Published 29 December 2023

လှိုင်သာယာနှင့်ပဲခူးတွင် ဓာတ်အားခွဲရုံအသစ်များတည်ဆောက်နေပြီး တည်ဆောက်မှု(၆၈)ရာခိုင်နှုန်းပြီးစီး‌နေပြီဖြစ်ကြောင်း လျှပ်စစ်စွမ်းအားဝန်ကြီး ဌာနမှသိရသည်။

အဆိုပါစီမံကိန်းလုပ်ငန်းများကို လျှပ်စစ်စွမ်းအားဝန်ကြီးဌာန၊ပြည်ထောင်စုဝန်ကြီး ဦးဉာဏ်ထွန်းနှင့်အဖွဲ့ဝင်များသွားရောက်ကြည့်ရူစစ်ဆေးခဲ့သည်။

ပြည်ထောင်စုဝန်ကြီးက ယခုကာလသည် ပွင့်လင်းရာသီဖြစ်ပြီး စပါးသီးနှံများ ရိတ်သိမ်းပြီးချိန်ဖြစ်သည့်အတွက် မြေသားလုပ်ငန်းများ ဆောင်ရွက်ခြင်း၊ ကြိုးဆွဲခြင်း လုပ်ငန်းများအတွက် လိုအပ်သော အထောက်အကူပစ္စည်းများ ကြိုတင်ပေးပို့ခြင်း၊ စီမံကိန်းတွင် အသုံးပြုမည့် အထောက်အကူပစ္စည်းများ ကြိုတင်သယ်ယူပို့ဆောင်ခြင်းလုပ်ငန်းများကို ကြိုတင်ဆောင်ရွက်ထားရန် လိုအပ်ကြောင်း၊ ဆောင်ရွက်လျက်ရှိသည့် မြို့ပြလုပ်ငန်းများကိုလည်း ဝန်ထမ်းအင်အား၊ စက်ယန္တရားအင်အား၊ လုပ်ငန်းဆောင်ရွက်ချိန်များကို ပိုမိုတိုးချဲ့စုဖွဲ့၍ ဟန်ချက်ညီ ပြီးစီးနိုင်ရေး အင်တိုက်အားတိုက် ဆောင်ရွက်သွားရန် လိုအပ်ကြောင်း၊ လုပ်ငန်းများ ဆောင်ရွက်ရာတွင်လည်း ဆောင်ရွက်ရန် ကျန်လုပ်ငန်းများအလိုက် ပြီးစီးရမည့်အချိန်ဇယားများ ရေးဆွဲထား၍ ၎င်းအချိန်ဇယားများအတိုင်း သတ်မှတ်ချိန်ပြီးစီးနိုင်ရေး အဆင့်ဆင့်ကြပ်မတ်ဆောင်ရွက်သွားရန် လိုအပ်ကြောင်း မှာကြားပြီး စီမံကိန်းလုပ်ငန်းများ ဆောင်ရွက်နေသော ဝန်ထမ်းများကို ဂုဏ်ပြုသစ်သီးခြင်းများ ပေးအပ်ကာ စီမံကိန်းလုပ်ငန်းခွင်အတွင်း ထရန်စဖော်မာများနှင့် Shunt Reactor တပ်ဆင်နေမှု၊ Hybrid Gas Insulated Switchgear (HGIS) တပ်ဆင်နေမှုနှင့် Control Build-ing တည်ဆောက်ခြင်းလုပ်ငန်း ဆောင်ရွက်နေမှုအခြေအနေကို လှည့်လည်ကြည့်ရှုစစ်ဆေးခဲ့သည်။

၅၀၀ ကေဗွီ လှိုင်သာယာ (အနောက်ပိုင်းတက္ကသိုလ်) ဓာတ်အားခွဲရုံနှင့် ၅၀၀ ကေဗွီ ဘုရားကြီးဓာတ်အားခွဲရုံစီမံကိန်းများသည် ယခုအခါ စီမံကိန်းလုပ်ငန်းများ၏ ၆၈ ရာခိုင်နှုန်း ဆောင်ရွက်ပြီးစီးနေပြီဖြစ်ကာ ၂၀၂၄ ခုနှစ်အတွင်း စီမံကိန်းတစ်ခုလုံး ရာနှုန်းပြည့်ပြီးစီးနိုင်ရေး ကြိုးပမ်းဆောင်ရွက်လျက်ရှိကြောင်းသိရသည်။
Yangon_Times/tthl
Published 29 December 2023
#Local_News
#Yangon_Times #YMG_News #Yangon_Media_Group

Published 29 December 2023

ထိုင်းနိုင်ငံသို့ သွားရောက်မည့် မြန်မာ MOU လုပ်သားများအနေဖြင့် ကြုံ‌တွေ့ရသည့်အခက်အခဲများအား ဝန်ကြီးဌာနသို့ တိုက်ရိုက်တင်ပြနိုင်ပြီး ညှိနှိုင်း‌ဖြေရှင်းပေးသွားမည် ဖြစ်ကြောင်း အလုပ်သမားဝန်ကြီးဌာန မှ သိရသည်။

အလုပ်သမားဝန်ကြီးဌာနအနေဖြင့် ရွှေ့ပြောင်းလုပ်သားလုပ်ငန်းစဉ်များကို တိုက်ရိုက်ကြီးကြပ်ရခြင်းဖြစ်သည့်အတွက် သက်ဆိုင်ရာ တိုင်းဒေသကြီး၊ ပြည်နယ်အစိုးရများ၊ လိုအပ်သည့် ဦးစီးဌာန လုပ်ငန်းအဖွဲ့အစည်းများနှင့်လည်းဆက်စပ်၍ ရွှေ့ပြောင်းလုပ်သားများသွားသည့် ခရီးလမ်းကြောင်း အဆင်ပြေစေရန်၊ အတတ်နိုင်ဆုံး သွားရမည့်ရက်များတွင် အချိန်ကိုက်သွားနိုင်စေရန်၊ အချိန်တိုအတွင်းသွားနိုင်ရန်အတွက် အားလုံးပေါင်းစပ်ညှိနှိုင်း၍ အတက်နိုင်ဆုံး ပြေလည်အောင် ဝန်ဆောင်မှုပေးကာ ဖြေ‌ရှင်းဆောင်ရွက်လျက်ရှိကြောင်း သိရသည်။

"ဒီကြားထဲကနေ အခက်အခဲတွေ၊ မပြေလည်မှုတွေ ရှိရင်လည်း အလုပ်သမားဝန်ကြီးဌာနကို တိုက်ရိုက်ဆက်သွယ်ပြီး ကြုံတွေ့နေရတဲ့ အခက်အခဲတွေ၊ အခြေအနေတွေကို တင်ပြလာရင်လည်း ကျွန်တော်တို့ ပေါင်းစပ်ညှိနှိုင်းပြီးတော့ ဖြေရှင်းဆောင်ရွက်ပေးသွားမယ်ဆိုတာကို အသိပေးပြောကြားလိုပါတယ်"ဟုအလုပ်သမားဝန်ကြီးဌာန၊ အမြဲတမ်းအတွင်းဝန် ဦးညွန့်ဝင်းကပြောသည်။

လတ်တလောတွင် ထိုင်းနိုင်ငံသို့ MOU လုပ်သားစေလွှတ်ရာတွင် အဓိကလမ်းကြောင်းဖြစ်သည့် မြဝတီလမ်းပိုင်းသည် အခက်အခဲရှိနေသော်လည်း ပုံမှန်အတိုင်းစေလွှတ်နေကြောင်း၊အလားတူ ရန်ကုန်-ကော့သောင်းလေယာဉ်နှင့်ကော့သောင်း-ရနောင်းရေယာဉ်ဖြင့်လည်း ထိုင်းနိုင်ငံသို့ MOU လုပ်သားစေလွှတ်လျက်ရှိကြောင်း၊ ယင်းကြောင့် MoU လုပ်သားနှင့်ပတ်သက်၍လုံးဝရပ်တန့်သွားသည့်အနေအထားမရှိကြောင်း သိရသည်။

ထို့အပြင် မြဝတီဘက်မှ ထိုင်းနိုင်ငံသို့ MoU လုပ်သားများသွားလာရန်ခက်ခဲလာပါကလည်း ရန်ကုန်-ကော့သောင်း-ရနောင်း လမ်းကြောင်း မှ လည်း လက်ခံမည့် လုပ်ငန်းစဉ်များဆောင်ရွက်ပေးမည်ဖြစ်ကြောင်းတစ်ဖက်နိုင်ငံမှပြောဆိုထားကြောင်းသိရသည်။

မြန်မာရွှေ့ပြောင်းအလုပ်သမားများအများဆုံးသွားရောက်သည့် နိုင်ငံဖြစ်သည့် ထိုင်းနိုင်ငံတွင် တရားဝင် မြန်မာရွှေ့ပြောင်းလုပ်သား ၄ သန်းခန့်ရှိပြီး ယင်းမှ MoU လုပ်သား ၁၅ သိန်းခန့်ရှိကြောင်း ထိုင်းအစိုးရ၏ ဖော်ပြချက်များအရ သိရသည်။
Yangon_Times/NN
Published 29 December 2023
#Local_News
#Yangon_Times #YMG_News #Yangon_Media_Group

Published 29 December 2023

စင်ကာပူရောက် မြန်မာများ Pay2Home Application ဖြင့် လွယ်ကူလျင်မြန် စွာဖြင့် ငွေလွှဲနိုင်ပြီဖြစ်ကြောင်း CB Bank ကသိရသည်။

အဆိုပါ Pay2Home Money Transferသည် စင်ကာပူနိုင်ငံရောက် မြန်မာများ အတွက် မိသားစုနှင့် မိတ်ဆွေများ ထံ ငွေလွှဲနိုင်ရာတွင် လွယ်ကူလျင်မြန်စေနိုင်မည်ဖြစ်ကြောင်း သိရသည်။

Pay2Home ဖြင့် ငွေလွှဲပါက Application မှလည်း အလွယ်တကူ လွှဲပို့နိုင်သလို Pay2Home Money Transfer Machine (MTM) ကိုလည်း အသုံးပြုပြီးလည်း CB Bank သို့ အချိန်နှောင့်နှေးကြန့်ကြာမှုမရှိဘဲ Special Account နှင့် Normal Savings Account များအတွင်းသို့ လွှဲပို့နိုင်မည်ဖြစ်ကြောင်းသိရသည်။

ထိုသို့ လွှဲပို့ရာတွင် မှတ်ပုံတင်နှင့် လျှို့ဝှက်ကုတ် (၇) လုံးပြပြီး CB Bank ၏ ဘဏ်ခွဲတိုင်းမှာလည်း လွယ်ကူစွာ ငွေထုတ်ယူနိုင်မည်ဖြစ်ကြောင်း သိရသည်။

အဆိုပါ Pay2Home Application အားhttps://onelink.to/cbpay2home မှတဆင့် download ရယူနိုင်ကြောင်းသိရသည်။
Yangon_Times/NN
Published 29 December 2023
#Local_News
#Yangon_Times #YMG_News #Yangon_Media_Group

' ပေ၂၁၀၀အောက်ချိုင့်ဝှမ်းက သဘာဝကျောက်စက် ရေသွယ်တန်းဆွဲရတာ ၊ကြားထဲမှာ‌ရေကန်လေးဆင့်ခံရမယ် ၊သွယ်တန်းမယ့် ပိုက်အရှည် ၂၂၆၂ပေနဲ့ ရေကန်လေးခု အလှုရှင် လိုအပ်နေပါတယ်၊ ပိုက်တစ်ပေ ငါးထောင်ကျပ်နဲ့ ပါဝင် လှုဒါန်းနိုင်ပါတယ် ' စခန်းလေးဘောဂသိဒ္ဓိတောရကျောင်းဆရာတော် ဦးနန္ဒသာမိ
Yangon_Times/NN
Published 29 December 2023
#Local_News
#Yangon_Times #YMG_News #Yangon_Media_Group

ယခင်ကတော့ငှက်Guideတွေနဲ့ ငှက်ကြည့်ပညာရှင် စာရင်းပြုစုတဲ့သူလာတယ် ကိုဗစ်နောက်ပိုင်းကတည်း လာတဲ့ သူ အလွန်နည်းသွားတယ်၊ အပန်းဖြေလာရောက် လည်ပတ်တဲ့သူဘဲများတယ်။ ဆောင်းခိုငှက်ကြည့်ဖို့ လာမယ့်သူတွေ အတွက်လည်း ပြင်ဆင်ထားပေးပါတယ်၊ အပန်းဖြေမယ့်သူတွေ အတွက်လည်း လာမယ့် Happy New အတွက် Tent တွေနဲ့ ညအိပ်တည်းခိုနိုင်ဖို့ စီစဉ်ထားတာတွေ ရှိပါတယ်။
Yangon_Times/LW
Published 29 December 2023
#Local_News
#Yangon_Times #YMG_News #Yangon_Media_Group

‘လူပုဂ္ဂိုလ်တစ်ဦးချင်းစီအတွက်တော့ မှတ်ပုံတင်ကြေး ၃၀၀၀၀၊ သက်တမ်းတိုးကြေး ၃၀၀၀၀ ၊ပြင်ဆင်ကြေး တစ်ချက်လျှင် ၃၀၀၀ သတ်မှတ်ထားတယ်။ ၂၀၂၄ခုနှစ် ၊ဇန်နဝါရီလ ၁ရက်မှ စတင်ခွင့်ပြုမယ့် မှတ်ပုံတင်တွေကို သက်တမ်း၂နှစ်အထိ ခွင့်ပြုသွားမယ်’ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန
Yangon_Times/tthl
Published 29 December 2023
#Local_News
#Yangon_Times #YMG_News #Yangon_Media_Group

Published 29 December 2023

    ပိုးသတ်ဆေးဥပဒေပါပြဋ္ဌာန်းချက်များကို လိုက်နာမှုမရှိသူများ၊ ဖောက်ဖျက်ကျူးလွန်သူများ လျော့နည်းပပျောက်သွားသည်အထိ ပိုးသတ် ဆေးဥပဒေလုပ်ထုံးလုပ်နည်းများနှင့်အညီ အရေးယူဆောင်ရွက်သွားရန်လိုအပ်ကြောင်း ပိုးသတ်ဆေးမှတ်ပုံတင်အဖွဲ့ဥက္ကဋ္ဌ ဒုတိယဝန်ကြီး ဒေါက်တာတင်ထွဋ်ကပြောကြားသည်။

နေပြည်တော်ရှိ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၌ကျင်းပခဲ့သောပိုးသတ်ဆေးမှတ်ပုံတင်အဖွဲ့၏ (၄၁) ကြိမ်မြောက်အစည်းအဝေးတွင်ယင်းသို့ပြောကြားခဲ့ခြင်းဖြစ်သည်။

   ပိုးသတ်ဆေးများကို မဆင်မခြင်သုံးစွဲလာခြင်းကြောင့် ပိုးမွှားမဟုတ်သော ပိုးကောင်များ ထိခိုက်သေကျေစေခြင်း၊ ဖျက်ပိုးများကို ကာကွယ်သော မိတ်ဆွေပိုးများ၊ ငှက်များ၊ ငါးများနှင့် နို့တိုက်သတ္တဝါများ သေကျေ၍ ကွင်းဆက်များ ပျက်စီးခြင်း၊ ရေနှင့်သဘာဝပတ်ဝန်းကျင် ညစ်ညမ်းခြင်း၊ မြေဆီလွှာအတွင်းရှိ တီကောင်အပါအဝင် ဇီဝမျိုးစုံနှင့် မြေဆီလွှာအာဟာရများပျက်စီးကာ မြေဆီလွှာကျန်းမာရေးကို ထိခိုက်စေကြောင်း သိရသည်။

 ထို့ပြင် ပိုးသတ်ဆေးများ ကြိမ်ဖန်များစွာ ပက်ဖျန်းခြင်းကြောင့် ဖျက်ပိုးများက ပိုးသတ်ဆေးကို ခံနိုင်စွမ်းရည်ရှိလာကြ၍ နှိမ်နင်းရန် ခက်ခဲကြောင်း၊ ထို့ကြောင့် ပိုးသတ်ဆေးများကို သတ်မှတ်ထားသည့် စံချိန်စံညွှန်းနှင့် မညီညွတ်ပါက မှတ်ပုံတင်ခွင့်ပေးမည်မဟုတ်ကြောင်း ပိုးသတ်ဆေးမှတ်ပုံတင်အဖွဲ့ဥက္ကဋ္ဌ ဒုတိယဝန်ကြီး ဒေါက်တာတင်ထွဋ်ကပြောကြားသည်။

ထို့ကြောင့် ပိုးသတ်ဆေးမှတ်ပုံတင်အဖွဲ့၏ လုပ်ငန်းများ ဆောင်ရွက်ရာတွင် လိုအပ်သော နည်းပညာအထောက်အကူရရှိရန် ကျွမ်းကျင်ပညာရှင်များ ပါဝင်သော နည်းပညာကော်မတီသို့ လိုအပ်သည့် သတင်းအချက်အလက်များကို ပြုစုတင်ပြခြင်း၊ စိစစ်သုံးသပ်အကြံပြုခြင်း၊ အရည် အသွေးစစ်ဆေးခြင်း၊ သီးနှံဖျက်ပိုးအပေါ် ထိရောက်စေနိုင်မှု (Efficacy) လူနှင့် အခြားအကျိုးပြုသတ္တဝါများအပေါ် အဆိပ်သင့်နိုင်မှု (Toxicity) များကို စိစစ်သုံးသပ် အကြံပြုခြင်းများ ဆောင်ရွက်ရမည်ဖြစ်ကြောင်းယင်းကဆက်လက်ပြောကြားသည်။

  ထို့နောက် အစည်းအဝေး တွင်  ပိုးသတ်ဆေးနည်းပညာကော်မတီဝင်များ စိစစ်တင်ပြလာသော ပိုးသတ်ဆေးအမျိုးပေါင်း ၁၀၉ မျိုးကို အတည်ပြုပေးနိုင်ရေး ဆွေးနွေးခဲ့ကြကြောင်း သိရသည်။
Yangon_Times/LW
Published 29 December 2023
#Local_News
#Yangon_Times #YMG_News #Yangon_Media_Group

Published 29 December 2023

ရန်ကုန်တိုင်းဒေသကြီး ရင်းနှီး မြှုပ်နှံမှုကော်မတီ သည် စက်မှုကဏ္ဍတွင် ရာခိုင်နှုန်းပြည့် မြန်မာနိုင်ငံသား ရင်းနှီးမြှုပ်နှံမှုလုပ်ငန်း သုံးခုနှင့် ရာခိုင်နှုန်းပြည့် နိုင်ငံခြားရင်းနှီး မြှုပ်နှံမှုလုပ်ငန်း နှစ်ခုကို အတည် ပြုပေးခဲ့ကြောင်း သိရသည်။

ရန်ကုန်တိုင်းဒေသကြီး ရင်းနှီး မြှုပ်နှံမှုကော်မတီ ၁၂/၂၀၂၃ ကြိမ်မြောက် အစည်းအဝေးကို ယမန်နေ့ နံနက်ပိုင်းက ရန်ကင်း မြို့နယ်၊ တိုင်းဒေသကြီး ရင်းနှီး မြှုပ်နှံမှုကော်မတီရုံး၌ ကျင်းပပြုလုပ်ခဲ့ရာ ယင်းအစည်းဝေးတွင် အဆိုပါ ရင်းနှီးမြူပ်နှံမှု များ ကို ပြုလုပ်ရန် အတွက် အတည်ပြုပေးခဲ့ကြောင်း သိရသည်။

အတည်ပြုပေးခဲ့သည့်လုပ်ငန်း များမှာ CMP စနစ်ဖြင့် အဝတ် အထည်မျိုးစုံချုပ်လုပ်၍ ပြည်ပ သို့ ရာခိုင်နှုန်းပြည့် တင်ပို့ခြင်း လုပ်ငန်း၊ နိုင်ငံတကာအဆင့်မီ တန်ဖိုး မြှင့်ဆန် ထုတ်လုပ်ရောင်းချ ခြင်းလုပ်ငန်း၊ ၁၀၀ ရာခိုင်နှုန်း ပြည်ပတင်ပို့မည့် ပဲအမျိုးမျိုး ကြိတ်ခဲသန့်စင် ထုတ်လုပ်ခြင်း လုပ်ငန်း၊ ပြည်တွင်း၌ ၁၀၀ ရာခိုင်နှုန်းရောင်းချမည့် ဆောက် လုပ်ရေးလုပ်ငန်းသုံး ကျောက် အမျိုးမျိုး ကြိတ်ခွဲရောင်းချခြင်း လုပ်ငန်းနှင့် CMP စနစ်ဖြင့် Wearing Apparel အမျိုးမျိုး ချုပ်လုပ်ခြင်း လုပ်ငန်းတို့ဖြစ်ကြောင်း သိရသည်။

အဆိုပါ ရင်းနှီးမြှုပ်နှံမှု လုပ်ငန်းများအတွက် မတည် ငွေရင်း ပမာဏမှာ ကျပ် ၈၉၅၀ ဒသမ ၂၃၈ သန်းနှင့် အမေရိကန် ဒေါ်လာ ၇ ဒသမ ၀၂၀ သန်း ဖြစ်ပြီး ပြည်တွင်းအလုပ်အကိုင် အခွင့်အလမ်း ၁၇၁၉ ဦးအတွက် ဖန်တီးပေးနိုင်မည်ဖြစ်ကြောင်း သိရသည်။
Yangon Times/LW
Published 29 December 2023
#Local_News
#Yangon_Times #YMG_News #Yangon_Media_Group

Published_29 December 2023

လာမည့်၂၀၂၄ ခုနှစ်ကို “တရုတ်-အာဆီယံ ပြည်သူအချင်းချင်းအပြန်အလှန်ဖလှယ်ရေးနှစ်’’အဖြစ် အာဆီယံနှင့် တရုတ်နိုင်ငံတို့မှသတ်မှတ်ခဲ့ပြီး “တရုတ်-အာဆီယံ ပြည်သူအချင်းချင်း အပြန်အလှန်ဖလှယ်ရေးနှစ်”Logo ဒီဇိုင်းပြိုင်ပွဲကျင်းပသွားမည်ဖြစ်ကြောင်း မြန်မာနိုင်ငံဆိုင်ရာတရုတ်သံရုံးမှသိရသည်။

အဆိုပါပြိုင်ပွဲကို တရုတ်-အာဆီယံစင်တာ၊ တရုတ်ပြည်သူ၏ ပြည်ပနိုင်ငံများချစ်ကြည်ရေးအသင်း (CPAFFC) နှင့် တရုတ်နိုင်ငံခြားရေးဝန်ကြီးဌာနတို့ ပူးပေါင်းကျင်းပခြင်းဖြစ်သည်။

ပြိုင်ပွဲအတွက် Logo ဒီဇိုင်းလက်ရာများကို ၂၀၂၄ ခုနှစ် ဇန်နဝါရီလ ၁၅ ရက်နေ့ နောက်ဆုံးထားပေးပိုရမည်ဖြစ်ပြီး ဖေဖော်ဝါရီလ ၁ ရက်နေ့တွင် ဆုရရှိသူများကို ကြေညာပေးသွားမည်ဖြစ်ကြောင်းသိရသည်။
ပထမဆု (၁) ဦး - တရုတ်ယွမ်ငွေ ၃ သောင်း(သိန်း ၁၂၀ကျော်) + ဂုဏ်ပြုလက်မှတ်
ဒုတိယဆု (၂) ဦး - တရုတ်ယွမ်ငွေ ၁ သောင်း(သိန်း၄၀) + ဂုဏ်ပြုလက်မှတ်
တတိယဆု (၅) ဦး - တရုတ်ယွမ်ငွေ ၅ ထောင်(သိန်း၂၀)+ ဂုဏ်ပြုလက်မှတ်
ကျန်ရှိသော အချို့ပြိုင်ပွဲဝင်များကို ပါဝင်ယှဉ်ပြိုင်ခြင်းဂုဏ်ပြုလက်မှတ်များ ချီးမြှင့်ပေးအပ်သွားမည် ဖြစ်ကြောင်း၊
ပါဝင်ယှဉ်ပြိုင်မည့် လက်ရာများကို This email address is being protected from spambots. You need JavaScript enabled to view it. သိုပေးပို့၍ ပါဝင်ယှဉ်ပြိုင်နိုင်ကြောင်းနှင့်
သိရှိလိုသည်များကို This email address is being protected from spambots. You need JavaScript enabled to view it. တွင်မေးမြန်းနိုင်ကြောင်းသိရသည်။

ပြိုင်ပွဲနှင့်ပတ်သက်သည့်အချက်အလက်များကို https://www.zcool.com.cn/events/ChinaAseandesign2024/e_index?goto=navတွင် ဝင်ရောက်ဖတ်ရှုနိုင်ကြောင်းသိရသည်။
Yangon_Times/tthl
Published 29 December 2023
#Local_News
#Yangon_Times #YMG_News #Yangon_Media_Group

#World_Health
Published 29 December 2023

အမျိုးသားတွေဟာ အမျိုးသမီးတွေရဲ့ မျက်ရည်အနံ့ကိုရရင် ရန်လိုစိတ်လျော့ကျသွားတယ်လို့ လေ့လာတွေ့ရှိထားပါတယ်။

အစ္စရေးလ်နိုင်ငံ ဝစ်ဇ်မန်းသိပ္ပံတက္ကသိုလ်မှ ပြုလုပ်တဲ့ သုတေသနမှာ လူ့မျက်ရည်ဟာ ရန်လိုစိတ်လှုံ့ဆော်ပေးတဲ့ ဦးနှောက် ၂ နေရာကို လျှော့ချပေးနိုင်တဲ့ ဓာတုအချက်ပြပစ္စည်း ပါဝင်တယ်လို့ သိရပါတယ်။

ယခင်က ကြွက်တွေကို လေ့လာရာမှာ ကြွက်မတွေရဲ့ မျက်ရည်က ကြွက်ထီးတွေကြား တိုက်ခိုက်ခြင်းကို လျော့ကျစေပြီး ကြွက်ထီးငယ်တွေက ကြွက်ထီးကြီးတွေရဲ့ တိုက်ခိုက်မှုမခံရအောင် သူတို့ကိုယ်ပိုင်မျက်ရည်ဖြင့် သုတ်လိမ်းကြတယ်လို့ ဝစ်ဇ်မန်းတက္ကသိုလ်က ဆိုပါတယ်။

အခြားသုတေသနမှာတော့ မျက်ရည်အနံ့ရခြင်းဖြင့် တက်စ်တိုစတီရုန်း ကျားဟော်မုန်းကို လျော့ကျစေတယ်လို့ တွေ့ရှိရပါတယ်။

အမျိုးသမီး ၆ ဦးကို ဝမ်းနည်းစရာကောင်းတဲ့ ဇာတ်ကားကြည့်ရှုစေခဲ့ပြီး သူတို့ရဲ့မျက်ရည်တွေကို ရယူကာ အမျိုးသားဒါဇင်ခန့်ကို စမ်းသပ်ခဲ့ပါတယ်။

ဒီနောက် အမျိုးသားတွေကို ကွန်ပျူတာဂိမ်း ကစားစေခဲ့ပြီး ပြိုင်ဘက်တွေက လုယူသွားတဲ့ ငွေတွေကို လိုက်လံစုဆောင်းရတဲ့ ဂိမ်းဖြစ်ပါတယ်။

ကစားတဲ့သူတွေက ကလဲ့စားချေပြီး ပြိုင်ဘက်တွေရှုံးအောင် ကြိုးစားနိုင်ပါတယ်။

အမျိုးသမီးမျက်ရည်အနံ့ကို ရတဲ့သူတွေဟာ ကလဲ့စားချေလိုစိတ် ၄၃.၇ ရာခိုင်နှုန်းကျဆင်းသွားပါတယ်။

ဒီထက်တိကျစွာ လေ့လာခဲ့ရာမှာ လူတွေရဲ့ဦးနှောက်ထဲက အနံ့ခံဆိုင်ရာနေရာ ၆၂ ခုထဲက ၄ ခုကို မျက်ရည်တွေက လှုံ့ဆော်နိုင်တာကို တွေ့ရှိခဲ့ပါတယ်။

မျက်ရည်ဖွဲ့စည်းတဲ့ ပစ္စည်းတွေဟာ ကလေးတွေကို ကာကွယ်ပေးဖို့ ပြောင်းလဲလာဖွယ်ရှိတယ်လို့ သိပ္ပံပညာရှင်များ ယုံကြည်နေကြပါတယ်။

ကလေးငယ်တွေက သူတို့ကို ရန်မလိုပါနဲ့လို့ မပြောတတ်တာကြောင့် မျက်ရည်ကျပြတယ်လို့ ဝစ်ဇ်မန်းမှ ဇီဝအာရုံကြော ပရော်ဖက်ဆာ နိုအပ်ဆိုဘယ်က ပြောပြသွားပါတယ်။

လီဗာပူးလ်ဂျွန်မိုးတက္ကသိုလ်မှ စိတ်ပညာရှင် ဒေါက်တာမင်နာလီယွန်စ်ကတော့ ဒီတွေ့ရှိချက်တွေကို တရားသေကောက်ချက် မချကြဖို့ ဆိုလိုက်ပါတယ်။

တကယ့်လက်တွေ့ဘဝမှာ ပြောင်းလဲမှုအများအပြား ရှိနိုင်ပြီး အကြမ်းဖက်ခြင်းခံရတဲ့ လူတွေရဲ့ မျက်ရည်တွေက အကြမ်းဖက်သူတွေရဲ့ ရန်လိုမှုကို ဘာကြောင့်မလျှော့ချနိုင်လဲလို့ မေးခွန်းထုတ်လိုက်ပါတယ်။

#World_Health #အမျိုးသမီးများ၏မျက်ရည်အနံ့ #အမျိုးသားများ၏ရန်လိုစိတ်ကိုလျှော့ချနိုင် #Source: New York Post

Published 29 December 2023

အမေရိကန်မှ မိန်းပြည်နယ်ဟာ လာမယ့်နှစ် သမ္မတရွေးကောက်ပွဲမှာ ဒေါ်နယ်ထရမ့်ကို ပြည်နယ်မဲပေးမှုကနေ ထုတ်ပယ်လိုက်ပါတယ်။

ဒါဟာ ထိုသမ္မတဟောင်းကို မဲပေးမှုကနေ ပိတ်ပင်လိုက်တဲ့ ဒုတိယမြောက်ပြည်နယ် ဖြစ်လာပါတယ်။

ဒီမိုကရက်တစ်ဦးဖြစ်တဲ့ မိန်းပြည်နယ်ဝန်ကြီးချုပ် ရှန်နာဘယ်လိုးစ်က ၂၀၂၀ ရွေးကောက်ပွဲတုန်းက ထရမ့်ဟာ မဲပေးလိမ်လည်မှု သတင်းမှားတွေကို ဖြန့်ခဲ့ကာ ဥပဒေပြုအမတ်တွေ မဲပေးမှုကို အတည်မပြုနိုင်စေရန် လွှတ်တော်အဆောက်အအုံ ကပ်ပီတိုလ်ကို တိုက်ခိုက်ဖို့ ထောက်ခံသူတွေကို တိုက်တွန်းခဲ့တဲ့ ဖြစ်စဥ်ကို ထောက်ပြလိုက်ပါတယ်။

အစိုးရအခြေခံအုတ်မြစ်ကို ထိပါးလာမယ့် အခြေအနေတစ်ခုကို အမေရိကန် ဖွဲ့စည်းအခြေခံက သည်းခံသွားမှာ မဟုတ်ဘူးလို့ စာရွက် ၃၄ မျက်နှာပါ အုပ်ချုပ်ပုံမှာ ဘယ်လိုးစ်က ရေးသားခဲ့ပါတယ်။

ထိုဆုံးဖြတ်ချက်ကို ပြည်နယ်အထက်တရားရုံးမှာ အယူခံဝင်နိုင်ပြီး တရားရုံးကနေ မဖြေရှင်းသေးသရွေ့ ဘယ်လိုးစ်က သူမပြဌာန်းချက်ကို ဆိုင်းငံ့ထားပါတယ်။

ဒီလိုဆုံးဖြတ်ချက်အတွက် ကန့်ကွက်ကြောင်း အလျင်အမြန် တင်သွင်းသွားမယ်လို့ ထရမ့်ရဲ့ မဲဆွယ်ရေးအဖွဲ့က ပြောကြားလိုက်ပါတယ်။

ပုန်ကန်မှုမှာ ထရမ့်ပါဝင်နေတယ်ဆိုတာကို ထရမ့်ရဲ့ရှေ့နေတွေက ငြင်းချက်ပြနေကြပြီး ထိုနေ့က ထောက်ခံသူတွေကို ပြောကြားခဲ့တာတွေဟာ လွတ်လပ်စွာ ပြောဆိုပိုင်ခွင့်နဲ့ညီတယ်လို့ ပြန်လည်ချေပထားပါတယ်။

သမ္မတတွေဟာ အမေရိကန်အတွက် သစ္စာဆိုပြီးနောက် ပုန်ကန်မှုမှာ ပါဝင်ပါက အမေရိကန် ဖွဲ့စည်းပုံအခြေခံဥပဒေအရ သမ္မတရာထူး ထမ်းဆောင်ခွင့်မရှိဆိုတဲ့ အချက်အပေါ် အခြေခံကာ ထရမ့်ဟာ ပါဝင်ယှဥ်ပြိုင်ခွင့် မရှိဘူးလို့ မိန်းပြည်နယ် လွှတ်တော်အမတ်တွေက ဆိုခဲ့တာ ဖြစ်ပါတယ်။

ဘယ်လိုးစ်အနေနဲ့ သမ္မတဟောင်း ဒေါ်နယ်ထရမ့်ကို မိန်းမဲပေးမှုကနေ ပိတ်ပင်ဖို့ဆုံးဖြတ်တာဟာ ဒီမိုကရေစီနဲ့ ဖွဲ့စည်းပုံအခြေခံဥပဒေဘက်ကနေ ရပ်တည်လိုက်တာဖြစ်ကြောင်း ဥပဒေပြု လွှတ်တော်အမတ်ဟောင်းတွေကလည်း ပြောကြားလိုက်ပါတယ်။

မိန်းပြဌာန်းချက်ဟာ ရွေးကောက်ပွဲမှာ ထရမ့်ပါဝင်ခွင့်နဲ့ ပတ်သက်ပြီး ဖြေရှင်းဖို့ အထက်တရားရုံးအတွက် ဖိအားတွေ ဖြစ်လာစေဦးမှာပါ။

ထရမ့်ဟာ ရီပတ်ဘလစ်ကန် အမည်စာရင်းမှာ ထိပ်ဆုံးကနေ ပြတ်ပြတ်သားသား ဦးဆောင်နေသူ ဖြစ်ပါတယ်။

ဒီဇင်ဘာ ၁၉ ရက်နေ့က ကိုလိုရာဒိုပြည်နယ်ဟာ ထရမ့်ကို ပြည်နယ်မဲပေးမှုကနေ ထုတ်ပယ်လိုက်တဲ့ ပထမဆုံးပြည်နယ် ဖြစ်ခဲ့ပါတယ်။

အခွင့်အရေး လှုပ်ရှားသူများနဲ့ ထရမ့်ဆန့်ကျင်သူများက ပုန်ကန်မှုကိစ္စဖြင့် ထရမ့်ကို ပြည်နယ်အများအပြားကနေ ယှဥ်ပြိုင်ခွင့်ပိတ်ပင်ဖို့ ကြိုးပမ်းနေကြပါတယ်။
Source: Reuters
Published 29 December 2023
#World_Politics
#Yangon_Times #YMG_News #Yangon_Media_Group

#World_Science
Published 29 December 2023

အင်္ဂါဂြိုဟ်လို့ခေါ်တဲ့ မားစ်ဂြိုဟ်ဟာ လူသားတွေအတွက် စိတ်ဝင်စားစရာ အကောင်းဆုံးဂြိုဟ်ဖြစ်နေပါတယ်။

သိပ္ပံပညာရှင်များ ဆယ်စုနှစ်တွေတိုင်အောင် လေ့လာခဲ့ပြီးနောက် လွန်ခဲ့တဲ့ နှစ်သန်းပေါင်းများစွာက မားစ်ဂြိုဟ်မျက်နှာပြင်ပေါ်မှာ ရေတွေနဲ့ သက်ရှိများပင် တည်ရှိခဲ့ပုံရတယ်လို့ ကောက်ချက်ချလိုက်ကြပါတယ်။

Perseverance လို့အမည်ပေးထားတဲ့ နာဆာမှ အာကာသယာဥ်ဟာ မားစ်ဂြိုဟ်ပေါ်မှာ လှည့်လည်သွားလာနေပြီး အရေးကြီးတွေ့ရှိချက်များ ထမ်းဆောင်နေကာ ရေရှိခဲ့တဲ့ အထောက်အထားကို မကြာသေးမီက တွေ့ရှိခဲ့ပါတယ်။

မားစ်ဂြိုဟ်ပေါ်မှာ ကျောက်ခဲ ကျောက်စရစ်များ ပြန့်ကျဲနေပုံကို ထိုယာဥ်မှ ကင်မရာဖြင့် ရိုက်ကူးရရှိခဲ့ပါတယ်။

ဓာတ်ပုံထဲက ကျောက်စရစ်ခဲနဲ့ ကျောက်တုံးတွေဟာ လွန်ခဲ့တဲ့နှစ်ဘီလီယံလောက်က အင်အားပြင်းရေလျှံမှုကြောင့် ပါလာတာဖြစ်တယ်လို့ နာဆာက ဆိုပါတယ်။

နောက်ထပ်အကြောင်းအရာက အခြားဂြိုဟ်ပေါ်မှာ သက်ရှိတည်ရှိတယ်ဆိုတဲ့ အထောက်အထား ရှာဖွေဖို့ပါပဲ။

 ပုံပြင်တွေ ဇာတ်ကားတွေထဲကလို ဂြိုဟ်သားအကောင်လိုက်လားဆိုတာ မသေချာပေမယ့် မားစ်ဂြိုဟ်ပေါ်မှာ အဏုဇီဝပိုးမွှားတွေ၊ ရုပ်ကြွင်းတွေရဲ့ သက်သေတွေကို တွေ့နိုင်ရင်တောင် အရေးပါနေပါပြီ။

ကမ္ဘာဂြိုဟ် စတင်ဖွဲ့စည်းစဥ်ကလည်း သက်ရှိများကင်းမဲ့နေခဲ့ကာ ရေထဲမှာ အဏုဇီဝသက်ရှိများ စတင်ဖြစ်ပေါ်လာပြီး အမျိုးမျိုးသော ရေနေသတ္တဝါများ ဖြစ်ပေါ်လာကာ ကုန်းပေါ်က သတ္တဝါတွေ အပင်တွေက နောက်မှပေါ်ပေါက်လာတယ်လို့ ယူဆနေကြပါတယ်။

ဖြစ်နိုင်တာကတော့ ဂြိုဟ်တစ်ခုမှာ ရေရှိတယ်ဆိုရင် သက်ရှိဖြစ်ပေါ်နိုင်ခြေ ပိုများတယ်လို့ ဆိုရမှာဖြစ်ပါတယ်။

#World_Science #မားစ်ဂြိုဟ် #နာဆာအာကာသယာဥ်မှတွေ့ရှိ #Source: WION