#Local_News
Published_1 January 2024

လေဆိပ်လမ်း၌ယာဉ်တိုက်မှုဖြစ်ပွားပြီး ကားထဲလူညှပ်နေသည့်အတွက်ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

ယနေ့ ဇန်နဝါရီ၁ရက် မနက် ၂နာရီ ၅၂မိနစ် အချိန်ခန့်က ရန်ကုန်တိုင်းဒေသကြီး၊ မရမ်းကုန်းမြို့နယ်၊ ၅ရပ်ကွက်၊ လေဆိပ်လမ်းတွင် ယာဉ်တိုက်မှုဖြစ်ကာ လူညှပ်နေကြောင်း သတင်းရရှိသဖြင့် မရမ်းကုန်းမြို့နယ်မီးသတ်စခန်းမှ မီးသတ်ယာဉ်၁စီး၊ သန္ဓမေီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့‌ကြောင်း သိရသည်။

အဆိုပါဖြစ်စဉ်ကြောင့် ယာဉ်မောင်း ကျား(၁)ဉီး ထိခိုက်ဒဏ်ရာ(မစိုးရိမ်ရ)အား လူထဲကလူ လူမှုကယ်ဆယ်ရေးအသင်းကားဖြင့် မြောက်ဥက္ကလာပဆေးရုံကြီးသို့ ပို့ဆောင်ပေးခဲ့ကြောင်းသိရသည်။

#Local_News #ယာဉ်တိုက်မှု‌ကြောင့် #ကားထဲလူညှပ်မှုဖြစ်ပွား #YMG/NN #Yangon_Times

#Local_News
Published 1 January 2024

မလေးရှားနိုင်ငံ ဆီလန်ဂေါပြည်နယ် ရေပိုင်နက်အတွင်း မြန်မာနိုင်ငံသား ၄ဦး ပါဝင်သည့် ငါးဖမ်းလှေတစ်စီးဖမ်းဆီးခံရကြောင်း မလေးရှား သတင်းဌာနများရဲ့ဖေါ်ပြချက်အရ သိရသည်။

ဆီလန်ဂေါပြည်နယ် ရေကြောင်းညွန်ကြားရေးမှူး၊ ရေကြောင်းကပ္ပတိန် Abdul Muhaimin bin Muhammad Salleh မလေးရှားရေကြောင်းကင်းလှည့်အဖွဲ့သည် အနောက်တောင်ဘက် ရေမိုင် ၈ မိုင်ခန့်အကွာတွင် ငါးဖမ်းသင်္ဘောတစီးအား သံသယဖြစ်ဖွယ်အခြေအနေတွင် တွေ့ရှိခဲ့ရာClass C အမျိုးအစား ဒေသန္တရ ငါးဖမ်းလှေတစ်စင်းအား တားမြစ်ဆေးရေဟု ယူဆရသည့် ၁.၅ လီတာရေသန့်ဘူး ၁၃ ဘူးကို တွေ့ရှိပြီးနောက် ဖမ်းဆီးခဲ့ခြင်းဖြစ်ကြောင်း သိရသည်။

အဆိုပါ ငါးဖမ်းစက်လှေပေါ်တွင် အသက် ၂၆ နှစ်မှ ၄၁ နှစ်ကြားရှိ မြန်မာနိုင်ငံသားလေးဦး အလုပ်လုပ်ကိုင်နေသည် ကို တွေ့ရှိရပြီး စာရွက်စာတမ်းများကို စစ်ဆေးရာတွင် ငါးဖမ်းလှေသည် လိုင်စင်ပါစည်းကမ်းချက်များကို ဖောက်ဖျက်ကျုးလွန်ခြင်း၊ ခွင့်ပြုချက်မရှိဘဲ နိုင်ငံခြားသားအလုပ်သမားများကို အသုံးပြုသည်ကို စစ်ဆေးတွေ့ရှိရကြောင်း သိရသည်။

ထို့အပြင် လှေအတွင်းတားမြစ်ပစ္စည်းများဖြစ်သော ကက်တမ်အရည်အပြင် ချောင်းဆိုးပျောက်ဆေး ၃ ပုလင်းနှင့် ကက်တမ်အရွက်လတ်လတ်ဆတ်ဆတ် ကီလိုဂရမ် ၁,၆၂၇ ပါသည့် ပလပ်စတစ် ၁အိတ် နှင့် ကီလိုဂရမ် ၅၀ ပါရှိသည့် ငါးသိုလှောင်ခန်းတစ်ခန်းကိုလည်း တွေ့ရှိကြောင်း သိရသည်။

ထို့ကြောင့် လှေ၊ သက်သေခံပစ္စည်းများနှင့် လှေလုပ်သားအားလုံးကို မလေးရှားရေကြောင်း စုံစမ်းစစ်ဆေးရေးအရာရှိများထံ မလွှဲပြောင်းမီ Pulau Indah Marine Police Force ဆိပ်ခံတံတားသို့ ခေါ်ဆောင်သွားကြောင်း သိရသည်။

#Local_News #မလေးရှား ဆီလန်ဂေါပြည်နယ် #ငါးဖမ်းလှေတစ်စီးဖမ်းဆီးခံရ #YMG/LW #Yangon_Times

#Local_News
Published_1 Jan 2024

၂၀၂၄ ခုနှစ်တွင် စီးပွားရေး ကောင်းမွန်စေရန် ကြိုးပမ်းမည်ဟု နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်ဗိုလ်ချုပ်မှူးကြီး မင်းအောင်လှိုင်က ၂ဝ၂၄ ခုနှစ် နှစ်သစ်ကူးနှုတ်ခွန်းဆက်စကားတွင် ထည့်သွင်းပြောကြားလိုက်သည်။

“စီးပွားရေးပိုမိုကောင်းမွန်အောင် ကြိုးပမ်း ဆောင်ရွက်သွားပါမယ်။ စိုက်ပျိုးရေးနဲ့ မွေးမြူ ရေးကိုအခြေခံတဲ့ MSME လုပ်ငန်းများ ယခုထက်ပိုမိုအားကောင်းလာအောင် ဆောင်ရွက်ပေးသွားပါမယ်။ ပညာရေးကိုလည်း ပိုမိုအားပေး ဆောင်ရွက်သွားပါမယ်။ တိုင်းရင်းသားပြည်သူအားလုံးအနေနဲ့ တည်ငြိမ်အေးချမ်းပြီး မိမိတို့ရဲ့ လူမှု စီး ပွားဘဝများ ဖွံ့ဖြိုးတိုးတက်လာအောင် ဝိုင်းဝန်းပူးပေါင်း ဆောင်ရွက်ကြဖို့လည်း ပြောကြားလိုပါတယ်”ဟု ယင်းကဆိုသည်။

ယင်းအပြင် ၂၀၂၄ ခုနှစ်အတွင်း ပြည်လုံးကျွတ် လူဦးရေနှင့်အိမ်အကြောင်းအရာ သန်းခေါင်စာရင်း ကောက်ယူ ခြင်း လုပ် ငန်းတွေကို ဆောင်ရွက်သွားမည် ဖြစ်ကြောင်း၊သန်းခေါင်စာရင်းကရရှိသောလူဦးရေဆိုင်ရာ ကိန်း ဂဏန်း အချက် အလက်များဖြင့် လူမှုရေး၊ စီးပွားရေး၊ စီမံခန့်ခွဲရေး ကိစ္စရပ်များတွင်မှာ အကျိုးရှိရှိလုပ်ဆောင် နိုင် မည်ဖြစ်ကြောင်းလည်း ပြောသည်။

အလားတူ ပါတီစုံဒီမိုကရေစီ အထွေထွေရွေးကောက်ပွဲကြီးဖြစ်ပေါ်စေရေးအတွက် အခြေခံအချက်ဖြစ်သော မဲစာရင်းများ မှန်ကန် ပြည့်စုံရေးကိုလည်း အသုံးပြုနိုင်မည် ဖြစ်သောကြောင့် ပြည်သူများအနေဖြင့် သန်းခေါင် စာရင်း ကောက်ယူရေး လုပ်ငန်းစဉ်တွင် ပူးပေါင်းပါဝင်ပေးကြရန်လည်း ပြောကြားထားသည်။

မြန်မာနိုင်ငံအနေဖြင့် လွတ်လပ်ရေးရရှိသည်မှာ (၇၆)နှစ်ရှိပြီ ဖြစ်သော်လည်း အကြောင်းအမျိုးမျိုးကြောင့် ထိုက်သင့်သောတိုးတက်မှု မရသေးကြောင်း၊ နိုင်ငံတိုးတက်သာယာဝပြောလိုပါက တရားဥပဒေ ကိုလေး စားလိုက်နာရန်၊ စည်းကမ်းရှိရှိစည်းစည်းလုံးလုံးနေထိုင်ကြရန်၊အနာဂတ်ကို မျှော်တွေးပြီး ပညာသင်ကြား သင့်သည့်အရွယ်တွင် ပညာသင်ကြားရေးကို သက်ဆိုင်သူ အားလုံးဝိုင်းဝန်း ကြိုးပမ်းပေးရန် နှင့် တတ်နိုင် သူများ၊ အလုပ်လုပ်နိုင် သူများအားလုံး ကုန်ထုတ်လုပ်မှုမြင့်မားရေး ရင်းနှီးမြှုပ်နှံ အလုပ်လုပ်ကြရန် လိုကြောင်း ပြောကြားခဲ့သည်။

#Local_News #စီးပွားရေး ကောင်းမွန်စေရန် #Yangon_Times/PP

#Local-News
Published 1 January 2024

(၇၆) နှစ်မြောက် လွတ်လပ်ရေးနေ့ကို ဂုဏ်ပြုသောအားဖြင့် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ မြန်မာ့စာတိုက်လုပ်ငန်းသည် “(၇၆) နှစ်မြောက် လွတ်လပ်ရေးနေ့ အထိမ်းအမှတ်” ၂၀၀ ကျပ်တန် အထူးထုတ် စာပို့တံဆိပ်ခေါင်းသစ် သုံးမျိုးအားရောင်းချပေးမည် ဖြစ်ကြောင်း မြန်မာ့စာတိုက်လုပ်ငန်းမှ သိရသည်။

၂၀၂၄ ခုနှစ် ဇန်နဝါရီ ၄ ရက် မြန်မာသက္ကရာဇ် ၁၃၈၅ ခုနှစ် နတ်တော်လပြည့်ကျော် ၈ ရက် (ကြာသပတေးနေ့) နံနက် ၉ နာရီခွဲမှစတင်၍ နေပြည်တော်ဗဟိုစာတိုက်ကြီး၊ ရန်ကုန်စာတိုက်ကြီး၊ မန္တလေးစာတိုက်ကြီးတို့နှင့် တိုင်းဒေသကြီး/ ပြည်နယ်များရှိ စာတိုက်များတွင် ရောင်းချပေးသွားမည်ဖြစ်ကြောင်း သိရသည်။

အထူးအစီအစဉ် တစ်ရပ်အနေဖြင့် နေပြည်တော်ဗဟိုစာတိုက်ကြီး၊ ရန်ကုန်စာတိုက်ကြီးနှင့် မန္တလေးစာတိုက်ကြီးတို့တွင် ဇန်နဝါရီ ၄ ရက် (ကြာသပတေးနေ့) တွင် ဝယ်ယူသော စာပို့တံဆိပ်ခေါင်းများပေါ်တွင် နေ့စွဲအမှတ်အသားတံဆိပ် ရိုက်နှိပ်ပေးသွားမည် ဖြစ်ကြောင်း သိရသည်။

#Local-News #၂၀၀ကျပ်တန်အထူးထုတ် #စာပို့တံဆိပ်ခေါင်းသစ်သုံး #YGM/LW #Yangon_Times

#World_News
Published 01 January 2024

 ဒိန်းမတ်ဘုရင်မကြီး မာဂရတ်(၂)ဟာ ထီးနန်းစွန့်ပြီး သားဖြစ်သူ အိမ်ရှေ့မင်းသား ဖရက်ဒရစ်ကို ထီးနန်းလွှဲပြောင်းပေးတော့မှာ ဖြစ်ကြောင်း ဒီဇင်ဘာ ၃၁ ရက်နေ့က ကြေညာခဲ့ရာ အားလုံးအတွက် အံ့အားသင့်စရာသတင်း ဖြစ်ခဲ့ပါတယ်။

နှစ်သစ်ကူးအကြိုနေ့ ဒိန်းမတ်ရုပ်သံဌာနမှ ထုတ်လွှင့်တဲ့ မိန့်ခွန်းမှာပြောကြားခဲ့ရာ ဇန်နဝါရီ ၁၄ ရက်နေ့မှာ ထီးနန်းစွန့်မယ်လို့ ကြေညာခဲ့တာ ဖြစ်ပါတယ်။

ဘုရင်မကြီးရဲ့ အသက်အရွယ်နဲ့ ကျန်းမာရေးပြဿနာများကြောင့် ဒီလိုလုပ်ရတာ ဖြစ်တယ်လို့ ဆိုပါတယ်။

ဗြိတိန်ဘုရင်မကြီး အယ်လိဇဘက်(၂) ကွယ်လွန်ပြီးနောက် ဘုရင်မကြီး မာဂရတ်(၂)ဟာ သက်တမ်းအရှည်ဆုံးနဲ့ နောက်ဆုံးအုပ်ချုပ်နေတဲ့ ဘုရင်မဖြစ်နေပါတယ်။

သူမထီးနန်းမှာအုပ်ချုပ်နေတဲ့ ရာစုနှစ်ဝက်လောက်အတွင်း ဒိန်းမတ်တော်ဝင်မျိုးနွယ်များကို ခေတ်မီအောင် ပြုလုပ်နိုင်ခဲ့တဲ့အတွက် အသက် ၈၃ နှစ်အရွယ် ဘုရင်မကြီးဟာ ဂုဏ်ပြုခံထားရပါတယ်။

ဒီမတိုင်ခင်ကတော့ မာဂရတ်ဟာ ထီးနန်းဘယ်တော့မှ မစွန့်လွှတ်ဘူးလို့ အကြိမ်ကြိမ် ပြောကြားခဲ့ပါတယ်။

ဒါပေမဲ့ ဖေဖော်ဝါရီလက ပြုလုပ်ခဲ့တဲ့ ကျောခွဲစိတ်မှုကြောင့် နောက်မျိုးဆက်ကို ထီးနန်းလွှဲဖို့ အချိန်တန်ပြီလားဆိုတာ အတွေးဝင်လာခဲ့တယ်လို့ ဆိုပါတယ်။

ဘုရင်မကြီးဟာ ဒိန်းမတ်နိုင်ငံမှာ အထူးကျော်ကြားလှပြီး အဓိကအချက်က နိုင်ငံရေးမဆန်တာကြောင့် ဖြစ်တယ်လို့ သမိုင်းပညာရှင် လားစ်ဟိုဗက်ဘက်ဆိုရင်ဆင်က AFP သတင်းဌာနကို ပြောကြားသွားပါတယ်။

မာဂရတ်ဟာ ပန်းချီပညာ၊ ဝတ်စုံနဲ့ ဒီဇိုင်းပညာတို့ တတ်မြောက်ထားပြီး တော်ဝင်ဒိန်းမတ်ဘဲလေး၊ တော်ဝင်ဒိန်းမတ်ကဇာတ်ရုံတို့နဲ့ အကြိမ်ကြိမ် တွဲလုပ်ခဲ့ဖူးပါတယ်။

ကိမ်းဘရစ်ချ်တက္ကသိုလ်နဲ့ ပဲရစ်ရှိ ဆိုဘွန်နေးတက္ကသိုလ်တို့မှာ ပညာသင်ယူခဲ့ပြီး အင်္ဂလိပ်၊ ပြင်သစ်၊ ဂျာမနီ၊ ဆွီဒင်ဘာသာစကားတို့ကို ကျွမ်းကျင်တတ်မြောက်ထားပါတယ်။

ဒါပေမဲ့ အားလုံးထဲမှာမှ ဆေးရေးခြယ်ခြင်းနဲ့ ပန်းချီဆွဲခြင်းတို့ကတော့ လူစိတ်ဝင်စားမှုအများဆုံး ရခဲ့ပါတယ်။

#World_News #ဒိန်းမတ်ဘုရင်မကြီးမာဂရတ်(၂) #ထီးနန်းစွန့်တော့မည် #Source: WION

#Local_News
Published_1 January 2024

ဗိုလ်တထောင်စေတီတော်တွင် သံဃပူဇာအဖြစ် ဆွမ်းဆန်စိမ်းလောင်းလှူပွဲကျင်းပခဲ့ပြီး သံဃာတော်(၁၀၈) ပါးနှင့်သီလရှင်(၃၆) ပါးတို့အားဆွမ်းဆန်စိမ်းများလောင်းလှူခဲ့ကြောင်း သိရသည်။

(၅၀)ကြိမ်မြောက် ဗုဒ္ဓပူဇနိယပွဲတော် သံဃပူဇာအနေဖြင့် ဆွမ်းဆန်စိမ်းလောင်းလှူပွဲကျင်းပရခြင်းဖြစ်ပြီး ဗိုလ်တထောင်ကျိုက်ဒေးအပ်ဆံတော်ဦးစေတီတော် ဂေါပကအဖွဲ့၏နှိုးဆော်ပန်ကြားမေတ္တာရပ်ခံမှုဖြင့် အလှူရှင် သူတော်စင်အပေါင်းတို့က သံဃပူဇာအဖြစ် ဂေါတမမြတ်စွာ ဘုရားသခင်အား အမှူးထားပြီး ဆရာတော် သံဃာတော်(၁၀၈)ပါးနှင့် သီလရှင်(၃၆)ပါးတို့အား စေတီတော်ရင်ပြင်ပတ်လည်မှ လှူဖွယ်ဝတ္ထုအစုစုတို့ကို လောင်းလှူဆက်ကပ်လှူဒါန်းပူဇော်ခဲ့သည်။

(၅၀)ကြိမ်မြောက် ဆွမ်းဆန်စိမ်းလောင်းလှူပွဲနှင့် အလှူဒါနအစုစုတို့အတွက် ရေစက်ချမင်္ဂလာ အခမ်းအနား ကိုဒီဇင်ဘာလ၃၁ရက်တွင်ကျင်းပခဲ့ပြီး နိုင်ငံတော်သံဃမဟာနာယကအဖွဲ့၊ အကျိုးတော်ဆောင်၊အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ၊ ဆရာတော် ဘဒ္ဒန္တစန္ဒိမာဘိဝံသ အရှင်သူမြတ်ထံမှ ပရိသတ်များက ငါးပါးသီလခံယူ ဆောက်တည်ကြ ပြီး ဆရာတော် အရှင်သူမြတ်များက မေတ္တာသုတ်ပရိတ်တရားတော်များ ချီးမြှင့်ခဲ့သည်။

ဗိုလ်တထောင်ကျိုက်ဒေးအပ်ဆံတော်ဦးစေတီတော် အလှည့်ကျသဘာပတိဦးဌေးဦးမှ (၅၀)ကြိမ်မြောက် ဗုဒ္ဓပူဇနိယပွဲတော် သံဃပူဇာအနေဖြင့် ဆွမ်းဆန်စိမ်းလောင်းလှူပွဲ ကျင်းပခြင်းနှင့်စပ်လျဉ်း၍ လျှောက်ထား တင်ပြ၍ နိုင်ငံတော်သံဃမဟာနာယကအဖွဲ့၊ အကျိုးတော်ဆောင်၊ အဂ္ဂမဟာပဏ္ဍိတ၊ အဂ္ဂ မဟာသဒ္ဓမ္မ ဇောတိက ဓဇ၊ ဆရာတော် ဘဒ္ဒန္တစန္ဒိမာဘိဝံသထံမှ အနုမောဒနာ တရား နာယူ၍ အလှူဒါနအစုစုအတွက် ရေစက်သွန်းချ အမျှပေးဝေခဲ့ပြီး အခမ်းအနားကို "ဗုဒ္ဓသာသနံ စိရံ တိဋ္ဌတု" သုံးကြိမ်ရွတ်ဆို ဆုတောင်း၍ ရုပ်သိမ်းခဲ့ကြောင်း သိရသည်။

#Local_News #ဗိုလ်တထောင်စေတီတော် #ဆွမ်းဆန်စိမ်းလောင်းလှူ #tthl #Yangon_Times

Published 1 Jan 2024

လေယာဥ်စီးနေကြသူ ခရီးသည်တွေဟာ လေယာဥ်ပေါ်က ညစ်ပတ်နေတဲ့ နေရာတွေကို သတိမထားမိကြပါဘူး။

လေယာဥ်ဝန်ထမ်းတွေက လေယာဥ်ပေါ်က အညစ်ပတ်ဆုံးနေရာတွေကို ခရီးသည်တွေ သတိထားမိစေရန် မကြာသေးမီက ဖော်ပြခဲ့ကြပါတယ်။

(၁) ဦးခေါင်းထက်မှ ပစ္စည်းထားအကန့်တွေဟာ လူအများအပြားမှ ထိတွေ့နေကြပြီး သန့်ရှင်းရေး သိပ်မလုပ်ဖြစ်တာကြောင့် ထိုအကန့်တွေကို မကိုင်ခင်မှာ သုတ်သင်သင့်တယ်လို့ လေယာဥ်မယ်နဲ့ ခရီးသွားဘလော့ဂါဖြစ်သူ ဟိုဆက်ဖင်းရီမိုက ပြောပြသွားပါတယ်။

(၂) ဘေးကင်းရေးလမ်းညွှန်ကတ်ဟာလည်း လူအများကိုင်တွယ်ကြတာကြောင့် ယူမဖတ်ခင်မှာ အရင်သုတ်သင်သင့်ပါတယ်။

(၃) ခရီးသည်တွေ စားသောက်တဲ့အခါ တင်လေ့ရှိတဲ့ စားပွဲတွေပေါ်မှာ ကလေးငယ်တွေရဲ့ ဒိုက်ပါတွေကို တင်လေ့ရှိတာကြောင့် အသုံးမပြုခင်မှာ သုတ်သင်သင့်ပါတယ်။

(၄) ခရီးသည်တွေထိုင်တဲ့ ခုံတွေဟာ အော့အန်တဲ့အခါမှာတောင် သိပ်ပြီးသန့်ရှင်းရေး မလုပ်ကြပါဘူး။

(၅) လေယာဥ်သန့်စင်ခန်းအတွင်းတွေကို သန့်ရှင်းရေးလုပ်ကြရင်တောင် တံခါးလက်ကိုင်တွေကတော့ သန့်ရှင်းရေး မလုပ်တတ်ကြပါဘူး။

ဒါကြောင့် ထိုနေရာတွေကို ထိတွေ့ပြီးတိုင်း လက်ကိုသန့်ရှင်းရေးလုပ်ဖို့ အရေးကြီးပါတယ်။

ဒီလိုမျိုး နေရာတိုင်းကို သေချာစွာ သန့်ရှင်းရေးလုပ်ဖို့ ပြဿနာရှိနေတာက အချိန်မလုံလောက်ခြင်း၊ ပစ္စည်းကိရိယာ မလုံလောက်ခြင်းတို့ကြောင့် ဖြစ်တယ်လို့ လေယာဥ်သန့်ရှင်းရေးဝန်ထမ်း ရိုဆာဆန်းချက်ဇ်က ပြောပြသွားပါတယ်။
Source: New York Post
#World_Health
#YMG_News #Yangon_Times #Yangon_Media_Group

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်ဗိုလ်ချုပ်မှူးကြီး မင်းအောင်လှိုင် ပြောကြားသည့်၂ဝ၂၄ ခုနှစ် နှစ်သစ်ကူးနှုတ်ခွန်းဆက်စကားကို အပြည့်အစုံပြန်လည်ဖော်ပြပေးအပ်ပါသည်။

၂၀၂၃ ခုနှစ်ဆိုတဲ့ အချိန်ကာလကုန်ဆုံးလို့ ၂၀၂၄ ခုနှစ် နှစ်သစ်ကို ကူးပြောင်းရောက်ရှိတဲ့အချိန်အခါသမယမှာ ပြည်ထောင်စု သမ္မတမြန်မာနိုင်ငံတော်အတွင်း မှီတင်းနေထိုင်ကြတဲ့ မိဘပြည်သူ တိုင်းရင်းသားညီအစ်ကိုမောင်နှမများအားလုံး ကိုယ်စိတ်နှစ်ဖြာ ကျန်းမာ ချမ်းသာကြပါစေလို့ ဆုမွန်ကောင်း တောင်းအပ်ပါတယ်။ ကမ္ဘာ တစ်ဝန်းလုံးမှာ ရှိကြတဲ့ ကမ္ဘာသူ ကမ္ဘာသားများအားလုံးကိုလည်း ဘေးဘယာများ ဝေးကွာကြပါစေကြောင်းနဲ့ အေးချမ်းသာယာ တဲ့ လူ့ဘောင်  အသိုက် အဝန်းတစ်ခုမှာ ချစ်ခင်စည်းလုံးစွာ နေထိုင်နိုင် ကြပါစေကြောင်းလည်း ဆန္ဒပြုဆုတောင်း ပေးလိုက်ရပါတယ်။

ကျွန်တော်တို့နိုင်ငံမှာ ပြီးခဲ့တဲ့ ၂၀၂၃ ခုနှစ်ကာလအတွင်း တွေ့ကြုံ ခဲ့ရတဲ့ အခက်အခဲအချို့ နဲ့ စိန်ခေါ်မှုများကိုလည်း နိုင်ငံတော် အစိုးရနဲ့ တိုင်းရင်းသားပြည်သူအားလုံး လက်တွဲပူးပေါင်းပြီး အောင်မြင်စွာ ရင်ဆိုင်ကျော်လွှားနိုင်ခဲ့ကြပါတယ်။ ဒီမိုကရေစီ နည်းလမ်းတကျနဲ့ ငြိမ်းချမ်းစွာ ကိုယ့်နိုင်ငံတိုးတက်စေဖို့ ဆန္ဒမရှိသူတွေကတော့ ပြည်သူပြည်သားတွေကို နည်းမျိုးစုံနဲ့ နှောင့်ယှက်ခဲ့ကြတာလည်းရှိပါတယ်။ အဖျက်လုပ်ငန်းအမျိုးမျိုးကြောင့် နိုင်ငံပိုင်၊ ပြည်သူပြည်သားတွေရဲ့ ပိုင်ဆိုင်မှုများ ထိခိုက်ပျက်စီးဆုံးရှုံးမှု ဟာ တိုင်းပြည်အတွက် အနုတ်လက္ခဏာပဲ ဖြစ်ခဲ့ပါတယ်။ ဒါတွေသာမရှိခဲ့၊ မဖြစ်ခဲ့ဘူးဆိုရင် ကျွန်တော်  တို့နိုင်ငံဟာ များစွာကို တိုးတက်နေမှာဖြစ်ပါတယ်။ ဒါဟာ ကျွန်တော်တို့အတွက် သင်ခန်းစာ ပါ ။ ကျွန်တော်တို့အားလုံး နိုင်ငံကိုချစ်တဲ့၊ အမျိုးကို ချစ်တဲ့စိတ်၊ ညီညွတ်တဲ့အားနဲ့ ကျော်လွှားရပါမယ်။ ၂၀၂၄ ခုနှစ်မှာလည်း ကျွန်တော်တို့အစိုးရအနေနဲ့ ချမှတ်ထားတဲ့ အမျိုးသားရေး ရည်မှန်းချက်များ၊ နိုင်ငံရေး ရည်မှန်းချက်များ၊ ရှေ့လုပ်ငန်းစဉ် များနဲ့ ဦးတည်ချက်များကို အောင်မြင်စွာအကောင်အထည်ဖော်နိုင်ဖို့ ပြည်သူလူထုနဲ့လက်တွဲပြီး ဆက်လက်ဆောင်ရွက်သွားမှာ ဖြစ်ပါတယ်။ အဓိကအားဖြင့် .. စီးပွားရေးပိုမိုကောင်းမွန်အောင် ကြိုးပမ်း ဆောင်ရွက်သွားပါမယ်။ စိုက်ပျိုးရေးနဲ့ မွေးမြူ ရေးကိုအခြေခံတဲ့ MSME လုပ်ငန်းများ ယခုထက်ပိုမိုအားကောင်းလာအောင် ဆောင်ရွက်ပေးသွားပါမယ်။ ပညာရေးကိုလည်း ပိုမိုအားပေး ဆောင်ရွက်သွားပါမယ်။ ဒါကြောင့်ကျွန်တော်တို့ . တိုင်းရင်းသားပြည်သူအားလုံးအနေနဲ့ တည်ငြိမ်အေးချမ်းပြီး မိမိတို့ရဲ့ လူမှုစီးပွားဘဝများ ဖွံ့ဖြိုးတိုးတက် လာအောင် ဝိုင်းဝန်းပူးပေါင်း ဆောင်ရွက်ကြဖို့လည်း ပြောကြားလိုပါ တယ်။ ကျွန်တော်တို့အစိုးရရဲ့ “ရှေ့သို့ချီမည် ပန်းတိုင်ဆီ”ဆိုသည့် အတိုင်း နိုင်ငံအကျိုး၊ တိုင်းရင်းသား ပြည်သူအားလုံးရဲ့အကျိုးကို ရှေးရှုပြီး ပိုမိုကောင်းမွန်တဲ့နိုင်ငံတော်နဲ့ လူမှုစီးပွားဘဝများကို ကြိုးစား တည်ဆောက် ပေးသွားမှာ ဖြစ်ပါတယ်။

၂၀၂၄ ခုနှစ်အတွင်းမှာ ကျွန်တော်တို့နိုင်ငံအတွင်း ပြည်လုံးကျွတ် လူဦးရေနှင့်အိမ်အကြောင်းအရာ သန်းခေါင်စာရင်း ကောက်ယူခြင်းလုပ်ငန်းတွေကို ဆောင်ရွက်သွားမှာဖြစ်ပါတယ်။ သန်းခေါင်စာရင်းမှရရှိတဲ့ လူဦးရေဆိုင်ရာ ကိန်းဂဏန်း အချက် အလက်များက ကျွန်တော်တို့နိုင်ငံရဲ့ လူမှုရေး၊ စီးပွားရေး၊ စီမံခန့်ခွဲရေး ကိစ္စရပ်များမှာ အကျိုးရှိရှိလုပ်ဆောင် နိုင်မှာဖြစ်ပါတယ်။ ဒါ့အပြင်ကျွန်တော်တို့အစိုးရရဲ့ အန္တိမရည်မှန်းချက်ဖြစ်တဲ့ လွတ်လပ်ပြီး တရားမျှတသော ပါတီစုံဒီမိုကရေစီ အထွေထွေရွေးကောက်ပွဲကြီးဖြစ်ပေါ်စေရေးအတွက် အခြေခံအချက်ဖြစ်တဲ့ မဲစာရင်းများ မှန်ကန် ပြည့်စုံရေးမှာလည်း အသုံးပြုနိုင်မှာဖြစ်ပါတယ်။ တိုင်းရင်းသား ပြည်သူတစ်ရပ်လုံးအနေနဲ့လည်း ဆောင်ရွက်မဲ့ သန်းခေါင်စာရင်း ကောက်ယူရေး လုပ်ငန်းစဉ်များမှာ ပူးပေါင်းပါဝင်ပေးကြဖို့လည်း ပြောကြားလိုပါတယ်။

ကျွန်တော်တို့နိုင်ငံဟာ လွတ်လပ်ရေးရတာ (၇၆)နှစ်ရှိပြီ ဖြစ်ပါတယ်။အကြောင်းအမျိုးမျိုးကြောင့် ထိုက်သင့်သောတိုးတက်မှု မရသေးပါဘူး။ ကိုယ့်နိုင်ငံကို တိုးတက်သာယာဝပြော စေချင်ရင် (၁)တရားဥပဒေကိုလေးစားလိုက်နာရပါမယ်၊ (၂) စည်းကမ်းရှိရှိနဲ့စည်းစည်းလုံးလုံးနေထိုင်ကြရပါမယ်၊(၃) အနာဂတ်ကို မျှော်တွေးပြီးပညာသင်ကြားသင့်တဲ့အရွယ်မှာ  ပညာသင်ကြားရေးသက်ဆိုင်သူ အားလုံးက ဝိုင်းဝန်း ကြိုးပမ်းပေးရပါမယ်၊ (၄) တတ်နိုင်သူများ၊ အလုပ်လုပ်နိုင် သူများအားလုံး ကုန်ထုတ်လုပ်မှုမြင့်မားရေး ရင်းနှီးမြှုပ်နှံ အလုပ်လုပ်ကြဖို့လိုပါတယ်။ ဘာအလုပ်ပဲ လုပ်ကြလုပ်ကြအင်အား ရှိမှရမှာ ဖြစ်လို့ ပျော်ရွှင်ဖွယ်ရာ မိသားစုများ တည်ဆောက်ကြဖို့လည်း တိုက်တွန်းလိုပါတယ်။ ကုန်လွန်ခဲ့တဲ့ နှစ်ဟောင်းထဲမှ ကျွန်တော်တို့ နိုင်ငံတော်အတွက် အကျိုးဖြစ်ထွန်း စေမဲ့အရာတွေကို ဆက်လက်သယ်ဆောင်ကြပြီး မကောင်းသော အတွေး မကောင်းသော အမြင်များနဲ့ မကောင်းသော လုပ်ရပ် များကို ချန်ရစ်ခဲ့ကာ လူမျိုးရေး၊ ဘာသာရေး၊ ဒေသအရေးအစွဲများ ကင်းဝေးခြင်းနဲ့အတူ တစ်ဦး အပေါ်တစ်ဦး ကိုယ်ချင်းစာတရား၊ မုဒိတာတရား၊ မေတ္တာတရား များနဲ့ ကျွန်တော်တို့အားလုံး မျှော်လင့်တောင့်တနေတဲ့ နိုင်ငံတော်သစ်ဆီဆက်လက်လျှောက်လှမ်းကြပါစို့လို့ တိုက်တွန်းပြောကြားရင်း နှစ်သစ်ကူး နှုတ်ခွန်း ဆက်စကား ပြောကြားအပ် ပါတယ်ခင်ဗျာ။

ဘေဂျင်း၊ ဒီဇင်ဘာ ၃၁ ရက် (ဆင်ဟွာ) - တရုတ်နိုင်ငံ၏ ထိပ်တန်းဥပဒေပြုလွှတ်တော်၊ အမျိုးသားပြည်သူ့ကွန်ဂရက် အမြဲတမ်းကော်မတီသည် လာဘ်ပေးသူများကို ကြီးလေးသောပြစ်မှုများချမှတ်နိုင်သည့် ပြစ်မှုဆိုင်ရာဥပဒေပြင်ဆင်ချက် XII ကို အတည်ပြုခဲ့သည်။

ပုဒ်မ ရှစ်ခုပါ၀င်သော ပြင်ဆင်ချက်တွင် ထပ်ခါတလဲလဲ သို့မဟုတ် တစ်ဦးထက်ပိုသောသူများကို လာဘ်ပေးကြသူများ၊ သို့မဟုတ် နိုင်ငံ့ဝန်ထမ်းများ၊ ကြီးကြပ်ရေးမှူးများ၊ အုပ်ချုပ်ရေးဥပဒေစိုးမိုးရေးအရာရှိများနှင့် တရားရေးအရာရှိများကို လာဘ်ပေးသူများကို ကြီးလေးသည့်ပြစ်ဒဏ်များချမှတ်နိုင်ကြောင်းဖော်ပြထားသည်။

နိုင်ငံတော်၏ အဓိကသော့ချက် သို့မဟုတ် အဓိကပရောဂျက်များတွင် လာဘ်ပေးမှုများ၊ သို့မဟုတ် အလုပ်ရာထူးနေရာ၊ ရာထူးတိုးခြင်း သို့မဟုတ် နေရာအပြောင်းအလဲများအတွက် လာဘ်ပေးသူများကို ပိုမိုပြင်းထန်သော ပြစ်ဒဏ်များ ခံရမည်ဟုလည်း သတ်မှတ်ထားသည်။

ဂေဟပတ်ဝန်းကျင်၊ ဘဏ္ဍာရေး၊ လုပ်ငန်းခွင်ဘေးကင်းရေး၊ အစားအသောက်နှင့် ဆေးဝါး၊ သဘာဝဘေးအန္တရာယ် ကာကွယ်ရေးနှင့် ကယ်ဆယ်ရေး၊ လူမှုဖူလုံရေး၊ ပညာရေးနှင့် ဆေးဝါးကုသရေးစသည့် ကဏ္ဍများတွင် လာဘ်ပေး၍ ရာဇ၀တ်မှု ကျူးလွန်သူများနှင့် လာဘ်ပေးကာ တရားမ၀င်အကျိုးအမြတ်ရှိအောင်ဆောင်ရွက်သူများကိုလည်း ကြီးလေးသော ပြစ်ဒဏ်  ချမှတ်ရမည်ဟု ပြင်ဆင်ချက်တွင် ပြဋ္ဌာန်းထားသည်။

ပြင်ဆင်ချက်သည် ၂၀၂၄ခုနှစ် မတ်လ(၁)ရက်နေ့တွင် အသက်ဝင်မည်ဖြစ်သည်။

 Source ■ Xinhua

Published-31 December 2023

ရန်ကုန်မြို့ရှိ ပြည်သူ့ရင်ပြင်၌ ကျင်းပမည့် New Year Countdown ပွဲ လာရောက်သူများ အပြန်အဆင်ပြေစေရေးအတွက် YBS ယာဉ်များကို ည (၁၂)နာရီ အထိ ပြေးဆွဲသွားမည်ဖြစ်ကြောင်း YRTC ထံမှ သိရသည်။

2024 Yangon New Year Countdown ပွဲတော်ကို ဒီဇင်ဘာ လ ၃၁ ရက်၊ ညနေ (၆)နာရီမှစတင်၍ ကျင်းပသွားမည်ဖြစ်ပြီး ယင်းပွဲတော်သို့ လာရောက်ဆင်နွှဲကြသူများ အပြန်ခရီးစဉ်အဆင်ပြေစေရေးအတွက် YBS ယာဉ်လိုင်း (၇)လိုင်း ပြေးဆွဲပေးရန် စီစဉ်ထားကြောင်း သိရသည်။

2024 Yangon New Year Countdown ပွဲတော်တွင် နိုင်ငံကျော် ရုပ်ရှင်သရုပ်ဆောင်များ၊ အဆိုတော်များ၊ DJ ပညာရှင်များ၊ အကအဖွဲ့များနှင့် မျိုးဆက်သစ်တေးသံရှင်များစွာတို့ ဖျော်ဖြေမည်ဖြစ်ပြီး မီးရှူးမီးပန်း ပစ်ဖောက်ခြင်းများဖြင့် စည်ကားသိုက်မြိုက်စွာ ကျင်းပသွားမည်ဖြစ်သည်။

အဆိုပါပွဲတော်သို့ လာရောက်သူများအတွက် ယာဉ်လိုင်း (၇)လိုင်းဖြစ်သည့် YBS (21) ၊ YBS (61) ၊ YBS (37) ၊ YBS (115) ၊ YBS (62) ၊ YBS (7) နှင့် YBS (8)တို့ကို ဒီဇင်ဘာလ ၃၁ ရက်၊ ည (၉)နာရီမွ ည (၁၂)နာရီအထိ ပြေးဆွဲပေးသွားမည်ဖြစ်သည်။
Yangon Times/LW
Published 31 December 2023
#Local_News
#Yangon_Times #YMG_News #Yangon_Media_Group

Published 31. December 2023

  နိုင်ငံတကာ နှစ်သစ်ကူး ပွဲတော် ကျင်းပမည်ဖြစ်သောကြောင့် ရန်ကုန် တွင် ညမထွက်ရ အမိန့် တစ်ရက်တာ ပယ်ဖျက်ပေးကြောင်း ရန်ကုန်တိုင်းဒေသကြီး အစိုးရအဖွဲ့ထံမှ သိရသည်။

နှစ်သစ်ကူးနေ့ဖြစ်သည့် ဒီဇင်ဘာလ ၃၁ ရက်နေ့တွင် ရန်ကုန်မြို့ ပြည်သူရင်ပြင်၌ 2024 New Year Countdown ပွဲတော် ကျင်းပပြုလုပ်ရန် စီစဉ်ထားသဖြင့် တစ်ရက်တာ ညမထွက်ရအမိန့် ပယ်ဖျက်ခွင့်ပြုကြောင်း သိရသည်။

  ခရိုင်စီမံအုပ်ချုပ်ရေးအဖွဲ့ (အားလုံး) ထံ ပေးပို့ထားသည့် အသိပေးစာအတွင်း ရာဇဝတ်ကျင့်ထုံးဥပဒေပုဒ်မ ၁၄၄ အရ ထုတ်ပြန်သည့် ညမထွက်ရအမိန့်ကို ဇန်နဝါရီလ ၁ ရက်နေ့ နံနက် ၁ နာရီမှ ၃ နာရီထိ ပယ်ဖျက်ကြောင်း ဖော်ပြထာသည်။

   ရန်ကုန်တိုင်းဒေသကြီးအစိုးရအဖွဲ့အနေဖြင့် New Year Countdown 2024 ပွဲတော်ကို ၂၀၂၃ ခုနှစ် ဒီဇင်ဘာလ ၃၁ ရက်နေ့၊ ညနေ ၆ နာရီမှ စတင်ကာ ပြည်သူ့ရင်ပြင်၌ ကျင်းပပြုလုပ်သွားမည်ဖြစ်ကြောင်း သိရသည်။

  ပွဲတော်၌ နိုင်ငံကျော် ရုပ်ရှင်သရုပ်ဆောင်များ၊ အဆိုတော်များ၊ DJ ပညာရှင်များ၊ အကအဖွဲ့များနှင့် မျိုးဆက်သစ် တေးသံရှင်များစွာဖြင့် ဖျော်ဖြေတင်ဆက်သွားမည်ဖြစ်ကာ မီးရှူးမီးပန်းပစ်ဖောက်ခြင်း အပါအဝင် စည်းကားသိုက်မြိုက်စွာ ကျင်းပပြုလုပ်သွားမည်ဖြစ်ကြောင်း သိရသည်။
Yangon Times/LW
Published 31 December 2023
#Local_News
#Yangon_Times #YMG_News #Yangon_Media_Group

Published 31 December 2023
 
ရန်ကုန်တိုင်းဒေသကြီး၊ ဒဂုံဆိပ်ကမ်းမြို့နယ်၊ (၆၀)ရပ်ကွက်၊ ဧရာဝဏ်လမ်း ရှိ ဟိုတယ် နိုဗယ် တွင် မီးလောင်မှု ဖြစ်ပွားခဲ့ကြောင်းမြန်မာနိုင်ငံမီးသတ်တပ်ဖွဲ့ထံ က သိရသည်။

  ဒီဇင်ဘာ ၃၀ရက် ည ၈နာရီ ၅၁မိနစ် အချိန်ခန့်က ဖြစ်ပွားခဲ့ ခြင်း ဖြစ်ပြီး  ဆိပ်ကမ်းမြို့နယ် မီးသတ်တပ်ဖွဲ့ က ထွက်ခွာငြိမ်းသတ်ခဲ့ရာ ၉နာရီ ၂၅ မိနစ် တွင် မီးငြိမ်းသတ်နိုင်ခဲ့ကြောင်း သိရသည်။

  အဆိုပါ မီးလောင်သည့် အကြောင်းရာ နှင့် ဆုံးရှုံးမှု တန်ဖိုး များ ကို သက်ဆိုင်ရာ မှ စစ်ဆေး လျက်ရှိ ကြောင်း သိရသည်။
Yangon Times/LW
Published 31 December 2023
#Local_News
#Yangon_Times #YMG_News #Yangon_Media_Group