ဗိုင်းရပ်စ်ကနေရရှိတဲ့ မျိုးရိုးဗီဇဆဲလ်တွေက ခရိုမိုဆုန်းတွေရဲ့ အဓိကအစိတ်အပိုင်းဖြစ်ပြီး နို့တိုက်သတ္တဝါတွေနဲ့ လူသားဖွံ့ဖြိုးတိုးတက်လာရာမှာ အရေးပါတဲ့ကဏ္ဍကနေ ပါဝင်နေခဲ့ပါတယ်" လို့ သုံးသပ်ပြထားပါတယ်။

Source: The Jerusalem Post
#Yangon_Media_Group

#World_Technology
Published 29 September 2022

တရုတ်နိုင်ငံမှ ကုန်းရေနှစ်သွယ်သွားနိုင်တဲ့ မီးသတ်လေယာဉ် AG600M ဟာ ရေ ၁၂ တန်ဖြည့်ခြင်းနဲ့ ရေဖြန့်ကျဲခြင်းတို့ကို အင်္ဂါနေ့က စမ်းသပ်အောင်မြင်ခဲ့ပြီး တကယ်လက်တွေ့အသုံးချနိုင်ဖို့ နီးစပ်နေပြီဖြစ်ပါတယ်။

#Yangon_Media_Group

Published 29 Sept 2022

ဘရာဇီးနိင်ငံ မြောက်ပိုင်း အမေဇုန်နာ့စ်ပြည်နယ်၊ကဲရီယိုမြို့ က တံတားတစ်စင်း  ဗုဒ္ဓဟူးနေ့က ပြိုကျခဲ့ရာ အနည်းဆုံး လူ(၃)ဦး သေဆုံးကာ ၁၅ ဦးပျောက်ဆုံးနေပါတယ်။

အမေဇုန်နာ့စ် မီးသတ်ဌာနဟာ ပျောက်ဆုံးနေသူတွေကို ဆက်လက်ရှာဖွေနေပါတယ်။ အဲဒီံတံတားဟာ ကဲရီယိုမြို့ကို ဖြတ်သွားတဲ့ BR-319 အမြန်လမ်းမကြီးပေါ်မှာ ရှိပါတယ်။ ကဲရီယိုမြို့ဟာ ပြည်နယ်မြို့တော် မန်နော့စ်မြို့မှ ၆၂ မိုင် အကွာမှာရှိပါတယ်။

တံတားပြိုကျချိန်မှာ အချို့ကားတွေဟာ တံတားပေါ်ကဖြတ်သန်းမောင်နှင်နေတာကြောင့် လူ(၁၄)ဦး ထိခိုက်ဒဏ်ရာရရှိခဲ့ပါသေးတယ်။ တံတားမပြိုကျခင် တံတားပေါ်မှာ ယာဉ်ကြောပိတ်ဆို့မှုရှိခဲ့လို့ တံတားဟာ အက်ကြောင်းရာထင်ခဲ့တယ်လို့ မျက်မြင်သက်သေတော်တော်များများကပြောကြပါတယ်။

Source AFP/Reuters

#Amazonas_Brazil

#Bridge_Collapse

#Brazil

#DailyNews
Published _ 29 September 2022

၁။ နယ်ဘက်တွင် ငြုတ်သီးအစိုရောင်းချမှု ပိုများနေ၍ ငြုတ်သီးအခြောက်ဈေး ၂သောင်းကျော်သို့ မြင့်တက်နေနေ

၂။ ရွှေတိဂုံရှိပျက်ဆီးမှုများသည့် အရံစေတီတော်(၂၀)ဆူကို ယခုနှစ်အတွင်းရွှေသင်္ကန်းအသစ် ကပ်လှူပူဇော်မည်

၃။ ကိုဗစ်-၁၉ ရန်ပုံငွေမှ ခရီးသွားကဏ္ဍကို ငွေကျပ် ၃ ဘီလီယံ ထုတ်ချေးထား

၄။ တရုတ်နိုင်ငံ၏ AG600M မီးသတ်လေယာဉ် ရေဖြည့်ခြင်းနှင့် ရေဖြန်းချခြင်းတို့အား အောင်မြင်စွာ စမ်းသပ်နိုင်ခဲ့ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Health
Published 29 September 2022

ကိုယ်ဝန်ဆောင်စဉ် စိုးရိမ်ပူပန်နေခြင်းက လမစေ့ဘဲမွေးနိုင်ချေ ပိုများကြောင်း လော့စ်အိန်ဂျလိစ် ကယ်လီဖိုးနီးယားတက္ကသိုလ်မှ သုတေသီများက လေ့လာတွေ့ရှိထားပါတယ်။

စိုးရိမ်ပူပန်စိတ်က အန္တရာယ်ဖြစ်လာနိုင်တဲ့ အကြောင်းအရင်းလားဆိုတာ သေချာသိရှိရန် နောက်ထပ်ကိုယ်ဝန်ဆောင်များကို စစ်ဆေးဖို့ တောင်းဆိုနေကြပါတယ်။

ကိုယ်ဝန်ဆောင် ၄ ယောက်မှာ ၁ ယောက်နှုန်းက စိုးရိမ်ပူပန်မှုတွေ ခံစားရတယ်လို့ အရင်ကလည်း တွေ့ရှိထားပါတယ်။

စိုးရိမ်ပူပန်တဲ့အခါ စိတ်ဖိစီးမှုဟော်မုန်းထွက်လာပြီးတော့ စောစီးစွာမွေးဖွားတတ်ပါတယ်။

၃၇ ပတ်မတိုင်ခင် စောမွေးလာတဲ့ကလေးတွေဟာ အသက်ရှူခက်ခဲတဲ့ပြဿနာများ၊ ရောဂါကူးစက်မှုများ၊ အသည်းရောင်အသားဝါ စသဖြင့် ဖြစ်နိုင်ချေများပါတယ်။

ဒါ့အပြင် စာသင်တဲ့အခါ ပိုပြီးအခက်အခဲတွေ့လာရတတ်ပါတယ်။
အမေရိကန်မှာ ကလေးအယောက် ၁၀၀ မွေးရင် ၁၀ ယောက်လောက်က စောမွေးတတ်ပါတယ်။

အမေရိကန်မှ အသက် ၃၁ နှစ်ပျမ်းမျှရှိတဲ့ ကိုယ်ဝန်ဆောင် ၁၉၆ ယောက်ကို လေ့လာခဲ့ကြကာ ၅၅ ရာခိုင်နှုန်းလောက်က ပထမကိုယ်ဝန်တွေဖြစ်ပါတယ်။

ကိုယ်ဝန်ကာလအပိုင်းအခြားအလိုက် သုတေသီတွေက စိတ်ဖိစီးမှုအတိုင်းအတာ ၄ မျိုးနဲ့ စမ်းသပ်ခဲ့ကြပါတယ်။

မွေးဖွားခြင်း၊ ပြုစုပျိုးထောင်ခြင်း၊ ငွေရေးကြေးရေးများနဲ့ပတ်သက်ပြီး ကိုယ်ဝန်ဆောင်ကာလအတွင်း စိုးရိမ်ပူပန်များအကြောင်း မေးမြန်းခဲ့ကြပါတယ်။

၂၀၁၃ မှ ၂၀၁၈ အတွင်း မွေးခဲ့တဲ့သူတွေကို လေ့လာခဲ့ကြတာကြောင့် ကိုဗစ်ကပ်ရောဂါနဲ့တော့ မသက်ဆိုင်ခဲ့ပါဘူး။

ကိုယ်ဝန်ဆောင်ကာလပထမအပိုင်းအခြားအတွင်း စိုးရိမ်ပူပန်စိတ်များခဲ့တဲ့သူတွေက စောစီးစွာမွေးဖွားနိုင်ချေများခဲ့တာကို သိသိသာသာတွေ့ရှိရပါတယ်။

ဆေးလိပ်သောက်ခြင်း၊ အဝလွန်ခြင်းစတဲ့ အချက်အလက်များပါ ထည့်တွက်ရင်တောင် ရလာဒ်တွေက အတူတူပဲဖြစ်ပါတယ်။

လူတစ်ယောက်က မွေးဖွားခြင်း၊ ငွေရေးကြေးရေးကိစ္စတွေမှာ အချိန်ကြာမြင့်စွာ စိုးရိမ်လာရာကနေ တော်တော်နဲ့ ခံစားမှုလျော့ပါးမသွားပါဘူး။

ဂနာမငြိမ်ခြင်း၊ အထိမခံခြင်း၊ ကိုယ်ဝန်ဆောင်ကာလအတွင်း အာရုံမစူးစိုက်နိုင်ခြင်းတို့က စိုးရိမ်ပူပန်ခြင်းရဲ့လက္ခဏာတွေပါ။

စိတ်ဖိစီးခြင်းနဲ့ လမစေ့မွေးဖွားခြင်းတို ဆက်စပ်နေပေမယ့် အကြောင်းအရင်းကိုတော့ လေ့လာနေကြဆဲဖြစ်ပါတယ်။

Source: Daily Mail
#Yangon_Media_Group