#Daily_News
Published_ 07 November 2023

၁။ ထိုင်းနိုင်ငံသို့ MOU အလုပ်သမားများ မြဝတီကျောက်လုံးကြီးစခန်းမှတစ်ဆင့် ပုံမှန်စေလွှတ်ပေးနေဟုဆို

၂။ ယခုနှစ်တန်ဆောင်မုန်းလပြည့်နေ့တွင် ထူးထူးခြားခြားဆေးပေါင်းခမည့်အချိန်(၂)ချိန်ရှိ

၃။ ကထိန်သင်္ကန်းပရိက္ခရာဈေးနှုန်းများ မြင့်တက်နေသော်လည်း နယ်အမှာများနေ

၄။ အစ္စရေးလ်-ဟားမတ်စ်ပဋိပက္ခကြောင့် အီဂျစ်တွင် လျှပ်စစ်ဓာတ်အားပြတ်တောက်မှုများ ပိုမိုဆိုးရွားလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

#World_News
Published 07 November 2023

ဂါဇာကမ်းမြောင်ဟာ ကလေးတွေရဲ့ သုသာန်ပြင်ကြီးတစ်ခု ဖြစ်လာကြောင်း ကုလသမဂ္ဂ အတွင်းရေးမှူးချုပ် အန်တိုနီယိုဂူတာရက်စ်က တနင်္လာနေ့က ဆိုလိုက်ကာ အပစ်အခတ်ရပ်စဲရေးအတွက် တောင်းဆိုမှုများ ပိုမိုပြုလုပ်လာပါတယ်။

အစ္စရေးလ်တို့ရဲ့ တိုက်ခိုက်မှုများကြောင့် ဂါဇာရှိ အသေအပျောက်စာရင်းက လူတစ်သောင်း ကျော်လာပြီဖြစ်တယ်လို့ ပါလက်စ်တိုင်း ကျန်းမာရေးအာဏာပိုင်များက ထုတ်ပြန်ကြေညာထားပါတယ်။

အစ္စရေးလ်ရော ဟားမတ်စ်စစ်သွေးကြွတွေကပါ နိုင်ငံတကာမှ အပစ်အခတ်ရပ်စဲရေးအတွက် ဖိအားပေးနေတာကို ပြန်လည်ငြင်းဆန်နေကြပါတယ်။

အောက်တိုဘာ ၇ ရက်နေ့ အစ္စရေးလ်တောင်ပိုင်းကို ဟားမတ်စ်တို့ ဝင်ရောက်သောင်းကျန်းခဲ့စဥ် ခေါ်ဆောင်သွားတဲ့ ဓားစာခံတွေကို အရင်လွှတ်ပေးသင့်တယ်လို့ အစ္စရေးလ်တို့က ဆိုနေကြကာ ဟားမတ်စ်တို့က ဂါဇာဒေသ တိုက်ခိုက်ခံနေရသရွေ့ ဓားစာခံတွေ ပြန်လွှတ်ပေးမှာ မဟုတ်သလို တိုက်ခိုက်တာတွေ ရပ်တန့်သွားမှာ မဟုတ်ဘူးလို့ ဆိုလိုက်ပါတယ်။

အစ္စရေးလ်ကာကွယ်ရေးတပ်များက မြေပြင်စစ်ဆင်ရေများ ပြုလုပ်နေပြီး ပစ်ခတ်တိုက်ခိုက်နေတာဟာ အရပ်သားတွေ၊ ဆေးရုံတွေ၊ ဒုက္ခသည်စခန်းတွေ၊ ဗလီကျောင်းတွေ၊ ဘုရားကျောင်းတွေ၊ ကုလသမဂ္ဂ အဆောက်အအုံတွေကို ထိခိုက်နေကာ ဘယ်သူမှ လုံခြုံမှုမရှိဘူးလို့ ဂူတာရက်စ်က သတင်းထောက်တွေကို ပြောကြားလိုက်ပါတယ်။

ဒါ့အပြင် ဟားမတ်စ်နဲ့ အခြားစစ်သွေးကြွများက အရပ်သားတွေကို လူသားဒိုင်းအဖြစ် အသုံးချနေပြီး စစ်တပ်နဲ့မခွဲခြားဘဲ အစ္စရေးလ်ဘက်ကို ဒုံးကျည်များ ဆက်လက်ပစ်ခတ်နေတယ်လို့ ဆိုလိုက်ကာ ဓားစာခံအားလုံးကို ခြွင်းချက်မရှိ ချက်ချင်းပြန်လွှတ်ပေးဖို့ တောင်းဆိုလိုက်ပါတယ်။

အစ္စရေးလ်တို့က အောက်တိုဘာ ၂၇ ရက်နေ့ ဂါဇာကို မြေပြင်စစ်ဆင်ရေး စတင်ချဲ့ထွင်တဲ့နေ့ကစပြီး တပ်သား ၃၁ ဦးသေဆုံးထားကြောင်း၊ ဟားမတ်စ်တို့က ဆေးရုံတွေထဲမှာ အရပ်သားတွေနဲ့ အတူ ပုန်းခိုနေကြကြောင်း စွပ်စွဲထားပါတယ်။

ဒီသတင်းဟာ အမှားသာဖြစ်ပြီး ကုလအနေနဲ့ အတည်ပြုစစ်ဆေးသင့်ကြောင်း ဟားမတ်စ်တို့က တုန့်ပြန်ပြောဆိုလိုက်ပါတယ်။

အစ္စရေးလ်ဘက်က ညတွင်းချင်း လေကြောင်း၊ ရေကြောင်း၊ မြေပြင်တို့ကနေ ပစ်ခတ်တိုက်ခိုက်တာဟာ အောက်တိုဘာ ၇ ရက်နေ့နောက်ပိုင်း အပြင်းထန်ဆုံးတိုက်ခိုက်မှု ဖြစ်ကြောင်း ဂါဇာရှိ ရိုက်တာသတင်းထောက်က ပြောပြသွားပါတယ်။

ဂါဇာမှာ အနည်းဆုံး လူ ၁၀,၀၂၂ ဦးသေဆုံးထားကာ ကလေး ၄,၁၀၄ ဦးပါဝင်ကြောင်း ဟားမတ်စ်အုပ်စိုးရာ ဂါဇာကမ်းမြောင်မှ ကျန်းမာရေးဝန်ကြီးဌာနက ထုတ်ပြန်လိုက်ပါတယ်။

‘’ဂါဇာဒေသဟာ ကလေးတွေအတွက် သုသာန်သင်္ချိုင်းမြေ ဖြစ်လာပါတယ်။ နေ့စဥ် ကလေးတွေ ရာနဲ့ချီပြီး ဒဏ်ရာရ သေဆုံးနေပါတယ်’’ လို့ ဂူတာရက်စ်က ပြောပါတယ်။

ဆေးရုံတွေဟာ ဒဏ်ရာရသူတွေကို လုံလောက်စွာ မကုသပေးနိုင်သလို ထောက်ပံ့ကူညီမှုတွေ မရဘဲ စားနပ်ရိက္ခာနဲ့ ရေရှားပါးနေကြောင်း၊ တိုက်ခိုက်နေတာတွေက ရက် ၃၀ လောက်ရှိနေပြီဖြစ်ကာ ရပ်တန်းကရပ်သင့်ပြီ ဖြစ်ကြောင်း နိုင်ငံတကာ အဖွဲ့အစည်းများက ဆိုပါတယ်။

အစ္စရေးလ်စစ်တပ်က ဟားမတ်စ်တို့ရဲ့ ခြံဝင်းကြီးတစ်ခုကို သိမ်းပိုက်လိုက်ကာ မြေအာက်လှိုဏ်ဂူတွေထဲမှာ ပုန်းခိုနေတဲ့ စစ်သွေးကြွများကို ဝိုင်းရံတိုက်ခိုက်ရန် ပြင်ဆင်နေကြပါတယ်။

#World_News #ဂါဇာကမ်းမြောင် #သုသာန်သင်္ချိုင်းမြေ #Source: Reuters

Published 07 November 2023

လူတွေရဲ့နေ့စဥ်ဘဝမှာ အကြောင်းအမျိုးမျိုးကြောင့် စိတ်ဖိစီးမှု ကြုံတွေ့ရစမြဲဖြစ်ပြီး သဘာဝအတိုင်း တုန့်ပြန်ဆောင်ရွက်တဲ့ သဘောဖြစ်ပါတယ်။

စပြီးတော့ ဖိစီးမှုဖြစ်တဲ့အခါ အက်ပီနက်ဖရင်းလို့ ခေါ်တဲ့ ဟော်မုန်းထွက်လာပြီး စားချင်စိတ်ကို လျော့ကျစေပါတယ်။

ဒါပေမဲ့ ဖိစီးမှုကြာရှည်လာရင်တော့ ကော်တီဆော်လ်တို့ ခေါ်တဲ့ ဟော်မုန်းထွက်လာကာ စားချင်စိတ်ကို ဖြစ်စေပါတယ်။

အချိုအအီပါတဲ့ စားစရာတွေ၊ ကယ်လိုရီများတဲ့ စားစရာတွေကို စားချင်လာပါတယ်။

ဒီစားစရာတွေက ဖိစီးမှုကို ခဏတာ ပြေလျော့စေပေမယ့် ကျန်းမာရေးနဲ့ မညီညွတ်တဲ့ အစားအစာတွေကို စားမိစေပါတယ်။

ဒါကြောင့် ဖိစီးမှုကို ရေရှည်ကြုံတွေ့လာရင်တော့ ကျန်းမာရေးကို ထိခိုက်လာစေပါတယ်။
 
(၁) အဝလွန်ခြင်း
ဖိစီးမှုများပြီး စားသုံးမိတဲ့အခါ ကယ်လိုရီများတာတွေကို စားမိပြီး ကိုယ်အလေးချိန် တက်လာစေတဲ့အပြင် နှလုံးသွေးကြောရောဂါများ၊ ဆီးချိုရောဂါတို့ကို ဖြစ်လာစေပါတယ်။
 
(၂) အသည်းအဆီဖုံးရောဂါ
ဖိစီးမှုများပြီး အဆီများတဲ့ အကြော်မုန့်တွေ စားမိတဲ့အခါ အသည်းထဲကဆဲလ်တွေမှာ အဆီတွေစုပုံလာပြီး အသည်းရဲ့အခြေအနေကို ပိုမိုဆိုးရွားစေပါတယ်။
 
(၃) အရက်ကြောင့်မဟုတ်သော အသည်းရောင်ရောဂါ (NASH)
အသည်းအဆီဖုံးရောဂါ ပိုမိုဆိုးရွားလာတဲ့အခါ NASH ဖြစ်လာနိုင်ပြီး အသည်းဆဲလ်များ ထိခိုက်ရောင်ရမ်းလာတာ ဖြစ်ပါတယ်။
 
(၄) အသည်းခြောက်ခြင်း
အခြားအသည်းပြဿနာတွေ ပိုဆိုးလာတဲ့အခါ အသည်းခြောက်ခြင်း ဖြစ်နိုင်ပါတယ်။
ကောင်းတဲ့ ဆဲလ်တွေနေရာမှာ အမာရွတ်တွေ ဖြစ်လာပြီး အသည်းလုပ်ဆောင်ချက်တွေကို ထိခိုက်စေပါတယ်။
 
ဒါကြောင့် လူတိုင်းဟာ စိတ်ဖိစီးမှုကို ဖြေရှင်းဖို့နဲ့ ကျန်းမာစွာ စားသောက်နေထိုင်ဖို့ အရေးကြီးကြောင်း သိရှိထားသင့်ပါတယ်။
Source: DoctorNDTV.
#World_Health
#Published_ 07 November 2023
#YMG #Yangon_Times #Yangon_Media_Group

Published 07 November 2023

အရေးမသာတဲ့ အခြေအနေတစ်ခုမှာ မလိုအပ်ဘဲ စွန့်စားမှုမလုပ်တဲ့ လုပ်ရပ်မျိုးကို လူသားတွေ ကျင့်ကြံကြတာဟာ သဘာဝဖြစ်ပါတယ်။

အိုင်ဗရီကို့စ်အနောက်တောင်ပိုင်း ထိုင်အမျိုးသားဥယျာဥ်ရှိ ချင်ပန်ဇီမျောက်များဟာလည်း ဒီလိုမျိုး လုပ်ဆောင်တတ်ကြပုံကို မြင်တွေ့ခဲ့ရပါတယ်။

အဆိုပါချင်ပန်ဇီ အသိုင်းအဝိုင်း ၂ ဖွဲ့ကို ၃ နှစ်ကြာအောင် နေ့စဥ်လှုပ်ရှားမှုများ လေ့လာခဲ့ရာမှာ စစ်ပွဲတွေမှာ မြင့်မားတဲ့နယ်ပယ် အသုံးချတဲ့နည်းဗျူဟာများ အသုံးပြုတာကို မှတ်တမ်းတင်နိုင်ခဲ့တယ်လို့ သုတေသီများက ကြာသပတေးနေ့မှာ ပြောပြခဲ့ပါတယ်။

ချင်ပန်ဇီတွေဟာ ရန်သူနယ်မြေထဲ ခိုးဝင်ခြင်းရှိမရှိ တောင်ကုန်းပေါ်မှ ထောက်လှမ်းရရှိတဲ့ အချက်အလက်များဖြင့် ထိပ်တိုက်တွေ့ဆုံနိုင်ခြေ နည်းတဲ့အချိန်မှာ ပိုမိုလုပ်ဆောင်ကြတယ်လို့ လေ့လာတွေ့ရှိပါတယ်။

ဒီလေ့လာမှုကနေ ချင်ပန်ဇီတွေဟာ လူသားတွေအသုံးပြုတဲ့ နည်းဗျူဟာများအတိုင်း လုပ်ဆောင်နိုင်တာကို ပထမဆုံးအကြိမ် တွေ့ရှိခဲ့တာ ဖြစ်ပါတယ်။

ရရှိလာတဲ့ သတင်းအချက်အလက်အရ ဘယ်အချိန် ဘယ်နေရာမှာ ဘေးကင်းစွာဘယ်လို လုပ်ဆောင်ရမလဲဆိုတဲ့ အသိဉာဏ်ရှိကြတာကို တွေ့မြင်ခဲ့ရကြောင်း ကိမ်းဘရစ်ချ်တက္ကသိုလ်မှ သုတေသနခေါင်းဆောင် ဆဲလ်ဗိန်းလီမွန်က ပြောပြသွားပါတယ်။

ချင်ပန်ဇီများကြား အုပ်စုတွင်းအကြမ်းဖက်မှုများ မကြာခဏရှိတတ်သလို နယ်မြေလုတာနဲ့ ပတ်သက်ပြီး မကြာမကြာ တိုက်ခိုက်နေတတ်ပါတယ်။

ချင်ပန်ဇီတွေဟာလည်း စားစရာရင်းမြစ်ခိုင်မာစေရန် နေရာလုကြကြောင်း၊ နယ်မြေကျယ်တဲ့အခါ အုပ်စုတွင်းရန်လိုမှု နည်းပါးသွားကြောင်း၊ အမတွေရဲ့ မျိုးပွားနှုန်းက ကျယ်ပြန့်နေရာတွေမှာ ပိုများကြောင်း ဖော်ပြထားပါတယ်။

စမ်းသပ်မှုမှာပါဝင်တဲ့ အဖွဲ့  ၂ ဖွဲ့မှာ အရေအတွက်အားဖြင့် အကောင် ၄၀ မှ ၄၅ အတွင်းရှိကြကာ အထီးတွေက ၅ ကောင်မှ ၆ ကောင်၊ အမတွေက ၁၀ ကောင်မှ ၁၃ ကောင်၊ ကျန်တာတွေက ဆယ်ကျော်သက်တွေ၊ မသန်မစွမ်းတွေ၊ ကလေးတွေ ဖြစ်ကြပါတယ်။

ချင်ပန်ဇီတွေက နယ်မြေအလွန်စိုးမိုးကြပြီး ပုံမှန်လှည့်လည် စောင့်ကြပ်ကြကာ အလွန်ပူးပေါင်းညီညွတ်တဲ့ နည်းလမ်းဖြင့် လှည့်လည်ကြတယ်လို့ သုတေသီက ပြောပြခဲ့ပါတယ်။

ချင်ပန်ဇီတွေနဲ့ ဘိုနိုဘိုတို့ဟာ လူသားတွေနဲ့ မျိုးရိုးဗီဇ အနီးကပ်ဆုံးဖြစ်ပြီး DNA ၉၈.၈ လောက်တူညီပါတယ်။

လူသားတွေနဲ့ ချင်ပန်ဇီတို့ရဲ့ မျိုးရိုးလမ်းကြောင်း ကွဲပြားသွားတာဟာ လွန်ခဲ့တဲ့ နှစ်သန်းပေါင်း ၆.၉ သန်းကနေ ၉ သန်းအတွင်းဖြစ်ပါတယ်။

ဒီလေ့လာမှုဟာ လူသားတွေရဲ့ မူလမျိုးစိတ်တွေရဲ့ ပြုမူနေထိုင်ပုံတွေကို ပိုမိုသိရှိစေတယ်လို့ ဆိုပါတယ်။

လူသားတွေနဲ့ အနီးစပ်ဆုံးမျိုးစိတ်တွေနဲ့ ဘယ်လောက်အထိ ကိုက်ညီမှုရှိကြောင်း၊ တောရိုင်းတိရိစ္ဆာန်တွေနဲ့ ဘယ်လောက်နီးစပ်ခဲ့ကြောင်း လေ့လာခွင့်ရတယ်လို့ ဆိုသွားပါတယ်။
Source: Reuters
#World_Science
#Published_ 07 November 2023
#YMG #Yangon_Times #Yangon_Media_Group

အစ္စရေးလ်နှင့် ပါလက်စ်တိုင်းတို့ တစ်နိုင်ငံနှင့်တစ်နိုင်ငံ လူ့အခွင့်အရေးများကို အပြန်အလှန်လေးစားသင့်ကြောင်း ညှိနှိင်းဖျန်ဖြေရေးမှူးဟောင်းအကြံပေး

ငြိမ်းချမ်းရေး ရရှိဖို့အတွက်ဆိုရင် အစ္စရေးလ်နဲ့ ပါလက်စ်တိုင်းတိုဟာ နှစ်ဖက်စလုံးမှ လူသားများတည်ရှိခြင်းနဲ့ လွတ်မြောက်ခြင်းဆိုင်ရာ ရပိုင်ခွင့်များကို အသိအမှတ်ပြုရန် လိုအပ်ကြောင်း အစ္စရေးလ်ဓားစာခံ ညှိနှိင်းရေးမှူးဟောင်းက ပြောပြသွားပါတယ်။
#World_News
#Published_ 06 November 2023
#YMG #Yangon_Times #Yangon_Media_Group

#Daily_News
Published_ 06 November 2023

၁။ ရှမ်းမြောက်တိုက်ပွဲကြောင့် လောက်ကိုင်တွင် အနယ်နယ်အရပ်ရပ်မှ ပြည်သူ သောင်းနှင့်ချီ ပိတ်မိနေဟုဆို

၂။ ယခုနှစ် လှည်းကူးတန်ဆောင်တိုင်ပွဲတော်တွင် နှစ်ကျိပ်ရှစ်ဆူဘုရား လှည့်လည်ပူဇော်ပွဲ ပြန်လည်ကျင်းပမည်

၃။ ပွင့်လင်းရာသီ ရောက်လာပြီ ဖြစ်သောကြောင့် သင်ဖြူးဖျာ အရောင်းအဝယ်သွက်လာ 

၄။ အစ္စရေးလ်နှင့် ပါလက်စ်တိုင်းတို့ တစ်နိုင်ငံနှင့်တစ်နိုင်ငံ လူ့အခွင့်အရေးများကို အပြန်အလှန်လေးစားသင့်ကြောင်း ညှိနှိုင်းဖျန်ဖြေရေးမှူးဟောင်း အကြံပေး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG