#WorldBusiness 
Published 21 June 2022

ရုရှားနိုင်ငံမှ ဓာတ်ငွေ့ထောက်ပံ့မှုများလျှော့ချလာတဲ့အပြင် လောင်စာမဖြည့်ထားနိုင်ရင် ဥရောပနိုင်ငံတွေအနေနဲ့ ဆောင်းရာသီရောက်တဲ့အခါ လောင်စာအခက်အခဲဖြစ်လာနိုင်ပါတယ်။

ဒါကြောင့် ရုရှားဓာတ်ငွေ့ဝယ်ယူသုံးစွဲနေရတဲ့ နိုင်ငံတွေက အခြားနည်းလမ်းဖြင့်လောင်စာရရှိဖို့ကြိုးပမ်းနေကြပြီး ကျောက်မီးသွေးဖြင့် လောင်စာထုတ်လုပ်လာဖွယ်ရှိနေပါတယ်။

ဓာတ်ငွေ့ဈေးနှုန်းများ တဟုန်ထိုးတက်နေတဲ့ အခက်အခဲအပြင် ငွေကြေးဖောင်းပွခြင်းကို တိုက်ဖျက်နေရတဲ့ မူဝါဒချမှတ်ရေးသမားတွေရင်ဆိုင်နေရတဲ့စိန်ခေါ်မှုကိုလည်း အကူအညီဖြစ်စေရန် ကျောက်မီးသွေးသုံးဓာတ်အားပေးစက်ရုံများ အသုံးပြုဖို့ ဂျာမနီ၊ အီတလီ၊ ဩစတြီးယား၊ နယ်သာလန်နိုင်ငံတို့က အသိပေးလိုက်ပါတယ်။

နယ်သာလန်အစိုးရက ကျောက်မီးသွေးသုံးစွမ်းအင်စက်ရုံများကို စတင်အသက်သွင်းပြီး စွမ်းအင်ကျပ်တည်းမှုကို ဖြေရှင်းမယ့်အစီအစဉ် ပထမအဆင့်ကို စတင်တော့မယ်လို့ တနင်္လာနေ့ကပြောကြားခဲ့ပါတယ်။

ရုရှားဓာတ်ငွေ့ပေးပိုမှု မသေချာတာကြောင့် ဒိန်းမတ်နိုင်ငံကလည်း အရေးပေါ်ဓာတ်ငွေ့အစီအစဉ်ပထမအဆင့်ကို စတင်လိုက်ပြီဖြစ်ပါတယ်။

ရုရှားဓာတ်ငွေ့ကုမ္ပဏီကြီး Gazprom က ဓာတ်ငွေ့ထောက်ပံ့မှုအချို့တဝက်သာပေးပို့တော့မှာဖြစ်ကြောင်း အီတလီလောင်စာကုမ္ပဏီ Eni ကို တနင်္လာနေ့က အသိပေးခဲ့တာကြောင့် အီတလီနိုင်ငံကလည်း စွမ်းအင်အခြေအနေနဲ့ပတ်သက်ပြီး အရေးပေါ်ထုတ်ပြန်ရမယ့်အနေအထားနဲ့နီးကပ်လာနေပါပြီ။

ရုရှားဓာတ်ငွေ့ထောက်ပံ့မှု လျော့ကျသွားတဲ့ ဂျာမနီနိုင်ငံကလည်း ဓာတ်ငွေ့သိုလှောင်မှုပမာဏကို တိုးမြှင့်ဖို့ အစီအစဉ်ကိုကြေညာလိုက်ကာ ကျောက်မီးသွေးသုံးဓာတ်အားပေးစက်ရုံများပြန်လည်စတင်ဖို့ ကြေညာလိုက်ပါတယ်။

"ဒါခက်ခဲပေမယ့် ဓာတ်ငွေ့သုံးစွဲမှုလျှော့ချဖို့ မဖြစ်မနေ လိုအပ်လာပါတယ်၊ ဒီလိုမလုပ်ဘူးဆိုရင် ဒီနှစ်ကုန်ဆောင်းရာသီကျရင် လောင်စာမလုံလောက်တဲ့ ပြဿနာကြုံတွေ့လာရနိုင်ပါတယ်" လို့ စီးပွားရေးဝန်ကြီး'ရောဘတ်ဟာဘက်ခ်'က ဆိုလိုက်ပါတယ်။

ဂျုံအဓိက တင်ပိုတဲ့နိုင်ငံဖြစ်သလို ဥရောပကိုဓာတ်ငွေ့ပေးပိုရာလမ်းကြောင်းဖြစ်တဲ့ ယူကရိန်းကို ရုရှားတို့ကျူးကျော်ခဲ့တဲ့အတွက် အနောက်နိုင်ငံတွေက ဒဏ်ခတ်ပိတ်ဆို့မှုများ ပြုလုပ်ခဲ့ရာ ဥရောပအနေနဲ့ ကိုယ့်ကိုယ်ကိုသာ အပြစ်တင်ရမယ်လို့ ရုရှားတို့က အစောပိုင်းက ဝေဖန်ခဲ့ပါတယ်။

မြင့်တက်လာတဲ့ လောင်စာဆီဈေးနှုန်းတွေ ပုံမှန်အတိုင်းပြန်ဖြစ်ဖို့ ၃ နှစ်ကနေ ၅ နှစ်လောက်အထိကြာနိုင်တယ်လို့ ဂျာမနီနိုင်ငံမှ အကြီးဆုံးစွမ်းအင်ထုတ်လုပ်ရေးကုမ္ပဏီ RWE ရဲ့အမှုဆောင်အရာရှိချုပ်'မားကပ်စ်ခရက်ဘာ'က ဆိုပါတယ်။

ဥရောပရဲ့ အကြီးမားဆုံးစီးပွားရေးကို အဓိကထောက်ပံ့ပေးပြီး ဂျာမနီကနေ ရုရှားဓာတ်ငွေ့များဖြတ်သန်းလာတဲ့ Nord Stream 1 ပိုက်လိုင်းကနေ တနင်္လာနေ့အထိ ၄၀ ရာခိုင်နှုန်းလောက် ဓာတ်ငွေ့လွှတ်နေဆဲဖြစ်ပါတယ်။

ကျောက်မီးသွေးသုံးဓာတ်အားပေးစက်ရုံများ ပြန်လည်ပတ်ပါက ဓာတ်အားသိုလှောင်မှု ၁၀ ဂစ်ဂါဝက်လောက်ထားရှိနိုင်မှာဖြစ်ကြောင်း ဂျာမနီစီးပွားရေးဝန်ကြီးဌာနက ပြောကြားခဲ့ပါတယ်။

ကျောက်မီးသွေးသုံးစွဲရေးအပြင် ဂျာမနီရဲ့နောက်ဆုံးဆောင်ရွက်ချက်တွေထဲမှာ ဓာတ်ငွေ့သုံးစွဲမှုလျှော့ချရေးအား ပေးဖိုနဲ့ ဓာတ်ငွေ့သိုလှောင်ရေး အလျင်အမြန်လုပ်ဆောင်နိုင်ဖို့ ငွေကြေးအကူညီများရယူဖို့ တိုင်ပင်လာကြပါတယ်။

Source: Reuters
#Yangon_Media_Group

#WorldDiscovery
Published 21 June 2022

ကမ္ဘာပေါ်က တန်ဖိုးအကြီးမားဆုံး သင်္ဘောပျက်နေရာတစ်ခုရဲ့ ဓာတ်ပုံများကို ကိုလံဘီယာစစ်တပ်က ဖော်ထုတ်ပြသလိုက်ကာ ထိုနေရာဟာ ရာစုနှစ် ၃ ခုနီးပါးကြာသည်အထိ ဘယ်သူမှမတွေ့ရှိခဲ့တဲ့ နေရာဖြစ်ပါတယ်။

စပိန်မှ 'ဆန်ဟိုဆေး'ရွက်လွှင့်သင်္ဘောကြီးဟာ ရတနာသေတ္တာ အများအပြားသယ်ဆောင်လာပြီး ၁၇၀၈ ခုနှစ်စစ်ပွဲမှာ ဗြိတိသျှရေတပ်သင်္ဘောများက ပစ်ချခဲ့တာဖြစ်ပါတယ်။

အမြှောက် ၆၄ လက်ပါသင်္ဘောကြီးဟာ လူ ၆၀၀ လောက်လိုက်ပါနိုင်ပြီး ရွှေဒင်္ဂါး၊ ငွေဒင်္ဂါး၊ မြကျောက်များနဲ့ ယနေ့ခေတ်ဒေါ်လာ ၁၇ ဘီလီယံတန်ဖိုးရှိ ရတနာများတန်ချိန် ၂၀၀ အနည်းဆုံးတင်ဆောင်လာတယ်လို့ ယူဆရပါတယ်။

ထိုသင်္ဘောပျက်နေရာကို ၂၀၁၅ ခုနှစ်က ကာတာဂျီနာကမ်းရိုးတန်းမှာ ကိုလံဘီယာရေတပ်အရာရှိများက တွေ့ရှိခဲ့ပေမယ့် နေရာအတိအကျကိုတော့လျှိုဝှက်ထားခဲ့ပါတယ်။

ဇွန်လ ၆ ရက်နေ့ကပြုလုပ်တဲ့ သတင်းစာရှင်းလင်းပွဲမှာ ကိုလံဘီယာသမ္မတ'အီဗန်ဒူကေ'က သင်္ဘောပျက်နေရာက ဓာတ်ပုံများကို ချပြခဲ့ပါတယ်။

ဓာတ်ပုံများအရ တွေ့ရှိခဲ့တဲ့ရတနာတွေထဲမှာ တရုတ်ကြွေထည်ပစ္စည်းများ၊ ရွှေဒင်္ဂါးများ၊ ဓားများနဲ့ အမြှောက်များပါဝင်ပါတယ်။

"ထိုပစ္စည်းများကို ပြန်လည်ရယူပြီး ဘဏ္ဍာရေးယန္တရားတွေ တည်တံ့နိုင်ဖို့ စိတ်ကူးထားပါတယ်၊ ဒီနည်းလမ်းဖြင့် ဆန်ဟိုဆေးသင်္ဘောရဲ့စည်းစိမ်ဥစ္စာကို ထိန်းသိမ်းစောင့်ရှောက်ရပါမယ်" လို့ 'ဒူကေ'က ဆိုပါတယ်။

ခေတ်မီအဝေးထိန်းကိရိယာများဖြင့် ပင်လယ်ရေအောက် ၃,၂၈၀ ပေ သို့ဆင်းသက်ကာ သင်္ဘောအပျက်အစီးများကို ဓာတ်ပုံရိုက်ကူးခဲ့တာဖြစ်ကြောင်း အာဏာပိုင်များကဆိုပါတယ်။

အမြှောက်တွေမှာ ထွင်းထားတဲ့စာများအရ ၁၆၅၅ ခုနှစ်မှာ စပိန်နိုင်ငံ ဆီဗီးလ်နဲ့ကာဒစ်ဇ်တိုမှာ ထုတ်လုပ်ခဲ့တယ်လို့ သိရှိရကြောင်း ကိုလံဘီယာရေတပ်ဗိုလ်ချုပ်ကြီး'ဟိုဆေးဂျိုအာကွင်အာမက်ဇ်ကွီတာ'က ထုတ်ပြန်လိုက်ပါတယ်။

ထိုသင်္ဘာပျက်နေရာကနေ အနီးအနားရှိနောက်ထပ် ၂ နေရာထပ်မံတွေ့ရှိခဲ့ပြီး ၁၈၀၀ ပြည့်နှစ်တွေက ကိုလိုနီခေတ်လှေတစ်စင်းလို့ ယူဆရပါတယ်။

ဆန်ဟိုဆေးသင်္ဘောပျက်နေရာတွေ့ရှိပြီးနောက် တရားရေးရင်ဆိုင်မှုများ ဆက်လက်ဖြစ်ပွားနေရပါတယ်။

သမ္မတဟောင်းက ၂၀၁၃ ခုနှစ် ရေအောက်ယဉ်ကျေးမှုအမွေအနှစ်ဆိုင်ရာဥပဒေကို လက်မှတ်ရေးထိုးပြီး ကိုလံဘီယာရေပိုင်နက်က ရှေးဟောင်းပစ္စည်းတွေကို နိုင်ငံကပိုင်ဆိုင်ကြောင်း အဆိုပြုခဲ့ပါတယ်။

ဒါပေမဲ့ စပိန်နိုင်ငံကလည်း ယူနက်စ်ကိုရဲ့ရေအောက်ယဉ်ကျေးမှုအမွေအနှစ်ဆိုင်ရာ သဘောတူညီချက်ကို ကိုးကားပြီး သင်္ဘောကသူတို့ ပိုင်ဆိုင်တာဖြစ်ကြောင်း ဆိုလိုက်ပါတယ်။

ပိုမိုရှုပ်ထွေးလာနိုင်တာက သင်္ဘောပေါ်က အဖိုးတန်ပစ္စည်းတွေကို တောင်အမေရိကနိုင်ငံတွေက လုယူသွားနိုင်ပြီး အချို့နိုင်ငံတွေကလည်း ပိုင်ဆိုင်ခွင့်ရဖို့တောင်းဆိုလာနိုင်ပါတယ်။

Source: Insider
#Yangon_Media_Group

#WorldHealth
Published 21 June 2022

ပြင်းအားမြင့် အာထရာဆောင်းလှိုင်းဖြင့် ဦးနှောက်ကိုတစ်ကြိမ်တစ်ခါသာ ထိတွေ့ကုသစေခဲ့ရာ ဗြိတိန်လူမျိုး ၁ သန်းကျော်လောက်ခံစားနေရတဲ့ လက်ဖျားကတုန်ကယင်ဖြစ်ခြင်းကို သက်သာစေနိုင်ပါတယ်။

ထိုကုသနည်းဖြင့် လူနာတွေအနေနဲ့ လှုပ်ရှားမှုများပြန်လည်ပြုလုပ်နိုင်ကာ သာမန်လှုပ်ရှားမှုများပြန်လည်လုပ်ဆောင်နိုင်စေရန် အကူအညီဖြစ်စေကြောင်း ကျွမ်းကျင်သူများက ဆိုပါတယ်။

ထိုကုသနည်းဟာ အင်္ဂလန်ကဆေးရုံ ၂ ရုံမှာသာ ကုသနိုင်တာကြောင့် ဦးနှောက်အာရုံကြောပြဿနာရှိနေပြီး ကတုန်ကယင်ဖြစ်နေတဲ့လူအနည်းစုသာ ကုသခွင့်ပေးထားပါတယ်။

အာရုံကြောဆိုင်ရာ ကတုန်ကယင်ဖြစ်ခြင်းကြောင့် ခန္ဓာကိုယ်အစိတ်အပိုင်းတွေဖြစ်တဲ့ လက်၊ ခြေထောက်၊ မေးရိုးတို့မှာ သူ့အလိုလိုတုန်ခါ နေတတ်ပါတယ်။

ဒါဟာ ယူကေမှာ အဖြစ်အများဆုံးအခြေအနေဖြစ်ပြီး အသက်လတ်ပိုင်းအရွယ်ကျော်ပြီးနောက် အများဆုံးတွေ့ရှိရပါတယ်။

ဖြစ်ရတဲ့အကြောင်းအရင်းကို သေချာမသိရသေးပေမယ့် ဦးနှောက်မှာပုံမှန်မဟုတ်တဲ့ လျှပ်စစ်တုန်ခါမှုများဖြစ်ပေါ်လာပြီး အာရုံကြောမှ တဆင့်ကြွက်သားများသိုရောက်ရှိသွားပါတယ်။

အာထရာဆောင်းကုသမှုပေးတဲ့ အင်ပီရီယယ်ကျန်းမာရေးစောင့်ရှောက်မှုကောလိပ်မှ ဓာတ်မှန်အကြံပေးပရော်ဖက်ဆာ'ဝလာဒစ္စလောဂက်ဒရိုက်ချ်'က "ဒီဝေဒနာက လက်ဖျားခြေဖျားတွေမှာ ကတုန်ကယင်ဖြစ်တတ်ပါတယ်၊ တုန်ခါနေတာကို မထိန်းချုပ်နိုင်တာကြောင့် အပြင်သွားဖို့တောင်ရှက်ရွံနေကြပါတယ်" လို့ ပြောပြခဲ့ပါတယ်။

အပျော့စားခံစားရသူတွေက မကုသဘဲထားတတ်ကြပေမယ့် အချို့ကတော့ တုန်ခါခြင်းကိုသက်သာစေတဲ့ ပရိုပရာနိုလောဆေးများ အသုံးပြုကြပါတယ်။

ဝေဒနာပြင်းထန်လာရင်တော့ ဒီထက်ပြင်းတဲ့ဆေးများအသုံးပြုကြရပါတယ်။

ပရီမီဒုန်းလိုဆေးတွေက ကတုန်ကယင်ဖြစ်ခြင်းကို သက်သာစေပေမယ့် ဘေးထွက်ဆိုးကျိုးအနေနဲ့ အလွန်အမင်းငိုက်မျဉ်းခြင်းများ ဖြစ်ပေါ်လေ့ရှိပါတယ်။

လူနာ ၄ ပုံ ၁ ပုံလောက်ကတော့ ဆေးပေးရာမှာ မထူးခြားခဲ့ပါဘူး။

ဒီကုသနည်းဟာ လူနာတစ်ဦးကို ပေါင် ၅ သောင်းကုန်ကျမှာဖြစ်ပြီး ခန္ဓာကိုယ်လှုပ်ရှားမှုကိုထိန်းချုပ်ပေးတဲ့ သာလာမက်စ်လိုခေါ်တဲ့ ဦးနှောက်အစိတ်အပိုင်းမှာ လျှပ်ကူးပစ္စည်းလေးတစ်ခုကို စိုက်လိုက်တာဖြစ်ပါတယ်။

ဝါယာကြိုးကနေ သာလာမက်စ်ကိုလွှတ်လိုက်တဲ့လှိုင်းက ကတုန်ကယင်ဖြစ်စေတဲ့ အာရုံကြောတုန့်ပြန်မှုတွေကို ဖျက်ဆီးပစ်လိုက်ပါတယ်။

ဒီကုသနည်းဟာ လူနာ ၉၀ ရာခိုင်နှုန်းမှာ သက်သာထိရောက်စေပေမယ့် အချိန်ကြာလာတာနဲ့အမျှ လျှပ်ကူးပစ္စည်းနားမှာ တစ်ရှူးအမာရွတ်တွေစုလာကာ ထိရောက်မှုကိုအားနည်းစေပါတယ်။

ကလေးနှစ်ယောက်အဖေ မစ္စတာ'ပီယာဆန်'ဟာ ကတုန်ကယင်ဝေဒနာခံစားနေရတာကြောင့် ဘန်ဂျိုတူရိယာကို မတီးခတ်နိုင်ဘဲရှိနေခဲ့ရာမှ နိုဝင်ဘာလမှာ ကုသမှုခံယူပြီးနောက် ဝေဒနာသက်သာလာကာ ဘန်ဂျိုပြန်လည်တီးခတ်နိုင်ပြီဖြစ်ပါတယ်။

Source: DailyMail
#Yangon_Media_Group

#WorldWildlife
Published 20 June 2022

စစ်ပွဲတွေနှစ်ပေါင်းများစွာတိုင်အောင်ဖြစ်ပွားခဲ့တဲ့အပြင် ရာသီဥတုဖောက်ပြန်မှုများကြုံတွေ့နေရတဲ့အီရတ်နိုင်ငံက တောရိုင်းတိရိစ္ဆာန်ဘေးမဲ့တောတစ်ခုမှာ ဒရယ်သတ္တဝါတွေဟာ ငတ်မွတ်ခေါင်းပါးပြီးသေဆုံးနေကြရပါတယ်။

#Yangon_Media_Group

Published 20 June 2022

ပါရီနိုင်ငံတကာ အတွင်းခံဖက်ရှင်ပွဲဟာ ပါရီကို ပြန်လည်ရောက်ရှိလာပြီဖြစ်ပါတယ်။ အဲဒီပွဲမှာ ကိုယ်ဟန်ပြမောင်မယ်တွေက အမှတ်တံဆိပ်မျိုးစုံကို "ultra-sexy" စတိုင်ဝတ်ဆင်ပြသခဲ့ကြပါတယ်။

ပါရီနိုင်ငံတကာ အတွင်းခံဖက်ရှင်ပွဲတော် ကျင်းပပုံတွေကို AFP က ရိုက်ကူးတင်ဆက်ပေးထားတာဖြစ်ပါတယ်။

Source: AFP

Published 20 June 2022

ထိုင်ဝမ်ကျွန်းအရှေ့ဖက် ဟွာလျန်းစီရင်စုမှာ ဇွန် ၂၀ ရက် တနင်္လာနေ့ မနက် ၉ နာရီ ၅ မိနစ် က ပြင်းအား ၅.၉ အဆင့်ရှိ ငလျင်ကြီးတစ်ခု လှုပ်ရှားသွားခဲ့ပါတယ်။

လတ္တီကျွတ်၂၃.၆၆ ဒီဂရီနှင့် လောင်ဂျီတွတ် ၁၂၁.၅၂ ဒီဂရီမှာ အနက် ၁၀ ကီလိုမီတာမှာ ငလျင်က လှုပ်ရှားသွားတာ ဖြစ်ပါတယ်။

ထိုင်ဝမ်တစ်ကျွန်းလုံး ငလျင်လှုပ်ရှားမှုကို ထိတွေ့ခံစားကြရပါတယ်။ ငလျင်ကြီးလှုပ်ပြီး ၄၀ စက္ကန့်အကြာမှာ ၄.၈ ပြင်းအားအဆင့်ရှိ ငလျင်တစ်ခုအပါအဝင် ငလျင်(၂)ခု လှုပ်ခတ်ခဲ့ပါတယ်။

လူတွေထိခိုက်ဒဏ်ရာရတာနှင့် အိုးအိမ်ပစ္စည်း ဆုံးရှုံးမှုတွေ သတင်းမရသေးပါဘူး။ ငလျင်ကြောင့် တိုင်ပေက မြေအောက်ရထားတွေ ခပ်နှေးနှေးပဲ မောင်းနှင်ခဲ့ကြရပါတယ်။

Source: CCTV+