#Local_News
Published_19 December 2022
ပြည်တွင်းအလုပ်အကိုင်အခွင့်အလမ်းပေါင်း ၂၉၅ ခု ဖန်တီးပေးနိုင်မည့် ရင်းနှီးမြှုပ်နှံမှုလုပ်ငန်း (၂) ခုကို ခွင့်ပြုပေးခဲ့ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) က ထုတ်ပြန်ကြေညာထားသည်။
ခွင့်ပြုပေးထားသည့် ရင်းနှီးမြှုပ်နှံမှုသည် စက်မှုကဏ္ဍဖြစ်ပြီး မြန်မာနိုင်ငံသား ရင်းနှီးမြှုပ်နှံမှုလုပ်ငန်း ၁ ခုနှင့် နိုင်ငံခြား ရင်းနှီးမြှုပ်နှံမှုလုပ်ငန်း ၁ ခုဖြစ်ကြောင်း၊ အဆိုပါ ရင်းနှီးမြှုပ်နှံမှုလုပ်ငန်းများ၏ မတည်ငွေရင်းပမာဏသည် မြန်မာကျပ် ၄ ဘီလီယံကျော်နှင့် အမေရိကန်ဒေါ်လာ ၀ ဒသမ ၅ သန်း ရှိကြောင်း သိရသည်။
ယင်းအပြင် ပြီးခဲ့သည့် နိုဝင်ဘာလအတွင်း ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီ (၁၁/ ၂၀၂၂) အစည်းအဝေးတွင် မြန်မာနိုင်ငံသား ရင်းနှီးမြှုပ်နှံမှုလုပ်ငန်း ၁ ခုနှင့် နိုင်ငံခြားရင်းနှီးမြှုပ်နှံမှုလုပ်ငန်း ၆ ခုကို အတည်ပြုခွင့်ပြုပေးခဲ့ကြောင်းလည်း သိရသည်။
ပြည်တွင်းသို့ နိုင်ငံခြားရင်းနှီးမြှုပ်နှံမှု ဝင်ရောက်မှုအများဆုံးမှာ အာဆီယံနိုင်ငံများနှင့် ဟောင်ကောင်၊ တရုတ်တို့ဖြစ်ပြီး တရုတ်သည် တတိယနေရာတွင် ရှိနေကြောင်း၊ အာဆီယံနိုင်ငံများ၏ ရင်းနှီးမြှုပ်နှံမှု စုစုပေါင်း ရင်းနှီးမြှုပ်နှံမှုသည် ၅၄ ရာခိုင်နှုန်းအထိရှိပြီး တရုတ်ရင်းနှီးမြှုပ်နှံမှုသည် ၁၃ ရာခိုင်နှုန်း ရှိကြောင်း ဖော်ပြထားသည့် စာရင်းများအရ သိရသည်။
#ymg/sth
#Yangon_Media_Group
- Category: Myanmar
- Hits: 278
#Local _News
Published _ 19 December 2022
တစ်ပတ်မှာ သုံးရက်ပြေးဆွဲပေးနေတဲ့ ရန်ကုန်-မန္တလေး အမှတ်(၅)အဆန်/အမှတ်(၆)အစုန် လေအိတ်ရထား ခရီးစဉ်ကို ဒီဇင်ဘာလ ၂၁ ရက်မှ ဇန်နဝါရီလ ၂ ရက်အထိ ကာလတိုအနေဖြင့် နေ့စဉ်ပြေးဆွဲပေးသွားမည်ဟု မြန်မာ့မီးရထားမှ သိရသည်။
ခရစ္စမတ်နဲ့ နှစ်သစ်ကူးရုံးပိတ်ရက်တွေမှာ ခရီးသွားတွေများပြားနိုင်တာကြောင့် ယခုလိုပြေးဆွဲပေးဖို့ စီစဉ်ရတာဖြစ်ကြောင်းလည်း သိရှိရသည်။
"ရထားထွက်ခွာချိန်နဲ့ လက်မှတ်ခနှုန်းထားကတော့ ပုံမှန်အတိုင်းအပြောင်းအလဲ မရှိဘူး။ လာမယ့် ၂၁ရက်နေ့ကနေ ၂၀၂၃ ဇန်နဝါရီလအထိ ပြေးဆွဲပေးသွားမှာပါ။ ပထမသတ်မှတ်ထားတဲ့ ၄လပိုင်း ၁ရက်နေ့က သတ်မှတ်ထားတဲ့ လက်မှတ်ဈေးနှုန်းတွေအတိုင်း အတက်အကျမရှိပဲ ပြေးဆွဲပေးသွားမှာပါ" ဟု ရန်ကုန်ဘူတာကြီးရဲ့ ရုံပိုင်ချုပ်ကြီးက YMG ကို ပြောခဲ့သည်။
လက်ရှိတွင် ရန်ကုန်-မန္တလေးလမ်းပိုင်းမှာ အမှတ်(၃)အဆန်၊(၄)အစုန်အမြန်ရထား နေ့စဉ်ပြေးဆွဲပေးနေပြီး အမှတ်(၁)အဆန်၊(၂)အစုန် စာပို့ရထားက တစ်ရက်ခြားနဲ့ အမှတ်(၅)အဆန်၊(၆)အစုန် လေအိတ်အမြန်ရထားကတော့ တစ်ပတ်လျှင် သုံးရက် ပြေးဆွဲပေးနေကြောင်း သိရသည်။
#ymg/NN
#Yangon_Media_Group
- Category: Myanmar
- Hits: 491
#Local_News
Published_19 December 2022
ဈေးကွက်အတွင်း၌ စားအုန်းဆီဈေးနှုန်းမှာ ဆက်တိုက်ကျဆင်းလာပြီး အခြေခံလက်ကားရည်ညွှန်းဈေးနှုန်းမှာလည်း တစ်ပိဿာ ကျပ် ၄၄၁၅ ကျပ်သတ်မှတ်ထားကြောင်း သိရသည်။
အဆိုပါ အခြေခံလက်ကားရည်ညွှန်းဈေးနှုန်းကို ဒီဇင်ဘာလ ၁၉ ရက်မှ ၂၅ ရက်အထိ သတ်မှတ်ထားပြီး ပြီးခဲ့သည့် တစ်ပါတ်ထက် ၁၀၀ နီးပါးကျဆင်းလာကြောင်း သိရသည်။
စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီအနေဖြင့် စားအုန်းဆီအဓိက ထုတ်လုပ်တင်ပို့သည့် မလေးရှားနိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ပြီး သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်အတွင်း ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးနေခြင်းဖြစ်ကြောင်း သိရသည်။
ယင်းအပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။
#ymg/sth
#Yangon_Media_Group
- Category: Myanmar
- Hits: 377
#Local_News
Published_ 19 December 2022
လူစီးယာဉ်တင်သွင်းလျှင် အနိမ့်ဆုံး၂၀၂၂ ခုနှစ်ထုတ်ယာဉ်ကို ခွင့်ပြုမှု ယခုနှစ်ကုန်တွင် စတင်မည် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
ယင်းထုတ်ပြန်ချက်တွင် ၂၀၂၃ ခုနှစ်အတွက် ပြည်ပမှမော်တော်ယာဉ်တင်သွင်းရာတွင် ထုတ်လုပ်သည့် ခုနှစ်ကိုလူစီးယာဉ်များအတွက် ၂၀၂၂ ခုနှစ်မှ ၂၀၂၃ ခုနှစ်အထိဖြစ်ပြီး လုပ်ငန်းသုံးယာဉ်များ ဖြစ်ကြသည့် ကုန်တင်ယာဉ်၊ ခရီးသည်တင်ယာဉ်များအတွက် ၂၀၁၉ ခုနှစ်မှ ၂၀၂၃ ခုနှစ်အထိဖြစ်ကြောင်း သိရသည်။
၎င်းအပြင် မီးသတ်ယာဉ်၊ လူနာတင်ယာဉ်များအတွက် ၂၀၁၄ ခုနှစ်မှ ၂၀၂၃ ခုနှစ်အထိနှင့် ယန္တရားယာဉ်များအတွက် ၂၀၁၄ ခုနှစ်မှ ၂၀၂၃ ခုနှစ်အထိ ဖြစ်ကြောင်းလည်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ထုတ်ပြန်ချက်တွင် ဖော်ပြထားသည်။
သို့သော်လည်း လက်ရှိ ၂၀၂၂ ခုနှစ် မကုန်မီ ဒီဇင်ဘာလ အတွင်း ကျန်ရှိသည့် အချိန်တွင် ၂၀၂၁ ခုနှစ်ထုတ် လူစီးယာဉ်များကို ခွင့်ပြုဦးမည် ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အရာရှိတစ်ဦးက ပြောသည်။
#ymg/mt
#Yangon_Media_Group
- Category: Myanmar
- Hits: 617
Published 19 Dec 2022
ထိုင်းရေတပ်စစ်သင်္ဘောတစ်စီး တနင်္ဂနွေညနေက ထိုင်းပင်လယ်ကွေ့မှာနစ်မြုပ်ခဲ့ရာ ရေထဲက သင်္ဘောသားတွေကို သင်္ဘောတွေ၊ရဟတ်ယာဉ်တွေနှင့် ကယ်ဆယ်ရေးလုပ်ငန်းတွေဆောင်ရွက်နေပါတယ်။
ဒီမနက်ခင်းအထိ ရေတပ်သင်္ဘောသား ၇၅ ဦးကို ကယ်ဆယ်နိုင်ခဲ့ပြီး ၃၁ ဦး ပျောက်ဆုံးနေတုန်းပဲလို့ ရေတပ်က ပြောပါတယ်။
တနင်္ဂနွေမနက်မှာ လေပြင်းကြောင့် ပင်လယ်ရေတွေဟာ အိတ်တီအမ်အက်စ် ဆူခိုထိုင်း လို့အမည်ပေးထားတဲ့ ရေတပ်သင်္ဘောရဲ့ လျှပ်စစ်စနစ်တွေ ထိခိုက်ခဲ့ရပါတယ်။အဲဒါကြောင့် ထိုင်းတော်ဝင်ရေတပ်က ဖရီးဂိတ်စစ်သင်္ဘောကြီး (၃)စီးနှင့် ရဟတ်ယာဉ်(၂)စီးတို့ကို ရွှေ့ပြောင်းရေစုပ်စက်တွေနှင့်အတူ အခင်းဖြစ်တဲ့နေရာကို ပို့လွှတ်ခဲ့ပါတယ်။ သင်္ဘောထဲက ရေတွေကို စုပ်ထုတ်ဖို့ကြိုးစားခဲ့ပေမယ့် လေပြင်းတွေကြောင့် မအောင်မြင်ခဲ့ပါဘူး။
မီးပျက်သွားတဲ့အတွက်ကြောင့် ပင်လယ်ရေတွေဟာ သင်္ဘောထဲပိုဝင်လာခဲ့ပြီး နောက်ဆုံးမှာ သင်္ဘောဟာ နစ်မြုပ်သွာပါတယ်။
အဲဒီစစ်သင်္ဘောဟာ ပရာချပ်ကီရီကန်ပြည်နယ် ဘန်ဆာဖန်ခရိုင်က ဆိပ်ကမ်းနှင့် မိုင် ၂၀ ဝေးကွာတဲ့နေရာမှာ ကင်းလှည့်တာဝန်ထမ်းဆောင်နေစဉ် မတော်တဆမှုဖြစ်ခဲ့ရတာပါ။
ထိုင်းနိုင်ငံမြောက်ပိုင်းနှင့်အလယ်ပိုင်းမှာ ယခုနှစ် အအေးဆုံးဖြစ်နေပါတယ်။ တောင်စွန်းပိုင်းမှာတော့ မကြာသေးခင်ရက်တွေက မုန်တိုင်းတွေနှင့် ရေကြီးရေလျှံတွေဖြစ်ပေါ်ခဲ့ပါတယ်။ သင်္ဘောတွေကို ဆိပ်ကမ်းမှာဆိုက်ကပ်ထားဖို့ သတိပေးချက်ထုတ်ပြန်ခဲ့ရပါတယ်။
Source: AP
#Thai_Navy_ship_sink
#Thai_Royal_Navy
#Thai_Navy_accident
- Category: World
- Hits: 500
#Local_News
Published _ 19 December 2022
မလေးရှား စကိတ်ပြိုင်ပွဲမှာ အသက် ၁၅ နှစ်အောက် မြန်မာကစားသမား ၂ ဦး ရွှေတံဆိပ် ၄ ခု ဆွတ်ခူးရရှိခဲ့ကြောင်း မြန်မာနိုင်ငံ စကိတ်စီးအား ကစားအသင်း( Myanmar Skate Association) မှသိရသည်။
မလေးရှားနိုင်ငံက အိမ်ရှင်အဖြစ်ကျင်းပသည့် Melaka Inline Speed Open 2022 စကိတ်ပြိုင်ပွဲကို မြန်မာကိုယ်စားပြု လှိုင်သာယာ သူရဲကောင်းလေးများ အသင်းမှ မောင်နှမဖြစ်သော မောင်အင်အား ၁၃ နှစ်နှင့် မမေခွန်အား ၁၂ နှစ်တို့ ၂ဦး ဝင်ရောက်ယှဉ်ပြိုင်ခဲ့ပြီးနောက် ပြိုင်ပွဲအပြီးတွင် ရွှေတံဆိပ် ၄ ခုအထိ ဆွတ်ခူးရရှိခဲ့သည်။
မြန်မာနိုင်ငံ စကိတ်စီးအား ကစားအသင်းမှ မီတာ ၂၀၀ နှင့် မီတာ ၈၀၀ mix အတွဲမှာ ထပ်မံဆွတ်ခူးပြီး ရွှေတံဆိပ် (၄) ခုရရှိခဲ့ပြီဖြစ်ပါတယ် ဟု ဆိုထားသည်။
ပြိုင်ပွဲကိုမူ မလေးရှားနိုင်ငံ မလက္ကာမြို့၊ ထွန်းဘာတီမာကွင်းတွင် ကျင်းပခဲ့ပြီး အိန္ဒိယ၊ စင်္ကာပူ၊ မလေးရှားနှင့် အင်ဒိုနီးရှားနိုင်ငံတို့မှ ကစားသမားများ ဝင်ရောက်ယှဉ်ပြိုင်ခဲ့ကြောင်းလည်း သိရှိရသည်။
#ymg/NN
#Yangon_Media_Group
- Category: Myanmar
- Hits: 400
#Local_News
Published_19 December 2022
ကိုဗစ်ကာလအတွင်း ပိတ်ထားခဲ့သည့် တရုတ်နယ်စပ်ဂိတ်အားလုံးကို လာမည့် ဇန်နဝါရီလအတွင်း ပြန်လည်ဖွင့်လှစ်ရန် စီစဉ်နေကြောင်း မူဆယ်နယ်စပ်ကုန်သည်များဆီမှ သိရသည်။
တရုတ်နိုင်ငံဘက်မှ အဆိုပါ နယ်စပ်ဂိတ်အားလုံးကို လာမည့်ဇန်နဝါရီလ ၉ ရက်တွင် ပြန်ဖွင့်ရန် ကြိုတင်စာထုတ်ပြန်ထားကြောင်း၊ တရုတ်နိုင်ငံအတွင်းသို့ ဝင်ရောက်လိုသူတွေအနေဖြင့် ၂၄ နာရီအတွင်း စစ်ဆေးထားသည့် ကိုဗစ်ရောဂါကင်းရှင်းကြောင်း အထောက်အထားနှင့် ဝင်ရောက်ခွင့်ပြုသွားမည်ဖြစ်ကြောင်း ထုတ်ပြန်ထားသည်။
ယင်းအပြင် ၂ နှစ်ကျော်ကြာပိတ်ထားသည့် တရုတ်နိုင်ငံအတွင်းက ရွှေလီ-ကျယ်ဂေါင်တံတားကို ဒီဇင်ဘာ ၁၃ ရက်ကနေစတင်ပြီး ပြန်လည်ဖွင့်လှစ်ပေးခဲ့ကြောင်း၊ ယင်းကြောင့် ကုန်သည်တွေအနေဖြင့် ယင်းနှင့် ထိစပ်နေသည့်ပြန်လည်ဖွင့်လှစ်ရန် ကုန်သည်တွေအနေဖြင့် ခန့်မှန်းထားခြင်းဖြစ်သည်။
လက်ရှိ မူဆယ်နယ်စပ်တွင် တစ်ရက်လျှင် ကုန်ကားအစီးရေ ၁၇၀ ဝန်းကျင် အဝင်အထွက်ရှိနေကြောင်း မူဆယ်နယ်စပ်ဆန်စပါးကုန်စည်ဒိုင်ဥက္ကဋ္ဌ ဦးမင်းသိန်း၏ ပြောပြချက်အရ သိရသည်။ မြန်မာ - တရုတ်နယ်စပ်ကုန်သွယ်ရေး စခန်းများအနက် ၉၀ ရာခိုင်နှုန်းနီးပါး ကုန်သွယ်မှုပြုလုပ်နေသည့် မူဆယ်နယ်စပ်ကုန်သွယ်ရေးစခန်းတွင် အမေရိကန်ဒေါ်လာ ၁ ဒသမ ၄၆ ဘီလီယံ ကုန်သွယ်မှုပြုလုပ်ထားကြောင်း ဖော်ပြထားသည့် စာရင်းများအရ သိရသည်။
#ymg/sth
#Yangon_Media_Group
- Category: Myanmar
- Hits: 341
#World_Politics
Published 19 December 2022
ယူကရိန်းသမ္မတ'ဇယ်လန်စကီ'က ငြိမ်းချမ်းရေးအမှာစကားပြောကြားထားတဲ့ ဗီဒီယိုကို ကာတာမှာကျင်းပခဲ့တဲ့ ကမ္ဘာ့ဖလားဘောလုံးပြိုင်ပွဲဗိုလ်လုပွဲ မစတင်မီမှာ ထုတ်လွှင့်ပြသပေးဖို့ တောင်းဆိုခဲ့ရာ ဘောလုံးအဖွဲ့ချုပ်ဖီဖာ(FIFA)က ငြင်းပယ်ခဲ့ပေမယ့်လည်း တစ်ကမ္ဘာလုံးက သူ့အမှာစကားကို ကြားသိခဲ့ပြီဖြစ်ကြောင်း 'ဇယ်လန်စကီ'က ပြောကြားလိုက်ပါတယ်။
ပြသဖို့တောင်းဆိုခဲ့တဲ့ဗီဒီယိုထဲမှာ သမ္မတရဲ့အမှာစကားအပြင် ရုရှားကျူးကျော်မှုကြောင့်ဖြစ်လာတဲ့ စစ်ပွဲကိုဖြေရှင်းနိုင်ရန်အတွက် ကမ္ဘာလုံးဆိုင်ရာငြိမ်းချမ်းရေးအစည်းအဝေးပွဲ ပြုလုပ်ရန်တောင်းဆိုချက်လည်း ပါဝင်ပါတယ်။
ယူကရိန်းဘောလုံးသမားတွေနဲ့ အခြားအရာရှိများက ဒီအမှာစကားကို လူအများသိအောင် ချပြနိုင်ခဲ့ပြီလို့ ဆိုခဲ့တာဖြစ်ပါတယ်။
"ဖီဖာက ကာတာမှာပြုလုပ်တဲ့ ဗိုလ်လုပွဲမတိုင်မီမှာ ကွင်းထဲကနေ အမှာစကားထုတ်လွှင့်ပြသဖို့ကို ပိတ်ပင်ခဲ့ပေမယ့် ကမ္ဘာကြီးက ကျွန်ုပ်တို့ရဲ့တောင်းဆိုသံကို ကြားသိခဲ့ကြပါပြီ" လို့ 'ဇယ်လန်စကီ'က ညစဉ်ဗီဒီယိုမိန့်ခွန်းမှာ ပြောကြားခဲ့ပါတယ်။
အနိုင်ရဖို့ကြိုးစားအားထုတ်ခြင်းက ကမ္ဘာ့ဖလားပြိုင်ပွဲရဲ့အနှစ်သာရဖြစ်ကြောင်း၊ ပြိုင်ပွဲဆိုတာက ကွင်းထဲမှာယှဉ်ပြိုင်တာဖြစ်ပေမယ့် စစ်မြေပြင်မှာယှဉ်ပြိုင်တာမဟုတ်ကြောင်း၊ အဆိုးဆုံးဖြစ်မှ အနီကဒ်ထိတာဖြစ်ပေမယ့် နျူကလီးယားစစ်ပွဲဖြစ်လာစေမယ့် အနီရောင်ခလုတ်တော့ မပါဝင်ကြောင်း ပြောကြားခဲ့ပါတယ်။
ဗိုလ်လုပွဲမတိုင်မီ ငြိမ်းချမ်းရေးအမှာစကားကို ထုတ်လွှင့်ခွင့်ပြုဖို့ 'ဇယ်လန်စကီ'က ဖီဖာကိုတောင်းဆိုခဲ့တယ်လို့ CNN က သောကြာနေ့မှာ သတင်းတင်ပြခဲ့ပါတယ်။
"ကျွန်ုပ်တို့က ကမ္ဘာကြီးအတွက် ငြိမ်းချမ်းရေးလမ်းစဉ်ကို မျှတစွာပဲ တင်ပြခဲ့ပါတယ်၊ စစ်ပွဲမှာ ချန်ပီယံဆိုတာမရှိပါဘူး၊ သရေရလဒ်ဆိုတာ မရှိပါဘူး" လို့ ဗီဒီယိုထဲမှာ ပြောကြားထားပါတယ်။
"ယခုဆောင်းရာသီမှာ ကမ္ဘာလုံးဆိုင်ရာငြိမ်းချမ်းရေးလမ်းစဉ်အစည်းအဝေးပွဲကို ကျင်းပပေးဖို့တောင်းဆိုပါတယ်၊ ကမ္ဘာ့ငြိမ်းချမ်းရေးအတွက် တစ်ကမ္ဘာလုံးကနိုင်ငံတွေ စုစည်းညီညွတ်စွာပါဝင်တဲ့ အစည်းအဝေးပေါ့၊ ဘောလုံးပွဲပြီးသွားရင် ပွဲကြည့်စင်တွေမှာ ဘယ်သူမှမရှိတော့သလို စစ်ပွဲပြီးရင်လည်း မြို့တွေမှာဘယ်သူမှမရှိတော့ပါဘူး" လို့ သမ္မတက အမှာစကားပြောခဲ့ပါတယ်။
အခြားတစ်ဖက်မှာတော့ တနင်္ဂနွေနေ့က ဒိုဟာမြို့တော်ရှိ လူဆေးလ်ဘောလုံးကွင်းမှာကျင်းပခဲ့တဲ့ ကမ္ဘာ့ဖလားဘောလုံးပြိုင်ပွဲဗိုလ်လုပွဲစဉ်မှာ ပြင်သစ်ကိုအနိုင်ရပြီး အာဂျင်တီးနားဗိုလ်စွဲခဲ့တဲ့အတွက် ရုရှားသမ္မတ'ပူတင်'က အာဂျင်တီးနားသမ္မတ'အယ်လ်ဘာတိုဖာနန်ဒက်ဇ်'ကို ဂုဏ်ပြုခဲ့ကြောင်း ရုရှားသတင်းဌာနများက တင်ပြခဲ့ပါတယ်။
ရုရှားနိုင်ငံက ယူကရိန်းကိုစစ်ပွဲဆင်နွှဲပြီး တစ်ကမ္ဘာလုံးပါဝင်ပတ်သက်လာစေပေမယ့် ဖီဖာက ဒီဖြစ်ရပ်ဆိုးကြီးကို အသိအမှတ်မပြုနားမလည်ကြောင်း ပြသရာရောက်တယ်လို့ ယူကရိန်းသမ္မတလက်ထောက်'မစ်ခေလိုပိုဒိုလီယက်ခ်'က တွစ်တာမှာဖော်ပြခဲ့ပါတယ်။
ဖီဖာကတော့ ကမ္ဘာ့ဖလားပွဲစဉ်တွေစီစဉ်ကျင်းပရာမှာ နိုင်ငံရေးအကြောင်းတွေနဲ့ပတ်သက်ပြီး ငြင်းပယ်ထားတာဖြစ်ပါတယ်။
အဆိုပါဗိုလ်လုပွဲစဉ်ကို တစ်ကမ္ဘာလုံးမှာ ရုပ်သံကနေတိုက်ရိုက်ကြည့်ရှုသူပေါင်း သန်းရာချီရှိခဲ့ကြပါတယ်။
Source: Reuters
#Yangon_Media_Group
- Category: World
- Hits: 332
#World_Health
Published 19 December 2022
လူတွေက ခန္ဓာကိုယ်ပုံသဏ္ဍာန်အမျိုးမျိုး ရှိကြပြီး အချို့က တင်ကား၊ အချို့က လက်မောင်းတုတ်၊ အချို့က ခြေထောက်ကြီးတာမျိုး ရှိတတ်ကြပါတယ်။
အရင်လေ့လာတွေ့ရှိမှုများအရ ဝမ်းဗိုက်နေရာမှာ အဆီစုလာခြင်းက ဆီးချို၊ နှလုံးသွေးကြောရောဂါ၊ ကင်ဆာနဲ့ လေဖြတ်ခြင်းစတဲ့ ကျန်းမာရေးပြဿနာများ ဖြစ်လာနိုင်ချေများစေပါတယ်။
ဒါပေမဲ့ ပေါင်နေရာတွေကြီးပြီး အရေပြားအောက်အဆီများနေခြင်းကတော့ ကျန်းမာရေးကောင်းကျိုးရှိနိုင်ကြောင်း ပညာရှင်များတွေ့ရှိခဲ့ပါတယ်။
ပေါင်၊ တင်ပါးနေရာတို့မှာ အဆီစုနေတဲ့အမျိုးသမီးတွေဟာ မှတ်ဉာဏ်ချို့ယွင်းခြင်းနဲ့ လေဖြတ်ခြင်းအန္တရာယ်တို့မှ ပိုပြီးကာကွယ်နိုင်ကြောင်း အမေရိကန်ဂျော်ဂျီယာမှ သုတေသီများ တွေ့ခဲ့ကြပါတယ်။
ဒါ့အပြင် ယောက်ျားတွေထက်လည်း ရောင်ရမ်းခြင်းဖြစ်နိုင်ချေနည်းပါတယ်။
ကြွက်တွေနဲ့စမ်းသပ်ရာမှာ ကြွက်မတွေကို အဆီစုပ်ထုတ်လိုက်ပြီးနောက် သူတို့ရဲ့ရောင်ရမ်းခြင်းအခြေအနေ မြင့်တက်လာတာကို တွေ့ခဲ့ရပါတယ်။
မှတ်ဉာဏ်ချို့ယွင်းခြင်းဝေဒနာလက္ခဏာမပေါ်ခင် ဆယ်စုနှစ်တွေကတည်းက ဦးနှောက်မှာရောင်ရမ်းခြင်းဖြစ်ပေါ်ကြောင်း လေ့လာတွေ့ရှိထားပါတယ်။
ရောင်ရမ်းခြင်းကိုဆန့်ကျင်ပေးတဲ့ အစွမ်းအာနိသင်တွေပါဝင်တဲ့ အစားအသောက်များစားသုံးခြင်းဖြင့် မှတ်ဉာဏ်ချို့ယွင်းခြင်းကို ကင်းဝေးစေပါတယ်။
ဒါပေမဲ့ ဒီအတွက်နဲ့တော့ ပေါင်မှာ အဆီစုလာအောင် တမင်တကာမကြိုးစားသင့်ကြောင်းလည်း အကြံပြုထားပါတယ်။
သုတေသီတွေအနေနဲ့ အမျိုးသားရောအမျိုးသမီးမှာပါ အဆိုပါကိစ္စက ဘယ်လောက်အထိကာကွယ်နိုင်လဲဆိုတာကို သိရဖို့ လေ့လာရန်လိုအပ်ကြောင်း ဩဂတ်စ်တာတက္ကသိုလ်မှ ပရော်ဖက်ဆာက ဆိုလိုက်ပါတယ်။
အဆီဆုံးရှုံးတဲ့အခါ ဦးနှောက်ရဲ့အစိတ်အပိုင်းအမျိုးမျိုးမှာ မတူညီတဲ့သက်ရောက်မှုများ ရှိနိုင်ကာ နောက်ထပ်လေ့လာဖို့လည်း လိုအပ်ပါတယ်။
Source: The Sun
#Yangon_Media_Group
- Category: World
- Hits: 630
#Health_Tips
Published 19 December 2022
လမ်းလျှောက်ခြင်းက အလွယ်ကူဆုံးနဲ့ ဘေးအန္တရာယ်အကင်းဆုံး လေ့ကျင့်ခန်းတစ်မျိုးဖြစ်ပါတယ်။
ခြေလှမ်းတိုင်းက ခန္ဓာကိုယ်ဇီဝဖြစ်စဉ်ကို ကူညီပေးပြီး ကျန်းမာရေးအတွက် မကောင်းတဲ့အစားအစာတွေကို ကူညီချေဖျက်ပေးပါတယ်။
ဒါပေမဲ့ နောက်ပြန်လမ်းလျှောက်ခြင်းဖြင့် သာမန်လမ်းလျှောက်ခြင်းကနေ မရနိုင်တဲ့ အကျိုးကျေးဇူးတွေရရှိနိုင်ပါတယ်။
နောက်ပြန်လမ်းလျှောက်ခြင်းက စိတ်ပိုင်းဆိုင်ရာ၊ ကြွက်သားများနဲ့ အဆစ်အမြစ်များကို သန်မာစေပါတယ်။
နောက်ပြန်လမ်းလျှောက်ကြည့်ဖို့အတွက် ဦးနှောက်နဲ့ခန္ဓာကိုယ် အလိုက်သင့်ဆောင်ရွက်နိုင်စွမ်းရှိဖို့လိုပြီး အားထုတ်မှုများစွာလိုအပ်ကာ လုပ်နေကျမဟုတ်တဲ့အရာကို ဦးနှောက်ကိုခိုင်းစေလိုက်တာပါပဲ။
လမ်းလျှောက်ခြင်းကို ပြန်လည်သင်ယူနေရတဲ့ လေဖြတ်ခြင်းခံစားခဲ့ရတဲ့သူတွေမှာ နောက်ပြန်လမ်းလျှောက်ခြင်းလေ့ကျင့်ခန်းမျိုး ပြုလုပ်ပါက ဘယ်လိုအကျိုးသက်ရောက်မှုရှိလဲဆိုတာကို 'မက်နာမာရာ'က မှတ်ချက်ပြုလိုက်ပါတယ်။
နောက်ပြန်ခြေလှမ်းလှမ်းလိုက်တဲ့အခါ ပေါင်မှာရှိတဲ့အဓိကကြွက်သား ၄ ခုထဲက ၂ ခုဟာ ရှေ့သို့လျှောက်ခြင်းထက် ပိုပြီးအလုပ်လုပ်ရပါတယ်။
ဒါကြောင့်ထိုကြွက်သားများ ပိုမိုသန်မာလာကာ ဒူးကိုလည်း ပိုမိုတည်ငြိမ်စေပြီး ဒူးပေါ်ပိတဲ့ဖိအားတွေကို ပြေလျော့စေပါတယ်။
ဒူးဆစ်ရောင်ဝေဒနာခံစားနေရသူများအတွက် နာကျင်မှုကိုသက်သာစေပြီး ပိုမိုနေထိုင်လို့ကောင်းလာစေနိုင်တယ်လို့ 'မက်နာမာရာ'က ဆိုခဲ့ပါတယ်။
ကယ်လိုရီတွေလည်း ပိုမိုလောင်ကျွမ်းစေပြီး ရှေ့ကိုလျှောက်တဲ့အခါ သိပ်ပြီးအသုံးမပြုရတဲ့ ကြွက်သားတွေအလုပ်လုပ်စေပါတယ်။
နောက်ပြန်လမ်းလျှောက်ခြင်းက ခန္ဓာကိုယ်စွမ်းအင်လောင်ကျွမ်းစေပေမယ့် ကိုယ်အလေးချိန်ချဖို့အတွက်တော့ ရွေးချယ်စရာမဟုတ်ပါဘူး။
ဒီလေ့ကျင့်ခန်းဟာ ခွန်အားနဲ့ ကြွက်သားခံနိုင်ရည်လေ့ကျင့်ဖို့အတွက်သာ အကောင်းဆုံးဖြစ်ပါတယ်။
အချိန်အကြာကြီး နောက်ပြန်လမ်းလျှောက်မယ့်အစား အချိန်တိုတိုလျှောက်ရင်း တစ်ခုခုကိုဆန့်ကျင်သလိုအားယူပြီး လျှောက်လို့ရအောင် ပြုလုပ်သင့်ပါတယ်။
Source: NY Post
#Yangon_Media_Group
- Category: World
- Hits: 407
Published 19 December 2022
ရုရှားကာကွယ်ရေးဝန်ကြီး ဆာဂေးရှိုအီဂူဟာ စစ်ဝတ်စုံဝတ်ဆင်လျက် စစ်ရဟတ်ယာဉ်အတွင်း စီးနင်းလိုက်ပါကာ ယူကရိန်းမှာရှိတဲ့ ရုရှားတပ်တွေကို စစ်ဆေးခဲ့ရာ အဲဒီ ဗွီဒီယိုကို ရုရှားကာကွယ်ရေး ဝန်ကြီးဌာနက သတင်းထုတ်ပြန်ပေးပါတယ်။
အထူးစစ်ဆင်ရေးဇုန်အတွင်းက ရုရှားတပ်ဖွဲ့တွေ ရှေ့သို့နေရာယူထားတဲ့အခြေအနေတွေနှင့် တပ်ဖြန့်ထားရှိမှုတွေကို ရုရှားစစ်ဝန်ကြီးဌာနအကြီးအကဲဟာ ပျံသန်းပြီးကြည့်ရှုစစ်ဆေးခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။
ဒါပေမယ့် ဒီခရီးစဉ်ဘယ်တုန်းကလုပ်ခဲ့တယ်ဆိုတာတော့ သတင်းထုတ်ပြန်ချက်မှာဖော်ပြမထားပါဘူး။ ဒါပေမယ့် အဲဒီခရီးစဉ်ဟာ သမ္မတပူတင်နှင့် ရှိုအီဂူအပါအဝင်ရုရှားရဲ့ ယူကရိန်းစစ်ဆင်ရေးအကြီးအကဲတွေ တွေ့ဆုံကြအပြီး နှစ်ရက်အကြာမှာ ဆောင်ရွက်ခဲ့တာဖြစ်ပါတယ်။
Source: AFP
#Russia_Defense_Minsiter_Inspection
#Sergei_Shoigu
#Russia_Ukraine_Crisis
- Category: World
- Hits: 256
#Local_News
Published - 18 Dec 2022
ပန်းဆိုးတန်း-ဒလ ချယ်ရီခရီးသည်တင် သင်္ဘောပေါ်တွင် ယနေ့ဒီဇင်ဘာလ ၁၈ ရက် ညနေ
၆ နာရီခွဲခန့်က ပေါက်ကွဲမှုဖြစ်ပွားခဲ့သောကြောင့် ခရီးသည် ပြည်သူအယောက် ၁၇ ဦးထက်မနည်း ဒဏ်ရာရသွားခဲ့ကြကြောင်း သိရသည်။
ယင်းဒဏ်ရာရသူများအား ရန်ကုန်ဆေးရုံကြီးသို့ ပို့ဆောင်ခဲ့ရကြောင်း။ဒဏ်ရာရသူများထဲတွင် ပြင်းထန်ဒဏ်ရာ ရရှိသူ ၅ ဦးရှိကာ ယင်းတို့မှာ စိုးရိမ်ရကြောင်း ပရဟိတ ကူညီရေးအဖွဲ့တစ်ခုမှ လိုက်ပါကူညီပေးခဲ့သူကဆိုသည်။
"ကျွန်တော်တို့ပရဟိတအသင်းကား ဆယ်စီးလောက်ပေါင်းစုပြီးပို့ခဲ့ကြပါတယ်။ငါးယောက်ကတော့ ဒဏ်ရာပြင်းပါတယ်ခင်ဗျာ"ဟု ယင်းကပြောသည်။
Photo-CJ
ymg/mt
#Yangon_Media_Group
- Category: Myanmar
- Hits: 2011