Published 13 July 2022

အမေရိကန်နိုင်ငံရဲ့ ကုလသမဂ္ဂသံအမတ်ကြီးဟောင်းနှင့် အိမ်ဖြူတော် အမျိုးသားလုံခြုံရေးအကြံပေးလုပ်ခဲ့သူ ဂျွန်ဘော်လ်တွန်က နိုင်ငံခြားတိုင်းပြည်တွေမှာ အာဏာသိမ်းမှုတွေကြိုးစားတဲ့ အစီအစဉ်တွေမှာ သူပါဝင်ကူညီခဲ့ဖူးတယ်လို့ အင်္ဂါနေ့က ဝန်ခံ ပြောကြားလိုက်ပါတယ်။

အမေရိကန်ကက်ပီတယ်တိုက်ခိုက်မှု ၂၀၂၁ ဇန်နဝါရီ ၆ ရက်ကိစ္စ ကွန်ဂရက်ကြားနာမှုအပြီး နောက်တစ်ရက်မှာ ဘော်လ်တွန်က စီအင်န်အင်နရုပ်သံကို ပြောကြားလိုက်တာ ဖြစ်ပါတယ်။၂၀၂၀ ရွေးကောက်ပွဲရှုံးပြီးနောက် အာဏာဆက်တည်မြဲအောင် အဲဒီအကြမ်းဖက်မှုကို သမ္မတဟောင်း ဒေါ်နယ်ထရမ့်က လှုံ့ဆော်ခဲ့တယ်လို့အင်္ဂါနေ့က ခုံအဖွဲ့ဝင် ဥပဒေပြုအမတ်တွေက စွပ်စွဲခဲ့ပါတယ်။

စီအင်န်အင်န်ရဲ့ အစီအစဉ်တင်ဆက်သူ ဂျိတ်တက်ပါနှင့် ပြောဆိုရာမှာ အသေအချာစီစဉ်ထားတဲ့ အာဏာသိမ်းမှုတစ်ခုကို ဆွဲထုတ်ယူဖို့လောက်အထိ ထရမ့်မှာ အရည်အချင်းမရှိပါဘူးလို့ ဘော်လ်တွန်က ပြောခဲ့ပါတယ်။

“ အာဏာသိမ်းတာကို ကူညီသူတစ်ဦးဟာ ဒီမှာမဟုတ်ဘူး..ဒါပေမယ့် အခြားနေရာတွေမှာ ခင်ဗျားသိပါတယ်။ အလုပ်တွေ အတော်များတာ။ ထရမ်လုပ်သလိုမျိုးလုပ်ရတာမဟုတ်ဘူး” လို့သူကပြောပါတယ်။

အာဏာသိမ်းကြိုးစားမှုတွေဆိုတာ ဘာကိုရည်ညွှန်းတာလဲလို့ တက်ပါက ဘော်လ်တွန်ကိုမေးတဲ့အခါ သူက..

“ အသေးစိတ်တော့မပြောဘူးဗျာ” လို့ ဘော်တွန်က ဗင်နီဇွဲလားကို ညွှန်းဆိုမှုမပြုခင် ပြောပါတယ်။ အဲဒီနောက်

“ အဲဒါက အောင်မြင်မှုမရခဲ့ဘူး။ ကျွန်တော်တို့ အများကြီးလုပ်ခဲ့တာမဟုတ်ဘူး။ ဒါပေမယ့် ကျွန်တော်တို့ အတိုက်အခံတွေကို ကြိုးစားခိုင်းတာ။ တရားမဝင်ရွေးကောက်ထားတဲ့သမ္မတတစ်ဦးကို လှန်ပစ်ဖို့ ဒါပေမယ့် မအောင်မြင်ခဲ့ဘူး” လို့ သူကပြောပါတယ်။

၂၀၁၉ခုနှစ်မှာ ဗင်နီဇွဲလား ဆိုရှယ်လစ်သမ္မတ နီကိုးလတ်စ် မာဒူရိုကို ဖြုတ်ချပစ်ဖို့ အတိုက်အခံခေါင်းဆောင် ဂျုအန်ဂူအိုင်ဒိုက စစ်တပ်ရဲ့ ကျောထောက်နောက်ခံရအောင်ကြိုးစားခဲ့တာတွေ ကို ဘော်လ်တွန်ဟာ အမျိုးသားလုံခြုံရေးအကြံပေးတစ်ဦးအဖြစ်  လူသိရှင်ကြား ထောက်ခံအားပေးခဲ့တာပါ။ မာဒူရို ပြန်ရွေးချယ်ခံရတာဟာ တရားမဝင်ဘူးလို့ ဘော်လ်တွန်က ငြင်းခုန်ခဲ့တာပါ။ ဒါပေမယ့် မာဒူရိုဟာ အာဏာဆက်ပြီး ကောင်းကောင်းထိန်းထားဆဲ ဖြစ်ပါတယ်။

“ဗင်နီဇွဲလားအပြင် အခြားအရာတွေလည်း ရှိသေးတာကို ခင်ဗျားမပြောသေးဘူးလို့ ကျွန်တော်ခံစားနေရတယ်” လို့ စီအင်အင်န် အစီအစဉ်တင်ဆက်သူကမေးတဲ့အခါ သူက “ ရှိခဲ့တာ သေချာတာပေါ့ဗျာ” လို့ ပြန်ပြောခဲ့ပါတယ်။

အခြားနိုင်ငံတွေအပေါ် ဝင်ရောက်စွက်ဖက်ခဲ့တဲ့ ဝါရှင်တန်ရဲ့ သမိုင်းကြောင်းကို နိုင်ငံခြားရေးရာမူဝါဒကျွမ်းကျင်ပညာရှင် တော်တော်များများက နှစ်ပေါင်းများစွာ ဝေဖန်လာခဲ့ကြတာဖြစ်ပါတယ်။အဲဒီအထဲမှာ  အီရန်ရဲ့ အမျိုးသားရေးဝန်ကြီးချုပ် မိုဟာမက် မိုဆာဒက်ကို ဖြတ်ချခဲ့တဲ့ ၁၉၅၃ ဖြစ်ရပ်နှင့် ဗီယက်နမ်စစ်ပွဲမှာ အမေရိကန်ပါဝင်ခဲ့တဲ့ အခန်းကဏ္ဍနှင့် အီရတ်နှင့် အာဖဂန်နစ္စတန်ကို ကျူးကျော်ခဲ့တာတွေပါဝင်ပါတယ်။

ဒါပေမယ့် နိုင်ငံခြားတိုင်းပြည်တွေ မငြိမ်မသက်ဖြစ်အောင် အမေရိကန်က ပါဝင်ဆောင်ရွက်ခဲ့တာတွေကို အမေရိကန် အရာရှိတွေက ထုတ်ဖော်ပြောကြားတာမျိုးဟာ   သိပ်ပြီးဖြစ်လေ့ဖြစ်ထမရှိတဲ့ကိစ္စဖြစ်ပါတယ်။

“ အမေရိကန်အစိုးရရဲ့ အဆင့်အမြင့်ဆုံးရာထူးတွေနှင့် ကုလသံအမတ်ကြီးအဖြစ် တာဝန် ထမ်းဆောင်ခဲ့တဲ့ ဂျွန်ဘော်လ်တွန်က အခြားနိုင်ငံတွေမှာ အာဏာသိမ်းအစီအစဉ်တွေကို သူကူညီခဲ့တယ်လို့ ခပ်ကြွားကြွားလေးပြောတာဖြစ်တယ်” လို့ ကင်ညာက ဘီဘီစီသတင်းထောက် ဒစ်ကင်းအိုလီဝီက တွစ်တာမှာရေးခဲ့ပါတယ်။

Source Reuters

#John_Bolton

#Washington_help_attempted_coup

#US_Politics

#Local_News
Published - 13 July 2022

လာမည့်ပြောင်းရာသီချိန်တွင် တရုတ်နိုင်ငံအကောက်ခွန် အထွေထွေအုပ်ချုပ်မှု အာဏာပိုင်အဖွဲ့(GACC) တွင် မှတ်ပုံတင်ထားသည့် ပြောင်းများကို နယ်စပ်ဒေသမှတစ်ဆင့် တရုတ်နိုင်ငံသို့ စတင်တင်ပို့သွားမည်ဖြစ်ကြောင်း မြန်မာနိုင်ငံ ပဲမျိုးစုံ၊ ပြောင်းနှင့် နှမ်းကုန်သည်များအသင်းမှ သိရသည်။

"အဲဒါတော့ဟုတ်တယ်။ တရုတ်နိုင်ငံ GACC နဲ့ စိုက်ပျိုးရေးဦးစီးဌာနတို့ မတ်လမှာ လက်မှတ်ထိုးပြီးသွားပြီ။ အခုတင်ပို့မဲ့ ကုမ္ပဏီတွေကို စီစစ်ပြီးတော့ တရုတ်ပြည်ကို မှတ်ပုံတင်ဖို့ပို့ထားတယ်။ မှတ်ပုံတင်ကျပြီဆိုတာနဲ့ တင်ပို့လို့ရပြီ။ တခြားနိုင်ငံတွေကိုလည်းပို့တယ်။ တရုတ်ကျတော့ GACC နှစ်နိုင်ငံလက်မှတ်မရှိရင် ပိုခွင့်မရှိဘူး။ အခုကျတော့ လက်မှတ်ထိုးပြီးပြီဆိုတော့ ပို့လို့ရပြီ"ဟုမြန်မာနိုင်ငံ ပဲမျိုးစုံ၊ ပြောင်းနှင့် နှမ်းကုန်သည်များအသင်းမှ ဥက္ကဌ ဦးထွန်းလွင်က YMG ကို ပြောသည်။

လက်ရှိ မြန်မာ့ပြောင်းများကို ထိုင်းနိုင်ငံအပါအဝင် အခြားနိုင်ငံများသို့ တင်ပို့လျက်ရှိပြီး လာမည့်ပြောင်းရာသီမှ စတင်ကာ တရုတ်နိုင်ငံသို့ GACC မှတ်ပုံတင်ကာ တင်ပို့မည်ဖြစ်ကြောင်း သိရသည်။

ပြောင်းအများဆုံး စိုက်ပျိုးသည့် ဒေသဖြစ်သော ရှမ်းပြည်နယ်မှ ပြောင်းများကို တင်ပို့သွားမည်ဖြစ်ကြောင်း၊ ရှမ်းပြည်နယ်မှ ပြောင်းများသည် အောက်တိုဘာလတွင် ထွက်ရှိမည်ဖြစ်ပြီး GACC မှတ်ပုံတင်ကာ တရုတ်နိုင်ငံသို့ တင်ပို့ခွင့်ရပါက တောင်သူများအတွက် အကျိုးရှိစေနိုင်မည်ဖြစ်ကြောင်း သိရသည်။

မြန်မာ့ပြောင်းများကို နယ်စပ်ဒေသမှတဆင့် ထိုင်းနိုင်ငံသို့နှစ်စဉ် ဖေဖော်ဝါရီလမှ သြဂုတ်လအတွင်း အခွန်သက်သာခွင့်ဖြင့် တင်ပို့နေပြီး လာမည့် ပြောင်းရာသီတွင် တရုတ်နိုင်ငံသို့ပါ တင်ပို့နိုင်မည်ဖြစ်သည့်အတွက် ပြည်ပဈေးကွက်ပိုမိုရရှိလာမည်ဖြစ်ကြောင်း သိရသည်။

ymg/sth
#Yangon_Media_Group

#WorldPolitics
Published 13 July 2022

သီရိလင်္ကာနိုင်ငံသမ္မတ'ဂိုတာဘာယာရာဂျာပက်ဆာ'ဟာ သမ္မတရာထူးမှ မဆင်းခင်နာရီပိုင်းအလိုမှာပဲ မော်လ်ဒိုက်နိုင်ငံသို ဗုဒ္ဓဟူးနေ့က ထွက်ပြေးသွားခဲ့ကြောင်း ရိုက်တာသတင်းဌာနက သိရှိခဲ့ရပါတယ်။

သီရိလင်္ကာနိုင်ငံအတွင်း စီးပွားရေးကျပ်တည်းမှုများကို အစိုးရအဖွဲ့က ကိုင်တွယ်ဖြေရှင်းနိုင်ခြင်းမရှိတာကြောင့် အကြီးအကျယ်ဆန္ဒပြမှုများဖြစ်ပွားခဲ့ပြီး သမ္မတနဲ့အဖွဲ့ကို ရာထူးမှနှုတ်ထွက်ဖို့ ဖိအားပေးခဲ့ကြပါတယ်။

'ရာဂျာပက်ဆာ'နဲ့သူ့ဇနီးအပြင် သက်တော်စောင့် ၂ ဦးတို့ဟာ သီရိလင်္ကာလေတပ်လေယာဉ်ဖြင့် ထွက်ခွာသွားခဲ့ကြောင်း လူဝင်မှုကြီးကြပ်ရေးအရာရှိတစ်ဦးက ပြောပြပါတယ်။

သမ္မတက မော်လ်ဒိုက်မြို့တော်မာလီမှာရှိကြောင်း၊ အဲဒီကနေတဆင့် နောက်ထပ်အာရှနိုင်ငံတစ်ခုကို ဆက်လက်သွားရောက်ဖွယ်ရှိကြောင်း 'ရာဂျာပက်ဆာ'နဲ့နီးစပ်တဲ့ အစိုးရအရာရှိတစ်ဦးက ထုတ်ဖော်ခဲ့ပါတယ်။

လက်ရှိသမ္မတတစ်ဦးကို နိုင်ငံကထွက်ခွာဖို့ ဥပဒေအရ မတားဆီးနိုင်ဘူးလို့ အာဏာပိုင်များက ပြောကြားခဲ့ကြောင်း လူဝင်မှုကြီးကြပ်ရေးအရာရှိက ဆိုပါတယ်။

ဆန္ဒပြသူထောင်ပေါင်းများစွာက သမ္မတနေအိမ်နဲ့ ဝန်ကြီးချုပ်နေအိမ်တို့ကို စနေနေ့က ဝင်စီးခဲ့ကြပြီး ရာထူးမှနှုတ်ထွက်ဖို့တောင်းဆိုခဲ့ကြရာ အစိုးရညီညွတ်ရေးအတွက် 'ရာဂျာပက်ဆာ'က ဗုဒ္ဓဟူးနေ့မှာရာထူးကဆင်းပေးရမှာဖြစ်ပါတယ်။

သောကြာနေ့ကတည်းက သမ္မတကိုမြင်တွေ့ရခြင်းလည်း မရှိတော့ပါဘူး။

သီရိလင်္ကာပါလီမန်မှ ပြောရေးဆိုခွင့်ရှိသူ'မာဟင်ဒါယာပါအဘေးဝါဒီနာ'က သမ္မတဆီက ဆက်သွယ်မှုမရသေးဘူးလို့ ဆိုပါတယ်။

'ရာဂျာပက်ဆာ'က ဗုဒ္ဓဟူးနေ့နှောင်းပိုင်းမှာ နှုတ်ထွက်စာပေးပို့လာလိမ့်မယ်လို သမ္မတနဲ့နီးစပ်တဲ့သတင်းအရင်းအမြစ်များမှ သိရပါတယ်။

ဝန်ကြီးချုပ်'ရာနီလ်ဝစ်ခ်ရမ်ဆင်ဂီ'ကိုလည်း ရာထူးနှုတ်ထွက်ဖို့ ဖိအားပေးထားကြပြီး သူသာနှုတ်ထွက်မယ်ဆိုရင် အခြေခံဖွဲ့စည်းပုံအရ နောက်ထပ်သမ္မတအသစ် မရွေးချယ်ခင်အချိန်အထိ ပါလီမန်ပြောရေးဆိုခွင့်ရှိသူက ယာယီသမ္မတအဖြစ် အုပ်ချုပ်ရမှာဖြစ်ပါတယ်။

ပါလီမန်က သောကြာနေ့မှာ ပြန်လည်ကျင်းပမှာဖြစ်ပြီး နောက် ၅ ရက်နေရင် သမ္မတအသစ်ကို မဲပေးရွေးချယ်သွားမယ်လို့ 'အဘေးဝါဒီနာ'ကဆိုပါတယ်။

ဝန်ကြီးချုပ်ဟောင်း'မာဟင်ဒါရာဂျာပက်ဆာ'အပါအဝင် 'ရာဂျာပက်ဆာ'မိသားစုမျိုးနွယ်ဟာ လူဦးရေ ၂၂ သန်းရှိတဲ့ သီရိလင်္ကာနိုင်ငံကို လက်ဝါးကြီးအုပ်စိုးထားခဲ့ပြီး နိုင်ငံသားတွေက လက်ရှိဖြစ်ပျက်နေတဲ့ပြဿနာတွေအတွက် သူတို့ကိုအပြစ်တင်နေကြပါတယ်။

ဧည့်ခရီးသွားလုပ်ငန်းကို မှီခိုနေရတဲ့သီရိလင်္ကာစီးပွားရေးဟာ ကိုဗစ်ကပ်ရောဂါကြောင့် အကြီးအကျယ်ထိခိုက်ပျက်စီးခဲ့ရတဲ့အပြင် ဓာတုမြေဩဇာများပိတ်ပင်ခြင်းက လယ်ယာထွက်ကုန်များကိုထိခိုက်စေကာ နိုင်ငံရပ်ခြားမှ သီရိလင်္ကာလုပ်ငန်းရှင်တွေဆီကလည်း ငွေလွှဲပို့ခြင်းများ ကျဆင်းလာခဲ့ပါတယ်။

နောက်ပိုင်းမှာတော့ ဓာတုမြေဩဇာပိတ်ပင်ခြင်းကို ပြန်လည်ခွင့်ပြုခဲ့ပါတယ်။
'ရာဂျာပက်ဆာ'တို့က ၂၀၁၉ ခုနှစ်မှာ ပြည်သူများအကြိုက် အခွန်ဖြတ်တောက်မှုကို အကောင်အထည်ဖော်ခဲ့ရာ အစိုးရဘဏ္ဍာရေးစနစ်ကိုထိခိုက်စေပြီး နိုင်ငံခြားအရန်ငွေထားရှိမှုလျော့ပါးလာကာ ပြည်ပမှ လောင်စာဆီ၊ အစားအစာနဲ့ ဆေးဝါးတင်သွင်းမှုများ လျှော့ချခဲ့ပါတယ်။

စက်သုံးဆီခွဲတမ်းရရှိမှု အလွန်ဆိုးရွားတဲ့အခြေအနေရောက်ရှိခဲ့ပြီး မီးဖိုဂတ်စ်အရောင်းဆိုင်တွေရှေ့မှာ လူပေါင်းများစွာ တန်းစီစောင့်ဆိုင်းနေကြရပါတယ်။

ပြီးခဲ့တဲ့လက ငွေကြေးဖောင်းပွမှု ၅၄.၆ ရာခိုင်နှုန်းမြင့်တက်ခဲ့ကာ နောင်လာမယ့်လတွေမှာ ၇၀ ရာခိုင်နှုန်းလောက်အထိရှိလာနိုင်ကြောင်း ဗဟိုဘဏ်ကသတိပေးထားပါတယ်။

Source: Reuters
#Yangon_Media_Group

#Health_Science
Published 13 July 2022

ကမ္ဘာ့ပထမဆုံးကိုယ်ဝန်သည် အီဂျစ်မံမီဟာ ရှားပါးကင်ဆာရောဂါနဲ့ သေဆုံးခဲ့တာဖြစ်ကြောင်း လေ့လာချက်အသစ်မှာ တွေ့ရှိခဲ့ပါတယ်။

ပိုလန်မှသုတေသီများက အရိုးမှာပုံမှန်မဟုတ်တဲ့ အမှတ်အသားများတွေ့ရှိပြီး အလောင်းရဲ့ဦးခေါင်းကို ဓာတ်မှန်ရိုက်ခဲ့ပါတယ်။

ထို့နောက် နှာခေါင်းလည်ချောင်းကင်ဆာခံစားရတဲ့ လူနာများကဲ့သို့ ထိုမံမီဟာလည်း ဒီရောဂါနဲ့သေဆုံးခဲ့တာဖြစ်မယ်လို့ ကောက်ချက်ချခဲ့ကြပါတယ်။

ထိုကင်ဆာမျိုးက နှာခေါင်းအနောက်ဘက်နဲ့ ပါးစပ်အနောက်ဘက်တို့ကိုဆက်ထားတဲ့ လည်ချောင်းနေရာမှာတွေ့ရတဲ့ ရှားပါးကင်ဆာမျိုးဖြစ်ပါတယ်။

ထိုအမျိုးသမီးဟာ ကိုယ်ဝန်ဆောင်ကာလ ၂၈ ပတ်အချိန်မှာ သေဆုံးခဲ့တာကိုသိရှိကြပြီး အခုတော့ သေဆုံးရတဲ့အကြောင်းအရင်းကိုပါ သိရှိခဲ့ကြပါပြီ။

ဦးခေါင်းခွံက ထိခိုက်ဒဏ်ရာတွေဟာ အကျိတ်နဲ့ ဦးခေါင်းခွံအရိုးတို့ကြောင့်ဖြစ်ပြီး မံမီအလောင်းစီမံခြင်းကြောင့်မဟုတ်ကြောင်း ဝါဆောမံမီလုပ်ငန်းအဖွဲ့(WMP)က ရုပ်ပုံများပြသခဲ့ပါတယ်။

အခုဆိုရင် သိပ္ပံပညာရှင်တွေက တစ်ရှူးနမူနာအသားစများရယူပြီး အခြားအီဂျစ်မံမီတွေရဲ့ ကင်ဆာနမူနာအသားစများနဲ့ နှိုင်းယှဉ်ကြည့်ဖို့စီစဉ်နေကြပါတယ်။

ကင်ဆာရဲ့မော်လီကျူး အမှတ်အသားများကိုကြည့်ပြီး ကင်ဆာဆင့်ကဲပြောင်းလဲလာပုံကို လေ့လာကာ ခေတ်မီကုသနည်းများထုတ်လုပ်နိုင်ဖို့ မျှော်မှန်းထားပါတယ်။

ဒါ့အပြင် နှာခေါင်းလည်ချောင်းကင်ဆာက ဗိုင်းရပ်စ်ရောဂါကူးစက်ခြင်းလား မျိုးရိုးဗီဇရောဂါလားဆိုတာကို သိရဖို့လည်း ဆုံးဖြတ်ပေးနိုင်မှာဖြစ်ပါတယ်။

ထိုမံမီအလောင်းကို အီဂျစ်အထက်ပိုင်းသီဘက်စ်ရှိ တော်ဝင်မျိုးနွယ်အုတ်ဂူမှာ တွေ့ရှိခဲ့တာဖြစ်ပါတယ်။

ကလီယိုပက်ထရာဘုရင်မခေတ် ပထမရာစုဘီစီအချိန်လောက်ကဖြစ်ဟန်ရှိပြီး ၁၈၀၀ ခုနှစ်အစောပိုင်းမှာတွေ့ရှိခဲ့တာ ဖြစ်နိုင်ပါတယ်။

ထိုအလောင်းကို ပိုလန်နိုင်ငံဝါဆောမြို့သို့ ၁၈၂၆ မှာယူဆောင်လာပြီး လက်ရှိမှာတော့ ဝါဆောအမျိုးသားပြတိုက်မှာ ထားရှိပါတယ်။

ပြီးခဲ့တဲ့နှစ်က အလောင်းစစ်ဆေးမှုပြုလုပ်ခဲ့ရာ ထိုအမျိုးသမီးဟာ သေဆုံးချိန်မှာ အသက် ၂၀ မှ ၃၀ နှစ်ကြားရှိပြီး ကိုယ်ဝန်ဆောင်ကာလ ၂၆ ပတ်မှ ၃၀ ပတ်ကြားရှိနေနိုင်ပါတယ်။

သူ့ရဲ့သန္ဓေသားလောင်းက တင်ပါးရိုးကြားမှာရှိပြီး အမေနဲ့အတူ မံမီစီရင်ထားခြင်းခံခဲ့ရပါတယ်။

အမေနဲ့အတူ ငရဲပြည်ကိုသွားပြီးမှ ကလေးက တမလွန်ဘဝရောက်ရှိနိုင်မယ်လို ရှေးအယူအဆတွေရှိခဲ့တဲ့ပုံပါပဲ။

မံမီရုပ်မှာ ကင်ဆာရောဂါတွေ့ရတာဟာ ဒါပထမဆုံးအကြိမ်မဟုတ်ပါဘူး။

၂၀၁၇ ခုနှစ်တုန်းက ရှေးဟောင်းမံမီအလောင်း ၂ လောင်းမှာ ကမ္ဘာ့သက်တမ်းအရင့်ဆုံးလို့ သိထားတဲ့ ရင်သားကင်ဆာနဲ့ ရိုးတွင်းခြင်ဆီကင်ဆာတို့ တွေ့ရှိခဲ့ပါတယ်။

Source: DailyMail
#Yangon_Media_Group

#Local_News
Published _ 13 July 2022

မြန်မာ့ရိုးရာ အထည်အလိပ်များကို ပြည်တွင်း ပြည်ပ၌ ဈေးကွက်ချဲ့ထွင်နိုင်စေရန် ရက်ကန်းပညာရှင်များနှင့် ဒီဇိုင်းတီထွင်သူများ ပူးပေါင်းဆောင်ရွက်လျက်ရှိကြောင်း သိရသည်။

ပြည်တွင်းက ထွက်ရှိသော မြန်မာ့ရိုးရာအထည်အလိပ်များထက် ပြည်ပမှဝင်လာသော အထည်အလိပ်များက ဈေးကွက်များတွင် ပိုမိုနေရာယူထားခြင်းကြောင့် မြန်မာ့ရိုးရာအထည်အလိပ်များ ထုတ်လုပ်သော ရက်ကန်းလုပ်ငန်းများအနေဖြင့် စိန်ခေါ်မှုများ ကြုံတွေ့နေရပြီး ပြည်တွင်း၌ ဈေးကွက်ချဲ့ထွင်နိုင်ရန် ကြိုးစားရုန်းကန်နေရကြောင်း သိရသည်။

လက်ရှိတွင် မြန်မာ့ရိုးရာ အထည်အလိပ်များ ထုတ်လုပ်သော ရက်ကန်းလုပ်ငန်းများသည် နိုင်ငံအတွင်းက ဝယ်လိုအားအပေါ်မူတည်၍၊ အထည် အလိပ် အရေအတွက်အများအပြား ရက်လုပ်ဖြန့်ချိရသော ပြည်တွင်း ဈေးကွက်နှင့် အရည်အသွေးကောင်းသော ထုတ်ကုန်များ ဖန်တီးရက်လုပ်ကာ တင်ပိုရသော နိုင်ငံခြားဈေးကွက်တိုအတွက် ဒီဇိုင်းဆန်းသော အထည်အလိပ်များ တိုးမြှင့်ထုတ်လုပ်နိုင်စေရန် ကြိုးပမ်းဆောင်ရွက်လျက်ရှိသည်။

မြန်မာ့ရိုးရာ ရက်ကန်းလုပ်ငန်းများမှ ထွက်ရှိသော အထည်အလိပ်များနှင့် အဝတ်အထည်များကို ပြည်တွင်း၊ ပြည်ပဈေးကွက် နှစ်ခုလုံး၌ တိုးချဲ့နိုင်စေရေးအတွက် စိတ်ဝင်စားဖွယ်ရာ လှပသောဒီဇိုင်းဆန်းများ ဖန်တီးထုတ်လုပ်နိုင်ရုံသာမက ဈေးနှုန်းသင့်တင့်မျှတရန်လည်း လိုအပ်ကြောင်းနှင့် ယင်းကဲ့သို့ ထုတ်လုပ်နိုင်ပါက ဝယ်လိုအားများမြင့် တက်လာပြီး ပြည်တွင်း၊ ပြည်ပဈေးကွက်များမှနေ၍ ကုန်အမှာများ တိုးမြှင့်လာနိုင်သည့်အပြင် နောက်ပိုင်းတွင် ထူးခြားသော ဒီဇိုင်းပုံစံများအတွက် သီးသန့်ကုန်အမှာများလည်းမှာယူလာနိုင်ကြောင်း မြန်မာ့ရိုးရာ ရက်ကန်းလုပ်ငန်းရှင်များက သုံးသပ်ကြသည်။

ယခုအခါ မြန်မာ့ရိုးရာ ချည်ထည်၊ ဂျပ်ခုတ်ထည်များကို ပိုမိုဒီဇိုင်းဆန်းသစ်စွာ ထုတ်လုပ်လာနိုင်စေရန် မြန်မာ့ရိုးရာထည် ဖက်ရှင်ဒီဇိုင်းသင်တန်းကို ဆောင်းဒါးရက်ကန်းနှင့် အသက်မွေးပညာသိပ္ပံတွင် တိုးချဲ့ဖွင့်လှစ်သွားရန် စီစဉ်နေကြောင်း သိရသည်။

ymg/NN
#Yangon_Media_Group

#Local_News
Published - 13 July 2022

ကိုဗစ်- ၁၉ ကာကွယ်ဆေးထိုးထားသော်လည်း မျိုးပြောင်းသဘာဝအရ ကူးစက်မှုရှိနိုင်ပြီး ရောဂါအခံရှိသူများ လုံးဝ Mask မချွတ်သင့်ကြောင်း ကျန်းမာရေးဝန်ကြီးဌာနမှ ဒေါက်တာသန်းနိုင်စိုးက ပြောသည်။

"ရောဂါအခံရှိတဲ့သူတွေအနေနဲ့ Mask ကိုမချွတ်သင့်ဘူး။ အထူးသဖြင့် လေဝင်လေထွက်မကောင်းတဲ့နေရာတွေ၊ ဈေး၊ ဆေးရုံ၊ ဆေးခန်း၊ ဈေးဝယ်စင်တာနေရာမျိုးတွေကို သွားမယ်ဆိုရင် Mask ကိုမချွတ်သင့်ဘူး။ ကာကွယ်ဆေးထိုးထားတယ်။ ပြင်းပြင်းထန်ထန်မဖြစ်နိုင်ဘူးလို့ သတ်မှတ်လိုမရဘူး။ ရောဂါခံပိုးတွေ ဆိုးလာမယ်။ သွေးကြောင့်မဟုတ်ရင်တောင် ပိုးကြောင့်မူလရောဂါအခံတွေ ပိုဆိုးလာနိုင်တယ်။ သေဆုံးမှုမဖြစ်နိုင်ဘူးလို့ပြောဖို့ခက်တယ်"ဟုယင်းကပြောသည်။

မြန်မာနိုင်ငံ၌ ဇူလိုင်လ ၁၁ ရက်ညပိုင်း၌ အိုမီခရွန် BA.4 ၊ BA.5 ၅ ဦးစစ်ဆေးတွေ့ရှိခဲ့ပြီး ဇူလိုင် ၁၂ ရက်တွင် ၉ ဦးထပ်မံတွေ့ရှိခဲ့ကြောင်း ထုတ်ပြန်ထားသည့်စာရင်းများအရ သိရသည်။

အိုမီခရွန် မျိုးရိုးဗီဇပြောင်းရောဂါပိုးများသည် ကိုဗစ်-၁၉ ရောဂါကာကွယ်ဆေး အကြိမ်ပြည့်ထိုးနှံပြီးသူများတွင် ရောဂါလက္ခဏာပြင်းထန်မှုနှင့်သေဆုံးမှုလျော့နည်းကြောင်း၊ ယင်းအပြင် ပြည်တွင်းကူးစက်မှုမရှိသော်လည်း ပြည်ပမှ ပြန်လည်ဝင်ရောက်လာသည့်သူများတွင် အများဆုံးတွေ့ရပြီး ကယ်ဆယ်ရေးလေယာဉ်ဖြင့် ပြန်လာသည့်သူများ၌ ပိုးတွေ့ရှိမှုရာခိုင်နှုန်းများကြောင်း သိရသည်။

ymg/sth
#Yangon_Media_Group

#WorldHealth
Published 13 July 2022

ပန်းဂေါ်ဖီကဲ့သို့ ဟင်းသီးဟင်းရွက်တွေဟာ ပဋိဇီဝပိုးသတ်ဆေးယဉ်ပါးခြင်းကိုဖြစ်စေတဲ့ ဘက်တီးရီးယားတွေကို ချေဖျက်ပေးနိုင်ဖွယ်ရှိကြောင်း ဘီယာရှီဘာရှိ ဘန်ဂူရီယန်တက္ကသိုလ်(BGU)မှ သုတေသီများက ရှာဖွေတွေ့ရှိခဲ့ပါတယ်။

ဘက်တီးရီးယားမျိုးစုံက ပဋိဇီဝဆေးယဉ်ပါးလာရတဲ့အကြောင်းအရင်းဟာ သူတို့ကို သုတ်သင်ခြင်းမှကာကွယ်ပေးမယ့် ဘက်တီးရီးယားအလွှာလေးကို ထုတ်လုပ်တာကြောင့်ဖြစ်ပါတယ်။

ဆေးဝါးထုတ်လုပ်ရေးကုမ္ပဏီတွေက ပဋိဇီဝဆေးအသစ်တွေထုတ်လုပ်ဖို့ ရည်ရွယ်ချက်နည်းပါးလာတာကြောင့်လည်း ပါဝင်ပါတယ်။

BGU အဖွဲ့က သုတေသနပြုလုပ်ရာမှာ အပင်ဓာတုပစ္စည်းတစ်မျိုးဖြစ်တဲ့ DIM က ဘတ်တီးရီးယားပိုးနှစ်မျိုးကို ကာကွယ်ပေးနေတဲ့ ဘက်တီးရီးယားအလွှာတွေကို အောင်မြင်စွာချေဖျက်နိုင်ခဲ့ပါတယ်။

Acinetobacter baumannii ဘက်တီးရီးယားကို ၆၅ ရာခိုင်နှုန်းနဲ့ Pseudomonas aeruginosa ဘက်တီးရီးယားကို ၇၀ ရာခိုင်နှုန်းချေဖျက်နိုင်ခဲ့ပြီး ပဋိဇီဝပိုးသတ်ဆေးနဲ့ပေါင်းစပ်လိုက်ရာမှာတော့ ၉၄ ရာခိုင်နှုန်းအထိချေဖျက်နိုင်ခဲ့ပါတယ်။

DIM ကို ပိုးဝင်နေတဲ့ဒဏ်ရာထဲထည့်လိုက်တဲ့အခါ သိသိသာသာ လျင်မြန်စွာဒဏ်ရာသက်သာလာခဲ့ပါတယ်။

ပဋိဇီဝပိုးသတ်ဆေးယဉ်ပါးတဲ့ ဘက်တီးရီးယားပိုးတွေဟာ လူနာတွေမှာ နေမကောင်းဖြစ်စေပြီး ဒဏ်ရာသက်သာရာမှာ အဟန့်အတားဖြစ်စေပါတယ်။

ပဋိဇီဝပိုးသတ်ဆေးယဉ်ပါးခြင်းကို ချေဖျက်နိုင်မယ့်နည်းပညာရှေ့ဆက်ထုတ်လုပ်ခြင်းနဲ့ စီးပွားဖြစ်လုပ်ကိုင်ခြင်းကို LifeMatters ကုမ္ပဏီကနေ လက်ရှိမှာတာဝန်ယူဆောင်ရွက်နေပါတယ်။

ထိုကုမ္ပဏီဟာ အဆုတ်လမ်းကြောင်းပြွန်ပိတ်ဆိုခြင်းလူနာတွေနဲ့ အခြားလူနာတွေမှာဖြစ်တတ်တဲ့ ပဋိဇီဝပိုးသတ်ဆေးယဉ်ပါးခြင်းကိုတိုက်ဖျက်ဖို့ နည်းလမ်းအသစ်များထုတ်လုပ်လျက်ရှိပါတယ်။

ထိုရောဂါက အဆုတ်များ၊ အစာချေစနစ်နဲ့ အခြားအစိတ်အပိုင်းတွေမှာ ပြင်းထန်စွာထိခိုက်စေပြီး အချွဲ၊ ချွေး၊ အစာချေအရည်များထုတ်လုပ်ပေးတဲ့ဆဲလ်တွေကို ထိခိုက်စေပါတယ်။

ထိုအရည်တွေက ပုံမှန်အားဖြင့် ပါးလွှာပြီးချောကျိကျိဂုဏ်သတ္တိရှိပါတယ်။
ဒါပေမဲ့ လူနာရှင်တွေမှာတော့ အရည်တွေကထူထဲစေးကပ်လာကာ အဆုတ်နဲ့ပန်ကရိယတိုရှိ ပြွန်တွေနဲ့လမ်းကြောင်းတွေမှာ ထိုအရည်များပိတ်ဆို့လာပါတယ်။

P. aeruginosa ဘက်တီးရီးယားအလွှာကိုဖယ်ရှားပြီး ကိုယ်ခံအားစနစ်ကနေ ရောဂါကူးစက်မှုကိုသုတ်သင်ကာ လူနာတွေရဲ့အသက်ကို ပိုမိုဆွဲဆန့်ပေးနိုင်ပါတယ်။

အခြားပဋိဇီဝပိုးသတ်ဆေးအမျိုးအစားတွေမှာလည်း သုတေသနတွေ့ရှိမှုတွေက အကျုံးဝင်ကြောင်း ပရော်ဖက်ဆာ'ကုရှ်မာရို'က ပြောကြားခဲ့ပါတယ်။

Source: The Jerusalem Post.
#Yangon_Media_Group

Published 12 July 2022

ကိုဗစ် ကူးစက်မှုတွေ အသစ်တစ်ဖန်လှိုင်းတွေပြန်ထလာခြင်းဟာ ကပ်ရောဂါဘေးဟာ ပြီးဆုံးဖို့ နီးကပ်စရာ မရှိသေးဘူးလို့ ပြသနေတယ်လို့ ကမ္ဘာ့ကျန်းမာရေးအဖွဲ့ အကြီးအကဲ တက်ဒရော့စ်အက်ဒန်နွမ် ဂီဘရီယက်ဆပ် ကပြောလိုက်ပါတယ်။  ဗိုင်းရပ်စ်ဟာ လွတ်လွတ်လပ်လပ်ကြီး ပြေးလွှားနေတုန်းပဲလို့ သူက သတိပေးလိုက်ပါတယ်။

Source: AFP

#Covid_Fresh_waves

#Covid_Virus_Freely_running

#Covid_19_WHO

Published 12 July 2022

ရုရှားဖက်ဒရေးရှင်းနိုင်ငံ၊ မော်စကိုမြို့၊ ကာလုဂါပြည်နယ်၊ ETHNOMIR ကမ္ဘာ့ ယဉ်ကျေးမှုမြို့တော်ရှိ ရွှေစည်းခုံပုံတူစေတီတော်ကြီး  ရတနာစိန်ဖူးတော်၊ ငှက်မြတ် နားတော် တင်လှူပူဇော်ပွဲနှင့် ဗုဒ္ဓါဘိသေကအနေကဇာတင် မဟာမင်္ဂလာ အခမ်း အနားကို သာသနာတော်နှစ် ၂၅၆၆ ခုနှစ်၊ ကောဇာသက္ကရာဇ် ၁၃၈၄ ခုနှစ်၊ ဝါဆို လပြည့်နေ့ဖြစ်သည့် ယနေ့နံနက်ပိုင်းတွင် ကျင်းပပြုလုပ်ခဲ့ပါတယ်။

မဟာမင်္ဂလာ အခမ်းအနားသို့ သီတဂူကမ္ဘာ့ဗုဒ္ဓ တက္ကသိုလ်များ၏ အဓိပတိအဘိဓဇမဟာရဋ္ဌဂုရု၊ အဘိဓဇအဂ္ဂမဟာသဒ္ဓမ္မ ဇောတိက၊ မဟာဓမ္မ ကထိက ဗဟုဇနဟိတဓရ၊ ရွှေကျင်နိကာယ ဥက္ကဋ္ဌ ရွှေကျင်သာသနာပိုင် သီတဂူဆရာတော်ဘုရားကြီး ဒေါက်တာ ဘဒ္ဒန္တဉာဏိဿရ၊ နိုင်ငံတော် သံဃမဟာ နာယကအဖွဲ့ ဒုတိယဥက္ကဋ္ဌ ကျောက်မဲဆရာတော် ဒေါက်တာ ဘဒ္ဒန္တ စန္ဒနဿရ၊ တိပိဋက ဆရာတော် ဘဒ္ဒန္တ သီလက္ခန္ဓာဘိဝံသ နှင့် အပြည်ပြည်ဆိုင်ရာ ထေရဝါဒဗုဒ္ဓ သာသနာပြုတက္ကသိုလ် ပါမောက္ခချုပ် အဂ္ဂမဟာပဏ္ဍိတ အဂ္ဂမဟာသဒ္ဓမ္မဇောတိကဓဇ၊ မဟာဓမ္မကထိက ဗဟုဇနဟိတဓရ၊ မဟာဂန္ထဝါစကပဏ္ဍိတ ဒေါက်တာ ဘဒ္ဒန္တ ဆေကိန္ဒ (ဓမ္မဒူတ ဆရာတော်)တို့ အမှူးပြု သည့် ဆရာတော်၊ သံဃာတော်အရှင်သူမြတ်များ၊ ရုရှားဖက်ဒရေးရှင်းနိုင်ငံမှ Orthodox ဘုန်းတော်ကြီး၊ လားမားဘုန်းတော်ကြီးများ ကြွရောက်ချီးမြှင့်တော်မူကြပါတယ်။

အဆိုပါ အခမ်းအနားသို့ နစကဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်၊ ဇနီးဒေါ်ကြူကြူလှ၊ ရုရှားဖက်ဒရေးရှင်း နိုင်ငံ၊ အထက်လွှတ်တော်ဒုတိယဥက္ကဋ္ဌ Konstantin Losifovich Kosachev၊ ရုရှား ကာကွယ်ရေး ဝန်ကြီးဌာနမှ ဒုတိယဝန်ကြီး Colonel General Alexander Vasilievich  Fomin(အလက်ဇန်းဒါး ဗာစီးလီယယ်ဗစ် ဖိုမင်)၊ ရုရှား ဖက်ဒရေးရှင်းနိုင်ငံ အစိုးရအဖွဲ့အစည်းနှင့် ကာကွယ်ရေးဝန်ကြီးဌာနမှ တာဝန်ရှိသူများ၊ စစ်ဘက်၊ နယ်ဘက်မှ တာဝန်ရှိသူများ၊   မြန်မာ့တပ်မတော်မှ ပညာတော်သင် သင်တန်းသား အရာရှိများ၊ ရုရှား-မြန်မာချစ်ကြည်ရင်းနှီးမှု ပူးပေါင်းဆောင်ရွက်ရေးအသင်းမှ ဧည့်သည်တော်များ၊ စစ်ဘက်နည်းပညာပူးပေါင်း ဆောင်ရွက်ရေးအဖွဲ့အစည်းမှ ဧည့်သည်တော်များ၊ မော်စကိုထေရဝါဒဗုဒ္ဓ အဖွဲ့အစည်းများ၊ ဘာသာရေးအဖွဲ့အစည်း များ၊ သံရုံးများမှ ဖိတ်ကြား ထားသည့် ဧည့်သည့်တော်များ၊  ဗုဒ္ဓဘာသာဝင် ရုရှား နိုင်ငံသားများ တက်ရောက်ကြခဲ့ကြပါတယ်။

အခမ်းအနားတွင်  ဥပါသကာများက ပရိတ်ပန်း၊ ပရိတ်ရေ၊ ပရိတ်ချည်၊ ပရိတ်သဲ များကို ယူဆောင်၍ စေတီတော် ပရိဝုဏ်တော်တွင် ပက်ဖျန်းကြဲဖြန့်ချည်နှောင် တားဆီးကာရံကြပါတယ်။

အဲဒီနောက် နစကဥက္ကဋ္ဌ နှင့်ဇနီးတို့က ရတနာစိန်ဖူးတော်၊ ငှက်မြတ်နားတော်နှင့်  လှူဖွယ်ပစ္စည်း များအား သီတဂူဆရာတော်ဘုရားကြီးထံ ဆက်ကပ်လှူဒါန်းကြပြီး အမွှေးနံ့သာရည်များ ပက်ဖျန်းပူဇော်ကြပါတယ်။

အဲဒီနောက် နစက ဥက္ကဋ္ဌနှင့်အဖွဲ့ဝင်တွေဟာ ရတနာစိန်ဖူးတော်၊ ငှက်မြတ်နားတော် တို့အား ပင့်ဆောင်၍ စေတီတော်ကြီးအား လက်ယာရစ် လှည့်လည်ပင့်ဆောင် ပူဇော်ကြပါတယ်။

ယင်းနောက် မင်္ဂလာအချိန်တွင် ရတနာစိန်ဖူးတော်၊ ငှက်မြတ်နားတော်တို့အား  စေတီတော်အထွတ်သို့ ပင့်ဆောင်တပ်ဆင်ပူဇော်၍ ပရိတ် နံ့သာရည် များ ပက်ဖျန်းကြပြီး ရတနာစိန်ဖူးတော်၊ ငှက်မြတ်နားတော် တင်လှူပူဇော် အောင်မြင်ခြင်း အထိမ်းအမှတ် ရတနာ ရွှေမိုး၊ ငွေမိုးများ ရွာသွန်းဖြိုးကြသည်။

ဆက်လက်ပြီး သံဃာတော်အရှင်သူမြတ်များက ရွှေစည်းခုံပုံတူစေတီတော်ကြီး အား ဗုဒ္ဓါဘိသေက အနေကဇာတင်၍ ဗုဒ္ဓါဘိသိတ်သွန်းတော်မူကြပြီး သီတဂူ ဆရာတော်ဘုရားကြီးက ရုရှားဖက်ဒရေးရှင်းနိုင်ငံ၊ မော်စကို မြို့၊ ကာလုဂါပြည်နယ်၊ ETHNOMIR ကမ္ဘာ့ယဉ်ကျေးမှုမြို့တော်ရှိ ရွှေစည်းခုံပုံတူစေတီတော်ကြီး  ရတနာ စိန်ဖူးတော်၊ ငှက်မြတ်နားတော် တင်လှူပူဇော်ပွဲနှင့် ဗုဒ္ဓါ ဘိသေက အနေကဇာတင် မဟာမင်္ဂလာအခမ်းအနား အောင်မြင်စွာ ပြီးမြောက်ခြင်းအဖြစ် ဝမ်းမြောက် ဩဝါဒ စကားမြွက်ကြားခဲ့ပါတယ်။

ယနေ့ ရတနာစိန်ဖူးတော်၊ ငှက်မြတ်နားတော် တင်လှူပူဇော်ပြီးစီးသည့် ရွှေစည်းခုံ ပုံတူစေတီတော်မြတ်ကြီးသည် ရုရှား-မြန်မာ နှစ်နိုင်ငံချစ်ကြည်ရေးနှင့် ယဉ်ကျေးမှု ပူးပေါင်းဆောင်ရွက်မှု၏ သမိုင်းမှတ်တိုင်တစ်ခုဖြစ်သည့်အတွက် သက်ဆိုင်ရာ တာဝန်ရှိသူများအနေဖြင့် စေတီတော်မြတ်ကြီး နှစ်ပေါင်း ရှည်ကြာ အဓွန့်ရှည် တည်တံ့ခိုင်မြဲရေးအတွက် ဝိုင်းဝန်းထိန်းသိမ်းဆောင်ရွက်ပေးကြရန် မေတ္တာ ရပ်ခံလိုပါကြောင်းဖြင့် လျှောက်ထားတင်ပြပါတယ်။

ယင်းနောက် လားမားဘုန်းတော်ကြီးနှင့် ရုရှားကာကွယ်ရေးဝန်ကြီးဌာန၊ ဒုတိယ ဝန်ကြီးတို့က ဝမ်းမြောက်စကားများ အသီးသီးပြောကြားခဲ့ကြကြောင်းသိရှိရပါတယ်။

#Russia_Myanmar_Ties

#Myanmar_Buddhism_Russia

Published 12 July 2022

Myanmar SAC Chairman and Commander-in-Chief of the Armed Forces, Senior General Min Aung Hlaing had a working meeting with Senior officials from Ministry of defense attending on behalf of the Russian Defense Minister Sergei Kuzhugetovich Shoiguat at MOD in Moscow on Monday.

The meeting was attended by SAC Chairman SG Min Aung Hlaing, Joint Secretary of the Council Lt-Gen Ye Win Oo, Commander-in-Chief (Air) General Tun Aung; Senior military officers from the Office of the Commander-in-Chief, U Lwin Oo, Myanmar Ambassador to Russia and Brigadier General Moe Kyaw of the Myanmar Military Attaché to Russiaand Senior officials from the Russian military.

During the meeting, the two sides exchanged views on ways to enhance existing friendship and military-technical cooperation between the two armed forces. The Myanmar military to continue in participating in defense capabilities competitions and exercises in Russia. The two sides also exchanged views on the current political situation in Myanmar and the ongoing cooperation between the two governments and the two armed forces in various fields, according to MRTV, state broadcaster of Myanmar.

#Myanmar_Russia_Ties

#Yangon_Media_Group

#WorldArt
Published 12 July 2022

လစ်ဗျားနိုင်ငံ ထရီပိုလီမြို့ရဲ့ မြို့ဟောင်းမှာ လူငယ်လေးတွေဟာ ငွေချည်မျှင်ရွှေချည်မျှင်များဖြင့် ရိုးရာရတနာချည်ထည်များ ရက်လုပ်နေကြပြီး စစ်ပွဲဒဏ်နဲ့အာဏာရှင်စနစ်ကြောင့် ဆယ်စုနှစ်များတလျှောက် ပျောက်ဆုံးနေခဲ့တဲ့ အနုပညာလက်ရာကို ပြန်လည်ရှင်သန်လာအောင်ပြုလုပ်နေကြပါတယ်။

#Yangon_Media_Group

Published 12 July 2022

ရုရှားဖက်ဒရေးရှင်းနိုင်ငံသို့ ရောက်ရှိနေသည့် နစက ဥက္ကဋ္ဌ၊တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည်  ရုရှားဖက်ဒရေးရှင်းနိုင်ငံ၊ ကာကွယ်ရေးဝန်ကြီး Army General Sergey Kuzhugetovich Shoigu ကိုယ်စား ကာကွယ်ရေးဝန်ကြီးဌာနမှ အကြီးအကဲများနှင့် ဇူလိုင် ၁၁ ရက်မွန်းလွဲပိုင်းတွင် ရုရှားဖက်ဒရေးရှင်းနိုင်ငံ၊ ကာကွယ်ရေးဝန်ကြီးဌာန၊ ဧည့်ခန်းမဆောင်၌ အလုပ်သဘောတွေ့ဆုံဆွေးနွေးခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။

အဆိုပါ တွေ့ဆုံဆွေးနွေးပွဲသို့ နစက ဥက္ကဋ္ဌနှင့်အတူ ကောင်စီတွဲဖက်အတွင်းရေးမှူး ဒုတိယ ဗိုလ်ချုပ်ကြီး ရဲဝင်းဦး၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ထွန်းအောင်၊ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ ရုရှားနိုင်ငံဆိုင်ရာ မြန်မာနိုင်ငံ သံအမတ်ကြီး ဦးလွင်ဦးနှင့် မြန်မာစစ်သံ (ကြည်း၊ ရေ၊ လေ) ဗိုလ်မှူးချုပ် မိုးကျော် တို့ တက်ရောက်ကြပြီး ရုရှားဖက်ဒရေးရှင်းနိုင်ငံ၊ ကာကွယ်ရေးဝန်ကြီးမှ အကြီးအကဲများနှင့်အတူ ရုရှား တပ်မတော်မှ အရာရှိကြီးများ တက်ရောက်ခဲ့ကြတာဖြစ်ပါတယ်။

ထိုသို့တွေ့ဆုံရာတွင် နှစ်နိုင်ငံတပ်မတော်နှစ်ရပ်အကြား ရှိရင်းစွဲ ချစ်ကြည်ရင်းနှီးမှု နှင့် စစ်ဘက်နည်းပညာဆိုင်ရာ ပူးပေါင်းဆောင်ရွက်မှုများကို ပိုမိုတိုးမြှင့်ဆောင်ရွက်နိုင် မည့် အခြေအနေများ၊ ရုရှားနိုင်ငံတွင် ကျင်းပပြုလုပ်လျက်ရှိသည့် ကာကွယ်ရေးစွမ်းရည် တိုးမြှင့်ရေးဆိုင်ရာ ပြိုင်ပွဲများနှင့် လေ့ကျင့်ရေးဆောင်ရွက်မှုများတွင် မြန်မာ့တပ်မတော်မှ ပါဝင်ယှဉ်ပြိုင်ဆောင်ရွက်လျက်ရှိပြီး ဆက်လက်ပါဝင်ဆောင်ရွက်သွားမည့် အခြေအနေ များ၊ မြန်မာနိုင်ငံ၏ နိုင်ငံရေးဖြစ်ပေါ်ပြောင်းလဲမှု အခြေအနေများနှင့် နှစ်နိုင်ငံ အစိုးရနှင့် တပ်မတော်နှစ်ရပ်အကြား ကဏ္ဍပေါင်းစုံတွင် ဆက်လက်ပူးပေါင်းဆောင်ရွက်သွားမည့် အခြေအနေများအား ခင်မင်ရင်းနှီးစွာ အမြင်ချင်း ဖလှယ်ဆွေးနွေးခဲ့ကြတယ်လို့ သတင်းထုတ်ပြန်ချက်မှာ ဖော်ပြထားပါတယ်။

-ymg/mnn

#Yango_Media_Group