#Local_News
Published _9 September 2022

ကချင်ပြည်နယ်၊ မြစ်ကြီးနားမြို့တွင် ငွေစက္ကူအတုထုတ်သည့် စက်၊ငွေစက္ကူအတုနှင့်အတူ အမျိုးသား ၃ ဦးကို စက်တင်ဘာလ ၈ ရက်က ဖမ်းဆီးလိုက်ကြောင်း သိရသည်။

မြစ်ကြီးနားမြို့ ရမ်ပူရပ်ကွက်နေ အသက် ၂၃ နှစ်အရွယ် မောင်ပိုင်လင်းထွေး(ခ)ကာရံဖြိုး ၊အသက် ၂၇ နှစ်အရွယ် ပိုင်စိုးသူ(ခ)ကမား တို့နှစ်ဦးကို ငွေတစ်သောင်းတန်အတု ၂၇ ရွက်၊ YOMA BANK စာတမ်းပါ စာရွက်ဖြင့် ဖုံးအုပ်ထားသည့် တစ်သောင်းတန်အတု အရွက် ၁ဝဝ ပါ ၄ အုပ်၊ ငါးထောင်တန်အတု အရွက် ၁ဝဝ ပါ တစ်အုပ်၊ ဖုန်းနှစ်လုံးနှင့်တူ ကနဦး ဖမ်းဆီးရမိခဲ့ခြင်းဖြစ်ကြောင်း၊ ယင်းတို့၏ ထွက်ဆိုချက်အရ အသက် ၂၁ နှစ်အရွယ် အောင်သူရဆိုသူထံမှ YOMA BANK စာတမ်းပါစာရွက်ဖြင့် ပတ်ထားသည့် တစ်သောင်းတန်အတု ၃၉၂ ရွက်ကို ထပ်မံ ဖမ်းဆီးရမိခဲ့ခြင်း ဖြစ်ကြောင်း သိရသည်။

ယင်းအပြင် ငွေစက္ကူအတု ပြုလုပ်ရာတွင် အသုံးပြုသည့် EPSON CL3210 စာတမ်းပါ Printer တစ်လုံးနှင့် အခြားဆက်စပ်ပစ္စည်းများကို ထပ်မံသိမ်းဆည်းရမိခဲ့သောကြောင့် အဆိုပါ သုံးဦးကို ဗဟိုဘဏ် ဥပဒေပုဒ်မ ၁၀၅/၁၀၆ ဖြင့် အမှုဖွင့်နိုင်ရန် စီစစ်ဆောင်ရွက်နေကြောင်း သိရသည်။

#ymg/mt
#Yangon_Media_Group

#Local_News
Published - 9 September 2022

ယူကေနိုင်ငံတွင် မြန်မာနိုင်ငံသားများ စရိတ်ငြိမ်းဖြင့် တစ်နှစ်တာမဟာဘွဲ့တက်ရောက်နိုင်ရန် အတွက် Chevening ပညာသင်ဆုလျှောက်ထားနိုင်ကြောင်း မြန်မာနိုင်ငံဆိုင်ရာ ဗြိတိသျှသံရုံးမှ ထုတ်ပြန်လိုက်သည်၊၊

အဆိုပါ Chevening ပညာတော်သင်ဆုရရှိနိုင်ရန်အတွက် လိုအပ်သည့်အကြံဉာဏ်ကောင်းများရရှိရန်လာမည့် စက်တင်ဘာလ (၁၃)ရက်ညနေ (၅)မှ (၇)နာရီအထိ zoomဖြင့် webinar တစ်ခုပြုလုပ်သွားမည်ဖြစ်သည်၊၊

ယင်း webinarကို မည်သူမဆိုအခမဲ့ တက်ရောက်နိုင်ပြီးhttps://bit.ly/3qfYoEPတွင် စာရင်းသွင်းနိုင်မည် ဖြစ်သည်၊၊

Chevening ပညာတော်သင်ဆုအကြောင်း သိကောင်းစရာများကို Webinar တွင် မြန်မာနိုင်ငံမှ Ma Yu Wai၊ U Kyaw Moe Aung ၊ Ma Hnin Thazinsoe တို့မှ ဟောပြောကြမည်ဖြစ်ပြီး "Chevening ပညာ တော်သင်ဆု ရရှိအောင် ဘာတွေဆောင်ရွက်ရမလဲနှင့် ယူကေ၌ ပညာသင်ယူခြင်း"ဆိုသည့် ခေါင်းစဉ်ဖြင့် ဟောပြောသွားမည်ဖြစ်ကြောင်းသိရသည်၊၊

Chevening ပညာတော်သင်ဆုတွင် အသက်အရွယ် ကန့်သတ်မှု၊ကိုးကွယ်မှုများ ခွဲခြားထားခြင်းမရှိဘဲ ရည်မှန်းချက်အောင်မြင်လိုသူများ၊ Leadership ပိုင်း စိတ်ဝင်စားသူများနှင့် မိမိနိုင်ငံအတွက် ကောင်းမွန်သော တိုးတက်မှုများရရှိအောင် ဆောင်ရွက်လိုသူများ အနေဖြင့်တက်ရောက်နိုင်မည်ဖြစ်ကြောင်း သိရသည်၊၊

#ymg/tthl
#Yangon_Media_Group

#Local_News
Published - 8 September 2022

ကလေးငယ်များ အပါအဝင် ထိုင်းနိုင်ငံတွင် ပြစ်ဒဏ်ကျပြီး လွတ်ရက်စေ့လာသည့် မြန်မာရွှေ့ပြောင်း ၃၄၀ ကျော်ကို နေရပ်သို့ပြန်လည်ပို့ဆောင်ပေးခဲ့ကြောင်း အလုပ်သမားသံအရာရှိရုံးမှ သိရသည်။

အဆိုပါ မြန်မာရွေ့ပြောင်း လုပ်သား ၃၄၀ ကျော်ကို ရနောင်းကနေ ကော့သောင်းမြို့သို့ ပြန်လည် ပို့ဆောင်ခဲ့ခြင်းဖြစ်သည်။

ပြီးခဲ့သည့် ဩဂုတ် ၈ ရက်နေ့မှ ယခု စက်တင်ဘာ ၈ ရက်နေ့တို့တွင် ထိုင်းနိုင်ငံ၌ အကြောင်းအမျိုးမျိုးကြောင့် ပြစ်ဒဏ်ကျခံပြီး လွတ်ရက်စေ့ မြန်မာရွှေ့‌‌ပြောင်းလုပ်သား အမျိုးသား ၂၃၃ ဦးနှင့် အမျိုးသမီး ၉၃ ဦးအပါအဝင် ကလေးငယ် ၁၉ ဦးကို ထိုင်းနိုင်ငံမှာရှိသည့် အလုပ်သမားသံအရာရှိ ဦးရဲလင်းထက်၊ နယ်ခြားကော်မတီမှ တာဝန်ရှိသူများ၊ ရနောင်းခရိုင်လူဝင်မှု ကြီးကြပ်ရေးဌာနမှ တာဝန်ရှိသူများ၊ နယ်စပ်ဖြတ်ကျော်အထူးတပ်ဖွဲ့မှ တာဝန်ရှိသူများမှ ရနောင်းမြို့မှ ကော့သောင်းမြို့သို့ ပဲ့ချိတ်လှေ (၂၁) စီးဖြင့် ပြန်လည်ပို့ဆောင်ပေးခဲ့ကြောင်း သိရသည်။

ပြည်တွင်း၌ အလုပ်အကိုင်ရှားပါးမှုကြောင့် ထိုင်းနိုင်ငံသို့တရားမဝင် သွား ရောက်လုပ်ကိုင်သူ များပြာလာခြင်းဖြစ်ကြောင်း၊ ထိုင်းနိုင်ငံထဲသို့ တရားမဝင်ဝင်ရောက်သည့် အလုပ်သမားများကို တစ်လထက်မကျော်အချုပ်ထောင်ထဲတွင် နေရကြောင်း သိရသည်။

#ymg/sth
#Yangon_Media_Group

Published 9 Sept 2022

အဲလစ်ဇဘက် ဘုရင်မကြီး ကွယ်လွန်တဲ့ သတင်း ကြာသပတေးနေ့က ထွက်ပေါ်လာပြီးနောက် ဘာကင်ဟမ်နန်းတော်အပြင်ဘက်မှာ မျက်ရည်တွေနှင့် လူအုပ်ကြီးဟာ ခိုကိုးရာမဲ့” "God Save the Queen" ဘုရားသခင် ဘုရင်မကြီးကို ကယ်တင်ပါ ဆိုတဲ့ တေးသီချင်းကို အော်ဟစ်သီဆိုကြပါတယ်။

လန်ဒန်က ဘုရင်မကြီးအိမ်တော်မှာ ယူနီယံဂျက်အလံ တိုင်ဝက်လျှော့ချတဲ့အခါ လူတွေက မျက်ရည်တွေကျလာပြီး တိတ်ဆိတ်စွာနေပေးကြပါတယ်။

လန်ဒန်မြို့ပြင်က ဝင်ဆာရဲတိုက်ကြီးမှာ အလံကိုတိုင်တစ်ဝက်လျော့ချတဲ့အချိန်မှာ သက်တန့်ကြီးပေါ်ထွန်းလာတယ်လို့ အေအက်ဖ်ပီကသတင်းရေးပါတယ်။

Source: AFP

#God_Save_the_Queen

#Queen_ Elizabeth_II

#Britain_Queen_Died

#World_Government
Published 9 September 2022

ဗြိတိန်ထီးနန်းကို ချားလ်စ်ဘုရင်ဆက်ခံလိုက်ပြီးနောက် နိုင်ငံရေးသမားများနဲ့ တက်ကြွလှုပ်ရှားသူများက ကာရစ်ဘီယံဒေသရှိ ကိုလိုနီနယ်ဟောင်းများအတွက် နိုင်ငံအုပ်ချုပ်သူအဖြစ်မှ ဘုရင်စနစ်ကိုဖယ်ရှားပေးရန်နဲ့ ဗြိတိန်အနေနဲ့ ကျွန်လျော်ကြေးပေးဆပ်ရန် ထပ်မံတောင်းဆိုလိုက်ပါတယ်။

ကြာသပတေးနေ့ မွန်းလွဲပိုင်းမှာ သက်တမ်းနှစ် ၇၀ အုပ်စိုးခဲ့တဲ့ ဘုရင်မကြီး'အဲလိဇဘက်'ကွယ်လွန်ပြီးနောက် သားဖြစ်သူ'ချားလ်စ်'က ထီးနန်းဆက်ခံခဲ့တာ ဖြစ်ပါတယ်။

ဂျမေကာဝန်ကြီးချုပ်က ဘုရင်မကြီး'အဲလိဇဘက်'အတွက် ဝမ်းနည်းပူဆွေးနေဦးမှာဖြစ်ကြောင်း ပြောကြားခဲ့ပြီး အန်တီဂွာနဲ့ ဘာတူဒါဝန်ကြီးချုပ်တို့ကလည်း မီးသင်္ဂြိုဟ်တဲ့နေ့မတိုင်ခင်အထိ အလံတိုင်တွေမှာ အလံတဝက်နှိမ့်ချထားရန် အမိန့်ပေးထားပါတယ်။

အချို့လူတွေကြား ၂၁ ရာစုမှာ ဝေးလံတဲ့နေရာဒေသမှ ဘုရင်စနစ်အုပ်ချုပ်ပုံနဲ့ပတ်သက်ပြီး မလိုလားတဲ့သူတွေ ရှိနေပါတယ်။

ယခုနှစ်အစောပိုင်း ရဝမ်ဒါထိပ်သီးအစည်းအဝေးတုန်းက ဓနသဟာယခေါင်းဆောင်အချို့ဟာ ဘုရင်မကြီး'အဲလိဇဘက်'ထံမှ ၅၄ နိုင်ငံဦးဆောင်အုပ်ချုပ်ခွင့်ကို 'ချားလ်စ်'ထံ လွှပြောင်းမှုအား မကျေနပ်ကြောင်း ထုတ်ဖော်ခဲ့ကြပါတယ်။

မတ်လတုန်းက လက်ရှိထီးနန်းအရိုက်အရာခံ အိမ်ရှေ့မင်းသား'ဝီလီယမ်'နဲ့ ကြင်ယာတော်'ကိတ်'တို့ဟာ ဘီလစ်ဇ်၊ ဂျမေကာ၊ ဘဟားမားတို့ထံ ၈ ရက်တာခရီးသွားစဉ်တုန်းက ကျွန်လျော်ကြေးပေးဆပ်ရန် တောင်းဆိုခံခဲ့ရပါတယ်။

"အုပ်ချုပ်သူပြောင်းသွားပြီဆိုတော့ ဒီနေရာဒေသရဲ့ ကျွန်လျော်ကြေးအကြောင်းအရာများကို တိုးမြှင့်ဆွေးနွေးဖို့ အခွင့်အရေးမျှော်လင့်နေပါတယ်"လို့ ဘဟားမားအမျိုးသားလျော်ကြေးရေးရာ ကော်မတီဥက္ကဌ 'နိုင်ယမ်ဘီဟောလ်ကမ်းဘဲလ်'က ကြာသပတေးနေ့က ပြောကြားလိုက်ပါတယ်။

'ဟောလ်ကမ်းဘဲလ်'က ဘုရင်မကြီးမိသားစုထံ ဝမ်းနည်းကြောင်းအသိပေးခဲ့ပြီး ပြီးခဲ့တဲ့နှစ်က ဗြိတိန်အုပ်စိုးချိန်ကျော်လွန်ကာ ဘာဘဒိုစ်က ပြည်သူ့သမ္မတနိုင်ငံဖြစ်လာတဲ့ အချိန်မှာ ကျွန်စနစ်ရဲ့ရက်စက်ကြမ်းကြုတ်မှုကို ချားလ်စ်က အသိအမှတ်ပြုခဲ့တယ်လို့ ဆိုလိုက်ပါတယ်။

'ချားလ်စ်'က ကျွန်လျော်ကြေးအတွက် တရားမျှတမှုကို ဦးဆောင်လမ်းပြနိုင်မယ်လို့ ယုံကြည်ထားကြောင်း 'ဟောလ်ကမ်းဘဲလ်'က ဆိုပါတယ်။

၁၅ ရာစုနဲ့ ၁၉ ရာစုနှစ်တွေတုန်းက အာဖရိကလူမျိုး ၁၀ သန်းကျော်ကို ဥရောပနိုင်ငံတွေက အတ္တလန်တိတ်ကျွန်များအဖြစ် ရောင်းဝယ်ခေါ်ဆောင်ခဲ့ပြီး ကြမ်းတမ်းလှတဲ့ ခရီးစဉ်အတွင်း အသက်ရှင်ခဲ့သူများကို ကာရစ်ဘီယံနဲ့ အမေရိကတို့မှာ စိုက်ပျိုးရေးအတွက် အဓမ္မစေခိုင်းခဲ့ပါတယ်။

နန်းတက်လာတဲ့ဘုရင်အသစ်ကတော့ လျော်ကြေးကိစ္စနဲ့ ပတ်သက်ပြီး ပြောကြားခြင်း မရှိသေးပါဘူး။

ဘုရင်မကြီးရဲ့ မြေးမြစ်တွေက လျော်ကြေးရေးရာပြောဆိုခွင့်ရှိနေကြောင်း ဂျမေကာလျော်ကြေးရှေ့နေ'ရိုဆယ်လီယာဟာမီလ်တန်'က ဆိုပါတယ်။

"တော်ဝင်မိသားစုထဲက ဘယ်သူပဲနန်းတက်သည်ဖြစ်စေ အာဖရိကလူမျိုးလျော်ကြေးများပေးဖို့ တောင်းဆိုခံရမှာဖြစ်ပါတယ်၊ ဗြိတိန်တော်ဝင်မျိုးနွယ်တွေ ကျွန်တော်တိုနိုင်ငံတွေကို အုပ်ချုပ်နေတာကို ဖယ်ရှားဖို့လုပ်ဆောင်သင့်ပါတယ်"လို့ ကာရစ်ဘီယံငြိမ်းချမ်းရေးလှုပ်ရှားမှု အထွေထွေအတွင်းရေးမှူးချုပ်'ဒေးဗစ်ဒန်နီ'က ပြောကြားလိုက်ပါတယ်။

ဩဂုတ်လက စစ်တမ်းကောက်ယူရာမှာ ဂျမေကာလူမျိုး ၅၆ ရာခိုင်နှုန်းက ဗြိတိန်ဘုရင်အုပ်ချုပ်ရေးစနစ်ကို ဖယ်ရှားဖို့ ဆန္ဒရှိနေပါတယ်။

Source: Reuters
#Yangon_Media_Group

#World_Archaeology
Published 9 September 2022

လွန်ခဲ့တဲ့ နှစ်ပေါင်း ၂,၇၀၀ ကျော်က တရုတ်အထက်တန်းလွှာ လူတစ်ဦးရဲ့ အုတ်ဂူထဲမှာ ကမ္ဘာ့ရှေးအကျဆုံး အသားဖြူခဲမိတ်ကပ်ကို တွေ့ရှိခဲ့ပါတယ်။

ရှေးဟောင်းရောမလူမျိုးတွေ အသုံးမပြုခင် နှစ်ပေါင်း ၃၀၀ လောက်ကတည်းက ထိုတရုတ်ဒေသမှ လူများက အသားဖြူမိတ်ကပ်တွေ အသုံးပြုနေကြတာဖြစ်မယ်လို့ ယူဆရပါတယ်။

၇၇၀ ဘီစီမှ ၄၇၆ ဘီစီအတွင်းက တရုတ်မြောက်ပိုင်းရှိ အဆင့်မြင့်လူတန်းစားများမြှုပ်နှံတဲ့ သုဿာန်ထဲက အုတ်ဂူထဲမှာမြှုပ်ထားတဲ့ ကြေးသေတ္တာ ၆ ခုထဲမှာ အဖြူရောင်အမှုန်လေးတွေ တွေ့ရှိခဲ့တာဖြစ်ပါတယ်။

အဖြူမှုန်တွေက အုတ်ဂူတွေထက် သက်တမ်းပိုရင့်မယ်လို့ တရုတ်သိပ္ပံအကယ်ဒမီတက္ကသိုလ်(UCAS)မှ ရှေးဟောင်းသုတေသနပညာရှင်များက မှတ်ချက်ပြုလိုက်ပါတယ်။

၁၆၀၀ ပြည့်နှစ်တွေတုန်းကလည်း ဥရောပအထက်တန်းလူတန်းစားတွေမှာ အဆိပ်ရှိတဲ့ခဲနဲ့ ရှာလကာရည်ကိုရောနှောကာ ခဲမိတ်ကပ်ဖြူတွေကို သုံးစွဲခဲ့ကြပါတယ်။

ထိုမိတ်ကပ်အသုံးပြုတာကလည်း တန်ရာတန်ကြေးပေးဆပ်ရပြီး ကျန်းမာရေးဆိုးရွားမှုများ ဖြစ်ပေါ်လာပါတယ်။

ပါဝင်တဲ့ရောင်ခြယ်ပစ္စည်းတစ်မျိုးက ခဲဆိပ်ဖြစ်စေကာ အရေပြားထိခိုက်စေပြီး အသက်သေဆုံးသည်အထိ ဖြစ်တတ်ပါတယ်။

ဒါပေမဲ့ တရုတ်ရှေးဟောင်းလက်ရာများအရ အသားဖြူခြင်းကို အလွန်တန်ဖိုးထားကြပါတယ်။

အီဒီမိတ်ကပ်ထဲက ဆဲရူဆိုက်သတ္တုမှာ ခဲကာဗွန်ပါဝင်ပြီး ခဲပမာဏမြင့်မားတဲ့ ပစ္စည်းဖြစ်ကာ လူ့ခန္ဓာကိုယ်ကို အဆိပ်အတောက်ဖြစ်စေပါတယ်။

တော်ဝင်မျိုးနွယ်တွေနဲ့ အထက်တန်းစားတွေသာမက ဂျပန်ဆာမူရိုင်းတွေလည်း ဒီမိတ်ကပ်ကိုသုံးစွဲခဲ့ကြပြီး မွေးဖွားလာတဲ့ ကလေးတွေကို ဘေးဖြစ်စေပါတယ်။

ထိုအသိုင်းအဝိုင်းမှမွေးလာတဲ့ ကလေးတွေဟာ အမေတွေအသုံးပြုခဲ့တဲ့မိတ်ကပ်တွေကြောင့် ခဲဆိပ်သင့်ကြပြီး ကိုယ်လက်အင်္ဂါချို့တဲ့ယိုယွင်းစေပါတယ်။

ဂျပန်သဘာဝပတ်ဝန်းကျင်ကျန်းမာရေး တက္ကသိုလ်က ဆာမူရိုင်းတွေနဲ့ သူတို့ကလေးတွေ သေဆုံးရတဲ့အကြောင်းအရင်းကို လေ့လာနေကြပါတယ်။

ကလေးအလောင်းတွေရဲ့အရိုးတွေကို ဓာတ်မှန်ရိုက်ကြည့်တဲ့အခါ လူကြီးတွေပါဝင်တဲ့ ခဲပမာဏထက် အဆပေါင်းဒါဇင်နဲ့ချီပြီး ပိုများနေကြောင်း သုတေသီများတွေ့ရှိခဲ့ကြပါတယ်။

၃ နှစ်အောက်ကလေးတွေမှာ ပိုဆိုးပြီး အရိုး ၁ ဂရမ်မှာ ခဲ ၁,၂၄၁ မိုက်ခရိုဂရမ်နှုန်းပါဝင်ကာ ဒါဟာ အာရုံကြောချို့တဲ့တဲ့ ပြဿနာဖြစ်နိုင်တဲ့ သတ်မှတ်ချက်ထက် အဆ ၁၂၀ ကျော်ပိုများနေတာဖြစ်ပါတယ်။

#Source: Daily Mail
#Yangon_Media_Group

#Local_News
Published _9 September 2022

မော်လမြိုင်သို့ လူနာပို့ပြီးပြန်လာသည့် လူနာတင်ယာဉ်တစ်စီး ယနေ့ နံနက်ပိုင်း တစ်နာရီ မထိုးမီအချိန် မိုင်းဆွဲခံရကာ တစ်ဦးပြင်းထန်ဒဏ်ရာ ရခဲ့ကြောင်း အောင်မင်္ဂလာနာရေးကူညီမှုနှင့် လူမှုကယ်ဆယ်ရေးအသင်းက သိရသည်။

မိုင်းဆွဲခံရသည့်ယာဉ်မှာ အဆိုပါအသင်းမှ ယာဉ်ဖြစ်ကြောင်း၊
သံဖြူဇရပ်မြို့နယ် ပိန္နဲတောကျေးရွာအနီးတွင် မိုင်းဆွဲခံရခြင်းဖြစ်ကြောင်းသိရသည်။

ယင်းကြောင့် ယာဉ်မောင်း ပြင်းထန်ဒဏ်ရာရရှိခဲ့ကာ လူနာတင်ယာဉ် နံပါတ်(၃) ပျက်စီးကျေမွသွားကြောင်း အောင်မင်္ဂလာနာရေးကူညီမှုနှင့်လူမှုကယ်ဆယ်ရေးအသင်းက ထုတ်ပြန်ထားသည်။

#ymg/mt
#Yangon_Media_Group

#Local_News
Published_ 9 September 2022

ရခိုင်ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးဗဟိုကော်မတီ၏ လုပ်ငန်းကော်မတီဖြစ်သော ကုလသမဂ္ဂအဖွဲ့အစည်းများ၊ နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်ရေးလုပ်ငန်းကော်မတီ၏ (၁/၂၀၂၂) ညှိနှိုင်းအစည်းအဝေးကို စက်တင်ဘာ ၈ ရက်နံနက်ပိုင်းတွင် နိုင်ငံခြားရေးဝန်ကြီးဌာန၌ ကျင်းပခဲ့ပါတယ်။

အစည်းအဝေးတွင် ကော်မတီဥက္ကဋ္ဌ၊ နိုင်ငံခြားရေးဝန်ကြီး ဦးဝဏ္ဏမောင်လွင်က လုပ်ငန်းကော်မတီအနေဖြင့် ဆက်လက်အကောင်အထည်ဖော်ရန် ကိစ္စရပ်များကို ဆောင်ရွက်နေကြောင်း၊ တိုးတက်မှုရလဒ်များကို နိုင်ငံတကာသို့ ပြသနိုင်ရမည် ဖြစ်ကြောင်းနှင့် ရခိုင်ပြည်နယ်ရှိ တိုင်းရင်းသားများအပါအဝင် အသိုက်အဝန်းများ၏ လူနေမှုဘဝ အမှန်တကယ် အဆင်ပြေချောမွေ့စေရေးအတွက် လက်တွေ့တွင် လုပ်ဆောင်ပေးရန်အရေးကြီးကြောင်း ပြောကြားခဲ့ပါတယ်။

ဆက်လက်၍ ကော်မတီအဖွဲ့ဝင်များက ရခိုင်ပြည်နယ်တွင် သက်ဆိုင်ရာဌာနများအလိုက် ဆောင်ရွက်နေမှုများ၊ ရခိုင်ပြည်နယ်အစိုးရအဖွဲ့မှ ရခိုင်ပြည်နယ်တွင် ကုလသမဂ္ဂ နှင့် နိုင်ငံတကာအဖွဲ့အစည်းများနှင့် အစိုးရ မဟုတ်သည့် နိုင်ငံတကာအဖွဲ့အစည်းများမှ လုပ်ငန်းဆောင်ရွက်နေမှုအခြေအနေများ၊ နေရပ်စွန့်ခွာသူများ စိစစ်လက်ခံပြီးနောက် ပြန်လည်နေရာချထားရေးနှင့်စပ်လျဉ်း၍ ကြိုတင်ပြင်ဆင်ဆောင်ရွက်ထားရှိမှု အခြေအနေများအပါအဝင် ဝန်ကြီးဌာနများအကြား ညှိနှိုင်းပေါင်းစပ်ဆောင်ရွက်မည့် လုပ်ငန်းများကို ဆွေးနွေးခဲ့ကြပါတယ်။

ယင်းနောက် ကော်မတီအတွင်းရေးမှူးဖြစ်သူ နိုင်ငံခြားရေးဝန်ကြီးဌာန၊ အမြဲတမ်း အတွင်းဝန်မှ ကော်မတီ၏ရှေ့ဆက်ဆောင်ရွက်ရန်ရှိသည့် ကိစ္စရပ်များကို လည်းကောင်း၊ တွဲဘက်အတွင်းရေးမှူးဖြစ်သည့် ပြန်ကြားရေးဝန်ကြီးဌာန၊ အမြဲတမ်းအတွင်းဝန်က သတင်းမှန်ပြန်ကြားရေး၏ အခန်းကဏ္ဍများကို ရှင်းလင်းတင်ပြခဲ့ပါတယ်။

ဝန်ကြီးက ရခိုင်ပြည်နယ်အတွက် အကူအညီများကို ကုလသမဂ္ဂ အဖွဲ့အစည်းများနှင့် နိုင်ငံတကာအဖွဲ့အစည်းများထံမှ ရယူရာတွင် မိမိတို့လိုအပ်ချက်နှင့်အညီ ရယူ၍ မြေပြင်တွင် လုပ်ငန်းများကို ထိရောက်စွာ အကောင်အထည်ဖော် ဆောင်ရွက်ရေးအတွက် ညှိနှိုင်း ပူးပေါင်းဆောင်ရွက်ရန် ပြောကြားခဲ့ပါတယ်။

#ygm_mnn
#Yangon_Media_Group

#Asean_News
Published_ 9 September 2022

အင်ဒိုနီးရှားနိုင်ငံ၊ ဂျကာတာမြို့၊ အာဆီယံအတွင်းရေးမှူးချုပ်ရုံး၌ စက်တင်ဘာ ၇ ရက်နှင့် ၈ ရက်တိုတွင် ကျင်းပပြုလုပ်တဲ့ အာဆီယံအသိုက်အဝန်း ၂၀၂၅ အလွန် မျှော်မှန်းချက်ရေးဆွဲရေးဆိုင်ရာ အဆင့်မြင့်လုပ်ငန်းအဖွဲ့၏ တတိယအကြိမ် အစည်းအဝေးသို့ အာဆီယံဆိုင်ရာ မြန်မာအမြဲတမ်းကိုယ်စားလှယ် ဦးအောင်မျိုးမြင့်အောင် တက်ရောက် ခဲ့ပါတယ်။

အစည်းအဝေးတွင် ပူးတွဲသဘာပတိများအဖြစ် ကမ္ဘောဒီးယားနိုင်ငံ၊ နိုင်ငံခြားရေးနှင့် နိုင်ငံတကာပူးပေါင်းဆောင်ရွက်ရေးဝန်ကြီးဌာန ဒုတိယဝန်ကြီး H.E. Dr. Chem Widhya နှင့် မလေးရှားနိုင်ငံ အဆင့်မြင့် ကိုယ်စားလှယ် H.E. Dato’ Zainuddin Yahya တို့က ဆောင်ရွက်ခဲ့ကြပါတယ်။

အဆိုပါ အစည်းအဝေးသို့ မြန်မာအမြဲတမ်း ကိုယ်စားလှယ်သည် မြန်မာနိုင်ငံ၏ Alternate Eminent Personနှင့် High-Level Representative အဖြစ်တက်ရောက်ခဲ့ပြီး၊ အာဆီယံအဖွဲ့ဝင်နိုင်ငံများမှ ထင်ပေါ်ကျော်ကြားပုဂ္ဂိုလ်များ၊ အဆင့်မြင့် ကိုယ်စားလှယ်များနှင့် အာဆီယံအတွင်းရေးမှူးချုပ်ရုံးမှ ကိုယ်စားလှယ်များ တက်ရောက်ခဲ့ကြပါတယ်။

ယခု တတိယအကြိမ်မြောက်အစည်းအဝေးတွင် အာဆီယံ အသိုက်အဝန်း ၂၀၂၅ အလွန် မျှော်မှန်းချက်ရေးဆွဲရေးဆိုင်ရာ အထောက်အကူပြု လုပ်ငန်းအဖွဲ့၏ ဒုတိယ အကြိမ်အစည်းအဝေး အစီရင်ခံစာအပေါ် လမ်းညွှန်မှုပေးခြင်း၊ အာဆီယံ အသိုက်အဝန်း ၂၀၂၅ အလွန် မျှော်မှန်းချက်ရေးဆွဲရေးအတွက် သက်ဆိုင်သူအားလုံးနှင့် ဆွေးနွေးမည့် အစီအစဉ်၊ အာဆီယံနိုင်ငံရေးနှင့် လုံခြုံရေးအသိုက်အဝန်းမဏ္ဍိုင်၊ စီးပွားရေးအသိုက်အဝန်း မဏ္ဍိုင်နှင့် လူမှုရေးနှင့် ယဉ်ကျေးမှု အသိုက်အဝန်းမဏ္ဍိုင်တို့မှ အာဆီယံအသိုက်အဝန်း ၂၀၂၅ အလွန် မျှော်မှန်းချက်တွင် ထည့်သွင်းမည့် အဓိကအချက်များ (Core Elements)နှင့် အာဆီယံအဖွဲ့အစည်း ခိုင်မာစေခြင်းနှင့် စွမ်းဆောင်ရည် အားကောင်းစေရေးအတွက် အကြံပြုချက်စာတမ်းတို့အပေါ် အမြင်ချင်းဖလှယ်ခဲ့ကြပါတယ်။

အစည်းအဝေးတက်ရောက်သူများက အာဆီယံ အသိုက်အဝန်း ၂၀၂၅ အလွန် မျှော်မှန်းချက်တွင် ထည့်သွင်းရန် ပေးပိုထားပြီးဖြစ်သည့် အဆိုပြုချက်များသည် အာဆီယံ ပဋိညာဉ်စာတမ်းပါ ရည်ရွယ်ချက်နှင့် အခြေခံမူများနှင့်အညီ လက်ရှိ အာဆီယံ အသိုက် အဝန်း ၂၀၂၅ အကောင်အထည်ဖော်မှုနှင့် ကာလလယ် သုံးသပ်ချက်ကို အခြေခံသင့် ပါကြောင်း၊ ပြင်ပမိတ်ဖက်အဖွဲ့အစည်းများနှင့် ပူးပေါင်းဆောင်ရွက်ရာတွင်လည်း ပိုမိုစည်းလုံးသည့် အားလုံးပါဝင်သောတုံ့ပြန်နိုင်မှု အားကောင်းသည့် အဖွဲ့အစည်း အဖြစ်နှင့် အာဆီယံ၏ အချက်အချာကျမှုနှင့် ဦးဆောင်မှု မြှင့်တင်နိုင်မည့်အချက်များကို အလေးထား ဆောင်ရွက်ရန်လိုအပ်ကြောင်းဖြင့် ဆွေးနွေးခဲ့ကြပါတယ်။

#ygm_mnn

#Yangon_Media_Group

#World_Health
Published 9 September 2022

ဦးနှောက်ကင်ဆာဆိုတာက ကြိုတင်စစ်ဆေးလို့ရတဲ့ ကင်ဆာမျိုးမဟုတ်ပါဘူး။

ဒါကြောင့် ရောဂါလက္ခဏာတွေကို သတိပြုမိဖို့ အလွန်အရေးကြီးပါတယ်။

ကလေးတွေနဲ့လူကြီးတွေမှာ ဦးနှောက်အကြိတ်စဖြစ်လာတဲ့ အစောပိုင်းလက္ခဏာများကို ယူကေဦးနှောက်အကြိတ်အဖွဲ့အစည်းက ပြီးခဲ့တဲ့လက သတိပေးဖော်ပြခဲ့ပါတယ်။

ဦးနှောက်အကြိတ်အမျိုးအစားပေါင်း ၁၀၀ ကျော်ဟာ ဇီဝပုံစံအရရော ကုသမှုနည်းလမ်းတွေမှာပါ ကွဲပြားကြပါတယ်။

အချို့အမျိုးအစားက လူငယ်တွေကိုသာသက်ရောက်စေပြီး အချို့ကတော့ လူကြီးတွေမှာသာ ဖြစ်ပေါ်တတ်ပါတယ်။

အကြိတ်ရှိတဲ့အပေါ်မူတည်ပြီး လက္ခဏာများ ကွဲပြားစွာခံစားရစေသလို လုံးဝမခံစားရတာမျိုးလည်း ရှိတတ်ပါတယ်။

ဦးနှောက်ကင်ဆာဖြစ်လာစေနိုင်တဲ့ လက္ခဏာတွေကတော့..

(၁) အကြောဆွဲခြင်း

တက်ခြင်း၊ အကြောဆွဲခြင်းတို့ဖြစ်ပေါ်တယ်ဆိုရင် အရေးပေါ်ဌာနသို့သွားရောက်ပြီး ဆရာဝန်က ဦးနှောက်ဓာတ်မှန်ရိုက်သင့်/ မရိုက်သင့် ဆုံးဖြတ်ပါလိမ့်မယ်။

(၂) ခန္ဓာကိုယ်တစ်ဖက်ခြမ်းတည်းမှ မျက်နှာ၊ လက်တံ၊ ခြေတံအားနည်းခြင်း

ထိုအစိတ်အပိုင်းတွေမှာ လေဖြတ်သလိုမျိုး အားနည်းလာတတ်ပြီး အချိန်ကြာတာနဲ့အမျှ ပိုသိသာလာတတ်ပါတယ်။

(၃) စကားပြောမပီသခြင်း

ကိုယ်ပြောချင်တဲ့ စကားကို မပြောပြနိုင်ဘဲ အမှားတွေပြောမိတာမျိုး၊ တစ်ခါတလေမှာ ပြောစရာစကားလုံး ရှာမရဖြစ်တတ်ပေမယ့် ခဏခဏဖြစ်လာပြီဆိုရင်တော့ ဆေးကုသမှုခံယူသင့်ပါပြီ။

(၄) လုပ်ကိုင်နိုင်စွမ်း ပြောင်းလဲလာခြင်း

အရင်ကလုပ်နေကျကိစ္စတွေကို လုပ်ရတာ ခက်ခဲရှုပ်ထွေးလာတာလည်း လက္ခဏာတစ်ခုပါ။

(၅) အမြင်အာရုံပြောင်းလဲခြင်း

ဦးနှောက်အကြိတ်ကြောင့် မျက်လုံးဘေးက မြင်ကွင်းကို မြင်ရခက်ခဲလာနိုင်ပါတယ်။

(၆) စာဖတ်ရခက်ခဲခြင်း အဓိပ္ပာယ်သဘောပေါက်ရန် ခက်ခဲခြင်း

စာရေးသားရတာ ခက်ခဲလာမယ်၊ စာဖတ်လို့ရပေမယ့် အဓိပ္ပာယ်ကို သဘောမပေါက်နိုင်ဘူးဆိုရင် ဆရာဝန်ပြသသင့်ပါတယ်။

(၇) ခေါင်းကိုက်ခဲခြင်း

ခေါင်းကိုက်ခြင်းဝေဒနာက ဦးနှောက်အကြိတ်နဲ့ ဆက်စပ်နေပါတယ်။
ဒါပေမဲ့ ဦးနှောက်အကြိတ်လို့ သတ်မှတ်ဖို့အတွက် ခေါင်းကိုက်လက္ခဏာတစ်ခုတည်းနဲ့တော့ မပြောနိုင်ပါဘူး။

#Source: The Jerusalem Post
#Yangon_Media_Group

Published 9 Sept 2022

ဗြိတိန်ရဲ့ သက်တမ်းအရှည်ဆုံးဧကရာဇ်ဖြစ်တဲ့ အသက် ၉၆နှစ်အရွယ် ဘုရင်မကြီး အဲလစ်ဇဘက်ဟာ စကော့တလန်က သူမရဲ့စံအိမ်မှာ ကြာသပတေးနေ့က ကွယ်လွန် သွားပြီဖြစ်ပါတယ်။

“ ကျွန်တော့်ရဲ့ချစ်လှစွာသော မိခင်ကြီး ဘုရင်မကြီး ကွယ်လွန်သွားခြင်းအတွက်  ကျွန်တော်နှင့် ကျွန်တော့်မိသားစုအားလုံး အတွက် အကြီးမားဆုံး ကြေကွဲဝမ်းနည်းရပါတယ်” လို့  သူမရဲ့သား ဗြိတိန်ဘုရင်မင်းမြတ်အသစ် ချားလ်စ်က ပြောပါတယ်။

“ ချစ်ခင်မြတ်နိုးရတဲ့ အမြင့်မြတ်ဆုံးသော မိခင်ကြီး ကွယ်လွန်သွားတဲ့အတွက် ကျွန်တော်တို့ ပူဆွေးသောကဖြစ်ကြရပါတယ်။ သူမကိုဆုံးရှုံးရခြင်းကို တစ်နိုင်လုံး၊ နိုင်ငံတော်နယ်ပယ်နှင့် ဓနသဟာယ ပြီးတော့ တစ်ကမ္ဘာလုံးက ပြည်သူတွေ နက်နက်ရှိုင်းရှိုင်းခံစားကြရမှာလို့ ကျွန်တော်သိပါတယ်” လို့ အသက် ၇၃နှစ်အရွယ် ဘုရင်ချားလ်က သတင်းထုတ်ပြန်ပါတယ်။

ကြာသပတေးနေ့လယ်ကစပြီး ဘုရင်မကြီးရဲ့ဆရာဝန်တွေက သူမကို စောင့်ကြပ်ကြည့်ရှုနေရတယ်လို့ ပြောပြီး မိသားစုဝင်တွေ စကော့တလန်က သူမရဲ့အနီး အပြေးရောက်လာကာ  သူမကျန်းမာရေး ယိုယွင်းလာတဲ့သတင်းတွေကြားခဲ့ရတာဖြစ်ပါတယ်။

လန်ဒန်မြို့လယ်က ဘတ်ကင်ဟမ်နန်းတော်အပြင်မှာ လူထောင်ပေါင်းများစွာစုရုံးနေကြပါတယ်။  အဲဒီနေရာမှာ အလံကို တိုင်တစ်ဝက်လျော့ချတဲ့အခါလူတွေကငြိမ်သက်ပေးကြပါတယ်။

ဘုရင်ချားလ်စ်နှင့် ကြင်ယာတော် မိဖုရား ကာမီလာတို့ဟာ သောကြာနေ့ လန်ဒန်ကိုမပြနခင်  ဘုရင်မကြီးကွယ်လွန်ခဲ့တဲ့  ဘာမိုရယ်ရဲတိုက်ကြီးမှာ ဆက်လက်နေထိုင်ဦးမှာဖြစ်ပါတယ်။ လန်ဒန်မှာ ချားလစ်ဘုရင်ဟာ   တိုင်းပြည်ကို မိန့်ခွန်းပြောရန်ရှိပြီး ဝန်ကြီးချုပ် လစ်ထရပ်စ်နှင့်လည်းတွေ့ဆုံမယ်လို့ တော်ဝင်အရာရှိတွေကပြောပါတယ်။

ပြီးခဲ့တဲ့နှစ်ကမှ ခင်ပွန်းဖြစ်သူ ကြင်ယာတော်မင်းသားကြီး သေဆုံးခဲ့ပြီးနောက် အဲဒီနှစ်ကုန်ပိုင်းလောက်မှာ ဘုရင်မကြီးဟာ episodic mobility လို့ခေါ်တဲ့ သွားရလာရခက်တဲ့ ဝေဒနာတစ်မျိုးခံစားခဲ့ရပါတယ်။ အဲဒါကြောင့် သူမဟာ အများပြည်သူနှင့် ထိတွေ့ဆက်ဆံမှုတွေ ရုပ်သိမ်းခဲ့ရပါတယ်။

ပြီးခဲ့တဲ့ အင်္ဂါနေ့က ဝန်ကြီးချုပ်သစ် ထရပ်စ်ကို ခန့်အပ်စဉ်တစ်ကြိမ် သူမဟာ နောက်ဆုံးတာဝန်ထမ်းဆောင်ခဲ့တာဖြစ်ပါတယ်။

ဘုရင်မကြီးကွယ်လွန်ခြင်းဟာ နိုင်ငံအတွက်ရော ကမ္ဘာကြီးအတွက်ပါ ကြီးမားစွာတုန်လှုပ်မှုဖြစ်စေပါတယ်လို့ ထရပ်စ်က ပြောပါတယ်။

ဘုရင်မကြီးဟာ ၁၉၅၂ခုနှစ် ဖေဖော်ဝါရီ(၆)ရက်မှာ ဖခင် ဂျော့-၆ ဘုရင် ကွယ်လွန်ပြီးနောက် အသက် ၂၅နှစ်အရွယ်မှာ ထီးနန်း အရိုက်အရာကိုဆက်ခံခဲ့ပါတယ်။

အဲဒီအချိန်မှာ ဗြိတိန်မှာ ဝန်ကြီးချုပ်က ဝင်စတန်ချာချီဖြစ်ပြီး ဆိုဗိယက်ခေါင်းဆောင်က ဂျိုးဆက်စတာလင်ဖြစ်ပါတယ်။ ကိုးရီးယားစစ်ပွဲလည်းပြင်းထန်နေချိန်ပါ။

သူမကွယ်လွန်ချိန်မှာ ဘုရင်မကြီးဟာ ယူနိုက်တက်ကင်းဒမ်းရဲ့ နိုင်ငံခေါင်းဆောင်သာမက ဩစတြေလျ၊ဘာဟာမား၊ ဘဲလစ်၊ကနေဒါ၊ဂရင်နာဒါ၊ဂျာမေကာ၊နယူးဇီလန်၊ပါပေါ နယူးဂီနီ၊ စိန့်လူစီယာ၊စိန့်ကစ်နှင့်နီဗစ်၊ တူဗာလူ၊ ဆော်လမွန်ကျွန်းမျာ၊ စိန့်ဗင်စင့်နှင့် ဂရင်နာဒိုင်း နှင့် အန်တီဂွာနှင့်ဘာဘူဒါတို့ရဲ့ နိုင်ငံ့ခေါင်းဆောင်လည်းဖြစ်ပါတယ်၊

Source Reuters

#Queen_ Elizabeth_dies

#Britain_Monarch

#King_Charles

#Local_News
Published - 8 September 2022

နိုင်ငံခြားငွေနဲ့ ရရှိတဲ့ မြန်မာသင်္ဘောသား လစာငွေတွေကို တတ်နိုင်သမျှ အမြင့်ဆုံးနှုန်းထားနဲ့ ဝယ်ယူပေးဖို့ ဗဟိုဘဏ်က ညွှန်ကြားထားတယ်လို ပင်လယ်ကူးသင်္ဘောသား အလုပ်သမားများအဖွဲ့ချုပ် (MSF) က ထုတ်ပြန်ထားပါတယ်။

#Yangon_Media_Group