#World_News
Published 26 July 2025

▪️ သောကြာနေ့က Southwest Airlines လေယာဉ်တစ်စီး လော့စ်အိန်ဂျလိစ်လေဆိပ်တစ်ခုမှ ထွက်ခွာပြီးနောက် ခဏအကြာမှာပဲ လေထဲမှာ လေယာဉ်ချင်းတိုက်မိမယ့် အခြေအနေကို ရှောင်ရှားနိုင်ရန်အတွက် ရုတ်တရက်ကြီး ၄၇၅ ပေလောက် နှိမ့်ဆင်းလိုက်သဖြင့် လေယာဉ်မယ် ၂ ဦး ထိခိုက်ဒဏ်ရာရခဲ့ပါတယ်။

▪️ FlightRadar24 အချက်အလက်အရ Southwest လေကြောင်းခရီးစဉ် ၁၄၉၆ ဟာ ဟောလိဝုဒ်ဘားဘန့်လေဆိပ်ကနေ ထွက်ခွာပြီး ၆ မိနစ်မှာပဲ အမြင့်ပေ ၁၄,၁၀၀ ပေကနေ ၁၃,၆၂၅ သို့ ထိုးဆင်းသွားခဲ့ပါတယ်။

▪️ လေထဲမှာ လေယာဉ်ချင်းတိုက်မိခြင်း မဖြစ်စေရန်အတွက် အရေးတကြီးရှောင်ရှားလိုက်ရခြင်း ဖြစ်တယ်လို့ လေယာဉ်မှူးက ခရီးသည်တွေကို ပြောပြခဲ့ပါတယ်။

▪️ လေယာဉ်ရုတ်တရက် ထိုးကျသွားတဲ့ ၁၀ စက္ကန့်လောက်မှာ ခရီးသည်တွေ အော်ဟစ်နေခဲ့ကြပါတယ်။

▪️ ခရီးသည်တွေ ထိုင်ခုံကနေ မြောက်တက်သွားပြီး ခေါင်မိုးနဲ့ ဦးခေါင်းဆောင့်မိကြတယ်လို့ လေယာဉ်ပေါ်ပါလာတဲ့ ဟာသသရုပ်ဆောင် ဂျင်မီဒိုးက ပြောပြပါတယ်။

▪️ လေယာဉ်ထိုးဆင်းပြီးနောက် စက္ကန့် ၂၀ လောက်အကြာမှာ တစ်နာရီကို ၄၅၀ မိုင်နှုန်းဖြင့် ဆက်လက်ပျံသန်းနေခဲ့ပါတယ်။

▪️ နောက်ထပ်လေယာဉ်တစ်စင်းဖြစ်တဲ့ Hawker Hunter လေယာဉ်ဟာ Southwest လေယာဉ်အနီး အမြင့် ၁၄,၆၃၃ ပေမှာ ရှိနေခဲ့ပါတယ်။

▪️ Hawker Hunter လေယာဉ်မှူးတွေက Boeing 737 ကို မြင်တွေ့နေရပေမယ့် လေကြောင်းထိန်းချုပ်ရေးဆီကနေ ညွှန်ကြားချက် သေချာမရရှိခဲ့ဘူးလို့ ပြောလာပါတယ်။

▪️ ဒီလေယာဉ်ကတော့ ယူကေစစ်တပ်လေကြောင်းအာဏာပိုင်ဖြစ်တဲ့ Hunter အပြည်ပြည်ဆိုင်ရာလေကြောင်းမှ ပိုင်ဆိုင်တာ ဖြစ်ပါတယ်။

▪️ ဒီအဖြစ်အပျက်အတွင်း လေယာဉ်မှူးတွေနဲ့ လေယာဉ်မယ်တွေရဲ့ လုပ်ငန်းကျွမ်းကျင်မှုကို အသိအမှတ်ပြုရမှာဖြစ်ကြောင်း၊ ခရီးသည်တွေနဲ့ ဝန်ထမ်းတွေရဲ့ ဘေးကင်းမှုက အရေးအကြီးဆုံးဖြစ်ကြောင်း Southwest က ထုတ်ပြန်ထားပါတယ်။

Source: New York Post

#World_Health
Published 26 July 2025

▪️ အာရုံကြောချို့ယွင်းတဲ့ ပါကင်ဆန်ရောဂါဖြစ်ပွားသူအချို့ဟာ မျိုးရိုးဗီဇကြောင့် ဖြစ်ကြပေမယ့် အများစုကတော့ အကြောင်းအရင်း မသိရှိကြပါဘူး။

▪️ သိပ္ပံပညာရှင်တွေ စောင့်ကြည့်နေကြတဲ့ ဗိုင်းရပ်စ်တစ်မျိုးက အခုဆိုရင် ဒီရောဂါဖြစ်ပွားစေနိုင်ဖွယ် ရှိတယ်လို့ တွေ့ရှိလာပါတယ်။

▪️ ပါကင်ဆန်ရောဂါဖြစ်စေနိုင်ဖွယ်ရှိတဲ့ ဗိုင်းရပ်စ်လိုအရာတွေကို စူးစမ်းလေ့လာချင်တာဖြစ်တယ်လို့ နော့သ်ဝက်စတန်းဆေးအဖွဲ့အစည်းမှ အာရုံကြောရောဂါအကြီးအကဲ ဒေါက်တာ အစ်ဂေါကိုရယ်နစ်က ပြောပါတယ်။

▪️ Human Pegivirus လို့ခေါ်တဲ့ သွေးထဲကကူးစက်တဲ့ ဗိုင်းရပ်စ်ဟာ ပါကင်ဆန်ရောဂါ ရှိသူတွေ ၅၀ ရာခိုင်နှုန်းရဲ့ ဦးနှောက်နဲ့ ကျောရိုးအရည်တို့မှာ ရှိနေပါတယ်။

▪️ အဆိုပါဗိုင်းရပ်စ်ဟာ ကူးစက်တဲ့လက္ခဏာမပေါ်ဘဲ ဦးနှောက်ကို ရောက်နေတတ်တယ်လို့ ဆိုပါတယ်။

▪️ ဒါဟာ ပြင်ပအရာတစ်ခုက ခန္ဓာကိုယ်ထဲမှာ မသိလိုက်ဘဲ ဖြစ်ပျက်တဲ့သဘော ဖြစ်နေပါတယ်။

▪️ သာမန်ဆိုရင် ဘေးအန္တရာယ်မရှိတဲ့ ဗိုင်းရပ်စ်က ပါကင်ဆန်ရောဂါနဲ့ များစွာသက်ဆိုင်နေပြီး မျိုးရိုးနောက်ခံရှိတဲ့သူတွေမှာ အရေးပါနေပါတယ်။

▪️ ဗိုင်းရပ်စ်ရှိသူတွေမှာ ကိုယ်ခံအားစနစ်က ကွဲပြားတုံ့ပြန်နေပြီး တစ်ဦးနဲ့တစ်ဦးလည်း ရှုပ်ထွေးတဲ့သဘော မြင်ရပါတယ်။

▪️ LRRK2 မျိုးဗီဇပစ္စည်းထဲမှာ ပါကင်ဆန်ဆက်စပ်ဆင့်ကဲပြောင်းလဲခြင်း ဖြစ်ပေါ်တဲ့သူတွေမှာ ကိုယ်ခံအားစနစ်က ဗိုင်းရပ်စ်ကို တစ်မျိုးတဖုံ တုံ့ပြန်စေပါတယ်။

▪️ သိပ္ပံပညာရှင်အဖွဲ့က ဒီဗိုင်းရပ်စ် ဦးနှောက်သို့ ဘယ်လိုရောက်ရှိလဲဆိုတာကို သိရဖို့ နောက်ထပ်လေ့လာမှုကြီးတွေ ပြုလုပ်ချင်နေပါတယ်။

#Source: New York Post

#World_Science
Published 26 July 2025

▪️ MIT's Media Lab မှ သုတေသီများက AI အကူအညီတစ်ခုဖြစ်တဲ့ ChatGPT အသုံးပြုခြင်းနဲ့ ဦးနှောက်လှုပ်ရှားမှုတို့ကြား ပတ်သက်မှုကို ဖော်ထုတ်ဖို့အတွက် စမ်းသပ်ခံသူ ၅၄ ယောက်မှာ EEG ဦးနှောက်လှိုင်းတိုင်းဆင်ဆာများ တပ်ဆင်ပြီး လေ့လာခဲ့ကြပါတယ်။

▪️ အဖွဲ့ ၃ ဖွဲ့ခွဲပြီး စာစီစာပုဒ်ကို နည်းလမ်း ၃ မျိုးဖြင့် ရေးခိုင်းခဲ့ပါတယ်။
တစ်ဖွဲ့ကတော့ ဘာအကူအညီမှ မယူဘဲ ကိုယ့်ဘာသာ ရေးခိုင်းပြီး ဒုတိယအဖွဲ့ကို search engine ဖြင့် အချက်အလက်များ ရှာဖွေအသုံးပြုစေပါတယ်။

▪️ နောက်ဆုံးအဖွဲ့ကိုတော့ AI အကူအညီပါဝင်တဲ့ ChatGPT အသုံးပြုခိုင်းပါတယ်။

▪️ AI အသုံးပြုပြီးရေးတဲ့ အဖွဲ့က ဦးနှောက်ပါဝင်ပတ်သက်မှု အနည်းဆုံးဖြစ်နေပြီး ကိုယ့်ဘာသာ ရေးတဲ့သူတွေထက် ဦးနှောက်လှုပ်ရှားမှု ၅၅ ရာခိုင်နှုန်း ပိုနည်းနေတာ တွေ့ခဲ့ကြပါတယ်။

▪️ ကိုယ့်ဦးနှောက်ကိုယ်သုံးတဲ့ အဖွဲ့က ဦးနှောက်အသုံးချနိုင်စွမ်းမှာ အကျယ်ပြန့်ဆုံးဖြစ်ခဲ့ပြီး search engine အသုံးပြုတဲ့အဖွဲ့ကတော့ ထိုနှစ်ဖွဲ့ကြား ရောက်ရှိနေပါတယ်။

▪️ ChatGPT ဖြင့်ရေးတဲ့သူတွေထဲက ၈၃ ရာခိုင်နှုန်းက စာစီစာပုဒ်ရေးပြီးနောက် မိနစ်ပိုင်းအတွင်းမှာပင် သူတို့ရေးသားတဲ့ စာတစ်ကြောင်းကိုတောင် မမှတ်မိကြပါဘူး။

▪️ သဘောကတော့ AI ကပဲ အလုပ်တွေကို လုပ်သွားတာကြောင့် ဦးနှောက်ကို အပေါ်ယံသာ အသုံးပြုပြီး မှတ်ဉာဏ်ထဲအထိ မရောက်ရှိတာ ဖြစ်ပါတယ်။

▪️ ပိုပြီးစိုးရိမ်ရတာက AI အသုံးပြုခြင်းက အကျင့်ပါသွားပြီး AI မပါဘဲ လုပ်ခိုင်းတဲ့အခါ ဦးနှောက်က အားထုတ်မှု သိပ်မလုပ်နိုင်တော့ပါဘူး။

▪️ ဒါပေမဲ့ ဉာဏ်ရည်တု AI ဆိုတာက ရန်သူမဟုတ်ဘဲ ညီညွတ်မျှတစွာ ချင့်ချိန်အသုံးပြုရင် နေ့စဉ်ဘဝမှာ အထောက်အကူရနိုင်သလို သင်ယူလေ့လာစရာတွေလည်း ရရှိနိုင်တာကြောင့် ဘယ်လိုအသုံးပြုလဲဆိုတဲ့အပေါ် များစွာမူတည်နေပါတယ်။

#Source: The Jerusalem Post

အမေရိကန်ကုန်သွယ်ရေးအခွန်စည်းကြပ်ခြင်းတွေက ကမ္ဘာ့စီးပွားရေးကဏ္ဍကြီးတွေမှာ ဆိုးကျိုးရှိလာနိုင်ပြီး မညီမျှမှုများဖြေရှင်းရာမှာ ကန့်သတ်ချက်တွေ ရှိလာလိမ့်မယ်လို့ နိုင်ငံတကာငွေကြေးထောက်ပံ့ရေးအဖွဲ့ (IMF)က အင်္ဂါနေ့မှာ သတိပေးလိုက်ပါတယ်။
#World_Business
Published 25 July 2025
#ကမ္ဘာ့စီးပွားရေးကဏ္ဍ #အခွန်စည်းကြပ်ခြင်း
#YMG #Yangon_Times #Yangon_Media_Group

#Daily_News

Published 25 July 2025

၁။ ‌‌‌‎‎‎တိုင်းရင်းသားလူမျိုးများ၏ အမျိုးသားဝတ်စုံမှန် သတ်မှတ်နိုင်ရေး စစ်တမ်းကောက်ယူမည်

‎၂။ ‌‎ရန်ကုန်-ဗုဒ္ဓဂါယာ ခရီးစဉ် တစ်ပတ်နှစ်ကြိမ် ပြေးဆွဲပေးမည်

၃။ ‌‎‎‎မြေလွတ်မြေရိုင်းများအသုံးပြုခွင့်ပြုရာတွင် Quick Win လုပ်ငန်းများကို ဦးစားပေးခွင့်ပြုသွားမည်

၄။ ‎‎အမေရိကန်ကုန်သွယ်ရေးအခွန်စည်းကြပ်ခြင်းကြောင့် ကမ္ဘာ့စီးပွားရေးကဏ္ဍကြီးများအပေါ်ဘေးအန္တရာယ်ကျလာနိုင်သည် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 25 July 2025

▪️ အီလွန်မက်စ်ပိုင်ဆိုင်သော Space X ရဲ့ Starlink ဂြိုဟ်တုအင်တာနက်စနစ်ဟာ ကြာသပတေးနေ့က အတွင်းပိုင်းဆော့ဖ်ဝဲ ချို့ယွင်းမှုကြောင့် ကမ္ဘာနဲ့ချီ ပြတ်တောက်မှုကြီးဖြစ်ခဲ့ပြီး သုံးစွဲသူသောင်းနဲ့ချီ အင်တာနက်ပြတ်သွားခဲ့ပါတယ်။

▪️ အမေရိကန်နဲ့ ဥရောပတို့မှာ မွန်းလွဲ ၃ နာရီခန့်က စတင်ပြတ်တောက်ခဲ့ပြီး သုံးစွဲသူ ၆၁,၀၀၀ ခန့်ထံမှ အကြောင်းကြားလာကြတယ်လို့ Downdetector စောင့်ကြည့်ရေးက ပြောပါတယ်။

▪️ ခဏအကြာမှာ Starlink က အင်တာနက်ပြတ်တောက်တဲ့အကြောင်းကို သိရှိထားပြီး ဖြေရှင်းဆောင်ရွက်နေတယ်လို့ X ဆိုရှယ်မီဒီယာမှာ ဖော်ပြခဲ့ပါတယ်။

▪️ ပြတ်တောက်ပြီး ၂ နာရီခွဲအကြာမှာ အင်တာနက်ဝန်ဆောင်မှုအများစု ပြန်ရပြီဖြစ်ကြောင်း၊ ဗဟိုကွန်ရက်ကြီးအတွက် လုပ်ဆောင်နေတဲ့ အဓိကအတွင်းပိုင်းဆော့ဖ်ဝဲများ ချို့ယွင်းတာကြောင့် ပြတ်တောက်သွားတာဖြစ်ကြောင်း Starlink အင်ဂျင်နီယာပိုင်းဒုဥက္ကဌ မိုက်ကယ်နီကိုးလ်စ်က X မှာ တောင်းပန်ထားပါတယ်။

▪️ အီလွန်မက်စ်ကလည်း အင်တာနက်ပြတ်တောက်ရတဲ့အတွက် တောင်းပန်စကားဆိုလိုက်ပြီး ပြဿနာအရင်းအမြစ်ကို ဖြေရှင်းသွားမှာဖြစ်ကာ နောက်ထပ်မဖြစ်စေရဘူးလို့ ဖော်ပြထားပါတယ်။

▪️ Space X ရဲ့ Starlink က အလျင်အမြန် တိုးတက်ဖွံ့ဖြိုးလာတဲ့ အရေးကြီးစီးပွားရေးလုပ်ငန်းဖြစ်ပြီး အခုလို အင်တာနက်ပြတ်တောက်ရတာကတော့ ဖြစ်တောင့်ဖြစ်ခဲပါတယ်။

▪️ အင်တာနက်ဝန်ဆောင်မှုကြီး ဖြစ်လာတဲ့ Starlink အနေနဲ့ အကြာရှည်ဆုံး ပြတ်တောက်တာ ဖြစ်တယ်လို့ Kentik အင်တာနက်အကဲဖြတ်ရေးမှ ကျွမ်းကျင်သူ ဒေါက်မဒိုရီက ပြောပါတယ်။

▪️ Space X ဟာ ၂၀၂၀ ခုနှစ်တည်းက Starlink ဂြိုဟ်တုပေါင်း ၈ ထောင်ကျော်ဖြင့် စတင်လုပ်ဆောင်ခဲ့ပြီး နိုင်ငံနဲ့ဒေသပေါင်း ၁၄၀ ခန့်မှ သုံးစွဲသူ ၆ သန်းကျော်ရှိပါတယ်။

▪️ ကမ္ဘာ့အနိမ့်ပိုင်းပတ်လမ်းကြောင်းကနေ ကွန်ရက်ကို ထူးထူးခြားခြား တည်ဆောက်ထားကာ စစ်စခန်းများ၊ ပို့ဆောင်ရေးလုပ်ငန်းများနဲ့ အခြားအင်တာနက်ရရှိရန် ခက်ခဲတဲ့ ဝေးလံဒေသများမှ အများအပြား သုံးစွဲကြပါတယ်။

#Source: Reuters