#Local_News
Published_ 8 March 2022

ဒီကနေ့ မတ်လ ၈ ရက် ရန်ကုန်စက်သုံးဆီရောင်းစျေးဟာ အောက်တိန်း ၉၂ တစ်လီတာလျှင် ၂,၁၃၀ ကျပ်၊ ၉၅ တစ်လီတာလျှင် ၂,၁၉၅ ကျပ်၊ ဒီဇယ်ဆီတစ်လီတာလျှင် ၂,၃၂၅ ကျပ် နှင့် ပရီမီယံဒီဇယ် တစ်လီတာလျှင် ၂,၃၃၅ ကျပ်အထိ မြင့်တက်လာပါတယ်။

မတ်လ ၇ ရက် မနေ့က အောက်တိန်း ၉၂ တစ်လီတာလျှင် ၁,၉၃၀ ကျပ်၊ ၉၅ တစ်လီတာလျှင် ၁,၉၉၅ ကျပ်၊ ဒီဇယ်ဆီတစ်လီတာလျှင် ၂,၀၂၅ ကျပ် နှင့် ပရီမီယံဒီဇယ် တစ်လီတာလျှင် ၂,၀၃၅ ကျပ် ရှိခဲ့ပါတယ်။

မနေ့ကနှင့် ဒီကနေ့ နှိုင်းယှဉ်ပါက အောက်တိန်းတစ်လီတာကို ၂၀၀ ကျပ်နှင့် ဒီဇယ်ဆီ တစ်လီတာကို ၃၀၀ ကျပ်စီ အသီးသီးမြင့်တက်လာတာ ဖြစ်ပါတယ်၊အမေရိကန်နဲ့ ဥရောပနိုင်ငံတွေက ရုရှားနိုင်ငံထုတ်ကုန်ပစ္စည်းတွေကို ပိတ်ဆို့အရေးယူမှုတွေစတင်အပြီးမှာ ကမ္ဘာ့ရေနံစိမ်းက တစ်စည်ပေါက်ဈေး အမေရိကန်ဒေါ်လာ ၁၃၀ နဲ့အထက်သို့ ရောက်သွားခဲ့ပြီး ဒါဟာ ၂၀၀၈ ခုနှစ်နောက်ပိုင်း ကမ္ဘာ့ရေနံစိမ်းဈေးနှုန်း အမြင့်ဆုံးအဖြစ် စံချိန်တင်မြင့်တက်သွားတာပဲဖြစ်ပါတယ်။

စက်သုံးဆီဈေးတွေ အဆမတန်မြင့်တက်လာတာကြောင့် ကုန်တင်ယာဉ်နှင့် အငှားယာဉ်တချို့လည်း ပြေးဆွဲမှုတွေရပ်နားနေရပါတယ်။

#ymg_mnn
#Yangon_Media_Group

#LocalNews
Published - 8 March 2022

ရုပ်ရှင်လောကသားများအတွက် ဆန်/ဆီ ရိက္ခာများအား မြန်မာနိုင်ငံရုပ်ရှင်အစည်းအရုံးမှ ဖြန့်ဝေပေးအပ်လျက်ရှိတယ်လို့ သိရပါတယ်။

အဆိုပါ ရိက္ခာများ ဖြန့်ဝေပေးအပ်မှုကို ယခု မတ်လ ၄ ရက်နေ့မှ စတင်ခဲ့ခြင်းဖြစ်ပြီး မတ်လ ၁၁ ရက်နေ့ အထိ အလွှာအလိုက် ဖြန့်ဝေ ပေးသွားမှာဖြစ်တယ်လို့ ဆိုပါတယ်။

"ဒီနေ့က ကျွန်တော်တို့တည်းဖြတ်အလွှာတွေကို ဖြန့်ဝေပေးတဲ့နေ့ပါ။ ရုပ်ရှင်အလွှာအလိုက် ရက်တွေသတ်မှတ်ပြီး ဖြန့်ဝေပေးနေတာပါ။ သူတို့ဖြန့်ဝေပေးတဲ့ထဲမှာ ဆန်ပါတယ်၊ ဆီပါတယ်၊ ငါးသေတ္တာဗူးတွေပါတယ် ကျန်တဲ့စားသောက်ကုန်တွေပေါ့ ဒါတွေကို ဖြန့်ဝေ ပေးနေတာဖြစ်ပါတယ်။"လို့ ရုပ်ရှင်တည်းဖြတ်အလွှာမှ တည်းဖြတ်ပညာရှင်တစ်ဦးက YMG ကို ပြောပြခဲ့ပါတယ်။

ရုပ်ရှင်လောကသားများအတွက် ဆန်/ဆီ ရိက္ခာများအား ဖြန့်ဝေပေးခြင်းကို သတ်မှတ်ရက်များအလိုက် ဆောင်ရွက်ပေးနေခြင်းဖြစ်ပါတယ်။

ဒါ့အပြင် ရိက္ခာထုတ်ယူလိုသူ ရုပ်ရှင်လောကသားများအနေနဲ့ နံနက် ၉ နာရီမှ ၁၂ နာရီအထိ တစ်ကြိမ်၊ မွန်းလွဲ ၁ နာရီမှ ၃ နာရီခွဲ အထိ တစ်ကြိမ် ရုပ်ရှင်အစည်းအရုံးဝင်ကတ်ပြားဖြင့် ကိုယ်တိုင်ထုတ်ယူနိုင်တယ်လို့လည်း သိရပါတယ်။

"အုပ်ချုပ်/ဖြန့်ချိ၊ ဇာတ်ညွှန်း၊ စက်မှု၊ တည်းဖြတ်၊ ဒါရိုက်တာ၊ ဇာတ်ပို့/ဇာတ်ရံ အလွှာအစုံကို ဖြန့်ဝေပေးနေခြင်းဖြစ်ပါတယ်။"လို့ ၄င်းက ဆက်လက်ပြောပြခဲ့ပါတယ်။

ymg/kg
#Yangon_Media_Group

#WorldPolitics
Published 08 March 2022

ရုရှားနိုင်ငံခြားရေးဝန်ကြီး'ဆာဂျီလက်ဗ်ရော့ဗ်'နဲ့ ယူကရိန်းနိုင်ငံခြားရေးဝန်ကြီး'ဒီမစ်ထရိုကူလ်ဘာ'တို့ဟာ တူရကီတောင်ပိုင်းနေရာမှာ ကြာသပတေးနေ့တွေ့ဆုံဆွေးနွေးသွားဖို့ သဘောတူခဲ့ကြပါတယ်။

ရုရှားတို့ ယူကရိန်းနိုင်ငံကို စတင်ကျူးကျော်ပြီးနောက်ပိုင်း နှစ်နိုင်ငံထိပ်သီးသံတမန်တွေ ပထမဆုံးအကြိမ်တွေ့ဆုံဆွေးနွေးတဲ့ပွဲ ဖြစ်လာဖို့ရှိနေပါတယ်။

ဆွေးနွေးပွဲပြုလုပ်မယ့်အကြောင်းကို တူရကီနိုင်ငံခြားရေးဝန်ကြီး'မီဗ်လုကာဗူဆိုဂလူ'က တနင်္လာနေ့ကကြေညာလိုက်ပြီး အန်တယ်လ်ယာအပန်းဖြေမြို့မှာပြုလုပ်မယ့် အစည်းအဝေးပွဲကို သူကိုယ်တိုင်တက်ရောက်သွားမှာဖြစ်ကြောင်းဆိုပါတယ်။
အစည်းအဝေးပွဲကိစ္စကို ရုရှားနိုင်ငံခြားရေးဝန်ကြီးဌာနကလည်း အတည်ပြုလိုက်ပါတယ်။

ပင်လယ်နက်အတွင်း ရုရှား ယူကရိန်းတို့နဲ့ ရေပိုင်နက်ချင်းထိစပ်နေတဲ့ နေတိုး(NATO)အဖွဲ့ဝင်နိုင်ငံတူရကီဟာ အဆိုပါနှစ်နိုင်ငံအကြား ဖျန်ဖြေညှိနှိုင်းမှုပြုလုပ်ပေးဖို့ ကမ်းလှမ်းနေခဲ့တာဖြစ်ပါတယ်။

တူရကီဟာ ရုရှားရော ယူကရိန်းနဲ့ပါ ကောင်းမွန်တဲ့ဆက်ဆံရေးရှိနေပြီး ရုရှားတို့ကျူးကျော်ခြင်းက လက်ခံနိုင်စရာအကြောင်းမရှိဘူးလို့ပြောကြားခဲ့ပေမယ့် ရုရှားနိုင်ငံအပေါ် စီးပွားရေးပိတ်ဆို့ဒဏ်ခတ်မှုတွေကိုလည်း ကန့်ကွက်ကြောင်းကြေညာခဲ့ပါတယ်။

တူရကီသမ္မတ'တာယစ်အာဒိုဂန်'က ဆွေးနွေးပွဲကိုလက်ခံကျင်းပပေးဖို့ အကြိမ်ကြိမ်ကမ်းလှမ်းနေကြောင်း တူရကီနိုင်ငံခြားရေးဝန်ကြီးက ရုရှားသမ္မတ'ဗလာဒီမီယာပူတင်'နဲ့ တနင်္ဂနွေနေ့က ဖုန်းဆက်ပြောဆိုခဲ့ရာ နောက်ပိုင်းမှာတော့ ရုရှားနိုင်ငံခြားရေးဝန်ကြီးက လက်ခံသဘောတူခဲ့တာဖြစ်ပါတယ်။

"ဒီဆွေးနွေးပွဲက အခြေအနေအလှည့်အပြောင်းတစ်ခုဖြစ်လာနိုင်ပြီး စစ်ပြေငြိမ်းရေးအတွက် အရေးကြီးခြေလှမ်းတစ်ခုဖြစ်လာဖို့ မျှော်လင့်ပါတယ်"လို့ 'ကာဗူဆိုဂလူ'က ဆိုလိုက်ပြီး နှစ်နိုင်ငံမှနိုင်ငံခြားရေးဝန်ကြီးတွေကလည်း ဒီဆွေးနွေးပွဲကိုတက်ရောက်ဖို့ သူ့အားဖိတ်ခေါ်ထားကြောင်း အသိပေးလိုက်ပါတယ်။

ရုရှားနိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ'မာရီယာဇာခါရိုဗာ'ကလည်း ဒီအစည်းအဝေးပွဲကိစ္စအတည်ပြုခဲ့ကြောင်း တယ်လီဂရမ်ကနေ ဖော်ပြထားပါတယ်။

ဆွေးနွေးမယ့်အကြောင်းအရာတွေက အရေးပါအကျိုးရှိမှ 'လက်ဗ်ရော့ဗ်'နဲ့ဆွေးနွေးမှာဖြစ်တယ်လို့ 'ကူလ်ဘာ'က စနေနေ့ကဆိုခဲ့ပါတယ်။

ရုရှားဘက်က လူသားချင်းစာနာထောက်ထားမှုကို ပြသတဲ့အနေနဲ့ ဗုံးဒဏ်ခံခဲ့ရပြီးပိတ်မိနေတဲ့ ယူကရိန်းနိုင်ငံသားတွေကို့ ရုရှားနိုင်ငံနဲ့ ဘီလာရုစ်နိုင်ငံများထံ ပို့ဆောင်ပေးဖို့ တနင်္လာနေ့ကကြေညာခဲ့ရာ ဒါဟာ ကလိမ်ကျတဲ့လုပ်ရပ်တစ်ခုအဖြစ် ယူကရိန်းဘက်က တုန့်ပြန်ရှုတ်ချလိုက်ပါတယ်။

အပစ်အခတ်ရပ်စဲခြင်းမရှိ အဝိုင်းခံထားရတဲ့'မာရီယူပေါလ်'မြို့ပေါ်က သိန်းပေါင်းများစွာသောလူတွေဟာ အဆက်မပြတ်ဗုံးကြဲတိုက်ခိုက်ခံနေရတဲ့အတွက် ထွက်ပြေးလွတ်မြောက်ခြင်းမရှိခဲ့ဘဲ အစာရေပြတ်လတ်ကာ ပိတ်မိနေတာဖြစ်ပါတယ်။

ရုရှားတို့က ယူကရိန်းနိုင်ငံအပေါ် အထူးစစ်ဆင်ရေးပြုလုပ်ကာ ကျူးကျော်တိုက်ခိုက်ခဲ့ကြပါတယ်။

နောက်ဆက်တွဲအနေနဲ့ လူပေါင်း ၁ သန်းခွဲကျော်ဟာ အိုးအိမ်စွန့်ခွာထွက်ပြေးနေရကာ ဒုတိယကမ္ဘာစစ်အပြီး ဥရောပမှာစစ်ဘေးဒုက္ခသည်အများဆုံးဖြစ်လာတဲ့ အခြေအနေဖြစ်နေကြောင်း ကုလသမဂ္ဂကပြောကြားလိုက်ပါတယ်။

တူရကီနိုင်ငံဟာ ကာကွယ်ရေး၊ ကူးသန်းရေး၊ စွမ်းအင်ရရှိရေးတို့မှာ ရုရှားနဲ့ဆက်ဆံရေးကောင်းမွန်အောင်ပြုလုပ်နေပြီး နှစ်စဉ်ရုရှားခရီးသွားဧည့်သည်သန်းပေါင်းများစွာကိုလည်း ဝင်ခွင့်ပြုလက်ခံပေးနေတာဖြစ်ပါတယ်။

ယူကရိန်းနိုင်ငံကိုလည်း တူရကီက ဒရုန်းယာဉ်များရောင်းချပေးနေတာကြောင့် ရုရှားတို့အမျက်ထွက်စရာဖြစ်ခဲ့ပါတယ်။

ဆီးရီးယားနဲ့လစ်ဗျားနိုင်ငံကိစ္စတွေမှာ ရုရှားတို့ရဲ့မူဝါဒပေါ်လစီကို တူရကီတို့က ဆန့်ကျင်ရှုတ်ချခဲ့ပြီး ၂၀၁၄ ခုနှစ် ယူကရိန်းထံမှ ခရိုင်းမီးယားကျွန်းဆွယ်ကိုသိမ်းယူခဲ့စဉ်ကလည်း ကန့်ကွက်ဆန့်ကျင်ခဲ့ဖူးပါတယ်။

Source: Reuters
#Yangon_Media_Group

Published 8 March 2022

ယူကရိန်းသမ္မတ ဗိုလိုဒီမာ ဇီလင်စကီးက မော်စကိုသည် အပြစ်ရှာသက်သက်သာဖြစ်ပြီး သူသည် ကိဗ်တွင် သူရှိနေကြောင်း တယ်လီဂရမ်တွင် ဗွီဒီယိုရိုက်ကူးပြီး တင်ခဲ့ပါတယ်။ အချို့မီဒီယာများက ဇီလင်စကီး နယ်စပ်တစ်နေရာတွင် ပုန်းအောင်းနေသည် သို့မဟုတ် ပိုလန်သို့ ထွက်ပြေးသွားပြီဟု သတင်းများ မကြာခဏထွက်ပေါ်နေအပြီး ဇီလင်စကီးက ဗွီဒီယိုတင်ခဲ့ခြင်းဖြစ်ပါတယ်။

Source : AFP

#WorldHealth
Published 08 March 2022

Rhesus macaques မျောက်မျိုးစိတ်တွေကို သုတေသနပြုလုပ်ခဲ့ရာမှာ ကိုရိုနာဗိုင်းရပ်စ်က မျောက်ထီးတွေရဲ့လိင်အင်္ဂါလမ်းကြောင်းတွေထဲက တစ်ရှူးတွေကို ကူးစက်ဝင်ရောက်နိုင်ကြောင်း တွေ့ရှိခဲ့ကြပါတယ်။

ကိုဗစ်လူနာအချို့မှာလည်း လိင်တံမထောင်မတ်နိုင်ခြင်းလက္ခဏာမျိုး ကြုံတွေ့ရကြောင်း အကြောင်းကြားထားကြပါတယ်။
ဒီလက္ခဏာတွေဟာ ရောဂါကူးစက်မှုနဲ့တွဲပါလာတဲ့ ရောင်ရမ်းခြင်း ဖျားနာခြင်းတို့ကြောင့်မဟုတ်ဘဲ ဗိုင်းရပ်စ်တိုက်ရိုက်ကူးစက်ဝင်ရောက်ခြင်းကြောင့်ဖြစ်နိုင်ကြောင်း ယူဆနေကြပါတယ်။

ရောဂါပိုးကူးစက်ဝင်ရောက်ထားတဲ့ နေရာတွေကိုရှာဖွေဖို့ တစ်ကိုယ်လုံးကို စကန်ဖတ်ကာ စမ်းသပ်စစ်ဆေးခဲ့ပါတယ်။
Rhesus macaques မျောက်ထီးသုံးကောင်ကို သုတေသနပြုလုပ်ရာမှာ ကိုရိုနာဗိုင်းရပ်စ်က ဆီးကျိတ်၊ လိင်တံ၊ ဝှေးစေ့နဲ့ အနီးနားရှိသွေးကြောတွေကို ကူးစက်ထားကြောင်း တွေ့ရှိရပါတယ်။

သိပ္ပံပညာရှင်တွေဟာ အဆုတ်လိုအင်္ဂါတွေမှာ ကိုရိုနာဗိုင်းရပ်စ်ကိုတွေ့ရှိမယ်လို့ ထင်မှတ်ထားကြပေမယ့် အခုလိုအထီးအင်္ဂါမှာပါတွေ့ရှိရတာကြောင့် အံ့အားသင့်ခဲ့ကြရကြောင်း ချီကာဂို ဖိုင်ဘာ့ဂ်ဆေးဘက်ဆိုင်ရာတက္ကသိုလ်မှ ပရော်ဖက်ဆာ'သောမတ်စ်ဟုပ်'က ပြောကြားခဲ့ပါတယ်။

မျောက်သုံးကောင်ကိုသာ အခြေခံပြီးစမ်းသပ်ထားတာဖြစ်ပေမယ့် တွေ့ရှိချက်က မှန်ကန်စိတ်ချရတယ်လို့ ဒေါက်တာ'ဟုပ်'ကဆိုပါတယ်။

ဒီတွေ့ရှိချက်ကို သတင်းဂျာနယ်တွေမှာဖော်ပြဖို့ ပညာရှင်တွေအချင်းချင်း အသိအမှတ်မပြုရသေးပေမယ့် bioRxiv ဝက်ဘ်ဆိုက်မှာ တနင်္လာနေ့က ဖော်ပြခဲ့ပါတယ်။

ဒီလေ့လာမှုကို လူဝီစီယာနာရှိ ကျူလိန်းအမျိုးသားပရိုင်းမိတ်သုတေသနစင်တာမှာ ပြုလုပ်ခဲ့တာဖြစ်ပါတယ်။

မျောက်တွေမှာ အထီးအင်္ဂါလမ်းကြောင်း ဗိုင်းရပ်စ်ကူးစက်ခံရခြင်းကြောင့် တက်စ်တိုစတီရုန်းဟော်မုန်းပမာဏနည်းပါးခြင်း၊ သုတ်ပိုးအကောင်ရေနည်းပါးခြင်း၊ လိင်အင်္ဂါနာကျင်ခြင်းတို့ ဖြစ်ပေါ်နိုင်သလားဆိုတာကိုတော့ မသိရှိရသေးပါဘူး။

ကိုရိုနာဗိုင်းရပ်စ်ကူးစက်ခံရတဲ့ အမျိုးသား ၁၀ ရာခိုင်နှုန်းမှ ၂၀ ရာခိုင်နှုန်းတိုဟာ လိင်အင်္ဂါလမ်းကြောင်းလက္ခဏာတွေနဲ့ ဆက်စပ်နေတယ်လို့ တွေ့ရှိထားပါတယ်။

ဗိုင်းရပ်စ်ကူးစက်တဲ့ယောက်ျားတွေဟာ အခြားသူတွေထက် လိင်တံမထောင်မတ်နိုင်ခြင်းပြဿနာဖြစ်ပေါ်ဖို့ ၃ ဆကနေ ၆ ဆလောက်အထိရှိ‌ပြီး ဒါဟာ ကိုဗစ်နောက်ဆက်တွဲလက္ခဏာတစ်ရပ်ဖြစ်လာနိုင်တယ်လို့ ယူဆနေကြပါတယ်။

အဆိုပါအမျိုးသားလူနာတွေမှာ လိင်အင်္ဂါနာကျင်ခြင်း၊ သုတ်ပိုးအကောင်ရေနည်းပါးခြင်း၊ သုတ်ပိုးအရည်အသွေးကျဆင်းခြင်း၊ မျိုးအောင်နိုင်စွမ်းကျဆင်းခြင်း၊ ကျားဟော်မုန်းနည်းပါးကာ လိင်စိတ်ဆန္ဒနည်းပါးခြင်းတို့ ကြုံတွေ့နေရတယ်လို့ အကြောင်းကြားလာကြပါတယ်။

ကိုရိုနာဗိုင်းရပ်စ်ကူးစက်ပြီး ဒီလိုလက္ခဏာကြုံတွေ့ရနိုင်ချေဟာ နည်းပါးတယ်ဆိုပေမယ့် ကပ်ရောဂါကြီးဖြစ်ပွားတဲ့အတိုင်းအတာနဲ့ယှဉ်ကြည့်ပါက သန်းပေါင်းများစွာသောအမျိုးသားတွေမှာ လိင်ကျန်းမာရေးပြဿနာများခံစားရနိုင်ကြောင်း ဒေါက်တာ'ဟုပ်'က ရှင်းပြထားပါတယ်။

အမျိုးသားတွေအနေနဲ့ ကိုဗစ်ကာကွယ်ဆေးထိုးဖို့ တိုက်တွန်းမှာကြားလိုက်ပြီး လိင်အင်္ဂါကျန်းမာရေးပြဿနာတစ်ခုခုခံစားရပါက ဆေးကုသမှုခံယူသင့်ကြောင်း တိုက်တွန်းထားပါတယ်။

အမျိုးသမီးမျိုးပွားအင်္ဂါစနစ်ကိုလည်း ဗိုင်းရပ်စ်ကကူးစက်နိုင်သလားဆိုတာကို ဆက်လက်လေ့လာသွားဦးမှာဖြစ်ပါတယ်။
တွေ့ရှိချက်တွေကိုအသုံးချပြီး မျိုးပွားနိုင်စွမ်းထိခိုက်လာနိုင်တဲ့အန္တရာယ်ကို ကုသသွားဖို့မျှော်လင့်နေကြပါတယ်။

Source: The New York Times.
#Yangon_Media_Group

#LocalNews
Published -8Mar 2022

ရန်ကုန်တိုင်းဒေသကြီး၊မင်္ဂလာဒုံနှင့် ဒဂုံမြို့သစ်မြောက်ပိုင်းမြို့နယ်တို့တွင် မတ်လ ၃ ရက်နေ့က ငွေကျပ် ၁ ဒသမ ၃ ဘီလီယံကျော်တန်ဖိုးရှိ မူးယစ်ဆေးဝါးများကို ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့ကသိရပါတယ် ။

ဖမ်းဆီးရမိမှုဖြစ်စဉ်မှာ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မတ်လ ၃ ရက်နေ့ မွန်းလွဲ ၁ နာရီခွဲအချိန် ရန်ကုန်တိုင်းဒေသကြီး၊ မင်္ဂလာဒုံမြို့နယ်၊ ချစ်တီးကုန်းရပ်ကွက်တွင် သက်နိုင်(၅၈)နှစ် မောင်းနှင်လာသည့် မော်တော်ဆိုင်ကယ်ကို သတင်းအရရှာဖွေရာ စိတ်ကြွရူးသွပ်ဆေးပြား ၂၀,၀၀၀ ပြား သိမ်းဆည်းရမိခဲ့ပြီး သတင်းကွင်းဆက်အရ မွန်းလွဲ ၂ နာရီအချိန် မင်္ဂလာဒုံမြို့နယ်၊ ချစ်တီးကုန်း(၂/ခ)ရပ်ကွက်၊ ဘူတာလမ်းတွင် မူးယစ်ဆေးဝါးများသယ်ဆောင်ရောင်းဝယ်ရာ၌ ပူးပေါင်းပါဝင်သူ ကျော်လွင်(၅၄)နှစ်အား Beijing မော်တော်ယာဉ် နှင့်အတူ ဖမ်းဆီးရမိခဲ့ပြီး ညနေ ၃ နာရီအချိန် ဒဂုံမြို့သစ်(မြောက်ပိုင်း)မြို့နယ်၊ အမှတ်(၄၄)ရပ်ကွက်၊ ရွှေစင် (၁)လမ်း၊ အိမ်အမှတ်(၄၄/၂၂၃)၊ A-1 မြေညီထပ်ရှိ ကျော်လွင်၏ တိုက်ခန်းအား ဆက်လက်ရှာဖွေရာ နေအိမ်အတွင်းမှ စိတ်ကြွရူးသွပ်ဆေးပြား ၄ ဒသမ ၂ သိန်း နှင့် ဘိန်းဖြူဘလောက်တုံး ၇၆ တုံး၊ အလေးချိန် ၂၅ ဒသမ ၈၄ ကီလို ထပ်မံသိမ်းဆည်းရမိခဲ့သဖြင့် ဒေသကာလတန်ဖိုးငွေကျပ် ၁ ဒသမ ၃ ဘီလီယံကျော်တန်ဖိုးရှိ စုစုပေါင်း စိတ်ကြွရူးသွပ်ဆေးပြား ၄ ဒသမ ၄ သိန်း၊ ဘိန်းဖြူ ၂၅ ဒသမ ၈၄ ကီလို သိမ်းဆည်းရမိခဲ့ပြီး စစ်ဆေးဖော်ထုတ်ချက်များအရ သိမ်းဆည်းရမိမူးယစ်ဆေးဝါးများအား ရှမ်းပြည်နယ်(တောင်ပိုင်း)မှ ရန်ကုန်တိုင်းဒေသကြီးသို့ သယ်ဆောင်ပြီး ၎င်းမှတစ်ဆင့် ရခိုင်ပြည်နယ်၊ မြန်မာ-ဘင်္ဂလားဒေ့ရ်ှနယ်စပ်သို့ သယ်ဆောင်မှာဖြစ်တယ်လို့ သိရပါတယ်။

ထို့ကြောင့် မူးယစ်ဆေးဝါးများအား လက်ဝယ်တွေ့ရှိသူများဖြစ်သည့် သက်နိုင်နှင့်ကျော်လွင်တို့အား မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေး ဖော်ထုတ်လျက်ရှိတယ်လို့ သိရပါတယ်။

ymg/hm
#Yangon_Media_Group

#LocalNews
Published - 8 March 2022

၁၉၈၂ နိုင်ငံသားဥပဒေအရ တေးသံရှင် ဆောင်းဦးလှိုင်နှင့် အစီအစဥ်တင်ဆက်သူ မောင်မောင်အေးအပါအဝင် လူပုဂ္ဂိုလ် ၅ ဦးတို့အား နိုင်ငံသားအဖြစ်မှ ရပ်စဲကြောင်း နစက က မတ်လ ၇ ရက်တွင် ထပ်မံကြေညာလိုက်ပါတယ်။

၄င်းတို့သည် နိုင်ငံတော်၏ တည်ဆဲဥပဒေများကို ဖောက်ဖျက်ကျုးလွန်၍ ပြည်ပနိုင်ငံများသို့ တရားမဝင်ထွက်ခွာသွားသူများဖြစ်ကြပြီး ၄င်းတို့ကို ၁၉၈၂ ခုနှစ်၊ မြန်မာနိုင်ငံသား ဥပဒေပုဒ်မ ၆၇ ပါ ဗဟိုအဖွဲ့၏လုပ်ပိုင်ခွင့်အရ ယင်းဥပဒေပုဒ်မ ၁၆ နဲ့အညီ နိုင်ငံသားအဖြစ်မှ ရပ်စဲလိုက်တာဖြစ်တယ်လို့ နစက ၏ ထုတ်ပြန်ချက်မှာဖော်ပြထားပါတယ်။ နိုင်ငံသားအဖြစ်မှရပ်စဲခံရသူများမှာ အဆိုတော်ဆောင်းဦးလှိုင်၊အစီအစဉ်တင်ဆက်သူ မောင်မောင်အေး၊ ဒေါ်ခင်မမမျိုး၊ ဦးပြည်သစ်ညွန့်ဝေနှင့် ဒေါ်ဖြူဖြူသင်းတို့ဖြစ်ကြပါတယ်။

ဒါ့အပြင် အခုမတ်လ ၄ ရက် နေ့က ဒေါက်တာဇော်ဝေစိုး၊ ဦးရည်မွန်၊ ဦးလွင်ကိုလတ်၊ဒေါ်ဇင်မာအောင်၊ ဦးအောင်မျိုးမင်း၊
ဦးထင်လင်းအောင်၊ ဒေါ်အိသဉ္ဇာမောင်၊ ဒေါက်တာဆာဆာ အပါအဝင် လူပုဂ္ဂိုလ်(၁၁)ဦးတို့ကိုလည်း ၁၉၈၂ နိုင်ငံသားဥပဒေအရ နိုင်ငံသားအဖြစ်က ရပ်စဲခဲ့ပါသေးတယ်။

ဒါကြောင့် ယနေ့အထိ နိုင်ငံသားအဖြစ်မှရပ်စဲခံရသူ (၁၆)ဦး ရှိပြီဖြစ်ပါတယ်။

ဒါ့အပြင် ဆက်လက်ဖော်ထုတ်တွေ့ရှိသူများကိုလည်း ဆက်လက်အရေးယူသွားမည်ဟု နစကရဲ့ ကြေညာချက်မှာ ဖော်ပြထားပါတယ်။

ymg/kg
#Yangon_Media_Group

#WorldHealth
Published - 08 March 2022

ဒိန်းမတ်နိုင်ငံမှာ လူပေါင်း ၁၅၂,၀၀၀ ဦးကို စစ်တမ်းကောက်ယူခဲ့ရာ ကိုရိုနာဗိုင်းရပ်စ်ကူးစက်ခံရပြီး ၆ လမှ ၁၂ လအတွင်း လူသုံးပုံတစ်ပုံနီးပါးလောက်ဟာ နောက်ဆက်တွဲလက္ခဏာအနည်းဆုံးတစ်မျိုးလောက် ခံစားရကြောင်း တွေ့ရှိခဲ့ကြပါတယ်။

ဒီလေ့လာကောက်ယူချက်မှာ ကိုဗစ်ရောဂါဖြင့် ဆေးရုံတက်ရောက်ခြင်းမရှိတဲ့ လူအများဆုံးပါဝင်ကာ အခြားအရေးကြီးလေ့လာချက်တွေကထက် အချိန်ပိုမိုကြာရှည်စွာစောင့်ကြည့်လေ့လာခဲ့တာဖြစ်ကြောင်း ဒိန်းမတ်နိုင်ငံဆီရမ်အင်စတီကျုမှ သုတေသီများက ပြောကြားခဲ့ပါတယ်။

စစ်တမ်းကောက်ယူချက်တွင် မေးခွန်းပုံစံများဖြင့်ကောက်ယူခဲ့ရာ အဖြစ်အများဆုံးနောက်ဆက်တွဲလက္ခဏာတွေမှာ အနံ့အရသာအာရုံပြောင်းလဲခြင်းနဲ့ နွမ်းနယ်နုံးချည့်ခြင်းတို့ဖြစ်နေပါတယ်။

အိုမီခရွန်မျိုးဗီဇကွဲမပေါ်ပေါက်သေးတဲ့အချိန် ၂၀၂၀ စက်တင်ဘာလမှ ၂၀၂၁ ဧပရယ်လ်လအတွင်း လေ့လာချက်ပြုလုပ်ခဲ့တာဖြစ်ပါတယ်။အရင် ၆ လ၊ ၉ လ၊ ၁၂ လအတွင်း ကိုရိုနာဗိုင်းရပ်စ်ပိုးကူးစက်ထားတဲ့ လူပေါင်း ၆၁,၀၀၂ ဦးကို ရောဂါပိုးမကူးစက်ခဲ့တဲ့ လူပေါင်း ၉၁,၈၇၈ ဦးနဲ့ နှိုင်းယှဉ်ခဲ့ပါတယ်။

ရောဂါပိုးကူးစက်ခဲ့တဲ့လူဦးရေ ၂၉.၆ ရာခိုင်နှုန်းဟာ ကူးစက်ခံရပြီး ၆ လမှ ၁၂ လအတွင်း အနည်းဆုံးရုပ်ပိုင်းဆိုင်ရာရောဂါလက္ခဏာတစ်မျိုးခံစားရကြောင်း တွေ့ရှိခဲ့ပြီး ရောဂါပိုးမကူးစက်ခဲ့တဲ့သူတွေထဲမှာတော့ ၁၃ ရာခိုင်နှုန်းသောလူတွေက နောက်ဆက်တွဲလက္ခဏာတွေခံစားခဲ့ရပါတယ်။

ရောဂါပိုးကူးစက်ခဲ့တဲ့သူ ၅၃.၁ ရာခိုင်နှုန်းကတော့ ရောဂါကူးစက်ခံရပြီး ၆ လမှ ၁၂ လအတွင်း စိတ်ပိုင်းဆိုင်ရာ သိုမဟုတ် ရုပ်ပိုင်းဆိုင်ရာမောပန်းခြင်း၊ အိပ်စက်မှုပြဿနာဖြစ်ခြင်း၊ မှတ်ဉာဏ်သိရှိမှုပြဿနာဖြစ်ခြင်းများ ခံစားခဲ့ကြရပါတယ်။

SARS-CoV-2 ကူးစက်ခံရတဲ့သူတွေမှာ စိတ်ဓာတ်ကျခြင်းဝေဒနာနဲ့ စိုးရိမ်ပူပန်ခြင်းဝေဒနာတွေလည်း အဖြစ်များလာပါတယ်။ရောဂါကူးစက်ပြီး ၃ လအတွင်း နောက်ဆက်တွဲလက္ခဏာတွေထဲမှာ အသက်ရှူခက်ခဲခြင်း၊ ပင်ပန်းနွမ်းနယ်ခြင်းတို့ကိုလည်း အနည်းဆုံး ၂ လလောက်ခံစားရနိုင်ကြောင်း WHO က ဖော်ပြထားပါတယ်။

လူဦးရေ ၁၀ ရာခိုင်နှုန်းမှ ၂၀ ရာခိုင်နှုန်းကြားမှာ ဒီလိုနောက်ဆက်တွဲလက္ခဏာတွေ ပေါ်ပေါက်လာနိုင်ပြီး စောင့်ရှောက်ကုသမှုတွေ လိုအပ်လာနိုင်ကြောင်း WHO က ခန့်မှန်းဖော်ပြထားပါတယ်။

"အိုမီခရွန်က အခြားမျိုးဗီဇကွဲတွေလို ကိုဗစ်နောက်ဆက်တွဲလက္ခဏာတွေ ပေါ်ပေါက်လာနိုင်တာကြောင့် အိုမီခရွန်ကူးစက်ခံရတဲ့လူအရေအတွက်အတိုင်း မှန်းဆကြည့်ပါက နောက် ၁၂ လအတွင်း ဒီပြဿနာကြီးနဲ့ကြုံတွေ့ရနိုင်ပါတယ်" လို့ အိတ်စ်တာဆေးဘက်ဆိုင်ရာတက္ကသိုလ်မှ သင်ရိုးပို့ချသူ'ဒေးဗစ်စထရိန်း'က ပြောကြားခဲ့ပါတယ်။
Source: Reuters

#WorldBusiness
Published 07 March 2022

တရုတ်နိုင်ငံရဲ့ စီးပွားရေးဖွံ့ဖြိုးတိုးတက်ဖို့အတွက် ပြည်တွင်းထုတ်လုပ်သုံးစွဲမှု ပြန်လည်ဦးမော့လာဖို့ကိုသာ အားထားရတော့မှာဖြစ်ပါတယ်။

#Yangon_Media_Group

Published 7 March 2022

ယူကရိန်းက အပြည်ပြည်ဆိုင်ရာ ရာဇဝတ်မှုတရာရုံး ICJ မှာ ပဋိပက္ခကို ရပ်တန့်ဖို့ ချက်ခြင်းအမိန့်တစ်ရပ်ချမှတ်ပေးဖို့ တိုင်တန်းလျှောက်ထားမှုနှင့်ပတ်သက်လို့ ဒီကနေ့မှာ နယ်သာလန်နိုင်ငံ၊သည်ဟိဟ်မြို့မှာ ကြားနာမှုပြုလုပ်ရာ ရုရှားက ကြားနာပွဲကိုတက်ရောက်ဖို့ ငြင်းဆန်ခဲ့တယ်လို့ တရားသူကြီးအဖွဲ့ သဘာပတိက ပြောပါတယ်။

နှုတ်ဖြင့်ကြားနာပွဲကို ရုရှားဖက်ဒရေးရှင်း တက်ရောက်မှုမရှိတဲ့အတွက် တရားရုံးက ဝမ်းနည်းမိပါတယ်လို့ ICJ ရဲ့  တရားသူကြီးအဖွဲ့ သဘာပတိ ဂျုန်းဒွန်နိုဟူးက ပြောပါတယ်။

နယ်သာလန်နိုင်ငံဆိုင်ရာ ရုရှားသံအမတ်ကြီး အလက်ဇင်းဒါးရှုဂင်းက “ သူ့အစိုးရအနေနှင့် ကြားနာပွဲ တက်ရောက်ပါဝင်ရန် ရည်ရွယ်ချက်မရှိကြောင်း တရားရုံးကို စာပို့ခဲ့တယ်လို့ သူမကပြောပါတယ်။

Source AFP

#LocalNews
Published - 7 Mar 2022

၂၀၂၂ ခုနှစ် ဇန်နဝါရီနဲ့ ဖေဖော်ဝါရီ ၂ လအတွင်း တရားမဝင်ဝင်ရောက်မှုနဲ့ထိုင်းနိုင်ငံမှာ ဖမ်းဆီခံရတဲ့မြန်မာအလုပ်သမားတွေ ၁၀,၀၀၀ နီးပါးရှိတယ်လို့ ထိုင်းနိုင်ငံအခြေစိုက် မြန်မာပြည်သားများအရေးပူးတွဲလှုပ်ရှားမှုကော်မတီကနေ သိရပါတယ်။

#Yangon_Media_Group