Published_ 17 October 2023

‘မြန်မာနိုင်ငံသွားဘက်ဆိုင်ရာညီလာခံ’အကြိုလှုပ်ရှားမှုအဖြစ် သက်ကြီးရွယ်အိုများကိုသွားတုတပ်ဆင်ပေးခြင်း နှင့်နှုတ်ခမ်းကွဲ၊အာခေါင်ကွဲလူနာများကိုအခမဲ့ခွဲစိတ်ကုသပေးခြင်းများကိုနေပြည်တော်ရှိသွားနှင့်ခံတွင်းဆေးရုံ၌ဆောင်ရွက်သွားရန်ရှိကြောင်း ကျန်းမာရေးဝန်ကြီးဌာနမှသိရသည်။

အဆိုပါ ‘သွားဘက်ဆိုင်ရာညီလာခံ’ကိုအောက်တိုဘာလ၂၀ရက်မှ၂၁ရက်အထိ နေပြည်တော် MICC-2တွင်ကျင်းပ မည်ဖြစ်ပြီး ညီလာခံအကြိုလှုပ်ရှားမှုအဖြစ် ဧရာဝတီတိုင်းရှိ နှုတ်ခမ်းကွဲ၊အာခေါင်ကွဲလူနာ(၄၃)ဦးကို အခမဲ့ခွဲစိတ်ကုသပေးခဲ့သည်။

နှုတ်ခမ်းကွဲ၊အာခေါင်ကွဲလူနာများကို ဧရာဝတီတိုင်းဒေသကြီး၊ ပုသိမ်မြို့၊ ခုတင်(၅၀၀)ဆံ့ ပြည်သူ့ဆေးရုံကြီးတွင် သွားဘက်ဆိုင်ရာဆေးတက္ကသိုလ်(ရန်ကုန်)မှပါမောက္ခဒေါက်တာထွန်းငွေဦးဆောင်သောအဖွဲ့ဝင်များ၊ပုသိမ်ပြည်သူ့ဆေးရုံကြီးမှ အထူးကုဆရာဝန်ကြီးများမှ ခွဲစိတ်ကုသပေးခြင်းများ ဆောင်ရွက်ပေးခဲ့ပြီး ဧရာဝတီတိုင်းဒေသကြီး ဝန်ကြီးချုပ်နှင့်အဖွဲ့ဝင်များမှကြည့်ရှုအားပေးခဲ့သည်။

၂၀၂၃ခုနှစ်အောက်တိုဘာလအတွင်း ‘မြန်မာနိုင်ငံသွားဘက်ဆိုင်ရာညီလာခံ’အကြိုလှုပ်ရှားမှုအဖြစ် သက်ကြီး ရွယ်အိုများကိုသွားတု(အံကပ်၊အံပုံ)တပ်ဆင်ပေးခြင်းနှင့်နှုတ်ခမ်းကွဲ၊အာခေါင်ကွဲများကိုအခမဲ့ခွဲစိတ်ကုသပေးခြင်းများကိုနေပြည်တော်ရှိသွားနှင့်ခံတွင်းဆေးရုံ၌ဆောင်ရွက်သွားမည်ဖြစ်ကြောင်းသိရသည်။

ယင်းအပြင် နှုတ်ခမ်းကွဲ၊အာခေါင်ကွဲလူနာများကို ရန်ကုန်ပြည်သူ့ဆေးရုံကြီး၊မန္တလေးပြည်သူ့ဆေးရုံကြီး၊ နေပြည်တော်ပြည်သူ့ဆေးရုံကြီး(ကုတင်၁၀၀၀ဆံ့)၊သွားနှင့်အထူးကုဆေးရုံ(နေပြည်တော်)၊မော်လမြိုင်မြို့၊လွိုင်လင်မြို့ ၊လှိုင်သာယာပြည်သူ့ဆေးရုံကြီးများတွင်ဆောင်ရွက်ပေးလျက်ရှိပြီး ရွှေဘိုမြို့၊မြိတ်မြို့၊မကွေးမြို့ပြည်သူ့ ဆေးရုံကြီးများတွင် တိုးချဲ့ဆောင်ရွက်နိုင်ရေးစီစဉ်ဆောင်ရွက်လျက်ရှိကာ ပြည်တွင်းရှိမျက်နှာမေးရိုးနှင့်ခံတွင်း ခွဲစိတ်ကုသမှုဆိုင်ရာဆေးပညာရှင်များအပြင် ပြည်ပပညာရှင်များနှင့်ပါတွဲဖက်၍ ကွင်းဆင်းကုသမှုများကိုလည်း ဆောင်ရွက်ပေးလျက်ရှိကြောင်းသိရသည်။
Yangon_Times/tthl
#Local_News
#Published_ 17 October 2023
#YMG #Yangon_Times

Published_ 17 October 2023

မြန်မာ့ထောပတ်သီးတွေဝယ်ယူရန် ပြင်သစ်နှင့် အိန္ဒိယနိုင်ငံများက အမှာစာတွေရရှိထားပြီး တင်ပို့နိုင်ရန် ဆောင် ရွက် နေကြောင်း မြန်မာနိုင်ငံ ထောပတ်သီးတင်ပို့ရောင်းချသူများအသင်းကသိရသည်။

မြန်မာ နိုင်ငံမှ စိုက်ပျိုးထွက်ရှိသည့် ထောပတ်သီး တန်ချိန် ၈ တန်ကို ပြင်သစ်နိုင်ငံနဲ့ ထောပတ်သီးတန်ချိန် ၁၀၀၀ ကို အိန္ဒိယနိုင်ငံကဝယ်ယူဖို့ အမှာစာတွေ ရရှိထားပြီးအရည်အသွေးကောင်းတဲ့  ထောပတ်သီးများကို နိုဝင်ဘာလဆန်းပိုင်းတွင်ပြည်ပနိုင်ငံတွေကို တင်ပို့ဖို့ ဆောင်ရွက်နေတာဖြစ်ကြောင်းသိရသည်။

ပြည်ပနိုင်ငံများကို ထောပတ်သီးတင်ပို့ရာတွင် ကမ္ဘာ့ပေါက်ဈေးနှင့်အညီ ထောပတ်သီး တစ်တန်ကို ကျပ် ၃၅ သိန်းနဲ့ရောင်းချရန် အဆိုပြုထားပြီး ပြည်တွင်းဈေးကွက် တွင်  ရန်ကုန်လက်လီဈေးအနေဖြင့် တစ်ကီလိုကို ကျပ် ၇၀၀၀ (UAE ၈၀၀၀) အထိ ပေါက်ဈေးရှိကြောင်း သိရသည်။
Yangon_Times/PP
#Local_News
#Published_ 17 October 2023
#YMG #Yangon_Times

Published-17 October 2023

တက္ကသိုလ်များ နိုဝင်ဘာ ၁၆ ရက်တွင် ကျောင်းအပ်လက်ခံ၍  နိုဝင်ဘာ ၂၃ ရက်တွင် ဖွင့်လှစ်သွားမည်ဖြစ်ကြောင်း တက္ကသိုလ်ပါမောက္ခချုပ်များ နှင့် အစည်းအဝေးပြုလုပ်စဉ် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာညွန့်ဖေမှ ပြောကြားခဲ့သည်။

ထိုအစည်းအဝေးကို အောက်တိုဘာ (၁၆)ရက်နေ့ မွန်းလွဲပိုင်းက ဗီဒီယိုကွန်ဖရင့်စနစ်ဖြင့်တွေ့ဆုံ၍ လုပ်ငန်းလမ်းညွှန်များကို ဆွေးနွေးမှာကြားခဲ့ခြင်းဖြစ်သည်။

တွေ့ဆုံစဉ် ပြည်ထောင်စုဝန်ကြီးက နိုင်ငံတော်စီမံအုပ်ချုပ်ရေးကောင်စီ၏ ရှေ့လုပ်ငန်းစဉ်(၅)ရပ်၊ ဦးတည်ချက်(၉)ရပ်တို့ကို တက္ကသိုလ်ဝန်ထမ်းများ အားလုံးသိရှိအောင် ထပ်ဆင့်ရှင်းလင်း ဆောင်ရွက်သွားကြရမည်ဖြစ်ပြီး တက္ကသိုလ်များ၏ ဥပဓိရုပ်ကောင်းမွန်ရေး အလေးထားဆောင်ရွက်ကြရန်လိုကြောင်း၊ နိုဝင်ဘာ ၁၆ ရက်တွင် တက္ကသိုလ်များ၌ ကျောင်းအပ်လက်ခံဆောင်ရွက်ပေးကြရမည်ဖြစ်ကြောင်း ပြောကြားခဲ့သည်။

ဒါ့အပြင် ကျောင်းသား ကျောင်းသူများ အေးချမ်းစွာပညာသင်ကြားနိုင်ရေးအတွက် လိုအပ်သည်များကို ယခုကတည်းက ကြိုတင်ပြင်ဆင် ဆောင်ရွက်ထားကြရမည်ဖြစ်ပြီး မကြာမီကာလတွင် ပညာရေးဝန်ကြီးဌာန၏ အမျိုးသား အားကစားလှုပ်ရှားမှုအဖြစ် အခြေခံပညာ၊ အဆင့်မြင့်ပညာ၊ ဆရာအတတ်ပညာ ကဏ္ဍသုံးခုတွင် ဒေသအဆင့်၊ ဗဟိုအဆင့် အားကစားပြိုင်ပွဲများ ကျင်းပမည်ဖြစ်သည်ဟု ပြောကြားခဲ့ကြောင်းသိရသည်။
Yangon_Times/PP
#Local_News
#Published_ 17 October 2023
#YMG #Yangon_Times

Published 17 October 2023

ရန်ကုန်တိုင်းဒေသကြီး မင်္ဂလာဒုံမြို့နယ် ခရေလမ်း တွင် ယနေ့ မနက်ပိုင်း က တွဲကားတစ်စီး ဘရိတ်ပေါက်ရာမှ ယာဉ် ၄စီးဆင့်တိုက်မှု ဖြစ်ပွားခဲ့ကြောင်း ပုလဲအရန်မီးသတ်တပ်ဖွဲ့ထံ မှ သိရသည်။

အဆိုပါ ဘိလပ်မြေတင်လာသည့် တွဲကားသည် မင်္ဂလာဒုံမြို့နယ်၊ ခရပင်လမ်းရှိ ရာသက်ပန်ကားမှတ်တိုင်အနီး တွင် ဘရိတ် ပေါက် ပြီး လူနာတင်ယာဉ် တစ်စီး ကို ဝင်တိုက်မိပြီး အိမ်စီးကားပါ ထပ်မံတိုက်မိခဲ့ကာ အနီးနားရှိ လျှပ်စစ်ပစ္စည်းဆိုင်ထဲသို့ ဝင်ရောက်ခဲ့ကြောင်း သိရသည်။

"ဘိလပ်မြေတင်လာတဲ့ တွဲကားက ဘရိတ်ပေါက်ပြီး လူနာတင်ယာဉ်တစ်စီးကို ဝင်တိုက်မိတယ်၊နောက် ပြီးတော့ အိမ်စီးကားနှစ်စီးကို ပါ ဝင်တိုက်ပြီးတော့လမ်းဘေးရှိတဲ့ လျှပ်စစ်ပစ္စည်းဆိုင်ထဲကို တွဲကား က ဝင်သွားပြီးတော့ အိမ်စီးကားနှစ်စီးလုံးက ချိတ် ပါသွားပါတယ်၊မီးခိုးတွေပါ ထွက်ပြီး တော့ မီးခိုးတွေပါ ထွက်သွားတယ် ''ဟု ပုလဲအရန်မီးသတ်တပ်ဖွဲ့မှ တပ်ဖွဲ့ဝင်တစ်ဦးကပြောသည်။

အဆိုပါ ယာဉ်တိုက်မှုဖြစ်စဉ်အတွင်း မီးလောင်ကျွမ်းမှုဖြစ်နိုင်ခြေရှိနိုင်သည့် အတွက် ပုလဲအရန်မီးသတ်က မီးသတ်ကားများအပါအဝင် လူနာတင်ယာဉ်များဖြင့် ထွက်ခွာကူညီခဲ့ပြီး ယာဉ်တိုက်မှု
ကြောင့် ထိခိုက် ဒဏ်ရာ ရရှိမှု အခြေနေ တော့ အသေးစိတ်ထုတ်ပြန် ခြင်း မရှိသေးကြောင်း သိရသည်။
Yangon_Times/LW
#Local_News
#Published_ 17 October 2023
#YMG #Yangon_Times

Published 17 October 2023

ပဲခူးတိုင်းဒေသကြီး၊ ပဲခူးမြို့နယ်၊ နေပြည်တော်-ရန်ကုန်အမြန်လမ်းမကြီးတွင် ယာဥ်တိုက် မှုဖြစ်၍ အမျိုးသား၁ဦးသေဆုံးပြီး ထိခိုက်ဒဏ်ရာရသူ၁ဦးရှိကြောင်း မြန်မာနိုင်ငံမီးသတ်တပ်ဖွဲ့မှသိရသည်။

၁၇.၁၀.၂၀၂၃ ရက်နေ့၊ ၀၁ ၃၅ အချိန်ခန့်၊ ပဲခူးတိုင်းဒေသကြီး၊ ပဲခူးမြို့နယ်၊ နေပြည်တော်-ရန်ကုန်အမြန်လမ်းမကြီး၊ မိုင်တိုင်အမှတ် (၂၃/၂) နှင့် (၂၃/၃) ကြားတွင် အောက်တိုဘာလ ၁၇ ရက်နံနက် ၁နာရီ၃၅ မိနစ်အချိန်က ယာဉ်တိုက်ဖြစ်၍ယာဉ်ပေါ်ပါ ကျား (၂)ဦးအနက် ကျား(၁)ဦး သေဆုံး၊ ကျား (၁)ဦး ထိခိုက် ဒဏ်ရာ (မစိုးရိမ်ရ) ရရှိခဲ့ကြောင်းသိရသည်။

သို့ဖြစ်ပါ၍ဘောနတ်ကြီး အမြန်လမ်းမီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်လုပ်ငန်းများ သွားရောက် ဆောင်ရွက်ခဲ့ရာ အမြန်လမ်း ရဲတပ်ဖွဲ့ပိုင် ယာဉ်ဖြင့် ပဲခူးမြို့နယ် ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်းသိရသည်။
#Yangon- Times/PP
#LocalNews
#YMG #Yangon_Times

Published 17 October 2023

တနင်္လာနေ့ညက ဘယ်လ်ဂျီယံနိုင်ငံ ဘရပ်ဆယ်လ်မြို့ အလယ်ပိုင်းမှာ ဆွီဒင်နိုင်ငံသား ၂ ဦး ပစ်သတ်ခံရပြီး အခြားတစ်ဦးကတော့ ဒဏ်ရာရရှိခဲ့ပါတယ်။

အစ္စလာမ်အဖွဲ့ဝင်တစ်ဦးက ဒီလုပ်ရပ်ကို ပြုလုပ်ခဲ့တယ်လို့ ယင်းကိုယ်တိုင် အွန်လိုင်းဗီဒီယိုမှာ ပြောကြားခဲ့ပါတယ်။

ဘယ်လ်ဂျီယံနဲ့ ဆွီဒင်တို့ရဲ့ ဘောလုံးပွဲ စတင်ခါနီးအချိန်မှာ ပစ်ခတ်မှု ဖြစ်ပွားပြီးနောက် သံသယရှိသူ တရားခံဟာ ထွက်ပြေးသွားခဲ့ပြီး ဘယ်လ်ဂျီယံဘက်က အသည်းအသန် လိုက်လံရှာဖွေကာ အကြမ်းဖက် သတိပေးချက်ကို အမြင့်ဆုံးအဆင့် ကြေညာခဲ့ပါတယ်။

အကြမ်းဖက် တိုက်ခိုက်သူဟာ အစ္စရေးလ်- ပါလက်စ်တိုင်းစစ်သွေးကြွ ပဋိပက္ခတွေနဲ့ ဆက်စပ်နေတယ်ဆိုတဲ့ အထောက်အထားတော့ မတွေ့ထားဘူးလို့ ဘယ်လ်ဂျီယံ အစိုးရရှေ့နေတစ်ဦးက ဆိုပါတယ်။

တိုက်ခိုက်ရတဲ့ ရည်ရွယ်ချက်က ထိခိုက်သူတွေဟာ ဆွီဒင်နိုင်ငံသား ဖြစ်နေတာကြောင့် ဖြစ်နိုင်ဖွယ်ရှိပါတယ်။

ကိုရန်မီးရှို့ခြင်းများနဲ့ ဆွီဒင်မှာ အစ္စလာမ်အထွတ်အမြတ် ဆောင်ပုဒ်ကို ဆန့်ကျင်တဲ့ လုပ်ရပ်တွေကြောင့် မွတ်ဆလင်တို့ အမျက်ထွက်ခဲ့ရကာ ဂျီဟဒ်တွေထံမှ ခြိမ်းခြောက်မှုများ ထွက်ပေါ်လာခဲ့ပြီးနောက် ဩဂုတ်လက ဆွီဒင်မှာ အကြမ်းဖက် သတိပေးချက် ဒုတိယအမြင့်ဆုံးအဆင့် ထုတ်ပြန်ခဲ့ပြီး နိုင်ငံရပ်ခြားမှ ဆွီဒင်လူမျိုးတို့ရဲ့ အကျိုးစီးပွားများကို ခြိမ်းခြောက်မှုတွေ မြင့်မားလာနိုင်တယ်လို့ သတိပေးခဲ့ပါတယ်။

ဆိုရှယ်မီဒီယာပေါ်က ဗီဒီယိုတစ်ခုမှာ သံသယဖြစ်ဖွယ် တရားခံက သူ့ကိုယ်သူ အက်ဒဲဆလမ်အယ်ဂူလာနီလို့ ခေါ်ပြီး အလာရ်အတွက် တိုက်ခိုက်ပေးသူတစ်ဦး ဖြစ်တယ်လို့ ဆိုပါတယ်။

ပစ်ခတ်မှုအတွင်း ဒဏ်ရာရခဲ့သူတစ်ဦးကတော့ တက္ကစီယာဥ်မောင်းဖြစ်ကာ အသက်အန္တရာယ် မရှိတော့ဘူးလို့ အစိုးရရှေ့နေက ဆိုပါတယ်။

ခြိမ်းခြောက်မှု မပြီးသရွေ့ အိမ်တွင်းမှာသာ နေထိုင်ကြဖို့ ရှေ့နေနဲ့ ဥရောပကော်မရှင်အဖွဲ့တို့က ဘယ်လ်ဂျီယံပြည်သူတွေကို တောင်းဆိုလိုက်ပါတယ်။

ဘယ်လ်ဂျီယံ ဝန်ကြီးချုပ် အလက်ဇန်ဒါဒီကရူးက ထိခိုက်သေဆုံးသူတွေဟာ ဆွီဒင်တွေဖြစ်တယ်လို့ X ဆိုရှယ်မီဒီယာမှာ အတည်ပြုဖော်ပြခဲ့ပါတယ်။

ဘယ်လ်ဂျီယံမှာ ဆွီဒင်လူမျိုးတွေ တိုက်ခိုက်ခံရတဲ့အတွက် ဆွီဒင်ဝန်ကြီးချုပ်ကို အနူးအညွတ် တောင်းပန်လိုပါကြောင်း၊ ဆုံးရှုံးသွားရတဲ့ နစ်နာသူတွေရဲ့ မိသားစုဝင် မိတ်ဆွေများနဲ့ ထပ်တူဝမ်းနည်းရပါကြောင်း၊ အကြမ်းဖက်များကို အတူတကွ တိုက်ခိုက်သွားမှာ ဖြစ်ကြောင်း ဒီကရူးက ဖော်ပြခဲ့ပါတယ်။

ဖြစ်ပျက်ခဲ့တာနဲ့ ပတ်သက်ပြီး အချက်အလက်များ ပိုမိုသိရှိစေရန် ဘယ်လ်ဂျီယံ အာဏာပိုင်များနဲ့ အပြင်းအထန် ပူးပေါင်းလုပ်ဆောင်နေကြောင်း ဆွီဒင်တရားရေးဝန်ကြီး ဂန်နာစထရွန်မာက ရိုက်တာသတင်းဌာနကို ပြောပြခဲ့ပါတယ်။

သေဆုံးသူ ၂ ဦးဟာ ဘောလုံးပွဲအားပေးသူတွေ ဖြစ်နိုင်ပြီး တနင်္လာနေ့ ညနေခင်းမှာ ယူရို ၂၀၂၄ ခြေစစ်ပွဲတစ်ပွဲအဖြစ် အိမ်ရှင်ဘယ်လ်ဂျီယံက ဆွီဒင်ကို လက်ခံယှဥ်ပြိုင်ခဲ့တာဖြစ်ကာ လုံခြုံရေး အကြောင်းပြချက်များဖြင့် ပထမပိုင်းအပြီးမှာ ပွဲကိုရပ်ဆိုင်းလိုက်ရပါတယ်။

သေနတ်သမားဟာ မပစ်ခတ်ခင်မှာ အလာဟူအက်ဘာလို့ အော်သွားခဲ့ကြောင်း မျက်မြင်တစ်ဦးက ပြောပြခဲ့တယ်လို့ ဘယ်လ်ဂျီယံ သတင်းစာတစ်ခုက ဖော်ပြထားပါတယ်။

ယခုဖြစ်ရပ်ဖြစ်ပြီးနောက် ပြင်သစ်က ဘယ်လ်ဂျီယံနဲ့ နယ်စပ်ဘက်မှာ လုံခြုံရေးများ တင်းကြပ်ထားပါတယ်။
Source: Reuters
#World_News
#YMG #Yangon_Times

Published 17 October 2023

ကောင်းစွာ အိပ်စက်စေနိုင်မယ့် နည်းလမ်းတွေထဲမှာ ပုံမှန်အိပ်ချိန်ထားရှိခြင်း၊ အလင်းကာလိုက်ကာများ တပ်ဆင်ခြင်း၊ အိပ်ရာဝင်ခါနီး အီလက်ထရွန်နစ်ပစ္စည်းများ အသုံးမပြုခြင်းတို့ကို သိထားကြပေမယ့် လူသိနည်းသေးတဲ့ အချက်တစ်ချက်ကတော့ ခြေထောက်နွေးထွေးအောင် ထားရှိခြင်းပါပဲ။

အိပ်တဲ့အခါ ခြေအိတ်ဝတ်အိပ်သူတွေ၊ ခြေထောက်ကို နွေးထွေးအောင် ထားတဲ့သူတွေဟာ ပိုမိုလျင်မြန်စွာ အိပ်ပျော်သလို ကြာရှည်စွာ အိပ်စက်နိုင်ကြတယ်လို့ လေ့လာချက်တွေမှာ တွေ့ရှိထားပါတယ်။

အိပ်စက်တဲ့အခါ ခြေထောက်နွေးထွေးအောင် ထားခြင်းက ကိုယ်တွင်းအပူချိန်ကို လျော့ကျစေကာ စိတ်ခန္ဓာ ပြေလျော့စေတာကြောင့် ကောင်းစွာ အိပ်စက်စေတယ်လို့ ဆန်ဖရန်ဆစ္စကိုအခြေစိုက် ဇီဝဆေးပညာ သိပ္ပံပညာရှင် ဒေါက်တာဘီကန်လောင်က ပြောပြခဲ့ပါတယ်။

ကိုယ်တွင်းအပူချိန်က အိပ်စက်နိုးကြားခြင်း စက်ဝန်းကို ထိန်းညှိရာမှာ အဓိကကျတယ်လို့ ဆိုပါတယ်။

ကိုယ်တွင်းအပူချိန်က စတင်အိပ်စက်စဥ်မှာ စတင်ကျဆင်းလာပြီး နံနက်ခင်းအစောပိုင်းမှာ အနိမ့်ဆုံးဖြစ်သွားကြောင်း၊ အပူချိန်ကျဆင်းတဲ့အခါ ခန္ဓာကိုယ်က ပြေလျော့ပြီး အိပ်ပျော်နေစေကြောင်း ရှင်းပြခဲ့ပါတယ်။

အပူပေးအခင်းပြား အသုံးပြုခြင်း၊ ရေနွေးဖြင့်ရေချိုးခြင်း၊ ခြေထောက်နှိပ်နယ်ခြင်း၊ ခြေအိတ်ဝတ်ဆင်ခြင်းတို့ဖြင့် ခြေထောက်သွေးကြောတွေကို ကျယ်စေကာ သွေးပိုရောက်စေပါတယ်။

ခန္ဓာကိုယ်အခြားနေရာတွေမှ သွေးတွေက ခြေထောက်ပိုရောက်စေပြီး ခန္ဓာကိုယ်အပူကို ဖယ်ရှားပေးတာကြောင့် ကိုယ်တွင်းအပူချိန်ကို ကျဆင်းစေတာ ဖြစ်ပါတယ်။

သွေးလည်ပတ်မှု မကောင်းတဲ့သူတွေမှာလည်း ခြေတွေလက်တွေထံ သွေးလှည့်ပတ်မှု ကောင်းစေမှာ ဖြစ်ပါတယ်။

ခြေထောက်ကို နွေးထွေးအောင် ထားခြင်းဖြင့် အိပ်စက်ခြင်းကို အထောက်အကူ ဖြစ်စေပေမယ့် တစ်ယောက်နဲ့ တစ်ယောက် မတူညီနိုင်တာကိုလည်း သတိပြုရမှာ ဖြစ်ပါတယ်။

ခြေထောက်ကို နွေးထွေးအောင် ပြုလုပ်ရာမှာ အပူလွန်ကဲတာမျိုး၊ မနေနိုင်လောက်အောင် ဖြစ်တာမျိုးကိုတော့ ရှောင်ရှားသင့်ပါတယ်။

ဒါကြောင့် မိမိအတွက် ပိုမိုသင့်လျော်တဲ့ နည်းလမ်းဖြင့်သာ မိမိသက်သာသလို ပြုလုပ်ရန် အရေးကြီးတယ်လို့ အနှစ်ချုပ်ပြောကြားသွားပါတယ်။
Source: New York Post
#World_Health
#YMG #Yangon_Times

၁၇ အောက်တိုဘာ ၂၀၂၃

တရုတ်သမ္မတရှီကျင့်ဖျင်နှင့်တွေ့ဆုံဖို့ ရုရှားသမ္မတ ဗလာဒီမာပူတင်ဟာ ယနေ့ အောက်တိုဘာ ၁၇ ရက် အင်္ဂါနေ့မှာ ဘေဂျင်းကို ရောက်ရှိလာပါတယ်။  ရုရှားနှင့်တရုတ်နှစ်နိုင်ငံအကြား ယုံကြည်မှုနှင့် အကန့်အသတ်မဲ့ မိတ်ဖက်ဖြစ်မှုကို ပြသဖို့ဖြစ်တယ်လို့ ရိုက်တာက သတင်းရေးသားပါတယ်။

ဒါဟာ ပူတင်အတွက် နိုင်ငံတကာရာဇဝတ်ခုံရုံးရဲ့ ဖမ်းဝရမ်းအထုတ်ခံရပြီး ဒုတိယမြောက် နိုင်ငံခြားခရီးစဉ်ဖြစ်ပါတယ်။ သူဟာ ဒီလစောစောပိုင်းက ကာဂျစ်စတန်ကို သွားရောက်ခဲ့ပါတယ်။

ပူတင်ကို ဘေဂျင်းနိုင်ငံတကာလေဆိပ်မှာ တရုတ်စီးပွားကူးသန်းဝန်ကြီး ဝမ်ဝင်ထောက်က ကြိုဆိုခဲ့ပါတယ်။

မော်စကိုကို သမ္မတရှီအလည်အပတ်ရောက်တုန်း ပူတင်ကို ဘေဂျင်းမှာပြုလုပ်မယ့် တတိယအကြိမ် ရပ်ဝန်းတစ်ခု လမ်းကြောင်းတစ်သွယ်ဖိုရမ် ကို တက်ရောက်ဖို့ ဖိတ်ခဲ့တာဖြစ်ပါတယ်။

ပူတင်ဟာ အဆိုပါဖိုရမ်ဖွင့်ပွဲကို တက်ရောက်မှာဖြစ်ပြီး အင်္ဂါနေ့မှာ ဗီယက်နမ်၊ထိုင်း၊မွန်ဂိုလီးယားနှင့်လာအို ခေါင်းဆောင်တွေ  နှင့်ဘေဂျင်းမှာ တွေ့ဖို့ရှိပါတယ်။ အဲဒီအပြင် ဗုဒ္ဓဟူးနေ့မှာကျင်ပမယ့် ဖိုရမ်မှာ တရုတ်သမ္မတရှီမိန့်ခွန်းပြောအပြီးမှာ ပူတင်က မိန့်ခွန်းပြောမှာဖြစ်ပြီး အဲဒီရက်မှာပဲ ရှီနှင့် နှစ်နိုင်ငံအကြားတွေ့ဆုံဆွေးနွေးမှာဖြစ်ပါတယ်။

ပူတင်ဟာ ၂၀၂၂ခုနှစ် ဖေဖော်ဝါရီလတုန်းက ဘေဂျင်းမှာကျင်းပခဲ့တဲ့ ဆောင်းရာသီအိုလံပစ်ပွဲတော်ဖွင့်ပွဲကို   တက်ရောက်ခဲ့  ပါတယ်။ ပူတင်ဟာ ရပ်ဝန်းတစ်ခုလမ်းကြောင်းတစ်သွယ်ဖိုရမ်ကို ယခုတတိယအကြိမ်တက်ရောက်ခြင်းဖြစ်ပြီး ၂၀၁၇နှင့် ၂၀၁၉မှာ ကျင်းပခဲ့တဲ့ ဖိုရမ်တွေကိုလည်းတက်ရောက်ခဲ့တာဖြစ်ပါတယ်။

Source; Reuters

.

Published 17 October 2023

အမျိုးသားများ တဖြည်းဖြည်းနဲ့ ဆံပင်ကျွတ်လာပြီး ထိပ်ပြောင်လာရခြင်းဟာ မျိုးရိုးဗီဇ၊ ဟော်မုန်းတို့ကြောင့် အဖြစ်များပါတယ်။
DHT ဟော်မုန်းဟာ ကျားဟော်မုန်းမှ ဆင်းသက်ဖြစ်ပေါ်လာပြီး မျိုးရိုးဗီဇအရ DHT ဟာ မွေးညင်းပေါက် ကျုံ့စေနိုင်ပြီး ဆံပင်ပါးခြင်း၊ ဆံပင်ကျွတ်ခြင်းတို့ ဖြစ်စေနိုင်ပါတယ်။
ထိုကဲ့သို့ မျိုးရိုးဗီဇအပြင် ထိပ်ပြောင်ခြင်းကို ဖြစ်စေတဲ့ အခြားအကြောင်းအရင်းများလည်း ရှိနေပါတယ်။
 
(၁) ဆေးဝါးများ
ကင်ဆာကုသဆေးများ၊ သွေးပေါင်ချိန်ထိန်းဆေးများ၊ စိတ်ကျရောဂါသက်သာဆေးများ၊ အဆစ်အမြစ်ရောင်သက်သာဆေးများဟာ ဘေးထွက်ဆိုးကျိုးအနေနဲ့ ထိပ်ပြောင်ခြင်းကို ဖြစ်စေတတ်ပါတယ်။
 
(၂) ဟော်မုန်းမညီမျှခြင်း
သိုင်းရွိုက်ပျက်စီးခြင်း၊ ဟော်မုန်းကုသခြင်းတို့လို အခြေအနေတွေမှာ ဟော်မုန်းမညီမျှခြင်းမျိုး ဖြစ်ပေါ်ပြီး DHT အလွန်အကျွံ များလာစေကာ ထိပ်ပြောင်ခြင်းကို ဖြစ်စေပါတယ်။
 
(၃) အသက်အရွယ်
အမျိုးသားတွေ အသက်ကြီးလာတာနဲ့အမျှ တက်စ်တိုစတီရုန်းပမာဏ လျော့နည်းလာပြီး ဆံပင်လျော့ပါးလာစေပါတယ်။
 
(၄) အာဟာရဓာတ်ချို့တဲ့ခြင်း
ဗိုက်တာမင်နဲ့ သတ္တုဓာတ်တွေ ချို့တဲ့လာပါက ဆံပင်ကျွတ်ခြင်းကို ဖြစ်စေပြီး ဗိုက်တာမင် အေ၊ စီ၊ ဒီ၊ အီး၊ ဘိုင်အိုတင်၊ သံဓာတ်ကြွယ်ဝတဲ့ စားစရာများ စားသုံးခြင်းဖြင့် ဆံကေသာကြီးထွားမှုကို အထောက်အကူ ဖြစ်စေပါတယ်။
 
(၅) ဖိစီးမှု
အချိန်ကြာမြင့်စွာ ဖိစီးမှု ခံစားရပါက ပုံမှန်ဆံပင်ကြီးထွားမှု စက်ဝန်းထိခိုက်ပြီး ဆံပင်ဆုံးရှုံးစေပါတယ်။
 
(၆) ရောဂါအခြေအနေများ
အချို့သောရောဂါတွေနဲ့ ကုသမှုတွေ၊ ဦးရေပြားရောဂါကူးစက်မှု၊ ဓာတုကုထုံးတို့ကြောင့်လည်း ဦးရေပြား ဆံပင်ကျွတ်ခြင်း ဖြစ်နိုင်ပါတယ်။
 
(၇) ဦးရေပြားရောဂါကူးစက်ခြင်း
မှိုနဲ့ ဘက်တီးရီးယား ကူးစက်မှုတို့ကြောင့်လည်း ဆံပင်ဆုံးရှုံးစေနိုင်ကာ ဦးရေပြား သန့်ရှင်းအောင် ထိန်းသိမ်းခြင်း၊ ရောဂါကုသခြင်းတို့ဖြင့် သက်သာစေပါတယ်။
 
(၈) ဆေးလိပ်သောက်ခြင်း
ဆေးလိပ်သောက်ခြင်းက သွေးလည်ပတ်မှုနဲ့ ဆံပင်မွေးညင်းပေါက်များအပေါ် ဘေးထွက်ဆိုးကျိုး ဖြစ်စေပါတယ်။
 
(၉) ဆံပင်ပုံစံနှင့် ဆံကေသာသုံးပစ္စည်းများ
ဆံပင်ကို တင်းကြပ်စွာ စည်းထားတာမျိုး၊ ဆံပင်ကို အပူလွန်ကဲစွာ ထိတွေ့စေတာမျိုး၊ ဓာတုပစ္စည်းဆေးပြင်းများ သုံးစွဲတာမျိုးတို့ကြောင့်လည်း ဆံပင်ဆုံးရှုံးခြင်း ဖြစ်စေနိုင်ပါတယ်။
Source: DoctorNDTV

#World_Health

#YMG #Yangon_Times

Published 14 October 2023
၁၁ ကြိမ်မြောက် ကမ္ဘာလုံးဆိုင်ရာ ဗီဒီယိုမီဒီယာဖိုရမ် (VMF)ပွဲအတွက် ကြာသပတေးနေ့က မီဒီယာများ ကိုယ်စားလှယ်များ ပေကျင်းမှာ စုဝေးခဲ့ကြပြီး ပိုမိုကွဲပြားသော၊ အားလုံးပါဝင်သော၊ စိတ်ချခိုင်လုံရသော မီဒီယာအသိုင်းအဝိုင်း ဖြစ်လာရေးအတွက် ဆွေးနွေးခဲ့ကြပါတယ်။
တရုတ် Media Group (CMG)မှ ကျင်းပတဲ့ပွဲကို တရုတ်နဲ့ နိုင်ငံရပ်ခြားမှ လူပေါင်း ၁၄၀ ခန့်တက်ရောက်ခဲ့ကြကာ တူညီတဲ့အနာဂတ်ပုံဖော်ခြင်း အကြောင်းအရာဖြင့် ဆွေးနွေးခဲ့ကြတာ ဖြစ်ပါတယ်။
ယခုနှစ် အစည်းအဝေးပွဲက တရုတ်နိုင်ငံရဲ့ ရပ်ဝန်းတစ်ခု လမ်းကြောင်းတစ်သွယ် စီမံကိန်းရဲ့ ၁၀ နှစ်တာ မှတ်ကျောက်တင်ခံရခြင်းနဲ့ အံဝင်ခွင်ကျ ဖြစ်နေတာကို အလေးပေးဖော်ပြနေပါတယ်။

#Local_News
Published 16 October 2023

ငမိုးရိပ်ရေလှောင်တမံ ရေပိုလွှဲမှ ရေကျော်လာတာကြောင့် ရန်ကုန်တိုင်းဒေသကြီး ဒဂုံမြို့သစ်အရှေ့ပိုင်းမြို့နယ်ရှိ ရပ်ကွက်အချို့ရေကြီးနစ်မြုပ်မှု ဒဏ်ခံနေရကြောင်း ဒေသခံများထံက သိရသည်။

အောက်တိုဘာ ၁၀ရက် ညပိုင်းကတည်းက မြို့နယ်အတွင်းသို့ ရေများဝင်ရောက်လာပြီး လက်ရှိအချိန်ထိ မြေနိမ့်ပိုင်းရပ်ကွက်များတွင် ရေများရှိနေသေးကြောင်း သိရသည်။

''ရေက အခုထိ အချို့နေရာတွေမှာ ဒူးလောက်၊ အချို့နေရာတွေက ပေါင်လောက်ရှိတယ်၊ အခုရေနစ်မြုပ်တဲ့နေရာတွေ အများစုက လက်လုပ်လက်စားတွေများတော့ စားဝတ်နေရေး အခက်ခဲတွေဖြစ်တာပေါ့ အခုရရေ ဘေးဒဏ်ကလဲ နေရာ အတော်များများဖြစ်နေတော့ သူတို့ဆီ အကူအညီလာပေးတာ နည်းနေတာပေါ့''ဟု နေသူရိန် လူမူကူညီရေးအသင်းမှ တာဝန်ရှိသူက ပြောသည်။

ရေကြီးနစ်မြုပ်မှုကြောင့် အချို့မိသားစုများ မှာ နေအိမ်များတွင် နေထိုင်မရတော့ဘဲ နီးစပ်ရာနေရာများတွင် ပြောင်းရွေ့နေရကာ အချို့မှာလဲနေအိမ်ထဲရေများ ဝင်ရောက်နေပေမယ့် အဆင်ပြေသလို နေထိုင်နေရကြောင်း သိရသည်။

ငမိုးရိပ် ရေလှောင်တမံ၏ ယနေ့ ရေအမှတ် တိုင်းတာချက်အရ တမံ ရေအမှတ် မှာ ၁၁၀.၉၀ ပေရှိပြီး ရေပိုလွဲမှ ရေ ၃.၉၀ပေ ကျော်နေကြောင်း ရေလှောင်တမံ၏ ထုတ်ပြန်ချက်အရ သိရသည်။

#Local_News #ငမိုးရိပ်ရေလှောင်တမံ #အချို့ရေကြီးနစ်မြုပ်နေ
#YMG/LW #Yangon_Times

#Local_News
Published-16 October 2023

ဂျပန်ကုမ္ပဏီ (၂၀၀)ကျော်က မြန်မာအလုပ်သမားဦးရေ (၈၀၀)ခန့် ခေါ်ယူမည်ဖြစ်ကြောင်း ဂျပန်နိုင်ငံ၊ တိုကျိုမြို့ရှိ မြန်မာသံရုံးက အောက်တိုဘာလ ၁၆ ရက်တွင် ထုတ်ပြန်လိုက်သည်။

အောက်တိုဘာလ (၃)ရက်မှ (၁၆)ရက်အတွင်း စိစစ်ပြီး နိုင်ငံခြား ရေးဝန်ကြီးဌာနသို့ ပေးပို့ပြန်ကြားခဲ့သည့် အလုပ်ကမ်းလှမ်းစာ (၂၄၃) ခုတွင် အမျိုးသား (၃၀၀)ကျော်၊ အမျိုးသမီး (၅၀၀)ခန့်၊ စုစုပေါင်း ဦးရေ (၈၀၀) ကျော် ခေါ်ယူရန် ဖော်ပြထားသည်။

အဆိုပါ အကြောင်းကြားစာတွင် ဂျပန်နိုင်ငံရှိ အလုပ်သမားကြီးကြပ်ရေးကုမ္ပဏီနှင့် အလုပ်ခေါ်ယူသည့် စက်ရုံ၊ ကုမ္ပဏီများအနေဖြင့် ဂျပန် နိုင်ငံတွင် တရားဝင်တည်ထောင်ထားခြင်း ရှိ၊ မရှိ စာရွက်စာတမ်း အထောက် အထားများ စိစစ်ပြီး ယင်း စိစစ်တွေ့ရှိချက်များ၊ သဘောထားမှတ်ချက် များကို နိုင်ငံခြားရေးဝန်ကြီးဌာနက တစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့ခြင်း ဖြစ်ကြောင်း သိရသည်။

ပြီးခဲ့သည့် စက်တင်ဘာလ (၁၆) ရက် မှ အောက်တိုဘာလ (၂) ရက်အတွင်း နိုင်ငံခြားရေးဝန်ကြီးဌာနသို့ စိစစ်ပေးပို့ပြန်ကြားခဲ့သော အလုပ်ကမ်းလှမ်းစာ (၃၁၄) ခုတွင် မြန်မာအလုပ်သမား အမျိုးသား၊ အမျိုးသမီး စုစုပေါင်း ဦးရေ (၁၀၀၀)ခန့် ခေါ်ယူမည်ဖြစ်ကြောင်း ထုတ်ပြန်ခဲ့သေးသည်။

#Local_News #ဂျပန်ကုမ္ပဏီ #မြန်မာအလုပ်သမား(၈၀၀)
#Yangon_Times/PP