#DailyNews
Published - 10 June 2022

၁။ သင်ရိုးညွှန်းတမ်းဖတ်စာများကို မျက်မမြင်စာဖြင့် ဖတ်နိုင်အောင်ဆောင်ရွက်နေ

၂။ နေပြည်တော် အိမ်ခြံမြေဈေးကွက် အရောင်းအေးနေ

၃။ နေ့စဉ်မိုးလေဝသသတင်း။

၄။ ပါကစ္စတန်နှင့်အိန္ဒိယ ပန်းရောင်အချိုရည်ကြောင့် ပြည်သူတွေပေါင်းစပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Asia_Business
Published 10 June 2022

ထိုင်းနိုင်ငံမှာ ဆေးခြောက်စိုက်ပျိုးခြင်းနဲ့ လက်ဝယ်ပိုင်ဆိုင်ခြင်းတို့ကို ကြာသပတေးနေ့ကစပြီး တရားဝင်ခွင့်ပြုလိုက်ပါပြီ။

ဒါ့အပြင် ပြည်သူ့ကျန်းမာရေးဝန်ကြီးက ဆေးခြောက်ပျိုးပင် ၁ သန်းကိုလည်းဖြန့်ဝေဖို့ စီစဉ်နေပါတယ်။

ဆေးခြောက်ပင်ရဲ့အစိတ်အပိုင်းအားလုံးကို မူးယစ်ဆေးဝါးအမျိုးအစားအဖြစ်ကနေဖယ်ရှားဖို့ အစားအစာနှင့် ဆေးဝါးကွပ်ကဲရေးအဖွဲ့(FDA)က ဆုံးဖြတ်လိုက်တာကြောင့် ထိုင်းနိုင်ငံက ဆေးဘက်ဆိုင်ရာနဲ့ စက်မှုလုပ်ငန်းများမှာ အသုံးပြုနိုင်ရန်အတွက် ဆေးခြောက်ပင်အသုံးပြုခြင်းကိုခွင့်ပြုလိုက်တဲ့ ပထမဆုံးအာရှနိုင်ငံဖြစ်လာပါတယ်။

ဒါပေမဲ့ ဆေးခြောက်ကို တစ်ကိုယ်ရည်စိတ်အပန်းဖြေရာမှာ အသုံးပြုခြင်းကို တရားဝင်ခွင့်ပြုထားတဲ့ ဥရုဂွေးနဲ့ ကနေဒါနိုင်ငံတို့ရဲ့လမ်းစဉ်ကိုတော့ လျှောက်လှမ်းသွားမှာ မဟုတ်ပါဘူး။

လူတွေရဲ့စိတ်ခံစားမှု မှိန်းမောခြင်းကိုမဖြစ်စေတဲ့ အပင်အစိတ်အပိုင်းတွေကနေ ထုတ်လုပ်ထားတဲ့ပစ္စည်းတွေကိုသာ အရင်က ကဖေးတစ်ခုမှာ ရောင်းချခွင့်ပြုခဲ့ရာ ကြာသပတေးနေ့ကတော့ ထိုခွင့်ပြုချက်ကိုထောက်ခံတဲ့ ထိုင်းနိုင်ငံကလူအချို့က ကဖေးဆိုင်ကနေ ဆေးခြောက်ဝယ်ယူပြီး အောင်ပွဲခံခဲ့ကြပါတယ်။

ဟိုက်လန်းကဖေးကို စောစောရောက်တဲ့လူတွေကတော့ အမျိုးမျိုးသောအပင်ထိပ်ဖူးတွေကို ရွေးချယ်ဝယ်ယူနိုင်ခဲ့ပါတယ်။

"ကျွန်တော်ဆေးခြောက်ရှူတယ်ဆိုတာကို အသံကျယ်ကျယ်နဲ့ပြောနိုင်ပါပြီ၊ အရင်တုန်းက တရားမဝင်သတ်မှတ်ထားတုန်းကလို ဖုံးကွယ်နေစရာမလိုတော့ပါဘူး" လို့ ပထမဆုံးလာဝယ်တဲ့ဧည့်သည်က ပြောပြသွားပါတယ်။

"အစိုးရရဲ့တာဝန်ကတော့ ဆေးဘက်ဆိုင်ရာအတွက်အသုံးပြုဖို့ကိုပဲ ကြေညာရမှာပေါ့၊ ဒါပေမဲ့ ဒီလိုခွင့်ပြုချက်ရအောင် ကျွန်တော်တို့အကြာကြီးစောင့်လိုက်ရပြီး နောက်ဆုံးတော့တရားဝင်ဖြစ်သွားပါပြီ၊ ဆေးခြောက်က ဆိုးကျိုးထက်ကောင်းကျိုးကပိုများတယ်ဆိုတာ အစိုးရကသဘောပေါက်ထားပါတယ်" လို့ ဆေးခြောက်တရားဝင်ဖြစ်ဖို့ တက်ကြွလှုပ်ရှားသူနဲ့ ကဖေးဆိုင်ပိုင်ရှင်ဖြစ်တဲ့ 'ရက်တာပွန်ဆန်ရက်'က ပြောပြသွားပါတယ်။

လူမြင်ကွင်းမှာ ဆေးခြောက်ရှူတဲ့လုပ်ရပ်ကိုတော့ ထိုင်းအစိုးရက အနှောင့်လုပ်ရပ်လို့သတ်မှတ်ကာ ထောင်ဒဏ် ၃ လနဲ့ ၂၅,၀၀၀ ဘတ်(၇၈၀ ဒေါ်လာ) ဒဏ်ကြေးကျခံရနိုင်ပါတယ်။

ဆေးခြောက်ပင်ကထုတ်ယူတဲ့ ဆီလိုမျိုးအရာတွေမှာ လူတွေရဲ့စိတ်ခံစားမှုမှိန်းမောခြင်းဖြစ်စေတဲ့ THC ၀.၂ ရာခိုင်နှုန်းထက်ကျော်ပြီး ပါဝင်တယ်ဆိုရင် တရားမဝင်ဘူးလို့ သတ်မှတ်ထားဆဲဖြစ်နေမှာပါ။

ဆေးခြောက်ဥပဒေအသစ်ထုတ်ပြန်ပြီး စည်းမျဉ်းများရှင်းရှင်းလင်းလင်းမဖြစ်ခင်အထိ ခရီးသွားဧည့်သည်တွေအနေနဲ့ သတိထားသုံးစွဲသင့်ကြောင်း ချင်းမိုင်တက္ကသိုလ် အပင်နှင့်မြေဆီသိပ္ပံဌာနမှ ပရော်ဖက်ဆာ'ဆာရာနာဆွမ်မာနို'က ပြောပြပါတယ်။

ထိုင်းနိုင်ငံက ဆေးခြောက်ကို ဆေးဘက်ဆိုင်ရာဈေးကွက်မှာဖြန့်ဖြူးချင်နေတာဖြစ်ပါတယ်။

ဆေးဘက်ဆိုင်ရာဧည့်ခရီးလုပ်ငန်းကောင်းလည်းရှိထားပြီး သူတို့ဆီကအပူပိုင်းရာသီဥတုကလည်း ဆေးခြောက်စိုက်ပျိုးဖို့သင့်တော်ပါတယ်။

"ကျွန်တော်တို့အနေနဲ့ ဆေးခြောက်ကိုဘယ်လိုသုံးရမလဲဆိုတာ သိရှိရပါမယ်၊ သုံးတတ်မယ်ဆိုရင် ဆေးခြောက်ကရွှေလိုပဲတန်ဖိုးရှိပြီး အရောင်းမြှင့်တင်သင့်ပါတယ်" လို့ ပြည်သူ့ကျန်းမာရေးဝန်ကြီး'အန်နူတင်ချန်ဝီရာကူလ်'က ပြောကြားလိုက်ပါတယ်။

ဆေးခြောက်အမှုနဲ့ ရင်ဆိုင်နေရသူများကို လွှတ်ပေးပြီး ဆေးခြောက်နဲ့ပတ်သက်လို့ သိမ်းဆည်းထားတဲ့ပစ္စည်းနဲ့ငွေတွေကို ပိုင်ရှင်တွေထံပြန်လည်ပေးအပ်သွားမယ်လို့ နိုင်ငံတကာမူးယစ်ဆေး မူဝါဒလုပ်ငန်းစုမှ အာရှဆိုင်ရာညွှန်ကြားရေးမှူး'ဂလော်ရီယာလိုင်'က ပြောကြားလိုက်ပါတယ်။

ဆေးခြောက်စိုက်ပျိုးထုတ်လုပ်ရေးလုပ်ငန်းများမှ ထိုင်းနိုင်ငံရဲ့စီးပွားရေးအကျိုးအမြတ်များရရှိလာဖို့ မျှော်လင့်နေကြပါတယ်။

Source: AP News.
#Yangon_Media_Group

#WorldHealth
Published 10 June 2022

အဝလွန်ခြင်းက နှလုံးတည်ဆောက်ပုံအားနည်းနိုင်ပြီး နှလုံးအလုပ်မလုပ်နိုင်တာမျိုးဖြစ်နိုင်ကြောင်း လေ့လာချက်တစ်ခုမှာတွေ့ရှိထားပါတယ်။

ခန္ဓာကိုယ်အဆီများရာကနေ သွေးလည်ပတ်မှုစနစ်မှာလည်း ပြဿနာတွေဖြစ်နိုင်ပါတယ်။

အဆိုပါသုတေသနကို ဗြိတိန်လူမျိုး ၄၉၀,၀၀၀ နီးပါးဆီကနေ ဆန်းစစ်လေ့လာထားတာဖြစ်ပါတယ်။

BMI များသူတွေနဲ့ ခါးတင်ပါးအချိုးများသူ ၃၀ ရာခိုင်နှုန်းလောက်မှာ နှလုံးအားနည်းခြင်းမျိုးဖြစ်နိုင်ချေရှိနေပါတယ်။

အခြားရောဂါအန္တရာယ်များဖြစ်တဲ့ ဆီးချို၊ သွေးတိုး၊ ကိုလက်စ်ထရောများခြင်းတို့ကိုပါ ထည့်သွင်းပြီးတာတောင် ယခုလိုဖြစ်နိုင်ချေများနေတာဖြစ်ပါတယ်။

BMI ၂၅ မှတ်ထက်များသူတွေကို နှလုံးဓာတ်မှန်ရိုက်ကြည့်ပြီး ကျန်းမာရေးကောင်းမွန်တဲ့သူတွေနဲ့နှိင်းယှဉ်ကြည့်ခဲ့ကြပါတယ်။

အဝလွန်သူတွေမှာ နှလုံးကြွက်သားများထူခြင်း၊ ဒဏ်ရာအမာရွတ်ရှိခြင်း၊ နှလုံးအခန်းညှစ်ထုတ်နှုန်းအားနည်းခြင်းတို ပိုမိုဖြစ်ပွားတာကိုတွေ့ရှိခဲ့ရပါတယ်။

ဒီအခြေအနေတွေက နှလုံးကနေ တစ်ကိုယ်လုံးဆီသို့သွေးရောက်ရှိအောင် ထိရောက်စွာညှစ်ထုတ်နိုင်ဖို့ ခက်ခဲနေပြီး နှလုံးအားနည်းခြင်း စတင်ဖြစ်ပွားလာပါတော့တယ်။

နှစ်စဉ်ယူကေမှာ နှလုံးအားနည်းသူ ၉ သိန်းနဲ့ အမေရိကန်မှာ ၆ သောင်းရှိလာကာ ဗြိတိန်နိုင်ငံရှိလူသေဆုံးမှုနှုန်းရဲ့ ၄ ပုံ ၁ ပုံလောက်ဟာ နှလုံးသွေးကြောရောဂါတွေကြောင့်ဖြစ်နေပါတယ်။

လန်ဒန်ကွင်းမယ်ရီတက္ကသိုလ်မှ သုတေသီတွေက ဗြိတိန်လူမျိုး ၃၁,၁၀၇ ယောက်ကို CMR scan ဖြင့် ရောဂါရှာဖွေကာ နှလုံးအခြေအနေများကို တင်ပြခဲ့ကြပါတယ်။

စမ်းသပ်မှုအစမှာ သူတို့ရဲ့ BMI နဲ့ ခါးတင်ပါးအချိုးကို တိုင်းတာခဲ့ကြပါတယ်။

ကျွမ်းကျင်သူတွေက အဝလွန်ခြင်းနဲ့ နှလုံးအနေအထားပြောင်းလဲသွားပုံများကြား ဆက်စပ်မှုများကို ဆက်လက်စုံစမ်းလေ့လာဖို့ တောင်းဆိုခဲ့ကြပါတယ်။

"အဝလွန်ခြင်းက နှလုံးသွေးကြောရောဂါများဖြစ်နိုင်ပြီး နှလုံးအားနည်းခြင်းဖြစ်တတ်တယ်ဆိုတာကို သိပြီးသားဖြစ်ပါတယ်၊ ဒါပေမဲ့ အခုဆိုရင် အဝလွန်ခြင်းကိုယ်တိုင်ကိုက နှလုံးအားနည်းခြင်းကို စတင်ဖြစ်ပွားစေတယ်လို့ သိလာရပါတယ်"လို့ ကွင်းမယ်ရီမှဒေါက်တာ'ဇာရာရေစီအက်စ်တာဘရက်ဂ်'က ပြောပြပါတယ်။

ယခုလေ့လာမှုကနေ အဝလွန်ခြင်းနဲ့ နှလုံးတည်ဆောက်ပုံအပြောင်းအလဲတို့ကြား ဆက်စပ်ပုံကို ပိုမိုသိရှိနားလည်လာအောင် လေ့လာနိုင်မှာဖြစ်ပါတယ်လို့ ပရော်ဖက်ဆာ'ဂျိမ်းစ်လိုက်ပါ'က ဆိုပါတယ်။

Source: DailyMail
#Yangon_Media_Group

#CovidVaccine
Published 10 June 2022

မိုဒါနာကထုတ်လုပ်တဲ့ ကိုရိုနာဗိုင်းရပ်စ်ကာကွယ်ဆေးအသစ်ဟာ မူလကာကွယ်ဆေးထက် အိုမီခရွန်မျိုးဗီဇကွဲကို ပိုမိုထိရောက်စွာကာကွယ်နိုင်တယ်လို့ ဗုဒ္ဓဟူးနေ့က ပြောကြားလိုက်ပါတယ်။

ဆောင်းဦးရာသီအတွင်း ရောဂါကူးစက်မှုမြင့်တက်နေခြင်းကို တိုက်ဖျက်ဖို့အတွက် မိုဒါနာက အားမြှင့်ကာကွယ်ဆေး ထုတ်လုပ်နေတာဖြစ်ပါတယ်။

ဒီကာကွယ်ဆေးကို စတုတ္ထအကြိမ်ကိုဗစ်ကာကွယ်ဆေးအဖြစ် စမ်းသပ်ဖို့စာရင်းပေးထားတဲ့ လူပေါင်း ၈၀၀ ကျော်မှာထိုးနှံခဲ့ရာ အိုမီခရွန်ကိုကာကွယ်နိုင်မယ့် ပဋိပစ္စည်းခုခံအား ၈ ဆပိုများကြောင်းတွေ့ရှိခဲ့ရပါတယ်။

အိုမီခရွန်မျိုးဗီဇကွဲနဲ့ မူလဗိုင်းရပ်စ်တွေကိုပါ ကာကွယ်နိုင်မယ့် ကိုဗစ်ကာကွယ်ဆေးအချက် အလက်တွေကို လာမယ့်အပတ်များအတွင်း တာဝန်ရှိသူများထံ တင်ပြသွားဖိုစီစဉ်ထားပြီး နွေရာသီနှောင်းပိုင်းမှာ ပြည်သူများထံဖြန့်ဝေသွားမယ်လို့ ကုမ္ပဏီကအသိပေးခဲ့ကာ သူတို့ရဲ့ရှယ်ယာတန်ဖိုး ၃ ရာခိုင်နှုန်းမြင့်တက်လာခဲ့ပါတယ်။

ကုမ္ပဏီအနေနဲ့ အမေရိကန်အစားအစာနဲ့ကွပ်ကဲရေး(FDA)နဲ့ အခြားတာဝန်ရှိသူများနှင့်ပါ လေ့လာမှု အပိုင်းဆက်စပ်လုပ်ကိုင်လျက်ရှိပြီး လျှောက်ထားတင်ပြချက်တွေ အဆင်ပြေချောမွေ့စေမှာဖြစ်ကြောင်း မိုဒါနာဥက္ကဌ'စတီဖင်ဟော့ဂ်'က ပြောပြပါတယ်။

ဒီကိစ္စတွေအားလုံးကို ရိုးရိုးရှင်းရှင်းနဲ့ ဆွေးနွေးတင်ပြနိုင်ဖို့ မျှော်လင့်ထားပါတယ်လို့ ဆိုပါတယ်။
အမေရိကန်အပါအဝင် အချို့နိုင်ငံတွေမှာ နှစ်စဉ်ဆောင်းဦးကာလ ကိုဗစ်ကာကွယ်ဆေးထိုးဖို့အစီအစဉ် ချမှတ်မလားဆိုတာတော့ မသိရသေးပါဘူး။

သူတို့ရဲ့အချက်အလက်တွေက အတော်လေးအားရကျေနပ်ဖွယ်ကောင်းပါတယ်လို့ ဗန်ဒါဘစ်လ်ဆေးပညာတက္ကသိုလ်မှ ကူးစက်ရောဂါပညာရှင်ဒေါက်တာ'ဝီလျံရှက်ဖ်နာ'က ဆိုပါတယ်။

ဒေါက်တာက FDA အနေနဲ့ ဒီကာကွယ်ဆေးကို အသိအမှတ်ပြုပေးဖို့မျှော်လင့်နေပြီး အမေရိကန်ရောဂါထိန်းချုပ်ကာကွယ်ရေးစင်တာက အရွယ်ရောက်ပြီးသူ အားလုံးကိုထိုးပေးမှာလား ဒါမှမဟုတ် အသက်ကြီးသူတွေကိုပဲ ထိုးပေးမှာလားဆိုတာလည်း မသိရသေးပါဘူး။

ဩဂုတ်လလောက်မှာ တင်ပို့နိုင်ဖို့အတွက် အားမြှင့်ကာကွယ်ဆေးအသစ်တွေကို ကုမ္ပဏီကအရှိန်မြှင့်ထုတ်လုပ်နေကြောင်း အမှုဆောင်ချုပ်'စတီဖင်ဘန်ဆယ်'က ပြောပြပါတယ်။

အဆိုပါအားမြှင့်ကာကွယ်ဆေးစမ်းသပ်ရာမှာ အရင်ကာကွယ်ဆေးတွေထက် အယ်လ်ဖာ၊ ဘီတာ၊ ဂမ်မာ၊ ဒယ်လ်တာတို့ကိုကာကွယ်ရာမှာ ပဋိပစ္စည်း(antibody)တွေ ပိုမိုထွက်ရှိကြောင်း တွေ့ရှိခဲ့ရပါတယ်။

Source: Reuters.
#Yangon_Media_Group

Published 10 June 2022

ကုလသမဂ္ဂလုံခြုံရေးကောင်စီတွင် ဂျပန်နိုင်ငံသည် ၂၀၂၃မှ ၂၀၂၄ အထိ (၂)နှစ်သက်တမ်းအတွက် အလှည့်ကျအဖွဲ့ဝင်နိင်ငံငါးနိုင်ထဲက တစ်နိုင်ငံအဖြစ် ဇွန် ၉ရက်က ရွေးကောက်ခံရတယ်လို့သိရပါတယ်။

ဂျပန်နည်းတူ လာမယ့်သက်တမ်း(၂)နှစ်အတွက် ရွေးကောက်ခံရတဲ့ (၄)နိုင်ငံက ဆွစ်ဇာလန်၊မိုဇမ်ဘစ်၊မော်လ်တာနှင့် အီကွေဒေါတို့ဖြစ်ကြပါတယ်။

အဲဒီ(၅)နိုင်ငံဟာ လက်ရှိ အမြဲတမ်းမဟုတ်သော အလှည့်ကျအဖွဲ့ဝင်နိုင်ငံတွေဖြစ်တဲ့ အိန္ဒိယ၊နော်ဝေး၊ကင်ညာ၊မက္ကဆီကိုနှင့် အိုင်ယာလန်တို့ နေရာ အစားထိုးတာဝန်ယူကြမှာဖြစ်ပါတယ်။

ကုလသမဂ္ဂလုံခြုံရေးကောင်စီမှာ အဖွဲ့ဝင်(၁၅)နိုင်ငံရှိပါတယ်။ အဲဒီအထဲက (၅)နိုင်ငံကတော့ အမြဲတမ်းအဖွဲ့ဝင်နိုင်ငံတွေဖြစ်ကြပြီး အမေရိကန်ပြည်ထောင်စု၊ရုရှား၊တရုတ်၊ပြင်သစ်နှင့်ဗြိတိန်တို့ဖြစ်ကြပါတယ်။

အခြား(၁၀)နေရာကတော့အလှည့်ကျစနစ်နှင့် အခြားနိုင်ငံတွေက တာဝန်ယူကြပါတယ်။နှစ်တိုင်း (၅)နိုင်ငံစီ ပြန်ရွေးကြတာ ဖြစ်ပါတယ်။

ဂျပန်၊ဆွစ်ဇာလန်၊မိုဇမ်ဘစ်၊မော်လ်တာနှင့် အီကွေဒေါတို့ကို ကုလသမဂ္ဂ အထွေထွေညီလာခံကနေ လျို့ဝှက်မဲနှင့် ရွေးချယ်ပေးခဲ့ကြပါတယ်။

၁၉၃နိုင်ငံတက်ရောက်မဲပေးရာမှာ ဂျပန်က ၁၈၄မဲရခဲ့ပါတယ်။

ဂျပန်ရဲ့ ထိပ်တန်းဦးစားပေးကတော့ “  စွမ်းအင်နှင့် စားနပ်ရိက္ခာအပါအဝင် လုံခြုံရေးကိစ္စဖြစ်တယ်” လို့ ဂျပန်ဒုတိယနိုင်ငံခြားရေးဝန်ကြီး အိုဒါဝါယာကီယိုရှီကပြောပါတယ်။

မိုဇမ်ဘစ်ဟာ ကုလလုံခြုံရေးကောင်စီမှာ ပထမဆုံးရွေးချယ်ခံရတာဖြစ်ပြီး ၁၉၂မဲရခဲ့ပါတယ်။

ဆွစ်ဇာလန်က ၁၈၇မဲ၊မော်လ်တာက ၁၈၅မဲနှင့် အီကွေဒေါက ၁၉၀မဲရရှိခဲ့ကြပါတယ်။

Source: AFP

Published 9 June 2022

မြက်ခင်းပြင်တစ်ခုပေါ်မှာ ပိုးစုန်းကြူးကလေးတွေ ကခုန်နေကြတာကို လူတွေက အံဩချီးမွမ်းနေကြပါတယ်။ ပြီးတော့ လေထိုးဝေလရုပ်ကြီးတစ်ကောင်အပေါ်ကနေ ဖြတ်လျှောက်နေကြပါတယ်။ အဲဒီနောက် ရောင်စုံအနုပညာလက်ရာတွေနှင့် အတူယှဉ်တွဲပြီး ဓာတ်ပုံရိုက်နေကြပါတယ်။ ရေရှည်တည်တံ့ရေးကို အားပေးတဲ့အနေနှင့် စင်္ကာပူမှာ အလင်းရောင်ပွဲတော်ကို ဆင်နွှဲနေကြတာဖြစ်ပါတယ်။

အိုင်-အလင်းရောင်ပွဲတော်ကို စင်္ကာပူမှာ ကိုဗစ်ကြောင့် (၂)နှစ်ရပ်နားထားရာကနေ ယခုစင်္ကာပူမြို့ မရီနာဘေ နေရာတစ်ဝိုက် ယခုပြန်လည်ကျင်းပခဲ့တာပါ။

ကြီးမားတဲ့ အင်စတောလေးရှင်းအမျိုး(၂၀)ထဲမှာ ရေခူကြီးတစ်ကောင်၊စွန့်ပစ်ထားတဲ့ ငါးဖမ်းပိုက်အဟောင်းတွေနှင့်ပြုလုပ်ထားတဲ့ မီးအိမ်တွေနှင့် စီဒီချပ်တွေနှင့်ထုလုပ်ထားတဲ့ပန်းပုတွေလည်း အပါအဝင် ဖြစ်ပါတယ်။

စွမ်းအင်ချွေတာတဲ့ မီးလုံးတွေနှင့် ပတ်ဝန်းကျင်ထိန်းသိမ်းရေး အထောက်အကူပြုပစ္စည်းတွေနှင့် အင်စတောလေးရှင်းအနုပညာလက်ရာတွေကို ဖန်တီးထားပါတယ်။ ဒီလိုဖန်တီးရတာဟာ စဉ်ဆက်မပြတ်ထိန်းသိမ်းရေး အလေ့အထတွေ ထွန်းကားစေဖို့ ရည်ရွယ်တာလို့ ပွဲတော်ကျင်းပသူတွေက ပြောပါတယ်။ဒါပေမယ့် အချို့ကတော့ သူတို့ရဲ့ ပတ်ဝန်းကျင်ထိန်းသိမ်းရေး သတင်းစကားပါးတာ ဘယ်လောက်ထိရောက်မှာလဲလို့ သံသယရှိနေကြပါတယ်။

Source AFP