#LocalNews
Published - 16 Feb 2022

တပ်မတော်တိုက်ခိုက်ရေးလေယာဉ်တစ်စီး လေ့ကျင့်ပျံသန်းစဉ် စက်ချို့ယွင်း ပျက်ကျ၍ လေယာဉ်မှူးဖြစ်သူသေဆုံးသွားကြောင်း နစက ပြန်ကြားရေးဝန်ကြီးဌာနက ထုတ်ပြန်လိုက်သည်။

ယနေ့ ဖေဖော်ဝါရီလ ၁၆ ရက် နံနက် ၁၀ နာရီ ၄၃ မိနစ်ခန့်က လေ့ကျင့်ရေးဧရိယာအတွင်း လေ့ကျင့်ပျံသန်းနေစဉ် စက်ချို့ယွင်းမှုကြောင့် လေယာဉ်ပျက်ကျခဲ့ကြောင်း၊တပ်မတော်(လေ)မှ လေယာဉ်တစ်စင်းဖြင့် လိုက်လံရှာဖွေခဲ့ရာ စစ်ကိုင်းတိုင်းဒေသကြီး စစ်ကိုင်းမြို၊အုန်းတောကျေးရွာ၏ အရှေ့ဘက် ရေမျက်ကြီးအင်းအတွင်း ပျက်ကျခဲ့သည့် လေယာဉ်ကိုတွေ့ခဲ့ရကြောင်း သိရသည်။

ယင်းလေယာဉ်ပျက်ကျမှုကြောင့် လေယာဉ်မှုး ဖြစ်သူ ဗိုလ်ကြီး ဟိန်းထက်အောင် မှာ အသက်ဆုံးရှုံးခဲ့ရကြောင်းလည်း သိရသည်

ymg/mt
#Yangon_Media_Group

#LocalNews
Published - 16 Feb 2022
ရန်ကုန်တိုင်း ဒေသကြီးရှိ ဒလမြို့နယ်တွင် ကိုဗစ် ၁၉ အတည်ပြုလူနာ ၈၀ ဦး အထိရှိလာတယ်လို့ ဒလမြို့နယ်၊ ကိုဗစ်-၁၉ သတင်းပြန်ကြားရေးကော်မတီမှ သိရပါတယ်။

အဆိုပါ ဒလမြို့နယ်၌ ယခု ဖေ ဖော်ဝါရီလ ၁၁ ရက်နေ့နှင့် ၁၂ ရက်နေ့တို့တွင် ဒေသခံပြည်သူ ၄၅ ဦးတို့ကို ကိုဗစ်-၁၉ ရောဂါပိုး ရှိ၊ မရှိ စစ်ဆေးဆောင်ရွက်ခဲ့ရာမှ ၄င်းတို အားလုံးတွင် ကိုဗစ် ၁၉ ရောဂါပိုး‌အား တွေ့ ရှိခဲ့ရတာဖြစ်ပါတယ်။

ထို့ ကြောင့် လက်ရှိအချိန်ထိ ဒလမြို့နယ်တွင် ကိုဗစ်-၁၉ ရောဂါပိုး တွေ့ ရှိသူ စုစုပေါင်း ၈၀ ဦးအထိ ရှိလာခဲ့ပြီဖြစ်တယ်လို့ သိရပါတယ်။

ဒါကြောင့်လည်း ဒလမြို့နယ်အတွင်းမှာ ကိုဗစ်-၁၉ ရောဂါ မျိုးရိုးဗီဇပြောင်း အိုမီခရွန်ကြိုတင်ကာကွယ်ရေးအတွက် ရည်ရွယ်၍ မြို့နယ် ကိုဗစ်-၁၉ ရောဂါကာကွယ်ထိန်းချုပ်ရေးနှင့် အရေးပေါ်တုန့်ပြန်ရေးကော်မတီ မှ ဦးဆောင်၍ အနယ်နယ်အရပ်ရပ်က ခရီးသွားလုပ်သားပြည်သူများ၊ ဒေသခံပြည်သူများအား နှာခေါင်းစည်းတပ်ဆင်ခြင်း မရှိသူများကို နှာခေါင်းစည်းများပေးဝေခြင်းနှင့် အသိပညာပေးနှိးဆော်ခြင်းလုပ်ငန်းများကိုလည်း မြို့နယ်အတွင်းရှိ လူစည်ကားရာ နေရာများနှင့် ဒလသင်္ဘောဆိပ်ကမ်းနှင့် စက်တပ်သမ္ဗန်ကူးတို့ဆိပ်တို့တွင် ပြုလုပ်ပေးလျက်ရှိတယ်လို့ ဆိုပါတယ်။

ဒါ့အပြင် နေ့စဉ် ပိုးတွေ့လူနာသစ် တစ်ထောင်ကျော်တွေ့ ရှိမှုမှာ ရန်ကုန်တိုင်းဒေသကြီးက တစ်နေ့ကို လူဦးရေ ၆၀၀ ကနေ ၇၀၀ နှုန်းနဲ့ အများဆုံးပိုးတွေ့ရှိနေတာဖြစ်ပြီး ဖေဖော်ဝါရီ လဆန်းပိုင်းက ပိုးတွေ့နှုန်းမှာ ၃ ရာခိုင်နှုန်းသာ ရှိခဲ့ရာကနေ အခုဆိုရင် ၈ ရာခိုင်နှုန်းအထိ တိုးမြင့်တွေ့ ရှိလာတာလည်း ဖြစ်ပါတယ်။

ဓါတ်ပုံ - ဒလမြို့နယ် ကိုဗစ်-၁၉ သတင်းပြန်ကြားရေးကော်မတီ။

ymg/kg
#Yangon_Media_Group

#LocalNews
Published - 16 Feb 2022

ညောင်သုံးပင်ဆရာ တော်ဘုရားကြီး၏ ကြွင်းကျန်သောရုပ်ကလပ်ကို MAI စင်းလုံးငှါးလေယာဉ်ဖြင့် မနက်ဖြန်( ဖေဖော်ဝါရီလ ၁၇ ရက်)တွင် မြန်မာနိုင်ငံရှိ မန္တ လေးမြို့သို့ ပြန်လည်ပင့် ဆောင်မှာဖြစ်သည့်အတွက် လိုအပ်သည့် ပြင်ဆင်မှုများနှင့် ဆရ တော်ကြီး အတွက် ရည်စူးကုသိုလ်ပြုပွဲကို ယနေ့တွင် ထိုင်းနိုင်ငံ၊ ဘန်ကောက်မြို့မှာ တပည့်သံဃာ တော်များနှင့် ဒါယိကာ၊ ဒါယိကာမများက စု ပေါင်း၍ ပြုလုပ်ခဲ့ကြတယ်လို့ သိရပါတယ်။

ဆရာတော်ကြီး၏ ကြွင်းကျန်သောရုပ်ကလပ်ကိုလည်း မနက်ဖြန် ဘန်ကော်စံတော်ချိန် ၁၀ နာရီ ၂၅ မိနစ်တွင် (MAI)စင်းလုံးငှါးလေယာဉ်ဖြင့် ပြန်လည့်ပင့်ဆောင်မည်ဖြစ်ပြီး မန္တလေးလေဆိပ်တွင် အဖူးမျှော်ခံကာ ထိုမှတစ်ဆင့် မိုးကုတ်မြို့သို့ ဆက်လက်ပင့်ဆောင်၍ ယခု
ဖေဖော်ဝါရီလ ၂၆ ရက် နေ့အထိ အပူဇော်ခံထားရှိမှာဖြစ်တယ်လို့ သိရပါတယ်။

ဆရာတော်ဘုရားကြီး၏ ရုပ်ကလပ်အား မိုးကုတ်မြို့ညောင်သုံးပင်ကျောင်းတိုက်မှာလည်း (၂)ပတ်တာ အဖူးမြော် ခံထားရှိကာ အန္တိမဈပနကို ကျင်းပပူဇော်သွားမှာဖြစ်တယ်လို့ သိရပါတယ်။

အန္တိမဈပနကို ကျင်းပပူဇော်သွားမည့် အစီစဉ်အသေးစိတ်ကိုလည်း ထပ်မံကြေညာ အသိပေးသွားမယ်လို့ ဆရာတော်ကြီး၏ ဒါယိကာ၊ ဒါယိကာမများထံမှ သိရပါတယ်။

မိုးကုတ်မြို့၊ ညောင်သုံးပင်သာမဏေကျော်စာသင်တိုက်ဆရာတော် နိုင်ငံတော်သံဃမဟာနာယကအဖွဲ့ (တွဲဖက်အကျိုးတော်ဆောင်) အဂ္ဂမဟာပဏ္ဍိတ အဂ္ဂမဟာဂန္ထဝါစကပဏ္ဍိတ အဂ္ဂမဟာသဒ္ဓမ္မဇောတိကဓဇ ဓမ္မကထိကဗဟုဇနဟိတဓရ ဆရာတော် ဒေါက်တာ
ဘဒ္ဒန္တတေဇောသာရ သက် တော်(၅၉)နှစ်သည် ထိုင်းနိုင်ငံ၊ ဘန်ကောက်မြို့ ၌ အသဲ ရောဂါ ကြောင့်ဆေးကုသမှုခံယူ နေစဉ် ဖေ ဖော်ဝါရီ ၁၄ ရက်၊ နံနက် (၁၂ နာရီ ၅၄ မိနစ်)အချိန်တွင် ဘဝနတ်ထံပျံလွန် တော်မူသွားခဲ့တာဖြစ်ပါတယ်။

ဒါ့အပြင် ယနေ့ နံနက်တွင် ထိုင်းနိုင်ငံ၊ ဘန်ကောက်မြို့တွင် ပြုလုပ်ခဲ့တဲ့ ဆရာ တော်ကြီး အတွက် ရည်စူးကုသိုလ်ပြုပွဲ အခမ်းအနားမှ ပုံရိပ် တွေကိုလည်း ယခုလိုတွေ့ မြင်ဖူးမြော်ရမှာဖြစ်ပါတယ်။

ဓါတ်ပုံ - ဒေါက်တာ တေ ဇောသာရ ဘိဝံသ(Page)

ymg/kg
#Yangon_Media_Group

#LocalNews
Published - 16 Feb 2022
အများက ကိုးကန့်အဖွဲ့ဟု ပြောလေ့ ရှိသည့် မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) ကို တည်ထောင်သူလည်း ဖြစ် ၊ ဥက္ကဋ္ဌဟောင်းဖြစ်သူ အသက် ၉၄ နှစ်အရွယ် ဦးဖုန်ကြားရှင်း ကွယ်လွန်ကြောင်း သိရသည်။

ဖေဖော်ဝါရီလ ၁၆ ရက် နံနက်က လူကြီးရောဂါဖြင့် ကွယ်လွန်ခြင်းဖြစ်ကြောင်း၊လက်ရှိတွင် ဈာပနအတွက် ပြင်ဆင်နေကြကြောင်း ၊ ဈာပနကို မနက်ဖြန် ဖေဖော်ဝါရီလ ၁၇ ရက်တွင် ပြုလုပ်မည် ဖြစ်ကြောင်း MNDAA ၏ ပြောရေးဆိုခွင့် ရှိသူကပြောသည်။

လွန်ခဲ့သည့် ၂၀၁၈ ခုနှစ် ဖေဖော်ဝါရီလ တတိယပတ်က ဦးဖုန်ကြားရှင်း ကွယ်လွန်ကြောင်း ကောလဟာလ သတင်းများထွက်ပေါ်ခဲ့သေးသည်။

၁၉၈၉ မတ်လ ၁၂ ရက်တွင် ဖုန်ကြားရှင်း နှင့် ဖုန်ကြားဖူးတို့ ညီအစ်ကို ခေါင်းဆောင်၍ ဗမာပြည်ကွန်မြူနစ်ပါတီ (ဗကပ) မှ ပထမဆုံး ခွဲထွက်ကာ MNDAA ကိုတည်ထောင်ခဲ့ကြကြောင်း သိရသည်။

ဦးဖုန်ကြားရှင်း ၏ ညီ ဦးဖုန်ကြားဖူး မှာ မြန်မာ – တရုတ်နယ်စပ်တွင် အဆုတ် ရောဂါ ဖြင့် ပြီးခဲ့သည့် ၂၀၁၇ ခုနှစ် ဇွန်လ ၂၀ ရက်က ကွယ်လွန်ခဲ့ကာ ယင်းမှာ ကွယ်လွန်စဉ် အသက် ၈၁ အရွယ် ရှိကြောင်း သိရသည်။

လက်ရှိတွင် မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) တွင် စစ်ဦးစီးချုပ် တာဝန်ကို ဦးဖုန်ကြားရှင်း ၏ သားကြီးဖြစ်သူ ဦးဖုန်တာရွှင် က တာဝန်ယူထားကြောင်းလည်း သိရသည်။

ymg/mt
photo-Global Times
#Yangon_Media_Group

#LocalNews
Published-16 Feb 2022
ကရင်ပြည်နယ်၊ မြဝတီ-ကော့ကရိတ်အာရှလမ်း၊ ကွမ်းခြံကုန်းအဆင်းတွင် ကော့ကရိတ်ဘက်မှ မြဝတီသို့ ပြောင်း ၊ ဆန်များတင်ဆောင်၍ မောင်းနှင်လာသော (၁၈)ဘီးတွဲယာဉ်(၁)စီး တိမ်းမှောက်မှု ယနေ့(ဖေဖော်ဝါရီ ၁၆ ရက်) နံနက် ၉ နာရီခွဲအချိန်က ဖြစ်ပွားခဲ့တယ်လို့သိရပါတယ်။

(၁၈)ဘီးတွဲယာဉ်(၁)စီး တိမ်းမှောက်မှုသတင်းရရှိသဖြင့် မြဝတီခရိုင်မီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ သင်္ဃန်းညီနောင်နယ်မြေမီးသတ်စခန်းမှ ရှာဖွေကယ်ဆယ်ရေးယာဉ်(၁)စီး၊ ရှာဖွေကယ်ဆယ်ရေးတပ်ဖွဲ့ဝင်များ၊ သက်ဆိုင်ရာအဖွဲ့အစည်းများဖြင့် ပူး ပေါင်း၍ ကယ်ဆယ်ရေးလုပ်ငန်းများသွားရောက်ဆောင် ရွက်ခဲ့ကြောင်း မြန်မာနိုင်ငံ မီးသတ်တပ်ဖွဲ့က သတင်းထုတ်ပြန်ထားပါတယ်။

ယာဉ်တိမ်းမှောက်မှုကြောင့် ယာဉ်ပေါ်ပါ ကျား(၃)ဦး၊ မ(၁)ဦး စုစုပေါင်း(၄)ဦးအနက် ကျား(၁)ဦး၊ မ(၁)ဦး(သေဆုံး)နှင့် ကျား(၂)ဦး ထိခိုက်ဒဏ်ရာရ(စိုးရိမ်ရ)တို့အား သင်္ဃန်းညီနောင်မြို့သစ်လူမှုကယ်ဆယ်ရေးအသင်းမှယာဉ်ဖြင့် မြဝတီပြည်သူ့ဆေးရုံသို့ ပို့ဆောင်ပေးခဲ့တယ်လို့ သိရပါတယ်။

ymg/hm
#Yangon_Media_Group

#BreakingNews
Published=16 Feb 2022

ယနေ့ နံနက် ၁၀နာရီ၄၃ မိနစ်က တပ်မတော်(လေ)တံတားဦးလေတပ်စခန်းမှတိုက်ခိုက်ရေးလေယာဉ်တစ်စီးသည်လေ့ကျင့်ပျံသန်းနေစဉ် အဆက်အသွယ်ပြတ်တောက်သွားသဖြင့် လေယာဉ်တစ်စင်းဖြင့်လိုက်လံရှာဖွေရာ စစ်ကိုင်းတိုင်းဒသကြီး အုန်းတော့ကျေးရွာ အရှေ့ဘက်ရှိ ရေမျက်ကြီးအင်းအတွင်းပျက်ကျခဲ့ပြီး လေယာဉ်မောင်းနှင်သူ လေသူရဲကိုရှာဖွေကယ်ဆယ်ရေးလုပ်ငန်းများဆောင်ရွက်နေကြောင်းသိရသည်။
ymg/hm
#Yangon_Media_Group

#LocalNews
Published - 16 Feb 2022
ကိုဗစ်ကြောင့် ပိတ်ထားသည့် တမူးမြို့ အဝင်အထွက်ဂိတ်များအားပြန်ဖွင့်ပေးလိုက်ပြီး ကုန်စည်စီးဆင်းမှုများနှင့် ခရီးသွားမှုတွေလည်း ပုံမှန်အတိုင်း ပြန်လည်စတင်နေပြီဖြစ်တယ်လို့ တမူးမြို့ ဒေသခံများထံမှ သိရပါတယ်။

ကိုဗစ်လူနာအများအပြားနှင့် အိုမီခရွန် အတည်ပြု လူနာများကို ပြီးခဲ့သည့် လပိုင်း အတွင်းမှာတမူးမြို့ မှာတွေ့ ရှိခဲ့တာကြောင့် ဒေသဆိုင်ရာအုပ်ချုပ်ရေးအဖွဲ့ က တမူးမြို့ ရှိ အိန္ဒိယ-မြန်မာ နယ်စပ်ဂိတ်တွေ အပါအဝင် မြို့အဝင်၊အထွက် ဂိတ်များကိုပိတ်လိုက်ပြီး ရောဂါ ထိန်းချုပ်ရေးတွေကို ဆောင်ရွက်ခဲ့တာပါ။

ယခုအခါမှာတော့တမူးမြို့ မှာ ကိုဗစ်အတည်ပြုလူနာများလျော့နည်းလာပြီး ရောဂါကိုလည်း
ကာကွယ် ထိန်းချုပ်ထားလာနိုင်ပြီ ဖြစ်တဲ့အတွက် ကိုဗစ်ကြောင့် ပိတ်ထားရတဲ့ တမူးမြို့ အဝင်အထွက်ဂိတ်များကို ဒေသအာဏာပိုင်တွေက ( ဖေ ဖော်ဝါရီ ၁၄ ရက်)မှ စတင်ကာ ပြန်လည်ဖွင့်လှစ်ပေးခဲ့တာဖြစ်တယ်လို့ သိရပါတယ်။

"ဂိတ် တွေက ပြန်ဖွင့်လိုက်ပါပြီ။ အရင်လို ပုံမှန်အတိုင်းဘဲသွားလာ နေကြပြီ။ ကုန်စည်စီးဆင်းမှု တွေလည်း ပြန်လုပ် နေကြပြီ။ ခရီးသွားလာတာ တွေလည်း ပြန်ရှိလာပါပြီ။ ခရီးသည်တင်ယာဉ် တွေလည်း သွားလာနေကြပါပြီ ။ သူကရက်ကိုထပ်မတိုးတော့ဘဲ ဂိတ် တွေကို ပြန်ဖွင့်ပေးလိုက်တာပေါ့ နော်။ မြို့မှာကလည်း ကိုဗစ်တွေ့ မှု ကနည်းလာတယ်။ အခုဆိုရင် အတည်ပြုလူနာက ၄၀ ကျော် လောက်ဘဲကျန်တယ်။ ဒါကလည်း နောက်နှစ်ပတ် လောက်ဆိုရင် ကုန်ပါပြီ။ ခရီးသွားလာမယ့်သူတွေကတော့ ကိုဗစ်စစ် ပေါ့ နော်။ တချို့ စစ်ပြီးသားသူတွေကျတော့လည်း ကိုဗစ်ထောက်ခံချက်နဲ့ သွားလာကြပေါ့။
ဒီလိုပုံစံမျိုးနဲ့ ပြန်လည်သွားလာခွင့် တွေကို ပြုလိုက်တာပါ။"လို့ တမူးမြို့ ဒေသခံတစ်ဦးက ပြောပါတယ်။

အိုမီခရွန် ရောဂါပိုးစတင် တွေ့ ရှိခဲ့တဲ့ အိန္ဒိယ-မြန်မာ နယ်စပ်မြို့တစ်မြို့ ဖြစ်တဲ့ တမူးမြို့တွင် ယနေ့ (ဖေ ဖော်ဝါရီ ၁၆ ရက် နေ့)အထိ ကိုဗစ်အတည်ပြု လူနာ ၄၁ ဦးသာကျန်ရှိတော့သည့် အတွက် ယခု ဖေဖော်ဝါရီလအတွင်း ကုန်သွယ်ရေးနှင့် ခရီးသွားလာခွင့်တွေကို ယခင်လို
ပြန်လည်ဖွင့် လှစ်ပေးခဲ့တာလည်း ဖြစ်ပါတယ်။

ဒါ့အပြင် တမူးမြို့ တွင် ယခုကူးစက်ခံနေရသော ရောဂါပိုးတွေ့လူနာများမှာ ဝေဒနာပြင်းထန်စွာခံစားနေရသောလူနာများမရှိဘဲ ယခု နောက်ပိုင်း စစ် ဆေးမှုရလဒ်များ အရလည်း ကိုဗစ်အတည်ပြုလူနာတွေ့ ရှိမှုနှုန်းက လျော့ကျလာတယ်လို့လည်း တမူးမြို့ ဒေသခံတွေက ပြောပြခဲ့ပါတယ်။

ထို့အပြင် ကျန်ရှိနေသည့် ပိုး တွေ့လူနာများကိုလည်းဆေးဝါးကုသမှုတွေကို ဆက်လက်ပြုလုပ်ပေးနေတယ်လို့ သိရပါတယ်။

ဓါတ်ပုံ - တမူးဇွဲမာန်

ymg/kg
#Yangon_Media_Group

#LocalNews
Published - 16 Feb 2022
ပန်းဆိုးတန်း-ဒလ ကူးတို့သင်္ဘောခရီးစဉ်ကို တစ်ရက်လျှင် အသွား၊အပြန်အခေါက် ရေ ၄၀ နှုန်းဖြင့် ပြေးဆွဲပို့ဆောင်ပေးနေတယ်လို့ ပြည်တွင်းရေကြောင်းပို့ ဆောင်ရေး(မြစ်ဝကျွန်းပေါ်ဌာနခွဲ)မှ သိရပါတယ်။

လက်ရှိအချိန်တွင် အစိုးရရုံးဖွင့်ရက်များနှင့် ရုံးပိတ်ရက်များ အပါအဝင် အသွားအခေါက် ၄၀ ၊ အပြန်အခေါက် ၄၀ နှုန်းဖြင့် ချယ်ရီရေယာဉ်များနဲ့ပြေးဆွဲပို့ ဆောင်ပေးနေတာပါ။

ဒါ့အပြင် ခရီးသည်များသွားလာမှု အဆင်ပြေချောမွေ့စေရေးအတွက် သင်္ဘောရေယာဉ်ခရီးစဉ်များ ပြေးဆွဲပေးရာတွင် ဒလဆိပ်ကမ်းမှ စတင်ထွက်ခွာချိန်အား နံနက် ၅ နာရီခွဲမှ ည ၇ နာရီအထိနှင့် ရန်ကုန်(ပန်းဆိုးတန်း)ဆိပ်ကမ်းမှ စတင်ထွက်ခွာချိန်အား နံနက် ၆ နာရီမှ ည ၇ နာရီခွဲအထိ သတ်မှတ်ပြီးပြေးဆွဲပေးနေတာဖြစ်တယ်လို့ ဆိုပါတယ်။

"ကျမတို့က ဒလမြို့မှာ နေတဲ့သူတွေဆိုတော့ ဒီချယ်ရီသင်္ဘောကိုဘဲ အဓိကထားပြီး အားကိုးပြီး သွားလာနေရတာ ပေါ့။ နေ့စဉ်အလုပ်သွားလည်း ဒီသင်္ဘောပဲစီးရတာပေါ့နော်။ သူတို့ကအခေါက်ရေများများဆွဲ ပေး လေ ကျမတို့ ခရီးသွား တွေအတွက်ပိုအဆင်ပြေလေပေါ့နော်။ သင်္ဘောကျတော့ စီးရတာ ပိုကောင်းတာပေါ့၊ သမ္ဗာန်တွေထက်စာရင် ပိုပြီးလုံခြုံစိတ်ချရတာ ပေါ့။ ကျ မတို့ ကတော့ မြစ်ကူးသင်္ဘောပဲ အများဆုံးစီးဖြစ်ပါတယ်။"လို့ ဒလမြို့တွင် နေထိုင်သူကုမ္ပဏီဝန်ထမ်းတစ်ဦးကပြောပြခဲ့ပါတယ်။

ရန်ကုန်(ပန်းဆိုးတန်း-ဒလ) ကူးတို့ သင်္ဘောခရီးစဉ်ကိုဒလမြို့နယ် ဒေသခံပြည်သူများ အပါအဝင် တွံတေး၊ ကော့မှူး၊ ကွမ်းခြံကုန်းမြို့နယ်များနှင့် ဧရာဝတီတိုင်းဒေသကြီးအတွင်းရှိ ခရီးသွားလုပ်သားပြည်သူများ၊ အစိုးရဝန်ထမ်းများ၊ ပုဂ္ဂလိကဝန်ထမ်းများနှင့် အထွေထွေလုပ်သားပြည်သူများစွာက နေ့စဉ် စီးနင်းသွားလာ နေကြတာပါ။

ဒါကြောင့်လည်း အနယ်နယ်အရပ်ရပ်က ခရီးသွားလုပ်သား ပြည်သူများ သွားလာမှု အပေါ်မူတည်၍ ရေယာဉ် ခရီးစဉ်အချိန်များကို ခေါက်ရေတိုး၍ ပြေးဆွဲပို့ ဆောင်ပေးလျက်ရှိတယ်လို့ လည်း ပြည်တွင်းရေကြောင်းပို့ဆောင်ရေး (မြစ်ဝကျွန်းပေါ်ဌာနခွဲ)မှ
သိရပါတယ်။

ymg/kg
#Yangon_Media_Group

#LocalNews
Published-16 Feb 2022

ဒွါဒသမ တိပိဋိကဓရ ဓမ္မ ဘဏဂါရိက ဘဒ္ဒန္တ အဘိဇာတာဘိဝံသ (စစ်ကိုင်းတိပိဋိက)ဆရာတော်ဘုရားကြီး ၏ကြွင်းကျန်ရစ်သော အရိုးပြာအိုး တစ်ချို့ တစ်ဝက်ကို မုံရွာမြို့ သဒ္ဓမ္မဇောတကသုဗောဓာရုံကျောင်းတိုက်မှ ရန်ကုန်မြို့ သဒ္ဓမ္မမာနိတာရုံကျောင်းတိုက်သို့ ဇာတိရွာ ၌အမှတ်တရစေတီမတည်မီ ဆရာတော်ကိုကြည်ညိုလေးစားသူများလာရောက် ရှိခိုးဝပ်ချ တောင်းပန်ကန်တော့မှုပြုနိုင်ပါစေရန် ဖေဖော်ဝါရီလ ၁၆ရက်က ပင့်ဆောင်ခဲ့ကြောင်းသိရပါတယ်။

ရန်ကုန်မြို့ ၊ သဒ္ဒမ္မမာနိတာရုံကျောင်းတိုက် ပဓာနနာယကဆရာတော်မုံရွာမြို့ ၊သဒ္ဒမ္မဇောတက သုဗောဓာရုံ ကျောင်းတိုက်နာယကဆရာတော် ဒွါဒသမ တိပိဋိကဓရ ဓမ္မ ဘဏဂါရိက ဘဒ္ဒန္တ အဘိဇာတာဘိဝံသ (စစ်ကိုင်းတိပိဋိက)ဆရာတော်ဘုရားကြီး ရုပ်ကလာပ်အား ဖေဖော်ဝါရီလ ၁၃ရက် ယနေ့ မွန်းလွဲ ၃နာရီကအန္တိမအဂ္ဂိဈာပနအခမ်းအနားနဲ့ပူဇော်လိုက်တာဖြစ်ပါတယ်။

စစ်ကိုင်းတိပိဋကဆရာတော်ဘဒ္ဒန္တအဘိဇာတာဘိဝံသဆရာတော်ဟာ ထိုင်းနိုင်ငံ၊ဘန်ကောက် မြို့ Bumrungrad ဆေးရုံကြီးမှာ ရိုးတွင်းချဉ်ဆီအစားထိုးလဲလှယ်ကုသရန် နဲ့သွေးဖြူဥရောဂါတို့ အတွက် ဆေးကုသမှုခံယူရင် ယင်းဆေးရုံတွင် ဖေဖော်ဝါရီ ၇ရက်နေ့ မြန်မာစံတော်ချိန် ညနေ ၅နာရီ ၄၉မိနစ်မှာ ဘဝနတ်ထံ ပျံလွန်တော်မူခဲ့တာဖြစ်ပါတယ်။

ဆရာတော်ဟာ စစ်ကိုင်းတိုင်းဒေသကြီး ဝက်လက်မြို့နယ်၊ ဆင်နင်းကျေးရွာတွင် ခမည်းတော် ဦးတင်ရ၊မယ်တော် ဒေါ်ညွန့်ခင်တို့ မှ ၁၃၃၀ပြည့်နှစ်၊သီတင်းကျွတ်လဆန်း(၈)ရက်၊တနင်္ဂနွေနေ့တွင် ဖွားမြင်တော်မူသော သားရတနာဖြစ်ပြီး ဘဝနတ်ထံပျံလွန်တော်မူစဉ်မှာ သက်တော်(၅၄)နှစ်၊သိက္ခာတော်(၃၄)ဝါရှိပြီဖြစ်ပါတယ်။
ymg/hm

#LocalNews
Published_ 16 Feb 2022

တောင်ကိုရီးယား POSCO International Corporation (Myanmar E&P) က မြန်မာ့ရေနံနှင့် သဘာဝဓာတ်ငွေ့လုပ်ငန်း (MOGE) နှင့် ပူးပေါင်းပြီး ရွှေသဘာဝဓာတ်ငွေ့ စီမံကိန်းအပိုင်း(၂)ရဲ့ ရခိုင်ကမ်းလွန်လုပ်ကွက် A-1 မှာ တူးဖော်ရေးလုပ်ငန်းများ စတင်နိုင်ရန် ပြင်ဆင်မှုများ ပြုလုပ်လျက်ရှိနေတယ်လို့ BETV စီးပွားရေးသတင်းမှာ ဖော်ပြထားပါတယ်။

Myanmar E&P အနေနဲ့ A-1 မှာ ရွှေအဆင့် (၂) ဖွံ့ဖြိုးတိုးတက်ရေး စီမံကိန်းအရ တပ်ဆင်ခြင်းလုပ်ငန်းများကို ကမ်းလွန်ဆောက်လုပ်ရေးရေယာဉ် ‘‘DLV 2000’’ နှင့် ဖေဖော်ဝါရီ ၁၆ ရက်မှ မတ်လ ၁၅ ရက်အထိ ဆောင်ရွက်သွားမယ်လို့ ကြေညာထား ပါတယ်။

ရွှေစီမံကိန်းမှာ POSCO International က ရှယ်ယာ ၅၁ ရာခိုင်နှုန်း ပိုင်ဆိုင်ကာ အော်ပရေတာအဖြစ် လုပ်ကိုင်ခွင့်ရရှိထားပြီး MOGE(မြန်မာ)က ၁၅ ရာခိုင်နှုန်း၊ ONGC(အိန္ဒိယ)က ၁၇ ရာခိုင်နှုန်း၊ KOGAS (တောင်ကိုရီးယား)နှင့် GAIL(အိန္ဒိယ)တို့က ၈.၅ ရာခိုင်နှုန်းစီ အချိုးကျပါဝင်ကာ ပူးပေါင်းဆောင်ရွက်နေခြင်း ဖြစ်ကြောင်းသိရပါတယ်။

ကမ်းလွန်လုပ်ကွက် A-1 နှင့် A-3 တို့ တွင် ပါရှိသည့် ရွှေစီမံကိန်းအတွင်း A-1 အတွင်း ‘ရွှေ’ နှင့် ‘ရွှေဖြူ’ လုပ်ကွက်တို့ ရှိပြီး A-3 မှာ ‘မြ’ လုပ်ကွက်တိုရှိကာ ထွက်ရှိလာသည့် ဓာတ်ငွေ့များ ကို တရုတ်အမျိုးသားရေနံကော်ပိုရေးရှင်းထံ ၂၀၁၃ ခုနှစ်မှ စတင်ကာ ပိုက်လိုင်းဖြင့် ပိုလွှတ်ရောင်းချခဲ့တယ်လို့ သတင်းမှာဖော်ပြထားပါတယ်။

POSCO ရဲ့ ထုတ်ပြန်ချက်အရ ရွှေအဆင့် (၂) ဖွံ့ ဖြိုးတိုးတက်ရေး စီမံကိန်း အတွက် အမေရိကန်ဒေါ်လာ ၄၇၃ သန်း ရင်းနှီးမြှုပ်နှံဖို့ လျာထားပြီး ကမ်းလွန်လုပ်ကွက် A-1 ရှိ ‘ရွှေ’ နှင့် ‘ရွှေဖြူ’ လုပ်ကွက်ဧရိယာအတွင်း စီးပွားဖြစ်ထုတ်လုပ်ရေး ရှစ်တွင်း တူးဖော်မယ်လို့ သိရပါတယ်။

ymg-mnn
#Yangon_Media_Group

#WorldHealth
Published - 16 February 2022

လှုပ်ရှားလေ့ကျင့်ခန်းပြုလုပ်ခြင်းက ခန္ဓာကိုယ်သန်စွမ်းကြံ့ခိုင်စေရုံတင်မကဘဲ ကိုဗစ်ကာကွယ်ဆေးထိုးပြီးတဲ့အခါ ပဋိပစ္စည်း antibody တွေကို တိုးများလာစေကြောင်း အိုင်ယိုဝါပြည်နယ်တက္ကသိုလ်မှ သုတေသီတွေက တင်ပြထားပါတယ်။

လေ့ကျင့်ခန်းပြုလုပ်ပေးခြင်းက တုပ်ကွေးကာကွယ်ဆေးနဲ့ ကိုဗစ်ကာကွယ်ဆေးထိုးပြီးတဲ့အခါ ပဋိပစ္စည်းထွက်ပေါ်လာမှုကို အားပေးကြောင်း၊ ကာကွယ်ဆေးထိုးပြီး လေ့ကျင့်ခန်းပြုလုပ်ခြင်းက ဘေးထွက်ဆိုးကျိုးမဖြစ်စေနိုင်ကြောင်း သုတေသီတွေက Science Direct ဂျာနယ်မှာ ထုတ်နုတ်ဖော်ပြထားပါတယ်။

ကာကွယ်ဆေးထိုးပြီးပြီးချင်း မိနစ် ၉၀ ကြာလေ့ကျင့်ခန်းပြုလုပ်ခြင်းရဲ့ အကျိုးသက်ရောက်မှုကို လေ့လာတဲ့အနေနဲ့ ကြွက်တွေကို ပြေးစက်မှာပြေးခိုင်းပြီး လေ့လာကြရာမှာ ရလာဒ်အတူတူထွက်ရှိလာခဲ့ပါတယ်။

ဗိုင်းရပ်စ်ကိုမှတ်မိသိရှိတဲ့ ပဋိပစ္စည်းတွေထွက်ရှိလာအောင် 'အင်တာဖရွန်အယ်လ်ဖာ'လို့ ခေါ်တဲ့ ပရိုတိန်းတွေရှိနေတာကို တွေ့ခဲ့ရပါတယ်။အချိန်အနည်းငယ်သာ လေ့ကျင့်ခန်းပြုလုပ်ခြင်းကတော့ ပဋိပစ္စည်းတွေများလာအောင် မလုပ်ပေးနိုင်ပါဘူး။

လေ့လာတွေ့ရှိချက်တွေအရ လေ့ကျင့်ခန်းပြုလုပ်ခြင်းဖြင့် ကာကွယ်ဆေးထိုးပြီး ၄ ပတ်အကြာအထိ သွေးရည်ကြည်ပဋိပစ္စည်းတွေ များစွာထွက်ရှိနေနိုင်ပါတယ်။လေ့ကျင့်ခန်းပုံမှန်ပြုလုပ်လေ့ရှိတဲ့ လူလတ်ပိုင်းတွေဟာ ကာကွယ်ဆေးထိုးပြီးနောက် သာမန်လေ့ကျင့်ခန်းပြုလုပ်ပေးခြင်းဖြင့် ကာကွယ်ဆေးကြောင့်ထွက်ရှိတဲ့ ပဋိပစ္စည်း antibody တွေ တိုးများလာစေပါတယ်။

စမ်းသပ်လေ့လာခဲ့တဲ့သူတဝက်နီးပါးလောက်က အဝလွန်တဲ့သူတွေဖြစ်ကြပေမယ့် လေ့ကျင့်ခန်းလုပ်နေစဉ်မှာတော့ ကျန်းမာတဲ့လူတစ်ယောက်ရဲ့ နှလုံးခုန်နှုန်းအတိုင်းထိန်းသိမ်းထားနိုင်ပါတယ်။

အရင်ထုတ်ပြန်ခဲ့ဖူးတဲ့ညွှန်ကြားချက်တွေထဲမှာ ကိုဗစ်ကာကွယ်ဆေးစထိုးတဲ့သူတွေအနေနဲ့ နှလုံးကြွက်သားရောင်ရမ်းခြင်းမျိုး မဖြစ်စေရန် လေ့ကျင့်ခန်းပြုလုပ်ခြင်းကို တစ်ပတ်လောက်ရှောင်ရှားဖို့ ညွှန်ကြားထားခဲ့ပါတယ်။

ပြီးခဲ့တဲ့အောက်တိုဘာလတုန်းက ဖိုင်ဇာကာကွယ်ဆေးထိုးပြီးတဲ့အခါ လေ့ကျင့်ခန်းမျိုးစုံပြုလုပ်နိုင်တယ်လို့ ကျန်းမာရေးဝန်ကြီးဌာနက ထုတ်ပြန်ကြေညာခဲ့ပါတယ်။
ကာကွယ်ဆေးထိုးပြီး နှလုံးရောင်ရမ်းခြင်းဖြစ်နိုင်ချေက အလွန့်အလွန်နည်းပါးကြောင်း အစ္စရေးလ်တို့ ကလည်း ဖော်ပြထားပါတယ်။

"ကျွန်တော်သိသလောက်ကတော့ ကာကွယ်ဆေးထိုးပြီးလို့ လေ့ကျင့်ခန်းမလုပ်သင့်ဘူးဆိုတာမျိုး မရှိပါဘူး" လို့ အစ္စရေးလ်ကျန်းမာရေးဝန်ကြီးဌာနမှ အထွေထွေညွှန်ကြားရေးမှူး ပရော်ဖက်ဆာ'နာ့ခ်မန်အက်ရှ်'က ပြောကြားလိုက်ပါတယ်။
Source: The Jerusalem Post 

#WorldPolitics
Published 16 February 2022

ယူကရိန်းနိုင်ငံအား ကျူးကျော်တိုက်ခိုက်ခြင်းမပြုလုပ်ဘဲ စစ်ပွဲကိုရှောင်ရှားဖို့ ရုရှားသမ္မတ'ဗလက်ဒီမီယာပူတင်'ကို အမေရိကန်သမ္မတ'ဂျိုးဘိုင်ဒန်'က အင်္ဂါနေ့က အလေးအနက်တောင်းဆိုလိုက်ပါတယ်။

ရုရှားတို့ကျူးကျော်တိုက်ခိုက်လာပါက မလိုအပ်ဘဲ အသက်သေဆုံးမှုတွေ ပျက်စီးဆုံးရှုံးမှုတွေ ဖြစ်ပေါ်လာမှာဖြစ်ပြီး 'ပူတင်'အနေနဲ့လည်း နိုင်ငံတကာက ရန်သူအဖြစ် သတ်မှတ်ခြင်းခံရနိုင်ကြောင်း 'ဘိုင်ဒန်'က ဆိုပါတယ်။

'ဘိုင်ဒန်'က ရုပ်မြင်သံကြားမိန့်ခွန်း၌ပြောကြားရာမှာ ယူကရိန်းကို ရုရှားစစ်အင်အား ၁ သိန်းခွဲခန့် ဝိုင်းရံထားတယ်လို့ ခန့်မှန်းရကြောင်း၊ ဒါဟာ အရင်နေ့တွေက ဖြန့်ကျက်ထားတဲ့ စစ်အင်အား ၁ သိန်းထက် ပိုများလာတာဖြစ်ကြောင်း၊ အချို့တပ်ဖွဲ့တွေ တပ်ဆုတ်လာတယ်ဆိုပေမယ့် အတည်မပြုနိုင်သေးကြောင်း၊ ကျူးကျော်မှုပြုလုပ်နိုင်ချေကတော့ အများကြီးရှိနေသေးကြောင်း ပြောကြားသွားခဲ့ပါတယ်။

ရုရှားအနေနဲ့ ဒီအကြပ်အတည်းမှာ ဖြေလျှော့သွားမလား ရင်ဆိုင်သွားမလားဆိုတာကို ရွေးချယ်လို့ရတဲ့ အခြေအနေရှိနေပါတယ်။

တကယ်လို့ ရုရှားတို့ ယူကရိန်းကိုကျူးကျော်မယ်ဆိုရင်တော့ အမေရိကန်နဲ့မဟာမိတ်အဖွဲ့တွေက ရုရှားတို့ ရဲ့စီးပွားရေးတွေကို ပစ်မှတ်ထားကာ ဒဏ်ခတ်အရေးယူသွားမှာဖြစ်ပြီး တစ်ကမ္ဘာလုံးနဲ့ အဆက်အသွယ်ဖြတ်ဆန့်ကျင်သွားဖို့ ပြင်ဆင်ထားကြပါတယ်။
'ဘိုင်ဒန်'ပြောဆိုခဲ့တဲ့ စကားလုံးတွေက 'ပူတင်'ကို အဓိကထားရည်ရွယ်ထားတာဖြစ်ပါတယ်။

ယူကရိန်းကို နေတိုး(NATO)အဖွဲ့ဝင်နိုင်ငံအဖြစ် လက်မခံဖို့နဲ့ နေတိုးတပ်ဖွဲ့တွေ ဥရောပအရှေ့ဘက်ကို ထပ်မံတိုးချဲ့မလာဖို့ 'ပူတင်'က တောင်းဆိုချက်တွေ တင်ပြထားပါတယ်။
'ဘိုင်ဒန်'က ရုရှားကို အရေးယူဒဏ်ခတ်သွားမယ်လို့ ခြိမ်းခြောက်နေပေမယ့် 'ပူတင်'ရဲ့သဘောထားကိုတော့ ပြောင်းလဲလာအောင် မစွမ်းဆောင်နိုင်သေးပါဘူး။

"အမေရိကန်နဲ့ နေတိုးတပ်ဖွဲ့ တွေက ရုရှားကိုခြိမ်းခြောက်နေတာမဟုတ်ပါဘူး။ ယူကရိန်းကလည်း ခြိမ်းခြောက်နေတာမဟုတ်ပါဘူး။ ယူကရိန်းနိုင်ငံအတွင်း အမေရိကန်နဲ့နေတိုးတပ်ဖွဲတွေရဲ့ ဒုံးကျည်တွေလည်း မရှိပါဘူး။ ထားရှိဖို့လည်း မရည်ရွယ်ထားပါဘူး။ ရုရှားပြည်သူတွေကို ပစ်မှတ်ထားအရေးယူနေတာမဟုတ်ပါဘူး။ ရုရှားနိုင်ငံ မငြိမ်မသက်ဖြစ်အောင် မရည်ရွယ်ပါဘူး" လို့ 'ဘိုင်ဒန်'က ဆိုပါတယ်။

"ရုရှားပြည်သူပြည်သားတွေကို ပြောပြချင်တာက ကျွန်တော်တို့က ရန်သူတွေမဟုတ်ပါဘူး။ ယူကရိန်းကိုတိုက်ခိုက်ပြီး သေကြေပျက်စီးကြရတာကို သင်တို့လည်း လိုချင်မှာမဟုတ်ဘူးလို့ ယုံကြည်ပါတယ်" လို့ 'ဘိုင်ဒန်'က ရုရှားနိုင်ငံသားတွေကို ကြေညာလိုက်ပါတယ်။

ရုရှားအနေနဲ့ ကျူးကျော်တိုက်ခိုက်ခဲ့ရင် လူ့အသက်တွေ ပျက်စီးဆုံးရှုံးမှုတွေ များသွားမှာဖြစ်ပြီး မလိုအပ်ဘဲ သေကြေပျက်စီးမှုတွေဖြစ်စေတဲ့လမ်းကို ရုရှားတို့ ရွေးချယ်ခဲ့တယ်ဆိုတာ ကမ္ဘာကမေ့ပျောက်သွားမှာမဟုတ်ပါဘူးလို့ ဆိုခဲ့ပါတယ်။

ဒါ့အပြင် 'ဘိုင်ဒန်'က အမေရိကန်တို့က ရုရှားနဲ့ထိပ်တိုက်ရင်ဆိုင်မှုဖြစ်အောင် ပြုလုပ်နေတာမဟုတ်ကြောင်း၊ ယူကရိန်းနိုင်ငံအတွင်းမှာ အမေရိကန်စစ်သည်တွေက တိုက်ခိုက်သွားမှာမဟုတ်ကြောင်း၊ ဒါပေမဲ့ ရုရှားတို့က ယူကရိန်းနိုင်ငံအတွင်း အမေရိကန်တွေကို တိုက်ခိုက်မယ်ဆိုရင်တော့ အလုံးအရင်းနဲ့ တုန့်ပြန်သွားမှာဖြစ်ကြောင်း ပြောကြားခဲ့ပါတယ်။
မိန့်ခွန်းမပြောကြားခင် တစ်ရက်အလိုက ယူကရိန်းအနေနဲ့ ဆိုက်ဘာတိုက်ခိုက်မှုတွေ ခံခဲ့ရပြီး ရုရှားလက်ချက်လို့ ယူဆရကြောင်း ပြောခဲ့ပါတယ်။

ရုရှားအနေနဲ့ ကုမ္ပဏီတွေ အရေးကြီးတဲ့ အချက်အခြာအဆောက်အအုံတွေကို ဆိုက်ဘာတိုက်ခိုက်မှုတွေ ပြုလုပ်လာမယ်ဆိုရင် တုန့်ပြန်သွားဖို့ ပြင်ဆင်ထားကြောင်း 'ဘိုင်ဒန်'က သတိပေးထားပါတယ်။
Source: Reuters