#LocalNews
Published - 15 Feb 2022
အခေါက်ရွှေ တစ်ကျပ်သားကို မြန်မာ ကျပ်ငွေ ၁၉ သိန်းကျော် ပြန်ဖြစ်လာကြောင်း ရန်ကုန်တိုင်းဒေသကြီး ရွှေလုပ်ငန်းရှင်များအသင်း ၏ ထုတ်ပြန်ချက်အရ သိရသည်။

ဖေဖော်ဝါရီလ ၁၄ ရက် တွင် အခေါက်ရွှေ တစ်ကျပ်သားလျှင် ၁၈ သိန်း ၉ သောင်းခွဲ ဖြင့် ဈေးပိတ်ခဲ့ရာမှ ယနေ့ ဖေဖော်ဝါရီလ ၁၅ ရက် နံနက်တွင် တစ်ကျပ်သားလျှင် ၁၉ သိန်း ရှစ်ထောင် ဖြင့် ဈေးဖွင့်ခဲ့ကာ ၁၉ သိန်း သုံးထောင်ဖြင့် ဈေးပြန်ပိတ်ခဲ့ခြင်း ဖြစ်ကြောင်း သိရသည်။

“ကမ္ဘာ့ရွှေဈေးတက်တယ်လေ။ဒါကြောင့် ပြည်တွင်းရွှေဈေးပါ တက်လာတဲ့သဘောပေါ့။ ကမ္ဘာ့နိုင်ငံရေး ကိစ္စတွေလည်း ပါတယ်။ ယူကရိန်းနဲ့ ရုရှားတို့ အခြေအနေတွေကြောင့် ကမ္ဘာ့ရွှေဈေးကဆက်တက်မယ့်သဘောရှိနေတယ်လို့ သုံးသပ်နေကြတယ်။အခုရွှေဈေးက ၁၉ သိန်းကျော်သွားတော့ ဝယ်ရောင်းလုပ်တဲ့သူတွေအကြိုက်ဈေးဖြစ်နေတော့ ပြန်ထုတ်ရောင်းလာကြပြန်တယ်” ဟု ရန်ကုန်တိုင်းရွှေလုပ်ငန်းရှင်များအသင်း ဥက္ကဋ္ဌ ဦးမျိုးမြင့်က YMG ကို ပြောသည်။

ပြည်တွင်းရွှေဈေးကွက်တွင် နေ့စဉ် ပုံမှန်ရွှေပိဿာချိန် ၅၀ ခန့်ကို အရောင်းအဝယ် လုပ်နေကြခြင်း ဖြစ်ကြောင်း၊ နောက်ရက်များတွင်လည်း တက်နိုင်သည့် အခြေအနေတွင် ရှိနေသော်လည်း ရွှေ အဝယ်မလိုက်နိုင်သေးကြောင်းလည်း ရွှေကုန်သည်များက ခန့်မှန်းထားကြသည်။

ymg/mt
#Yangon_Media_Group

#DailyNews
Published - 15 Feb 2022

၁။ မြောက်ဦးဒေသ ကမ္ဘာ့အမွေအနှစ်စာရင်းဝင်ရေး ရှေ့ပြေးကွင်းဆင်းမှုလုပ်ငန်းအကြောင်း ပြည်နယ်အစိုးရကိုတင်ပြမည်။

၂။ ထိုင်းနိုင်ငံမှ မြန်မာ MOU လုပ်သား သိန်းနှင့်ချီခေါ်ယူမည်ဆိုသော်လည်း ကိုဗစ်စည်းကမ်းများအရ တစ်လလျှင် ၇,၅၀၀ ခန့်သာ ပိုနိုင်မည်။

၃။ နေ့စဉ်မိုးလေဝသသတင်း။

၄။ မီးတောင်ပေါက်ကွဲ၍ နှစ်ပေါင်း ၁,၄၀၀ ပြာပုံအောက်ရောက်ခဲ့သည့် မိုင်ယာရွာကလေးကို ရှေးဟောင်းပြတိုက်အသွင်ဖန်တီး.....အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

Published 15 Feb 2022

ဂျပန်နိုင်ငံခြားရေးဝန်ကြီးဟာ ဇန်နဝါရီ ၁၄ရက် တနင်္လာနေ့က ကမ္ဘောဒီးယားဝန်ကြီးချုပ်ဟွန်ဆန်ကသူ့ရဲ့ အရိုက်အရာကို ဆက်ခံသူအဖြစ်ခန့်အပ်ခံထားရတဲ့ သူ့သားဖြစ်သူနှင့် တိုကျိမှာတွေ့ဆုံပြီး မြန်မာနိုင်ငံအခြေအနေနှင့်ပတ်သက်ပြီး အတူတကွ ပူးပေါင်းဆောင်ရွက်ကြဖို့ သဘောတူညီခဲ့ကြတယ်လို့ ဂျပန်အရာရှိတွေကပြောပါတယ်။

ကမ္ဘောဒီးယားစစ်တပ်ရဲ့လက်ရှိ တပ်မှူးတစ်ဦးဖြစ်တဲ့ ဟွန်မန်နက်ဟာ ဖခင်ဖြစ်သူ ဟွန်ဆန်နှင့်အတူ ဇန်နဝါရီလတုန်းက မြန်မာနိုင်ငံကို အတူသွားရောက်ခဲ့သူဖြစ်ပါတယ်။ ဟွန်ဆန်ဟာ ပြီးခဲ့တဲ့နှစ်မြန်မာစစ်တပ်က အာဏာရယူပြီးနောက်ပိုင်း ပထမဆုံးလာရောက်တဲ့ နိုင်ငံခြားတိုင်းပြည်တစ်ပြည်ရဲ့ခေါင်းဆောင်တစ်ဦးပါ။

တိုကျိုမှာ ဟွန်မန်နက်နှင့်ပြောဆိုဆွေးနွေးခဲ့စဉ်အတွင်း  ဂျပန်နှင့်ကမ္ဘောဒီးယားတို့ရဲ့ ခိုင်မာတဲ့ဆက်ဆံရေးနှင့် သူတို့ရဲ့ မြန်မာနိုင်ငံနှင့်နီးကပ်စွာဆက်ဆံရေးတို့အပါအဝင် အခြားသော ဒေသဆိုင်ရာ အရေးကိစ္စတွေကို ဂျပန်နိုင်ငံခြားရေးဝန်ကြီး ယိုရှီမာဆာ ဟာရာရှီက ပြောဆိုဆွေးနွေးခဲ့တယ်လို့ ဂျပန်နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။

ကမ္ဘောဒီးယားဟာ လက်ရှိအာဆီယံအလှည့်ကျဥက္ကဋ္ဌဖြစ်ပြီး မြန်မာအကျပ်အတည်းလျော့ကျသွားစေဖို့ အာဆီယံရဲ့ ကြိုးစားအားထုတ်မှုမှာ ဟွန်ဆန်က ဦးဆောင်ပေးနေပါတယ်။

ဟာရာရှီက ဟွန်ဆန်ရဲ့ မြန်မာခရီးစဉ်ကို ကောင်းမွန်တဲ့ကြိုးစားအားထုတ်မှုတစ်ခုအဖြစ် ချီးကျူးလိုက်ပါတယ်။

ဟွန်ဆန်ဟာ အာဏာကို ၃၆နှစ်စွဲကိုင်ရယူထားသူဖြစ်ပြီး ၂၀၂၈ခုနှစ်အထိ ဝန်ကြီးချုပ်ရာထူးဆက်လက်ထမ်းဆောင်လိုတဲ့ ရည်ရွယ်ချက်ရှိပါတယ်။သူ့သားဟွန်မန်နက်ကို သူ့အရိုက်အရာဆက်ခံသူဖြစ် ထောက်ခံအတည်ပြုပေးထားပါတယ်။

Source ABC News

#LocalNews
Published - 15 Feb 2022

ရခိုင်ပြည်နယ် စစ်တွေမြို့မှ ရန်ကုန်မြို့သို့ လေယာဉ်စီးနင်းလိုက်ပါကြမည့်သူများအား ဖေဖော်ဝါရီလ ၁၄ ရက်တွင် ကိုဗစ်စစ်ဆေးမှုစတင်ရာ တစ်နေ့တည်းပိုးတွေ့သူ ၁၂ ဦးရှိကြောင်း ရခိုင်ပြည်နယ်အစိုးရအဖွဲ့က သိရသည်။

စစ်တွေမှ ရန်ကုန်သို့ လေယာဉ်စီးနင်းလိုက်ပါမည့်သူ ၁၇၅ ဦးကိုစစ်ဆေးခဲ့သည့်အနက် ၁၂ ဦးတွင် ပိုးတွေ့ရှိခဲ့ခြင်းဖြစ်ကြောင်း ပြည်နယ်ကောင်စီပြောရေးဆိုခွင့်ရှိသူ ဦးလှသိန်းက ပြောသည်။

"ပိုးတွေ့သူတွေကို MOH သတ်မှတ်ချက် version T အရ ဆေးရုံပို့ပြီး ကုသမှုခံယူစေပါတယ်။ဒါ့အပြင် ဆက်စပ်သူတွေကို HQ ထားပြီးတော့ သက်ဆိုင်ရာကလည်း မျက်ခြေမပြတ် ဆောင်ရွက်နေပါတယ်။ ပိုးတွေ့နမူနာတွေကို omicron ဟုတ် မဟုတ် စစ်ဆေးဖို့ စစ်တွေကနေ ရန်ကုန်ကို ပို့ထားတယ်"ဟု ယင်းက ဆိုသည်။

အိုမီခရွန်ကိုဗစ်ပိုးကူးစက်ခံရမှုမြင့်တက်လာနေသည့်အတွက် ယနေ့ ဖေဖော်ဝါရီလ ၁၅ ရက်ကစ၍ ပြည်တွင်းလေကြောင်းလိုင်းဖြင့် ခရီးသွားမည့်သူများအားလုံး ကိုဗစ်ကာကွယ်ဆေးထိုးပြီးသည်ဖြစ်စေ၊ မထိုးပြီးသည်ဖြစ်စေ ကိုဗစ်စစ်ဆေးခြင်းကိုခံယူပြီးမှ လေယာဉ်စီးခွင့်ရရှိမည်ဖြစ်ကြောင်း ကျန်းမာရေးဝန်ကြီးဌာနက ထုတ်ပြန်ထားသည်။

ရခိုင်ပြည်နယ်တွင် ယခုဖေဖော်ဝါရီလ ၁ ရက်မှ ဖေဖော်ဝါရီလ ၁၄ ရက်ထိ စစ်တွေ၊ ကျောက်ဖြူ၊ မောင်တော၊ သံတွဲ၊ မြေပုံနှင့် အမ်းမြို့နယ်တို့တွင် ကိုဗစ်ပိုးရှိသူအရေအတွက် မြင့်တက်လာရာတွင် စစ်တွေမြို့မှာ အများဆုံးဖြစ်ကြောင်း ၊
လက်ရှိတွင် စစ်တွေ၌ ၁၉ ဦး၊ မြေပုံ၌ ၁ ဦး၊ ကျောက်ဖြူ၌ ၁ ဦး ၊ သံတွဲ၌ ၂ ဦး ရှိကြောင်း ပြည်နယ်စီမံအုပ်ချုပ်ရေးကောင်စီက ထုတ်ပြန်ထားသည်။

ymg/mt
#Yangon_Media_Group

#LocalNews
Published- 15 Feb 2022

ဖေဖော်ဝါရီလ ၁၄ ရက် နံနက် ၇ နာရီ ခန့်က ရှမ်းပြည်တိုးတက်ရေးပါတီ SSPP/SSA မှ ရှမ်းပြည်နယ်မြောက်ပိုင်း နမ့်ခမ်းမြို့နယ် နမ့်ခမ်း မုံးဝီး လမ်းမဘေးမှာ မူးယစ်ဆေးဝါးစွဲနေသူများကို သွားရောက်ဖမ်းဆီးခဲ့တယ်လို့ သိရပါတယ်။

SSPP/SSA မှ တာဝန်ရှိသူတစ်ဦးက " ဒေသခံမိဘပြည်သူများရဲ့ တိုင်တန်းချက်အရ မူးယစ်ဆေးဝါးသုံးစွဲသူ ၊ သူခိုး ၊ ဓားပြ ပေါများလာတဲ့အတွက် တစ်ယောက်ထဲ အပြင်သွားရင်တောင် ကြောက်နေရတယ်၊ ဒါကြောင့် ကျွန်တော်တို့မှာ တာဝန်ရှိတဲ့အတွက် သူတို့ရှိတဲ့နေရာတွေကို အချိန်ယူပြီးလိုက်လှံစုံစမ်းတယ် ၊ နေရာအတိကျသိတော့ ကျွန်တော်တို့ဘက်နဲ့ ဒေသခံပြည်သူတွေပေါင်းပြီး သွားရောက်စစ်ဆေးလိုက်ချိန်မှာ မူးယစ်ဆေးဝါးသုံးစွဲသူ ကျား ( ၉) ယောက်နဲ့ ဆက်စပ် ပစ္စည်းများကို ဖမ်းဆီးခဲ့ရတယ် " လို့ ပြောကြားပါတယ်။

ဖေဖော်ဝါရီလ ၉ ရက်နေ့ကလည်း ရှမ်းပြည်တိုးတက်ရေးပါတီ SSPP/SSA မှ မူဆယ်မြို့နယ် ပန်ခမ်းကျေးရွာအုပ်စု တွန်ဟူးချိုကျေးရွာရှိ တောင်ကြောပေါ်၌ မူးယစ်ဆေးဝါးရောင်းဝယ်သုံးစွဲသူ ( ၈ )ဦးနှင့်အတူ ဆက်စပ်ပစ္စည်းများကိုလည်း ဖမ်းဆီးထိန်းသိမ်းထားတယ်လို့ သိရပါတယ်။

ဒေသအတွင်းလှုပ်ရှားနေသော ရှမ်းပြည်တိုးတက်ရေးပါတီ SSPP/SSA နဲ့ ပြည်သူများပူးပေါင်းပြီး မူးယစ်ဆေးဝါးရောင်းဝယ်ဖောက်ကားသူ၊ သုံးစွဲသူများကို ပြင်းပြင်းထန်ထန် စစ်ဆေးဖမ်းဆီးမှုများ ပြုလုပ်လျက်ရှိပြီး နောင်များတွင်လည်း မူးယစ်ဆေး၏ ဆိုးကျိုးနှင့်ပြဿနာများ လျော့ကျစေရေးအတွက် ရှမ်းပြည်တိုးတက်ရေးပါတီ SSPP/SSA နှင့် ဒေသခံပြည်သူများ အတူတကွပူးပေါင်းပြီး နှိမ်နှင်းသွားမယ်လို့ သိရပါတယ်။

မူးယစ်ဆေးဝါးနှင့်ပက်သက်ပြီး ဖမ်းဆီးရမိသူများကို ရှမ်းပြည်တိုးတက်ရေးပါတီ SSPP/SSA မှ ချမှတ်ထားသော စည်းမျဉ်းစည်းကမ်းအတိုင်း မူးယစ်ဆေးဝါး၏ ဆိုးကျိုး အသိပညာပေးခြင်း၊ သတိပေးခြင်း နှင့် ပြစ်မှုအလိုက် ထောင်ဒဏ်ချမှတ်ခြင်းများ ပြုလုပ်သွားမယ်လို့ သိရပါတယ်။

ymg/hm
#Yangon_Media_Group

#LocalNews
Published - 15 Feb 2022

ညောင်သုံးပင်ဆရာ တော်ဘုရားကြီး၏ ကြွင်းကျန်သောရုပ်ကလပ်ကို ဘန်ကောက်မှ မန္တလေးသို့ (ဖေ ဖော်ဝါရီလ ၁၇ ရက် (ကြာသာပတေးနေ့)တွင် စင်းလုံးဌား လေယာဥ်ဖြင့် ပြန်လည်ပင့်ဆောင်သွားမှာဖြစ်တယ်လို့ သိရပါတယ်။

အဆိုပါ နေ့တွင်ပင် မန္တလေးမှ ဒါယိကာ၊ ဒါယိကာမများ၏ ဖူးမြော်အပူဇော်ခံပြီး မန္တ လေးမြို့ မှ တစ်ဆင့် မိုးကုတ်မြို့ ညောင်သုံးပင်ကျောင်းတိုက်သို့ နေ့ချင်းဆက်လက်ပင့်ဆောင်မှာဖြစ်တယ်လို့ သိရပါတယ်။

ဆရာတော်ဘုရားကြီး၏ ရုပ်ကလပ်အား မိုးကုတ်မြို့ညောင်သုံးပင်ကျောင်းတိုက်၌ (၂)ပတ်တာ အဖူးမြော်ခံထားရှိကာ အန္တိမဈပနကို ကျင်းပပူဇော်သွားမှာဖြစ်ပြီး အစီစဉ်အသေးစိတ်ကို ထပ်မံကြေညာ အသိပေးသွားမယ်လို့ လည်း ဆရာတော်ဘုရားကြီး၏ ဒါယိကာ၊ ဒါယိကာမများထံမှ သိရပါတယ်။

မိုးကုတ်မြို့၊ ညောင်သုံးပင်သာမဏေကျော်စာသင်တိုက်ဆရာတော် နိုင်ငံတော်သံဃမဟာနာယကအဖွဲ့ (တွဲဖက်အကျိုးတော်ဆောင်) အဂ္ဂမဟာပဏ္ဍိတ အဂ္ဂမဟာဂန္ထဝါစကပဏ္ဍိတ အဂ္ဂမဟာသဒ္ဓမ္မဇောတိကဓဇ ဓမ္မကထိကဗဟုဇနဟိတဓရ ဆရာတော် ဒေါက်တာ
ဘဒ္ဒန္တတေဇောသာရ သက် တော်(၅၉)နှစ်သည် ထိုင်းနိုင်ငံ၊ ဘန်ကောက်မြို့ ၌ အသဲ ရောဂါ ကြောင့်ဆေးကုသမှုခံယူ နေစဥ် ဖေ ဖော်ဝါရီ ၁၄ ရက်၊ နံနက် (၁၂ နာရီ ၅၄ မိနစ်)အချိန်တွင် ဘဝနတ်ထံပျံလွန် တော်မူသွားခဲ့တာဖြစ်ပါတယ်။

Photo - Internet

ymg/kg
#Yangon_Media_Group 

#LocalNews
Published_ 15 Feb 2022

၂၀၂၁ ခုနှစ် အစောပိုင်းကစပြီး ရှမ်းပြည်နယ်မြောက်ပိုင်းမှာ လူပေါင်း ၈ သောင်း နီးပါးခန့်ဟာ နေရပ်စွန့်ခွာတိမ်းရှောင်နေကြရပြီး ကလေးငယ်တွေနဲ့ မိသားစုတွေဟာ အခြေခံဝန်ဆောင်မှုတွေဖြစ်တဲ့ ပညာရေး၊ ကျန်းမာရေးစောင့်ရှောက်မှု၊ ရေနဲ့သန့်ရှင်းရေး ဝန်ဆောင်မှုတွေကို အချိန်မီရရှိအသုံးပြုနိုင်ဖို့ အခက်အခဲတွေရှိနေတယ်လို့ ယူနီဆက်ရဲ့ ထုတ်ပြန်ချက်မှာ ဖော်ပြထားပါတယ်။

ယူနီဆက်က မြေပြင်မှာလက်တွေ့ကွင်းဆင်းပြီး လိုအပ်နေတဲ့ကလေးငယ်တွေ အတွက် မရှိမဖြစ်အရေးပါတဲ့ပစ္စည်းတွေကို ထောက်ပံ့ဖြန့်ဝေးပေးလျှက်ရှိပါတယ်လို့ လာရှိးမြို့ရှိ ယူနီဆက်ရုံးခွဲတာဝန်ခံဖြစ်သူ ကိုလှိုင်မင်းဦးက ရှင်းပြပါတယ်။

မြန်မာနိုင်ငံတွင် မြင့်တက်လာသော ပဋိပက္ခများနှင့် အကြမ်းဖက်မှုများ၊ ကူဗစ်-၁၉ ကူးစက်ရောဂါ၊ ရာသီဥတုဆိုင်ရာ ဘေးအန္တရာယ်များကြောင့် ကလေးသူငယ် ၅ သန်းအပါအဝင် လူသားချင်းစာနာမှု အကူအညီ လိုအပ်နေသည့် ခန့်မှန်းခြေလူဦးရေ ၁၄.၄ သန်းခန့် ရှိလာနိုင်တယ်လို့ ယူနီဆက်က ခန့်မှန်းထားပါတယ်။

ယူနီဆက်သည် မြန်မာနိုင်ငံတစ်ဝန်းရှိမြို့နယ် ၈၈ ခုတွင် လုပ်ဆောင်လျက်ရှိသော မိခင်၊ မွေးကင်းစကလေးနှင့် ကလေးသူငယ်ကျန်းမာရေးနှင့် HIV စီမံချက်များ တိုးချဲ့ရန်အတွက် ထပ်တိုးရန်ပုံငွေ အမေရိကန်ဒေါ်လာ ၁၅ သန်း နှင့် လူပေါင်း ၁ သန်းကျော် အတွက် အရေးပါသော တစ်ကိုယ်ရေသန့်ရှင်းရေး ထောက်ပံ့ပစ္စည်းများနှင့် ဝန်ဆောင်မှုများအပါအဝင် သန့်ရှင်းသောသောက်ရေ၊ ဘေးကင်းစိတ်ချရသော သန့်ရှင်းရေးဝန်ဆောင်မှုများ ပေးနိုင်ရန်အတွက် ထပ်တိုးရန်ပုံငွေ အမေရိကန်ဒေါ်လာ ၂၉ သန်း လိုအပ်လျက်ရှိတယ်လို့ ဆိုပါတယ်။
ဓာတ်ပုံ_ UNICEF MYANMAR
ymg-mnn
#Yangon_Media_Group 

#WorldPolitics
Published - 15 February 2022

ယူကရိန်းပြည်သူပြည်သားတွေကို ဖေဖော်ဝါရီ ၁၆ ရက်နေ့တွင် နိုင်ငံတော်အလံလွှင့်ထူကြဖို့နဲ့ နိုင်ငံတော်သီချင်းသံပြိုင်သီဆိုကြဖို့ ယူကရိန်းသမ္မတ'ဗိုလိုဒီမီယာဇဲလန်စကီ'က မှာကြားလိုက်ပါတယ်။

ဖေဖော်ဝါရီ ၁၆ ရက်နေ့မှာ ရုရှားတို့စတင်ကျူးကျော်လာနိုင်တယ်လို့ အနောက်တိုင်းမီဒီယာအချို့က ဖော်ပြနေကြပါတယ်။'ဇဲလန်စကီ'က ထိုနေ့တွင် ရုရှားတိုကျူးကျော်လာမယ်မထင်ကြောင်း ခန့်မှန်းထားပြီး တိုင်းတစ်ပါးမီဒီယာတွေရဲ့ဖော်ပြချက်ကို သိပ်ပြီးယုံကြည်တဲ့ပုံမပေါ်ပါဘူး။

အမေရိကန်နဲ့ အခြားနိုင်ငံများမှအရာရှိများက ထိုနေ့တွင် ရုရှားတပ်ဖွဲ့များစတင်တိုက်ခိုက်လာနိုင်ကြောင်း သတိပေးချက်ကို အနောက်တိုင်းမီဒီယာအဖွဲ့အစည်းအများအပြားက ကိုးကားဖော်ပြနေကြတာဖြစ်ပါတယ်။

"ဖေဖော်ဝါရီ ၁၆ ရက်နေ့ကို တိုက်ပွဲခေါ်တဲ့နေ့လို့ ပြောနေကြပေမယ့် ကျွန်တော်တို့ကတော့ ညီညွတ်သောသောနေ့အဖြစ် ပြသသွားမှာပါ။ နိုင်ငံတော်အလံတွေကိုင်၊ အဝါရောင်နဲ့အပြာရောင်အဝတ်တွေကိုင်ပြီး ကျွန်တော်တို့ရဲ့ စည်းလုံးညီညွတ်မှုကို ပြသသွားမှာပါ" လို့ 'ဇဲလန်စကီ'က ဆိုပါတယ်။

ရုရှားက ယူကရိန်းကိုခြိမ်းခြောက်နေတယ်ဆိုတာကို သိရှိထားပေမယ့် ကျူးကျော်တိုက်ခိုက်လာနိုင်တယ်လို့ အနောက်နိုင်ငံတွေက အလွန်အကျူးဖော်ပြနေကြောင်း၊ ရုရှားတို့ကျူးကျော်ဖို့ပြင်ဆင်နေမှုအပေါ် အနောက်နိုင်ငံတွေရဲ့တုန့်ပြန်ပုံက အထိတ်တလန့်ဖြစ်စေကြာင်း ပြောကြားသွားပါတယ်။

ထိုနေ့ကို ကျူးကျော်မှုပြုလုပ်လာနိုင်တယ်ဆိုတဲ့ မီဒီယာတွေရဲ့ဖော်ပြချက်ကို ယူကရိန်းသမ္မတက အရွဲ့ တိုက်တုန့်ပြန်လိုက်တာဖြစ်ကြောင်း သမ္မတအစိုးရအဖွဲ့ ဦးစီးအရာရှိချုပ်ရဲ့ အကြံပေးပုဂ္ဂိုလ်က ရိုက်တာသတင်းဌာနကို ပြောကြားခဲ့ပါတယ်။

"ကျူးကျော်တိုက်ခိုက်မယ့်နေ့ကို ခရီးအလည်အပတ်သွားမယ့်ရက်စွဲလို့ အတိအကျသိနေရရင် မီဒီယာတွေရဲ့ဖော်ပြချက်တွေက ဘယ်လိုယုံစားရတော့မှာလဲ" လို့ ပြောကြားသွားပါတယ်။

သမ္မတရုံးက အမိန့်စာထုတ်ပြန်ထားရာမှာ ဗုဒ္ဓဟူးနေ့တွင် ယူကရိန်းနိုင်ငံရှိ မြို့တွေရွာတွေအားလုံးမှာ နိုင်ငံတော်အလံလွှင့်ထူကြပြီး နံနက် ၁၀ နာရီမှာ တစ်နိုင်ငံလုံး နိုင်ငံတော်သီချင်းကို သံပြိုင်သီဆိုကြရန် ဖော်ပြထားပါတယ်။

တပ်မတော်သားတွေနဲ့ နယ်ခြားစောင့်တပ်ဖွဲ့တွေကိုလည်း လစာတိုးမြှင့်ပေးဖို့ တောင်းဆိုထားပါတယ်။ထိုနေ့ကို ရုရှားသမ္မတ'ဗလက်ဒီမီယာပူတင်'က တိုက်ခိုက်ဖို့အမိန့်ပေးသွားမယ်မထင်ကြောင်း အမေရိကန်အရာရှိတွေခန့်မှန်းထားပေမယ့် အချိန်မရွေးတိုက်ခိုက်လာနိုင်တယ်လို့ ထပ်ခါထပ်ခါ သတိပေးထားကြောင်း ပန်တဂွန်မှ ပြောရေးဆိုခွင့်ရှိသူ 'ဂျွန်ကာဘီ'က သတင်းထောက်တွေကို ပြောကြားခဲ့ပြီး ယူကရိန်းနယ်စပ်အနီးမှာ ရုရှားတို့ စစ်အင်အားထပ်မံဖြည့်တင်းမှုတွေ ပြုလုပ်နေကြောင်းလည်း သတိပေးခဲ့ပါတယ်။
Source: Reuters

#LocalNews
Published- 15 Feb 2022

မန္တလေးမြို့အရှေ့ဘက်၊ ပုသိမ်ကြီးမြို့နယ်၊ ရေတံခွန်တောင်ပေါ်ရှိ YGW(အဝါရောင်မျိုးဆက်သစ်လူငယ်ပရဟိတအသင်း)ရဲ့ ဘိုးဘွားများစောင့်ရှောက်ရေးကျောင်းတွင်နေထိုင်ပြီး လူမှုကွန်ရက်ပေါ်မှာ လူသိများသူ အဘွားမေကြည်ခင်(ဖွားကြည်ခင်)မှာ ကင်ဆာရောဂါကြောင့် ဆေးကုသမှုခံယူနေရင်း ကွယ်လွန်သွားပြီဖြစ်တယ်လို့ YGW အသင်းကထုတ်ပြန်လိုက်ပါတယ်။

အသက် ၈၄ နှစ်အရွယ်ရှိ အဘွားမေကြည်ခင်မှာ ယခုနှစ် ဇန်နဝါရီလအတွင်းကစတင်ကာ ကျန်းမာရေးသိသာစွာချို့ယွင်းလာတာကြောင့် ဓာတ်မှန်ရိုက်ခြင်း၊ ‌ကျန်းမာရေးစစ်ဆေးခြင်းတို့ကို ပြုလုပ်ခဲ့ခြင်းဖြစ်ရာ အသည်းနှင့်အဆုတ်တို့တွင် ကင်ဆာအကြိတ်များတွေ့ရှိရတာကြောင့် ဆေးကုသမှုခံယူနေရတာဖြစ်ပါတယ်။

အဘွားမေကြည်ခင်ကိုဖေဖော်ဝါရီ ၁၅ ရက် မွန်းလွဲ ၁ နာရီအချိန်တွင် မန္တလေးအထွေထွေရောဂါကုဆေးရုံကြီးမှ အေးရိပ်ငြိမ်သုဿန်သို့ ပို့ဆောင်ကာ နာရေးအခမ်းအနားပြုလုပ်မှာဖြစ်တယ်လို့ သိရပါတယ်။

YGW ဘိုးဘွားများစောင့်ရှောက်ရေးကျောင်းဆရာတော်သည် အဘွားမေကြည်ခင်ရဲ့ ဗီဒီယိုဖိုင်များကို လူမှုကွန်ရက်ပေါ်သို့တင်လေ့ရှိရာ အဘွား၏ ဟန်ဆောင်မှုကင်းစွာ ချစ်စဖွယ်ခပ်စွာစွာပြောဆိုမှုပုံစံများကြောင့် လူချစ်လူခင်များရခြင်းဖြစ်ပြီး အနုပညာလောကမှ နာမည်ကြီးမင်းသားမင်းသမီးများ၊ အနုပညာရှင်များကလည်း ကျောင်းသို့ လာရောက်လှူဒါန်းရင်း ဖွားကြည်ခင်ထံ တကူးတကတွေ့ဆုံနှုတ်ဆက်ခံရသူဖြစ်ပါတယ်။

ymg/hm
#Yangon_Media_Group

#LocalNews
Published - 15 Feb 2022

အိုမီခရွန် ရောဂါပိုးစတင်တွေ့ရှိခဲ့တဲ့ အိန္ဒိယ-မြန်မာ နယ်စပ်မြို့တစ်မြို့ ဖြစ်တဲ့ တမူးမြို့တွင် လက်ရှိအချိန်တွင် ကိုဗစ်အတည်ပြု လူနာ (၄၃)ဦးသာ ကျန်ရှိတော့တယ်လို့ သိရပါတယ်။

လက်ရှိမှာလည်း တမူးမြို့တွင် အိုမီခရွန် ရောဂါဖြစ်ပွားမှုနှုန်းကို ထိန်းချုပ်ထားနိုင်သည့် အနေအထားမှာရှိနေပြီး
ယခုကူးစက်ခံနေရသော ကိုဗစ်မျိုးကွဲအိုမီခရွန်ရောဂါပိုးမှာ ကူးစက်မှုနှုန်းမြန်သော်လည်း ကူးစက်ခံရသောလူနာများ၏ ကျန်းမာရေးမှာ စိုးရိမ်စရာမတွေ့ရဘဲ အားလုံးကျန်းမာစွာရှိနေတာဖြစ်ပြီး သေဆုံးသူလည်းမရှိခဲ့ဘူးလို့ သိရပါတယ်။

"လက်ရှိ ကိုဗစ်လူနာက ၄၀ ကျော် လောက်ပဲကျန်တယ်။ အခုနောက်ပိုင်း ပိုးတွေ့နှုန်းအတော်လေးကျလာတယ်။ ရောဂါကို ထိန်းချုပ်ထားနိုင်ပြီလို့ ပြောလို့ရပါတယ်။ အခုစစ်လို့တွေ့လည်း တစ်ယောက်စ၊နှစ်ယောက်စ လောက်ပါပဲ၊ အရင်လို အများကြီးမတွေ့တော့ဘူး။ ဒါကလည်း ခရီးသွားလာကြမယ့်သူတွေကို စစ်ရင်းနဲ့တွေ့တာပါ။ ပြောရရင်
တမူးမှာက ကိုဗစ်လူနာက ကုန်သလောက်ဖြစ်နေပါပြီ။ နောက်ထပ်တစ်ပတ်၊ ဆယ်ရက်လောက်ဆို ကုန်သလောက်ဖြစ်သွားပါပြီ။ အခုလည်း ဆေးရုံက ဆင်းခွင့်ရသူတွေလည်း အများကြီးရှိနေတယ်။ အတည်ပြုလူနာတွေရဲ့ ရောဂါလက္ခဏာကလည်း ပြင်းထန်မှုမရှိပါဘူး။"လို့ တမူးမြို့ဒေသခံတစ်ဦးက YMG ကို ပြောပြခဲ့ပါတယ်။

အဆိုပါ တမူးမြို့ မှာ ကိုဗစ်လူနာအများအပြားနှင့် အိုမီခရွန်အတည်ပြုလူနာများကို ပြီးခဲ့သည့်လပိုင်းအတွင်းမှာ တွေ့ ရှိခဲ့တာဖြစ်ပြီး ဒေသဆိုင်ရာအုပ်ချုပ်ရေးအဖွဲ့က တမူးမြို့ရှိ အိန္ဒိယ-မြန်မာ နယ်စပ်ဂိတ်တွေအပါအဝင် မြို့အဝင်၊အထွက်ဂိတ်များကို ယာယီပိတ်ထားခဲ့ပြီး ရောဂါကာကွယ်ထိန်းချုပ်ရေးတွေကို ဆောင်ရွက်ခဲ့ရတာဖြစ်ပါတယ်။

ဒါ့အပြင် တမူးမြို့တွင် ယခုကူးစက်ခံနေရသော ရောဂါပိုးတွေ့လူနာများမှာ ဝေဒနာပြင်းထန်စွာခံစားနေရသောလူနာများမရှိဘဲ မြို့နေလူထုမှာ ရာသီဥတုအပြောင်းအလွဲကြောင့် နှာစေးချောင်းဆိုးဖြစ်ယုံနှင့် စစ်ဆေးကြည့်ပါက ပိုးတွေ့ ရှိအဖြေထွက်ပြီး ဆေးရုံတွင်နေရသော(၁၀)ရက်အတွင်းဝေဒနာပြင်းထန်စွာခံစားနေရသော လူနာများမရှိသလောက်ဖြစ်တယ်လို့လည်း ဒေသခံတွေကပြောပါတယ်။

ဒါ့အပြင် သတ်မှတ်ရက်ပြည့်ပြီး ဆေးရုံမှဆင်းခွင့်ရသူများလည်း အများအပြားရှိခဲ့သည့်အတွက် ယနေ့ ဖေဖော်ဝါရီလ ၁၅ ရက်နေ့အထိ တမူးမြို့တွင် ကိုဗစ်အတည်ပြုလူနာ ၄၃ ဦးသာ ကျန်ရှိတော့တာဖြစ်တယ်လို့ သိရပါတယ်။

ထို့အပြင် ကျန်ရှိနေသည့် ပိုးတွေ့လူနာများကိုလည်း ဆေးဝါးကုသမှုတွေကို ဆက်လက်ပြုလုပ်ပေးနေတယ်လို့ တမူးမြို့ရှိ ကိုဗစ်အရေးကိစ္စရပ်များကို ကူညီဆောင်ရွက်ပေးနေသူများထံမှ သိရပါတယ်။

ဓါတ်ပုံ - တမူးဇွဲမာန်

ymg/kg
#Yangon_Media_Group

#LocalNews
Published - 15 Feb 2022

ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့မှ ကြီးမှူး၍ ရွှေတိဂုံစေတီတော်ကြီးတွင် မြန်မာ့ရိုးရာထမနဲလှူဒါန်းခြင်းနှင့် ဆွမ်းတော်ကြီးဆက်ကပ်လှူဒါန်းခြင်းအခမ်းအနားကို ဒီကနေ့( ဖေ ဖော်ဝါရီ ၁၅ ရက်)၊ နံနက် ၅ နာရီခွဲ(အာရုဏ်တက်ချိန်)မှာ ကျင်းပပြုလုပ်ခဲ့တယ်လို့ သိရပါတယ်။

ရွှေတိဂုံစေတီတော်ကြီး၌ ယနေ့ပြုလုပ်ခဲ့တဲ့ (၁၅)ကြိမ်မြောက်၊ မြန်မာ့ရိုးရာထမနဲလှူဒါန်းခြင်း၊ ဆွမ်းတော်ကြီးဆက်ကပ်ခြင်းအခမ်းအနားကို ကျင်းပခဲ့ရာ စေတီတော်ကြီး၏ ကုသိုလ်တော်ကိစ္စအဝဝ တာဝန်များကိုဆောင်ရွက်နေကြ သော ရွှေတိဂုံစေတီတော်ဘဏ္ဍာတော်ထိန်း ဂေါပကအဖွဲ့ဝင်များ၊ဝန်ထမ်းများတက်ရောက်ခဲ့ကြပြီး ပထမဦးစွာ"နမောတဿ" သုံးကြိမ်ရွတ်ဆို ဘုရားကန်တော့၍ အခမ်းအနားဖွင့်လှစ်ခြင်း၊ ထို့နောက် နဝင်္ဂသီလခံယူဆောက်တည်ခြင်းတို့ကို ပြုလုပ်ခဲ့တယ်လို့လည်း သိရပါတယ်။

ထို့အပြင် ရွှေတိဂုံစေတီတော်မြတ်ကြီး(ဝါ)မြတ်စွာဘုရားရှင်တို့အား ရည်မှန်း၍ ထမနဲဆွမ်း၊ ပန်း၊ ရေချမ်း၊သစ်သီး၊ ဆီမီးနံ့သာများ ဆက်ကပ်လှူဒါန်းခြင်း၊ ဘုရား၊တရား၊သံဃာ့ဂုဏ်တော်များ ရွတ်ပွားပူဇော်ခြင်း၊ ဒိသာဖရဏမေတ္တာပွားခြင်း၊ မေတ္တာသုတ်တော်လာအရပ်ဆယ်မျက်နှာမေတ္တာပို့ခြင်း၊ ဆုတောင်းအမျှဝေခြင်းတို့ပြုကြပြီး "ဗုဒ္ဓသာသနံ စိရံ တိဋ္ဌတု" သုံးကြိမ်ရွတ်ဆိုဆုတောင်း၍ အခမ်းအနားကို ရုပ်သိမ်းခဲ့တယ်လို့ ရွှေတိဂုံစေတီတော် ဂေါပကအဖွဲ့က သတင်းထုတ်ပြန်ခဲ့ပါတယ်။

ဓါတ်ပုံ - ရွှေတိဂုံစေတီတော် (ဂေါပကအဖွဲ့)

ymg/kg
#Yangon_Media_Group

#WorldHealth
Published - 15 February 2022

လက်ရှိအိုမီခရွန်ကူးစက်မှုမြင့်မားချိန်ကာလအတွင်း အမေရိကန်ရှိ ကိုဗစ်အားမြှင့်ကာကွယ်ဆေး booster ထိုးနှံထားသူတွေရဲ့ ရောဂါကာကွယ်နိုင်စွမ်းကို လေ့လာကြည့်ရာမှာ ထိရောက်မှုအာနိသင်လျော့နည်းလာကြောင်း တွေ့ရှိရပေမယ့် ရောဂါပြင်းထန်စွာဖြစ်ပွားခြင်းကိုတော့ ထိထိရောက်ရောက်ကာကွယ်နိုင်ဆဲဖြစ်ပါတယ်။

အိုမီခရွန်ကူးစက်မှုက ဒီဇင်ဘာလနဲ့ဇန်နဝါရီလတွေမှာ ကူးစက်မှုအမြင့်ဆုံးဖြစ်ခဲ့ပေမယ့် လတ်တလောမှာတော့ ကူးစက်မှုလျော့နည်းလာပြီဖြစ်ပါတယ်။
ကိုဗစ်အားမြှင့်ကာကွယ်ဆေးတွေက ဘေးကင်းစိတ်ချရဆဲဖြစ်ပြီး ရောဂါပြင်းထန်စွာဖြစ်ပွားခြင်းကို ဆက်လက်ကာကွယ်ပေးနိုင်ဆဲဖြစ်ကြောင်း ရောဂါထိန်းချုပ်ကာကွယ်ရေးစင်တာ CDC မှ ပြောရေးဆိုခွင့်ရှိသူ 'ခရစ္စတန်နော့ဒ်လန်'က ပြောဆိုခဲ့ပါတယ်။

အမေရိကန် ပြည်နယ် ၁၀ ခုမှ ဆေးရုံတွေနဲ့ အရေးပေါ်ကုသမှုတက်ရောက်ခံယူရတဲ့ လူနာတွေကို သုတေသီတို့ က လေ့လာကြည့်ကြပြီး ဖိုင်ဇာနဲ့ မိုဒါနာ အားမြှင့်ကာကွယ်ဆေးတွေ ဘယ်လောက်အထိ ကာကွယ်ပေးနိုင်လဲဆိုတာကို ခန့်မှန်းတွက်ချက်ခဲ့ကြပါတယ်။

လေ့လာခဲ့တဲ့လူတွေထဲက ၁၀ ရာခိုင်နှုန်းက အားမြှင့်ကာကွယ်ဆေးထိုးနှံထားပြီး သူတို့ ရဲ့ရောဂါခုခံနိုင်စွမ်းက မူလကာကွယ်ဆေးသာထိုးထားတဲ့သူတွေထက် ပိုများနေတာကို တွေ့ခဲ့ရပါတယ်။

အိုမီခရွန်မျိုးဗီဇကွဲ ကူးစက်ပျံ့ပွားနေတဲ့ကာလအတွင်း ပြင်ပလူနာတွေရဲ့ ကာကွယ်ဆေးထိရောက်မှုနှုန်းကို လေ့လာရာမှာ အားမြှင့်ကာကွယ်ဆေးထိုးပြီး ၂ လအကြာမှာ ၈၇ ရာခိုင်နှုန်းရှိခဲ့ပြီး ၄ လကြာတဲ့အချိန်မှာတော့ ၆၆ ရာခိုင်နှုန်းဖြစ်သွားပါတယ်။

ဆေးရုံတက်ကုသခံယူရမှုကို ကာကွယ်နိုင်စွမ်းမှာလည်း အားမြှင့်ကာကွယ်ဆေးထိုးပြီး ၂ လအကြာမှာ ၉၁ ရာခိုင်နှုန်းရှိနေပြီး ၄ လအကြာမှာတော့ ၇၈ ရာခိုင်နှုန်းအထိ ကျဆင်းခဲ့ပါတယ်။

ဒါပေမဲ့လည်း ဒီလေ့လာချက်တွေက အိုမီခရွန်ကူးစက်ပျံ့ပွားမှုမတိုင်ခင် ၄ လလောက်က အားမြှင့်ကာကွယ်ဆေးထိုးထားတဲ့ လူ ၂၀၀ အောက်ကိုသာ အခြေခံလေ့လာထားတာဖြစ်ပါတယ်။

ဒါကြောင့် ကျန်းမာရေးအခြေအနေများကြောင့် ကိုဗစ်အားမြှင့်ကာကွယ်ဆေး (booster) ကို စောစောထိုးထားတဲ့သူတွေက ရောဂါပြင်းထန်နိုင်ချေများတယ်ဆိုတာကိုတော့ သေချာမသိရသေးပါဘူး။

ကနဦးကိုဗစ်ကာကွယ်ဆေးထိုးပြီး ၆ လကျော်တဲ့အခါ ကာကွယ်ဆေးအာနိသင်လျော့နည်းလာခဲ့တာကြောင့် အမေရိကန်မှာ ပြီးခဲ့တဲ့နှစ်က အားမြှင့်ကာကွယ်ဆေးထိုးဖို့ အစီအစဉ် ကြေညာခဲ့တာဖြစ်ပါတယ်။

ဆေးရုံတက်ကုသခံယူရမှုကို ၇၈ ရာခိုင်နှုန်းကာကွယ်နိုင်တယ်ဆိုတာ အတော်လေးထိရောက်နေသေးတယ်လို ပြောလို့ ရကြောင်း ဘာမင်ဂမ် အလာဘာမာတက္ကသိုလ်မှ ကူးစက်ရောဂါကုဆရာဝန်ဒေါက်တာ'မိုက်ကယ်ဆာ့ဂ်'က ပြောကြားလိုက်ပါတယ်။

ကိုယ်ခံအားနည်းတဲ့သူတွေမှာတောင် အားမြှင့်ကာကွယ်ဆေးထိုးထားရင် အသက်သေဆုံးမှုအလွန်အဖြစ်နည်းကြောင်း၊ ကာကွယ်ဆေးတွေက အကျိုးသက်ရောက်ဆဲဖြစ်ကြောင်း ဆိုပါတယ်။
Source: AP News