Published 26 December 2023

ရန်ကုန်တိုင်း ဒေသကြီးအတွင်း သဘာဝဓာတ်ငွေ့သုံး ဓာတ်အားပေးစက်ရုံများသို့ ဓာတ်ငွေ့ပို့လွှတ်နေသော ရတနာကမ်းလွန်သဘာဝဓာတ်ငွေ့ပိုက်လိုင်း ထိန်းသိမ်းပြုပြင်ခြင်းလုပ်ငန်းများဆောင်ရွက်ရန် ရှိသည့်အတွက် မြို့နယ်နေရာအချို့တွင် ဒီဇင်ဘာ (၂၆)ရက်မှ ဇန်နဝါရီ (၂) ရက်အတွင်းယာယီဓာတ်အားပြတ်တောက်မည်ဖြစ်ကြောင်း ရန်ကုန်လျှပ်စစ် ဓာတ်အားပေးရေးကော်ပိုရေးရှင်း ထုတ်ပြန်ချက်အရ သိရသည်။

  အဆိုပါထိန်းသိမ်းပြုပြင်ခြင်းလုပ်ငန်း ဆောင်ရွက်နေစဉ်အတွင်း သဘာဝဓာတ်ငွေ့ဖြင့် မောင်းနှင်နေသော  ဓာတ်အားပေးစက်မှ ဓာတ်အားစနစ်အတွင်းသို့ ဓာတ်အာထုတ်လုပ်ပို့လွှတ်နိုင်မှု (၁၀၀)မဂ္ဂါဝပ်ခန့် လျော့နည်းနေမည်ဖြစ်ကြောင်း သိရသည်။

  ထို့ပြင် ကမ်းလွန်ရွှေဂက်စ်မှ မြင်းခြံသို့ ပေးပို့နေသော တောင်သာသဘာဝ ဓာတ်ငွေ့ပိုက်လိုင်း ယိုစိမ့်မှု ဖြစ်ပေါ်နေသောကြောင့် ယနေ့ နံနက်  ၁၀နာရီခွဲ  မှ နေ့လည် ၂နာခွဲ အထိ အရေးပေါ်ရပ်တန့် ပြင်ဆင်ခြင်းလုပ်ငန်းဆောင်ရွက်ရမည်ဖြစ်သဖြင့် gas ပေးပို့မှုရပ်တန့်ရမည်ဖြစ်ကာ ဓာတ်အားစနစ်အတွင်းသို့ ဓာတ်အားထုတ်လုပ်ပို့လွှတ်နိုင်မှု (၃၁၅)မဂ္ဂါဝပ်ခန့် လျော့နည်းနေမည်ဖြစ်ကြောင်း သိရသည်။

  ထို့ကြောင့် ဓာတ်ငွေ့ပိုက်လိုင်းများ ပြုပြင်နေစဉ်ကာလအတွင်း လျှပ်စစ်ဓာတ်အားထုတ်လုပ်မှုများ လျော့နည်းနေမည်ဖြစ်ကာ  အရေးပေါ် ဝန်အားလျှော့ ထိန်းညှိခြင်းများ ဆောင်ရွက်ရမည်ဖြစ်သောကြောင့်  ရန်ကုန်တိုင်းဒေသကြီးအတွင်းရှိ မြို့နယ်နေရာအချို့တို့တွင် ယာယီဓာတ်အားပြတ်တောက်မှုများရှိမည် ဖြစ်ကြောင်း ထုတ်ပြန်ချက် တွင် ဖေါ်ပြထားသည်။
Yangon Time/LW
#Local_News
#Published 26 December 2023
#YMG_News #Yangon_Times #Yangon_Media_Group

 Published 26 December 2023

ဆီးရီးယားရှိ တော်လှန်ရေးတပ်ဖွဲ့ဝင် အကြီးတန်းဗိုလ်ချုပ်ကြီးတစ်ဦးကို သတ်ခဲ့တဲ့ အစ္စရေးလ်အနေနဲ့ သေချာပေါက် ပြန်လည်ပေးဆပ်ရမယ်လို့ အီရန်သမ္မတ အီဘရာဟင်ရေစီက ဒီဇင်ဘာ ၂၅ ရက်နေ့မှာ ပြောကြားလိုက်ပါတယ်။

ဒီလုပ်ရပ်ဟာ ထိုဒေသမှာ နိုင်ထက်စီးနင်း လုပ်နေတဲ့ အစ္စရေးလ်အစိုးရရဲ့ နောက်ထပ်စိတ်ပျက်စရာ သဘောထားတစ်ခု ဖြစ်ကြောင်း၊ ဒီရာဇဝတ်မှုအတွက် အစ္စရေးလ်တို့ သေချာပေါက် ပြန်လည်ပေးဆပ်ရမှာ ဖြစ်ကြောင်း ရေစီက ထုတ်ဖော်ပြောကြားလိုက်ပါတယ်။

ရာဇီမူဆာဗီ သေဆုံးကြောင်းကို အီရန်နိုင်ငံပိုင် မီဒီယာက ဖော်ပြခဲ့ပြီး အစ္စလာမ်တော်လှန်ရေးတပ်ဖွဲ့ (IRGC)မှ ပြည်ပလက်ခွဲတပ်ဖြစ်တဲ့ Quds တပ်ဖွဲ့ရဲ့ အတွေ့အကြုံအရှိဆုံး အကြံပေးပုဂ္ဂိုလ်တွေထဲက တစ်ဦးဖြစ်တယ်လို့လည်း ဖော်ပြခဲ့ပါတယ်။

အီရန်မှ IRNA သတင်းဌာနရဲ့ ဖော်ပြချက်ထဲမှာ လွန်ခဲ့တဲ့ နာရီအနည်းငယ်က ဒါမတ်စ်ကပ်စ် ဆင်ခြေဖုံးဒေသကို အစ္စရေးလ်တို့ တိုက်ခိုက်ရာမှာ မူဆာဗီသေဆုံးခဲ့တယ်လို့ ဆိုပါတယ်။

ဗိုလ်ချုပ်ကြီးဟာ ဆီးရီးယားရှိ ခုခံကာကွယ်ရေး ပင်မလုပ်ငန်းစဥ်များအတွက် ထောက်ပံ့ပို့ဆောင်ရေးကဏ္ဍမှာ လှုပ်ရှားနေသူဖြစ်တယ်လို့ IRNA က ဖော်ပြခဲ့ပါတယ်။

IRGC တပ်က မူဆာဗီသေဆုံးကြောင်းကို အတည်ပြုလိုက်ကာ အစ္စရေးလ်ဘက်မှ ဒုံးကျည်ဖြင့် တိုက်ခိုက်စဥ် ဆုံးပါးသွားတာဖြစ်ပြီး အစ္စရေးလ်အနေနဲ့ ပြန်ပေးဆပ်ရမယ်လို့ ထုတ်ပြန်ကြေညာခဲ့ပါတယ်။

၂၀၂၀ ခုနှစ် ဘဂ္ဂဒက်မှာ အမေရိကန်ဒရုန်းတိုက်ခိုက်မှုအတွင်း သေဆုံးခဲ့တဲ့ အီရန် Quds တပ်မှူး ဗိုလ်ချုပ်ကြီးကာဆမ်ဆိုလေမာနီနဲ့ မူဆာဗီတို့က ရဲဘော်ရဲဖက်တွေ ဖြစ်ခဲ့ပြီး လာမယ့်ရက်သတ္တပတ်ဟာ ဆိုလေမာနီ သတ်ဖြတ်ခံရခြင်း ၄ နှစ်ပြည့်မြောက်မှာ ဖြစ်ပါတယ်။

မူဆာဗီကို ဒုံးကျည် ၃ စင်းဖြင့် ပစ်မှတ်ထား တိုက်ခိုက်ခဲ့တယ်လို့ အီရန်ရုပ်သံမှ ဖော်ပြခဲ့ပါတယ်။

၂၀၁၁ ခုနှစ် ဆီးရီးယားပြည်တွင်းစစ် စဖြစ်ကတည်းက အစ္စရေးလ်ဟာ လေကြောင်းတိုက်ခိုက်မှုပေါင်း ရာနဲ့ချီ ပြုလုပ်ခဲ့ပြီး အဓိကအားဖြင့် အီရန်ထောက်ပံ့တပ်များ၊ ဟက်ဇ်ဘိုလာ တိုက်ခိုက်ရေးသမားများ၊ ဆီးရီးယားစစ်တပ်နေရာများကို ပစ်မှတ်ထားခဲ့ပါတယ်။

အစ္စရေးလ်တို့ဟာ ဟားမတ်စ်တို့နဲ့ စစ်ပွဲဖြစ်ကတည်းက ဆီးရီးယားဘက်ကို ပိုမိုပြင်းထန်စွာ တိုက်ခိုက်လာခဲ့ပါတယ်။
Source: WION
#World_News
#YMG_News #Yangon_Times #Yangon_Media_Group

#World_Nature
Published 26 December 2023

ပန်းပွင့်တွေနဲ့ ဝတ်မှုန်ကူးအင်းဆက်များကြား အပြန်အလှန် အကျိုးပြုခြင်းက ယခုအခါ ရာသီဥတု ပြောင်းလဲမှုကြောင့် အနည်းငယ် ပြောင်းလဲလာပါတယ်။

အခုအခါ ပန်းပွင့်တွေက ဝတ်မှုန်ကူးအင်းဆက်တွေအပေါ် သိပ်ပြီးမမှီခိုတော့ဘဲ ဆွဲဆောင်မှုလျော့နည်းလာကာ အင်းဆက်အရေအတွက် ကျဆင်းလာတယ်လို့ လေ့လာတွေ့ရှိထားပါတယ်။

ပဲရစ်အနီးရှိ ပေါင်ဒါပန်းခင်းရှိ ပန်းပွင့်တွေဟာ လွန်ခဲ့တဲ့ နှစ် ၂၀၊ ၃၀ ခန့်ကထက် ၁၀ ရာခိုင်နှုန်းသေးလာပြီး ဝတ်ရည်ထုတ်လုပ်မှု ၂၀ ရာခိုင်နှုန်း လျော့နည်းလာကြောင်း သုတေသီများ တွေ့ရှိထားပါတယ်။

ပန်းတွေဟာ ကိုယ်ပိုင်ဝတ်မှုန်ကူးခြင်းဆီသို့ ပြောင်းလဲလာကာ ရေတိုမှာ အလုပ်ဖြစ်ပေမယ့် နောင်တစ်ချိန်မှာ ရာသီဥတု ပြောင်းလဲမှုများကို ခံနိုင်ရည်ရှိလာနိုင်စွမ်း လျော့နည်းလာနိုင်ပါတယ်။

အပင်တွေက အင်းဆက်တွေအတွက် ဝတ်ရည်ထုတ်ပေးပြီး အင်းဆက်တွေက အပင်တွေကြား ဝတ်မှုန်ကူးပေးပါတယ်။

ဒါဟာ နှစ်ပေါင်းများစွာတိုင်အောင် နှစ်ဖက်စလုံးအတွက် အပြန်အလှန် အကျိုးပြုလာခဲ့ပါတယ်။

ဒါပေမဲ့ အခုတော့ အပင်တွေဟာ ဝတ်ရည်ထုတ်လုပ်မှု နည်းပါးလာပြီး အင်းဆက်တွေက အပင်တွေအပေါ် ဆွဲဆောင်မှု နည်းပါးလာပါတယ်။

ဝတ်မှုန်ကူးအင်းဆက်တွေ နည်းပါးလာခြင်းက ပြန်များလာဖို့ အလွယ်တကူ မဖြစ်နိုင်ကြောင်း၊ ဘာကြောင့်လဲဆိုတော့ အပင်တွေက စတင်ပြောင်းလဲနေပြီဖြစ်ကြောင်း၊ ဒီအတွက် ထိန်းသိမ်းရေးလုပ်ငန်းစဥ်တွေ လိုအပ်နေကြောင်း ဦးဆောင်သုတေသီ ဆမ်ဆန်အေကိုကာပီဒေါလ်က ဖော်ပြသွားပါတယ်။

 ဒါတွေဟာ တကယ့်လက်တွေ့မှာ မျိုးဗီဇပြောင်းလဲနေတာဖြစ်တယ်လို့ လန်ကက်စတာတက္ကသိုလ်မှ ဖိလစ်ဒွန်ကာစလေက ပြောပြသွားပါတယ်။

ကမ္ဘာကြီးမှာ လွန်ခဲ့တဲ့ နှစ် ၁၅၀ အတွင်း အင်းဆက်မျိုးစိတ်ပေါင်း ၅ ရာခိုင်နှုန်းမှ ၁၀ ရာခိုင်နှုန်းလောက်အထိ ပျောက်ကွယ်သွားခဲ့ပါတယ်။

အင်းဆက်အရေအတွက်က တစ်နှစ်ကို ၂ ရာခိုင်နှုန်း ကျဆင်းနေပါတယ်။

တစ်ကမ္ဘာလုံးရှိ အပင် ၇၅ ရာခိုင်နှုန်းကျော်ကို အင်းဆက်တွေက ဝတ်မှုန်ကူးနေတာဖြစ်ပြီး တစ်နှစ်ကို ဒေါ်လာ ၅၇၇ ဘီလီယံတန်ကြေးလောက် ရှိနေပါတယ်။

#World_Nature #ပန်းပွင့်များမျိုးဗီဇပြောင်းလဲလာ #ဝတ်မှုန်ကူးအင်းဆက်များလျော့နည်း #Source: WION

#World_Health
Published 26 December 2023

စနေတနင်္ဂနွေ အားလပ်ရက်တွေမှာ ပိုမိုကြာရှည်စွာ အိပ်စက်ပါက နှလုံးသွေးကြော ကျန်းမာရေးကို တိုးတက်စေနိုင်ကြောင်း Sleep Health ဂျာနယ်မှာ ဖော်ပြထားပါတယ်။

အသက် ၂၀ နဲ့အထက် အမေရိကန်လူမျိုး ၃,၄၀၀ ခန့်ရဲ့ အချက်အလက်တွေကို တရုတ်ပြည် နန်ကျင်ဆေးတက္ကသိုလ်မှ သုတေသီများက လေ့လာခဲ့ကြပါတယ်။

ကြားရက်တွေနဲ့ စနေတနင်္ဂနွေနေ့တွေမှာ ပါဝင်စမ်းသပ်သူတွေ ဘယ်လောက်ကြာကြာ အိပ်လဲဆိုတဲ့ အချက်အလက်တွေနဲ့ နှလုံးရောဂါ၊ သွေးတိုး ဆီးချိုတို့ ရှိသလားဆိုတာတွေကို လေ့လာခဲ့ကြပါတယ်။

ကြားရက်တွေထက် နားရက်တွေမှာ အနည်းဆုံး တစ်နာရီပိုမိုအိပ်စက်သူတွေက ပုံမှန်အိပ်စက်သူများထက် နှလုံးသွေးကြောရောဂါများ ဖြစ်နိုင်ခြေနည်းတာကို တွေ့ရှိခဲ့ကြပါတယ်။

ကြားရက်တွေမှာ အိပ်ချိန် ၆ နာရီအောက်သာရှိပြီး နားရက်တွေမှာ အနည်းဆုံး ၂ နာရီပိုအိပ်တဲ့သူတွေက ရောဂါဖြစ်နိုင်ခြေ အများဆုံးလျှော့ချနိုင်တာကို တွေ့ရပါတယ်။

တစ်ညကို အိပ်ချိန် ၆ နာရီတောင် မရှိတဲ့သူတွေမှာ ဖိစီးမှုဟော်မုန်းတွေ ထွက်လာပြီး နှလုံးရောဂါ ဖြစ်နိုင်ခြေများစေကာ နားရက်တွေမှာ ပိုမိုအိပ်စက်လိုက်ပါက နှလုံးအခြေအနေက ပုံမှန်ပြန်ဖြစ်သွားတယ်လို့ နယူးယော့ခ်တက္ကသိုလ်မှ ပရော်ဖက်ဆာမာ့ခ်ဆီဂယ်က ပြောပြသွားပါတယ်။

ဆန်ဖရန်ဆစ္စကိုမှ အိပ်စက်ခြင်းပညာရှင် ဒေါက်တာဘီကွမ်လောင်က အကယ်၍ အိပ်ရေးပျက်နေတဲ့သူ မဟုတ်ဘူးဆိုရင် ခန္ဓာကိုယ်တွင်း နေ့ညလည်ပတ်မှုစနစ် ထိန်းသိမ်းနိုင်ပြီး ကျန်းမာရေးနဲ့ အားအင်တို့ကို တိုးတက်စေတယ်လို့ ဆိုထားပါတယ်။

ဒါကြောင့် ပညာရှင်တွေကတော့ နားရက်တွေမှာ ပိုမိုအိပ်စက်တာကို အကြံမပြုထားပါဘူး။

ဆက်တိုက်အိပ်ရေးပျက်လာပြီ ဆိုရင်တော့ ပင်ပန်းနွမ်းနယ်လာကာ အဝလွန်ခြင်းနဲ့ နှလုံးသွေးကြောရောဂါများ ဖြစ်နိုင်ခြေများစေပါတယ်။

ဒီလိုအခြေအနေမျိုးမှာတော့ နားရက်တွေမှာ ပြန်လည်ဖြည့်တင်းအိပ်စက်ခြင်းဖြင့် ကျန်းမာရေးအတွက် အကျိုးရှိစေတယ်လို့ ဆိုပါတယ်။

ဒါပေမဲ့ ရေရှည်အိပ်ရေးပျက်ခြင်းရဲ့ အကျိုးဆက်ကိုတော့ ပြန်လည်ချေပနိုင်စွမ်း မရှိတာကိုလည်း သတိပြုရမှာ ဖြစ်ပါတယ်။

အိပ်ရေးမဝတဲ့အခါ နှလုံးရောဂါ၊ ဆီးချို၊ အဝလွန်ခြင်း၊ စိတ်ဓာတ်ကျခြင်း၊ သွေးတိုးခြင်းတို့ ဖြစ်နိုင်ခြေများစေတယ်လို့ ရောဂါထိန်းချုပ်ကာကွယ်ရေးစင်တာက ဖော်ပြထားပါတယ်။

#World_Health #ပိုမိုကြာရှည်စွာအိပ်စက်ခြင်း #နှလုံးရောဂါများကိုကာကွယ်နိုင် #Source: New York Post

၂၅ ဒီဇင်ဘာ ၂၀၂၃

ပို့ကုန်တင်ပို့သူတွေအနေနှင့် ပို့ကုန်ရငွေများပြည်လည်ဝင်ရောက်ရမည့်ကာလသတ်မှတ်ချက်တွေကို မြန်မာနိုင်ငံတော် ဗဟိုဘဏ်က ပြောင်းလဲသတ်မှတ်လိုက်ကြောင်း ကြေညာပါတယ်။

ပို့ကုန်ရငွေများအား ပြည်တွင်းသို့ ပြန်လည်ဝင်ရောက်ရမည့်ကာလကို အာရှနိုင်ငံများသို့ တင်ပို့သည့် ပို့ကုန်များအတွက် ပို့ကုန်တင်ပို့သည့်နေ့မှ ယခင် (၄၅) ရက်အစား (၃၀)ရက်သို့ လည်းကောင်း၊ အာရှနိုင်ငံများမှအပ အခြားနိုင်ငံများသို့ တင်ပို့သည့် ပို့ကုန်များအတွက် ပို့ကုန်တင်ပို့ သည့်နေ့မှ ယခင်(၉၀)ရက်အစား (၆၀) ရက်သို့လည်းကောင်း မြန်မာနိုင်ငံအတွင်းရှိ ပို့ကုန်တင်ပို့သူ၏ ဘဏ်ငွေစာရင်းသို့ နိုင်ငံခြားငွေဖြင့် မပျက်မကွက် ထည့်သွင်းရန် ပြင်ဆင်သတ်မှတ်လိုက်တာဖြစ်တယ်လို့ ၂၀၂၃ခုနှစ်၊ ဒီဇင်ဘာ ၂၅ရက် ရက်စွဲဖြင့်ထုတ်ပြန်လိုက်တဲ့ ဗဟိုဘဏ်ရဲ့ အမိန့်  ကြော်ငြာစာအမှတ် ၂၇ /၂၀၂၃ တွင်ဖော်ပြထားပါတယ်။

နိုင်ငံခြားသုံးငွေစီမံခန့်ခွဲမှုဥပဒေ၊ နိုင်ငံခြားသုံးငွေစီမံခန့်ခွဲမှုစည်းမျဉ်းနှင့် (၆-၅-၂၀၂၂) ရက်စွဲပါ မြန်မာနိုင်ငံတော်ဗဟိုဘဏ်၏ အမိန့်ကြော်ငြာစာအမှတ် (၂၇/၂၀၂၂) တို့အရ ပို့ကုန်တင်ပို့သူသည် ပို့ကုန်ရငွေကို နိုင်ငံအတွင်းရှိ ပို့ကုန်တင်ပို့သူ၏ ဘဏ်ငွေစာရင်းသို့ မပျက်မကွက် ထည့်သွင်းရေး ဆောင်ရွက်ရာတွင် အာရှနိုင်ငံများသို့ တင်ပို့သည့် ပို့ကုန်များအတွက် ပို့ကုန်တင်ပို့သည့်နေ့မှ (၄၅) ရက် အတွင်းလည်းကောင်း၊ အာရှနိုင်ငံများမှအပ အခြားနိုင်ငံများသို့ တင်ပို့သည့် ပို့ကုန်များအတွက် ရက်ပေါင်း (၉၀) အတွင်းလည်းကောင်း ပြန်လည်ဝင်ရောက်ရန် သတ်မှတ်ထားခဲ့တာဖြစ်ပြီး ယင်းကို ပြန်လည်ပြင်ဆင်ခဲ့ခြင်းဖြစ်ပါတယ်။

ဤအမိန့်ကြော်ငြာစာသည် ထုတ်ပြန်သည့်နေ့မှစ၍ အကျိုးသက်ရောက်စေရမည်ဖြစ်ပြီး လိုက်နာဆောင်ရွက်ခြင်းမရှိပါက နိုင်ငံခြားသုံးငွေစီမံခန့်ခွဲမှုဥပဒေ အရအရေးယူခြင်းခံရမယ်လို့လည်း ဗဟိုဘဏ်ဥက္ကဋ္ဌ ဒေါ်သန်းသန်းဆွေလက်မှတ်ရေးထိုး ထုတ်ပြန်တဲ့အဆိုပါအမိန့်ကြော်ငြာစာမှာဖော်ပြထားပါတယ်။

-ymg/knl

တူရကီတွင် ငွေကြေးဖောင်းပွမှုမြင့်မားလာခြင်းနဲ့အတူ အများပြည်သူပို့ဆောင်ဆက်သွယ်ရေးစရိတ်များ (၅၀)ရာခိုင်နှုန်းမြင့်တက်လာ

တူရကီနိုင်ငံ အစ္စတန်ဘူလ်မြိုမှာ အများပြည်သူ ပို့ဆောင်ရေးစရိတ်များ မြင့်တက်လာတာကြောင့် မြို့နေပြည်သူများအတွက် နေထိုင်မှုဘဝ ခက်ခဲလာကာ နေ့စဥ်သွားလာရေး ကုန်ကျမှုများကို တွက်ချက်ချွေတာလာရပါတယ်။
#World_Crisis
Published 25 December 2023
#တူရကီ #ပို့ဆောင်ရေးစရိတ်များမြင့်တက်
#Yangon_Times #YMG_News #Yangon_Media_Group

၂၅ ဒီဇင်ဘာ ၂၀၂၃

နယ်စပ်ဖြတ်ကျော်ရာဇဝတ်မှုများ၊ မူးယစ် ဆေးဝါး တရားမဝင် ထုတ်လုပ်ရောင်းဝယ်မှုများ၊ လူကုန်ကူးမှုများ၊ အကြမ်းဖက်မှုများ၊ ဆိုက်ဘာရာဇဝတ်မှုများ၊ အွန်လိုင်းလောင်းကစားမှုများ စသည့် ရာဇဝတ်မှုများသည် ဒေသတွင်းလုံခြုံရေးနှင့် စီးပွားရေးဖွံ့ဖြိုးတိုးတက်မှုကို အဟန့်အတား ဖြစ်စေသည့် အတွက် အဖွဲ့ဝင်နိုင်ငံများအနေဖြင့် တရားဥပဒေစိုးမိုးရေးဆိုင်ရာ ပူးပေါင်းဆောင်ရွက် မှုများကို တိုးမြှင့်ဆောင်ရွက်သွားရန် လိုအပ်တယ်လို့ နစက ဥက္ကဋ္ဌဗိုလ်ချုပ်မှူးကြီးမင်းအောင်လှိုင်က ပြောကြားပါတယ်။

ယနေ့ဒီဇင်ဘာ ၂၅ရက် မွန်းလွဲပိုင်းက ကျင်းပပြုလုပ်သည့်( ၄)ကြိမ်မြောက် မဲခေါင်-လန်ချန်း ပူးပေါင်းဆောင်ရွက်မှု နိုင်ငံ့ခေါင်းဆောင်များ အစည်းအဝေးတွင် နစက ဥက္ကဋ္ဌ  နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ဗွီဒီယိုကွန်ဖရင့်စနစ်ဖြင့် ပါဝင်တက်ရောက်ဆွေးနွေးရာ၌ ယင်းကဲ့သို့ထည့်သွင်းပြောကြားခဲ့ခြင်းဖြစ်တယ်လို့ နစကရဲ့ သတင်းထုတ်ပြန်ချက်မှာဖော်ပြထားပါတယ်။

အဲဒီအတွက် “မဲခေါင်-လန်ချန်း လုံခြုံရေး နှင့် တရားဥပဒေစိုးမိုးရေး ပူးပေါင်းဆောင်ရွက်မှုဗဟိုဌာန” က ဆောင်ရွက်လျက်ရှိ သည့် ဒေသတွင်း ပူးပေါင်းညှိနှိုင်းရေးအခန်းကဏ္ဍ၏ အရေးပါမှုကိုလည်း အသိအမှတ် ပြုပါကြောင်းလည်း ဗိုလ်ချုပ်မှူးကြီးက ဆက်လက်ပြောဆိုပါတယ်။

မြန်မာနိုင်ငံအနေဖြင့် ၂၀၁၇ ခုနှစ်မှစ၍ ၂၀၂၃ ခုနှစ်အထိကာလအတွင်း အမေရိကန်ဒေါ်လာ ၃၁ ဒသမ ၆ သန်း တန်ဖိုးရှိသည့် အထူးရန်ပုံငွေ စီမံကိန်း ၁၀၆ ခုရရှိထားပြီး နိုင်ငံ၏ လူမှုစီးပွားဖွံ့ဖြိုးတိုးတက်မှု လုပ်ငန်းများကို အထောက်အကူပြုလျက်ရှိပါကြောင်း၊ တရုတ်ပြည်သူ့သမ္မတနိုင်ငံအနေဖြင့် မဲခေါင်-လန်ချန်း နိုင်ငံများအား အထောက်အပံ့နှင့်အကူအညီများ ဆက်လက်ပေးအပ်နေမှုအပေါ် ကျေးဇူးတင်ရှိတယ်လို့လည်း ဗိုလ်ချုပ်မှူးကြီးက ပြောပါတယ်။

နေပြည်တော် တွင် “အမျိုးသားကူးစက်ရောဂါကာကွယ်ရေးနှင့် လေ့ကျင့်ရေးစင်တာ” တည်ဆောက် ရန် အတွက် အကူအညီများ ပေးအပ်ခဲ့သည့် တရုတ်နိုင်ငံကို ကျေးဇူးတင်ရှိပါကြောင်းနှင့် အဆိုပါစင်တာသည် ၂၀၂၄ ခုနှစ်၊ နှစ်ဦးပိုင်းတွင် ပြီးစီးမည်ဖြစ်တယ်လို့လည်း ဗိုလ်ချုပ်မှူးကြီးက ကျေးဇူးတင်စကားပြောကြားပါတယ်။

ယင်းအပြင်  မဲခေါင်-လန်ချန်း ပူးပေါင်းဆောင်ရွက်မှု လုပ်ငန်းစဉ် အောက်တွင် အချင်းချင်းအပြန်အလှန် အကူအညီပေးသင့်တယ်လို့ ဗိုလ်ချုပ်မှူးကြီးက ပြောဆိုလိုက်ပြီး ထိုကဲ့သို့ ဆောင်ရွက်နိုင်ရေးအတွက် တရုတ်နိုင်ငံ၏ ရပ်ဝန်းနှင့်ပိုးလမ်းမစီမံကိန်းနှင့် မဲခေါင်- လန်ချန်း ဖွံ့ဖြိုးတိုးတက်မှု လမ်းကြောင်းများမှတစ်ဆင့် အကောင်အထည်ဖော် ဆောင် ရွက်သင့်တယ်လို့လည်း ဗိုလ်ချုပ်မှူးကြီးက အကြံပြုပြောဆိုပါတယ်။

“မဲခေါင်-လန်ချန်း ပူးပေါင်းဆောင်ရွက်မှု ဆန်းသစ်တီထွင်မှုစင်္ကြံ” ဖော်ဆောင်မှုနှင့် “အဖွဲ့ဝင်နိုင်ငံများအကြား ပေါင်းစည်းဆက်နွှယ်မှု တိုးမြှင့်ရေးဆိုင်ရာ စီမံချက်” ရေးဆွဲမှုများကိုလည်း အရှိန်အဟုန်မြှင့် ဆောင်ရွက်ကြဖို့လည်း ဗိုလ်ချုပ်မှူးကြီးက မဲခေါင်-လန်ချန်းနိုင်ငံ့အကြီးအကဲများကို တိုက်တွန်းပြောဆိုပါတယ်။

“မဲခေါင်‘လန်ချန်း ခရီးသွားလာရေး မြို့တော်များ တည်ထောင်ခြင်း”၊ “မဲခေါင်- လန်ချန်း လေကြောင်းခရီးသွားလာမှုဆိုင်ရာ ဖွံ့ဖြိုးတိုးတက်မှုနှင့် မိတ်ဖက် ထူထောင်ခြင်း” လုပ်ငန်းစဉ်များကို ကြိုဆိုတယ်လို့လည်း ဗိုလ်ချုပ်မှူးကြီးက ဆက်လက်ပြောဆိုခဲ့ပါတယ်။

အစည်းအဝေးတွင် နစက ဥက္ကဋ္ဌနိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်နှင့် တရုတ်ပြည်သူ့သမ္မတနိုင်ငံ ဝန်ကြီးချုပ် မစ္စတာလီချန်း တို့က ပူးတွဲဥက္ကဋ္ဌများအဖြစ် ဆောင်ရွက်ကြပြီး ကမ္ဘောဒီးယားနိုင်ငံ ဝန်ကြီးချုပ် မစ္စတာ ဆမ်ဒက် မဟာ ပဝရ ဓိပတိ ဟွန်မာနိုက်၊ လာအို ပြည်သူ့ဒီမို ကရက်တစ်သမ္မတနိုင်ငံဝန်ကြီးချုပ် မစ္စတာ ဆုံဆိုင်း ဆီဖန်ဒုံ၊ ထိုင်းနိုင်ငံဝန်ကြီးချုပ် မစ္စတာ ဆရက်ထာ ထာဗီဆင် နှင့် ဗီယက်နမ် ဆိုရှယ်လစ် သမ္မတနိုင်ငံ ဝန်ကြီးချုပ် မစ္စတာ ဖန်မင်ချင်း တို့တက်ရောက်ခဲ့ကြပါတယ်။

ပူးတွဲဥက္ကဋ္ဌများက အဖွင့်အမှာစကားများ အသီးသီးပြောကြားပြီး မဲခေါင်- လန်ချန်း ပူးပေါင်းဆောင်ရွက်မှု အဖွဲ့ဝင် နိုင်ငံခေါင်းဆောင်များက မဲခေါင်-လန်ချန်း ပူးပေါင်းဆောင်ရွက်မှုဆိုင်ရာ ဖြစ်ပေါ်တိုးတက်မှုအခြေအနေများ အပေါ်သုံးသပ်ကာ၊ အနာဂတ် မဲခေါင်-လန်ချန်း ပူးပေါင်းဆောင်ရွက်မှုလုပ်ငန်းစဉ်များအပေါ် အမြင်ချင်း ဖလှယ်ဆွေးနွေးခဲ့ကြပါတယ်။

အစည်းအဝေးတွင် အနာဂတ်လုပ်ငန်းအစီအစဉ်များအတွက် မူဝါဒလမ်းညွှန် တစ်ရပ်အဖြစ် “နေပြည်တော်ကြေညာစာတမ်း” နှင့် အဖွဲ့ဝင်နိုင်ငံများအကြား အိမ်နီး ချင်းကောင်းပီသမှု၊ ချစ်ကြည်ရင်းနှီးမှုနှင့် လက်တွေ့ကျသော ပူးပေါင်းဆောင်ရွက် မှုများ တိုးမြှင့်ဆောင်ရွက်နိုင်ရန်ရည်ရွယ်၍ “မဲခေါင်-လန်ချန်း ပူးပေါင်းဆောင်ရွက်မှု လုပ်ငန်းအစီအစဉ် (၂၀၂၃-၂ဝ၂၇)” နှင့် “ မဲခေါင်-လန်ချန်း တီထွင်ဆန်းသစ်မှုစကြီ ဖွံ့ဖြိုးတိုးတက်ရေး ပူးတွဲအစီအစဉ်” တို့ကို အတည်ပြု ထုတ်ပြန်ခဲ့ကြတယ်လို့သိရပါတယ်။

အစည်းအဝေးတွင်  ဗိုလ်ချုပ်မှူးကြီး မင်းအောင်လှိုင် က မဲခေါင်-လန်ချန်း ပူးပေါင်းဆောင် ရွက်မှု အလှည့်ကျပူးတွဲဥက္ကဋ္ဌတာဝန်ကို ထိုင်းနိုင်ငံ သို့ လွှဲပြောင်းပေးအပ်ခဲ့ပါတယ်။

(၄) ကြိမ်မြောက် မဲခေါင်-လန်ချန်း ပူးပေါင်းဆောင်ရွက်မှု နိုင်ငံ့ခေါင်းဆောင်များ အစည်းအဝေးသို့ နစက တွဲဖက်အတွင်းရေးမှူး ဒုတိယ ဗိုလ်ချုပ်ကြီး ရဲဝင်းဦး၊ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဌာန၊ ပြည်ထောင်စု ဝန်ကြီး ဦးသန်းဆွေ၊ နိုင်ငံခြားရေးဝန်ကြီးဌာန၊ ဒုတိယဝန်ကြီးဦးလွင်ဦးနှင့် တာဝန် ရှိသူများ ပါ ဝင်တက်ရောက်ခဲ့ကြပါတယ်။

မဲခေါင်-လန်ချန်းပူးပေါင်းဆောင်ရွက်မှုကို ၂၀၁၆ ခုနှစ်တွင် ဖွဲ့စည်းခဲ့ခြင်း ဖြစ်ကာ အဖွဲ့ဝင်နိုင်ငံများအဖြစ် ကမ္ဘောဒီးယား၊ တရုတ်၊ လာအို၊ မြန်မာ၊ ထိုင်းနှင့် ဗီယက်နမ်နိုင်ငံတို့ ပါဝင်ပါတယ်။ မြန်မာနိုင်ငံအနေဖြင့် မဲခေါင်-လန်ချန်း ပူးပေါင်း ဆောင်ရွက်မှု အစီအစဉ်၏ အလှည့်ကျ ပူးတွဲဥက္ကဋ္ဌတာဝန်ကို အမြဲတမ်းပူးတွဲဥက္ကဋ္ဌ ဖြစ်သည့် တရုတ်နိုင်ငံနှင့်အတူ ၂၀၂၀ ပြည့်နှစ်၊ ဩဂုတ်လမှ ၂၀၂၃ ခုနှစ်၊ ဒီဇင်ဘာလ အထိ အောင်မြင်စွာ ပူးတွဲထမ်းဆောင်ခဲ့ခြင်းဖြစ်ကြောင်း သတင်းထုတ်ပြန်ချက်မှာဖော်ပြထားပါတယ်။

-ymg/knl

#Daily_News
Published 25 December 2023

၁။ ပုဂံရှေးဟောင်းဇုန်ထဲတွင်  ပလတ်စတစ်သုံးစွဲမှုလျော့ကျအောင်နှင့် အမှိုက်ကင်းစင်အောင် ပရော်ဂျက်ဖြင့်ဆောင်ရွက်မည်

၂။ တညင်းကုန်း လက်ကားဈေးကြီးတွင် ဆိုင်ခန်းပေါင်း ၁၂၀၀ကျော် ပါဝင်မည့် ဈေးရုံကြီးကို လာမည့်ဧပြီလတွင် ဖွင့်လှစ်နိုင်ရန်ရည်ရွယ်ထားဟုဆို

၃။ ခရစ္စမတ်အားလပ်ရက် ပုဂံလာရောက်သူများပြားပြီး ပုဂံမြို့တွင်းဟိုတယ်များအခန်းပြည့်နေ

၄။ တူရကီတွင်ငွေကြေးဖောင်းပွမှုမြင့်မားလာခြင်းနဲ့အတူ အများပြည်သူပို့ဆောင်ဆက်သွယ်ရေး စရိတ်များ (၅၀)ရာခိုင်နှုန်းမြင့်တက်လာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

#Local_News
Published 25 December 2023

ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)မြို့နယ်၊ (၄၆)ရပ်ကွက်၌ ယနေ့နေ့လည်၌ နေအိမ်တစ်လုံးမီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

အဆိုပါ ၄၆ ရပ်ကွက် စံရိပ်ငြိမ်လမ်းတွင် ယနေ့ညနေ ၃ နာရီ ၁၀ မိနစ်အချိန်က မီးလောင်မှုဖြစ်ပွားကြောင်း သတင်းရရှိသဖြင့် ဒဂုံမြို့သစ်(မြောက်ပိုင်း)မြို့နယ်မီးသတ်စခန်းမှ မီးငြှိမ်းသတ်ယာဉ်(၃)စီး၊ ရေသယ်ယာဉ်(၁)စီး၊ ဒဂုံမြို့သစ်(အရှေ့ပိုင်း)မြို့နယ် မီးသတ်စခန်းမှ မီးငြှိမ်းသတ်ယာဉ်(၂)စီးတို့ဖြင့် ထွက်ခွာငြှိမ်းသတ်ခဲ့ရာ ညနေ ၃နာရီ ၁၉ မိနစ် အချိန်၌ မီးထိန်းနိုင်ပြီး ၃နာရီ ၂၂မိနစ် အချိန်တွင် မီးငြှိမ်းခဲ့ကြောင်း သိရသည်။

ယင်းဖြစ်စဉ်ကြောင့်နေအိမ်တစ်လုံးမီးလောင်ကျွမ်းခဲ့ပြီး ပျက်စီးဆုံးရှုံးမှုတန်ဖိုးနှင့်မီးလောင်မှုဖြစ်စဉ်များအားဆက်လက်စုံစမ်းလျှက်ရှိကြောင်း သိရသည်။

#Local_News #မြောက်ဒဂုံ၄၆ရပ်ကွက် #မီးလောင်မှုဖြစ်ပွား #YMG/ NN #Yangon_Times

ချေးငွေလျှောက်ထားဖို့ကို ဒီဇင်ဘာ ၂၀ ရက်မှာ စတင်ခွင့်ပြုခဲ့တာပါ။ လျှောက်လွှာခေါ်ယူတဲ့ လေးရက်အတွင်း လျှောက်လွှာလျှောက်ထားမှု ဧက ၅၀,၀၀၀ (ရာခိုင်နှုန်း ၅၀)အထိ ရှိနေပါပြီ
#Local_News
Published 25 December 2023
#ကာလတိုချေးငွေလျှောက်ထား #ဧကငါးသောင်းအထိရှိ
#YMG/NN #Yangon_Times

အခုချိန်ကကုန်ကြမ်းဈေးနှစ်ဆကျော်လောက်တက်နေတယ်၊ ဈေးကောင်းနေတော့ မှိုအထွက်များတဲ့ စိုက်တောင်သူတွေတွက်ခြေကိုက်နေတယ်၊ အထွက်လည်းများကြပါတယ်
#Local_News
Published 25 December 2023
#ကောက်ရိုးနှင့်ငွေနှင်းမှိုများဈေးကောင်းရ
#YMG/NN #Yangon_Times

#Local_News
Published 25 December 2023

ထိုင်းနိုင်ငံတွင် အလုပ်လုပ်ကိုင်ရန် မြဝတီခရိုင်ဘက်မှ  တရားမဝင် နယ်စပ်ဖြတ်ကျော်ကာ ဖိုးဖမြို့နယ်ထဲသို့ ဝင်ရောက်လာသည့် မြန်မာနိုင်ငံသား ၁၇ ဦး ဖမ်းဆီးခံရကြောင်း ထိုင်းသတင်းဌာနများ၏ ဖေါ်ပြချက်အရသိရသည်။

ပြီးခဲ့သည့် ဒီဇင်ဘာလ ၂၃ ရက်နေ့က  ထိုင်း-မြန်မာနယ်စပ်၊ တာ့က်ခရိုင်၊ ဖိုးဖမြို့နယ်၊ ခီလီလာ့တ်ကျေးရွာဘက်ကို တရားမဝင် ဝင်ရောက်လာသည့် မြန်မာနိုင်ငံသား ၁၇ ဦးကို ထိုင်းစစ်တပ်ကစစ်ဆေးတွေ့ရှိခဲ့တာကြောင့် ဖမ်းဆီးခံရခြင်းဖြစ်ကြောင်း သိရသည်။

ဖမ်းဆီးခံရသူများတွင်  အမျိုးသား ၁၀ ဦး၊ အမျိုးသမီး ၇ ဦး၊ စုစုပေါင်း ၁၇ ဦးဖြစ်ပြီး ၎င်းတို့ကို ဥပဒေအရ အရေးယူဆောင်ရွက်ရန်အတွက်  ဖိုးဖရဲစခန်းသို့ ပို့ဆောင်ထားကြောင်း သိရသည်။

ယခုဒီဇင်ဘာလအတွင်း ထိုင်းနိုင်ငံတွင် အလုပ်လုပ်ကိုင်ရန် တရားမဝင်နယ်စပ်ဖြတ်ကျော်ဝင်ရောက်လာသည့် မြန်မာနိုင်ငံသား ရာဂဏန်းခန့်အထိ  ဆက်တိုက် ဖမ်းဆီးခံနေရကြောင်းအလုပ်သမားအရေးကူညီဆောင်ရွက်သူများထံကသိရသည်။

#Local_News #တရားမဝင်နယ်စပ်ဖြတ်ကျော်ဝင်ရောက် #မြန်မာနိုင်ငံသား၁၇ဦးဖမ်းဆီးခံရ  #YMG/LW #Yangon_Times