#World_Health
Published 8 September 2022

ဓာတ်ဆီဒီဇယ်ဆီများ လောင်ကျွမ်းခြင်းကနေ ထွက်လာတဲ့လေထုညစ်ညမ်းမှုက အမျိုးသမီးတွေကို ပိုပြီးဒုက္ခပေးနိုင်ကြောင်း လေ့လာတွေ့ရှိထားပြီး ဖြစ်ရတဲ့အကြောင်းအရင်းကိုတော့ သေချာမသိကြသေးပါဘူး။

အမျိုးသမီးတွေက လေထုညစ်ညမ်းမှုနဲ့တွေ့တဲ့အခါ အမျိုးသားတွေနဲ့ယှဉ်ရင် ပရိုတိန်းပစ္စည်း ၉၀ ကျော်ထွက်ရှိကာ လေထုညစ်ညမ်းမှုကြောင့်ဖြစ်တဲ့ ရင်ကြပ်ရောဂါ၊ အဆုတ်လမ်းကြောင်းပိတ်ရောဂါများ ဖြစ်နိုင်ချေပိုများပါတယ်။

ဒီပရိုတိန်းတွေက နှလုံးရောဂါ၊ သွေးခဲခြင်းမျိုးအခြေအနေတွေမှာ ပါဝင်တဲ့ပစ္စည်းတွေဖြစ်ပြီး ညစ်ညမ်းတဲ့လေထုကိုရှူမိတဲ့လူတွေအားလုံးမှာ အဆုတ်ကို ထိခိုက်စေပါတယ်။

အသက်ရှူလမ်းကြောင်းဆိုင်ရာ ရောဂါတွေက အမျိုးသားတွေထက် အမျိုးသမီးတွေမှာ ပိုဖြစ်လေ့ရှိတာသိထားကြပေမယ့် အကြောင်းအရင်းကိုတော့ ကျွမ်းကျင်ပညာရှင်များ သေချာမသိကြပါဘူး။

ထိုလေ့လာမှုအတွက် ကျန်းမာရေးကောင်းပြီး ဆေးလိပ်မသောက်တဲ့ အမျိုးသား ၅ ဦးနဲ့ အမျိုးသမီး ၅ ဦးတို့ကို လေ့လာခဲ့ကြပါတယ်။

သူတို့ကို အချိန် ၄ နာရီကြာအောင် သန့်စင်တဲ့လေရှူခိုင်းပြီး နောက်ထပ် ၄ နာရီကို ဒီဇယ်အိတ်ဇောငွေ့ပါတဲ့ လေကိုရှူခိုင်းခဲ့ပါတယ်။

လေထုအမှုန်ပါဝင်မှု PM 2.5 ကိုအခြေခံကာ လေထုညစ်ညမ်းမှုအတိုင်းအတာကို ၃ မျိုးခွဲခြားလိုက်ပါတယ်။

၂၄ နာရီအကြာမှာ သူတို့ထံမှ သွေးနမူနာများရယူခဲ့ပါတယ်။

အဲဒီအခါ အမျိုးသမီးတွေဟာ အမျိုးသားတွေထက် ကွဲပြားတဲ့ပရိုတိန်း ၉၀ ကိုတွေ့ရှိခဲ့ပါတယ်။

ဒီလိုမျိုး ပရိုတိန်းတွေများပြားလာခြင်းက နှလုံးပြဿနာများနဲ့ ခုခံအားထိခိုက်မှုများ ဖြစ်လာနိုင်ပါတယ်။

အမျိုးသားတွေနဲ့ အမျိုးသမီးတွေက လေထုညစ်ညမ်းခြင်းကို တုံပြန်ပုံတွေကို သိဖို့လိုအပ်နေပြီး အသက်ရှူလမ်းကြောင်းဆိုင်ရာ ရောဂါများကို ကာကွယ်ခြင်း၊ ရောဂါရှာဖွေခြင်း၊ ကုသခြင်းတိုပါ သိရှိဖို့လိုအပ်နေပါတယ်လို့ ဒေါက်တာ'နီးလ်အော်ဖာမူခါဂျီ'က ရှင်းပြပါတယ်။

လေထုညစ်ညမ်းခြင်းက ရင်ကြပ်၊ အဆုတ်ကင်ဆာ၊ နာတာရှည်အဆုတ်ရောင်ရောဂါများ ဖြစ်ပေါ်စေနိုင်တဲ့ အဓိကအကြောင်းအရင်းတစ်ခုပါ။

မော်တော်ယာဉ်များမှ လောင်စာလောင်ကျွမ်းရာကထွက်လာတဲ့ အခိုးအငွေ့တွေက လေထုညစ်ညမ်းရခြင်း အဓိကတရားခံဖြစ်ပြီး အဓိကလမ်းမကြီးတွေနဲ့ ကားသွားကားလာများတဲ့ လမ်းတွေအနီးနားမှာ နေထိုင်တဲ့သူတွေဟာ အသက်ရှူလမ်းကြောင်းရောဂါများ ပိုဖြစ်နိုင်ကြောင်း သိရှိရပါတယ်။

Source: Daily Mail
#Yangon_Media_Group

#World_Technology
Published 8 September 2022

စက်တင်ဘာ ၇ ရက်နေ့(ဗုဒ္ဓဟူးနေ့)က Apple ထုတ်ကုန်ပစ္စည်းအသစ်များကို မိတ်ဆက်ခဲ့ပါတယ်။

ငွေကြေးဖောင်းပွမှုတွေနဲ့ ကုန်ကြမ်းပစ္စည်းကွင်းဆက်ပြဿနာများ ရှိနေပေမယ့် နောက်ဆုံးထုတ်လုပ်ခဲ့တဲ့ ပစ္စည်းမော်ဒယ်လ်တွေနဲ့ ဈေးနှုန်းကွာခြားမှုမရှိလှသလို သင့်တင့်မျှတတဲ့ဈေနှုန်းနဲ့ ပရီမီယမ်ဒီဂျစ်တယ်လက်ပတ်နာရီကိုလည်း ပြသခဲ့ပါတယ်။

ကုမ္ပဏီတည်ရှိရာ ကယ်လီဖိုးနီးယားရုံးချုပ်မှာ မိနစ် ၉၀ ကြာ မိတ်ဆက်ရှင်းလင်းပွဲပြုလုပ်ခဲ့ပြီး SIM ကဒ်မလိုအပ်တဲ့ နည်းပညာအသစ်အကြောင်းကိုလည်း ထည့်သွင်းပြသသွားပါတယ်။

စင်္ကာပူမှ ဝယ်သူများအတွက် iPhone 14 128GB အတွက် စင်္ကာပူဒေါ်လာ ၁,၂၉၉ မှစတင်ကာ ဖုန်းမျက်နှာပြင်ပိုကျယ်တဲ့ iPhone 14 Plus ကတော့ ၁,၄၉၉ ဒေါ်လာမှစပါတယ်။

128GB မှ 1TB အထိရွေးချယ်စရာရှိတဲ့ Pro version ကတော့ ၁,၆၄၉ ဒေါ်လာမှစပြီး Pro Max ကတော့ ၁,၇၉၉ ဒေါ်လာအနည်းဆုံးရှိပါတယ်။

ကြိုတင်မှာယူမှုများကို စင်္ကာပူစံတော်ချိန် သောကြာနေ့ ည ၈ နာရီမှဖွင့်လှစ်မှာဖြစ်ပြီး iPhone 14 နဲ့ Plus version တွေကိုတော့ စက်တင်ဘာ ၁၆ ရက်နေ့နဲ့ အောက်တိုဘာ ၇ ရက်နေ့တို့မှာ အသီးသီးစတင်ရောင်းချမှာဖြစ်ပါတယ်။

Pro version တွေကတော့ စက်တင်ဘာ ၁၆ ရက်နေ့မှာ ရရှိနိုင်ပြီဖြစ်ပါတယ်။

ပစ္စည်းအသစ်တွေထဲမှာ နားကြပ်အသစ်လည်းပါဝင်ပြီး ဈေးနှုန်းမြင့်မားတဲ့ပစ္စည်းတွေကို သုံးစွဲချင်တဲ့သူတွေအတွက် ရည်ရွယ်ထုတ်လုပ်ထားတာဖြစ်ပါတယ်။

"ကမ္ဘာ့ရောင်းအားအကောင်းဆုံး iPhone 13 ဝယ်လိုအားများကြောင့် Apple က ၂၀၂၂ ပထမနှစ်ဝက်မှာ ဆက်လက်အောင်မြင်ခဲ့ပါတယ်" လို သုံးသပ်သူ'လဲ့ဆန်ချူ'က ဆိုပါတယ်။

တရုတ်နိုင်ငံရဲ့ ကိုဗစ်တင်းကြပ်စည်းမျဉ်းများကြောင့် အိန္ဒိယကနေ ကုန်ကြမ်းပစ္စည်းထောက်ပံ့ရယူခဲ့တဲ့ အကျိုးကျေးဇူးအနေနဲ့ iPhone ဈေးနှုန်းတွေ မတက်ဘဲရောင်းချနေနိုင်တာဖြစ်ပါတယ်။

ဒီမိတ်ဆက်ပွဲက Apple ရဲ့ပို့ဆောင်ထုတ်လုပ်မှု အားသာချက်ကို ဖော်ပြရာရောက်တယ်လို့ 'ဒန်အိုင်ဗက်စ်'က သုံးသပ်ခဲ့ပါတယ်။

iPhone 14 မှာ ဘတ်ထရီအား ပိုမိုကြာရှည်ခံကာ ကင်မရာစနစ်က အလွန်မြင်ကွင်းကျယ်ပြန့်ပြီး အလင်းချိန်ညှိလို့ရတဲ့ စနစ်တွေ ပါဝင်ပါတယ်။

ဝိုင်ဖိုင်မရနိုင်တဲ့နေရာတွေမှာ အရေးပေါ် SOS မက်ဆေ့ချ်ဖြင့် အရေးပေါ်ဝန်ဆောင်မှုထံ ပို့ဆောင်နိုင်အောင် ပြုလုပ်ထားပါတယ်။

iPhone 14 Plus မှာ ဂိမ်းဆော့တဲ့အခါပဲဖြစ်ဖြစ်၊ ဗီဒီယိုကြည့်တာပဲဖြစ်ဖြစ် ကြည့်ရှုရတာအားရစေတဲ့ ၆.၇ လက်မမျက်နှာပြင်ပါဝင်တာကြောင့် ပိုမိုအဆင်ပြေစေမှာပါ။

အဆင့်မြင့်လုပ်ဆောင်ချက်များပါဝင်တဲ့ ဒီဂျစ်တယ်လက်ပတ်နာရီအသစ်ကိုလည်း ထုတ်ဖော်ပြသခဲ့ပါတယ်။

Apple Watch Series 8 က ခန္ဓာကိုယ်အပူချိန်နဲ့ အခြားလုပ်ဆောင်ချက်များ ဆောင်ရွက်နိုင်ပြီး စင်္ကာပူဒေါ်လာ ၅၉၉ က စတင်ရောင်းချမှာဖြစ်ပါတယ်။

အပြေးသမားများအတွက် Apple Watch Ultra က ဘတ်ထရီသက်တမ်းပိုမိုတာရှည်ခံပါတယ်။

Source: CNA
#Yangon_Media_Group

#World_Health
Published 8 September 2022

လူတွေရဲ့ ရုပ်ခန္ဓာကျန်းမာရေးက စိတ်ပိုင်းဆိုင်ရာ ကျန်းမာရေးကိုပါ တိုက်ရိုက်သက်ရောက်နေပါတယ်။

ခန္ဓာကိုယ်နဲ့ပတ်သက်တာ တစ်ခုခုပြုလုပ်လိုက်တိုင်း စိတ်ပိုင်းဆိုင်ရာကိုသာမက ကျန်းမာရေးကိုအဘက်ဘက်ကနေ သက်ရောက်စေပါတယ်။

TikTok ပေါ်မှ ဘွဲ့ရအာရုံကြောသိပ္ပံပညာရှင်'ကိုဒီအစ္စဘဲလ်'က စိတ်ပိုင်းဆိုင်ရာရော ရုပ်ပိုင်းဆိုင်ရာပါ ကျန်းမာနေအောင် သတိထားသင့်တဲ့ အရေးအကြီးဆုံး ၅ ချက်ကို ဖော်ပြသွားပါတယ်။

(၁) နှစ်ခြိုက်စွာအိပ်စက်ရန်

အိပ်ချိန်နည်းရင် ဘဝသက်တမ်းတိုတောင်းနိုင်တယ်လို့ 'အစ္စဘဲလ်'က ရှင်းပြထားပါတယ်။

အိပ်စက်ခြင်းဖြင့် နေ့စဉ်လှုပ်ရှားတွေးခေါ်ခြင်းကနေ ဖြစ်ပေါ်လာတဲ့ ဦးနှောက်ရောင်ရမ်းခြင်းများကို လျှော့ချပေးနိုင်ပါတယ်။

လုံလောက်စွာ မအိပ်စက်ရတဲ့အခါ အဝလွန်ခြင်း၊ ဆီးချိုရောဂါ၊ နှလုံးသွေးကြောရောဂါစတဲ့ ကျန်းမာရေးပြဿနာများ ဖြစ်ပေါ်လာနိုင်ပါတယ်။

(၂) အချိန်မှန်မှန် တရားထိုင်ပေးခြင်း

စိတ်ကိုဖြေလျှော့ရာမှာ တရားထိုင်ခြင်းက အလွယ်ကူဆုံးနည်းလမ်းဖြစ်ပြီး စိုးရိမ်ပူပန်မှုကိုလျှော့ချပေးခြင်း၊ စိတ်ဓာတ်ကျခြင်းကိုလျှော့ချပေးခြင်း၊ ဦးနှောက်ရောင်ရမ်းခြင်းကို လျှော့ချပေးခြင်းတို့ ပြုလုပ်ပေးပါတယ်။

တစ်နေ့ကို ၁၀ မိနစ်ခန့်တရားထိုင်ပေးသင့်တယ်လို 'အစ္စဘဲလ်'က အကြံပြုထားပါတယ်။

တရားထိုင်ခြင်းနဲ့ ဦးနှောက်ရောင်ရမ်းမှုလျော့ကျခြင်းတို့က တိုက်ရိုက်မပတ်သက်နေပေမယ့် ခန္ဓာကိုယ်တွင်းရောင်ရမ်းခြင်းနဲ့ ဖြစ်လာတဲ့ရောဂါတွေကို လျှော့ချရာမှာ တရားထိုင်ခြင်းက အကူအညီပေးပါတယ်။

(၃) အရက်သေစာရှောင်ရှားခြင်း

အရက်က ဦးနှောက်ကို တိုက်ရိုက်ရောင်ရမ်းခြင်းဖြစ်စေပြီး စိတ်ကျဝေဒနာဖြစ်စေနိုင်ပါတယ်။

အရက်အလွန်အကျွံသောက်တဲ့အခါ ခန္ဓာကိုယ်ကိုထိခိုက်စေပြီး ကျန်းမာရေးဆိုးရွားစေကြောင်း လွန်ခဲ့တဲ့နှစ်ပေါင်းများစွာကတည်းက ဖော်ပြထားပါတယ်။

အရက်က ဦးနှောက်ထဲက သတင်းပို့ပစ္စည်းများကို နှောင့်ယှက်ကာ ခံစားချက်၊ အတွေးအခေါ်၊ အမူအကျင့်တို့ကို သက်ရောက်စေပါတယ်။

(၄) လှုပ်ရှားလေ့ကျင့်ခန်း

မအားလို့ အချိန်မရလို့ဆိုပြီး အလေးမ'မဘဲနေတာမျိုး၊ လေ့ကျင့်ခန်းမလုပ်ဘဲနေတာမျိုး မလုပ်သင့်ပါဘူး။

လေ့ကျင့်ခန်းလုပ်တဲ့အခါ BDNF ဆိုတဲ့ ပစ္စည်းထွက်လာပြီး ဦးနှောက်ရောင်ရမ်းခြင်းကို လျှော့ချပေးကာ အာရုံကြောကိုကျုံခြင်း ဆန့်ခြင်း ပြုလုပ်ပေးပါတယ်။

ဦးနှောက်ထဲမှာ မှတ်ဉာဏ်စွမ်းရည်အတွက်အရေးကြီးတဲ့ အာရုံကြောမျှင်များ ဆက်လက်တည်ရှိဖို့ အကူအညီဖြစ်စေပါတယ်။

(၅) ဆုံးဖြတ်ချက်ပြတ်သားခြင်း

လူတွေရဲ့ဦးနှောက်တွေက စဉ်းစားဆုံးဖြတ်ပြီး ပြုလုပ်လေ့ရှိတယ်။

ကျရှုံးမှုတွေကနေ သင်ခန်းစာယူပြီး သင်ယူလာတတ်ကြတယ်။

ကျရှုံးမှုတွေကနေ သင်ခန်းစာယူခြင်းက ရင့်ကျက်လာစေတယ်လို့ ဆိုကြသူတွေရှိသလို ဆန့်ကျင်ဘက် ထင်မြင်တဲ့သူတွေလည်းရှိပါတယ်။

ကျရှုံးတဲ့အခါ သင်ယူချင်စိတ်မရှိတော့ဘဲ ဆက်မလုပ်ကြတာမျိုးဖြစ်တတ်တယ်လို့ တွေ့ရှိထားတာတွေရှိပါတယ်။

လူတွေက ကျရှုံးသူတွေထက် အောင်မြင်သူတွေကိုသာ ရှေးရှုမြင်တတ်ကြတာပါ။

Source: The Jerusalem Post
#Yangon_Media_Group

#World_Pets
Published 7 September 2022

'ကက်စီးယပ်စ်'နဲ့ 'ရိုစီ'ဆိုတဲ့ ခွေးတွေဟာ ဟောင်ကောင်ခွေးဂေဟာတစ်ခုမှာ မွေးစားမယ့်ပိုင်ရှင်အသစ်တွေကို စောင့်မျှော်နေကြပါတယ်။

#Yangon_Media_Group

Published 7 Sept 2022

ဗီယက်နမ်တောင်ပိုင်းက ကာရာအိုကေဘားတစ်ဆိုင် စက်တင်ဘာ ၆ ရက်က မီးလောင်ခဲ့တဲ့အတွက် လူ ၁၂ ဦးသေဆုံးပြီး ၁၁ ဦး ဒဏ်ရာရရှိသွားပါတယ်လို့ အရာရှိတွေကပြောပါတယ်။

အင်္ဂါနေ့ညပိုင်းမှာ အဲဒီကာရာအိုကေဘားဆိုင်ရဲ့ ဒုတိယထပ်နှင့် တတိယထပ်မှာ မီးစတင်လောင်ကျွမ်းတာဖြစ်ပြီး ဆိုင်ကို လာရောက်ကြတဲ့ ဖောက်သည်တွေနှင့် ဝန်ထမ်းတွေဟာ ပိတ်မိနေခဲ့ပါတယ်။ မီးခိုးတွေဟာ လှေကားတစ်လျောက်ပိတ်မှောင်သွားပြီး အရေးပေါ်ထွက်ပေါက်ပါပိတ်ဆို့သွားတယ်လို့ နိုင်ငံပိုင်မီဒီယကပြောပါတယ်။

တော်တော်များများဟာ လသာဆောင်ဘက်ကို အပြေးအလွှားထွက်ပြေးကြပါတယ်။ အဲဒီအခါမှာ သစ်သားအတွင်းခန်းတွေမှာ မီးကကြီးလာပြီး အချို့ဟာ အဆောက်အအုံကနေ ခုန်ချကြတယ်လို့ သတင်းတွေကဆိုပါတယ်။

အဲဒီကာရာအိုကေဘားဟာ ဟိုချီမင်းမြို့တော် ရဲ့ မြောက်ဘက် သူယမ်အန်းမြို့က လူနေထူထပ်တဲ့ ရပ်ကွက်ထဲမှာ မှာတည်ရှိပါတယ်။

ဒေသအရာရှိတစ်ဦးက လူ၁၂ ဦးသေဆုံးပြီး ၁၁ဦးဒဏ်ရာရတယ်လို့ အေအက်ဖ်ပီကိုပြောပါတယ်။

ကယ်ဆယ်ရေးအဖွဲ့တွေဟာ အသက်ရှင်သူတွေ ဆက်လက်ရှာဖွေနေပြီး မီးလောင်ရတဲ့အကြောင်းရင်းကို ဖော်ထုတ်နေတယ်လို့လည်း သူယမ်အန်မြို့ ကွန်မြူနစ်ပါတီအရာရှိတစ်ဦးကပြောပါတယ်။  အဲဒီကာရာအိုကေဘားအနီးနေထိုင်သူ ငုယင်ဆန်းကလည်း မီးသတ်ကားတွေရောက်လာချိန် အထဲမှာ လူ(၄၀)လောက်ပိတ်မိနေတယ်လို့ ဧည့်ကြိုတစ်ဦးက ပြောတယ်လို့ ပြန်ပြောပြပါတယ်။

အချို့က အပူဒဏ်မခံနိုင်လို့ခုန်ချကြတဲ့အတွက် လက်တွေ ခြေထောက်တွေကျိုးကုန်တယ်လို့ ဆန်းက ဆက်ပြောပါတယ်။

ယခုမီးလောင်မှုဟာ ၂၀၁၈နှစ်ကတည်းကဆိုရင် အဆိုးရွားဆုံးဖြစ်ပါတယ်။ ၂၀၁၈တုန်းကတော့ ဟိုချီမင်းက လူနေအိမ်တွဲတစ်ခုမီးလောင်လို့ လူ၁၃ ဦးသေဆုံးခဲ့ရတာဖြစ်ပါတယ်။ ၂၀၁၆ခုနှစ်က ဟနွိုင်းမြို့တော် က ကာရာအိုကေဘားတစ်ခုယခုလိုပဲမီးလောင်လို့ လူ၁၃ ဦးသေဆုံးခဲ့ရပါသေးတယ်။ ပြီးခဲ့တဲ့လက ဟနွိုင်းက အခြားကာရာအိုကေတစ်ခုမီးလောင်လို့ မီးငြှိမ်းသတ်တဲ့ မီးသတ်သမားသုံးဦးသေဆုံးခဲ့ရကြောင်းသိရပါတယ်။

Source AFP

#Vietnam_Karaoke_Bar_Fire

#Vietnam_Thuan_An_city

#Vietnam

#DailyNews
Published _ 7 September 2022

၁။ ရင်းသားကျေးရွာတွင် တည်ဆောက်နေသည့် ဆိပ်ခံဗောတံတား ၆ လအတွင်းပြီးစီးမည်

၂။ ကောက်ဖီစိုက်ပျိုးရင်းနှီးမည့်သူများကို စိုက်ပျိုးမြေအသုံးပြုခွင့် ပုံစံ(၇) ထုတ်ပေးမည်

၃။ ဓာတ်ဆီတစ်လီတာပျမ်းမျှ ၂၅ ကျပ်မြင့်တက်လာ၊ ဒီဇယ်ဈေးအနည်းငယ်ပြန်ကျလာ

၄။ ဟောင်ကောင်မှနေထိုင်သူအများအပြား ထွက်ခွာသွား၍ စွန့်ပစ်ခံရသည့် အိမ်မွေးခွေးများ တိုးများလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group