#Local_News
Published 26 February 2025
▪️ ကိုရီးယားနိုင်ငံရောက် မြန်မာနိုင်ငံသား၏ နိုင်ငံကူးလက်မှတ်သက်တမ်းတိုးခြင်းကို ဆောင်ရွက်ရာတွင် တရားဝင်နည်းလမ်းဖြင့်သာ ဆောင်ရွက်ရန်အတွက် ဆိုးလ်မြို့ရှိ မြန်မာသံရုံးက ယမန်နေ့က ထုတ်ပြန်ထားသည်။
▪️ ကိုရီးယားနိုင်ငံ လူဝင်မှုကြီးကြပ်ရေးဌာနမှ တာဝန်ရှိသူများအနေဖြင့် ပြည်ပနိုင်ငံသားများကိုင်ဆောင်ထားသော နိုင်ငံကူးလက်မှတ်များ၏ တရားဝင်မှုရှိမရှိကို စစ်ဆေးကြပ်မတ်လျက်ရှိရာ တချို့သောမြန်မာနိုင်ငံသားများ ကိုင်ဆောင်အသုံးပြုနေသည့် နိုင်ငံကူးလက်မှတ်များတွင် တံဆိပ်တုံးရိုက်နှိပ်ထားပြီး သက်တမ်းတိုးထားသည့်ကိစ္စနှင့် ပတ်သက်၍ တရားဝင်မှုနှင့် စစ်မှန်မှုရှိမရှိတို့ကို မြန်မာသံရုံးသို့ ဆက်သွယ်မေးမြန်းမှုများ ဆောင်ရွက်လျက်ရှိကြောင်း၊ ထိုသို့ ဆက်သွယ်မေးမြန်းမှုအရ မြန်မာသံရုံးမှ စိစစ်ခဲ့ရာ အချို့သော နိုင်ငံကူးလက်မှတ်များတွင် တရားမဝင်တံဆိပ်တုံးအတုအပဖြင့် ရိုက်နှိပ်ကာ သက်တမ်းတိုးထားပြီးသကဲ့သို့ လုပ်ဆောင်ထားသည်ကို တွေ့ရှိရကြောင်း၊ ထို့ကြောင့်ကိုရီးယားနိုင်ငံ လူဝင်မှုကြီးကြပ်ရေးဌာနမှ တာဝန်ရှိသူများက အဆိုပါနိုင်ငံကူးလက်မှတ် ကိုင်ဆောင်အသုံးပြုသူများအား လေဆိပ်မှ ထွက်ခွာခွင့်ကို ငြင်းပယ်ကာ ထိန်းသိမ်းခဲ့သည့်ဖြစ်စဉ် မကြာသေးမီကာလ၌ဖြစ်ပေါ်ခဲ့ရာ ထိုထိန်းသိမ်းခံရသူများအတွက် မြန်မာသံရုံးကလိုအပ်သောကောင်စစ်ဆိုင်ရာကိစ္စရပ်များကို ဆောင်ရွက်ပေးခဲ့ရကြောင်း သိရသည်။
▪️ ထို့ကြောင့်ကိုရီးယားနိုင်ငံရောက် မြန်မာနိုင်ငံသားများအနေဖြင့် မိမိတို့၏ နိုင်ငံကူးလက်မှတ်များကို တရားဝင်သောနည်းလမ်းဖြင့်သာ သက်တမ်းတိုးခြင်းကို ဆောင်ရွက်ကြရန်အရေးကြီးကြောင်း၊ တရားမဝင် တံဆိပ်တုံးအတုအပပြုလုပ်သူများကိုလည်း ထိရောက်စွာအရေးယူနိုင်ရေးအတွက်လည်း မြန်မာသံရုံးအနေဖြင့် ကိုရီးယားအာဏာပိုင်များနှင့်ဆက်လက်ညှိနှိုင်းဆောင်ရွက်လျက်ရှိကြောင်း ထုတ်ပြန်ထားသည်။
#YMG/SW #Yangon_Times
