#World_Science
Published 05 June 2025

▪️ နာဆာစက်ရုပ်အာကာသယာဉ်နှစ်စီးကနေ ရရှိတဲ့ အချက်အလက်များဖြင့် လကမ္ဘာဆွဲအားစစ်ဆေးခဲ့ရာမှာ ဘာကြောင့် လကမ္ဘာမျက်နှာပြင်နှစ်ခု ဒီလောက်ကွာခြားနေလဲဆိုတဲ့အကြောင်း အရိပ်အမြွက် သိလာစေပါတယ်။

▪️ အမေရိကန် အာကာသအေဂျင်စီ GRAIL ရဲ့ အချက်အလက်အရ လကမ္ဘာအတွင်းနက်ပိုင်းမှာ ဘက်မညီတဲ့ တည်ဆောက်ပုံရှိနေပြီး လွန်ခဲ့တဲ့နှစ်ဘီလီယံခန့်က မီးတောင်ဖြစ်စဉ်ကြီးများကြောင့် မျက်နှာသွင်ပြင်အနေအထား ပြောင်းလဲသွားဟန်ရှိပါတယ်။

▪️ လက ကမ္ဘာဂြိုဟ်နားတဝိုက် အဝိုင်းပုံသဏ္ဍာန်လည်ပတ်နေစဉ် ကမ္ဘာနဲ့နီးတဲ့ လမျက်နှာပြင်က တခြားမျက်နှာပြင်ထက် အနည်းငယ်ပိုခုံးနေပြီး ဒါဟာ ကမ္ဘာဂြိုဟ်ရဲ့ ဆွဲအားသက်ရောက်မှုကြောင့်ဖြစ်ကာ လအတွင်းပိုင်း မျက်နှာပြင်နှစ်ဖက်ကို ကွာခြားသွားစေတာ ဖြစ်တယ်လို့ တွေ့ရှိခဲ့ကြပါတယ်။

▪️ ဒါ့အပြင် ကမ္ဘာနဲ့နီးတဲ့ လမျက်နှာပြင်အတွင်းပိုင်းက ပိုမိုပူနွေးပြီး ဘူမိဗေဒအရ ပိုမိုနက်ရှိုင်းနေတယ်လို့ နာဆာဓာတ်ခွဲခန်းမှ ဆိုလာစနစ်ဒိုင်နမစ်အဖွဲ့ရဲ့ ကြီးကြပ်ရေးမှူး ရိုင်ယန်ပတ်ခ်က ပြောပါတယ်။

▪️ ကမ္ဘာနဲ့နီးစပ်တဲ့ လဖက်ခြမ်းမှာ အရည်ပူကျောက်များ အေးခဲသွားရာကနေ ဖြစ်လာတဲ့ ကွင်းပြင်ကျယ်ကြီးတွေ ဖုံးအုပ်နေပြီး အဝေးဖက်ခြမ်းကတော့ မျက်နှာပြင် ပိုမိုကြမ်းတမ်းပါတယ်။

▪️ အနီးဖက်ခြမ်းမှာ မီးတောင်ဖြစ်စဉ်များကနေ ရေဒီယိုသတ္တိကြွများ ထွက်လာပြီး အပူထုတ်ပေးတဲ့ဒြပ်စင်များ စုပြုံလာသဖြင့် ကွဲပြားတာဖြစ်တယ်လို့ သိပ္ပံပညာရှင်အချို့ ယူဆထားပါတယ်။

▪️ လမျက်နှာပြင်နှစ်ဖက်ဟာ အတော်လေးကွဲပြားနေပြီး မြေမျက်နှာသွင်ပြင်၊ အလွှာအထူ၊ အပူထုတ်ဒြပ်စင်ပမာဏတို့မှာ ကွာခြားနေတယ်လို့ ပတ်ခ်ကပြောပါတယ်။

▪️ အဆင့်မြှင့်တင်ထားတဲ့ ဆွဲငင်အားမြေပုံက လကမ္ဘာနေရာ၊ လမ်းညွှန်မှု၊ အချိန်စနစ်တို့ ထုတ်လုပ်ရာမှာ အရေးကြီးတဲ့အခြေခံဖြစ်ပြီး အနာဂတ်လကမ္ဘာ ရှာဖွေစူးစမ်းရေးအလုပ်တွေ အောင်မြင်ဖို့အတွက် အလွန်အရေးပါတယ်လို့ ပြောပါတယ်။

▪️ ဒီလိုနည်းလမ်းနဲ့ပဲ လကမ္ဘာအတွင်းပိုင်းကိုလည်း ဆွဲအားအချက်အလက်များဖြင့် ဆန်းစစ်နိုင်မယ်လို့ သုတေသီများ ပြောသွားပါတယ်။

#Source: Reuters

ကမ္ဘာပေါ်က အကြီးမားဆုံး အီလက်ထရွန်နစ်ဈေးတွေထဲက တစ်ခုဖြစ်တဲ့ ဟွာချန်ပေဟာ တရုတ်တောင်ပိုင်း ကွမ်တုံပြည်နယ် ရှန်ကျန်မှာရှိပြီး နိုင်ငံခြားဧည့်ခရီးသွားများ မဖြစ်မနေသွားကြတဲ့နေရာ ဖြစ်လာပါတယ်။
#World_Technology
Published 4 June 2025
#နိုင်ငံခြားခရီးသွား #တရုတ်ကွမ်တုံမှအီလက်ထရွန်နစ်ဈေး
#YMG #Yangon_Times #Yangon_Media_Group

#World_Politics
Published 04 June 2025

▪️ တောင်ကိုရီးယားရဲ့ လစ်ဘရယ်သမ္မတသစ် လီဂျယ်မြောင်က ဗုဒ္ဓဟူးနေ့မှာ စတင်တာဝန်ထမ်းဆောင်ပြီဖြစ်ကာ တိုင်းပြည်ကို စစ်အုပ်ချုပ်ရေးကြောင့် မတည်မငြိမ်ဖြစ်ရာကနေ မြှင့်တင်သွားရန် ပြည်တွင်းစက်မှုလုပ်ငန်းများ အကာအကွယ်ပြုရေး ခြိမ်းခြောက်မှုတွေနဲ့ စီးပွားရေးတိုးတက်မှုနှုန်း နှေးတာတွေကနေ ပြန်လည်ထွန်းကားစေရန် လုပ်ဆောင်သွားမယ်လို့ ကတိပြုပြောကြားလိုက်ပါတယ်။

▪️ ယခင်သမ္မတ ယွန်ဆော့ယောလ် စစ်အုပ်ချုပ်ရေးကျင့်သုံးရန် ကြိုးပမ်းခဲ့တာကို လူအများ ဆန့်ကျင်ခဲ့ကြတာကြောင့် သမ္မတသက်တမ်း ၃ နှစ်အတွင်းမှာပဲ ရာထူးမှဆင်းခဲ့ရပြီးနောက် ယခုအင်္ဂါနေ့ လျှပ်တပြက်ရွေးကောက်ပွဲမှာ လီဂျယ်မြောင်က ပြတ်ပြတ်သားသား အနိုင်ရခဲ့ရာ တောင်ကိုရီးယားမှာ ပြောင်းလဲမှုအများအပြား ဖြစ်လာရန် မျှော်လင့်ရပါတယ်။

▪️ သူ့အနေနဲ့ ဆယ်စုနှစ် ၃ ခုနီးပါးအတွင်း တောင်ကိုရီးယားခေါင်းဆောင် တစ်ယောက်အဖြစ် အခက်ခဲဆုံးစိန်ခေါ်မှုတွေ ရင်ဆိုင်ရနိုင်ကာ စစ်အုပ်ချုပ်ရေး ကြိုးပမ်းခဲ့ခြင်းကြောင့် ထိခိုက်ခဲ့ရတဲ့နိုင်ငံကို ပြန်လည်မြှင့်တင်ဖို့ကစလို့ မဟာမိတ်အမေရိကန်မှ မမျှော်လင့်တဲ့ ကာကွယ်ရေးလှုပ်ရှားမှုများကို ဖြေရှင်းရေးအထိ လုပ်ဆောင်သွားရမှာ ဖြစ်ပါတယ်။

▪️ မဲဆန္ဒရေတွက်ရာမှာ မဲပေးသူ ၃၅ သန်းနီးပါးမှ လီဂျယ်မြောင်က ၄၉.၄၂ ရာခိုင်နှုန်း အနိုင်ရခဲ့ကာ ကွန်ဆာဗေးတစ်ပြိုင်ဘက် ကင်မွန်ဆူက ၄၁.၁၅ ရာခိုင်နှုန်းရှိခဲ့ကြောင်း နိုင်ငံတော်ရွေးကောက်ပွဲကော်မရှင် အချက်အလက်များအရ သိရပါတယ်။

▪️ အသက် ၆၁ နှစ်ရှိ လူ့အခွင့်အရေးရှေ့နေဟောင်း လီဂျယ်မြောင်က "ပထမဆုံးတာဝန်က ဆူပူအုံကြွမှုကို ထိန်းသိမ်းကျော်လွှားရန်ဖြစ်ပြီး လက်နက်အားကိုးဖြင့် စစ်အာဏာသိမ်းတာမျိုး နောက်ထပ်ဘယ်တော့မှ မဖြစ်စေရန် လုပ်ဆောင်သွားရမယ်" လို့ ပါလီမန်အပြင်ဘက်မှာ မိန့်ခွန်းပြောသွားပါတယ်။

▪️ ဗုဒ္ဓဟူးနေ့မှာ နိုင်ငံတော်ရွေးကောက်ပွဲကော်မရှင်က လီဂျယ်မြောင်ကို သမ္မတအဖြစ် တရားဝင်အတည်ပြုလိုက်ပြီး သမ္မတနဲ့ ကာကွယ်ရေးဦးစီးချုပ်အာဏာတို့ကို ပေးအပ်လိုက်ပါတယ်။

▪️ သမ္မတက "ပထမဆုံးနေ့မှာပဲ တိုင်းပြည်ရဲ့ စီးပွားရေးပြဿနာများကို ချက်ချင်းဖြေရှင်းသွားမှာဖြစ်ကာ နေရေးထိုင်ရေး အခက်အခဲများကို အဓိကအလေးထားသွားပါမယ်" လို့ ပြောသွားပါတယ်။

#Source: Reuters

#World_Health
Published 04 June 2025

▪️ ဦးနှောက်အာရုံခံနှစ်မျိုး ဆုံးရှုံးရင် အသက်အန္တရာယ် ဖြစ်စေတဲ့အထိ ကျန်းမာရေးပြဿနာ ဖြစ်နိုင်တယ်လို့ သုတေသနအသစ်မှာ တွေ့ရှိထားပါတယ်။

▪️ အကြားအာရုံဆုံးရှုံးခြင်းက နှလုံးရောဂါဖြစ်နိုင်ခြေ များစေပြီး အနံ့အာရုံမကောင်းတဲ့သူတွေက အာရုံကြောချို့တဲ့ခြင်း၊ အသက်ရှူလမ်းကြောင်းနဲ့ နှလုံးသွေးကြောပြဿနာများဖြင့် အသက်ဆုံးပါးနိုင်ခြေ ပိုများတယ်လို့ လေ့လာတွေ့ရှိထားပါတယ်။

▪️ ဆွီဒင်နိုင်ငံ ကယ်ရိုလင်စကီးတက္ကသိုလ်မှ သိပ္ပံပညာရှင်များက သံပယို၊ ကြက်သွန်ဖြူ၊ ကော်ဖီအပါအဝင် ပစ္စည်း ၁၆ မျိုးရဲ့ အနံ့ခွဲခြားစစ်ဆေးချက် ပြုလပ်ရာမှာ ပါဝင်စမ်းသပ်ခံသူ ၂,၅၀၀ ထဲက ကျရှုံးခဲ့တဲ့သူတွေဟာ အသက်အန္တရာယ်ဖြစ်နိုင်ခြေ ၇၀ ရာခိုင်နှုန်းနီးပါး ပိုများတာကို တွေ့ခဲ့ကြပါတယ်။

▪️ အနံ့ခံအာရုံမကောင်းခြင်းက သေဆုံးရခြင်းရဲ့ အဓိကအကြောင်းအရင်းတွေထဲ ပါဝင်ပြီးတော့ ဒီမန်ရှာက အဖြစ်နိုင်ဆုံးပြဿနာ ဖြစ်နေပါတယ်။
အနံ့ခံအာရုံက အနံ့အရသာတင်မကဘဲ မှတ်ဉာဏ်ပိုင်းနဲ့ သိမြင်နိုင်စွမ်းတို့နဲ့ပါ သက်ဆိုင်နေတယ်လို့ သုတေသနပြုစုသူ အင်ဂရစ်အက်စထရွန်က ပြောပါတယ်။

▪️ ဒါ့အပြင် အကြားအာရုံပြဿနာရှိသူတွေဟာလည်း နှလုံးရောဂါဖြစ်နိုင်ခြေ ၁၅ ကနေ ၂၈ ရာခိုင်နှုန်းအထိ ရှိနေတယ်လို့ ယူကေက လူပေါင်း ၁၆၄,၀၀၀ ကို စမ်းသပ်ရာမှာ တွေ့ရှိခဲ့ပါတယ်။

▪️ အကြားအာရုံထောက်ကူပစ္စည်းတွေ သုံးရတဲ့သူတွေဟာ ထိုကဲ့သို့ပြဿနာမျိုး ဖြစ်နိုင်ခြေ ၂၆ ရာခိုင်နှုန်း ပိုများနေပါတယ်။

▪️ ဒါတွေဟာ သွေးကြောအခြေအနေတွေကြောင့် ဖြစ်နိုင်ပေမယ့် အကြားအာရုံချို့တဲ့လို့ ရလာတဲ့ ဖိစီးမှုတွေကလည်း နှလုံးရောဂါကို ပိုဆိုးစေနိုင်ပါတယ်။

#Source: New York Post

#World_Health
Published 04 June 2025

▪️ ဆံကေသာနဲ့ ပတ်သက်လာရင် ဆံပင်နှစ်ခွဖြစ်ခြင်း၊ ဆံပင်ကျိုးပဲ့ခြင်းတို့က အဖြစ်အများဆုံး ပြဿနာတွေဖြစ်ပါတယ်။

▪️ ရာသီဥတုကြောင့် ဒီလိုတွေဖြစ်နိုင်သလို အပူဖြင့်အလှပြင်ခြင်း၊ အာဟာရဓာတ်ချို့တဲ့ခြင်းတို့ကြောင့်လည်း ဖြစ်နိုင်ပါတယ်။

▪️ ဒီလိုတွေမဖြစ်ရအောင် ကြိုတင်ကာကွယ်နိုင်တဲ့ နည်းလမ်းတွေလည်း ရှိပါတယ်။

(၁) ဆံပင်ကိုပုံမှန်တိပေးပါ
▪️ ရက်သတ္တပတ် ၆ ပတ်မှ ၈ ပတ်ကြာတိုင်း ဆံပင်တိပေးခြင်းဖြင့် အနားသတ်တွေ ညီညာစေသလို နှစ်ခွဖြစ်ခြင်းဖြင့် ကာကွယ်ပြီးသား ဖြစ်စေပါတယ်။

(၂) အပူပြင်းပြင်းဖြင့် အလှပြင်ခြင်းရှောင်ရှားပါ
▪️ ဆံပင်ဖြောင့်စက်တွ၊ ကောက်စက်တွေ၊ အပူလွန်ကဲတဲ့ ခြောက်စက်တွေက ဆံကေသာ စိုစွတ်မှုကို ထိခိုက်စေပါတယ်။

(၃) ဆံကေသာကိုသေချာစွာပျော့ပျောင်းစေပါ
▪️ ဆံပင်ပျော့ပျောင်းနည်းလမ်းတွေ သဘာဝအတိုင်း အုန်းဆီလိမ်းပေးတာတွေက စိုစွတ်မှုကို ထိန်းသိမ်းပေးပြီး ဆံချည်မျှင်တွေ သန်မာစေပါတယ်။

(၄) ခဏခဏခေါင်းလျှော်ခြင်း မပြုပါနှင့်
▪️ မကြာခဏခေါင်းလျှော်တာဟာ သဘာဝအဆီများ ကွာကျစေတာကြောင့် တစ်ပတ်ကို ၂-၃ ကြိမ်ထက် ပိုမလျှော်သင့်ပါဘူး။

(၅) ဖြည်းညင်းစွာခေါင်းဖြီးပါ
▪️ အသွားကျဲတဲ့ ဘီးဖြင့် ဖြည်းဖြည်းချင်းဖြီးသွားသင့်ပြီး ဆံပင်တွေ ထုံးမသွားအောင် စိတ်ရှည်ရပါမယ်။

(၆) ဖဲသားပိုးသားခေါင်းအုံး ပြောင်းသုံးပါ
▪️ ချည်သားခေါင်းအုံးတွေက ပွတ်တိုက်စေသဖြင့် ဆံပင်ကျိုးပဲ့နိုင်တာကြောင့် ပွတ်တိုက်အားနည်းတဲ့ ဖဲသား၊ ပိုးသားခေါင်းအုံးစွပ်များ ပြောင်းသုံးသင့်ပါတယ်။

(၇) နေရောင်ဒဏ်ကိုကာကွယ်ပါ
▪️ ခရမ်းလွန်ရောင်ခြည်တွေက ဆံကေသာကို ထိခိုက်စေတာကြောင့် နေပူထဲသွားရင် အကာအကွယ်သုံးသင့်သလို ခရမ်းလွန်ရောင်ခြည် ကာကွယ်ပေးတဲ့ ဆံကေသာပစ္စည်းများ သုံးသင့်ပါတယ်။

(၈) ခန္ဓာကိုယ်နှင့်ဆံပင်ကို အာဟာရဖြည့်တင်းပါ
▪️ ဘိုင်အိုတင်၊ သံဓာတ်၊ ဇင့်၊ အိုမီဂ-၃၊ ဗိုက်တာမင်-အီးတို့က ဆံကေသာကျန်းမာရေးအတွက် ကောင်းစေပြီး ရေအလုံအလောက်သောက်ခြင်းဖြင့် ရေဓာတ်ပြည့်ဝနေစေပါတယ်။

#Source: DoctorNDTV

ရေနံတင်ပို့နိုင်ငံများအဖွဲ့အစည်း (OPEC)နဲ့ မဟာမိတ်များပါဝင်တဲ့ OPEC +တို့ဟာ ဇူလိုင်လမှာ တစ်နေ့ကို ရေနံစည် ၄၁၁,၀၀၀ တိုးမြှင့်ထုတ်လုပ်ရန် စနေနေ့က ကြေညာလိုက်ပါတယ်။
#World_Business
Published 3 June 2025
#ရေနံစည်တိုးမြှင့်ထုတ်လုပ် #OPEC
#YMG #Yangon_Times #Yangon_Media_Group