Published_12 June 2024

ယခု၂၀၂၄-၂၀၂၅ဘဏ္ဍာနှစ် နှစ်လတာအတွင်း ကံပိုင်တည်ကုန်သွယ်ရေးစခန်းမှ ကန်ဒေါ်လာသန်း၉၀ကျော် အထိကုန်သွယ်ထား ကြောင်းစီးပွားရေးနှင့်ကူးသန်း
ရောင်းဝယ်ရေးဝန်ကြီးဌာနမှ သိရသည်။

ထိုသို့ကုန်သွယ်ထားရာတွင် ၂၀၂၄ခုနှစ်ဧပြီလ ၁ရက်မှ မေလ၃၁ရက်နေ့အထိ ပို့ကုန်တင်ပို့မှုမှ ကန်ဒေါ်လာ ၇၂ဒဿမ၉၇၂သန်း ၊သွင်းကုန်တင်ပို့မှုမှ ကန်ဒေါ်လာ ၁၉ဒဿမ၈၂၄သန်း စုစုပေါင်း ကုန်သွယ်မှုပမာဏ ၉၂ဒဿမ ၇၉၆သန်း ကုန်သွယ်ထားကြောင်းသိရသည်။

ထို့အပြင် ကံပိုင်တည်ကုန်သွယ်ရေးစခန်းမှ ၂၀၂၄-၂၀၂၅ ဘဏ္ဍာနှစ်၊ ဇွန်လကုန်သွယ်မှုလျာထားချက်မှာ ပို့ကုန် (၄.၀၀၀) ဒေါ်လာသန်းနှင့် သွင်းကုန် (၁.၀၀၀) ဒေါ်လာသန်းဖြင့် စုစုပေါင်း (၅.၀၀၀) ဒေါ်လာသန်းဖြစ်ပြီး ဇွန်လ (၃) ရက်နေ့ထိအမှန်ဆောင်ရွက်နိုင်မှုမှာ ပို့ကုန် (၂.၃၂၃) ဒေါ်လာသန်း၊ သွင်းကုန် (၁.၀၂၄) ဒေါ်လာသန်း၊ စုစုပေါင်း (၃.၃၄၇) ဒေါ်လာသန်းဖြစ်သဖြင့် ကုန်သွယ်မှုလျာထားချက်အပေါ် (၆၆.၉၃၀%) ဆောင်ရွက်နိုင်ခဲ့ ကြောင်းသိရသည်။

၂၀၂၄-၂၀၂၅ ဘဏ္ဍာနှစ်၊ ဇွန်လ (၃) ရက်အတွင်း ပို့ကုန်အမယ်များအနေဖြင့် တစ်သျှူးငှက်ပျော၊ ပဲမျိုးစုံ၊ ငရုတ်ခြောက်၊ သရက်ပြားခြောက်၊ မန်ကျည်းသီး(အစေ့ပါ)၊ ချဉ်ပေါင်ဖာလာ၊ ကော်ဖီစေ့၊ ကြက်သွန်နီနှင့် အလူမီနီယံဖြတ်စတို့ တင်ပို့နိုင်ခဲ့‌ပြီးသွင်းကုန်အမယ်များအနေဖြင့် ရင်းနှီးမြှုပ်နှံမှု ပစ္စည်းများ၊ လုပ်ငန်းသုံးပစ္စည်းများ၊ ဆောက်လုပ်ရေးလုပ်ငန်းသုံးပစ္စည်းများ၊ လူသုံးကုန်အဝတ်အထည်များ၊ သစ်သီးများ၊ စက်သုံးဆီများနှင့် CMP ပစ္စည်းများတင်သွင်းနိုင်ခဲ့‌ ကြောင်းသိရသည်။

ထို့အပြင် ကံပိုင်တည်ကုန်သွယ်ရေးစခန်း၏ ၂၀၂၄  ခုနှစ်၊ ဇွန်လ (၂) ရက်မှ (၃) ရက်နေ့အထိ ပို့ကုန်ပိုင်းတွင် အဓိကပို့ကုန်ဖြစ်သည့် တစ်သျှူးငှက်ပျောတင်ပို့မှုအနေဖြင့် ဈေးနှုန်းတစ်တန်လျှင် (၂၅၃၀) ယွမ်/ (၃၄၇) ဒေါ်လာတို့ဖြင့် တန်ချိန် (၅၂၅) တန်၊ တန်ဖိုး (၀.၁၈၂) ဒေါ်လာသန်း၊ ငရုတ်ခြောက် တန်ချိန် (၄၆.၃)တန်၊ တန်ဖိုး (၀.၀၆၉) ဒေါ်လာသန်း၊ ပဲမျိုးစုံ တန်ချိန် (၅၈၉)တန်၊ တန်ဖိုး (၀.၅၀၁) ဒေါ်လာသန်း၊ ချဉ်ပေါင်ဖာလာ တန်ချိန် (၂၄.၉) တန်၊ တန်ဖိုး (၀.၀၅၀) ဒေါ်လာသန်း၊ကြက်သွန်နီ တန်ချိန် (၂၀၇.၅) တန်၊ တန်ဖိုး (၀.၀၈၂) ဒေါ်လာသန်း၊ ကော်ဖီစေ့ တန်ချိန် (၃၄) တန်၊ တန်ဖိုး (၀.၁၃၆) ဒေါ်လာသန်း၊ အလူမီနီယံဖြတ်စ တန်ချိန် (၆၆.၈၇) တန်၊ တန်ဖိုး (၀.၁၂၀) ဒေါ်လာသန်းနှင့် မကျည်းသီး(အစေ့ပါ) တန်ချိန် (၁၅.၅) တန်၊ တန်ဖိုး (၀.၀၀၃) ဒေါ်လာသန်း တင်ပို့နိုင်ခဲ့ကြောင်း၊ အများဆုံးသွင်းကုန်ပစ္စည်းများမှာ သံကြိုးခွေ၊ Hollow Pipe ၊ Iron Pipe၊ ကြွေးပြား၊ ကားတာယာ၊ လိမ္မော်သီး၊ ပန်းသီး၊ သစ်တော်သီး၊ လူသုံးအဝတ် အထည်များနှင့် စက်သုံးဆီတို့ဖြစ်ပြီး ရင်းနှီးမြှုပ်နှံမှုပစ္စည်းတန်ချိန် (၁၆၁.၂၅၀) တန်၊ တန်ဖိုး (၀.၁၃၇) ဒေါ်လာသန်း၊ လုပ်ငန်းသုံးပစ္စည်း တန်ချိန် (၂၀၃.၀၀၀) တန်၊ တန်ဖိုး (၀.၃၁၃) ဒေါ်လာသန်းနှင့် လူသုံးကုန်ပစ္စည်း တန်ချိန် (၂၁၀.၃၂၀) တန်၊ တန်ဖိုး (၀.၁၇၇) ဒေါ်လာသန်းတို့ တင်သွင်းနိုင်ခဲ့‌ ကြောင်း သိရသည်။
Yangon_Times/NN
#Local_News
#Published_12 June 2024
#YMG #Yangon_Times #Yangon_Media_Group

Published_12 June 2024

ရွှေတိဂုံစေတီတော်မြတ်ကြီးဖူးမြော်ခွင့်ကို ယခင်က မနက်(၅)နာရီမှည(၉)နာရီ အထိ သတ်မှတ်ထားရာမှ ဇွန်လ၂၁ရက်မှစတင်ပြီး မနက်(၄)နာရီမှည(၁၀)နာရီအထိ ဖူးမြော်ခွင့်တိုးမြှင့်ပေးလိုက်ကြောင်း ရွှေတိဂုံစေတီတော်ဂေါပကအဖွဲ့ထံမှသိရသည်။

မနက်အစောကြီးအာရုဏ်တက်ချိန် ၄နာရီကစလို့ ရွှေတိဂုံဘုရားဖူးမြော်နိုင်မှာဖြစ်၍ အဓိဌာန်ဝင်မည့်သူများ၊ အာရုဏ်ဆွမ်းဆက်ကပ်လှူမည့်သူများပိုမိုအဆင်ပြေစေသလို ညပိုင်း(၁၀)နာရီအထိ ဖူးမြော်ခွင့်ရသည့် အတွက် ရုံးဆင်းချိန် ရုံးသမား၊အလုပ်သမားများ ညပိုင်းဘုရားဖူးသွားရောက်ရာတွင်ပိုမိုအဆင်ပြေစေမည်ဖြစ်သည်ဟု ဘုရားဖူးများထံမှသိရသည်။

ကိုဗစ်မတိုင်ခင်က ရွှေတိဂုံစေတီတော်ကို မနက်(၄)နာရီမှည(၁၀)နာရီအထိဖူးမြော်ခွင့်ရခဲ့သော်လည်း ကိုဗစ်ကာလမှာ မနက်(၆)နာရီမှည(၆)နာရီအထိသာဖူးမြော်ခွင့်ရရှိခဲ့ခြင်းဖြစ်သည်။

၂၀၂၂ခုနှစ်တွင် မနက်(၅)နာရီမှ ည(၈)နာရီအထိသတ်မှတ်ခဲ့ပြီး၂၀၂၄ခုနှစ်နှစ်စတွင် မနက်(၅)နာရီမှည(၉)နာရီ အထိဘုရားဖူးချိန်တိုးမြှင့်ခဲ့ပြီး ယခုအခါ မနက်(၄)နာရီမှည(၁၀)နာရီအထိ ဖူးမြော်ခွင့်တိုးမြှင့်ပေးလိုက်ကြောင်း သိရသည်။
Yangon_Times/tthl
#Local_News
#Published_12 June 2024
#YMG #Yangon_Times #Yangon_Media_Group

ထိုင်းနိုင်ငံအပါအဝင် ပြည်ပနိုင်ငံအချို့က ဝယ်ယူမှုများနေတဲ့အတွက် ပြောင်းဈေးမှာ ဆက်လက်မြင့်တတ်လာတယ်လို့ ပြောင်းစိုက်ပျိုးထုတ်လုပ်ရောင်းဝယ်သူများ အသင်းထံက သိရပါတယ်။
Yangon_Times/LW
#Local_News
#Published_12 June 2024
#YMG #Yangon_Times #Yangon_Media_Group

ကွယ်လွန်သွားတဲ့ စာရေးဆရာကြီး ဦးတင်မောင်ထွေး (နတ်ရေကန်)ဟာ‘နတ်ရေကန် ရွှေစောင်းဆု’ ဆိုပြီးစာပေ၊ ဂီတ၊ ရုပ်ရှင်၊ သဘင်စတဲ့ အနုပညာလောက သားတွေထဲက အနုပညာထူးချွန်သူတွေ၊ လူမှုရေး ထူးချွန်သူတွေကိုပေးအပ်တယ်။၂၀၂၄ခုနှစ်ထဲမှာ သရုပ်ဆောင်ထူးခန့်ကျော်ကို ‘နတ်ရေကန် ရွှေစောင်းဆု’နဲ့ ငွေကျပ် ၁၅သိန်း ပေးအပ်ခဲ့တယ်။
Yangon_Times/tthl
#Local_News
#Published_12 June 2024
#YMG #Yangon_Times #Yangon_Media_Group

“ဧရာဝတီတိုင်းဒေသကြီးတွင် အလားအလာရှိသော ထုတ်ကုန် (အုန်းသီး) တန်ဖိုးကွင်းဆက်တစ်လျှောက် အဆင့်မြှင့်တင် ထုတ်လုပ်ခြင်းစီမံကိန်း” ကာလကို အခုလကုန်အထိတိုးမြှင့်ဆောင်ရွက်နေ တယ်လို့ ဧရာဝတီတိုင်းဒေသကြီး၊ဦးစီးမှုးရုံးက သိရပါတယ်။
Yangon_Times/NN
#Local_News
#Published_12 June 2024
#YMG #Yangon_Times #Yangon_Media_Group

အခြားဒေသ ထွက် သံပုရာသီး တွေ ဈေးကွက် ထဲ အဝင်များ လာတဲ့ အတွက် ရှမ်းပြည်နယ်က ထွက် ရှိတဲ့ သံပုရာသီး မှာ တစ်ပိသာ ကို ကျပ်၅၀၀၀ကျော် ဈေးကျဆင်းလာတယ်လို အောင်ပန်းရှိ ကုန်စိမ်းပွဲရုံ တွေ ထံ က သိရပါတယ်။
Yangon_Times/LW
#Local_News
#Published_12 June 2024
#YMG #Yangon_Times #Yangon_Media_Group

ဂျပန်ဘာသာ N-5 Basic သင်တန်းနဲ့ အင်္ဂလိပ်စာသင်တန်းတွေဟာ ပုံမှန်အားဖြင့် ကျပ်တစ်သိန်း ခွဲကုန်ကျမှာဖြစ်ပြီး ပညာဒါနအနေနဲ့ အတန်းပညာမရှိသူတွေကိုရော အတန်းပညာရှိတဲ့သူတွေကိုပါ ကျပ်နှစ်သောင်းနဲ့ တက်နိုင်အောင်ဆောင်ရွက်ပေးမှာဖြစ်တယ်။
(ပွင့်သခင်ဂျပန်နှင့် အင်္ဂလိပ်စာသင်တန်းကျောင်း၊ တည်ထောင်သူ)
Yangon_Times/tthl
#Local_News
#Published_12 June 2024
#YMG #Yangon_Times #Yangon_Media_Group

Published 12 June 2024

အမေရိကန်သမ္မတ ဂျိုးဘိုင်ဒင်ရဲ့ သားဖြစ်သူ ဟန်တာဘိုင်ဒင်ဟာ သေနတ်ဝယ်ရန်အတွက် တရားမဝင် မူးယစ်ဆေးသုံးစွဲမှုနဲ့ ပတ်သက်ပြီး လိမ်လည်ထွက်ဆိုခဲ့တယ်လို့ ဂျူရီတရားသူကြီးအဖွဲ့က အင်္ဂါနေ့မှာ စွဲချက်တင်လိုက်ပါတယ်။

ဒါကြောင့် လက်ရှိသမ္မတရဲ့ သားတစ်ယောက်အနေဖြင့် ပြစ်မှုတစ်ခုကြောင့် စွဲချက်တင်ခံရတဲ့ ပထမဆုံးလူ ဖြစ်လာပါတယ်။

ဟန်တာကို စွပ်စွဲထားတဲ့ အချက် ၃ ချက်စလုံးမှာ အပြစ်မြောက်တယ်လို့ ဒယ်လာဝယ် ဝီလ်မင်တန်မှ တရားသူကြီး ၁၂ ဦးပါ ဂျူရီအဖွဲ့က တွေ့ရှိခဲ့ပါတယ်။

တရားရုံးမှ ဟန်တာထွက်ခွာလာချိန်မှာ ဇနီးဖြစ်သူ မယ်လစ်ဆာနဲ့ သမ္မတကတော် ဂျေးလ်ဘိုင်ဒင်တို့က ဟန်တာရဲ့လက်ကို ကိုင်ထားခဲ့ပါတယ်။

တရားသူကြီးတွေဟာ ဟန်တာနဲ့ ပတ်သက်ပြီး စွပ်စွဲလို့ရသမျှကို အပြင်းအထန် လိုက်လံရှာဖွေနေကြတယ်လို့ ဟန်တာရဲ့ရှေ့နေ အက်ဘီလိုဝဲလ်က ပြောလိုက်ပါတယ်။

ဂျိုးဘိုင်ဒင်နဲ့ ဒေါ်နယ်ထရမ့်တို့ နိုဝင်ဘာ ၅ ရက်နေ့ သမ္မတရွေးကောက်ပွဲ ယှဥ်ပြိုင်ခါနီးအချိန်မှာ ယခုလို အမှုစစ်ဆေးခြင်း ပြုလုပ်ခဲ့တာ ဖြစ်ပါတယ်။

ဟန်တာဘိုင်ဒင် အရက်သေစာနဲ့ ကိုကိန်းအလွဲသုံးစားလုပ်ပြီး ခက်ခဲခဲ့တဲ့အချိန်တွေကို ရှေ့နေတွေက တင်ပြခဲ့ကာ ထိုသို့သုံးစွဲခြင်းက တရားဝင် သေနတ်ဝယ်ယူခွင့် မရှိတော့ပါဘူး။

အချိန် ၃ နာရီကြာ စဥ်းစားဆုံးဖြတ်ကြပြီးနောက် ဟန်တာဘိုင်ဒင်ဟာ ၂၀၁၈ ခုနှစ်က Colt Cobra ခြောက်လုံးပြူးတစ်လက် ဝယ်ယူဖို့ အစိုးရရဲ့ စစ်ဆေးမှတ်တမ်းကို ဖြည့်စွက်ရာမှာ တရားမဝင် မူးယစ်ဆေးသုံးစွဲမှု မရှိဘူးလို့ လိမ်လည်ခဲ့ကာ တရားဥပဒေနဲ့မညီ လက်နက်ကိုင်ဆောင်ခဲ့ကြောင်း တွေ့ရှိခဲ့ပါတယ်။

အမေရိကန် ခရိုင်တရားသူကြီး မာယယ်လင်နိုရီကာက ပြစ်ဒဏ်ချဖို့ ရက်အတိအကျ မပြောခဲ့ပေမယ့် လာမယ့် ရက် ၁၂၀ အတွင်း ဖြစ်နိုင်တယ်လို့ ဆိုပါတယ်။

ဂျိုးဘိုင်ဒင်ကတော့ အမှုစစ်ဆေးခြင်းရဲ့ ရလဒ်ကို လက်ခံလိုက်ကာ သူ့သားအယူခံဝင်တဲ့အခါမှာလည်း တရားစီရင်ရေး လုပ်ငန်းစဥ်များကို လေးစားသွားမယ်လို့ ပြောကြားလိုက်ပါတယ်။

သေနတ်ကိုင်ဆောင်ခြင်း ပြစ်မှုများအတွက် အပြစ်ဒဏ်ကက ၁၅ လမှ ၂၁ လလောက် သတ်မှတ်ထားကာ ဒီထက်တိုတောင်းတဲ့ ပြစ်ဒဏ်မျိုးလည်း ဖြစ်နိုင်တယ်လို့ တရားရေးကျွမ်းကျင်သူများက ဆိုပါတယ်။

ဂျူရီလူကြီးတစ်ဦးက CNN နဲ့အင်တာဗျူးရာမှာ နိုင်ငံရေးနဲ့ ပတ်သက်ပြီး ဘာမှမပြောခဲ့ကြကြောင်း၊ သမ္မတမိသားစု အကြောင်းလည်း မပြောခဲ့ကြကြောင်း၊ ဟန်တာရဲ့ အမှုကိစ္စအကြောင်းသာ ဖြစ်ကြောင်း ပြောပြသွားပါတယ်။

ဟန်တာရဲ့ အမှုစစ်ဆေးခြင်းမှာ ဇနီးဟောင်း၊ ရည်းစားဟောင်းနဲ့ မူးယစ်ဆေးစွဲလမ်းခဲ့တဲ့ အကြောင်းတွေကို ပထမဆုံးချပြခဲ့တဲ့ ခယ်မဖြစ်သူတို့ သက်သေထွက်ဆိုခဲ့ကြပါတယ်။

ဟန်တာရဲ့အမှုက မူးယစ်ဆေးသုံးစွဲခြင်းသာမကဘဲ ထိုအချိန်အတွင်း အစိုးရဖြည့်စွက်မှတ်တမ်းမှာ လိမ်လည်ဖို့ ဆုံးဖြတ်ခဲ့တာလည်း ပါဝင်ကြောင်း ထရမ့်ခန့်အပ်ထားတဲ့ အမေရိကန် တရားရေးဌာနမှ အထူးရှေ့နေ ဒေးဗစ်ဝစ္စက ပြောပြသွားပါတယ်။
Source: Reuters
#World_News
#Published_12 June 2024
#YMG #Yangon_Times #Yangon_Media_Group

Published 12 June 2024

ရန်ကုန်မြို့ပတ်ရထားလမ်း အဆင့်မြှင့်တင်ရေးစီမံကိန်းတွင် ဘူတာသစ်နှစ်ခု တည်ဆောက်မည်ဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာန မြန်မာ့မီးရထား မှ သိရသည်။

အဆိုပါ ရန်ကုန်မြို့ပတ်ရထားလမ်း အဆင့်မြှင့်တင်ရေးစီမံကိန်းတွင် ဘူတာသစ်နှစ်ခု တည်ဆောက်ရန် အိတ်ဖွင့်တင်ဒါ ခေါ်ယူကြောင်း မြန်မာ့မီးရထားက ဇွန် ၁၀ ရက်တွင် ထုတ်ပြန်ထားသည်။

မြို့ပတ်ရထားလမ်းပိုင်းတွင် ဟံသာဝတီဘူတာအသစ်နှင့် တံတားကလေးဘူတာအသစ် တည်ဆောက်သည့် လုပ်ငန်းများကို အိတ်ဖွင့်တင်ဒါ ခေါ်ယူထားခြင်းဖြစ်ပြီးတင်ဒါပုံစံများကို ဇွန် ၁၀ ရက်မှ ဇူလိုင်လ ၁၀ ရက်အထိ ရုံးချိန်အတွင်း ဝယ်ယူနိုင်မည်ဖြစ်ကြောင်း သိရသည်။

လက်ရှိတွင် ရန်ကုန်မြို့ပတ်ရထားလမ်း အဆင့်မြှင့်တင်သည့် လုပ်ငန်းများကို ဆောင်ရွက်နေပြီး အဆင့်မြှင့်တင်သည့်လုပ်ငန်းများ ပြီးစီးသွားမည်ဆိုပါက မြန်နှုန်းမြင့် ရထားများအသုံးပြုကာ နေ့စဉ် ရထားစီးခရီးသည် ၂၄၀,၀၀၀ ခန့်ကို သယ်ယူပို့ဆောင်ပေးနိုင်မည် ဖြစ်ကြောင်း သိရသည်။
Yangon_Times/LW
#Local_News
#Published_12 June 2024
#YMG #Yangon_Times #Yangon_Media_Group

Published_ 12 June 2024

ရုရှားနိုင်ငံမှထုတ်လုပ်သည့်ကင်ဆာဆေးဝါးများမြန်မာသို့တင်သွင်းဖြန့်ချိထုတ်လုပ်နိုင်ရေးနှင့် ရုရှား-မြန်မာပူးပေါင်းပြီး ကင်ဆာရောဂါကုသနိုင်ရေးများကို နှစ်နိုင်ငံကျန်းမာရေးဝန်ကြီးဌာနများမှ ကျန်းမာရေးဝန်ကြီးများကဆွေးနွေးခဲ့ကြောင်းသိရသည်။

ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းသည် ရုရှားဖက်ဒရေးရှင်းနိုင်ငံ စိန့်ပီတာစဘတ်မြို့၌ ကျင်းပသည့် (၂၇) ကြိမ်မြောက် နိုင်ငံတကာစီးပွားရေး ဖိုရမ်တက်ရောက်ရန် ရုရှားသို့ ရောက်ရှိနေစဉ်ဆွေးနွေးခဲ့ခြင်းဖြစ်သည်။

ပြည်ထောင်စုဝန်ကြီးသည် ရုရှားဖက်ဒရေးရှင်းနိုင်ငံ ကျန်းမာရေးဝန်ကြီး Dr. Mikhail Murashko နှင့် ကိုယ်စားလှယ်အဖွဲ့အား Conference Hall G 1.24 ခန်းမ၌ တွေ့ဆုံပြီး မြန်မာ-ရုရှား နှစ်နိုင်ငံကျန်းမာရေးကဏ္ဍ ပိုမိုမြှင့်တင်ဆောင်ရွက်နိုင်ရေးနှင့် ပူးပေါင်းဆောင်ရွက်မှု မူဘောင်ရေးဆွဲနိုင်ရေးကိစ္စရပ်များ၊ မိခင်နှင့် ကလေးကျန်းမာရေးစောင့်ရှောက်မှု၊ အရေးပေါ်ကျန်းမာရေးစောင့်ရှောက်မှုများအပါအဝင် နှစ်နိုင်ငံ ဆေးဘက်ဆိုင်ရာ သင်ကြားရေး ပူးပေါင်းဆောင်ရွက်နိုင်မည့်ကိစ္စရပ်များ၊

ရုရှားဖက်ဒရေးရှင်းနိုင်ငံမှ ထုတ်လုပ်သည့် ကင်ဆာရောဂါကုသမှုနှင့် အခြားရောဂါများ ကုသမှုဆိုင်ရာ ခေတ်မီဆေးဝါးများနှင့် ဆေးဘက်ဆိုင်ရာပစ္စည်းများ တင်သွင်း၊ ဖြန့်ချိ၊ ထုတ်လုပ်နိုင်ရေးကိစ္စရပ်များ၊ စဝ်စံထွန်းပြည်သူ့ဆေးရုံကြီး အဆင့်မြှင့်တင်ရေးနှင့် ကင်ဆာရောဂါကုသမှု ပူးပေါင်းဆောင်ရွက် နိုင်ရေးကိစ္စရပ်များ၊ ဆေးဘက် ဆိုင်ရာပညာရှင်များ အပြန်အလှန် အတွေ့အကြုံဖလှယ်ရေးနှင့် ဆေးဘက် ဆိုင်ရာညီလာခံ၊ သင်တန်းများ၊ အစည်းအဝေးများသို့ ဖိတ်ကြားနိုင်ရေးကိစ္စရပ်များကို ရင်းနှီးခင်မင်စွာ ဆွေးနွေးခဲ့ကြပြီး အမှတ်တရလက်ဆောင်ပစ္စည်း များ အပြန်အလှန်ပေးအပ်ကြသည်။

ပြည်ထောင်စုဝန်ကြီးသည် ရုရှားဖက်ဒရေးရှင်း နိုင်ငံ Polysan နှင့် Pharmasyntez ဆေးဝါး ထုတ်လုပ်ရေးလုပ်ငန်းများသို့ သွားရောက်၍ ရုရှားဖက်ဒရေးရှင်းနိုင်ငံမှ ထုတ်လုပ်သည့် ကင်ဆာရောဂါ ကုသမှုဆေးဝါးများ၊ အခြားခေတ်မီအရည်အသွေးပြည့်ဝသော ဆေးဝါးများ မြန်မာနိုင်ငံသို့ တင်သွင်း၊ ဖြန့်ချိ၊ ထုတ်လုပ်နိုင်ရေး နိုင်ငံပိုင်နှင့် ပုဂ္ဂလိကဆေးဝါးထုတ်လုပ်ရေးလုပ်ငန်းများနှင့် ပူးပေါင်းဆောင်ရွက်နိုင်ရေး ကိစ္စရပ်များကို ဆွေးနွေးလေ့လာခဲ့သည်ဟုဆိုသည်။

ဇွန် ၈ ရက် မနက်ပိုင်းက ပြည်ထောင်စုဝန်ကြီးနှင့် အဖွဲ့သည် စိန့်ပီတာစဘတ်မြို့ Napa-lkov Cancer Center သို့ ရောက်ရှိ၍ စိန့်ပီတာစဘတ်မြို့အစိုးရအဖွဲ့၊ Napalkov Cancer Center မှ တာဝန်ရှိသူများနှင့် နှစ်နိုင်ငံ ကင်ဆာရောဂါ ဆေးကုသမှု ပူးပေါင်းဆောင်ရွက်ရေးလုပ်ငန်းများကို ဆွေးနွေးခဲ့ကြပြီး နှစ်နိုင်ငံ ချစ်ကြည်ရင်းနှီးမှုနှင့် ဆေးဘက်ဆိုင်ရာ ပူးပေါင်းဆောင်ရွက်မှုအရ မြန်မာနိုင်ငံမှ ရောက်ရှိနေသည့် ကင်ဆာလူနာ မောင်စိုးမင်းသန့်ကို သွားရောက်ကြည့်ရှု အားပေးစကား ပြောကြားပြီး ထောက်ပံ့ငွေနှင့် အစားအသောက်များ ပေးအပ်ခဲ့သည်။

မွန်းလွဲပိုင်းတွင် ပြည်ထောင်စုဝန်ကြီးသည် Federal State Budgetary Institute Granov Russian Scientific Center of Radiology and Surgical Tech-nologies နှင့် Federal State Budgetary Institute Nikiforov Russian Center for Emergency and Radiation Medicine သို့ သွားရောက်ကြည့်ရှု လေ့လာရာ တာဝန်ရှိသူများ က အဏုမြူရောင်ခြည်ဖြင့် ခေတ်မီကင်ဆာရောဂါ ဆေးကုသမှုလုပ်ငန်းဆောင်ရွက်နေမှု၊ ဓာတ်ရောင်ခြည်စက် ကိရိယာအသုံးပြုမှု၊ အဏုမြူရောင်ခြည်ဆေးဝါးထုတ်လုပ်မှု၊ ဓာတ်ရောင်ခြည်ဘေးသင့်လူနာများ အရေးပေါ်ဆေး ကုသမှုလုပ်ငန်းများနှင့် ပြန်လည်သန်စွမ်းရေး ဆေးပညာရပ်ဆိုင်ရာလုပ်ငန်းများနှင့်စပ်လျဉ်း၍ တာဝန်ရှိသူများက လိုက်လံရှင်းလင်းပြသကြကြောင်းသိရသည်။
Yangon_Times/tthl
#Local_News
#Published_12 June 2024
#YMG #Yangon_Times #Yangon_Media_Group

Published_12 June 2024

အကျဉ်းထောင်မှ ဝိဇ္ဇာဘာသာတွဲတွင် မြန်မာနိုင်ငံတစ်နိုင်ငံလုံး တတိယအမှတ်အများဆုံးဖြင့် အောင်မြင်သူ တစ်ဦး ပေါ်ထွက်ခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

၂၀၂၃-၂၀၂၄ ခုနှစ် ပညာသင်နှစ်အတွက် တက္ကသိုလ်ဝင်တန်းအောင်စာရင်းများကို ယနေ့ ဇွန်လ ၁၁ ရက်တွင် ထုတ်ပြန်ကြေညာခဲ့ရာ တက္ကသိုလ်ဝင်စာမေးပွဲ အောင်မြင်သူများအနက် အကျဉ်းဦးစီးဌာနအောက်ရှိ အင်းစိန် ဗဟို အကျဉ်းထောင်မှ အကျဉ်းသား ၇ ဦးနှင့် မန္တလေး ဗဟိုအကျဉ်းထောင်မှ အကျဉ်းသား ၁၆ ဦး၊ စုစုပေါင်း အကျဉ်းသား ၂၃ ဦးအောင် မြင်ခဲ့ကြောင်း သိရသည်။

အောင်မြင်သူများတွင် ၄ ဘာသာဂုဏ်ထူးရှင် ၁ ဦး၊ ၃ ဘာသာဂုဏ်ထူးရှင် ၄ ဦး၊ ၂ ဘာသာ ဂုဏ်ထူးရှင် ၂ ဦး နှင့် ၁ ဘာသာဂုဏ်ထူးရှင် ၃ ဦး ပါဝင်ကြောင်း၊ ၄ ဘာသာ ဂုဏ်ထူးရှင်သည် ဝိဇ္ဇာ ဘာသာတွဲတွင် မြန်မာနိုင်ငံ တစ်နိုင်ငံလုံး တတိယအမှတ်အများဆုံးဖြင့် ထူးချွန်စွာ အောင်မြင် ခဲ့ကြောင်း သိရသည်။

အလားတူ လူမှုဝန်ထမ်းဦးစီးဌာနအောက်ရှိ လူငယ်ထိန်းသိမ်းစောင့်ရှောက်ရေးစခန်း နှင့် လူငယ်သင်တန်း ကျောင်းများမှ လူငယ်သင်တန်းသား ၈ ဦး၊ ကြည့်မြင်တိုင်မျက်မမြင်ကျောင်းမှ သင်တန်းသား ၂ ဦး အောင်မြင် ခဲ့ကြောင်းလည်း သိရသည်။

အကျဉ်းသား၊အကျဉ်းသူများ၏ ပညာသင်ယူခွင့် အ ခွင့်အရေး ဆက်လက်ရရှိနိုင်ရေးအတွက် မြန်မာနိုင်ငံအမျိုး သားလူ့အခွင့်အရေးကော်မရှင်အနေဖြင့် ဆောင်ရွက်ပေးသွားမည်ဖြစ်ကြောင်း သိရသည်။
Yangon_Times/PP
#Local_News
#Published_12 June 2024
#YMG #Yangon_Times #Yangon_Media_Group

Published_12 Jun 2024

မြန်မာနိုင်ငံနှင့် သီရိလင်္ကာနိုင်ငံ တို့ ဆေးဝါး ထုတ်လုပ်မှု ကဏ္ဍတွင် ပူးပေါင်းရန် ယနေ့ ဇွန်လ ၁၁ ရက်က နေပြည်တော်၌ ဆွေးနွေးခဲ့ကြကြောင်း နစက သတင်းထုတ်ပြန်ရေးအဖွဲ့က သိရသည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ထံ မြန်မာနိုင်ငံ ဆိုင်ရာ သီရိလင်္ကာနိုင်ငံ သံအမတ်ကြီးအဖြစ်ခန့်အပ် ရန် သဘောတူညီပြီးဖြစ်သော သံအမတ်ကြီး H.E. Mrs. Ponnamperuma Arachige Prabashini Ponnamperuma သည် နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ ရုံး၊ သံတမန်ဆောင်ဧည့်ခန်းမ၌ ၎င်း၏ သံအမတ်ခန့်အပ်လွှာကို ပေးအပ်ပြီးနောက် အထက်ပါအတိုင်း ဆွေးနွေး ခဲ့ကြခြင်း ဖြစ်ကြောင်း သိရသည်။

ဆေးဝါး ထုတ်လုပ်မှု ကဏ္ဍအတွက် ပူးပေါင်းဆောင် ရွက်ရေးဆိုင်ရာကိစ္စအပါအဝင် နှစ်နိုင်ငံချစ်ကြည် ရင်းနှီး မှုနှင့် သံတမန်ဆက်ဆံရေးဆိုင်ရာ ကိစ္စများ၊ မြန်မာနိုင်ငံမှ ရဟန်းသံဃာများနှင့် သာသနာနွယ်ဝင် သီလရှင်များ သီရိလင်္ကာ နိုင်ငံတွင် ပညာသင်ကြားလျက်ရှိမှု၊ သီရိလင်္ကာနိုင်ငံရှိ ထေရ်ကြီးဝါကြီး ဆရာတော် ကြီးများ အား မြန်မာနိုင်ငံမှသာသနာတော်ဆိုင်ရာ ဘွဲ့တံဆိပ်တော်များ ဆက်ကပ် လျက်ရှိမှု တို့ အခြေအနေများ အပါအဝင် ခရီးသွားလုပ်ငန်းများ တိုးတက်ရေးအတွက် ပူးပေါင်းဆောင်ရွက်ရေး ၊အပြန်အလှန် ကုန်သွယ်မှုများမြှင့်တင် ရေး၊စိုက်ပျိုးရေး၊ ကာကွယ်ရေး တို့တွင် ပူးပေါင်းဆောင် ရွက်မှုများတိုးမြှင့်ဆောင်ရွက်ရန်လည်း ဆွေးနွေးခဲ့ကြ ကြောင်း သိရသည်။
Yangon_Times/PP
#Local_News
#Published_12 June 2024
#YMG #Yangon_Times #Yangon_Media_Group