#Local_News
Published_ 16 October 2023

စတုတ္ထအကြိမ် အသည်းအစားထိုး ခွဲစိတ်ကုသမှု(ဒုတိယနေ့)အဖြစ် မင်္ဂလာဒုံ၊ အမှတ်(၁)တပ်မတော်ဆေးရုံကြီး(ခုတင်-၁၀၀၀)တွင်တူဖြစ်သူအသည်းအလှူရှင်ကိုနိုင်လင်း၏ အသည်းကိုယူပြီး အဒေါ်ဖြစ်သူ ဒေါ်ညိုညိုထွေးအား အသည်းအစားထိုးခွဲစိတ်ကုသပေးခဲ့ကြောင်း သိရသည်။

ယင်းအသည်းအစားထိုးကုသမှုကို အောက်တိုဘာလ(၁၅)ရက်တွင် ဆောင်ရွက်ခဲ့ပြီး အသည်းအလှူရှင်နှင့် လူနာတို့သည် ခွဲစိတ်ကုသပြီးနောက် ကျန်းမာရေးအခြေအနေကောင်းမွန်လျက်ရှိကြောင်းနှင့် အထူးကြပ်မတ် ကုသခန်း၌ လိုအပ်သောပြုစုကုသမှုများကို သက်ဆိုင်ရာပါရဂူများ၊ ဆေးမှူးများနှင့် သူနာပြု၊ ကျွမ်းကျင်သူများ ကဆက်လက်ဆောင်ရွက်ပေးလျက်ရှိသည်ဟုဆိုသည်။

တပ်မတော်မှ အသည်းအစားထိုး ခွဲစိတ်ကုသမှုအဖွဲ့အနေဖြင့် ၂၀၂၂ ခုနှစ်၊ စက်တင်ဘာလ(၂၇)ရက်နှင့်(၂၈) ရက်တို့တွင် ပထမအကြိမ်အသည်းအစားထိုးလူနာ(၂)ဦးအား လည်းကောင်း၊ ၂၀၂၃ ခုနှစ်၊ ဇန်နဝါရီလ (၃၀)၊(၃၁) ရက်နှင့် ဖေဖော်ဝါရီလ(၁)ရက်တို့တွင် ဒုတိယအကြိမ်အသည်းအစားထိုးခွဲစိတ်ကုသမှုလူနာ ၃ ဦး ၊ တတိယ အကြိမ် အသည်းအစားထိုးခွဲစိတ်ကုသမှုကို ဇူလိုင်လ (၁၈)ရက်တွင်အားလည်းကောင်း အောင်မြင်စွာ ဆောင်ရွက်နိုင်ခဲ့ကြောင်း သိရသည်။

#Local_News #အသည်းအစားထိုးခွဲစိတ်ကုသ  #tthl  #Yangon_Times

၁၆ အောက်တိုဘာ ၂၀၂၃

၂၀၁၅ခုနှစ်က မယ်ကမ္ဘာရွေးပွဲတွင် ဥရုဂွေး နိုင်ငံကိုယ်စားပြု ယှဉ်ပြိုင်ခဲ့တဲ့ ရှာရီကာ ဒီအာမတ်စ်သည် အောက်တိုဘာ ၁၃ ရက်နေ့က သားအိမ်ခေါင်းကင်ဆာဖြင့် အသက် ၂၆နှစ်အရွယ်တွင် ကွယ်လွန်သွားခဲ့တယ်လို့သိရပါတယ်။ သူမဟာ သားအိမ်ခေါင်းကင်ဆာကြောင့် ဓာတုနှင့် ဓာတ်ရောင်ခြည်ကုထုံးတိုဖြင့်ကုသခံနေရစဉ် ကွယ်လွန်ခဲ့ခြင်းဖြစ်ပါတယ်။

သူမကွယ်လွန်ခြင်းအတွက် ဥရုဂွေးတင်မက ကမ္ဘာတစ်လွှားကပါ ထိန့်လန့်တုန်လှုပ်ခဲ့ကြရပါတယ်။ “ ညီမလေးရေး မြင့်မြင့်သာ ပျံတက်ပါတော့ အမြဲထာဝရနော်” လို့ အစ်ကိုဖြစ်သူ မေ့ခ်ဒီအာမတ်စ်က ဆိုရှယ်မီဒီယာမှာရေးခဲ့ပါတယ်။ ၂၀၂၂ မယ်စကြဝဠာ ဥရုဂွေး ကာလရိုမီယိုကလည်း သူမကွယ်လွန်ခြင်းအတွက် ဝမ်းနည်းကြေကွဲခဲ့ပါတယ်။ “ ဒီလောကအတွက် သိပ်ပြီး  ပြောင်းလဲသွားပြီ။ ကျွန်မဘဝမှာ တွေ့ခဲ့ရတဲ့ အချောအလှဆုံး အမျိုးသမီးတွေထဲကတစ်ယောက်” လို့ တသသပြောခဲ့ပါတယ်။

“ အစ်မကိုအမြဲသတိရနေရတော့မှာ။ ကျွန်မကို ကူညီခဲ့တာတွေတင်မကဘဲ ကျွန်မတိုးတက်ကြီးပွားတာ ကိုအစ်မက မြင်ချင်ခဲ့တာလေ” လို့ ၂၀၂၁ ဥရုဂွေးမယ် လိုလာဒီလော့စ်ဆန်တိုးစ်က အမှတ်တရပြောခဲ့ပါတယ်?

၂၀၁၅ မယ်ကမ္ဘာရွေးပွဲကို တရုတ်မှာကျင်းပစဉ်က သူမဟာ ထိပ်ဆုံးဆန်ကာတင် ၃၀ ဦးထဲ ပါခဲ့တာမဟုတ်ပေမယ့် အဲဒီတုန်းက သူမဟာ ၁၈နှစ်အရွယ်မယ်လေးတွေ (၆)ဦးထဲမှာ တစ်ဦးဖြစ်ခဲ့ပါတယ်။

ကမ္ဘာ့ကျန်းမာရေးအဖွဲ့အဆိုအရ သားအိမ်ခေါင်းကင်ဆာဟာ အမျိုးသမီးတွေအကြား ဖြစ်လေ့ဖြစ်ထရှိတဲ့ စတုတ္ထမြောက် ကင်ဆာအမျိုးအစားဖြစ်ပါတယ်လို့သိရပါတယ်။ ၂၀၁၈ခုနှစ်မှာ တစ်ကမ္ဘာလုံးမျာ အမျိုးသမီးပေါင်း ငါးသိန်းခုနှစ်သောင်းခန့်ဟာ သားအိမ်ခေါင်းကင်ဆာခံစားနေကြရပြီး သုံးသိန်းတစ်သောင်းတစ်ထောင်ခန့်ဟာ သေဆုံးခဲ့ရပါတယ်လို့ ကမ္ဘာ့ကျန်းမာရေး   အဖွဲ့ရဲ့ ဝက်ဘ်ဆိုက်မှာဖော်ပြထားပါတယ်။

Source: NDTV

#World_News
Published 16 October 2023

အစ္စရေးလ်အနေဖြင့် ပါလက်စ်တိုင်းအပေါ် ရန်လိုတိုက်ခိုက်မှု မရပ်တန့်ဘူးဆိုပါက တင်းမာမှုများအရှိန် မြင့်မားလာနိုင်ကြောင်း အီရန်က သတိပေးလိုက်ကာ ထိုဒေသတဝိုက်ရှိ အခြားအဖွဲ့များက ဝင်ရောက်လုပ်ဆောင်ရန် အသင့်ဖြစ်နေကြပြီလို့ အစ္စရေးလ်  နိုင်ငံခြားရေးဝန်ကြီးက ပြောကြားခဲ့ကြောင်း ဖားစ်သတင်းဌာနက တနင်္ဂနွေနေ့မှာ ဖော်ပြလိုက်ပါတယ်။

‘’အစ္စရေးလ်တို့ ဆက်ပြီး ရန်ဆောင်တိုက်ခိုက်နေပါက ဒေသတဝိုက်ရှိ ပါတီတွေကလည်း လှုပ်ရှားရလိမ့်မယ်’’ လို့ ဟိုစိန်အမိုင်ရက်ဒိုလာဟီယန်က ပြောကြားခဲ့တာ ဖြစ်ပါတယ်။

အစ္စရေးလ်ဝန်ကြီးချုပ် ဘင်ဂျမင်နေတန်ဟူညာက ဟားမတ်စ်စစ်သွေးကြွတွေကို ဖျက်ဆီးပစ်မယ်လို့ အခိုင်အမာဆိုခဲ့ကာ အစ္စရေးလ်နယ်စပ်မြို့တွေမှာ ဝင်ရောက်သောင်းကျန်းခဲ့တဲ့ အစ္စလာမ်စစ်သွေးကြွတွေကို ရှာဖွေဖို့အတွက် အစ္စရေးလ်တပ်တွေက ဂါဇာကမ်းမြောင်သို့ ဝင်ရောက်ရန် ပြင်ဆင်နေပါတယ်။

အီရန်နိုင်ငံမှ အာဏာအရှိဆုံးခေါင်းဆောင် အိုင်ယာတိုလာအလီခါမီနိုင်က အစ္စရေးလ်ကို ဟားမတ်စစ်သွေးကြွများ တိုက်ခိုက်မှုမှာ အီရန်မပတ်သက်ဘူးလို့ ပြောကြားထားပါတယ်။

အီရန်တို့က ဟားမတ်စ်တို့ကို လက်နက်ထောက်ပံ့နေပြီး အကြမ်းဖက်မှုတွေ ဖြစ်စေတယ်လို့ အစ္စရေးလ်က စွပ်စွဲနေတာ ကြာပါပြီ။

ဒါပေမဲ့ ဘဏ္ဍာရေးနဲ့ ကျင့်ဝတ်ပိုင်းတွေမှာ ထောက်ပံ့ပေးနေတယ်လို့ အီရန်က ဆိုထားပါတယ်။

၁၉၇၉ တော်လှန်ရေးပြီးနောက်ပိုင်း ပါလက်စ်တိုင်းတွေကို ထောက်ပံ့ဖို့က အီရန်တို့ရဲ့ အဓိကမဏ္ဍိုင်တစ်ရပ် ဖြစ်လာပြီး မွတ်ဆလင်တွေရဲ့ ဦးဆောင်သူအဖြစ် ခံယူလာပါတယ်။

အစ္စရေးလ်တို့က ဂါဇာကမ်းမြောင်ကို ဝိုင်းရံပြီး လူမျိုးသုဥ်းသတ်ဖြတ်ရန် ကြိုးစားနေတယ်လို့ အမိုင်ရက်ဒိုလာဟီယန်က ပြီးခဲ့တဲ့ ရက်သတ္တပတ်က စွပ်စွဲလိုက်ကာ ဒီလိုမျိုးတိုက်ခိုက်ခြင်းကြောင့် အရှေ့အလယ်ပိုင်းမှာ စစ်မျက်နှာပြင်အသစ်တွေ ဖြစ်ပေါ်လာနိုင်ကြောင်း သတိပေးလိုက်ပါတယ်။

ဒီလိုမျိုး စစ်မျက်နှာအသစ် ဖြစ်ပေါ်လာခြင်းနဲ့ စစ်ပွဲတင်းမာမှုမှန်သမျှက အမေရိကန်နဲ့ အစ္စရေးလ်တို့နဲ့ တိုက်ရိုက်ပတ်သက်နေတယ်လို့ ဆိုပါတယ်။

အမိုင်ရက်ဒိုလာဟီယန်က ဟားမတ်စ်ခေါင်းဆောင် အစ္စမေးလ်ဟာနီယဲနဲ့ စနေနေ့က ကာတာမှာတွေ့ဆုံကာ အစ္စရေးလ်ကို တိုက်ခိုက်ခဲ့ခြင်းအကြောင်းနဲ့ အဖွဲ့အစည်း အောင်မြင်မှုများ ရရှိစေရန် ဆက်လက်ပူးပေါင်းဆောင်ရွက်ဖို့ သဘောတူညီခဲ့ကြကြောင်း ဟားမတ်စ်ဘက်က ထုတ်ပြန်ကြေညာခဲ့ပါတယ်။

#World_News #အစ္စရေးလ်ကိုအီရန်သတိပေး #တိုက်ခိုက်မှုများမရပ်တန့်
#Source: Reuters

#Local_News
Published-16 Oct 2023

နှစ်စဉ်ရေနစ်မြုပ်သည့် ရေနက်ကွင်းစပါးစိုက်ခင်းများအား ရေနစ်မှုဒဏ်ခံနိုင်သည့်စပါးမျိုးနှင့် မျိုးသန့်များပြောင်းလဲရွေးချယ်စိုက်ပျိုးရန် လိုအပ်ကြောင်း မြန်မာနိုင်ငံဆန်စပါးအသင်းချုပ်မှ သိရသည်။

ပဲခူးမြို့၌ မိုးရွာသွန်းမှုများပြီး မြစ်ရေတက်ခြင်း၊ ဆည်ရေလျှံခြင်းများကြောင့်စပါးစိုက်ခင်းများနှင့် နေအိမ်များနှစ်စဉ်နှစ်တိုင်းလိုလိုရေနစ်မြုပ် ထိခိုက်ပျက်စီးခဲ့ပြီးယခုနှစ်ပဲခူးဒေသရေကြီးရေလျှံမှုအတွင်း ပဲခူးမြို့နယ်အပါအဝင်စုစုပေါင်းမြို့နယ်ရှစ်ခုမှ စပါးစိုက်ဧကတစ်သိန်းဝန်းကျင်ရေနစ်မြုပ်ပျက်စီးခဲ့ရာ မြန်မာနိုင်ငံဆန်စပါးအသင်းချုပ်ဥက္ကဌဉီးရဲမင်းအောင်ကယခုကဲ့သို့အကြံပြု‌ခြင်းဖြစ်သည်။

"ရေကြီးတဲ့နေရာဆို ဘယ်လိုစပါးမျိုးကို စိုက်မလဲ ၊ ဘယ်လိုပုံစံလုပ်မှာလဲ။ စပါးရောစိုက်သင့်လား ၊ မစိုက်သင့်ဘူးလားစဉ်းစားရမယ့် အပိုင်းရှိတယ်။ မွေးမြူရေးလုပ်မလားစသဖြင့်စဉ်းစားရမယ့်အပိုင်းရှိတယ်။ ဒါတွေက MRF အနေနဲ့ဝိုင်းပြီးကူပြီးစဉ်းစားပေးလို့ရတယ်။ တချို့နေရာတွေဆို ဝင်ကူပေးလို့ရနိုင်တာရှိကောင်းရှိနိုင်တယ်။ ဘယ်ကျေးရွာ၊ ဘယ်ကွင်းမှာ ဖြစ်နေပါတယ်ဆိုတာတော့သိဖို့လိုတယ်။ စိုက်ပျိုးရေးလုပ်ငန်းရော၊ မွေးမြူရေးလုပ်ငန်းတွေဟာ စိန်ခေါ်မှုတွေများပါတယ် " ဟု၄င်းကဆက်ပြောသည်။

လတ်တလောတွင် ပဲခူးရေကြီးမှုကြောင့် စပါးစိုက်ဧကတစ်သိန်းကျော် ထိခိုက်ခဲ့ရပြီး ဆန်စပါးအပါအဝင် ကဏ္ဍအသီးသီးမထိခိုက်ပျက်စီးဆုံးရှုံးမှု ပမဏာအတိုင်းအတာကို သက်ဆိုင်ရာဌာန အဖွဲ့အစည်းများမှကွင်းဆင်းတိုင်းထွာပြီးအချက်အလက်များအား ဆက်လက်စုဆောင်းကောက်ခံရယူနေဆဲ ဖြစ်ကြောင်းသိရသည်။

ပဲခူးတိုင်း၌မိုးရွာသွန်းမှုများပြားပြီး မြစ်ရေတက်ခြင်း၊ ဆည်ရေလျှံခြင်းများကြောင့်စပါးနှင့်အခြားသီးနှံ စိုက်ခင်းများအပါအဝင်နေအိမ်များ နှစ်စဉ်နီးပါးရေနစ်မြုပ်ထိခိုက်ပျက်စီးခြင်းများရှိသော်လည်း ယခုနှစ်၌ရေကြီးရေလျှံမှုမှာ နှစ်ပေါင်း၆၀‌ကျော်အတွင်း ထိခိုက်မှုအများဆုံးရေကြီးမှုဖြစ်ကြောင်းသိရသည်။

#Local_News #ရေနက်ကွင်းစပါးစိုက်ခင်းများ #စပါးမျိုးနှင့်မျိုးသန့်များ #YMG/NN

#Local_News
Published -16 October 2023

တရုတ်နိုင်ငံအနေဖြင့် မြန်မာ့ ငြိမ်းချမ်းရေးလုပ်ငန်းစဉ်အပေါ် ခိုင်မာစွာ ရပ်တည်ထောက် ခံလျက်ရှိကာ နိုင်ငံပြိုကွဲစေမည့် လုပ်ဆောင်မှု များကို လက်မခံကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံ တော်ဝန်ကြီးချုပ်ဗိုလ်ချုပ်မှူးကြီး မင်းအောင်လှိုင် ထံ လာရောက်တွေ့ဆုံသည့် တရုတ်နိုင်ငံခြားရေး ဝန် ကြီးဌာန၊အာရှရေးရာ အထူးကိုယ်စားလှယ် Mr. Deng Xijun က ပြောသည်။

ပြည်တွင်းငြိမ်းချမ်းရေးရရှိရေးအတွက် နိုင်ငံတော်အစိုးရနှင့် တပ်မတော်က NCA လမ်းကြောင်းပေါ်မှ ခိုင်မာစွာရပ်တည်၍ ကြိုးပမ်းဆောင်ရွက်လျက် သကဲ့သို့ တရုတ်နိုင်ငံမှလည်း ကူညီဆောင်ရွက်ပေးလျက်ရှိ သည့်အခြေအနေများ၊ တရုတ်နိုင်ငံအနေဖြင့် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်အပေါ် ခိုင်မာစွာ ရပ်တည်ထောက်ခံလျက်ရှိသည့်အခြေအနေများနှင့် နိုင်ငံပြိုကွဲစေမည့် လုပ်ဆောင်မှု များကို လက်ခံမှုမ ရှိ သည့် အခြေအနေများ၊ မြန်မာနိုင်ငံအနေဖြင့်လည်း တရုတ်နိုင်ငံ နှင့် နယ်စပ်ဒေသတည်ငြိမ်ရေးနှင့် ဖွံ့ဖြိုးတိုးတက်ရေးကို အလေးထားဆောင်ရွက်သွား မည့် အခြေအနေများ၊ မြန်မာနိုင်ငံနယ်စပ်ဒေသများတွင် အခြေပြု၍ အိမ်နီးချင်းနိုင်ငံများ ၏ အကျိုးစီးပွားကိုထိခိုက်စေမည့် လုပ်ဆောင်ချက်များကို လက်သင့်ခံမှုမရှိသည့် အခြေအနေများ၊ အချို့တိုင်းရင်းသားလက်နက်ကိုင် အဖွဲ့များအနေဖြင့် ငြိမ်းချမ်းရေး ဆောင်ရွက်ရာတွင် NCA စာချုပ်ကဲ့သို့ခိုင်မာမှု၊ တရားဝင်မှုရှိသည့် စာချုပ်ချုပ်ဆိုနိုင်ခြင်းမရှိဘဲ သဘောတူညီချက်များ၊ ကတိကဝတ်များ ဖြင့်သာဆောင်ရွက်ခဲ့ကြမှု အခြေအနေများနှင့် ခိုင်မာလေးနက် တရားဝင်မှုရှိ သည့် NCA လမ်းကြောင်းအပေါ် လျှောက်လှမ်းပြီး ထာဝရငြိမ်းချမ်းရေး တည်ဆောက်ကြရန်တိုက်တွန်း ဆောင်ရွက်လျက်ရှိမှု အခြေအနေများ ၊ တပ်မတော်အနေဖြင့် ပါတီစုံဒီမိုကရေစီ လမ်းကြောင်းပေါ်တွင် လျှောက်လှမ်းမှုအပေါ် ခိုင်မာစွာရပ်တည်ဆောင်ရွက်လျက်ရှိမှု အခြေအနေများ၊ အွန်လိုင်းလောင်း ကစားမှုများနှင့် အွန်လိုင်းလိမ်လည်မှုများပပျောက်စေရေးနှစ်နိုင်ငံပူးပေါင်း ဆောင်ရွက်သွားမည့်ကိစ္စရပ်များ၊ နှစ်နိုင်ငံပူးပေါင်းဆောင်ရွက်မှုများ ဆက်လက် တိုးမြှင့်ဆောင်ရွက်သွားမည့် ကိစ္စရပ်များ၊ ရခိုင်ပြည်နယ်အတွင်းရှိ နေရပ်စွန့်ခွာသူများ ပြန်လည်လက်ခံရေးနှင့်ပတ်သက်၍ ဆောင်ရွက်လျက်ရှိမှု အခြေအနေ များနှင့် ပတ်သက်ပြီး ဆွေးနွေးခဲ့ကြခြင်း ဖြစ်သည်။

ယင်းအပြင် တရုတ်နိုင်ငံခြားရေးဝန်ကြီးဌာန အာရှရေးရာ အထူးကိုယ်စားလှယ်က တစ်နိုင်ငံလုံး ပစ်ခတ် တိုက်ခိုက်မှုရပ်စဲရေး သဘောတူစာချုပ် (NCA) (၈)နှစ်မြောက် နှစ်ပတ်လည်နေ့ အခမ်းအနားကို ခမ်းနားထည်ဝါစွာဖြင့် အောင်မြင်အောင်ဆောင်ရွက်နိုင်ခဲ့သဖြင့် ဂုဏ်ယူဝမ်းမြောက်ကြောင်းလည်း ပြောကြားခဲ့ကြောင်း သိရသည်။

#Local_News #မြန်မာ့ငြိမ်းချမ်းရေးလုပ်ငန်းစဉ် #နိုင်ငံပြိုကွဲစေမည့်လုပ်ဆောင်မှုများ #Yangon_Times/PP

#Local_News
Published -16 October 2023

ငြိမ်းချမ်းရေးကို မြန်မာ့ကိုယ်ပိုင်နည်းလမ်းဖြင့် ဖော်ဆောင်ရမည်ဟု ထိုင်းနိုင်ငံ၊ နိုင်ငံခြားရေးဝန်ကြီးဌာန၊ ဒုတိယ ဝန်ကြီး Mr. Sihasak Phuangketkeow က ယနေ့ နေပြည်တော်၌ ပြုလုပ်ခဲ့သော တစ်နိုင်ငံလုံးပစ်ခတ် တိုက် ခိုက်မှုရပ်စဲရေး သဘောတူစာချုပ် (NCA) (၈)နှစ်မြောက် နှစ်ပတ်လည်နေ့ အခမ်းအနားတွင် ပြောသည်။

“ပြန်လည်သင့်မြတ်ရေးနဲ့ တွေ့ဆုံဆွေးနွေးမှုများကို အခြေခံကာ မြန်မာဦးဆောင်တဲ့ မြန်မာ့ကိုယ်ပိုင် နည်းလမ်းနဲ့ မြန်မာနိုင်ငံရဲ့ ငြိမ်းချမ်းရေးဖြစ်စဉ်ကို ဖော်ဆာင်သွားရမှာ ဖြစ်ပါတယ်၊ ထိုင်းနိုင်ငံအနေနဲ့ လွန်ခဲ့တဲ့(၈)နှစ်ခန့်ကတည်းကပင် အပြည့်အဝ ထောက်ခံအားပေးခဲ့ပါတယ်။ ယနေ့ထိတိုင် ခိုင်မြဲစွာနဲ့ တသမတ်တည်း ဆက်လက်တည်ရှိနေဆဲဖြစ်ပါတယ်။မည့်သည်နိုင်ငံတွင်မဆို ငြိမ်းချမ်းရေးကို ဦး တည်တဲ့လမ်းကြောင်းမှာ ယင်းနိုင်ငံရဲ့ ပြည်သူများကိုယ်တိုင်က ဖန်တီးဆုံးဖြတ်ရမယ်လို့ ထိုင်းနိုင်ငံအနေနဲ့ ယုံကြည်ပါတယ်”ဟု၎င်းက ပြောသည်။

မြန်မာနိုင်ငံနှင့် ထိုင်းနိုင်ငံတို့၏ ငြိမ်းချမ်းရေးနှင့်သာယာဝပြောရေးတို့မှာ နီးကပ်စွာ ပတ်သက်ဆက်နွှယ်လျက်ရှိကြောင်း၊နယ်နိမိတ်ချင်းထိဆက်နေသော အိမ်နီးချင်းနိုင်ငံအနေဖြင့် အပြန်အလှန်နားလည်မှု၊ အပြန်အလှန်လေးစားမှု၊အပြန်အလှန် အကျိုးဖြစ်ထွန်းမှုတို့ရှိသော စစ်မှန်သည့် မိတ်ဖက်အဖြစ် ဖော်ဆော် သွားရန် ထိုင်းနိုင်ငံ၏ ကတိကဝတ်တွင် ရှိနေကြောင်း၊ မြန်မာနိုင်ငံသည် ထိုင်းနိုင်ငံ၏အကျိုးစီးပွားနှင့် အာဆီယံအပါအဝင် ဒေသတစ်ခုလုံး၏ အကျိုးစီးပွားလည်း ဖြစ်ကြောင်း ၊ယင်းအပြင် မြန်မာနိုင်ငံရှိ အဖွဲ့အစည်းများအနေဖြင့် ယခုလမ်းကြောင်းအတိုင်း ပြီးမြောက် အောင်မြင်အောင် ဆက်လက်လျှောက်လှမ်းသွားကြရန်လည်း ယင်းကတိုက်တွန်းခဲ့သေးသည်။

#Local_News #မြန်မာ့ကိုယ်ပိုင်နည်းလမ်း #ထိုင်းနိုင်ငံခြားရေးဒုဝန်ကြီး #Yangon_Times/PP

#Local_News
Published -16 October 2023

နှစ်တာကာလကြာမြင့်သည့်တိုင် NCA ကို အကောင်အထည်မဖော်နိုင်ခဲ့သောကြောင့် ပြည်ထောင်စုကြီးအတွက် များစွာနှမျောမိကြောင်း သျှမ်းပြည်ပြန်လည်ထူထောင်ရေးကောင်စီ (RCSS) ဥက္ကဋ္ဌ ဗိုလ်ချုပ်ကြီးယွက်ဆစ်က ပြောသည်။

ယနေ့ အောက်တိုဘာလ ၁၅ ရက်တွင် ကျင်းပခဲ့သော တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်လက်မှတ်ရေးထိုးခြင်း (၈) နှစ်ပြည့် အခမ်းအနားတွင် NCA စာချုပ်လက်မှတ်ရေးထိုးထားသည့် တိုင်းရင်းသားလက်နက်ကိုင် အဖွဲ့ အစည်း(၇)ဖွဲ့၏ကိုယ်စား ယင်းက ပြောခြင်း ဖြစ်သည်။

“အထူးသဖြင့် ၂၀၂၀ ပြည့်နှစ် ရွေးကောက်ပွဲဆိုင်ရာ နိုင်ငံရေးအကျပ်အတည်းများ ဖြစ်ပေါ်လာခဲ့ရာမှာ နိုင်ငံ ရေးပြဿနာကို နိုင်ငံရေးနည်းလမ်းနဲ့ မဖြေရှင်းနိုင်ခဲ့ကြတဲ့အတွက် NCA အကောင်အထည်ဖော်မှုသည်လည်း ရပ်တန့်သွားခဲ့ရပါတယ်။ နိုင်ငံ့အရေး၊ ငြိမ်းချမ်းရေးအတွက်အချိန်တွေ အလဟဿ ဖြစ်ခဲ့ရပါတယ်”ဟု ၎င်းက ပြောသည်။

သို့သော်လည်း NCA လက်မှတ်ရေးထိုးထားခဲ့ကြသော တိုင်းရင်းသားလက်နက်ကိုင် တော်လှန်ရေးအဖွဲ့ အစည်းများအနေဖြင့် NCA ၏ အနှစ်သာရများဖြစ်သော နိုင်ငံရေးပြဿနာများကို နိုင်ငံရေးနည်းလမ်းဖြင့် ဖြေရှင်းရေး၊ သက်ဆိုင်သူအားလုံးပါဝင်သော အဓိပ္ပာယ်ပြည့်ဝသည့် နိုင်ငံရေးဆွေးနွေးပွဲများဖြစ်မြောက်ရေးနှင့် အရပ်သားများကို အကာအကွယ်ပေးရေး စသော မူများကိုကိုင်စွဲကာ လက်ရှိနိုင်ငံရေးအကျပ်အတည်းကို ဖြေရှင်းနိုင်ရေးအတွက် တစိုက်မတ်မတ် အားထုတ်ကြိုးပမ်းခဲ့ကြောင်းနှင့် ကြိုးပမ်းနေဆဲလည်း ဖြစ်ကြောင်း ယင်းက အသိပေးတင်ပြခဲ့သည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) သည် အစိုးရ၊ လွှတ်တော်၊ တပ်မတော်၊ တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ ပါဝင် လက်မှတ်ရေးထိုးခဲ့သည့်သာကမ ကုလ သမဂ္ဂ၊ ဥရောပသမဂ္ဂ၊ တရုတ်နိုင်ငံ၊ အိန္ဒိယနိုင်ငံ၊ ထိုင်းနိုင်ငံ၊ ဂျပန်နိုင်ငံတို့က အသိသက်သေအဖြစ် ပါဝင် လက်မှတ်ရေးထိုးခဲ့သည့် သဘောတူစာချုပ်ဖြစ်သည့်အပြင် တွေ့ဆုံဆွေးနွေးခြင်းလမ်းကြောင်းမှတစ်ဆင့် တိုင်းပြည်ရဲ့အုပ်ချုပ်ရေးစနစ် ပြုပြင်ပြောင်းလဲရန် ကြိုးပမ်းခဲ့သော်လည်း အလျှော့အတင်းမလုပ်နိုင်ခဲ့သဖြင့် NCA အကောင်အထည် ဖော်ဆောင်ခြင်းလုပ်ငန်းများ ရှေ့မတိုးနိုင်ဖြစ်ခဲ့ရကြောင်းလည်း ၎င်းက ပြောသည်။

လက်ရှိတွင် ပြည်တွင်း၌ စစ်ရေးပဋိပက္ခ နှင့် နောက်ဆက်တွဲအကျိုးအဆက်များကို ရင်ဆိုင်ကြုံတွေ့နေရသော ကြောင့် ဘက်ပေါင်းစုံ အကျပ်အတည်းကို ပိုမိုပြီးဆိုးဝါးသထက် မဆိုးဝါးလာစေရန် ဝိုင်းဝန်းပြီး အဖြေရှာရမည့် အချိန် ရောက်ပြီဟုလည်း တိုက်တွန်းခဲ့သည်။

ယင်းအပြင် အမျိုးသားပြန်လည်သင့်မြတ်ရေး လုပ်ငန်းစဉ်ကို မဖြစ်မနေ အကောင်အထည်ဖော်ရမည့်အချိန် ကျရောက်နေပြီဖြစ်၍ သက်ဆိုင်သူများအကြား ယုံကြည်မှုတည်ဆောက်နိုင်ရေးကလည်း လိုအပ်နေကြောင်း၊ သူ့မူကိုယ့်မူ အသေစွဲကိုင်နေကြမည်ဆိုပါက လက်ရှိ နိုင်ငံရေးအကြပ်အတည်းကို ကျော်လွှားနိုင်မည်မဟုတ်ကြောင်းလည်း ဆိုသည်။

နိုင်ငံရေးပြဿနာ၏ အရေးကြီးသောအစိတ်အပိုင်းတစ်ရပ်ဖြစ်သည့် ဖွဲ့စည်းပုံအခြေခံဥပဒေကိုလည်းပြင်ရန် လိုအပ်သကဲ့သို့ အားလုံးလက်ခံနိုင်သည့် ဥပဒေ ဖြစ်ရန် လိုကြောင်းလည်း ဗိုလ်ချုပ်ကြီးယွက်ဆစ်က ပြောကြားခဲ့သည်။

#Local_News #NCA #ဗိုလ်ချုပ်ကြီးယွက်ဆစ် #Yangon_Times/PP

#Local_News
Published -16 October 2023

ငြိမ်းချမ်းရေးတွက် ဆန္ဒကိုရှေ့တန်းမတင်ဘဲ ညှိနှိုင်းအဖြေရှာကြ ရန် တိုင်းရင်းသားခေါင်းဆောင် စောမူတူး စေးဖိုး က တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် လက်မှတ်ရေးထိုးခြင်း (၈) နှစ်ပြည့် အခမ်းအနားတွင် တောင်းဆိုလိုက်သည်။

“ကျွန်တော်တို့ အားလုံးဟာ မိမိတို့အသီးသီးရဲ့ ဆန္ဒသဘောထားတွေကိုသာ ရှေ့တန်းမတင်ဘဲ အပြန်အလှန် လေးစားတန်ဖိုးထားမှုနဲ့ အမျိုးသားပြန်လည်သင့်မြတ်ရေးကို ဦးတည်ကာ ညှိနှိုင်းအဖြေရှာကြဖို့ကိုလည်း သက်ဆိုင်သူအားလုံးကို တောင်းဆိုလိုပါတယ်”ဟု ယင်းကဆိုသည်။

မြန်မာနိုင်ငံဟာ လွတ်လပ်ရေး ရပြီးကတည်းက နှစ်ရှည်လများ ဖြစ်ပွားခဲ့သော လက်နက်ကိုင် ပဋိပက္ခကို အဆုံးသတ်နိုင်ရန် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်ရရှိရေး(၂) နှစ်ခန့် အချိန်ယူ ဆွေးနွေးခဲ့ကြရကြောင်း၊နှစ်ဖက်ညှိနှိုင်းဆွေးနွေးဘက်အကြား ရဲရင့်တက်ကြွသောအားမာန်ဖြင့်တွေ့ဆုံ ဆွေး နွေးခြင်းအားဖြင့် အဖြေရှာလိုသည့် အာသီသကိုအခြေခံကြသောကြောင့် NCA ဆိုသည့် သမိုင်းစာမျက်နှာ သစ်တစ်ခု ပေါ်ပေါက်စေခဲ့ခြင်း ဖြစ်ကြောင်း ယင်းကပြောသည်။

“ဒါတွေဟာ အလျှော့အတင်း ပြုလိုတဲ့စိတ်ဓါတ်၊ အခက်အခဲတွေကို အတူတကွ ပူးပေါင်း ဖြေရှင်းလိုတဲ့ဆန္ဒ၊ နိုင်ငံရေးပြဿနာတွေကို နိုင်ငံရေးနည်းနဲ့ ဖြေရှင်းလိုတဲ့သန္နိဋ္ဌာန်၊ ဆွေးနွေးဘက်တစ်ဘက်စီမှာ ပါဝင်ခဲ့ကြတဲ့ ကိုယ်စားလှယ်တွေအကြား ထိန်းသိမ်းထားနိုင်တဲ့ ညီညွတ်မှုနဲ့ယုံကြည်မှုတွေကြောင့်ဖြစ်ပါတယ်။

လက်ရှိ ကာလမှာလည်း ဒီလိုစိတ်ဓါတ်ဆန္ဒနဲ့ ထပ်မံပြီး ကြိုးပမ်းအားထုတ်ကြဖို့ တိုက်တွန်းလိုပါတယ်”ဟု စောမူတူး စေးဖိုးက ပြောသည်။

မြန်မာနိုင်ငံသည် လူမျိုးပေါင်းစုံနေထိုင်သော တိုင်းပြည်ဖြစ်သည့်အတွက် ငြိမ်းချမ်းစွာအတူတကွ နေထိုင်နိုင်ရေး အတွက် ရှေးရှုရန်လိုနေကြောင်း၊ ခါးသီးစွာတွေ့ကြုံခံစားလာခဲ့ကြရသော လက်နက်ကိုင် ပဋိပက္ခကို အမြန်ဆုံး ချုပ်ငြိမ်းစေပြီး အနာဂတ်မျိုးဆက်သစ် ပြည်သူပြည်သား လူငယ်လူရွယ်များအတွက် "ငြိမ်းချမ်းရေး" အမွေအနှစ် ကို ချန်ရစ်ထားနိုင်ရန်၊တရားမျှတမှု နှင့် ဂုဏ်သိက္ခာရှိမှုတို့အပေါ်အခြေခံသည့် တာဝန်ယူမှု၊ တာဝန်ခံမှု၊ ပွင့် လင်း မြင်သာမှုရှိမည့် ငြိမ်းချမ်းရေးကို ဖော်ဆောင်သွားကြရန် နှင့် လက်ရှိနိုင်ငံရေး အကျပ်အတည်းကို ကျော် လွှား၍ ဒီမိုကရေစီနှင့် ဖက်ဒရယ်စံနစ်ကိုအခြေခံသည့် ပြည်ထောင်စုကိုတည်ဆောက်နိုင်ရေး မဆုတ်မနစ် ကြိုးပမ်းကြရန်လည်း ယင်းက ပြောကြားခဲ့သည်။

#Local_News #တိုင်းရင်းသားခေါင်းဆောင် #စောမူတူးစေးဖိုး
#Yangon_Times/PP

#World_Health
Published 16 October 2023

ရောဂါနောက်ဆက်တွဲ လက္ခဏာတွေ ဖြစ်တတ်တာဟာ ကိုဗစ်ရောဂါ တစ်ခုတည်းမဟုတ်ဘဲ အခြားရောဂါတွေဟာလည်း လက္ခဏာများ ကျန်ရှိနေတတ်တယ်ဆိုတဲ့ အထောက်အထားများကို လန်ဒန် ကွင်းမယ်ရီတက္ကသိုလ်မှ သုတေသီများက တွေ့ရှိခဲ့ကြပါတယ်။

အခြားသော အသက်ရှူလမ်းကြောင်း ရောဂါတွေဟာလည်း နောက်ဆက်တွဲ လက္ခဏာများ ရှိနေတယ်လို့ Lancet ဆေးဘက်ဆိုင်ရာဂျာနယ်မှာ ဖော်ပြခဲ့ပါတယ်။

ယခုနှစ် အစောပိုင်းမှာ ကိုဗစ်ရောဂါရဲ့ နောက်ဆက်တွဲလက္ခဏာများ အကြောင်း အများအပြား တွေ့ရှိခဲ့ပြီးနောက် အခြားရောဂါများမှာလည်း အလားတူမျိုး ဖြစ်နိုင်တယ်လို့ ခန့်မှန်းခဲ့ကြကာ သုတေသန ပြုလုပ်ခဲ့တာ ဖြစ်ပါတယ်။

ကိုဗစ်၁၉ရောဂါ ကူးစက်ဖူးသူတွေဟာ အစာအိမ် အူလမ်းကြောင်း၊ အာရုံကြော၊ အရိုးငြမ်းနှင့်ကြွက်သား၊ နှလုံးနှင့်အဆုတ် ပြဿနာများ ပိုပြီးဖြစ်နိုင်ချေရှိကာ ပိုပြီးပြင်းထန်နိုင်ချေ ရှိနေပါတယ်။

ကိုဗစ်နောက်ဆက်တွဲ လက္ခဏာတွေထဲမှာ အနံ့အရသာ ပြဿနာများ၊ ခေါင်းကိုက်ခြင်း၊ မူးဝေခြင်းစတဲ့ လက္ခဏာများ ပိုပြီးဖြစ်ပွားနိုင်ပါတယ်။

ကိုဗစ်ရောဂါကို ပြင်းထန်စွာ ခံစားခဲ့ရသူတွေဟာ နောက်ဆက်တွဲလက္ခဏာများ ပိုမိုပြင်းထန်နိုင်ပြီး နေထိုင်မှုဘဝ အခြေအနေ ယုတ်လျော့လာနိုင်ပါတယ်။

အခြားသော အသက်ရှူလမ်းကြောင်း ရောဂါများမှ နောက်ဆက်တွဲလက္ခဏာများကိုလည်း မသိရှိကြတာမျိုး ဖြစ်နိုင်ဖွယ်ရှိတယ်လို့ သိပ္ပံပညာရှင်များ ယူဆထားကြပါတယ်။

ကိုဗစ်နဲ့ အခြားရောဂါများရဲ့ နောက်ဆက်တွဲလက္ခဏာတွေ အဓိကကွာခြားတာတွေက မှတ်ဉာဏ်ဆုံးရှုံးခြင်း၊ ဆံပင်ကျွတ်ခြင်း၊ အနံ့အရသာ ပြဿနာတို့ ဖြစ်ပါတယ်။

အဆိုပါ သုတေသန အချက်အလက်များဖြင့် လူနာများကို ကောင်းစွာစောင့်ရှောက်နိုင်ကာ အသက်ရှူလမ်းကြောင်းရောဂါတွေရဲ့ နောက်ဆက်တွဲလက္ခဏာများအကြောင်း ဆေးဘက်ဆိုင်ရာ ပညာရှင်တွေ ပိုမိုနားလည်လာစေမှာ ဖြစ်ပါတယ်။  

#World_Health #ကိုဗစ်ရောဂါ ##နောက်ဆက်တွဲလက္ခဏာ #Source: The Jerusalem Post

#World_Health
Published 16 October 2023

ကာကွယ်ကုသလို့ လွယ်ကူတဲ့ လေဖြတ်ခြင်းဝေဒနာကြောင့် ၂၀၅၀ ခုနှစ်အရောက်မှာ နှစ်စဥ်သေဆုံးသူ အရေအတွက် ၁၀ သန်းနီးပါး ရှိလာနိုင်ပြီး အထူးသဖြင့် တိုင်းပြည်ဝင်ငွေ နည်းပါးတဲ့နိုင်ငံတွေနဲ့ အလယ်အလတ် နိုင်ငံတွေမှာ ပိုဖြစ်နိုင်ကြောင်း အစီရင်ခံစာတစ်ခုမှာ ဖော်ပြထားပါတယ်။

Lancet Neurology ဂျာနယ်မှာ ဖော်ပြထားရာမှာ လေဖြတ်ခြင်းကြောင့် သေဆုံးရခြင်းက ၂၀၂၀ မှာ ၆.၆ သန်းရှိရာကနေ ၂၀၅၀ မှာ ၉.၇ သန်း ရှိလာနိုင်ပါတယ်။

ဒီအခြေအနေအတွက် ကာကွယ်ဖို့ အရေးကြီးပုံတွေကို အလေးပေးဖော်ပြထားပါတယ်။

ကာကွယ်ခြင်းနဲ့ ကုသခြင်းတို့အတွက် ကုန်ကျစရိတ်သက်သာတဲ့ စောင့်ကြည့်ရေးစနစ် ထားရှိဖို့ အကြံပြုထားပါတယ်။

အများပြည်သူ သိရှိနားလည်ရန်နဲ့ ကျန်းမာရေးနဲ့ ညီညွတ်တဲ့ နေထိုင်စားသောက်မှုပုံစံများ ကျင့်ကြံဖို့ကိုလည်း အကြံပြုသွားပါတယ်။

ခန္ဓာကိုယ်အင်္ဂါ ထိခိုက်ခြင်း မဖြစ်စေရန်နဲ့ နောက်ထပ်လေဖြတ်ခြင်းများ မဖြစ်ရအောင် အထောက်အထားပြု စောင့်ရှောက်မှုများလည်း လိုအပ်ကြောင်း အိန္ဒိယဆေးဘက်ဆိုင်ရာ သုတေသနကောင်စီမှ ညွှန်ကြားရေးမှူးချုပ် ဒေါက်တာ ရာဂျစ်ဘာရ်က ပြောပြခဲ့ပါတယ်။

အိန္ဒိယသွေးတိုးထိန်းချုပ်စနစ်ဟာ သိသာစွာ အောင်မြင်မှုရလာပြီး လူနာ ၂ သန်းကို ဒီဂျစ်နည်းဖြင့် စောင့်ကြည့်လာနိုင်ကာ ဝေဒနာဖြစ်ပွားမှုတွေရဲ့ တဝက်လောက်မှာ သွေးပေါင်ချိန်ကို လက်တွေ့ထိန်းချုပ်လာနိုင်ပါတယ်။

လေဖြတ်ခြင်းကြောင့် သေဆုံးမှုများလာတာကို ဖြေရှင်းရန် လိုအပ်ကြောင်းး ကမ္ဘာ့လေဖြတ်ဝေဒနာအဖွဲ့အစည်းမှ ဥက္ကဌ ပရော်ဖက်ဆာ ဂျေရာရက်ဂျ်ပန်ဒီယန်က ပြောပြခဲ့ပါတယ်။
နိုင်ငံတော်ဆေးရုံအခြေပြု လေဖြတ်မှတ်တမ်းများနဲ့ လူဦးရေအခြေပြု လေဖြတ်မှတ်တမ်းများကလည်း အရေးကြီးကြောင်း ရောဂါအချက်အလက်နဲ့ သုတေသနဆိုင်ရာ အမျိုးသားစင်တာမှ ဒေါက်တာ ပရာရှန့်မေသာက ဆိုပါတယ်။

ICMR ဌာနခွဲမှ ဒေါက်တာ မီနက်ခ်ရှီရှာမာကလည်း အိန္ဒိယရှိ လေဖြတ်စောင့်ရှောက်ရေးစနစ် တိုးတက်လာမှုနဲ့ သွေးပေါင်ချိန်များခြင်းကို ရှာဖွေကုသဖို့ အရေးကြီးပုံတို့ကိုလည်း ဖော်ပြသွားပါတယ်။

#World_Health သေဆုံးသူ(၁၀)သန်းနီးပါးရှိ #Source: India Today

#Local_News
Published-15 Oct2023

မကွေးတိုင်းဒေသကြီးရှိ မန်းရွှေစက်တော်ဘုရားကြီးအားလာမည့်နှစ်များတွင် သဘာဝဘေးအန္တရာယ်မှ ကာကွယ်ရန်ကြိုတင်ပြင်ဆင်မှုများ ပြုလုပ်သွားမည်ဖြစ်ကြောင်း မန်းရွှေစက်တော်ဘုရား၏ဂေါပကအဖွဲ့မှ တာဝန်ရှိသူတစ်ဦးက ပြောသည်။

အဆိုပါ မန်းရွှေစက်တော်၌ မိုခါမုန်တိုင်းအလွန်နှင့် မိုးများမှုကြောင့် ထိခိုက်ပျက်စီးခဲ့မှုများအားမန်းရွှေစက်တော်ဘုရားပွဲ‌ တော်အမီပြင်ဆင်ဆောင်ရွက်နေလျှက်ရှိကြောင်းသိရသည်။

"လာမယ့်နှစ်တွေမှာလည်း သဘာဝဘေးအန္တရာယ်ကနေကာကွယ်နိုင်ဖို့ ကြိုတင်ကာကွယ်မှုလုပ်ငန်းတွေဆောင်ရွက်သွားဖို့ရှိပါတယ်။ အခုကပွဲတော်အမီ မိုခါမုန်တိုင်းနဲ့ဒီမိုးကာလမှာ မိုးများတာတွေကြောင့် ထိခိုက်တာလေးတွေလဲလုပ်ဆောင်နေပါတယ်။ ဒီအချိန်ကပွဲတော်အချိန်မဟုတ်ပေမယ့် စိမ်းစိုလှပနေ‌တာကြောင့် ဘုရားဖူးလာရောက်ကြဖို့ ဖိတ်ခေါ်ပါတယ် "ဟု၄င်းကဆက် ပြောသည်။

ပြီးခဲ့သည့်မိုးဦးကာလအတွင်းက ဖြစ်ပွားခဲ့သည့်မိုခါမုန်တိုင်းနှင့် မိုးတွင်းကာမိုးများခဲ့သည့်အတွက် ရေတိုက်စားခဲ့ခြင်းများရှိခဲ့ရာ မန်းချောင်းတစ်လျှောက်ပြင်ဆင် ဆောင်ရွက်ခြင်းများနှင့် မန်းရွှေစက်တော်ဘုရားဝန်းသုံးမိုင်လမ်း၌ ဘုရားဖူးကားများသွားလာရေးအဆင်ပြေစေရန် ဆောင်ရွက်ခြင်းများကိုဆောင်ရွက်ခဲ့ကြောင်း သိရသည်။

ထို့အပြင်အောက်စက်တော်ရာတိုင်လုံးကြီးများနှင့်ဘုံခုနှစ်ဆင့်ကိုမြန်မာမှုမပျက်ရှေးမူလက်ရာများအတိုင်းပြင်ဆင်ခြင်းများကိုလည်းပြုပြင်ဆောင်ရွက်‌နေကြောင်းသိရသည်။

မန်းရွှေစက်တော်ဘုရားပွဲတော်အားနှစ်စဉ်တပို့တွဲလဆန်း ၅ ရက်နေ့မှ မြန်မာနှစ်ဆန်း ၁ ရက်နေ့အထိ ကျင်းပလေ့ရှိပြီး ဘုရားပွဲတော်ကာလ၌ တစ်ရက်လျှင် ဘုရားဖူးဦးရေတစ်သောင်းခန့်လာရောက်လေ့ရှိကြောင်း သိရသည်။

#Local_News #မန်းရွှေစက်တော်ဘုရားကြီး #သဘာဝဘေးအန္တရာယ်မှကာကွယ် #YMG/NN

#Local_News
Published 15 October 2023

ရန်ကုန်-မန္တလေး အမြန်လမ်းတွင် မိုးရွာသဖြင့် ခရီးသည်တင်ယာဉ် Express တစ်စီး လမ်းချော်ကာ တိမ်းမှောက်မှုဖြစ်ပွားခဲ့ကြောင်း မီးသတ်တပ်ဖွဲ့သတင်းများအရ သိရသည်။

ယနေ့ အောက်တိုဘာလ ၁၅ရက် မနက် ၈နာရီ ၂၀မိနစ်အချိန်က ရန်ကုန်-မန္တလေးအမြန်လမ်းမကြီးရှိ မိုင်တိုင် ၃၅၂/၁နဲ့ ၃၅၂/၂ကြားမှာ ရန်ကုန်ကနေ မန္တလေးသို့ မောင်းနှင်လာသည့် ခရီးသည်တင် Express ယာဉ်သည် မိုးရွာတာကြောင့် လမ်းချော်ပြီး လမ်းယာဘက်သို့ တိမ်းမှောက်ခဲ့ခြင်းဖြစ်သည်။

Express ယာဉ်တစ်စီး တိမ်းမှောက်မှုကြောင့် စကားအင်းအမြန်လမ်းမီးသတ်စခန်းမှ  ရှာဖွေကယ်ဆယ်ရေးတပ်ဖွဲ့ဝင်များမှ ရှာဖွေကယ်ဆယ်ရေးလုပ်ငန်းများ ဆောင်ရွက် ပေးခဲ့ကြောင်းသိရသည်။

အဆိုပါ Express ခရီးသည်တင်ယာဉ် တိမ်းမှောက်မှုဖြစ်စဉ်အတွင်း လူထိခိုက်ဒဏ်ရာရရှိမှုမရှိကြောင်း မီးသတ်တပ်ဖွဲ့၏ သတင်းထုတ်ပြန်ချက်အရသိရသည်။

#Local_News #ရန်ကုန်-မန္တလေး #လမ်းချော်ကာ တိမ်းမှောက်  #YMG/NN