#WorldPolitics
Published 18 June 2022

သောကြာနေ့က စိန့်ပီတာဘာ့ဂ်နိုင်ငံတကာစီးပွားရေး ဖိုရမ်မှာ ရုရှားသမ္မတ'ဗလာဒီမီယာပူတင်'က အနောက်နိုင်ငံတွေကို ဝေဖန်တိုက်ခိုက်လိုက်ပြီး တစ်ဦးတည်းခြယ်လှယ်နေတဲ့ခေတ်ကြီး အဆုံးသတ်တော့ပြီလို့ မိန့်ခွန်းမှာ ထည့်သွင်းကြေညာ ပြောကြားသွားခဲ့ပါတယ်။

"စစ်အေးတိုက်ပွဲကိုအနိုင်ရတော့ အမေရိကန်တွေက သူတို့ကိုယ်သူတို့ ကမ္ဘာပေါ်ကဘုရားသခင်ရဲ့ကိုယ်စားလှယ်တွေလိုမျိုး ထင်နေကြပါတယ်၊ တကယ်ကတော့ ဘာတာဝန်ယူမှုမှ မရှိဘဲ သူတို့အကျိုးစီးပွားအတွက်သာကြည့်သူတွေဖြစ်ပါတယ်၊ ဒီအကျိုးစီးပွားတွေကို အထွတ်အမြတ်အရာတွေအဖြစ် သတ်မှတ်နေကြပါတယ်၊ အခုတော့တဖက်သတ်ဆန်စွာနဲ့ တစ်ကမ္ဘာလုံး မတည်မငြိမ်ဖြစ်နေရပါပြီ" လို့ ပြောကြားခဲ့ပါတယ်။

ဆိုက်ဘာတိုက်ခိုက်မှုကြီး တစ်ခုဖြစ်ပေါ်ခဲ့တာကြောင့် အများကမျှော်လင့်နေတဲ့မိန့်ခွန်းကို မိနစ် ၉၀ ကျော်လောက် နောက်ဆုတ်ပြီးပြုလုပ်ခဲ့ရပါတယ်။

အစည်းအဝေးညီလာခံ ပြုလုပ်တဲ့စနစ်မှာ DDoS လိုခေါ်တဲ့ ဆိုက်ဘာတိုက်ခိုက်မှု တစ်မျိုးဖြစ်ပေါ်ခဲ့တာကြောင့် မိန့်ခွန်းကိုနောက်ဆုတ်ကျင်းပရတာဖြစ်ကြောင်း ရုရှားအုပ်ချုပ်အဖွဲ့မှပြောရေးဆိုခွင့်ရှိသူ'ဒီမစ်ထရီပက်စ်ကော့ဗ်'က သတင်းထောက်များကိုပြောကြားခဲ့ပါတယ်။

အဆိုပါ တိုက်ခိုက်မှုကို ဘယ်သူတွေပြုလုပ်လဲဆိုတာကို သေသေချာချာမသိရသေးပါဘူး။

ဟက်ကာတွေစုစည်းထားတဲ့ ယူကရိန်းအိုင်တီတပ်ဖွဲ့ကတော့ သီတင်းပတ်အစောပိုင်းတုန်းက စိန့်ပီတာဘာ့ဂ်ဖိုရမ်ကို ပစ်မှတ်ထားကြောင်း သူတို့ရဲ့တယ်လီဂရမ်ချန်နယ်ကနေ ကြေညာထားပါတယ်။

ထိုနှစ်စဉ်ညီလာခံဟာ လွန်ခဲ့တဲ့ ၄ လခန့်ကယူကရိန်းကိုကျူးကျော်ပြီးနောက်ပိုင်း 'ပူတင်'ရဲ့ထင်ရှားတဲ့ မိန့်ခွန်းတွေထဲကတစ်ခုဖြစ်ပြီး သူ့ရဲ့ထင်မြင်ယူဆချက်တွေကို ကမ္ဘာကသိနိုင်တဲ့အခွင့်အလမ်းလည်း ဖြစ်ပါတယ်။

ရုရှားအနောက်ပိုင်းမြို့မှာ 'ပူတင်'ကမိန့်ကြားခဲ့တာဖြစ်ပြီး အပိုစကားတွေပြောမနေဘဲ အမေရိကန်နဲ့ မဟာမိတ်နိုင်ငံများကို တိုက်ခိုက်ပြောကြားခဲ့တာဖြစ်ပါတယ်။

"အရင်တုန်းကအတိုင်း သူတို့ရဲ့စိတ်ကူးယဉ်မှုတွေအောက်မှာ ပဲနေနေကြတာပါ၊ သူတို့စစ်ပွဲအနိုင်ရတော့ အားလုံးကို ကိုလိုနီသိမ်းပိုက်တယ်လို့ ထင်နေကြပါတယ်၊ အဲဒီမှာနေတဲ့လူတွေကလည်း ဒုတိယတန်းစားလူတွေပါပဲ၊ ယူကရိန်းစစ်ပွဲဟာ ရုရှားရဲ့အထူးစစ်ဆင်ရေးဖြစ်ပြီး အနောက်နိုင်ငံက ရုရှားကိုပဲအလုံးစုံအပြစ်ဖို့နေပါတယ်" လို့ ဆိုခဲ့ပါတယ်။

ရုရှားက သူတို့ကိုအပြစ်တင်နေတဲ့ အနောက်နိုင်ငံတွေကိုဝေဖန်လိုက်ပြီး 'ပူတင်'က စားသောက်ကုန် ဈေးနှုန်းမြင့်တက်လာခြင်းအပေါ် အမေရိကန်အစိုးရနဲ့ ယူရိုဗျူရိုကရေစီစနစ်ကို အပြစ်တင်ဖို့ ကြိုးစားခဲ့ပါတယ်။

ယူကရိန်းနိုင်ငံဟာ စားသောက်ကုန်အဓိက ထုတ်လုပ်ရာနိုင်ငံဖြစ်ပြီး ရုရှားတို့ကျူးကျော်ခြင်းကြောင့် ထုတ်လုပ်မှုနဲ့ချိတ်ဆက်ထောက်ပံ့မှု ကွင်းဆက်များ ပျက်စီးခဲ့ရပါတယ်။

စစ်ပွဲရဲ့သက်ရောက်မှုကြောင့် လူပေါင်း ၄၉ သန်းလောက် စားစရာပြတ်လပ်နိုင်တယ်လို့ ကုလသမဂ္ဂက သတိပေးလိုက်ပါတယ်။

ရုရှားသင်္ဘောတွေပေါ်မှာ ယူကရိန်းတိုရဲ့ဆန်စပါးတွေတင်ဆောင်လာတာကို ဂြိုဟ်တုပုံရိပ်ဖြင့်ဖမ်းယူရရှိပြီးနောက် ယူကရိန်းရဲ့ဆန်စပါးတွေကို ရုရှားတို့က ခိုးယူနေကြတယ်လို့ စွပ်စွဲလိုက်ပါတယ်။

ပင်လယ်နက်ရေလမ်းကြောင်းမှာ ရုရှားတို့က ပိတ်ဆိုထားတာကြောင့် ယူကရိန်းရဲ့ထွက်ကုန်တွေကို အခြားနိုင်ငံများထံ ပေးပို့လို့မရဘဲ ဖြစ်နေပါတယ်။

Source: CNN
#Yangon_Media_Group

#WorldScience
Published 18 June 2022

ဒေါ်လာသန်း ၁၈၀ တန် စကိုင်းအိုင်းတယ်လီစကုပ်ကို အသုံးပြုရာမှာ ကမ္ဘာမြေပြင်ပမှ သက်ရှိလိုယူဆရတဲ့ အရာတွေရဲ့လှုပ်ရှားမှုတွေ တွေ့ခဲ့တယ်လို့ တရုတ်နိုင်ငံက ပြောပါတယ်။

တရုတ်နိုင်ငံကွေ့ကျိုးဒေသမှာရှိတဲ့ ၁,၆၄၀ ပေအချင်းရှိတဲ့ စကိုင်းအိုင်းတယ်လီစကုပ်ဟာ ပုံမှန်မဟုတ်တဲ့ လျှပ်စစ်သံလိုက်လှိုင်းတွေကို တွေ့ရှိခဲ့ကြောင်း၊ ကမ္ဘာမြေပြင်ပမှ ဂြိုဟ်သားတွေတည်ရှိရာနေရာကနေ ဖြစ်နိုင်ကြောင်း သိပ္ပံပညာရှင်များက ပြောကြားလိုက်ပါတယ်။

ဒီသတင်းကို ပေကျင်းမှာရှိတဲ့ သိပ္ပံနဲ့နည်းပညာနေ့စဉ်သတင်းစာမှာ ဖော်ပြခဲ့တာဖြစ်ပါတယ်။

ဘလွန်းဘာ့ဂ်သတင်းဌာနရဲ့ဖော်ပြချက်အရ သိပ္ပံနဲ့နည်းပညာသတင်းစာဟာ သတင်းဖော်ပြပြီးခဏအကြာမှာပဲ ပြန်လည်ဖယ်ရှားပစ်ခဲ့ပါတယ်။

"စကိုင်းအိုင်းတယ်လီစကုပ်က ကမ္ဘာမြေပြင်ပက သက်ရှိလှုပ်ရှားမှုတွေကို ဖမ်းယူခဲ့ပြီး သတင်းမှာဖော်ပြခဲ့ပြီးနောက် ပြန်လည်ဖျက်ပစ်ခဲ့တယ်လို့ ဘလွန်းဘာ့ဂ်က ဖော်ပြခဲ့ပါတယ်။

ဒီသတင်းဟာ ဆိုရှယ်မီဒီယာတွေနဲ့ သတင်းဌာနတွေမှာ ချက်ချင်းပျံ့နှံသွားခဲ့ပါတယ်။

ပြင်ပသက်ရှိလှုပ်ရှားမှုသုတေသနအဖွဲ့က ၂၀၂၀ ခုနှစ်က သံသယဖြစ်ဖွယ်လှုပ်ရှားမှု ၂ ခုတွေ့ရှိခဲ့ပြီး ၂၀၂၂ အတွင်းမှာလည်း နေအဖွဲ့အစည်းစနစ်အပြင်ဘက်က ဂြိုဟ်တွေမှာ နောက်ထပ်သံသယဖြစ်ဖွယ်လှုပ်ရှားမှု တွေ့ရှိခဲ့ပါတယ်။

ဒီလှုပ်ရှားမှုတွေက ရေဒီယိုလှိုင်းနှောင့်ယှက်မှုကြောင့် ဖြစ်နိုင်တာကြောင့် နောက်ထပ်လေ့လာခဲ့ကြပါသေးတယ်။

လက်ရှိအချိန်မှာ ကမ္ဘာမြေအပြင်ဘက်က သက်ရှိထင်ရှားရှိမှုမျိုးမတွေ့ရှိရသေးပေမယ့် ကမ္ဘာ့အပြင်ဘက် စကြဝဠာကြီးမှာ သက်ရှိတွေလုံးဝမရှိဘူးလို့ ဆိုလိုတာမဟုတ်ပါဘူး။

စကိုင်းအိုင်းစက်ဝိုင်းတယ်လီစကုပ်ကြီးဟာ ဂြိုဟ်သားလှုပ်ရှားမှုမျိုးကို တွေ့ရှိနိုင်တဲ့ကိရိယာကြီးဖြစ်ပါတယ်။

အချင်း ၁,၆၄၀ ပေရှိကာ ကမ္ဘာ့အကြီးဆုံးရေဒီယိုတယ်လီစကုပ်ကြီးဖြစ်ပါတယ်။

စကိုင်းအိုင်းတယ်လီစကုပ်ဟာ ပူအာတိုရီကိုက တယ်လီစကုပ်ထက် ၃ ဆကနေ ၅ ဆလောက်ပိုမိုတွေ့ရှိနိုင်ပြီး ဂြိုဟ်သားသက်ရှိတွေကိုရှာဖွေတွေ့ရှိနိုင်ဖို့ သိပ္ပံပညာရှင်တွေက မျှော်လင့်နေကြပါတယ်။

စကိုင်းအိုင်းတယ်လီစကုပ်မဆောက်လုပ်ခင်မှာ ရွာတစ်ရွာဖျက်ဆီးခံလိုက်ရပြီး လျှပ်စစ်သံလိုက်လှိင်းနှောင့်ယှက်တာမျိုး မဖြစ်ဖို့အတွက် ၃ မိုင်ပတ်ပတ်လည်က လူပေါင်း ၉ ထောင်ကျော်ကိုပြောင်းရွှေ့ခိုင်းခဲ့ကာ တစ်ဦးစီကိုနစ်နာကြေးအဖြစ် ၁,၈၀၀ ဒေါ်လာပေးခဲ့ပါတယ်။

Source: DailyMail
#Yangon_Media_Group

#WorldHealth
Published 18 June 2022

ကိုရိုနာဗိုင်းရပ်စ်ရဲ့ အိုမီခရွန်မျိုးဗီဇကွဲဟာ အရင်မျိုးဗီဇကွဲတွေလောက် ကိုဗစ်နောက်ဆက်တွဲလက္ခဏာများ ဖြစ်ပေါ်နိုင်ချေနည်းပါးကြောင်း ယူကေမှလေ့လာတွေ့ရှိခဲ့ပါတယ်။

လန်ဒန်ကင်းစ်ကောလိပ်မှ သုတေသီများလေ့လာချက်အရ ရောဂါကူးစက်အပြီး ကိုဗစ်နောက်ဆက်တွဲလက္ခဏာဖြစ်နိုင်ချေဟာ ဒယ်လ်တာကူးစက်မှုလှိုင်းတုန်းကထက်စာရင် အိုမီခရွန် ကူးစက်မှုလှိုင်းမှာ ၂၀ ရာခိုင်နှုန်းကနေ ၅၀ ရာခိုင်နှုန်းအထိ လျော့ကျသွားခဲ့ပါတယ်။

အဆိုပါ တွေ့ရှိမှုက လူနာရဲ့အသက်အရွယ်နဲ့ နောက်ဆုံးကိုဗစ်ကာကွယ်ဆေးထိုးခဲ့တဲ့အချိန်အပေါ်မူတည်ပြီး အပြောင်းအလဲဖြစ်နိုင်ပါတယ်။

ကိုဗစ်နောက်ဆက်တွဲ လက္ခဏာတွေထဲမှာ နုံးချည့်ခြင်းကနေ စိတ်အုံမှိုင်းမှုများအထိ ခံစားရနိုင်ပြီး ရက်သတ္တပတ်လများအထိ တာရှည်နိုင်ပါတယ်။

ဒီဝေဒနာတွေကို ပြည်သူ့ကျန်းမာရေးတစ်ရပ်အနေနဲ့ရှုမြင်လာကြပြီး အိုမီခရွန်က ကိုဗစ်နောက်ဆက်တွဲ လက္ခဏာဖြစ်နိုင်ချေများလားဆိုတာကို သုတေသီတိုက အရေးတကြီးရှာဖွေလေ့လာနေကြပါတယ်။

ကင်းစ်ကောလိပ်ရဲ့လေ့လာချက်အရ အိုမီခရွန်က ကိုဗစ်နောက်ဆက်တွဲ လက္ခဏာဖြစ်နိုင်ချေနည်းတယ်လို့ဆိုပေမယ့် နောက်ဆက်တွဲလက္ခဏာခံစားရသူတွေ နည်းသွားတာတော့မဟုတ်ပါဘူး။

ယူကေအမျိုးသား အချက်အလက်ရုံးရဲ့ဖော်ပြချက်အရ ယူကေမှာ အိုမီခရွန်ကူးစက်ပြီး ကိုဗစ်နောက်ဆက်တွဲ လက္ခဏာခံစားနေရသူ ၄၃၈,၀၀၀ ဦးရှိနေကာ ဝေဒနာခံစားရသူအားလုံးရဲ့ ၂၄ ရာခိုင်နှုန်းရှိကြောင်း သိရှိရပါတယ်။

လန်ဆက်ဂျာနယ်မှာ ဇွန်လ ၁၆ ရက်နေ့ကဖော်ပြရာမှာ ဒယ်လ်တာနဲ့အိုမီခရွန်ကိုနှိုင်းယှဉ်ကြည့်တဲ့အခါ အခြားမျိုးဗီဇကွဲများအကြား ကိုဗစ်နောက်ဆက်တွဲဖြစ်နိုင်ချေ ကွာခြားချက်ကြီးကြီးမားမားမရှိကြောင်း တွေ့ရှိခဲ့ရပါတယ်။

အိုမီခရွန်ကူးစက်မှုက ဘာကြောင့်နောက်ဆက်တွဲဝေဒနာဖြစ်နိုင်ချေနည်းတာလဲဆိုတာကို သိရဖို့ နောက်ထပ်လေ့လာမှုတွေ ပြုလုပ်ရဦးမှာဖြစ်ပါတယ်။

Source: CNA
#Yangon_Media_Group

#WorldTechnology
Published 17 June 2022

ချဲအော့ပ်စ်ပိရမစ်ကြီးရဲ့အတွင်းပိုင်းနေရာများအထိဝင်ရောက်ကာ နိုင်းလ်မြစ်ကိုကနူးလှေဖြင့်သွားခြင်းနဲ့ ဖာရိုးခေတ်ရဲ့အငွေ့အသက်တွေကိုခံစားနိုင်ဖို့အတွက် ပဲရစ်မြို့က အာရပ်ကမ္ဘာအင်စတီကျု(IMA)မှာ သုံးဖက်မြင်ကွန်ပျူတာသရုပ်ဖော်ပုံဖြင့် အင်္ဂါနေ့ကစပြီး ဝင်ရောက်လေ့လာနိုင်ပြီဖြစ်ပါတယ်။

#Yangon_Media_Group

Published 17 June 2022
တရုတ်နိုင်ငံက တတိယမြောက် လေယာဉ်တင်စစ်သင်္ဘောကြီး ဖူကျင်းကို ရှန်ဟိုင်းမှာ ရေချလိုက်ပါတယ်။

သင်္ဘောရဲ့အမည်ကို  တရုတ်နိုင်ငံ အရှေ့ဘက်ကမ်းခြေက ဖူကျင်းပြည်နယ်ကို အစွဲပြုပြီး ပေးခဲ့တာဖြစ်ပြီး သောကြာနေ့ မနက်၁၁နာရီမှာ ကျန်းနန် သင်္ဘောကျင်းကနေ ရေချခဲ့တာပါ။ တက်ရောက်သူတွေက နိုင်ငံတော်အလံကို လွှင့်ထူတဲ့အခါ  တရုတ်နိုင်ငံတော်သီချင်းကို သီဆိုကြပါတယ်။

အဲဒီနောက်  အမည်ပေးလက်မှတ်ကိုအပ်နှင်းပြီးနောက် စစ်တပ်နှင့်အရပ် အရာရှိတွေဟာ စစ်သင်္ဘောကို ဖဲကြိုးဖြတ်ဖွင့်လှစ် ခဲ့ပါတယ်။

ရှန်ပိန်ပုလင်းတစ်လုံးကို ဖူကျင်းရဲ့ ဦးပိုင်းမှာ ဖောက်ခဲ့ပြီး ရောင်စုံတံခွန်တိုင်တွေနှင့် ရောင်စုံမီးခိုးတွေ၊ရေပန်းတွေ နှင့်အတူ ဖွင့်ပွဲကို ဆင်နွှဲကြပါတယ်။

အဲဒီနောက် လေယာဉ်တင်စစ်သင်္ဘောဟာ ဥဩဆွဲပြီး သင်္ဘောကျင်းကနေ ဖြည်းညှင်းစွာ ထွက်ခွာခဲ့ပါတယ်။

သင်္ဘောကြီးဟာ ဆိုက်ကပ်မှုနှင့်ပင်လယ်တွင်းလေ့ကျင့်မှုတွေ ပြုလုပ်မှာဖြစ်ပါတယ်။

Source CCTV+

#DailyNews
Published - 17 June 2022

၁။ မေရီချက်ပ်မင်း နားမကြားသောကလေးများ ကျောင်းတွင်ကျောင်းသား (၁၅၀) ဦးပြန်တက်မည်ဟု မျှော်မှန်းစောင့်ဆိုင်းနေ

၂။ တက္ကသိုလ်၊ ဒီဂရီကောလိပ် ကျောင်းအပ်သူများသော်လည်း အမှန်တကယ် ကျောင်းတက်ရောက်သူ နည်းပါးနေ

၃။ နေ့စဉ်မိုးလေဝသသတင်း။

၄။ ကွန်ပျူတာဖြင့် ဖန်တီးထားသည့် အီဂျစ်ကချဲအော့ပ်စ်ပိရမစ် အစစ်ယောင်နေရာဆီသို့ ပဲရစ်မြို့ကနေ သွားရောက်လည်ပတ်နိုင် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group