#Health_Tips
Published 21 August 2022

ရေမိုးချိုးလိုက်ရင် လူကလန်းဆန်းပြီး အားပြည့်သွားသလိုခံစားရစေပါတယ်။

ဒါပေမဲ့ ရေပူချိုးခြင်းနဲ့ ရေအေးချိုးခြင်းကလည်း အကျိုးသက်ရောက်မှု ကွဲပြားမှုရှိနေပါတယ်။

*ရေပူချိုးခြင်း၏ အကျိုးကျေးဇူးများ

- လန်းဆန်းပေါ့ပါးစေခြင်း

ရေအပူချိန် ၃၈ နဲ့ ၃၉ ဒီဂရီထက်မပိုတဲ့ ရေနဲ့ချိုးရင် အတော်ကိုအကြောပြေလန်းဆန်းစေပါတယ်။

ရေနွေးနဲ့ထိလိုက်တာနဲ့ ကြွက်သားတွေ ပြေလျော့သွားတာကို ခံစားမိမှာပါ။

ကြွက်သားတောင့်တင်းနေတာတွေလည်း ချက်ချင်းသက်သာစေပါတယ်။

ရေနွေးနဲ့ချိုးခြင်းဖြင့် အသက်ရှူနှုန်းကို နှေးစေတာကြောင့် အဆုတ်နက်ရှိုင်းတဲ့အထိ သေချာလေးအသက်ရှူသွင်းမိပါတယ်။

- အသားအရည်သန့်စင်စေခြင်း

ရေနွေးက အရေပြားပေါ်ကချွေးပေါက်တွေကို ကျယ်စေပါတယ်။

ဒါကြောင့် အရေပြားက အဆိပ်အတောက် အဆီအညစ်အကြေးတွေကို ထိရောက်စွာ ဖယ်ရှားပေးနိုင်ပါတယ်။

ဒါပေမဲ့ ရေနွေးအပူချိန်သိပ်မများဖို့ကိုတော့ ဂရုစိုက်ရပါမယ်။

*ရေအေးချိုးခြင်း၏ အကျိုးကျေးဇူးများ

- ခန္ဓာကိုယ်အတွက် အားအင်ဖြစ်စေခြင်း

ရေချိုးတဲ့အခါ ခန္ဓာကိုယ်မှာ အားအင်ရှိလာသလို ခံစားရစေပါတယ်။

ခန္ဓာကိုယ်ကို လှုံ့ဆော်ပေးပြီး ကြွက်သားတွေကို နှိုးဆွပေးပါတယ်။

တစ်နေ့တာအတွက် တက်တက်ကြွကြွနဲ့ အဆင်သင့်ဖြစ်နေချင်ရင် ရေအေးချိုးခြင်းက အကောင်းဆုံးပါ။

ရေအေးချိုးတဲ့အခါ ကယ်လိုရီလောင်ကျွမ်းဖို့ ပိုမိုလှုပ်ရှားရတာကြောင့် ကိုယ်အလေးချိန်ကျခြင်းကို အထောက်အကူဖြစ်စေပါတယ်။

- ကိုယ်ခံအားစနစ်ကိုမြှင့်တင်ပေးခြင်း

အပူချိန် ၁၅ ဒီဂရီဆဲလ်စီးယပ်စ်ရေအေးကို ချိုးခြင်းဖြင့် ခန္ဓာကိုယ်ကနေ သွေးဖြူဥများ ပိုမိုထွက်ရှိစေပါတယ်။

သွေးဖြူဥတွေက ပြင်ပရောဂါပိုးမွှားထံမှ ကာကွယ်ပေးတာကြောင့် ကိုယ်ခံအားစနစ်ကို မြှင့်တင်ပေးနိုင်တာဖြစ်ပါတယ်။

ဒါ့အပြင် သွေးလည်ပတ်မှုကို ကောင်းစေတာကြောင့် အောက်ဆီဂျင်လုံလောက်စွာရရှိစေပါတယ်။

ရေအေးနဲ့ ရေနွေးက သူ့အားသာချက်နဲ့သူ ရှိနေတာကြောင့် မိမိနဲ့ကိုက်ညီတဲ့ အပူချိန်အလိုက် ရေချိုးဖို့ကသာ အရေးပါတယ်။

ရေနွေးနဲ့ချိုးတဲ့အခါ ၁၀ မိနစ်ထက် မကျော်သင့်ဘဲ ရေအေးချိုးတဲ့အခါမှာတော့ ရေအပူချိန်ကို ဖြည်းဖြည်းချင်းလျှော့ချသွားသင့်ပါတယ်။

Source: Soo Healthy
#Yangon_Media_Group

#World_Health
Published 21 August 2022

ကိုဗစ်ကပ်ရောဂါအစတုန်းက သိပ္ပံပညာရှင်များဟာ ၁၉၀၀ ခုနှစ်တွေကထုတ်လုပ်ခဲ့တဲ့ တီဘီကာကွယ်ဆေးဖြင့် ခုခံအားမြှင့်တင်ပြီး ကိုဗစ်ရောဂါကိုကာကွယ်ပေးနိုင်မလားဆိုပြီး စမ်းသပ်ခဲ့ကြပါတယ်။

Bacillus-Calmette-Guerin ဆိုတဲ့ ကာကွယ်ဆေးဟာ ကိုယ်ခံအားကို ကောင်းစွာမြှင့်တင်ပေးနိုင်ပြီး အခုအချိန်အထိ တီဘီကူးစက်နိုင်သေးတဲ့ ဖွံ့ဖြိုးဆဲနိုင်ငံတွေမှာ မွေးကင်းစကလေးတွေကို ထိုးပေးနေဆဲဖြစ်ပါတယ်။

ထိုကာကွယ်ဆေးဟာ ဗိုင်းရပ်စ်၊ ဘက်တီးရီးယား၊ ပါရာဆိုက် စတဲ့ ကူးစက်ရောဂါအမျိုးမျိုးကို ခုခံနိုင်ရန် ကိုယ်ခံအားစနစ်အားမြှင့်တင်ပေးပြီး ကလေးငယ်တွေရဲ့ အသက်သေဆုံးနိုင်ချေကို လျှော့ချပေးနိုင်ပါတယ်။

မျောက်ကျောက်ရောဂါနဲ့ ပိုလီယိုတိုပါ ပြန်လည်ထွက်ပေါ်လာပြီး ကိုရိုနာဗိုင်းရပ်စ်ကလည်း ဆင့်ကဲပြောင်းလဲလာတဲ့အချိန်မှာ ရောဂါအမျိုးမျိုးကို ကာကွယ်ပေးနိုင်ဖွယ်ရှိနေတဲ့ ကာကွယ်ဆေးအဟောင်းကို သိပ္ပံပညာရှင်များ ပြန်လည်စိတ်ဝင်စားလာကြပါတယ်။

၂၀၂၀ ခုနှစ် ဇန်နဝါရီလ ကိုဗစ်ကပ်ရောဂါစတင်ချိန်မှာ ဆီးချိုရောဂါလူနာ ၁၄၄ ယောက်ကို လေ့လာခဲ့ပါတယ်။

လူ ၃ ပုံ ၂ ပုံဟာ ကပ်ရောဂါမတိုင်ခင်က တီဘီဆေးအနည်းဆုံး ၃ ကြိမ်ထိုးထားပြီး ကျန်လူနာတွေကတော့ အာနိသင်မပါတဲ့ဆေးများ ထိုးပေးခဲ့ပါတယ်။

တီဘီဆေးထိုးထားတဲ့လူနာတွေထဲက ၁ ရာခိုင်နှုန်းကသာ ကိုဗစ်ရောဂါဖြစ်ပွားခဲ့ပြီး ကာကွယ်ဆေးမထိုးတဲ့ လူတွေထဲကတော့ ၁၂.၅ ရာခိုင်နှုန်းဟာ ကိုဗစ်ကူးစက်ခဲ့ပါတယ်။

စမ်းသပ်ချက်အတိုင်းအတာက ကျဉ်းမြောင်းပေမယ့် ရလာဒ်တွေကတော့ မိုဒါနာနဲ့ ဖိုင်ဇာကာကွယ်ဆေးတွေလိုပဲဖြစ်ကြောင်း မာဆာချူဆက်အထွေထွေဆေးရုံမှ ဒေါက်တာ'ဒန်နစ်ဖော့စ်မန်'က ပြောပြခဲ့ပါတယ်။

ထိုကာကွယ်ဆေးက ထိုးနှံသူရဲ့ကိုယ်ခံအားစနစ်ကို အသစ်ဖြစ်အောင်ပြုလုပ်ပေးတဲ့ ပုံစံမျိုးဖြစ်ပါတယ်။

နှလုံးရောဂါ၊ အဆုတ်ရောဂါရှိတဲ့ နောက်ထပ်လူနာ ၃၀၀ ကိုလည်း တီဘီဆေးဖြင့်စမ်းသပ်ခဲ့ရာ လူ ၃ ပုံ ၂ ပုံမှာ ကိုဗစ်ရောဂါကူးစက်မှုကို ကာကွယ်နိုင်ခဲ့ပြီး အသက်ရှူလမ်းကြောင်းဆိုင်ရာ အခြားရောဂါတွေကိုလည်း ကာကွယ်ပေးနိုင်ခဲ့ကြောင်း ဆိုပါတယ်။

အချို့တွေက တီဘီကာကွယ်ဆေးရဲ့အစွမ်းကို ယုံကြည်ကြပေမယ့် အချို့ကတော့ မယုံကြည်ကြပါဘူး။

"ဆေးက အခြားသက်ရောက်မှုတွေရှိတယ်ဆိုပေမယ့် ဘယ်လောက်များသိသာတဲ့လက္ခဏာ ဖြစ်နေလို့လဲ" လို့ ဩစတြေးလျ မဲလ်ဘုန်းတက္ကသိုလ်မှ ကလေးအထူးကုဒေါက်တာ'နိုင်ဂျယ်ကာတစ်'က ဆိုပါတယ်။

ဆယ်စုနှစ်များတိုင်အောင် တီဘီဆေးကို ဓာတ်ခွဲခန်းထဲမှ ဘက်တီးရီးယားနဲ့ထုတ်လုပ်ခဲ့ပါတယ်။

ထိုးနှံခြင်းအကြိမ်အရေအတွက်က ခုခံအားအပေါ်သက်ရောက်မှုရှိနေပြီး ကာကွယ်နိုင်စွမ်းအပြည့်အဝရနေဖို့ ထပ်ခါထပ်ခါထိုးနှံဖို့ လိုအပ်နိုင်ပါတယ်။

တီဘီဆေးကို နောင်ထွက်ပေါ်လာနိုင်တဲ့ ကိုရိုနာဗိုင်းရပ်စ်မျိုးဗီဇကွဲတွေအတွက် ရည်ရွယ်ပြီး ထုတ်လုပ်ချင်ကြတာဖြစ်ပါတယ်။

Source: New York Times
#Yangon_Media_Group

#World_Climate
Published 20 August 2022

'မာ့ခ်ကိုဝမ်ဟိုဗန်'နဲ့ ငါးဖမ်းအဖွဲ့က နယ်သာလန်နိုင်ငံရှိ ခန်းခြောက်နေတဲ့ ရေကန်ထဲကငါးတွေကို ရေပုံးထဲပစ်ထည့်နေကြပါတယ်။

#Yangon_Media_Group

Published: 20 Aug 2022

အိန္ဒိယရဲ့ ဖျော်ဖြေရေးမြို့တော်ဖြစ်တဲ့ မွမ်ဘိုင်းမှာ ရာစုနှစ်တစ်စုနီးပါးမျှ  လန်ဒန်စတိုင် နှစ်ထပ်ဘတ်စ်ကားတွေကို တိုးချဲ့ပြေးဆွဲလာခဲ့ရာမှာ ယခုတစ်ခါတိုးချဲ့လိုက်တာကတော့ ယခင်နှင့်မတူလှပါဘူး။ ဒီတစ်ခါနှစ်ထပ်ဘတ်စ်ကားတွေကို လျှပ်စစ်ကားတွေအဖြစ် ထပ်မံတိုးချဲ့လိုက်တာဖြစ်ပါတယ်။

ဒီဇင်ဘာလကစပြီး ပထမဆုံး လျှပ်စစ် နှစ်ထပ်ဘတ်စ်ကားကြီး အစင်းရေ ၂၀၀ဟာ မမ်ဘိုင်းရဲ့ အလုပ်များလှတဲ့ လမ်းတွေ အပေါ် ပြေးဆွဲတော့မှာပါ။ အဲဒီကားကြီးတွေဟာ လောလောဆယ်ပြေးဆွဲနေတဲ့ လျှပ်စစ် တစ်ထပ်ဘတ်စ်ကား အစီးရေ ၄၀၀ နှင့်အတူ ပူးပေါင်းကြ ပါလိမ့်မယ်။

လူဦးရေ၁.၄ဘီလျံရှိနေတဲ့ အိန္ဒိယနိုင်ငံဟာ ကမ္ဘာပေါ်မှာ ကာဘွန်အထုတ်လုပ်မှု  တတိယမြောက် အများဆုံးနိုင်ငံဖြစ်နေလို့ အစိုးရဟာ ၂၀၇၀ အရောက်မှာ ကာဘွန်ထုတ်လုပ်မှုလုံးဝမရှိစေရေးလျှော့ချဆောင်ရွက်နိုင်ဖို့ ကြိုးစားနေရပါတယ်။

ကမ္ဘာပေါ်မှာ လေထုအညစ်ညမ်းဆုံးမြို့တွေထဲမှာ ပါဝင်နေတဲ့ အိန္ဒိယရဲ့ အချို့မြို့တွေဟာ လေထုညစ်ညမ်းမှုကိုလျှော့ချဖို့ လိုအပ်နေတဲ့အတွက် လျှပ်စစ်သုံး အများပြည်သူသယ်ယူပို့ဆောင်ရေးကို မြှင့်တင်ဆောင်ရွက်နေရတာဖြစ်ပါတယ်။

ယခုလျှပ်စစ်ဘတ်စ်ကားတွေကို အိန္ဒိယကားထုတ်လုပ်တဲ့ ကုမ္ပဏီကြီးဖြစ်တဲ့ အာရှော့လေးလန်းရဲ့ အစိတ်အပိုင်းတစ်ခုဖြစ်တဲ့ ဆွစ် မိုဘီလတီ Switch Mobility က ဖန်တီးထုတ်လုပ်တာပါ။

ကုမ္ပဏီက ထုတ်လုပ်တဲ့ အလားတူ နှစ်ထပ်လျှပ်စစ်ဘတ်စ်ကားတွေကို ၂၀၁၄ခုနှစ်ကတည်းက လန်ဒန်မှာ ပြေးဆွဲနေပြီ ဖြစ်ပါတယ်။

“ လျှပ်စစ်ဓာတ်အားသုံးယာဉ်တွေကို သာမာန်ပြည်သူတွေသုံးစွဲလာစေချင်ပါတယ်။ ဒါမှ နက်ဇီးရိုးဆိုတဲ့ ရည်မှန်းချက်ကို ရရှိမှာဖြစ်ပါတယ်။ဘတ်စ်ကား အစင်း၂၀၀ ကြောင့် နှစ်စဉ် မြို့မှာ အပင် ၈၆၀၀၀(ရှစ်သောင်းခြောက်ထာင်)စိုက်ပေးတာနှင့်ညီမျှပါတယ်။” လို့ ဆွစ်မိုဘီလတီအိန္ဒိယရဲ့ အမှုဆောင်အရာရှိချုပ် မာဟက်ရှ် ဘာဘူက ကြာသပတေးနေ့မှာ ပြုလုပ်တဲ့ ဘတ်စ်ကားအသစ်ကို ပြသတဲ့ ပွဲမှာအေအက်ဖ်ပီကိုပြောပါတယ်။

he Switch EiV 22 လျှပ်စစ် နှစ်ထပ်ဘတ်စ်ကားတွေဟာ  အိန္ဒိယမှာထုတ်လုပ်ပြီး ခရီးသည် ၆၅ ဦးစီးနင်းလိုက်ပါနိုင်ပြီး ၁၅၅ မိုင်အထိ မောင်းနှင်လို့ရတဲ့ ဘက်ထရီအိမ်ပူးတွဲပါရှိပါတယ်။

ရုပ်ကြွင်းလောင်စာသုံး နှစ်ထပ်ဘတ်စ်အနီကြီးတွေကတော့ ၁၉၃၇ ခုနှစ်ကတည်းက မမ်ဘိုင်းမှာ စတင်ပြေးဆွဲခဲ့ပါတယ်။ ယခုဆိုရင် လူအကြပ်ဆုံးအချိန်မှာ အဲဒီဘတ်စ်ကားတွေဟာ အစီးရေ ၉၀၀ အထိမြို့တွင်းလမ်းကြောင်းတွေမှာပြေးဆွဲနေပါတယ်။

၁၉၉၀ပြည့်လွန်နှစ်တွေကတည်းက ဟောင်းနွမ်းနေတဲ့ အဲဒီဘတ်စ်ကားတွေကိုဖြည်းဖြည်းချင်း အစားထိုးခဲ့ပါတယ်။ ယခုဆိုရင် အဲဒီဘတ်စ်ဟောင်းတွေ အစင်း ၅၀ကျော်လောက်ပဲ ပြေးဆွဲနေတော့တာဖြစ်ပါတယ်။

Source AFP

#Electric_double-decker_Mumbai

#India_Electric_Vehicles

#Electric_Buses

#DailyNews
Published - 20 August 2022

၁။ မြဝတီနှင့်လားရှိုးတွင် ပညာတတ်အမျိုးသမီးငယ်များ လူကုန်ကူးခံနေရ၊ ဥပဒေအရအကူအညီတောင်းခံနေ

၂။ ကြက်သွန်ဈေးနှုန်းများ ဆက်တိုက်မြင့်တက်နေ

၃။ ကုန်ကြမ်းဈေး ကြီးမြင့်မှုကြောင့် စားဆီဈေး မြင့်တက်နေ

၄။ မိုးခေါင်ရေရှားမှု ဒဏ်ခံနေရသည့် နယ်သာလန်မြစ်မှ ငါးများအတွက် ကယ်ဆယ်ရေးလုပ်ငန်းများ လုပ်ဆောင် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Crime
Published 20 August 2022

၂၀၁၄ ခုနှစ်က မက္ကဆီကိုမှာ အဆိုးရွားဆုံးလူ့အခွင့်အရေး ချိုးဖောက်ခံရမှုဖြစ်ခဲ့တဲ့ ကျောင်းသား ၄၃ ဦး အငြင်းပွားဖွယ်ရာ ပျောက်ဆုံးမှုကို ဦးဆောင်စုံစမ်းစစ်ဆေးခဲ့တဲ့ ရှေ့နေချုပ်ဟောင်းတစ်ဦးအား ဩဂုတ် ၁၉ ရက်နေ့မှာ နိုင်ငံတော်ကနေ ဖမ်းဆီးလိုက်ပါတယ်။

ထိုအမှုနဲ့ပတ်သက်ပြီး ဖမ်းဆီးထိန်းသိမ်းခံထားရသူတွေထဲမှာ ရှေ့နေချုပ်ဟောင်း'ဂျေဆူးမူရီလိုကာရမ်'က ရာထူးအမြင့်ဆုံးအရာရှိဖြစ်နေပါတယ်။

ထိုအမှုဟာ တစ်နိုင်ငံလုံးကို တုန့်လှုပ်ခြောက်ခြားစေပြီး နိုင်ငံတကာကလည်း ရှုတ်ချပြစ်တင်ခဲ့ကြပါတယ်။

ဒါ့အပြင်သူဟာ ထိုအချိန်က လူအတော်များများငြင်းပယ်ခဲ့ကြတဲ့ သမ္မတ'အင်းနရစ်ပီနာနီတို'အစိုးရအဖွဲ့ကနေ ၂၀၁၅ ခုနှစ်မှာတင်ပြခဲ့တဲ့ သမိုင်းဝင်အမှန်တရားအဖြစ်အပျက်ရဲ့ ဗိသုကာပညာရှင်လို့တောင် တင်စားခဲ့ကြပါတယ်။

တချိန်က နိုင်ငံရေးလွှမ်းမိုးမှုရှိခဲ့တဲ့ တော်လှန်ရေးအဖွဲ့အစည်းပါတီ(PRI)ရဲ့ အရေးပါသူတစ်ဦးလည်းဖြစ်ခဲ့တဲ့ 'မူရီလိုကာရမ်'ကို လူပျောက်ဆုံးမှု၊ ညှဉ်းပန်းနှိပ်စက်မှု၊ တရားမျှတမှုအား အလွဲသုံးစားလုပ်မှု စတဲ့ရာဇဝတ်မှုများဖြင့် ဖမ်းဆီးခဲ့တာဖြစ်ကြောင်း ရှေ့နေချုပ်ရုံးက ပြောကြားလိုက်ပါတယ်။

ကျောင်းသားတွေ မပျောက်ဆုံးခင်က မက္ကဆီကိုစီးတီးရှိ ဆန္ဒပြပွဲသို့ သွားရောက်ရန်အတွက် ဂွာရဲရိုးတောင်ပိုင်းက ဘတ်စ်ကားတွေကို ထိန်းချုပ်ညွှန်ကြားခဲ့ကြပါတယ်။

ထိုကျောင်းသားတွေကို အကျင့်ပျက်ရဲတွေက ဖမ်းဆီးခဲ့ပြီးနောက် မူးယစ်ဆေးဝါးဂိုဏ်းတစ်ခုထံ ပြိုင်ဘက်ဂိုဏ်းမှ အဖွဲ့သားတွေအထင်နဲ့ လွှဲအပ်ပေးပြီး ဘာတွေဆက်ဖြစ်လဲဆိုတာကတော့ အတော်လေးအငြင်းပွားစရာ ဖြစ်ခဲ့ပါတယ်။

၂၀၁၅ ခုနှစ်က တရားဝင်ထုတ်ပြန်ချက်မှာတော့ မူးယစ်ဂိုဏ်းက ကျောင်းသားတွေကို သတ်ပစ်လိုက်ပြီး အမှိုက်ပုံမှာမီးရှို့ပစ်လိုက်ကြတယ်လို့ ဖော်ပြခဲ့ပါတယ်။

ထိုမှတ်ချက်တွေကို ကျွမ်းကျင်ပညာရှင်များနဲ့ လူ့အခွင့်အရေးဆိုင်ရာ ကုလသမဂ္ဂမဟာမင်းကြီးရုံးအပြင် မိသားစုဝင်တွေကပါ ငြင်းပယ်ခဲ့ပါတယ်။

စစ်တပ်အဖွဲ့ဝင်တွေကလည်း ဒီကိစ္စမှာ တစ်စိတ်တစ်ပိုင်းပတ်သက်နေပြီး တိုက်ရိုက် ဒါမှမဟုတ် ပေါ့ဆမှုရှိနေပါတယ်။

"သူတို့ရဲ့ လုပ်ဆောင်ချက်တွေ၊ ချန်လှပ်ထားမှုတွေ ဒါမှမဟုတ် ပူးပေါင်းပါဝင်မှုကြောင့် ကျောင်းသားတွေပျောက်ဆုံးသတ်ဖြတ်ခံလိုက်ရပြီး အခြားလူ ၆ ဦးလည်း သေဆုံးခဲ့ရပါတယ်" လို့ ပြည်ထဲရေးလက်ထောက်ဝန်ကြီး'အယ်လီယန်ဒရိုအင်ဆိုင်နတ်စ်'က ပြောကြားလိုက်ပါတယ်။

လက်နက်အဖွဲ့တွေထဲက ဘယ်သူတွေပါဝင်လဲဆိုတာသိရဖို့ နောက်ထပ်စစ်ဆေးမှုတွေ ပြုလုပ်သွားဦးမယ်လို့လည်း ဆိုပါတယ်။

ထိုအမှုနဲ့သက်ဆိုင်တဲ့ မည်သည့် စစ်မှုထမ်း၊ အရာရှိပဲဖြစ်ဖြစ် တရားမျှတမှုနဲ့ ရင်ဆိုင်သွားရမယ်လို့ သမ္မတ'အန်ဒရီမန်နူယယ်လိုပက်ဇ်အိုဘရာဒေါ်'က သောကြာနေ့က အသိပေးလိုက်ပါတယ်။

Source: CNA
#Yangon_Media_Group