#WorldPolitics
Published - 11 March 2022
အနောက်အုပ်စုက ရုရှားနိုင်ငံအပေါ် ဒဏ်ခတ်ပိတ်ဆို့ခြင်းများချမှတ်ခဲ့ရာ ထိုကဲ့သို့အရေးယူပိတ်ဆို့မှုများကြောင့် အစားအစာကုန်ဈေးနှုန်းနဲ့ လောင်စာဆီဈေးနှုန်းမြင့်တက်လာကာ အနောက်နိုင်ငံများအပေါ် တန်ပြန်သက်ရောက်လာမှာဖြစ်ကြောင်း ရုရှားသမ္မတ'ဗလာဒီမီယာပူတင်'က ကြာသပတေးနေ့ကပြောကြားခဲ့ပါတယ်။

ဒါ့အပြင် ရုရှားတို့အနေနဲ့ ပြဿနာကိစ္စရပ်များကို ကိုယ်တိုင်ဖြေရှင်းပြီး ပိုမိုအင်အားကြီးထွားတဲ့နိုင်ငံဖြစ်လာမယ်လို့ ဆိုခဲ့ပါတယ်။ယူကရိန်းကို အထူးစစ်ရေးဆောင်ရွက်ချက်များပြုလုပ်ခြင်းမှာလည်း အခြားရွေးချယ်စရာလမ်းမရှိကြောင်း၊ ခဏတာစီးပွားရေးပြေလည်မှုနှင့် နိုင်ငံရဲ့အချုပ်အခြာအာဏာကို အပေးအယူဘယ်တော့မှလုပ်မှာမဟုတ်ကြောင်း အခိုင်အမာပြောသွားပါတယ်။

"ဒီဒဏ်ခတ်ပိတ်ဆို့မှုတွေက ဘယ်လိုပဲဖြစ်ဖြစ်ချမှတ်လာကြမှာပါ။ အဲဒါကြောင့် ပြဿနာအခက်အခဲတွေ ရှိလာမှာပါပဲ။ ဒါပေမဲ့ အရင်ကဒီပြဿနာတွေကို ကျော်လွှားခဲ့ပြီဖြစ်ပြီး အခုလည်း ကျော်လွှားသွားဦးမှာပါ။ နောက်ဆုံးကျရင် ရုရှားက ကိုယ်ပိုင်အချုပ်အခြာအာဏာဖြင့် အမှီအခိုမရှိဘဲ ကိုယ်ပိုင်ရပ်တည်နိုင်တဲ့နိုင်ငံဖြစ်လာမှာပါ" လို့ ရုရှားအစိုးရအဖွဲ့အစည်းအဝေးမှာ ပြောကြားသွားပါတယ်။

ရုရှားတပ်ဖွဲ့တွေ ယူကရိန်းစတင်ကျူးကျော်ပြီး ၂ ပတ်အကြာမှာ ရုရှားအစိုးရအဖွဲ့အစည်းအဝေးကို အွန်လိုင်းဗီဒီယိုကနေ ဆွေးနွေးခဲ့ကြတာဖြစ်ပါတယ်။
အနောက်နိုင်ငံတွေရဲ့ ဒဏ်ခတ်ပိတ်ဆို့မှုတွေကြောင့် ရုရှားတို့ရဲ့ဘဏ်တွေ၊ စီးပွားလုပ်ငန်းတွေ၊ ရုရှားခရိုနီလုပ်ငန်းရှင်တွေအနေနဲ့ စီးပွားရေးအကြပ်အတည်းရှိလာပြီး ဒီပြဿနာတွေကိုကြံ့ကြံ့ခံနိုင်ဖို့ တိုက်တွန်းမှာကြားတဲ့သဘောဖြစ်ပါတယ်။

အမေရိကန်တို့က ရုရှားမှရေနံဝယ်ယူမှုကို ပိတ်ပင်ထားတဲ့အပြင် အရေးယူပိတ်ဆို့မှုတွေကျယ်ကျယ်ပြန့်ပြန့် လုပ်ဆောင်လာတာကြောင့် ရုရှားတို့ရဲ့စီးပွားရေးခက်ခဲလာပေမယ့် စာချုပ်ပါအချက်အလက်တာဝန်များအတိုင်း ဥရောပကိုရေနံများ ဆက်လက်တင်ပို့သွားမယ်လို့ ပူတင်ကဆိုပါတယ်။

ဥရောပရဲ့သဘာဝဓာတ်ငွေ့သုံးစွဲမှု ၃ ပုံ ၁ ပုံကို ရုရှားတို့က အဓိကထောက်ပံ့နေတာဖြစ်ပါတယ်။"အမေရိကန်ဈေးကွက်မှာ ရုရှားလောင်စာဆီတင်သွင်းခွင့်မပြုတော့ဘူးလို့ သူတို့ဘက်ကကြေညာထားပါတယ်။ ဈေးနှုန်းတွေတက်၊ ငွေကြေးဖောင်းပွမှုတွေ အလွန်မတန်စံချိန်တင်မြင့်မားလာပါပြီ။ သူတို့ပြုလုပ်တဲ့အမှားတွေရဲ့အကျိုးဆက်ကို ကျွန်တော်တို့အပေါ်အပြစ်တင်ဖို့ လုပ်နေကြတယ်။ ဒါကကျွန်တော်တို့နဲ့ ဘာမှမဆိုင်တော့ပါဘူး" လို့ 'ပူတင်'က ပြောကြားခဲ့ပါတယ်။

ရုရှားတို့ကလည်း အနောက်အုပ်စုအပေါ်တုန့်ပြန်ပိတ်ဆို့တဲ့အနေနဲ့ ဆက်သွယ်ရေးပစ္စည်း၊ ဆေးဝါး၊ မော်တော်ယာဉ်၊ စိုက်ပျိုးရေးပစ္စည်း၊ အီလက်ထရွန်နစ်နဲ့နည်းပညာအပြင် အခြားပစ္စည်းတွေကို ၂၀၂၂ မကုန်ခင်အထိ တင်ပို့ခြင်းကိုပိတ်ပင်ထားကြောင်း ရုရှားအစိုးရအဖွဲ့က ကြေညာခဲ့ပါတယ်။

တင်ပို့ခြင်းပိတ်ပင်ထားတဲ့ပစ္စည်းများစာရင်းမှာ မီးရထားတွဲများ၊ ကွန်တိန်နာများ၊ တာဘိုင်များနဲ့ အခြားပစ္စည်းတွေပါဝင်ပြီး စုစုပေါင်းအားဖြင့် အမျိုးအစား ၂၀၀ ကျော်ခန့်ပါဝင်နေပါတယ်။

နိုင်ငံရပ်ခြားမှကုန်ပစ္စည်းတွေကို လူတွေအသုံးပြုချင်ကြတာကိုနားလည်ပေမယ့် စိတ်အေးအေးထားပြီး ဒီအခက်အခဲတွေကိုဖြေရှင်းသွားနိုင်မယ်လို့ 'ပူတင်'ကယုံကြည်နေပါတယ်။

ရုရှားတို့က စိုက်ပျိုးရေးဓာတ်မြေဩဇာတွေ အဓိကထုတ်လုပ်တဲ့နေရာဖြစ်တာကြောင့် ရုရှားကိုအခက်အခဲဖြစ်အောင်ပြုလုပ်ပါက ကမ္ဘာ့အစားအသောက်ဈေးကွက်မှာ ဆိုးကျိုးတွေမလွဲမသွေသက်ရောက်လာမှာဖြစ်ကြောင်း 'ပူတင်'ကမှတ်ချက်ပြုလိုက်ပါတယ်။

ရုရှားနိုင်ငံရဲ့ စားနပ်ရိက္ခာဖူလုံမှုရှိကြောင်း စိုက်ပျိုးရေးဝန်ကြီးက အစည်းအဝေးပွဲမှာအတည်ပြုလိုက်ပါတယ်။အနောက်နိုင်ငံရဲ့ဒဏ်ခတ်ပိတ်ဆို့မှုတွေက ရုရှားတို့ရဲ့ ရွှေနဲ့နိုင်ငံခြားငွေထိန်းသိမ်းထားရှိမှုတို့ကို ရပ်ဆိုင်းသွားစေတာကြောင့် နိုင်ငံခြားကုန်သွယ်မှုတွေ ပြုလုပ်လို့မရတော့ပါဘူး။

ဒီလိုအခြေအနေတွေကိုဖြေရှင်းဖို့ ရုရှားကိုယ်ပိုင်ဘဏ္ဍာရေးစနစ်တည်ငြိမ်အောင် ဦးစားပေးဆောင်ရွက်ရမှာဖြစ်ကြောင်း ရုရှားဘဏ္ဍာရေးဝန်ကြီး'အန်တွန်ဆီလူအာနော့ဗ်'က အကြံပြုသွားပါတယ်။
Source: Reuters

#LocalNews
Published 11 March 2022

မုံရွာမြို့ ၊ ဇလုပ်ကျေးရွာ၊ ကျောက္ကာ ဆီဆိုင်တန်းတွင် ဒီကနေ့(မတ်လ ၁၁ ရက်)၊ နံနက်ပိုင်းအချိန်က မီးလောင်မှုတစ်ခု ဖြစ်ပွားခဲ့တယ်လို့ သိရပါတယ်။

အဆိုပါ မီးလောင်မှုဟာ ဒီကနေ့ နံနက် ၇ နာရီကျော်အချိန်က စတင်ခဲ့တာဖြစ်ပြီး မီးသတ်တပ်ဖွဲ့ဝင်များနှင့် ဒေသခံလူမှုရေးအသင်းအဖွဲ့ဝင်တွေက အချိန်တစ်နာရီကြာ ကြိုးစားငြိမ်းသတ်ခဲ့ရတာဖြစ်ပါတယ်။

"သူက ဆီဆိုင်တန်း တွေပဲပေါ့ ဘယ်ကစလောင်လဲဆိုတာတော့ မသိရသေးဘူး။ သူက လူနေအိမ်တော့မရှိဘူး၊ ဆီဆိုင်တန်းတွေဘက်ပဲလောင်သွားတာပေါ့။ အခု အဲ့ဒီဆီဆိုင်တန်းက ဖွင့်တော့မဖွင့်တော့ဘူး။

ဒါပေမယ့် ဆီတွေဘာတွေသိုလှောင်ထားတာတွေတော့ရှိတာပေါ့ ။ လောင်တာကတော့ တစ်ခန်းထဲပါ၊ ဆီပေပါက ၁၅ လုံးပတ်ချာလည်လောက်ရှိပါတယ်။ လူထိခိုက်ဒဏ်ရာရမှုကတော့ မရှိခဲ့ပါဘူး။"လို့ မုံရွာမြို့ လူမှုကူညီကယ်ဆယ်ရေးအဖွဲ့ ဥက္ကဌ ဦးစိန်ကိုကို က YMG ကိုပြောပြခဲ့ပါတယ်။

အဆိုပါ ကျောက္ကာ ဆီဆိုင်တန်း မီးလောင်မှုကို စစ်ကိုင်းတိုင်းမီးသတ်ဦးစီးမှူးရုံးမှ မီးသတ်ယာဉ်(၁)စီး၊ LUF 60 ယာဉ်(၁)စီး၊ ရေသယ်ယာဉ်(၁)စီး၊ မုံရွာခရိုင်မီးသတ်စခန်းမှ Foam မီးငြှိမ်းသတ်ယာဉ်(၂)စီး၊ မီးသတ်ယာဉ်(၁)စီး၊ မုံရွာမြို့နယ်မီးသတ်စခန်းမှ မီးသတ်ယာဉ်(၁)စီး၊ ရေသယ်ယာဉ်(၁)စီးတို့ဖြင့် ထွက်ခွာငြှိမ်းသတ်ခဲ့ရတာဖြစ်တယ်လို့ မီးသတ်တပ်ဖွဲ့က သတင်းထုတ်ပြန်ထားပါတယ်။

"ကျွန်တော်တို့အသင်းကတော့ ကယ်ဆယ်ရေးယာဉ် (၁)စီးနဲ့ လူနာတင်ယာဉ် (၂)စီးထွက်ခွာပြီး လိုအပ်သည်များ ကူညီဆောင်ရွက်ပေးခဲ့ပါတယ်။ မီးလောင်ပြင်ဖိနပ်လိုအပ်ချက်ကြောင့် အဖွဲ့သားတစ်ဦး ခြေထောက်မီးအနည်းငယ်ဟက်ခံခဲ့ရပါတယ်။ ကျန်တဲ့လူထိခိုက်မှုကတော့ မရှိခဲ့ပါဘူး။"လို့ ဦးစိန်ကိုကို က ဆက်လက်ပြောပြခဲ့ပါတယ်။

Photo - မြန်မာနိုင်ငံ လူမှုကယ်ဆယ် ရေးအဖွဲ့ချုပ်(မုံရွာ)

ymg/kg
#Yangon_Media_Group

#WorldHealth
Published - 11 March 2022
SARS-CoV-2 ဗိုင်းရပ်စ်ရဲ့ အိုမီခရွန်မျိုးဗီဇကွဲကူးစက်ခံရသူများဟာ အနည်းဆုံး ၆ ရက်ကြာတဲ့အထိ ရောဂါပိုးပျံ့ပွားစေနိုင်ကြောင်း၊ အရင်မျိုးဗီဇကွဲတွေကူးစက်ပျံ့ပွားနိုင်တဲ့အချိန်နဲ့ အတူတူနီးပါးလောက်ဖြစ်ကြောင်း လေ့လာချက်တစ်ခုမှာဖော်ပြထားပါတယ်။

သုတေသီတို့က ဒယ်လ်တာကူးစက်ခံရသူ ၃၇ ဦး၊ အိုမီခရွန်ကူးစက်ခံရသူ ၁၉ ဦးအပါအဝင် ရောဂါပိုးကူးစက်ခံထားရတဲ့လူနာ ၅၆ ဦးထံမှ သွေးနမူနာများရယူခဲ့ပါတယ်။
လူနာအားလုံးဟာ တုပ်ကွေးရောဂါလက္ခဏာလိုမျိုး သာမန်လက္ခဏာတွေလောက်သာခံစားခဲ့ရပြီး တစ်ယောက်မှဆေးရုံတက်ကုသရခြင်းမရှိပါဘူး။

လူနာတွေအနေနဲ့ ကိုဗစ်ကာကွယ်ဆေးတွေထိုးထိုးမထိုးထိုး ဘယ်မျိုးဗီဇကွဲကူးစက်သည်ဖြစ်စေ ရောဂါလက္ခဏာစပေါ်ပြီး အနည်းဆုံး ၆ ရက်အထိ ဗိုင်းရပ်စ်အရှင်တွေကူးစက်ပျံ့ပွားနိုင်ကြောင်း ဘော့စ်တွန်မြို့ မာဆာချူဆက်စ်အထွေထွေဆေးရုံမှ ဒေါက်တာ'အေမီဘာချက်'က ပြောပြလိုက်ပြီး medRxiv ဝက်ဘ်ဆိုက်မှာဖော်ပြခဲ့ပါတယ်။

"အခြားလူတွေဆီ ရောဂါပိုးကူးစက်ဖို့အတွက် ဗိုင်းရပ်စ်အရှင်ဘယ်လောက်အထိလိုအပ်သလဲဆိုတာကို သေချာမသိရသေးပါဘူး။ ရောဂါအပျော့စားသာခံစားရတဲ့သူတွေဆီကလည်း ပျမ်းမျှအားဖြင့် ၆ ရက်ကြာတဲ့အထိ ရောဂါကူးစက်လာနိုင်ပါတယ်။ ကာကွယ်ဆေးထိုးထားမထိုးထား ဘယ်မျိုးဗီဇကွဲကူးစက်သည်ပဲဖြစ်စေ သီးသန့်ခွဲနေထိုင်ခြင်း၊ နှာခေါင်းစည်းတပ်ဆင်ခြင်းများ လုပ်ဆောင်သင့်ပါတယ်" လို့ 'ဘာချက်'က ဆိုပါတယ်။

#Yangon_Media_Group

#LocalNews
Published - 11 Mar 2022
တစ်နိုင်ငံလုံးအတိုင်းအတာအရ၂၀၂၂ခုနှစ် တက္ကသိုလ်ဝင်စာမေးပွဲ ဖြေဆိုမယ့်ကျောင်းသား/ကျောင်းသူ ဦးရေ ၃၁၂,၀၀၀ကျော်ရှိတယ်လို့ နစကသတင်းထုတ်ပြန်ရေးအဖွဲ့ ကနေသိရပါတယ်။

ထုတ်ပြန်ထားတဲ့ စာရင်းတွေအရ တက္ကသိုလ်ဝင်တန်းစာမေးပွဲ ဖြေဆိုရန် ရခိုင်ပြည်နယ်တွင် ကျောင်းသူ/ကျောင်းသား ၄၅,၅၉၂ ဦးနဲ့ အများဆုံးဝင်ရောက်ဖြေဆိုမှာဖြစ်ပြီး ဧရာဝတီတိုင်းဒေသကြီးတွင် စာမေးပွဲဝင်ရောက်ဖြေဆိုမည့်သူ ၄၀,၃၂၀ဦးရှိကာ ရန်ကုန်တိုင်းဒေသကြီးတွင် ဝင်ရောက်ဖြေဆိုမည့်သူ ၃၇,၅၆၀ဦး ရှိတာဖြစ်ပါတယ်။

ကျင်းပမယ့်တက္ကသိုလ်ဝင်တန်းစာမေးပွဲတွင်တိုင်းဒေသကြီး/ပြည်နယ်အလိုက် ခရိုင်/မြို့နယ်/စာစစ်ဌာနနှင့် ဖြေဆိုသူစာရင်းများအရ ခရိုင်(၇၁)ခရိုင်၊ မြို့နယ် (၃၂၁)မြို့၊ စာစစ်ဌာန(၁၂၅၆)ဌာနတို့တွင် စာရင်းပေးသွင်းဦးရေ ကျောင်းတွင်းဖြေ ၂၀၀,၇၆၈ဦးနဲ့အလွတ်ဖြေဆိုမယ့်သူ ၁၁၁,၅၃၁ ဦး စုစုပေါင်း ၃၁၂,၂၉၉ ဦး ပါဝင်ဖြေဆိုမှာဖြစ်ပါတယ်။

ယခုနှစ် တက္ကသိုလ်ဝင်တန်းစာမေးပွဲ ကို မတ်လ ၃၁ရက်နေ့မှ ဧပြီလ ၉ရက်နေ့ထိဖြေဆိုမှာဖြစ်ကာ တစ်နိုင်ငံလုံးတွင် ကယားပြည်နယ်မှဝင်ရောက်ဖြေဆိုမယ့် ကျောင်းသူ/ကျောင်းသား ၇၈၀ဦးသာရှိတယ်လို့ ထုတ်ပြန်ချက်အရသိရပါတယ်။
ymg/hm

#Yangon_Media_Group

#WorldHealth
Published - 11 March 2022
ကိုဗစ်ရောဂါကူးစက်ခြင်းကြောင့် ဦးနှောက်ကျုံ့ခြင်းဖြစ်ပွားနိုင်ပြီး အသက်အလတ်ပိုင်းလူတွေမှာ ဦးနှောက်ပျက်ယွင်းခြင်းက ပုံမှန်ထက် ၃ ဆလောက် ပိုမိုမြန်ဆန်စွာဖြစ်ပေါ်နိုင်ကြောင်း လေ့လာချက်အသစ်တစ်ခုမှာဖော်ပြထားပါတယ်။

ကိုရိုနာဗိုင်းရပ်စ်ကူးစက်ထားတဲ့လူ ၄၀၁ ယောက်ကို အောက်စ်ဖို့ဒ်တက္ကသိုလ်က ရောဂါမကူးစက်ခင်နဲ့ ရောဂါကူးစက်အပြီး ဦးနှောက်တွေကိုစကင်ဖတ်လေ့လာခဲ့ကြပါတယ်။
ရောဂါကူးစက်ထားတဲ့သူတွေရဲ့ အနံ့ခံအာရုံနဲ့ဆိုင်တဲ့ ဦးနှောက်အစိတ်အပိုင်းနေရာဟာ ရောဂါမကူးစက်တဲ့သူတွေနဲ့ယှဉ်ရင် ဝ.၇ ရာခိုင်နှုန်းပိုကျုံ့လာခဲ့ပါတယ်။

ပုံမှန်အတိုင်းဆိုရ၍ သက်လတ်ပိုင်းလူတစ်ယောက်ရဲ့ အနံ့ခံအာရုံဦးနှောက်အစိတ်အပိုင်းနေရာဟာ နှစ်တစ်နှစ်အတွင်း ဝ.၂ ရာခိုင်နှုန်းလျော့ပါးသွားပြီး အသက်ကြီးတဲ့သူတွေမှာတော့ ဝ.၃ ရာခိုင်နှုန်းနှစ်စဉ်လျော့နည်းလာနိုင်ပါတယ်။

ကိုဗစ်ကူးစက်ထားတဲ့သူတွေမှာတော့ ဦးနှောက်အစိတ်အပိုင်းက ပိုမိုမြန်ဆန်စွာယိုယွင်းလာနိုင်တယ်လို့ အသိပေးချင်တာဖြစ်ပါတယ်။ကိုရိုနာဗိုင်းရပ်စ်ပိုးတွေ့ရှိတဲ့သူတွေမှာ အသိဉာဏ်စမ်းသပ်စစ်ဆေးချက်တွေပြီးမြောက်ဖို့ ပိုမိုကြာရှည်နေခဲ့ပါတယ်။

သုံးသပ်လေ့လာထားတဲ့သုတေသီတွေက "ကိုဗစ်ရောဂါကြောင့်ဖြစ်လာတဲ့ ဆိုးကျိုးသက်ရောက်မှုတွေက သိသာထင်ရှားပြီး ဆိုးဆိုးရွားရွားထိခိုက်စေပါတယ်။ ဆေးရုံတက်ကုသခံယူရတဲ့သူတွေကို ထည့်မတွက်ရင်တောင် ဒီသက်ရောက်မှုတွေဆက်ရှိနေပါသေးတယ်။
ဒီဆိုးကျိုးတွေက တစိတ်တပိုင်းပြန်ကောင်းလာနိုင်လား ဒါမှမဟုတ် ရေရှည်အထိသက်ရောက်နေမှာထားဆိုတာကို ဆက်လက်လေ့လာသွားရမှာပါ" လို့ Natue ဂျာနယ်မှာဖော်ပြခဲ့ပါတယ်။

ဦးနှောက်ကျုံ့ခြင်းနဲ့ဆိုးကျိုးသက်ရောက်မှုတွေက အသက်ရှူလမ်းကြောင်းရောဂါပိုးကူးစက်မှုကြောင့် ဖြစ်တာလားဆိုတာကို လေ့လာစစ်ဆေးကြည့်ဖို့အတွက် အဆုတ်ရောင်ရောဂါဖြစ်တဲ့လူနာတွေရဲ့ဦးနှောက်တွေကို ဆန်းစစ်လေ့လာခဲ့ရာမှာ ကိုဗစ်နဲ့မသက်ဆိုင်ကြောင်းတွေ့ခဲ့ရပါတယ်။

ဦးနှောက်ကျုံ့ခြင်းက ဗိုင်းရပ်စ်နဲ့သက်ဆိုင်သလားဆိုတာကိုမသိရသလို ဦးနှောက်အစိတ်အပိုင်းထိခိုက်မှုကြောင့် အနံ့ခံအာရုံဆုံးရှုံးတာလား၊ ခုခံအားကြောင့်ဖြစ်တာလားဆိုတာတွေကို မသိရှိရသေးကြောင်း သိပ္ပံပညာရှင်တွေက ပြောကြားခဲ့ပါတယ်။

ဒါပေမဲ့လည်း ကိုဗစ်ရောဂါကူးစက်ခံရတဲ့လူတွေမှာ ကိုဗစ်နောက်ဆက်တွဲလက္ခဏာခံစားရတဲ့ အကြောင်းအရင်းကိုတော့ သိရှိနိုင်ဖွယ်ရှိနေပါတယ်။
Source:‌ The Telegraph 

#LocalNews
Published - 11 Mar 2022

ယနေ့ နံနက်အစောပိုင်းကရန်ကုန်တိုင်းဒေသကြီး၊သာကေတမြို့နယ်၊တစ်ဆယ်တောင်ရပ်ကွက်အတွင်းမီးလောင်မှုဖြစ်ပွားရာ အိမ် ၁၂လုံးခန့်မီးလောင်ဆုံးရှုံးခဲ့ကြောင်းရပ်ကွက်နေပြည်သူများထံကသိရပါတယ်။

ဖြစ်စဉ်မှာ မတ်လ ၁၁ ရက်နေ့ ယနေ့ နံနက် ၁၂နာရီ၁၀မိနစ်အချိန်ခန့်က ရန်ကုန်တိုင်းဒေသကြီး၊ သာကေတမြို့နယ်၊ တစ်ဆယ်တောင်ရပ်ကွက်၊ ဇေယျဝတီ(၃)လမ်းတွင် မီးလောင်မှုဖြစ်ပွားခဲ့တာဖြစ်တယ်လို့ သိရပါတယ်။

"မီးကအရမ်းများတယ်ဗျ တစ်ချို့ အိမ်တွေဆို လူလွတ်အောင်ပြေးရတာဘာမှ ယူချိန်မရလိုက်ဘူးဗျာ။အားလုံးပေါင်း အိမ်၁၂လုံးပါသွားတယ်"လို့ တစ်ဆယ်တောင်ရပ်ကွက်နေထိုင်သူတစ်ဦးကပြောပါတယ်။

သတင်းရရှိသဖြင့် သာကေတမြို့နယ်မီးသတ်စခန်းမှ မီးသတ်ယာဉ်(၃)စီး၊ ထွက်ခွာငြိမ်းသတ်ခဲ့ရာ၁၂နာရီ၁၆ မိနစ်အချိန် တွင်Level 1ယာဉ်အုပ်စု ထွက်ခွာကာ၁၂နာရီ ၂၁ မိနစ်အချိန်တွင် level 2 ယာဉ်အုပ်စု ထွက်ခွာခဲ့ပြီးနံနက် ၁၂နာရီ ၃၇မိနစ် အချိန် မီးထိန်းနိုင်ကာ ၁၂နာရီ ၄၃ မိနစိအချိန်တွင် မီးငြိမ်းခဲ့တယ်လို့ သိရပါတယ်။

ymg/hm
#Yangon_Media_Group

Published 10 March 2022

ယူကရိန်းအကျပ်အတည်းကြောင့် ရုရှားကို စွမ်းအင် အရေးယူပိတ်ဆို့မှုလုပ်လိုက်တာဟာ ဥရောပအတွက် နောက်ပြန် ထိခိုက်မှုဖြစ်စေလိမ့်မယ်လို့ ဗြိတိန်ပညာရှင်တစ်ဦးက သတိပေးလိုက်ပါတယ်။ the consultancy Energy Aspects အဖွဲ့ရဲ့ ဥရောပ သဘာဝဓာတ်ငွေ့သုတေသနအဖွဲ့ကို ဦးဆောင်တဲ့ ပညာရှင် ဂျိမ်းစ်ဝက်ဒဲလ်က ရုရှားနှင့်ယူကရိန်း ပဋိပက္ခမဖြစ်ခင်ကတည်းက ဥရောပမှာ စွမ်းအင်မလုံလောက်မှုရှိခဲ့တယ်လို့ ပြောပါတယ်၊အဲဒါကြောင့် သဘာဝဓာတ်ငွေ့ထုတ်လုပ်သူတွေဟာ သူတို့ရဲ့ မူလထုတ်လုပ်မှုအစီအစဉ်တွေကိုအတင်းအကြပ်ပြောင်းလဲခဲ့ရတယ်လို့ သူကပြောပါတယ်။အချိန်တစ်ခုရောက်ရင် ဒီလုပ်ငန်းတွေဟာ ခက်ခဲမှုတွေ ပိုကြုံရဖွယ်ရှိနေပါတယ်လို့ သူကသုံးသပ်ပါတယ်။

Source CMG

#WorldEnvironment
Published 10 March 2022

ဂါဇာကမ်းမြောင်ဒေသရှိ အမှိုက်ပုံတစ်ခုမှာ ဘတ်ထရီအဟောင်းအပျက်တွေ တောင်လိုပုံနေပြီး ပါလက်စ်တိုင်းလူနည်းစုနေထိုင်ရာဒေသရှိလူတွေကို ကျန်းမာရေးထိခိုက်စေလျက်ရှိပါတယ်။

#Yangon_Media_Group

#LocalNews
Published_10 March 2022

ရခိုင်ပြည်နယ် ကျောက်တော်မြို့ မဟာမုနိရင်ပြင်မှာတွေ့တဲ့ ရှေးဟောင်းနတ်ညီနောင်ရုပ်တုကို မဟာမုနိပြတိုက်မှာ ထိန်းသိမ်းထားမယ်လို့ ရှေးဟောင်းသုသေတနနှင့် အမျိုးသားပြတိုက်ဦးစီးဌာန(မြောက်ဦးဌာနခဲ)ရဲ့ ညွှန်ကြားရေးမှူး ဦးကြည်ခင်က YMG ကို ပြောပါတယ်။

#Yangon_Media_Group

Published 10 March 2022

ပိုလန်က ယူကရိန်းအတွက် တိုက်လေယာဉ်တွေ ပို့ပေးမယ့်ကမ်းလှမ်းချက်ကို အမေရိကန်စစ်ဌာနချုပ် ပင်တဂွန်က ပယ်ချလိုက်ပါတယ်။ဒီလိုလုပ်ဆောင်မယ်ဆိုရင် အရှိန်မြှင့်လုပ်ဆောင်တယ်လို့ အဓိပ္ပါယ်သက်ရောက်သွားနိုင်လို့ အန္တရာယ်ကြီးမားတယ်လို့ ပင်တဂွန်စစ်ဌာနချုပ်ရဲ့ ပြောရေးဆိုခွင့်ရပုဂ္ဂိုလ် ဂျွန်ကီဘီက ပြောပါတယ်။ အဲသလို လေယာဉ်တွေပေးမယ့်အစား လက်နက်တွေနှင့်လေကြောင်းရန်ကာကွယ်ရေးစနစ်တွေကို ပံ့ပိုးတာကပိုကောင်းတယ်လို့ သူကဆက်ပြောပါတယ်။

Source AFP

#LocalNews
Published- March 10 2022

အင်ဒိုနီးရှားနိုင်ငံက စားအုန်းဆီတင်ပို့တာကို ခွဲတမ်းသတ်မှတ်လိုက်တာကြောင့် အိန္ဒိယအပါအဝင် အခြားနိုင်ငံတွေကလည်း စားအုန်းဆီ ဝယ်ယူမှုမြင့်တက်လာတယ်။

#Yangon_Media_Group

#LocalNews
Published 10 Mar 2022

ကမ္ဘာ့ရေနံဈေးမြင့်တက်လာခြင်းနှင့်အတူ ပြည်တွင်းစက်သုံးဆီဈေးနှုန်းများမြင့်တက်လျှက်ရှိပြီး သယ်ယူပို့ဆောင်စရိတ်၊ ကုန်ထုတ်လုပ်မှုစရိတ်များမြင့်မားလာသောကြောင့် အခြားကုန်စည်ဈေးနှုန်းများလည်းလိုက်ပါမြင့်တက်လျှက်ရှိရာ ပဲမျိုးစုံဈေးနှုန်းများလည်းအပါအဝင် နေ့စဥ်တက်ဈေးသို့ဦးတည်နေတယ်လို့ ဧရာကုန်သွယ်မှု ဗဟိုဌာနကသိရပါတယ်။

ဧရာဝတီတိုင်းဒေသကြီးအတွင်း ပြီးခဲ့သည့်သီတင်းပတ်အတွင်းဖြစ်ပေါ်ခဲ့သော မတ်ပဲဈေးနှုန်းများမှာ မတ်လ ၂ ရက်နေ့တွင် မတ်ပဲတစ်တင်းလျှင် ကျပ် ၄၄,၇၀၀၊ ၃ ရက်နေ့မှ ၆ ရက်နေ့အထိ ကျပ် ၄၄,၅၀၀၊ ၇ ရက်နေ့တွင် ကျပ် ၄၄,၉၀၀၊ ၈ ရက်နေ့တွင် ကျပ်၄၆,၅၀၀၊ ၉ ရက်နေ့တွင် ကျပ် ၄၆,၃၀၀ နှင့် ၁၀ ရက်နေ့တွင် ကျပ် ၄၆,၀၀၀ အသီးသီးဖြစ်ပေါ်ခဲ့ပါတယ်။

အိန္ဒိယနိုင်ငံ၏ရူပီးငွေကြေးတန်ဖိုးအနည်းငယ်ကျဆင်းပြီး ဈေးနှုန်းအချို့မြင့်တက်လာသောကြောင့် ၂ ရက်အတွင်း မတ်ပဲဈေးနှုန်းသည် FAQ တစ်တန်လျှင် $815 မှ $890 သို့ရောက်ရှိလာကာ ပဲခွဲစက်များမှ အဝယ်လိုက်နေခြင်းနှင့် ပဲစားသုံးမှုပိုမိုများပြားလာခြင်းတို့ကြောင့် အိန္ဒိယနိုင်ငံပြည်တွင်းဈေးကွက်တွင်လည်း ပဲမျိုးစုံဈေးနှုန်းများအထိုက်အလျောက်မြင့်တက်လျှက်ရှိတယ်လို့ သိရပါတယ်။

လက်ရှိမြန်မာကျပ်ငွေတန်ဖိုးကျဆင်းနေခြင်းနှင့်အတူ ကမ္ဘာ့ဈေးကွက်တွင် ပဲမျိုးစုံဈေးနှုန်းမြင့်တက်လာခြင်းများကြောင့် မတ်ပဲဈေးဆက်တက်နေဦးမည်ဟု သုံးသပ်ရကာပြီးခဲ့သည့် ဘဏ္ဍာနှစ်အတွင်း အိန္ဒိယသည် ရုရှားမှပဲဝယ်ယူတင်သွင်းရန် စတင်လုပ်ဆောင်ချက်ခြင်းများရှိခဲ့ပြီး ယခုလက်ရှိတွင် ရုရှားမှ ပဲတင်သွင်းရန်မဖြစ်နိုင်တော့သည့်အခါ ၎င်း၏ ပဲလိုအပ်ချက်ကို ယခင်တင်သွင်းနေကျနိုင်ငံများထံမှသာ ဆက်လက်ဝယ်ယူရမည့်အခြေအနေဖြစ်တယ်လို့ သိရပါတယ်။

လတ်တလောတွင် အိန္ဒိယသည် ပဲဝယ်ယူတင်သွင်းရာတွင် မြန်မာမတ်ပဲတင်သွင်းခွင့်ကို ယခုနှစ်မတ်လကုန်အထိသာ ခွင့်ပြုထားသောကြောင့် တင်သွင်းခွင့်ကာလအပြီးတွင် မြန်မာမတ်ပဲဈေးနှုန်းအနည်းငယ်ပြန်အေးလာနိုင်ကြောင်းလည်း ပဲရောင်းဝယ်တင်ပို့သူကုန်သည်များက သုံးသပ်ထားပါတယ်။

ymg/hm
#Yangon_Media_Group