Published 20 February 2022

မြန်မာနိုင်ငံရဲ့ လက်ရှိကိုဗစ်ကူးစက်မှု အနေအထားဟာ မတ်လ(၁၃)ရက်နေ့မှာ အမြင့်ဆုံးအနေအထားရောက်ရှိလိမ့်မယ် လို့ကျန်းမာရေးသုတေသနလုပ်နေတဲ့ နိုင်ငံတကာအဖွဲ့အစည်းတစ်ခုရဲ့ ခန့်မှန်းချက်အရ သိရပါတယ်။

ဝါရှင်တန်ပြည်နယ်၊ဆီယက်တဲလ်အခြေစိုက် Institute for Health Metrics and Evaluation (IHME)ရဲ့ နိုင်ငံအလိုက် ကိုဗစ်-၁၉ ကူးစက်မှု ခန့်မှန်းခြေပြဇယားတွေထဲမှာ မြန်မာနိုင်ငံရဲ့ ကိုဗစ်ကူးစက်မှုခန့်မှန်းခြေမှာ အဲသလိုတွက်ချက်ဖော်ပြထားတာဖြစ်ပါတယ်။

အဆိုပါအဖွဲ့ရဲ့တွက်ချက်မှုအရ မတ်လ(၁၃)ရက်နေ့မှာ နေ့စဉ်အတည်ပြုလူနာတွေ့ရှိသူပေါင်းဟာ ၁၁၄၀၀ ကျော်ရှိ လာလိမ့် မယ်လို့ခန့်မှန်းထားပါတယ်။ မတ်လ၂၉ ရက်မှာ သေဆုံးမှုကလည်းအမြင့်ဆုံးဖြစ်ပြီး (၃၄)ဦးခန့်ရှိလိမ့်မယ်လို့လည်း ခန့်မှန်း ထားပါတယ်။

အဆိုပါ တွက်ချက်မှုများကို ဖေဖော်ဝါရီ(၉)ရက်အထိ မြန်မာနိုင်ငံ ကျန်းမာရေးဝန်ကြီးဌာနက တရားဝင်ထုတ်ပြန်ထားတဲ့ အချက်အလက်တွေအပေါ်အခြေခံထားတဲ့အတွက် ဖေဖော်ဝါရီ၁၀ရက်မှ ယမန်နေ့ ဖေဖော်ဝါရီ ၁၉ရက်အထိ (၉)ရက်စာ အချက်အလက်တွေပါဝင်ခြင်းမရှိဘဲ ခန့်မှန်းထားတာဖြစ်ပါတယ်။အဲဒါကြောင့် မည်မျှအထိနီးစပ်မှန်ကန်မှုရှိမယ်ဆိုတာတော့ သေချာမသိနိုင်ကြောင်း မြန်မာနိုင်ငံက ကျန်းမာရေးပညာရှင်တစ်ဦးကပြောပါတယ်။

ကိုဗစ်ကူးစက်မှုတွေဟာ မတ်(၁၃)ရက်နောက်ပိုင်းတဖြည်းဖြည်းကျဆင်းပြီး မေလ(၃၁)ရက်နေ့မှာ အနိမ့်ဆုံးအဆင့် ပြန်လည် ရောက်ရှိလာနိုင်တယ်လို့ အဆိုပါအဖွဲ့ရဲ့ ခန်မှန်း တွက်ချက်မှုများအရသိရပါတယ်။ အလားတူပဲ အဲဒီရက်မှာ သေဆုံးမှု ဟာလည်း အနိမ့်ဆုံးသို့ပြန်လည်ရောက်ရှိမယ်လို့ တွက်ချက်ထားကြပါတယ်။

အိုမီခရွန်ကြောင့် ဇန်နဝါရီ စတုတ္ထပတ်ခန့်ကစတင်ခဲ့တဲ့ ကိုဗစ်ကူးစက်မှု စတုတ္ထလှိုင်းဟာ မေလကုန်မှာ ပြီးဆုံးသွားနိုင်တဲ့ အတွက် (၄)လကျော်ခန့်ကြာမြင့်နိုင်တယ်လို့ အဆိုပါခန့်မှန်းခြေပြဇယားတွေအရသိရပါတယ်။

“ကျွန်တော်လည်း အဲဒီလိုပဲစဉ်းစားမိပါတယ်။ မတ်၁၃မတိုင်ခင်မှာတင် အမြင့်ဆုံးတောင်ရောက်သွားနိင်တယ်။ အခုဆို အတည်ပြုလူနာ ၃၀၀၀ကျော်နေပြီ။ကူးစက်မှုနှုန်းကလည်း ၁၀ရာခိုင်နှုန်းကျော်လာပြီ။ ဒီအတိုင်းဆို အိုမီခရွန်ရဲ့ ကူးစက်တဲပုံစံဟာ နှစ်ရက်သုံးရက်အတွင်းနှစ်ဆတက်သွားနိုင်တယ်။ဖေဖော်ဝါရီလကုန်ပိုင်းမှာ အတည်ပြုလူနာ ၅၀၀၀ အထိ တောင်ရှိလာနိုင်တယ်။ သတင်းမပို့တဲ့သူတွေနှင့် ရောဂါလက္ခဏာမပြသူတွေ မခံစားရသူတွေလို ပျောက်ကွယ်နေတဲ့ ကူးစက်မှု တွေလည်းရှိတယ်။ အချို့သူတွေက ကိုယ့်ဘာသာကိုယ် စစ်ကြပြီး ကျန်းမာရေးဌာနကို သတင်းမပို့ကြတော့ဘူး။ကျေးလက်နှင့် အစွန်အဖျားဒေသတွေမှာလည်း ကူးစက်မှုတွေမသိတာတွေရှိနိုင်သေးတယ်” လို့ ကျန်းမာရေးပညာပေးပညာရှင် ဆရာ   ဒေါက်တာခင်မောင်လွင်က အဆိုပါ ပညာရှင်အဖွဲ့ရဲ့ ခန့်မှန်းတွက်ချက်မှုအပေါ် သုံးသပ်ပါတယ်။

ymg/knl

လာမည့်လများအတွင်း မြန်မာနိုင်ငံတွင် ကိုဗစ်အတည်ပြုလူနာတွေ့ရှိနိုင်မှု ခန့်မှန်းခြေဇယား  (Source IHME)

လာမည့်လများအတွင်း မြန်မာနိုင်ငံတွင် ကိုဗစ်ကြောင့် နေစဉ်သေဆုံးနိုင်မှုခန့်မှန်းခြေပြဇယား (Source IHME)

 #LocalNews
Published -20 Feb 2022

တောင်ကြီး-မိုင်းပြင်း ပြည်ထောင်စု ကားလမ်းမပေါ်မှယာဥ်စီး ချောက်ထဲထိုးကျကာ လူတစ်ဦးသေဆုံးမှုဖြစ်စဥ်ယနေ့ မွန်းလွဲပိုင်းကဖြစ်ပွားခဲ့တယ်လို့ သိရပါတယ်။

ဖြစ်စဥ်မှာဖေဖော်ဝါရီလ ၂၀ရက်နေ့ ယနေ့ မွန်းလွဲ ၁နာရီ ၁၀မိနစ် အချိန်ခန့်၊ ရှမ်းပြည်နယ်၊ ကျိုင်းတုံခရိုင်၊ မိုင်းပျဉ်းမြို့နယ်၊ တောင်ကြီး-မိုင်းပျဉ်း ပြည်ထောင်စုလမ်းမကြီး၊ မိုင်တိုင်အမှတ်(၃၂၄/၄)တွင် VIGO အမျိုးအစား (အနက်ရောင်)ယာဉ်သည် ပေ(၅၀) ခန့်အနက်ရှိသော ချောက်ထဲသို့ ထိုးကျတိမ်းမှောက်မှုဖြစ်ပွားခဲ့တယ်လို့ သိရပါတယ်။

အဆိုပါယာဥ်တိမ်းမှောက်မှု သတင်းအရ မိုင်းပျဉ်းမြို့နယ်မီးသတ်စခန်းမှ မီးသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များဖြင့် သွားရောက်ကူညီဆောင်ရွက်ခဲ့ရာ ယာဉ်တိမ်းမှောက်မှုကြောင့် ယာဉ်မောင်း ကျား(၁)ဦး (သေဆုံး)ကို မိုင်းပျဉ်းမြို့ ပြည်သူ့ဆေးရုံကြီးသို့ ပို့ ဆောင်ပေးခဲ့တယ်လို့ သိရပါတယ်။

ymg/hm
#Yangon_Media_Group 

#LocalNews
Published_ 20 Feb 2022

ရန်ကုန်တိုင်းဒေသကြီး ဒဂုံမြို့သစ်တောင်ပိုင်းမြို့နယ် လေးဒေါင့်ကန်ကျေးရွာ အမှတ်(၇) လမ်းမကြီးနှင့် အမှတ်(၂) လမ်းမကြီးအနီး အကောင်အထည်ဖော်ဆောင်ရွက်လျက်ရှိတဲ့ ပြည်သူအငှားအိမ်ရာစီမံကိန်းပြီးစီးပါက ရန်ကုန်စည်ပင်နယ်နိမိတ် ၃၃ မြို့နယ်အတွင်း အိမ်ငှားနေထိုင်သူ မည်သည့်မိသားစုဝင်မဆို လျှောက်ထားနိုင်မှာ ဖြစ်တယ်လို့ သိရပါတယ်။

အဆိုပါ ပြည်သူ့အငှားအိမ်ရာစီမံကိန်းကို ဆောက်လုပ်ရေးဝန်ကြီးဌာန မြို့ပြနှင့်အိမ်ရာဖွံ့ဖြိုးရေးဦးစီးဌာနက မြေဧက ၁၇၄ ဧကပေါ်မှာတည်ဆောက် အကောင်အထည်ဖော်နေတာဖြစ်ပြီး လေးခန်းတွဲငါးထပ်ပါ အဆောက်အအုံ ၁၉၄ လုံး အခန်းပေါင်း ၃၁၀၄ ခန်း ပါဝင်ပါတယ်။

စီမံကိန်းရှိတိုက်ခန်းများထဲမှ အချို့ပြီးစီးနေပြီဖြစ်တဲ့ တိုက်ခန်းတွေကို ရေနဲ့လျှပ်စစ်မီး ရရှိရေး ဆောင်ရွက်ပြီးပါက ၂၀၂၂ ခုနှစ်အတွင်းမှာ အငှားချထားပေးနိုင်ဖို့ ကြိုးစားဆောင်ရွက်နေတယ်လို့ ဆိုပါတယ်။

ပြည်သူ့အငှားအိမ်ရာငှားရမ်းရာတွင် လျှောက်လွှာခေါ်ယူမယ့် အချိန်၊ နေ့ရက်နဲ့ လိုအပ်ချက် များကို အများပြည်သူသိရှိစေရန် တရားဝင်ထုတ်ပြန်ပေးမှာ ဖြစ်တယ်လို့ သိရပါတယ်။

ပြည်သူ့အငှားအိမ်ရာစနစ်ကို မြန်မာနိုင်ငံတွင် ၁၉၅၁ ခုနှစ်ကပင် ကျင့်သုံးခဲ့ခြင်းဖြစ်ပြီး ရန်ကုန်မြို့တွင် ရန်ကင်းအိမ်ရာ၊ ဦးဝိစာရအိမ်ရာ၊ လမ်းသစ်အိမ်ရာ၊ ဝေဠုဝန်အိမ်ရာ၊ ကန်တော်လေးအိမ်ရာ စတဲ့ အိမ်ရာများအပါအဝင် ပြည်သူ့အငှားအိမ်ရာပေါင်း ၁၁ ခုကို အကောင်အထည်ဖော်ပေးခဲ့ပြီးဖြစ်ပါတယ်။

အဆိုပါအိမ်ရာများတွင် နိုင်ငံ့ဝန်ထမ်းများ၊ ပြည်သူများအပါအဝင် ဝင်ငွေနည်းပြည်သူများကိုစျေးကွက်တွင် လက်ရှိအိမ်လခပေါက်စျေး ငှားရမ်းခထက် များစွာသက်သာသည့် နှုန်းထားများဖြင့် နှစ်ရှည်ငှားရမ်းနေထိုင်ခွင့်ပေးခဲ့ပါတယ်။

ymg_mnn
#Yangon_Media_Group 

Published 20 February 2022

ယူကရိန်းနိုင်ငံ ရုပ်သံလိုင်းတစ်ခုမှာ ဖေဖော်ဝါရီ(၁၉)ရက်က  ဆွေးနွေးခန်း တိုက်ရိုက်တင်ဆက်နေစဉ် သတင်းထောက်တစ်ဦးက ရုရှားလိုလားတဲ့ ယူကရိန်းနိုင်ငံရေးသမားတစ်ဦးကို လက်သီးနှင့်ထိုးခဲ့ပါတယ်။

သတင်းထောက်ယူရီဘူတူဆော့ဗ်က ရုရှားလိုလားတဲ့ အတိုက်အခံပါတီ For Life က ပါလီမန်အမတ်နက်စတာရှုဖရစ်ကို ဆွေးနွေးခန်းတိုက်ရိုက် ထုတ်လွှင့်နေစဉ်အတွင်း လက်သီးနှင့်ဆတ်ခနဲထိုးခဲ့ပါတယ်။ သူ့မျက်နှာကိုရိုက်လိုက်ပြီးနောက် တစ်မိနစ်ခန့်ကြာသည်အထိ သူ့လည်ပင်းကိုချုပ်ထားပါတယ်။ ရှူဖရစ်ဟာ ယူကရိန်းပါလီမန်အမတ်၄၅၀ ဦးထဲက တစ်ဦးဖြစ်ပါတယ်။

သူတို့နှစ်ဦးဟာ တစ်မိနစ်နီးပါး လုံးထွေးသတ်ပုတ်ခဲ့ကြတာကို ရုပ်သံမှာမြင်တွေ့ရပါတယ်။ အခြာသူတွေက သူတို့နှစ်ဦးကို ခွဲထုတ်ဖို့ ဝိုင်းကြိုးစားကြပါတယ်။

ယူကရိန်းနာတီဗွီရဲ့ ရုပ်သံတင်ဆက်သူ ဆာဗစ်ရှုစတားရဲ့“ လွတ်လပ်စွာပြောဆိုခွင့်” ဆိုတဲ့ ပုံမှန်ဆွေးနွေးခန်းအစီအစဉ်မှာ ရှုဖရစ်နှင့်အတူ  အနောက်လိုလားတဲ့ ယူကရိန်းဝန်ကြီးချုပ်ဟောင်း အာဆင်နီယက်ဆင်ယတ်နှင့် သမ္မတဟောင်း ပီထရိုပိုရိုရှင်ကိုတို့ကလည်း  ပါဝင်ဆွေးနွေးကြတာဖြစ်ပါတယ်။

ဆွေးနွေးခန်းအတွင်း ဝန်ကြီးချုပ်ဟောင်း ယက်ဆင်ယတ်က ရှုဖရစ်ကို “ပူတင်ဟာ လူသတ်သမားနှင့်ရာဇဝတ်ကောင်ဟုတ်သလား မဟုတ်ဘူးလား” လို့မေးခဲ့ပါတယ်။ ရှုဖရစ်က ပူတင်ကို ရှုတ်ချဖို့ ငြင်းဆန်ခဲ့ပါတယ်။

“ ယူကရိန်းအာဏာပိုင်တွေ ဒီပြသနာကိုရှင်းကြပါစေ” လို့သူကတုန့်ပြန်ခဲ့ပါတယ်။

အဲဒီအခါသမ္မတဟောင်း ပိုရိုရှင်ကိုက  “ ဒီစတူဒီထဲမှာ ရုရှားသူလျှိုတစ်ယောက်ရောက်နေပြီ” လို့ သူ့ရဲ့တုန့်ပြန်ချက်အပေါ် ပြန်သရော်ခဲ့ပါတယ်။

အော်ကျယ်ဟစ်ကျယ်ဖြစ်ပြီးတဲ့နောက် သွေးစွန်းပေနေတဲ့ ရှဖရစ်က ဆွေးနွေးပွဲပြန်ဆက်ဖို့ ပြန်ထိုင်ခဲ့ပါတယ်။ သူက သတင်းထောက် ဘူတူဆော့ဗ်ကို “ ကုတ်ခြစ်လိုက်တာ တကတည်း ကောင်မလေးတစ်ယောက်လိုပဲ” လို့ပြန်လှောင်ပြောင်ခဲ့ပါ သေးတယ်။

ယူကရိန်းကိုရုရှားကျူးကျော်မယ့် အရိပ်အငွေ့တွေ လက်ငင်းဖြစ်ပေါ်နေချိန်မှာ ဒီဆွေးနွေးခန်းရိုက်ကူးတင်ဆက်ခဲ့ တာ ဖြစ်ပါတယ်။

Source: Business Insider/twitter@gkates>

#LocalNews
Published_20 Feb 2022

အာဆီယံဒေသအတွင်းရှိ လူမှုဘဝများတိုးတက်စေရေး၊ လူမှုအဖွဲ့အစည်းများချိတ်ဆက် မှု အားကောင်းစေရေးနှင့် ကပ်ရောဂါကြောင့်ထိခိုက် မှုများအားပြန်လည်ထူထောင်ရေးအတွက် စံနမူနာအဖြစ်စွမ်းစွမ်းတမံဆောင်ရွက်ပေးကြသော လူပုဂ္ဂိုလ်နှင့်အဖွဲ့အစည်းများအား ပေးအပ်မည့် ၂၀၂၂ ခုနှစ် အာဆီယံဆုကို အာဆီယံအတွင်းရေးမှူးချုပ်ရုံးသို့ လျှောက်ထားနိုင်ကြောင်း သိရပါတယ်။

အဆိုပြုလျှောက်ထားသူများအနေဖြင့် အာဆီယံအဖွဲ့ဝင်နိုင်ငံများအကြား စွမ်းစွမ်းတမံဆောင်ရွက်မှုများ၊ အာဆီယံနှင့်ကမ္ဘာတစ်ဝန်းအကြား စွမ်းစွမ်းတမံဆောင်ရွက်မှုများ၊ အာဆီယံအဖွဲ့ဝင်နိုင်ငံများအကြား ပြည်သူအချင်းချင်းထိတွေ့ဆက်ဆံမှုများ၊ အာဆီယံအဖွဲ့ဝင်နိုင်ငံများအကြား စံနှုန်းများမြှင့်တက်ရေး နှင့်စီးပွားရေးပူးပေါင်းဆောင်ရွက် မှုများ၊ အာဆီယံအသိုက်အဝန်းတည်ဆောက်ရေးအတွက် အထောက်အကူဖြစ်စေသည့် စွမ်းစွမ်းတမံဆောင်ရွက်ချက် များ စတဲ့နယ်ပယ်များမှာ ဆောက်ရွက်နေသူတွေ ဖြစ်ရမယ်လို့ ဖော်ပြထားပါတယ်။

လက်ရှိအာဆီယံအတွင်းရေးမှူးချုပ်နှင့် အာဆီယံအတွင်းရေးမှူးချုပ်ဟောင်းများအပါအဝင် ထင်းရှားတဲ့အဆင့်မြင့်ပုဂ္ဂိုလ်များနဲ့ဖွဲစည်းထားတဲ့ အကဲဖြတ်ဒိုင်အဖွဲ့က ဆုရရှိသူကိုရွေးချယ်၍ အာဆီယံဆုဖလားနှင့် အမေရိကန်ဒေါ်လာ ၂၀၀၀၀ ကို ကမ္ဘောဒီးယားနိုင်ငံမှာကျင်းပမယ့် အာဆီယံထိပ်သီးအစည်းအဝေးမှာ ပေးအပ်သွားမှာဖြစ်ပါတယ်။

ဆုလျှောက်လွှာပုံစံကို အာဆီယံအတွင်းရေးမှူးချုပ်ရုံးရဲ့ အင်တာနက်စာမျက်နှာ https://asean.org/asean-prize/ မှာရယူနိုင်ပါတယ်။ လျှောက်လွှာများကို ဧပြီလ ၂၅ ရက်နေ့အထိ လက်ခံသွားမှာဖြစ်ကာ အာဆီယံရေးရာဦးစီးဌာန၊ နိုင်ငံခြားရေးဝန်ကြီးဌာန၊ ရုံးအမှတ် (၉) နေပြည်တော် နှင့် This email address is being protected from spambots. You need JavaScript enabled to view it. သို့ ပေးပို့လျှောက်ထားနိုင်ပါတယ်။

အာဆီယံဆုကို ၂၀၁၈ ခုနှစ်တွင်စတင်ပေးအပ်ခဲ့ပြီး ဖိလစ်ပိုင်၊ မလေးရှား၊ စင်ကာပူနှင့် ထိုင်းနိုင်ငံ တို့က ဆုများရရှိဖူးကြပါတယ်။

ymg_mnn
#Yangon_Media_Group

#LocalBusiness
Published- 20 Feb 2022

မြန်မာနိုင်ငံတော်ဗဟိုဘဏ်က ရောင်းချပေးတဲ့နိုင်ငံခြားငွေ ဒေါ်လာ ၃၄ သန်းနဲ့စက်သုံးဆီ မှာယူတင်သွင်းခဲ့တဲ့ ကုမ္ပဏီ ၂၆ ခုမှ ဒီဇယ်ဆီဂါလန် ၁၂ ဒသမ ၅၄ သန်းခန့်ကို တိုင်းဒေသကြီးနဲ့ပြည်နယ်များတွင် ရောင်းချပေးလျက်ရှိ တယ်လို့ စီးပွားရေးနဲ့ကူးသန်းရောင်းဝယ် ရေးဝန်ကြီးဌာနက ထုတ်ပြန်လိုက်ပါတယ်။

အဆိုပါရောင်းချပေးမှုကိုစီးပွားရေးနဲ့ကူးသန်းရောင်းဝယ်ရေး ဝန်ကြီးဌာနနဲ့ မြန်မာနိုင်ငံ စက်သုံးဆီတင်သွင်းဖြန့်ဖြူးရောင်းချရေးအသင်းတို့ ပူးပေါင်းကာဗဟိုဘဏ်ရဲ့ ရည်ညွှန်းငွေလဲနှုန်းနဲ့ တိုက်ရိုက်ရောင်းချပေးတဲ့ နိုင်ငံခြားငွေ အမေရိကန်ဒေါ်လာ ၃၄ သန်း ဖြင့် ကုမ္ပဏီ ၂၆ ခုမှ စက်သုံးဆီများမှာယူတင်သွင်းကာဒီဇယ်ဆီဂါလန် ၁၂ ဒသမ ၅၄ သန်းခန့်ကို အထူးစျေးနှုန်းနဲ့ ဇန်နဝါရီ ၁၁ ရက်မှ စတင်ဖြန့်ဖြူးရောင်းချပေးလျက်ရှိပြီး ဖေဖော်ဝါရီ ၁၉ ရက်တွင် ကုမ္ပဏီ ၁၄ ခုမှ ပြည်နယ်နဲ့တိုင်းဒေသကြီးများရှိ စက်သုံး ဆီအရောင်းဆိုင် စုစုပေါင်း ၃၃၈ ဆိုင်တွင်ဖြန့် ဖြူးရောင်းချပေးလျက်ရှိတယ်လို့ သိရပါတယ်။

အထူးစျေးနှုန်းနဲ့ရောင်းချပေးတဲ့စက်သုံးဆီအရောင်းဆိုင်များတွင် ရည်ညွှန်းစျေး နှုန်းအတိုင်း ဝယ်ယူရရှိနိုင်မည်ဖြစ် ကာ၊ နေ့စဉ်ဒီဇယ်ဆီစျေးနှုန်းများကို မြန်မာနိုင်ငံ စက်သုံးဆီ တင်သွင်းရောင်းချဖြန့်ဖြူးရေးအသင်းရဲ့ www.mpta.org.mm တွင် နေ့ စဉ်ထုတ်ပြန်ပေးလျက်ရှိတယ်လို့ သိရပါတယ်

ထို့ အပြင် သတ်မှတ် စျေးနှုန်းများအတိုင်း ဝယ်ယူရရှိခြင်းမရှိပါက ကုန်သွယ်မှုနဲ့ကုန်စည်စီးဆင်းမှုများ မှန်ကန်မြန်ဆန်စေရေး လုပ်ငန်းကော်မတီ ဖုန်း ၀၉-၆၆၄၀၇၅၆၈၃၊ ၀၉-၆၆၄၅၉၆၃၂၇၊ ၀၉-၆၈၇၆၃၅၉၄၃၊ ၀၉-၆၇၆၃၂၀၈၂၆၊ စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဖုန်း ၀၁-၂၅၀၂၇၀၊ မြန်မာနိုင်ငံ စက်သုံးဆီတင်သွင်းဖြန့်ဖြူးရောင်းချရေး အသင်းဖုန်း ၀၉-၄၂၁၀၀ ၆၇၉၄ တို့သို့ ဆက် သွယ်တိုင်ကြားနိုင်တယ်လို့ ထုတ်ပြန်ချက်မှာဖော်ပြထားပါတယ်။

သတ်မှတ်စျေးနှုန်းနဲ့ရောင်းချပေးမယ့်စက်သုံးဆီအရောင်းဆိုင် များမှာရန်ကုန်တိုင်းဒေသကြီးတွင် ၇၂ ဆိုင်၊ မန္တလေးတိုင်းဒေသကြီးတွင် ၇၀ ဆိုင်၊ နေပြည်တော်၌ ၁၂ ဆိုင်၊ ပဲခူးတိုင်းဒေ သကြီး၌ ၃၇ ဆိုင်၊ မကွေးတိုင်းဒေသကြီးတွင် ၁၆ ဆိုင်၊ စစ်ကိုင်းတိုင်းဒေသကြီးတွင် ၁၂ ဆိုင်၊ တနင်္သာရီတိုင်းဒေသကြီးတွင် နှစ်ဆိုင်၊ ဧရာဝတီတိုင်းဒေသကြီးတွင် ၂၄ ဆိုင်၊ ကရင် ပြည်နယ်တွင်ရှစ်ဆိုင်၊ မွန် ပြည်နယ်တွင် ၃၀ ဆိုင်၊ ရခိုင်ပြည်နယ်တွင် ၉ဆိုင်၊ ရှမ်းပြည် နယ်တွင် ၄၁ ဆိုင် စုစုပေါင်း ၃၃၆ ဆိုင် တွင် ရောင်း ချပေးနေတာဖြစ်တယ်လို့ သိရပါတယ်။

ymg/hm
#Yangon_Media_Group 

#local_sport
Published_ 20 Feb 2022

ဗီယက်နမ်နိုင်ငံက လက်ခံကျင်းပမည့် (၃၁) ကြိမ်မြောက် အရှေ့တောင်အာရှ အားကစားပြိုင်ပွဲသို မြန်မာနိုင်ငံအနေဖြင့် အားကစားနည်း ၁၈ နည်း သွားရောက် ယှဉ်ပြိုင်ရန် ရည်မှန်းထားတယ်လို့ သိရပါတယ်။

အဆိုပါအားကစားနည်း ၁၈ နည်းအတွက် အုပ်ချုပ်သူ/နည်းပြနှင့် အားကစားသမား အရေအတွက် ၄၀၀ ခန့်ဝင်ရောက်ယှဉ်ပြိုင်ရန် စီစဉ်ထားပြီး အနည်းငယ်အတိုး/လျှော့ ရှိနိုင်ကြောင်း သိရပါတယ်။

အားကစားနည်း ၁၈ နည်းအနက် နေပြည်တော် အားကစားလေ့ကျင့်ရေးစခန်းတွင် အားကစားနည်း ၁၂ နည်း၊ ရန်ကုန်မြို့ရှိ သက်ဆိုင်ရာအားကစားအဖွဲ့ချုပ်အသီးသီးတွင် အားကစားနည်း လေးနည်း၊ ဂေါက်သီးနှင့် စစ်တုရင်အားကစားနည်း နှစ်နည်းမှာ သက်ဆိုင်ရာအားကစားအဖွဲ့ချုပ်များ၏ အစီအစဉ်ဖြင့် လေ့ကျင့်မှုများ ဆောင်ရွက်နေ တယ်လို့ သိရပါတယ်။

အားကစားအဖွဲ့လိုက် ကြိုတင်ပြင်ဆင် လေ့ကျင်မှုများကို ၂၀၂၁ ခုနှစ် ဖေဖော်ဝါရီ ၁ ရက်မှစတင်ကာ စခန်းသွင်းလေ့ကျင့်နေပြီး ပြိုင်ပွဲတွင်အောင်မြင်မှုများ ရရှိစေရန် အားကစားနည်း ခြောက်နည်းကို တရုတ်နိုင်ငံသို့ စေလွှတ်၍ ပူပေါင်းလေ့ကျင့်မှုများ ဆောင်ရွက်ခဲ့ပါတယ်။

စခန်းဝင်လေ့ကျင့်နေတဲ့ အားကစားသမား/နည်းပြ/အုပ်ချုပ်သူ များကို စားစရိတ် တစ်ရက်လျှင် ၅၀၀၀ ကျပ်နှုန်းဖြင့် ကျွေးမွေးကာ၊ လစဉ်ထောက်ပံ့ကြေးများလည်း ချီးမြှင့် ပေးလျက်ရှိပါတယ်။ ပြိုင်ပွဲတွင် ဆုတံဆိပ်နှင့် အောင်မြင်မှုများရရှိလာပါက ထိုက်ထိုက် တန်တန် ချီးမြှင့်နိုင်ရေး စီစဉ်နေကြောင်း သိရပါတယ်။

(၃၁) ကြိမ်မြောက် အရှေ့တောင်အာရှ အားကစားပြိုင်ပွဲကို လာမည့် မေလ ၁၂ ရက်မှ ၂၃ ရက်အထိ ဟနွိင်းမြို့နှင့် နီးစပ်ရာ ၁၂ နေရာတွင် အားကစားနည်း ၄၀ ဖြင့် ကျင်းပသွားမှာ ဖြစ်ပါတယ်။
ymg-mnn
#Yangon_Media_Group

Published 20 February 2022

ရုရှားရဲ့ မဟာဗျူဟာမြောက် နျူကလီးယား စစ်ရေးလေ့ကျင့်မှု အကြီးစားကြီးတစ်ခုကို ဖေဖော်ဝါရီ၁၉ရက် စနေနေ့က ပြုလုပ်ခဲ့ရာ ရုရှားသမ္မတ ဗလက်ဒီမာပူတင်ကိုယ်တိုင် ကြီးကြပ်ခဲ့ပါတယ်

ရုရှားဒုံးယာဉ်တပ်တွေ၊ တောင်ပိုင်းစစ်ဒေသ၊မဟာဗျူဟာဒုံးကျည်တပ်တွေ၊မြောက်ပိုင်းနှင့် ပင်လယ်နက်ရေတပ်တွေဟာ ယခု စစ်ရေးလေ့ကျင့်မှုမှာပါဝင်ခဲ့တယ်လို့ ကရင်မလင်ကပြောပါတယ်

အဲဒီစစ်ရေးလေ့ကျင့်မှုကို ရုရှားသမ္မတပူတင်ဟာ ဘီလာရု(စ်)သမ္မတ အလက်ဇင်းဒါးလူကာရှင်ကိုနှင့်အတူ ကရင်မလင်ရှိ ဝန်းကျင်အနေအထားစင်တာကနေ အတူတကွ ကြည့်ရှုခဲ့ပါတယ်

တိုက်ကြီးအတွင်းပစ်ခရုစ်ဒုံးကျည်၊ဟိုက်ပါဆိုနစ်ဒုံးကျည်တွေအပါအဝင် နျူကလိယနှင့်နျူကလီးယားမဟုတ်သောလက်နက်တွေနှင့် ယခုစစ်ရေးလေ့ကျင့်မှုမှာ ပစ်ခတ်လေ့ကျင့်ခဲ့ကြပါတယ်

ယခုမဟာဗျူဟာ ဟန့်တားလေ့ကျင့်ခန်းတွေကို ယခင်ကတည်းက ကြိုတင်စီစဉ်ထားခဲ့တာဖြစ်ပြီး တပ်တွေရဲ့ တိုက်ခိုက်ရေး အသင့်ပြင်ဆင်ထားမှုတွေနှင့် လက်နက်တွေရဲ့ယုံကြည်စိတ်ချရမှုတွေကို စစ်ဆေးခဲ့တယ်လို့ ကရင်မလင်ကပြောပါတယ်

လုပ်ငန်းတွေအားလုံးအပြည့်အဝပြီးဆုံးပြီး ဒုံးကျည်တွေအားလုံး သတ်မှတ်ထားတဲ့ပစ်မှတ်တွေကို ထိမှန်ခဲ့တယ်လို့ သတင်းထုတ်ပြန်ချက်ထဲမှာဖော်ပြထားပါတယ်

Source CMG/Russia Defense Ministry

#WorldHealth
Published - 20 February 2022

အမေရိကန်မှာ ပြီးခဲ့တဲ့လ အိုမီခရွန်ကူးစက်မှုအမြင့်ဆုံးဖြစ်ခဲ့ချိန်မှာ ကိုဗစ်ရောဂါဆိုးရွားစွာခံစားရနိုင်တဲ့လူနာတွေအတွက် ရောဂါကုသဆေးတွေကို ဝယ်ယူရရှိနိုင်ဖို့ ခက်ခဲနေခဲ့ပါတယ်။ဖိုင်ဇာဆေးဝါးကုမ္ပဏီမှထုတ်တဲ့ ပက်ဇ်လိုဗစ်(Paxlovid)ဆေးအနည်းငယ်သာ ဆေးရုံတွေ ဆေးဆိုင်တွေကို ရောက်ရှိခဲ့တာဖြစ်ပါတယ်။

အခု ရောဂါကူးစက်မှုတွေကျဆင်းလာတဲ့အချိန်ကျမှ ဖက်ဒရယ်အစိုးရကမှာယူထားတဲ့ ဆေးဝါးသိန်းပေါင်းများစွာဟာ ဆေးဆိုင်တွေဆီရောက်ရှိလာပြီဖြစ်ပါတယ်။

"အခုအချိန်မှာ ကိုဗစ်ကူးစက်မှုတွေ လျင်မြန်စွာကျဆင်းလာတာကြောင့် ကုသဆေးတွေ သိပ်ပြီးမလိုအပ်တော့ပါဘူး။ လွန်ခဲ့တဲ့ ၃ - ၄ ပတ်လောက်ကသာ ဒီလောက်ဆေးဝါးထောက်ပံ့မှုရခဲ့ရင် အခြေအနေတွေက တစ်မျိုးဖြစ်သွားမှာပါ" လို့ မာဆာချူဆက်စ်ဆေးပညာဆိုင်ရာကော်မတီမှ ဥက္ကဌဖြစ်သူ 'အာဆစ်ဖ်မာချန့်'က ပြောကြားလိုက်ပါတယ်။

ပက်ဇ်လိုဗစ်ဆေးဝါးတွေဟာ ရောဂါပြင်းထန်စွာခံစားရနိုင်တဲ့လူတွေမှာ စောလျင်စွာကုသခြင်းဖြင့် ထိထိရောက်ရောက်ကုသပေးနိုင်တာကြောင့် နိုင်ငံအတွင်း ကိုဗစ်ရောဂါနဲ့အတူ ယှဉ်တွဲနေထိုင်သွားနိုင်ဖို့ အရေးကြီးတဲ့ကဏ္ဍမှာပါဝင်နေကြောင်း 'ဂျိုးဘိုင်ဒန်'ရဲ့အုပ်ချုပ်ရေးအဖွဲ့က ပက်ဇ်လိုဗစ်ဆေးဝါးကို အားကိုးအားထားပြုခဲ့တာဖြစ်ပါတယ်။

ပက်ဇ်လိုဗစ်ဆေးကို ရောဂါလက္ခဏာစပေါ်ပြီး ၅ ရက်အတွင်းအသုံးပြုခြင်းဖြင့် ဆေးရုံတက်ကုသခံယူရမှုနဲ့ အသက်သေဆုံးမှုတို့ကို ၉၀ ရာခိုင်နှုန်းနီးပါးလျှော့ချပေးနိုင်ကြောင်း ခန့်မှန်းထားကြပါတယ်။

ဒါပေမဲ့ ဆေးထုတ်လုပ်ရေးလုပ်ငန်းတွေက လနဲ့ချီအောင်ကြာတတ်ပါတယ်။
နယူးယော့ခ်မြို့ရှိ ဒေသတစ်ခုမှာ ပြီးခဲ့တဲ့ကူးစက်မှုအမြင့်ဆုံးကာလအတွင်း ရောဂါကူးစက်မှုကြောင့် ဆေးရုံတက်ကုသခံယူရသူ ၁၂၂ ဦးရှိခဲ့ရာမှ အခုအခါ ၈ ယောက်သာရှိတော့တာဖြစ်ပါတယ်။

ဒီဇင်ဘာလအတွင်း ဈေးကွက်ထဲစတင်ဝင်ရောက်ချိန်တုန်းက ပက်ဇ်လိုဗစ်ဆေးကို ဝယ်ယူရရှိဖိုအလွန်ခက်ခဲခဲ့ပြီး အခုအခါမှာတော့ အလွယ်တကူရရှိနေပြီဖြစ်ပေမယ့် ဆေးဆိုင်တိုင်းမှာရရှိတာမဟုတ်ဘဲ သတ်မှတ်ထားတဲ့ဆေးဆိုင်တွေမှာသာ ရရှိနေပါတယ်။

ဆေးဝါးတွေက အခုအချိန်မှာ လုံလောက်နေပေမယ့် နောက်ထပ်ကူးစက်မှု ဖြစ်လာခဲ့ရင်တော့ လုံလောက်မှာမဟုတ်ကြောင်း မာဆာချူဆက်စ်ဆေးရုံ ပြင်ပကိုဗစ်လူနာဌာနမှ ဆေးကုသမှုပိုင်းဒါရိုက်တာ 'စကော့ဒရိုင်ဒန်ပီတာဆန်'က သတိပေးလိုက်ပါတယ်။

ပစ္စည်းထောက်ပံ့မှုကနည်းပါးပြီး ဆေးဝါးထုတ်လုပ်ရေးလုပ်ငန်းစဉ်တွေက ရှုပ်ထွေးတဲ့အတွက် အလျင်အမြန်မထုတ်လုပ်နိုင်ပါဘူး။ပက်ဇ်လိုဗစ်ဆေးက ရောဂါဆိုးရွားနိုင်တဲ့လူတွေကို ကုသပေးနိုင်မှာဖြစ်ပေမယ့် ပြီးခဲ့တဲ့ရက်တွေတုန်းကလို ကူးစက်မှုတွေများလာရင်တော့ ကာကွယ်နိုင်တော့မှာမဟုတ်ပါဘူး။

ထုတ်လုပ်ရေးကုန်ကြမ်းပစ္စည်းတွေ အလုံအလောက်မရသေးရင်တော့ အခုလိုအခြေအနေပဲဆက်ဖြစ်နေမှာဖြစ်ကြောင်း ပြောကြားသွားပါတယ်။
Source: Bloomberg

#WorldHealth
Published - 20 February 2022
ကိုဗစ်ရောဂါကူးစက်မှုမြင့်မားနေတဲ့နိုင်ငံများအတွင်း ကွာရန်တင်းသတ်မှတ်နေထိုင်ချိန် ၁၄ ရက်ကို အချို့အခြေအနေတွေမှာ လျှော့ချလိုရနိုင်ကြောင်း ကမ္ဘာ့ကျန်းမာရေးအဖွဲ့အစည်း WHO က ကြာသပတေးနေ့က ပြောကြားလိုက်ပါတယ်။

ဒီလိုလျှော့ချသတ်မှတ်လိုက်ခြင်းက ကျန်းမာရေးစောင့်ရှောက်မှုအဖွဲ့အစည်းတွေမှာ ဝန်ထုပ်ဝန်ပိုးပိနေတဲ့နေရာတွေအတွက် သက်သာရာရစေမှာဖြစ်ကြောင်း ကုလသမဂ္ဂက ထောက်ခံလိုက်ပါတယ်။

ဥပမာအားဖြင့် ရောဂါစစ်ဆေးပြီးကြောင်းမပြသနိုင်ပါက ၁၀ ရက်ကွာရန်တင်းနေထိုင်နိုင်ပြီး ရောဂါလက္ခဏာမပေါ်တဲ့အပြင် ရောဂါပိုးမရှိကြောင်းစစ်ဆေးချက်ရရှိပါက ကွာရန်တင်းနေထိုင်ချိန်ကို ၇ ရက်အထိ လျှော့ချနိုင်မှာဖြစ်ပါတယ်။

ကွာရန်တင်းနေထိုင်ချိန်လျှော့ချဖို့အတွက် ရောဂါပိုးစစ်ဆေးခြင်းမပြုလုပ်နိုင်တဲ့နေရာတွေမှာ ရောဂါလက္ခဏာပေါ်မပေါ်ကိုကြည့်ပြီး ဆုံးဖြတ်သွားနိုင်ကြောင်း ဖော်ပြထားပါတယ်။
ထိုကဲ့သို့အခြေအနေတွေမှာ ထိတွေ့ဆက်ဆံခဲ့သူများအား ခြေရာခံစောင့်ကြည့်ခြင်းတို့ကိုလည်း ဖြေလျှော့ဆောင်ရွက်နိုင်ကြောင်း WHO က ဆိုပါတယ်။

ကိုဗစ်ရောဂါပိုးတွေ့ရှိသူတွေနဲ့ ထိတွေ့ဆက်ဆံခဲ့သူတွေထဲက ကျန်းမာရေးဝန်ထမ်းတွေလို ရောဂါကူးစက်နိုင်ချေများသူတွေ၊ ရောဂါအခံရှိပြီး ပြင်းထန်စွာခံစားရနိုင်သူတွေ၊ ကာကွယ်ဆေးမထိုးရသေးတဲ့လူတွေကိုတော့ ဦးစားပေးစစ်ဆေးသွားသင့်ပါတယ်။

အမေရိကန်၊ ဂျာမနီ၊ ဆွစ်ဇာလန်တို့လို နိုင်ငံအချို့မှာ အိုမီခရွန်ကူးစက်မှုပုံစံနဲ့ကိုက်ညီအောင် ကွာရန်တင်းနေထိုင်ချိန်ကို လျှော့ချထားပြီးဖြစ်ပါတယ်။
Source: The Jerusalem Post

Published 19 February 2022

(၇)နှစ်ကျော် ဖန်တီးတည်ဆောက်ပြီးတဲ့နောက် ယူအေအီးရဲ့ ရှာဂျာ ဆာဖာရီဥယျဉ်ဟာ ဧည့်သည်တွေနှင့် တိရိစ္ဆာန်ချစ်သူတွေ အတွက် ဖေဖော်ဝါရီ ၁၈ရက်သောကြာနေ့က စတင်ဖွင့်လှစ်လိုက်ပါတယ်။ အဲဒီဆာဖာရီဥယျဉ်ဟာရှာဂျာမြို့က အယ်လ်ဘရီဒီ သဘာဝ ဘေးမဲ့တောမှာတည်ရှိပါတယ်။

အဲဒီနေရာဟာ ဒူဘိုင်းကနေ တစ်နာရီခန့် ကားမောင်းလာရင်ရောက်ပါတယ်။ ဥယျဉ်ကြီးတစ်ခုလုံးရဲ့ အကျယ်အဝန်းဟာ ၈၀၀ ဟက်တာရှိတဲ့အအတွက် အာဖရိကအပြင်ဘက်မှာ အကျယ်ဆုံးဆာဖာရီဥယျဉ်ကြီးဖြစ်ပါတယ်။

Source AFP

#WorldTech
Published 18 February 2022

ရဝမ်ဒါနိုင်ငံမှ တက္ကစီဆိုင်ကယ်မောင်းသူ 'အီဗိုဒီနီယိုရူရယ်မာ'ဟာ သူ့ရဲ့လောင်စာဆီသုံးဆိုင်ကယ်ယာဉ်ကို လျှပ်စစ်ဆိုင်ကယ်အဖြစ်ပြောင်းလဲခဲ့ပါတယ်။

#Yangon_Media_Group