#World_Health
Published 24 January 2023

အရက်အလွန်အကျွံသောက်ခြင်းက ကျန်းမာရေးကိုဆိုးရွားစေပေမယ့် အနည်းငယ်မျှသောက်သုံးခြင်းကတော့ ကျန်းမာရေးကောင်းမွန်စေတယ်ဆိုတဲ့ မရေမရာတွေ့ရှိချက်တွေကို ဆယ်စုနှစ်တွေတိုင်အောင် လေ့လာပြီးနောက်မှာတော့ အရက်ကိုအနည်းငယ်မျှ မှီဝဲရင်တောင် ကျန်းမာရေးဆိုးကျိုးတွေဖြစ်လာနိုင်တယ်ဆိုတာကို သိလာရပါပြီ။

၂၀၁၅ မှ ၂၀၁၉ ခုနှစ်အတွင်း အမေရိကန်မှာ အရက်အလွန်အကျွံသောက်ခြင်းကြောင့် တစ်နှစ်ကို လူပေါင်း ၁၄၀,၀၀၀ ခန့်သေဆုံးခဲ့ပါတယ်။

၄၀ ရာခိုင်နှုန်းလောက်က ရုတ်တရက်ဖြစ်စဉ်များဖြစ်တဲ့ ယာဉ်တိုက်မှု၊ အဆိပ်သင့်ခြင်း၊ အသတ်ခံမှုတို့ကြောင့် သေဆုံးခဲ့ပေမယ့် အများစုကတော့ အရက်ကြောင့်ဖြစ်တဲ့ အသည်းရောဂါ၊ ကင်ဆာ၊ နှလုံးရောဂါတို့ကနေ နာတာရှည်ရောဂါများဖြစ်ကာ သေဆုံးကြရတာဖြစ်ပါတယ်။

အရက်အလွန်အကျွံသောက်မှသာ ကျန်းမာရေးထိခိုက်တယ်လို့ လူတွေကထင်နေကြပေမယ့် အတန်အသင့်သောက်သုံးရင်တောင် ကျန်းမာရေးထိခိုက်တတ်ပါတယ်။

အမျိုးသားတွေမှာ နေ့စဉ် ၂ ခွက်ထက်ပိုပြီး သောက်သုံးသူများနဲ့ အမျိုးသမီးတွေမှာ ၁ ခွက်ထက်ပိုသောက်သူတွေဟာ အရက်စွဲလမ်းတယ်လို့ သတ်မှတ်လို့ရပါတယ်။

အရက်ကြောင့် ကျန်းမာရေးထိခိုက်ရတဲ့ အဓိကအကြောင်းအရင်းတစ်ခုက DNA ကို ထိခိုက်စေတာကြောင့်ပါ။

အရက်သောက်တဲ့အခါ ခန္ဓာကိုယ်ထဲမှာ အက်ဆီတယ်ဒီဟိုက်ဆိုတဲ့ ဓာတုပစ္စည်းအဖြစ် ပြောင်းလဲသွားပြီး DNA ကို ပျက်စီးစေပါတယ်။
DNA ပျက်စီးသွားတဲ့အခါ ဆဲလ်က ထိန်းမနိုင်ကြီးထွားလာပြီး ကင်ဆာအကျိတ်ဖြစ်ပွားလာပါတယ်။

လက်ရှိသုတေသနများအရ အရက်အနည်းငယ်မျှ သောက်ရင်တောင် သွေးပေါင်ချိန်တိုးစေပြီး နှလုံးရောဂါဖြစ်စေပါတယ်။

မသောက်တော့ဘဲနေလိုက်ရင်တော့ သွေးပေါင်ချိန်ပုံမှန် ပြန်ဖြစ်လေ့ရှိပေမယ့် နှလုံးခုန်မမှန်ခြင်း၊ သွေးခဲခြင်း၊ လေဖြတ်ခြင်းတို့ ဖြစ်နိုင်ချေရှိပါတယ်။

အရက်ကြောင့် တိုက်ရိုက်ဖြစ်တတ်တဲ့ကင်ဆာတွေကတော့ ခံတွင်းကင်ဆာ၊ လည်ချောင်းကင်ဆာ၊ အစာရေမျိုကင်ဆာ၊ အသည်းကင်ဆာ၊ ရင်သားကင်ဆာ၊ အူမကြီးကင်ဆာတို့ဖြစ်ပါတယ်။

အသောက်နည်းတဲ့လူက အသောက်များတဲ့လူထက် ကင်ဆာဖြစ်နိုင်ချေနည်းသွားတာသာရှိပါတယ်။

သောက်တဲ့သူတိုင်းတော့ ဒီရောဂါတွေဖြစ်နေတာမဟုတ်ပါဘူး။
အစားအသောက်ပုံစံ၊ လေ့ကျင့်ခန်း၊ ဆေးလိပ်သောက်ခြင်းတို့ကလည်း ရောဂါဖြစ်နိုင်ချေများခြင်း နည်းခြင်းကို ဖြစ်စေနိုင်ပါတယ်။

အသောက်များတဲ့လူက လျှော့သောက်ပြီး အသောက်နည်းတဲ့လူက မသောက်ဘဲနေခြင်းဖြင့် ရောဂါဖြစ်နိုင်ချေအန္တရာယ်တွေကို လျှော့ချနိုင်ပါတယ်။

ယေဘုယျအားဖြင့်တော့ လျှော့သောက်ပါက အသက်ပိုရှည်နိုင်တယ်လို့ သတ်မှတ်ရမှာဖြစ်ပါတယ်။

Source: CNA
#Yangon_Media_Group

#World_News
Published 23 January 2023

ဒိုမီနီကန်အမျိုးသားတစ်ဦးဟာ ကာရစ်ဘီယန်ပင်လယ်ထဲက ရွက်လှေတစ်စီးပေါ်ကနေ တစ်လနီးပါးပျောက်ဆုံးသွားခဲ့ပြီး ကိုလံဘီယာရေပြင်မှာ ကယ်ဆယ်ခြင်းမခံရခင်အချိန်အထိ ခရမ်းချဉ်ဆော့စ်နဲ့ အသက်ဆက်ခဲ့ရကြောင်း နိုင်ငံရေတပ်အာဏာပိုင်များက ဗုဒ္ဓဟူးနေ့မှာ သတင်းထုတ်ပြန်ခဲ့ပါတယ်။

#Yangon_Media_Group

Published 23 January 2023

ကမ္ဘာပေါ်မှာ တစ်တွဲတည်းသော အသက်ရှင်ကျန်ရစ်တဲ့ သုံးမြွှာပူး ပန်ဒါဝက်ဝံတွေဟာ တရုတ်နိုင်ငံ တောင်ပိုင်း ကွမ်ကျိုးမြို့မှာ နွေဦးပွဲတော်အဆင်အယင်တွေနှင့် ပြင်ဆင်ထားတဲ့ အခန်းထဲမှာ အစားကောင်းတွေစားသောက်ရင်း အလည်လာကြတဲ့ ဧည့်ပရိသတ်တွေကို ပွဲတော်လာပျော်ရွှင်မှုတွေ ဆောင်ကြဉ်းပေးနေပါတယ်။

သားဖောက်ပေးသူတွေဟာ တရုတ်နှစ်သစ်ကူးဆင်နွှဲဖို့အတွက် ရှစ်နှစ်အရွယ်သုံးမြွှာပူးလေးတွေနေထိုင်တဲ့ အိမ်ကလေးကို မီးအိမ်နီတွေ၊ နှစ်ကြောင်းကဗျာတွေနှင့် အလှဆင်ပေးထားပါတယ်။

တန်ဖိုးရှိလှတဲ့ သုံးမြွှာပူးပန်ဒါကလေးသုံးကောင်ကို ၂၀၁၄ခုနှစ် ဇူလိုင်၂၉ရက်မှာ ကွမ်ကျိုးမြို့က ချင်မီလောင် ဆာဖရီဥယျဉ်မှာ မွေးဖွားပေးခဲ့ပါတယ်။ သူတို့လေးတွေကို မိန်မိန်၊ ရွှိုင်းရွှိုင်းနှင့် ကူကူလို့အမည်ပေးထားပါတယ်။ အသက် ၅နှစ်သားရောက်တဲ့အခါ သူတို့သီးခြားရပ်တည်နိုင်အောင် သူတို့ကိုခွဲထားပေးခဲ့ပါတယ်။သူတို့သုံးကောင်ထဲမှာ အလတ်ကလေးရွှိုင်းရွှိုင်းက အသွက်ဆုံးလေးဖြစ်ပါတယ်။ သူ့အိမ်အလယ်မှာ  ကံကောင်းပျော်ရွှင်မှုလို့ အဓိပ္ပါယ်ရတဲ့ တရုတ်အက္ခရာ “ဖူ”ကို ချိတ်ဆွဲပေး ထားပါတယ်၊

အကြီးဆုံးအစ်မကြီး မိန်းမိန်းကတော့ အေးအေးဆေးဆေးနေတတ်ပြီး ကမ္ဘာလှည့်တွေကြားထဲ ထင်ရှားပေါ်လွင်နေပါတယ်။ မိန်းမိန်းဟာ လူတွေနှင့် ဆက်သွယ်တတ်ပြီး ညင်သာစွာထိုင်တတ်ပါတယ်။ အငယ်ဆုံးကူးကူးကတော့ ပန်ဒါချစ်တဲ့သူတွေဆီက နှစ်သက်တဲ့အသံတွေကိုလျစ်လျှူရှုပြီး အပင်ကိုမှီပြီးလှဲလျောင်းနေတတ်ပါတယ်။

“ နှစ်သစ်ကူးပွဲတော်အတွင်း သူတို့ကို ရှယ်အစားအစာတွေကျွေးတယ်။ ဥပမာ တောင်ပိုင်းကလူတွေဟာ ပွဲတော်မှာ တန်ယွမ်လို့ခေါ်တဲ့ ဆန်လုံးတွေစားကြတယ်။ အဲဒါကြောင့်သူတို့ကို တန်ယွမ်ပုံစံ အလုံးကလေးထဲ  ဒါမှမဟုတ် ဖက်ထုတ်ပုံစံတွေထဲ ပြောင်းဖူးပြုတ်တွေ ထည့်ကျွေးပါတယ်” လို့ ပန်ဒါထိမ်း ချန်ရှုကျင်းက ပြောကြားလိုက်ပါတယ်၊

သုံးမြွှာပူးကလေးတွေဟာ ကျန်းမာရေးကောင်းနေကြပြီး  ဒီနှစ်ထဲ သားဖောက်မယ့်အစီအစဉ်ထဲ သူတို့ပါဝင်လာမယ် လို့ အထိမ်းတွေဆီကသိရပါတယ်။

Source : CCTV+

#Triplets_Giant_panda

#China_triplets_panda

#Chimelong_Safari_Park

#DailyNews
Published_ 23 January 2023

၁။ ပြည်ပသို့ ရေထွက်ကုန်ပစ္စည်းတင်ပို့မှု အမေရိကန်ဒေါ်လာ ၅၅၇ သန်းကျော်ရရှိထား

၂။ ဂျိုးဖြူပိုက်ပြင်နေစဉ်ရေပြတ်နေသည့် လူနေရပ်ကွက်များကို ရေများလှူဒါန်းပေးနေ

၃။ သယ်ယူပို့ဆောင်စရိတ် မြင့်တက်နေပေမယ့် ကုန်ကားများပုံမှန်အတိုင်းရန်ကုန်သို့ ဝင်ရောက်လာဟုဆို

၄။ ပင်လယ်ပြင်တွင် လမ်းပျောက်၍ ခရမ်းချဉ်ဆော့စ်နှင့်(၂၄)ရက်တိုင်အောင် အသက်ဆက်ခဲ့ရသည့် ဒိုမီနီကန်လူမျိုးကို ကိုလံဘီယာမှတွေ့ရှိကယ်တင် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#World_Crime

Published 23 January 2023

စနေနေ့က အက'ကလပ်တစ်ခုမှာ လူ ၁၀ ဦးကို သတ်ခဲ့ပြီး ၁၀ ယောက်ကျော်ဒဏ်ရာရရှိစေခဲ့တဲ့ အသက် ၇၂ နှစ်အရွယ် သေနတ်သမားတစ်ဦးဟာ ကိုယ့်ကိုယ်ကိုသတ်သေသွားခဲ့ကြောင်း ရဲအရာရှိများက ထုတ်ပြန်ကြေညာခဲ့ပါတယ်။

'ဟူကန်ထရန်'လို့အမည်ရတဲ့သူဟာ လူအစုလိုက်အပြုံလိုက်သတ်ခဲ့တယ်လို့ စွပ်စွဲခံထားရပြီး ရဲအရာရှိများနဲ့ ရင်ဆိုင်ပြီးနောက် ကုန်တင်ယာဉ်တစ်ဦးပေါ်မှာ ကိုယ့်ကိုယ်ကို သေနတ်နဲ့ပစ်သတ်သွားတယ်လို့ လော့စ်အိန်ဂျလိစ်ခရိုင်ရဲမှူး'ရောဘတ်လူနာ'က သတင်းစာရှင်းလင်းပွဲမှာ ပြောကြားခဲ့ပါတယ်။

နှစ်သစ်ကူးပွဲတော်ပြီးနောက် Monterey Park Ballroom မှာ ပစ်ခတ်ခဲ့တယ်လို့ စွပ်စွဲခံထားရတဲ့ 'ဟူကန်ထရန်'ဟာ တစ်ဦးတည်း ကျူးလွန်ခဲ့တာဖြစ်ပြီး အကြောင်းအရင်းကိုတော့ စုံစမ်းစစ်ဆေးနေဆဲဖြစ်တယ်လို့ ရဲမှူးက ဆိုပါတယ်။

နံနက် ၁၀ နာရီ ၂၀ မိနစ်မှာ တော်ရန့်စ်ရှိရဲများက အလိုရှိကြောင်းဖော်ပြချက်ထဲကအတိုင်း တရားခံရဲ့အဖြူရောင်ဗန်ကားကို တွေ့ရှိခဲ့ကာ ဈေးဝယ်စင်တာကားပါကင်နေရာအထိ လိုက်သွားခဲ့ပြီး ကားထဲက သေနတ်ပစ်သံတစ်ချက် ကြားလိုက်ရပါတယ်။

အရာရှိများက နောက်ဆုတ်ပြီး ဗျူဟာမြောက်အဖွဲ့တွေကို အကူအညီတောင်းခဲ့ပါတယ်။

မွန်းလွဲမတိုင်ခင်အချိန်မှာ သံချပ်ကာယာဉ်တွေနဲ့ ဗုံးဖြုတ်ရေးအဖွဲ့များ ရောက်လာခဲ့ကြပါတယ်။

၁ နာရီမထိုးခင်အချိန်မှာ SWAT အဖွဲ့က ဗန်ကားရဲ့ခရီးသည်ထိုင်ခုံတံခါးနဲ့ ဘေးတံခါးများကို ဖွင့်ခဲ့ကြပါတယ်။

ဓာတ်ပုံမှတ်တမ်းများအရ လူတစ်ယောက်က ယာဉ်မောင်းထိုင်ခုံမှာ ငိုက်စိုက်ကျနေခဲ့ကာ တရားခံဖြစ်တယ်လို့ အတည်ပြုခဲ့ကြပါတယ်။

ရဲဌာနက အစောပိုင်းမှာ တရားခံအလိုရှိကြောင်း စာထုတ်ပြန်ခဲ့ရာမှာ မျက်မှန်တပ်ထားပြီး ဆောင်းတွင်းဝတ်ဦးထုပ်၊ သားရေဂျက်ကတ်တို့ ဝတ်ဆင်ထားပါတယ်။

သူ့ရဲ့ကားထဲမှာ ပစ်ခတ်မှုဖြစ်ခဲ့စဉ်တုန်းကနဲ့ ဆက်စပ်နေတဲ့ သေနတ်တစ်လက်ကိုလည်း တွေ့ရှိခဲ့ပါတယ်။

လော့စ်အိန်ဂျလိစ်မြို့အပြင်ဘက် ၈ မိုင်ခန့်က ကလပ်တစ်ခုမှာ ပစ်ခတ်မှုဖြစ်ပွားခဲ့ပြီး အမျိုးသား ၅ ဦး၊ အမျိုးသမီး ၅ ဦးသေဆုံးခဲ့ပါတယ်။
၁၀ ယောက်က ဒဏ်ရာရထားပြီး ၇ ယောက်က ဆေးရုံတင်ထားရဆဲဖြစ်ပါတယ်။

အခင်းဖြစ်ပွားရာကနေ တရားခံလို့ယူဆရတဲ့ ယောက်ျားတစ်ယောက်လွတ်မြောက်သွားပြီး အာရှလူမျိုးဖြစ်တယ်လို့ အလိုရှိစာထဲမှာ ဖော်ပြခဲ့ပါတယ်။

ပစ်ခတ်မှုဖြစ်ပွားပြီး မိနစ် ၂၀ အကြာမှာ အယ်ဟမ်ဘရာရှိ အကခန်းမမှာလည်း ထိုလူကပဲသေနတ်ကိုင်ပြီး ဝင်လာပေမယ့် လူနှစ်ယောက်က လက်နက်မဲ့အောင် တားဆီးနိုင်ခဲ့ပါတယ်။

Source: NY Post
#Yangon_Media_Group

#World_Health
Published 22 January 2023

ဆိုဒါနဲ့ သစ်သီးဖျော်ရည်လိုမျိုး အချိုဓာတ်ပါတဲ့ အရည်တွေဟာ သွေးတွင်းသကြားဓာတ်ပမာဏကို မြင့်တက်စေပြီး နှလုံးရောဂါ၊ ဆီးချိုဒုတိယအမျိုးအစား၊ လေဖြတ်ခြင်းတို့ ဖြစ်စေနိုင်ကြောင်း လေ့လာမှုအသစ်တစ်ရပ်အရ သိရပါတယ်။

လူကြိုက်အများဆုံး အဖျော်ယမကာတွေမှာ ဖရပ်တို့စ်(fructose)ပါဝင်မှုမြင့်မားတာကြောင့် အထိခိုက်နိုင်ဆုံးဖြစ်တယ်လို့ American Journal of Clinical Nutrition မှာ ဖော်ပြထားပါတယ်။

ဆီးချို၊ နှလုံးသွေးကြောရောဂါ၊ ကင်ဆာမဖြစ်ဖူးတဲ့ လူပေါင်း ၄ သောင်းကျော်ကို ဟားဗတ်ဒ်မှ သိပ္ပံပညာရှင်များက စစ်တမ်းကောက်ယူခဲ့ကာ သကြားဓာတ်က ကျန်းမာရေးကိုဘယ်လောက်ထိခိုက်လဲဆိုတာကို ခြေရာခံခဲ့ကြပါတယ်။

ဖရပ်တို့စ်အလွန်အကျွံစားမိတဲ့အခါ ကိုယ်အလေးချိန်တက်ခြင်း၊ ခန္ဓာကိုယ်အလယ်တဝိုက်အဆီတက်လာခြင်း၊ နှလုံးသွေးကြောဆိုင်ရာ ဇီဝဖြစ်စဉ်ချို့ယွင်းမှုများ ဖြစ်စေနိုင်ကြောင်း သိပ္ပံပညာရှင်များ တွေ့ရှိခဲ့ကြပါတယ်။

ရောဂါထိန်းချုပ်ကာကွယ်ရေးစင်တာ(CDC)ရဲ့ ဖော်ပြချက်အရ သွေးတွင်းသကြားဓာတ်မြင့်မားတဲ့အခါ သွေးကြောတွေနဲ့ နှလုံးကိုထိန်းချုပ်ထားတဲ့ အာရုံကြောများကို ထိခိုက်စေကာ ဆီးချိုဖြစ်လာနိုင်စေပါတယ်။

သကြားပါတဲ့ အဖျော်ယမကာတွေက ဖရပ်တို့စ်ပါဝင်မှုအများဆုံး အစားအစာတွေဖြစ်ပါတယ်။

အစားအသောက်တွေမှာပါဝင်တဲ့ ဖရပ်တို့စ်ပမာဏက မူလရင်းမြစ်ပေါ်မူတည်ပြီး ကွဲပြားတတ်ပါတယ်။

ဖျော်ရည်တွေမှာ ဖရပ်တို့စ်ပမာဏမြင့်မားတာကြောင့် အသီးတွေကို ဒီအတိုင်းစားခြင်းက ပိုပြီးကျန်းမာစေမှာဖြစ်ပါတယ်။

သကြားပါတဲ့ အစားအသောက်တွေက ကျန်းမာရေးပြဿနာများဖြစ်နိုင်သလို သကြားအစားထိုး အချိုဓာတ်ပေးတဲ့အမှုန့်တွေကလည်း သွေးတွင်းသကြားဓာတ်ကို မြင့်တက်စေတယ်လို့ သိပ္ပံပညာရှင်များက သတိပေးထားပါတယ်။

Source: NY Post
#Yangon_Media_Group