#Local_News
Published_23 June 2022

ရခိုင်ပြည်နယ်၊ မောင်တောမြို့နယ်၊ သင်္ဘောလှကျေးရွာမှ ကျောင်းအုပ်ဆရာကြီး ဦးဘိုဝင်းနှင့် ဒေါ်ဥမ္မာကျော်တို့ ပြန်ပေးဆွဲခံရသည့်နေရာမှ ပြန်လွတ်လာခဲ့ပြီ ဖြစ်သော်လည်း ဘင်္ဂလားဒေ့ရှ်အစိုးရကခေါ်ယူသွားပြန်ကြောင်း သိရသည်။

ယနေ့ ဇွန်လ ၂၃ ရက် နံနက် ၆ နာရီခန့်က ပြန်လွတ်လာခြင်းဖြစ်ပြီး မွန်းလွဲ ၁၂ နာရီ‌ကျော်အချိန်တွင် ဘင်္ဂလားဒေရှ်နိုင်ငံအစိုးက ပြန်လည်ခေါ်ဆောင်သွားခဲ့ခြင်းဖြစ်ကြောင်း လိုက်ပါကူညီပေးနေသူတစ်ဦးက YMG ကို ပြောသည်။

ပြန်ပေးဆွဲခံခဲ့ရသည့် ဆရာနှင့်ဆရာမတို့မှာ ဘင်္ဂလားဒေ့ရှ်နိုင်ငံ၊ ကော့ဘဇားခရိုင် နတ်မြစ်ကမ်းခြေရှိ ခြံချောင်းရခိုင်ရွာအနီးတွင် ပြန်ပေးဆွဲသမားများက လွှတ်ပေးခဲ့ခြင်းဖြစ်ပြီး ခြံချောင်းကျေးရွာမှတစ်ဆင့် မောင်တော ငခူရဘက်သို့ ပြန်လာရန် စီစဉ်ခဲ့ကြသော်လည်း ဘင်္ဂလားဒေ့ရှ်အစိုးရတာဝန်ရှိသူများက လာရောက်ခေါ်ဆောင်သွားခြင်းဖြစ်ကြောင်း သိရသည်။

"သူတို့ပြန်ပေးဆွဲခံထားရကတည်းက ဘင်္ဂလားဒေ့ရှ်နိုင်ငံဘက်က ရွာကို ရောက်နေတာ၊ မနက်ကပြန်လွတ်လာပြီးတော့ အဲဒီနားက ရွာတစ်ရွာမှာ ရှိနေတုန်း ဘင်္ဂလားဒေ့ရှ်အစိုးရတာဝန်ရှိသူတွေက ပြန်ခေါ်သွားတာ။ နှစ်နိုင်ငံအစိုးရအချင်းချင်း တောင်ပြိုလက်ဝဲမြို့အတွင်းက ငြိမ်းချမ်းရေးတံတားမှာ အခမ်းအနားနဲ့ အပ်နှံဖို့ လုပ်နေတယ်လို့ ကြားရပါတယ်"ဟု ယင်းကပြောသည်။

ပြန်ပေးဆွဲခံရသည့် ဆရာနှင့်ဆရာမတို့ ပြန်လည်လွတ်မြောက်ရေးအတွက် မြို့နယ်ပညာရေးဌာနမှ တာဝန်ရှိသူများက ဘင်္ဂလားဒေ့ရှ်နိုင်ငံသုံး တကာငွေ သိန်း ၃၀ နှင့် ညီမျှသည့် မြန်မာငွေ ကျပ် သိန်း ၆၀၀ ကို ပြန်ပေးဆွဲသမားများထံ လွှဲပေးခဲ့ရကြောင်းလည်း သတင်းများ ထွက်ပေါ်နေသည်။

ပြီးခဲ့သည့် ဇွန်လ ၁၆ ရက်က ကျောင်းအုပ်ဆရာကြီး ဦးဘိုဝင်းနှင့် ဆရာမဒေါ်ဥမ္မာကျော်တို့နှစ်ဦး မောင်တောမြို့နယ် သင်္ဘောလှရွာမှ မောင်တောမြို့ရှိ မြို့နယ်ပညာရေးမှူးရုံးသို့ ဆိုင်ကယ်ဖြင့်သွားရောက်စဉ်လမ်းတွင် ပြန်ပေးဆွဲခံခဲ့ရခြင်းဖြစ်ကြောင်း၊ ယင်းတို့နှစ်ဦးအား ဘင်္ဂလားဒေ့ရှ်ငွေ တာကာ သိန်း ၅ဝ (မြန်မာကျပ်ငွေ သိန်းတစ်ထောင်ခန့်)ဖြင့် ပြန်ရွေးရန်တောင်းဆိုခဲ့ကြောင်းလည်း သိရသည်။

ymg/mt
#Yangon_Media_Group

#LocalNews
Published _ 23 June 2022

ရွှေတိဂုံစေတီတော်၏ ရင်ပြင်တော် မြောက်ဘက်စောင်းတန်းထိပ်၊ ခြေတော်ရာ တန်ဆောင်းရှေ့တွင် သေသွားသည့် ထန်းပင်နေရာ၌ ထန်းပင်အသစ် အစားထိုးစိုက်ပျိုးနေကြောင်း ရန်ကုန်မြို့တော်စည်ပင်သာယာရေး ကော်မတီမှ သိရသည်။

ယမန်နေ့ နံနက် ၁၁ နာရီ ၃၅ မိနစ်အချိန်က အနောက်တောင်ထောင့် (စနေထောင့်) အောက်ပစ္စယံပတ်လမ်း၊ မိုးညှင်းစံကျောင်းတိုက်ရှေ့ရှိ ထန်းပင်အသစ်တစ်ပင်ကို ရွှေတိဂုံ စေတီတော် ဝတ္တကအသင်းနှင့် ပူးပေါင်းတူးယူခဲ့ပြီး မိုးညှင်းစံကျောင်းတိုက်ရှေ့မှ ရင်ပြင်တော်ပေါ်သို့ မြောက်ဘက်စောင်းတန်း အရံလှေကားမှ ဝိုင်းဝန်းတင် ဆောင်ခဲ့ကြရာ ရင်ပြင်တော်ပေါ်သို့ မွန်းလွဲ ၁ နာရီ ၂၅ မိနစ် အချိန် ရင်ပြင်ပေါ်သို့ ရောက်ရှိခဲ့ကြောင်း သိရသည်။

အဆိုပါ ထန်းပင်အသစ်ကိုသေသွားသည့် ထန်းပင်နေရာ၌ လတ်တလောတွင် ယာယီထောင် မတ်ခဲ့ပြီး ယနေ့ မွန်းတည့် ၁၂ နာရီအချိန်တွင် စိုက်ပျိုးခဲ့ကြောင်း သိရသည်။

ymg/NN
#Yangon_Media_Group

#DailyNews
Published - 23 June 2022

၁။ သထုံ၊ ရွှေစာရံစေတီတော်မြတ်ကြီးတွင် လုံးတော်ပြည့်ရွှေသင်္ကန်းကပ်လှူပူဇော်မည်

၂။ လူမှုကူညီကယ်ဆယ်ရေးအသင်းများ စက်သုံးဆီဈေးမတည်ငြိမ်မှုကြောင့် အခက်အခဲအချို့ရှိနေ

၃။ နေ့စဉ်မိုးလေဝသသတင်း။

၄။ ဘင်္ဂလာဒေ့ရှ်အထည်ချုပ်လုပ်ငန်း စီးပွားရေးတိုးတက်ခြင်း၏ အကျိုးဆက်မြစ်ရေများအဆိပ်သင့်ပျက်စီး... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 22 June 2022

မြန်မာနိုင်ငံအတွင်းသို့ ကမ္ဘာလှည့်ခရီးသွားဗီဇာဖြင့် လာရောက်လည်ပတ်သူ ၆၀၀ ကျော်ရှိကြောင်း ဟိုတယ်နှင့်ခရီးသွားလာရေးဝန်ကြီးဌာန၏ ထုတ်ပြန်ချက်အရ သိရသည်။

မေလမှ ဇွန်လ ၁၉ ရက်အထိ နိုင်ငံပေါင်း ၂၄ နိုင်ငံမှ Tourist Visa ဖြင့် လာရောက်လည်ပတ်သူဦးရေ ၆၀၆ ဦးရှိပြီး ဇွန်လတွင်လာရောက်လည်ပတ်သူများပြားကြောင်း သိရသည်။

မြန်မာနိုင်ငံတွင် ၂၀၂၂ ခုနှစ် မေလ ၂၀ ရက်ကစ၍ Tourist Visa ဖြင့် ကမ္ဘာလှည့်ခရီးသွားဧည့်သည်များကို ခွင့်ပြုပေးခဲ့ပြီးနောက်ပိုင်း မေလ ၂၄ ရက်တွင် စတင်ဝင်ရောက်လာခဲ့ခြင်းဖြစ်ကြောင်း၊ အရှေ့တောင်အာရှနှင့် အာရှနိုင်ငံတို့မှ လာရောက်မှုအများဆုံးဖြစ်ပြီး အနောက်နိုင်ငံအချို့မှလည်း ဝင်ရောက်လည်ပတ်မှုရှိကြောင်း ဟိုတယ်နှင့် ခရီးသွားလာရေးဝန်ကြီးဌာနစာရင်းများအရ သိရသည်။

မြန်မာနိုင်ငံအနေဖြင့် နိုင်ငံတကာလေကြောင်းလိုင်းများကို ဧပြီလ ၁၇ ရက်မှ စတင်ဆင်းသက်ခွင့်ပြုခဲ့ကြောင်း၊ လက်ရှိတွင် ခရီးသွားလုပ်ငန်းရှင်အချို့ပြန်လည်ပတ်နေသော်လည်း အခက်အခဲများစွာရှိနေကြောင်း သိရသည်။

ymg/sth
#Yangon_Media_Group

#Local_News
Published _ 23 June 2022

ယခုနှစ် ကမ္ဘောဒီးယားနိုင်ငံတွင် ကျင်းပပြုလုပ်မည့် ၃၂ ကြိမ်မြောက် ဆီးဂိမ်းပြိုင်ပွဲတွင် မြန်မာ့ရိုးရာခြင်းလုံးအားကစားနည်းကို ထည့်သွင်းကျင်းပနိုင်ရန် ဆောင်ရွက်သွားမည်ဖြစ်ကြောင်း သိရသည်။

၂၀၁၉ ခုနှစ်နှင့် ၂၀၂၂ ခုနှစ်တွင် ကျင်းပပြုလုပ်ခဲ့သော အရှေ့တောင်အာရှအားကစားပြိုင်ပွဲများတွင် ပါဝင်ခြင်းမရှိသေးသည့် ရိုးရာခြင်းလုံးအားကစားနည်းကို ထည့်သွင်းကျင်းပနိုင်ရေးအတွက် ထိုင်း၊ ကမ္ဘောဒီးယားနှင့် လာအိုစသည့်နိုင်ငံများကို အဓိကထားစည်းရုံးသွား မည်ဖြစ်ကြောင်း မြန်မာနိုင်ငံရိုးရာခြင်းလုံးအဖွဲ့ချုပ်က သိရသည်။

ကမ္ဘောဒီးယားနိုင်ငံအနေဖြင့် ၂၀၁၅ ခုနှစ်၊ ၂၈ ကြိမ်မြောက် စင်ကာပူဆီးဂိမ်းတွင် ရိုးရာခြင်းလုံး အားကစားနည်း၌ ဆုရရှိခဲ့သည့်အတွက် ၎င်းနိုင်ငံတွင် ကျင်းပပြုလုပ်မည့် ဆီးဂိမ်းပြိုင်ပွဲအတွင်း ရိုးရာခြင်းလုံးအား ကစားနည်းကို ထည့်သွင်းကျင်းပရန် စိတ်ဝင်စားမှုရှိနေကြောင်းလည်း သိရသည်။

ရိုးရာခြင်းလုံး အားကစားနည်းနှင့် နီးစပ်မှုရှိသည့် ထိုင်းနှင့် လာအိုနိုင်ငံများတွင်လည်း သွားရောက်ကာ ပြိုင်ပွဲတွင် ရိုးရာခြင်းလုံးအားကစားနည်း ထည့်သွင်းကျင်းပနိုင်ရေး အတွက် သက်ဆိုင်ရာ အားကစားအဖွဲ့ချုပ်များက တာဝန်ရှိသူများနှင့်ဆွေးနွေးညှိနှိုင်းမှုများ ဆောင်ရွက်သွားမည်ဖြစ်ကြောင်း မြန်မာနိုင်ငံရိုးရာခြင်းလုံးအဖွဲ့ချုပ် တာဝန်ရှိသူက ပြောသည်။

မြန်မာနိုင်ငံအနေဖြင့် အိမ်ရှင်အဖြစ်ကျင်းပခဲ့သော ၂၀၁၃ ခုနှစ် ၂၇ ကြိမ်မြောက် ဆီးဂိမ်းပြိုင်ပွဲ၊ ၂၀၁၅ ခုနှစ် ၂၈ ကြိမ်မြောက် စင်ကာပူဆီးဂိမ်းနှင့် ၂၀၁၇ ခုနှစ် ၂၉ ကြိမ် မြောက် မလေးရှားဆီးဂိမ်းများတွင် ရိုးရာခြင်းလုံး အားကစား နည်းပါဝင်ခဲ့ပြီး၊ ၂၀၁၉ ခုနှစ် အကြိမ် ၃၀ မြောက် ဖိလစ်ပိုင်ဆီးဂိမ်းနှင့် ၂၀၂၂ ခုနှစ် ၃၁ ကြိမ်မြောက် ဗီယက်နမ် ဆီးဂိမ်းပြိုင်ပွဲများတွင် ပါဝင်ခဲ့ခြင်းမရှိကြောင်းလည်း သိရသည်။

ymg/NN
#Yangon_Media_Group

#WorldPolitics
Published 23 June 2022

ဘူလ်ဂေးရီးယားအစိုးရနဲ့ ဝန်ကြီးချုပ်တို့ကို အယုံအကြည်မရှိ အဆိုအောင်မြင်သွားပြီး ဘူလ်ဂေးရီးယားအစိုးရပြုတ်ကျကာ ဝန်ကြီးချုပ်'ကီရဲလ်ပက်ကော့ဗ်'တို့ကို ဗုဒ္ဓဟူးနေ့မှာ ရာထူးမှဆင်းပေးလိုက်ရပါတယ်။

ဘူလ်ဂေးရီးယားအစိုးရနဲ့ ဝန်ကြီးချုပ်တို့ဟာ ရုရှားကိုဆန့်ကျင်တဲ့ ရပ်တည်ချက်ကို ထူးခြားစွာ ရပ်တည်ခဲ့ပြီး အကျင့်ဖျက်ခြစားမှုကို တိုက်ဖျက်ဖို့ ကတိပြုထားသူတွေဖြစ်ပါတယ်။

လွန်ခဲ့တဲ့ ၆ လလောက်ကမှ အာဏာရလာတဲ့အစိုးရအဖွဲ့ဟာ နိုင်ငံတော်အသုံးစရိတ်ကိစ္စနဲ့ မြောက်မက်ဆီဒိုးနီးယားရဲ့ အီးယူဝင်ရောက်ခွင့်ကိုခွင့်ပြုပေးသင့်/မပေးသင့်ကိစ္စတွေနဲ့ ပတ်သက်ပြီး ၁၂၃ မဲ - ၁၁၆ မဲဖြင့်ရှုံးနိမ့်ခဲ့ပြီး ဥပဒေရေးရာအတိုက်အခံ လွှတ်တော်အမတ်များက လက်ရှိအစိုးရကို ဖြုတ်ချခဲ့ပါတယ်။

ဥရောပသမဂ္ဂအဖွဲ့ဝင်ထဲက အဆင်းရဲဆုံးနိုင်ငံဖြစ်တဲ့ ဘူလ်ဂေးရီးယားမှာ ငွေကြေးဖောင်းပွမှုကိုထိန်းညှိရန် အစိုးရက ဘဏ္ဍာရေးနဲ့စီးပွားရေးမူဝါဒများ အကောင်အထည်ဖော်ရန် ပျက်ကွက်ခဲ့ကြောင်း စွပ်စွဲခဲ့ကြတာဖြစ်ပါတယ်။

ဘူလ်ဂေးရီးယားက အခုဆိုရင် ၂၀၂၁ ဧပြီနောက်ပိုင်း စတုတ္ထအကြိမ်မြောက်အထွေထွေ ရွေးကောက်ပွဲ ပြုလုပ်ရဖွယ်ရှိနေပြီး ၂၀၂၄ ခုနှစ်မှာ ယူရိုငွေလက်ခံကျင့်သုံးရေး အစီအစဉ်များနဲ့ အီးယူပြန်လည်ထူထောင်ရေးရန်ပုံငွေမှ ယူရိုငွေသန်းပေါင်းများစွာ လက်လွှတ်ရနိုင်တဲ့ အန္တရာယ်ရှိနေပါတယ်။

ဝန်ကြီးချုပ်'ပက်ကော့ဗ်'က "ဒီမဲခွဲဆုံးဖြတ်မှုက ရှေ့လျှောက်ရမယ့်အစီအစဉ်တွေအများကြီးထဲကမှ အစိတ်အပိုင်းလေးတစ်ခုသာဖြစ်ပါတယ်၊ သူတို့နားမလည်နိုင်တာက ဒီလိုဆုံးဖြတ်လိုက်လို့ ဘူလ်ဂေးရီးယား ပြည်သူတွေရဲ့ ထောက်ခံမှုရရှိလာမှာမဟုတ်ပါဘူး" လို့ ပြောကြားခဲ့ပါတယ်။

အသက် ၄၂ နှစ်ရှိ 'ပက်ကော့ဗ်'ဟာ ဟားဗတ်ဘွဲ့ရတစ်ဦးဖြစ်ပြီး အကျင့်ပျက်ခြစားမှုတွေကို တိုက်ဖျက်ဖို့ ကတိကဝတ်ပြုခဲ့ပါတယ်။

ဘူလ်ဂေးရီးယားနိုင်ငံဟာ အရင်တုန်းက ရုရှားနဲ့ရင်းနှီးတဲ့ဆက်ဆံရေးအစဉ်အလာရှိထားတဲ့နိုင်ငံဖြစ်ပေမယ့် ယူကရိန်းကို ရုရှားကျူးကျော်ပြီးနောက် 'ပက်ကော့ဗ်'ဟာ ဘူလ်ဂေးရီးယားအနေနဲ့ ဥရောပနဲ့ နေတိုးအဖွဲ့ကို ထောက်ခံတဲ့ သဘောမျိုးပြသခဲ့ပါတယ်။

ယူကရိန်းကို ရုရှားကျူးကျော်ခြင်းအပေါ် စစ်ပွဲလို့သတ်မှတ်ဖို့ကို ငြင်းပယ်ခဲ့တဲ့ ကာကွယ်ရေးဝန်ကြီးကို ဖေဖော်ဝါရီလတုန်းက 'ပက်ကော့ဗ်'က ရာထူးမှ ထုတ်ပယ်ခဲ့ပါတယ်။

'ပက်ကော့ဗ်'ဟာ ရုရှားကိုဒဏ်ခတ်ပိတ်ဆို့မှုတွေ ပြုလုပ်နေတဲ့ အီးယူဆုံးဖြတ်များအပေါ်ထောက်ခံအားပေးခဲ့တဲ့အပြင် ယူကရိန်းမှ အကြီးစားစစ်ယန္တရားများကို ပြုပြင်ဖို့လည်း သဘောတူညီခဲ့ပါတယ်။

ဘူလ်ဂေးရီးယားနိုင်ငံဟာ ရုရှားဓာတ်ငွေ့ကို အလုံးစုံနီးပါး မှီခိုနေခဲ့ရပြီး ရုရှားတောင်းဆိုထားတဲ့အတိုင်း ရုရှားငွေရူဘယ်လ်ဖြင့် ဝယ်ယူဖို့ငြင်းဆန်ခဲ့ရာ ရုရှားကဓာတ်ငွေ့ပေးပိုမှု ရပ်ဆိုင်းလိုက်ပါတယ်။

ဒါကြောင့်နိုင်ငံအတွင်း သဘာဝဓာတ်ငွေ့ရရှိစေရန် ကြိုးပမ်းခဲ့ကြပေမယ့် နောက်ဆက်တွဲနိုင်ငံရေးပြဿနာများကြောင့် အနှောင့်အယှက်ဖြစ်ခဲ့ရပါတယ်။

ပင်စင်လစာတိုးဖို့နဲ့ အစားအစာ လောင်စာဈေးနှုန်းများမြှင့်တက်လာတာနဲ့အမျှ အိမ်ထောင်စုများကိုထောက်ပံ့ဖို့အတွက် အသုံးစရိတ်ပြုပြင်ပြောင်းလဲရေး မူကြမ်းကို လွှတ်တော်အနေနဲ့ မဲခွဲဆုံးဖြတ်ပြီး အတည်ပြုပေးဖို့မျှော်လင့်ကြောင်း ဒုတိယဝန်ကြီးချုပ်'အက်ဆန်ဗက်ဆီလက်ဗ်'က ထုတ်ဖော်ပြောကြားခဲ့ပါတယ်။

လက်ရှိအာဏာရအဖွဲ့ကို ဆန့်ကျင်ဖို့ ဝန်ကြီးချုပ်ဟောင်း'ဘွိုင်ကိုဘော်ရီဆော့ဗ်'ရဲ့ GERB ပါတီက အဆိုပြုခဲ့တာဖြစ်ပြီး စီးပွားရေးပြဿနာများနဲ့ ယူကရိန်းစစ်ပွဲကြောင့် ကွဲပြားနေတဲ့ ရုရှားထောက်ခံရေး ပါတီများအနေနဲ့ မဲခွဲဆန္ဒပြုခြင်းတွေကနေ အကျိုးအမြတ်ရလာနိုင်ပါတယ်။

Source: Reuters
#Yangon_Media_Group

Published 23 June 2022

ဆမ်ဆောင်းရဲ့ အချို့သော စမတ်ဖုန်းတွေမှာ ရေစိုခံ water-resistance လုပ်ဆောင်နိုင်မှုနှင့် ပတ်သက်ပြီး  အထင်မှားစေအောင် ကြေညာခဲ့တာတွေကြောင့် ဩစတြေလျမှာရှိတဲ့ ဆမ်ဆောင်းအီလက်ထရွန်နစ် ပြည်တွင်းဌာနကို ဩစတြေလျဒေါ်လာ၁၄သန်း( အမေရိကန်ဒေါ်လာ၉.၆၅သန်း) ဒဏ်ငွေပေးဆောင်ဖို့ ဩစတြေလျရဲ့ တရားရုံးတစ်ခုက အမိန့်ချလိုက်တယ်လို့ နိုင်ငံရဲ့ ယှဉ်ပြိုင်မှုဆိုင်ရာ ကြီးကြပ်ရေးအဖွဲ့က  ဇွန် ၂၃ရက်က ပြောလိုက်ပါတယ်။

ဆမ်ဆောင်းဩစတြေလျဟာ ယင်းရဲ့ အချို့သော ဂလက်ဆီဖုန်းတွေမှာ ရေစိုခံ water-resistance အဆင့်နှင့်ပတ်သက်လို့ ဝယ်သူတွေ အထင်မှားစေအောင်လုပ်ခဲ့တယ်လို့ ဩစတြေလျယှဉ်ပြိုင်မှုနှင့် စားသုံးသူကာကွယ်ရေးအဖွဲ့(ACCC) က ပြောပါတယ်။ ၂၀၁၉ ဇူလိုင်မှာ အဲဒီအဖွဲ့က ကုမ္ပဏီကို ပထမဆုံးတရားစွဲခဲ့တာဖြစ်ပါတယ်။

၂၀၁၆ခုနှစ် မတ်လကနေ ၂၀၁၈ခုနှစ် အောက်တိုဘာလအတွင်း ကုမ္ပဏီဟာ စတိုးဆိုင်တွေနှင့် ဆိုရှယ်မီဒီယာ ကြော်ငြာတွေမှာ အဲဒီဖုန်းတွေကို ရေကူးကန်ထဲ ဒါမှမဟုတ် ပင်လယ်ရေထဲမှာ အသုံးပြုနိုင်တယ်လို့ အခိုင်အမာရေးသားပြောဆိုခဲ့တာပါလို့ အဖွဲ့ကပြောပါတယ်။

ဒါပေမယ့် တကယ်တမ်းမှာ အသုံးပြုသူတွေထံမှ တိုင်တန်းမှု ရာပေါင်းများစွာရရှိခဲ့ပြီး ဖုန်းတွေဟာ ရေနှင့်ထိတွေ့ပြီးနောက် လုပ်ဆောင်မှုတွေ ပုံမှန်အလုပ်မလုပ်တော့တာ လုံးဝအလုပ်မလုပ်တော့တာတွေဖြ်ခဲ့တယ်လို့ တိုင်တန်းသူတွေက ပြောခဲ့ကြပါတယ်။

“ဒီဂလက်ဆီဖုန်းတွေအတွက် ရောင်းချရာမှာ အရေးကြီးတဲ့ အကြောင်းပြချက်တစ်ခုဖြစ်ခဲ့တယ်။ ဝယ်သူတော်တော်များများဟာ ဖုန်းအသစ်တစ်လုံးကို ဝယ်ဖို့မဆုံးဖြတ်ခင် အဲဒီအထင်မှားစေတဲ့ ကြေညာကြောင့် ဝယ်ဖြစ်သွားကြတယ်” လို့ အဖွဲ့ကပြောပါတယ်။

ဆမ်ဆောင်းဆီက အဲဒါနှင့်ပတ်သက်လို့ချက်ခြင်းတုန့်ပြန်မှုမရသေးပါလို့ ရိုက်တာကရေးပါတယ်။

Source: Reuters

#LocalNews
Published - 23 June 2022

မိုင်းဖုန်းဆရာတော်ကြီး ဇွန်လိုင်လ ၃၁ ရက်နေ့ မနက်ပိုင်းတွင်အဓိဋ္ဌာန်ထွက်မည်ဖြစ်ပြီး ဇူလိုင်လ ၃၁ ရက်နေ့ညနေ(၅)နာရီတွင် အများပူဇော်နိုင်ရန် မိုင်းကျက်အောက်ဂူကို ကြွမည်ဖြစ်ကြောင်း တောင်တန်းသာသနာပြုဆရာတော် ဦးသုခမိန္ဒကသူရဲ့ လူမှုကွန်ရက်အကောင့် Sao Su Kham တွင် ဖော်ပြထားသည်၊၊

မိုင်းဖုန်းဆရာတော်၏ နောက်ဆက်တွဲ စာတိုလေး တစ်ခုကို တောင်တန်းသာသနာပြုဆရာတော် ဦးသုခမိန္ဒကဘာသာပြန်ပြီး လူမှုကွန်ရက်မှာဖော်ပြထား ခြင်းဖြစ်သည်၊၊

မိုင်းဖုန်းဆရာတော်၏စာတွင်"ဇွန်လိုင်လ ၃၁ ရက်နေ့ အဓိဋ္ဌာန်ထွက်ပါမယ်။ နမ့်ဟူးရေထွက်မှာ ဆံတော်ကို ချပါမယ်။ နမ့်ဆင်မ်ရဲ့ တစ်ဘက်ကမ်း စံကျောင်းငယ်မှာ နေ့ဆွမ်းဘုဉ်းပေးပါမယ်။
(၃၁၊ ၇၊ ၂၀၂၂) ညနေ ၅ နာရီအချိန်အများပူဇော်နိုင်ရန် မိုင်းကျက်အောက်ဂူကို ကြွပါမယ်။
ဆရာတော်အား ဂူထွက်ပင့်ဖို့ နံနက် ၇ နာရီအချိန် သံဃာတော် ၂၃ ပါး၊ ရွှေခေါင်းပေါင်းရ အမျိုးသားပုဂ္ဂိုလ် ၃၈ ယောက် အပေါ်ဂူသို ကြွပါရန်။

ဝေါယာဉ်ကို ဆွဲဖို့အတွက် ရွှေခေါင်းပေါင်းရ အမျိုးသားများ လက်ယာဘက်၊ ရွှေခေါင်းပေါင်းရ အမျိုးသမီးများ လက်ဝဲဘက်မှ တစ်ယောက်ကို တစ်လံစီအကွာနေ၍ ဝေါယာဉ်ကို ဆွဲရန်။

သံဃာတော်များ ဝေါယာဉ်ရှေ့မှ ကြွပါရန်။

မိုင်းကျက်အောက်ဂူတွင် ၅ ရက် သီတင်းသုံးအပူဇော်ခံပြီးမှ မိုင်းဖုန်းကို ကြွပါမည်။

ဒုတိယဝါကို ဘယ်နေရာဝါဆိုမလဲ မဆုံးဖြတ်ရသေးပါ။

အရညဝါသီမိုင်းဖုန်းဆရာတော်၏စာကို တောင်တန်းသာသနာပြုဆရာတော် ဦးသုခမိန္ဒ (စဝ်ဆုခမ်း တန့်ယန်း)မှ ဘာသာပြန်ပေးသည်"ဟုဖော်ပြပါရှိသည်၊၊

မိုင်းကျက်အောက်ဂူတွင် (၅) ရက်သီတင်းသုံးအပူဇော်ခံပြီးမှ မိုင်းဖုန်းကို ကြွရောက်မည်ဖြစ်ကြောင်းလည်း သိရသည်၊၊

ymg/tthl
#Yangon_Media_Group

#Local_News
Published - 22 June 2022

၂၀၂၂ ခုနှစ်အတွင်း ပြည်တွင်း၌ အထည်ချုပ်စက်ရုံများ လစဉ်တိုးဖွင့်ပေးနေကြောင်း အလုပ်သမားဝန်ကြီးဌာန၏ စာရင်းများအရ သိရသည်။

အထည်ချုပ်စက်ရုံများတွင် တောင်အာရှနှင့်အရှေ့တောင်အာရှနိုင်ငံများမှ ရင်းနှီးမြှုပ်နှံမှုအများဆုံးဖြစ်ကြောင်းနှင့် တစ်နိုင်ငံလုံးအတိုင်းအတာ အနေဖြင့် လစဉ်အထည်ချုပ်စက်ရုံအသစ် ငါးရုံဖွင့်လှစ်၍ အလုပ်အကိုင် ငါးသိန်းခန့် ဖန်တီးပေးထားကြောင်း သိရသည်။

အဆိုပါ စက်ရုံအသစ်များ ဖွင့်လှစ်နိုင်ခဲ့သည့်အတွက် ပြီးခဲ့သည့် မေလတွင် လုပ်သားနှစ်သောင်းကျော် အလုပ်အကိုင်ပေးထားနိုင်ခဲ့ကြောင်း သိရသည်။

"လာရောက်ရင်းနှီးမြှုပ်နှံတဲ့လုပ်ငန်းတွေမှာ အထည်ချုပ်စက်ရုံက အများဆုံး ပါဝင်ပါတယ်"ဟု မြန်မာနိုင်ငံရင်းနှီးမြှုပ်နှံမှု ကော်မရှင်၊ ကုမ္ပဏီများညွှန်ကြားမှုဦးစီးဌာနမှ တာဝန်ရှိသူတစ်ဦးကပြောသည်။

ကိုဗစ်-၁၉ ကြောင့် ပြည်တွင်းရှိစီးပွားရေးလုပ်ငန်းအချို့ ရပ်ဆိုင်းလုနီးပါးဖြစ်ခဲ့ရပြီး အလုပ်လက်မဲ့များဖြစ်ခဲ့ရကြောင်း၊ လက်ရှိအချိန်တွင် အလုပ်ကိုင်ရှားပါးနေမှုကြောင့် ထိုင်းနိုင်ငံသို့ တရားမဝင်သွားရောက်လုပ်ကိုင်သူများရှိနေပြီး အစိုးရကလည်း တရားဝင် လုပ်သားစေလွှတ်မှုများ ရှိနေကြောင်းလည်းသိရသည်။

ymg/sth
#Yangon_Media_Group

#WorldHealth
Published 23 June 2022

လေ့ကျင့်ခန်းတွေမလုပ်ဘဲ အိပ်စက်ခြင်းဖြင့်ကိုယ်အလေးချိန်လျော့နိုင်မယ်ဆိုရင် ဝိတ်ကျချင်သူတွေအတွက်တော့ သတင်းကောင်းဖြစ်ပါတယ်။

စမ်းသပ်ခံတဲ့လူတွေကို အောက်ဆီဂျင်ပမာဏနည်းပါးတဲ့တဲထဲမှာ သုတေသီများက အိပ်စက်ခိုင်းစေခဲ့ရာ ဒီဖြစ်စဉ်က တကယ်အကျိုးဖြစ်ထွန်းလာဖွယ်ရှိနေပါတယ်။

အရင်လေ့လာမှုတွေမှာ ခန္ဓာကိုယ်ထဲအောက်ဆီဂျင်ဓာတ်နည်းနေတဲ့အချိန်မှာ အစာစားချင်စိတ်လျော့ပါးသွားပြီး ဆီးချိုရောဂါရှိသူတွေမှာ ကယ်လိုရီတွေ ပိုမိုလောင်ကျွမ်းစေပါတယ်။

ပို့စ်မောက်တက္ကသိုလ်ကဦးဆောင်ပြီး အောက်ဆီဂျင်အကန့်အသတ်နဲ့သာ ပါဝင်တဲ့ စတာလင်ပေါင် ၂ ထောင်တန်တဲထဲမှာ စမ်းသပ်အိပ်စက်စေမယ့် အစီအစဉ်တွေ ပါဝင်နေပါတယ်။

ဒီလိုနည်းနဲ့ ဆီးချိုကြောင့် ဝိတ်ကျဖိုရုန်းကန်နေရသူတွေအတွက် အကူအညီဖြစ်စေပြီး ရောဂါသက်သာအောင် ပြုလုပ်နိုင်ဖွယ်ရှိတယ်လို့ သုတေသီများက ဆိုပါတယ်။

ဗြိတိန်နိုင်ငံမှာ ဆီးချိုရောဂါ ဒုတိယအမျိုးအစားရှိသူ ၄.၄ သန်းခန့်ရှိနေပြီး အမေရိကန်မှာ ၃၃ သန်းခန့်ရှိနေနိုင်ပါတယ်။

အစားအသောက်မညီညွတ်ခြင်းနဲ့ ကိုယ်အလေးချိန်တက်ခြင်းတို့က ဆီးချိုရောဂါဒုတိယအမျိုးအစားဖြစ်ရခြင်းရဲ့ အဓိကအကြောင်းအရင်းတွေဖြစ်ပါတယ်။

လက်ရှိကုသနည်းတွေကတော့ အစာစားပြီး ဂလူးကိုစ်ပမာဏထိန်းသိမ်းဖို့ သောက်ဆေးသောက်ရတာမျိုးရှိသလို ဆေးနဲ့မထိန်းချုပ်နိုင်ဘူးဆိုရင် အင်ဆူလင်ထိုးပေးရပါတယ်။

လေယာဉ်ပျံစီးတဲ့အခါမျိုးနဲ့ အမြင့်နေရာတွေကိုရောက်တဲ့အခါမှာ ခန္ဓာကိုယ်ကအသက်ရှူဖို့ ပိုမိုရုန်းကန်လှုပ်ရှားရပြီး ကယ်လိုရီတွေ ပိုမိုလောင်ကျွမ်းစေတာဖြစ်ပါတယ်။

အောက်ဆီဂျင်နည်းပါးတဲ့ တဲထဲမှာအိပ်စက်ခြင်းက အသက်ရှူရခက်ခဲသူတွေနဲ့ အိပ်နေစဉ်အသက်ရှူကျပ်တတ်တဲ့သူတွေအတွက်တော့ မသင့်တော်ပါဘူး။

ပြုလုပ်မယ့်စမ်းသပ်မှုမှာ သုတေသီတွေဖန်တီးထားတဲ့ တဲများဖြင့် စမ်းသပ်ခံမယ့်သူတွေက အိမ်မှာပဲ ၁၀ ရက်တာကာလအပိုင်းအခြား ၂ ခါစမ်းသပ်ပါဝင်ရမှာဖြစ်ပါတယ်။

သူတို့ရဲ့အစားအသောက်မှတ်တမ်း၊ သွေး၊ ဆီး၊ ဝမ်းနမူနာများ သိရဖို့ စမတ်မော်နီတာများတပ်ဆင်ထားရမှာ ဖြစ်ပါတယ်။

သာမန်လေထုထဲမှာ အောက်ဆီဂျင်ပါဝင်မှု ၂၁ ရာခိုင်နှုန်းရှိပြီး စမ်းသပ်ခံမယ့်သူတွေကို အောက်ဆီဂျင် ၁၅ ရာခိုင်နှုန်းပေးထားမှာဖြစ်ပါတယ်။

ဇီဝကမ္မဗေဒပညာရှင်ဒေါက်တာ'အန့်ရှက်ဖာ့ဒ်'က ဆီးချိုရောဂါဆိုတာ နာတာရှည်ရောဂါဖြစ်ပြီး နှလုံးရောဂါ၊ မျက်လုံးပြဿနာစတဲ့ ကျန်းမာရေးဆိုးကျိုးများဖြစ်ပေါ်လာနိုင်တဲ့ အန္တရာယ်ရှိနေပါတယ်လို့ ပြောပြခဲ့ပါတယ်။

၂၀၄၅ ခုနှစ်အရောက်မှာ ဆီးချိုရောဂါဒုတိယအမျိုးအစားခံစားရသူ ကမ္ဘာတဝှမ်းမှာ လူသန်း ၇၀၀ ခန့်ရှိလာမယ်လို့ ခန့်မှန်းရပါတယ်။

"သေသေချာချာ မသိရသေးပေမယ့် ကယ်လိုရီတွေလောင်ကျွမ်းရင် အစာစားချင်စိတ်မပေါ်ဘဲ ဗိုက်မဆာတော့တာဖြစ်ကြောင်း ဒေါက်တာ'ရှက်ဖာ့ဒ်'ကဆိုပါတယ်။

အောက်ဆီဂျင်ပမာဏနည်းပါးလာရင် အသက်ရှူကျပ်ခြင်း၊ ခေါင်းကိုက်ခြင်း၊ စိတ်ရှုပ်ထွေးခြင်း၊ မောပန်းလွယ်ခြင်းတို့ဖြစ်တတ်ပြီး အလွန်ဆိုးရွားလာရင်တော့ ကိုမာဝင်နိုင်သလို သေဆုံးခြင်းအထိပါ ဖြစ်ပွားတတ်ပါတယ်။

Source: DailyMail
#Yangon_Media_Group

#Local_News
Published_ 23 June 2022

ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း) မြို့နယ်တွင် ငွေကျပ် သိန်း ၂၇၀၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

ဇွန် ၂၁ ရက် ၁၁ နာရီအချိန်ခန့် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များပါ၀င်သော ပူးပေါင်းအဖွဲ့သည် သတင်းအရ သက်သေများနှင့်အတူ ဒဂုံမြို့သစ်(မြောက်ပိုင်း)မြို့နယ်၊ (၄၅) ရပ်ကွက်တွင် မြင့်သိန်း (ခ)ဂနေ့(ခ)သားကြီး မောင်းနှင်ပြီး အေးလှိုင်(ခ)စိုး၀င်း လိုက်ပါလာသည့် Toyota Corolla Fielder အမျိုးအစား မော်တော်ယာဉ်အား ရပ်တန့်စစ်ဆေးရှာဖွေခဲ့ပါတယ်။

ထိုသို့ရှာဖွေရာ ၎င်းတို့ထံမှ စိတ်ကြွရူးသွပ်ဆေးပြား ၁၀၀၀၀ ပြားနှင့် လက်ကိုင်ဖုန်း ၂ လုံးတို့အား တွေ့ရှိသိမ်းဆည်းရမိခဲ့ပြီး စစ်ဆေးဖော်ထုတ်ချက်အရ ညနေ ၃ နာရီ အချိန်ခန့် မြင့်သိန်း(ခ) ဂနေ့(ခ)သားကြီး နေထိုင်သည့် (၄၂) ရပ်ကွက်၊ ပီမိုးနင်း (၃) လမ်းရှိ နေအိမ်မှ စိတ်ကြွရူးသွပ်ဆေးပြား ၂၆၀၀၀၀ ပြား၊ စုစုပေါင်းစိတ်ကြွရူးသွပ်ဆေးပြား ၂၇၀၀၀၀ ပြား (ဒေသကာလပေါက်စျေးတန်ဖိုးငွေကျပ် သိန်း ၂၇၀၀) အား တွေ့ရှိ သိမ်းဆည်း ရမိခဲ့ပါတယ်။

ထို့ကြောင့် မြင့်သိန်း နှင့် အေးလှိုင်တိုအား ဒဂုံမြို့သစ်(မြောက်ပိုင်း)မြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမှုများ ရေးဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သတင်းရရှိပါတယ်။

ymg-mnn
#Yangon_Media_Group

#WorldHealth
Published 23 June 2022

အလွန်နည်းပါးတဲ့ ပမာဏလောက်ဖြင့် အရည်နဲ့အငွေ့များကို ခွဲခြမ်းစိတ်ဖြာနိုင်ပြီး ကင်ဆာကိုရှာဖွေစစ်ဆေးနိုင်မယ့် အာရုံခံကိရိယာတစ်မျိုးကို ရုရှားသုတေသီများ တီထွင်ထုတ်လုပ်ခဲ့ကြပါတယ်။

အရည်နဲ့အငွေ့များကို အလွန်အာရုံခံသိရှိနိုင်တဲ့ မိုက်ခရိုဖလူးဝစ်ဒစ်ချန်နယ်များနဲ့ နာနိုဖိုတိုနစ်အလင်းအာရုံခံ ကိရိယာများကို ဆားကစ်ပြားလေးမှာ တပ်ဆင်အသုံးပြုရကြောင်း HSE တက္ကသိုလ်နဲ့ စကောလ်ကိုဗို သိပ္ပံနဲ့နည်းပညာတက္ကသိုလ်တို့မှ သုတေသီများက Optics Letters မှာ ဖော်ပြခဲ့ကြပါတယ်။

အရည် ဒါမှမဟုတ် အငွေ့များကို ချန်နယ်တွေကနေညှစ်ထုတ်ကာ ထွက်လာတဲ့ဓာတ်ရောင်ခြည်ကို နာနိုဖိုတိုနစ် ကိရိယာများဖြင့် ရှာဖွေစစ်ဆေးတဲ့အခါ သုတေသီများက ထွက်ပေါ်လာတဲ့ရောင်စဉ်တန်းလက္ခဏာများနဲ့ အရည်အငွေ့ဖွဲ့စည်းပါဝင်ပုံများကို ဆုံးဖြတ်သုံးသပ်နိုင်မှာဖြစ်ပါတယ်။

သေးငယ်တဲ့ကိရိယာအရွယ်အစားကြောင့် အလွန်နည်းပါးတဲ့နမူနာများဖြင့်ပါ တိကျစွာရှာဖွေစစ်ဆေးနိုင်မှာ ဖြစ်ပါတယ်။

နမူနာရယူတဲ့ နေရာကနေ အခြားနေရာကိုရွှေ့ပြောင်းရတဲ့အခါ သုတေသီများက ခွဲခြမ်းစိတ်ဖြာမှုမလုပ်နိုင်တဲ့အခါမျိုးမှာ ဒီစမ်းသပ်နည်းက အရေးကြီးပါတယ်။

HSE တက္ကသိုလ်ရဲ့ဖော်ပြချက်အရ လူတွေရဲ့သွေးထဲမှာ ကင်ဆာကိုရှာဖွေတွေ့ရှိနိုင်တဲ့ ပစ္စည်းများပါဝင်ပြီး အိတ်ဇိုဆုန်းကဲ့သို့ ပစ္စည်းတွေဟာ တစ်ရှူးနဲ့အင်္ဂါဆဲလ်တွေကနေ ထုတ်လွှတ်လိုက်တဲ့ အဏုဇီဝအိတ်လေးတွေ ဖြစ်ပါတယ်။

ကင်ဆာအစောပိုင်းအဆင့်တွေမှာ သွေးထဲက အိတ်ဇိုဆုန်းပမာဏက သိသိသာသာများလေ့ရှိပြီး ကင်ဆာရှိကြောင်း ကင်ဆာအထူးကုဆရာဝန်များက သိရှိနိုင်ပါတယ်။

"ဆဲလ်တွေက အိတ်ဇိုဆုန်းကဲ့သို့ပစ္စည်းများ အသုံးပြုပြီး ဆဲလ်အချင်းချင်းဆက်သွယ်ကြပါတယ်၊ ဒါပေမဲ့ အတွင်းပိုင်းနဲ့အပြင်ပိုင်းဆိုင်ရာ အချက်အလက်များကနေ မှားယွင်းပေးပို့ပြီး ဆဲလ်ကွဲခြင်းနဲ့ အကျိတ်ကြီးထွားခြင်းတို့ ဖြစ်ပေါ်လာနိုင်ပါတယ်" လို့ စကောလ်ကိုဗို သိပ္ပံနဲ့နည်းပညာတက္ကသိုလ်မှ ပရော်ဖက်ဆာ'ဒီမစ်ထရီဂိုရင်'က ပြောပြသွားပါတယ်။

Source: The Jerusalem Post
#Yangon_Media_Group