#WorldPolitics
Published 13 May 2022

ဖင်လန်နိုင်ငံမှ ခေါင်းဆောင်များက နေတိုး(NATO)အဖွဲ့သို့ ဝင်ရောက်ပူးပေါင်းရန် လျှောက်ထားသွားဖို့ ကြာသပတေးနေ့က ဖွင့်ဆိုလာကြပြီး ဆွီဒင်နိုင်ငံကလည်း အလားတူသဘောမျိုးဆောင် ရွက်သွားဖို့ ရှိနေပါတယ်။

ရုရှားသမ္မတ’ဗလာဒီမီယာပူတင်’ ယူကရိန်းကို ကျူးကျော်တာ ၂ လခွဲရှိလာတဲ့အချိန်မှာ ရုရှားအိမ်နီးချင်းတွေကလည်း ကျူးကျော်ခံရမှာကို စိုးရိမ်လာတာကြောင့် ဥရောပတိုက်မှာ နိုင်ငံရေးချိန်ခွင်လျှာ သမိုင်းဝင်အပြောင်းအလဲ ဖြစ်လာဖိုရှိနေပါပြီ။

ရုရှားအုပ်ချုပ်ရေးအခြေစိုက် ကရန်မ်လင်အိမ်‌‌‌တော်ကတော့ စစ်ရေးအချက်အခြာ ဆောင်ရွက်ချက်များဖြင့် တုန့်ပြန်သွားမယ်လို့ တန်ပြန်သတိပေးလိုက်ပါတယ်။

လက်ရှိယူကရိန်း-ရုရှားစစ်ပွဲမှာ ရုရှားတပ်တွေက ယူကရိန်းအလယ်ပိုင်း၊ မြောက်ပိုင်း၊ အရှေ့ပိုင်းတို့မှာ ဖိနှိပ်ချေမှုန်းလျက်ရှိပြီး ဒွန်ဘက်စ်စက်မှုဇုန်ဒေသကို သိမ်းယူတဲ့နေရာမှာ အချက်အခြာကျတဲ့ မာရီယူပိုလ်မြို့ကိုလည်း တိုက်ခိုက်ခဲ့ကြပါတယ်။

ယူကရိန်းတပ်တွေကတော့ အရှေ့မြောက်ဒေသများရှိ မြို့ရွာအချို့ကို ပြန်လည်သိမ်းယူနိုင်ခဲ့ပါတယ်။

ပဋိပက္ခ စတင်ချိန်ကစလို့ ရုရှားစစ်သားတစ်ယောက်ကို စစ်ရာဇဝတ်မှုဖြင့် ပထမဆုံးအကြိမ်အဖြစ် သောကြာနေ့ကျရင် မြို့တော်ကိဗ်မှာ ရုံးတင်စစ်ဆေးသွားဖို့စီစဉ်ထားပါတယ်။

ရုရှားတင့်ကားတပ်မှ အသက် ၂၁ နှစ်ရှိ စစ်သားတစ်ယောက်ကို ဖမ်းဆီးရမိခဲ့ပြီး စစ်ပွဲအစပိုင်းရက်သတ္တပတ်မှာ စက်ဘီးစီးလာတဲ့ အရပ်သားတစ်ဦးကို အသေပစ်သတ်ခဲ့ခြင်းကြောင့် စွပ်စွဲချက်တင်ခဲ့တာ ဖြစ်ပါတယ်။

ဖင်လန်နိုင်ငံသမ္မတနဲ့ ဝန်ကြီးချုပ်တို့က နေတိုးအဖွဲ့ထဲဝင်ရောက်ရန် ချက်ချင်းလျှောက်ထားဖို့ကြေညာခဲ့ပါတယ်။

ဆိုဗီယက်ပြည်ထောင်စုရန်ကို ကာကွယ်ဖို့အတွက် နေတိုးတပ်ဖွဲ့ကြီးကို စစ်ရေးအရဖွဲ့စည်းတည်ဆောက်ထားတာ ဖြစ်ပါတယ်။

နိုင်ငံ့ပါလီမန်လွှတ်တော်က အတည်ပြုဖို့ လိုသေးပေမယ့် သမ္မတရဲ့‌‌ကြေညာချက်က ဖင်လန်အနေနဲ့ လျှောက်တင်သွားဖို့သေချာနေပြီး အပြီးသတ်အောင်မြင်ဖို့ကတော့ လနဲ့ချီစောင့်ဆိုင်းရဦးမှာဖြစ်ပါတယ်။

အလားတူ ဆွီဒင်နိုင်ငံကလည်း နေတိုးတပ်ဖွဲ့ရဲ့ ကာကွယ်မှုအောက် ခိုလှုံလာဖွယ်ရှိနေပါတယ်။

နေတိုးအဖွဲ့က လက်ခံလိုက်မယ်ဆိုရင်တော့ ဒါဟာ ဥရောပလုံခြုံရေး ပထဝီနယ်နိမိတ်မှာ ပြောင်းလဲမှုကြီးတစ်ရပ် ဖြစ်ပေါ်လာမှာပါ။

ဘာကြောင့်လဲဆိုတော့ ဆွီဒင်နိုင်ငံက နှစ်ပေါင်း ၂၀၀ ကျော်တိုင်အောင် စစ်ရေးမဟာမိတ်ပူးပေါင်းခြင်းကို ရှောင်ဖယ်နေခဲ့သလို ဖင်လန်ကလည်း ဒုတိယကမ္ဘာစစ်မှာ ဆိုဗီယက်ကို ရှုံးနိမ့်ပြီးနောက် ကြားနေနိုင်ငံအဖြစ်သာ ရှိနေခဲ့ပါတယ်။

ယူကရိန်းကို တိုက်ခိုက်လာတဲ့ ရုရှားစစ်ကြောင်းအရ နောင်တစ်ချိန်မှာ တိုက်ခိုက်ခံလာရဖွယ်ရှိနေတဲ့ အဆိုပါ နှစ်နိုင်ငံဟာ စိုးရိမ်ထိတ်လန့်နေရပြီး အများပြည်သူတွေရဲ့ အမြင်ကလည်း နေတိုးအဖွဲ့ဝင်ဖြစ်လာဖို့ ဆန္ဒရှိနေကြပါတယ်။

ဥရောပမဟာမိတ်အဖွဲ့သာ အင်အားတိုးချဲ့လာမယ်ဆိုရင် ရုရှားအနေနဲ့ ဘော်လ်တိတ်ပင်လယ်နဲ့ အာတိတ်ပင်လယ်ဒေသတို့မှာ နေတိုးအဖွဲ့ဝင်နိုင်ငံတွေ ဝန်းရံခြင်းကို ခံလာရဖွယ်ရှိနေပါတယ်။

‘ပူတင်’က ဥရောပကိုပိုင်းခြားပြီး နေတိုးတပ်ဖွဲ့တွေ နောက်ပြန်ဆုတ်စေဖို့ ရည်ရွယ်ပြုလုပ်ခဲ့ပေမယ့် အခုတော့ဆန့်ကျင်ဘက် အခြေအနေဖြစ်လာနိုင်ဖွယ် ရှိပါတယ်။

နေတိုးအထွေထွေအတွင်းရေးမှူးချုပ်’ယန်းစ်စတိုလ်တန်ဘာ့ဂ်’က ဖင်လန်နဲ့ဆွီဒင်တို့ကို မဟာမိတ်အဖွဲ့ကနေ ကြိုဆိုကြောင်း ပြောကြားလိုက်ပါတယ်။

ရုရှားနိုင်ငံခြားရေးဝန်ကြီးက “နိုင်ငံတော်လုံခြုံရေးကို ခြိမ်းခြောက်လာမှုမှန်သမျှ စစ်ရေးအရရော အခြားအတိုင်းအတာများဖြင့်ပါ တုန့်ပြန်သွားရမှာပါ” လို့ သတိပေးလိုက်ပါတယ်။

Source: AP News
#Yangon_Media_Group

#Local_News
Published_ 13 May 2022

(၃၁) ကြိမ်မြောက် အရှေ့တောင်အာရှ အားကစားပြိုင်ပွဲ (ဆီးဂိမ်းစ်) ဘောလုံးပြိုင်ပွဲရဲ့ အမျိုးသား ယူ ၂၃ အုပ်စုပွဲစဉ်အဖြစ် အိမ်ရှင် ဗီယက်နမ်အသင်းနှင့် မြန်မာအသင်းတို့ ဒီနေ့ မေ ၁၃ ရက်၊ မြန်မာစံတော်ချိန် ညနေ ၆ နာရီခွဲမှာ ယှဉ်ပြိုင်ကစားကြမှာ ဖြစ်ပါတယ်။

မြန်မာအသင်းဟာ အုပ်စုပွဲ ၂ ပွဲကစားပြီးချိန်မှာ ၂ ပွဲစလုံး အနိုင်ရရှိထားကာ ရမှတ် ၆ မှတ်ဖြင့် အုပ်စုပထမနေရာမှာ ရပ်တည်နေပြီး အိမ်ရှင် ဗီယက်နမ်က ၂ ပွဲကစား ရမှတ် ၄ မှတ်နဲ့ အုပ်စု တတိယနေရာမှာ ရှိနေပါတယ်။

မြန်မာအသင်းအနေနဲ့ ဒီနေ့ကစားမယ့် အိမ်ရှင်ဗီယက်နမ်အသင်းကို အနိုင်ရရှိပါက ဆီမီးဖိုင်နယ်ကို တက်ရောက်နိုင်မှာ ဖြစ်ပါတယ်။

လက်ရှိ မြန်မာအသင်း ယှဉ်ပြိုင်ကစားပြီးဖြစ်တဲ့ အုပ်စုပွဲစဉ် ၂ ပွဲမှာ တီမောနဲ့ ဖိလစ်ပိုင် အသင်းတို့ကို ၃-၂ ဂိုးစီနဲ့ အနိုင်ရရှိထားပါတယ်။

ymg-mnn
#Yangon_Media_Group

#LocalNews
Published - 13 May 2022

မြန်မာနိုင်ငံဆိုင်ရာတရုတ်သံရုံးက မေရီချက်ပ်မင်း နားမကြားသော ကလေးများကျောင်းရှိကလေးငယ်တွေအတွက် သိန်း(၂၅၀)ကျော်တန်ဖိုးရှိ စားသောက်ကုန်များ လှူဒါန်းပေးအပ်ခဲ့ပါတယ်၊၊

၂၀၂၁-၂၀၂၂ ပညာသင်နှစ်မှာ သံရုံးအနေနဲ့ ကျောင်းရှိဆရာ၊ ဆရာမနဲ့ ကျောင်းသား၊ ကျောင်းသူတွေအတွက် မြန်မာကျပ်ငွေ ၂၅,၄၃၅,၀၀၀ တန်ဖိုးရှိ စားသောက်ကုန်များလှူဒါန်းပေးအပ်ပြီးကျောင်းရဲ့ယခုပညာသင်နှစ်နဲ့ ၂၀၂၂ ခုနှစ်နွေရာသီသင်တန်း စာသင်ကြားမှုနဲ့ နေထိုင်မှုတွေအတွက် ထောက်ပံ့ကူညီပေးခဲ့တာဖြစ်တယ်လို့ ဆိုပါတယ်၊၊

မြန်မာနိုင်ငံဆိုင်ရာ တရုတ်သံရုံးက ၂၀၁၈ ခုနှစ်မှစပြီး မေရီချက်ပ်မင်း နားမကြားသော ကလေးများကျောင်းထံသို့ စားသောက်ကုန်များ လှူဒါန်းပေးအပ်ခဲ့တယ်လို့ သိရပါတယ်၊၊

ymg/tthl
#Yangon_Media_Group

Published 13 May 2022

အမေရိကန်သမ္မတ ဂျိုးဘိုင်ဒင်ဟာ သမိုင်းဝင် အမေရိန်-အာဆီယံ အထူးထိပ်သီးဆွေးနွေးပွဲကို တက်ရောက်လာတဲ့ အာဆီယံခေါင်းဆောင်တွေကို မေ၁၂ရက်က ဝါရှင်တန်ဒီစီမှာ ကြိုဆိုခဲ့ပါတယ်။ ဘိုင်ဒင်နှင့် အာဆီယံခေါင်းဆောင်တွေဟာ အိမ်ဖြူတော် တောင်ဘက်မြက်ခင်းပြင်မှာ အမှတ်တရ အုပ်စုဓာတ်ပုံရိုက်ကူးခဲ့ကြပါတယ်။

ဘိုင်ဒင်က သန့်ရှင်းသောစွမ်းအင်နှင့် ရေကြောင်းလုံခြုံရေးကိစ္စတွေကို ကူညီဖို့ ကတိပေးခဲ့ပါတယ်။

နှစ်ရက်ကြာ ဆွေးနွေးပွဲဟာ ရုရှားရဲ့ယူကရိန်းကျူးကျော်မှု အပေါ် အာရုံစိုက်နေရသော်ငြား အမေရိကန် ပြည်ထောင်စုအနေနှင့်  အာရှကို ဦးစားပေးအဆင့်ဆက်လက်ထားရှိနေဆဲဆိုတာကို ပြသလိုက်တာဖြစ်ပါတယ်။

Source AFP

#LocalNews
Published - 13 May 2022

ပို့ကုန်ရငွေပြန်လည်ဝင်ရောက်ဖို့ကျန်နေတဲ့ ကုမ္ပဏီ (၁၇၇)ခုအနက် ကုမ္ပဏီ(၁၅၈)ခုကို ဥပဒေအရ အရေးယူဆောင်ရွက်နေတာတွေ၊ ကုမ္ပဏီဒါရိုက်တာအဖွဲ့ဝင်တွေကို အမည်မည်းစာရင်းကြေညာခဲ့တာတွေ ဆောင်ရွက်ခဲ့ပြီးနောက် ကျန်ရှိနေတဲ့ကုမ္ပဏီ(၁၉)ခုကိုလည်း ထပ်မံအရေးယူနေသလို ဒါရိုက်တာအဖွဲ့ဝင်တွေကိုလည်း အမည်မည်းစာရင်းထည့်သွင်းကြောင်း မြန်မာနိုင်ငံတော် ဗဟိုဘဏ်ကမေလ(၁၂)ရက်မှာ ကြေညာချက်ထုတ်ပြန်လိုက်ပါတယ်၊၊

၂၀၁၆ ခုနှစ်မှ ၂၀၁၈ခုနှစ်အတွင်း ပို့ကုန်ပို့ပြီး ပို့ကုန်ရငွေပြန်လည်ဝင်ရောက်ဖို့ကျန်နေတဲ့ ကုမ္ပဏီ (၁၇၇)ခု အနက်ကုမ္ပဏီ(၁၅၈)ခုကို ဦးစွာအရေးယူဆောင်ရွက်တာ၊ အမည်မည်းစာရင်းကြေညာခဲ့ပြီးနောက် ကျန်ရှိနေတဲ့ကုမ္ပဏီ(၁၉)ခုကိုလည်း ဆက်လက်ဆောင်ရွက်ခဲ့တာဖြစ်တယ်လို့ ဗဟိုဘဏ်ရဲ့ ထုတ်ပြန်ချက်မှာ ဖော်ပြထားပါတယ်၊၊

မြန်မာနိုင်ငံတော်ဗဟိုဘဏ်အနေနဲ့ ဆက်လက်ပြီးတော့လည်း ကျန်ရှိနေသေးတဲ့ ပို့ကုန်ရငွေ မဝင်တဲ့ ကုမ္ပဏီတွေကို စိစစ်ပြီးအရေးယူသွားမှာဖြစ်တယ်လို့ ထုတ်ပြန်ချက်မှာ ဖော်ပြပါရှိပါတယ်၊၊

ymg/tthl
#Yangon_Media_Group

#Local_News
Published_ 13 May 2023

မန္တလေးမြို့၊ ကျုံးလေးပြင်ရှိ လမ်းများပေါ်တွင် သံဃာတော်အပါး ၁၀၂၆၄ ပါးကို လှူဒါန်းမည့် ဆွမ်းလောင်းပွဲကို မန္တလေးတိုင်းဒေသကြီးအစိုးရအဖွဲ့ကြီးမှူး၍ မေ ၁၄ ရက် ကဆုန်လပြည့်နေ့ နံနက်ပိုင်း၌ ကျင်းပသွားမှာ ဖြစ်ကြောင်း သိရပါတယ်။

မန္တလေးမြို့ပေါ်ရှိ ကျောင်းတိုက်တွေက သံဃာတော်အပါး ကို ၁၀၂၆၄ ပါး လာမယ့်မေ ၁၄ ရက် ကဆုန်လပြည့်နေ့မှာ ဆွမ်းခံကြွဖို့ ဖိတ်ကြားထားကြောင်း သိရပါတယ်။

ဆွမ်းလောင်းပွဲကို မေ ၁၄ရက် နံနက် ၆နာရီတွင် စတင်မည်ဖြစ်ပြီး ၆၆ လမ်းအတိုင်း ကျုံးအရှေ့ဘက်(အရှေ့ပြင်)တွင် သံဃာတော် ၂၅၆၆ ပါး၊ ၂၆ လမ်းအတိုင်း ကျုံးတောင်ဘက်(တောင်ပြင်)
တွင် သံဃာတော် ၂၅၆၆ ပါး၊ လမ်း ၈ဝ အတိုင်း ကျုံးအနောက်ဘက်(အနောက်ပြင်) တွင် သံဃာတော် ၂၅၆၆ ပါး၊ ၁၂ လမ်းအတိုင်းကျုံးမြောက်ဘက် (မြောက်ပြင်) တွင် သံဃာတော် ၂၅၆၆ ပါး စုစုပေါင်း သံဃာတော် ၁၀၂၆၄ ပါးကို မန္တလေးတိုင်းဒေသကြီးအစိုးရအဖွဲ့နှင့်အလှူရှင်များက ဆွမ်း၊ ဆွမ်းဟင်း၊ လှူဖွယ်ပစ္စည်းများနှင့် နဝကမ္မဝတ္ထုငွေများကို လောင်းလှူသွားမှာ ဖြစ်ကြောင်းလည်း သိရပါတယ်။

ymg_mnn
#Yangon_Media_Group

#WorldHealth
Published 13 May 2022

နာတာရှည်စိတ်ဖိစီးမှုများခြင်းက အမျိုးသမီးတွေရဲ့မျိုးဥအိမ်ထဲက မျိုးဥအရေအတွက် ကျဆင်းစေပြီး မျိုးအောင်နိုင်စွမ်းထိခိုက်စေကြောင်း လေ့လာချက်မှာဖော်ပြထားပါတယ်။

တရုတ်သုတေသီများက ကြွက်မများဖြင့် စမ်းသပ်ကြရာ အဖွဲ့သုံးဖွဲ့ခွဲပြီး စိတ်ဖိစီးမှုဖြစ်လာအောင် အော်ဟစ်ခြင်း၊ ဆူညံသံပြုလုပ်ခြင်း၊ နောက်ခံသံပြုလုပ်ခြင်းများကို ၃ ပတ်တိုင်‌‌‌အောင် နေ့စဉ် ၆ နာရီ နားထောင်ခိုင်းခဲ့ပါတယ်။

အော်ဟစ်သံကိုနားထောင်ခိုင်းခဲ့တဲ့ ကြွက်မတွေက မွေးဖွားတဲ့အခါ အကောင်ရေသိသိသာသာနည်းပါးသွားခဲ့ပါတယ်။

ဒီလိုဖြစ်ရတာဟာ အီစထရိုဂျင်အမျိုးသမီးဟော်မုန်းနဲ့ မျိုးဥအိမ်များရှိ မျိုးပွားဆဲလ်များနဲ့ ဆက်စပ်နေတဲ့ အန်တီမူလေရီယန်ဟော်မုန်းများ နည်းပါးသွားတာကြောင့်ဖြစ်ကြောင်း သိပ္ပံပညာရှင်များရှင်းပြလိုက်ပါတယ်။

စိတ်ဖိစီးမှုက အဓိကဟော်မုန်းထွက်ရှိမှုကို တားဆီးပေးပြီး မျိုးပွားနိုင်စွမ်းကို ထိခိုက်စေကာ ဓမ္မတာ ရပ်တန့်သွားတဲ့အထိ ဖြစ်တတ်ပါတယ်။

စိတ်ဖိစီးမှုက အမျိုးသားတွေမှာလည်း မျိုးအောင်နိုင်စွမ်းကျဆင်းစေပြီး တက်စ်တိုစထရုန်းဟော်မုန်းလျော့နည်းကာ သုတ်ပိုးအရေအတွက်နည်းပါးစေပါတယ်။

တရုတ်မြောက်ပိုင်းရှိ ရှန်ကျိုတုန်တက္ကသိုလ်မှသုတေသီများက ကြွက်မအကောင် ၁၀၀ ကို စိတ်ဖိစီးမှုများ အောင်ပြုလုပ်ပြီး Endocrinology ဂျာနယ်မှာ ဖော်ပြခဲ့ပါတယ်။

ကြွက် ၃ ပုံ ၁ ပုံကို မနက်နဲ့ညနေတိုင်း ၃ နာရီကြာအောင် အော်ဟစ်သံများနားထောင်စေခဲ့ပါတယ်။

နောက်ထပ် ၃ ပုံ ၁ ပုံက ကြိမ်နှုန်းအားလုံးရဲ့ဆူညံသံများ နားထောင်စေခဲ့ပြီး ကျန်တဲ့ကြွက်တွေကိုတော့ နောက်ခံအသံများဖြင့်သာ စမ်းသပ်ခဲ့ကြပါတယ်။

ရက်အနည်းငယ်ကြာပြီးနောက် မျိုးဥအရေအတွက်နဲ့ ဟော်မုန်းပမာဏကို စစ်ဆေးခဲ့ကြပါတယ်။

အော်ဟစ်သံများ နားထောင်စေခဲ့တဲ့ ကြွက်မတွေက အကောင်ရေအနည်းဆုံးပေါက်ဖွားခဲ့ပြီး နောက်ခံအသံသာ နားထောင်ခိုင်းခဲ့တဲ့ ကြွက်တွေက အများဆုံးမွေးဖွားနိုင်ခဲ့ပါတယ်။

အော်ဟစ်သံဖြင့် စမ်းသပ်ခဲ့တဲ့ ကြွက်မ‌တွေရဲ့ မျိုးဥတွေကိုလေ့လာကြည့်ရာမှာ ဆဲလ်ထိခိုက်ပျက်စီးမှုများ တွေ့ရပါတယ်။

အဆိုပါ အချက်အလက်တွေအရ စိတ်ဖိစီးခြင်းက မျိုးဥအရေအတွက် ထိခိုက်တာနဲ့ ဆက်စပ်နေတယ်လို့ ကောက်ချက်ချနိုင်ကြောင်း ဒေါက်တာ’ဝမ်ယန်’က ဖော်ပြထားပါတယ်။

ဒီတွေ့ရှိချက်က လက်ရှိ‌ဆေးပညာအပေါ် တိုးတက်မှုရှိလာစေမှာဖြစ်ပြီး မျိုးဥလျော့နည်းရတဲ့အခြေအနေကို သဘောပေါက်လာစေမှာဖြစ်ပါတယ်။

Source: DailyMail
#Yangon_Media_Group

#WorldHealth
Published 13 May 2022

တရုတ်အစိုးရက ကိုဗစ်ထိန်းချုပ်ကန့်သတ်ချက်များကို အချိန်ကြာမြင့်စွာတင်းတင်းကြပ်ကြပ်ချမှတ်ထားခဲ့ရာမှ ကန့်သတ်ချက်များကို ဖြေလျှော့လိုက်ပါက အိုမီခရွန်ဗိုင်းရပ်စ်ကူးစက်ပျံ့ပွားသွားနိုင်ပြီး ကိုဗစ်လှိုင်းကြောင့်သေဆုံးသူ ၁.၆ သန်းရှိလာနိုင်တယ်လို့ ရှန်ဟိုင်းမြို့ ဖူဒန်တက္ကသိုလ်မှ သုတေသီများက ခန့်မှန်းဖော်ထုတ်လိုက်ပါတယ်။

တရုတ်ပြည်က ကိုဗစ်ကာကွယ်ဆေးထိုးနှံခြင်း စီမံကိန်းမှာ ရရှိလာတဲ့ရောဂါကာကွယ်နိုင်စွမ်းက လုံလောက်ခြင်းမရှိဘဲ ဗိုင်းရပ်စ်ကလည်း ကိုယ်ခံအားကာကွယ်နိုင်စွမ်းကို ခံနိုင်ရည်ရှိလာတာကြောင့် ဆေးရုံဆေးခန်းအထူးကြပ်မတ်ဆောင်တွေမှာ စုပြုံလာနိုင်ပါတယ်။

တရုတ်ရဲ့ကိုဗစ်ထိန်းချုပ်ရေးပေါ်လစီကို တစိုက်မတ်မတ်လိုက်နာဆောင်ရွက်ခဲ့ကြရာ ကပ်ရောဂါကာလတလျှောက် ကိုရိုနာဗိုင်းရပ်စ်ကိုထိန်းချုပ်ထားနိုင်ခဲ့ပြီး အဆိုပါလမ်းစဉ်အတိုင်းဆက်လက်ဆောင်ရွက်သွားသင့်ကြောင်း လေ့လာချက်မှာ ဖော်ပြထားပါတယ်။

ကိုဗစ်စစ်ဆေးရေးဆောင်ရွက်ချက်တွေ တင်းကြပ်တဲ့လော့ဒေါင်းတွေသာ မရှိပါက မေလနဲ့ဇူလိုင်လအတွင်း အိုမီခရွန်ကူးစက်သူ ၁၁၂.၂ သန်း၊ ဆေးရုံတက်ကုသခံယူရသူ ၅.၁ သန်း၊ သေဆုံးသူ ၁.၆ သန်းရှိလာနိုင်လို ဖော်ပြထားပါတယ်။

တင်းကြပ်တဲ့ထိန်းချုပ်ချက်တွေက ရောဂါကူးစက်မှုကို ထိန်းချုပ်ထားနိုင်ပေမယ့် လူမှုစီးပွားရေးတွေကိုတော့ ထိခိုက်စေလျက်ရှိပါတယ်။

တရုတ်ပြည်မှာ လော့ဒေါင်းချထားတဲ့ကာလအတွင်း ပြည်သူများကျန်းမာရေးစောင့်ရှောက်မှုရရှိဖို့ခက်ခဲနေခဲ့ပြီး ထုတ်လုပ်ရေးစက်ရုံများ၊ ကုန်ကြမ်းထုတ်လုပ်မှုများ၊ အလုပ်ကဏ္ဍများ ထိခိုက်ခဲ့ရတာကြောင့် လတ်ဆတ်တဲ့အစားအစာရရှိဖို့ ခက်ခဲနေခဲ့ပါတယ်။

တရုတ်ရဲ့ကိုဗစ်ထိန်းချုပ်ရေးပေါ်လစီက စီးပွားရေးကို ထိခိုက်စေတာကြောင့် ပြောင်းလဲဆောင်ရွက်ဖို့ စဉ်းစားသုံးသပ်သင့်ကြောင်း WHO အထွေထွေအတွင်းရေးမှူးချုပ်က တရုတ်ကိုတောင်းဆို လိုက်ပါတယ်။

WHO အကြီးအကဲတစ်ယောက်က နိုင်ငံတစ်နိုင်ငံရဲ့ ကိုဗစ်ထိန်းချုပ်ရေးပေါ်လစီကို ဝင်ရောက်စွက်ဖက်တာမျိုးက ဖြစ်တောင့်ဖြစ်ခဲဖြစ်ပြီး အစောပိုင်းကလည်း ဗိုင်းရပ်စ်စတင်ပေါ်ပေါက်ရာ တရုတ်နိုင်ငံကို မျက်နှာသာပေးဆက်ဆံခဲ့လို WHO အကြီးအကဲ ဝေဖန်ခံခဲ့ရပါတယ်။

သမ္မတ’ရှီကျင့်ဖင်’က တင်းကြပ်တဲ့ ကိုဗစ်ပေါ်လစီတွေနဲ့ ကိုဗစ်စစ်ဆေးရေး ကိစ္စရပ်များကို ဆက်လက် ချမှတ်ထားဆဲဖြစ်ပါတယ်။

Source: Bloomberg
#Yangon_Media_Group

Published_13 May 2022

တိုင်းရင်းသားလက်နက်ကိုင် အဖွဲ့အစည်များနှင့် လွတ်လွတ်လပ်လပ်ဆွေးနွေးမှုကြောင့် ရသင့်သည့် အဖြေတစ်ခုရရှိလာမည်ဖြစ်ကြောင်း နစက ဥက္ကဌ က ပြောကြားလိုက်သည်။

မေလ ၁၂ ရက်တွင်ကျင်းပခဲ့သောနိုင်ငံတော်စီမံအုပ်ချုပ်ရေးကောင်စီအစည်းအဝေး (၄/၂၀၂၂)တွင် သူက အထက်ပါအတိုင်း ပြောကြားလိုက်ခြင်း ဖြစ်သည်။

“တိုတောင်းသည့်ကာလအတွင်းအဖြေတစ်ခုခုရရှိဖို့ အဖွဲ့အစည်းများအလိုက် ဥက္ကဋ္ဌနှင့်ညှိနှိုင်းတိုင်ပင်နိုင်ရန် နှစ်ဦးတို့ကို မိမိနှင့် သီးခြားစီတွေ့ဆုံဖို့ စီမံဆောင်ရွက်ခဲ့ပါတယ်။ လွတ်လပ်စွာဆွေးနွေးနိုင်ဖို့ဖိတ်ခေါ်ခဲ့တာပါ။ အဲသလိုဆွေးနွေးမှုကြောင့် ရသင့်တဲ့ အဖြေတစ်ခုရရှိလာမှာဖြစ်ပြီးထပ်မံတွေ့ဆုံဆွေးနွေးမှုတွေဆက်လက်ဆေင်ရွက်သွားပါမယ်” ဟု ဗိုလ်ချူပ်မှူကြီး မင်းအောင်လှိုင်က ပြောကြားခဲ့ခြင်းဖြစ်သည်။

ယင်းအပြင် အခွင့်အာဏာများခွဲဝေခံစားခြင်း၊ မျှဝေခံစားခြင်းများရရှိစေရန် ဆောင်ရွက်ရန်လိုကြောင်း၊ ထို့ကြောင့် ပါတီစုံဒီမိုကရေစီစနစ်၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု စနစ်ကိုသွားရမည်ဖြစ်ကြောင်းထည့်သွင်းပြောကြားခဲ့သည်။

"မူလက တက်မယ်လို့ ဆန္ဒရှိနေပြီးတော့မှ လာမတက်ဘူးဆိုပြီး တော့ ဆုံးဖြတ်ချက်ချခဲ့တာ KNU အဖွဲ့ဖြစ်ပါတယ်။ KNU ရယ် နောက်တစ်ခါ KIA ရယ်၊ KNPP ကတော့ အဲ့ဒီနယ်မြေတွေမှာရှိတဲ့ တချို့သော သူတို့ဆီက အဖွဲ့အစည်းတွေက ကျွန်တော်တို့ဆီမှာ လက်ရှိ အကြမ်းဖက်လို့ သတ်မှတ်ထားတဲ့ PDF နောက်တစ်ခါ CRPH သူတို့နဲ့ ဆက်နွယ်နေတဲ့ဟာတွေရှိတာတွေ့တယ်။ နောက်တစ်ခါ ဒီအဖွဲ့တွေက ပြည်ပနိုင်ငံရဲ့ ပတ်သက်မှုနဲ့ ဆက်နွယ်နေတယ်လို့လည်း ကျွန်တော်တို့ သိထားပါတယ်။ ဒါကြောင့်လည်းသူတို့က ကျွန်တော်တို့ရဲ့ ဆွေးနွေးပွဲနဲ့ပတ်သက်ပြီးတော့ မတက်ဘူးဆိုတဲ့အကြောင်း ထုတ်ပြန်ခဲ့တာဖြစ်တယ်လို့ ကျွန်တော်တို့ တွေ့ရှိ ရပါတယ် "ဟုနစက ဥက္ကဌ က ပြောသည်                                                                  

 "နိုင်ငံ့အရေး၊ ကိုယ့်ပြည်တွင်းအရေးမှာ ပြည်ပက ပါဝင်နေသမျှကာလပတ်လုံးတိုင်းပြည် တည်ငြိမ်အေးချမ်းဖိုဆို့တာတော်တော်ခက်ကြောင်း၊ မြန်မာနိုင်ငံရဲ့အရေးကို မြန်မာနိုင်ငံသားတွေပဲ ဆုံးဖြတ်ဖို့ဖြစ်ပြီး တခြားပြည်ပနိုင်ငံ တွေကနေပြီးတော့ ဝင်ရောက်စွက်ဖက်ပြီး ဆုံးဖြတ်ရအောင် ဆောင်ရွက်ပေးလို့ ဘယ်လိုမှ မဖြစ်နိုင်ဘူးဟု သူကဖြည့်စွက်ပြောကြားသည်။                                                                             

ငြိမ်းချမ်းရေးကို အမှန်တစ်ကယ်လိုချင်ပါက ငြိမ်းချမ်းရေး လိုချင်တဲ့စိတ်နဲ့ လာကြဖို့၊ သွားနေတဲ့ ဒီမိုကရေစီလမ်းကြောင်းမှာ ဒီမိုကရေစီ တစ်ကယ်မှန်မှန်ကန်ကန် ဖြစ်ချင်ပါက ဒီမိုကရေစီလိုချင်တဲ့ဆန္ဒနှင့် ပြည်ထောင်စုအတွင်းမှာ နေထိုင်ကြတဲ့ တိုင်းရင်းသားအားလုံး ပြည်ထောင်စုစိတ်ဓာတ်နဲ့ လုပ်မယ်ဆိုရင် တိုင်းပြည်အတွက် ရည်မှန်းချက်ပန်းတိုင်ကို ဘယ်လိုပဲဖြစ်ဖြစ် အောင်မြင်မယ်ဆိုတဲ့ အမြင်ရှိတယ်၊ ပြည်ထောင်စုစိတ်ဓာတ်နဲ့ လုပ်ကြမယ်ဆိုပါက ငြိမ်းချမ်းရေးဆွေးနွေးပွဲမှာ မအောင်မြင်စရာ အကြောင်းမရှိဘူးဟုလည်း သူက ဆက်လက်ပြောကြားသည်။

ငြိမ်းချမ်းရေး ဆွေးနွေးပွဲသို့ NCA လက်မှတ်ရေးထိုးထားသည့်အဖွဲ့များအနက်၇ ဖွဲ့တက်ရောက်မည်ဖြစ်ပြီးNCAလက်မှတ်ရေးထိုးထားခြင်း မပြုရသေးသောအဖွဲ့များအနက်၃ ဖွဲ့တက်ရောက်မည်ဖြစ်ကြောင်း သိရသည်။                                                       

ငြိမ်းချမ်းရေးဆွေးနွေးပွဲကို ယခု မေလအတွင်း ပြုလုပ်သွားမည်ဟုသတင်းရရှိပါသည်။

ymg/mt/mnn

Yangon_Media_Group

#WorldAuction
Published 12 May 2022

အထင်ကရသိပ္ပံ‌‌ခေတ်လွန်ရုပ်ရှင်ဇာတ်ကားများမှ အမှတ်တရပစ္စည်းများကိုစုစည်းပြီး ကယ်လီဖိုးနီးယားပြည်နယ်မှာ လာမယ့်ဇွန်လအတွင်း လေလံတင်ရောင်းချသွားမှာ ဖြစ်ပါတယ်။

#Yangon_Media_Group

Published 12 May 2022

အာဏာပိုင်တွေက သုံးရက်ကြာလော့ခ်ဒေါင်းလုပ်မယ်လို့ အွန်လိုင်းပေါ်မှာ ကောလာဟလတွေထွက်လာတဲ့အတွက် ဘေဂျင်း ဒေသခံတွေဟာ စူပါမားကက်တွေမှာ မေ(၁၂)ရက်က စားသောက်ကုန်တွေကို အပြေးအလွှား အလုအယက် ဝယ်ယူ  နေခဲ့ကြ  ပါတယ်။

ဘေဂျင်းမှာ ကိုဗစ်နေ့စဉ်ကူးစက်မှုမှာ ဒါဇင်ကျော်ရှိပြီး တည်ငြိမ်နေပါတယ်။

ဗုဒ္ဓဟူးနေ့နှောင်းပိုင်းမှာတော့ ဘေဂျင်းဟာ အငှားယာဉ်နှင့် အငှားယာဉ်မောင်းလုပ်ငန်းတွေကို ကိုဗစ်ကူးစက်မှုစတင်ခဲ့တဲ့ ဘေဂျင်းရဲ့ကြီးဆုံးခရိုင်ဖြစ်တဲ့ ချောင်းယန်ခရိုင်နှင့်အခြားခရိုင်နှစ်ခုမှာ ခေတ္တရပ်ဆိုင်းကြောင်းကြေညာချက်  ထုတ်ပြန် ခဲ့ပါတယ်။

အဲဒီဒေသတွေမှာ စားသောက်ဆိုင်တွေထမှာ ထိုင်စားတာတွေပိတ်ခဲ့ပြီး အချို့ ဈေးဝယ်စင်တာတွေ၊ဖျော်ဖြေရေးနှင့်ခရီးသွား နေရာတွေကိုပိတ်ခဲ့ပါတယ်။အချို့ ဘတ်စ်လိုင်းနှင့် မြေအောက်ရထားလမ်းပိုင်းတွေကို ယာယီရပ်ဆိုင်းခဲ့ပါတယ်။ အချို့ လူနေအိမ်ရာတွေကို‌ လော့ခ်ဒေါင်းချခဲ့ပါတယ်။

Source Text: AFP/Reuters & Video AFP

#LocalNews
Published - 12 May 2022

ဧရာဝတီတိုင်းရှိ ရှေးဟောင်းကြပ်ပြင် ပျူဂဝံမြို့ဟောင်းအတွင်း ဖော်ထုတ်တွေ့ရှိခဲ့တဲ့ ကျောက် ခေတ်ပစ္စည်းများနှင့် ပတ်သက်၍ သုတေသန စာတမ်းတစ်စောင်ကို ပြုစုနေတယ်လို့ ပျူဂဝံမြို့ ဟောင်း ဆရာတော်ဦးပညာသီရိက မိန့်ကြားပါတယ်။

#Yangon_Media_Group