#LocalNews
Published - 10 March 2022

ချင်းပြည်နယ်မှ စစ်ဘေးရှောင်လာသည့် လူဦးရေ ၁၅၀ ကျော်အား ကလေးမြို့ပေါ်တွင် လက်ခံစောင့်ရှောက်ပေးထားတယ်လို့ ဒေသခံ လူမှုကူညီရေးအသင်းများထံမှ သိရပါတယ်။

#Yangon_Media_Group

# LocalNews
Published -10 March 2022

၈၈ မျိုးဆက် ကျောင်းသားခေါင်းဆောင် ကိုမြအေးကို ယနေ့ မတ်လ ၁၀ ရက်တွင် ရန်ကုန်တိုင်းဒေသကြီး အင်းစိန်ထောင်တွင်းတရားရုံးမှ ထောင်ဒဏ် (၂)နှစ်ချမှတ်လိုက်ကြောင်း အဆိုပါတရားရုံးအသိုင်းအဝိုင်းက သိရသည်။

"ကိုမြအေးကို မင်္ဂလာတောင်ညွန့်တရားရုံးက အဲဒီအင်းစိန်ထောင်တွင်းတရားရုံးမှာပဲ ၂ နှစ် အပြည့် အမိန့်ချလိုက်ပါတယ်။ချုပ်ရက်ခံစားစေ တဲ့"ဟု အဆိုပါ တရားရုံး အသိုင်းအဝိုင်း နှင့်နီးစပ်သူက YMG ကို ပြောသည်။

၂၀၂၁ ခုနှစ် ဖေဖော်ဝါရီလ ၁ ရက်ကပင် ထိန်းသိမ်းခံထားရသော ကိုမြအေးက အပြစ်မရှိကြောင်း ပြီးခဲ့သည့် ဖေဖော်ဝါရီလ ၁၆ ရက် ရုံးချိန်းတွင် ကိုယ်တိုင်ထုချေခဲ့သေးသည်။

ymg/mt
#Yangon_Media_Group

#LocalNews
Published - 10 Mar 2022
နေ့စဥ်အချိန်ကြာမြင့်စွာမီးပျက်ခြင်းကြောင့် စက်ရုံများလည်ပတ်နိုင်ရေးအတွက်အခြားစွမ်းအင်များဖြင့် အသုံးပြုလည်ပတ်ရတာကြောင့် ရန်ကုန်တိုင်းဒေသကြီးအတွင်းရေသန့်ထုတ်လုပ်ရောင်းချသူများအနေဖြင့် စျေးနှုန်းတိုးမြှင့်ရောင်းချမှုပြုလုပ်ရန်အသိပေးထားကြောင်းသိရပါတယ်။

ထိုသို့ကုန်ကျစရိတ်မြင့်တက်လာမှုနှင့်ပတ်သတ်ပြီး Alpineကုမ္ပဏီကလည်း"အဖက်ဖက်မှတိုးမြှင့်လာသည့် ကုန်ကျစရိတ်များကြောင့် Alpine 20 Litre ရေစျေးနှုန်းအား (၁၅.၃.၂၀၂၂) ရက်နေ့မှစ၍ တစ်ဘူးလျှင် ၁၀၀/-ကျပ် တိုးမြှင့်ရောင်းချမည်ဖြစ်ပါကြောင်း အသိပေးအပ်ပါသည်"လို့ ၎င်းတို့ရဲ့လူမှုကွန်ယက်စာမျက်နှာမှအသိပေးထားပါတယ်။

ရေသန့်ထုတ်လုပ်မှုကုန်ကျစရိတ်နဲ့သယ်ယူပို့ဆောင်ခတွေ မြင့်တက်လာမှုနဲ့ပတ်သတ်ပြီး တောင်ဒဂုံမြို့နယ်ရေသန့်စက်ရုံလုပ်ငန်းရှင်တစ်ဦးကလည်း"အဓိကက လျှပ်စစ်မီးပေါ့ဗျာ။မီးမရတော့အခြားရနိုင်တဲ့ မီးစက်တို့ဘာတို့သုံးရပြီး အရင်ထက်ကုန်ကျစရိတ်တွေကပိုလာတယ်။လုပ်သားစရိတ်ရော တစ်ဖက်က ဓါတ်ဆီစျေးတက်တာရောကြောင့် အရင်က ရပ်ကွက်ထဲ လက်လီဖြန့်ရင် ၂၀လီတာတစ်ဗူး ၅၀၀ ရောင်းတယ် ခုတစ်ရာတက်ပြီး ၆၀၀ရောင်းရတာပေါ့ သယ်ယူဖြန့်ဖြူးတဲ့စရိတ်ကာမိအောင်စျေးတက်ရတဲ့သဘောပါပဲ"လို့ပြောပါတယ်။

ယခုအခါမြို့တွင်းမြို့နယ်များတွင်လည်း အထပ်မြင့်တိုက်ခန်းများအပေါ်သို့ အရောက်ရေသန့်ဖြန့်ဖြူးပေးရာတွင်လည်း ယခင်က ၂၀လီတာ တစ်ဗူးလျှင်ငွေကျပ်၈၀၀ခန့်သာကျသင့်သော်လည်း ယခုအခါငွေကျပ် ၁၀၀၀ထိပေးကာဝယ်ယူအသုံးပြုနေရတယ်လို့သိရပါတယ်။

ymg/hm
#Yangon_Media_Group

#LocalNews
Published_10 March 2022

အင်းစိန် CID သင်တန်းကျောင်းမှ ဒုရဲမှူးကြီးဇော်ဝင်းကို ကို ထောင်သုံးနှစ်ချ၍ ရမည်းသင်းအကျဉ်းထောင်သို့ ယနေ့ မတ်လ ၁၀ ရက်တွင် ပို့ဆောင်လိုက်ကြောင်း ဆရားရုံးနှင့် နီးစပ်သူတစ်ဦးထံမှ သိရသည်။

"ဒီနေ့ရုံးချိန်းမှာက ဒုရဲမှူးကြီး ဇော်ဝင်းကို ပါတယ်။သူက Post ကို Share လုပ်လိုက်လို့ ကောမန့်ရေးလိုက်လို့ ရဲစည်းကမ်းအရ သူ့ကို ထောင်ဒဏ် ၃ နှစ်ချပြီး ရမည်းသင်းကို ဒီနေ့ပို့လိုက်တယ်။ ဒီနေ့ရုံးထုတ်တာကလည်း သူ့ကို ရမည်းသင်း ပို့ဖို့ ရုံးထုတ်လာတာ၊ သူက အဲဒီကောမန့်ရေးတဲ့ အတွက် ၅၀၅(က)နဲ့ ဇဗ္မူသီရိတရားရုံးမှာ မတ်လ ၁၇ ရက်နေ့ ရုံးချိန်းပေးထားတယ်"အဆိုပါ နီးစပ်သူက YMG ကို ပြောသည်။

ဒုရဲမှူးကြီးဇော်ဝင်းကို ကို ပြီးခဲ့သည့် ဖော်ဖော်ဝါရီလ ၈ ရက်က ဖမ်းဆီးခဲ့ပြီး ၅၀၅ (က) နှင့် ရဲစည်းကမ်းဥပဒေတို့ဖြင့် အမှုဖွင့်ခဲ့ခြင်း ဖြစ်ကြောင်း၊ယခုအခါ ရဲစည်းကမ်းဥပဒေအရ အကျဉ်းကျခြင်းဖြစ်ကြောင်းလည်း သိရသည်။

၎င်း၏အမှုအတွက် ပထမဆုံးအကြိမ်အဖြစ် ဖေဖော်ဝါရီလ ၂၄ ရက်တွင် နေပြည်တော်ဇမ္မူသီရိမြို့နယ်တရားရုံး၌ ရုံးထုတ်ခဲ့ခြင်း ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published - 10 March 2022

ဒေါ်အောင်ဆန်းစုကြည်၏ သက်တော်စောင့်ချယ်ရီထက်အတွက် ထွက်ဆိုကြမည့်သက်သေများ ယနေ့ မတ်လ ၁၀ ရက် တွင်လည်း ရောက်မလာကြသည့်အတွက် သက်သေများမရောက်သည့် ရုံးချိန်း ၃ ကြိမ်ရှိပြီဖြစ်ကြောင်း တရားရုံးနှင့် နီးစပ်သည့် အသိုင်းအဝိုင်းက သိရသည်။

"ချယ်ရီထက်က ဒီနေ့ သက်သေနှစ်ယောက်မလာလို့ပါယ်လိုက်တယ်။ ဟုတ်တယ်၊ ချယ်ရီထက်သက်သေတွေ ပါယ်နေတာပဲ ၊မလာနိုင်ဘူးလေ။ ချယ်ရီထက်သက်သေက ထောင်ထဲကလူတွေဖြစ်နေတယ်၊ ထောင်ကျနေတဲ့သူတွေ အကျဉ်းကျနေတဲ့သူတွေ အဲလိုတွေဖြစ်နေတယ်။ ဒါကြောင့် မလာရင် ပါယ်လိုက်တာပေါ့၊ အခုက ၃ ကြိမ် ရှိပြီ ၊ သက်သေဆိုရင် ၆ ယောက်ရှိပြီ။ပါယ်ခံရတာ ၆ ယောက်ပေါ့ ။ နောက်ထပ် ၆ ယောက်လောက်ကတော့ ကျန်သေးတယ်။တောက်လျှောက် သက်သေမလာဘူးဆိုရင် ဘာဖြစ်မလဲဆိုတော့ လျှောက်လဲချက်ပေးပြီး ထောင်ချမှာပေါ့၊ ဒါပဲရှိတာဘဲ "ဟု ရားရုံးနှင့် နီးစပ်သူက YMG ကိုပြောသည်။

ချယ်ရီထက်မှာ လက်ရှိတွင် ရဲစည်းကမ်းထိန်းသိမ်းရေး ဥပဒေဖြင့် ထောင်သုံးနှစ်ချမှတ်ခံထားရသူ ဖြစ်သည်။

၎င်းကို ၂၀၂၂ ခုနှစ် ဇန်နဝါရီလ ၁၃ ရက်က ပုဒ်မ ၅၀၅ (က) အမှုအတွက် အပြစ်ရှိကြောင်းစွဲချက်တင်ခဲ့ကာ ပြီးခဲ့သည့် ဖေဖော်ဝါရီလ ၁၇ ရက် ရုံးချိန်းတွင် ချယ်ရီထက်က မိမိအနေဖြင့် ပြစ်မှုမြောက်စေသည့်ကိစ္စများမလုပ်ခဲ့ကြောင်း သူ့ကိုစွဲဆိုထားသော ဆူပူစေရန်လှုံ့ဆော်မှု ရာဇသတ်ကြီးဥပဒေပုဒ်မ ၅၀၅-က နှင့် ပတ်သက်၍ တရားခွင်တွင် ပြောဆိုခဲ့သည်။

လွန်ခဲ့သော၂၀၂၁ ခုနှစ် ဇွန်လအတွင်းတွင် NLD ပါတီ၏ ဘီးလင်းမြို့နယ် လွှတ်တော်အမတ် ဒေါ်သီရိရတနာက တောတွင်းစခန်းချနေပုံ ၊ လက်နက်ကိုင်ဆောင်ထားသည့်မှတ်တမ်းဓာတ်ပုံများ၊ NUG ၏ သတင်းထုတ်ပြန်ချက်များ ၊ပြည်ပသတင်းဌာနများ၏သတင်းရုပ်သံဖိုင်များ စသည်တို့ကို အပြန်အလှန်ပေးပို့ခဲ့ကြသည်ဆိုကာ ရဲတပ်ဖွဲ့က ချယ်ရီထက်ကို အမှုဖွင့်ခဲ့ခြင်းဖြစ်သည်။

ymg/mt
#Yangon_Media_Group

#LocalNews
Published - 10 March 2022

ကျွန်းလှဗုဒ္ဓတက္ကသိုလ်(KBU)နှင့် ထိုင်းနိုင်ငံမဟာချူလာလောင်ကွန်ရာဇဝိဒလျတက္ကသိုလ်(IBSC)တို့ အကြား ပူးပေါင်းဆောင်ရွက်ရေး ညှိနှိုင်းအစည်းအဝေးကို ဒီကနေ့(မတ်လ ၁၀)ရက်၊ နံနက်ပိုင်းအချိန်မှာ ပြုလုပ်ခဲ့တယ်လို့ သိရပါတယ်။

အဆိုပါ ဆွေးနွေးပွဲသို့ IBEC -ဆရာတော်ဒေါက်တာအရှင်သောဘိတ(အဂ္ဂမဟာသဒ္ဓမ္မဇောတိကဓဇ-ကမ္ဘာ့ငြိမ်းချမ်းရေးသံတမန်) ဦး ဆောင်သောအဖွဲ့ နှင့် ထိုင်းနိုင်ငံမဟာချူလာလောင်ကွန်ရာဇဝိဒလျတက္ကသိုလ်မှ တာဝန်ရှိသူများ တက်ရောက်ခဲ့ကြတာပါ။

ဆွေးနွေးပွဲ ဒုတိယပိုင်းအစီအစဥ်တွင်လည်း ထိုင်းနိုင်ငံရှိ မဟာချူလာလောင်ကွန်တက္ကသိုလ်အကြီးအကဲများဖြင့်တွေ့ဆုံကာ တက္ကသိုလ်နှစ်ခုကြား နားလည်မူစာချွန်လွှာ(MOU)လက်မှတ်ရေးထိုးနိုင်ရေးကိစ္စရပ်များကို ဆက်လက်ဆွေးနွေးသွားကြမှာဖြစ်တယ်လို့ သိရပါတယ်။

ထိုင်းနိုင်ငံသို့ ငြိမ်းချမ်းရေးခရီးစဥ်ကြွချီသွားခဲ့တဲ့ IBEC -ဆရာတော်ဟာ မတ်လ(၇)ရက်နေ့က အဆိုပါနိုင်ငံသို့ရောက်ရှိခဲ့ပြီးမတ်လ(၁၀)ရက်နေ့အထိ နေထိုင်သွားမှာဖြစ်တယ်လို့ ဆိုပါတယ်။

စတော့ဟုမ်းကမ္ဘာ့ငြိမ်းချမ်းရေးဆုရှင် -ကမ္ဘာ့ငြိမ်းချမ်းရေးသံတမန်ရဟန်းတော် IBEC ဆရာတော် ဒေါက်တာအရှင်သောဘိတသည် ဥ ရောပနိုင်ငံများသို့ ငြိမ်းချမ်ရေးခရီးစဥ်အဖြစ် ကြွချီနေတာဖြစ်ပြီး IBEC ဆရာတော်၏ ဥရောပတိုက်နိုင်ငံများ ငြိမ်းချမ်းရေးခရီးစဥ်ဟာ (၁)လတာ ကြာမြင့်ခဲ့တာဖြစ်ပါတယ်။

IBEC ဆရာတော်၏ ဥရောပတိုက်နိုင်ငံများ ငြိမ်းချမ်းရေးခရီးစဥ်အတွင်း မြန်မာပြည်ငြိမ်းချမ်းရေးအတွက် အာဆီယံဒေသတွင်းနှင့် ဥရောပသမဂ္ဂအတွင်း အပြုသဘောဆောင်မူပြရုပ်များကိုဆောင်ရွက်ကြရန် ငြိမ်းချမ်းရေးသတင်းစကားများကိုလည်း ပြောကြားခဲ့တာဖြစ်တယ်လို့ IBEC - သတင်းထုတ်ပြန်ရေးအဖွဲ့ က ထုတ်ပြန်ထားပါတယ်။

ဓါတ်ပုံ - IBEC - သတင်းထုတ်ပြန်ရေးအဖွဲ့။

ymg/kg
#Yangon_Media_Group

#DailyNews
Published - 10 Mar 2022

၁။ ရွှေပြန်ရောင်းသူများနေသောကြောင့် တချို့ဆိုင်များ ငွေကို နေ့ချင်းပြီးမရှင်းနိုင်သည့်အခြေအနေရှိနေ

၂။ ချင်းပြည်နယ်မှစစ်ရှောင်လာသည့် လူဦးရေရာကျော်ကို ကလေးမြို့ရှိ ပုညကုသလအသင်းတွင် လက်ခံစောင့်ရှောက်ထား

၃။ မိုလေဝသ သတင်း

၄။ ဂါဇာဒေသတွင် မီးပျက်ခြင်းကြောင့် ဘတ်ထရီအဟောင်းအပျက်များစုပြုံလာပြီး ကျန်းမာရေးအန္တရာယ်ရှိလာနေ.......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#Local_Health
Published_ 10 March 2022

ကိုဗစ်-၁၉ စတုတ္ထလှိုင်းတွင် ရောဂါဖြစ်ပွားမှုမှာ ဖေဖော်ဝါရီလဆန်းပိုင်းမှစ၍ နေ့စဉ်ပိုးတွေ့မှု သိသာစွာမြင့်တက်လာခဲ့သော်လည်း ယခု မတ်လဆန်းပိုင်းတွင် စတင်ကျဆင်းလာပြီး နေ့စဉ်ရောဂါကြောင့် သေဆုံးမှုမှာလည်း ၀.၁ မှ ၀.၂ ရာခိုင်နှုန်းခန့်သာရှိကြောင်း နစက ကျန်းမာရေးဝန်ကြီး ပါမောက္ခဒေါက်တာ သက်ခိုင်ဝင်းက ကိုဗစ်-၁၉ရောဂါ ကာကွယ်ထိန်းချုပ်ရေး လုပ်ငန်းညှိနှိုင်းအစည်းအဝေးမှာ ပြောကြားခဲ့ပါတယ်။

ကိုဗစ်-၁၉ ရောဂါ စတုတ္ထလှိုင်းအတွင်း ရောဂါဖြစ်ပွားသေဆုံးမှုများကို သုံးသပ်ကြည့်ရာ ရောဂါကြောင့် သေဆုံးသူအများစုဖြစ်သည့် ၉၀ မှ ၉၅ ရာခိုင်နှုန်းခန့်မှာ ကာကွယ်ဆေး အကြိမ်ပြည့်ထိုးနှံမှုမရှိသူများဖြစ်တယ်လို့ ဆိုပါတယ်။

ရောဂါဖြစ်ပွားမှု လျင်မြန်စွာပြန်လည်ကျဆင်းလာခြင်းနှင့် ရောဂါကြောင့်သေဆုံးမှု လျော့ကျရခြင်းတို့မှာ ကိုဗစ်-၁၉ရောဂါ စတုတ္ထလှိုင်းမစတင်မီကတည်းက ကျန်းမာရေးဝန်ကြီးဌာနအနေဖြင့် ရောဂါကာကွယ်၊ထိန်းချုပ်၊ကုသရေးလုပ်ငန်းများကို ကြိုတင်ပြင်ဆင် ဆောင်ရွက်နိုင်ခဲ့ခြင်းနှင့် အသက်(၁၈)နှစ်အထက် ဦးတည်အုပ်စုများတွင် ကာကွယ်ဆေးလွှမ်းခြုံမှု ၆၀ ရာခိုင်နှုန်းကျော်ရရှိအောင် ဆောင်ရွက်ထားရှိခဲ့နိုင်ခြင်း၊ အသက် ၁၂ နှစ်မှ အသက် ၁၈ နှစ်အရွယ် အခြေခံပညာကျောင်းသား၊ကျောင်းသူ ၁.၅ သန်းခန့်အား ကာကွယ်ဆေးအကြိမ်ပြည့် ထိုးနှံနိုင်ခဲ့ခြင်းတို့ကြောင့်ဖြစ်တယ်လို့ ဝန်ကြီးကဆိုပါတယ်။

ကာကွယ်ဆေးများ ပျက်စီးဆုံးရှံးးခြင်းမဖြစ်စေရေးအတွက် အအေးလမ်းကြောင်းမပျက် သိုလှောင်ထားရှိ၍ ပို့ဆောင်ပေးနိုင်ရေး ကြိုတင်ပြင်ဆင်ဆောင်ရွက်ရမှာဖြစ်ပြီး ပုံမှန်ကာကွယ်ဆေးထိုးလုပ်ငန်းများကိုလည်း အရှိန်အဟုန်မြှင့်တင်ဆောင်ရွက်ရန် တိုက်တွန်းခဲ့ပါတယ်။

ယခုကိုဗစ်-၁၉ ရောဂါစတုတ္ထလှိုင်းတွင် တစ်နိုင်ငံလုံးအနေဖြင့် ကိုဗစ်-၁၉ ရောဂါ ဖြစ်ပွား ကူစက်မှုနှင့်သေဆုံးမှုများမှာ ကျဆင်းလျက်ရှိတယ်လို့ ကျန်းမာရေးဝန်ကြီးဌာနရဲ့ နေ့စဉ်ထုတ်ပြန်ချက်များအရ သိရပါတယ်။

တိုင်းဒေသကြီးနှင့် ပြည်နယ်များရှိဆေးရုံများတွင် ကုသရေးလုပ်ငန်းများကို နိုင်နိုင်နင်းနင်းဆောင်ရွက်နိုင်ပြီး အောက်ဆီဂျင်လုံလောက်မှုလည်းရှိတယ်လို့သူကပြောပါတယ်

#ymg_mnn
#Yangon_Media_Group

#Local_News
Published 10 march 2022

ရွှေဘဏ်ရဲ့ (၇)ခုမြောက်ဘဏ်ခွဲဖြစ်တဲ့ နေပြည်တော်ဘဏ်ခွဲကို ဇမ္ဗူသီရိမြို့နယ် သပြေကုန်းပွဲရုံတန်းမှာ မတ်လ(၉)ရက် မနက်ပိုင်းက ဖွင့်လှစ်လိုက်ပါတယ်။

ရွှေဘဏ်ရဲ့ နေပြည်တော်ဘဏ်ခွဲ ဖွင့်လှစ်ပွဲကိုတော့ Chief Executive Officer Mr. Moo Sun နဲ့ Chief Operating Officer ဦးကျော်သက်ဦးတို့က ဖဲကြိုးဖြတ်ဖွင့်လှစ်ပေးခဲ့ပြီး ရွှေဘဏ်ရုံးချုပ်ကတာ၀န်ရှိသူတွေ၊ နေပြည်တော်ဘဏ်ခွဲက တာ၀န်ရှိသူတွေနဲ့ ဖိတ်ကြားထားတဲ့ဧည့်သည်တော်တွေ တက်ရောက်ခဲ့ကြပါတယ်။

ရွှေဘဏ်(ကျေးလက်နှင့်မြို့ပြဖွံဖြိုးရေးဘဏ်)အနေနဲ့ ရုံးချုပ်နှင့် ရုံးချုပ်ဘဏ်ခွဲကို ရန်ကုန်မြို့၊ ကုန်သည်လမ်းနှင့် ပန်းဆိုးတန်းလမ်းထောင့်မှာ ၂၀၁၆ ခုနှစ်၊ ဇန်နဝါရီလ (၁၁) ရက်နေ့က စတင်ဖွင့်လှစ်ခဲ့တာပါ။

လက်ရှိမှာတော့ ရုံးချုပ်နဲ့ နေပြည်တော်ဘဏ်ခွဲ အပါအ၀င် ဘုရင့်နောင်ဘဏ်ခွဲ၊ မန္တလေးဘဏ်ခွဲ၊ ရာဇဓိရာဇ်ဘဏ်ခွဲ၊ ရွှေဂုဏ်သူဘဏ်ခွဲနဲ့ မော်လမြိုင်ဘဏ်ခွဲ စုစုပေါင်း ဘဏ်ခွဲ(၇)ခု ဖွင့်လှစ်ထားပြီးဖြစ်တယ်လို့ သိရပါတယ်။

#Yangon_Media_Group

#WorldPolitics
Published - 10 March 2022
တရုတ်နိုင်ငံနဲ့ ထိုင်ဝမ်ကျွန်းတိုကြား စစ်ပွဲဖြစ်ပွားလာပါက ဘယ်သူပဲနိုင်သည်ဖြစ်စေ ဝမ်းနည်းပူဆွေးနေကြရမှာဖြစ်ပြီး စစ်ရေးပဋိပက္ခဖြစ်ပွားခြင်းကို အတတ်နိုင်ဆုံးရှောင်ရှားနိုင်ခြင်းက အကောင်းဆုံးသာဖြစ်ကြောင်း ထိုင်ဝမ်ကာကွယ်ရေးဝန်ကြီး'ချူကောင်းချန်'က ကြာသပတေးနေ့မှာ သတင်းထောက်တွေကိုပြောကြားခဲ့ပါတယ်။

ယူကရိန်းနိုင်ငံအပေါ် ရုရှားတို့ကျူးကျော်ဝင်ရောက်ခြင်းနဲ့ပတ်သက်ပြီး လုံခြုံရေးဆိုင်ရာကိစ္စရပ်များအကြောင်းဆွေးနွေးမယ့် ပါလီမန်လွှတ်တော်အစည်းအဝေးမတိုင်ခင် ကာကွယ်ရေးဝန်ကြီးကအခုလို ပြောကြားသွားတာဖြစ်ပါတယ်။

တရုတ်နဲ့ထိုင်ဝမ်ကျွန်းတို့ကြား ပဋိပက္ခဖြစ်ပွားလာပါက နှစ်ဘက်စလုံးမှထိခိုက်ပေးဆပ်မှုတွေ ရှိလာမှာဖြစ်ကြောင်း၊ အနိုင်ရရှိတဲ့သူတောင် ဝမ်းနည်းပူဆွေးနေရမှာဖြစ်ကြောင်း 'ချူကောင်းချန်'က ဆိုပါတယ်။

တရုတ်တို့က ထိုင်ဝမ်ကျွန်းကိုပြန်လည်သိမ်းယူဖို့ လိုအပ်ပါကစစ်ရေးအင်အားပါ အသုံးပြုလာမယ်လို့ ကြုံးဝါးထားတာဖြစ်ပါတယ်။ယူကရိန်းမှာစစ်ပွဲဖြစ်ပွားနေကတည်းက ထိုင်ဝမ်တို့ကလည်း တရုတ်နိုင်ငံအပေါ် ပိုမိုသတိထားစောင့်ကြည့်လျက်ရှိပေမယ့် တရုတ်စစ်ရေးလှုပ်ရှားမှုတွေ ပုံမှန်မဟုတ်တာမျိုးမတွေ့ရကြောင်း သတင်းတင်ပို့ထားပါတယ်။
တရုတ်လေတပ်ကတော့ ထိုင်ဝမ်လေကြောင်းကာကွယ်ရေးသတ်မှတ်ဇုန်အတွင်း မကြာခဏဆက်လက်ဝင်ရောက်နေဆဲဖြစ်ပါတယ်။

ထိုင်ဝမ်မှ တရုတ်မူဝါဒဆိုင်ရာပြည်မကြီးရေးရာကောင်စီက ဗုဒ္ဓဟူးနေ့က ပါလီမန်အစည်းအဝေးမှာတင်ပြရာမှာ တရုတ်တို့က နှစ်ကုန်ပိုင်းအတွင်း အဓိကကွန်မြူနစ်ပါတီညီလာခံကို တည်ငြိမ်အေးချမ်းစွာပြုလုပ်နိုင်ဖို့ အလုပ်များနေကြရာ ထိုင်ဝမ်တို့နဲ့တင်းမာမှုများ ရုတ်တရက်မြင့်တက်လာပါတယ်။

ထိုင်ဝမ်စစ်ရေးဗျူဟာမှူးတွေက ယူကရိန်းအပေါ် ရုရှားတို့ကျူးကျော်တိုက်ခိုက်ခြင်းတွေကို လေ့လာကာ အိမ်နီးချင်းအင်အားကြီးတရုတ်တို့ တိုက်ခိုက်လာပါက ထိုင်ဝမ်ကျွန်းမှာ ကိုယ်ပိုင်နည်းဗျူဟာများဖြင့်ခုခံကာကွယ်နိုင်ဖို့ ကြိုးစားနေကြပါတယ်။

ရန်သူရုရှားဘက်က စစ်အင်အားကြီးမားလွန်းပြီး အခွင့်အရေးအသာမရနိုင်တဲ့ကြားက ယူကရိန်းတို့က ရုရှားတို့ရဲ့ကျူးကျော်စစ်ကို ထိထိရောက်ရောက်နှောင့်နှေးအောင် ပြုလုပ်ထားနိုင်ကြောင်း ကာကွယ်ရေးဝန်ကြီးဌာနက ကြာသပတေးနေ့က ပြောကြားထားပါတယ်။

ယူကရိန်းတို သူတို့ရဲ့ပင်မမြေပြင်ကြီးမှာ အရှိန်မြှင့်ခုခံတိုက်ခိုက်နိုင်ခြင်းကို ထိုင်ဝမ်စစ်တပ်ကအတုယူပြီး ထိုင်ဝမ်ရဲ့ကိုယ်ပိုင်နည်းဗျူဟာများဖြင့် မမျှတတဲ့စစ်ပွဲကိုဆင်နွှနိုင်ဖို့ စီစဉ်နေကြပါတယ်။

ယာဉ်တပ်ဒုံးကျည်တွေလိုမျိုး ပိုမိုရွေ့လျားနိုင်အောင်စီစဉ်ပြီး တဖက်ကနေတိုက်ခိုက်ရခက်ခဲအောင်ပြုလုပ်ဖို့ ထိုင်ဝမ်သမ္မတ'ဆိုင်အင်ဝမ်'က မှာကြားထားပါတယ်။

ယူကရိန်းပဋိပက္ခကြောင့် ထိုင်ဝမ်အနေနဲ့သင်ခန်းစာများစွာရထားပြီး ပြင်ဆင်မှုတွေပြုလုပ်ထားကြောင်း 'ချူကောင်းချန်'က ဆိုပါတယ်။တရုတ်နဲ့စစ်ဖြစ်လာလျှင် နိုင်ငံတကာမှအကူအညီတွေ မျှော်လင့်လို့ရနိုင်သလားလို့ မေးမြန်းခဲ့ရာ ကိုယ့်နိုင်ငံကို ကိုယ့်ဘာသာကာကွယ်ရမယ်လို့ ဖြေကြားသွားခဲ့ပါတယ်။

ထိုင်ဝမ်ရေလက်ကြားက ဘယ်တုန်းကမှ လုံခြုံဘေးကင်းတဲ့နေရာမဟုတ်ခဲ့ပါဘူးလို့ လည်း ပြောသွားပါတယ်။

Source: Reuters

#WorldHealth
Published - 10 March 2022
ကမ္ဘာတဝန်းမှာ အိုမီခရွန်မျိုးဗီဇကွဲအလျင်အမြန်ကူးစက်နေတာကြောင့် လူတစ်ယောက်အနေနဲ့ ကိုဗစ်ရောဂါကူးစက်ခံရဖူးတယ်ဆိုရင် ကိုဗစ်ကာကွယ်ဆေးတွေ အားမြှင့်ကာကွယ်ဆေး(booster)တွေထိုးနှံဖို့ လိုအပ်သေးသလားဆိုတာကို အတော်များများကသိချင်နေကြပါတယ်။

ဆေးပညာသီအိုရီတွေအရ ရောဂါကူးစက်ခံရရင် ပဋိပစ္စည်း(antibody)ထွက်ပေါ်ကာ သဘာဝခုခံအားရရှိစေပါတယ်။ဒါပေမဲ့မေးစရာရှိတာက သဘာဝခုခံအားက ကိုဗစ်ကာကွယ်ဆေးနေရာမှာ အစားထိုးပေးနိုင်လား၊ နောက်ထပ်ကိုဗစ်ရောဂါကူးစက်မှုကို ကာကွယ်ပေးနိုင်လား ဆိုတာပါပဲ။

လေ့လာစမ်းသပ်ချက်တွေအရ ကိုဗစ်ကူးစက်ပြီးသားလူတွေလည်း ကာကွယ်ဆေးထိုးသင့်ပြီး ကာကွယ်ဆေးထိုးပြီးသားလူတွေကလည်း အားမြှင့်ကာကွယ်ဆေးထိုးနှံသင့်ပါတယ်။
ကိုဗစ်ရောဂါကူးစက်ခံရပြီးနောက်ပိုင်း ကာကွယ်ဆေးမထိုးရသေးတဲ့လူတွေဟာ ရောဂါကူးစက်ခံရပြီးနောက် ကာကွယ်ဆေးထိုးလိုက်တဲ့သူတွေထက် ရောဂါထပ်မံကူးစက်နိုင်ချေပိုများကြောင်း အမေရိကန်ရောဂါထိန်းချုပ်ကာကွယ်ရေးစင်တာ(CDC)က ဖော်ပြထားပါတယ်။

ကိုဗစ်အားမြှင့်ကာကွယ်ဆေး(booster)က ရောဂါပြင်းထန်စွာဖြစ်ပွားခြင်းကို ကာကွယ်ပေးနိုင်တာကြောင့် ရောဂါကူးစက်ဖူးသူတွေမှာလည်း အားမြှင့်ကာကွယ်ဆေးထိုးနှံသင့်ကြောင်း နိုင်ငံအများအပြားမှ တာဝန်ရှိသူများက အကြံပြုထားပါတယ်။

ကိုဗစ်ရောဂါကူးစက်ခံရခြင်းကြောင့် ဆေးရုံတက်ကုသခံယူခဲ့ရတဲ့ ကာကွယ်ဆေးမထိုးရသေးတဲ့လူတွေဟာ ဖိုင်ဇာ-ဘိုင်အိုတက်ခ်ကာကွယ်ဆေး ၂ ကြိမ်ထိုးထားသူတွေထက်စာရင် ရောဂါထပ်မံကူးစက်နိုင်ချေ ၅ ဆခွဲမျှပိုများနေကြောင်း အမေရိကန် CDC က ပြီးခဲ့တဲ့နိုဝင်ဘာလက ဖော်ပြခဲ့ပါတယ်။

အရင်က SARS-CoV-2 ကူးစက်ခံရဖူးသူတွေထဲမှာ ကာကွယ်ဆေးအပြည့်ထိုးနှံထားခြင်းဖြင့် ရောဂါထပ်မံကူးစက်မှုမဖြစ်ပွားအောင် ထပ်ဆောင်းကာကွယ်ပေးနိုင်ပါတယ်။
ရောဂါကူးစက်ခံရဖူးပြီး ကာကွယ်ဆေးနှစ်ကြိမ်ထိုးထားသူတွေမှာ ရောဂါကာကွယ်နိုင်စွမ်းက ပိုမိုအားကောင်းကာ တာရှည်ခံနိုင်ပြီး ကာကွယ်ဆေးနှစ်ကြိမ်ထိုးအပြီးမှာ ၉၀ ရာခိုင်နှုန်းအထိ ကာကွယ်ပေးနိုင်ပါတယ်။

အဆိုပါကာကွယ်နိုင်စွမ်းက ရောဂါကူးစက်ခံရအပြီး တစ်နှစ်ကျော်အထိတာရှည်ခံနိုင်ကာ ကာကွယ်ဆေးထိုးအပြီးမှာ ၆ လကျော်တာရှည်ခံနိုင်ပါတယ်။

ရောဂါကူးစက်ခံရပြီးရရှိခဲ့တဲ့ သဘာဝခုခံအားကတော့ ၆ လလောက်အထိ ကာကွယ်မှုပေးနိုင်ပါတယ်။၄ လမှ ၆ လကြာပြီးနောက် ခုခံအားကတဖြည်းဖြည်းလျော့ကျလာမှာဖြစ်ပါတယ်။

ဂျွန်ဟော့ကင်းစ်တက္ကသိုလ်လေ့လာချက်အရ mRNA ကာကွယ်ဆေးနှစ်ကြိမ်ထိုးပြီး ရောဂါကူးစက်ခဲ့တဲ့လူတွေမှာ ကာကွယ်ဆေးမထိုးထားဘဲ ရောဂါကူးစက်ခဲ့တဲ့လူတွေထက် ခုခံအားက ပိုမိုကြာရှည်ခံနိုင်ပါတယ်။

ကိုဗစ်ရောဂါဖြစ်ပွားခြင်းမှ ပြန်လည်သက်သာလာတဲ့လူတွေကို ရောဂါပိုးမတွေ့ရှိတော့ကြောင်းအဖြေထွက်ပြီးတဲ့အခါ ကာကွယ်ဆေးထိုးနှံပေးခြင်းဖြင့် ကျန်းမာရေးစောင့်ရှောက်မှုစင်တာတွေမှာ ကူးစက်မှုတွေကိုလျှော့ချနိုင်မှာဖြစ်ကြောင်း CDC က ဆိုပါတယ်။
Source: South China Morning Post

#LocalNews
Published- 10 Mar 2022
ရန်ကုန်တိုင်းဒေသကြီး အတွင်း နေ့စဉ် အချိန်ကြာမြင့်စွာမီးပြတ်တောက်တာကြောင့် သုံးရေ ရရှိရေးအခက်အခဲတွေဖြစ်လာနေတယ်လို့ ပြည်သူတွေဆီကသိရပါတယ်။

တိုင်းဒေသကြီးအတွင်းက ဆင် ခြေဖုံးမြို့နယ်များတဲ့ ဒဂုံမြို့သစ်(တောင်ပိုင်း၊မြောက်ပိုင်း၊အရှေ့ပိုင်းမြို့နယ်)တွေနဲ့ ဒဂုံဆိပ်ကမ်းမြို့နယ်တွေမှာ ရေပေးဝေမှုအချိန်နဲ့ လျှပ်စစ်မီးလာချိန် တိုက်ဆိုင်မှသာရေရှိကြပြီး ရေပေဝေချိန်တွင်လျှပ်စစ်မီးမရရှိတာကြောင့် သုံးရေအခက်အခဲဖြစ်နေတယ်လို့ သိရပါတယ်။

"ရေလာတဲ့အချိန်မှာမီးမရရင် ဘာမှမတတ်နိုင်ဘူးဗျ အစိုးရရေပေးဝေတာဆိုပေမယ့် အိမ်တိုင်းက ရေရဖို့ရေစုပ်စက်အသေးလေးတွေအသုံးပြုနေရတယ် ။ရေက တိုက်ရိုက်ရတာမဟုတ်ဘူးလေ ခုဆိုရင် မီးလာတဲ့အချိန်နဲ့ရေလာတဲ့အချိန် တိုက်ဆိုင်ရင်တောင်ရေရဖို့အလုအယက်မောင်းတာကြောင့် ရေကရတဲ့ နေရာရ မရတဲ့နေရာမရဖြစ်နေတော့ ဝယ်သုံးနေရတယ်"လို့ ဒဂုံမြို့သစ်တောင်ပိုင်းနေသူတစ်ဦးကပြောသည်။

ထို့အပြင်မြို့တွင်းမြို့နယ်များရှိအထပ်မြင့်တိုက်ခန်းတွေအနေနဲ့လည်း သုံးရေရှိဖို့ ခက်ခဲနေပြီး ကိုယ်ပိုင်မီးစက်တွေအသုံးပြုကာ ရေရှိရေး ဆောင်ရွက်နေတာကြောင့် စက်သုံးဆီအတွက် အပိုကုန်ကျစရိတ်တွေရှိလာနေတယ်လို့ သိရပါတယ်။

"အထပ်မြင့်မှာနေတော့ရေကတော့အရေးကြီးလိုအပ်တာပေါ့ချက်ပြုတ်ရေးအတွက်ရေသန်ဗူးဝယ်သုံးလို့ ရပေမယ်အခြားသုံးစရာရေကျတော့ ခက်တယ်လေ ခုတစ်ချို့ နေရာတွေဆိုရင်မီးစက်ရှိတဲ့အိမ်တွေကရေတင်ပြီး ဘေးတိုက်ခန်းတွေကိုဖြန့်ပေးရတယ် ဆီဖိုးတော့ မျှပေးကြတာတော့ မီးလာတဲ့အချိန်ကျတော့လည်းအားလုံးကရေတင်ကြတော့ ရေအားကမကောင်းဘူး "လို့ တာမွေမြိုနယ်နေထိုင်သူဦးသန်းဝင်းကပြောပါတယ်။

ဓာတ်အားတိုးတက်ထုတ်လုပ်နိုင်ဖို့ ထပ်မံတူးဖော်တွေ့ရှိသော တွင်းသစ်နှစ်တွင်းမှ ရေအောက် သဘာဝဓာတ်ငွေ့ပိုက်လိုင်းအသစ်တွေ သွယ်တန်းရန်ရှိတဲ့အတွက် မဂ္ဂါဝပ် ၁၃၀၀ကျော်လျော့နည်းရရှိမယ့်အခြေအနေ ရှိပြီး အဲဒီရက်ပိုင်းအတွင်း အချို့ နေရာတွေမှာ ၂၄နာရီ ဝန်အားလျှော့ချခြင်းတွေရှိလာမယ်လို့ မတ်လ၆ရက်နေ့က လျှပ်စစ်နှင့်စွမ်းအင်ဝန်ကြီးဌာနက အသိပေးပန်ကြားချက် ထုတ်ပြန်ထားပြီကမ်းလွန်ဓာတ်ငွေ့စီမံကိန်းများဖြစ်သော ရတနာ၊ ဇောတိကဖောက်ခွဲဖျက်ဆီးခံခဲ့ရသည့် ဓာတ်အားလိုင်းများကိုလည်း အမြန်ဆုံးပြင်ဆင်၍ ဘီလူးချောင်းရေအားလျှပ်စစ် ဓာတ်အားပေးစက်ရုံများမှ ထွက်ရှိသည့် (၂၂၀) မဂ္ဂါဝပ်ကို ဓာတ်အားစနစ်သို့ ပြန်လည်ပို့ လွှတ်နိုင်ရေး စီမံဆောင်ရွက်နေကြောင်း သိရပါတယ်။

လျှပ်စစ်ဓာတ်အား တိုးမြှင့်ထုတ်လုပ်နိုင်ကိုလည်း စီမံဆောင်ရွက်လျက်ရှိရာ ကျောက်ဖြူ (၁၅၀) မဂ္ဂါဝပ် သဘာဝဓာတ်ငွေ့ သုံးဓာတ်အားပေးစက်ရုံသစ်မှ ဓာတ်အား (၆၀) မဂ္ဂါဝပ်ခန့်ကို ဖေဖော်ဝါရီ ၁၀ ရက်မှစတင်၍ ထပ်တိုးဖြန့်ဖြူးနိုင်ခဲ့ကာ၊ ဇွန်လမှ စတင်၍ အဆိုပါဓာတ်အားပေးစက်ရုံမှ (၁၅၀) မဂ္ဂါဝပ်ထိ ဓာတ်အားတိုးမြှင့် ထုတ်လုပ်နိုင်မှာဖြစ်ကြောင်း နစက လျှပ်စစ်နှင်စွမ်းအင်ဝန်ကြီးဌာနက သတင်းထုတ်ပြန်ထားပါတယ်။

ymg/hm
#Yangon_Media_Group