#WorldHealth
Published 14 May 2022

ကိုဗစ်ရောဂါဖြစ်စေတဲ့ အိုမီခရွန်မျိုးဗီဇကွဲမှ ထပ်မံခွဲထွက်လာတဲ့ မျိုးနွယ်ခွဲဗိုင်းရပ်စ်တွေကူးစက်မှုများပြားလာတဲ့အပြင် ကိုဗစ်ထိန်းချုပ် ကန့်သတ်ချက်များ ဖြေလျှော့လာခြင်းကြောင့် အာဖရိက တောင်ပိုင်းမှာ ကိုဗစ်ကူးစက်မှုလှိုင်းဖြစ်ပေါ်လျက်ရှိ‌ကြောင်း WHO က ကြာသပတေးနေ့က ကြေညာလိုက်ပါတယ်။

“ကူးစက်မှုမြင့်တက်လာခြင်းက အစောပိုင်းသတိပေးချက်တစ်ခုဖြစ်ပြီး အနီးကပ်စောင့်ကြည့်နေပါတယ်၊ အခုအချိန်မှာ နိုင်ငံ‌တွေအနေနဲ့ ကြိုတင်ပြင်ဆင်ထားသင့်ပါပြီ၊ နောက်ထပ်ကူးစက်မှုဖြစ်လာတဲ့အခါ ထိရောက်စွာတုန့်ပြန်နိုင်အောင် စီစဉ်ထားသင့်ပါတယ်” လို့ WHO မှ အာဖရိကဒေသတွင်းဆိုင်ရာ အရေးပေါ်ပြင်ဆင်ရေးနှင့် တုန့်ပြန်ဆောင်ရွက်ရေးဒါရိုက်တာ ဒေါက်တာ’အက်ဘ်ဒူဆာလမ်ဂူယီ’က ပြောကြားသွားပါတယ်။

Source: Reuters
#Yangon_Media_Group

#Local_News
Published_ 14 May 2022

တပ်မတော်သို့ဝင်ရောက်စဥ် အသက် ၁၈ နှစ် မပြည့်သေးသူ ၂၈ ဦးအား စစ်မှုထမ်းခြင်းမှ နုတ်ထွက်ခွင့်ပြု၍ မိဘအုပ်ထိန်းသူများထံ လွှဲပြောင်းပေးအပ်ခဲ့ကြောင်းသိရပါတယ်။လွှဲပြောင်းအပ်မှု (၁၇) ကြိမ်အတွင်း ၁၀၅၇ ဦးအား လွှဲပြောင်းပေးအပ်ပြီးဖြစ်ကြောင်း သိရပါတယ်။

ကာကွယ်ရေးဦးစီးချုပ်ရုံး(ကြည်း)နှင့် မြန်မာနိုင်ငံစောင့်ကြည့်လေ့လာရေးနှင့် အစီရင်ခံတင်ပြရေး လုပ်ငန်းအဖွဲတို့၏ အစီအစဉ်ဖြင့် တပ်မတော်သို့ဝင်ရောက်စဉ် အသက် ၁၈ နှစ် မပြည့်သေးသူများကို သက်ဆိုင်ရာတိုင်းစစ်ဌာနချုပ်အလိုက်စိစစ်၍ စစ်မှုထမ်းခြင်းမှနုတ်ထွက်ခွင့် ပြုလျက်ရှိတယ်လို့ ဆိုပါတယ်။

နုတ်ထွက်ခွင့်ရရှိသူများနှင့် မိဘ/အုပ်ထိန်းသူများကို မြန်မာနိုင်ငံ စောင့်ကြည့်လေ့လာရေးနှင့် အစီရင်ခံတင်ပြရေး လုပ်ငန်းအဖွဲ့နှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနတို့မှစီစဉ်သော ကြားကာလပြုစုစောင့်ရှောက်ရေးစခန်းသို့ ပို့ဆောင်ပေးတယ်လို့ ဆိုပါတယ်။

ထိုစခန်းတွင် မိဘများနှင့် အဆက်အသွယ်မရရှိသေးပါက ဆက်သွယ်ဆောင်ရွက်ပေးခြင်း၊ ကျန်းမာရေးဆေးဝါးကုသရန် လိုအပ်မှုရှိ/မရှိစစ်ဆေး၍ လိုအပ်က ဆေးဝါးကုသမှုခံယူစေခြင်း၊ ကျောင်းပြန်တက်ရန် ဆန္ဒရှိပါကကျောင်းပြန်တက်ရန်၊ အလုပ်လုပ်ကိုင်ရန်ဆန္ဒရှိပါက မျှတသောအလုပ်အကိုင်ရရှိနိုင်ရန်၊ လိုအပ်သည့် ကျွမ်းကျင်မှုများ သင်ယူရန်၊ ဖြစ်နိုင်ခြေများဆန်းစစ်ခြင်းနှင့် လက်ငင်းအသုံးပြုရန် အခြေခံပစ္စည်းများ ဝေငှခြင်း၊ အိမ်အပြန်ခရီးစရိတ်နှင့် စားစရိတ်များ စီစဉ်ပေးခြင်းများ ဆောင်ရွက်ပေးမှာ ဖြစ်ကြောင်းသိရပါတယ်။

ymg-mnn
#Yangon_Media_Group

#WorldArchitect
Published 13 May 2022

စိတ်ကူးဉာဏ်နှံနှံစပ်စပ်နဲ့ ဇာတ်ကားရသမျိုးစုံကို တင်ဆက်ပေးခဲ့တဲ့ ဂျာမန်ဒါရိုက်တာ’ဝင်မ်ဝမ်းဒါးစ်’က တိုကျိုမှ အများသုံးသန့်စင်ခန်းတွေကိုကြည့်ပြီး အကြံဉာဏ်ရရှိသွားပါတယ်။

#Yangon_Media_Group

Published 13 May 2022

အာရပ်စော်ဘွားများပြည်ထောင်စု(ယူအေအီး)ရဲ့ သမ္မတ ရှိတ်ခါလီဖာဘင်ဇာယတ်အယ်လ်နာယန် ကွယ်လွန်သွားပြီလို့ သမ္မတရေးရာ ဝန်ကြီးဌာနက မေလ(၁၃)ရက်သောကြာနေ့က ကြေညာပါတယ်။ သူဟာ အာဘူဒါဘီစော်ဘွားလည်းဖြစ်ပါတယ်။

“ သမ္မတရေးရာဝန်ကြီးဌာနဟာ ယူအေအီးပြည်သူတွေ၊အာရပ်နှင့် အစ္စလမ်မစ်နိုင်ငံတွေနှင်ကမ္ဘာကြီးကို သမ္မတ ရှိခါလီဖာဘင်ဇာယတ်အယ််နာယန် သောကြာနေ့က ကွယ်လွန်ကြောင်း ပူဆွေးကြေကွဲစွာကြေညာပါတယ်” လို့ နိုင်ငံပိုင်မီဒီယာကနေကြေညာခဲ့ပါတယ်။အသေးစိတ်တော့ ထုတ်ပြန်ကြေညာခြင်းမပြုပါဘူး။

ဖွဲ့စည်းပုံအခြေခံဥပဒေအရ ဒုတိယသမ္မတနှင့်ဝန်ကြီးချုပ် ရှိမိုဟာမက်ဘင်ရာရှစ်အယ်လ်မက်တွမ်ဟာ ယာယီသမ္မတအဖြစ် ဖက်ဒရယ်ကောင်းစီက နောက်သမ္မတရွေးချယ်ပေးတဲ့အထိ ထမ်းဆောင်ရမှာဖြစ်ပါတယ်။ ဖက်ဒရယ်ကောင်စီဟာ စော်ဘွား (၁၇)ဦးပါ အဖွဲ့ဖြစ်ပပြီး ရက်ပေါင်း၃၀အတွင်းတွေ့ဆုံရမှာပါ။

၂၀၁၄ခုနှစ်မှာ လေဖြတ်ပြီးကတည်းက ၁၉၄၉မှာမွေးဖွားခဲ့တဲ့ ခါလီဖာဟာလူမြင်ကွင်းကိုသိပ်မထွက်တော့ပါဘူး။ သူ့ရဲ့ ညီအစ်ကိုဝမ်းကွဲဖြစ်တဲ့ အမ်ဘီဇက်လို့သိကြတဲ့ အာဘူဒါဘီအိမ်ရှေ့မင်းသား မိုဟာမက်ဘင်ဇာယက်ဟာ လက်တွေ့ အုပ်ချုပ်နေသူဖြစ်လာခဲ့ပါတယ်။

ယူအေအီးဟာ ဝမ်းနည်းဘွယ်နေ့ပေါင်း ၄၀ သတမှတ်ထားပြီး သောကြာနေ့ကစလို့ အလံကိုတိုင်တစ်ဝက် လျှော့ချလွှင့်ထူလိုက် ပါတယ်။ အစိုးရနှင့်ပုဂ္ဂလိကလုပ်ငန်းတွေကို သုံးရက်ရပ်ဆိုင်းထားတယ်လို့ ဝန်ကြီးဌာနက ပြောပါတယ်။

အာဘူဒါဘီရဲ့အချမ်းသာဆုံးစော်ဘွားအဖြစ် ခါလီဖာဟာ ၂၀၀၄ခုနှစ်က အာဏာစတင်ရခဲ့ပြီး နိုင်ငံခေါင်းဆောင် ဖြစ်လာပါတယ်။ သူ့အရိုက်အရာကို အိမ်ရှေ့မင်းသား ရှိတ်မိုဟာမ်ကက ဆက်ခံဖွယ်ရှိနေပါတယ်။

ခါလီရဲ့ဖခင် ကွယ်လွန်သူ ရှိတ်ဇာဘတ်ဘင်ဆူလ်တန်အယ်လ်နာယန်ဟာ ၁၉၇၁ ခုနှစ်မှာယူအေအီးကို ဖက်ဒရယ်နိုင်ငံ အဖြစ် တည်ထောင်ခဲ့ပါတယ်။ အဲဒီကစပြီး ပင်လယ်ကွေ့နိုင်ငံရဲ့ ကြွယ်ဝချမ်းသာမှုကို အများဆုံးရယူထားတဲ့ အာဘူဒါဘီဟာ သမ္မတနေရာရယူထားခဲ့တာဖြစ်ပါတယ်။

Source Reuters

#LocalNews
Published_13 May 2022

အခု မေလထဲမှာ ကျင်းပဖို့ ရှိနေတဲ့ တိုင်းရင်းသားလက်နက်ကိုင်အဖွဲ့တွေနဲ့ နစကတို့ရဲ့ တွေ့ဆုံဆွေးနွေးပွဲမှာ တက်ရောက်မယ့် တိုင်းရင်းသားလက်နက်ကိုင်တွေအနေနဲ့ တစ်ဖွဲ့ချင်း တင်ပြစရာတွေလည်း ရှိမယ်ဆိုပေမယ့် တစ်နိုင်ငံလုံးနဲ့ ပတ်သက်တဲ့ ဆွေးနွေးစရာအကြောင်းအရာတွေကတော့ ရည်မှန်းချက်တူကြမှာ ဖြစ်တယ်လို့ ငြိမ်းချမ်းရေးဦးဆောင်အဖွဲ့ (PPST) ရဲ့ အဖွဲ့ဝင်လည်းဖြစ်၊ ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ရဲ့ နာယကလည်း ဖြစ်တဲ့ ဗိုလ်မှူးကြီးခွန်ဥက္ကာက ပြောပါတယ်။

#Yangon_Media_Group

#LocalNews
Published - 13 May 2022

မန္တလေးမြို့တွင် အုပ်စုဖွဲ့လုယက်သူများကြောင့် မြို့နေဒေသခံများ အနေနဲ့ စိုးရိမ်နေရတယ်
လို့ သိရပါတယ်၊၊

#Yangon_Media_Group

#LocalNews
Published -13 May 2022

မေလ(၁၄)ရက်၊ ကဆုန်လပြည့်နေ့မှာ ရန်ကုန်တိုင်းဒေသကြီး ၊တိုက်ကြီးမြို့နယ်ရှိ ပန်းတစ်ပွင့်တောင်တော်မြတ်ကြီးမှာ ကန်တော်မင်္ဂလာနဂါးရုံဘုရားထီးတော်တင်တာ၊ အမျိုးခေါ်အိုးပေါ်စေတီတော်အတွက် ပန္နက်ရိုက်အုတ်မြစ်ချမင်္ဂလာတွေ ကျင်းပပြုလုပ်သွားမှာ ဖြစ်တယ်လို့ ပန်းတစ်ပွင့်တောင်ဆရာတော်ထံမှ သိရပါတယ်၊၊

#Yangon_Media_Group

#LocalNews
Published - 13 May 2022

ခိုးကိုးရာမဲ့နေသည့် အသက်(၁၇)နှစ်အရွယ် မိခင်ဖြစ်သူနှင့် (၃)လအရွယ် ကလေးငယ်ကို မြဆည်းဆာဂေဟာမှ ရာသက်ပန်တာဝန်ယူစောင့်ရှောက်သွားမှာဖြစ်တယ်လို့ သိရပါတယ်။

"သနားစရာလဲကောင်း ဆိုးလှတဲ့ဘဝနဲ့အနာဂတ်မဲ့နေတဲ့ (၃)လရွယ် ကလေးတင်မက (၁၇)နှစ်အရွယ်မိခင်ဖြစ်သူကိုပါ မြဆည်းဆာမှ စောင့်ရှောက်လိုက်တာပါ။ ပထမတော့ ကလေးကိုပဲ တာဝန်ယူမွေးစားမလိုပါပဲ။ ဒါပေမဲ့ မိခင်နဲ့ကလေး ဖြစ်သူတို့ရဲ့ အကြောင်းရင်းကို သိရပြီးနောက် မြဆည်းဆာဆရာတော်ရဲ့ လမ်းညွှန်မှုကိုခံယူပြီး အသက် (၁၇)နှစ်အရွယ် မိခင်ဖြစ်သူကိုပါ မြဆည်းဆာမှ တာဝန်ယူစောင့်ရှောက်ပေးလိုက်ပါပြီ။ မိခင်နဲ့ ကလေးလဲ မခွဲရတော့သလို သူတို့ သားအမိနှစ်ဦးလုံးရဲ့ ဘဝတခုလုံးလဲ လုံခြုံစိတ်ချသွားရတာပေါ့"လို့ မော်လမြိုင်မြို့ခံ ပရဟိတသမားတစ်ဦးဖြစ်သူ ကိုဇင်မိုးက သူ၏လူမှုကွန်ရက်ပေါ်မှာ ရေးသားခဲ့တာပါ။

မြဆည်းဆာဆရာတော်ရဲ့ လမ်းညွှန်မှုနဲ့ မိခင်နဲ့ကလေးကို သူတို့ကိုစောင့်ရှောက်ပေးထားတဲ့ သူနဲ့အတူ နေအိမ်မှာ ခေါ်တွေ့ဆုံမေးမြန်းပြီး အခြေအနေအရ အကောင်းဆုံးလမ်းဖြစ်တဲ့ မိခင်ကိုရော ကလေးကိုပါ တာဝန်ယူစောင့်ရှောက်ပေးလိုက်တာဖြစ်တယ်လို့ ၄င်းက ပြောပါတယ်။

အဆိုပါ ကလေးမိခင်အမျိုးသမီး၏ အစ်မဟာ ၄င်းတို့ကို တနယ်တကျေးကို ခေါ်လာပြီ တောင်းရမ်းစားခိုင်းပြီး ခေါင်းပုံဖြတ်ရာမှ (၁၆)နှစ်အရွယ် ကိုယ်ဝန်အရင့်အမာနဲ့ ယင်းမိန်းကလေးက လိုက်တောင်းစားရင်း စျေးကြိုကားဝင်းမှာ မူးပြီးလဲ ငိုကြွေးနေစဉ် မုဒုံမြို့မှာနေတဲ့ ဂရုဏာရှင် ညီလေးတစ်ဦးနဲ့တွေ့ပြီး သနားပြီးကယ်တင် နောက်ဆုံးကလေးခွဲမွေးပြီးတဲ့ထိ ငွေကြေးထောက်ပံ့ကူညီခဲ့ပြီးနောက် ယခုအခါ မြဆည်းဆာဂေဟာမှ ခေါ်ယူစောင့်ရှောက်ခဲ့ခြင်းဖြစ်ပါတယ်။

" ပြောရရင် မွေးစားရိတ်ရဖို့ ထောက်ပံ့သမျှငွေကြေးတွေကိုလည်း သူ့အစ်မဖြစ်သူက လာလာ သိမ်းတယ်။ နောက်ဆုံး ကလေးမွေးပြီးတဲ့အခါလဲ မွေးပြီး (၁၃)ရက်နဲ့တင် လာခြိမ်းခြောက်ပြီး အဲဒီမွေးခါစ ကလေးနဲ့ လိုက်တောင်းခိုင်းတယ်တဲ့။ ကလေးရော အမေပါ နေလောင်ပြီး အရွယ်နဲ့ မမျှအောင် လောကဓံကို ခံရတယ်။ နေလောင်ပြီး မဲသည်းနေတာပဲ။ ကလေးကမွေးတုန်းက ဖြူဖြူဖွေးဖွေးတတုံးတခဲ။ နောက်ဆုံး (၁၇)နှစ်အရွယ် မိခင်ဖြစ်သူက ဘယ်လိုမှဒဏ်မခံနိုင်တဲ့အဆုံး ကလေးကိုခေါ် သူ့ကိုကူညီခဲ့ဖူးတဲ့သူကို ဆက်သွယ်အကူအညီတောင်းပြီး ထွက်ပြေးတယ်။ သူ့ကိုကလေးမွေးဖို့ အစအဆုံးကူညီခဲ့တဲ့ သူဆီကိုရောက်တော့ ကလေးရဲ့အနာဂတ်အတွက် မြဆည်းဆာဆရာတော်ထံ ဆက်သွယ်မိပြီး အကူအညီတောင်းခံလာရတာပါ။"လို့ ကိုဇင်မိုး က ဆက်လက်ပြောပြခဲ့ပါတယ်။

အဆိုပါ မြဆည်းဆာ ဘိုးဘွားရိပ်သာနှင့်မိဘမဲ့ဂေဟာ မုရောင်းကျေးရွာ မော်လမြိုင်မြို့မှာ တည်ရှိတဲ့ ဂေဟာတစ်ခုဖြစ်တယ်လို့လည်း သိရပါတယ်။

Photo - Zin Moe

ymg/kg
#Yangon_Media_Group

#LocalNews
Published - 13 May 2022

၂၀၂၂ ခုနှစ်၊ မေလ (၁၃)ရက်နေ့၊ မြန်မာစံတော်ချိန် မွန်းလွဲ(၁)နာရီကျော်တွင် မြစ်ကြီးနားမြေငလျင်စခန်းမှ အနောက်တောင်ဘက် (၂၅)မိုင် ခန့်အကွာ၊ မြန်မာနိုင်ငံပြည်တွင်း (‌ကချင် ပြည်နယ်၊ မိုးကောင်းမြို့၏ အရှေ့မြောက်ဘက် (၁၂) မိုင်ခန့်အကွာ)၊ မြောက်လတ္တီတွဒ် (၂၅.၃၅)ဒီဂရီ၊ အရှေ့လောင်ဂျီတွဒ် (၉၇.၁၁)ဒီဂရီ၊ အနက်(၁၀)ကီလိုမီတာကို ဗဟိုပြုပြီး အင်အားရစ်(ခ်)တာစကေး (၄.၁)အဆင့်ရှိ အင်အားအနည်းငယ်ရှိသော မြေငလျင်တစ်ခုလှုပ်ရှားသွားကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၊ မြေငလျင်ဌာနခွဲမှ သိရပါသည်၊၊

ymg/tthl
#Yangon_Media_Group

#LocalNews
Published - 13 May 2022

စစ်ကိုင်း တောင်ရိုးရှိ ကျွန်းလှဗုဒ္ဓတက္ကသိုလ်နှင့် အိန္ဒိယနိုင်ငံ ပန်ချာပီတက္ကသိုလ်နှစ်ခုတို့ကြား နာလည်မှုစာချွန်လွှာ လက်မှတ်ရေးထိုးမှုကို ပြီးခဲ့တဲ့ရက်ပိုင်းအတွင်းက အိန္ဒိယနိုင်ငံမှာ ပြုလုပ်ခဲ့တယ်လို့သိရပါတယ်။

အဆိုပါ နားလည်မှုစာချွန်လွှာတွင် ကျောင်းသား/သူများ၊ ဆရာ/ဆရာမများ ဖလှယ်ခြင်း၊ ပညာ ရေးဆိုင်ရာအစီအစဉ်များ ဖွံ့ဖြိုးတိုးတက်ရေးနှင့် ပီပြင်စွာ ပူးပေါင်းဆောင်ရွက်ရေး၊ အခြားအကျိုးရှိမည့် အစီအစဉ်များ ဖွံ့ဖြိုးတိုးတက်အောင်စီစဉ်ဆောင်ရွက်ခြင်း၊ ပူးတွဲညီလာခံနှင့် အလုပ်ရုံဆွေးနွေးပွဲများ ကျင်းပခြင်း၊ ပညာရေးဆိုင်ရာ အချက်အလက်များဖလှယ်ခြင်း စသည့်အချက်အလက်များပါဝင်တယ်လို့ IBEC သတင်းထုတ်ပြန်ရေးအဖွဲ့က ထုတ်ပြန်ထားပါတယ်။

အဆိုပါ တက္ကသိုလ်ဟာ အိန္ဒိယနိုင်ငံ ပန်ဂျပ်မြို့၊ Patiala တွင် တည်ရှိသော တက္ကသိုလ်တစ်ခုဖြစ်ပါတယ်။

PUP ကို ၁၉၆၂ ခုနှစ်၊ ဧပြီလ ၃၀ ရက်နေ့တွင် စတင်တည်ထောင်ခဲ့ပြီး ဟီဘရူးတက္ကသိုလ်ပြီးနောက် အစ္စရေးဘာသာစကားဖြင့်အမည်ပေးသည့် ကမ္ဘာပေါ်တွင် ဒုတိယမြောက် တက္ကသိုလ်ဖြစ်တယ်လို့ သိရပါတယ်။

IBEC ဆရာတော်နှင့်အဖွဲ့သည် ကျွန်းလှဗုဒ္ဓတက္ကသိုလ် (KBU)နှင့် အိန္ဒိယနိုင်ငံ ပန်ချာပီ တက္ကသိုလ် ၊ နီပေါနိုင်ငံ၊ လုမ္ဗိနီဗုဒ္ဓတက္ကသိုလ်တို့ နားလည်မှုစာချွန်လွှာလက်မှတ်ရေးထိုးရန် စစ်ကိုင်းမှ ရန်ကုန်သို့ မေလ ၅ ရက်နေ့က စတင်ထွက်ခွာသွားခဲ့တာဖြစ်ပါတယ်။

ခရီးစဉ်အတွင်း IBEC ဆရာတော်နှင့် နိုင်ငံတကာပညာရေးပူးပေါင်းဆောင်ရွက်ရေးအဖွဲ့ ဖြစ်တဲ့ Kyunhla Buddhist University ကိုယ်စားလှယ်အဖွဲ့တို့သည် သံဝေဇနိယလေးဌာနသို့ သွားရောက်လေ့လာခဲ့တယ်လို့လည်း သိရပါတယ်။

ဓါတ်ပုံ - IBEC သတင်းထုတ်ပြန်ရေးအဖွဲ့

ymg/kg
#Yangon_Media_Group

#LocalNews
Published_13 May 2022

နိုင်ငံတကာလေကြောင်းလိုင်း ပျံသန်းမှုလုပ်ငန်းများ ပြန်လည်အသက်ဝင်လာပြီးနောက် ခရီးသွား e-Visa လျှောက်ထားခြင်း လုပ်ငန်းစဉ်များကို မေလ ၁၅ ရက်မှ စတင်၍ ခွင့်ပြုတော့မည်ဖြစ်ကြောင်း လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက သိရသည်။

မေလ ၁၂ ရက်ကလည်း လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ နိုင်ငံခြားရေးဝန်ကြီးဌာန၊ စီမံကိန်းနှင့်ဘဏ္ဍာရေးဝန်ကြီးဌာန၊ ဟိုတယ်နှင့် ခရီးသွားလာရေးလုပ်ငန်းဝန်ကြီးဌာန၊ ကျန်းမာရေးဝန်ကြီးဌာန၊ ပို့ဆောင်ရေးဝန်ကြီးဌာန၊ မြန်မာ့အာမခံလုပ်ငန်းနှင့် e-Visa စနစ်ကို ပူးပေါင်းဆောင်ရွက်နေသည့် Myanmar Easenet ကုမ္ပဏီတို့မှ တာဝန်ရှိသူတိုက Online e-Visa စနစ်ဖြင့် Tourist Visa (ကမ္ဘာလှည့်ဗီဇာ) ပြန်လည်ခွင့်ပြုထုတ်ပေးနိုင်ရေး ညှိနှိုင်းအစည်းအဝေးကို ပြုလုပ်ခဲ့ကြသေးသည်။

Online e-Visa စနစ်ဖြင့် e-Visa (ကမ္ဘာလှည့်)ကို နိုင်ငံပေါင်း ၁၀၀၊ e-Visa (လုပ်ငန်း)ကို နိုင်ငံပေါင်း ၅၅ နိုင်ငံ ခွင့်ပြုဆောင်ရွက်နေရာမှ ကိုဗစ်-၁၉ ရောဂါ အခြေအနေကြောင့် ၂၀၂၀ ပြည့်နှစ် မတ်လ ၂၃ ရက်မှစ၍ ယာယီရပ်ဆိုင်း ထားခဲ့ရာ ယခုအခါ ကိုဗစ်-၁၉ ရောဂါဖြစ်ပွားမှု သိသိသာသာ လျော့နည်းကျဆင်းလာမှုကြောင့် e-Visa ဖြင့် (Business) လုပ်ငန်းဗီဇာကို ဧပြီလ ၁ ရက်မှ ပြန်လည်ခွင့်ပြုပေးခဲ့ပြီးနောက် ဧပြီလ ၁၇ ရက်မှစ၍လည်း ရန်ကုန်အပြည်ပြည်ဆိုင်ရာလေဆိပ်မှ နိုင်ငံတကာလေကြောင်းလိုင်းများကို ပြန်လည်ဝင်ထွက်ပျံသန်းခွင့်ပြုခဲ့ရာ e-Visa (Business) ဖြင့် လျှောက်ထားဝင်ရောက်လာမှုများ ရှိခဲ့ကြောင်း သိရသည်။

ယင်းကြောင့် e-Visa (Tourist) ကမ္ဘာလှည့်ဗီဇာကို ခွင့်ပြုချက်အရ ခွင့်ပြုဆောင်ရွက်ရန်ရှိရာ နိုင်ငံအတွင်း ဝင်ရောက်လာမည့် နိုင်ငံခြားသားများကို အဆင်ပြေစေရေးအတွက် e-Visa (ကမ္ဘာလှည့်)ဖြင့် ဝင်ရောက်လာမည့် နိုင်ငံခြားသားများ ခွင့်ပြုချက် လျှောက်ထားရာတွင် အချက်အလက် ပြည့်စုံမှန်ကန်စေရေးကိစ္စများကို ထပ်မံလုပ်ဆောင်နေကြောင်း သိရသည်။

ထိုင်းနိုင်ငံဆိုင်ရာ မြန်မာသံရုံးက ထုတ်ပြန်ထားရာ၌ e-Visa( Tourist) ခရီးသွားပြည်ဝင်ဗီဇာများ ကို မေလ ၁၅ ရက်မှစ၍ https://evisa.moip.gov.mm တွင် ဝင်ရောက်လျှောက်ထားနိုင်ပြီဖြစ်ကြောင်း ပါရှိသည်။

ymg/mt
#Yangon_Media_Group

#DailyNews
Published - 13 May 2022

၁။ ကဆုန်လပြည့်နေ့တွင် ပန်းတစ်ပွင့်တောင်၌ ဘုရားထီးတင်ခြင်း၊ စေတီတော်ပန္နက်ရိုက်ခြင်းနှင့် ညောင်ရေသွန်းလောင်းပူဇော်ခြင်းများ ကျင်းပပြုလုပ်မည်။

၂။ မန္တလေးမြို့တွင် သံအုပ်စုဖွဲ့လုယက်သူများကြောင့် မြို့နေဒေသခံများ စိုးရိမ်နေရ။

၃။ နေ့စဉ်မိုးလေဝသသတင်း။

၄။ တိုကျိုမှ ခေတ်မီသန့်စင်ခန်းများအကြောင်း ဂျာမန်ဒါရိုက်တာကြီးတစ်ဦးက ဇာတ်ကားရိုက်ကူးသွားမည် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group