#World_News
Published 11 April 2026

■ အမေရိကန်နဲ့ ငြိမ်းချမ်းရေးဆွေးနွေးဖို့အတွက် အီရန်ညှိနှိုင်းရေးအဖွဲ့ သောကြာနေ့မှာ ပါကစ္စတန်နိုင်ငံ အစ္စလာမာဘက်သို့ ရောက်ရှိလာပါတယ်။

■ နောက်ဆုံးသတ်မှတ်ချိန် မတိုင်မီ နာရီပိုင်းအလို အင်္ဂါနေ့က အမေရိကန်သမ္မတ ဒေါ်နယ်ထရမ့်ဟာ ၂ ပတ်တာ အပစ်အခတ်ရပ်စဲရေး ကြေညာခဲ့ပါတယ်။

■ ဒီအတွက် အီရန်ကို အမေရိကန်နဲ့ အစ္စရေးလ်တို့ လေကြောင်းတိုက်ခိုက်တာတွေ ရပ်ဆိုင်းသွားပေမယ့် ဟော်မုဇ်ရေလက်ကြားကို အီရန်ပိတ်ဆို့ထားတာ မဖွင့်သေးသလို အစ္စရေးလ်နဲ့ လက်ဘနွန် ဟစ်ဇ်ဘိုလာကြား စစ်ပွဲလည်း ငြိမ်သက်သွားခြင်း မရှိပါဘူး။

■ အီရန်ပါလီမန်ဥက္ကဌ မိုဟာမက်ဘာကာကာလီဘက်ဖ်နဲ့ နိုင်ငံခြားရေးဝန်ကြီး အက်ဘက်စ်အာရက်ချီတို့ ဦးဆောင်တဲ့ ကိုယ်စားလှယ်အဖွဲ့မှာ စီးပွားရေး၊ လုံခြုံရေး၊ နိုင်ငံရေးကဏ္ဍမှ ပညာရှင်များအပြင် မီဒီယာနဲ့ ထောက်ပံ့ဝန်ထမ်းများ အပါအဝင် ၇၀ ခန့် ပါဝင်တာကြောင့် ဒီညှိနှိုင်းရေးတွေက ဘယ်လောက်အထိ အရေးကြီးလဲဆိုတာ သိသာပါတယ်။

■ အီရန်ခေါင်းဆောင်တွေက အမေရိကန်အပေါ် ယုံကြည်မှုမရှိတဲ့သဘော မြင်ရပေမယ့် သူတို့ရဲ့ လုပ်ပိုင်ခွင့်တွေကို အသိအမှတ်ပြုပေးရင် ညှိနှိုင်းလိုကြပါတယ်။

■ အီရန်နဲ့ အမေရိကန် အပစ်အခတ်ရပ်စဲရေး ရထားပေမယ့် အစ္စရေးလ်နဲ့ ဟစ်ဇ်ဘိုလာတို့ကြား ဆက်လက်တိုက်ခိုက်နေကြပြီး လက်ဘနွန်မှာ အထိအခိုက် များတယ်လို့ သိရပါတယ်။

■ အီရန်နိုင်ငံ့ခေါင်းဆောင်က စစ်ပွဲအတွင်း ထိခိုက်နစ်နာမှုများအတွက် လျော်ကြေးအလိုရှိနေပါတယ်။

■ ဒီစစ်ပွဲကြောင့် စွမ်းအင်ထောက်ပံ့လည်ပတ်မှုတွေ ထိခိုက်နေသလို ကမ္ဘာလုံးဆိုင်ရာ ငွေကြေးဖောင်းပွမှု မြင့်တက်နေပြီး စီးပွားရေးဖွံ့ဖြိုးမှု နှောင့်နှေးကြရပါတယ်။

Source: Reuters

#World_Health
Published 11 April 2026

■ ဟင်းနုနွယ်မှာ ဓာတ်တိုးဆန့်ကျင်ပစ္စည်းတွေ အမျှင်ဓာတ်တွေ ပြည့်ဝနေပြီး တစ်နေ့တာကို ဟင်းနုနွယ်ဖြင့် စတင်ခြင်းက ရေဓာတ်ဖြည့်ပေးခြင်း၊ အဆိပ်အတောက် ဖယ်ရှားခြင်း၊ အစာခြေစနစ် ကောင်းမွန်စေခြင်း စတဲ့ ကျန်းမာရေးအကျိုးကျေးဇူးတွေ ရနိုင်တယ်လို့ ချန်နိုင်အခြေစိုက် အာဟာရပညာရှင် ဒီပါလက်ရှ်မီက ပြောပါတယ်။

■ သွေးတွင်းသကြားဓာတ် ထိန်းညှိပေးခြင်း၊ သံဓာတ်ပါဝင်တဲ့ သွေးနီဥဆဲလ် ထုတ်လုပ်ခြင်း၊ ခွန်အားနဲ့ သက်လုံမြှင့်တင်ပေးခြင်းတို့ ရရှိနိုင်ပါတယ်။

■ သီရိရာမာချန်ဒရာ ပညာရေးနှင့်သုတေသနတက္ကသိုလ်မှ အာဟာရပညာရှင် စီဗီအီရှဝါရာကလည်း ဟင်းနုနွယ်မှာ ဗိုက်တာမင်-စီ၊ ဘီတာကယ်ရိုတင်း၊ လူတိန်းတို့လို ဓာတ်တိုးဆန့်ကျင်ပစ္စည်းများ ကြွယ်ဝပြီး အရေပြား၊ ဆံကေသာတို့ ကျန်းမာသန်စွမ်းစေကာ ကိုယ်ခံအားစနစ် ကောင်းမွန်စေတယ်လို့ ဆိုပါတယ်။

■ ဟင်းနုနွယ်မှာပါတဲ့ နိုက်ထရိတ်တွေက သွေးလှည့်ပတ်မှု ကောင်းစေပြီး ဗိုက်တာမင်-ကေနဲ့ ကယ်စီယံတို့က အရိုးကြံ့ခိုင်စေပါတယ်။

■ လူတိန်းနဲ့ ဇီဇန်သင်းတို့က မျက်လုံးကြွက်သား ယုတ်လျော့လာတဲ့ ရောဂါအခြေအနေတွေကို လျော့နည်းစေပါတယ်။

■ အမျှင်ဓာတ်နဲ့ ပိုတက်ဆီယံတို့က ကိုလက်စထရောကျစေသဖြင့် နှလုံးကျန်းမာရေးကို အထောက်အကူ ပြုပါတယ်။

■ ဟင်းနုနွယ်ချက်ပြုတ်တဲ့အခါ အာဟာရဓာတ်တွေကို ခန္ဓာကိုယ်က ကောင်းစွာစုပ်ယူနိုင်ပေမယ့် အစိမ်းလိုက်စားခြင်းကတော့ အာဟာရဓာတ်စုပ်ယူမှုတွေကို အနှောင့်အယှက် ဖြစ်စေနိုင်ပါတယ်။

Source: Indian Express.

#World_Health
Published 11 April 2026

■ နောက်ပြန်လမ်းလျှောက် လေ့ကျင့်ခန်းက အစပိုင်းမှာ ထူးဆန်းသလို ဖြစ်ပေမယ့် ခန္ဓာကိုယ်တွင်း အလုပ်လုပ်ပုံကို ကြီးမားစွာ သက်ရောက်စေနိုင်ပါတယ်။

■ နောက်ပြန်လမ်းလျှောက်ခြင်းက ခန္ဓာကိုယ်က ပုံမှန်လှုပ်ရှားလေ့မရှိတာကြောင့် အာရုံစူးစိုက်မှု၊ ထိန်းချုပ်နိုင်စွမ်း၊ ကြွက်သားပါဝင်လှုပ်ရှားခြင်းတို့ ပိုပြီးလိုအပ်ပါတယ်။

■ ဒါက သာမန်ပဲလို့ ထင်ရပေမယ့် ခန္ဓာကိုယ်ထဲမှာ သိပ်အသုံးမပြုတဲ့ ကြွက်သားတွေကို လှုံ့ဆော်ပေးရတယ်လို့ ကြံ့ခိုင်ရေးနည်းပြ ဆူနီလ်ချောင်ဒရီက ပြောပါတယ်။

■ သာမန်လမ်းလျှောက်ခြင်းနဲ့ ဘာတွေကွာခြားသွားသလဲဆိုရင် သာမန်လမ်းလျှောက်ခြင်းမှာ ဒူးကောက်ကြောနဲ့ ခြေသလုံးတို့ အများဆုံးအလုပ်လုပ်ရပြီး နောက်ပြန်လမ်းလျှောက်ခြင်းမှာတော့ ရှေ့ပေါင်ကြွက်သားတွေ ပိုမိုအလုပ်လုပ်ရကာ ခြေထောက်သန်မာစေပါတယ်။

■ အရှေ့ဘက်လမ်းလျှောက်ခြင်းက ဒူးတွေအပေါ် ဖိအားဆက်တိုက်ဖြစ်စေပြီး နောက်ပြန်လျှောက်ခြင်းကတော့ ဒီဖိအားကို လျော့စေကာ ဒူးမကောင်းသူတွေအတွက် သက်သာစေပါတယ်။

■ သာမန်လမ်းလျှောက်ခြင်းက အလေ့အကျင့်အတိုင်း ဖြစ်နေပေမယ့် နောက်ပြန်လျှောက်ခြင်းကတော့ ဦးနှောက်ကို တက်ကြွအောင်လှုံ့ဆော်ပေးပြီး ဟန်ချက်နဲ့ စိတ်ခန္ဓာလုပ်ဆောင်မှု တိုးတက်စေနိုင်ပါတယ်။

■ နောက်ပြန်လမ်းလျှောက်ခြင်းက အားစိုက်ထုတ်မှု ပိုမိုလိုအပ်ပြီး ကယ်လိုရီ ပိုမိုလောင်ကျွမ်းစေနိုင်ပါတယ်။

■ နေ့စဉ် ၁၀-၁၅ မိနစ်ခန့် နောက်ပြန်လမ်းလျှောက်ခြင်းဖြင့် ကြံ့ခိုင်မှု၊ ဟန်ချက်တို့ တိုးတက်စေပြီး ကိုယ်အလေးချိန်ပါ ကျစေနိုင်ပါတယ်။

■ အစပိုင်းမှာ လျှောက်ရတာ ထူးဆန်းနိုင်ပေမယ့် ကျင့်သားရသွားရင် အလွန်အသုံးဝင်တဲ့ လေ့ကျင့်ခန်းတစ်မျိုး ဖြစ်ပါတယ်။

Source: India Today.

တရုတ်ပြည်ရဲ့ လူသားပုံစံစက်ရုပ်ကဏ္ဍက စီးပွားဖြစ်အသုံးချခြင်းဆီ ဖြန့်ကျက်လာပြီး အဓိကကစက်ရုပ်တွေရဲ့ ဦးနှောက်ဖြစ်တဲ့ အယ်ဂိုရစ်သမ်တွေပဲ ဖြစ်ပါတယ်။

#Asia_Technology
Published 10 April 2026
#တရုတ်လူသားပုံစံစက်ရုပ် #အယ်ဂိုရစ်သမ်
#YMG #Yangon_Times #Yangon_Media_Group

#World_News
Published 10 April 2026

■ အီရန်နိုင်ငံ့ခေါင်းဆောင် မော့တာဘာခါမေနီက ဖခင် အယာတိုလာအလီခါမေနီ အသတ်ခံရတာကို လက်စားချေဖို့ ဆုံးဖြတ်ထားကြောင့် ကြာသပတေးနေ့က ပြောပါတယ်။

■ ယခုထက်ထိ အများမြင်ကွင်းမှာ ပေါ်မလာသေးတဲ့ မော့တာဘာရဲ့ အဆိုပါ ထုတ်ပြန်ချက်ကို အီရန်မီဒီယာတစ်ခုက ဖော်ပြခဲ့ပါတယ်။

■ စစ်ပွဲပထမဆုံးနေ့မှာ အသတ်ခံခဲ့ရတဲ့ ဖခင်နဲ့ အခြားသူတွေအတွက် လက်စားချေဖို့ အီရန် ဆုံးဖြတ်ထားတာ ဖြစ်ပါတယ်။

■ တိုက်ခိုက်ခဲ့သူတွေကို အလွတ်မပေးဘဲ အလျော်အစားနဲ့ လက်စားချေမှု တောင်းယူသွားဖို့ ကြုံးဝါးထားပြီး ဟော်မုဇ်ရေလက်ကြားကို နောက်ထပ်အခြေအနေသို့ ဆောင်ရွက်သွားမယ်လို့ သတိပေးလိုက်ပါတယ်။

■ အာရပ်အိမ်နီးချင်းတွေ အနေနဲ့လည်း မှန်ကန်တဲ့ဘက်ကနေ ရပ်တည်ပေးပြီး အနောက်တိုင်းအင်အားစုတွေကို သစ္စာမခံဖို့ တောင်းဆိုလိုက်ပါတယ်။

■ X ဆိုရှယ်မီဒီယာမှာ ဖော်ပြထားရာမှာ အီရန်က စစ်ပွဲအလိုမရှိပေမယ့် လုပ်ပိုင်ခွင့်တွေကို စွန့်လွှတ်မှာမဟုတ်ဘဲ စည်းလုံးညီညွတ်စွာ ခုခံသွားမှာဖြစ်တယ်လို့ ဆိုပါတယ်။

■ ထိခိုက်ပျက်စီးမှုတိုင်း၊ အာဇာနည်တွေရဲ့ သွေးကြွေးအတွက် အလျော်အစားအလိုရှိတယ်လို့လည်း ဆိုပါတယ်။

■ တိုင်းပြည်ကို ရာဇဝတ်မှုတွေ ကျူးလွန်တိုက်ခိုက်သူတွေကို ခွင့်လွှတ်မှာမဟုတ်ဘူးဆိုတာ အားလုံးသိကြမှာပါလို့ ဖော်ပြထားပါတယ်။

■ ခေါင်းဆောင်ဟောင်း အာဇာနည်ခါမေနီနဲ့ အပေါင်းအပါတို့ ကြွေကျသွားတာ ရက်ပေါင်း ၄၀ ရှိခဲ့ပြီလို့ ဖော်ပြထားပါတယ်။

Source: WION

#World_Science
Published 10 April 2026

■ ဆိုရှယ်မီဒီယာတင်ဆက်သူ ဘော်ဘီဂျိုဖလွိုက်က နားရွက်၊ နဖူး၊ မေးစေ့၊ ပါးစပ်တို့ဟာ အရွယ်အစား တူတူပဲလို့ အင်စတာဂရမ်မှာ ပြောလာပါတယ်။

■ အက်စ်သက်တစ်ဆေးရုံမှ အရေပြားနဲ့ အလှအပဆိုင်ရာအထူးကု ဒေါက်တာ ရင်ကီကာပူရ်ကတော့ ဒီအဆိုကို ငြင်းဆိုလိုက်ကာ လူတိုင်းအတွက် အတူတူဖြစ်မနေနိုင်ဘူးလို့ ဆိုပြန်ပါတယ်။

■ လူတွေရဲ့ မျက်နှာတွေက ထူးခြားတဲ့ဖွဲ့စည်းပုံရှိပြီး မျက်နှာသွင်ပြင် အရွယ်အစား ကွဲပြားနိုင်တယ်လို့ ပြောပါတယ်။

■ မျက်နှာသွင်ပြင်ဆိုတာက မျိုးဗီဇ၊ အသက်အရွယ်၊ ပတ်ဝန်းကျင်ဆိုင်ရာတွေဖြင့် ပုံဖော်ထားပါတယ်။

■ ဟိုက်ဒရာဘက် ဂလင်းအီးဂဲလ်ဆေးရုံမှ ဒေါက်တာ မန်နင်ဒရာကလည်း နားရွက်၊ နဖူး၊ မေးစေ့၊ ပါးစပ်တို့ အရွယ်အစားတူညီတဲ့ အထောက်အထား မရှိဘဲ လူတစ်ဦးမှာ ဒီအတိုင်းအတာတွေ အတော်လေး ကွဲပြားကြတယ်လို့ ဆိုပါတယ်။

■ သူတို့ရဲ့ အချိုးအစားတွေက မျိုးဗီဇ၊ အရိုးငြမ်းဖွံ့ဖြိုးမှု၊ မျက်နှာဖွံ့ဖြိုးမှုပုံစံတို့ဖြင့် ဆုံးဖြတ်ပေးတယ်လို့ ပြောပါတယ်။

■ နားရွက်ဖြစ်ပေါ်တဲ့ အရိုးနု ၆ မျိုးနဲ့ နဖူးပုံစံဆုံးဖြတ်ပေးတဲ့ ဦးခေါင်းခွံရိုးတွေဆိုရင် ကွဲပြားပါတယ်။

■ မေးစေ့က မေးရိုးဖွံ့ဖြိုးမှုကနေ ပုံဖော်ပြီး ပါးစပ်ကတော့ စကားပြောခြင်း၊ စားခြင်း လိုအပ်ချက်များနဲ့ ကိုက်ညီအောင် ဖန်တီးထားပါတယ်။

■ ဒီလိုကွဲပြားမှုတွေက မျက်နှာတစ်ခုချင်းစီအလိုက် မတူထူးခြားဖြစ်တည်ပြီး အရွယ်အစားတူညီတာ မဟုတ်ဘူးလို့ ပြောသွားပါတယ်။

Source: Indian Express