#Local_News
Published _ 16 August 2022

ယခုဘဏ္ဍာနှစ် ၄ လကျော်အတွင်း ပြည်ပကို ပဲမျိုးစုံ တန်ချိန် ၅ သိန်း ၇ သောင်းကျော် တင်ပို့ထားကြောင်း စီးပွားရေးနှင့်ကူးသန်းရောင်း ဝယ်ရေးဝန်ကြီးဌာနက သိရသည်။

၂၀၂၂-၂၀၂၃ ဘဏ္ဍာနှစ် ဧပြီလ ၁ ရက်မှ ဩဂုတ်လ ၅ ရက်အထိ ပင်လယ်ရေကြောင်းမှတဆင့် ပဲမျိုးစုံတန်ချိန် ၄ သိန်း ၃ သောင်းကျော်နှင့် နယ်စပ်မှ တန် ၁ သိန်း ၄ သောင်း တင်ပို့ထားရှိပြီး ဝင်ငွေအနေဖြင့် အမေရိကန်ဒေါ်လာ သန်း ၄၄၀ ကျော် ရရှိထားသည်။

ယခုဘဏ္ဍာနှစ်အတွင်း ပဲတီစိမ်းကို အများဆုံးတင်ပို့ထားပြီး တန်ချိန် ၂ သိန်း ၈ သောင်းကျော်အထိရှိနေကာ မတ်ပဲ တင်ပို့မှုအနေနှင့် တန်ချိန် ၁ သိန်း ၃ သောင်းကျော်၊ ပဲစင်းငုံ တင်ပို့မှုအနေနှင့် တန်ချိန် ၁ သောင်းခွဲကျော် ရှိကြောင်း စီးပွား၊ ကူးသန်းရဲ့ အချက်အလက်တွေအရ သိရသည်။

ယခု သြဂုတ်လ ၈ ရက်မှစ၍ ဗဟိုဘဏ်က အမေရိကန်ဒေါ်လာနှုန်းထား သတ်မှတ်ချက်နီင့် ပို့ကုန်ရငွေ လဲလှယ်မှုကို ဖြေလျော့ပေးလိုက်သည့်အတွက် ပဲတင်ပို့မှု ပို့များလာနိုင်ကြောင်း ဈေးကွက်ကျွမ်းကျင်သူများက သုံးသပ်ထားသည်။

အဆိုပါ ညွှန်ကြားချက် ထွက်ရှိပြီးနောက် ပဲဈေးတွေဟာလည်း တောက်လျှောက် မြင့်တက်နေကြောင်း ဈေးကွက်မှတဆင့် သိရသည်။

ymg/NN
#Yangon_Media_Group

#Local_News
Published_16 August 2022

ထိုင်းနိုင်ငံ၊ ဘန်ကောက်မြို့ Bangkok Hospital Internation Building တွင် ဆေးကုသမှုခံယူနေရသော မိုင်းဖုန်းဆရာတော်ကြီးအတွက် ယနေ့ သြဂုတ်လ ၁၆ ရက်က ဆုတောင်းမေတ္တာပို့ခြင်းများပြုလုပ်ခဲ့ကြကြောင်း သိရသည်။

ဆရာတော်ဘုရားကြီး၏ ကျန်းမာရေး လျင်မြန်စွာ ပြန်လည်ကောင်းမွန် စေရန်ရည်ရွယ်၍ တောင်ကြီးမြို့၊ ရှမ်းပြည်နယ် ဗုဒ္ဓတက္ကသိုလ်၌ စုပေါင်း ဗောဇ္ဈင်္ဂသုတ်ပရိတ်တရားတော် ရွတ်ဖတ်ပူဇော်ခြင်း၊ မူဆယ်မြို လွယ်တိန်ခမ်းဘုရားကျောင်းမှ တောင်တန်းသာသနာပြု ဆရာတော် ဦးသုခမိန္ဒ (စဝ်ဆုခမ်း) နှင့် ဒကာဒကာမများကဆုတောင်းမေတ္တာပိုခြင်းတို့ကို ယနေ့ နံနက်တွင် ပြုလုပ်ခဲ့ကြခြင်းလည်းဖြစ် သည်။

ယင်းသို့ ပြုလုပ်ရာတွင် အရှည်တစ်တောင်ရှိ ဖရောင်းတိုင် ၉ တိုင်ပေါ် မိုင်းဖုန်းဆရာတော်ကြီး၏ ဘွဲ့တော်"ဉာဏသံဝရ" ဟု ရေး၍ သစ်သီး ၅ မျိုးလှူဒါန်းခြင်း၊ အမွှေးတိုင် ၁၆ တိုင် ၉ စုံ ကို ဖ ယောင်းတိုင် ၉ တိုင်နှင့်အတူတွဲလျက် ထွန်းညှိခြင်းများ ပြုလုပ်ခဲ့ကြကြောင်း သိရသည်။

လက်ရှိတွင် မိုင်းဖုန်းဆရာတော်ကြီး၏ ကျန်းမာရေးအခြေအနေမှာ ၈၀ ရာခိုင်နှုန်းကောင်းမွန်လာပြီ ဖြစ်ကြောင်း၊ ဆရာတော်ကြီးကလည်း ကျန်းမာရေး စောင့်ရှောက်မှု ကုန်ကျစရိတ်အားလုံး တာဝန်ယူပူဇော်လှူဒါန်းသည့် ထိုင်းဘုရင်နှင့် ဆွေတော်မျိုးတော်များ အားလုံးကို သြဂုတ်လ ၁၅ ရက် ညပိုင်းက မေတ္တာပို့ တရားဟောခဲ့ကြောင်းလည်း သိရသည်။

လက်ရှိတွင် ဆရာတော်ဘုရားအား ဖူးတွေ့ရန်အတွက် Bangkok Hospital Internation ဆေးရုံတာဝန်ခံများနှင့် နန်းတွင်းလုံခြုံရေးမှ အထူးတားမြစ်၍ ဖူးတွေ့ခွင့်မပေးသေးသော်လည်း မေတ္တာပိုနိုင်မည့်နေရာ သီးသန့်စီစဉ်ပေးထားကြောင်းနှင့် မှတ်တမ်းစာအုပ်ထားရှိပြီး ယင်းစာအုပ်တွင် သွားရောက်ဆုတောင်းမေတ္တာစာများရေးသားနိုင်ကြောင်း၊ သွားရောက်မည့်သူများအနေဖြင့် နှာခေါင်းစည်းကို မဖြစ်မနေ တပ်သွားရန်လိုကြောင်းလည်း သိရသည်။

ymg/mt
#Yangon_Media_Group

#Local_News
Published - 16 August 2022

ရန်ကုန်မြို့တွင်း ပြေးဆွဲနေသည့် YBS ယာဉ်လိုင်းများထဲမှ YBS 28 နှင့် YBS 29 ယာဉ်လိုင်းတို့တွင် မှတ်တိုင်အလိုက် ယာဉ်စီးခ ကောက်ခံသည့်စနစ်ကို ကနဦး စမ်းသပ်ဆောင်ရွက်နေပြီဖြစ်ကြောင်း အဆိုပါယာဉ်လိုင်းများထံမှ သိရသည်။

YPS ကတ်ဖြင့် ယာဉ်စီးခ ပေးချေသည့်အခါတွင် ယခင်လို ဂိတ်စ - ဂိတ်လယ် - ဂိတ်ဆုံးမှတ်တိုင် သတ်မှတ်သည့် ဖြတ်ပိုင်းခရီးစဉ်နှင့် မကောက်ခံတော့ဘဲ စီးနင်းသည့် မှတ်တိုင်အရေအတွက်ကိုသာ အခြေခံ ကောက်ခံသည့်စနစ်ကို စမ်းသပ်ဆောင်ရွက်ခြင်းဖြစ်ကြောင်း သိရသည်။

အဆိုပါ စနစ်ကို သြဂုတ်လ ၁၂ ရက်မှ ၁၈ ရက်အထိ ၇ ရက်ကြာ ကနဦး စမ်းသပ်ဆောင်ရွက်နေခြင်းဖြစ်ပြီး အကျိုးသက်ရောက်မှုရှိပါက ဩဂုတ် ၁၉ ရက်က စပြီး အမှန်တကယ် ကျင့်သုံးသွားမည် ဖြစ်ကြောင်း Yangon Payment Services က ကြေညာထားသည်။

ဒဂုံတက္ကသိုလ်မှ ဆူးလေမြို့တော်ခန်းမအထိ ပြေးဆွဲနေတဲ့ YBS 28 ယာဉ်လိုင်းမှာ ခရီးသည် စတက်သည့်မှတ်တိုင်ကနေ စုစုပေါင်း ၂၅ မှတ်တိုင်အထိကို ကျပ် ၂၀၀ သတ်မှတ်ထားပြီး စတက် မှတ်တိုင်မှ ၂၅ မှတ်တိုင်ကျော်ပါက ကျပ် ၃၀၀ အထိကောက်ခံမည်ဖြစ်ကြောင်း သိရသည်။

ယင်းအပြင်ရွှေပေါက်ကံ တံတားထိပ်ဆူးလေမှမြို့တော်ခန်းမအထိ ပြေးဆွဲနေသည့် YBS 29 ယာဉ်လိုင်းတွင် ခရီးသည် စတက်သည့် မှတ်တိုင်မှ စုစုပေါင်း ၃၃ မှတ်တိုင်အထိ ကျပ် ၂၀၀ သတ်မှတ်ထားပြီး စတက် မှတ်တိုင်ကနေ ၃၃ မှတ်တိုင် ကျော်ပါက ကျပ် ၃၀၀ ကောက်ခံမည်ဟု သတ်မှတ်ထားကြောင်း သိရသည်။

YBS ယာဉ်စီးခကို ခရီးစဉ် အစအဆုံး ပုံသေယာဉ်စီးခကျပ် ၂၀၀ သတ်မှတ်ထားသော်လည်း တချို့ယာဉ်လိုင်းများတွင် ခရီးစဉ် အစအဆုံးကျပ် ၃၀၀ မှကျပ် ၅၀၀ အထိ ကောက်ခံမှုများရှိနေကြောင်း သိရသည်။

ရန်ကုန်မြို့တွင်း၌ နေ့စဉ်ယာဉ်လိုင်းပေါင်း ၁၁၃ လိုင်း၊ ယာဉ်စီးရေ ၃၀၀၀ ဝန်းကျင်ဖြင့် နေ့စဉ်ပုံမှန်ပြေးဆွဲပေးနေကြောင်း သိရသည်။

ymg/sth
#Yangon_Media_Group

#Local_News
Published_16 August 2022

ရဟတ်ယာဉ်ဝယ်ယူခြင်းနှင့် ပတ်သက်၍ ဦးဝင်းမြင့်နှင့် ဒေါ်အောင်ဆန်းစုကြည်တို့ကို အဂတိလိုက်စားမှု တိုက်ဖျက်ရေး ဥပဒေဖြင့် တရားစွဲထားသည့် ရာဇဝတ်ကြီးအမှုအမှတ် ၄၉ အတွက် တရားလိုဖြစ်သူ အဂတိလိုက်စားမှု တိုက်ဖျက်ရေးကော်မရှင်မှ ဦးအောင်ခန့်အား စစ်မေးခဲ့ကြောင်း တရားရုံးနှင့် နီးစပ်သူများထံမှ သိရသည်။

ယနေ့ သြဂုတ်လ ၁၆ ရက်တွင် နေပြည်တော် အကျဉ်းထောင်အတွင်းတရားရုံး၌ စစ်မေးခဲ့ခြင်း ဖြစ်ကြောင်းလည်း သိရသည်။

ရဟတ်ယာဉ် ငှားရမ်းခြင်း၊ ဝယ်ယူခြင်း၊ စောင့်ရှောက်ရေးကိစ္စရပ်များနှင့် ပတ်သက်၍ ဦးဝင်းမြင့်နှင့် ဒေါ်အောင်ဆန်းစုကြည်တို့ကို အဂတိဖြင့် တရားစွဲဆိုထားသည့် ရာဇဝတ်ကြီးအမှု အမှတ် ၄၆၊ ၄၇၊ ၄၈၊ ၄၉၊ နှင့် ၅၀ တို့ရှိပြီး ယင်းအထဲမှ ရဟတ်ယာဉ်ဝယ်ယူခြင်း ကိစ္စရပ်များအတွက် အဂတိဖြင့် တရားစွဲဆိုထားသည့် ရာဇဝတ်ကြီးအမှုအမှတ် ၄၉ အတွက် စစ်ဆေးခဲ့ခြင်းလည်း ဖြစ်သည်။

ရာဇဝတ်ကြီးအမှု အမှတ် ၄၉ နှင့်ပတ်သက်၍ အစိုးရနှင့် ကုမ္ပဏီအကြား ဆောင်ရွက်ခဲ့သည့် စာချုပ်စာတမ်းများကို လွန်ခဲ့သော ဇွန်လ ၁၃ ရက်ရုံးချိန်း၌ တရားလိုဘက်မှ တင်ပြထားခဲ့ခြင်းလည်း ဖြစ်သည်။

ymg/mt
#Yangon_Media_Group

#Local_News
Published_16 August 2022

မြန်မာနိုင်ငံသို့ ပထမဆုံးအကြိမ်ရောက်ရှိနေသည့် ကုလအထူးသံတမန် နိုလင်းဟေဇာနှင့် နစက တာဝန်ရှိသူများ မနက်ဖြန် သြဂုတ်လ ၁၇ ရက်တွင် နေပြည်တော်၌ တွေ့ဆုံကြမည်ဖြစ်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက ပြောသည်။

"မနက်ဖြန် သူ သက်ဆိုင်သူတွေနဲ့တွေ့ပါမယ်။ ဒါပဲ ပြောလို့ရပါတယ်" ဟု ယင်းက ပြောသည်။

ပြီးခဲ့သည့် ၂၀၂၁ ခုနှစ် အောက်တိုဘာလက စတင်၍ ကုလသမဂ္ဂ၏ မြန်မာနိုင်ငံဆိုင်ရာ အထူးကိုယ်စားလှယ်အဖြစ် ခန့်အပ်ခြင်းခံခဲ့ရသူ ဖြစ်သော ကုလအထူးသံတမန် နိုလင်းဟေဇာ အနေဖြင့် မြန်မာနိုင်ငံသို့ သြဂုတ်လ ၁၅ ရက်တွင် သွားရောက်မည့်အကြောင်း ကုလသမဂ္ဂက အနေဖြင့် သတင်းထုတ်ပြန်ထားသည်။

မြန်မာနိုင်ငံ၏ ဆိုးရွားလာနေသော အခြေအနေနှင့် ချက်ချင်းလက်ငင်း လုပ်ဆောင်နိုင်မည့် ကိစ္စများကို လုပ်ဆောင်ရန် နိုလင်းဟေဇာက ဆောင်ရွက်သွားမည်ဖြစ်ကြောင်း ကုလသမဂ္ဂ ပြောရေးဆိုခွင့်ရပုဂ္ဂိုလ် စတက်ဖိန်း ဒူဂျာရစ်က အဆိုပါ ထုတ်ပြန်ချက်တွင် ပြောဆိုထားသည်။

ကုလသမဂ္ဂ အတွင်းရေးမှူးချုပ်၏ အထူးကိုယ်စားလှယ် မစ်(စ်)နိုလင်းဟေဇာက မြန်မာနိုင်ငံ၏ အခြေအနေ ထပ်မံမယိုယွင်းလာစေရန်နှင့် ပြည်သူများ၏ ဆိုးရွားသည့် အခြေအနေများကို ဖြေရှင်းဆောင်ရွက်ပေးနိုင်ရန် ကုလသမဂ္ဂနှင့် အာဆီယံ ပူး‌ပေါင်းမှုမြှင့်တင် ဆောင်ရွက်ပေးရန် ချက်ချင်းလိုအပ်‌ကြောင်း ယခုနှစ် နှစ်ဆန်းပိုင်းက ကမ္ဘောဒီးယားနိုင်ငံဝန်ကြီးချုပ် H.E. Mr. Samdech Akka Moha Sena Padei Hun Sen နှင့် ပြုလုပ်သည့် အွန်လိုင်းအ‌ဝေးတွင် ပြောကြားခဲ့သေးသည်။

ymg/mt
#Yangon_Media_Group

#Local_News
Published - 16 August 2022

အစိုးရ၏ သွင်းကုန်အပေါ်ကန့်သတ်မှု၊ ဒေါ်လာဈေးမြင့်တက်မှုနှင့် စက်သုံးဆီဈေးမြင့်တက်မှုစသည့် အခက်အခဲများကြောင့် ဆောက်လုပ်ရေးပစ္စည်းအရောင်းဆိုင်တချိုပိတ်သိမ်းနေပြီဖြစ်ကြောင်း သိရသည်။

ဒေါ်လာဈေးသည် ပြင်ပဈေးကွက်အတွင်းမှာ ကြိုက်ရောင်းကြိုက်ဝယ်ဈေးဖြစ်နေပြီး တစ်ဒေါ်လာ ၂၇၀၀ ကနေ ၃၀၀၀ အထိမြင့်တက်နေခြင်းဖြစ်သည်။

ယခုကဲ့သို့ အခြေအနေတွင် ပြည်ပကတင်သွင်းရသည့် ဆောက်လုပ်ရေးပစ္စည်းများ၏ ဈေးနှုန်းသည်လည်းမြင့်တက်လာပြီး စက်သုံးဆီဈေးနှုန်းကြီးမြင့်မှုကလည်း ဝန်ထုပ်ဝန်ပိုးဖြစ်စေကာ ဆက်လက်လုပ်ကိုင်ရန်အခက်တွေ့နေပြီဖြစ်ကြောင်း သိရသည်။

“ကျွန်တော်တို့ လက်ကားရောင်းတဲ့ အရောင်းများအားလုံး အရောင်းပိတ်လိုက်ပါပြီ။ တကယ်စိတ်မကောင်းပါဘူး။ အိပ်မက်တွေ မက်ခဲ့တာ အများကြီးပါ”ဟု UEDC Myanmar အိမ်ဆောက်ပစ္စည်းအမျိုးမျိုးရောင်းဖြန့်ချီရေးဆိုင်က ၎င်းတို့၏ လူမှုကွန်ရက်စာမျက်နှာတွင် ကြေညာထားသည်။

ယင်းအပြင်သွင်းကုန်ကန့်သတ်မှုကြောင့်လည်း မလိုအပ်သည့်ကုန်ကျစရိတ်များကို သွင်းကုန်လုပ်ငန်းရှင်များက ထပ်မံကုန်ကျနေပြီး ဆောက်လုပ်ရေးပစ္စည်းဈေးတွေ မြင့်တက်နေကြောင်း သိရသည်။

ဆက်လက်ဖွင့်လှစ်နေသည့် လုပ်ငန်းများသည်လည်း ယင်းကာလတွင်ရုန်းကန်နေရပြီး လုပ်ငန်းရပ်တည်ရန်အတွက် မနည်းကြိုးစားနေရကြောင်း ဈေးကွက်အတွင်းက သိရသည်။

ymg/sth
#Yangon_Media_Group

#Local_News
Published - 16 August 2022

မြန်မာနိုင်ငံမှ ထိုင်းနိုင်ငံကို ဇောတိက ကမ်းလွန် သဘာဝဓာတ်ငွေ့ထုတ်လုပ်ရေး စီမံကိန်း၊ ဂတ်စ်ပိုက်လိုင်းမှတစ်ဆင့် သဘာဝဓာတ်ငွေ့များ ပုံမှန်အတိုင်း ပြန်လည်ပို့လွှတ်နေပြီဖြစ်ကြောင်း PTTEP က သတင်းထုတ်ပြန်ထားသည်။

ထိုင်းနိုင်ငံနှင့် မြန်မာနိုင်ငံကို သွယ်တန်းထားသည့် ဂတ်စ်ပိုက်လိုင်း ပြင်ဆင်မှုပြီးစီးပြီဖြစ်သောကြောင့် သဘာဝဓာတ်ငွေ့ ပုံမှန်အတိုင်း ပြန်လည်ပို့လွှတ်နေပြီဖြစ်ကြောင်း ထိုင်းနိုင်ငံ စွမ်းအင်ကုမ္ပဏီဖြစ်သည့် PTTEP က သတင်းထုတ်ပြန်ထားသည်။

ပြီးခဲ့သည့် ဩဂုတ်လ ၁ ရက်နေ့တွင် အဆိုပါ ကမ်းလွန်သဘာဝဓာတ်ငွေ့ပိုက်လိုင်းကနေ ဂတ်စ်ပေးပိုမှုဟာ လေဖိအားလျော့ကျမှုဖြစ်ပေါ်နေခြင်းကြောင့် ဓာတ်ငွေ့ပေးပို့မှုကို နှစ်ပတ်ကြာရပ်တန့်ခဲ့ပြီး ပြင်ဆင်မှုများ လုပ်ဆောင်ခဲ့ခြင်းဖြစ်သည်။

ဇောတိက ကမ်းလွန်သဘာဝဓာတ်ငွေ့စီမံကိန်းကနေ နေ့စဉ် သဘာဝဓာတ်ငွေ့ ကုဗပေသန်း ၃၀၀ ထုတ်လုပ်နေခြင်းဖြစ်ပြီး ထုတ်လုပ်သည့် ဓာတ်ငွေ့အားလုံး၏ ၈၀ ရာခိုင်နှုန်းသည် ထိုင်းနိုင်ငံကို ရောင်းချခြင်းဖြစ်သည်။

PTTEP ဟာ ပြည်သစ်စွမ်းအင်ကုမ္ပဏီ Total မြန်မာနိုင်ငံက ထွက်ခွာသွားပြီးနောက် ပြည်တွင်း၌ ရေနံနှင့် သဘာဝဓာတ်ငွေ့ထုတ်လုပ်သည့် တစ်ခုတည်းသော ပြည်ပအခြေစိုက်ကုမ္ပဏီဖြစ်လာသည်။

ymg/sth
#Yangon_Media_Group

#World_Business
Published 16 August 2022

မြင့်တက်လာတဲ့ ကုန်ဈေးနှုန်းများနဲ့အညီ ထုတ်လုပ်နိုင်ရန်အတွက် ထိုင်းနိုင်ငံမှ ခေါက်ဆွဲခြောက်ထုပ်လုပ်ငန်းများက သူတို့ရဲ့ခေါက်ဆွဲခြောက်ထုပ်ဈေးနှုန်းများကို တိုးမြှင့်ခွင့်ပေးဖို့ နိုင်ငံတော်အစိုးရကို ဩဂုတ် ၁၅ ရက်နေ့(တနင်္လာနေ့)က တောင်းဆိုလိုက်ပါတယ်။

ဒါဟာ ၁၄ နှစ်အတွင်း ပထမဆုံးအကြိမ်အနေနဲ့ ခေါက်ဆွဲခြောက်ထုပ်တွေ ဈေးတက်လာဖို့ အလားအလာမြင်တွေ့နေရတာ ဖြစ်ပါတယ်။

ခေါက်ဆွဲခြောက်ထုပ်များနဲ့ အသင့်စားစားသောက်ကုန်များရဲ့ ဈေးနှုန်းတွေကို ထိုင်းနိုင်ငံဥပဒေအတိုင်း ထိန်းချုပ်ထားပါတယ်။

မာမား(Mama)၊ ဝေဝေ(Wai Wai)နဲ့ ဂျပန်နိုင်ငံထုတ် နစ်ဆင်(Nissin) ခေါက်ဆွဲခြောက်အမှတ်တံဆိပ်များအပါအဝင် ခေါက်ဆွဲခြောက်ကုမ္ပဏီကြီး ၅ ခုက သူတို့ခေါက်ဆွဲခြောက်ထုပ်တွေရဲ့ဈေးနှုန်းကို (၆)ဘတ် ( ဝ.၁၇ ဒေါ်လာ ) မှ (၈)ဘတ် ( ဝ.၂၃ ဒေါ်လာ )သို့ ဈေးတက်ခွင့်ပေးရန် ကူးသန်းရောင်းဝယ်ရေးဝန်ကြီးဌာနထံမှ ခွင့်ပြုချက်တောင်းခံခဲ့ကြောင်း ထုတ်ပြန်ခဲ့ပါတယ်။

ရောင်းကုန်များရဲ့ဈေးနှုန်းကို တိုးမြှင့်ခွင့်ပြုရန် အချို့ကုမ္ပဏီတွေရဲ့တောင်းဆိုချက်တွေကို အစိုးရက များမကြာမီအချိန်က ငြင်းပယ်ခဲ့ဖူးပါတယ်။

"ရုရှား-ယူကရိန်းစစ်ပွဲပဋိပက္ခကြောင့် ဆီဈေးနှုန်းသိသိသာသာ မြင့်တက်လာပါတယ်၊ ဂျုံမှုန့်နဲ့ စားအုန်းဆီဈေးနှုန်းတွေလည်း အဆမတန်မြင့်တက်နေပါတယ်" လို့ ထိုင်းနိုင်ငံစားသောက်ကုန်စက်ရုံရဲ့ဒုဥက္ကဌ ဝေဝေ အမှတ်တံဆိပ်လုပ်ငန်းမှ 'ဝီရာနာပါပရူချက်'က ပြောပြပါတယ်။

ရောင်းကုန်ပစ္စည်းအချို့ကို ရှုံးလျက်နဲ့ရောင်းချနေရပြီး ထိုင်းနိုင်ငံအတွင်းမှာ ရောင်းအားကျလာနိုင်ပါတယ်။

ဈေးတက်ဖို့ခွင့်ပြုချက်မရဘူးဆိုရင် နိုင်ငံခြားဈေးကွက်တွေကိုသာ ပြောင်းလဲရောင်းချလာနိုင်ပြီး ထိုဈေးကွက်မှာလည်း ဈေးနှုန်းတက်နေပြီးသား ဖြစ်ပါတယ်။

အစိုးရက ထိုတောင်းဆိုချက်များကို တစ်ဆင့်ချင်းစီ စဉ်းစားသွားမှာဖြစ်ပြီး စားသုံးသူရော ထုတ်လုပ်သူရော နှစ်ဖက်စလုံးအကျိုးရှိအောင် ဆောင်ရွက်သွားမှာဖြစ်ကြောင်း ထိုင်းနိုင်ငံပြည်တွင်းကုန်သွယ်ရေး ညွှန်ကြားရေးမှူးချုပ် 'ဝါတာနာဆက်ဆာအီယမ်'က ထုတ်ပြန်ကြေညာခဲ့ပါတယ်။

Source: CNA
#Yangon_Media_Group

#Local_News
Published_ 16 Aug 2022

မြန်မာနိုင်ငံတော်ဗဟိုဘဏ်က ကင်းလွတ်ခွင့်ပြုတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်တို၏ ပြည်ပမှ နိုင်ငံခြားသုံးငွေဖြင့် ရရှိသောဝင်ငွေများကိစ္စနှင့် စပ်လျဉ်း၍ ၂ဝ၂၂ ခုနှစ်၊ ဩဂုတ်လ ၁၅ ရက် ရက်စွဲဖြင့် ထုတ်ပြန်ထားပါတယ်။

နိုင်ငံခြားသုံးငွေစီမံခန့်ခွဲမှု ဥပဒေအရ ပြည်တွင်း၌ နေထိုင်သူများ၏ ပြည်ပမှ နိုင်ငံခြားသုံးငွေဖြင့် ရရှိသောဝင်ငွေများနှင့် နိုင်ငံခြားသုံးငွေများ ပြည်ပသို့ လွှဲပြောင်းခြင်း နှင့် စပ်လျဉ်း၍ မြန်မာနိုင်ငံတော်ဗဟိုဘဏ်က ထုတ်ပြန်ခဲ့ပါတယ်။

အမိန့်ကြော်ငြာစာအရ ကင်းလွတ်ခွင့်ပြုတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်တို့အား မြန်မာနိုင်ငံတော်ဗဟိုဘဏ်မှ ညွှန်ကြားစာများထုတ်ပြန်၍ နိုင်ငံခြားသုံးငွေများ ရောင်းဝယ်ဖောက်ကားသည့်လုပ်ငန်း (AD) လိုင်စင်ရဘဏ်များသို့ ဆက်လက် အကြောင်း ကြားခဲ့ပါတယ်။

နိုင်ငံခြားသုံးငွေကြီးကြပ်မှု ကော်မတီ၏ လမ်းညွှန်ချက်နှင့်အညီ ကုမ္ပဏီ၊ အဖွဲအစည်း၊ လူပုဂ္ဂိုလ် အနေဖြင့် မိမိကိုယ်တိုင်အတွက် သုံးစွဲခြင်း၊ AD လိုင်စင်ရ ဘဏ်မဟုတ်သော အခြားသူများထံသို့ ရောင်းချခြင်း၊ AD လိုင်စင်ရဘဏ်များသို့ ရောင်းချခြင်းတို့ကို ဆောင်ရွက်နိုင်ကြောင်း သိရပါတယ်။

ကင်းလွတ်ခွင့်ပြုသည့် ကုမ္ပဏီ၊ အဖွဲ့အစည်း၊ လူပုဂ္ဂိုလ်၏ ပြည်ပမှ နိုင်ငံခြားသုံးငွေဖြင့် ရရှိသောဝင်ငွေပမာဏ၏ ၁၀၀% အား ၎င်းကိုယ်တိုင်အတွက် သုံးစွဲခြင်း၊ AD လိုင်စင်ရဘဏ်မဟုတ်သော အခြားသူများထံသို့ ရောင်းချခြင်း၊ AD လိုင်စင်ရဘဏ်များသို့ ရောင်းချခြင်းစသည့် transactions များကို ဆောင်ရွက်ပေးရန် တင်ပြလာပါက ဆောင်ရွက်ပေးရမယ်လို ဖော်ပြထားပါတယ်။

ကင်းလွတ်ခွင့်ပြုတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်ထံမှ နိုင်ငံခြားငွေ ဝယ်ယူ ထားတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်အား ၎င်းတို့ဝယ်ယူထားသည့် နိုင်ငံခြားငွေကို မိမိကိုယ်တိုင်အတွက် သုံးစွဲခြင်းနှင့် AD လိုင်စင်ရဘဏ်များသို့ ပြန်လည်ရောင်းချခြင်းကိုသာ ဝယ်ယူသည့်နေ့မှ ရက်ပေါင်း (၃၀) အတွင်း ဆောင်ရွက်ပေးရမှာ ဖြစ်ပါတယ်။

ကင်းလွတ်ခွင့်ပြုတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်က ၎င်းကိုယ်တိုင်အတွက် သုံးစွဲခြင်းပြုရာတွင် နိုင်ငံဖြတ်ကျော် ဆောင်ရွက်သည့် cross border transactions ကိုလည်းကောင်း၊ ကင်းလွတ်ခွင့်ပြုတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်ထံမှ နိုင်ငံခြားငွေ ဝယ်ယူထားတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်က ဝယ်ယူထားသည့် နိုင်ငံခြားငွေကို မိမိကိုယ်တိုင်အတွက် သုံးစွဲခြင်းပြုရာတွင် နိုင်ငံဖြတ်ကျော် ဆောင်ရွက်သည့် cross border transactions ကိုလည်းကောင်း နိုင်ငံခြားသုံးငွေ ကြီးကြပ်မှုကော်မတီရဲ့ ခွင့်ပြုချက်ရယူရန်မလိုဘဲ ဆောင်ရွက်နိုင်ကြောင်း သိရပါတယ်။

သို့သော် မြန်မာနိုင်ငံတော်ဗဟိုဘဏ်က ညွှန်ကြားသည့်အတိုင်း Electronic Reporting System ဖြင့် သတင်းပေးပို့ရမည်ဖြစ်သဖြင့် AD လိုင်စင်ရဘဏ်များ အနေဖြင့် (due diligence) စိစစ်ဆောင်ရွက်သွားရမယ်လို့ ဆိုပါတယ်။

ygm_mnn
#Yangon_Media_Group

Published 16 August 2022

မြန်မာနိုင်ငံဆိုင်ရာ ကုလသမဂ္ဂ အထူးသံတမန် နိုလင်းဟေဇာဟာ တနင်္လာနေ့က မြန်မာနိုင်ငံကို ပထမဆုံးအကြိမ်သွားရောက် တယ်လို့ အေပီသတင်းအရသိရပါတယ်။ ဒါဟာ သူမကို‌ ပြီးခဲ့တဲ့ အောက်တိုဘာမှာ ခန့်အပ်ပြီးကတည်းက ပထမဆုံးခရီးဖြစ်ပါတယ်။

ဟေဇာဟာ “ ဆိုးရွားလာနေတဲ့ မြန်မာ့အခြအနေနှင့် လက်ငင်းစိုးရိမ်ပူပန်မှုတွေအပြင် သူမကို တာဝန်ပေးအပ်ထားတဲ့ အခြားနယ်ပယ်နှင့်ဆိုင်တာတွေကိုဆွေးနွေးမယ်လို့ ကုလသမဂ္ဂရဲ့ ပြောရေးဆိုခွင့်ရပုဂ္ဂိုလ် စတက်ဖိန်း ဒူဂျာရစ်က ပြောပါတယ်။

သူမဟာ မြန်မာစစ်တပ်ခေါင်းဆောင်တွေနှင့် အကျဉ်းချခံထားရဲ့ ခေါင်းဆောင်ဟောင်းဒေါ်အောင်ဆန်းစုကြည်တို့နှင့်တွေ့ မတွေ့ကိုတော့ သူက အသေးစိတ်ပြောမသွားဘူးလို့သတင်းကရေးသားပါတယ်။

“ သူမဟာ နိုင်ငံရေး နယ်ပယ်တစ်လွှားက ပါဝင်သူတွေ၊အရပ်ဘက်အဖွဲ့အစည်းတွေနှင့် လက်ရှိပဋိပက္ခဖြစ်နေတဲ့ လူမှုအဖွဲ့ အစည်းတွေနှင့် ကျယ်ပြန့်စွာ ဆွေးနွေးပြီးတဲ့နောက် သူမရဲ့ယခုခရီးဖြစ်လာတာလို့ ဒူဂျာရစ်ကပြောပါတယ်၊

သူမဟာ စင်္ကာပူက လူ့အခွင့်အရေးလှုပ်ရှားတက်ကြွသူနှင့် အမျိုးသမီးတွေစီးပွားဖွံ့ဖြိုးတိုးတက်ရေးမြှင့်တင်ပေးတဲ့ ကုလရဲ့ UNIFEMကို ၁၉၉၄မှ ၂၀၀၇ အထိ ဦးဆောင်ခဲ့ သူဖြစ်ပါတယ်။ ၂၀၀၇မှ ၂၀၁၄ အထိ ကုလသမဂ္ဂ စီးပွားရေးနှင့် လူမှုရေးကော်မရှင် (အာရှပစိဖိတ်ဒေသ)ရဲ့ အမှုဆောင်အတွင်းရေးမှူးလုပ်ခဲ့သူလည်းဖြစ်ပါတယ်။

Source:AP/ CNA

#Health_Science
Published 16 August 2022

တက်စ်တိုစတီရုန်းဟော်မုန်းဟာ ယောက်ျားတွေရဲ့ လိင်စိတ်ကို တွန်းအားပေးနှိုးဆွနိုင်တယ်လို့ သိထားကြပေမယ့် ယုယကြင်နာတဲ့စိတ်ကိုလည်း ဖြစ်စေကြောင်း လေ့လာတွေ့ရှိထားပါတယ်။

သုတေသီများက ကြွက်မျိုးကွဲအထီးများကို တက်စ်တိုစတီရုန်းများထိုးပေးပြီး သူတို့ရဲ့လက်တွဲဖော်တွေနဲ့ တုံ့ပြန်နေထိုင်ပုံတွေကို လေ့လာခဲ့ကြပါတယ်။

ထိုကဲ့သို့ထိုးပေးခြင်းဖြင့် ထွေးပွေ့ယုယစိတ်၊ ရင်းနှီးဖော်ရွေစိတ်များဖြစ်ပေါ်လာပြီး ပေါင်းသင်းဆက်ဆံရေးကောင်းမွန်လာကြောင်း တွေ့ရှိခဲ့ရပါတယ်။

တက်စ်တိုစတီရုန်းက အောက်ဆီတိုစင်လိုခေါ်တဲ့ အချစ်ဟော်မုန်းကို တိုးများစေပါတယ်။

"တက်စ်တိုစတီရုန်းက ပုံမှန်အားဖြင့် လိင်ပိုင်းဆိုင်ရာ စိတ်နှိုးဆွခြင်းကို ဖြစ်ပေါ်စေတယ်လို့သာ သိထားခဲ့ပေမယ့် အခုတော့ ပေါင်းသင်းဆက်ဆံရေးမှာပါ အကျိုးသက်ရောက်မှုတွေရှိနေတာကို တွေ့ခဲ့ရပါတယ်" လို့ အတ္တလန်တာ အီမော်ရီတက္ကသိုလ်မှ စိတ်ကျန်းမာရေးတွဲဖက်ပရော်ဖက်ဆာ 'အော်ဘရေကယ်လီ'က ပြောပြခဲ့ပါတယ်။

ကြွက်ထီးတွေနဲ့စမ်းသပ်ရာမှာ မိတ်လိုက်တဲ့အချိန် စိတ်အားထက်သန်မှုရှိပြီး ကိုယ်နေထိုင်ရာနေရာကို ကာကွယ်ရာမှာ ရန်လိုစိတ်တွေရှိနေပါတယ်။

ဒါပေမဲ့ ကြွက်မတွေ ကိုယ်ဝန်ဆောင်ချိန်မှာ ဂရုစိုက်ကြင်နာတတ်ပြီး သားပေါက်တွေကိုလည်း ကာကွယ်ပေးချင်တဲ့သဘော ရှိနေပါတယ်။

တက်စ်တိုစတီရုန်းထိုးပေးလိုက်ရင် ကြင်နာယုယစိတ်တွေ လျော့နည်းသွားမယ်လို့ ထင်ခဲ့ကြပေမယ့် ကြွက်ထီးလေးက သူ့ကြင်ဖက်အပေါ် ပိုပြီးယုယလာတာဟာ အံ့အားသင့်စရာဖြစ်ခဲ့ကြပါတယ်။

အဲဒီနောက် ကြွက်မကိုဖယ်ထုတ်လိုက်ပြီး ကြွက်ထီးတစ်ကောင်တည်း လှောင်အိမ်ထဲထားလိုက်ပါတယ်။

ထို့နောက် နောက်ထပ်ကြွက်ထီးတစ်ကောင်ကို လှောင်အိမ်ထဲထည့်ပေးလိုက်ပြီး ရန်လိုတဲ့သဘောတွေ့ရမလားလို့ စောင့်ကြည့်ခဲ့ကြပါတယ်။

ပုံမှန်အားဖြင့် ကြွက်ထီးတစ်ကောင်က သူ့နေရာကို တခြားကြွက်ထီးတစ်ကောင်ရောက်လာရင် လိုက်တိုက်ခိုက်တတ်သလို လုံးဝရှောင်ရှားတာမျိုး ပြုလုပ်တတ်ပါတယ်။

ဒါပေမဲ့ တက်စ်တိုစတီရုန်းထိုးပေးထားတဲ့ ကြွက်ထီးကတော့ နောက်ထပ်ဝင်လာတဲ့ကြွက်ထီးကို ရင်းနှီးတဲ့ပုံစံမျိုး ပြသနေပါတယ်။
ဒါပေမဲ့ ထိုကြွက်ကိုပဲ နောက်ထပ်တက်စ်တိုစတီရုန်းတွေ ထိုးပေးလိုက်ရာမှာတော့ ရန်လိုတဲ့သဘောဖြစ်လာခဲ့တာကို တွေ့ရှိခဲ့ပါတယ်။

လူသားတွေနဲ့စမ်းသပ်ဖို့က ကြွက်တွေထက် ပိုမိုရှုပ်ထွေးပေမယ့် အဆိုပါ လေ့လာချက်ကနေ အခြေခံသဘောတရားတွေ ရလာနိုင်ပါတယ်။

ဟော်မုန်းအပြင် ဦးနှောက်အစိတ်အပိုင်းအချို့ကပါ တူညီနေတာတွေ ရှိနေပါတယ်။

၂၀၂၁ လေ့လာချက်တစ်ခုအရ တက်စ်တိုစတီရုန်းပမာဏများ ပြားခြင်းက အမျိုးသားတွေမှာ တွန့်တိုတတ်တဲ့သဘောရှိပြီး တကိုယ်ကောင်းဆန်တဲ့အပြုအမူတွေ တွေ့ရကြောင်း သိရှိထားပါတယ်။

Source: Daily Mail
#Yangon_Media_Group

#Local_News
Published_16 August 2022

လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေပံ့ပိုးမှုဖြင့် 'အစားအစာ တီထွင်ဆန်းသစ်မှုဌာန' ဆောက်လုပ်ပြီးစီးသွားပြီဖြစ်ကြောင်း မြန်မာနိုင်ငံဆိုင်ရာ တရုတ်သံရုံးမှ ထုတ်ပြန်လိုက်သည်၊၊

လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေပံ့ပိုးမှုဖြင့် “လန်ချန်း-မဲခေါင်ဒေသတွင်း သစ်သီးဝလံထုတ်ကုန်များဖြင့် စီးပွားရေးဖွံ့ဖြိုးတိုးတက်မှုမြှင့်တင်ရေး သုတေသန” စီမံကိန်း“အစားအစာ တီထွင်ဆန်းသစ်မှုဌာန ဆောက်လုပ်ပြီးစီးခြင်းနှင့် သစ်သီးအခြောက်ခံမှုလေ့ကျင့်ရေး စတင်ခြင်းအခမ်းအနား” ကို သြဂုတ်လ ၁၅ ရက်နေ့တွင် ရန်ကုန်မြို့၌ ကျင်းပခဲ့ကြောင်း သိရသည်၊၊

အဆိုပါ အခမ်းအနားတွင် သံမှူးကြီး Mr. Zheng Zhihong က "မြန်မာနိုင်ငံသည် ရာသီဥတုစိုစွတ်ပြီး မြေဆီလွှာ ပေါကြွယ်ဝသဖြင့် သစ်သီးအများအပြား တင်ပို့ခြင်းဖြင့် ဂုဏ်သတင်းကျော်ဇောကြောင်း၊ မြို့ပြဖြစ်တည်မှု အတိုင်းအတာမြှင့်တင်လာမှုနှင့် လူတို့ဝင်ငွေတိုးများလာသည်နှင့်အမျှ သစ်သီးနှင့် သစ်သီးအချောကိုင်ကုန်ပစ္စည်းများ စားသုံးမှုပမာဏ အဆက်မပြတ် တိုးများလာကြောင်း၊ သစ်သီးထုတ်ကုန်အချောကိုင်ခြင်းနည်းပညာနှင့် စက်ပစ္စည်းများ ဖော်ဆောင်တင်သွင်းရာတွင် နည်းပညာဆန်းသစ်တီထွင်မှုကို အပြည့်အဝအသုံးချနိုင်ကြောင်း၊ သစ်သီးအချောကိုင်ထုတ်ကုန်အရည်အသွေးနှင့် တန်ဖိုးများကို ထိရောက်စွာကူညီမြှင့်တင်နိုင်ကာ Industry chain ဖြန့်ကျက်၍ လုပ်ငန်းခွင်ဝင်မှုတိုးမြှင့်ပြီး ပြည်သူလူနေမှုဘဝဖွံဖြိုးတိုးတက်မှုအား အထောက်အကူပြုကြောင်း၊ အစားအစာတီထွင်ဆန်းသစ်မှုဌာန ဆောက်လုပ်ပြီးစီးခြင်းနှင့် သစ်သီးအခြောက်ခံမှုလေ့ကျင့်ရေးတွင် သစ်သီးအချောကိုင်လုပ်ငန်းကုမ္ပဏီများက ခေတ်မီသည့်နည်းပညာမျှဝေမှုကိုဖော်ဆောင်နိုင်ပြီး မဲခေါင်မြစ်နိုင်ငံ အစားအစာအချောကိုင်လုပ်ငန်း ဖွံ့ဖြိုးတိုးတက်မှုအား တွန်းအားပေး၍ ပိုမိုများပြားသည့် လယ်ယာထွက်ကုန်များတင်ပို့မှုကို မြှင့်တင်နိုင်မည်ဟုမျှော်လင့်ကြောင်း "ပြောကြားခဲ့သည်။

လက်ရှိအချိန်အထိ မြန်မာနိုင်ငံအတွက် လန်ချန်း-မဲခေါင်ပူးပေါင်းဆောင်ရွက်မှုအထူးရန်ပုံငွေ စီမံကိန်းပေါင်း ၉၀ ကျော်ဖော်ဆောင်ခဲ့ပြီးဖြစ်ကာ မြန်မာနိုင်ငံ လူမှုရေးနှင့်စီးပွားရေးဖွံ့ဖြိုးတိုးတက်မှုနှင့် လူနေမှုဘဝအကျိုးစီးပွားကောင်းမွန်ရေးအတွက် အရေးပါသည့်အခန်းကဏ္ဍမှပါဝင်ခဲ့ကြောင်း သိရသည်၊၊

ယင်းအခမ်းအနားကို မြန်မာနိုင်ငံဆိုင်ရာ တရုတ်သံရုံး သံမှူးကြီး Mr. Zheng Zhihong ၊ မြန်မာနိုင်ငံသိပ္ပံနှင့် နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်တိုတက်ရောက်အမှာစကားပြောကြားခဲ့ပြီးမြန်မာနိုင်ငံ လန်ချန်း-မဲခေါင် ပူးပေါင်းဆောင်ရွက်ရေးဆိုင်ရာ ပူးပေါင်းညှိနှိုင်းရေးအဖွဲ့ ဒုတိယဥက္ကဋ္ဌ ဦးဝင်းဇေယျာထွန်းက အွန်လိုင်းမှ အမှာစကားပြောကြားခဲ့ကာ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်း၊ မြန်မာနိုင်ငံအခြေစိုက် မဲခေါင်မြစ်ဒေသနိုင်ငံသံတမန်များ (သို့မဟုတ်) ကိုယ်စားလှယ်များနှင့် မြန်မာနိုင်ငံ သက်ဆိုင်ရာဌာန၊ တက္ကသိုလ်နှင့် အဖွဲ့အစည်းကိုယ်စားလှယ်ပေါင်း လူ ၅၀ ကျော် တက်ရောက်ခဲ့ကြောင်း ဖော်ပြထားသည်၊၊

ymg/tthl
#Yangon_Media_Group