#LocalNews
Published_12 March 2022

ယနေ့ မတ်လ ၁၂ ရက်မှ မတ်လ ၁၈ ရက်ထိ တစ်ပတ်အတွင်း ရွှေကမ်းလွန်သဘာဝဓာတ်ငွေ့တွင်းသစ်မှ ဓာတ်ငွေ့ချိတ်ဆက်ရယူရေးလုပ်ငန်းလုပ်နေစဉ် လက်ရှိထက်လျှပ်စစ်မီးပြတ်တောက်မှု ပိုလာနိုင်မည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာနက အသိပေးထားသောကြောင့် ယင်းကာလအတွင်းဆက်သွယ်ရေးအခက်အခဲရှိနိုင်ဟု တယ်လီနောမြန်မာက သုံးစွဲသူများထံ အကြောင်းကြားသည်။

"၂၀၂၂ ခုနှစ် မတ်လ ၁၂ ရက်မှ ၁၈ ရက်အတွင်း အချို့နေရာများတွင် လျှပ်စစ်မီးလျော့နည်းသွားမည်ဖြစ်ရာ တယ်လီနောမြန်မာအနေဖြင့်လည်း ဤကာလအတွင်း ဆက်သွယ်ရေးကိစ္စယာယီပြတ်တောက်မှုများ ရှိနိုင်မည်ဖြစ်၍ ယင်းအဆင်မပြေမှုအတွက် တောင်းပန်အပ်ပါသည်"ဟု တယ်လီနော၏ စာတိုတွင် ထည့်သွင်းရေးသားထားသည်။

မိမိတို့အနေဖြင့် လျှပ်စစ်မီးပြတ်တောက်မည့် ဆိုးကျိုးသက်ရောက်မှုများကို အတတ်နိုင်ဆုံး လျှော့ချလုပ်ဆောင်သွားမည်ဖြစ်ကြောင်းလည်း ထည့်သွင်းရေးသားထားသေးသည်။

လျှပ်စစ်နှင့် စွမ်းအင်ဝန်ကြီးဌာနအနေဖြင့် ရွှေကမ်းလွန်စီမံကိန်းတွင် ထပ်မံတူးဖော်တွေ့ရှိသောတွင်းသစ်(၂)တွင်းမှ သဘာဝဓာတ်ငွေ့များကို ရယူသုံးစွဲရန် လက်ရှိပိုက်လိုင်းအတွင်းသို့ ထည့်သွင်းပို့လွှတ်ရန် ရေအောက်ပိုက်လိုင်းဆက်သွယ်ရေးလုပ်ငန်းများ လုပ်ဆောင်နေပြီဖြစ်သောကြောင့် လျှပ်စစ်ဖြန့်ဝေမှု ၃၃၄ မဂ္ဂါဝပ်ခန့် လျော့ကျမည်ဖြစ်ရာ လက်ရှိ လျှပ်စစ်ဓာတ်အားရရှိချိန်ထက် ထပ်မံနည်းသွားမည်ဖြစ်ကြောင်း ထုတ်ပြန်ထားပြီး ဖြစ်သည်။

ymg/mt
#Yangon_Media_Group

#LocalNews
Published - 12 March 2022

မြစ်ကြီးနားမြို့ ၊ အောက်မော်ဖောင်းကျေးရွာ၊နယ်မြေ(၃)တွင် ဒီက နေ့ မတ်လ(၁၂)ရက်၊ နံနက်ပိုင်းအချိန်က မီးလောင်မှုတစ်ခု ဖြစ်ပွားခဲ့တယ်လို့ သိရပါတယ်။

အဆိုပါ မီးလောင်မှုကို မြစ်ကြီးနားခရိုင်မီးသတ်ဦးစီးမှူးရုံးမှ မီးငြှိမ်းသတ်ယာဉ် (၂)စီး၊ ရေသယ်ယာဉ်(၁)စီးတို့ဖြင့် ထွက်ခွာငြှိမ်းသတ်ခဲ့ရတာပါ။

မီးလောင်မှုဟာ နံနက် ၉ နာရီ ၄၇ မိနစ်မှာ စတင်ခဲ့ပြီး နံနက် ၉ နာရီ ၅၇ မိနစ် အချိန်မှာ မီးကိုငြိမ်းသတ်နိုင်ခဲ့တာဖြစ်တယ်လို့ မီးသတ်တပ်ဖွဲ့က ထုတ်ပြန်ထားပါတယ်။

ယင်းမီးလောင်မှုကြောင့် လူနေအိမ်တစ်လုံးဆုံးရှုံးခဲ့ပြီး လူထိခိုက်ဒဏ်ရာရမှုတော့ မရှိခဲ့ဘူးလို့သိရပါတယ်။

Photo - MFSD

ymg/kg
#Yangon_Media_Group

#LocalNews
Published - 12 March 2022

ဒီကနေ့ နံနက်ပိုင်းမှစတင်၍ မြဝတီ - ကော့ကရိတ် အာရှလမ်းမကြီးတွင် တိုက်ပွဲများဖြစ်ပွားနေမှုကြောင့် ကားများပိတ်ဆို့နေပြီး အဆိုပါလမ်းမကြီးကိုလည်း ခေတ္တယာယီပိတ်ထားရတယ်လို့ ဒေသခံများထံမှ သိရပါတယ်။

ဒီကနေ့(မတ်လ ၁၂ ရက်) နံနက်ပိုင်းတွင် မြဝတီ-ကော့ကရိတ် အာရှလမ်းတွင် ကုန်တင်ယာဉ် ၂ စီးနှင့် ခရီးသည်တင်မှန်လုံယာဉ် ၁ စီး စုစုပေါင်းယာဉ် ၃ စီး ပစ်ခတ်မီးရှို့ခံရပြီးနောက် ယာဉ်သွားလာမှုများအား ယနေ့ နေ့လည်ပိုင်းကစလို့ ပိတ်ထားခဲ့တာဖြစ်တယ်လို့ ဆိုပါတယ်။

"မြ၀တီလမ်းအခြေနေ မကောင်းပါဘူး။ကားတွေ မီးရှို့ခံရတယ်ပြောတယ်။ တချို့ကားတွေလည်း ပြန်လှည့် နေကြရတယ်။ အခြေအ နေအသေးစိတ်ကတော့ မသိရသေးဘူး။ တိုက်ပွဲတွေဖြစ်နေတယ်လို့လည်း ပြောပါတယ်။"လို့ မြဝတီမြို့နေ ဒေသခံတစ်ဦးက YMG ကို ပြောပြခဲ့ပါတယ်။

လက်ရှိအခြေအနေများအရ အာရှလမ်းမကြီးတွင် ယာဉ်ဖြတ်သန်းသွားလာမှုတွေကို ခေတ္တပိတ်ထားသောကြောင့် ယာဉ်မောင်းများနှင့် ခရီးသွားပြည်သူများအနေဖြင့် ခိုင်လုံသည့်သတင်းများအားနားစွင့်ပြီး သတိထားသွားလာကြဖို့ကိုလည်း တိုက်တွန်းနှိုးဆော်မှုတွေကို ပြုလုပ်ထားပါတယ်။

အဆိုပါ မြဝတီ - ကော့ကရိတ် အာရှလမ်းမကြီး တောနော်ရေတံအနီးတွင် ဒီကနေ့ မနက် ၈ နာရီကျော်ခန့်က ၁၂ ဘီးကားတစ်စီးနှင့် ကော့နွဲတတားအနီးတွင် ကုန်တင်ယာဉ်တစ်စီးတို့ မီးလောင်ခဲ့တာဖြစ်ပြီး မနက် ၉ နာရီအချိန်ခန့်မှာလည်း ၃ စီးမြောက်အဖြစ် ရွှေစင်စင်္ကြာမှန်လုံယာဉ် ထပ်မံ၍ မီးလောင်မှုဖြစ်ပွားခဲ့တာပါ။

ဒါ့အပြင် ယနေ့ မွန်းလွဲပိုင်းမှာလည်း အဆိုပါလမ်းမကြီးပေါ်တွင် မြဝတီမြို့သို့တက်လာသည့် အိမ်စီးကားငယ်တစ်စီး နှစ်ဖက်ညှပ် ပစ်ခတ်တိုက်ခိုက်ခြင်းခံခဲ့ရတယ်လို့ သိရပါတယ်။

အဆိုပါလမ်းမကြီးတွင် နှစ်ဖက်တပ်တွေရဲ့ စစ်ရေးတင်းမာမှုတွေက မြင့်တက်နေတာဖြစ်တယ်လို့လည်း ယင်းဒေသခံများရဲ့ ပြောပြချက်အရသိရပါတယ်။

Photo - CJ

ymg/kg
#Yangon_Media_Group

#DailyNews
Published - 12 Mar 2022

၁။ စက်သုံးဆီဈေးကြောင့် နယ်ဝေးလူနာပို့ဆောင်ရေး အခက်အခဲဖြစ်လာ

၂။ ပွင့်လင်းရာသီမှာ ငါးမဖမ်းရရာသီဖြစ်လာတာကြောင့် တိကျသည့် ငါးလုပ်ငန်းဆိုင်ရာ သုတေသနများလိုအပ်လာ

၃။ မိုးလေဝသ သတင်း

၄။ ကိုဗစ်ကပ်ရောဂါစတင်ပျံ့ပွားပြီးနောက်ပိုင်း ဆိုးလ်မြို့တွင် BTS အဖွဲ့ ပထမဆုံးအကြိမ်ဖျော်ဖြေပွဲပြန်လည်ကျင်းပနိုင်ခဲ့.......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 12 March 2022

၂၀၂၁ ခုနှစ်၊ ဖေဖော်ဝါရီလ ၁ ရက်နေ့မှစ၍ ဖြစ်ပွားလျက်ရှိသောဖြစ်ရပ်များကြောင့် ယခု ၂၀၂၂ ခုနှစ်၊မတ်လ ၁ ရက် နေ့ အထိ မြန်မာနိုင်ငံတစ်ဝှမ်းတွင် နေရပ်စွန့်ခွာရွှေ့ပြောင်းနေထိုင်ရသူဦးရေ ၅၀၃,၀၀၀ အထိရှိလာတယ်လိ့် UNHCR က ထုတ်ပြန်လိုက်ပါတယ်။

ဒါဟာ ခုနှစ်ရက်တာ ကာလအတွင်း လူဦးရေ ၅ သောင်းကျော်တိုးမြှင့်လာခဲ့ခြင်းဖြစ်တယ်လို့ UNHCR က
ဆိုပါတယ်။

ဒါ့အပြင် အရှေ့မြောက်ပိုင်းဒေသရှိ ကချင်ပြည်နယ် မိုးမောက်မြို့နယ်တွင် လက်နက်ကိုင်တိုက်ပွဲများဖြစ်ပွားမှုကြောင့် လူဦးရေ ၁,၀၀၀ ခန့် နေရပ်စွန့်ခွာရွှေ့ပြောင်းနေထိုင်နေကြရသလို အနောက်မြောက်ပိုင်းဒေသတွင် ဘေးကင်းလုံခြုံမှုအခြေအနေ မတည်ငြိမ်လျက်ရှိပြီး လက်နက်ကိုင်ပဋိပက္ခများ ပြင်းထန်စွာဖြစ်ပွားလျက်သောကြောင့် သီးနှံများရိတ်သိမ်းမှုများနှင့် အခြားသက်မွေးဝမ်းကြောင်းဆိုင်ရာ လုပ်ငန်းများတွင် ပြင်းထန်စွာထိခိုက်နစ်နာဆုံးရှုံးမှုများ ဖြစ်ပွားလျက်ရှိတယ်လို့ UNHCR က ပြောပါတယ်။

ယင်းဖြစ်ရပ်များကြောင့် နေရပ်စွန့်ခွာသူများသည် အစားအစာ၊ ကျန်းမာရေးစောင့်ရှောက်မှုနှင့် အခြားသောအခြေခံလိုအပ်ချက် ဝန်ဆောင်မှုများစသည့်အကူအညီများ အရေးတကြီးလိုအပ်လျက်ရှိပြီး ချင်းပြည်နယ်တွင်လည်း နေရပ်စွန့်ခွာရွှေ့ပြောင်းနေထိုင်ရမှုများ မြှင့်တက်လာလျက်ရှိတယ်လို့ UNHCR က ဆိုပါတယ်။

ဒါကြောင့် ရခိုင်ပြည်နယ်အပါအဝင် ကယားပြည်နယ်၊ကချင်ပြည်နယ်၊ ချင်းပြည်နယ်၊ ရှမ်းပြည်နယ်(တောင်ပိုင်း)တို့ရှိ နေရပ်စွန့်ခွာစခန်းများတွင်နေထိုင်နေသည့် နေရပ်စွန့်ခွာနေထိုင်ရသူအတွက် အရေးပေါ်ပစ္စည်းများ၊ ဆေးဘက်ဆိုင်ရာသုံးနှာခေါင်းစည်းများကို ပံ့ပိုးကူညီပေးသွားမယ်လို့လည်း UNHCR ရဲ့ ထုတ်ပြန်ချက်မှာ ဖော်ပြခဲ့ပါတယ်။

ဓါတ်ပုံ - UNHCR

ymg/kg
#Yangon_Media_Group

#LocalNews
Published - 12 March 2022

အစာအဆိပ်သင့်မှုဖြစ်ပွားပြီး ၄ နှစ်အရွယ်နှင့် ၁၆ နှစ်အရွယ် ကလေးငယ်နှစ်ဦး သေဆုံးခဲ့ရသည့်ဖြစ်စဥ်တစ်ခု ဝမ်းတွင်းမြို့နယ်မှာ ဖြစ်ပွားခဲ့တယ်လို့ သိရပါတယ်။

အဆိုပါဖြစ်စဥ်ဟာ မတ်လ ၁၁ ရက်နေ့က ဖြစ်ပွားခဲ့ခြင်းဖြစ်ပြီး ကလေးငယ်နှစ်ဦးဟာ ဝမ်းတွင်းမြို့နယ်၊မြောက်ဆယ်ရွာကျေးရွာတွင် နေထိုင်ကြသူများဖြစ်ပါတယ်။

"ကလေးတွေက ထန်းရည်အချိုဝယ်သောက်ကြတာလို့ပြောတယ်။ ထန်းရည်ချို ဝယ်သောက်တော့ သူတို့ယူသွားတဲ့ဘူးထဲကို ထန်းရည်ချိုတွေ လှယ်ထည့်ပေးတာပေါ့။ ကလေးငယ်တွေရဲ့ အိမ်ကပြောပြရသလောက်ကတော့ ကလေးတွေယူသွားတဲ့ ဘူးက
မသန့်ဘူးလို့ ပြောပါတယ်။ ဘူးထဲမှာ အဆိပ်ဖြစ်စေနိုင်မယ့် တစ်ခုခုရှိနိုင်မယ်ပေါ့။ အဲ့ဒီလို အစာအဆိပ်သင့်တာလို့ သိရပါတယ်။ မိန်းကလေးက ၄ နှစ်၊ ယောကျ်ားလေးက ၁၆ နှစ် မောင်နှမ တွေပေါ့၊ ကျွန်တော်တို့အသင်းကို အကြောင်းကြားလို့ ကျွန်တော်တို့ အသင်းက သွားရောက်ကူညီဆောင်ရွက်ပေးခဲ့တာဖြစ်ပါတယ်။"လို့ ဝမ်းတွင်းမြို့နယ်ရှိ သန္တိသုခပရဟိတ(နာကူ)အသင်းမှ တာဝန်ရှိသူတစ်ဦးက ပြောပြခဲ့ပါတယ်။

အစားအဆိပ်သင့်မှုဖြစ်ပွားပြီး သေဆုံးခဲ့ရသည့်မောင်နှစ်မနှစ်ဦး၏ (DB)များကိုလည်း ဝမ်းတွင်းရင်ခွဲရုံမှ ကျေးရွာနေအိမ်သို့ သန္တိသုခပရဟိတ(နာကူ)အသင်းမှ ကူညီပို့ဆောင်ပေးခဲ့တယ်လို့လည်း သိရပါတယ်။

Photo - သန္တိသုခပရဟိတ(နာကူ)အသင်း။

ymg/kg
#Yangon_Media_Group

#LocalNews
Published -12 Mar 2022

ရခိုင်ပြည်နယ်အမ်းမြိုနယ်တွင် ယာဉ်အောက်ဘက်ကုန်ပစ္စည်းများထားသိုသည့်အခန်းအတွင်း ကုန်ပစ္စည်းများကြား၌ သိုဝှက် သယ်ဆောင်လာသည့် ဘင်္ဂါလီ ၄ ဦးအား ဖမ်းဆီးရမိခဲ့တယ်လို့ အမ်းမြိုနယ်ရဲတပ်ဖွဲ့မှ သိရပါတယ်။

အမ်းမြို့နယ်၊ ကံမြင့်ကန်ပူးပေါင်းစစ်ဆေးရေးဂိတ်၌ ပူးပေါင်းအဖွဲ့ဝင်များမှ ယာဉ်အဝင်/အထွက်များအား စစ်ဆေးနေစဉ် မတ်လ ၁၁ ရက်နေ့ နံနက်ပိုင်းက စစ်တွေမြို့မှ ရန်ကုန်မြို့သို့ထွက်ခွာလာသော ကျောက်တော်မြို့နယ်၊ ရွာမကျေးရွာနေ ဦးထွန်းထွန်းကျော်(ဘ)ဦးလှကျော်ဇော၊ အသက် ၄၁ နှစ်၊ ရခိုင်/ဗုဒ္ဓ၊ မောင်းနှင်လာပြီး ကျောက်တော်မြို့နယ်၊ မင်းသားတောင်ကျေးရွာ ထွန်းထွန်းဦး(ဘ) ဦးဘတင်၊ အသက် ၃၇ နှစ်၊ ရခိုင်/ဗုဒ္ဓနှင့် မြေပုံမြို့နယ်၊ စံညှင်းကျေးရွာနေ ကျော်စွာ (ဘ)ဦးရွှေလှသိန်း၊ အသက် ၂၈ နှစ်၊ ရခိုင်/ဗုဒ္ဓ၊ ယာဉ်နောက်လိုက်တို့ ၂ ဦး လိုက်ပါလာကာ ခရီးသည်ကျား ၃၀ ဦး၊ မ ၁၅ ဦး၊ ပေါင်း ၄၅ ဦး တင်ဆောင်လာသည့် ''မာန်သစ္စာ'' ခရီးသည်တင် ယာဉ်အား စစ်ဆေးခဲ့ရာယာဉ်အောက်ဘက်ကုန်ပစ္စည်းများထားသိုသည့်အခန်းအတွင်း ကုန်ပစ္စည်းများကြား၌ သိုဝှက်သယ်ဆောင်လာသည့် ဘင်္ဂါလီ ၄ ဦးအား ဖမ်းဆီးရမိခဲ့ကြောင်း သိရှိရပါတယ်။

ဖမ်းဆီးရမိ ဘင်္ဂါလီများအားမေးမြန်းချက်အရ ၎င်းတို့သည် မလေးရှားနိုင်ငံသို့ရောက်ရှိနေသော ဆွေမျိုးများမှ စစ်တွေရှိလူပွဲစားတစ်ဦးထံ မလေးရှားရောက်ပါက သိန်း ၃၀ ပေးမည်ဖြစ်ကြောင်း ချိတ်ဆက်ပေးမှုကြောင့် လိုက်ပါလာစဉ်ဖမ်းဆီးခံရခြင်းဖြစ်ကြောင်းနှင့် ဖမ်းဆီးရမိယာဉ်မောင်းဖြစ်သူအား စစ်ဆေးချက်အရ ဘင်္ဂါလီများအား ရန်ကုန်မြို့သို့ ပို့ဆောင်ပေးမည်ဆိုပါ တစ်ဦးလျှင် ၁၁ သိန်းစီ ပေးမည်ဖြစ်ကြောင်းပြောဆိုခဲ့ရာ ၎င်းမှသဘောတူခဲ့သဖြင့် ခေါ်ဆောင်လာခြင်းဖြစ်ကြောင်း စစ်ဆေးပေါ်ပေါက်ခဲ့တယ်လို့ သိရပါတယ်။

ဖမ်းဆီးရမိ ဘင်္ဂါလီ ၄ ဦးအား လဝကအက်ဥပဒေ-၆(၂)/၆(၃)ဖြင့် အမှုဖွင့်အရေးယူနိုင်ရေးဆောင်ရွက်လျက်ရှိပြီး ယာဉ်မောင်းနှင့် ယာဉ် နောက်လိုက်တို့အား ရာဇသတ်ကြီးပုဒ်မ-၃၆၇ ဖြင့် အမှုဖွင့်လှစ်ခဲ့ပြီး အရေးယူနိုင်ရေးဆောင်ရွက်လျက်ရှိတယ်လို့ သိရပါတယ်။

ymg/hm
#Yangon_Media_Group

#WorldPolitics
Published 12 March 2022

အိန္ဒိယနိုင်ငံမှ ာဒီအပတ်အတွင်း လက်နက်ထိန်းသိမ်းစစ်ဆေးမှုများပြုလုပ်စဉ် နည်းပညာပိုင်းချို့ယွင်းမှုတစ်ခုဖြစ်ခဲ့ကာ ဒုံးကျည်တစ်ခု မတော်တဆပစ်လွှတ်မိပြီး ပါကစ္စတန်နိုင်ငံထဲသို့ကျရောက်ခဲ့ကြောင်း အိန္ဒိယတို့က သောကြာနေ့မှ ာထုတ်ပြန်ကြေညာလိုက်ပါတယ်။

ဆန္ဒပြမှုတွေကို ကိုင်တွယ်ဖြေရှင်းဖို့ ပါကစ္စတန်တို့က အိန္ဒိယသံတမန်ကိုဆင့်ခေါ်ခဲ့ပြီးနောက် အခုလိုအဖြစ်အပျက်ဖြစ်ပွားခဲ့ခြင်းဖြစ်ပါတယ်။

နျူကလီးယားလက်နက်ပိုင်အိမ်နီးချင်းနိုင်ငံတွေအနေနဲ့ လက်နက်စမ်းသပ်မှုမှားယွင်းတွက်ချက်မိကာ မတော်တဆပစ်ခတ်မိခြင်းဖြစ်ပွားနိုင်တဲ့အန္တရာယ်တွေကို စစ်ဘက်ဆိုင်ရာကျွမ်းကျင်ပညာရှင်တွေက သတိပေးခဲ့ဖူးပါတယ်။

မတော်တဆလက်နက်ပစ်လွှတ်မိခဲ့တာကြောင့် စစ်ပွဲ ၃ ခုဖြစ်ပွားခဲ့ဖူးကာ ကက်ရှ်မီးယားဒေသအငြင်းပွားမှုကိစ္စအတွက်လည်း လက်နက်ကိုင်အဖွဲ့အစည်းတွေကြား မကြာခဏဆိုသလို ပဋိပက္ခတွေဖြစ်ပွားနေခဲ့ပါတယ်။

အခုနောက်ပိုင်းလများအတွင်း ပဋိပက္ခတင်းမာမှုတွေလျော့ကျလာတဲ့အချိန်မှာပဲ အိန္ဒိယတို့ ဒုံးကျည်မတော်တဆပစ်လွှတ်မိခြင်းက လုံခြုံရေးကိစ္စရပ်များနဲ့ပတ်သက်ပြီး မေးခွန်းထုတ်စရာဖြစ်လာပါတယ်။

"၂၀၂၂ ခုနှစ် မတ်လ ၉ ရက်နေ့မှာ လက်နက်ပစ္စည်းများ ပုံမှန်စစ်ဆေးရေးပြုလုပ်နေစဉ် နည်းပညာပိုင်းချို့ယွင်းမှုဖြစ်ခဲ့ပြီး ဒုံးကျည်မတော်တဆပစ်လွှတ်မိခဲ့ပါတယ်" လို့ အိန္ဒိယကာကွယ်ရေးဝန်ကြီးဌာနက ဖော်ပြခဲ့ပါတယ်။

"မတော်တဆထွက်သွားတဲ့ဒုံးကျည်က ပါကစ္စတန်နယ်မြေတစ်ခုသို့ ကျရောက်ခဲ့တယ်လို့ သိရှိရပါတယ်။ ဒီအဖြစ်အပျက်အတွက် အလွန်စိတ်မကောင်းဖြစ်ရပါတယ်။ ဒါပေမယ့် လူတစ်ဦးမျှ ထိခိုက်သေဆုံးခြင်းမရှိတဲ့အတွက် စိတ်သက်သာရာရခဲ့ပါတယ်" လို့ ဖော်ပြထားပါတယ်။

အစိုးရက ဒီအဖြစ်အပျက်ကို အလွန်အလေးထားပြီး သေသေချာချာစုံစမ်းစစ်ဆေးသွားမှာဖြစ်ကြောင်း ကာကွယ်ရေးဝန်ကြီးဌာနက ပြောကြားလိုက်ပါတယ်။

အိန္ဒိယဘက်ကကျလာတဲ့ဒုံးကျည်ဟာ မြို့တော်အစ္စလာမာဘက်ဒ်နဲ့ ၅၀၀ ကီလိုမီတာအကွာအဝေးရှိ အရှေ့ပိုင်းမြို့မီယန်ချန်နူသို့ အထိအခိုက်မရှိဘဲကျရောက်ခဲ့ကြောင်း ပါကစ္စတန်မှတာဝန်ရှိသူများက ပြောကြားခဲ့ပါတယ်။

ပါကစ္စတန်နိုင်ငံအတွင်း ဆန္ဒပြမှုတွေက လေကြောင်းသွားလာရေးကိစ္စတွေကို အကြောင်းမဲ့နှောင့်ယှက်ထိပါးလာသလိုဖြစ်ပြီး လေကြောင်းခရီးစဉ်တွေနဲ့ ခရီးသည်တွေရဲ့အသက်အန္တရာယ်ကို ထိခိုက်လာနိုင်တယ်လို့ ပါကစ္စတန်ကယူဆထားပါတယ်။

အဆိုပါဆန္ဒပြမှုများကို တာဝန်ယူကိုင်တွယ်ဖြေရှင်းဖို့ ပါကစ္စတန်နိုင်ငံခြားရေးရုံးက အိန္ဒိယမှတာဝန်ခံကို အစ္စလာမာဘက်ဒ်ထံသို့ ဖိတ်ခေါ်ထားတာဖြစ်ပါတယ်။

အိန္ဒိယအနေနဲ့ မသိချင်ယောင်ဆောင်နေပါက ဖြစ်လာမယ့်အကျိုးဆက်တွေကိုသိရှိထားဖို့လိုပြီး နောက်တစ်ခါဒီလိုအကြမ်းဖက်ခြင်းတွေဖြစ်မလာအောင် ကြိုတင်ပြင်ဆင်ထားဖို့ ပါကစ္စတန်က အိန္ဒိယကိုသတိပေးလိုက်ပါတယ်။

အိန္ဒိယတို့ဘက်က အစ္စလာမာဘက်ဒ်သို့ မတော်တဆဒုံးကျည်ပစ်လွှတ်မိခြင်းကို ချက်ချင်းအကြောင်းကြားဖို့ပျက်ကွက်ခဲ့တာဟာ အလွန်ကိုတာဝန်မဲ့တဲ့လုပ်ရပ်ဖြစ်ကြောင်း ပါကစ္စတန်နိုင်ငံလုံခြုံရေးအကြံပေးအရာရှိ 'မိုအက်ဒ်ယူဆက်ဖ်'က အပြစ်တင်လိုက်ပါတယ်။

"ဒုံးကျည်ပစ်ခတ်မှုက မတော်တဆဖြစ်တာလား ဒါမှမဟုတ် ရည်ရွယ်ချက်ရှိရှိပစ်ခတ်တာလားဆိုတာကို သိရှိအောင် စုံစမ်းစစ်ဆေးသွားရပါမယ်" လို့ 'ယူဆက်ဖ်'က တွစ်တာမှာဖော်ပြထားပါတယ်။

စစ်ဘက်ဆိုင်ရာအရေးနဲ့တောင်အာရှရေးရာ ကျွမ်းကျင်ပညာရှင်'အိုက်ရှာဆစ်ဒီကာ'က အိန္ဒိယ-ပါကစ္စတန်အရေးကို ဘေးအန္တရာယ်အနည်းဆုံးဖြစ်အောင်ဆောင်ရွက်သင့်ကြောင်း အကြုံပြုထားပါတယ်။

"နှစ်နိုင်ငံစလုံးက နျူကလီးယားလက်နက်ထိန်းချုပ်ရေးမှာ ယုံကြည်ချက်ရှိနေပေမယ့် ဒီလိုမတော်တဆမျိုးထပ်မံဖြစ်ပွားပြီး နောက်ဆက်တွဲဆိုးကျိုးတွေဖြစ်လာမှာ စိုးရိမ်ရပါတယ်"

Source: Reuters
#Yangon_Media_Group

#WorldHealth
Published - 12 March 2022
အရေပြားအောက်သွေးကြောထိခိုက်ကာ ဖောထွက်ရောင်ကိုင်းခြင်းများအတွက် အသုံးပြုလေ့ရှိတဲ့ဆေးဟာ ဓာတ်ခွဲခန်စမ်းသပ်ချက်များအရ ကိုဗစ်ရောဂါကုသရာမှာထိရောက်မှုရှိကြောင်း သုတေသနပညာရှင်များက ပြောကြားလိုက်ပါတယ်။

ဂျပန်နိုင်ငံ တာကီဒါ(Takeda)ဆေးဝါးကုမ္ပဏီမှ Firazyr အမှတ်တံဆိပ်ဖြင့်ထုတ်လုပ်ရောင်းချတဲ့ Icatibant ဆေးဟာ bradykinin receptor b2 ပရိုတိန်းကို ပိတ်ဆို့တားဆီးပေးပါတယ်။

အဆိုပါပရိုတိန်းကို ဆဲလ်မျက်နှာပြင်များပေါ်ရှိ ACE2 ပရိုတိန်းတွေက ထိန်းညှိပေးထားတာဖြစ်ပြီး ကိုရိုနာဗိုင်းရပ်စ်ကူးစက်ဝင်ရောက်လာနိုင်တဲ့နေရာဖြစ်ပါတယ်။

လတ်တလောကိုဗစ်ရောဂါကူးစက်ထားတဲ့လူနာတွေမှ နှာခေါင်းတွင်းဆဲလ်တွေကို လေ့လာဆန်းစစ်ကြည့်ရာမှာ Icatibant ဆေးပေးခြင်းဖြင့် bradykinin receptor b2 ပမာဏမြင့်တက်လာကာ ဗိုင်းရပ်စ်ပိုးဖြတ်သန်းလာနိုင်တဲ့ပရိုတိန်းကို တားဆီပေးပြီး အသက်ရှူလမ်းကြောင်းမှဆဲလ်တွေကို ကိုရိုနာဗိုင်းရပ်စ်ကူးစက်ခြင်းမှ ကာကွယ်ပေးတာကို တွေ့ရှိခဲ့ကြပါတယ်။

Icatibant ဆေးက ဗိုင်းရပ်စ်ပမာဏကို ၉၀ ရာခိုင်နှုန်းကျော်လောက်အထိ လျော့နည်းစေပြီး SARS-CoV-2 ဗိုင်းရပ်စ်ကူးစက်ခြင်းကြောင့် အသက်ရှူလမ်းကြောင်းဆဲလ်တွေသေဆုံးခြင်းမှ ကာကွယ်ပေးနိုင်တာကို အံ့အားသင့်လောက်ဖွယ်ရာ တွေ့ရှိခဲ့ကြောင်း မြူးနစ်နည်းပညာတက္ကသိုလ်မှ'အဒမ်ချာကာ'က ပြောကြားလိုက်ပြီး မော်လီကျူးဆေးပညာဂျာနယ်မှာ ဖော်ပြခဲ့ပါတယ်။

Icatibant က ဇီဝဓာတုလမ်းကြောင်းအမျိုးမျိုးကို အသုံးပြုပြီး စတီးရွိက်တွေထက် အသက်ရှူလမ်းကြောင်းကို ပိုမိုကာကွယ်ပေးနိုင်တယ်လို့ ဖော်ပြခဲ့ကြပါတယ်။

ဓာတ်ခွဲခန်းစမ်းသပ်ချက်တွေအရ icatibant ဆေးတွေကို ကြိမ်ဖန်များစွာအသုံးပြုခြင်းကတော့ ကိုရိုနာဗိုင်းရပ်စ်ကူးစက်မှုကို လုံးဝရပ်တန့်စေနိုင်မှာမဟုတ်ပေမယ့် ရောဂါပြင်းထန်မှုကိုတော့ လျှော့ချပေးနိုင်ပါတယ်။

icatibant ဆေးအသုံးပြုခြင်းဖြင့် ကိုဗစ်ရောဂါလူနာတွေမှာ ကောင်းကျိုးတချို့ရရှိနိုင်မယ်လို့ အကြံပြုလာကြပါတယ်။ရောဂါပြင်းထန်နိုင်တဲ့လူနာတွေမှာ icatibant ဆေးပေးပြီး ရောဂါကူးစက်မှုအစောပိုင်းအချိန်အတွင်း ကုသပေးလို့ရမလားဆိုတာကို စမ်းသပ်လေ့လာသွားမှာဖြစ်ကြောင်း 'ချာကာ'ကပြောကြားခဲ့ပါတယ်။
Source: Reuters

#WorldHealth
Published - 12 March 2022
မိုဒါနာ(Moderna)ကုမ္ပဏီကထုတ်တဲ့ လက်ရှိကိုဗစ်ကာကွယ်ဆေးနဲ့ အိုမီခရွန်မျိုးဗီဇကွဲကိုကာကွယ်နိုင်တဲ့နည်းပညာအားပေါင်းစပ်ကာ ထုတ်လုပ်လိုက်တဲ့ကိုဗစ်အားမြှင့်ကာကွယ်ဆေး(booster)ကို စတင်စမ်းသပ်နေပြီဖြစ်ကြောင်း မိုဒါနာကုမ္ပဏီကကြေညာလိုက်ပါတယ်။

ကြာသပတေးနေ့က ပထမဦးဆုံးတစ်ယောက်ကို စမ်းသပ်ထိုးနှံခဲ့ပြီဖြစ်တယ်လို့ ဖော်ပြခဲ့ပါတယ်။အမေရိကန်နိုင်ငံရှိ နေရာ ၂၀ နေရာတို့မှာ လူပေါင်း ၃၇၅ ဦးကိုစမ်းသပ်ဖို့ မိုဒါနာကစီစဉ်ထားပါတယ်။

စမ်းသပ်ထိုးနှံမယ့်သူတွေဟာ အသက် ၁၈ နှစ်နဲ့အထက်ရှိသူတွေဖြစ်ပြီး မိုဒါနာကာကွယ်ဆေး ၂ ကြိမ်ထိုးပြီးသူတွေအပြင် အနည်းဆုံးလွန်ခဲ့တဲ့ ၃ လက မိုဒါနာအားမြှင့်ကာကွယ်ဆေးထိုးထားတဲ့သူတွေလည်း ပါဝင်ပါတယ်။

အိုမီခရွန်မျိုးဗီဇကွဲဟာ ယခုနှစ်အစပိုင်းမှာ ကူးစက်မှုအလွန်မြင့်တက်ခဲ့ပြီးနောက် လတ်တလောမှာတော့ ကူးစက်မှုလျော့နည်းနေပြီဖြစ်ပါတယ်။ဖိုင်ဇာကထုတ်တဲ့ အသိအမှတ်ပြုကိုဗစ်ကာကွယ်ဆေးကို အိုမီခရွန်ကူးစက်မှုကိုကာကွယ်နိုင်မယ့် နည်းပညာနဲ့ပေါင်းစပ်ကာ ဖိုင်ဇာပေါင်းစပ်ကာကွယ်ဆေးကိုလည်း စမ်းသပ်လေ့လာနေပြီဖြစ်ပါတယ်။
နယူးယော့ခ်မှာ နံနက် ၁၀ နာရီ ၄၀ မိနစ်က ရှယ်ယာတန်ဖိုး ၄.၃ ရာခိုင်နှုန်းကျဆင်းခဲ့ပြီး နှစ်အစတည်းကဆိုရင် ၄၆ ရာခိုင်နှုန်းအထိ ကျဆင်းနေခဲ့တာဖြစ်ပါတယ်။

Source: Bloomberg

#WorldWildlife
Published 11 March 2022

တောရိုင်းတိရိစ္ဆာန်တွေထဲမှာ မျိုးသုဉ်းပျောက်ကွယ်မယ့်အန္တရာယ်နဲ့ ကြုံတွေ့နေရတဲ့ အလွန်ရှားပါးတောဆိတ်သတ္တဝါများကိုကယ်ဆယ်ရန်အစီအစဉ်များဖြင့် ဆောင်ရွက်လျက်ရှိရာ ကင်ညာတောင်အောက်ရှိ သဘာဝဘေးမဲ့တောထဲသို့ ဘွန်ဂိုတောဆိတ်တွေကို ပထမဆုံးအကြိမ်လွှတ်ပေးခဲ့ပါတယ်။

#Yangon_Media_Group

Published 11 March 2022

အမေရိကန်နိုင်ငံမှာ နှစ်ပေါင်းလေးဆယ်အတွင်း ငွေကြေးဖောင်းပွမှု စံချိန်တင်မြင့်မားနေတဲ့အတွက် တစ်ပတ်ရစ်ကားဟောင်းတွေဟာ ကားသစ်တွေထက်တောင် ဈေးကြီးတဲ့အထိ ဈေးတွေတက်နေပါတယ်။

တမ်ပါမြို့မှာဆိုရင် တစ်ပတ်ရစ်ကားတွေထဲက ၁၀နှစ်သက်တမ်းလောက်ရှိတဲ့ကားတွေဟာ ကားသစ်တွေနီးပါးလောက် ဈေးမြင့်နေပါတယ်။ ပြီးခဲ့တဲ့နှစ်မှာ တစ်ပတ်ရစ်ကားတွေရဲ့ဈေးတွေဟာ ၄၀ရာခိုင်နှုန်းကျော်မြင့်တက်လာနေပါတယ်။

Source CMG