#Local_News
Published_ 22 May 2023

ဧရာဝတီတိုင်း၊ ဖျာပုံမြို့နယ်အတွင်း မေလ ၂၁ က ဂဠုန်မင်းရွှေဆိုင် ဓါးပြတိုက်ခံရမှု ဖြစ်ပွားခဲ့ပြီး ပြည်သူများဝိုင်းဝန်းဖမ်းဆီးပေးမူကြောင့် ၂ ဦးဖမ်းမိခဲ့တယ်လို့ ဒေသခံများရဲ့ပြောဆိုချက်အရ သိရသည်။

မေလ ၂၁ ရက်နေ့ နေ့လည်ပိုင်းအချိန်က ဖျာပုံမြို့နယ်၊ ၆ရပ်ကွက်ရှိ ဂဠုန်မင်း စိန်၊ ရွှေ ရတနာဆိုင်ကို အမည်မသိလူ ၄ဦးက ဆိုင်ကယ်နှစ်စီးဖြင့် သေနတ်ပစ်ဖောက်ကာ ဓါးပြတိုက်မှုပြလုပ်ခဲ့တာဖြစ်သည်။ ဖမ်းမိသူနှစ်ဦးကို စစ်ဆေးမေးမြန်းမူအရ သံသယ ရှိသူ ၈ဦးကို ထပ်မံဖော်ထုတ် စစ်ဆေးလျှက်ရှိကြောင်း သိရသည်။

ဓါးပြမှုကျူးလွန်သူ ၄ဦး ဆိုင်အပြင်သို့ ပြန်ထွက်လာတဲ့အချိန်မှာ အနီးဝန်းကျင်ရှိ ပြည်သူများက ဝိုင်းဝန်းလိုက်လံဖမ်းဆီးခဲ့တာကြောင့် ကျူးလွန်သူနှစ်ဦးကို ဖမ်းဆီးရမိခဲ့တယ်လို့ သိရသည်။

ဂဠုန်မင်းရွှေဆိုင် ဓါးပြတိုက်ခံရမှုဖြစ်စဉ်မှာ မည်မျှပါသွားတယ်ဆိုတာကိုတော့ အသေးစိတ်မသိရသေးဘဲ ထွက်ပြေးလွတ်မြောက်နေသူ နှစ်ဦးကို ဖမ်းဆီးရမိရေး ရှာဖွေမှုတွေပြုလုပ်နေကြောင်း သိရသည်။

#ymg/ynzw #Local_News #ဖျာပုံမြို့ #ဂဠုန်မင်းရွှေဆိုင်၌ သေနတ်ပစ်ဖောက် ဓါးပြတိုက်
#YMG #Yangon-Media-Group

#Local_News
Published_ 22 May 2023

ပရဟိတ မင်းသမီးတစ်ဦးဖြစ်သော သရုပ်ဆောင်ခိုင်နှင်းဝေက မိုခါမုန်တိုင်းဘေးသင့်ခဲ့သော ရခိုင်ပြည်နယ်အတွင်းရှိ ကလေးများအတွက် လိုအပ်သည့် အသုံးအဆောင်ပစ္စည်းများနှင့်အတူ အလှူငွေ ကျပ် သိန်း ၂၀၀ ကို မေ ၂၁ ရက်က လှူဒါန်းခဲ့ကြောင်း သိရသည်။

သရုပ်ဆောင် ခိုင်နှင်းဝေက ခုနစ်ရက်သားသမီး စုပေါင်းအလှူအဖြစ် ကလေးဝတ်အင်္ကျီ၊ ဘောင်းဘီ၊ အဝတ်အထည်ထည့်ပုံးများအပါအဝင် လိုအပ်သော အသုံးအဆောင်ပစ္စည်းများကို မေ ၂၀ ရက်က လှူဒါန်းခဲ့ခြင်းဖြစ်သည်။

ရခိုင်ပြည်နယ်အတွင်းရှိ မုန်တိုင်းသင့်ကလေးများအတွက် ငွေကျပ် သိန်း၂၀၀ နှင့်အတူ ထိန်းသိမ်းစောင့်ရှောက်ရန် အကူအညီလိုအပ်နေသော ကလေးများအတွက် မိဘများကိုယ်စား ခြောက်လအထိ ယာယီထိန်းသိမ်းစောင့်ရှောက်ခြင်းများလည်း စီစဉ်ဆောင်ရွက်ထားကြောင်း သရုပ်ဆောင် ခိုင်နှင်းဝေက ပြောသည်။

သရုပ်ဆောင် ခိုင်နှင်းဝေသည် လက်ရှိတွင် ခိုင်နှင်းဝေ ရင်သွေးလေးများဂေဟာကို တည်ထောင်ကာ မိဘမဲ့ကလေးများနှင့် စွန့်ပစ်ခံရသော ကလေးငယ်လေးများအား ပြုစုစောင့်ရှောက်လျက်ရှိသူဖြစ်ပြီး ယခုကဲ့သို့လိုအပ်သော နေရာများ၊ ခက်ခဲနေသော ပြည်သူများအတွက် လှူဒါန်းမှုများကို စဉ်ဆက်မပြတ်လုပ်ဆောင်လျက်ရှိသည်။

#ymg/ppk #Local_News #သရုပ်ဆောင်ခိုင်နှင်းဝေ #အလှူငွေကျပ်သိန်း၂၀၀မတည်လှူဒါန်း
#YMG #Yangon-Media-Group

#Local_News
Published_ 22 May 2023

လာမည့်ဇွန်လအတွင်း အားအနည်းငယ်မှအား အသင့်အတင့်ရှိသော အယ်လ်နီညိုအခြေအနေသို့ ရောက်ရှိမည်ဖြစ်ကြောင်း မိုးလေဝသနှင့်ဇလဗေဒ ညွှန်ကြားမှုဦးစီးဌာနမှမေလ(၂၂)ရက်တွင်ထုတ်ပြန် လိုက်သည်၊၊

အဆိုပါ အယ်လ်နီညိုဖြစ်စဉ်ကြောင့် အကျိုးသက်ရောက်မှုမှာ ယေဘုယျအားဖြင့် မိုးရွာသွန်းမှုပုံစံမူမမှန်ခြင်း၊ အပူချိန်မြင့်မားခြင်း၊ မုန်တိုင်းဖြစ်ပေါ်မှု မူမမှန်ခြင်းစသည့် ရာသီဥတုဖြစ်စဉ်များ ဖြစ်ပေါ်လေ့ရှိသည်ဟု ဆိုသည်၊၊

ထုတ်ပြန်ချက်တွင် အီကွေတာအနီးရှိ အပူပိုင်းပစိဖိတ်သမုဒ္ဒရာ (Tropical Pacific Ocean) ၏ ပင်လယ် ရေမျက်နှာပြင်အပူချိန်နှင့် လေထုဖြစ်စဉ်များမှာ အားအနည်းငယ်ရှိသော အယ်လ်နီညိုအခြေအနေသို့ ရောက်ရှိနေကြောင်း၊

နိုင်ငံတကာ မိုးလေဝသဌာနများ ၏ သင်္ချာပုံစံပြုမော်ဒယ်များ ခန့်မှန်းချက်အရ ဇွန်လအတွင်း အားအနည်းငယ်မှ အား အသင့်အတင့်ရှိသော အယ်လ်နီညိုအခြေအနေသို့ ရောက်ရှိနိုင်သည်ဟု ခန့်မှန်းရ သည်ဟုဖော်ပြထားသည်၊၊

အယ်လ်နီညိုဖြစ်စဉ်သည် ပစိဖိတ်သမုဒ္ဒရာတွင် ဖြစ်ပေါ်သည့်ဖြစ်စဉ် ဖြစ်သော်လည်း အဆိုပါ အယ်လ်နီညိုဖြစ်စဉ်ကြောင့် အကျိုးသက်ရောက်မှုမှာ ယေဘုယျအားဖြင့် မိုးရွာသွန်းမှုပုံစံမူမမှန်ခြင်း၊ အပူချိန်မြင့်မားခြင်း၊ မုန်တိုင်းဖြစ်ပေါ်မှု မူမမှန်ခြင်းစသည့် ရာသီဥတုဖြစ်စဉ်များ ဖြစ်ပေါ်လေ့ရှိကြောင်း၊ အယ်လ်နီညိုဖြစ်ပေါ်မှုနှင့် ပတ်သက်သည့် အခြေအနေများအား အချိန်နှင့်တပြေးညီ ဆက်လက်ထုတ်ပြန်ပေးပို့သွားမည် ဖြစ်ကြောင်းသိရသည်၊၊

#ymg/tthl #Local_News #အယ်လ်နီညို #အပူချိန်မြင့်မားဦးမည်
#YMG #Yangon_Media_Group

#Local_News
Published_ 22 May 2023

ဆိုင်ကလုန်းမုန်တိုင်းမိုခါ ဘေးအန္တရာယ်ကျရောက်ခဲ့သည့်ဒေသများမှ ဒေသထံပြည်သူများကို ကျန်းမာရေးဝန်ကြီးဌာနမှ နယ်လှည့်၍ဆေးကုသပေးခြင်း၊ ကျန်းမာရေးစောင့်ရှောက်ပေးခြင်းများဆောင်ရွက်ပေးလျက်ရှိကြောင်း သိရသည်၊၊

ကျန်းမာရေးဝန်ကြီးဌာနမှ နယ်လှည့်အထူးကုဆေးအဖွဲ့များ၊ အရေးပေါ်တုံ့ပြန်ဆောင်ရွက်ရေးအဖွဲ့များနှင့်ဆေးအဖွဲ့များက ဆိုင်ကလုန်းမုန်တိုင်းမိုခါ ဘေးအန္တရာယ်ကျရောက်ခဲ့သည့်ဒေသများတွင် ကျန်းမာရေးစောင့်ရှောက်မှုလုပ်ငန်းများကို အချိန်နှင့်တစ်ပြေးညီ ဆောင်ရွက်ပေးလျက်ရှိခြင်းဖြစ်သည်၊၊

ရခိုင်ပြည်နယ်၊ပုဏ္ဏားကျွန်းမြို့ရှိဒေသခံပြည်သူ(၃၂၂)ဦး၊ ရခိုင်ပြည်နယ်၊ ဘူးသီးတောင်မြို့နယ်မှ(၄၇)ဦး၊ ရခိုင်ပြည်နယ်၊ မောင်တောမြို့နယ် အင်းဒင်၊ ကျောက်ပန်ဒူနှင့် အောင်သုခရွာများသို့သွားရောက်၍ ဒေသခံပြည်သူများကိုလည်း ကျန်းမာရေးစောင့်ရှောက်ကုသပေးခဲ့သည်၊၊

စလင်းမြို့နယ်၊ ဆင်ဖြူကျွန်းတိုက်နယ်ရှိ မြို့မ အ.မ.က ကျောင်း၌ဒေသခံပြည်သူ ၄၈၉ ဦး၊ ကညှပ်ကျေးရွာ၌ ဒေသခံပြည်သူ ၁၂၉ ဦး၊ သရက်ချဉ်ကျေးရွာ၌ ၂၃၉ ဦး စုစုပေါင်း ၈၅၇ ဦး၊ညောင်ဦးမြို့နယ်မှ ဒေသခံပြည်သူ ၁၃၁ ဦးကိုကျန်းမာရေးစောင့်ရှောက်မှု ဆောင်ရွက်ပေးခဲ့သည်။

ဆက်လက်၍ အထူးကုဆရာဝန်ကြီးများပါဝင်သည့်နယ်လှည့် အထူးကုဆေးအဖွဲ့များ၊ အရေးပေါ် တုံ့ပြန်ဆောင်ရွက်ရေးအဖွဲ့များနှင့် ဆေးအဖွဲ့များသည် ဆိုင်ကလုန်းမုန်တိုင်း မိုခါ ဘေးအန္တရာယ် ကျရောက်ခဲ့သည့် ရခိုင်ပြည်နယ်ရှိအခြားမြို့နယ်များနှင့် မုန်တိုင်းဒဏ်ကြာင့် ရေကြီးရေလျှံဖြစ်ပွားခဲ့သည့်ဒေသများသို့ နယ်လှည့်ဆေးကုသမှုများ သွားရောက် ဆောင်ရွက်မည်ဖြစ်သည်ဟု ဆိုသည်၊၊

ထို့အပြင် ကျန်းမာရေးဝန်ကြီးဌာန ပြည်သူ့ကျန်းမာရေးဦးစီးဌာနအနေဖြင့် ရခိုင်ပြည်နယ် စစ်တွေမြို့၌ ဆိုင်ကလုန်းမုန်တိုင်း မိုခါဒဏ်ကြောင့်ရေစိုပျက်စီးခဲ့သည့် ကာကွယ်ဆေးထားသိုသည့် ရေခဲသေတ္တာများကိုရန်ကုန်မြို့မှ အင်ဂျင်နီယာများ ချက်ချင်းစေလွှတ်၍ ပြင်ဆင်မှုများဆောင်ရွက်ခြင်း၊ ပြည်နယ်ဆေးသိုလှောင်ခန်းတွင် ထားရှိသော ကာကွယ်ဆေးများ အအေးလမ်းကြောင်း မပျက်စေ ရန် ထိန်းသိမ်းခြင်းတို့ကို ကြိုးပမ်းဆောင်ရွက်ခဲ့ရာ မေ၂၀ ရက်တွင် ပြင်ဆင်မှုများ ဆောင်ရွက်ပြီးစီး၍ ကာကွယ်ဆေးများ ပျက်စီးဆုံးရှုံးခြင်းမရှိဘဲလိုအပ် သောနေရာများသို့ ကာကွယ်ဆေးများပြန်လည်ဖြန့်ဝေရန် အသင့်ဖြစ်နေကြောင်း သိရသည်။

#ymg/tthl #Local_News #မိုခါမုန်တိုင်းဘေးသင့်ပြည်သူ #နယ်လှည့်ဆေးကုသပေး
#YMG #Yangon_Media_Group

#Local_News
Published_ 22 May 2023

အွန်လိုင်းစနစ်အသုံးပြုကာအခွန်ထမ်းသစ်လျောက်ထားနိုင်မည့် အီလက်ထရွန်းနစ်အခွန်မှတ်ပုံတင်စနစ်ကို ယခုမေလ ၂၃ရက်နေ့က စတင်တော့မည်ဟု ပြည်တွင်းအခွန်များ ဦးစီးဌာနကသိရသည်။

လက်ရှိအသုံးပြုနေသည့် စာရွက်စာတမ်းများနှင့် အခွန်ရုံးသို့အခွန်ထမ်းမှတ်ပုံတင်လျောက်ထားနေမှုအစား အွန်လိုင်းမှလျောက်ထားအသုံးပြုနိုင်မည်ဖြစ်သည်။

ကုမ္ပဏီအဖွဲ့အစည်းများ၊ အကျိုးအမြတ်မယူသောအဖွဲ့အစည်းများနှင့် တစ်ဦးချင်းပုဂ္ဂိုလ်လုပ်ငန်းရှင်များအနေဖြင့် အခွန်ထမ်းအသစ်အဖြစ်မှတ်ပုံတင်ရာတွင် လူကိုယ်တိုင်လျောက်ထားစရာမလိုဘဲ အွန်လိုင်းမှတဆင့် အခွန်ထမ်းမှတ်ပုံတင် နံပါတ်ရယူနိုင်မည်ဖြစ်သည်။

အခွန်ကြေငြာလွှာနှင့် နှစ်စဉ်အခွန်ငွေပေးသွင်းမှုတွေကိုတော့ ပုံမှန်ဆောင်ရွက်နေဆဲနည်းလမ်းများအတိုင်းသာ ဆက်လက်ကျင့်သုံးသွားမည်ဟု သိရသည်။

အီလက်ထရွန်းနစ်အခွန်မှတ်ပုံတင်စနစ်ကိုသုံးစွဲလိုသူများအနေဖြင့် www.ird.gov.mm တွင်အသေးစိတ်လေ့လာပြီးလျောက်ထားနိုင်ကြောင်းပြည်တွင်းအခွန်များဦးစီဌာနမှသိရသည်။

#ymg/ppk #Local_News #အွန်လိုင်းအခွန်စည်းကျပ်မှုစနစ် #အခွန်မှတ်ပုံတင်
#YMG #Yangon-Media-Group

#Local_News
Published_ 22 May 2023

ကျန်းမာရေးဝန်ကြီးဌာနရဲ့ မေ ၂၁ ရက်နေ့ည၈နာရီထုတ်ပြန်ချက်အရ ပြည်တွင်းမှာ ဓာတ်ခွဲနမူနာ ၆၁၀၅ ဦးကိုဓာတ်ခွဲစစ်ဆေးခဲ့ရာ ကိုဗစ်(၁၉)လူနာသစ် ၈၀ဦး ထပ်မံတွေ့ရှိခဲ့ကြောင်း ထုတ်ပြန်ချက်အရသိသည်။ အဆိုပါလူနာများထဲမှာ သေဆုံးသူမရှိကြောင်း ထုတ်ပြန်ချက်များအရသိရသည်။

မေလ ၁၈ ရက်နေ့ထုတ်ပြန်ချက်အရ ရာခိုင်နှုန်းအားဖြင့် ဒသမ ၃၁ ရာခိုင်နှုန်းဖြစ်ပြီး အရင်နေ့တွေထပ် လူနာအရေအတွက် ကျဆင်းလာကြောင်း ကျန်းမာရေးဝန်ကြီးဌာနရဲ့ ထုတ်ပြန်ချက်အရသိရသည်။

သုတေသန တွေ့ရှိချက်များအရ ကိုဗစ်(၁၉)ရောဂါ ကာကွယ်ဆေးထိုးနှံထားသူများတွင် ရောဂါပြင်းထန်မှု၊ ဆေးရုံတက်ရောက်ကုသခံယူရမှုနှင့် သေဆုံးမှုတို့ကို လျှော့ချနိုင်ပြီး ထပ်ဆောင်းကာကွယ်ဆေးထိုးနှံထားခြင်းဖြင့် ရောဂါပြင်းထန်မှု၊ ဆေးရုံတက်ရောက် ကုသခံရမှုနှင့် သေဆုံးမှုတို့ကို ပိုမိုလျှော့ချနိုင်ကြောင်း ကျန်းမာရေးဝန်ကြီးဌာနက ထုတ်ပြန်ထားသည်။

ကမ္ဘာ့နိုင်ငံတချို့မှာတွေ့ရတဲ့ အိုမီခရွန်မျိုးဗီဇပြောင်း ကိုဗစ်ပို့ကို မြန်မာနိုင်ငံမှာလည်းတွေ့ရှိနေရတာဖြစ်ပြီး ပိုးကူးစပ်သူ လူနာများရှိနေသည်။

#ymg/ynzw #Local_News #ကိုဗစ်လူနာသစ် (၈၀) ဦး
#YMG #Yangon-Media-Group

#Local_News
Published_ 22 May 2023

မိုခါမုန်တိုင်းဒဏ်သင့်သူများအတွက် အာဆီယံနိုင်ငံများမှ အမေရိကန်ဒေါ်လာ ၁၀၇၀၆၄ ခန့်မှန်းတန်ဖိုးရှိ ယာယီမိုးကာတဲများ၊ တာပေါ်လင်၊ Jerry Can၊ Shelter Repair Kit အပါအဝင် အခြားအရေးပေါ်သုံးပစ္စည်းများ ပါဝင်သောတန်ချိန် စုစုပေါင်း ၃၄ ဒသမ ၆၉ တန်ကျော် သယ်ဆောင်လာတဲ့ စင်ကာပူလေတပ်မှ C-130 နှစ်စင်းနှင့် B737-800F လေယာဉ်တို့သည် မေ ၂၁ ရက်တွင် ရန်ကုန်လေဆိပ်သို့ ဆိုက်ရောက်ခဲ့ပါတယ်။

ပထမသုတ်အဖြစ် ရောက်ရှိလာတဲ့ အကူအညီပစ္စည်းများကို ဘေးအန္တရာယ် စီမံခန့်ခွဲမှုအတွက် လူသားချင်းစာနာထောက်ထားမှုဆိုင်ရာ အာဆီယံညှိနှိင်းမှုဗဟိုဌာန ၏ အမှုဆောင်ဒါရိုက်တာ မစ္စတာ လီယန်မင်းက ရန်ကုန်တိုင်းဒေသကြီးအစိုးရအဖွဲ၏ လူမှုရေးဝန်ကြီး ဦးအောင်ဝင်းသိန်းထံ လွှဲပြောင်းပေးခဲ့ပါတယ်။

အဆိုပါ လူသားချင်းစာနာထောက်ထားမှု ဆိုင်ရာပစ္စည်းများကို မိုခါမုန်တိုင်း ဒဏ်သင့်သူများထံသို ဆက်လက်ပေးပိုမှာဖြစ်ကြောင်း သိရပါတယ်။

အာဆီယံ၏ One ASEAN One Response မူအရ အာဆီယံနိုင်ငံများမှ ထောက်ပံ့ မည့် လူသားချင်းစာနာထောက်ထားမှုဆိုင်ရာ ပစ္စည်းများကို အာဆီယံအရေးပေါ် ထောက်ပံ့မှုစီမံခန့်ခွဲမှုစနစ်၏ မလေးရှားနိုင်ငံ ဆူဘန်းမြိုနှင့် ထိုင်းနိုင်ငံ ချိုင်နတ်မြို့တိုရှိ သိုလှောင်ရုံများမှ ပစ္စည်းများကို ထိုင်း၊ စင်ကာပူ၊ အင်ဒိုနီးရှားတပ်မတော်လေယာဉ်များဖြင့် စုစုပေါင်း ၁၉ ခေါက် ကူညီသယ်ယူပိုဆောင်ပေးသွားမည်ဖြစ်ကြောင်း သိရသည်။

မုန်တိုင်းဒဏ်သင့်သူများအတွက် အရေးပေါ်တုံပြန်ရေးနှင့် ပြန်လည်ထူထောင်ရေး လုပ်ငန်းများ ဆောင်ရွက်ရာတွင် မည်သူတစ်ဦးတစ်ယောက်မျှ မကျန်ရှိစေရေး “မူ”ကို လက်ကိုင်ထားပြီး နိုင်ငံတော်အကြီးအကဲများ၏ လမ်းညွှန်မှု၊ အမျိုးသား သဘာဝ ဘေးအန္တရာယ်ဆိုင်ရာ စီမံခန့်ခွဲကော်မတီ၏ ကြီးကြပ်မှု၊ ဝန်ကြီးဌာနများ၊ တိုင်းဒေသကြီး/ ပြည်နယ်အစိုးရများနှင့် အချိန်နှင့်တစ်ပြေးညီ ပူးပေါင်းမှုတိုဖြင့် ဆောင်ရွက်လျက်ရှိပြီး အာဆီယံ၊ သက်ဆိုင်ရာနိုင်ငံတကာအဖွဲ့အစည်းများနှင့်လည်း ပူးပေါင်းဆောင်ရွက်လျက်ရှိ ကြောင်း သတင်းရရှိပါတယ်။

#ygm_mnn #Local_News #မိုခါမုန်တိုင်းဒဏ်သင့်သူ #ထိုင်း၊ စင်ကာပူ၊ အင်ဒိုနီးရှား #လူသားချင်းစာနာထောက်ထားမှု ဆိုင်ရာပစ္စည်းများ
#YMG #Yangon_Media_Group

#Local_News
Published_ 22 May 2023

မြန်မာ-ကိုရီးယား ချစ်ကြည်ရေး(ဒလ)တံတားစီမံကိန်းတည်ဆောက်ရေးချဉ်းကပ်လမ်းဧရိယာမှာ လူနေအိမ်များနှင့်နီးကပ်စွာ တည်ရှိနေသဖြင့် ဘေးအန္တရာယ်ကင်းရှင်းရေးနှင့် ငလျင်ဒဏ်ခံနိုင်ရေးကိုစနစ်တကျ တွက်ချက်၍အထူးအလေးထားဆောင်ရွက်ရန် မေလ ၂၁ ရက်က အဆိုပါ စီမံကိန်းသို့ သွားရောက်ရာတွင် နစက ဥက္ကဌက ပြောကြားခဲ့သည်။

ရန်ကုန်မြို့ နှင့် ဒလမြို့တို့ကို ဆက်သွယ်ဖောက်လုပ်မည့် မြန်မာ-ကိုရီးယား ချစ်ကြည်ရေး(ဒလ)တံတားစီမံကိန်းပြီးစီးပါက ရရှိလာနိုင်မည့် အကျိုးကျေးဇူးများ၊စီမံကိန်းဆိုင်ရာ အချက်အလက်များ၊ ၂၀၂၂ ခုနှစ်၊ ဇွန်လအတွင်း နိုင်ငံတော်စီမံ အုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်လာရောက်စစ်ဆေးစဉ် လမ်းညွှန်မှာကြားချက်များကို အကောင်အထည်ဖော်ဆောင်ရွက်ပြီးစီးမှု၊ တံတား၏ အဓိကကျသည့် ရေလယ်တာဝါတိုင်လုပ်ငန်း ဆောင်ရွက်ပြီးစီးမှု၊ စီမံကိန်းလုပ်ငန်းအပိုင်းအလိုက် လုပ်ငန်းဆောင်ရွက်ပြီးစီးမှု၊ စီမံကိန်းလုပ်ငန်းများဆောင်ရွက်ရာ၌ အရည်အသွေး ထိန်းသိမ်းရေးလုပ်ငန်းများ၊ လုပ်ငန်းခွင်ဘေးအန္တရာယ်ကင်းရှင်းရေးလုပ်ငန်းများနှင့်ပတ်ဝန်းကျင် ထိန်းသိမ်းရေးလုပ်ငန်းများကိုလည်း ဆောင်ရွက်လျက်ရှိမှု အခြေအနေများကို ဆောက်လုပ်ရေးဝန်ကြီးဌာနက ရှင်းလင်းတင်ပြပြီးနောက် ယင်းက အထက်ပါအတိုင်း ပြောကြားခြင်း ဖြစ်သည်။

နစက ဥက္ကဌက စီမံကိန်းလုပ်ငန်းများအတွက် လိုအပ်သည့် ဆောက်လုပ်ရေးပစ္စည်းများအားလုံး အသင့်ရရှိအောင်ဆောင်ရွက်ရန်၊ တံတားတွဲဆက်ခြင်းလုပ်ငန်းများစနစ်တကျဖြစ်ရန်၊ယခုစီမံကိန်း ချဉ်းကပ်လမ်းဧရိယာသည် လူနေအိမ်များနှင့်နီးကပ်စွာ တည်ရှိနေသဖြင့် ဘေးအန္တရာယ်ကင်းရှင်းရေးနှင့် ငလျင်ဒဏ်ခံနိုင်ရေးကိုစနစ်တကျ တွက်ချက်၍ အထူးအလေးထားဆောင်ရွက်ရန်၊ တံတားတည်ဆောက်မှုစီမံကိန်းကာလ ကြာမြင့်သည်နှင့်အမျှ လမ်းကြောင်းပိတ်ဆို့မှုများ ဖြစ်ပေါ်နေမည်ဖြစ်သဖြင့် သတ်မှတ်အချိန်ကာလအတွင်းပြီးစီးအောင် ကြိုးပမ်းဆောင်ရွက်ရန် ပြောကြားခဲ့ကြောင်း သိရသည်။

မြန်မာ-ကိုရီးယား ချစ်ကြည်ရေး(ဒလ)တံတားတည်ဆောက်ရေး စီမံကိန်းကို ၂၀၁၂ ခုနှစ်တွင် နိုင်ငံတော်သမ္မတဦးသိန်းစိန်၏ ကိုရီးယားနိုင်ငံ ချစ်ကြည် ရေးခရီးစဉ်အတွင်း မြန်မာနိုင်ငံတွင် မြန်မာ-ကိုရီးယားချစ်ကြည်ရေး တံတားစီမံကိန်းတစ်ခုအကောင်အထည်ဖော်ဆောင်ရွက်ရန်ဆွေးနွေးခဲ့ပြီး ၂၀၁၃ ခုနှစ်တွင် စီမံကိန်းစတင်အကောင်အထည်ဖော်ဆောင်ရွက်ခဲ့ရာ ၂၀၁၅ ခုနှစ်တွင် တည်ဆောက်ရေးလုပ်ငန်းများကို စတင်ဆောင်ရွက်ခဲ့ကြောင်း၊ တံတားအမျိုးအစားမှာ ကြိုးဆိုင်းတံတား(Cable - Stayed Bridge) အမျိုးအစားဖြစ်ကြောင်း၊ တံတား တည်ဆောက်ပြီးစီးပါကရန်ကုန်မြို့ မှ ဒလ၊ တွံတေး၊ ကော့မှူး၊ ကွမ်းခြံကုန်းမြို့ နယ်များ၊ ဒေးဒရဲတံတားမှတဆင့်ကမ်းခြေဒေသများနှင့် ဧရာဝတီတိုင်းဒေသကြီးတစ်ခုလုံးသို့ လွယ်ကူလျင်မြန်စွာ သွားလာနိုင်မည်ဖြစ်ပြီး လက်ရှိဖြစ်ပေါ်နေသည့် ရန်ကုန်မြို့၏ ယာဉ်ကြောပိတ်ဆို့မှု များသည်လည်း အတိုင်းအတာတစ်ခုအထိ လျော့ပါးသက်သာသွားမည်ဖြစ်ကြောင်း သိရသည်။

#ymg/pl #Local_News #ဒလတံတား #ဘေးအန္တရာယ်ကင်းရှင်းရေး
#YMG #Yangon_Media_Group

#Asia_Politics
Published 22 May 2023

G7 ဟီရိုရှီးမားထိပ်သီးအစည်းအဝေးနဲ့ ပတ်သက်ပြီး အလေးအနက်ကိုယ်စားပြုတင်ပြရန် တရုတ်ဒုတိယနိုင်ငံခြားရေးဝန်ကြီး 'စွန်ဝေဒေါင်'က တရုတ်နိုင်ငံဆိုင်ရာ ဂျပန်သံအမတ်ကြီး 'ဟီဒဲယိုတာရူမီ'ကို တနင်္ဂနွေနေ့က ဆင့်ခေါ်လိုက်ပါတယ်။

ဟီဒဲယိုတာရူမီကို ဆင့်ခေါ်ရတဲ့အကြောင်းရင်းကတော့ G7 ထိပ်သီးအစည်းအဝေးပွဲမှာ တရုတ်နဲ့ဆက်နွယ်နေတဲ့ ကိစ္စရပ်များကိုဆွေးနွေးဖို့ဖြစ်ပါတယ်။

စွန်ဝေဒေါင်က G7 ဟာ စခန်းများနဲ့ စစ်အေးတိုက်ပွဲများကြား ထိပ်တိုက်ရင်ဆိုင်မှုအခြေအနေကို လိုက်နာပေမယ့် လုပ်ရပ်တွေကတော့ သမိုင်းအစဉ်အလာ၊ ယေဘုယျလမ်းကြောင်း၊ နိုင်ငံတကာကျင့်ဝတ်များကို ချိုးဖောက်နေတယ်လို့ ထောက်ပြခဲ့ပါတယ်။

G7 အလှည့်ကျဥက္ကဌဖြစ်တဲ့ ဂျပန်နိုင်ငံဟာ အခြားနိုင်ငံများနဲ့ ပူးပေါင်းကာ တရုတ်ကိုပုတ်ခတ်ခြင်း၊ တရုတ်နိုင်ငံအတွင်းရေးကို အပြင်းအထန်ဝင်ရောက်စွက်ဖက်ခြင်းများ ပြုလုပ်ခဲ့တယ်လို့ စွန်ဝေဒေါင်ကပြောကြားခဲ့ကြောင်း တရုတ်နိုင်ငံခြားရေးဝန်ကြီးဌာနက တနင်္ဂနွေညမှာ ထုတ်ပြန်လိုက်ပါတယ်။

ထိုင်ဝမ်အရေးကိစ္စနဲ့ ပတ်သက်ပြီးတော့ "ထိုင်ဝမ်ဟာ တရုတ်နိုင်ငံပိုင်ဖြစ်ပြီး ထိုင်ဝမ်ပြဿနာဟာလည်း တရုတ်လူမျိုးများရဲ့အရေးဖြစ်ကာ တရုတ်တွေကသာဆုံးဖြတ်သင့်ပါတယ်။ ထိုင်ဝမ်အရေးဟာ တရုတ်ရဲ့ အဓိကအကျိုးစီးပွားအချက်အခြာဖြစ်ပြီး တရုတ်-ဂျပန်ဆက်ဆံရေးမှာ ဖြတ်ကျော်လို့မဖြစ်တဲ့ကန့်သတ်ချက်ဖြစ်ပါတယ်။ နိုင်ငံတော်အချုပ်အခြာအာဏာ၊ နယ်မြေတည်တံ့ခိုင်မြဲမှုတို့ကို ကာကွယ်မယ့် တရုတ်လူမျိုးတို့ရဲ့ ခိုင်မာတဲ့ဆုံးဖြတ်ချက် စွမ်းရည်တို့ကို လျှော့မတွက်သင့်ပါဘူး" လို့ ပြောကြားခဲ့ပါတယ်။

ဟောင်ကောင်၊ ရှင်ကျန်၊ ရှီဇန်တို့ဟာ တရုတ်အတွင်းရေးကိစ္စများဖြစ်ပြီး ပြင်ပဝင်ရောက်စွက်ဖက်မှုများ ခွင့်ပြုမှာမဟုတ်ကြောင်း စွန်ဝေဒေါင်က ဆိုပါတယ်။

"တရုတ်ဟာ နိုင်ငံတကာရေကြောင်း တရားဥပဒေစိုးမိုးရေးကို အခိုင်အမာကာကွယ်နေသူဖြစ်ပါတယ်။ အရှေ့တရုတ်ပင်လယ်နဲ့ တောင်တရုတ်ပင်လယ်ရဲ့ လက်ရှိအခြေအနေဟာ ယေဘုယျအားဖြင့် တည်ငြိမ်နေပြီး မလိုလားအပ်တဲ့ ထွက်ပေါ်သတင်းတွေနဲ့ ဆန့်ကျင်ဘက်ဖြစ်နေပါတယ်။ တရုတ်ဟာ အပြန်အလှန်အကျိုးဖြစ်ထွန်းစေမယ့် ဗျူဟာကို အခိုင်အမာလိုက်နာပြီး စီးပွားရေးကျပ်တည်းခြင်းနဲ့ ကြွေးမြီထောင်ချောက်တွေကို တရုတ်နိုင်ငံအပေါ် သက်ရောက်ခွင့်ပြုမှာမဟုတ်ပါဘူး" လို့ ပြောကြားလိုက်ပါတယ်။

"တရုတ်ဟာ ကိုယ်ပိုင်ကာကွယ်ရေးနဲ့ ကာကွယ်ရေးဆိုင်ရာနျူကလီးယားဗျူဟာကို အစဉ်အမြဲလိုက်နာကာ နျူကလီးယားဦးစားပေးအသုံးမပြုသည့် မူဝါဒကို လိုက်နာပြီး နိုင်ငံတော်လုံခြုံရေးအတွက် နောက်ဆုံးဦးစားပေးအဆင့်မှာ ထားရှိပါတယ်။ နျူကလီးယားလက်နက်ပိုင် ၅ နိုင်ငံထဲမှာဒီလိုကတိကဝတ်ပြုထားတဲ့ တစ်ခုတည်းသောနိုင်ငံဖြစ်ပါတယ်။ တရုတ်ရပ်တည်ချက်က ပွင့်လင်းမြင်သာမှုရှိပြီး ဖျက်ဆီးလို့မရပါဘူး" လို့ ဖော်ပြခဲ့ပါတယ်။

ပွင့်လင်းမြင်သာခြင်းနဲ့ အားလုံးပါဝင်နိုင်ရေးလမ်းကြောင်းချမှတ်ရန်၊ အနည်းစုသီးခြားဖွဲ့စည်းမှုတွေကို ရပ်တန့်ရန်၊ အခြားနိုင်ငံများကို ဖိနှိပ်ခြင်းမပြုရန်၊ ကွဲပြားရေးနဲ့ ထိပ်တိုက်ရင်ဆိုင်မှုများဖန်တီးခြင်းတို့မှ ရပ်တန့်ရန် G7 အဖွဲ့ဝင်များကို တိုက်တွန်းလိုက်ပါတယ်။

ဂျပန်အနေနဲ့ တရုတ်ကိုနားလည်မှုမှန်ကန်အောင်၊ ဗျူဟာမြောက်လွတ်လပ်ရေးကို ဆုပ်ကိုင်နိုင်အောင်၊ တရုတ်နဲ့ဂျပန်ကြား အခြေခံမူတွေကို လိုက်နာပြီး အပြုသဘောဆောင်တဲ့ သဘောထားနဲ့ နှစ်နိုင်ငံဆက်ဆံရေးဖွံ့ဖြိုးတိုးတက်မှုကို အမှန်တကယ်မြှင့်တင်နိုင်အောင် ကြိုးပမ်းသင့်တယ်လို့ ပြောကြားခဲ့ပါတယ်။

#Source: India Today #Asia_Politics #G7 ထိပ်သီးအစည်းအဝေး
#YMG #Yangon_Media_Group

#Local_News
Published_ 22 May 2023

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနဝန်ကြီး ဦးအောင်နိုင်ဦး ဦးဆောင်သော မြန်မာကိုယ်စားလှယ်အဖွဲ့သည် မေ ၂၁ ရက်က ကူမင်းမြို Haigeng Garden Convention Center ၌ ယူနန်ပြည်နယ် ပါတီအတွင်းရေးမှူး Mr. Wang Ning မှ တည်ခင်း ဧည့်ခံသော အလုပ်သဘေ နေ့လယ်စာစားပွဲသို့ တက်ရောက်စဉ် မြန်မာ-တရုတ် နှစ်နိုင်ငံကုန်သွယ်မှုတွင် လျင်မြန်ချောမွေ့စေရေးကိစ္စရပ်များကို ဆွေးနွေးခဲ့ကြောင်း သိရပါတယ်။

အဆိုပါ အလုပ်သဘော နေ့လယ်စာ စားပွဲတွင် မြန်မာ့လယ်ယာထွက်ကုန်များ ပိုမို တိုးမြှင့်ထုတ်လုပ်၍ တရုတ်နိုင်ငံဈေးကွက်သို ပိုမိုတင်ပိုနိုင်ရန် ပူးပေါင်းဆောင်ရွက်ရေး၊ ဘိန်း အစားထိုးသီးနှံ စိုက်ပျိုးရေးအပြင် တန်ဖိုးမြှင့် လယ်ယာစိုက်ပျိုးရေးထွက်ကုန်များ ထုတ်လုပ်နိုင်အောင် ဆောင်ရွက်ရေး၊ စိုက်ပျိုးရေးနည်းပညာ မြှင့်တင်နိုင်ရန် ပူးပေါင်းဆောင်ရွက်ရေးတို့ကိုလည်း ဆွေးနွေးခဲ့ကြပါတယ်။

ပါတီအတွင်းရေးမှူးက မြန်မာနိုင်ငံရှိ လေဘေးသင့်ပြည်သူများအတွက် ယူနန်ပြည်နယ်အစိုးရမှ တရုတ်ယွမ်ငွေငါးသိန်း (၅၀၀၀၀၀) လှူဒါန်းမည်ဖြစ်ကြောင်း ပြောကြားပါတယ်။

ယင်းနောက်ဝန်ကြီးသည် ကူမင်းမြို့၌ တရုတ်နိုင်ငံ အကောက်ခွန် အထွေထွေအုပ်ချုပ်မှုအာဏာပိုင်အဖွဲ့ (GACC)၏ အဖွဲ့ဝင် Mr. Zhao Zenglian နှင့် တာဝန်ရှိသူများအား တွေ့ဆုံ၍ မြန်မာနိုင်ငံမှထွက်ရှိသည့် ရေထွက်ကုန်ပစ္စည်းများ၊ လယ်ယာထွက် ကုန်ပစ္စည်းများနှင့် မွေးမြူရေးထွက်ကုန်များ တရုတ်နိုင်ငံသို့တင်ပို့နိုင်ရေးအတွက် GACC ၏ ခွင့်ပြုချက်ရရှိရေး၊ လယ်ထွက်ကုန်ပစ္စည်းများ ပိုမိုတင်ပို့ခြင်းဖြင့် ပို့ကုန်လုပ်ငန်းရှင်များ သာမက စိုက်ပျိုးထုတ်လုပ်သည့် တောင်သူလုပ်ငန်းရှင်များလည်း အကျိုးကျေးဇူးကို ခံစားနိုင်သည့်အတွက် ဆင်းရဲနွမ်းပါးမှုကိုလျှော့ချရေးတွင် အထောက်အကူဖြစ်စေပါတယ်။

ထို့ပြင် နယ်စပ်ဂိတ်များကို နည်းပညာသုံး၍ လုပ်ငန်းများဆောင်ရွက်နိုင်ရေးနှင့် ပြတင်းတစ်ပေါက်စနစ် ထူထောင်ဆောင်ရွက်နိုင်ရေး၊ နယ်စပ်ကုန်သွယ်မှု အခြေခံအဆောက်အဦများ အဆင့်မြှင့်တင်နိုင်ရေးတို့ကို ပိုမိုပူးပေါင်းဆောင်ရွက်သွားနိုင်ရေး ဆွေးနွေးခဲ့ကြပါတယ်။

ဝန်ကြီးနှင့်အဖွဲ့သည် မေ ၂၀ ရက်က မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီးနှင့်အတူ တရုတ်-မြန်မာ နယ်စပ်ဂိတ်များဖြစ်သည့် မန်ဝိန်း၊ နန်းတော်၊ ဆင်ဖြူ၊ ဟိုဆောင်၊ ကျိမ်စန်းကျော့၊ ပန်ဆိုင်/ကျူကုတ် နယ်စပ်ဂိတ်များသို့ သွားရောက်၍ နှစ်နိုင်ငံနယ်စပ်ဂိတ်များမှ လူဝင်/လူထွက် လုပ်ငန်းစဉ်များဆောင်ရွက်နေမှုနှင့် ပို့ကုန်၊ သွင်းကုန် ယာဉ်အဝင်/အထွက် ရှင်းလင်းရေးလုပ်ငန်းစဉ်များကို ကြည့်ရှုစစ်ဆေးခဲ့ပြီး လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ပါတယ်။

ထို့နောက် ရွှေလီမြို့တွင် မြန်မာနိုင်ငံမှတင်ပို့သည့် ကျောက်စိမ်းများအား အချောထည်ပြုလုပ်၍တရုတ် နိုင်ငံတစ်ဝန်းသို Online/ Offline ဖြင့် ဖြန့်ဖြူးရောင်းချနေသည့် ကျောက်စိမ်းရောင်းဝယ်ရေး စင်တာသို့သွားရောက်ကြည့်ရှုပြီး မြန်မာနိုင်ငံမှ တင်ပို့သည့်ဆန်များ တန်ဖိုးမြှင့်ထုတ်ကုန်အဖြစ် ထုတ်လုပ်နေသည့် လုပ်ငန်းဆောင်ရွက်မှုကို သွားရောက်ကြည့်ရှုခဲ့ကြောင်း သတင်းရရှိပါတယ်။

#ygm_mnn #Local_News #မြန်မာ-တရုတ် #စီး/ကူးဝန်ကြီး
#YMG #Yangon_Media_Group

#Local_News
Published_ 22 May 2023

ပဲခူးမြစ်ကူးတံတား(သန်လျင် တံတားအမှတ်-၃)တည်ဆောက်ပြီးစီးပါက ဘားအံ-မြဝတီအထိ ဆက်စပ်သွားလာနိုင်မည်ဟု နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောသည်။

မေလ ၂၁ ရက်က အဆိုပါသန်လျင်တံတားအမှတ်-၃ တည်ဆောက်ရေး စီမံကိန်း လုပ်ငန်းခွင်သို့ သွားရောက်ကြည့်ရှုစစ်ဆေးစဉ် ယင်းက အထက်ပါအတိုင်း ပြောကြားခဲ့ခြင်း ဖြစ်သည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပဲခူးမြစ်ကူးတံတား(သန်လျင် တံတားအမှတ်-၃)တည်ဆောက်ရေးစီမံကိန်းတွင် အသုံးပြုသည့် သံနှင့် သံမဏိပစ္စည်းများ ဆားငန်ရေဒဏ်ခံနိုင်စေရေးနှင့်စံချိန်စံညွှန်းကိုက်ညီစေရေး စနစ်တကျဆောင်ရွက်ရန်၊စီမံကိန်းအပိုင်းအလိုက် ဆောင်ရွက်၍ရသည့်လုပ်ငန်းများကို ကြိုတင်ပြီးစီးအောင် ဆောင်ရွက်ပြီး စီမံကိန်းတစ်ခုလုံး သတ်မှတ်ကာလအတွင်းပြီးစီးနိုင်ရေး ဆောင်ရွက်သွားရန် လည်း ပြောသည်။

ယင်းအပြင် ပဲခူးမြစ်ကူးတံတား(သန်လျင် တံတားအမှတ်-၃)တည်ဆောက်ရေးစီမံကိန်းတစ်ခုလုံး ပြီးစီးပါက သံလွင်တံတား အမှတ်-၁ တွင် ဖြစ်ပေါ်လျက်ရှိသည့် ယာဉ်ကြောပိတ်ဆို့မှုများကိုဖြေရှင်းပေးနိုင်မည်ဖြစ်ကြောင်း၊ သီလဝါအထူးစီးပွားရေးဇုန်ကိုအကြောင်းပြု၍ ပြည်တွင်း၊ ပြည်ပ စီးပွားရေးလုပ်ငန်းများ တိုးပွားလာမှုကြောင့် ရန်ကုန်မြို့ အပါအဝင် ရန်ကုန်တောင်ပိုင်းခရိုင်မြို့နယ်များဖြစ်သည့် သန်လျင်၊ ကျောက်တန်း၊ခရမ်း၊ သုံးခွ ဒေသရှိ ပြည်သူများ၏ လူမှုစီးပွားဘဝတိုးတက်လာမည်ဖြစ်ပြီး သီလဝါအထူးစီးပွားရေးဇုန်နှင့် သန်လျင်ဒေသဖွံ့ဖြိုးတိုးတက်လာမည်သာမက အရှေ့-အနောက် စီးပွားရေးစင်္ကြံလမ်းမကြီးကို အသုံးပြု၍ ဘားအံ-မြဝတီအထိ ဆက်စပ်သွားလာနိုင်မည်ဖြစ်သည့်အတွက် မွန်ပြည်နယ်၊ ကရင်ပြည်နယ် ဖွံ့ဖြိုးတိုးတက်မှုကိုလည်း အကျိုးပြုကာ ဒေသတွင်းနိုင်ငံများနှင့်ပါ ဆက်သွယ်မှုပိုမို ဖွံ့ဖြိုးလာမည်ဖြစ်ကြောင်း ယင်းက ပြောကြားခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

#ymg/pl #Local_News #သန်လျင်တံတားအမှတ်-၃ #ဘားအံ-မြဝတီ
#YMG #Yangon_Media_Group

#Local_News
Published_ 22 May 2023

မန္တလေးနှင့်စစ်ကိုင်းမြို့များအတွင်း လုပ်ကြံခဲ့ကြသည့် Royal PhoenixGuerilla Force-RPGF အဖွဲ့ဝင်များကို ဖောက်ခွဲရေးပစ္စည်းများနှင့်အတူ ဖမ်းဆီးရမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ပြီးခဲ့သည့်ဧပြီလ ၆ ရက် နေ့လယ်ပိုင်းတွင် ချမ်းမြသာစည်မြို့နယ်၊ ကံသာယာရပ်ကွက်ရှိ “တော်ဝင်ဦး”တည်းခိုခန်း၊ အခန်းအမှတ်(၂၀၅)၌ Royal Phoenix Guerilla Force-RPGF အမည်ခံအကြမ်းဖက်အဖွဲ့မှ ဒုတိယခေါင်းဆောင် ချမ်းမြေ့ဦး(ခ)ဘရိတ်ကီ(ခ)ကောက်ကြီး အားဖမ်းဆီးရမိခဲ့ရာ ယင်း၏ထွက်ဆိုချက်အရ မေလ ၁၈ ရက် နံနက်ပိုင်းက ချမ်းမြသာစည်မြို့နယ်၊ အောင်သာယာရပ်ကွက်၊ ၄၆ လမ်းနှင့် ၁၀၇(အေ)လမ်းကြား၌ RPGF ခေါင်းဆောင်စောဘငြိမ်း(ခ)ပြည်ငြိမ်းချမ်း(ခ)ကိုစော(ခ)ကိုပြည့် ၊ အဖွဲ့ဝင်များဖြစ်သည့် ဇော်ထက်နှင့် ဟိန်းထက်တိုကို အမရပူရမြို့နယ်၊ ဧရာဝတီတံတား(ရတနာပုံ)စစ်ဆေးရေးဂိတ်တွင် လည်းကောင်း၊ ဇော်ရဲထက်(ခ)သားသား၊ အောင်ထွန်းမင်း(ခ)အော်တို၊ မင်းမင်းဦး(ခ)သက်ဦးမောင်တို့ကို အမရပူရမြို့နယ်၊ မှန်တန်းရပ်ကွက်တွင်လည်းကောင်း အသီးသီးဖမ်းဆီးရမိခဲ့ကြောင်း သိရသည်။

အဖမ်းခံရသော စောဘငြိမ်း(ခ)ပြည်ငြိမ်းချမ်း(ခ)ကိုစော(ခ)ကိုပြည့်၏ ထွက်ဆိုချက်အရ ယင်းနေ့ နေ့လယ်ပိုင်းတွင် ပြည်ကြီးတံခွန်မြို့နယ်၊ ငွေတော်ကြည်ကုန်းရပ်ကွက်၊ ၇၃(အေ)လမ်း၊ ၁၂၀ လမ်းနှင့် ၁၂၁ လမ်းကြား၌ ဝင်းမာ အားကြိုးဆွဲလက်ပစ်ဗုံး ၅ လုံးဖြင့် လည်းကောင်း၊ RPGF အဖွဲ့ဝင်သူရစိုး(ခ)ကျောက်ရုပ်အား ပုသိမ်ကြီးမြို့နယ်၊ လက်ကောင်းကျေးရွာတွင် လည်းကောင်းထပ်မံဖမ်းဆီးရမိခဲ့သေးကြောင်း သိရသည်။

အလားတူစောဘငြိမ်း(ခ)ပြည်ငြိမ်းချမ်း(ခ)ကိုစော(ခ)ကိုပြည့်နှင့်အောင်ထွန်းမင်း (ခ)အော်တို တို့၏ ထွက်ဆိုချက်အရ ယင်းနေ့ ညပိုင်းတွင် RPGF အဖွဲ့ကို ငွေကြေးထောက်ပံ့ပေးနေသူများဖြစ်သည့် ခိုင်ခိုင်အောင် အား ချမ်းအေးသာဇံမြို့နယ်၊ ဒေးဝန်းအနောက်ရပ်ကွက်၊ သင်္ဂချောင်းလမ်းတွင်လည်းကောင်း၊ ရန်နောင်ဖြိုး အား ချမ်းမြသာစည်မြို့နယ်၊ မြရည်နန္ဒာရပ်ကွက်၊ တိုက်အမှတ်(၁၉)၊ အခန်းအမှတ် (၁၉)တွင် လည်းကောင်း၊ သူဇာဝေနှင့် အောင်ရဲကျော်တို့အား ပြည်ကြီးတံခွန်မြို့နယ်၊ သင်ပန်းကုန်းရပ်ကွက်တွင် လည်းကောင်း ဖမ်းဆီးရမိခဲ့သည့်အတွက် စုစုပေါင်း အမျိုးသား ၁၀ ဦး၊ အမျိုးသမီး ၃ ဦးတို့ကို တရုတ်ကြိုးဆွဲလက်ပစ်ဗုံး ၅ လုံးနှင့်အတူ ဖော်ထုတ်ဖမ်းဆီးရမိခဲ့ခြင်း ဖြစ်ကြောင်း သိရသည်။

ဖမ်းဆီးရမိတရားခံများ၏ ထွက်ဆိုချက်အရယင်းတို့သည် ၂၀၂၂ ခုနှစ်၊ မတ်လအတွင်း ရှမ်းပြည်နယ် (မြောက်ပိုင်း)၊ နမ္မတူမြို့နယ်အတွင်းရှိ KIA တပ်မဟာ(၄)စခန်း၌ သင်တန်း ၁ လ တက်ရောက်ခဲ့ကြောင်း၊ မန္တလေးမြို့သို့ ပြန်လည်ရောက်ရှိနေထိုင်စဉ် CRPHINUG မှ ပြုလုပ်သည့် ZOOM Meeting များတွင်တက်ရောက်ခဲ့ကာ ၂၀၂၂ ခုနှစ်၊ ဧပြီလတွင်မန္တလေးမြို့နှင့် စစ်ကိုင်းမြို့များအတွင်း လုပ်ကြံရန် RPGFအမည်ခံအကြမ်းဖက်အဖွဲ့ကို အဖွဲ့ဝင် ၁၆ ဦးဖြင့် ဖွဲစည်းခဲ့ကြောင်း သိရသည်။

ထွက်ဆိုချက်အရ ၂၀၂၃ ခုနှစ်၊ ဧပြီလ ၂၀ ရက်တွင်စစ်ကိုင်းမြို့၊ ရွာထောင်ရပ်ကွက်ရှိ“နှင်းရွှေရည်”လက်ဖက်ရည်ဆိုင်၌ အရပ်သား ဦးကျော်စိုးကိုလည်းကောင်း ၊ ဧပြီလ ၂၇ ရက်တွင် ပုသိမ်ကြီးမြို့နယ်၊ လက်ကောင်းကျေးရွာ အုပ်ချုပ်ရေးမှူး ဦးမောင်ကြီးအား လုပ်ကြံသတ်ဖြတ်ရန် သွားရောက်စဉ် နေအိမ်၌ တွေ့ရှိခြင်းမရှိသဖြင့် ၎င်း၏သားဖြစ်သူ ဦးစန်းယုမောင်ကိုလည်းကောင်း ပစ်ခတ်လုပ်ကြံသတ်ဖြတ်ခဲ့ကြောင်း၊ RPGF အနေဖြင့် မန္တလေးမြို့နှင့် စစ်ကိုင်းမြို့များအတွင်း မိုင်းထောင်ဖောက်ခွဲမှု ၉ ကြိမ်ကျူးလွန်ခဲ့ကြောင်း ထုတ်ပြန်ချက်တွင် ဖော်ပြထားသည်။

ယခုအခါ လျှို့ဝှက်သတင်းပေးသူနှင့် ဖမ်းဆီးပေးသူများအား ဆုငွေများကို ထိုက်ထိုက်တန်တန် လျှို့ဝှက်၍ ချီးမြှင့်ပေးလျက်ရှိကြောင်းလည်း သတင်းထုတ်ပြန်ချက်တွင် ဖော်ပြထားသည်။

#ymg/pl #Local_News #မန္တလေးနှင့်စစ်ကိုင်းမြို့ #Royal_PhoenixGuerilla_Force-RPGF
#ဖောက်ခွဲရေးပစ္စည်းများနှင့်အတူဖမ်းဆီးရမိ #Yangon_Media_Group