#LocalNews
Published_12 July 2022

ဆီထွက်သီးနှံတွေကလွဲလို့ ကျန်တဲ့လယ်ယာထွက်ကုန်တွေကို တရုတ်နိုင်ငံကို ပို့တဲ့အခါ တရုတ်ယွမ်နဲ့ပဲ ရောင်းချခွင့်ရတာကြောင့် ကုန်သည်တွေ အဆင်ပြေကြတယ်လို့ မူဆယ်ဆန်ကုန်စည်ဒိုင် ဒုတိယဥက္ကဋ္ဌ ဦးမင်းသိန်းက ပြောပါတယ်။

#Yangon_Media_Group

#LocalNews
Published_12 July 2022

တိုင်းဒေသကြီး၊ပြည်နယ်အချို့တို့တွင် သတ်မှတ်ရည်ညွှန်းဈေးနှုန်းထက် ပိုရောင်းသော စက်သုံးဆီဆိုင် ၈၂ ဆိုင်ကို ဥပဒေနှင့်အညီ အရောင်းဆိုင်အဆင့်လိုက် ဒဏ်ကြေးသတ်မှတ်အရေးယူခဲ့ကြောင်း နစက သတင်းထုတ်ပြန်ရေးအဖွဲ့က သိရသည်။

စက်သုံးဆီဆိုင်များအနေဖြင့် နေ့စဉ်ထုတ်ပြန်သည့် ရည်ညွှန်းဈေးနှုန်းများနှင့်အညီ ရောင်းချခြင်း ရှိ၊မရှိကိုလည်း တိုင်းဒေသကြီးပြည်နယ်အလိုက် သက်ဆိုင်ရာ ဌာနများ၊ပူးပေါင်းအဖွဲ့များက မကြာခဏ ရှောင်တခင်ဝင်ရောက်စစ်ဆေးနေကြောင်းနှင့် စက်သုံးဆီဝယ်ယူသူများအနေဖြင့်လည်း မကျေနပ်မှုများရှိပါက သတင်းပေးနိုင်ကြောင်းလည်း သိရသည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီအနေဖြင့် စက်သုံးဆီအမျိုးအစားအလိုက် စင်ကာပူနိုင်ငံ၏ နေ့စဉ် MOPS Price အပေါ်အခြေခံ၍ သယ်ယူစရိတ်နှင့် ပရီမီယံအာမခံကြေးများ၊အခွန်အခများ၊လုပ်ငန်းဆောင်ရွက်မှု ကုန်ကျစရိတ်များ စသည်တို့အပေါ် သင့်တင့်သည့်အမြတ်ရာခိုင်နှုန်းထပ်ပေါင်းကာ နိုင်ငံခြားငွေလဲလှယ်နှုန်းဖြင့် ရန်ကုန်မြို့နှင့် မန္တလေးမြို့တို့အတွက် ရည်ညွှန်းလက်ကားဈေးနှုန်းများသတ်မှတ်ရောင်းချပေးကြောင်း သိရသည်။

ယင်းရည်ညွှန်းဈေးနှုန်းများကို ပြည်ထောင်စုနယ်မြေနေပြည်တော်အပါအဝင် တိုင်းဒေသကြီး၊ပြည်နယ်အလိုက်မြို့တော်များ၊မြို့များအတွက် သင့်တင့်မျှတသည့် သယ်ယူပို့ဆောင်ခစရိတ်များ ထပ်ဆောင်းတွက်ချက် ထုတ်ပြန်ပေးသွားရန်လည်းရှိနေကြောင်း သိရသည်။

ymg/mt
#Yangon_Media_Group

#LocalNews
Published_12 July 2022

မြန်မာ့ခရီးသွားဘဏ်အနေနဲ့ ဘဏ်အသိုင်းအဝိုင်းမှာ နောက်ကျမှဖွင့်ခဲ့တဲ့ ဘဏ်ဖြစ်ပေမဲ့လည်း ချေးငွေလျှောက်ထားသူတွေအနေနဲ့ သတ်မှတ်ချက် ပြည့်စုံတယ်ဆိုရင် အမြန်ဆုံး ထုတ်ချေးပေးနိုင်အောင် လုပ်ဆောင်နေတာ ဖြစ်တယ်လို့ သိရပါတယ်။

#Yangon_Media_Group

Published 12 July 2022

ကာလီဖိုးနီးယားပြည်နယ်တောင်ပိုင်းက 7-Eleven(ဆဲဗင်းအလဲဗင်း) စတိုးဆိုင် (၆)ဆိုင်မှာ တနင်္လာနေ့ မိုးသောက်ချိန်ခန့်မှာ သေနတ်ပစ်ဓားပြမှုတွေ ဆက်တိုက်ဖြစ်ပွားခဲ့ရာ လူ(၂)ဦးသေဆုံးပြီး (၃)ဦး ဒဏ်ရာရရှိခဲ့တယ်လို့ အာဏာပိုင်တွေကပြောပါတယ်။ အဲဒီ သေနတ်ပစ်လုယက်မှုကျူးလွန်တဲ့ (၆)နေရာထဲက အနည်းဆုံး (၃)နေရာမှာ ကျူးလွန်ခဲ့တယ်လို့ သံသယဖြစ်သူ တစ်ကိုယ်တော် သေနတ်သမားကို ရဲတွေက ရှာဖွေနေပါတယ်။

ဇူလိုင်၁၁ရက် မိုးသောက်ချိန်ခန့်ကနေ နာရီပေါင်း ငါးနာရီအတွင်း အကြမ်းဖက်မှု (၆)ခု ဆက်တိုက်ဖြစ်ပွားခဲ့တာပါ။ အဲဒီအချိန်ဟာ ဆဲဗင်းအလဲဗင်းရဲ့ ၉၅နှစ်ပြည့်နှစ်ပတ်လည်နေ့အထိမ်းအမှတ်အဖြစ် ဆလာပီအအေးတွေ အခမဲ့ တိုက်နေတာ လည်းဖြစ်ပါတယ်။

အွန်တာရီယို၊အပ်လန်း၊ရေဗားဆိုက်၊ဆန်တာအန်နာ၊ဘရီယာနှင့် လာဟာဘရာမြို့တွေမှာ ဒီလိုအကြမ်းဖက်မှု ဘာကြောင့် လုပ်သလဲဆိုတာကို စုံစမ်းစစ်ဆေးသူတွေ ရှင်းရှင်းလင်းလင်းမသိကြသေးပါဘူး။

“ဒီအမှုကျူးလွန်သူကိုယ်တိုင်ကပဲ ဖြေပေးနိုင်လိမ့်မယ်” လို့  ရေးဗားဆိုက် ရဲတပ်ဖွဲ့က ပြောရေးဆိုခွင့်ရသူ အရာရှိ ရိုင်ယန်ရေးးဘက်ကပြောပါတယ်။

ဆဲဗင်းအလဲဗင်းကို ခုနှစ်လပိုင်း ၁၁ရက်မှာ တိုက်ခိုက်တာ တိုက်ဆိုင်မှုတော့ မဖြစ်လောက်ဘူးလို့လည်း သူက ပြောပါတယ်။

သေဆုံးသူတွေနှင့်မိသားစုဝင်တွေနှင့်ထပ်တူ ဝမ်းနည်းကြေကွဲရပါတယ်လို့ ဆဲဗင်း အလဲဗင်းက ကြေညာချက်ထုတ်ပြန်ပါတယ်။

ပထမဆုံးပစ်ခတ်ဓားပြတိုက်မှုကို လော့အင်ဂျလိအရှေ့ဖက် ၃၅ မိုင်ဝေးကွာတဲ့ အွန်တာရီယိုမြို့မှာ ညသန်းခေါင်စတင်ခဲ့တာဖြစ်ပါတယ်။  Mask တပ်ထားတဲ့ အမျိုးသားတစ်ဦး သေနတ်ကိုင်ပြီး စတိုးဆိုင်ထဲဝင်လာကာ ဝန်ထမ်းထံကနေ ပိုက်ဆံတောင်းပါတယ်။သူက သေနတ်မပစ်ခဲ့သလို ဘယ်သူမှလည်း ဒဏ်ရာမရခဲ့ပါဘူးတဲ့။ ဒါပေမယ့် ပိုက်ဆံ ပါသွားသလား မပါသွားသလားလည်း အသေအချာမသိသေးဘဲရှိနေပါတယ်။

အဲဒီနောက် ၄၅မိနစ်အကြာမှာ အခုစတိုးနှင့် ၅ မိုင်လောက်ကွာဝေးတဲ့အပ်လန်းက စတိုးဆိုင်မှာ အလားတူဓားပြတိုက်မှုဖြစ်ခဲ့ပါတယ်။အဲဒီမှာလည်း ဒေါ်လာ ၄၀၀ကနေ ၅၀၀ အထိငွေတွေနှင့် ဆိုင်ကပစ္စည်းအချို့ယူပြီး ဓားပြဟာထွက်သွားခဲ့ပါတယ်။ သေနတ်ပစ်မသွားခဲ့ပါဘူး။

တစ်နာရီအကြာမှာ အပ်လန်းက ၂၅မိုင်ဝေးတဲ့ ရေးဗားဆိုက်က ဆိုင်မှာ သေနတ်ပစ်ပြီး ဓားပြတိုက်ခဲ့ပါတယ်။ သေနတ်ပစ်ခံရတဲ့ ဝန်ထမ်းဟာ စိုးရိမ်ရတဲ့အခြေအနေရှိပါတယ်။

အဲဒီနောက် မနက် ၃နာရီ ၂၀မိနစ်ခန့်မှာ ဆန်တာ အန်နာမှာဖြစ်ပွားခဲ့ပြန်ပါတယ်။

မိနစ် ၄၀ အကြာမှာ ဘရီယာက စတိုးမှာ သေနတ်ပစ်ခံရပြီး သေဆုံးမှုရှိခဲ့ပါတယ်။ အဲဒီပစ်ခတ်မှုအပြီး တစ်နာရီမပြည့်ခင် မနက် ၄ နာရီ ၅၅မိနစ်ခန့် မှာ လာဟာဘရာ စတိုးဆိုင်မှာ ပစ်ခတ်ဓားပြတိုက်မှုဖြစ်ပွားခဲ့ပြီး လူနှစ်ဦးသေနတ်ကျည်ဆံထိမှန်ခံပါတယ်။ အာဏာပိုင်တွေက ပစ်ခတ်ခံရသူတွေ အခြေအနေထုတ်ပြန်ခြင်းမရှိသေးပါဘူး။

Source AP

#US_7_Eleven_Store_Shooting

#7_Eleven_robbery

#US_Gun_Issue

#LocalNews
Published_12 July 2022

ထိုင်းနိုင်ငံသို့သွားရောက်ကြမည့် MoU လုပ်သားများ ကွာရန်တင်း ငါးရက်နေရမည်ဟု သတင်းထွက်ပေါ်နေကြောင်း ပြည်ပအလုပ်အကိုင်အေဂျင်စီများက သိရသည်။

ပြီးခဲ့သည့် မေလ ၁၀ ရက်ကစ၍ ထိုင်းနိုင်ငံသို့ MoU စနစ်ဖြင့် မြန်မာအလုပ်သမားများစတင်သွားရောက်ခွင့်ရခဲ့ကြရာ ဇွန်လအကုန်အထိ ထိုင်းဘက်ခြမ်းတွင် ကွာရန်တင်း ဝင်ရောက်စရာမလိုဘဲ အလုပ်အကိုင်နှင့်ပတ်သက်သည့် စာရွက်စာတမ်းစစ်ဆေးမှု၊ကိုဗစ်စစ်ဆေးမှုများပြုလုပ်ကာ အလုပ်လုပ်မည့်နေရာသို့ သွားရောက်ခွင့်ရခဲ့ကြခြင်း ဖြစ်သည်။

သို့သော်လည်း ဇူလိုင်လ ၁ ရက်က စ၍ မဲဆောက်ဘက်ခြမ်းတွင် ကွာရန်တင်း တစ်ရက်ဝင်ရောက်ခဲ့ကြရပြီး ယခုအခါ ငါးရက်ဝင်ရမည်ဟု သတင်းထွက်နေခြင်းဖြစ်ကြောင်း သိရသည်။

"သတင်းကတော့ မသေချာသေးဘူး။ဒါပေမဲ့လည်း ဖြစ်နိုင်တယ်။ဘာလို့လဲဆိုတော့ ကိုဗစ်တွေက ပြန်ပြီးတော့ဖြစ်နေတယ်ဆိုတော့လေ၊ပြီးခဲ့တဲ့ ဇူလိုင်လ တစ်ရက်နေ့ကစပြီးတော့ ကွာရန်တင်းတစ်ရက်ထားခဲ့တာကို ရက်ထပ်တိုးမယ့် သဘောလို့ပဲ မြင်ပါတယ်"ဟု ပြည်ပအေဂျင့်တစ်ဦးကပြောသည်။

ယနေ့ ဇူလိုင်လ ၁၂ ရက်တွင် ထိုင်းနိုင်ငံသို့ မြဝတီ - မဲဆောက် ချစ်ကြည်ရေးအမှတ် (၂) တံတားမှ တစ်ဆင့် MOU စနစ်ဖြင့် အလုပ်သမား ၇၀၀ ကျော် ထပ်မံ သွားရောက်ခဲ့ကြကြောင်း သိရသည်။

ymg/mt
#Yangon_Media_Group

#LocalNews
Published - 12 July 2022

မြန်မာ-ရုရှားကုန်သွယ်မှု ဒေါ်လာတစ်ဘီလီယံထိ တိုးမြှင့်နိုင်ရေး ရည်မှန်းထားကြောင်း နှစ်နိုင်ငံကုန်သွယ်ရေးဆွေးမှုအရ သိရသည်။

မြန်မာ-ရုရှား နှစ်နိုင်ငံအကြား ကုန်သွယ်မှုပိုမိုတိုးမြှင့်နိုင်ရေး ညှိနှိုင်းအစည်းအဝေးကို ယမန်နေ့ (ဇူလိုင်လ ၁၁ရက်)တွင် ပြုလုပ်ခဲ့ကြောင်း နစကမှ သတင်းထုတ်ပြန်ထားသည်။

ယင်းဆွေးနွေးပွဲတွင် မြန်မာ့ပိုကုန်များ ရုရှားနိုင်ငံဈေးကွက်သို့ မဟာဗျူဟာ ကျကျ ထိုးဖောက်ဝင်ရောက်နိုင်ရေးအတွက် နည်းလမ်းရှာဆောင်ရွက်သွားရန်ဆွေးနွေးခဲ့ကြောင်း ထုတ်ပြန်ချက်တွင် ပါရှိသည်။

မြန်မာ- ရုရှား နှစ်နိုင်ငံအကြားကုန်သွယ်မှုသည် ၂၀၁၉-၂၀၂၀ ဘဏ္ဍာနှစ်တွင် အမေရိကန်ဒေါ်လာသန်း ၆၀ ကျော်သာရှိပြီး အမေရိကန်ဒေါ်လာ တစ်ဘီလီယံအထိ တိုးမြှင့်တင်ပို့နိုင်ရေး နှစ်နိုင်ငံလုံးမှ ရည်မှန်းထားကြောင်း သိရသည်။

မြန်မာနိုင်ငံမှ ဆန်၊ ဆန်ကွဲ၊ ပြောင်း၊ ပဲတီစိမ်း အစရှိသည့် လယ်ယာထွက်ကုန်ပစ္စည်းများကို ရုရှားနိုင်ငံသို့တင်ပို့ရန် အလားအလာရှိသော ကုန်စည်များအဖြစ် ဈေးကွက်သစ်ချဲ့ထွင်တင်ပို့သွားမယ်လို့ သိရသည်။

အစည်းအဝေးကို နစက ဌာနတွေနှင့် မြန်မာနိုင်ငံကုန်သည်များနှင့် စက်မှုလက်မှု လုပ်ငန်းရှင်များအသင်းချုပ်၊ မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံအထည်ချုပ် လုပ်ငန်းရှင်များအသင်း အစရှိသည့် ကုန်သည်အသင်းအဖွဲ့များ တက်ရောက်ခဲ့ကြောင်း သိရသည်။

ymg/sth
#Yangon_Media_Group

#DailyNews
Published - 12 July 2022

၁။ဆန်နှင့်ဆန်ကွဲပို့ကုန်ကို တရုတ်ယွမ်ဖြင့်သာ ရောင်းချခွင့်ရကြသောကြောင့်ကုန်သည်များအဆင်ပြေ

၂။ကိုဗစ်ရောဂါ ပြည်တွင်းသို့ပြန်ဝင်ကူးစက်မှုမရှိစေရေး ထပ်ဆောင်းကာကွယ်ဆေး မဖြစ်မနေထိုးနှံရန်လိုဟုဆို

၃။ နေ့စဉ်မိုးလေဝသသတင်း။

၄။ ငွေချည်မျှင်များဖြင့်ရက်လုပ်သည့် လစ်ဗျားရိုးရာရတနာလက်မှုပညာပြန်လည်ပေါ်ထွန်းလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 12 July 2022

ရထားစီးသူခရီးသည် တိုးတက်များပြားလာသည့်အတွက် အမြန်ရထားများထပ်တိုးပြေးဆွဲပေးနေရကြောင်း မြန်မာ့မီးရထားမှ သိရသည်။

ရန်ကုန်-မန္တလေး လမ်းပိုင်းတွင် ရန်ကုန်မှ မန္တလေး၊ မန္တလေးမှ ရန်ကုန် အမြန်ရထားနှစ်စင်းကို ဇူလိုင်လ ၁၀ ရက်မှ စတင်ပြီး၍ ထပ်တိုးပြေးဆွဲပေးခဲ့ကြောင်း သိရသည်။

ယင်းအပြင် လာမည့် ဇူလိုင်လ ၂၅ ရက်တွင် ရန်ကုန် - မော်လမြိုင်လမ်းပိုင်းရှိ ရန်ကုန်မှ မော်လမြိုင်၊ မော်လမြိုင်မှ ရန်ကုန် အမြန်ရထား ၂ စင်း ထပ်တိုးပြေးဆွဲမည်ဖြစ်ကြောင်း၊ ဩဂုတ်လ ၂၀ ရက်တွင် ရန်ကုန်-ပြည်လမ်းပိုင်းရှိ ရန်ကုန်မှပြည်၊ အစုန်အဆန် ရထား ၂ စင်း ထပ်မံတိုးချဲ့ပြေးဆွဲမည်ဖြစ်ကြောင်း သိရသည်။

လက်ရှိတွင် တစ်နိုင်ငံလုံးရှိ လူစီးကုန်တင်ရထား၊ စာပိုရထား၊အမြန်ရထားနှင့်မြို့ပတ်ရထား စုစုပေါင်း ၅၄ စင်း ပြေးဆွဲပေးလျက်ရှိကြောင်း မြန်မာ့မီးရထားမှ ထုတ်ပြန်ထားသည်။

ymg/sth
#Yangon_Media_Group

#Local_News
Published_ 12 July 2022

မြန်မာနိုင်ငံရင်းနှီးမြှုပ်နှံမှုကော်မရှင်၏ (၃/ ၂၀၂၂) ကြိမ်မြောက်အစည်းအဝေးကို ဇူလိုင် ၁၁ ရက် နံနက်ပိုင်းတွင် နေပြည်တော်ရှိ ပြည်ထောင်စုအစိုးရအဖွဲ့ရုံး၌ကျင်းပရာ အစည်းအဝေးတွင် ဆောင်ရွက်ဆဲ ရင်းနှီးမြှုပ်နှံမှုလုပ်ငန်း(၁၁)ခု၏ မတည်ငွေရင်း တိုးမြှင့်ခြင်းအပါအဝင် စက်မှုကဏ္ဍ၊ ဝန်ဆောင်မှုကဏ္ဍ၊ စိုက်ပျိုးမွေးမြူရေးကဏ္ဍနှင့် လျှပ်စစ်နှင့် စွမ်းအင်ကဏ္ဍတို့မှ ရင်းနှီးမြှုပ်နှံမှုလုပ်ငန်းသစ် (၁၉) ခုကို ခွင့်ပြုပေးခဲ့ကြောင်း သိရပါတယ်။

လုပ်ငန်းများရဲ့ ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ၈၀၇ ဒသမ ၁၅၅ သန်းနှင့် ငွေကျပ် ၃၂၁,၉၄၈ ဒသမ ၇၅၂ သန်းဖြစ်ပြီး ပြည်တွင်းအလုပ်အကိုင် အခွင့်အလမ်းပေါင်း ၃,၁၀၀ ကျော်ကို ဖန်တီးပေးနိုင်မှာ ဖြစ်ပါတယ်။

အဆိုပါ အစည်းအဝေးသို့ မြန်မာနိုင်ငံရင်းနှီးမြှုပ်နှံမှုကော်မရှင် ဥက္ကဋ္ဌ ဒုတိယ ဗိုလ်ချုပ်ကြီးမိုးမြင့်ထွန်းနှင့် ကော်မရှင်အဖွဲ့ဝင်များ တက်ရောက်ခဲ့ကြပါတယ်။

ခွင့်ပြုခဲ့သောလုပ်ငန်းများတွင် ပြန်လည်ပြည့်ဖြိုးမြဲစွမ်းအင် အမျိုးအစားဖြစ်သည့် နေရောင်ခြည်စွမ်းအင်သုံး ဓာတ်အားပေးရုံတည်ဆောက်၍ လျှပ်စစ်ဓာတ်အား ထုတ်လုပ်ခြင်းလုပ်ငန်း (၅) ခုလည်းပါဝင်ကြောင်း သိရပါတယ်။

၂၀၂၂-၂၀၂၃ ဘဏ္ဍာရေးနှစ်အတွက် ယနေ့အချိန်အထိ မြန်မာနိုင်ငံရင်းနှီးမြှုပ်နှံမှု ဥပဒေအရ နိုင်ငံခြားရင်းနှီးမြှုပ်နှံမှုလုပ်ငန်းပေါင်း (၂၀) က စုစုပေါင်း အမေရိကန်ဒေါ်လာ ၈၂၉ ဒသမ ၁၄၆ သန်းဖြင့်လည်းကောင်း၊ မြန်မာနိုင်ငံသားရင်းနှီးမြှုပ်နှံမှုလုပ်ငန်း(၂၁)ခုက စုစုပေါင်းငွေကျပ် ၃၅၀,၉၄၇ ဒသမ ၃၄၇ သန်းဖြင့်လည်းကောင်း ရင်းနှီးမြှုပ်နှံမှုများ ပြုလုပ်လျက်ရှိကြပြီး အဆိုပါလုပ်ငန်းများမှ အလုပ်အကိုင်ခွင့်အလမ်းပေါင်း ၁၃,၀၀၀ ကျော်ကို ဖန်တီးပေးနိုင်ခဲ့ကြောင်း သတင်းရရှိပါတယ်။

ymg-mnn
#Yangon_Media_Group

Published 12 July 2022

ဂျပန်ဝန်ကြီးချုပ်ဟောင်း ရှင်ဇို အာဘေးရဲ့ရုပ်အလောင်းကို တင်ဆောင်လာတဲ့ နိဗ္ဇာန်ယာဉ်ဟာ ဇူလိုင် ၁၂ရက်က ဂျပန်ဝန်ကြီးချုပ်ရုံးအပြင်ဘက်မှာ  အလေးအမြတ်ပြုဖို့အတွက်  ခေတ္တရပ်ပေးခဲ့ပါတယ်။ ဂျပန်နိုင်ငံဝန်ကြီးချုပ် ဖူမီယိုကီရှီဒါနှင့် အဆင့်မြင့်အစိုးရအရာရှိကြီးတွေက သူတို့ရဲ့ ဝန်ကြီးချုပ်ဟောင်း အာဘေးရဲ့ ရုပ်ကလပ်ကို လက်အုပ်ချီကန်တော့ပြီး အလေးအမြတ်ပြုခဲ့ကြပါတယ်။

အာဘေးဟာ နာယာမြို့မှာ သေနတ်သမာတစ်ဦးရဲ့ အနီးကပ်ပစ်ခတ်လုပ်ကြံမှုကြောင့်ကွယ်လွန်ခဲ့ရတာဖြစ်ပါတယ်။

ဝန်ကြီးချုပ်ရုံးက အလံတိုင်မှာလည်း ဂျပန်နိုင်ငံတော်အလံကို ဝမ်းနည်းခြင်းအထိမ်းအမှတ် တိုင်တစ်ဝက်လွှင့်ထူထားပါတယ်။

ဒီကနေ့ ဇူလိုင် ၁၂ ရက်မှာ ဝန်ကြီးချုပ်ဟောင်း အာဘေးရဲ့ ဈာပနကို မိသားစုသီးသန့် ပြုလုပ်မှာဖြစ်ပြီး ဂျပန်တစ်နိုင်ငံလုံးက ပြည်သူတွေက ကွယ်လွန်သူ ခေါင်းဆောင်ဟောင်းအတွက် ကြေကွဲဝမ်းနည်းနေကြပါတယ်။

Source AFP

#Japan_Former_PM_Abe_Funeral

#Shinzo_Abe_Funeral

#Japan_Poliitcs

#ရှင်ဇိုအာဘေး

#Local_News
Published 12 July 2022

ရှမ်းပြည်နယ်(အရှေ့ပိုင်း)၊ တာချီလိတ်မြို့၊ မိုင်းဖုန်း(က)ကျေးရွာအုပ်စု ၊ ဝမ်ပုံဆိပ်ကမ်းတွင် လာအိုနိုင်ငံမှ နေရပ်ပြန်မြန်မာရွှေ့ပြောင်းအလုပ်သမား အမျိုးသား အမျိုးသမီး စုစုပေါင်း (၂၆၉)ဦးကို မြန်မာတာဝန်ရှိသူများက ယမန်နေ့က လက်ခံခဲ့ကြပါတယ်။

အဆိုပါနေရပ်ပြန်များကို လာအိုနိုင်ငံ၌ ကိုဗစ်- ၁၉ ရောဂါ ကာကွယ်ဆေး ( ၂)ကြိမ်ထိုးပြီးကြောင်း အထောက်အထားကဒ် တင်ပြနိုင်သူများကို ကျန်းမာရေးစစ်ဆေး၍ ၎င်းတို့၏နေရပ်သို့ နေ့ချင်းပြန်လည်ပို့ဆောင်ပေးခဲ့ပြီး ကာကွယ်ဆေးထိုးနှံပြီးသော်လည်း အထောက်အထား ကဒ်မပြနိုင်ခဲ့သူများကိုပိုမိုစိတ်ချလုံခြုံစေရန် ကျန်းမာရေးစစ်ဆေးမှုကိုပြုလုပ်ပြီး စံလင်းဖြိုး Quarantine Center တွင်(၃) ရက်ထားရှိကာ ကျန်းမာရေးစစ်ဆေးမှု(၂)ကြိမ်ပြုလုပ်မည်ဖြစ်ကြောင်း၊ရောဂါကူးစက်မှုကင်းစင်ကြောင်း အတည်ပြုချက်အဖြေထွက်ရှိမှသာလျင်နေရပ်သို့ ပြန်လည်ပို့ဆောင်ပေးမည်ဖြစ်ကြောင်း သိရှိရပါတယ်။

ထို့နောက် ရွေ့ပြောင်းမြန်မာအလုပ်သမားများကို မြို့နယ်ကိုဗစ်ကော်မတီ ဥက္ကဋ္ဌ ဦးတင်ဦးကျော်နှင့် ခရိုင်/မြို့နယ် ကြက်ခြေနီကြီးကြပ်မှုကော်မတီမှ တကိုယ်ရည်သုံး ပစ္စည်းဖြစ်သော ဆပ်ပြာခဲ၊ဆပ်ပြာမှုန့်၊ဆပ်ပြာခွက်၊စပရေးလက်ဆေးရည်၊နှာခေါင်းစည်း( face mask)တို့ကို ထောက်ပံ့ပေးခဲ့ကြပြီး မော်တော်ယာဉ်များဖြင့် စံလင်းဖြိုး Quarantine Center သို့ ပို့ဆောင်ခဲ့ကြကြောင်းသိရှိရပါတယ်။

ymg/ys-tcl
#Yangon_Media_Group

#Local_News
Published_ 12 July 2022

ကချင်ပြည်နယ်၊ မိုးညှင်းမြို့နယ်တွင် ငွေကျပ်သိန်း ၅,၆၀၀ ကျော်တန်ဖိုးရှိ ဘိန်းဖြူ ၁၆ ဒသမ ၇၂ ကီလိုနှင့် ဘိန်းစိမ်း ၁၂၅ ကီလို ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဇူလိုင် ၉ ရက် မွန်းတည့် ၁၂ နာရီတွင် ကချင်ပြည်နယ်၊ မိုးညှင်းမြို့နယ်၊ နန့်စီးအောင် ပူးပေါင်းစစ်ဆေးရေးဂိတ်တွင် မန္တလေးမှ ဟိုပင်ဘက်သို့ စိုင်းသူရကျော် မောင်းနှင်လာသော ၁၂ ဘီး မော်တော်ယာဉ်ကို သတင်းအရရှာဖွေခဲ့ပါတယ်။

ယာဉ်ပေါ်တွင် ဘိလပ်မြေအိတ်များဖြင့် ဖုံးအုပ်သယ်ဆောင်လာသည့် ဒေသကာလတန်ဖိုး ငွေကျပ်သိန်း ၅,၆၀၀ ကျော်တန်ဖိုးရှိ ဘိန်းဖြူ ၁၆ ဒသမ ၇၂ ကီလို၊ ဘိန်းစိမ်း ၁၂၅ ကီလို သိမ်းဆည်းရမိခဲ့ပါတယ်။

ကွင်းဆက်ဖော်ထုတ်ချက်အရ ညနေ ၆ နာရီခွဲတွင် မိုးညှင်းမြို့နယ်၊ ဟိုပင်မြို့၊ ရွာသစ်ကြီးကျေးရွာအနီးတွင် မူးယစ်ဆေးဝါးများသယ်ဆောင်ရာ၌ ပူးပေါင်းပါဝင်သူ ဇော်ဇော်စိုး(ခ)ဖိုးလုံးအား ထပ်မံဖမ်းဆီးရမိခဲ့ပါတယ်။

စစ်ဆေးဖော်ထုတ်ချက်အရ သိမ်းဆည်းရမိ မူးယစ်ဆေးဝါးများအားရှမ်းပြည်နယ် (တောင်ပိုင်း)မှ ကချင်ပြည်နယ်သို့ သယ်ဆောင်ခြင်းဖြစ်ကြောင်းသိရှိရသဖြင့် ၎င်းတို့အား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေး ဖော်ထုတ်လျက်ရှိကြောင်း သတင်းရရှိပါတယ်။

ymg-mnn
#Yangon_Media_Group