#World_Health
Published_ 2 April 2023

အလွန်သေးငယ်တဲ့ဘက်ထရီဖြင့် ရင်သားကင်ဆာဖြစ်နေတဲ့ကြွက်တွေကို ၂ ပတ်အတွင်းကုသပေးနိုင်ခဲ့ကာ လူနာတွေအတွက် မျှော်လင့်ချက်ဖြစ်လာစေပါတယ်။

ထိုပစ္စည်းက ဆားရည်ထဲ လျှပ်စီးပတ်လမ်းငယ်ဖန်တီးပြီး အောက်ဆီဂျင်နှစ်ထားတဲ့ အကျိတ်တစ်ရှူးနားတဝိုက်မှာ ထိုးသွင်းလိုက်တာဖြစ်ပါတယ်။

ဘက်ထရီက သူ့အလိုလိုအားသွင်းနိုင်ပြီး နာရီ ၅၀၀ အထိ ခံနိုင်ရည်ရှိကြောင်း သုတေသီများက ဆိုပါတယ်။

ထိုနည်းလမ်းက ကင်ဆာဆဲလ်တွေမှာ အောက်ဆီဂျင်ပြတ်လပ်ခြင်းကို ဖြစ်ပေါ်စေတာဖြစ်ပါတယ်။

ဒါ့အပြင် အောက်ဆီဂျင်ကျသွားတဲ့ဆဲလ်တွေထဲ ထိုးသွင်းလိုက်တဲ့အထူးဆေးတွေရဲ့ ထိရောက်မှုကိုလည်း မြှင့်တင်ပေးပါတယ်။

"၁၄ ရက်ကြာပြီးနောက် ဘက်ထရီအသုံးပြုပြီး ဆေးကုသမှုခံယူခဲ့တဲ့ ကြွက် ၅ ကောင်ရဲ့အကျိတ်တွေက ၉၀ ရာခိုင်နှုန်းလောက်လျော့ကျခဲ့ပြီး ၄ ကောင်ကတော့ အကျိတ်ပျောက်ကင်းသွားပါတယ်" လို့ ရှန်ဟိုင်း ဖူဒန်တက္ကသိုလ်မှ ပရော်ဖက်ဆာ'ဖန်ကျန်'က ပြောပြခဲ့ပါတယ်။

အသုံးပြုတဲ့ဆေးတွေကတော့ HAP လို့ခေါ်တဲ့ ဆေးတွေဖြစ်ပါတယ်။

သူတို့ရဲ့ထိရောက်မှုကို လုံလုံလောက်လောက် သက်သေမပြနိုင်သေးတာကြောင့် ဆေးဘက်ဆိုင်ရာမှာ အသုံးပြုခွင့်မပေးသေးပါဘူး။

ဘက်ထရီက အကျိတ်ကိုဖုံးကွယ်ပေးပြီး အတွင်းရှိအောက်ဆီဂျင်ကို ၁၄ ရက်ကျော်ကြာအောင် အဆက်မပြတ်သုံးစွဲပါတယ်။

ဒါပေမဲ့ အကျိတ်ထဲမှာ အောက်ဆီဂျင်ပြတ်လပ်ပါက ကင်ဆာပျံ့ပွားခြင်းကို များပြားစေနိုင်ကြောင်း ကိမ်းဘရစ်ချ်တက္ကသိုလ်မှ ပရော်ဖက်ဆာ'ရန်ဒယ်လ်ဂျွန်ဆန်'က ဆိုပါတယ်။

လူတွေမှာ အဆိုပါဘက်ထရီဖြင့်ကုသမယ်ဆိုရင်တော့ ကုန်ကျစရိတ်တွေနဲ့ ထိရောက်မှုကို အရင်တိုင်းတာသင့်ပါတယ်။

ယူကေမှာ ရင်သားကင်ဆာကြောင့် နှစ်စဉ်နှစ်တိုင်းလူပေါင်း ၁၁,၅၀၀ ခန့်သေဆုံးထားပါတယ်။
Source: The Sun
#World_Health #ရင်သားကင်ဆာ #သုတေသီများ #ကြွက်များကိုအချိန်(၂)ပတ်အတွင်းကုသ
#YMG #Yangon_Media_Group

#World_Health
Published_12 April 2023

မိခင်ဖြစ်လာတော့မယ့် အမျိုးသမီးတွေအနေနဲ့ ကိုယ်ဝန်ဆောင်ကာလမှာ ဂရုတစိုက်စားသုံးဖို့ အလွန်အရေးကြီးပါတယ်။

ကလေးတွေ ကျန်းမာသန်စွမ်းစွာ ဖွံ့ဖြိုးလာစေရန်အတွက် သင့်တင့်မျှတတဲ့အစားအစာအာဟာရ ရရှိဖို့အာရုံစိုက်သင့်ပါတယ်။

နွေရာသီမှာ အထူးသဖြင့် သတိထားစားသုံးသင့်ပြီး ထိုရာသီအတွင်း စားသောက်ချင်စိတ်နည်းပါးကာ ရေဓာတ်ခန်းခြောက်မှု ပိုဖြစ်တတ်ပါတယ်။

ကိုယ်ဝန်ဆောင်ကာလအတွင်း စားသုံးသင့်တဲ့ အရေးကြီးအစားအစာတွေကတော့..
(၁) ဟင်းသီးဟင်းရွက်
ဟင်းနုနွယ်၊ ဂေါ်ဖီထုပ်၊ ပန်းဂေါ်ဖီတို့မှာ ဖောလစ်အက်ဆစ်၊ သံဓာတ်၊ ကယ်လ်စီယမ်တို့ကြွယ်ဝပါတယ်။

သံဓာတ်က သွေးနီဥထုတ်လုပ်ရာမှာ အရေးပါပြီး ကိုယ်ဝန်ဆောင်စဉ် သွေးအားနည်းခြင်းကို ကာကွယ်ပေးပါတယ်။

(၂) အသီးအနှံ
လိမ္မော်သီး၊ ဘယ်ရီသီးများ၊ ငှက်ပျောသီး၊ ပန်းသီး၊ သစ်တော်သီးတို့မှာ ဗိုက်တာမင်၊ သတ္တုဓာတ်၊ ဗိုက်တာမင်-စီ၊ ပိုတက်ဆီယမ်၊ အမျှင်ဓာတ်တို့ပါဝင်ပါတယ်။

ဗိုက်တာမင်စီက သံဓာတ်ကိုစုပ်ယူကာ ကိုယ်ခံအားကိုထောက်ပံ့ပေးပြီး ပိုတက်ဆီယမ်က သွေးပေါင်ချိန်ကို ထိန်းသိမ်းပေးပါတယ်။

(၃) ပရိုတိန်း
ကြက်သား၊ ငါး၊ ကြက်ဆင်၊ တိုဖူးတို့မှာ ပရိုတိန်းများပါဝင်ပြီး သံဓာတ်၊ ဇင့်၊ ဗိုက်တာမင်-ဘီ၁၂ တို့ ပံ့ပိုးပေးပါတယ်။

သံဓာတ်က သန္ဓေသားဖွံ့ဖြိုးမှုအတွက် အရေးပါပြီး ဗိုက်တာမင်-ဘီ၁၂ က သန္ဓေသားဦးနှောက်နဲ့ အာရုံကြောစနစ်အတွက် အရေးကြီးပါတယ်။

(၄) ဂျုံနှင့်စပါး
ဆန်ညို၊ ဂျုံပေါင်မုန့် စတာတွေမှာ ကာဗိုဟိုက်ဒရိတ်၊ အမျှင်ဓာတ်ပါဝင်ပြီး သွေးတွင်းသကြားဓာတ်ကိုထိန်းညှိပေးကာ စွမ်းအင်ပေးစွမ်းနိုင်ပါတယ်။

အမျှင်ဓာတ်က ဝမ်းချုပ်ခြင်းကိုကာကွယ်ပေးပြီး အစာချေခြင်းကို ကူညီပေးပါတယ်။

(၅) မြေပဲနှင့်အစေ့အဆန်များ
ဗာဒံစေ့၊ သစ်ကြားသီး၊ ချီယာစေ့၊ လျှော်စေ့တို့လို အစေ့အဆန်တွေမှာ ကျန်းမာရေးနဲ့ညီညွတ်တဲ့ အဆီ၊ ပရိုတိန်း၊ အာဟာရဓာတ်များပါဝင်ပါတယ်။

ဗိုက်တာမင်-အီးက သန္ဓေသားဆဲလ်ကြီးထွားခြင်းအတွက် အရေးပါပြီး မဂ္ဂနီဆီယမ်က သွေးပေါင်ချိန်ထိန်းသိမ်းပေးကာ ကြွက်သားနဲ့အာရုံကြောလုပ်ဆောင်ချက်ကို ထောက်ပံ့ပေးပါတယ်။
Source: The Jerusalem Post
#World_Health #ကိုယ်ဝန်ဆောင် #အရေးကြီးအစားအစာ(၅)မျိုး
#YMG #Yangon_Media_Group

#World_History
Published_ 11 April 2023

အီရတ်သမ္မတဟောင်း'ဆက်ဒမ်ဟူစိန်' အာဏာကျပြီး နှစ် ၂၀ ကြာသည့်တိုင်အောင် ဂျော်ဒန်နိုင်ငံမှာ သူ့ရဲ့ပုံရိပ်တွေ တွေ့နေရဆဲဖြစ်ပြီး နာမည်ကြီးလေးစားခံနေရဆဲ ဖြစ်ပါတယ်။

#World_History # အီရတ်ခေါင်းဆောင်ဆက်ဒမ်ဟူစိန် #အမှတ်ရလေးစား
#YMG #Yangon_Media_Group

#Daily_News
Published_ 11 April 2023

၁။ပုဂံမှာ ဘုရားပုံတော်တွေ မြေကြီးမှာ ချမရောင်းဖို့နဲ့ ဗုဒ္ဓဘာသာ ပုံရိပ်ဆိုင်ရာတွေ ကိုယ်ခန္ဓာမှာ တက်တူးထိုးရင် အရေးယူမည်

၂။ဆန်နှင့်ဆန်ကွဲ ပို့ကုန်ဝင်ငွေ ဒေါ်လာ ၁ ဘီလီယံ ရရှိရေး ဆန်စပါးအသင်းချုပ် ရည်မှန်းထား

၃။ဧပြီလတွင် ပြည်တွင်းခရီးသွားကဏ္ဍ အမြင့်ဆုံးအချိန်ရောက်နေ၊ မေလ၌ တဖြည်းဖြည်းပြန်ကျဆင်းနိုင်ဟုဆို

၄။နှစ်(၂၀)ကြာပြီးတိုင်အောင် အီရတ်ခေါင်းဆောင်ဟောင်း ဆက်ဒမ်ဟူစိန်အား ဂျော်ဒန်တွင်အမှတ်ရ လေးစားနေကြဆဲ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#World_Crime
Published_ 11 April 2023

တနင်္လာနေ့က လူဝီဗီးလ်မြို့ရှိ ဘဏ်တစ်ခုမှာ အသက် ၂၃ နှစ်အရွယ် ဘဏ်ဝန်ထမ်းဟောင်းတစ်ဦးက လုပ်ဖော်ကိုင်ဖက် ၅ ဦးကို သေနတ်ဖြင့် ပစ်သတ်ကာ နောက်ထပ် ၉ ဦးဒဏ်ရာရစေခဲ့ပြီးယင်းကို ဆိုရှယ်မီဒီယာမှာ တိုက်ရိုက်ပြသခဲ့ကြောင်း ရဲတပ်ဖွဲ့က ပြောကြားခဲ့ပါတယ်။

သေနတ်သမားဟာ အခင်းဖြစ်ပွားရာနေရာမှာပဲ ထိမှန်သေဆုံးခဲ့ပြီး ရဲတပ်ဖွဲ့က ပစ်သတ်တာလား ဒါမှမဟုတ် သူ့ကိုယ်သူပစ်သတ်တာလားဆိုတာ မသိရပါဘူး။

အမေရိကန်က လူအစုလိုက်အပြုံလိုက် ပစ်သတ်မှုဖြစ်ရပ်တွေထဲမှာ အခုဖြစ်ရပ်က နောက်ဆုံးဖြစ်ပျက်သွားတာဖြစ်ပါတယ်။

သေနတ်သမားက 'ကော်နာစတာဂျန်'ဖြစ်ကာ ပြီးခဲ့တဲ့နှစ်က အမျိုးသားဘဏ်ဟောင်းမြို့ထဲရုံးခွဲမှာ အချိန်ပြည့်ဝန်ထမ်းအဖြစ် အလုပ်ဝင်ခဲ့ကြောင်း လူဝီဗီးလ်ရဲတပ်ဖွဲ့က ဆိုပါတယ်။

စလပ်ဂါဖီးလ်ဘေ့စ်ဘောကွင်းအနီး ဘဏ်ရုံးမှာ နံနက်ပိုင်း ၈ နာရီခွဲ၌ ပစ်ခတ်မှုဖြစ်ပွားနေတယ်လို့ သတင်းပေးပို့ပြီး မိနစ်ပိုင်းအတွင်းမှာပဲ ရဲတပ်ဖွဲ့က တုန့်ပြန်ဆောင်ရွက်ခဲ့ကြောင်း သိရပါတယ်။

ရဲအရာရှိတွေက ရိုင်ဖယ်ကိုင်ဆောင်ထားတဲ့ သေနတ်သမားကို ပစ်ခတ်ခဲ့ကြောင်း ရဲမှူးချုပ်'ဂျက်ကွီလင်ဂွင်ဗီလာရိုလ်'က သတင်းထောက်တွေကို ပြောကြားခဲ့ပါတယ်။

တိုက်ခိုက်သူက သူပစ်ခတ်နေတဲ့ပုံကို ဆိုရှယ်မီဒီယာမှာ ထုတ်လွှင့်ပြသခဲ့တယ်လို့ ဆိုပါတယ်။

ထိခိုက်သေဆုံးသူတွေကတော့ အသက် ၄၀ နှစ် 'ယိုရွှာဘာရစ်'၊ အသက် ၅၇ နှစ် 'ဒင်နာအက်ခ်ဘာ့'၊ အသက် ၆၃ နှစ် 'သောမတ်စ်အယ်လီယော့'၊ အသက် ၄၅ နှစ် 'ဂျူလီယာနာဖာမာ'၊ အသက် ၆၄ နှစ်'ဂျိမ်းစ်တက်'တို့ဖြစ်ပါတယ်။

ကင်တပ်ကီအုပ်ချုပ်ရေးမှူး'အန်ဒီဘီရှီယာ'က နေ့လယ်ခင်းသတင်းစာရှင်းလင်းပွဲမှာ ငိုကြွေးပြောကြားခဲ့ပါတယ်။

ဒဏ်ရာရသူတွေထဲမှာ ရဲအရာရှိ ၂ ဦးလည်းပါဝင်ခဲ့ပြီး အသက် ၂၆ နှစ်အရွယ် ရဲအရာရှိဟာ ဦးခေါင်းကို ထိမှန်ခဲ့ပြီးနောက် စိုးရိမ်ရဖွယ်အခြေအနေ ရှိနေပါတယ်။

အမေရိကန်မှာ ၂၀၂၃ ခုနှစ်အတွင်း အစုလိုက်အပြုံလိုက် ပစ်ခတ်မှုပေါင်း ၁၄၆ မှုဖြစ်ပွားခဲ့ပြီး ၂၀၁၆ နောက်ပိုင်းအများဆုံးဖြစ်ပွားခဲ့တာ ဖြစ်ပါတယ်။

သေနတ်များ လုံခြုံစွာသိမ်းဆည်းရန်၊ သေနတ်ရောင်းချမှုများအတွက် နောက်ကြောင်းစစ်ဆေးမှု၊ သေနတ်ထုတ်လုပ်သူများ လွတ်ငြိမ်းချမ်းသာခွင့် ဖယ်ရှားရန် လိုအပ်တဲ့ဥပဒေများကို ကွန်ဂရက်လွှတ်တော်မှ အတည်ပြုပေးစေလိုကြောင်း သမ္မတ'ဂျိုးဘိုင်ဒင်'က ပြောကြားလိုက်ပါတယ်။

Source: Daily Mail
#World_Crime #လူဝီဗီးလ် #ဘဏ်ဝန်ထမ်းဟောင်း #သေနတ်ပစ်ခတ်မှု #(၅)ဦးသေဆုံး
#YMG #Yangon_Media_Group

#World_Health
Published_ 11 April 2023

အမျိုးသားများ ဆီးသွားရင်း မိုဘိုင်းဖုန်းအသုံးပြုတာဟာ ကျန်းမာရေးဘေးထွက်ဆိုးကျိုးများ ရှိလာစေနိုင်ကြောင်း ဆရာဝန်များသတိပေးလာကြပါတယ်။

အများသုံးအိမ်သာတွေမှာ ရေဆွဲချရာကနေ စင်ထွက်လာတဲ့ဘက်တီးရီးယားတွေက ရက်ပိုင်းအထိကြာအောင် ရှိနေနိုင်ကြောင်း အင်ဒီယာနာကျန်းမာရေးတက္ကသိုလ်မှ ဆီးလမ်းကြောင်းပညာရှင် ဒေါက်တာ'ဟယ်လန်ဘာနီ'က ပြောကြားခဲ့ပါတယ်။

ဆီးစက်တွေက အိမ်သာခွက်ထဲကနေ ၃ ပေလောက်အထိ စင်ထွက်လာနိုင်ပြီး ရေဆွဲချတဲ့အခါမှာ ၆ ပေလောက်အထိ လွင့်စင်လာနိုင်ပါတယ်။

လက်တစ်ဖက်သုံးပြီး ဆီးသွားကြကာ အခြားလက်ဖြင့် ဖုန်းကိုင်ထားခြင်းက ရောဂါပိုးမပျံ့ပွားနိုင်ဘူးလို့ အထင်မှားနေတတ်ကြပါတယ်။

အများသုံးအိမ်သာတွေမှာ ထိတွေ့သမျှအရာတွေက ပိုးမွှားများပြည့်နှက်နေတတ်ပါတယ်။

လေထုထဲသို့ပျံ့နှံ့သွားကာ E coli ၊ streptococcus ၊ အသည်းရောင်အသားဝါ A နဲ့ E စတဲ့ဘက်တီးရီးယားများ ပေါက်ဖွားရာနေရာဖြစ်နေပြီး ဝမ်းရောဂါအမျိုးမျိုးဖြစ်စေပါတယ်။

ရေဆွဲချရာမှ လွင့်စင်လာတဲ့ အမှုန် ၅၇ ရာခိုင်နှုန်းခန့်ဟာ လူတစ်ယောက်ဆီသို့ ၅.၅ စက္ကန့်အတွင်း ရောက်ရှိသွားနိုင်ပါတယ်။

လက်ထဲကကိုင်ထားတဲ့ဖုန်း၊ ခန္ဓာကိုယ်ဆီကို အဆိုပါအမှုန်များလွင့်စင် ကပ်ညိလာနိုင်ပါတယ်။

ဒီနောက် လက်ကိုင်ဖုန်းကို မျက်နှာနားကပ်ပြီး ဖုန်းပြောတဲ့အခါ အဆိုပါအညစ်အကြေးမှုန်များက ပါးစပ်၊ မျက်နှာတွေသို့ထိစပ်လာနိုင်ပါတယ်။

၂၀၂၀ ခုနှစ်က အီရန်မှာ ရေအိမ်ပေါင်း ၁,၀၆၂ ခုမှ နမူနာများရယူခဲ့ကာ နမူနာအားလုံးရဲ့ ၈၉ ရာခိုင်နှုန်းက ရောဂါပိုးများကူးစက်နေပြီး အများစုက E. coli ဖြစ်နေပါတယ်။

ဒေါက်တာဘာနီပြောကြားရာမှာ "ပြန်လွင့်စင်လာတဲ့အမှုန်တွေက ကျားအင်္ဂါအထိရောက်ရှိနိုင်ကာ လက်တွဲဖော်ကိုပါကူးစက်နိုင်ပါတယ်" လို့ ဆိုပါတယ်။

လက်အခြောက်ခံစက်တွေကနေလည်း လက်ပေါ်သို့ ဘက်တီးရီးယားများ ရောက်ရှိလာနိုင်ကြောင်း တွေ့ရှိထားပါတယ်။

သာမန်လူတစ်ယောက်ဟာ ဆီးသွားရာမှာ ပျမ်းမျှအားဖြင့် ၂၁ စက္ကန့်ကြာတတ်ပြီး ဒါဟာ ဘက်တီးရီးယားသန်းပေါင်းများစွာ ကူးစက်နိုင်လောက်တဲ့အချိန်ဖြစ်ပါတယ်။
Source: Daily Mail.
#World_Health #YMG #Yangon_Media_Group