#Local_News
Published_2 July 2022

တရားမဝင်မြန်မာများပါ ကားတစ်စီး မလေးရှားသို့သွားရောက်စဉ် တိမ်းမှောက်၍ ၂၃ ဦးဒဏ်ရာရသွားကြောင်း မြန်မာရွှေ့ပြောင်းအလုပ်သမားများအရေး ဆောင်ရွက်သူများက ပြောသည်။

ဇူလိုင်လ တစ်ရက်ညနေ ၃ နာရီခန့်အချိန်က ထိုင်းနိုင်ငံ အာရှလမ်းမကြီး တောင်ပိုင်းအဝင် ဗန်းလမ်လိုင်ရွာ ထခေခရိုင် ထချန်ခရိုင်ခွဲ စုရာဇ်ဌာနီတွင် ကားတိမ်းမှောက်ခဲ့ခြင်း ဖြစ်ကြောင်း၊ စိုးရိမ်ဒဏ်ရာ ရသူမရှိကြောင်း သိရသည်။

ယင်းမြန်မာနိုင်ငံသားများအား အဖြူရောင်ပစ်ကပ်ကားတစ်စီးဖြင့် တင်ဆောင်၍ မလေးရှားနိုင်ငံသို့ ထိုင်းနိုင်ငံမှတစ်ဆင့် ပို့ဆောင်ရန် သွားရောက်စဉ် လမ်းတွင် မော်တော်ဆိုင်ကယ်ဖြင့် တိုက်မိသောကြောင့် အရှိန်မထိမ်းနိုင်ဘဲ လမ်းဘေးသို့ ထိုးကျတိမ်းမှောက်ခဲ့ခြင်းဖြစ်ကြောင်း သိရသည်။

ymg/mt
#Yangon_Media_group

#Local_News

Published - 2 July 2022

ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီမှ ပြည်တွင်းအလုပ်အကိုင် အခွင့်အလမ်း ၃၃၇၃ နေရာဖန်တီးပေးနိုင်ခဲ့ကြောင်း တိုင်းဒေသကြီး ရင်းနှီးမြှုပ်နှံမှု ကော်မတီရုံး၌ ပြုလုပ်သည့် အစည်းအဝေးပွဲမှ သိရသည်။

အဆိုပါ အစည်းအဝေးတွင် ရန်ကုန်တိုင်းဒေသကြီး ရင်းနှီးမြှုပ်နှံမှု ကော်မတီအနေဖြင့် စက်မှုကဏ္ဍတွင် မြန်မာနိုင်ငံသား ရင်းနှီးမြှုပ်နှံမှုလုပ်ငန်းသုံးခုနှင့် နိုင်ငံခြား ရင်းနှီးမြှုပ်နှံမှုလုပ်ငန်း သုံးခုတို့ကို အတည်ပြုပေးခဲ့ပြီး CMP စနစ်ဖြင့် ဆံပင်တုအမျိုးမျိုး ထုတ်လုပ်ခြင်းလုပ်ငန်း၊ အမျိုးသမီးဝတ် အတွင်းခံအင်္ကျီ၊ အတွင်းခံဘောင်းဘီနှင့် ၎င်းတို့၏ ဆက်စပ်ပစ္စည်းအမျိုးမျိုး ချုပ်လုပ်ခြင်းလုပ်ငန်း၊ အဝတ်အထည်အမျိုးမျိုး ချုပ်လုပ်ခြင်းလုပ်ငန်းတို ဖြစ်ကြောင်း သိရသည်။

အဆိုပါ ရင်းနှီးမြှုပ်နှံမှုလုပ်ငန်းများ၏ မတည်ငွေရင်း ပမာဏမှာ မြန်မာ ငွေကျပ် ၄၄၄၁ ဒသမ ၄၇၇ သန်းနှင့် အမေရိကန်ဒေါ်လာ ၆ ဒသမ ၆၅၉ သန်းဖြစ်ကာ ရင်းနှီးမြှုပ်နှံမှုလုပ်ငန်း ခြောက်ခုမှ ပြည်တွင်းအလုပ်အကိုင် အခွင့်အလမ်း ၃၃၇၃ နေရာ ဖန်တီးပေးနိုင်ခဲ့ကြောင်း သိရသည်။

ယင်းအပြင် အလုပ်အကိုင်အခွင့်အလမ်းများရရှိစေရန်အတွက် အထည်ချုပ်စက်ရုံအသစ်များကို လစဥ်ဖွင့်လှစ်ခွင့်ပြုခဲ့ပြီး ပြီးခဲ့သည့် မေလတွင် လုပ်သားနှစ်သောင်းကျော် အလုပ်အကိုင်ပေးထားနိုင်ခဲ့ကြောင်း သိရသည်။

ကိုဗစ်-၁၉ ကြောင့် ပြည်တွင်းရှိ စီးပွားရေးလုပ်ငန်းအချို့ ရပ်ဆိုင်းလုနီးပါးဖြစ်ခဲ့ရပြီး အထူးသဖြင့် စက်မှုဇုန်အလုပ်အသမားများ အများဆုံး အလုပ်လက်မဲ့များဖြစ်ခဲ့ရကြောင်း၊ လက်ရှိအချိန်တွင် အလုပ်ကိုင်ရှားပါးနေမှုကြောင့် ထိုင်းနိုင်ငံသို့ တရားမဝင် သွားရောက်လုပ်ကိုင်သူများရှိနေပြီး အစိုးရမှလည်း တရားဝင် လုပ်သားစေလွှတ်မှုများ ရှိနေကြောင်းလည်းသိရသည်။

ymg/sth
#Yangon_Media_Group

#WorldPolitics
Published 2 July 2022

ယူကရိန်းကိုကျူးကျော်ခဲ့တဲ့ရုရှားကို အနောက်နိုင်ငံများက ခွဲခြားဆက်ဆံနေပေမယ့် အင်ဒိုနီးရှားနိုင်ငံက ရုရှားတို့နဲ့ပူးပေါင်းပြီး စီမံကိန်းအများအပြား ပြုလုပ်သွားဖို့ စီစဉ်နေကြပါတယ်။

အင်ဒိုနီးရှားနိုင်ငံ အရှေ့ဂျာဗားဒေသမှာ လောင်စာဆီနဲ့ ရေနံဓာတုလုပ်ငန်းအတွက် ကုန်ကြမ်းများထုတ်လုပ်နိုင်ရန် အင်ဒိုနီးရှားနိုင်ငံပိုင် Pertamina ရေနံကုမ္ပဏီနဲ့ ရုရှားပိုင် Rosneft ရေနံကုမ္ပဏီတို့က ရေနံချက်စက်ရုံတစ်ခုတည်ဆောက်ဖို့စီစဉ်နေကြကြောင်း အင်ဒိုနီးရှားအစိုးရအကြီးတန်းအရာရှိတစ်ဦးက ဇူလိုင် ၁ ရက်နေ့မှာ The Straits Times သတင်းဌာနကိုပြောကြားခဲ့ပါတယ်။

"အခွန်ကင်းလွတ်ခွင့်ကာလနဲ့ ပတ်သက်ပြီး ရုရှားနဲ့ဆွေးနွေးညှိနှိုင်းနေပါတယ်၊ စီမံကိန်းကရှေ့ဆက်နေဆဲဖြစ်ပါတယ်" လို့ စီမံကိန်းကိုကြီးကြပ်ဦးစီးနေတဲ့ အမည်မဖော်လိုသူ အရာရှိတစ်ဦးက ပြောပြခဲ့ပါတယ်။

အဆိုပါ နှစ်နိုင်ငံပိုင်ကုမ္ပဏီတွေက အစောပိုင်းတုန်းကလည်း ဂျာကာတာအခြေစိုက်ဖက်စပ်လုပ်ငန်းတစ်ခုဖြစ်တဲ့ PT Pertamina Rosneft Pengolahan dan Petrokimia ကို အကောင်အထည်ဖော်ခဲ့ပြီး အရှေ့ဂျာဗား ကျူဘန်မြို့ရှိ New Grass Refinery Root (NGRR) လုပ်ငန်းကို ထိန်းချုပ်ထားကာ တစ်နေ့ကို ဓာတ်ဆီ၊ ဒီဇယ်ဆီ၊ လေယာဉ်ဆီစည်ပိုင်းပေါင်း ၂၂၉,၀၀၀ ထွက်ရှိနေပါတယ်။

ယခုစီမံကိန်းရဲ့ ကနဦးကုန်ကျစရိတ်က အမေရိကန်ဒေါ်လာ ၁၆ ဘီလီယံရှိခဲ့ပြီး Rosneft ကုမ္ပဏီက ၄၅ ရာခိုင်နှုန်းနဲ့ Pertamina ကုမ္ပဏီက ၅၅ ရာခိုင်နှုန်းပါဝင်ပိုင်ဆိုင်နေပါတယ်။

စီမံကိန်းပြီးမြောက်အောင်မြင်ခဲ့ရင် အင်ဒိုနီးရှားအနေနဲ့ လောင်စာဆီတင်သွင်းခြင်းကိုမှီခိုနေရခြင်းအတွက် များစွာအထောက်အကူပြုစေမှာဖြစ်ပါတယ်။

အင်ဒိုနီးရှားသမ္မတ'ဝီဒိုဒို'နဲ့ အစိုးရအဖွဲ့က စက်သုံးဆီအရောင်းဆိုင်တွေမှာ လူအများတတ်နိုင်တဲ့ လောင်စာဆီဈေးနှုန်းအတိုင်းရောင်းချနိုင်ဖို့ လောင်စာထုတ်လုပ်ရေးလုပ်ငန်းများ တိုးချဲ့လျက်ရှိပါတယ်။

အင်ဒိုနီးရှားနိုင်ငံရှိ လူဦးရေသန်း ၂၇၀ ဟာ ကိုဗစ်ကပ်ရောဂါရိုက်ခတ်မှုဒဏ်မှ ရုန်းထွက်နေကြရဆဲဖြစ်ပြီး ဒီလိုလောင်စာကုမ္ပဏီတွေ တိုးချဲ့လာတာဟာ နိုင်ငံရေးနဲ့လူမှုရေးတည်ငြိမ်အေးချမ်းဖို့ အရေးပါတဲ့ဆုံးဖြတ်ချက်ဖြစ်ကြောင်း လေ့လာသုံးသပ်သူတွေက ရှုမြင်နေကြပါတယ်။

ကာလီမန်တန်ရှိ အင်ဒိုနီးရှားမြို့တော်အသစ်မှာ ရုရှားမီးရထားလမ်းများရင်းနှီးမြှုပ်နှံဖို့ကိုလည်း ရုရှားသမ္မတ'ပူတင်'ကကမ်းလှမ်းခဲ့ကြောင်း ဂျာကာတာရှိ ရုရှားသံရုံးက သောကြာနေ့မှာ ကြေညာခဲ့ပါတယ်။

ကပ်ရောဂါကြောင့် နှောင့်နှေးမှုများရှိခဲ့ပေမယ့် မြို့တော်အသစ် နူဆန်တာရာမှာ ဩဂုတ်လကစပြီး စတင်တည်ဆောက်သွားမှာ ဖြစ်ပါတယ်။

မစ္စတာ'ဝီဒိုဒို'က ကြာသပတေးနေ့က ရုရှားသို့လာရောက်စဉ်မှာ 'ပူတင်'နဲ့ပြောကြားခဲ့ကြပြီး ရုရှားလောင်စာကုမ္ပဏီတွေက အင်ဒိုနီးရှားမှာလာရောက်ရင်းနှီးမြှုပ်နှံချင်ကြကြောင်း၊ အထူးသဖြင့် လျှပ်စစ်ဓာတ်အားပေးရရှိရေးအတွက် နျူကလီးယား စွမ်းအင်များထုတ်လုပ်ဖို့အတွက်ဖြစ်ကြောင်း ဆွေးနွေးပြောကြားခဲ့ကြပါတယ်။

အင်ဒိုနီးရှားနိုင်ငံက အချို့ဒေသတွေမှာ လျှပ်စစ်ဓာတ်အား မလုံမလောက်ရရှိနေပါတယ်။

မစ္စတာ'ဝီဒိုဒို'က ယူကရိန်းသမ္မတရဲ့သတင်းစကားကို 'ပူတင်'ထံသို့ပေးပို့ခဲ့ပြီး အတိအကျကိုတော့ မဖော်ပြခဲ့ပါဘူး။

စစ်ပွဲပဋိပက္ခကြောင့် ထိခိုက်ခဲ့ရတဲ့ ကမ္ဘာ့စားနပ်ရိက္ခာနဲ့ ဓာတ်မြေဩဇာထောက်ပံ့မှုတွေကို ပြန်လည်ချိတ်ဆက်ရေးတိုးတက်လာဖို့မျှော်လင့်ထားပြီး နှစ်နိုင်ငံအကြား သံတမန်ရေးဆက်သွယ်နိုင်ဖို့ ကမ်းလှမ်းခဲ့ပါတယ်။

အင်ဒိုနီးရှားနိုင်ငံက ယခုနှစ် ဂျီ-၂၀ အဖွဲ့အစည်းမှာ အလှည့်ကျဥက္ကဌရာထူးရရှိထားပြီး ထိပ်သီးအစည်းအဝေးပွဲကျင်းပနိုင်ဖို့ပြင်ဆင်လျက်ရှိရာ အနောက်နိုင်ငံတွေက 'ပူတင်'ကို ဂျီ-၂၀ အစည်းအဝေးပွဲက နေထုတ်ပယ်ဖို အင်ဒိုနီးရှားကိုဖိအားပေးနေကြပါတယ်။

Source: The Straits Times
#Yangon_Media_Group

#Local_News
Published_2 July 2022

ရခိုင်ပြည်နယ်နှင့် ဧရာဝတီတိုင်းဒေသကြီးကို ဆက်သွယ်တည်ဆောက်ထားသည့် ဂွချောင်းတံတားကို ဇူလိုင်လ ၁ ရက်ကစ၍ ယာယီဖြတ်သန်းသွားလာခွင့်ပြုထားကြောင်း ဆောက်လုပ်ရေးဝန်ကြီးဌာနတာဝန်ရှိသူက ပြောသည်။

“အခုက ကျောင်းသားတွေက ကူးတို့နဲ့သွားလာနေရတယ်။ မိုးရာသီဆိုတော့ မိုးစိုတယ်၊ အဆင်လည်းမပြေဘူးလေ၊ တံတားပေါ်ကဆိုတော့ လမ်းလျှောက်လို့ပဲသွားသွား၊ စက်ဘီးနဲ့ပဲသွားသွားပေါ့။ ကားလေးတွေဆိုရင်လည်း ဟိုဖက်ကမ်း၊ ဒီဖက်ကမ်း သွားလာလို့ရတဲ့ အနေအထားဖြစ်လို့ ခွင့်တောင်းပြီးမှ ယာယီခွင့်ပြုထားတာပါ"ဟု အဆိုပါဝန်ကြီးဌာန တာဝန်ရှိသူက ပြောသည်။

လတ်တလောတွင် တံတား၏ အချောသတ်လုပ်ငန်းများနှင့် လက်ကျန်လုပ်ငန်းများ ကျန်နေသေးသည့်အတွင် ယင်းတို့ကို ဆက်လက်လုပ်နေရသေးကြောင်း၊ပွင့်လင်းရာသီတွင် ဖွင့်လှစ်နိုင်မည်ဖြစ်ကြောင်း ဆောက်လုပ်ရေးဝန်ကြီးဌာန တံတားဦးစီးဌာန တံတားအထူးအဖွဲ့(၈)က သိရသည်။

ဂွချောင်းတံတားကို ၂၀၁၉ ခုနှစ် နိုဝင်ဘာလ ၁၈ ရက် တွင် စတင်တည်ဆောက်ခဲ့ပြီး အမျိုးအစားမှာ သံကူရစ်တံတားအမျိုးအစားဖြစ်ကာ တံတားအရှည်မှာ ၁၃၉၈ ပေနှင့် ၉ လက်မရှိကြောင်း ၊ ငွေကျပ်သန်းပေါင်း ၈၉၀၀ ဖြင့် တည်ဆောက်ခဲ့ခြင်းဖြစ်ကြောင်း သိရသည်။

ymg/mt
#Yangon_Media_Group

#DailyNews
Published - 2 July 2022

၁။ ယခုရက်ပိုင်းအတွင်း လယ်ယာမြေများ ရေမနစ်မြုပ်အောင် ကြိုတင်ဆောင်ရွက်ထားရန်လို

၂။ ညောင်နှစ်ပင်ကိုသွားသည့်ကိစ္စ အထူးစီမံကိန်းများကြောင့်ဟုဆို

၃။ နေ့စဉ်မိုးလေဝသသတင်း။

၄။ ဖွံ့ဖြိုးတိုးတက်ရေး စီမံကိန်းများကြောင့် ကိုင်ရိုမှရေပေါ်အိမ်များ ဖယ်ရှားခံရမည့် အန္တရာယ်ကြုံတွေ့နေရ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_ 2 July 2022

ကုလသမဂ္ဂလူ့အခွင့်အရေးကောင်စီ ပုံမှန်အစည်းအဝေးတွင် မြန်မာနိုင်ငံဆိုင်ရာ အထူး အစီရင်ခံစာတင်သွင်းသူ၏ နှုတ်ဖြင့်အစီရင်ခံတင်ပြမှုအပေါ် အပြန်အလှန် ဆွေးနွေးမှုအား နစက မှ ဇွန် ၃၀ ရက်တွင် တုံပြန်ချက် ထုတ်ပြန်ထားပါတယ်။

ကုလသမဂ္ဂလူ့အခွင့်အရေးကောင်စီ၏ အကြိမ်(၅၀)မြောက် ပုံမှန်အစည်းအဝေး ကာလအတွင်း ၂၉-၆-၂၀၂၂ ရက်တွင် မြန်မာနိုင်ငံဆိုင်ရာ အထူးအစီရင်ခံစာတင်သွင်းသူ၏ နှုတ်ဖြင့် တင်သွင်းသည့်အစီရင်ခံစာသည် တစ်ဖက်သတ် သတင်းအချက်အလက်များနှင့် ဘက်လိုက်စွာ ပုံဖော်သောဇာတ်လမ်းများကို အခြေခံထားတယ်လို့ ဆိုပါတယ်။

အထူးအစီရင်ခံစာတင်သွင်းသူ၏ တင်ပြချက်တွင် အကြမ်းဖက်အဖွဲ့အစည်း ဖြစ်သည့် CRPH ၊ NUG နှင့် PDFs တို့၏ သတ်ဖြတ်မှုကြောင့် အပြစ်မဲ့ပြည်သူ ၃,၀၀၀ နီးပါး ၏ အသက်ဆုံးရှုံးခဲ့ရမှုများကို ဖော်ပြထားခြင်းမရှိသည်ကို စိတ်ပျက်ဖွယ်တွေ့ရှိရပါတယ်။

PDF အကြမ်းဖက်အဖွဲ့များသည် အကြမ်းဖက်မှုများ ကျူးလွန်ကြောင်း ငြင်းဆို၍ မရနိုင်သော သက်သေများ ရှိသော်လည်းအထူးအစီရင်ခံစာ တင်သွင်းသူအနေဖြင့် အဆိုပါ အချက်အလက်များနှင့် သက်သေများကိုဖော်ပြရန် ရည်ရွယ်ချက်ရှိရှိ ပျက်ကွက်ခဲ့တယ်လို့ ဆိုပါတယ်။

ထို့အပြင် NUG တွင် ၎င်းတို့၏ အစီအစဉ်ကိုမထောက်ခံသူများနှင့် လိုက်ပါ ဆောင်ရွက်မှု မရှိသူများအား “လုပ်ကြံသတ်ဖြတ်မည့်စာရင်း”ရှိကြောင်း ကျယ်ပြန့်စွာ သတင်းများထွက်ပေါ် လျက်ရှိသည်။ ယင်းကိစ္စကိုပြည်တွင်းနှင့် နိုင်ငံတကာ မီဒီယာများတွင် ရေးသားခဲ့ကြသည်။ အထူးအစီရင်ခံစာတင်သွင်းသူ၏ အစီရင်ခံစာများတွင် မြန်မာနိုင်ငံအစိုးရအပေါ် အခြေအမြစ်မရှိသော စွပ်စွဲချက်များ ထည့်သွင်းဖော်ပြထားသော်လည်းအဆိုပါ “လုပ်ကြံသတ်ဖြတ်မည့်စာရင်း” ကိစ္စနှင့်စပ်လျဉ်း၍ မည်သည့်အခါကမျှ ဖော်ပြခြင်းမရှိခဲ့ဘဲ အပြစ်မဲ့အရပ်သားများစွာမှာသတင်းပေးအဖြစ် စွပ်စွဲခံခဲ့ရပြီး ပစ်မှတ်ထားသတ်ဖြတ်ခံရလျက်ရှိတယ်လိုဆိုပါတယ်။

ထို့ပြင် မြန်မာနိုင်ငံသည် လွတ်လပ်၍ အချုပ်အခြာအာဏာပိုင် နိုင်ငံတစ်နိုင်ငံ ဖြစ်သည့် အားလျော်စွာ လက်ရှိအစိုးရအနေဖြင့် ၂၀၀၈ ခုနှစ်၊ ဖွဲ့စည်းပုံအခြေခံဉပဒေမှ အပ်နှင်းထားသည့် အခွင့်အာဏာကိုအပြည့်အဝ ကျင့်သုံးပိုင်ခွင့်ရှိသည်။

သေဒဏ်ချမှတ် စီရင်ခံရသူတစ်ဉီးချင်းစီမှာ အပြစ်မဲ့ပြည်သူများအား အကြောက်တရားကြီးစိုးရေးနှင့် တည်ငြိမ်ရေးကို ပျက်ပြားစေရန် လုပ်ကြံသတ်ဖြတ်မှုအနည်းဆုံး ၅၀ ကိုကျူးလွန်ရာတွင် အဓိကကြိုးကိုင်စီစဉ်သူများအဖြစ် ပြစ်မှုထင်ရှားသဖြင့် အမိန့်ချမှတ်ခံရခြင်းဖြစ်ပါတယ်။

အထူးအစီရင်ခံစာ တင်သွင်းသူသည် အခြားကုလသမဂ္ဂဝန်ထမ်းများက ရည်ညွှန်း ကိုးကားခြင်းမရှိသော လက်နက်ကိုင်အဖွဲ့များနှင့် ဆက်စပ်သည့် အဖွဲ့အစည်းများနှင့် အစိုးရဆန့်ကျန်ဘက် မီဒီယာများကိုကိုးကားခဲ့ကြောင်း ဖော်ပြထားပါတယ်။

ကျောင်းဖွင့်ပြီး တစ်လမပြည့်မီပင် PDF အကြမ်းဖက်အဖွဲ့များကဆရာ/ဆရာမ ၆ ယောက်ကို သတ်ဖြတ်ခဲ့ပြီးကျောင်း ၂၁ ကျောင်းကိုတိုက်ခိုက်ခဲ့သည်။ PDF အမည်ခံ အဖွဲများကြောင့် လက်ရှိအချိန်အထိပညာရေးဝန်ထမ်း ၄၃ ဉီးသေဆုံးခဲ့ရပြီး ကျောင်း ၅၄၈ ကျောင်းတိုက်ခိုက်ခံခဲ့ရတယ်လို့ ဆိုပါတယ်။

အထက်ပါ အကြောင်းအရာများနှင့် ၎င်း၏နိုင်ငံရေးသက်ဝင်သည့် သုံးသပ်ချက် များကြောင့် မြန်မာအစိုးရအနေဖြင့် အထူးအစီရင်ခံစာတင်သွင်းသူ၏ နှုတ်ဖြင့် အစီရင်ခံစာ တင်ပြမှုကိုပြတ်သားစွာ ကန့်ကွက်ပယ်ချလိုက်ပြီး နိုင်ငံရေးမသွတ်သွင်းခြင်းနှင့် အချုပ်အခြာ အာဏာပိုင်နိုင်ငံတစ်နိုင်ငံ၏ ပြည်တွင်းရေးကိုဝင်ရောက်စွက်ဖက်မှု မပြုခြင်းစတဲ့ အခြေခံမူများကိုလိုက်နာရန် အထူးအစီရင်ခံစာတင်သွင်းသူကို တိုက်တွန်းသည် ဟု ဖော်ပြပါရှိပါတယ်။

ymg-mnn
#Yangon_Media_Group

#Local_News
Published - 2 July 2022

အမြန်ရထားလက်မှတ်ခ စျေးနှုန်းများကို ဇူလိုင် ၁ ရက် မှစ၍ တိုးမြှင့်သတ်မှတ်လိုက်ကြောင်း မြန်မာ့မီးရထားမှ သိရသည်။

ယခင်က ရန်ကုန် - မန္တလေး အမြန်ရထား လက်မှတ်ခ ရိုးရိုးတန်း တစ်စောင်လျှင် ကျပ် ၄၆၅၀၊ အထက်တန်း ကျပ် ၉၃၀၀ ၊ အိပ်စင်ပါလက်မှတ်ခ ကျပ် ၁၃၀၀၀ ဖြစ်ပြီး ဇူလိုင် ၁ ရက်မှစ၍ ရိုးရိုးတန်း ကျပ် ၇၇၅၀၊ အထက်တန်း ကျပ် ၁၅၄၅၀၊ အိပ်စင်လက်မှတ်ခ ကျပ် ၂၁၂၅၀ သို့ တိုးမြှင့် သတ်မှတ်လိုက်ခြင်းဖြစ်ကြောင်း သိရသည်။

အလားတူ ရန်ကုန် - မော်လမြိုင် အမြန်ရထားလက်မှတ်ခ ရိုးရိုးတန်းလက်မှတ်တစ်စောင် ၂၁၅၀ ကျပ်၊ အထက်တန်း ၄၂၅၀ ကျပ်သာရှိပြီး ယခု ရိုးရိုးတန်း ၃၅၅၀ ကျပ်၊ အထက်တန်း ၇၀၅၀ ကျပ် တိုးမြှင့်ထားကာ ရန်ကုန်-ပြည်အမြန်ရထားလက်မှတ်ခမှာလည်း ယခင် ရိုးရိုးတန်းတစ်စောင်လျှင် ၁၉၅၀ ကျပ်၊ အထက်တန်း ၃၉၀၀ ကျပ်၊ ယခုရိုးရိုးတန်း ၃၂၅၀ ကျပ်၊ အထက်တန်း ၆၄၅၀ ကျပ်သို့ တိုးမြှင့်သတ်မှတ်လိုက်ကြောင်းလည်း သိရသည်။

ကိုဗစ် - ၁၉ ရောဂါကြောင့် တစ်နှစ်ကျော်ကြာ ရပ်နားထားသည့် မီးရထားလိုင်းများအနက် အမှတ်(၅)အဆန်နှင့် အမှတ်(၆)အစုန် ရန်ကုန် - မန္တလေး အမြန်ရထားတစ်စင်းကို ဇူလိုင်လမှစ၍ ပြန်လည်ပြေးဆွဲပေးမည်ဖြစ်ပြီး လက်ရှိ ရန်ကုန်-ပြည် နံနက် ၆ နာရီ စာပို့ရထားနှင့် နံနက် ၁၁ နာရီ အမြန်ရထားတိုးချဲ့ပြေးဆွဲပေးနေကာ နောက်ထပ် ရထားတစ်စင်းကိုလည်း ပြန်လည် ပြေးဆွဲရန်ရှိကြောင်း သိရသည်။

ရန်ကုန်မြို့တွင်း မြို့ပတ်ရထားများကို ဇွန် ၂၀ ရက်မှ စတင်၍ လက်ဝဲရစ်တစ်စင်းနှင့် လက်ယာရစ် တစ်စင်းတို့သာ ပြေးဆွဲပေးနေကြောင်း သိရသည်။

ymg/sth
#Yangon_Media_Group

#Local_News
Published _ 2 July 2022

အိန္ဒိယနိုင်ငံမှ ဝယ်လိုအားမြင့်တက်မှုများခြင်းကြောင့် ပြည်တွင်းမတ်ပဲစျေးနှုန်းသည် အမြင့်ပိုင်းတွင်ရှိနေကြောင်း မန္တလေးပွဲရုံမှ သိရသည်။

မန္တလေးပဲစျေးကွက်အတွင်း မတ်ပဲစျေးနှုန်းဟာ ယခင်က ပဲတစ်အိတ်လျင် ငွေကျပ် ၁သိန်းရှိခဲ့ကာ ယခု ပဲတစ်လျင် ငွေကျပ် ၁သိန်း ၅သောင်း ၅ထောင်အထိ မြင့်တက်လာခဲ့ပြီး ငါးသောင်းကျော်မြင့်တက်လာခဲ့ကြောင်း ယင်းမှသိရသည်။

၂၀၂၂ ခုနှစ် မတ်ပဲရာသီအတွင်း စျေးကွက်ထဲတွင် ဆောင်းသီးနှံအဖြစ်စိုက်ပျိုးသည့် မတ်ပဲနှင့် နွေရာသီမှာ သီးထပ်စိုက်ပျိုးသည့် မတ်ပဲများကို စျေးကွက်မှာ ရောင်းချနေ လျက်ရှိကြောင်းလည်း မန္တလေးပွဲရုံမှ သိရသည်။

မတ်ပဲသည် နိုင်ငံခြားပို့ကုန်များအနက် အရေအတွက်အများဆုံးတင်ပိုရသည့်နံပါတ် ၁ နေရာတွင်ရှိနေသောကြောင့် နှစ်စဥ် နိုင်ငံခြားဝင်ငွေ အများဆုံးရရှိနေကြောင်းလည်း သိရသည်။

ymg/NN
#Yangon_Media_Group

Published 2 July 2022

မြန်မာနိုင်ငံသို့ အလုပ်သဘောခရီးရောက်ရှိနေတဲ့ အာဆီယံအလှည့်ကျဥက္ကဋ္ဌ၏ မြန်မာနိုင်ငံဆိုင်ရာအထူးကိုယ်စားလှယ်၊ ကမ္ဘောဒီးယားနိုင်ငံ ဒုတိယဝန်ကြီးချုပ်၊ နိုင်ငံခြားရေးနှင့် အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး မစ္စတာ PRAK Sokhonn  ဟာ ဒီကနေ့ ဇူလိုင်(၂)ရက် နံနက်ပိုင်းက ရန်ကုန်မြို့မှာ နိုင်ငံရေးပါတီ(၇)ခုမှ တာဝန်ရှိသူတွေနှင့် တွေ့ဆုံဆွေးနွေးခဲ့တယ်လို့ သတင်းရရှိပါတယ်။

အထူးကိုယ်စားလှယ်နှင့်တွေ့ဆုံဖို့စီစဉ်ထားတဲ့ နိုင်ငံရေးပါတီတွေက   ပအိုဝ်းအမျိုးသားအဖွဲ့ချုပ်၊  တအောင်း(ပလောင်) အမျိုးသားပါတီ၊ ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ၊ ဇိုမီး ဒီမိုကရေစီအဖွဲ့ချုပ်၊ရခိုင်အမျိုးသားပါတီ၊ ရခိုင်ဦးဆောင်ပါတီနှင့် မွန်ညီညွတ်ရေးပါတီတို့ဖြစ်ကြပါတယ်။

ရခိုင်ဦးဆောင်ပါတီ ဥက္ကဋ္ဌ ဒေါက်တာအေးမောင်နှင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ဥက္ကဋ္ဌ ဦးသန်းဋ္ဌေးတို့ ကိုယ်တိုင်တက်ရောက်လာတာတွေ့ရတယ်လို့ သတင်းအရင်းအမြစ်တစ်ခုက YMG ကိုပြောပြပါတယ်။

တွေ့ဆုံမှုနှင့်ပတ်သက်လို့ နိုင်ငံရေးပါတီတွေက သတင်းထုတ်ပြန်ကြလိမ့်မယ်လို့ မျှော်လင့်ထားကြပါတယ်။

-ymg/knl

#MyanmarNews
Published 2 July 2022

ရှမ်းပြည်နယ်( အရှေ့ပိုင်း) တာချီလိတ်မြို့တွင် ထိုင်းနိုင်ငံမှ နေရပ်သို့ပြန်လာကြသည့် ရွှေ့ပြောင်းမြန်မာအလုပ်သမားအမျိုးသား၊ အမျိုးသမီးစုစုပေါင်း( ၁၆၆ )ဦးကို ယမန်နေ့ နေ့လည် ၁၂ နာရီအချိန်၌ မော်တော်ယာဉ်များဖြင့် မိမိနေရပ်အသီးသီးသို့ ပြန်လည်ပို့ဆောင်ပေးခဲ့ကြောင်း သိရှိရပါတယ်။

ဇွန်လ ၂၈ ရက်နေ့က ထိုင်းနိုင်ငံ မယ်ဆိုင်မြို့က တဆင့် တာချီလိတ်မြို့ မြန်မာ-ထိုင်းချစ်ကြည်ရေးတံတား(၂)မှ ပြန်လည်ဝင်ရောက်လာခဲ့ကြရာတွင် ဝမ်လုံး Quarantine Certre ၌( ၄ )ရက်ကြာထားရှိပြီး နှာခေါင်းနှင့် အာခေါင်တို့ဖတ်ရယူ၍ RDT စက်ဖြင့် ထပ်မံစစ်ဆေးအတည်ပြုချက်ရယူရတွင် ပိုးကင်းစင်သူ( ၁၆၆ )ဦးကို တာဝန်ရှိသူများက မိမိနေရပ် တိုင်းဒေသကြီးနှင့်ပြည်နယ်များသို့ပြန်လည်ပို့ဆောင်ပေးခြင်း ဖြစ်ကြောင်း၊ ကိုဗစ်ပိုးတွေ့ရှိသူအမျိုးသား၊ အမျိုးသမီးစုစုပေါင်း(၁၇)ဦးသည် ကျန်းမာရေးစောင့်ရှောက်မှု ခံယူရန် သတ်မှတ်ကာလအထိ ကိုဗစ် စင်တာတွင် ဆက်လက်နေထိုင်ရမည်ဖြစ်ကြောင်း သိရပါတယ်။

နေရပ်ပြန်ရွှေ့ပြောင်းအလုပ်သမားများကို မြို့နယ် ကိုဗစ် ၁၉ ရောဂါ ကာကွယ်ကုသရေးနှင့် အရေးပေါ်တုန့်ပြန်ဆောင်ရွက်ရေးကော်မတီ ဥက္ကဋ္ဌ မြို့နယ်အုပ်ချုပ်ရေးမှူး ဦးတင်ဦးကျော်နှင့် တာဝန်ရှိသူများက လိုက်ပါပို့ဆောင်ပေးခဲ့ပြီး မေတ္တာရှင် လူမှုကူညီရေးအသင်းဝင်များက အုပ်ချုပ်ရေးနှင့်လူမှုရေးကိစ္စရပ်ကို ကူညီ စောင့်ရှောက်ပေးလျက်ရှိကြောင်းသိရှိရပါတယ်။

ymg/ys-tcl
#Yangon_Media_Group

#Local_News
Published - 2 July 2022

မြို့တွင်းပြေးဆွဲနေသည့် YBS ယာဥ်လိုင်းများပေါ်တွင် ယာဉ်အကူတွေလိုက်ပါလာပြီး ယာဉ်စီးခ ၅၀၀ ကျပ်နှင့်အထက် ပိုမိုကောက်ခံသည့် YBS ယာဉ်အစီးရေ ၁၂၀ ကျော်ကို တစ်နှစ်ပြေးဆွဲခွင့်ပိတ်ပြီး အရေးယူထားကြောင်း YRTC မှသိရသည်။

ယင်းအပြင် ယာဉ်စီးခ ပိုတောင်းသည့် ယာဉ်အစီးရေ ၄၆ စီးကို ခြောက်လပိတ် ခြင်း၊ ယာဉ်အကူ လိုက်ပါပြီး ပြေးဆွဲသည့် ယာဉ် ၂၅၁ စီးကို သုံးလပိတ်သည့်အပြင် ခရီးစဉ်မှတ်တမ်းမပါသည့် ယာဉ် ၁၁၂ စီးကို သုံးလပိတ်၍ အရေးယူထားကြောင်း သိရသည်။

ရန်ကုန်တိုင်းအတွင်း YBS ယာဉ်လိုင်းပေါင်း ၁၁၆ လိုင်း၊ ယာဉ်အစီးရေ သုံးထောင်ကျော်ဖြင့် နေ့စဥ်ပုံမှန်ပြေးဆွဲပေးနေကြောင်း သိရသည်။

လက်ရှိတွင် ရန်ကုန်မြို့တွင်းပြေးဆွဲနေသည့် YBS ယာဥ်များတွင် ယာဉ်နောက်လိုက်များ လိုက်ပါပြီး ယာဉ်စီးခပိုမိုကောက်ခံမှုများရှိနေကြောင်း ခရီးသည်များထံမှ သိရသည်။

ymg/sth
#Yangon_Media_Group

#Local_News
Published _ 2 July 2022

၂၀၂၁-၂၀၂၂ ဘဏ္ဍာနှစ်အတွက် ရန်ကုန်တိုင်းဒေသကြီးအတွင်း မြေရောင်းဝယ်ခြင်း အခွန်စည်းကြပ်မှု အမြင့်ဆုံးနေရာအဖြစ် ပြည်လမ်းနှင့် ကမ္ဘာအေးဘုရားလမ်းတစ်လျောက် သတ်မှတ်ထားကြောင်း အခွန်ဦးစီးဌာနမှ သိရသည်။

မြေရောင်းဝယ်ခြင်းအပေါ် အခွန်စည်းကြပ်ရမည့်နှုန်းထားများအား စတုရန်းပေများနှင့် သတ်မှတ်ထားရှိပြီး ယင်းသတ်မှတ်နယ်မြေများ၌ အရောင်းအဝယ်ပြုလုပ်သည့်အခါ ၁ စတုရန်းပေကို ငွေကျပ် ၃သိန်းခွဲ သတ်မှတ်ထားကြောင်း ယင်းမှသိရသည်။

ယင်းစည်းကြပ်မှုနှုန်းထားကို ၂၀၂၁-၂၀၂၂ မီနီဘတ်ချက်ကာလာတွင်း ၆လအတွင်းသတ်မှတ်ထားပြီး ယခင်က ၁ စတုရန်းပေ ကို ငွေကျပ် ၃သိန်းသတ်မှတ်ထားကာ ယခုတွင် ငွေကျပ် ၃သိန်းခွဲအဖြစ် သတ်မှတ်ကာ လ ထပ်မံတိုးမြှင့်ထားကြောင်း သိရသည်။

ymg/NN
#Yangon_Media_Group