#WorldBusiness
Published 9 July 2022

ကမ္ဘာ့အချမ်းသာဆုံး ပုဂ္ဂိုလ်နဲ့ တက်စ်လာရဲ့အမှုဆောင်အရာရှိချုပ်ဖြစ်သူ'အီလွန်မက်စ်'က တွစ်တာကိုဝယ်ယူမယ့် ဒေါ်လာ ၄၄ ဘီလီယံတန်သဘောတူညီချက်ကိုဖျက်သိမ်းကြောင်း သောကြာနေ့က ကြေညာခဲ့ပါတယ်။

အကြောင်းအရင်းကတော့ တွစ်တာဟာ ကုမ္ပဏီချင်း ပူးပေါင်းဆောင်ရွက်ရေးသဘောတူညီချက်တွေမှာ အကြိမ်ကြိမ်ချိုးဖောက်ခဲ့တာကြောင့်လို့ ပြောကြားခဲ့ပါတယ်။

တွစ်တာဥက္ကဌ'ဘရက်တိုင်လာ'ကတော့ ပူးပေါင်းဆောင်ရွက်ရေး သဘောတူညီချက်များအတွက် တရားဥပဒေအရဆောင်ရွက်သွားဖို့ ဘုတ်အဖွဲ့က စီစဉ်နေကြောင်း ဖော်ပြသွားပါတယ်။

"တွစ်တာဘုတ်အဖွဲ့က မစ္စတာ'မက်စ်'နဲ့ သဘောတူညီထားတဲ့ ကိစ္စရပ်တွေကို ဖျက်သိမ်းလိုက်ပါတယ်" လို့ ရေးသားထားပါတယ်။

'မက်စ်'ရဲ့ရှေ့နေတွေ ပြောကြားချက်အရ တွစ်တာပေါ်က အကောင့်တုတွေနဲ့ပတ်သက်တဲ့ အချက်အလက်တွေကို အကြိမ်ကြိမ်တောင်းဆိုခဲ့ပေမယ့် တွစ်တာဘက်က ပျက်ကွက်ခဲ့ကြောင်း၊ ဒါဟာကုမ္ပဏီစီးပွားရေးလုပ်ဆောင်ချက်ရဲ့ အဓိက အခြေခံကိစ္စဖြစ်ကြောင်း အမှုတွဲမှာ ဖော်ပြထားပါတယ်။

"ကုမ္ပဏီချင်းပူးပေါင်းဆောင်ရွက်ရေး သဘောတူညီချက်ညှိနှိုင်းတုန်းက မစ္စတာ'မက်စ်'အရေးစိုက်ခဲ့တဲ့ ကဏ္ဍကွဲသဘောတူညီမှုတွေမှာ အဓိကချိုးဖောက်ခဲ့ပြီး မစ္စတာ'မက်စ်'ကို သတင်းအချက်အလက်မှားတွေသာ ပေးပို့ခဲ့ကြပါတယ်" လို့ ဖော်ပြထားပါတယ်။

ဒါ့အပြင် တွစ်တာက အထက်ပိုင်းအမှုဆောင်များနဲ့ အရည်အချင်းရှိအဖွဲ့ရဲ့ ၃ ပုံ ၁ ပုံကိုလည်း အလုပ်ထုတ်ပစ်ခဲ့ပြီး လက်ရှိစီးပွားရေးအဖွဲ့အစည်းရဲ့ အဓိကအစိတ်အပိုင်းများ ထိန်းသိမ်းစောင့်ရှောက်ရေးတာဝန်ကိုလည်း တွစ်တာကချိုးဖောက်ခဲ့တာကြောင့် ဝယ်ယူဖို့ဖျက်သိမ်းလိုက်တာဖြစ်ကြောင်း 'မက်စ်'ကဆိုပါတယ်။

'မက်စ်'ကဝယ်ယူဖို့ ဖျက်သိမ်းလိုက်တာကြောင့် သူနဲ့တွစ်တာကြား တရားဥပဒေအရ ရင်ဆိုင်လာရဖို့ရှိပါတယ်။

တရားရုံးကြားနာမှုတွေ လာမယ့်သီတင်းပတ်များအတွင်း စတင်ပြီး လအနည်းငယ်ကြာရင် ပြဿနာပြေရှင်းသွားဖို့ မျှော်လင့်ထားကြောင်း တွစ်တာကဆိုပါတယ်။

တွစ်တာရဲ့ရှယ်ယာတန်ဖိုးက ၃၄.၅၈ ဒေါ်လာဖြင့် ၆ ရာခိုင်နှုန်းကျဆင်းခဲ့ပြီး ဧပြီလအစောပိုင်း ကုမ္ပဏီမှာ'အီလွန်မက်စ်'ပါဝင်လာချိန်တုန်းက တွစ်တာရှယ်ယာတန်ဖိုး ထိုးတက်သွားခဲ့ပါတယ်။

ဧပြီ ၂၅ ရက်နေ့ တွစ်တာကိုဝယ်ယူဖို့ သဘောတူညီလိုက်တဲ့အချိန်မှာတော့ ရှယ်ယာတန်ဖိုးတွေက ရက်ပိုင်းအတွင်း ကျဆင်းသွားခဲ့ပြီး ရင်းနှီးမြှုပ်နှံသူတွေက 'မက်စ်'အနေနဲ့ ထိုသဘောတူညီချက်ကို ဖျက်သိမ်းလာနိုင်တယ်လို့ ယူဆခဲ့ကြတာဖြစ်ပါတယ်။

တွစ်တာမှာ လူလုပ်အသိဉာဏ်ထိန်းချုပ်ထားတဲ့ အကောင့်တုတွေအကြောင်း အထောက်အထားမပြနိုင်ခင်အထိ 'မက်စ်'က ဝယ်ယူဖို့ကို ဆိုင်းငံ့ထားခဲ့ပါတယ်။

အကြောင်းတစ်စုံတရာကြောင့် မဝယ်ယူဖြစ်ခဲ့ဘူးဆိုရင် 'မက်စ်'အနေနဲ့ တွစ်တာကိုလျော်ကြေး ဒေါ်လာ ၁ ဘီလီယံပေးဆောင်ဖို့ စာချုပ်မှာ ထည့်သွင်းထားပါတယ်။

ဒီကိစ္စနဲ့ပတ်သက်ပြီး ဝန်ထမ်းတွေကလည်း သူတို့ရဲ့အလုပ်နေရာ၊ လစာ၊ အဝေးမှထိန်းချုပ် လုပ်ကိုင်နိုင်ခွင့်တွေအပေါ် စိုးရိမ်ပူပန်လျက်ရှိပါတယ်။

Source: Reuters
#Yangon_Media_Group

#Local_News
Published_ 9 July 2022

ဇွန် (၃၀) ရက်မှ ဇူလိုင် (၉) ရက်အထိ ၁၀ ရက်အတွင်း မြန်မာနိုင်ငံ ပြည်တွင်းနဲ့ ပတ်ဝန်းကျင်နေရာများကို ဗဟိုပြု၍ ငလျင် (၁၉) ကြိမ်အထိ လှုပ်ရှားခဲ့ကြောင်း မိုး/ဇလရဲ့ ထုတ်ပြန်ချက်များအရ သိရပါတယ်။

ဇူလိုင် (၉) ရက်တွင် Andaman Islands, India Region ကို ဗဟိုပြု၍ အင်အား ရစ်(ခ်)တာစကေး (၅.၀) အဆင့်ရှိ အင်အားအသင့် အတင့်ရှိသော မြေငလျင် လှုပ်ရှားသွားခဲ့ပါတယ်။

ဇူလိုင်(၈)ရက်တွင် ဖြူးမြို့၏တောင်-အရှေ့တောင်ဘက်(၁၈)မိုင် ခန့်အကွာကို ဗဟိုပြု၍ အင်အားရစ် (ခ်) တာစကေး (၄.၁) အဆင့်ရှိ အင်အားအနည်းငယ်ရှိသော မြေငလျင်၊ ညောင်ဦးမြို့၏ အနောက်-အနောက်တောင်ဘက် (၉)မိုင်ခန့်အကွာကို ဗဟိုပြု၍ အင်အားရစ်(ခ်)တာစကေး (၃.၆) အဆင့်ရှိ အင်အားအနည်းငယ်ရှိသော မြေငလျင်တို့ လှုပ်ရှားခဲ့ပါတယ်။

ဇူလိုင်(၇)ရက်တွင် ဂွမြို့၏ မြောက်-အရှေ့မြောက်ဘက်(၉)မိုင် ခန့်အကွာကို ဗဟိုပြု၍ အင်အားရစ်(ခ်)တာစကေး(၃.၅) အဆင့် ရှိ အင်အားအနည်းငယ်ရှိသော မြေငလျင်၊ နမ့်စန်မြို့၏ အရှေ့-အရှေ့မြောက်ဘက် (၆)မိုင် ခန့်အကွာ ကို ဗဟိုပြု၍ အင်အားရစ်(ခ်)တာစကေး (၄.၂) အဆင့်ရှိ အင်အားအနည်းငယ်ရှိသော မြေငလျင်၊ လင်းခေးမြို့၏ အနောက်ဘက် (၁၂)မိုင်ခန့်အကွာကို ဗဟိုပြု၍ အင်အား ရစ်(ခ်)တာ စကေး (၃.၇)အဆင့်ရှိ အင်အား အနည်းငယ်ရှိသော မြေငလျင်တို့ လှုပ်ရှာခဲ့ပါတယ်။

ဇူလိုင် (၆) ရက်တွင် နမ့်စန်မြို့၏ မြောက်ဘက် (၅)မိုင်ခန့်အကွာကို ဗဟိုပြု၍ အင်အား ရစ်(ခ်)တာ စကေး (၃.၇)အဆင့်ရှိ အင်အား အနည်းငယ်ရှိသော မြေငလျင်၊ Andaman Islands, India Region ကို ဗဟိုပြု၍ အင်အား ရစ်(ခ်)တာစကေး (၄.၇)အဆင့်ရှိ အင်အားအနည်းငယ်ရှိသော မြေငလျင်တို့ လှုပ်ရှားသွားခဲ့ပါတယ်။

ဇူလိုင်(၅) ရက်နေ့တွင် သရက်မြို့၏ တောင်-အရှေ့တောင်ဘက် (၁၁) မိုင်ခန့် အကွာကို ဗဟိုပြု၍ အင်အားရစ်(ခ်)တာစကေး (၃.၅) အဆင့်ရှိ အင်အား အနည်းငယ်ရှိသော မြေငလျင်၊ လှိုင်မြို့နယ်၏ အရှေ့မြောက်ဘက် (၁)မိုင် ခန့်အကွာကို ဗဟိုပြု၍ အင်အားရစ်(ခ်) တာစကေး (၃.၀) အဆင့်ရှိ အင်အားအနည်းငယ် ရှိသော မြေငလျင်၊ Andaman Islands, India Region ကို ဗဟိုပြု၍ အင်အားရစ်(ခ်)တာစကေး (၄.၈) အဆင့်ရှိ အင်အားအနည်းငယ်ရှိသော မြေငလျင်တို့ လှုပ်ရှားသွားခဲ့ပါတယ်။

ဇူလိုင်(၄)ရက်တွင် Andaman Islands, India Region ကိုဗဟိုပြု၍ အင်အား ရစ်(ခ်)တာစကေး (၄.၈) အဆင့်ရှိ အင်အားအနည်းငယ်ရှိသော မြေငလျင်၊ Andaman Islands, India Region ကို ဗဟိုပြု၍ အင်အား ရစ်(ခ်)တာစကေး (၄.၈) အဆင့်ရှိ အင်အား အနည်းငယ်ရှိသော မြေငလျင်၊ Andaman Islands, India Region ကိုဗဟိုပြု၍ အင်အား ရစ်(ခ်)တာစကေး (၅.၀) အဆင့်ရှိ အင်အားအသင့်အတင့်ရှိသော မြေငလျင်တို့ လှုပ်ရှားသွားခဲ့ပါတယ်။

ဇူလိုင်(၃)ရက်တွင် အောင်လံမြို့၏ အနောက်မြောက်ဘက် မိုင်(၂၀) ခန့်အကွာ ကို ဗဟိုပြု၍ အင်အားရစ်(ခ်)တာစကေး (၄.၈) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားခဲ့ပါတယ်။

ဇူလိုင်(၂) ရက်တွင် မိုင်းလားမြို့၏ အနောက်မြောက်ဘက် (၁၀)မိုင်ခန့်အကွာကို ဗဟိုပြု၍ အင်အားရစ်(ခ်)တာစကေး (၄.၈) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားခဲ့ပါတယ်။

ဇူလိုင် (၁)ရက်တွင် ကျိုင်းတုံမြို့၏ အရှေ့-အရှေ့တောင်ဘက် (၉)မိုင်ခန့်အကွာကို ဗဟိုပြု၍ အင်အား ရစ်(ခ်)တာစကေး (၃.၈)အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားခဲ့ပါတယ်။

ဇွန်(၃၀) ရက်တွင် မိုင်းဖြတ်မြို့၏ မြောက်ဘက် မိုင် (၂၀) ခန့်အကွာကို ဗဟိုပြု၍ အင်အားရစ်(ခ်)တာစကေး (၅.၄)အဆင့်ရှိ အင်အားအသင့်အတင့်ရှိသော မြေငလျင်၊ ကလေးမြို့၏ အရှေ့မြောက်ဘက် (၁၂)မိုင်ခန့်အကွာကို ဗဟိုပြု၍ အင်အားရစ်(ခ်) တာစကေး (၄.၇)အဆင့်ရှိ အင်အားအနည်းငယ်ရှိသော မြေငလျင်တို့ လှုပ်ရှားသွားခဲ့ပါတယ်။

ymg-mnn
#Yangon_Media_Group

#Point_Of_View
Published - 9 July 2022

ကားတင်သွင်းခွင့်ပိတ်တာဟာ ၂၀၂၁ အကုန် ၂၀၂၂ မှမဟုတ်ဘူး ၂၀၂၁မှာကတည်းက တင်သွင်းခွင့်ဟာမရသလောက်ပဲ။ ဦးစားပေးတာကတော့ လုပ်ငန်းသုံးလိုင်စင်ကို စီးပွားကူးသန်းက တာဝန်ယူချပေးတာ။ပေါပေါလောလောချပေးတာလားဆို မဟုတ်ပါဘူး။လွယ်လွယ်ကူကူချပေးလို့ရတဲ့အစီးရေထက်ကို လျှော့ချပြီးတော့ပေးခဲ့တာ။

#Yangon_Media_Group

#Local_News
Published_ 9 July 2022

လူ့အခွင့်အရေးကောင်စီ၏မူဝါဒများကို ကောင်စီကိုယ်တိုင်လိုက်နာရန် ပျက်ကွက်နေကြောင်း နစက နိုင်ငံခြားရေးဝန်ကြီးဌာနက ကြေညာချက် ထုတ်ပြန်လိုက်ပါတယ်။

ဂျီနီဗာမြို့၌ ဇွန် ၁၃ ရက်မှ ဇူလိုင် ၈ ရက်အထိ ကျင်းပခဲ့တဲ့ ကုလသမဂ္ဂ လူ့အခွင့်အရေးကောင်စီ၏ အကြိမ်(၅၀)မြောက် ပုံမှန်အစည်းအဝေးကာလတွင် မြန်မာနိုင်ငံအတွက် အထောက်အကူမဖြစ်သော ဆွေးနွေးပွဲများစွာ ကျင်းပခဲ့တယ်လို့ ဆိုပါတယ်။

ဆွေးနွေးပွဲများတွင် အစ္စလာမ်မစ် ပူးပေါင်းဆောင်ရွက်ရေးအဖွဲ့(အိုအိုင်စီ)မှ တင်သွင်းခဲ့သော ဆုံးဖြတ်ချက်အဆိုအရ ဇွန် ၁၄ ရက်တွင် ကျင်းပခဲ့တဲ့ လူ့အခွင့်အရေးဆိုင်ရာ မဟာမင်းကြီး၏ နှုတ်ဖြင့်အစီရင်ခံချက်အပေါ် အပြန်အလှန်ဆွေးနွေးပွဲနှင့် ဇွန် ၁၅ ရက် တွင်ကျင်းပခဲ့တဲ့ “မြန်မာနိုင်ငံရှိ “ရိုဟင်ဂျာ” မွတ်ဆလင်များနှင့် အခြား လူနည်းစုများ အပေါ်လူ့အခွင့်အရေး ချိုးဖောက်မှုများနှင့် ဖိနှိပ်မှုများဖြစ်ပွားစေတဲ့ အကြောင်းရင်းများ” ခေါင်းစဉ်ပါ ဆွေးနွေးပွဲနှင့် ဥရောပသမဂ္ဂ (အီးယူ)မှ တင်သွင်းခဲ့တဲ့ ဆုံးဖြတ်ချက် အဆိုအရ ဇွန် ၂၉ ရက်တွင် ကျင်းပခဲ့တဲ့ မြန်မာနိုင်ငံလူ့အခွင့်အရေး အခြေအနေဆိုင်ရာ အထူးအစီရင် ခံစာတင်သွင်းသူ၏နှုတ်ဖြင့် အစီရင်ခံချက်အပေါ် အပြန်အလှန်ဆွေးနွေးပွဲတို့ ပါဝင်ပါတယ်။

ထို့ပြင် အိုအိုင်စီက တင်သွင်းသော “မြန်မာနိုင်ငံရှိ “ရိုဟင်ဂျာ” မွတ်ဆလင်များနှင့် အခြားလူနည်းစုများ၏ လူ့အခွင့် အရေးအခြေအနေ” ခေါင်းစဉ်ပါ ဆုံးဖြတ်ချက် အဆိုကို ဇူလိုင် ၇ ရက်တွင် လူ့အခွင့် အရေးကောင်စီက အတည်ပြုချမှတ်ခဲ့သည်။ လူ့အခွင့်အရေးကောင်စီသည် ပူးပေါင်းဆောင်ရွက် ခြင်းနှင့်ညှိနှိုင်းဆွေးနွေးခြင်း မူများကို ဆန့်ကျင်၍ သက်ဆိုင်ရာနိုင်ငံပါဝင်ခြင်းမရှိဘဲ ဆောင်ရွက်ခဲ့ခြင်းဖြစ်ပါတယ်။

လူ့အခွင့်အရေးကောင်စီ၏ အထက်ပါအပြုအမူများကို ကြည့်ခြင်းဖြင့် လူမျိုးပေါင်းစုံနှင့် ဘာသာပေါင်းစုံ အတူတကွနေထိုင်သည့် မြန်မာနိုင်ငံရှိ ပြည်သူများအကြား လူ့အခွင့်အရေး အရေခြုံ၍ စိတ်ဝမ်းကွဲပြားမှုများနှင့် မယုံကြည်မှုများဖြစ်ပေါ်စေရန် ရွေးချယ်ပစ်မှတ်ထားနေသည့် အတိုင်းအတာကို ထင်ရှားစေပါတယ်။

လူ့အခွင့်အရေးကောင်စီက ချမှတ်ခဲ့သည့် ဆုံးဖြတ်ချက်အဆို ကိုယ်တိုင်ကပင် မမှန်ကန်သောစွပ်စွဲချက်များ၊ နိုင်ငံရေးနှင့် ဘာသာရေး သက်ဝင်သော အသုံးအနှုန်းများဖြင့် အမုန်းတရားဖြစ်ပေါ်စေပါတယ်။

မြန်မာနိုင်ငံသည် ၁၉၈၂ မြန်မာနိုင်ငံသားဥပဒေနှင့် ကိုက်ညီသူများကို လူမျိုး ဘာသာ မခွဲခြားဘဲ သင့်လျော်သည့် နိုင်ငံသားအဆင့်အတန်းပေးလျက်ရှိပါတယ်။ သို့ရာတွင် မြန်မာနိုင်ငံ၏ ဥပဒေနှင့် သမိုင်းကြောင်း မှတ်တမ်းများတွင် မရှိခဲ့သည့် ဖန်တီးထားသော “ရိုဟင်ဂျာ” အသုံးအနှုန်းကို အသိအမှတ်မပြုကြောင်း ထပ်မံ ဖော်ပြအပ်သည်။ ထိုကဲ့သို့အသုံးအနှုန်း သုံးစွဲမှုကိုလည်း ပြင်းထန်စွာ ကန့်ကွက်ကြောင်းဖော်ပြထားပါတယ်။

သက်ဆိုင်ရာ နိုင်ငံမပါဝင်ဘဲ အထက်ပါကိစ္စများ ဆောင်ရွက်ရန် လူ့အခွင့်အရေးကောင်စီက ဆုံးဖြတ်ခဲ့သည်ကို မြန်မာနိုင်ငံက ထပ်မံကန့်ကွက်သည်။ ဇူလိုင် ၇ ရက်တွင် စာရွက်စာတမ်းအမှတ် A/HRC/50/L21 ပါ ဆုံးဖြတ်ချက် အဆို(မူကြမ်း) ကို အတည်ပြုချမှတ်ရာတွင် မြန်မာနိုင်ငံက ပါဝင်ပတ်သက်ခြင်းမရှိဘဲ နိုင်ငံ၏ အချုပ်အခြာအာဏာနှင့် ဂုဏ်သိက္ခာကို ထိပါးသောအသုံးအနှုန်းများ ပါဝင်သည့် အဆို(မူကြမ်း) တစ်ခုလုံးကို ကန့်ကွက်ပယ်ချလိုက်ကြောင်း ဖော်ပြထားပါတယ်။

ymg-mnn
#Yangon_Media_Group

#Local_News
Published - 9 July 2022

ပြီးခဲ့သည့်ရက်ပိုင်းအတွင်း စက်ဆုံးဆီ 92 ၊ 95 စျေးနှုန်းမှာ ကျပ် ၂၀၀၀ အောက်ကျဆင်းခဲ့ပြီး ကမ္ဘာ့ရေနံစိမ်းစျေးမြင့်တက်မှုကြောင့် စျေးနှုန်းအနည်းငယ်ပြန်လည်မြင့်တက်ခဲ့ကြောင်း ထုတ်ပြန်ထားသည့် အရောင်းဆိုင်များ၏ စျေးနှုန်းများအရ သိရသည်။

ဇူလိုင် ၈ ရက်တွင် ၉၂ တစ်လီတာလျှင် ၁၈၂၅ ကျပ်၊ ၉၅ တစ်လီတာလျှင် ၁၉၃၀ ကျပ်၊ ၉၇ တစ်လီတာလျှင် ၂၃၃၅ ကျပ်၊ ဒီဇယ် တစ်လီတာလျှင် ၂၀၆၅ ကျပ်၊ပရီမီယံ ဒီဇယ်တစ်လီတာလျှင် ၂၁၂၀ ကျပ်၊ ယနေ့(ဇူလိုင် ၉) ရက်တွင် ၉၂ တစ်လီတာလျှင် ၁၈၈၀ ကျပ် ၊ ၉၅ တစ်လီတာလျှင် ၁၉၉၅ ကျပ် ၊ ၉၇ တစ်လီတာလျှင် ၂၃၃၅ ကျပ် ၊ ဒီဇယ် တစ်လီတာလျှင် ၂၂၄၀ ကျပ် ၊ ပရီမီယံ ဒီဇယ်တစ်လီတာလျှင် ၂၃၀၀ ကျပ် ဖြစ်ကြောင်း သိရသည်။

ပြည်တွင်း စက်သုံးဆီစျေးနှုန်းသည် အတက်အကျ ရှိနေခဲ့သော်လည်း 92 နှင့် 95 စျေးနှုန်းသည် ၂၀၀၀ အောက်တွင်သာရှိနေသေးကြောင်း သိရသည်။

ရန်ကုန်မြို့နှင့် မန္တလေးမြို့တို့တွင် ရည်ညွှန်းလက်ကားစျေးနှုန်းများနှင့် နေပြည်တော်၊ တိုင်းဒေသကြီးနှင့် ပြည်နယ်များတွင် ရည်ညွှန်းလက်လီစျေးနှုန်းများဖြင့်လည်း ရောင်းချပေးနေကြောင်း စက်သုံးဆီတင်သွင်း သိုလှောင်ဖြန့်ဖြူးခြင် းလုပ်ငန်းကြီးကြပ်ရေးကော်မတီမှ သိရသည်။

ymg/sth
#Yangon_Media_Group

#Local_News
Published - 9 July 2022

ထိုင်းနိုင်ငံသို့ မေလနှင့် ဇွန်လနှစ်လအတွင်း မြန်မာလုပ်သားတစ်သောင်းကျော် စေလွှတ်ခဲ့ကြောင်း အလုပ်သမားညွှန်ကြားမှုဦးစီးဌာနမှ သိရသည်။

အဆိုပါ နှစ်လတာကာလအတွင်း ထိုင်းနိုင်ငံတွင် အလုပ်သွားရောက်လုပ်ကိုင်မည့် အမျိုးသား ၆၂၁၃ ဦးနှင့် အမျိုးသမီး ၄၆၀၅ ဦး စုစုပေါင်း ၁၀၈၁၈ ဦးအထိ စေလွှတ်ထားကြောင်း အလုပ်သမားညွှန်ကြားမှုဦးစီးဌာန၏ ထုတ်ပြန်ထားချက်အရ သိရသည်။

ထိုင်းနိုင်ငံသို့ သွားရောက်လုပ်ကိုင်မည့် မြန်မာလုပ်သားတွေကို မြဝတီ-မဲဆောက်လမ်းကြောင်း၊ ကော့သောင်း-ရနောင်း လမ်းကြောင်းတွေမှတစ်ဆင့် ပို့ဆောင်ပေးနေခြင်းဖြစ်ကြောင်း သိရသည်။

မြန်မာ - ထိုင်း နှစ်နိုင်ငံအကြား MoU စနစ်ဖြင့် အလုပ်သမား စေလွှတ်ခြင်းလုပ်ငန်းစဉ်ကို ကိုဗစ် ၁၉ ကပ် ရောဂါကာလအတွင်း ယာယီရပ်နားထားခဲ့ရာမှ နှစ်နိုင်ငံ ညှိနှိုင်းဆောင်ရွက်မှုဖြင့် ၂၀၂၂ခုနှစ် မေလ ၁၀ ရက် နေ့မှ စတင်ကာ ပြန်လည်စေလွှတ်ခဲ့ခြင်းဖြစ်သည်။

ထိုင်းနိုင်ငံသို့ တရားမဝင်သွားရောက်လုပ်ကိုင်သူများလည်းရှိနေပြီး အလုပ်သမားအခွင့်အရေး အပြည့်အဝမရရှိကြောင်း၊ MoU စနစ်ဖြင့် တရားဝင်သွား ရောက်လုပ်ကိုင်ပါက သက်ဆိုင်ရာနိုင်ငံတွင် စနစ်တကျ နေထိုင်အလုပ်လုပ်ကိုင်နိုင်ခြင်း၊ အလုပ်သမားများ၏ ရပိုင်ခွင့်နှင့် အခွင့်အ ရေးများ နစ်နာဆုံးရှုးမှုမရှိဘဲ ရသင့်ရထိုက်သည့် အခွင့်အရေးများရရှိခံစားနိုင်ခြင်း၊ သက်ဆိုင်ရာနိုင်ငံ၏ တည်ဆဲဥပဒေများနှင့်အညီ အကာအကွယ်ရရှိနိုင်ခြင်းစသည့် အကျိုးကျေးဇူးများ ရရှိနိုင်မည်ဖြစ်ကြောင်း သိရသည်။

ymg/sth
#Yangon_Media_Group

Published 9 July 2022

ဂျပန်ပြည်သူတွေဟာ လုပ်ကြံသတ်ဖြတ်မှုကြောင့် ကွယ်လွန်သွားတဲ့ ဝန်ကြီးချုပ်ဟောင်း ရှင်ဇိုအာဘေး လုပ်ကြံခံရတဲ့ နာယာမြို့က နေရာမှာ စုဝေးရောက်ရှိလာကြပြီး လွမ်းသူ့ပန်းစည်းတွေ ချခဲ့ကြပါတယ်။

ဂျပန်နိုင်ငံရဲ့ လူသိအများဆုံး နိုင်ငံရေးသမားဖြစ်တဲ့ သူဟာ ရွေးကောက်ပွဲအတွက် မဲဆွယ်စည်းရုံးနေစဉ် သေနတ်သမားက သတ်ဖြတ်ခဲ့ခြင်းဖြစ်ပါတယ်။

ဂျပန်နိုင်ငံဟာ ကမ္ဘာပေါ်မှာ အကြမ်းဖက်မှုဖြစ်ပွားမှု နည်းပါးပြီး တင်းကြပ်တဲ့ လက်နက်ဥပဒေရှိတဲ့နိုင်ငံတစ်နိုင်ငံဖြစ်လို့  ယခုလို လုပ်ကြံသတ်ဖြတ်မှုဟာ တစ်ကမ္ဘာလုံးကို အံဩတုန်လှုပ်သွားစေခဲ့ပါတယ်။

Source: AFP

#Local_News
Published_9 July 2022

ဧရာဝတီတိုင်းဒေသကြီး၏ မြို့တော်ပုသိမ်မြို့ရှိ စက်မှုမြို့တော်တွင် အမေရိကန်ဒေါ်လာ ၂ ဒသမ ၇၇၀ သန်း ရင်းနှီးမည်တည်သည့် အထည်ချုပ်စက်ရုံတစ်ခု စတင်လည်ပတ်ပြီဖြစ်ကြောင်း တိုင်းဒေသကြီးရင်းနှီးမြုပ်နှံမှုကော်မတီက သိရသည်။

ယင်းမှာ Shuang Xi(Pathein) Garment Co..,Ltd မှ လာရောက်ရင်းနှီးမြှုပ်နှံခြင်းဖြစ်ပြီး အထည်ချုပ်လုပ်ငန်းအတွက်ကုန်ကြမ်းပစ္စည်းများကို ပြည်ပမှ မှာယူတင်သွင်းကာ ကုန်ချောအဖြစ် JAKO - UHL.Sport အမှတ်တံဆိပ်
အဝတ်အထည်များ ထုတ်လုပ်၍ ပြည်ပနိုင်ငံများသို့ တင်ပိုရောင်းချသွားမည်ဖြစ်ကြောင်း သိရသည်။

လက်ရှိစက်ရုံတွင်ပြည်ပနိုင်ငံသား(၃)ဦး၊ လုပ်သားဦးရေ ၄၆၈ ဦးဖြင့် လုပ်ကိုင်လျက်ရှိသော်လည်း စမ်းသပ်လည်ပတ်မှုနောက်ပိုင်းတွင် လုပ်သားအင်အား ၁၃၀၀ ကျော်ထိ ထပ်တိုးမြှင့်ဆောင်ရွက်သွားမည်ဖြစ်ကြောင်းသိရသည်။

ymg/mt
#Yangon_Media_Group

#Local_News
Published - 9 July2022

နှစ်နာရီကျော်သွားလာနိုင်သည့် ဒိုင်နိုဆောစက်ရုပ်ဖန်တီးမှုကိုဇူလိုင်လ(၈)ရက်တွင် အချောသတ်ပြီးစီးသွားပြီဖြစ်ကြောင်း တီထွင်ဖန်တီးသူ ကိုအောင်ကျော်လှိုင်ထံမှ သိရသည်၊၊

မျိုးတုန်းပျောက်ကွယ်သွားသည့် ဒိုင်နိုဆောအမျိုးအစားထဲတွင် ပါဝင်သည့် ထရီကာတော့ သတ္တဝါပုံစံအတိုင်းစက်ရုပ်တစ်ခုကို ဂျစ်ကားထုတ်လုပ်ရေးလုပ်ငန်းတွင် လုပ်ကိုင်ဖူးသည့်ကိုအောင်ကျော်လှိုင်က တီထွင်ဖန်တီးလိုက်ခြင်းဖြစ်သည်၊၊

ပစ္စည်းရှားပါးမှုကြောင့် လနှင့်ချီအချိန်ကြာမြင့်ခဲ့ပြီး ဘက်ထရီကို အသုံးပြုဆောင်ရွက်ထားကာ လက်များခြေထောက်များက သက်ရှိသတ္တဝါများအတိုင်းသွားလာနိုင်အောင် ဖန်တီးထားသည်ဟုဆိုသည်၊၊

ယခုတီထွင်လိုက်သည့် စက်ရုပ်သည် ဆိုင်ကယ်လိုမျိုး မောင်းနှင်သွားလာနိုင်ပြီး ကလေးရော၊ လူကြီးပါ စီးနှင်းနိုင်ကြောင်းနှင့် ယခုဖန်တီးထားသည့် ဒိုင်နိုဆောစက်ရုပ်ကို ပြင်ဦးလွင်ရှိဒိုင်နိုဆောဥယျာဉ်တွင်ထားရှိသွားမည်ဟုတီထွင်ဖန်တီးသူ ကိုအောင်ကျော်လှိုင်၏ ပြောပြချက်အရ သိရသည်၊၊

ymg/tthl
#Yangon_Media_Group

#WorldNews
Published 9 July 2022

ဇူလိုင် ၄ ရက်နေ့ အမေရိကန်လွတ်လပ်ရေးနေ့ပွဲမှာ သေနတ်ပစ်ခတ်မှုကျူးလွန်ခဲ့သူရဲ့အဖေက သားဖြစ်သူပြစ်မှု မကျူးလွန်ခင်ညကမှ ဒိန်းမတ်ကပစ်ခတ်မှုအကြောင်းကို သူတို့နှစ်ယောက်ပြောဆိုနေခဲ့ကြောင်း ဗုဒ္ဓဟူးနေ့ကဖွင့်ဟခဲ့ပြီး သူ့ရဲ့သားဖြစ်သူ သေနတ်ဘယ်လိုရရှိလာသလဲဆိုတဲ့အပေါ် သူ့မှာအပြစ်မရှိကြောင်း ရှင်းပြခဲ့ပါတယ်။

စိတ်ပိုင်းဆိုင်ရာ ပြဿနာရှိနေတဲ့သားဖြစ်သူကို ကူညီပြီးသေနတ်ဝယ်ပေးခဲ့တယ်ဆိုတဲ့ စွပ်စွဲချက်တွေကိုဖြေရှင်းဖို့ အဖေဖြစ်သူ'ရောဘတ်ခရိုင်မိုဂျူနီယာ'က 'အာရ်ကယ်လီ'ရဲ့ရှေ့နေတစ်ဦးကို ခေါ်ယူခဲ့ပါတယ်။

သူနဲ့ သားဖြစ်သူ 'ရောဘတ်ခရိုင်မို၃'တို့ဟာ တနင်္ဂနွေနေ့က ကိုပင်ဟေဂင်ဈေးဝယ်စင်တာ အပြင်ဘက်က ပစ်ခတ်မှုအကြောင်း ဆွေးနွေးခဲ့ကြကြောင်း ပြန်ပြောပြခဲ့ပါတယ်။

သူ့သားက ဒိန်းမတ်ကသေနတ်သမားကို အရူးကောင်လို့တောင်ခေါ်ခဲ့သေးတယ်လို့ ဆိုပါတယ်။

'ရောဘတ်ခရိုင်မိုဂျူနီယာ'က အရင်က မြို့တော်ဝန်လောင်းနေရာလျှောက်ခဲ့ဖူးသူဖြစ်ပြီး ပေါင်မုန့်အသားညှပ်ဆိုင်ဖွင့်ခဲ့သူဖြစ်ပါတယ်။

အခုတော့ သားဖြစ်သူကို သေနတ်ကိုင်ဆောင်ခွင့်လိုင်စင်ရရှိအောင် အားပေးကူညီခဲ့တယ်လို့ စွပ်စွဲခံနေရတာဖြစ်ပါတယ်။

ထိုလိုင်စင်ဖြင့် 'ခရိုင်မို၃'ဟာ ပြစ်မှုကျူးလွန်ခဲ့တဲ့ သေနတ်အပါအဝင် သေနတ် ၄ လက်ဝယ်ယူခဲ့ပါတယ်။

၂၀၁၉ ခုနှစ်က ဆွေမျိုးသားချင်းတွေကို အန္တရာယ်ခြိမ်းခြောက်မှု ပြုလုပ်ခဲ့တယ်လို့ အာဏာပိုင်တွေကသတ်မှတ်ပြီး ၃ လအကြာမှာပဲ သားဖြစ်သူအတွက် သေနတ်လိုင်စင်လျှောက်ထားခွင့်ကို ထောက်ခံပေးခဲ့တာဖြစ်ပါတယ်။

သေနတ်သမားရဲ့အိမ်မှာ ရဲတွေက ဓားရှည်တစ်ချောင်းနဲ့ ဓားတို ၁၅ ချောင်းတွေ့ရှိခဲ့ပေမယ့် အဖေဖြစ်သူကတော့ ဒါဟာ လူငယ်သဘာဝ စုဆောင်းသိမ်းဆည်းခြင်းသာဖြစ်ကြောင်း ရှင်းပြခဲ့ပါတယ်။

သေနတ်ကိုင်ဆောင်ခွင့် လိုင်စင်ထောက်ခံပေးတာက သေနတ်ပစ်ကွင်းကိုသွားပြီးလေ့ကျင့်ဖို့ထင်တာကြောင့်ဖြစ်ကြောင်း ပြောပြခဲ့ပြီး သားကတော့ AR-15 သေနတ်ကို ဝယ်ယူကာ ပစ်ခတ်ခဲ့တာဖြစ်ပါတယ်။

"သူ့ဘာသာ အဲဒီကိုကားမောင်းသွားတယ်၊ သူ့ဘာသာမှာတယ်၊ သူ့ဘာသာယူသွားတယ်၊ ကျွန်တော်နဲ့ဘာမှမဆိုင်ပါဘူး၊ သူတို့က ကျွန်တော်ကူညီအားပေးနေတယ်လို့ ထင်နေကြတယ်၊ ကျွန်တော်ဒီမှာပဲ တစ်ချိန်လုံးနေလာပြီး ဆက်ပြီးလည်းနေသွားမှာပါ၊ ကျွန်တော်အမှားမလုပ်ထားတာကြောင့် ခေါင်းမော့ရင်ကော့ပြီးနေနိုင်ပါတယ်"လို့ 'ရောဘတ်ခရိုင်မိုဂျူနီယာ'က ရှင်းပြသွားပါတယ်။

အဖေက သူ့သားကိုအပြည့်အဝထောက်ခံပြီး တရားခွင်အားလုံးလိုက်ပါတက်ရောက်မှာဖြစ်ပေမယ့် ဒီအဖြစ်အပျက်ကိုတော့ မကျေနပ်ဘဲရှိနေပါတယ်။

"သူ့ကို ထောင်ဒဏ်အကြာကြီးချမှတ်စေချင်ပါတယ်၊ ဒါဘဝပါပဲ၊ ကိုယ်လုပ်ခဲ့တာအတွက် ပြန်ပြီးအကျိုးခံစားရမှာပါ၊ သူ့မှာစိတ်ပိုင်းဆိုင်ရာပြဿနာတွေရှိနေပါတယ်၊ ကျွန်တော်သိပ်ပြီး သတိမထားလိုက်မိဘူး" လို့ ဆိုပါတယ်။

သူ့သားက ရန်လိုမုန်းတီးစိတ်နဲ့ ပြစ်မှုကျူးလွန်ခဲ့တာမဟုတ်ကြောင်း၊ အဲဒီသတင်းကိုကြားတော့ ကျွန်တော်လည်း အတော်ထိတ်လန့်သွားပါတယ်လို့ ပြောပြသွားပါတယ်။

Source: New York Post
#Yangon_Media_Group

#Local_News
Published _ 9 June 2022

ထိုင်းနိုင်ငံသို့ လေ့လာရေးခရီးသွားရောက်ခဲ့သည့် ၂၀၂၂ ခုနှစ် တက္ကသိုလ်ဝင်တန်းစာမေးပွဲ၌ ထူးချွန်စွာအောင်မြင်ခဲ့သည့် ကျောင်းသား၊ ကျောင်းသူ ၃၃ ဦးသည် ဇူလိုင် ၆ ရက်က ထိုင်းနိုင်ငံ၊ သုဝဏဘူမိလေဆိပ်မှတဆင့် စင်ကာပူနိုင်ငံသို့ လေ့လာရေးခရီးဆက်လက်သွားရောက်ခဲ့သည်။

သွားရောက်ရာတွင် စင်ကာပူနိုင်ငံ၊ ချန်ဂီလေဆိပ်သို့ရောက်ရှိလာသည့် ထူးချွန်ကျောင်းသား၊ ကျောင်းသူများလေ့လာရေးအဖွဲ့အား စင်ကာပူနိုင်ငံရှိ မြန်မာသံရုံးနှင့်စစ်သံရုံးတို့မှ တာဝန်ရှိသူများက ကြိုဆိုနှုတ်ဆက်ကြသည်။

ထူးချွန်ကျောင်းသားကျောင်းသူ လေ့လာရေးအဖွဲ့သည် မြန်မာသံရုံး၌ သံရုံးယာယီတာဝန်ခံဦးစိုးမြင့်က လေ့လာရေးခရီးစဉ်နှင့် ပတ်သက်၍ ရှင်းလင်းပြောကြားကာ ညစာဖြင့် တည်ခင်းဧည့်ခံပြီးနောက် ထူးချွန်ကျောင်းသားကျောင်းသူများသည် Gardens by the Bay သို့ သွားရောက်လည်ပတ်ကြသည်။

ယင်းပြင် ဇူလိုင်လ ၇ ရက် နံနက်ပိုင်းတွင် စင်္ကာပူနိုင်ငံရှိ Sentosa Beach, Palawan Beach နှင့် Siloso Beach များသို့ သွားရောက်လည်ပတ်ကာ အမှတ်တရဓာတ်ပုံများ ရိုက်ကူးကြသည်။

မွန်းလွဲပိုင်း၌ Universal Studios Singapore သို့ သွားရောက်လည်ပတ်ပြီး Waterfront Station မှမိုးပျံရထားစီးနင်း၍ VivoCity Station သို့သွားရောက်ကာ ကားများဖြင့် Science Center Singapore သိပ္ပံပြတိုက်သို့ သွားရောက်၍ လှည့်လည်ကြည့်ရှုလေ့လာကြသည်။

ယင်းနောက် Nanyang Technological University-NTU သို့ ရောက်ရှိရာ တာဝန်ရှိသူများက ကြိုဆိုကာ တက္ကသိုလ်အတွင်းလှည့်လည်ရှင်းလင်းပြသကာ Vivo City သို့လည်းသွားရောက်လည်ပတ်၍ စျေးဝယ်ခဲ့ကြသည်။

ထို့အတူ Time Capsule တွင် စင်္ကာပူနိုင်ငံ၏ ဖြစ်ပေါ်တိုးတက်လာမှုသမိုင်းကြောင်းအား လေ့လာကြည့်ရှုကာ Singapore Flyer စီးနင်း၍ စင်ကာပူတစ်မြိုလုံး၏ ညအလှရှုခင်းကို ခံစားကြည့်ရှုကြသည်။

အလားတူ ဇူလိုင် ၈ ရက်တွင် Lavender ဘူတာမှ Raffles Place ဘူတာသို့ MRT ရထားစီးနင်း၍ စင်္ကာပူမြစ်ဘေးရှိ Boat Quay သို့ သွားရောက်လည်ပတ်ခဲ့ကြသည်။ ထို့နောက် Fullerton Hotel နှင့် Asian Civilisations Museum ကြားရှိ Mirror Balls အားလေ့လာကြည့်ရှုပြီး စင်ကာပူနိုင်ငံ၏ အထိမ်းအမှတ်ဖြစ်သည့် Merlion ရုပ်ထုပန်းခြံ၊ East Coast Park ပန်းခြံတို့သို့ သွားရောက်လည်ပတ်ကြသည်။

ထို့အတူ IKEA ဈေးဝယ်စင်တာသို့ သွားရောက်ခဲ့ကြပြီး ချန်ဂီလေဆိပ်ရှိ Jewel Changi Airport သို့ ရောက်ရှိလေ့လာကြကာ ညပိုင်းတွင် စင်ကာပူနိုင်ငံမှရန်ကုန်မြို့သို့ လေကြောင်းခရီးဖြင့် ပြန်လည်ထွက်ခွာခဲ့ကြကြောင်း သိရသည်။

နစက ဥက္ကဋ္ဌ၏လမ်းညွှန်ချက်အရ ၂၀၂၂ ခုနှစ် တက္ကသိုလ်ဝင်စာမေးပွဲတွင် ဝိဇ္ဇာဘာသာတွဲ၊ သိပ္ပံဘာသာတွဲ၊ ဝိပ္ပံဘာသာတွဲများတွင် မြန်မာတစ်နိုင်ငံလုံး၌ အမှတ်အများဆုံး အဆင့် ၁ မှ အဆင့် ၁၀ အတွင်း ထူးချွန်စွာအောင်မြင်ခဲ့ကြသည့် ကျောင်းသား ကျောင်းသူ ၃၃ ဦးအား ချီးမြှင့်ဂုဏ်ပြုသည့်အနေဖြင့် ဇူလိုင် ၄ ရက်မှ ၈ ရက်အထိ ထိုင်းနိုင်ငံနှင့်စင်္ကာပူနိုင်ငံများသို့ လေ့လာရေးခရီး ပို့ဆောင်ခဲ့ခြင်းဖြစ်သည်။

ymg/NN
#Yangon_Media_Group

#WorldTechnology
Published 9 July 2022

ယခုနှစ်အစောပိုင်းတုန်းက အထူ ၁.၈ မီလီမီတာသာရှိတဲ့ ကမ္ဘာ့အပါးလွှာဆုံးလက်ပတ်နာရီကို 'ဘူလ်ဂေရီ'မှထုတ်လုပ်ခဲ့ပြီး အတော်လေးသတင်းကြီးသွားခဲ့ပါတယ်။

အခုဆိုရင် 'ရစ်ချတ်မေးလ်'နဲ့ 'ဖာရာရီ'တို့ကပူးပေါင်းပြီး RM UP-01 ဖာရာရီလက်ပတ်နာရီကို ထုတ်လုပ်ခဲ့ပါတယ်။

ထိုနာရီအသစ်ဟာ 'ဘူလ်ဂေရီ'ရဲ့ Octo Finissimo Ultra လက်ပတ်နာရီထက် ၀.၀၅ မီလီမီတာ ပိုမိုပါးလွှာတာကြောင့် ကမ္ဘာ့အပါးလွှာဆုံးလက်ပတ်နာရီဂုဏ်ပုဒ်ကို ရယူလိုက်ပါပြီ။

ဖာရာရီက မမျှော်မှန်းနိုင်တဲ့ နည်းပညာတွေနဲ့ ပြောင်မြောက်လှတဲ့ လက်ပတ်နာရီဒီဇိုင်းကို ၁.၇၅ မီလီမီတာအထူနဲ့ ထုတ်လုပ်အောင်ပွဲခံသွားပါပြီလို့ 'ရစ်ချတ်မေးလ်'က ဝက်ဘ်ဆိုက်မှာဖော်ပြထားပါတယ်။

ကမ္ဘာ့စံချိန်တင်လက်ပတ်နာရီ RM UP-01 ဖာရာရီကို လိုချင်တယ်ဆိုရင်တော့ ဒေါ်လာ ၁,၈၈၈,၀၀၀ နဲ့ရောင်းချသွားမှာ ဖြစ်ပါတယ်။

"တကယ့်လက်တွေ့မှာတောင် အခြားနာရီဒီဇိုင်းတွေအတိုင်း အခြေခံလိုအပ်ချက်တွေနဲ့အညီ ထုတ်လုပ်ကြပါတယ်၊ ဒီလိုအပါးလွှာဆုံးနာရီထုတ်လုပ်ဖို့ကတော့ အသုံးပြုသူရဲ့တစ်နေ့တာဘဝမှာ လိုအပ်ချက်တွေဖြည့်ဆည်းနိုင်ဖိုစဉ်းစားရပါတယ်" လို့ ရှင်းပြသွားပါတယ်။

ထိုနာရီကိုစမ်းသပ်ထုတ်လုပ်ဖို့ စုစုပေါင်းကြာချိန် နာရီ ၆ ထောင်ကျော် ကြာမြင့်ခဲ့ပါတယ်။

အောက်ခံပြားနဲ့ စက်သွားကုပ်တို့ကို ပွတ်တိုက်မှုဒဏ်ခံနိုင်တဲ့ အလွိုင်းအမျိုးအစားဖြစ်တဲ့ အဆင့် ၅ တိုင်တေနီယမ်ဖြင့် ပြုလုပ်ထားပါတယ်။

အလွိုင်းက အဆင့် ၅ တိုင်တေနီယမ် ၉၀ ရာခိုင်နှုန်း၊ အလူမီနီယမ် ၆ ရာခိုင်နှုန်း၊ ဗနေဒီယမ် ၄ ရာခိုင်နှုန်းဖြင့် ပြုလုပ်ထားပါတယ်လို့ ဆိုပါတယ်။

အောက်ခံပြားက လေးထောင့်ဝိုင်းပုံစံထဲမှာရှိပြီး အချိန်ပြမှတ်ကတော့ အပေါ်ဘက်အလယ်တည့်တည့်မှာရှိပါတယ်။

ထိုလက်ပတ်နာရီကို ကိုယ်တိုင်ရစ်လှည့်ချိန်ညှိနိုင်ပြီး ပါဝါအားက ၄၅ နာရီကြာခံနိုင်ပါတယ်။

လုပ်ဆောင်ချက်ခလုတ်က ၁၀ နာရီနဲ့ ၁၁ နာရီလက်တံကြားမှာရှိပြီး အသုံးပြုသူတွေက ရစ်လှည့်ကာရွေးချယ်လုပ်ဆောင်နိုင်ပါတယ်။

ဒီလိုနာရီမျိုးလိုချင်တယ်ဆိုရင် လက်မြန်ခြေမြန်နဲ့ ဝယ်နိုင်အားရှိဖို့လိုတယ်လို့ ဆိုပါတယ်။

RM UP-01 နာရီကို အခု ၁၅၀ သာထုတ်လုပ်ဖို့ကန့်သတ်ထားပါတယ်။

'ဘူလ်ဂေရီ'က Octo Finissimo Ultra နာရီကိုထုတ်လုပ်ပြီး ၃ လအကြာမှာပဲ ဖာရာရီရဲ့နာရီအသစ်ထွက်ပေါ်လာတာဖြစ်ပါတယ်။

Source: Reuters
#Yangon_Media_Group